BTV NEWS

អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ

ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា

គណបក្សប្រជាជនកម្ពុជា បានទទួលសមាជិកថ្មីជិត១ ០០០នាក់ នៅសង្កាត់រការធំ ខេត្តកំពង់ស្ពឺ

ក្រសួងទេសចរណ៍បើកយុទ្ធនាការ ទស្សនាកម្ពុជានៅរដូវកាលបៃតងឆ្នាំ ២០២៦

ព័ត៌មានជាតិ

រដ្ឋបាលស្រុកអន្លង់វែង បង្កើនការដាំដុះក្នុងសួនកសិដ្ឋានជនភៀសសឹក ដើម្បីពង្រឹងភាពធន់ក្នុងសហគមន៍

ក្រោយពីមានការណែនាំដ៏ខ្ពង់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រដ្ឋបាលខេត្តឧត្តរមានជ័យបានជំរុញចលនាដាំដុះបន្លែនៅតាមជំរំដើម្បីផ្គត់ផ្គង់ដល់ជនភៀសសឹកប្រចាំថ្ងៃ ដោយនៅថ្ងៃទី១៧ ខែកុម្ភៈនេះ កសិដ្ឋានបន្លែជនភៀសសឹកស្រុកអន្លង់វែងជាង ១ហិចតា ចាប់ផ្តើមប្រមូលផល និងបន្តបណ្ដុះម្ទេស ១៥០០ដើមបន្ថែមទៀត ដើម្បីបំពេញតម្រូវការឱ្យកាន់តែសំបូរបែប។ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ បានថ្លែងអំណរគុណដល់ថ្នាក់ដឹកនាំស្រុក និងមន្ត្រីជំនាញពាក់ព័ន្ធទាំងអស់ដែលបានខិតខំប្រឹងប្រែងសម្រេចបានលទ្ធផលជាផ្លែផ្កាជូនដល់ប្រជាពលរដ្ឋយើង៕

ជប៉ុនផ្តល់ថវិកាជាង ៣១ម៉ឺនដុល្លារអាមេរិកសម្រាប់ការលើកកម្ពស់ប្រព័ន្ធថែទាំវះកាត់តាមសហគមន៍នៅក្នុងខេត្តក្រចេះ

រដ្ឋាភិបាលជប៉ុន នឹងផ្តល់ថវិកាសរុបចំនួន ៣១៦,៤៨៤ ដុល្លារអាមេរិក ដល់អង្គភាពទទួលជំនួយចំនួន មួយក្រោមគ្រោងការណ៍ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន។ កិច្ចសន្យាផ្តល់ជំនួយត្រូវបានចុះហត្ថលេខានៅថ្ងៃនេះដោយឯកឧត្តម អ៊ូអិណ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និង អ្នកតំណាងស្ថាប័នទទួលជំនួយសម្រាប់ អនុវត្តគម្រោងខាងក្រោម៖“គម្រោងពង្រឹង និងពង្រីកការថែទាំវះកាត់ នៅក្នុងតំបន់ភូមិភាគឦសាន្ត នៃប្រទេសកម្ពុជា” (ថវិកាចំនួន ៣១៦,៤៨៤ ដុល្លារអាមេរិក) ស្ថាប័នទទួលជំនួយ៖ អង្គការមូលនិធិសម្រាប់ការអភិវឌ្ឍ និងជំនួយសង្គ្រោះអន្តរជាតិ (FIDR)។ គម្រោងនេះមានគោលបំណងលើកកម្ពស់ប្រព័ន្ធថែទាំវះកាត់តាមសហគមន៍ នៅក្នុងខេត្តក្រចេះ ដែល អាចឱ្យអ្នកជំងឺទទួលបានការព្យាបាលវះកាត់ទាន់ពេលវេលា និងសមស្រប។ ចំនុចសំខាន់ៗរបស់គម្រោងរួម មានការពង្រឹងជំនាញរបស់បុគ្គលិកពេទ្យ ការជំរុញកិច្ចសហប្រតិបត្តិការក្នុងចំណោមកន្លែងថែទាំសុខភាពក្នុង ស្រុក និងការតម្លើងឧបករណ៍វះកាត់នៅមន្ទីរពេទ្យខេត្តក្រចេះ។ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជាតាំងពីឆ្នាំ២០០២ ដើម្បីគាំទ្រដល់សកម្មភាពរបស់អង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែង ដើម្បីជួយដល់ ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ ចាប់តាំងពីឆ្នាំ២០០២មក រដ្ឋាភិបាលជប៉ុនបានផ្តល់ថវិកាជាង ៦០លានដុល្លារអាមេរិក ដល់គម្រោងចំនួន ១៧០ ដែលផ្តោតសំខាន់ទៅលើវិស័យ អប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា៕

ប្រធានសមាគមអ្នកចិញ្ចឹមសត្វ៖ តម្រូវការផ្គត់ផ្គង់ជ្រូករស់ក្នុងឱកាសចូលឆ្នាំចិន-វៀតណាមនឹងហក់ឡើងដល់ ១,២ម៉ឺនក្បាលក្នុងមួយថ្ងៃ

នៅក្នុងរដូវបុណ្យចូលឆ្នាំថ្មីប្រពៃណីចិន-វៀតណាម ក្នុងឆ្នាំនេះ តម្រូវការផ្គត់ផ្គង់ជ្រូករស់លើទីផ្សារ នឹងហក់ឡើងពីប្រមាណ ១ម៉ឺនដល់ ១,២ពាន់ក្បាលក្នុងមួយថ្ងៃ កើនឡើងប្រមាណ ២០ភាគរយ ខណៈដែលតម្លៃសាច់ជ្រូកនៅលើទីផ្សារ នឹងអាចហក់ឡើងបន្តិចបន្ទូច បើធៀបទៅនិងថ្ងៃធម្មតា។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានថ្លែងប្រាប់ភ្នាក់ងារអ្នកយកព័ត៌មាន ស្តីពីការចិញ្ចឹម និងការផ្គត់ផ្គង់ជ្រូករស់ មាន់ និងការផ្គត់ផ្គង់សាច់នៅក្នុងឱកាសបុណ្យចូលឆ្នាំថ្មីប្រពីណៃចិន-វៀតណាម នេះថា ជុំវិញមុខរបរចិញ្ចឹមសត្វឃើញថា នៅក្នុងរយៈពេលប៉ុន្មានឆ្នាំចុងក្រោយនេះ ការចិញ្ចឹមជ្រូកមានការវិវត្តន៍រីកចម្រើនយ៉ាងខ្លាំង ក្នុងនោះក្រៅពីការចិញ្ចឹមជាលក្ខណៈគ្រួសារ កម្ពុជាក៏មានកសិដ្ឋានចិញ្ចឹមបែបឧស្សាហកម្មជាច្រើនកន្លែង ប្រកបដោយស្តង់ដារ ឆ្លើយតបដល់ការផ្គត់ផ្គង់ក្នុងស្រុក និងនាំចេញ។លោកបន្តថា ចំពោះការផ្គត់ជ្រូករស់ និងសាច់ជ្រូកលើទីផ្សារវិញឃើញថា នៅប៉ុន្មានឆ្នាំចុងក្រោយនេះ កម្ពុជាបានផ្គត់ផ្គង់តម្រូវ សាច់លើទីផ្សារ ជាពិសេសសាច់ជ្រូក និងមាន់ជាដើម បានឆ្លើយតបគ្រប់គ្រាន់ទៅនិងតម្រូវការទីផ្សារ គឺបានជំនួសការនាំចូលទាំងស្រុង ជាក់ស្តែងការផ្គត់ផ្គង់ជ្រូករស់ថ្ងៃធម្មតា មានតម្រូវការក្នុងរង្វង់ ៩ពាន់ទៅ ១ម៉ឺនក្បាល ដោយឡែកនៅក្នុងរដូវបុណ្យចូលឆ្នាំថ្មីប្រពៃណី ចិន និងវៀតណាម នៅក្នុងឆ្នាំ២០២៦ តម្រូវការជ្រូករស់អាចហក់ឡើងពី ១ ម៉ឺន ដល់ ១,២ ម៉ឺនក្បាល ចំណែកតម្លៃសាច់នៅលើទីផ្សារ អាចប្រែប្រួលបន្តិចបន្ទួច ស្របពេលតម្លៃមាន់កសិកម្ម លក់ទៅឱ្យឈ្មួញកណ្តាល (មាន់រស់) បានធ្លាក់ថ្លៃយ៉ាងគំហុក ដោយក្នុង១គីឡូ ក្រាម មានតម្លៃមិនដល់ ៤ ពាន់រៀលនោះឡើយ។ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ លើកឡើងឱ្យដឹងក្នុងពេលថ្មីៗនេះថា ក្នុងឆ្នាំ២០២៥, កម្ពុជាមានសត្វសរុបចំនួនជិត ៦៩ លានក្បាល ក្នុងនោះជ្រូកមានចំនួនជាង ៤,៦ លានក្បាល កើនឡើងជាង ១៤% ធៀបនឹងឆ្នាំ២០២៤ ចំណែកបក្សី មានចំនួនជិត ៦១ លានក្បាល ថយចុះ ១,៣% ធៀបនឹង ឆ្នាំ២០២៤។ ទន្ទឹមនឹងនេះ កម្ពុជាអាចផ្គត់ផ្គង់សាច់បានចំនួន ៩៨% ស្មើនឹង ៣៣១ ពាន់តោន ដែលតម្រូវការជាក់ស្តែងចំនួន ៣៣៨ ពាន់តោន។ តាមការគណនាតម្លៃសត្វ និងផលិតផលសត្វនេះ មានតម្លៃប្រមាណជា ១ ៨០៦ លានដុល្លារ ក្នុងនោះតម្លៃផលិតផលសត្វ នៅសត្តឃាតដ្ឋាន ប្រមាណជា ១ ៣៦០ លានដុល្លា ស៊ុតបក្សី និងទឹកដោះប្រមាណជា ២០៣ លានដុល្លារ និងបាននាំចេញសត្វ និង ផលិតផលសត្វបានប្រមាណជា ២៤៣ លានដុល្លារ៕ អត្ថបទ៖ សុន រ៉ាឌី

ក្រសួងការងារកំពុងបន្តផ្សព្វផ្សាយឱកាសការងារដល់ពលរដ្ឋនៅតាមខេត្ត ខណៈបានធ្វើជិត៦០០លើកហើយ

គិតត្រឹមពាក់កណ្តាលខែកុម្ភៈ ឆ្នាំ២០២៦នេះ ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ សរុបចំនួន ៥៩៣លើក ដោយបាននាំយកឱកាសការងារជាច្រើនកន្លែងផ្សព្វផ្សាយជូនដោយផ្ទាល់ដល់អតីតពលករត្រឡប់មកពីប្រទេសថៃ និងអ្នកស្វែងរកការងារធ្វើ ខណៈនៅឆ្នាំនេះក្រសួងកំពុងបន្តធ្វើយុទ្ធនាការផ្សព្វផ្សាយឱកាសការងារដល់ពលរដ្ឋនៅតាមមូដ្ឋានបណ្ដាខេត្តជាបន្តបន្ទាប់ទៀត។អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានឱ្យដឹងថា វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ត្រូវបានរៀបចំឡើងជារៀងរាល់ចុងសប្តាហ៍នៅទូទាំងប្រទេស ក្រោមប្រធានបទ «ខ្មែរជួយរកការងារឱ្យខ្មែរ ខ្មែរផ្តល់ការងារឱ្យខ្មែរ» ដែលជាយន្តការដ៏មានប្រសិទ្ធភាពក្នុងការផ្តល់ឱកាសការងារក្នុងស្រុកដល់អតីតពលករត្រឡប់មកពីប្រទេសថៃ អ្នកស្វែងរកការងារ ក៏ដូចជាយុវជនដែលត្រូវការរៀនជំនាញបច្ចេកទេស និងវិជ្ជាជីវៈ (TVET)។ក្នុងឱកាសចុះផ្សព្វផ្សាយការងារ និងអត្ថប្រយោជន៍ផ្សេងៗជូនដល់ប្រជាពលរដ្ឋ និងអតីតពលករនៅខេត្តក្រចេះ កាលពីសប្តាហ៍កន្លងទៅ ឯកឧត្តម ម៉ុល វិបុល អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា ការងារ គឺជាជីវិត ហើយការជ្រើសរើសការងារក្នុងស្រុក គឺជាជម្រើសដ៏ល្អបំផុត ដែលប្រកបដោយសុវត្ថិភាព សុខុមាលភាព ទទួលបានការគាំពារពីរាជរដ្ឋាភិបាល ការគោរពសិទ្ធិ ការទទួលបានអត្ថប្រយោជន៍ផ្សេងៗ គ្មានការរើសអើង បាននៅជិតក្រុមគ្រួសារ ងាយស្រួលធ្វើដំណើរទៅមកស្រុកកំណើតជាដើម ពោលគឺប្រសើរជាងការងារនៅក្រៅប្រទេសដែលទទួលប្រាក់ចំណូលប្រហាក់ប្រហែលគ្នា។ ឯកឧត្តម បានបន្តថា ក្រៅពីទទួលបានការងារធ្វើ កម្មករនិយោជិតនឹងក្លាយជាសមាជិក ប.ស.ស. ដែលទទួលបានអត្ថប្រយោជន៍សំខាន់ៗជាច្រើន ដូចជា ការពិនិត្យ និងព្យាបាលជំងឺនៅមន្ទីរពេទ្យដៃគូរបស់ ប.ស.ស. ដោយឥតគិតថ្លៃ ហើយប្រសិនបើមានគ្រោះថ្នាក់ការងារ ពលរដ្ឋដែលជាសមាជិក ប.ស.ស. នឹងទទួលបានការការពារ និងតាវកាលិក (អត្ថប្រយោជន៍) ពី ប.ស.ស.។ ម្យ៉ាងទៀត ក៏នឹងទទួលបានប្រាក់សោធននិវត្តន៍នៅពេលចាស់ជរា សម្រាប់ធានាប្រាក់ចំណូលដូចមន្ត្រីរាជការដែរ។ឯកឧត្តម ម៉ុល វិបុល ក៏បានលើកទឹកចិត្តឱ្យយុវជនចុះឈ្មោះចូលរៀនវគ្គបណ្ដុះបណ្ដាលបច្ចេកទេស និងវិជ្ជាជីវៈ (TVET 1.5M) ដែលជាការយកចិត្តទុកដាក់ដ៏ខ្ពង់ខ្ពស់របស់សម្ដេចនាយករដ្ឋមន្ត្រី ហ៊ុន ម៉ាណែត ក្នុងគោលដៅកសាងសេដ្ឋកិច្ចគ្រួសាររបស់ប្រជាពលរដ្ឋឱ្យកាន់តែរឹងមាំ។ បន្ថែមពីលើនេះ គឺដើម្បីជួយបង្កើនសមត្ថភាពក្នុងរយៈពេលខ្លី និងងាយស្រួលទទួលបានឱកាសការងារ ជាមួយនឹងប្រាក់ចំណូលសមរម្យនាពេលអនាគត។ ក្រសួងការងារ និងបណ្តុះបណ្តាលវិជ្ជាជីវៈ បានបន្តអំពាវនាវដល់ប្រជាពលរដ្ឋទាំងអស់ដែលមានបំណងចង់ស្វែងរកការងារ ជាពិសេសអតីតពលករដែលខកខានមិនបានចូលរួមវេទិកាការងារ អាចទំនាក់ទំនងទៅកាន់លេខ ១២៩៧ ដែលមានមន្ត្រីក្រសួងការងារនៅរងចាំទទួលទូរសព្ទ ៧ថ្ងៃក្នុងមួយសប្ដាហ៍ ដើម្បីផ្ដល់ជូននូវឱកាសការងារ និងការបណ្ដុះបណ្ដាលជំនាញបច្ចេកទេស និងវិជ្ជាជីវៈ ដោយឥតគិតថ្លៃ៕ អត្ថបទ៖ ឈិត បូរ៉ាវី

អាជ្ញាធរខេត្តសៀមរាបជំរុញពលរដ្ឋដាំបន្លែតាមផ្ទះ ដើម្បីជួយសម្រួលជីវភាព កាត់បន្ថយធ្វើចំណាកស្រុក

អាជ្ញាធរស្រុកប្រាសាទបាគង បានអំពាវនាវដល់ប្រជាពលរដ្ឋឱ្យដាំបន្លែតាមផ្ទះឱ្យបានច្រើន ដើម្បី ជួយសម្រួលជីវភាព និងកាត់បន្ថយការធ្វើចំណាកស្រុក ខណៈដែលបន្លែគ្រប់ប្រភេទមានទីផ្សារល្អ និងជាគំរូដ៏ល្អក្នុងការបង្កើត «សហគមន៍បៃតង» នៅតាមភូមិ សាលារៀន និងវត្ដអារាម។លោក សូរ ប្លាតុង អភិបាលស្រុកប្រាសាទបាគង ខេត្ដសៀមរាប បានមានប្រសាសន៍ថា ការដាំបន្លែជាមុខរបរដ៏សំខាន់មួយបន្ទាប់ពីដំណាំស្រូវ ដែលកសិករមួយចំនួនក្នុងបណ្តាខេត្តនៃប្រទេសកម្ពុជាកំពុងតែពេញនិយមធ្វើការដាំដុះ ដើម្បីបង្កើនសេដ្ឋកិច្ចគ្រួសារ។លោកបន្ដថា ការដាំបន្លែជាលក្ខណៈគ្រួសារ ទទួលបានបន្លែសុវត្ថិភាពសម្រាប់ទទួលទានក្នុងគ្រួសារមានសុខភាពល្អ។ នៅរដូវប្រាំងនេះ ប្រជាពលរដ្ឋ ត្រូវប្រើប្រាស់ដីនៅជុំវិញផ្ទះឱ្យអស់លទ្ធភាពរបស់តាមរយៈ ការដាំដុះគ្រប់ប្រភេទ ខណៈដែលការដាំបន្លែជាលក្ខណៈគ្រួសារ គឺជាសកម្មភាពកសិកម្មដ៏សំខាន់ ដែល ជួយឱ្យពលរដ្ឋកម្ពុជាទទួលបានបន្លែសុវត្ថិភាពសម្រាប់ហូបចុកកាត់បន្ថយការចំណាយ និងបង្កើតចំណូលបន្ថែម ជាពិសេស កាត់បន្ថយការធ្វើចំណាកស្រុក។ លោកបន្ដថា តាមរយៈការដាំដុះចម្រុះ និងការប្រើប្រាស់ដីធ្លីឱ្យអស់លទ្ធភាពតាមរយៈការកែច្នៃទីធ្លាមុខផ្ទះ និងចំហៀងផ្ទះ ដែលសល់ដីទំនេរចោល មិនត្រឹមតែអាចធ្វើកសិកម្មដាំដុះបន្លែច្រើនមុខសម្រាប់ទុកលក់រកចំណូលបន្ថែមប៉ុណ្ណោះទេ ប៉ុន្តែក៏បានជួយឱ្យគាត់អាចទុកបរិភោគបន្លែធម្មជាតិក្នុងក្រុមគ្រួសារថែមទៀត។បើតាមលោក សូរ ប្លាតុង ការដាំត្រឹមតែរយៈពេលមួយខែ ដូចបន្លែ ស្ពៃ ត្រកួន ស្ពៃចង្កឹះ ស្ពៃតឿ ស្ពៃក្រញាញ់ សណ្តែ អាចទទួលផល ។លោក សាយ តុម ប្រធាននាយកដ្ឋានសាកវប្បកម្ម និងដំណាំរួមផ្សំ នៃក្រសួងកសិកម្មរុក្ខាប្រមាញ់ និងនេសាទ មានប្រសាសន៍ថា សកម្មភាពដាំដុះនេះ គឺជាការចូលរួមយ៉ាងសកម្មក្នុងការអនុវត្តតាមការផ្ដួចផ្ដើម និងបំផុសចលនារបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលជានិច្ចកាលតែងតែជំរុញឱ្យមានការដាំដុះបន្លែតាមផ្ទះ សាលារៀន វត្តអារាម និងសហគមន៍។ ចលនានេះ គឺដើម្បីបង្កើនភាពម្ចាស់ការ កាត់បន្ថយការចំណាយ និងពឹងផ្អែកលើទីផ្សារខាងក្រៅ, ធានាសន្តិសុខស្បៀង បង្កើនបរិមាណបន្លែសុវត្ថិភាព សម្រាប់ប្រើប្រាស់ក្នុងសហគមន៍ ជាពិសេស ការលើកកម្ពស់សុខុមាលភាព តាមរយៈទទួលបានបន្លែស្រស់ៗ និងមានជីវជាតិសម្រាប់ការហូបចុកផង និងជាគំរូដ៏ល្អក្នុងការបង្កើត "សហគមន៍បៃតង"នៅតាមភូមិ និងនៅតាមវត្តអារាម៕

សង្គមស៊ីវិល និងបក្សនយោបាយមានសុទិដ្ឋិនិយមថា ទស្សនកិច្ចសម្តេចធិបតីនៅអាមេរិក និងអឺរ៉ុប បានពង្រីកមុខមាត់កម្ពុជាលើឆាកអន្តរជាតិ និងទាញប្រយោជន៍សេដ្ឋកិច្ចសម្រាប់ជាតិ

អង្គការសង្គមស៊ីវិល និងគណបក្សនយោបាយបានបង្ហាញសុទិដ្ឋិនិយមថា ដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញទៅចូលរួមកិច្ចប្រជុំដំបូង នៃក្រុមប្រឹក្សាសន្តិភាព ដែលនឹងប្រ ព្រឹត្តទៅនៅថ្ងៃទី១៩ ខែកុម្ភៈ ឆ្នាំ២០២៦ និងទស្សនកិច្ចនៅអឺរ៉ុប នឹងជួយពង្រីកមុខមាត់កម្ពុជាលើឆាកអន្តរជាតិ និងទាក់ទាញប្រយោជន៍សេដ្ឋកិច្ច។លោក រ៉ែន អាទិត្យសិលវតា អនុប្រធានសហភាពអង្គការសង្គមស៊ីវិល បានលើកឡើងថា ចំពោះដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញទៅចូលរួមកិច្ចប្រជុំដំបូងនៃក្រុមប្រឹក្សាសន្តិភាព និងទស្សនកិច្ចនៅអឺរ៉ុប គឺមានសារសំខាន់សម្រាប់ប្រទេសកម្ពុជាដែលផ្តោតលើ រឿងពីរធំៗ ទី១. សន្តិ ភាព និងទី២. កត្តាសេដ្ឋកិច្ច។ ហើយប្រមុខដឹកនាំរាជរដ្ឋាភិបាលកម្ពុជា កំពុងតែគិត គូរជាចាំបាច់ទៅលើកត្តាការ ពារឲ្យបាននូវសន្តិភាព។ឯកឧត្តម អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ បានថ្លែងថា ដំណើរទស្សនកិច្ចរបស់សម្តេចធិបតីទៅចូលរួមកិច្ចប្រជុំដំបូង នៃក្រុមប្រឹក្សាសន្តិភាព គឺជាប្រវត្តិសាស្ត្រមួយរបស់កម្ពុជា។ ដូច្នេះដំណើរ ទស្សនកិច្ចនេះ គឺទទួលបាននៅផលចំណេញពីរ ទី១. ការពង្រឹងចំណងមិត្តភាព ការទំនាក់ទំនងផ្នែកការទូត និងនិយោបាយជាមួយប្រទេសមហាអំណាច និងប្រទេសនៅតំបន់អឺរ៉ុប និងទី២. ការសហការផ្នែកសេដ្ឋកិច្ច គឺទាក់ទាញការវិនិយោគចូលមកក្នុងប្រទេសកម្ពុជា បង្កើនចំណងមិត្តភាព ការទូត និងនយោបាយ។សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានដឹកនាំគណៈប្រតិភូជាន់ខ្ពស់កម្ពុជា ចាកចេញពីប្រទេសកម្ពុជាហើយ កាលពីយប់ថ្ងៃទី១៥ ខែកុម្ភៈ ឆ្នាំ២០២៦ ទៅចូលរួមកិច្ចប្រជុំដំបូងនៃក្រុមប្រឹក្សាសន្តិភាព ដែលនឹងប្រព្រឹត្តទៅនៅថ្ងៃទី១៩ ខែកុម្ភៈ ឆ្នាំ២០២៦ នៅសហរដ្ឋអាម៉េរិក៕ អត្ថបទ៖ វង្ស សុភាព

ពលរដ្ឋជឿជាក់ថា ដំណើរទស្សនកិច្ចសម្តេចធិបតីនៅអាមេរិក និងអឺរ៉ុប គឺជាស្ពានឆ្ពោះទៅដោះស្រាយជម្លោះព្រំដែនកម្ពុជា-ថៃ ដោយសន្តិវិធី

ពលរដ្ឋខ្មែរកំពុងរស់នៅបរទេសជឿជាក់ថា ដំណើរទស្សកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជានៅអាម៉េរិក និងអឺរ៉ុប នឹងធ្វើពិភពលោកកាន់តែចាប់អារម្មណ៍ជម្លោះព្រំដែនកម្ពុជា-ថៃ ដែលអាចជួយបញ្ចេញសំឡេងអន្តរាគមន៍ដោះស្រាយជម្លោះនេះដោយសន្តិវិធី ដែលកម្ពុជាប្រាថ្នាចង់បាន។តាមរយៈវីឌីអូឃ្លីបដែលBTVទទួលបាននៅថ្ងៃទី១៧ខែកុម្ភៈនេះ លោក ហ៊ន វណ្ណនាដ ពលរដ្ឋខ្មែរកំពុងរស់នៅសហរដ្ឋអាម៉េរិកបានលើកឡើងថា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា អញ្ជើញចូលរួមក្នុង កិច្ចប្រជុំក្រុមប្រឹក្សាសន្តិភាពនៅសហរដ្ឋអាម៉េរិក គឺជាការលើកស្ទួយកិត្តិយសប្រទេសកម្ពុជានៅលើឆាកអន្តរជាតិ ជាពិសេសនឹងធ្វើឲ្យថ្នាក់ដឹកនាំពិភពលោកចាប់អារម្មណ៍ជម្លោះព្រំដែនកម្ពុជា-ថៃ ដែលប្រទេសថៃបានឈ្លានពានប្រទេសកម្ពុជា។លោក ដាំ ភិរម្យ ពលរដ្ឋខ្មែរកំពុងរស់នៅប្រទេសកាណាដា បានលើកឡើងដែរថា តាមរយៈកិច្ចប្រជុំនេះលោកមានជំនឿយ៉ាងមុតមាំលើការដឹកនាំប្រកបដោយឆន្ទៈ ទស្សនៈវិស័យ និងការទទួលខុសត្រូវរបស់សម្តេច ធិបតី ក្នុងការបន្តថែរក្សាសន្តិភាព ស្ថិរភាព និងការដោះស្រាយជម្លោះព្រំដែនកម្ពុជា-ថៃ ដោយសន្តិវិធី។គួរបញ្ជាក់ដែរថា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដឹកនាំគណៈប្រតិភូរាជរដ្ឋាភិបាលកម្ពុជាចូលកិច្ចប្រជុំក្រុមប្រឹក្សាសន្តិភាព (Board of Peace) នៅរដ្ឋធានីវ៉ាស៊ីនតោន សហរដ្ឋអាម៉េរិក និងទស្សនកិច្ចការងារ នៅទីក្រុងហ្សឺណែវ ប្រទេសស្វីស និងទីក្រុងព្រុចសែល ប្រទេសបែលហ្សិក ពីថ្ងៃទី១៥-២៧ ខែកុម្ភៈ ឆ្នាំ២០២៦៕ អត្ថបទ៖ទូច សោភ័ណ

ពលរដ្ឋជាប់សែចិនកុះករនាំគ្នាបួងសួងសុំលាភជ័យ និងសុខសន្តិភាពនៅវិហារអ្នកតាចិនក្រុងតាខ្មៅ

នៅថ្ងៃទី១៧ខែកុម្ភៈនេះ ពលរដ្ឋខ្មែរជាប់សែស្រឡាយចិន បន្តនាំគ្នាទៅវិហារអ្នកតាចិន នៅក្នុងក្រុងតាខ្មៅ ខេត្តកណ្តាល ដើម្បីបួងសួង សុំលាភ សុំជ័យ សេចក្តីសុខក្នុងគ្រួសារ និងប្រទេសជាតិមានសុខសន្តិភាព រីកចម្រើនរៀងរហូត។ពលរដ្ឋចាស់ក្មេង បានថ្លែងថា រៀងរាល់ឆ្នាំគេតែងជំនឿជឿជាក់ខ្លាំង និងនាំគ្នាមកវិហារអ្នកតាចិន នៅក្រុងតាខ្មៅ ដោយមានការទិញដើមអំពៅ ផ្លែទទឹម ក្រូច ធូបទៀន និងគ្រឿងសែននានា យកទៅសែនព្រេន សុំសេចក្តីសុខ ហេងលាភ មានជ័យ កាត់គ្រោះចង្រៃផ្សេងៗ ហើយតាមរយៈការបួងសួងនេះដែរ គេក៏បានបួងសួងប្រទេសជាតិ មានសុខសន្តិភាព ស្ថេរភាព រីកចម្រើន មានទេសចរអន្តរជាតិ និងអ្នកវិនិយោគមកកម្ពុជាកាន់តែច្រើនផងដែរ។សូមបញ្ជាក់ថា ឆ្នាំនេះ ក៏ដូចឆ្នាំកន្លងមក កូនខ្មែរកាត់សែស្រឡាយចិនតែងនាំគ្នា សម្រុកចូលមកវិហារអ្នកតាចិន ស្ថិតនៅក្រុងតាខ្មៅ ខេត្តកណ្ដាល ច្រើនហូរហែរ ចូលទៅអុជធូប ធ្វើពិធីសែនព្រេងស្ទើរគ្រប់រយៈពេល២៤ម៉ោង ក្នុងរយៈពេល៤ថ្ងៃ នៃពិធីសែន និងបុណ្យចូលឆ្នាំថ្មីប្រពៃណីចិន ដើម្បីសុំសេចក្តីសុខពីអ្នកតាចិនយកហេងលាភ មានជ័យ និងយកយ័ន្ត យកដើមអំពៅនោះទៅដាំនៅក្នុងផ្ទះ ហើយផ្លែទទឹមទៅដាក់នៅក្នុងផ្ទះដើម្បីសេចក្តីសុខ រកទទួលទានមានបាន តាមអបិយជំនឿរបស់អ្នកកាត់ខ្សែស្រឡាយចិន៕ អត្ថបទ៖ ស៊ុម សុខជា

អ្នកនាំពាក្យ៖ រាជរដ្ឋាភិបាលកំពុងយកចិត្តទុកដាក់យ៉ាងខ្លាំង ចំពោះពលរដ្ឋភៀសសឹកដែលមិនទាន់អាចទៅផ្ទះវិញបាន

រាជរដ្ឋាភិបាលកំពុងយកចិត្តទុកដាក់យ៉ាងខ្លាំងចំពោះប្រជាពលរដ្ឋភៀសសឹក ដែលមិនទាន់អាចទៅផ្ទះសំបែងវិញបាន ក្នុងនោះក្រុមការងាររាជរដ្ឋាភិបាល កំពុងបញ្ចុះបឋមសិលាដើម្បីចាប់ផ្តើមសាងសង់ជម្រកបណ្តោះអាសន្នជូនប្រជាពលរដ្ឋភៀសសឹកបានប្រព្រឹត្តទៅជាបន្តបន្ទាប់ប៉ុន្មានថ្ងៃចុងក្រោយនេះក្នុងបណ្តាខេត្តមួយចំនួនតាមជាយដែន ក្រោយពីក្រសួងរៀបចំដែនដី នគរូបនីយកម្ម និងសំណង់បានកំណត់ទីតាំងនិងសិក្សារួចរាល់។ នេះបើតាមអ្នកនាំពាក្យរាជរដ្ឋាភិបាលកម្ពុជា។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា ថ្លែងតាមរយៈសន្និសីទសារព័ត៌មាននៅថ្ងៃទី១៧ ខែកុម្ភៈ ឆ្នាំ២០២៦នេះថា ដូចការគ្រោងទុក ពិធីបញ្ចុះបឋមសិលាដើម្បីចាប់ផ្តើមសាងសង់ជម្រកបណ្តោះអាសន្នជូនប្រជាពលរដ្ឋភៀសសឹកបានប្រព្រឹត្តទៅជាបន្តបន្ទាប់ប៉ុន្មានថ្ងៃចុងក្រោយនេះក្នុងបណ្តាខេត្តមួយចំនួនតាមជាយដែន ក្រោយពីក្រសួងរៀបចំដែនដី នគរូបនីយកម្ម និងសំណង់បានកំណត់ទីតាំងនិងសិក្សារួចរាល់។ ការរៀបចំជម្រកបណ្តោះអាសន្នជូនប្រជាពលរដ្ឋភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបានគឺជាការគិតគូរប្រកបដោយការទទួលខុសត្រូវខ្ពស់របស់រាជរដ្ឋាភិបាលដើម្បីឱ្យពួកគេមានកន្លែងស្នាក់នៅសមរម្យ ដោយគិតគូរទាំងសុវត្ថិភាព ទាំងបរិស្ថាន និងសុខុមាលភាព ទម្រាំដល់ពេលដែលពួកគេអាចវិលត្រឡប់ទៅកាន់ផ្ទះសម្បែងវិញនាពេលខាងមុខ។ឯកឧត្តមបន្តថា ក្រៅពីផ្តល់ជូនជម្រកបណ្តោះអាសន្ន រាជរដ្ឋាភិបាលក៏ផ្តល់ជូនបងប្អូនជនភៀសសឹកទាំងនោះនូវដំណោះស្រាយសមរម្យមួយទៅតាមស្ថានភាពជាក់ស្តែងដើម្បីរក្សាលំនឹងជីវភាពប្រចាំថ្ងៃក្នុងអំឡុងពេលដ៏លំបាកនេះ ខណៈដែលរាជរដ្ឋាភិបាលបាននិងកំពុងធ្វើការងារការទូតយ៉ាងសកម្មដើម្បីការពារអធិបតេយ្យភាព និងបូរណភាពទឹកដី ក៏ដូចជាការពារសិទ្ធិប្រជាពលរដ្ឋដែលត្រូវបានរារាំងដោយកងកម្លាំងប្រដាប់អាវុធថៃមិនឱ្យវិលត្រឡប់ទៅផ្ទះសម្បែងវិញ។ គិតមកទល់នឹងពេលនេះ នៅសល់ពលរដ្ឋភៀសសឹកចំនួនជាង៧ម៉ឺននាក់ទៀតនៅមិនទាន់អាចវិលត្រឡប់ទៅកាន់ផ្ទះសម្បែងវិញបាននៅឡើយក្នុងចំណោមជនភៀសសឹកសរុបជាង៦៤ម៉ឺននាក់។ ឯកឧត្តម អ្នកនាំពាក្យរាជរដ្ឋាភិបាលបានបញ្ជាក់ថា ការផ្តល់ជម្រកបណ្តោះអាសន្នជូនបងប្អូនជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន មិនមែនមានន័យថា រាជរដ្ឋាភិបាលបោះបង់សិទ្ធិទាមទារទឹកដីដែលកងកម្លាំងថៃកំពុងកាន់កាប់ដោយខុសច្បាប់នោះឡើយ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ជំហរយ៉ាងម៉ឺងម៉ាត់ចំពោះមុខប្រជាពលរដ្ឋរួចហើយថា រាជរដ្ឋាភិបាលដាច់ខាតមិនបោះបង់សិទ្ធិទាមទារទឹកដីក្នុងដែនអធិបតេយ្យស្របច្បាប់របស់កម្ពុជានោះឡើយ ហើយ រាជរដ្ឋាភិបាលបាននិងកំពុងធ្វើការងារយ៉ាងសកម្មនិងម៉ឺងម៉ាត់បំផុតដើម្បីឈានទៅរកដំណោះស្រាយបញ្ហាព្រំដែនដោយសន្តិវិធីតាមយន្តការដែលភាគីទាំងពីរបានឯកភាពគ្នា និងដោយអនុលោមតាម អនុសញ្ញា សន្ធិសញ្ញា និងច្បាប់អន្តរជាតិជាធរមាន។ ឯកឧត្តមបន្តថា ជាក់ស្តែង រាជរដ្ឋាភិបាល តាមរយៈក្រសួង ស្ថាប័ន នានាជាសេនាធិការ បានតវ៉ាជំទាស់យ៉ាងខ្លាំងក្លានិងជាផ្លូវការនូវរាល់ការរំលោភបំពានទាំងឡាយមកលើដែនអធិបតេយ្យភាព និងបូរណភាពទឹកដីកម្ពុជា ពីសំណាក់កងកម្លាំងប្រដាប់អាវុធថៃ ដែលធ្វើឱ្យមានការកែប្រែនូវបរិយាកាសសន្តិសុខនៅក្នុង ឬជុំវិញតំបន់ជនស៊ីវិល ការពង្រឹងការគ្រប់គ្រងយោធា ឬការបង្កើតស្ថានភាពថ្មីនៅលើទីតាំងជាក់ស្តែង ក៏ដូចជាការរារាំងជនស៊ីវិលមិនឱ្យវិលត្រឡប់ទៅកាន់ផ្ទះសំបែងរបស់ពួកគេវិញបាន។ ការតវ៉ាទាំង នេះគឺជាភស្តុតាងបញ្ជាក់ពីការប្រើសិទ្ធិស្របច្បាប់របស់កម្ពុជា ក្នុងការការពារបូរណភាពទឹកដីក៏ដូចជាការពារសិទ្ធិ និងសេចក្តីថ្លៃថ្នូររបស់ប្រជាពលរដ្ឋ ប្រឆាំងនឹងការរំលោភបំពាន។ រាជរដ្ឋាភិបាលចាត់ទុកការការពារទឹកដីនិងប្រជាជនជាអាទិភាពខ្ពស់បំផុតរបស់ខ្លួន។ ក្នុងឱកាសអញ្ជើញចុះជួបសំណេះសំណាលនិងសួរសុខទុក្ខប្រជាពលរដ្ឋភៀសសឹកនាពេលថ្មីៗនេះ សម្តេចបវរធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលបានគិតគូរដោយយកចិត្តទុកដាក់បំផុតចំពោះប្រជាពលរដ្ឋភៀសសឹក ទាំងពលរដ្ឋភៀសសឹកដែលអាចត្រឡប់ទៅលំនៅឋានវិញបាន ទាំងពលរដ្ឋភៀសសឹកដែលមិនទាន់អាចត្រឡប់ទៅលំនៅឋានវិញបាននៅឡើយនិងការស្តារឡើងវិញនូវហេដ្ឋានរចនាសម្ព័ន្ធដែលខូចខាត។សម្រាប់ពលរដ្ឋភៀសសឹកដែលអាចវិលត្រឡប់ទៅលំនៅឋានវិញបាន ក្រសួងស្ថាប័នពាក់ព័ន្ធ និងអាជ្ញាធរមូលដ្ឋាន បាននិងកំពុងខ្នះខ្នែងរៀបចំសម្របសម្រួលឱ្យពួកគេអាចវិលត្រឡប់ទៅលំនៅឋានវិញឱ្យបានឆាប់តាមដែលអាចធ្វើទៅបានដោយធានាសុវត្ថិភាពតាមរយៈការបោសសំអាតអាវុធយុទ្ធភ័ណ្ឌមិនទាន់ផ្ទុះនៅតាមទីតាំងទាំងនោះ ក៏ដូចជាជួយសម្រួលជីវភាពរបស់ពួកគេតាមរយៈការដោះស្រាយតម្រូវការចាំបាច់នានាដែលពួកគេត្រូវការ។ជាមួយគ្នានោះ រាជរដ្ឋាភិបាលក៏បានបង្កើតគណៈកម្មការចំពោះកិច្ចមួយដើម្បីសិក្សាអំពីផលប៉ះពាល់ឱ្យបានជាក់លាក់ដើម្បីចេញវិធានការអន្តរាគមន៍ឱ្យមានប្រសិទ្ធភាព។ ចំពោះហេដ្ឋារចនាសម្ព័ន្ធដែលបានរងការខូចខាត មានជាអាទិ៍សាលារៀន មណ្ឌលសុខភាព មន្ទីរពេទ្យបង្អែក ផ្សារ ផ្លូវ ស្ពាន បណ្តាញទឹកស្អាត អគ្គិសនី និងទូរគមនាគមន៍ជាដើម រាជរដ្ឋាភិបាលនឹងស្តារឡើងវិញឱ្យបានឆាប់បំផុតតាមស្ថានភាពជាក់ស្តែង នៅក្រោយពេលដែលក្រុមការងារចំពោះកិច្ចសិក្សារួចរាល់។ ទន្ទឹមនឹងនោះ ការការពារបូរណភាពទឹកដីក្នុងដែនអធិបតេយ្យស្របច្បាប់របស់កម្ពុជាក៏ត្រូវបានធ្វើឡើងដំណាលគ្នានិងយ៉ាងម៉ឺងម៉ាត់បំផុត។អ្នកនាំពាក្យរាជរដ្ឋាភិបាលគូសបញ្ជាក់ជាថ្មីថា កម្ពុជាប្រកាន់ជំហរដាច់ខាតក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ(Uti Possidetis Juris)គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង៕

កម្ពុជាបន្តបណ្ដេញចេញជនបរទេសចំនួន ១,០៨៩ នាក់ ពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់

ភ្នំពេញ៖ នៅថ្ងៃទី១៤ ១៥ ១៦ខែកុម្ភៈ ឆ្នាំ២០២៦ កម្ពុជា បានបណ្ដេញចេញជនបរទេសចំនួន ១,០៨៩ នាក់ ពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់។ នេះបើតាមការបញ្ជាក់របស់អគ្គនាយកអន្តោប្រវេសន៍នៃក្រសួងមហាផ្ទៃ។អគ្គនាយកអន្តោប្រវេសន៍ បានឱ្យដឹងនៅថ្ងៃទី១៧ ខែកុម្ភៈ ឆ្នាំ២០២៦នេះថា ដោយអនុវត្តតាមអនុសាសន៍ដ៏ខ្ពង់ខ្ពស់ របស់ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី បន្តធ្វើការបណ្តេញជនបរទេសសរុបចំនួន ១០៨៩នាក់ (ស្រី ៥៧នាក់) មាន ១៤សញ្ជាតិ រួមមាន ចិន យ៉ូហ្គង់ដា ម៉ាឡេស៊ី ឥណ្ឌូនេស៊ី ប៉ាគីស្ថាន កូរ៉េ វៀតណាម ចិនតៃវ៉ាន់ ហ្វីលីពីន នីហ្សេរីយ៉ា ឥណ្ឌា បង់ក្លាដេស កេនយ៉ា និងនេប៉ាល់ ត្រូវបានបណ្ដេញចេញតាមប៉ុស្តិ៍នគរបាលច្រកទ្វារអាកាសអន្តរជាតិតេជោ និងជនជាតិវៀតណាមបណ្ដេញចេញតាមប៉ុស្តិ៍នគរបាលច្រកទ្វារអន្តរជាតិព្រែកចាក ជនបរទេសទាំងអស់នេះពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ លេងល្បែងស៊ីសងតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់នៅកម្ពុជា។អគ្គនាយកអន្តោប្រវេសន៍ បានបញ្ជាក់ថា ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល នៃកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត

ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក

មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក

ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់

ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់

លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត

មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា

សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

រដ្ឋបាលស្រុកអន្លង់វែង បង្កើនការដាំដុះក្នុងសួនកសិដ្ឋានជនភៀសសឹក ដើម្បីពង្រឹងភាពធន់ក្នុងសហគមន៍

ក្រសួងការងារកំពុងបន្តផ្សព្វផ្សាយឱកាសការងារដល់ពលរដ្ឋនៅតាមខេត្ត ខណៈ​បាន​ធ្វើ​ជិត​៦០០​លើក​ហើយ

អាជ្ញាធរខេត្តសៀមរាបជំរុញពលរដ្ឋដាំបន្លែតាមផ្ទះ ដើម្បីជួយសម្រួលជីវភាព កាត់​បន្ថយ​ធ្វើ​ចំណាក​ស្រុក

ពលរដ្ឋជាប់សែចិនកុះករនាំគ្នាបួងសួងសុំលាភជ័យ និងសុខសន្តិភាព​នៅ​វិហារ​អ្នកតាចិន​ក្រុងតាខ្មៅ