BTV NEWS

សាលាភូមិន្ទរដ្ឋបាល នៃក្រសួងមុខងារសាធារណៈ ចុះ MoU ជាមួយក្រសួងទេសចរណ៍ពង្រឹងសមត្ថភាពមន្រ្តី

សាលាភូមិន្ទរដ្ឋបាល នៃក្រសួងមុខងារសាធារណៈ និងក្រសួងទេសចរណ៍ នៅព្រឹកថ្ងៃទី២៦ ខែមករានេះ បានចុះអនុស្សរណៈនៃការយោគយល់គ្នា (MoU) ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល និងឯកឧត្តម ហួត ហាក់ រដ្ឋមន្រ្តីក្រសួងទេសចរណ៍។ឯកឧត្តម ឧបនាយករដ្ឋមន្ត្រី ហ៊ុន ម៉ានី បានថ្លែងថា ការចុះអនុស្សរណៈនៅពេលនេះ គឺផ្តោតលើការបង្កើតកិច្ចសហប្រតិបត្តិការ និងលើកកម្ពស់ការគាំទ្រពីគ្នាទៅវិញទៅមកពាក់ព័ន្ធនឹងការអភិវឌ្ឍសមត្ថភាព, ការបណ្តុះបណ្តាល, គម្រោងសិក្សាស្រាវជ្រាវ និងសកម្មភាពផ្សេងៗ ដោយផ្អែកលើគោលការណ៍ពិគ្រោះ យោបល់ ឯកភាពគ្នា សមភាព យុត្តិធម៌ និងផ្ដល់អត្ថប្រយោជន៍ដល់គូភាគីទៅវិញទៅមក។ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានថ្លែងថា កិច្ចសហប្រតិបត្តិការរវាងសាលាភូមិន្ទរដ្ឋបាលនៃក្រសួងមុខងារសាធារណៈ និងក្រសួងទេសចរណ៍ក្នុងពេលនេះ គឺពិតជាឆ្លើយតបចំគោលដៅរបស់ក្រសួងទាំងពីរ និងរាជរដ្ឋាភិបាល ស្របតាមយុទ្ធសាស្រ្តបញ្ចកោណដំណាក់កាលទី១ ដោយផ្តោតទៅលើអាទិ ភាពគន្លឹះចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា។ដោយផ្អែកតាមស្មារតីនៃអនុស្សរណៈនៃការយោគយល់គ្នា សាលាភូមិន្ទរដ្ឋបាល នៃក្រសួងមុខងារសាធារណៈ និងក្រសួងទេសចរណ៍ នឹងឯកភាពក្នុងការផ្ដល់កិច្ចសហការយ៉ាងជិតស្និទ្ធ ដើម្បីអភិវឌ្ឍសមត្ថភាព មន្ត្រីរាជការ នៃក្រសួងទេសចរណ៍ តាមរយៈគោលការណ៍៦ចំណុចរួមមាន៖ ទី១.ការសហការរៀបចំវគ្គបណ្ដុះ បណ្ដាលពង្រឹងសមត្ថភាពជូនដល់ថ្នាក់ដឹកនាំ និងមន្ត្រីរាជការ។ ទី២.ការផ្លាស់ប្ដូរទស្សនកិច្ចសិក្សា និងបទ ពិសោធការងាររបស់ថ្នាក់ដឹកនាំ និងមន្ត្រីរាជការ ទី៣.ការអនុវត្តគម្រោងសហប្រតិបត្តិការផ្សេងៗទៀត ទី៤. ការចូលរួម និងការរៀបចំសន្និសីទ សិក្ខាសាលា និងព្រឹត្តិការណ៍នានា ទី៥.ការលើកកម្ពស់កិច្ចសហប្រតិបត្តិ ការសិក្សាអប់រំផ្សេងទៀតតាមការឯកភាពគ្នា និងទី៦.ការផ្លាស់ប្ដូរវាគ្មិនសម្រាប់បង្រៀនទៅវិញទៅមក៕ អត្ថបទ៖ ទូច សោភ័ណ

រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ និងបូរណភាពទឹកដី

គិតចាប់តាំងពីកម្ពុជាទទួលរងសង្គ្រាមឈ្លានពានពីប្រទេសថៃកាលពីថ្ងៃទី២៤ ខែកក្កដា ឆ្នាំ២០២៥មក ទាំងថ្នាក់ដឹកនាំ ទាំងអាជ្ញាធរគ្រប់លំដាប់ថ្នាក់ ចាប់តាំងពីអាជ្ញាធរមូលដ្ឋាន រហូតដល់ក្រសួង និងស្ថាប័ននានាដែលជាសេនាធិការរបស់រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ បូរណភាពទឹកដី ក៏ដូចជាការយកចិត្តទុកដាក់ជួយប្រជាពលរដ្ឋភៀសសឹកដោយចាត់ទុកជាកិច្ចការងារអាទិភាពចម្បងបំផុតរបស់រាជរដ្ឋាភិបាល។ នេះបើតាមការបញ្ជាក់របស់អ្នកនាំពាក្យរាជរដ្ឋាភិបាល។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បញ្ជាក់តាមរយៈសន្និសីទសារព័ត៌មាន នៅព្រឹកថ្ងៃទី២៦ ខែមករា ឆ្នាំ២០២៦នេះថា គិតចាប់តាំងពីកម្ពុជាទទួលរងសង្គ្រាមឈ្លានពានពីប្រទេសថៃកាលពីថ្ងៃទី២៤ ខែកក្កដា ឆ្នាំ២០២៥ មក ទាំងថ្នាក់ដឹកនាំ ទាំងអាជ្ញាធរគ្រប់លំដាប់ថ្នាក់ ចាប់តាំងពីអាជ្ញាធរមូលដ្ឋាន រហូតដល់ក្រសួង និងស្ថាប័ននានាដែលជាសេនាធិការរបស់រាជរដ្ឋាភិបាលបានបំពេញការងារយ៉ាងសកម្មបំផុតដើម្បីការពារអធិបតេយ្យភាពជាតិ បូរណភាពទឹកដី ក៏ដូចជាការយកចិត្តទុកដាក់ជួយប្រជាពលរដ្ឋភៀសសឹក ដោយចាត់ទុកជាកិច្ចការងារអាទិភាពចម្បងបំផុតរបស់រាជរដ្ឋាភិបាល។ជាក់ស្តែងក្នុងអំឡុងពេល៦ខែចុងក្រោយនេះ ក្រសួងនិងស្ថាប័ននានារបស់រាជរដ្ឋាភិបាលបានចេញសេចក្តីប្រកាសព័ត៌មាន កំណត់ទូតតវ៉ា សេចក្តីថ្លែងការណ៍ ញ្ញតិថ្កោលទោស និងលិខិតបកស្រាយ ឬលិខិតបំភ្លឺឆ្លើយតបផ្សេងៗ គ្រប់ទម្រង់សរុបចំនួនជិត ៧០០ លើកក្នុងនោះមានដូចជា ក្រសួងការពារជាតិចំនួន ៣៨៣ លើក, ក្រសួងមហាផ្ទៃចំនួន ៨៣ លើក, ក្រសួងវប្បធម៌ និងវិចិត្រសីល្បៈចំនួន ៦៤លើក, ក្រសួងការបរទេសនិងសហប្រតិបត្តិការអន្តរជាតិ៤៩លើក, គណៈកម្មាធិការសិទ្ធិមនុស្សកម្ពុជា ២៧ លើក, អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន ២៥លើក, រដ្ឋលេខាធិការដ្ឋានកិច្ចការព្រំដែន២០ លើក, មជ្ឈមណ្ឌលម្ចាត់មីនកម្ពុជា ១៦ លើក និងក្រសួងធម្មការនិងសាសនាចំនួន១លើក។ដោយឡែក អង្គភាពអ្នកនាំពាក្យរាជរដ្ឋាភិបាលសហការណ៍ជាមួយក្រសួង ស្ថាប័ននានា ដោយមានការសម្របសម្រួលពីបញ្ជាការដ្ឋានព័ត៌មានក៏បានរៀបចំធ្វើបច្ចុប្បន្នភាព(Press Briefing) ប្រចាំថ្ងៃចំនួនជិត ២០០ លើកដើម្បីផ្តល់ព័ត៌មានដល់ប្រជាពលរដ្ឋឬឆ្លើយតបជាមួយភាគីថៃ និងបញ្ជាក់ជំហរច្បាស់លាស់របស់កម្ពុជាចំពោះការការពារអធិបតេយ្យភាព និងបូរណភាពទឹកដីជូនដល់ប្រជាពលរដ្ឋខ្មែរក៏ដូចជាសហគមន៍អន្តរជាតិបានជ្រាប។ក្រៅពីនោះ ក្រសួងការបរទេសនិងសហប្រតិបត្តិការអន្តរជាតិ ក៏បានធ្វើបទបង្ហាញចំនួន១៤លើកជូនប្រធាន និងតំណាងនៃស្ថានបេសកកម្មការទូត និងអង្គការអន្តរជាតិអំពីបច្ចុប្បន្នភាពនៃការវិវត្តន៍ស្ថានការណ៍តាមបណ្តោយព្រំដែនកម្ពុជាថៃ និងបានដឹកនាំអង្គទូត និងអង្គការអន្តរជាតិចុះពិនិត្យមើលស្ថានភាពជាក់ស្តែងតាមបណ្តាខេត្តជាប់ព្រំដែនបាន៤លើក។ ចំណែកស្ថានតំណាងកម្ពុជានៅក្រៅប្រទេសក៏បានធ្វើចលនាការទូតយ៉ាងសកម្មដើម្បីឱ្យបណ្តាប្រទេសជាមិត្ត និងសហគមន៍អន្តរជាតិបានយល់ពីការពិត និងពីជំហរដ៏ត្រឹមត្រូវរបស់កម្ពុជាក្នុងការការពារអធិបតេយ្យភាពជាតិ និងបូរណភាពទឹកដីរបស់ខ្លួនដោយសន្តិវិធីតាមគោលការណ៍ច្បាប់អន្តរជាតិ។ក្រសួងការពារជាតិក៏បានសម្របសម្រួលក្រុមអនុព័ន្ធយោធាបរទេសប្រចាំកម្ពុជា និងអ្នកសង្កេតការណ៍អាស៊ាន(AOT)ចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពនៅតាមព្រំដែនជាបន្តបន្ទាប់ និងសម្របសម្រួលកិច្ចប្រេជុំ RBC និង GBC ជាច្រើនលើកទៀត។ ដោយឡែក ក្រសួងព័ត៌មានក៏បានសម្របសម្រួលឱ្យអ្នកសារព័ត៌មានជាតិ និងអន្តរជាតិជាច្រើនចុះទៅដល់តំបន់ព្រំដែនដើម្បីរាយការណ៍ព័ត៌មានអំពីការខូចខាតហេដ្ឋារចនាសម្ព័ន្ធស៊ីវិល និងផលប៉ះពាល់លើជនស៊ីវិលស្លូតត្រង់កម្ពុជាដោយសារការវាយប្រហារពីយោធាថៃបំពានមកលើដែនអធិបតេយ្យភាពកម្ពុជា។ ទាំងអស់នេះសបញ្ជាក់អំពីការងារយ៉ាងសកម្ម មោះមុត ម៉ត់ចត់ និងគ្រប់ជ្រុងជ្រោយរបស់រាជរដ្ឋាភិបាលលើគ្រប់ចំណុចទាំងអស់ដោយគ្មានខ្វះចន្លោះឬធ្វេសប្រហែសឡើយ។ងាកទៅមើលប្រជាពលរដ្ឋខ្មែរគ្រប់មជ្ឈដ្ឋាន និងគ្រប់ទិសទី រាប់ទាំងព្រះសង្ឃ អ្នកសារព័ត៌មាន និងអ្នកមានឥទ្ធិពលក្នុងបណ្តាញសង្គម បានបង្ហាញស្មារតីស្នេហាជាតិ និងសាមគ្គីភាពយ៉ាងរឹងមាំដោយរួមគ្នាការពារអធិបតេយ្យភាពជាតិ និងបូរណភាពទឹកដីយ៉ាសកម្មក្លៀវក្លាជាមួយរាជរដ្ឋាភិបាល។ ប្រតិកម្មរបស់ប្រជាពលរដ្ឋខ្មែរត្រូវបានធ្វើឡើងតាមគ្រប់រូបភាព ទាំងនៅលើបណ្តាញសង្គម នៅតាមវេទិកាសាធារណនានា ក៏ដូចជាការប្រមូលផ្តុំគ្នាដើម្បីបញ្ចេញសំឡេងតវ៉ា និងការស្វះស្វែងរកអន្តរាគមន៍ពីសហគមន៍អន្តរជាតិឱ្យដឹងលឺ និងជួយគាំទ្របុព្វហេតុដ៏ត្រឹមត្រូវរបស់កម្ពុជាក្នុងការការពារអធិបតេយ្យភាពនិងបូរណភាពទឹកដី តាមគោលការណ៍ជាមូលដ្ឋាន និងមិនអាចបដិសេធបាននៃច្បាប់អន្តរជាតិដែលហាមឃាត់ការកាន់កាប់ទឹកដីដោយប្រើប្រាស់កម្លាំង។ និយាយជារួម ទីណាមានប្រជាពលរដ្ឋខ្មែររស់នៅ ទីនោះមានសំឡេងការពារអធិបតេយ្យភាព និងបូរណភាពទឹកដីកម្ពុជាលាន់លឺយ៉ាងកងរំពង។ បន្ថែមពីលើនេះ សកម្មភាពសប្បុរសធម៌ដើម្បីជួយដល់វីរកងទ័ព និងវីរនគរបាលជាតិដែលឈរជើងនៅជួរមុខ ក៏ដូចជាជួយដល់ជនភៀសសឹក ក៏កើតមានយ៉ាងគគ្រឹគគ្រេងពីគ្រប់មជ្ឈដ្ឋាន។ នេះគឺជាកម្លាំងចលករដ៏ខ្លាំងក្លាក្នុងការការពារអធិបតេយ្យភាព និងបូរណភាពទឹកដីកម្ពុជាតាមរយៈការរក្សាជំហររឹងមាំ និងស្រុះគ្នាជាសំឡេងតែមួយរវាងរាជរដ្ឋាភិបាល និងប្រជាពលរដ្ឋដែលជាកម្លាំងសាមគ្គីដ៏រឹងមាំនៃមហាគ្រួសារខ្មែរ ដើម្បីថែរក្សាការពារបូរណភាពទឹកដីក្នុងដែនអធិបតេយ្យស្របច្បាប់របស់ខ្លួនយ៉ាងប្តូរផ្តាច់បំផុតនិងឥតងាករេ។អ្នកនាំពាក្យរាជរដ្ឋាភិបាលកម្ពុជា បញ្ជាក់ជូនជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងឡើយ៕

សម្ដេចតេជោ ជំរុញកម្ពុជានិងឡាវបន្តខិតខំពង្រីកវិស័យសេដ្ឋកិច្ច ពាណិជ្ជកម្ម វិនិយោគជាមួយគ្នាឱ្យស្របទៅនឹងទំនាក់ទំនងល្អរវាងប្រទេសទាំងពីរ

សម្ដេចអគ្គមហាសេនាបតីតេជោ ហ៊ុន សែន បានជំរុញឱ្យរាជរដ្ឋាភិបាលកម្ពុជា និងឡាវ បន្តខិតខំប្រឹងប្រែងពង្រីកលើវិស័យពាណិជ្ជកម្ម វិនិយោគ ជាពិសេសវិស័យសេដ្ឋកិច្ចប្រទេសទាំងពីរបន្ថែមទៀត ដើម្បីឱ្យសមស្របទៅនឹងទំនាក់ទំនងដ៏ល្អរវាងប្រទេសទាំងពីរ ទាំងទំនាក់ទំនងផ្នែកសេដ្ឋកិច្ច និងនយោបាយ។ សម្តេចតេជោ ហ៊ុន សែន ប្រធានព្រឹទ្ធសភា បានជំរុញបែបនេះ ក្នុងឱកាសអនុញ្ញាតឱ្យឯកឧត្តម ប៊ួកែវ ភុំវង្សសាយ (Buakeo Phumvongsay) ឯកអគ្គរដ្ឋទូត នៃសាធារណរដ្ឋប្រជាធិបតេយ្យប្រជាមានិតឡាវប្រចាំកម្ពុជា ចូលជួបសម្តែងការគួរសម និងជម្រាបលា ព្រឹកថ្ងៃទី២៦ ខែមករា ឆ្នាំ២០២៦នេះ នៅវិមានសាមគ្គីភាព នៃព្រឹទ្ធសភារាជធានីភ្នំពេញ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ក្នុងឱកាសនោះសម្ដេចតេជោ បានសម្ដែងនូវការស្វាគមន៍ និងរីករាយដែលបានជួបជាមួយនឹង ឯកឧត្តម ឯកអគ្គរដ្ឋទូតនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជា សារជាថ្មី ដោយសម្ដេចតេជោបានវាយតម្លៃខ្ពស់ចំពោះបេសកកម្មរបស់ឯកឧត្តម ឯកអគ្គរដ្ឋទូត ក្នុងពេលបំពេញបេសកកម្មនៅកម្ពុជា ដោយបាននាំនៅទំនាក់ទំនងរវាងកម្ពុជា និងឡាវឱ្យកាន់តែមានភាពរីកចម្រើនបន្ថែមទៀត។ ក្នុងឱកាសនោះ ឯកឧត្តម ឯកអគ្គរដ្ឋទូតនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជា បានសម្ដែងនូវក្ដីអរគុណជាអនេកដែលសម្ដេចតេជោបានអនុញ្ញាតឱ្យឯកឧត្តម និងសហការីបានជួប ដើម្បីជម្រាបលាក្នុងឱកាសនេះ។ ឯកឧត្តម ឯកអគ្គរដ្ឋទូត បានចាត់ទុកប្រទេសកម្ពុជា គឺជាផ្ទះទីពីររបស់ឯកឧត្តម ដោយឯកឧត្តមបានបញ្ជាក់ថា ក្នុងពេលបំពេញបេសកកម្មការងារនៅកម្ពុជារយៈពេលបួនឆ្នាំ ឯកឧត្តមមានអនុស្សាវរីយ៍ជាច្រើនជាមួយប្រជាជនកម្ពុជាជាពិសេសប្រទេសកម្ពុជាតែម្ដង។ ឯកឧត្តម ឯកអគ្គរដ្ឋទូត ក៏បានលើកឡើងអំពីទំនាក់ទំនងរវាងកម្ពុជា និងឡាវ ដោយបានបញ្ជាក់ថា ក្នុងឱកាសបំពេញបេសកកម្មទូតនៅកម្ពុជានេះ ឯកឧត្តមបានពង្រីកទំនាក់ទំនងរវាងកម្ពុជា និងឡាវឱ្យមានភាពល្អប្រសើរ និងការផ្លាស់ប្ដូរនូវដំណើរទស្សនកិច្ចថ្នាក់ដឹកនាំរវាងប្រទេសទាំងពីរជាបន្តបន្ទាប់។ សម្ដេចតេជោ ហ៊ុន សែន បានបង្ហាញក្ដីរីករាយចំពោះទំនាក់ទំនងដ៏ល្អរវាងកម្ពុជា និងឡាវ និងសម្ដេចការពេញចិត្តចំពោះអ្វីដែល ឯកឧត្តម ឯកអគ្គរដ្ឋទូត បានលើកឡើង ជាពិសេសការផ្លាស់ប្ដូរនូវទំនាក់ទំនងរវាងប្រទេសទាំងពីរ តាមរយៈដំណើរទស្សនកិច្ចនៃថ្នាក់ដឹកនាំប្រទេសទាំងពីរ។ ក្នុងឱកាសនោះសម្ដេចតេជោ ក៏បានជំរុញបន្ថែមទៀតឱ្យឡាវ និងកម្ពុជា បន្តខិតខំប្រឹងប្រែងពង្រីកលើវិស័យពាណិជ្ជកម្ម វិនិយោគ ជាពិសេសវិស័យសេដ្ឋកិច្ចប្រទេសទាំងពីរតែម្ដង ដើម្បីឱ្យសមស្របទៅនឹងទំនាក់ទំនងដ៏ល្អរវាងប្រទេសទាំងពីរ ទាំងទំនាក់ទំនងផ្នែកសេដ្ឋកិច្ច និងនយោបាយ។ សម្ដេចតេជោ បានបញ្ជាក់ថា នៅពេលដែលទំនាក់ទំនងល្អទាំងផ្នែកសេដ្ឋកិច្ច និងនយោបាយរវាងប្រទេសទាំងពីរមានការកើនឡើងនោះនឹងធ្វើឱ្យទំនាក់ទំនងរវាងប្រទេសទាំងពីរកាន់តែមានភាពរឹងមាំបន្ថែមទៀត។ ជាចុងក្រោយសម្ដេចតេជោ បានជូនពរ ឯកឧត្តម ឯកអគ្គរដ្ឋទូតឡាវឱ្យទទួលជោគជ័យលើកិច្ចការងារបន្តទៀត និងសង្ឃឹមថាវិលត្រឡប់មកទស្សនកិច្ចនៅប្រទេសកម្ពុជានៅពេលណាមួយបន្ថែមទៀត៕

ពលករច្រើននាក់បានទទួលការងារធ្វើក្នុងវេទិកាការងារនៅក្នុងខេត្តបាត់ដំបង និងបន្ទាយមានជ័យ កាលពីចុងសប្ដាហ៍មុន

បន្ទាយមានជ័យ-បាត់ដំបង៖ អតីតពលករច្រើននាក់ដែលបានវិលត្រឡប់មកពីប្រទេសថៃ បានទទួលការងារធ្វើ តាមរយៈវេទិកាការងារដែលត្រូវបានរៀបចំនៅក្នុងខេត្តបាត់ដំបង និងបន្ទាយមានជ័យ កាលពីចុងសប្ដាហ៍មុន។ ពួកគេបានថ្លែងអំណរគុណរាជរដ្ឋាភិបាល និងរោងចក្រសហគ្រាសនានាដែលបានផ្ដល់ឱ កាសការងារដល់ពួកគេ។ក្នុងស្មារតី «ខ្មែរជួយរកការងារឱ្យខ្មែរ ខ្មែរផ្តល់ការងារឱ្យខ្មែរ» វេទិកាការងារ សន្តិសុខសង្គម និង បណ្ដុះបណ្ដាលវិជ្ជាជីវៈ ត្រូវបានរៀបចំឡើង កាលពីថ្ងៃទី២៤-២៥ ខែមករា ឆ្នាំ២០២៦ នៅក្នុងស្រុកបវេល និងស្រុកមោងឫស្សី ខេត្តបាត់ដំបង និងស្រុកមង្គលបូរី និងក្រុងសិរីសោភ័ណ ខេត្តបន្ទាយមានជ័យ ដើម្បីផ្ដល់ឱកាសការងារដល់អតីតពលករវិលត្រឡប់មកពីថៃ និងយុវជនក្នុងមូលដ្ឋានឱ្យទទួលបាន ការងារធ្វើភ្លាមៗ និងចុះឈ្មោះរៀនជំនាញបច្ចេកទេស។ប្រជាពលរដ្ឋដែលសម្ភាសន៍ការងារជាប់ បានបង្ហាញអារម្មណ៍សប្បាយរីករាយដែលទទួលបានការ ងារធ្វើដើម្បីមានប្រាក់ចំណូលផ្គត់ផ្គង់ជីវភាពគ្រួសារ។ ពួកគេបានថ្លែងអំណរគុណរាជរដ្ឋាភិបាល តាមរយៈក្រសួងការងារ និងបណ្ដុះបណ្ដាលវិជ្ជាជីវៈ ដែលបាននាំយកឱកាសការងារជូនប្រជាពលរដ្ឋដល់មូលដ្ឋានផ្ទាល់តែម្ដង។ពួកគេបានបញ្ជាក់ផ្ដាំតកូនចៅឈប់វិលទៅធ្វើការងារនៅប្រទេសថៃវិញហើយ ព្រោះក្នុងស្រុកមាន ការងារច្រើនកន្លែង សុវត្ថិភាព ប្រាក់ខែសមរម្យមិនចាញ់នៅប្រទេសថៃ ពិសេសគឺបាននៅជិតជុំគ្រួសារ។ សូមជម្រាបថា វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ដែលរៀបចំដោយក្រសួងការងារ និងបណ្ដុះបណ្ដាលវិជ្ជាជីវៈ គឺវេទិកាជំនួបដ៏ធំមួយរវាងអ្នកស្វែងរកការងារ និងនិយោជក ដើម្បីដាក់ពាក្យស្វែងរកការងារ ជ្រើសរើស បុគ្គលិក សម្ភាស និងទទួលបានការងារភ្លាមៗនៅមូលដ្ឋានផ្ទាល់តែម្តង តាមរយៈក្រុមហ៊ុនធំៗដែលត្រូវការ កម្លាំងពលកម្មបន្ថែម ដើម្បីកុំឱ្យបងប្អូនពិបាកចំណាយពេលវេលា និងថវិកាក្នុងការធ្វើដំណើរទៅឆ្ងាយ៕

ក្រសួងមុខងារសាធារណៈ បន្តចុះត្រួតពិនិត្យដំណើរការជំរឿនមន្ត្រីនៅតាមគ្រឹះស្ថានសិក្សាសាធារណៈ

ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ នៅថ្ងៃទី ២៦ ខែមករា ឆ្នាំ២០២៦ បានអញ្ជើញចុះត្រួតពិនិត្យដំណើរការជំរឿនមន្ត្រីនៅតាមគ្រឹះស្ថានសិក្សាសាធារណៈ។ ការចុះត្រួតពិនិត្យដំណើរការជំរឿននេះ ធ្វើឡើងនៅទីតាំងវិទ្យាល័យ ជាស៊ីម បឹងកេងកង រាជធានីភ្នំពេញ។ជាការតាមដានដំណើរការជំរឿន ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈនៅថ្ងៃនេះ បានអញ្ជើញដឹកនាំក្រុមការងារចុះត្រួតពិនិត្យការងារជំរឿននៅទីតាំងវិទ្យាល័យជាស៊ីមបឹងកេងកង ដោយផ្ទាល់។ សម្រាប់ការចាប់ផ្ដើមដំណើរការជំរឿននេះ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ធ្លាប់បានលើកឡើងថា នេះជាការងារដែលប្រមូលទិន្នន័យមន្ត្រីជាក់ស្ដែងកាន់តែច្បាស់លាស់ និងមានការឯកភាពគ្នាពីរចនាសម័្ពន្ធ និងមន្ត្រីបម្រើការងារជាក់ស្ដែងនៅតាមអង្គភាព។ជាទិន្នន័យមូលដ្ឋានសំខាន់សម្រាប់ឈានទៅការដោះស្រាយបញ្ហាខ្វះមន្ត្រីតាមរយៈការប្រឡងជ្រើសរើសដើម្បីទៅបំពេញបន្ថែមឱ្យចំគោលដៅ។ នេះជាចំណែកដ៏សំខាន់ក្នុងការពង្រឹងសមត្ថភាព និងលើកកម្ពស់សេវាសាធារណៈនៅមូលដ្ឋាន។ ជាក់ស្ដែង ក្នុងឆ្នាំ ២០២៥កន្លងទៅ ក្រសួងមុខងារសាធារណៈ ក៏បានរៀបចំការប្រឡងជ្រើសរើសមន្ត្រីសុខាភិបាលផ្អែកលើកិច្ចព្រមព្រៀងការងារ ក៏ដូចជាគ្រូបង្រៀនផ្អែកលើកិច្ចព្រមព្រៀងការងារ ដើម្បីទៅបំពេញការខ្វះខាតមន្ត្រីផងដែរ។ក្រសួងមុខងារសាធារណៈ ជាសេនាធិការឱ្យរាជរដ្ឋាភិបាលនីតិកាលទី ៧ ទទួលខុសត្រូវលើកំណែទម្រង់រដ្ឋបាលសាធារណៈ។ ចាប់រាប់ពីដំណាក់កាលដំបូងនៃរាជរដ្ឋាភិបាលនីតិកាលទី ៧មកទល់បច្ចុប្បន្ន ក្រសួងមុខងារសាធារណៈ បានបំពេញការងារជាច្រើនជាបន្តបន្ទាប់។ ចាប់ផ្ដើមដំបូងដោយការកែលម្អរប្រព័ន្ធប្រឡងជ្រើសរើសមន្ត្រី ការវិភាគមុខងារ និងហេដ្ឋារចនាសម័្ពន្ធតាមក្រសួងស្ថាប័ន និងការងារបន្ទាប់ជាការធ្វើជំរឿនមន្ត្រីរាជការស៊ីវិល ដែលអនុវត្តនាពេលនេះ។ការអនុវត្តការងារជំរឿនចាប់ផ្ដើមដំបូងនៅតាមក្រសួងស្ថាប័ន រួចបន្តការធ្វើជំរឿនគ្រូបង្រៀននៅតាមគ្រឹះស្ថានសិក្សាសាធារណៈ ក៏ដូចជាជំរឿនលើមន្ត្រីបម្រើការនៅតាមអង្គភាពសុខាភិបាលសាធារណៈ។ជំរឿនគ្រូបង្រៀននៅតាមគ្រឹះស្ថានសិក្សាសាធារណៈ ក៏ដូចជាជំរឿនលើមន្ត្រីបម្រើការនៅតាមអង្គភាពសុខាភិបាលសាធារណៈ ចាប់ផ្ដើមនៅថ្ងៃដំណាលគ្នា ដោយផ្ដើមពីសាលារៀនស្ថិតក្នុងភូមិសាស្ត្រខណ្ឌដូនពេញ និងអង្គភាពសុខាភិបាលសាធារណៈ ក្នុងមូលដ្ឋានការិយាល័យសុខាភិបាល ស្រុកប្រតិបត្តិចតុមុខ៕ អត្ថបទ៖ គឹម ហុក

ធនាគារជាតិបោះផ្សាយមូលបត្ររដ្ឋឆ្នាំ២០២៥ បានចំនួនសរុប ៧០លានដុល្លារអាម៉េរិក

ធនាគារជាតិនៃកម្ពុជា នៅក្នុងឆ្នាំ២០២៥ បានបោះផ្សាយមូលបត្ររដ្ឋចំនួន ១១ លើក មានទំហំទឹកប្រាក់សរុបជាង ៤១០ ប៊ីលានរៀល ត្រូវប្រមាណ ៧០ លានដុល្លារអាម៉េរិក ក្នុងផែនការដែលបានកំណត់ ១២៣លានដុល្លារអាម៉េរិក។ធនាគារជាតិនៃកម្ពុជា ក្នុងឆ្នាំ២០២៥ បានបន្តចូលរួមអភិវឌ្ឍទីផ្សារមូលបត្រនៅកម្ពុជា ដោយបានសម្របសម្រួលដល់ការ បោះផ្សាយមូលបត្ររដ្ឋ ជូនក្រសួងសេដ្ឋកិច្ច និងហិរញ្ញវត្ថុ មានចំនួន១១លើក ក្នុងទំហំទឹកប្រាក់សរុបជាង ៤១០ ប៊ីលានរៀល និង ៧០ លានដុល្លារអាមេរិក ក្នុងផែនការដែលបានកំណត់ ១២៣ លានដុល្លារអាម៉េរិក, ក្នុងនោះទូទាត់គូប៉ុងសរុបមានចំនួន ៤០ លើក និងទូទាត់ប្រាក់ដើមចំនួន ៦ លើក, នេះបើយោងតាមរបាយការណ៍ត្រួតពិនិត្យប្រឆ្នាំ២០២៥ របស់ធនាគារជាតិនៃកម្ពុជា។ចំពោះមូលបត្ររដ្ឋឥណប្រតិទាន ១ ឆ្នាំ, មានអត្រាគូប៉ុងជាមធ្យម ២,៧៥% និងអត្រាចំណូលដេញថ្លៃឈ្នះជាមធ្យម ៣,១៥%, ឥណប្រតិទាន ២ ឆ្នាំ មានអត្រាគូប៉ុងជាមធ្យម ៣,២០%, ឥណប្រតិទាន ៣ ឆ្នាំ មានអត្រាគូប៉ុងជាមធ្យម ៣,៤៨% និង អត្រាចំណូលដេញថ្លៃឈ្នះជាមធ្យម ៣,៩៩%, ឥណប្រតិទាន៥ឆ្នាំ មានអត្រាគូប៉ុងជាមធ្យម ៤,២១% និងអត្រាចំណូលដេញថ្លៃ ឈ្នះជាមធ្យម ៤,៥% ហើយឥណប្រតិទាន ១០ឆ្នាំ មានអត្រាគូប៉ុងជាមធ្យម ៤,៦០%។លើសពីនេះ ធនាគារជាតិនៃកម្ពុជា បានសម្របសម្រួលឱ្យគ្រឹះស្ថានហិរញ្ញវត្ថុមិនមែនធនាគារ ដែលជាអន្តរការីមូលបត្ររដ្ឋ ចំនួន១ (ក្រុមហ៊ុន រ៉ូយ៉ាល់គ្រុប ស៊ីឃ្យូរីធី ម.ក) ចូលជាសមាជិកថ្នាល NBCP ហើយបានចូលរួមដេញថ្លៃមូលបត្ររដ្ឋ ដោយជោគជ័យ កាលពីថ្ងៃទី២២ ខែតុលា ឆ្នាំ២០២៥ នៃការបោះផ្សាយលក់មូលបត្ររដ្ឋលើកទី៣៩។ ទន្ទឹមនេះ, ក្រុមការងារមូលបត្ររដ្ឋ ធនាគារជាតិ នៃកម្ពុជា ក៏បានជួបពិភាក្សាការងារជាមួយអន្តរការីមូលបត្ររដ្ឋចំនួន ១ និងបានចូលរួមសហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងកម្មវិធីផ្សព្វផ្សាយលក់មូលបត្ររដ្ឋដល់វិនិយោគិនសក្ដានុពលចំនួន ២ដង ដើម្បីបន្តជំរុញការចូលរួមបន្ថែមពីបណ្តវិនិយោគិន។ចំណែកនៅក្នុងឆ្នាំ២០២៦នេះ, រាជរដ្ឋាភិបាលគ្រោងបោះផ្សាយលក់មូលបត្ររដ្ឋ ក្នុងទំហំទឹកប្រាក់ ២ ១១៤ ប៊ីលានរៀល សមមូល នឹងប្រមាណ ៥២៤ លានដុល្លារអាម៉េរិក ដើម្បីផ្តល់ចំណូលដោយត្រង់មករាជរដ្ឋាភិបាល ក្នុងគោលដៅធានាដល់ការវិនិយោគ និង ចីរភាព នៃការគ្រប់គ្រងបំណុល និងថវិកាជាតិ៕ អត្ថបទ៖ សុន រ៉ាឌី

គ្រឹះស្ថានធនាគារ និងហិរញ្ញវត្ថុ បានរៀបចំឥណទានឡើងវិញជូនអតិថិជនមានចំនួន ៥,៣ ប៊ីលានដុល្លារ

គ្រឹះស្ថានធនាគារនិងហិរញ្ញវត្ថុ បានបន្តរៀបចំឥណទានឡើងវិញជូនអតិថិជន ក្នុងឆ្នាំ២០២៥ មានចំនួន ៥,៣ ប៊ីលានដុល្លារអាម៉េ រិក ស្មើប្រមាណ ៨,៣ ភាគរយ នៃឥណទានសរុប និងបានលុបចោលឥណទាន ៨០លានរៀល សម្រាប់យោធិនពលី និង ១០ លានរៀល សម្រាប់យោធិនពិការក្នុងសមរភូមិ។លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងនៅក្នុងសន្និបាតបូកសរុបលទ្ធផលការងារប្រចាំឆ្នាំ និងទិសដៅការងារឆ្នាំ២០២៦ របស់ធនាគារជាតិនៃកម្ពុជា នៅចុងសប្តាហ៍កន្លងមកថា នៅក្នុងស្មារតីសាមគ្គីភាពមនុស្សធម៌ និងស្រប តាមគោលនយោបាយរបស់រាជរដ្ឋាភិបាល ក្នុងការជួយសម្រួលបន្ទុកដល់យោធិនសមរភូមិ និងប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ, ធនាគារជាតិនៃកម្ពុជាបានណែនាំឱ្យគ្រឹះស្ថានធនាគារ និងហិរញ្ញវត្ថុ ឱ្យរៀបចំឥណទានឡើងវិញ និងផ្តល់ អនុគ្រោះផ្សេងៗទៀតសម្រាប់អតិថិនទូទៅ ជនភៀសសឹក ពលករប្រឡប់មកពីប្រទេសថៃ និងយោធិនដែលធ្វើប្រតិបត្តិការដោយផ្ទាល់ ក្នុងសមរភូមិប្រយុទ្ធជាដើម។ជាក់ស្តែងនៅក្នុងឆ្នាំ ២០២៥, គ្រឹះស្ថានធនាគារនិងហិរញ្ញវត្ថុ បានបន្តរៀបចំឥណទានឡើងវិញជូនអតិថិជនមានចំនួន ប្រមាណ ៥,៣ ប៊ីលានដុល្លារអាម៉េរិក ស្មើប្រមាណ ៨,៣ ភាគរយ នៃឥណទានសរុប ត្រូវជាង ២៥ ពាន់គណនី និងបានលុបចោល ឥណទានរហូតដល់ ៨០ លានរៀល សម្រាប់អតិថិជន ឬអ្នកកម្ចីជាយោធិនពលី និងលុបចោលឥណទានប្រមាណ ១០ លានរៀល សម្រាប់អតិថិជនដែលជាយោធិនពិកាក្នុងសមរភូមិ។ជុំវិញបញ្ហាខាងលើនេះ, គ្រឹះស្ថានដែលជាសមាជិករបស់សមាគមមីក្រូហិរញ្ញវត្ថុកម្ពុជា បានអនុវត្តវិធានការបន្ធូរបន្ថយ ផ្នែកហិរញ្ញវត្ថុ និងជំនួយមនុស្សធម៌ផ្សេងៗ ដើម្បីជួយសម្រាលបន្ទុកដល់សហគមន៍ដែលរងគ្រោះក្នុងនោះរួមមាន៖ លើកលែងការ ប្រាក់សរុបមានចំនួន ១០,៦ លានដុល្លារអាម៉េរិក សម្រាប់គ្រួសារដែលជាជនភៀសសឹក ដើម្បីជួយពួកគាត់ឱ្យមានស្ថិរភាពហិរញ្ញវត្ថុ ក្នុងអំឡុងពេលភៀសសឹក និងការរំខានដល់ការរស់នៅ។ លុបចោលបំណុល (ទាំងប្រាក់ដើមនិងការប្រាក់) ចំនួនប្រមាណ ១ លាន ដុល្លារអាមេរិក សម្រាប់យោធិនជួរមុខ យោធិនរងរបួស និងគ្រួសាររបស់យោធិនពលី ដើម្បីជាការដឹងគុណចំពោះការលះបង់ និងការ បាត់បង់ចំណូលរបស់ពួកគេ និងរៀបចំឥណទានមានចំនួនប្រមាណ ៥០០ លានដុល្លាអាម៉េរិក ដើម្បីសំរាលសំពាធហិរញ្ញវត្ថុ ជូនដល់ ជនភៀសសឹក និងអតិថិជនដែលរងផលប៉ះពាល់ផ្សេងៗទៀត៕ អត្ថបទ៖ សុន រ៉ាឌី

«រាជធានីភ្នំពេញ ជាទីក្រុងរបស់យើងទាំងអស់គ្នា ហេតុដូច្នេះសូមបងប្អូនចូលរួមប្រែក្លាយទីក្រុងយើងឱ្យកាន់តែមានសោភ័ណភាព បរិស្ថានអនាម័យ និងសន្តិសុខសណ្ដាប់ធ្នាប់ល្អ»

ភ្នំពេញ៖ ឯកឧត្តម ឃួង ស្រេង អភិបាល នៃ គណៈអភិបាលរាជធានី ភ្នំពេញ នៅថ្ងៃទី២៦ ខែមករា ឆ្នាំ២០២៦នេះ បានអំពាវនាវដល់បងប្អូនប្រជាពលរដ្ឋចូលរួមប្រែក្លាយទីក្រុងភ្នំពេញឱ្យមានសោភ័ណភាព បរិស្ថានអនាម័យ និងសន្ដិសុខសណ្ដាប់ធ្នាប់ល្អ ពីព្រោះទីក្រុងភ្នំពេញជាទីក្រុងយើងទាំងអស់គ្នា។ឯកឧត្តមអភិបាលបានថ្លែងថា រាជធានីភ្នំពេញ បានប្រែក្លាយពីទីក្រុងគ្មានមនុស្សនៅ មកជាទីក្រុងមួយប្រកបដោយសោភ័ណភាព បរិស្ថានស្រស់បំព្រង មានសន្តិសុខ សណ្ដាប់ធ្នាប់ល្អ និងទទួលបានការចាប់អារម្មណ៍ពីភ្ញៀវជាតិ អន្តរជាតិ។ ឯកឧត្តមបានបន្តថា តាមរយៈភាពអំណោយផល នៃសក្តានុពលលើវិស័យសេដ្ឋកិច្ច ពាណិជ្ជកម្ម ទេសចរណ៍ និងសន្តិសុខសណ្តាប់ធ្នាប់ ជាពិសេសការចូលរួមទទួលស្វាគមន៍របស់បងប្អូនប្រជាពលរដ្ឋប្រកបដោយក្ដីស្រលាញ់ និងស្នាមញញឹមស្រស់បំព្រងនោះ រាជធានីភ្នំពេញទទួលបានចំណាត់ថ្នាក់លេខ២ នៅលើពិភពលោក ជាទីក្រុងប្រជុំដោយសប្បាយភាពនាពេលរាត្រី និងជាប់ចំណាត់ថ្នាក់លេខ១០ លើពិភពលោក ដោយត្រូវបានចាត់ថ្នាក់ ដោយគេហទំព័រទេសចរណ៍ អន្តរជាតិ”Condé Nast Travelor-កុងដេណាស់ត្រាវេលល័រ” ព្រមទាំងទទួលបានការចាត់ថ្នាក់ដោយសារព័ត៌មានអន្តរជាតិ BBC ថាជាគោលដៅទេសចរណ៍ដ៏ល្អបំផុតទាំង២០ សម្រាប់ឆ្នាំ២០២៦នេះផងដែរ។ឯកឧត្តម ឃួង ស្រេង បានថ្លែងបញ្ជាក់ថា ៖«អាស្រ័យហេតុនេះក្នុងនាមយើងទាំងអស់គ្នាដែលជាម្ចាស់ផ្ទះ រួមមានអាជ្ញាធរមានសមត្ថកិច្ច កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋទាំងអស់ មានកាតព្វកិច្ចចូលរួមរៀបចំរាជធានីភ្នំពេញ ឱ្យកាន់តែមានការអភិវឌ្ឍគ្រប់វិស័យ មានសុខសន្តិភាព សណ្ដាប់ធ្នាប់ និងសោភ័ណភាពល្អប្រសើរ ដើម្បីត្រៀមខ្លួនទទួលវិនិយោគិន ភ្ញៀវទេសចរជាតិ និងអន្តរជាតិ មកព្រះរាជាណាចក្រកម្ពុជា ជាពិសេសនៅរាជធានីភ្នំពេញ ដែលជាបេះដូងនៃដែនដីសុវណ្ណភូមិមួយនេះ»៕

តំណាងរាស្រ្តមណ្ឌលខេត្តកំពត ជំរុញឱ្យប្រជាកសិករគិតគូរពីការដាំបន្លែធម្មជាតិលើកកម្ពស់ជីវភាពរស់នៅ

ឯកឧត្តម វ៉ាន់ ដារ៉ា តំណាងរាស្រ្តមណ្ឌលខេត្តកំពត និងជាសមាជិកគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣) នៃរដ្ឋសភា នារសៀលថ្ងៃទី២៥ ខែមករា ឆ្នាំ២០២៦ បានអញ្ជើញចុះសួរសុខទុក្ខ និងស្វែងយល់អំពីការបង្កបង្កើនផលដំណាំបន្លែធម្មជាតិរបស់ប្រជាកសិករ ស្ថិតនៅភូមិត្រពាំងពោន ឃុំបន្ទាយមាសខាងកើត ស្រុកបន្ទាយមាស ខេត្តកំពត។ នៅក្នុងឱកាសនោះ ឯកឧត្តម វ៉ាន់ ដារ៉ា បានជំរុញឱ្យកសិករបន្តការដាំដុះបន្លែធម្មជាតិ ចិញ្ចឹមសត្វឱ្យបានច្រើន ដើម្បីលើកកម្ពស់ជីវភាពរស់នៅឱ្យកាន់តែប្រសើរ និងយកចិត្តទុកដាក់ជាចម្បងចំពោះសុខមាលភាព និងសុខភាពប្រជាពលរដ្ឋ។ជាមួយគ្នានេះ ឯកឧត្តម ក៏បានកោតសសើរកសិករដែលបានចូលរួមអនុវត្តវិធីសាស្រ្តដាំបន្លែធម្មជាតិ មិនធ្វើឱ្យប៉ះពាល់ដល់សុខភាពមនុស្ស សត្វ បរិស្ថាន និងកាត់បន្ថយការចំណាយ។ឯកឧត្តមតំណាងរាស្រ្តមណ្ឌល បានសំណូមពរឱ្យប្រជាកសិករ និងប្រជាពលរដ្ឋប្រើប្រាស់បន្លែធម្មជាតិក្នុងស្រុក ដើម្បីចូលរួមចំណែកលើកកម្ពស់ការថែរក្សាសុខភាព និងអនាម័យ ក៏ដូចជាលើកស្ទួយផលិតផលកសិកម្មក្នុងស្រុកឱ្យកាន់តែប្រសើរឡើង។ឯកឧត្តម ក៏បានអំពាវនាវប្រជាពលរដ្ឋ ជាពិសេសកុមារ និងមនុស្សចាស់ ត្រូវថែរក្សាសុខភាពឱ្យបានល្អ រក្សាអនាម័យជាប្រចាំ ព្រោះរដូវនេះ អាកាសធាតុមានការប្រែប្រួល ចុះត្រជាក់ខ្លាំងអាចធ្វើឱ្យមានបញ្ហាសុខភាព ដូចជា ជំងឺផ្តាសាយ និងជំងឺផ្លូវដង្ហើម។ ដូច្នេះត្រូវរស់នៅដោយអនាម័យជាប់ជានិច្ច បើមានបញ្ហាសុខភាពធ្ងន់ធ្ងរ ត្រូវបញ្ជូនទៅកាន់មន្ទីរពេទ្យឱ្យបានឆាប់រហ័ស ដើម្បីជៀសផុតគ្រោះថ្នាក់កើតឡើងជាយថាហេតុ។ ទន្ទឹមនឹងនេះ ឯកឧត្តម វ៉ាន់ ដារ៉ា ក៏បានជូនសារុង និងឧបត្ថម្ភថវិកាដល់ប្រជាកសិករមួយចំនួនផងដែរ៕

NEA សហការជាមួយដៃគូពាក់ព័ន្ធ ចុះផ្សព្វផ្សាយការរៀបចំផែនការអាជីព និងជ្រើសរើសជំនាញសិក្សា

នៅព្រឹកថ្ងៃទី២៦ ខែមករា ឆ្នាំ២០២៦នេះ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយ ស.ស.យ.ក. វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្រុមហ៊ុនឯកជន និងវិទ្យាស្ថានជាតិពហុបច្ចេកទេសព្រះសុកុមៈ បានរៀបចំសិក្ខាសាលាស្តីពី “ការរៀបចំផែនការអាជីព និងជ្រើសរើសជំនាញសិក្សា” នៅវិទ្យាល័យព្រះមហាសង្ឃរាជ បួរ គ្រី ស្ថិតនៅស្រុកអង្គស្នួល ខេត្តកណ្តាល។សិក្ខាសាលាស្តីពី “ការរៀបចំផែនការអាជីព និងជ្រើសរើសជំនាញសិក្សា” រៀបចំឡើងក្នុងគោលបំណងសំខាន់ៗដូចជា ៖ ការដោះស្រាយបញ្ហាគម្លាតជំនាញ , ការកាត់បន្ថយការបោះបង់ការសិក្សា, ការកសាងមូលធនមនុស្ស , ការផ្សារភ្ជាប់ទ្រឹស្តី និងការអនុវត្ត និងការភ្ជាប់ជាមួយនូវឱកាសអាហារូបករណ៍ វគ្គអប់រំបណ្តុះបណ្តាល និងឱកាសការងារដោយផ្ទាល់ពីគ្រឹះស្ថានអប់រំសិក្សា និងរោងចក្រសហគ្រាសជំនាញជាដើម។ក្នុងកម្មវិធីនេះ តំណាងក្រុមហ៊ុនឯកជន និងវិទ្យាស្ថានបណ្តុះបណ្តាលជំនាញ បានធ្វើបទបង្ហាញតម្រង់ទិសទៅកាន់សិស្សានុសិស្ស ឱ្យបានយល់ដឹងអំពីឱកាសការងារ និងអាជីពការងារ ជាពិសេសការត្រៀមខ្លួនជាមុន ក្រោយបញ្ចប់ការសិក្សាថ្នាក់ទី១២ ឬហៅថា ថ្នាក់បាក់ឌុប។សម្តេចព្រះមង្គលទេពាចារ្យ វង្ស អានេតា ព្រះនាយកវិទ្យាល័យសម្តេចព្រះមហាសង្ឃរាជ បួរ គ្រី មានសង្ឃដីកាថា កម្មវិធីសិក្ខាសាលានេះ ពិតជាមានសារៈសំខាន់ណាស់ក្នុងការចូលរួមតម្រង់ទិសដល់សិស្សានុសិស្សថ្នាក់មធ្យមសិក្សាទុតិយភូមិ ឱ្យមានការសម្រេចចិត្តច្បាស់លាស់ មុននឹងចាប់យកជំនាញសិក្សានៅថ្នាក់ឧត្តមសិក្សា ឬការអប់រំបណ្តុះបណ្តាលបច្ចេកទេស និងវិជ្ជាជីវៈនាពេលអនាគត។មន្រ្តីទីភ្នាក់ងារជាតិមុខរបរ និងការងារ (NEA) បានលើកឡើងឱ្យដឹងថា ក្នុងបរិបទនៃការរីកចម្រើនសេដ្ឋកិច្ច និងការប្រែប្រួលយ៉ាងរហ័សនៃតម្រូវការជំនាញក្នុងទីផ្សារកាងារកម្ពុជា NEA បាននិងកំពុងដើរតួនាទីយ៉ាងសកម្មក្នុងការអនុវត្តគោលនយោបាយជាតិស្តីពីមុខរបរ និងាករងារ ។ ក្នុងនោះការរៀបចំសិក្ខាសលានេះ គឺជាយុទ្ធសាស្រ្តដ៏សំខាន់ ដែល NEA តែងតែអនុវត្តយ៉ាងជាប់លាប់នៅតាមគ្រឹះស្ថានសិក្សារដ្ឋ និងឯកជន ដើម្បីឆ្លើយតបទៅនឹងបញ្ហា “គម្លាតជំនាញ” និងដោះស្រាយ កង្វះព័ត៌មានទីផ្សារការងារ សម្រាប់យុវជន។ ស្របពេលដែលសេដ្ឋកិច្ចកម្ពុជាកំពុងវិវត្តទៅរកយុគ្គសម័យឌីជីថល និងបដិវត្តឧស្សាហកម្ម ៤.០ ការអភិវឌ្ឍមូលធនមនុស្សឱ្យឆ្លើយតបទៅនឹងតម្រូវការជាក់ស្តែងនៃទីផ្សារការងារ គឺជាកិច្ចការអាទិភាពបំផុត៕ អត្ថបទ៖ ឈិត បូរ៉ាវី

ព័ត៌មានជាតិ

សាលាភូមិន្ទរដ្ឋបាល នៃក្រសួងមុខងារសាធារណៈ ចុះ MoU ជាមួយក្រសួងទេសចរណ៍ពង្រឹងសមត្ថភាពមន្រ្តី

រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ និងបូរណភាពទឹកដី

ក្រសួងមុខងារសាធារណៈ បន្តចុះត្រួតពិនិត្យដំណើរការជំរឿនមន្ត្រីនៅតាមគ្រឹះស្ថានសិក្សាសាធារណៈ

ធនាគារជាតិបោះផ្សាយមូលបត្ររដ្ឋឆ្នាំ២០២៥ បានចំនួនសរុប ៧០លានដុល្លារអាម៉េរិក

គ្រឹះស្ថានធនាគារ និងហិរញ្ញវត្ថុ បានរៀបចំឥណទានឡើងវិញជូនអតិថិជនមានចំនួន ៥,៣ ប៊ីលានដុល្លារ

តំណាងរាស្រ្តមណ្ឌលខេត្តកំពត ជំរុញឱ្យប្រជាកសិករគិតគូរពីការដាំបន្លែធម្មជាតិលើកកម្ពស់ជីវភាពរស់នៅ

NEA សហការជាមួយដៃគូពាក់ព័ន្ធ ចុះផ្សព្វផ្សាយការរៀបចំផែនការអាជីព និងជ្រើសរើសជំនាញសិក្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

សាលាភូមិន្ទរដ្ឋបាល នៃក្រសួងមុខងារសាធារណៈ ចុះ MoU ជាមួយក្រសួងទេសចរណ៍ពង្រឹង​សមត្ថភាពមន្រ្តី

រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ និងបូរណភាពទឹកដី

ក្រសួងមុខងារសាធារណៈ បន្តចុះត្រួត​ពិនិត្យ​ដំណើរ​ការ​ជំរឿន​មន្ត្រី​នៅ​តាម​គ្រឹះ​ស្ថាន​សិក្សា​សាធារណៈ

ធនាគារជាតិបោះផ្សាយមូលបត្ររដ្ឋឆ្នាំ២០២៥ បានចំនួនសរុប ៧០លានដុល្លារអាម៉េរិក

គ្រឹះស្ថានធនាគារ និងហិរញ្ញវត្ថុ បានរៀបចំឥណទានឡើងវិញជូនអតិថិជនមានចំនួន ៥,៣ ប៊ីលាន​ដុល្លារ

តំណាងរាស្រ្តមណ្ឌលខេត្តកំពត ជំរុញឱ្យប្រជាកសិករគិតគូរពីការដាំបន្លែធម្មជាតិលើកកម្ពស់ជីវភាពរស់នៅ

NEA សហការជាមួយដៃគូពាក់ព័ន្ធ ចុះផ្សព្វផ្សាយ​ការរៀបចំ​ផែនការ​​អាជីព និង​ជ្រើស​រើស​ជំនាញ​សិក្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សាលាភូមិន្ទរដ្ឋបាល នៃក្រសួងមុខងារសាធារណៈ ចុះ MoU ជាមួយក្រសួងទេសចរណ៍ពង្រឹងសមត្ថភាពមន្រ្តី

ក្រសួងមុខងារសាធារណៈ បន្តចុះត្រួតពិនិត្យដំណើរការជំរឿនមន្ត្រីនៅតាមគ្រឹះស្ថានសិក្សាសាធារណៈ

គ្រឹះស្ថានធនាគារ និងហិរញ្ញវត្ថុ បានរៀបចំឥណទានឡើងវិញជូនអតិថិជនមានចំនួន ៥,៣ ប៊ីលានដុល្លារ

NEA សហការជាមួយដៃគូពាក់ព័ន្ធ ចុះផ្សព្វផ្សាយការរៀបចំផែនការអាជីព និងជ្រើសរើសជំនាញសិក្សា