BTV NEWS

ផ្ទះទេវតា១ ខ្នងដោយមានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ត្រូវបានប្រគល់ជូនពលរដ្ឋខ្វះខាតជីវភាពនៅខេត្តកំពង់ធំ

ក្រសួងសុខាភិបាលចេញសេចក្តីប្រកាសព័ត៌មានស្តីពីការការពារខ្លួនពីការឆ្លងវីរុសហាន់តា (Hantavirus)

ក្រសួងការងារ នាំយកឱកាសការងារពិសេសទាំងក្នុង និងក្រៅប្រទេសជូនអតីតពលករ និងយុវជននៅក្នុងខេត្តឧត្តរមានជ័យ

សម្តេចប្រធានរដ្ឋសភា អំពាវនាវដល់ពលរដ្ឋបន្តរក្សាស្មារតីសាមគ្គីជាតិ គាំទ្ររាជរដ្ឋាភិបាល ដើម្បីប្រែក្លាយការគំរាមកំហែង និងបញ្ហាប្រឈមនានា ទៅជាឱកាសពង្រឹងសេដ្ឋកិច្ច និងខឿនការពារជាតិ

ព័ត៌មានជាតិ

ប្រមុខការទូតកម្ពុជា និងរដ្ឋមន្ត្រីការបរទេសទី២ព្រុយណេពិភាក្សាការងារជំរុញកិច្ចសហប្រតិបត្តិការទ្វេភាគីឱ្យកាន់តែរីកចម្រើន

ក្នុងបរិយាកាសដ៏ស្និទ្ធស្នាលបំផុត នៅថ្ងៃទី២៨ ខែមករា ឆ្នាំ២០២៦នេះ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានជួបពិភាក្សាការងារទ្វេភាគីជាមួយ ឯកឧត្តម Dato Erywan Pehin Yusof រដ្ឋមន្ត្រីការបរទេស ទី២ នៃប្រទេសព្រុយណេ នៅកោះសេប៊ូ។ក្នុងឱកាសនេះ រដ្ឋមន្ត្រីទាំងពីរបានផ្លាស់ប្តូរការសួរសុខទុក្ខគ្នាទៅវិញទៅមក ដែលសបញ្ជាក់ឱ្យឃើញពីស្មារតីមិត្តភាពយ៉ាងស៊ីជម្រៅ និងការជឿទុកចិត្តគ្នាទៅវិញទៅមក ក្នុងគោលដៅជំរុញកិច្ចសហប្រតិបត្តិការទ្វេភាគីឱ្យកាន់តែរីកចម្រើនសម្រាប់ប្រជាជន និងប្រទេសទាំងពីរ។ ភាគីទាំងពីរក៏បានពិភាក្សាអំពីការត្រៀមរៀបចំដំណើរទស្សនកិច្ចផ្លូវការរបស់ ឯកឧត្តមឧបនាយករដ្ឋមន្ត្រី ប្រាក់ សុខុន ទៅកាន់ប្រទេសព្រុយណេ ដែលគ្រោងនឹងប្រព្រឹត្តទៅនៅក្នុងឆមាសទី១ នៃឆ្នាំ២០២៦នេះ៕

ក្រសួងបរិស្ថាន៖ សារធាតុគីមីជាង ១៦ ០០០ ប្រភេទត្រូវបានប្រើប្រាស់ដើម្បីផលិតចេញជាផលិតផលប្លាស្ទិកក្នុងនោះមួយភាគបួន គឺជាសារធាតុគីមីគ្រោះថ្នាក់ចំពោះសុខភាពមនុស្ស និងប្រព័ន្ធអេកូឡូស៊ី

សារធាតុគីមីជាង ១៦ ២៣៥ ប្រភេទ ត្រូវបានប្រើក្នុងការផលិតប្លាស្ទិក។ អ្នកស្រាវជ្រាវអាចកំណត់អត្តសញ្ញាណ និងប្រមូលសារធាតុគីមី ទាំងនោះ ក្នុងការផលិតប្លាស្ទិកបានត្រឹមតែ ១២ ៦៥៨ ប្រភេទប៉ុណ្ណោះ ក្រៅពីនេះមិនទាន់មានព័ត៌មាន និងអាចកំណត់លក្ខណៈសម្បត្តិអំពីសមាសធាតុផ្សំរបស់វានៅឡើយ។ យោងតាមមូលដ្ឋានទិន្នន័យសកលចេញផ្សាយកាលពីពេលថ្មីៗ ដោយកម្មវិធីឈ្មោះ PlastChem និងបានដកស្រង់ផ្សាយដោយអគ្គនាយកដ្ឋានទទួលបន្ទុកបរិស្ថាននៃសហភាពអឺរ៉ុប បានឱ្យដឹងថា ក្នុងចំណោមសារធាតុគីមីចម្រុះ ដែលអាចកំណត់អត្តសញ្ញាណបាន សម្រាប់ប្រើប្រាស់ក្នុងការផលិតជាប្លាស្ទិក អ្នកវិទ្យាសាស្រ្តបានរកឃើញសារធាតុគីមីគ្រោះថ្នាក់ រហូតដល់មួយភាគបួនរួចទៅហើយ។ វាក៏កំពុងត្រូវបានប្រើប្រាស់ និងបោះចោលទៅក្នុងបរិស្ថាន និងកំពុងបង្កគ្រោះថ្នាក់បំផុត ចំពោះសុខភាពមនុស្ស និងប្រព័ន្ធអេកូឡូស៊ី។ ប្រភពដដែលខាងលើបានឱ្យដឹងថា សារធាតុគីមីគួរឲ្យព្រួយបារម្ភជាច្រើន មិនទាន់ត្រូវបានគ្រប់គ្រងនៅកម្រិតសកលនៅឡើយទេ វាកំពុងស្ថិតក្នុងសម្ភារប្រើប្រាស់ដោយប្លាស្ទិក ដែលអាចចូលទៅក្នុងខ្លួនមនុស្ស ជាមួយភាពស៊ាំ រឹងមាំ និងអាចមានរយៈពេលយូរ ក្នុងខ្លួនមនុស្ស។សូមបញ្ជាក់ថា ប្លាស្ទិកបញ្ចេញសារធាតុពុលនិងបង្កគ្រោះថ្នាក់ នៅគ្រប់ដំណាក់ កាលនៃវដ្តជីវិតរបស់វា គិតចាប់ផ្តើមពីការផលិត ការប្រើប្រាស់ ការកែច្នៃឡើងវិញ និងរហូតដល់ការគ្រប់គ្រងសំណល់របស់វា។ សារធាតុគីមីចម្រុះ រួមទាំងលម្អងប្លាស្ទិក នៅពេលធ្លាក់ចូលទៅក្នុងខ្លួនមនុស្ស បង្កឱ្យមានជំងឺជាច្រើនក្នុងមានទាំងជំងឺបន្តពូជ ការអភិវឌ្ឍសរសៃប្រសាទ ភាពស៊ាំ និងជំងឺមេតាប៉ូលីស។ អ្នកវិទ្យាសាស្រ្តបានឱ្យដឹងបន្ថែមថា ការប្រើប្រាស់ប្លាស្ទិកចាស់ៗឡើងវិញ ក៏ជាបញ្ហាផងដែរ ពីព្រោះវត្ថុធាតុដើមចាស់ៗ នៅពេលរលួយ ដែលបង្កើនហានិភ័យនៃការបញ្ចេញសារធាតុគីមី។សូមបញ្ជាក់ថាការសិក្សាកន្លងមកនេះ បានជំរុញឱ្យមានការគាំទ្រ ដល់ការពង្រឹងការគ្រប់គ្រងសារធាតុគីមី និងបង្កើនតម្លាភាព ក្នុងការផលិតសម្ភារជំនួសសារធាតុគ្រោះថ្នាក់ ដោយជម្រើសសម្ភារមានសុវត្ថិភាព និងកែច្នៃផលិតប្លាស្ទិកឲ្យសាមញ្ញ និងមិនមានជាតិពុល ដើម្បីឆ្ពោះទៅរកសេដ្ឋកិច្ចប្លាស្ទិកចក្រា៕

ក្រសួងអប់រំ និង KOICA បន្តជំរុញការប្រើប្រាស់បច្ចេកវិទ្យា ICT សម្រាប់ការសិក្សាមុខវិជ្ជា STEM

ក្រសួងអប់រំ យុវជន និងកីឡា ដោយមានកិច្ចសហការពីមន្ត្រីជំនាញនៃ KOICA ប្រទេសកូរ៉េ បានអនុវត្តគម្រោងរួមគ្នា ដោយផ្តោតលើការប្រើប្រាស់បច្ចេកវិទ្យា ICT ក្នុងជួយដល់ដំណើរការសិក្សាលើមុខវិជ្ជា STEM សម្រាប់សិស្សកម្រិតអនុវិទ្យាល័យ។ បច្ចុប្បន្នក្រសួងអប់រំ និង KOICA បាននឹងកំពុងអនុវត្តគម្រោងមួយនេះលើសាលារៀនគោលដៅចំនួន ២០។ការប្រើប្រាស់បច្ចេកវិទ្យា ICT ក្នុងជួយដល់ដំណើរការសិក្សាលើមុខវិជ្ជា STEM សម្រាប់សិស្សកម្រិតអនុវិទ្យាល័យ នេះ បច្ចុប្បន្នបានអនុវត្តលើពីរកម្រិតថ្នាក់រួចមកហើយ គឺថ្នាក់ទី ៧ និងថ្នាក់ទី៨ លើសាលារៀនគោលដៅទាំង ២០ នៅខេត្តកណ្ដាល ព្រៃវែង កំពង់ចាម និងខេត្តតាកែវ។ បច្ចុប្បន្នមន្ត្រីជំនាញនៃក្រសួងអប់រំ និងមន្ត្រីជំនាញនៃ KOICA កំពុងធ្វើការបណ្ដុះបណ្ដាលលើគរុនិស្សិត ក៏ដូចជាគ្រូបង្រៀនថ្នាក់ទី ៩ មកពីសាលារៀនគោលដៅទាំង ២០ លើសៀវភៅគោលដែលត្រូវបានរៀបចំឡើង ក៏ដូចជាការប្រើប្រាស់បច្ចេកវិទ្យា ICT ដែលជាជំនួយដល់ការបង្រៀនមុខវិជ្ជា STEM។ លោក ជ សុភា ប្រធានដេប៉ាតឺម៉ង់ ICT នៃវិទ្យាស្ថានគរុកោសល្យ រាជធានីភ្នំពេញ លើកឡើងថា វាជាភាពចាំបាច់ក្នុងការប្រើប្រាស់ ICT ក្នុងការជួយដល់ការយល់ដឹងរបស់សិស្សលើ មុខវិជ្ជាទាំង ៥ ដែលរួមមានរូបវិទ្យា ជីវវិទ្យា គីមីវិទ្យា ផែនដីវិទ្យា និងគណិតវិទ្យា។ លោកបញ្ជាក់ថា ការប្រើប្រាស់ ICT ជាជំនួយនេះ នឹងជួយឱ្យសិស្សយល់ដឹងកាន់តែស៊ីជម្រៅ តាមរយៈការអនុវត្តផ្ទាល់លើទូរស័ព្ទដៃ ចៀសជាងការសិក្សាត្រឹមតែទ្រឹះស្ដី។សម្រាប់គរុនិស្សិត និងគ្រូបង្រៀនថ្នាក់ទី៩ មកពីសាលារៀនគោលដៅទាំង ២០ ដែលកំពុងទទួលបានការបណ្ដុះបណ្ដាលរយៈពេលប៉ុន្មានថ្ងៃមកនេះ លើកឡើងថា នេះជាការបណ្ដុះបណ្ដាលដែលមានអត្ថប្រយោជន៍ជាច្រើន សម្រាប់ការផ្ទេរចំណេះដឹងទៅកាន់សិស្ស ជួយឱ្យសិស្សងាយសិក្សាលើមុខវិជ្ជា STEM ទាំងនោះ។ សម្រាប់គម្រោងមួយនេះ មានឈ្មោះជាផ្លូវការថា គម្រោងកសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សា បឋមភូមិ នៅកម្ពុជា។ ការអនុគម្រោងនេះ មានការចាប់ផ្ដើមពីឆ្នាំ២០២១ ដោយគ្រោងបញ្ចប់នៅចុងឆ្នាំ ២០២៦នេះ។ ចំពោះទីតាំងអនុវត្តគម្រោង រួមមានមជ្ឈមណ្ឌលគរុកោសល្យភូមិភាគ ៤ និងសាលារៀនគោលដៅទាំង ២០ ដែលស្ថិតនៅខេត្តកណ្ដាល តាកែវ ព្រៃវែង និងខេត្តកំពង់ចាម។ជាការគ្រោងក្រសួងអប់រំ ក៏នឹងចែករំលែកសៀវភៅគោលទាំង ៣កម្រិតថ្នាក់ និងធ្វើការបណ្ដុះបណ្ដាលបន្ថែម ទៅកាន់សាលារៀនដទៃ ក្រៅពីសាលារៀនគោលដៅផងដែរ៕ អត្ថបទ៖ គឹមហុក

ពលរដ្ឋខ្មែរនៅបរទេស៖ ការចូលជាសមាជិកក្រុមប្រឹក្សាសន្តិភាព នឹងអាចការពារកម្ពុជាពីការបង្កជម្លោះ

បន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានយល់ព្រមតាមសំណើរបស់លោកដូណាល់ ត្រាំ ប្រធានាធិបតីសហរដ្ឋអាម៉េរិក ចូលរូមជាសមាជិកស្ថាបនិកនៃក្រុមប្រឹក្សាសន្តិភាព ប្រជាពលរដ្ឋខ្មែររស់នៅបរទេស បានបង្ហាញការគំាទ្រ និងសង្ឃឹមថា ការចូលរួមជាសមាជិកនេះ នឹងអាចការពារប្រ ទេសកម្ពុជាមិនឱ្យប្រទេសជិតខាងមកបង្កជម្លោះព្រំដែនជាមួយបានទៀតជាពិសេសប្រទេសថៃ។តាមរយៈវីឌីអូដែលBTVទទួលបាននៅព្រឹកថ្ងៃទី២៨ខែមករា ឆ្នាំ២០២៦នេះ ពលរដ្ឋខ្មែរកំពុងរស់ នៅរដ្ឋTennessee សហរដ្ឋអាម៉េរិក បានលើកឡើងថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដែលបានសម្រេចចិត្តចូលរួមជាសមាជិកស្ថាបនិក នៃ ក្រុមប្រឹក្សាសន្តិភាព ស្របតាមការអញ្ជើញរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក គឺជា ការសម្រេចចិត្តដ៏ត្រឹមត្រូវ ដោយការចូលរួមនេះ គឺបង្ហាញពីឆន្ទៈរបស់ប្រទេសកម្ពុជាក្នុងការគាំទ្រ និងរួមចំ ណែកដល់ការលើកកម្ពស់ការរក្សាសន្តិភាពជាសកល។ លើសពីនេះ ពលរដ្ឋទាំងនោះ សង្ឃឹមថា ការចូល រួមជាសមាជិកក្រុមប្រឹក្សាសន្តិភាព នឹងអាចការពារប្រទេសកម្ពុជាមិនឲ្យប្រទេសជិតខាងមកបង្កជម្លោះព្រំ ដែនជាមួយ ជាពិសេសប្រទេសថៃ។សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី២៧ ខែមករា ម្សិលមិញ បានបញ្ជាក់ថា ការសម្រេចចូលរួមជាសមាជិកស្ថាបនិកនៃក្រុមប្រឹក្សាសន្តិភាព (The Board of Peace) តាមការអញ្ជើញ របស់ឯកឧត្តមប្រធានាធិបតីសហរដ្ឋអាមេរិក Donald J. Trump គឺដើម្បីបង្ហាញពីឆន្ទៈរបស់កម្ពុជាក្នុង ការគាំទ្រ និងរួមចំណែកដល់ការលើកកម្ពស់ការរក្សាសន្តិភាពសកល។ សុច្ឆន្ទៈ ស្រឡាញ់សន្តិភាព ការគាំ ទ្រ និងរួមចំណែកដល់ការកសាង និងរក្សាសន្តិភាព គឺជាគោលការណ៍ដែលកម្ពុជាតែងតែប្រកាន់ខ្ជាប់ជា រៀងរហូតមក ជាពិសេសតាមរយៈការបញ្ជូនកងកម្លាំងរក្សាសន្តិភាព ក្រោមឆត្រអង្គការសហប្រជាជាតិ ទៅបំពេញបេសកកម្មនៅតាមបណ្តាប្រទេសមួយចំនួនដែលរងគ្រោះដោយសារសង្រ្គាម៕ អត្ថបទ៖ ទូច សោភ័ណ

មន្រ្ដីជំនាញក្រសួងធនធានទឹក ចុះពិនិត្យការសាងសង់ហេដ្ឋារចនាសម្ព័ន្ធធារាសាស្រ្តសម្រាប់សហគមន៍កសិកម្មទំនើប ក្នុងភូមិសាស្ដ្រខេត្តពោធិ៍សាត់ ខណៈសម្រេចបានប្រមាណ៨០%

នៅថ្ងៃទី២៨ ខែមករា ឆ្នាំ២០២៦ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ និងជានាយកអង្គភាពគ្រប់គ្រងគម្រោង ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម អញ្ជើញចុះពិនិត្យជាក់ស្តែងវឌ្ឍនភាពការងារសាងសង់គម្រោងអភិវឌ្ឍន៍ហេដ្ឋារចនាសម្ព័ន្ធធារាសាស្រ្ត សម្រាប់សហគមន៍កសិកម្មទំនើបម្ទេសដំណាក់ត្រយឹង ស្ថិតក្នុងភូមិប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវ៉ាញ ខេត្តពោធិ៍សាត់ ដែលទទួលបានហិរញ្ញប្បទានពីធនាគារពិភពលោក (WB) តាមរយៈគម្រោងពិពិធកម្មកសិកម្មកម្ពុជា។ សូមជម្រាបថា គម្រោងអភិវឌ្ឍន៍ហេដ្ឋារចនាសម្ព័ន្ធធារាសាស្រ្ត សម្រាប់សហគមន៍កសិកម្មទំនើបម្ទេសដំណាក់ត្រយឹង បាននិងកំពុងអនុវត្តការងារសាងសង់ដោយក្រុមហ៊ុន Peng Sour Construction Co., Ltd ដែលគិតមកដល់ពេលនេះ លទ្ធផលការងារសាងសង់ជារួមសម្រេចបានប្រមាណ ៨០%។ក្នុងឱកាសនោះ ឯកឧត្តមរដ្ឋលេខាធិការប្រចាំការ បានវាយតម្លៃខ្ពស់ចំពោះវឌ្ឍនភាពការងារដែលភាគីក្រុមហ៊ុនសម្រេចបាន និងបានណែនាំដល់ក្រុមហ៊ុនឱ្យបន្តបង្កើនការយកចិត្តទុកដាក់បន្ថែមទៀតលើគុណភាពសំណង់ បទដ្ឋានបច្ចេកទេស និងជំរុញឱ្យបង្កើនល្បឿនក្នុងការអនុវត្តកិច្ចការបន្ថែមទៀត ព្រមទាំងសំណូមពរដល់មន្ទីរធនធានទឹក និងឧតុនិយម និងសហគមន៍កសិកម្មទំនើបឱ្យបន្តសហការ និងជួយសម្របសម្រួលក្នុងករណីចាំបាច់ណាមួយ ដើម្បីឱ្យការអនុវត្តគម្រោងសម្រេចបានជោគជ័យតាមផែនការកំណត់៕

ពលរដ្ឋប្រើបណ្ណ ប.ស.ស ថែទាំសុខភាពកើនឡើងនឹងរួមចំណែកសម្រេចគោលដៅគ្របដណ្តប់សេវាសុខភាពជាសកល កាត់បន្ថយភាពក្រីក្រ

របាយការណ៍ក្រសួងសុខាភិបាលបានបង្ហាញថា ក្នុងឆ្នាំ២០២៥ ចំនួនពលរដ្ឋប្រើប្រាស់បណ្ណ ប.ស.ស និងបណ្ណមូលនិធិសមធម៌ ចូលទទួលសេវាថែទាំសុខភាព មានការកើនឡើងខ្លាំង ហើយពលរដ្ឋក៏បានបង្ហាញការយល់ដឹង ការមានបណ្ណ ប.ស.ស និងបណ្ណមូលនិធិសមធម៌ បណ្ណក្រីក្រ បណ្ណងាយរង ហានិភ័យ គឺបានពិតជាបានរួចំណែកខ្លាំងលើកកម្ពស់សុខភាពពលរដ្ឋ ការផ្តល់ផលចំណេញខ្លាំង និងការកាត់បន្ថយភាពក្រីក្ររបស់ប្រជាពលរដ្ឋ។ពលរដ្ឋទទួលសេវាសុខាភិបាល នៅមន្ទីរពេទ្យជ័យជំនះ ខេត្តកណ្តាល បានថ្លែងប្រាប់BTV នៅថ្ងៃ ទី២៨ ខែមករា នេះ ថាបច្ចុប្បន្ន ពលរដ្ឋទាំងអស់គ្នាមានការជឿជាក់ខ្ពស់លើប្រព័ន្ធសុខាភិបាលកម្ពុជា ហើយតាមរយៈការប្រើប្រាស់បណ្ណ ប.ស.ស បណ្ណមូលនិធិសមធម៌ បណ្ណក្រីក្រ និងបណ្ណងាយរងហានិភ័យ ចូលពិនិត្យសុខភាព ព្យាបាលជំងឺនៅមូលដ្ឋានសុខាភិបាល ដោយមិនមានការបង់ថ្លៃនេះ គឺរួមចំណែក ខ្លាំងលើកកម្ពស់សុខភាពរបស់ប្រជាពលរដ្ឋ ជាពិសេស ការហ៊ានទៅជួបពេទ្យច្រើនដង នៅពេលគេមាន បញ្ហាសុខភាព ឈឺធ្ង្ងន់ ឬឈឺស្រាលនានា។តាមរបាយការណ៍ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតត្រឹម ឆ្នាំ២០២៥ នេះ បេឡាជាតិសន្តិសុខសង្គម ប.ស.ស មានសមាជិកសរុបចំនួនជាង ៣លាន ៥៣៦ពាន់ ៥០៩នាក់ ហើយបើតាមរបាយការណ៍ក្រសួងសុខាភិបាល បានឲ្យដឹងថា នៅក្នុងឆ្នាំ២០២៥ មានពលរដ្ឋប្រើប្រាស់ បណ្ណ ប.ស.ស ចូលពិនិត្យសុខភាព ព្យាបាលជំងឺ មានចំនួនជាង ៨លាន ១០៣ពាន់ ៣៨៥ករណី កើនឡើង៣% ប្រៀបធៀបឆ្នាំ២០២៤។ ដោយឡែក នៅក្នុងចំណោមពលរដ្ឋប្រើប្រាស់សេវាសុខភាព នៃមូលនិធិសមធម៌ ចំនួនជិត៤លាន ៦៩៦ពាន់នាក់ ក្នុងរយៈពេល១០ខែ ក្នុងឆ្នាំ២០២៥ គឺមានពលរដ្ឋបានចូលពិនិត្យសុខភាព ព្យាបាលជំងឺ បានចំនួនជាង៥លានករណី កើនឡើង៤ភាគរយ ប្រៀបធៀបឆ្នាំ២០២៤ ដែលមានចំនួន៤លាន៨៦២ ពាន់ករណី។ឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការក្រសួងសុខាភិបាល បានឲ្យដឹងថា ឆ្នាំ២០២៥ សរុបជារួមទូទាំងប្រទេស ទទួលបានពលរដ្ឋចូលទទួលសេវាថែទាំសុខភាព ព្យាបាលជំងឺទូទៅ ប្រមាណ ជាង២១លានករណី កើនឡើងជាង១៣ភាគរយ ប្រៀបធៀប២០២៤ ហើយបើគិតសន្ទស្សន៍គ្របដណ្តប់ សេវាសុខភាពជាសកល ដែលគេគិតរង្វាស់ពី០ទៅ១០០ គឺកម្ពុជា ធ្វើបានក្នុងសន្ទស្សន៍កើនពី៦០ នៅ ឆ្នាំ២០២៤ កើនដល់៦៣ នៅឆ្នាំ២០២៥៕ អត្ថបទ៖ ស៊ុម សុខជា

ប្រធានសភាពាណិជ្ជកម្ម៖ ឆ្នាំ២០២៦ នឹងក្លាយជាឆ្នាំនៃការជំរុញសន្ទុះសេដ្ឋកិច្ចឱ្យកាន់តែលឿន និងត្រូវការការគាំទ្រពីវិស័យឯកជន

ប្រធានសភាពាណិជ្ជកម្មកម្ពុជា ថ្លែងថា ឆ្នាំ២០២៦ នឹងក្លាយជាឆ្នាំនៃការជំរុញសន្ទុះសេដ្ឋកិច្ចឱ្យកាន់តែលឿន ខណៈដែលកំណើន សេដ្ឋកិច្ចជាតិ ត្រូវបានព្យាករណ៍ក្នុងកម្រិត ៥,០% ដែលបញ្ហានេះត្រូវការគាំទ្រពីវិស័យឯកជន ក្នុងការដើរតួជាអ្នកតភ្ជាប់ទំនាក់ទំនង ក្នុងធុរកិច្ច ពាណិជ្ជកម្ម និងវិនិយោគ។អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា លើកឡើងនៅក្នុងមហាសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ ២០២៦ របស់សភាពាណិជ្ជកម្មកម្ពុជា នៅថ្ងៃទី២៨ ខែមករា ឆ្នាំ២០២៦ នេះថា សភាពាណិជ្ជកម្មកម្ពុជាមិនត្រឹមតែជាស្ថាប័នធម្មតាមួយទេ ប៉ុន្តែគឺជាដៃគូរបស់ រាជរដ្ឋាភិបាល, តាមច្បាប់ស្តីពីសភាពាណិជ្ជកម្មសភាពាណិជ្ជកម្ម មានបេសកកម្មចម្បង គឺធ្វើជាស្ពានចម្លងរួមគ្នារវាងសហគមន៍ ធុរកិច្ច និងចក្ខុវិស័យយុទ្ធសាស្ត្ររបស់រាជរដ្ឋាភិបាល។អ្នកឧកញ៉ា បន្តថា ការរួមចំណែកដ៏សំខាន់បំផុតរបស់សភាពាណិជ្ជកម្មកម្ពុជា ចំពោះវិស័យឯកជន គឺការទទួលបានឱកាស ចូលជួបពិភាក្សាដោយផ្ទាល់ជាមួយថ្នាក់ដឹកនាំកម្រិតខ្ពស់បំផុត, តាមរយៈវេទិការាជរដ្ឋាភិបាល-ផ្នែកឯកជន (G-PSF) លើកទី១៩ គឺបានពង្រឹងកិច្ចសន្ទនាប្រកបដោយតម្លាភាព និងផ្អែកលើមូលដ្ឋានពិតប្រាកដ ជាមួយសម្ដេចមហាបវរធិបតី ហ៊ុន ម៉ាណែត នាយក រដ្ឋមន្ត្រី, ដោយសារសភាពាណិជ្ជកម្ម បានបញ្ចេញសំឡេងរួមគ្នា ផ្អែកលើមូលដ្ឋានច្បាស់លាស់ គឺបានដោះស្រាយដោយជោគជ័យ នូវ បញ្ហាដែលនៅសេសសល់យូរអង្វែងក្នុងវិស័យពន្ធដារគយ និងភស្តុភារកម្ម។ កត្តានេះបានបញ្ជាក់ យ៉ាងច្បាស់ថា សភាពាណិជ្ជកម្ម កម្ពុជា គឺជាតំណាងស្របច្បាប់នៃវិស័យឯកជន។ បច្ចុប្បន្នបណ្តាញរបស់សភាពាណិជ្ជកម្មកម្ពុជា បានពង្រីកខ្លួនលើសពីព្រំដែនជាតិ ដោយមានការិយាល័យតំណាងចំនួន៨នៅទូទាំងពិភពលោក។អ្នកឧកញ៉ា គិត ម៉េង លើកឡើងថា ប្រធានការិយាល័យតំណាងសភាពាណិជ្ជកម្មកម្ពុជា នៅក្រៅប្រទេសទាំងអស់ គឺមាន បេសកកម្មចម្បង ដោយត្រូវដើរតួជាច្រកទ្វារយុទ្ធសាស្ត្រក្នុងការធានាថា ម៉ាកសញ្ញាផលិតនៅកម្ពុជា នឹងក្លាយជាសញ្ញាសម្គាល់នៃ គុណភាព និងភាពជឿជាក់នៅក្នុងទីផ្សារអន្តរជាតិ។ ឆ្នាំ២០២៦ នឹងក្លាយជាឆ្នាំនៃការជំរុញសន្ទុះសេដ្ឋកិច្ចឱ្យកាន់តែលឿន ខណៈដែល កំណើនសេដ្ឋកិច្ចជាតិ ត្រូវបានព្យាករណ៍ក្នុងកម្រិត ៥,០%។ សភាពាណិជ្ជកម្មកម្ពុជា ត្រូវជំរុញវិស័យឯកជន ឲ្យត្រូវតាមគោល នយោបាយរបស់រាជរដ្ឋាភិបាល។ស្ថិតក្នុងបរិបទនេះ បានណែនាំឱ្យប្រធានសភាពាណិជ្ជកម្មខេត្ត ត្រូវធ្វើការជិតស្និទ្ធជាមួយអាជ្ញាធរមូលដ្ឋាន និងសហគ្រាសធុន តូច និងមធ្យមក្នុងខេត្តរបស់ខ្លួន។ ធ្វើជាចំណុចបង្គោលសម្រាប់ការរៀបចំសហគ្រាសធុនតូច និងមធ្យម ឱ្យចូលក្នុងប្រព័ន្ធផ្លូវការ ដើម្បី ឱ្យពួកគេទទួលបានអត្ថប្រយោជន៍ពីកិច្ចព្រមព្រៀងពាណិជ្ជកម្មជាតិ។ កំណត់នូវឧត្តមភាពប្រកួតប្រជែងរបស់ខេត្តនីមួយៗដូចជា វិស័យទេសចរណ៍នៅសៀមរាប កសិ-កែច្នៃនៅកំពង់ធំ ឬភស្តុភារកម្មនៅខេត្តព្រះសីហនុ។ ចំណែកប្រធានតំណាងនៅក្រៅប្រទេស ដើរតួជាអ្នកតភ្ជាប់ទំនាក់ទំនងធុរកិច្ចជួរមុខ។ ត្រូវរៀបចំជំនួបពិភាក្សាធុរកិច្ច ដែលនាំទៅដល់ការចុះអនុស្សរណៈយោគយល់ (MOU) ពិតប្រាកដរវាងក្រុមហ៊ុនបច្ចេកវិទ្យាបរទេស និងប្រតិបត្តិករតំបន់សេដ្ឋកិច្ចពិសេស (SEZ) ក្នុងស្រុក៕អត្ថបទ៖ សុន រ៉ាឌី

២០ឆ្នាំមុន ជំនាញសុនខដោះមីនកម្ពុជាពឹងបរទេស១០០% ប៉ុន្ដែពេលនេះអាចម្ចាស់ការខ្លួនឯងទាំងស្រុង

កាលពី២០ឆ្នាំមុន កម្មវិធីសុនខបានពឹងផ្អែកលើបរទេសជួយគាំទ្របច្ចេកទេសទាំងស្រុង១០០% ប៉ុន្តែបច្ចុប្បន្ននេះកម្ពុជា តាមរយៈ អង្គភាព CMAC អាចម្ចាស់ខ្លួនឯងការទាំងស្រុង១០០% លើការងារបច្ចេកទេសទាំងការងារបង្កាត់ពូជ ការហ្វឹកហ្វឺនជំនាញផ្សេងៗ និងអាចចែករំលែកដល់អន្តរជាតិទៀតផង។ឯកឧត្តម ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានសរសេរបញ្ជាក់នៅលើបណ្ដាញសង្គមហ្វេសប៊ុកនៅថ្ងៃទី២៨ ខែមករា ឆ្នាំ២០២៦នេះថា នៅថ្ងៃទី២៧-២៨ ខែមករា ឆ្នាំ២០២៦នេះ អង្គភាព CMAC និងតំណាង JICA ក៏ដូចជាក្រុមប្រឹក្សាផ្តល់យោបល់ជប៉ុន បានជួបពិភាក្សាគ្នាដើម្បីបន្តពង្រឹងកិច្ចសហប្រតិបតិ្តការរវាងមណ្ឌលសុនខ CMAC និងដៃគូនានា ដើម្បីហ្វឹកហ្វឺនអ្នកកាន់សុនខអន្តរជាតិនៅកម្ពុជា និងនាំយកសុនខជំនាញពីកម្ពុជាទៅប្រតិបត្តិការនៅបណ្តាប្រទេសនានាដែលរងផលប៉ះពាល់ដោយសំណល់យុទ្ធភណ្ឌសង្គ្រាម។ ឯកឧត្តម ហេង រតនាបញ្ជាក់ថា៖«កាលពីជាង២០ឆ្នាំមុននេះ កម្មវិធីសុនខបានពឹងផ្អែកលើបរទេសជួយគាំទ្របច្ចេកទេសទាំងស្រុង១០០% ប៉ុន្តែបច្ចុប្បន្នកាលនេះកម្ពុជា (អង្គភាពCMAC) អាចម្ចាស់ការទាំងស្រុង១០០% លើការងារបច្ចេកទេសទាំងការងារបង្កាត់ពូជ ការហ្វឹកហ្វឺនជំនាញផ្សេងៗ និងអាចចែករំលែកដល់អន្តរជាតិទៀតផង»។ ឯកឧត្តមបានសង្គត់ធ្ងន់ថា៖«កូនខ្មែរត្រូវតែប្រឹងប្រែង ហ្មត់ចត់ម៉ឺងម៉ាត់ និងមានស្មារតីឆន្ទៈម្ចាស់ការ ដើម្បីសម្រេចបានគោលដៅប្រកបដោយនិរន្តភាពសម្រាប់សង្គមជាតិរបស់យើង»៕

មន្រ្ដីជំនាញ៖ ការនាំចូលទំនិញរបស់ថៃមកកម្ពុជាបន្តធ្លាក់ចុះ ដោយសារការពហិការរបស់ពលរដ្ឋ

ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា គិតមកដល់ពេលនេះ ការនាំចូលមុខទំនិញរបស់ថៃមកកម្ពុជាបន្តធ្លាក់ចុះ ដោយសារចលនានៃការពហិការរបស់ប្រជាពលរដ្ឋ និងខណៈសន្ទុះនៃការផលិតផលិតកម្មក្នុងស្រុកដើម្បីផ្គត់ផ្គង់តម្រូវការទីផ្សារមានការកើនឡើង។នៅក្នុងវេទិកាផ្សព្វផ្សាយ និងដាក់ឲ្យអនុវត្ដផែនការសកម្មភាព ឆ្នាំ២០២៦ កាលពីថ្ងៃទី២៧ ខែមករាកន្លងទៅ ឯកឧត្តមបណ្ឌិត គុណ ញឹម បានមានប្រសាសន៍បញ្ជាក់ថា ទំនិញគ្រឿងឧបភោគ បរិភោគ ដែលនាំចូលពីថៃ នឹងបន្ដធ្លាក់ចុះទៀត។ ជាកាពិត អាជីវករ ពាណិជ្ជករ បានរកប្រភពផ្គត់ផ្គង់ពីកន្លែងផ្សេងដើម្បីជំនួសផលិតផលថៃ។ឯកឧត្តមបណ្ឌិត ជឿជាក់ថា សន្ទុះនៃចលនាផលិតផលិតកម្មនៅក្នុងស្រុក ដើម្បីផ្គត់ផ្គង់តម្រូវការទីផ្សារ គឺមានការកើនឡើងច្រើនឡើងៗ ហើយទទួលបានការគាំទ្រពីរាជរដ្ឋាភិបាល។ ឯកឧត្តម បានបន្តថា ទំនិញដែលធ្លាប់នាំចូលពីប្រទេសថៃ ដើម្បីមកផ្គត់ផ្គង់នៅក្នុងទីផ្សារ នឹងមានការធ្លាក់ចុះកាន់តែតិចទៅៗ ដែលអាចដល់ដំណាក់កាលមួយ ធ្លាក់ដល់ចំណុចសូន្យ ដូចទៅនឹងមុខទំនិញ ដែលរាជរដ្ឋាភិបាលហាមឃាត់ផងដែរ មានដូចជា៖ បន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈ។ សូមជម្រាបជូនថា វេទិកាផ្សព្វផ្សាយ និងដាក់ឱ្យអនុវត្តផែនការសកម្មភាពឆ្នាំ២០២៦ របស់អគ្គនាយកដ្ឋានគយ និងរដ្ឋាករកម្ពុជា បានប្រព្រឹត្តទៅដោយមានការធ្វើបទបង្ហាញរបស់តំណាងនៃអគ្គនាយកដ្ឋានគយនិងរដ្ឋាករកម្ពុជា លើប្រធានបទចំនួន៤ គឺ “សកម្មភាពគន្លឹះផែនការសកម្មភាពឆ្នាំ២០២៦ របស់ អគ្គនាយកដ្ឋានគយនិងរដ្ឋាករកម្ពុជា”, “ការកែទម្រង់ច្បាប់ និងបទប្បញ្ញត្តិ”, “គោលនយោបាយពន្ធនិងអាករ និងកិច្ចសម្រួលពាណិជ្ជកម្ម”, និង “ការប្រើប្រាស់ប្រព័ន្ធបច្ចេកវិទ្យាព័ត៌មាននៅក្នុងកិច្ចប្រតិបត្តិការគយ” ។ វេទិកានេះ មានការចូលរួមពីតំណាងសមាគមធុរជន, អ្នកនាំចេញ-នាំចូល, ជើងសាគយ, អ្នកជំនាញការ, មន្ត្រីនៃក្រសួងសេដ្ឋកិច្ចនិងហិរញ្ញវត្ថុ និងមន្ត្រីគយនិងរដ្ឋាករជាច្រើនរូបទៀត។គួរបញ្ជាក់ទៀតថា អគ្គនាយកដ្ឋានគយ និងរដ្ឋាករកម្ពុជា តែងរៀបចំផែនការសកម្មភាពការងារជារៀងរាល់ឆ្នាំហើយក្នុងផែនការសកម្មភាពឆ្មាំ២០២៦នេះ មានបែងចែកជា ៣ផ្នែកសំខាន់ៗ គឺ ១) ការពង្រឹងគោលនយោបាយពន្ធអាករ និងការងារបច្ចេកទេសគយ, ២) កិច្ចសម្រួលពាណិជ្ជកម្ម, អនុលោមភាពនិងការអនុវត្តច្បាប់, និងការធ្វើទំនើបកម្មប្រព័ន្ធបច្ចេកវិទ្យាព័ត៌មាន, និង ៣) ការពង្រឹងសមត្ថភាពស្ថាប័នគយ។ ក្នុងនោះ ការជំរុញកែលម្អកិច្ចសម្រួលពាណិជ្ជកម្ម និងការពង្រីកនិងពង្រឹងការប្រើប្រាស់ប្រព័ន្ធបច្ចេកវិទ្យាព័ត៌មាន ត្រូវបានចាត់ទុកជាអាទិភាពចម្បងរបស់អគ្គនាយកដ្ឋានគយនិងរដ្ឋាករកម្ពុជា៕ អត្ថបទ៖ ឈិត បូរ៉ាវី

ក្រសួងអប់រំ ផ្ដល់ឱកាសឱ្យនិស្សិតចូលរួមក្នុងកម្មវិធីស្រាវជ្រាវ និងនវានុវត្តន៍ ដើម្បីសហគ្រិនភាព

ក្រសួងអប់រំ យុវជន និងកីឡា បានប្រកាសបើកឱកាសឱ្យនិស្សិត នៅតាមបណ្ដាសាកលវិទ្យាល័យអាចចូលរួម ក្នុងកម្មវិធី R&I4E ដែលមានឈ្មោះពេញថា ការស្រាវជ្រាវ និងនវានុវត្តន៍ ដើម្បីសហគ្រិនភាព Research and Innovation for Entrepreneurship។ កម្មវិធីនេះផ្ដល់ឱកាសដល់និស្សិតមកពីសាកលវិទ្យាល័យរដ្ឋនិងឯកជន អាចរួមគ្នាដោះស្រាយបញ្ហា និងបង្កើតវត្ថុគំរូ និងដំណោះស្រាយជាក់ស្តែង ហើយប្រែក្លាយជាសហគ្រិនភាព។កម្មវិធី R&I4E ជាកិច្ចសហការនៃសាកលវិទ្យាល័យជាតិគ្រប់គ្រង និងមូលនិធិសម្រាប់ការស្រាវជ្រាវ គំនិតច្នៃប្រឌិត និងនវានុវត្តន៍ ក្រសួងអប់រំ យុវជន និងកីឡា ហើយផ្តល់ឱកាសដល់និស្សិតមកពីសាកលវិទ្យាល័យរដ្ឋនិងឯកជន អាចរួមគ្នាដោះស្រាយបញ្ហា និងបង្កើតវត្ថុគំរូ និងដំណោះស្រាយជាក់ស្តែង ហើយប្រែក្លាយជាសហគ្រិនភាព។គម្រោង R&I4E មានគោលបំណងគាំទ្រការចូលរួម ដំណើរការ គុណភាព និងលទ្ធផលចុងក្រោយនៃនវានុវត្តន៍៖• ធានាការអនុវត្តទៅតាមដំណើរការ និងវិធីសាស្ត្រនវានុវត្តន៍៖ កសាងសមត្ថភាពនិស្សិតតាមរយៈវិធីសាស្ត្រ Design Thinking ។• បណ្តុះដំណោះស្រាយនវានុវត្តន៍ដែលមានគុណភាព និងជោគជ័យក្នុងទីផ្សារ៖ បង្កើតវត្ថុគំរូដែលមានភាពច្នៃប្រឌិត និងសក្តានុពលសម្រាប់ការអនុវត្ត។ • អភិវឌ្ឍជំនាញវិជ្ជាជីវៈសំខាន់ៗផ្នែកនវានុវត្តន៍ និងសហគ្រិនភាព៖ ពង្រឹងសមត្ថភាពក្នុងការឈ្វេងយល់ពីតម្រូវការអ្នកប្រើប្រាស់ ការដោះស្រាយបញ្ហា ការបង្កើតវត្ថុគំរូដោយរហ័ស និងការគិតបែបវិភាគ។• ផ្លាស់ប្តូរគំនិតនវានុវត្តន៍ឱ្យទៅជាសហគ្រាសដែលអាចបន្តការបណ្តុះធុរកិច្ចបាន៖ ជ្រើសរើស និងរៀបចំក្រុមដែលមានសមត្ថភាពខ្ពស់សម្រាប់ការរីកចម្រើនក្រោយបញ្ចប់កម្មវិធី។កម្មវិធី R&I4E តម្រូវឱ្យក្រុមការងាររួមបញ្ចូលនូវជំនាញជាក់លាក់ និងបំពេញឱ្យគ្នាទៅវិញទៅមក ដើម្បីធានាបាននូវការអភិវឌ្ឍគម្រោងគ្រប់ជ្រុងជ្រោយ ចាប់ពីចំណេះដឹងបច្ចេកទេសស៊ីជម្រៅ ការអនុវត្តឌីជីថល ការបង្កើតគំរូផលិតផលជាក់ស្តែង និងលទ្ធភាពជោគជ័យលើទីផ្សារ ៖• អ្នកឯកទេស "ជំនាញរឹង" (អ្នកជំនាញវិស័យ): និស្សិតទាំងនេះមកពីជំនាញដូចជា វិស្វកម្ម កសិកម្ម ឬវេជ្ជសាស្ត្រ ដែលផ្តល់ចំណេះដឹងផ្នែកវិស័យជំនាញ។ • អ្នកជំរុញផ្នែក ICT និងឌីជីថល (អ្នកអភិវឌ្ឍន៍បច្ចេកទេស): និស្សិតដែលមានជំនាញផ្នែក ICT ការសរសេរកូដ សូហ្វវែរ និងការរៀបចំកម្មវិធី ដើម្បីអនុវត្តសមាសភាគឌីជីថល នៃដំណោះស្រាយ។ • អ្នកច្នៃប្រឌិតបង្កើតគំរូផលិតផល: និស្សិតទាំងនេះមានជំនាញក្នុងការរចនា ការផលិត និងការដំឡើងផ្ទាល់ដៃ។ ពួកគេរួមមានជាងមេកានិក ជាងអគ្គិសនី ជាងផ្សារ និងអ្នកឯកទេសបោះពុម្ព 3D។• អ្នកយុទ្ធសាស្ត្រធុរកិច្ច និងទីផ្សារ (អ្នកជំនាញលទ្ធភាពជោគជ័យ): និស្សិតមកពីកម្មវិធីធុរកិច្ច ឬសហគ្រិនភាព ដែលផ្តោតលើទិដ្ឋភាពពាណិជ្ជកម្ម និងប្រតិបត្តិការ៕ អត្ថបទ៖គឹមហុក

បណ្ដាញសង្គម

ព័ត៌មានថ្មីៗ

ក្រុមហេសបូឡាអះអាងពីការវាយប្រហារថ្មី ដែលកំណត់គោលដៅលើមូលដ្ឋាន យោធានៅអ៊ីស្រាអែល

សហភាពអឺរ៉ុបនឹងរៀបចំកិច្ចប្រជុំកម្រិតខ្ពស់ចំនួន ២ ជាមួយអាជ្ញាធរអន្តរកាលស៊ីរី នៅទីក្រុងប្រ៊ុចសែល

កងទ័ពអ៊ីស្រាអែលអំពាវនាវប្រជាជនឲ្យជម្លៀសចេញពីភូមិចំនួន ៩ នៅភាគខាងត្បូងប្រទេសលីបង់

ប្រមុខការទូតរុស្ស៊ី និងអារ៉ាប៊ីសាអ៊ូឌីតអំពាវនាវឲ្យស្តារឡើងវិញនូវការធ្វើនាវាចរណ៍ដោយសេរី នៅច្រកសមុទ្រហ័រមូស

ស្លូវ៉ាគី៖ អឺរ៉ុបបង្ខូចប្រវត្តិសាស្ត្រ និងខ្វះការគោរពចំពោះព្រឹត្តិការណ៍សង្គ្រាមលោកលើកទី២

លោក TRUMP រំពឹងថា នឹងទទួលបានការឆ្លើយតបពីអ៊ីរ៉ង់ចំពោះសំណើរបស់អាមេរិក ក្នុងរយៈពេលប៉ុន្មានម៉ោងខាងមុខនេះ

អាមេរិកវាយប្រហារទូកដឹកគ្រឿងញៀននៅភាគខាងកើតមហាសមុទ្រប៉ាស៊ីហ្វិក បានសម្លាប់មនុស្សយ៉ាងតិច ២នាក់

ប្រមុខUN ជំរុញឲ្យមានការអត់ធ្មត់អតិបរមា ដើម្បីជៀសវាងការកើនឡើងភាពតានតឹងបន្ថែមទៀត នៅច្រកសមុទ្រហ័រមូស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ក្រសួងអប់រំ និង KOICA បន្តជំរុញការប្រើប្រាស់បច្ចេកវិទ្យា ICT សម្រាប់ការសិក្សាមុខវិជ្ជា STEM

ពលរដ្ឋខ្មែរនៅបរទេស៖ ការចូលជាសមាជិកក្រុមប្រឹក្សាសន្តិភាព នឹងអាចការពារកម្ពុជាពីការបង្កជម្លោះ

២០ឆ្នាំមុន ជំនាញសុនខដោះមីនកម្ពុជាពឹងបរទេស១០០% ប៉ុន្ដែពេលនេះអាចម្ចាស់ការខ្លួនឯងទាំងស្រុង

មន្រ្ដីជំនាញ៖ ការនាំចូលទំនិញរបស់ថៃមកកម្ពុជាបន្តធ្លាក់ចុះ ដោយសារការពហិការរបស់ពលរដ្ឋ

ក្រសួងអប់រំ ផ្ដល់ឱកាសឱ្យនិស្សិតចូលរួមក្នុងកម្មវិធីស្រាវជ្រាវ និងនវានុវត្តន៍ ដើម្បីសហគ្រិនភាព

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ក្រសួងអប់រំ និង KOICA បន្តជំរុញការប្រើប្រាស់បច្ចេកវិទ្យា ICT សម្រាប់ការសិក្សាមុខវិជ្ជា STEM

ពលរដ្ឋខ្មែរនៅបរទេស៖ ការចូលជាសមាជិកក្រុមប្រឹក្សាសន្តិភាព នឹង​អាច​ការពារ​កម្ពុជា​ពី​ការ​បង្ក​ជម្លោះ

២០ឆ្នាំមុន ជំនាញសុនខដោះមីនកម្ពុជាពឹងបរទេស១០០% ប៉ុន្ដែ​ពេល​នេះ​អាច​ម្ចាស់​ការ​ខ្លួន​ឯង​ទាំង​ស្រុង

មន្រ្ដីជំនាញ៖ ការនាំចូលទំនិញរបស់ថៃមកកម្ពុជាបន្តធ្លាក់ចុះ ដោយសារការពហិការរបស់ពលរដ្ឋ

ក្រសួងអប់រំ ផ្ដល់ឱកាសឱ្យនិស្សិតចូលរួមក្នុងកម្មវិធីស្រាវជ្រាវ និងនវានុវត្តន៍ ដើម្បីសហគ្រិនភាព

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ពលរដ្ឋខ្មែរនៅបរទេស៖ ការចូលជាសមាជិកក្រុមប្រឹក្សាសន្តិភាព នឹងអាចការពារកម្ពុជាពីការបង្កជម្លោះ

២០ឆ្នាំមុន ជំនាញសុនខដោះមីនកម្ពុជាពឹងបរទេស១០០% ប៉ុន្ដែពេលនេះអាចម្ចាស់ការខ្លួនឯងទាំងស្រុង