នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
លោកជំទាវបណ្ឌិត ពេជ ចន្ទមុន្នី៖ ការបន្តបរិច្ចាគដល់កាកបាទក្រហមកម្ពុជា បង្ហាញ​ពី​ការ​មិន​បោះ​បង់​ជន​រងគ្រោះ
សម្តេចតេជោ ផ្តាំទៅភាគីថៃថា កុំបបួលកម្ពុជារៀបចំយន្តការទ្វេភាគីថ្មីជំនួសយន្តការទ្វេភាគីចាស់ ដែលថៃលុបចោលជាឯកតោភាគីទៀតឱ្យសោះ
ពន្ធនាគារខេត្តព្រះវិហារ ប្រកាសព្រះរាជក្រឹត្យបន្ធូរបន្ថយទោស និងលើកលែងទោសដល់ទណ្ឌិតចំនួន១០នាក់ ក្នុងឱកាសព្រះរាជពិធីបុណ្យវិសាខបូជា
TOP STORY | សម្ដេចតេជោ ហ៊ុន សែន ប្រកាស​គាំទ្រពេញ​ទំហឹង​​គោល​ជំហរ​រាជ​រដ្ឋាភិបាល​លើ​ដំណោះ​​ស្រា​​យ ស្តីពីតំបន់សមុទ្រត្រួតស៊ី​គ្នាកម្ពុជា ថៃ ក្រោយពេលភាគីថៃលុបចោល MOU 2001 ជាឯកតោភាគី

ព័ត៌មានជាតិ

សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត អញ្ជើញរៀបចំពិធីបុណ្យទក្ខិណានុប្បទានខួបគម្រប់ ៣ឆ្នាំឧទ្ទិសមហាកុសល ជូនចំពោះដួងវិញ្ញាណក្ខន្ធ លោកជំទាវមហាសទ្ធាភិរ័ក្ខធម្មសិរីរតន៍ អគ្គមហាឧបាសិកា ពុទ្ធសាសនូបត្ថម្ភក៍ ប៊ុន សុថា

2026/02/03 05:02:40 pm        182
Facebook Telegram Linkin
ភ្នំពេញ ៖ គិតមកដល់ថ្ងៃទី៣ ខែកុម្ភៈ ឆ្នាំ២០២៦នេះ គឺមានរយៈពេល ៣ឆ្នាំហើយ នៃការចូលមរណភាពរបស់លោកជំទាវមហាសទ្ធាភិរ័ក្ខធម្មសិរីរត៍ អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា ហៅ ប៊ុន សាមហ៊ឹង​។​ក្នុងមនោសញ្ចេតនាស្រឡាញ់ ដ៍ជ្រាលជ្រៅបំផុតចំពោះប្អូន ដែលធ្លាប់ មានអនុស្សាវរីយ៍ ជាមួយគ្នារាប់មិនអស់ក្នុងអតីតកាលនោះ សម្តេចអគ្គមហាសេនាបតីតេជោ ហ៊ុន សែន និង សម្តេច កិត្តិព្រឹទ្ធបណ្ឌិត ប៊ុន រ៉ានីហ៊ុនសែន តំណាងគ្រួសារទាំងមូល ព្រមទាំង ឯកឧត្តម តាន់បញ្ញាវុធ ត្រូវជាស្វាមី លោកស្រី កូវ សុវណ្ណារិទ្ធត្រូវជាបុត្រីបានមូលមតិគ្នា ប្រារព្ធពិធីបុណ្យទក្ខិណានុប្បទាន ខួបគម្រប់៣ឆ្នាំ ឧទ្ទិសមហាកុសល ជូនចំពោះដួងវិញ្ញាណក្ខន្ធ លោកជំទាវ មហាសទ្ធាភិរ័ក្ខធម្មសិរីរត៍ អគ្គមហាឧបាសិកា ពុទ្ធសាសនូបត្ថម្ភក៍ ប៊ុនសុថា ដែលពិធីនេះ បានប្រារព្ធធ្វើ នៅព្រឹកថ្ងៃអង្គារ១រោច ខែមាឃ ឆ្នាំម្សាញ់ សប្តស័ក ព.ស២៥៦៩ត្រូវនឹងថ្ងៃទី៣ ខែកុម្ភៈ ឆ្នាំ២០២៦នេះ។ ពិធីនេះបានយាងនិមន្ត សម្តេច ព្រះមហាសុមេធាធិបតី កិត្តិបណ្ឌិត អំលឹមហេង សម្តេចព្រះសង្ឃនាយកនៃព្រះរាជាណាចក្រកម្ពុជា, សម្តេច ព្រះពោធិវ័ង្ស កិត្តិបណ្ឌិត ណយ ច្រឹក សម្តេច ព្រះសង្ឃនាយករងទី១ ,សម្តេចព្រះវនរ័ត កិត្តិបណ្ឌិត មួងរ៉ា សម្តេច ព្រះសង្ឃនាយករងទី២ ,សម្តេចព្រះ ពុទ្ធជ័យមុនី បណ្ឌិត ឃឹម សន សម្តេចព្រះសង្ឃនាយករងទី៣ នៃព្រះរាជាណាចក្រកម្ពុជា, សម្តេចព្រះធម្មលិខិត បណ្ឌិត សៅរ៍ ចន្ទថុល្ល អនុប្រធានថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា សម្តេចព្រះឧត្តមបញ្ញាកិត្តិបណ្ឌិត ដូង ផង់ អនុប្រធានថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា,   សម្តេចព្រះឧត្តមចរិយាបណ្ឌិត ឈឹង ប៊ុនឈា អនុប្រធានថេរសភា នៃព្រះពុទ្ធសាសនា នៅព្រះរាជាណាចក្រកម្ពុជា, សម្តេច ព្រះសាក្យមុនី កិត្តិបណ្ឌិត រ័ត្ន សារឿន និង សម្តេច ព្រះមង្គល មុនីរង្សី ហ៊ូ ឈីវនាថ សមាជិកថរសភានៃព្រះពុទ្ធសាសនា នៅព្រះរាជាណាចក្រកម្ពុជា សរុប៩ព្រះអង្គ ប្រារព្ធពិធីជាលំដាប់លំដោយ តាមទំនៀមទំលាប់ប្រពៃណីព្រះពុទ្ធសាសនា។ក្នុងពិធីនេះក៏មានការប្រារព្ធពិធី ថ្វាយបង្គំព្រះពុទ្ធរូបធ្វើបទនមស្ការសមាទានសីលតាមសិក្ខាបទ ដើម្បីរំឭកនឹកគុណព្រះរតនត្រៃ និងព្រះសម្មាសម្ពុទ្ធព្រះមរមគ្រូនៃយើងដែលព្រះ​អង្គត្រាស់​ដឹងនូវ​អនុត្តរៈសម្មា​សម្ពោ​ធិញាណ​ និងព្រះធម៌វិន័យដ៏វិសេសវិសាលបន្សល់ទុកអោយពុទ្ធបរិស័ទគ្រប់ជំនាន់គោរពប្រតិបត្តិ ដែលពុទ្ធឱវាទ និងព្រះធម៌វិន័យ របស់ព្រះអង្គ គឺជាប្រទីបបំភ្លឺ ផ្លូវ​ដល់​មនុស្ស​លោកគ្រប់​រូបឱ្យ​ប្រកាន់ខ្ជាប់​នូវអំពើល្អ​ជាកុសល លះបង់អំពើបាបសាង នូវកុសលទានតម្កល់ទុកសំរាប់អនាគតជាតិ។ពិសេសនោះពុទ្ធបរិស័ទគ្រប់រូបត្រូវគោរពប្រតិបត្ត និងដឹងគុណចំពោះបុព្វការីជនមានមាតាបិតាទាំង​រូបលោកនៅមានអាយុសង្ខា ឬមរណៈកាលទៅហើយក្ដី ដូចដែល សម្តេចលោកជំទាវ អ្នកឧកញ៉ា ឯកឧត្តម លោកជំទាវ លោក លោក ស្រី ជាបង ជាស្វាមី ជាបុត្រី ព្រមទាំងក្រុមគ្រួសារ បាននិងកំពុង ប្រណិបត្តិក្នុងពេលនេះ គឺបានបង្ហាញនូវក្តីស្រឡាញ់ កត្តញូ កត្ត វេទិតាធម៌ ដ៍ខ្ពង់ខ្ពស់បំផុត សម្រាប់​ជាការ​តប​ស្នង​សងគុណ ចំពោះបុព្វការីជន ដែលបានធ្វើមរណកាល ទៅកាន់ បរលោកខាងមុខយ៉ាងពិតប្រាកដ។សូមរំលឹកជូនថា លោកជំទាវមហាសទ្ធាភិរ័ត្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភន៍  ប៊ុន សុថា ហៅ ប៊ុន សាមហ៊ឹង ប្រសូត្រនៅថ្ងៃសុក្រ៨កើត ខែផល្គុនឆ្នាំរកា ព.ស ២៥០០ ត្រូវនឹងថ្ងៃទី៨ ខែ មីនាឆ្នាំ១៩៥៧និងមានទទួលមរណភាពនៅថ្ងៃសុក្រ១៣កើតខែមាឃ ឆ្នាំខាល ចត្វាស័កព.ស ២៥៦៦ត្រូវនឹងថ្ងៃទី៣ខែកុម្ភះឆ្នំា២០២៣ក្នុងជន្មាយុ៦៧ឆ្នាំ។ ការទទួលអនិច្ចកម្មរបស់លោកជំទាវមហាសទ្ធាភិរ័ត្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភន៍ គឺជាការបាត់បង់មួយដ៏ធំធេង នូវ មាតា ជីដូន ដែលមានព្រហម្មវិហារធម៌ដ៏ខ្ពង់ខ្ពស់បំផុតចំពោះកូនចៅ។ថ្មីដ្បិត តែរូបកាយនិងជីវិត របស់លោកជំទាវ បានបាត់បង់ ក៍ពិតមែន តែដំបូន្មានប្រកបដោយមធុរស និងព្រហ្មវិហារធម៌ សេចក្តីល្អ និងគុណធម៌ដ៏ឧត្តុង្គឧត្តមវិសុទ្ធថ្លៃថ្លា និងគំរូនៃសេចក្តីអង់អាចក្នុងការតស៊ូជំន្នះឧបសគ្គគ្រប់បែបយ៉ាង របស់លោកជំទាវ មហាសទ្ធាភិរ័ត្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភន៍ នឹងស្ថិតនៅក្នុងការចងចាំ របស់កូនចៅ និងញាតមិត្តទាំងអស់ឥតមានថ្ងៃបំភ្លេចបានឡើយ។ក្នុងឱកាសពិធីបុណ្យនេះសម្តេចអ្នកឧកញ៉ា ឯកឧត្តមលោកជំទាវអ្នកផ្តើមបុណ្យនិងក្រុមគ្រួសារបានវេរទេយ្យវត្ថុនិងគ្រឿងអត្ថបរិក្ខានិងបច្ច័យថ្វាយនិងប្រគេនសម្តេចព្រះសង្ឃនាយក សម្តេច ព្រះសង្ឃនាយករងនិងព្រះ សម្តេច ព្រះមហាថេរ ទាំង៩ព្រះអង្គប្រកបដោយ សទ្ធាជ្រះថ្លាបំផុត ព្រមទាំងអញ្ជើ្ញរាប់ព្រះសង្ឃ៦៩ព្រអង្គជាកិច្ចឧទ្ទិសកុសលផលបុណ្យ​ជូនវិញ្ញាណក្ខន្ធ​មាតាបិតាបុព្វការីជន​ដែលបានចែកឋានទៅកាន់ បរលោកខាងមុខហើយនោះដែលរួមមាន៖ វិញ្ញាណក្ខន្ធ មហាឧបាសក លីន គ្រី និងអ្នកឧកញ៉ាព្រឹទ្ធមហា ឧបាសិកាធម្មញ្ញាណវិវឌ្ឍនា ប៊ុន ស៊ាងលី បិតា មាតាបង្កើត សម្តេច កិត្តិព្រឹទ្ធបណ្ឌិត ប៊ុន រ៉ានីហ៊ុនសែនវិញ្ញាណក្ខ័ន អ្នកឧកញ៉ា មហាភក្តី សប្បុរិស ភោគាធិបតី ហ៊ុននាង និងមហាឧបាសិកា ឌីប៉ុក បិតាមាតបង្កើតសម្តេចអគ្គមហាសេនាបតីតេជោហ៊ុនសែន ជាពិសេស ជូនវិញ្ញញាណក្ខន្ធ លោកជំទាវ មហសទ្ធាភិរ័ក្ខធម្មសិរីរត៍ ប៊ុន សុថា ដែលបានចូលមរណកាល អស់រយៈពេលគម្រប់៣ឆ្នាំនាថ្ងៃនេះ រួមទាំងវិញ្ញាណក្ខន្ធញាតិការសាច់សារលោហិតក្នុងសង្សារវដ្តទាំងអស់ អញ្ជើញមកទទួល​យក មនុញ្ញផល ដែល សម្តេច,អ្នកឧកញ៉ា,ឯកឧត្តម,លោកជំទាវ លោក លោកស្រី ឧទ្ទិសជូន ក្នុងពេលនេះ និងបានសោយសុខក្នុងឋានដ៍ ខ្ពង់ខ្ពស់និងសុគតិភពកុំបីឃ្លាងឃ្លាតឡើយ។ ​តាមរយៈអំណាច នៃផល្លានិសង្ឃ កើតចេញពី ពិធីបុណ្យទក្ខិណានុប្បទានក្នុងថ្ងៃនេះ សម្តេចព្រះសង្ឃនាយក,សម្តេច ព្រះសង្ឃនាយករង,សម្តេច ព្រះមហាថេរ, ព្រះរាជាគណៈ និងព្រះថេរានុថេរៈគ្រប់ព្រះអង្គ សូមលើកថ្វាយ គុណបុណ្យព្រះរតនត្រៃ និងវត្ថុសក្តិសិទ្ធក្នុងលោក និងទេវតាថែរក្សាទឹកដី នៃព្រះរាជាណា ចក្រកម្ពុជា សូមជួយបីបាច់រក្សា និងប្រោសព្រហ្មប្រសិទ្ធិពរជ័យ សិរីមង្គលគ្រប់ប្រការ ជូនសម្តេច អគ្គមហាសេនាបតីតេជោ និង សម្តេច កិត្តិព្រឹទ្ធបណ្ឌិត ព្រមទាំងក្រុមគ្រួសារ សូមមានសុខភាពល្អ ជន្មាយុយឺនយូរ ស្ថិតនៅជាម្លប់ដ៍ត្រជាក់ សំរាប់កូនចៅ ជំនាន់បច្ចុប្បន្ន និងជំនាន់ក្រោយៗទៀត ជាពិសេសដើម្បីជាសរសរស្តម្ភ រួមចំណែកក្នុងការអភិវឌ្ឍប្រទេសជាតិ និងស្ថិតនៅជាគ្រឹះដ៍រឹងមាំក្នុងការថែរក្សា ការពារសុខសន្តិភាពជាយូរអង្វែងតរៀងទៅ៕ 

មន្រ្ដីជាន់ខ្ពស់រាជរដ្ឋាភិបាលចែករំលែកទស្សនទានយុទ្ធសាស្ត្រស្តីពី «កិច្ចព្រមព្រៀងពន្ធគយបដិការកម្ពុជា-អាមេរិក» និងមាគ៌ាសេដ្ឋកិច្ចជាតិ ជូនសមាជិករដ្ឋសភា

2026/02/03 03:56:53 pm        118
Facebook Telegram Linkin
ក្នុងបរិបទដែលពិភពលោកកំពុងតាមដានយ៉ាងយកចិត្តទុកដាក់ លើគោលនយោបាយសេដ្ឋកិច្ចរបស់មហាអំណាចសហរដ្ឋអាមេរិក នាព្រឹកថ្ងៃទី៣ ខែកុម្ភៈ ឆ្នាំ២០២៦ នៅវិមានរដ្ឋសភា ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មការផ្តល់យោបល់លើគោលនយោបាយពាណិជ្ជកម្ម បានអញ្ជើញធ្វើជាវាគ្មិនកិត្តិយសក្នុងបាឋកថាដ៏មានសារៈសំខាន់ក្រោមប្រធានបទ “កិច្ចព្រមព្រៀងកម្ពុជា-សហរដ្ឋអាមេរិក ស្តីពីការកំណត់ពន្ធគយទៅវិញទៅមក” (The Cambodia-US Agreement on Reciprocal Tariffs)។កម្មវិធីនេះរៀបចំឡើង ដោយអគ្គលេខាធិការដ្ឋានរដ្ឋសភា ក្រោមការសម្របសម្រួលពី ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរង និងជាប្រធានក្រុមទីប្រឹក្សារដ្ឋសភា ដោយមានការអញ្ជើញចូលរួមពីសមាជិក សមាជិកាគណៈកម្មការជំនាញទាំង១០ ព្រមទាំងថ្នាក់ដឹកនាំ និងមន្ត្រីជំនាញនៃអគ្គលេខាធិការដ្ឋានរដ្ឋសភាជាច្រើនរូប។តាមរយៈបាឋកថានេះ ឯកឧត្តមបណ្ឌិតសភាចារ្យ បានធ្វើការវិភាគយ៉ាងស៊ីជម្រៅ និងច្បាស់លាស់ ដោយផ្អែកលើសូចនករថ្មីៗ នៃរដ្ឋបាលអាណត្តិទីពីរ របស់លោកប្រធានាធិបតី ដូណាល់ ត្រាំ ជាពិសេសគោលនយោបាយ “America First” ដែលផ្ដោតលើការអនុវត្តពន្ធបដិការ។ ឯកឧត្តមបានគូសបញ្ជាក់ថា កិច្ចព្រមព្រៀង ស្តីពីការកំណត់ពន្ធគយទៅវិញទៅមកនេះ មិនត្រឹមតែផ្ដល់នូវកាលានុវត្តភាពប៉ុណ្ណោះទេ ប៉ុន្តែវាក៏តម្រូវឱ្យកម្ពុជាត្រូវគិតគូរឱ្យបានហ្មត់ចត់ចំពោះបញ្ហាប្រឈមនានា ដែលអាចកើតមានឡើងផងដែរ។ដើម្បីពង្រឹងភាពធន់នៃសេដ្ឋកិច្ចជាតិ ឯកឧត្តមបណ្ឌិតសភាចារ្យ បានចែករំលែកនូវយុទ្ធសាស្ត្រពិពិធកម្មទីផ្សារ ដើម្បីកាត់បន្ថយការពឹងផ្អែកខ្លាំងលើទីផ្សារតែមួយ ឬពីរ។ ក្នុងនោះ ឯកឧត្តមបានលើកឡើងពីមហិច្ឆតារបស់កម្ពុជា ក្នុងការត្រៀមខ្លួនចូលជាសមាជិកនៃកិច្ចព្រមព្រៀង CPTPP ដែលជាទីផ្សារកម្រិតស្តង់ដារខ្ពស់បំផុតមួយក្នុងលោក ដើម្បីទាក់ទាញវិនិយោគទុនខ្នាតយក្សពីបរទេស ដែលនឹងចូលរួមចំណែកបង្កើនកិត្តិនាម និងកសាងទំនុកចិត្តលើឆាកអន្តរជាតិមកលើកម្ពុជា។ឈរលើចន្លោះនៃការប្រកួតប្រជែងភូមិសាស្ត្រនយោបាយរវាងចិន និងអាមេរិក ឯកឧត្តមទេសរដ្ឋមន្ត្រី បានគូសបញ្ជាក់ពីការសម្រេចចិត្តដ៏ហ្មត់ចត់របស់រាជរដ្ឋាភិបាលក្នុងការរក្សាតុល្យភាពអំណាច ដោយប្រកាន់ខ្ជាប់នយោបាយ “មិត្តច្រើន ខ្មាំងសូន្យ” ដោយរាជរដ្ឋាភិបាលកម្ពុជានូវបន្តចាត់ទុកចិនជាបង្អែកយុទ្ធសាស្ត្រដ៏សំខាន់លើខ្សែច្រវាក់ផលិតកម្ម ហេដ្ឋារចនាសម្ព័ន្ធ និងការវិនិយោគផ្ទាល់ គ្រាដែលសហរដ្ឋអាមេរិកក៏ជាមិត្តរបស់កម្ពុជាដែលជាទីផ្សារនាំចេញសក្ដានុពល ដែលកម្ពុជាត្រូវរក្សានិរន្តរភាពតាមរយៈការចរចាប្រកបដោយវិជ្ជាជីវៈ និងភាពឆ្លាតវៃដូចគ្នាដែរ។ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា បានផ្ដល់តម្លៃខ្ពស់លើការកែទម្រង់ផ្ទៃក្នុង និងការកសាងកិត្តិនាមជាតិ ដោយប្រើប្រាស់ឥទ្ធិពលចិត្តសាស្ត្រ ដើម្បីទាក់ទាញវិនិយោគិន តាមរយៈការកែទម្រង់ស៊ីជម្រៅ, ការពង្រឹងប្រព័ន្ធច្បាប់ដោយធានាឱ្យបាននូវតម្លាភាព ដើម្បីកសាងម៉ាកសញ្ញាជាតិ គ្រាដែលភាពស្មោះត្រង់ក្នុងពាណិជ្ជកម្មក៏បានបង្ហាញរូបភាពកម្ពុជាជាប្រទេសគោរពច្បាប់ ដែលនឹងក្លាយជា “ជម្រកវិនិយោគដ៏មានសុវត្ថិភាព” សម្រាប់ក្រុមហ៊ុនលំដាប់ពិភពលោក។ជារួម បាឋកថាដ៏មានសារៈសំខាន់របស់ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា នៅថ្ងៃនេះ បានបញ្ជូនសារយ៉ាងច្បាស់ថា “ការកែទម្រង់ផ្ទៃក្នុង គឺជាគ្រឹះ ហើយការទូតសេដ្ឋកិច្ចបត់បែន គឺជាដំបូល”។ កម្ពុជានាពេលបច្ចុប្បន្ន មិនមែនគ្រាន់តែជាប្រទេសរង់ចាំទទួលជំនួយនោះទេ ប៉ុន្តែគឺជា “ដៃគូយុទ្ធសាស្ត្រ” ដែលមានតម្លៃ និងមានសមត្ថភាពឈរជើងយ៉ាងរឹងមាំក្នុងតុល្យភាពអំណាចសកល ដើម្បីឧត្តមប្រយោជន៍ជាតិ និងប្រជាជនទាំងមូល៕

មន្ត្រីជាន់ខ្ពស់ក្រសួងសេដ្ឋកិច្ច៖ រាជរដ្ឋាភិបាលមិនដំឡើងប្រាក់បៀវត្ស តែបានផ្តល់ការគាំទ្រដល់ស្ថាប័ន និងរបបសង្គមផ្សេងៗ

2026/02/03 03:14:04 pm        126
Facebook Telegram Linkin
ភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ថ្លែងថា នៅក្នុងឆ្នាំ២០២៦ នេះ ទោះបីរាជរដ្ឋាភិបាលមិនដំឡើងប្រាក់បៀវត្ស ដល់មន្ដ្រីរាជការ និងកងកម្លាំងប្រដាប់អាវុធ តែរាជរដ្ឋាភិបាលបានវិភាជថវិកាក្នុងក្របខណ្ឌកែទម្រង់រដ្ឋបាលសាធារណៈ លើកទឹកចិត្ដគាំទ្រសម្មតិកម្ម ក្នុងទំហំ ១៥ លានដុល្លារអាមេរិក ដើម្បីលើកទឹកចិត្តដល់ស្ថាប័ន បុគ្គល និងគម្រោងផ្សេងៗ និងការដំឡើងថវិកាផ្នែកគាំពារសង្គមជាដើម។ ​ឯកឧត្តម ចាន់ សុធី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងវេទិកាសាធារណៈ ស្តីពីការគ្រប់គ្រងម៉ាក្រូសេដ្ឋ កិច្ច និងច្បាប់ថវិកាជាតិឆ្នាំ២០២៦ នៅថ្ងៃទី២ ខែកុម្ភៈ ឆ្នាំ២០២៦ នេះថា ជុំវិញការដំឡើងប្រាក់បៀវត្ស ជូនដល់មន្ដ្រីរាជការ និងកងកម្លាំង ប្រដាប់អាវុធនេះ គឺជាកិច្ចការអាទិភាពដើម្បីចូលរួមលើកកម្ពស់ជីវភាពរបស់មន្រ្តីរាជការ ក៏ដូចជាការលើកកម្ពស់គុណភាពនៃសេវាសាធារណៈ។ឯកឧត្តម បន្តថា ប៉ុន្តែស្ថិតនៅក្នុងកិច្ចការដ៏លំបាកនេះ ខណៈដែលការប្រមូលចំណូលនឹងអាចថមថយជាងមុន ស្របពេលដែល សម្ពោធនៃចំណាយមានតម្រូវការកើនឡើង ក្នុងនោះប្រសិនបើរាជរដ្ឋាភិបាលដំឡើងប្រាក់បៀវត្ស ក៏មិនច្រើនប៉ុន្មាននោះឡើយ អាចក្នុងរង្វង់ ប្រមាណ ១៥ លានដុល្លារក្នុងមួយឆ្នាំតែប៉ុណ្ណោះ ដែលបញ្ហានេះសូមមានការយោគយល់ចំពោះមន្ត្រីរាជការ និងកងកម្លាំងប្រដាប់អាវុធទាំងអស់ ខណៈដែលកម្ពុជាកំពុងស្ថិតនៅក្នុងការលំបាក។ ឯកឧត្តមរដ្ឋលេខាធិការ បានបង្ហាញប្រាក់បៀវត្សដែលអនុវត្តឆ្នាំ២០២៦ គឺស្ថិតនៅក្នុងកម្រិត មួយសមរម្យផងដែរ ជាក់ស្តែងមន្ត្រីរាជការទូទៅ ទទួលបានប្រាក់បៀវត្សក្នុងរង្វង់ជាង ១ លាន ៤ សែនរៀល, គ្រូបបង្រៀនជិត ១ លាន ៥០ សែនរៀល, ចំណែកនគបាលជាតិ (ពលបាលត្រី) ជាង ១ លាន ៤៨ ម៉ឺនរៀល និងបៀវត្សយោធិន (ពលទោ) ជាង ១ លាន ៤១ ម៉ឺនរៀល (គិតបញ្ចូលអង្ករ)។ឯកឧត្តម ចាន់ សុធី បន្តថា ទោះបីនៅក្នុងឆ្នាំ២០២៦ រាជរដ្ឋាភិបាលមិនបានដំឡើងប្រាក់បៀវត្ស ជូនដល់មន្ដ្រីរាជការ និងកងកម្លាំង ប្រដាប់អាវុធ ប៉ុន្តែការផ្តល់របរសន្តិសុខសង្គម (ប័ណ្ណ ប.ស.ស.) បានកំពុងដំណើរការយ៉ាងល្អជូនដល់មន្រ្តីរាជការ នៅពេលមានជំងឺឈឺថ្នាត់ ដូចជា ការពង្រីកលើការព្យាបាលជំងឺលើសឈាម ឬជំងឺទឹកនោមផ្អែមជាដើម ជាក់ស្តែងក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមិនមែនបន្ទុកបុគ្គលិក ត្រូវបានដំឡើង ៦០ លានដុល្លារអាមេរិក ឡើងប្រមាណ ១១,៤ ភាគរយ ខណៈដែលចំណូលសរុបឡើងក្នុងរង្វង់ ៣,៦ ភាគរយប៉ុណ្ណោះ។ ឯកឧត្តម បន្ថែមថា ក្រៅពីនេះ រាជរដ្ឋាភិបាលក៏បានវិភាជថវិកានៅក្នុងក្របខណ្ឌកែទម្រង់រដ្ឋបាលសាធារណៈ ដែល លើកទឹកចិត្ដគាំទ្រសម្មតិកម្ម ក្នុងទំហំទឹកប្រាក់ ១៥ លានដុល្លារអាមេរិក (ប្រហាក់ប្រការដំឡើងប្រាក់បៀវត្ស) ដែលស្ថិតក្រោមការចាត់ចែង របស់ក្រសួងមុខងារសាធារណៈ ក្នុងការលើកទឹកចិត្តគាំទ្រស្ថាប័ន បុគ្គល និងគម្រោងផ្សេងៗជាដើម។ បញ្ហានេះបញ្ជាក់ឱ្យឃើញថា ទោះ រាជរដ្ឋាភិបាលមិនបានដំឡើងប្រាក់បៀវត្ស តែរាជរដ្ឋាភិបាលបានដំឡើងតាមរយៈនៃការអនុវត្តគោលការណ៍សំខាន់ៗខាងលើនេះ៕អត្ថបទ៖ សុន រ៉ាឌី

កម្ពុជាមិនបន្ធូរដៃឡើយក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា ខណៈ​បន្ត​បណ្តេញ​ជន​បរទេស ១ពាន់នាក់ទៀតចេញពីកម្ពុជាពាក់ព័ន្ធបទល្មើសបច្ចេកវិទ្យា និងស្នាក់​នៅ​ធ្វើ​ការ​ងារ​ខុសច្បាប់

2026/02/03 01:27:37 pm        231
Facebook Telegram Linkin
នៅថ្ងៃទី១ ខែកុម្ភៈ ឆ្នាំ២០២៦ តាមអនុសាសន៍ដ៏ខ្ពង់ខ្ពស់ ឯកឧត្តមអភិសន្តិបណ្ឌិត ឧប​នាយក​រដ្ឋ​មន្ត្រី រដ្ឋមន្ត្រីក្រសួងមហាផ្ទៃ ឯកឧត្តម ឧត្តមសេនីយ៍ឯក សុខ វាសនា អគ្គនាយក​អន្តោ​ប្រវេសន៍​ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី ធ្វើការបណ្តេញ​ជន​ជាតិ​វៀត​ណាម​សរុ​បចំនួន ១៧៥នាក់ (ស្រី៣៩នាក់) ចេញពីព្រះរាជាណាចក្រកម្ពុជា តាមប៉ុស្តិ៍​នគរបាល​ច្រក​ទ្វារ​ព្រំដែនអន្តរជាតិបាវិតខេត្តស្វាយរៀង ពាក់ព័ន្ធករណី លួចស្នាក់នៅធ្វើការងារខុសច្បាប់ (Online Scams) ។ នេះបើតាមរបាយការណ៍របស់អគ្គនាយកដ្ឋានអន្តោប្រវេសន៍។ដោយឡែក នៅថ្ងៃទី១-២ ខែកុម្ភៈ ឆ្នាំ២០២៦ អគ្គនាយកអន្តោប្រវេសន៍ ក៏បាន​បណ្តេញ​ជន​បរទេស​សរុបចំនួន ៤១៩នាក់ (ស្រី១០នាក់) មាន៧សញ្ជាតិរួមមាន ចិន ឥណ្ឌូនេស៊ី បង់ក្លាដេស ឥណ្ឌា លីប៊េរីយា នីហ្សេរីយា និងប៉ាគីស្ថាន ចេញពីកម្ពុជា​ដែល​ពាក់​ព័ន្ធ​ករណី​លួច​ឆ្លង​ដែន​ ស្នាក់នៅធ្វើការងារខុសច្បាប់ និងប្រើប្រាស់ QR CODE ក្លែងក្លាយផងដែរ។ ជាមួយ​គ្នា​នេះ កាលពីនៅថ្ងៃទី៣១ ខែមករា ឆ្នាំ២០២៦ អគ្គនាយកអន្តោប្រវេសន៍ ក៏​បាន​បណ្តេញ​ជន​បរទេស​សរុបចំនួន ៤០៦នាក់ (ស្រី២៨នាក់) មាន៩សញ្ជាតិរួមមាន ចិន ឥណ្ឌូនេស៊ី បង់ក្លាដេស យ៉ូហ្គង់ដានីហ្សេរីយ៉ា កូរ៉េ ឥណ្ឌា ថៃ និងសេរ៉ាឡេអូន ក្នុងនោះមានជនជាតិចិនចំនួន ១៤០នាក់ ចេញពីកម្ពុជាផងដែរ ដែលពាក់ព័ន្ធករណីលួចឆ្លងដែន ស្នាក់នៅធ្វើការងារខុសច្បាប់ និង​ប្រើប្រាស់ QR CODE ក្លែងក្លាយ។សូមរម្លឹកថា ថ្នាក់ដឹកនាំកម្ពុជា ប្រកាសថា កម្ពុជាមិនបន្ធូរដៃឡើយ ក្នុងប្រតិបត្តិការស្រាវជ្រាវ និង​បង្ក្រាបបទល្មើសឆបោកតាមប្រព័ន្ធបច្ចេកវិទ្យា។ ជាក់ស្ដែងកាលពីថ្ងៃទី៣១ ខែមករា ឆ្នាំ២០២៦ កម្លាំង​នគរបាលជាតិ បើកប្រតិបត្តិការ​បង្ក្រាប​ទីតាំង​សង្ស័យ​ប្រព្រឹត្ត​អំពើ​ឆបោក​តាម​ប្រព័ន្ធ​បច្ចេក​វិទ្យា ក្នុងបរិវេណកាស៊ីណូវ៉ាន់ឆឹង (A7) ដែលមានអគារចំនួន២២ ស្ថិតនៅភូមិតាបឹប សង្កាត់​បាវិត ក្រុងបាវិត ខេត្តស្វាយរៀង បង្ក្រាបទី​តាំង​បទ​ល្មើស​ឆបោក​តាម​ប្រព័ន្ធ​បច្ចេក​វិទ្យា​ឃាត់​ខ្លួន​ជន​បរទេស​សរុបដល់ទៅ២០៤៤នាក់ ក្នុងនោះជនជាតិចិន ១៧៩២នាក់ វៀតណាម ១៧៧នាក់ មីយ៉ាន់ម៉ា ១៧៩នាក់ នេប៉ាល់ ៣០នាក់ ចិនតៃវ៉ាន់៥នាក់ ម៉ាឡេស៊ី១នាក់ ឡាវ២នាក់ ឥណ្ឌា ៣៦​នាក់ និងជនជាតិម៉ិកស៊ិក១នាក់។ សូម​បញ្ជាក់ថា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា រាជរដ្ឋាភិបាលកម្ពុជា នីតិកាល​ទី៧ នៃរដ្ឋសភា ក្រោមការដឹកនាំដោយសម្ដេចធិបតី ហ៊ុន ម៉ាណែត បាន​ចេញ​សេចក្តី​សម្រេច​បង្កើត​គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) ដោយមានសម្តេចធិបតី ជាប្រធាន។ តាមរយៈ​យន្តការ​ថ្មី​បន្ថែម​ទៀត​នេះ​ក្នុង​ក្រប​ខ័ណ្ឌ​ក្រ​សួង​មហាផ្ទៃ ក្នុងរយៈពេល៩ខែ ឆ្នាំ២០២៥ សមត្ថកិច្ចនគរបាលជាតិ បានបើក​ប្រតិបត្តិការ​បង្ក្រាប​បទ​ល្មើសឆបោកតាមប្រព័ន្ធបច្ចេកវិទ្យា បានចំនួន ៤៨ លើកឃាត់ខ្លួន​បញ្ជូន​ទៅ​តុលាការ​ចំនួន​១៦៨នាក់ និងបណ្ដេញចេញពីកម្ពុជាទៅប្រទេសកំណើត ចំនួន ២.៧២២ នាក់។ ឈាន​ចូលខែមករា ឆ្នាំ២០២៦ សមត្ថកិច្ចកម្ពុជា ក៏បា​ន​ចាប់​ខ្លួន​មេ​ខ្លោង​ដ៏​ធំ​មួយ​ដែល​ប្រព្រឹត្ត​អំពើ​ឆបោក​តាម​ប្រព័ន្ធបច្ចេកវិទ្យា ឈ្មោះ ចេន ហ្ស៊ី រួមទាំងបក្សពួកបញ្ជូនទៅប្រទេសចិន បន្ទាប់​ពី​បាន​ស៊ើបអ​ង្កេតជាច្រើនខែផងដែរ៕ 

អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ អញ្ជើញចែកអំណោយសម្តេចមហាបវរធិបតី ហ៊ុន ម៉ាណែត ជូនជនភៀសសឹក នៅខេត្តព្រះវិហារ

2026/02/03 01:21:31 pm        138
Facebook Telegram Linkin
នៅថ្ងៃទី៣ ខែកុម្ភៈ ឆ្នាំ២០២៦នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជាអធិបតីក្នុងពិធីសំណេះសំណាល និងចែកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ជូនប្រជាពលរដ្ឋភៀសសឹកចំនួន ៧៧៤គ្រួសារ នៅមណ្ឌលសុវត្ថិភាព ក្នុងឃុំកំពង់ស្រឡៅមួយ ស្រុកឆែក ខេត្តព្រះវិហារ។ក្នុងនាម គណៈកម្មាធិការជាតិគ្រប់គ្រងគ្រោះមហន្តរាយ សូមថ្លែងអំណរគុណយ៉ាងជ្រាលជ្រៅជូនចំពោះសម្តេចមហាបវរធិបតី ហ៊ុន ម៉ាណែត ដែលតែងតែខ្វល់ខ្វាយ និងតាមដានជាប់ជាប្រចាំអំពីសុខទុក្ខជនភៀសសឹកតាមមណ្ឌលសុវត្ថិភាពទាំងអស់។ពិធីប្រគល់អំណោយជូនប្រជាពលរដ្ឋភៀសឹកក្នុងមួយគ្រួសារទទួលបានអង្ករចំនួន ៥០គីឡូក្រាម, មី មួយកេសធំ, ត្រីខ មួយកេស និងថវិកាចំនួន ១,០០០.០០០រៀល៕

អង្គភាពជំនាញក ម្ពុជា ឡាវ និងវៀតណាម ធ្វើសិក្ខាសាលាជាមួយគ្នាបួនថ្ងៃផ្លាស់ប្តូរបទពិសោធន៍លើបញ្ហាប្រឈម និងដំណោះស្រាយថ្មីៗក្នុងវិស័យសកម្មភាពបោសសម្អាតគ្រាប់យុទ្ធភណ្ឌមិនទាន់ផ្ទុះ

2026/02/03 01:12:20 pm        183
Facebook Telegram Linkin
ភ្នំពេញ៖ នៅថ្ងៃទី៣ ខែកុម្ភៈ ឆ្នាំ២០២៦នេះ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់-CMAC បានចូលរួមជាអធិបតីក្នុងពិធីបើកសិក្ខាសាលាថ្នាក់តំបន់ ស្តីពីគ្រាប់យុទ្ធភណ្ឌមិនទាន់ផ្ទុះ (UXO Regional Workshop)។ សិក្ខាសាលានេះនឹងប្រព្រឹត្តទៅចាប់ពីថ្ងៃទី៣ដល់ថ្ងៃទី៦ ខែកុម្ភៈ ឆ្នាំ២០២៦ នៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង ដោយមានការអញ្ជើញចូលរួមពីប្រតិភូជំនាញសរុបចំនួន២៣រូប មកពីអង្គភាពជំនាញទាំង៣ប្រទេស គឺមជ្ឈមណ្ឌលសកម្មភាពកំចាត់មីនកម្ពុជា (CMAC) អង្គភាពជាតិបោសសម្អាតគ្រាប់យុទ្ធភណ្ឌមិនទាន់ផ្ទុះឡាវ (UXO Lao) និងមជ្ឈមណ្ឌលសកម្មភាពកំចាត់មីនវៀតណាម (VNMAC)។ សក្ខាសាលានេះគាំទ្រ និងសហការដោយភ្នាក់ងារកិច្ចសហប្រតិបត្តិការអន្តរជាតិជប៉ុន JICA។ គោលបំណងនៃការរៀបចំសិក្ខាសាលានេះ សម្រាប់ផ្តល់ឱកាសជូនអង្គភាពជំនាញទាំង៣ប្រទេសកម្ពុជា ឡាវ និងវៀតណាម ធ្វើការពិភាក្សា ផ្លាស់ប្តូរនូវបទពិសោធន៍ បញ្ហាប្រឈម និងដំណោះស្រាយថ្មីៗ ក្នុងវិស័យសកម្មភាព ដែលនឹងជួយជំរុញការងារបោសសម្អាតគ្រាប់យុទ្ធភណ្ឌមិនទាន់ផ្ទុះឱ្យកាន់តែមានប្រសិទ្ធភាព និងមានសុវត្ថិភាពខ្ពស់ថែមទៀត។ ទន្ទឹងនឹងនេះ សិក្ខាសាលានេះ មិនត្រឹមតែជាវេទិកាសម្រាប់ពង្រឹងសមត្ថភាពបច្ចេកទេសប៉ុណ្ណោះទេ ប៉ុន្តែក៏ជាជំហានដ៏សំខាន់ក្នុងការបង្កើនកិច្ចសហប្រតិបត្តិការតំបន់ ដើម្បីធានាបាននូវសុវត្ថិភាពពេញលេញ និងការអភិវឌ្ឍប្រកបដោយចីរភាពជូនដល់ប្រជាពលរដ្ឋ ដែលរងផលប៉ះពាល់ដោយសារសំណល់គ្រាប់យុទ្ធភណ្ឌមិនទាន់ផ្ទុះសង្គ្រាមផងដែរ។ តាមកម្មវិធីដែលបានគ្រោងទុកប្រតិភូនៃសិក្ខាសាលានេះ ត្រូវចុះពិនិត្យកិច្ចប្រតិបត្តិជាក់ស្តែង ក្នុងការបោសសម្អាតចម្ការគ្រាប់របស់អង្គភាព CMAC នៅភូមិសាស្រ្តខេត្តកំពង់ធំ និងការបោសសម្អាតគ្រាប់យុទ្ធភណ្ឌមិនទាន់ផ្ទុះក្រោមទឹក ក្នុងភូមិសាស្ត្រខេត្តព្រៃវែងជាដើម៕

ក្រសួងវប្បធម៌កម្ពុជាបន្តតវ៉ាយ៉ាងដាច់អហង្ការទៅក្រសួងវប្បធម៌ថៃ ចំពោះសកម្មភាពនានាដែលអាជ្ញាធរថៃបានអនុវត្តនៅតាមតំបន់ប្រាសាទតាមាន់ និងប្រាសាទតាក្របី

2026/02/03 01:03:05 pm        308
Facebook Telegram Linkin
ភ្នំពេញ៖ ក្រសួងវប្បធម៌ និងវិចិត្រសិល្បៈ កម្ពុជា នៅថ្ងៃទី៣ ខែកុម្ភៈ ឆ្នាំ២០២៦នេះ បានចេញប្រកាស តវ៉ាយ៉ាងដាច់អហង្ការជាថ្មីទៅកាន់ ក្រសួងវប្បធម៌ថៃ ចំពោះសកម្មភាពនានាដែលអាជ្ញាធរថៃបានអនុវត្តនៅតាមតំបន់ប្រាសាទតាមាន់ និងប្រាសាទតាក្របី។ នេះបើតាមសេចក្តីប្រកាសព័ត៌មាន។ ក្រសួងវប្បធម៌ និងវិចិត្រសិល្បៈកម្ពុជាបានបញ្ជាក់សារជាថ្មីឡើងវិញថា ទីតាំងប្រាសាទទាំងពីរ ស្ថិតនៅក្នុង ដែនអធិបតេយ្យភាពរបស់ព្រះរាជាណាចក្រកម្ពុជាទាំងស្រុង ដូចដែលបានកំណត់យ៉ាងច្បាស់ដោយសន្ធិសញ្ញា បារាំង-សៀម ឆ្នាំ១៩០៤ និងឆ្នាំ១៩០៧ ព្រមទាំងផែនទីដែលត្រូវបានទទួលស្គាល់ជាផ្លូវការ និងនៅតែមាន សុពលភាពស្របតាមច្បាប់អន្តរជាតិ។ក្រសួងវប្បធម៌ និងវិចិត្រសិល្បៈ សម្តែងការព្រួយបារម្ភយ៉ាងខ្លាំង ចំពោះរបាយការណ៍នៃការខូចខាត ធ្ងន់ធ្ងរ និងការបំផ្លិចបំផ្លាញស្ទើរតែទាំងស្រុងនៃប្រាសាទតាក្របីដែលជាទីកន្លែងសក្ការៈ និងជាបេតិកភណ្ឌប្រវត្តិសាស្ត្រ ដ៏សំខាន់ដែលត្រូវបានថែរក្សាអស់រយៈពេលរាប់សតវត្សរ៍ មានតម្លៃវប្បធម៌ និងជាដួងព្រលឹងរបស់ប្រជាជនខ្មែរ។កម្ពុជា មិនអាចទទួលយកបាននូវ៖ ការប្រើប្រាស់កម្លាំងណាមួយប្រឆាំងទៅលើតំបន់វប្បធម៌ និងបុរាណវិទ្យា។ សកម្មភាពស្តារឡើងវិញ អភិរក្ស ចុះបញ្ជី ឬសាងសង់ណាមួយ ដែលអនុវត្តដោយឯកតោភាគី ដោយគ្មានការយល់ព្រមពីភាគីកម្ពុជា ឬសកម្មភាពណាមួយដែលប៉ះពាល់ ឬបំផ្លាញស្ថានភាពផ្លូវច្បាប់ ប្រវត្តិសាស្ត្រ និងវប្បធម៌នៃតំបន់ ទាំងនេះ។ ក្រសួងវប្បធម៌ និងវិចិត្រសិល្បៈ បានអំពាវនាវឱ្យភាគីថៃបញ្ឈប់ជាបន្ទាន់នូវសកម្មភាពទាំងអស់នៅតំបន់ ប្រាសាទតាមាន់ និងប្រាសាទតាក្របីដោយគោរពអធិបតេយ្យភាពរបស់កម្ពុជា និងដោះស្រាយបញ្ហាពាក់ព័ន្ធទាំងអស់ ដោយសន្តិវិធី និងស្របតាមច្បាប់អន្តរជាតិ។ក្រសួងវប្បធម៌ និងវិចិត្រសិល្បៈកម្ពុជា ប្រកាសអំពីការប្តេជ្ញាចិត្តក្នុងការការពារ និងថែរក្សាបេតិកភណ្ឌវប្បធម៌របស់កម្ពុជា ព្រមទាំងកិច្ចសហប្រតិបត្តិការដោយផ្អែកលើការគោរពគ្នាទៅវិញទៅមក ភាពស្របច្បាប់និងគោលការណ៍ដែលត្រូវបាន គាំទ្រដោយអង្គការអន្តរជាត៕

អ្នកនាំពាក្យរាជរដ្ឋាភិបាល៖ កម្ពុជាប្ដេជ្ញាការពារអធិបតយ្យភាពជាតិ និងទឹកដី​យ៉ាង​ម៉ឺង​ម៉ាត់​មិន​អាច​ធ្វើ​សម្បទាន​បានឡើយ

2026/02/03 12:50:20 pm        451
Facebook Telegram Linkin
ប្រសាសន៍របស់ថ្នាក់ដឹកនាំកំពូលរបស់កម្ពុជាបានបញ្ជាក់យ៉ាងច្បាស់ជាបន្តបន្ទាប់ថា កម្ពុជា ប្ដេជ្ញា​គ្រប់​បែបយ៉ាងលើការ ការពារអធិបតយ្យភាពជាតិ និងបូរណភាពទឹកដីយ៉ាងម៉ឺងម៉ាត់ មិន​អាច​ធ្វើ​សម្បទានបាន និង​ជ្រើស​រើស​យក​ការ​ដោះស្រា​យ​បញ្ហា​ព្រំដែន​ដោយ​សន្តិវិធី​តាម​រយៈ​យន្ត​ការ​ដែល​មានស្រាប់តាមស្មារតីនៃអនុសញ្ញា សន្ធិសញ្ញា និងច្បាប់អន្តរជាតិ ខណៈដែល​កម្ពុជា​ និង​ថៃ​មានខ្សែព្រំដែនអន្តរជាតិដែលការពារយ៉ាងរឹងមាំដោយច្បាប់អន្តរជាតិ។ នេះបើតាមការ​បញ្ជាក់​របស់​អ្នក​នាំពាក្យរាជរដ្ឋាភិបាលកម្ពុជា។ តាមរយៈសន្និសីទសារព័ត៌មាននៅថ្ងៃទី៣ ខែកុម្ភៈ ឆ្នាំ២០២៦នេះ ឯកឧត្តម ប៉ែន បូណា អ្នក​នាំ​ពាក្យ​រាជរដ្ឋាភិបាលកម្ពុជា បានថ្លែងថា សម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រី​នៃ​កម្ពុជា ក្នុងជំនួបជាមួយពលរដ្ឋភៀសសឹកនៅខេត្តព្រះវិហារ កាលពីថ្ងៃទី៣១ ខែមករា​កន្លង​ទៅនេះ​ បានបានមានប្រសាសន៍ប្រាប់ប្រជាពលរដ្ឋភៀសសឹកថា ការទាមទារបូរណ​ភាព​ទឹក​ដី​របស់​យើង​នៅ​តែ​បន្ត​ធ្វើ​នៅ​គ្រប់​កន្លែង​ទាំង​អស់​ពោល​គឺ​រាជ​រដ្ឋាភិបាល​មិន​បាន​បោះ​បង់​ចោល​សិទ្ធិ​ការពារ​ទឹក​ដី​នោះឡើយ ហើយការចុះហត្ថ​លេខា​លើ​បទ​ឈប់​បាញ់​ក៏​មិន​មែន​ជា​ថ្នូរ​នឹង​ការ​កាត់​ទឹក​ដី​ឱ្យ​គេ​នោះឡើយ។ ចំណែកសម្តេចតេជោ ហ៊ុន សែន ប្រធានព្រឹទ្ធសភា និងជាប្រធាន​គណបក្ស​ប្រជាជន​កម្ពុជា​ដែល​ជា​គណបក្សកំពុងកាន់អំណាច បានគូសបញ្ជាក់ក្នុងសារកាលពីថ្ងៃទី៧ ខែមករា ឆ្នាំ២០២៦ថា កម្ពុជា​ប្តេជ្ញាចិត្តយ៉ាងមុតមាំក្នុងការខិតខំដើម្បីសម្រេចគោលដៅចម្បងរបស់ខ្លួន គឺការបញ្ចប់​ទុក្ខ​វេទនា​របស់ប្រជាជនទប់ស្កាត់ការបំផ្លិចបំផ្លាញ និងបន្តដើរលើមាគ៌ាឆ្ពោះទៅរកសន្តិភាព ដំណោះ​ស្រាយ​ប្រកប​ដោយយុត្តិធម៌ និងចីរកាល។ ទន្ទឹមនោះកម្ពុជានឹងមិនធ្វើសម្បទាននូវអធិបតេយ្យ ឬសេចក្តីថ្លៃថ្នូររបស់ខ្លួនឡើយ។សូមរម្លឹកថា ក្នុងឱកាសជំនួបជាមួយពលរដ្ឋភៀសសឹកនៅខេត្តព្រះវិហារ, សម្ដេចធិបតី នាយក​រដ្ឋ​មន្រ្ដី​ក៏​បានបញ្ជាក់ដែរថា ការងារវាស់វែង គ្រប់គ្រង និងដោះស្រាយបញ្ហាព្រំដែនរវាងកម្ពុជា និងថៃ គឺ​នៅ​តែធ្វើឡើងដោយគោរពតាមច្បាប់អន្តរជាតិដដែល ពីព្រោះព្រំដែនកម្ពុជា-ថៃ គឺជាព្រំ​ដែន​អន្តរជាតិ​ដែល​ត្រូវដោះស្រាយយន្តការទូតនិងបច្ចេកទេសព្រំដែន។ ទោះបីជាដំណោះ​ស្រាយ​តាម​ផ្លូវ​ច្បាប់​វា​យឺត​បន្តិច​មែន​តែ​វា​ជា​ដំណោះ​ស្រាយ​ដែល​ធានា​នូវ​សេចក្តី​សុខ​យូរ​អង្វែង​សម្រាប់​ទាំង​អស់​គ្នា​៕

រដ្ឋមន្ត្រីសុខាភិបាល ចុះពិនិត្យការបម្រើសេវាជូនពលរដ្ឋនៅមន្ទីរពេទ្យខេត្តឧត្តរមានជ័យ និង​មណ្ឌល​សុខភាព​សំរោង ខេត្តបន្ទាយមានជ័យ

2026/02/03 12:27:07 pm        199
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងថ្នាក់ដឹកនាំក្រសួង កាល​ពី​ព្រឹក​ថ្ងៃ​ទី​១ ខែកុម្ភ ឆ្នាំ២០២៦ បានអញ្ជើញចុះពិនិត្យការបម្រើសេវាសុខាភិបាល និងសួរសុខទុក្ខ ក្តីនឹក​រលឹក​ ដល់មន្រ្តីសុខាភិបាល នៅមន្ទីរពេទ្យខេត្តឧត្តរមានជ័យ និងមណ្ឌលសុខភាពសំរោង ខេត្ត​ឧត្តរ​មាន​ជ័យ។ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តី បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ មន្រ្តី និងបុគ្គលិកសុខាភិបាល នៃមន្ទីរសុខាភិបាលខេត្តឧត្តរមានជ័យ ដែល​ខិត​ខំ​ក្នុង​ការ​បម្រើ​សេវា​ជូន​ប្រជាពលរដ្ឋ និងលះបង់សុវត្ថិភាពផ្ទាល់ខ្លួន ដោយឆន្ទៈមោះមុត ក្នុងនាមជា​កង​ទ័ព​អាវស ដោយមិនទុកឱ្យប្រជាពលរដ្ឋណាម្នាក់ មិនទទួលបានការថែទាំព្យាបាលនោះឡើយ។ ឯកឧត្តម បានផ្តល់ជាអនុសាសន៍មួយចំនួនដល់ថ្នាក់ដឹកនាំ មន្រ្តីសុខាភិបាលមន្ទីរពេទ្យខេត្ត និង​មណ្ឌល​សុខភាព ត្រូវផ្តោតសំខាន់ក្នុងការលើកកម្ពស់សុខភាព មាតា ទារក និងកុមារ និង​ជា​ពិសេស​សុខ​ភាពផ្លូវចិត្ត។ ក្នុងនោះឯកឧត្តមបានផ្តាំផ្ញើដល់មន្រ្ដីសុខាភិបាល គ្រូពេទ្យ ត្រូវចេះ​សាមគ្គី​គ្នា មានភាពនឹងនរ ទឹកចិត្តមោះមុត ស្មារតីទទួលខុសត្រូវខ្ពស់ និងបន្តខិតខំ​ប្រឹង​ប្រែង​លើក​ស្ទួយស​មត្ថភាពសហភាតរៈ និងអង្គភាពឱ្យកាន់តែមានភាពរីកចម្រើនរុងរឿង «ត្រូវ​ធ្វើ​អ្វី​ដែល​មាន​ក្នុងដៃ ឱ្យអស់ពីលទ្ធភាព ហើយលើសពីធម្មតា»។តមកនារសៀលថ្ងៃដដែល ឯកឧត្តមរដ្ឋមន្រ្តីក្រសួងសុខាភិបាល បានអញ្ជើញ​ចុះ​ពិនិត្យ​ការ​បម្រើ​សេវា​សុខាភិបាល និងសួរសុខទុក្ខ សំណេះសំណាល នៅមណ្ឌលសុខភាពចុងកាល់ ខេត្ត​ឧត្តរ​មាន​ជ័យ​។ ឯកឧត្តមសាស្រ្តាចារ្យរដ្ឋមន្រ្តី បានកោតសរសើរនូវការ ខិតខំប្រឹងប្រែង ការប្តេជ្ញាចិត្ត និង​ការស្មោះស្ម័គ្ររបស់មន្ត្រីសុខាភិបាល ក្នុងការបម្រើសេវាសុខភាពជូនប្រជាពលរដ្ឋ ក្នុង​អំឡុង​ពេល​រង​ផលប៉ះពាល់ដោយជម្លោះព្រំដែនកម្ពុជា-ថៃ។បន្ទាប់មកនៅរសៀលថ្ងៃដដែល ឯកឧត្តមរដ្ឋមន្រ្តី បានចុះពិនិត្យនៅមន្ទីរពេទ្យបង្អែកប៉ោយប៉ែត ខេត្ត​បន្ទាយមានជ័យ ។ ឯកឧត្តមសាស្រ្តាចារ្យរដ្ឋមន្រ្តី បានណែនាំដល់មន្រ្តីសុខាភិបាល ត្រូវ​បន្ត​ពង្រឹង​សមត្ថភាពបន្ថែមទៀត តាមរយៈការបណ្តុះបណ្តាលបន្តក្នុងជំនាញបច្ចេកទេស និងភាព​ជា​អ្នក​ដឹក​នាំ ដើម្បីពង្រឹងអង្គភាពឱ្យកាន់តែល្អប្រសើរឡើងថែមទៀត។ ឯកឧត្តមសាស្រ្តាចារ្យ សង្ឃឹម​ថា ​មន្ទីរពេទ្យនេះ នឹងក្លាយទីកន្លែងមានការចូលរួម ភាពជាអ្នកដឹកនាំ នាពេលខាងមុខ៕ អត្ថបទ រដ្ឋា 

ក្រសួងការងារ​នឹង​ធ្វើ​តេស្ត​ជំនាញ​ ដើម្បី​បើក​ច្រក​ឱ្យ​ពលរដ្ឋ​ដែល​មាន​ជំនាញ​ងាយ​ស្រួល​ស្វែង​រក​ការងារ​ធ្វើ

2026/02/03 12:12:35 pm        248
Facebook Telegram Linkin
ស្របតាមការយកចិត្តទុកដាក់របស់សម្ដេចនាយករដ្ឋមន្ត្រី ក្រសួងការងារ និង​បណ្តុះ​បណ្តាល​វិជ្ជា​ជីវៈ​ នឹងរៀបចំការវាយតម្លៃការសិក្សាពីមុន (RPL) ឬហៅថា ការធ្វើតេស្តជំនាញ ដើម្បី​ផ្ដល់​វិញ្ញា​បន​បត្រ​ទទួលស្គាល់ជំនាញជាផ្លូវការជូនដល់ប្រជាពលរដ្ឋ ជាពិសេសអតីតពលករមកពីថៃ លើ​វិស័យ​សំណង់ ចាប់ពីខែកុម្ភៈ ឆ្នាំ២០២៦នេះតទៅ។មានប្រសាសន៍ប្រាប់ព័ត៌មាន ប៊ីធីវី នៅព្រឹកថ្ងៃទី៣ ខែកុម្ភៈនេះ តាមសារអេឡិចត្រូនិក លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា សម្រាប់​ការ​ងារ​ខាង​​លើ​នេះ ប្រជាពលរដ្ឋទាំងអស់ ជាពិសេសបង​ប្អូន​អតីត​ពលករ​ត្រឡប់​មក​ពី​ប្រទេស​ថៃ​ដែ​ល​មាន​​បទ​ពិសោធន៍ស្រាប់ក្នុងវិស័យសំណង់ ក្រសួងនឹងរៀបចំការវាយតម្លៃការសិក្សាពីមុន (RPL) ដើម្បី​ផ្ដល់វិញ្ញាបនបត្រទទួលស្គាល់ជំនាញជាផ្លូវការលើវិស័យសំណង់ចំនួន ៨មុខជំនាញ ដោយ​ឥត​គិត​ថ្លៃ ចាប់ពីខែកុម្ភៈ ឆ្នាំ២០២៦នេះតទៅ។ ខណៈដែលការងារទាំងនេះ ក្រសួងបាន​រៀប​ចំ​រួច​រាល់ និងរៀបចំឯកសារ និងរង់ចាំការសម្រេចយកថ្ងៃឱ្យទៅប្រឡង RPL ផ្ទាល់តែម្តង។អ្នកនាំពាក្យ បានបញ្ជាក់ថា RPL ឬក៏ការធ្វើតេស្តវាយតម្លៃទទួលស្គាល់ជំនាញ គឺជា​រឿង​មួយ​មាន​ភាព​ចាំ​បាច់បំផុត ហើយក៏ជាគំនិតផ្តួចផ្តើម ផ្លាស់ប្តូរដោយភ្ជាប់គន្លាតរវាងជំនាញក្រៅផ្លូវការ និង​គុណ​វុឌ្ឍ​ផ្លូវការ ដែលជាដំណើរការនៃវាយតម្លៃ និងបញ្ជាក់​ជំនាញ​ផ្តល់​ជូន​បុគ្គល​ម្នាក់ៗ​ដែល​ទទួល​ស្គាល់​ជាផ្លូវការដោយមិនចាំបាច់សិក្សាឡើងវិញ ដើម្បីបង្កើនលទ្ធភាពការងារ គាំទ្រ​ដល់​ការ​រៀន​សូត្រ​ពេញមួយជីវិត និងការកំណត់បាននូវសុពលភាពនៃកម្លាំងជំនាញផងដែរ។ លោក​បានបន្តទៀតថា ដូច្នេះកម្មវិធីវាយតម្លៃទទួលស្គាល់ជំនាញនេះ និងការ​វាយ​តម្លៃ​ផ្អែក​លើ​សមត្ថ​ភាពទទួលស្គាល់ការសិក្សាដែលមានពីមុន គឺពិតជាជំរើសមួយ​ដ៏​ល្អបំផុតស​ម្រាប់​បង​ប្អូន​កម្មករ​និយោជិត ក៏ដូចជាអ្នកប្រកបរបរសេដ្ឋកិច្ចក្រៅប្រព័ន្ធ ក៏ដូចជាប្រជា​ពលរដ្ឋ​ត្រឡប់​មក​ពី​ប្រទេស​ថៃ​ផងដែរ។ សម្រាប់អតីតពលករ គឺក្រសួងផ្តល់ការវាយតម្លៃទៅលើវិស័យសំណង់មុនគេ គឺ​ដើម្បីឱុ្យបងប្អូនមាន​សញ្ញា​បត្រ​បញ្ជាក់​ពី​សមត្ថភាព​ដែល​បាន​ប្រកបរបរ​នៅ​ក្នុង​ប្រទេស​ជិត​ខាង​ជា​ច្រើន​ឆ្នាំម​កហើយ និងដើម្បីឱ្យពួក​គាត់​មាន​សមត្ថ​ភាព​កម្រិត​ណា​នៅ​ក្នុង​វិស័យ​សំណង់​ជំនាញ​៨​មុខ ​មានដូចជា៖ ការលាយបាយ អ, ការបង្គុំដែក និងក្រាលពុម្ពជាដើម ដែលស្ថិត​ក្នុង​ជំនាញ​សំណង់​នេះ​។បើតាមអ្នកនាំពាក្យ ទីតាំងដែលនឹងត្រូវរៀបចំប្រឡងមានចំនួន ៨ទីតាំង ស្ថិតនៅរាជធានីភ្នំពេញ ខេត្តសៀមរាប និងខេត្តបាត់ដំបង។ លោកបានអំពាវនាវដល់ប្រជាពលរដ្ឋ អតីត​ពលករ​មក​ពី​ថៃ អ្នកដែលចង់បានសញ្ញាបត្រ ឬមានជំនាញរួចហើយប៉ុន្តែមិនទាន់មានសញ្ញាបត្រ មិន​ទាន់​មាន​ការ​បញ្ជាក់ជាដើម ដើម្បីជាស្ពានក្នុងការបង្ហាញពីគុណវុឌ្ឍរបស់ខ្លួន ឬជាការបង្ហាញ​ពី​សមត្ថ​ភាព​របស់​ខ្លួន ក៏ដូចជា​ដើម្បី​ទាម​ទារ​សមត្ថភាព​របស់​ខ្លួន​ក្នុង​ការ​ធ្វើ​ការងារ​ដើម្បី​ទទួល​បាន​ប្រាក់​បៀវត្សរ៍​កាន់​តែខ្ពស់ ក៏ដូចជាដើម្បីទទួលបានតំណែងល្អជាដើម សូមអញ្ជើញចូល​រួម​ធ្វើ​តេស្ត​សមត្ថ​ភាព​នេះបានជាមួយក្រសួងការងារ និងបណ្តុះបណ្តាលវិជ្ជាជីវៈ ឬទាក់ទងតាម​រយៈ​លេខ​១២៩៧ ដើម្បីទទួលបានព័ត៌មានកាន់តែលម្អិត៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

កីឡាករ-កីឡាការិនីវាយកូនបាល់មួយចំនួននឹងពហិការមិនចូលរួម French Open ដោយសារ​បញ្ហាប្រាក់រង្វាន់
05/06/2026 02:05 PM
Facebook Telegram Linkin
មេបញ្ជាការកងទ័ពអាកាសអ៊ីស្រាអែលនិយាយថា យោធាត្រៀមខ្លួនសម្រាប់ការដាក់ពង្រាយទៅកាន់អ៊ីរ៉ង
05/06/2026 02:05 PM
Facebook Telegram Linkin
ប្រធានាធិបតីអ៊ីរ៉ង់និយាយថា ទីក្រុងតេអេរ៉ង់ត្រៀមខ្លួនរួចជាស្រេចសម្រាប់ការសន្ទនា ក្នុងក្របខណ្ឌច្បាប់អន្តរជាតិ
05/06/2026 01:05 PM
Facebook Telegram Linkin
តំណាងសិស្ស-និស្សិតនៅកូវ៉ែត រំពឹងវគ្គផ្ដាច់ព្រ័ត្រ ACGL នឹងធ្វើឲ្យពិភពអារ៉ប់ស្គាល់ច្បាស់ពីក្លិប និង​ប្រទេសកម្ពុជា
05/06/2026 01:05 PM
Facebook Telegram Linkin
កងទ័ពរបស់ប្រទេសឆាដ និយាយថាកងកម្លាំងរបស់ខ្លួន២៣នាក់ស្លាប់ក្នុងការវាយប្រហារពីក្រុមបូកូ ហារ៉ាម
05/06/2026 12:05 PM
Facebook Telegram Linkin
ការស្ទង់មតិបង្ហាញថា ប្រជាជនអ៊ីស្រាអែលភាគច្រើនប្រឆាំងការបញ្ចប់សង្គ្រាមជាមួយអ៊ីរ៉ង់
05/06/2026 12:05 PM
Facebook Telegram Linkin
អាមេរិក៖ កិច្ចព្រមព្រៀងសន្តិភាពអ៊ីស្រាអែល-លីបង់ អាចឈានដល់បាន ប៉ុន្តែក្រុមហេសបូឡាគឺជាបញ្ហា
05/06/2026 12:05 PM
Facebook Telegram Linkin
អគ្គិភ័យដ៏ធំមួយនៅផ្សារទំនើបប្រទេសអ៊ីរ៉ង់ បានបណ្តាលឲ្យមនុស្សស្លាប់ និងរងរបួស
05/06/2026 12:05 PM
Facebook Telegram Linkin
ចិនទទួលស្វាគមន៍រដ្ឋមន្ត្រីការបរទេសអ៊ីរ៉ង់ ប៉ុន្មានថ្ងៃមុនដំណើរទស្សនកិច្ចរបស់លោក Trump
05/06/2026 12:05 PM
Facebook Telegram Linkin
ពលរដ្ឋប៉ាឡេស្ទីនក្នុងដែនដីហ្កាហ្សានៅតែបន្តស្លាប់ ខណៈអ៊ីស្រាអែលវាយប្រហារឥតឈប់ទោះមានបទឈប់បាញ់
05/06/2026 12:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.