BTV NEWS

សម្ដេចតេជោ ផ្ដល់សូឡាជិត ៧០០ដើម សម្រាប់បំភ្លឺផ្លូវនៅឃុំទង់ត្រឡាច ស្រុកស្រីសន្ធរ

អភិបាលខេត្តបាត់ដំបង ដាស់តឿនយុវជនត្រូវចៀសឆ្ងាយពីគ្រឿងញៀន និងគោរពច្បាប់ចរាចរណ៍

ទ័ពមួកខៀវកម្ពុជាជាង ១៨០រូប វិលត្រឡប់ពីប្រទេសលីបង់ ដោយសុវត្ថិភាព

រដ្ឋមន្ដ្រីក្រសួងអភិវឌ្ឍន៍ជនបទ អញ្ជើញសំណេះសំណាលជាមួយនាយទាហាន ពលទាហាន អតីតយុទ្ធជន និងនិវត្តជនជាង១០០គ្រួសារ ក្នុងខេត្តកំពង់ឆ្នាំង

ព័ត៌មានជាតិ

អភិបាលខេត្តកំពង់ចាម ស្នើសមាគមនារីខេត្ត បន្តចលនាធ្វើការងារមនុស្សធម៌ឱ្យបានច្រើន ដើម្បីរួមចំណែកជាមួយរដ្ឋាភិបាលកម្ពុជា

ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានស្នើសុំដល់សមាជិកសមាគមនារី តាម ខេត្ត ក្រុង-ស្រុក ជួយធ្វើចលនាធ្វើការងារសង្គម តាមរយៈ ជួយស្ត្រីមានផ្ទៃពោះស្ត្រីមេម៉ាយ ចាស់ជរា ក្មេងកំព្រាជនពិការឲ្យបានផុសផុលដើម្បីរួមចំណែក ជាមួយរាជរដ្ឋាភិបាលកម្ពុជាក្នុងការកាត់បន្ថយភាពក្រីក្រ និងលើកស្ទួយជីវភាពប្រជាពលរដ្ឋ។ឯកឧត្តមមានប្រសាសន៍បែបនេះ ក្នុងពិធីកិច្ចប្រជុំបូកសរុបលទ្ធផលការងារប្រចាំឆ្នាំ ២០២៥ និងលើកទិសដៅឆ្នាំ២០២៦ របស់គណៈកម្មការសាខាសមាគមនារីកម្ពុជាដើម្បី សន្តិភាព និងការអភិវឌ្ឍន៍ និងក្រុមចលនាស្ត្រីខេត្តកំពង់ចាម នាព្រឹកថ្ងៃទី២៦ ខែមករា ឆ្នាំ ២០២៦ នៅសាលាខេត្តដោយក្នុងពិធីនេះ ក៏មានការអញ្ជើញចូលរួមដោយលោកជំទាវ ញូង ចរិយា អ៊ុន ចាន់ដា ប្រធានកិត្តិយសសាខាសមាគមនារី ដើម្បីសន្តិភាពនិងការអភិវឌ្ឍន៍ និងឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម។ឯកឧត្តមអភិបាលខេត្ត បានលើកឡើងថា កន្លងមកឃើញសកម្មភាព សមាគមនារី តែងតែចុះជួយការងារ មនុស្សធម៌ជារៀងរាល់ឆ្នាំលើសពីឯកឧត្តម សូមស្នើដល់សមាគមនារីខេត្ត បន្តជំរុញដល់ សមាគមនារីតាមក្រុង ស្រុកឲ្យបន្តសកម្មភាពចុះជួយប្រជាពលរដ្ឋជួបការលំបាកឲ្យបានកាន់តែច្រើនបន្ថែមទៀត ដើម្បីរួមគ្នាលើកកម្ពស់ជីវភាព រស់នៅរបស់ប្រជាពលរដ្ឋ មានលំនឹងក្នុងគ្រួសារហើយ ក៏ការរួមចំណែកជាមួយរាជរដ្ឋាភិបាលកម្ពុជា កាត់បន្ថយភាពក្រីក្ររបស់ប្រជាពលរដ្ឋតាមជនបទ។ ឯកឧត្តម អ៊ុន ចាន់ដា បានបន្ត ការបង្កើតសមាគមនេះឡើង មិនមែនត្រឹមតែគៀងគរថវិកាតែមួយមុខនោះទេ គឺបង្កើតឡើងដើម្បីឲ្យសមាជិកក្នុងសមាគមនារី ចុះធ្វើសកម្មភាព ជួយការងារសង្គម មិនផ្តោតសំខាន់តែរឿងលុយកាក់ចូលសមាគមនោះដូច្នេះសូមសមាជិកសមាគមប្រឹងប្រែងខិតខំ ជួយកិច្ចការមនុស្សធម៌ឲ្យបានច្រើន។ជាមួយគ្នានេះ ឯកឧត្តមអភិបាលខេត្តកំពង់ចាម ក៏បានអំពាវនាវ ដល់សមាជិកនីមួយៗ ត្រូវមានការសាមគ្គីភាពផ្ទៃក្នុង មានឯកភាពគ្នា ចេះជួយគ្នាទៅវិញទៅមក ដល់សមាជិកក្នុងក្រុមដែលជួបការលំបាក ហើយបន្តពង្រឹង សមត្ថភាព ចំណេះដឹង ចំណេះធ្វើឲ្យមានសមត្ថភាព គ្រប់គ្រាន់ សម្រាប់ធ្វើជាអ្នកដឹកនាំក្រុមដឹកនាំសមាគមន៍ និងក្លាយជា សរសៃរឈាម សេដ្ឋកិច្ចរបស់ប្រទេសជាតិ៕

អ្នកបន្តភៀសសឹក ទទូចឱ្យអន្តរជាតិជួយអន្តរាគមន៍ជំរុញថៃបញ្ឈប់អរិភាពជាមួយកម្ពុជា និងងាកមករកដំណោះស្រាយផ្លូវច្បាប់

ប្រជាពលរដ្ឋនៅខេត្តឧត្តរមានជ័យ មានលំនៅឋាននៅតំបន់ក្រហមហើយកំពុងបន្តភៀសសឹកតាមជំរំសុវត្ថិភាព បានស្នើយ៉ាងទទូច ដល់សហគមន៍អន្តរជាតិ បញ្ឈប់ទង្វើអរិភាពរបស់កងទ័ពថៃ ឈ្លានពានបូរណភាពទឹកដីកម្ពុជា និងជួយស្ដារសន្តិភាពនៅកម្ពុជាឡើងវិញ ។ប្រជាពលរដ្ឋ លើកឡើងថា កំពុងនឹករលឹកយ៉ាងខ្លាំង ដល់ផ្ទះសម្បែងពួកគាត់ ដែលជម្លៀសចេញអស់រយៈពេលជាង ១ខែមកហើយនោះ ហើយមិនដឹងទ្រព្យសម្បត្តិ រងការបំផ្លាញយ៉ាងណាខ្លះ ព្រោះនៅក្បែរតំបន់ប្រយុទ្ធគ្នារវាងកងទ័ពកម្ពុជា និងកងទ័ពថៃ ហើយចង់ត្រឡប់ទៅផ្ទះវិញ ។អ្នកភៀសសឹកបានបន្តថា នៅពេលឃើញប្រជាពលរដ្ឋភៀសសឹកដទៃទៀត ត្រឡប់ទៅផ្ទះវិញ គឺពួកគាត់ក៏ចង់ទៅដែរ ប៉ុន្តែស្ដាប់តាមការណែនាំរបស់រាជរដ្ឋាភិបាល និងអាជ្ញាធរ ដោយសារផ្ទះនៅក្នុងតំបន់ក្រហម ហើយការហាមមិនទាន់ឲ្យទៅវិញនេះ គឺគិតពីសុវត្ថិភាពរបស់ពួកគាត់។ទន្ទឹមនេះ ប្រជាពលរដ្ឋបានស្នើយ៉ាងទទូច ដល់សហគមន៍អន្តរជាតិ និងអង្គការសហប្រជាជាតិ ជួយដល់ប្រទេសកម្ពុជា ដែលរងនូវអំពើឈ្លានពានរបស់កងទ័ពថៃ ហើយបានបង្កសង្គ្រាមមុននោះ ដើម្បីពួកគាត់អាចត្រឡប់ទៅផ្ទះវិះ ដោយសុវត្ថិភាព។ទោះបីជាមានកិច្ចព្រមព្រៀង បទឈប់បាញ់អស់រយៈពេលជិតមួយខែ មកហើយក៏ដោយ ក៏ក្នុងអំឡុងនេះ កងទ័ពថៃតែងតែបង្កនូវអរិភាព ជាច្រើនបន្តបន្ទាប់ ក្នុងនោះមានការយកបន្លាលួស តួកុងទីន័រ និងកងឡានជាដើម មកព័ទ្ធយកទឹកដីខ្មែរ នៅក្នុងតំបន់មួយចំនួន ដែលទង្វើនេះ បានរំលោភទៅលើកិច្ចព្រមព្រៀងកាលពីថ្ងៃទី២៧ ខែធ្នូ ឆ្នាំ២០២៥ ។គួរបញ្ជាក់ថា ក្នុងចំណោមពលរដ្ឋភៀសសឹកសរុបជាង ៦សែន ៤ម៉ឺននាក់ គឺមានប្រមាណជាង ៥សែន ៣ម៉ឺននាក់ ឬស្មើនឹង ៨២ភាគរយហើយ បានវិលត្រឡប់ទៅលំនៅឋានវិញ ។ ដូចនេះប្រជាពលរដ្ឋភៀសសឹកបន្តស្នាក់នៅជំរំមានចំនួន ជាង ១១ម៉ឺននាក់ទៀត ក្នុងនោះស្រី្តមានជាង ៦ម៉ឺននាក់ និងកុមារជិត ៤ម៉ឺននាក់៕ អត្ថបទ បាន សុខរិទ្ធិ

រដ្ឋមន្រ្ដីកសិកម្មកម្ពុជា នាំរដ្ឋមន្រ្ដីកសិកម្មឡាវឈ្វេងយល់អំពីផលិតផលកសិកម្មសំខាន់ៗរបស់កម្ពុជា

កាលពីថ្ងៃទី២៥ ខែមករា ឆ្នាំ២០២៦នេះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញនាំ ឯកឧត្តមបណ្ឌិត Linkham DOUANGSAVANH រដ្ឋមន្រ្តីក្រសួងកសិកម្មនិងបរិស្ថាន នៃសាធារណរដ្ឋប្រជាធិបតេយ្យប្រជាមានិតឡាវ ធ្វើដំណើរទស្សនកិច្ចនៅរាជធានីភ្នំពេញ និងខេត្តកំពង់ស្ពឺ ដើម្បីពិនិត្យនិងស្វែងយល់ផលិតផលកសិកម្មសំខាន់ៗដែលជាសក្តានុពលរបស់ប្រទេសកម្ពុជា។យោងតាម ក្រសួងកសិកម្ម រុក្ខាប្រមាញ់ និងនេសាទ ក្នុងដំណើរទស្សនកិច្ចនេះ ឯកឧត្តមរដ្ឋមន្រ្តីទាំងពីររូប បានអញ្ជើញពិនិត្យពីខ្សែច្រវាក់ផលិតកម្មនៃរោងចក្រទាំងមូល និងស្វែងយល់បន្ថែមពីផលិតផលសម្រេចរបស់រោងចក្រ ខនហ្វីរេល រាជធានីភ្នំពេញ ដែលធ្វើឡើងពីកសិផលសក្តានុពលកម្ពុជាជាច្រើន ប្រកបដោយគុណភាពល្អ សុវត្ថិភាពអនាម័យខ្ពស់ រសជាតិឆ្ងាញ់ និងល្អប្រសើរសម្រាប់សុខភាព ខណៈផលិតផលទាំងនេះសុទ្ធសឹងតែឆ្លងកាត់ការពិសោធន៍ មានការទទួលស្គាល់ និងវាយតម្លៃច្បាស់លាស់មុននឹងដាក់លក់លើទីផ្សារ និងនាំចេញទៅក្រៅប្រទេស។បន្ទាប់ពីចប់ដំណើរទស្សនកិច្ចខាងលើនេះ ឯកឧត្តមរដ្ឋមន្រ្តី ឌិត ទីណា បានបន្តអញ្ជើញនាំឯកឧត្តមរដ្ឋមន្រ្តីក្រសួងកសិកម្មនិងបរិស្ថានឡាវ ធ្វើដំណើរទស្សនកិច្ច នៅរោងចក្រ ហ្គោលដេនរ៉ាយស៍ (Golden Rice) ខេមបូឌា ខូអិលធីឌី ស្ថិតនៅខេត្តកំពង់ស្ពឺ។បើតាម ក្រសួងកសិកម្ម រុក្ខាប្រមាញ់ និងនេសាទ ក្នុងការចុះពិនិត្យនេះដែរ ឯកឧត្តមរដ្ឋមន្រ្តីទាំងពីររូប បានអញ្ជើញចុះពិនិត្យពីការកែច្នៃស្រូវអង្ករ ចាត់តាំងពីដំណាក់កាលដំបូង សម្ងួត កិន ការគ្រប់គ្រងគុណភាព វេចខ្ចប់ជាផលិតផលសម្រេច សម្រាប់ដាក់លក់ក្នុងស្រុក និងនាំចេញទៅក្រៅប្រទេស ប្រកបដោយគុណភាព ស្តង់ដាអនាម័យ និងសុវត្ថិភាពខ្ពស់៕ អត្ថបទ៖ ឈិត បូរ៉ាវី

អាជ្ញាធរខណ្ឌ៧មករា បន្តយកចិត្តទុកដាក់ក្នុងការរៀបចំសណ្តាប់ធ្នាប់តាមដងផ្លូវក្នុងមូលដ្ឋាន ដើម្បីរក្សារបៀបរៀបរយ

ភ្នំពេញ ៖ អាជ្ញាធរនៅតាមថ្នាក់មូលដ្ឋាន នៅតែបន្តការយកចិត្តទុកដាក់ក្នុងការរៀបចំសណ្តាប់ធ្នាប់សាធារណៈតាមបណ្តោយដងផ្លូវនានាក្នុងមូលដ្ឋានរបស់ខ្លួន ដើម្បីធានារក្សាបានរបៀបរៀបរយឲ្យបានល្អប្រសើរ ។ នៅព្រឹកថ្ងៃទី២៦ ខែមករា ឆ្នាំ២០២៦នេះ កម្លាំងអាជ្ញាធរចម្រុះខណ្ឌ៧មករា ដឹកនាំដោយលោក ថេង សុថុល អភិបាលខណ្ឌ បានបន្តការចុះរៀបចំសណ្តាប់ធ្នាប់ នៅលើផ្លូវលេខ១០៧ ( ផ្លូវសុកហុក ) ស្ថិតក្នុងសង្កាត់ពាក់ព័ន្ធចំនួន០៥ រួមមានសង្កាត់អូរឬស្សី១ , អូរឬស្សី៣ , អូរឬស្សី៤ , សង្កាត់មនោរម្យ និងសង្កាត់បឹងព្រលឹត ខណ្ឌ៧មករា រាជធានីភ្នំពេញ ។ លោក ថេង សុថុល អភិបាលខណ្ឌ៧មករា បានប្រាប់ឲ្យដឹងថា ដោយបន្តការអនុវត្តតាមប្រសាសន៍ណែនាំដ៏ខ្ពង់ខ្ពស់របស់ ឯកឧត្តម ឃួង ស្រេង អភិបាលរាជធានីភ្នំពេញ រដ្ឋបាលខណ្ឌតែងតែគិតគូរជានិច្ចជាកាលលើបញ្ហាសណ្តាប់ធ្នាប់សាធារណៈ ដើម្បីធានាដល់របៀបរៀបរយ និងសោភ័ណ្ឌភាពល្អក្នុងទីក្រុង ខណៈខណ្ឌ៧មករា គឺជាខណ្ឌមួយដែលឋិតនៅកណ្តាលរាជធានីភ្នំពេញ ឬហៅថា ជាតំបន់ប្រជុំជន ។ លោកអភិបាលបញ្ជាក់ថា ការចុះរៀបចំសណ្តាប់ធ្នាប់នៅលើផ្លូវលេខ១០៧ ( ផ្លូវសុកហុក ) ខាងលើ គឺដើម្បីឲ្យបងប្អូនជាម្ចាស់លំនៅឋានស្របសងខាងផ្លូវដែលកំពុងប្រកបអាជីវកម្មនានា សូមចូលរួមជាមួយអាជ្ញាធរក្នុងគោលដៅរក្សាសណ្តាប់ធ្នាប់ ទុកចំណីផ្លូវសម្រាប់ពលរដ្ឋថ្មើរជើង ជៀសវៀងការបន្តរំលោភចិញ្ចើមផ្លូវ ឬចំណីផ្លូវសាធារណៈដែលនាំឲ្យប៉ះពាល់ធ្ងន់ធ្ងរដល់របៀបរៀបរយសាធារណៈ ពិសេសអាចបង្កការកកស្ទះនានាដោយកត្តាបំពានណាមួយរបស់អ្នកដែលល្មើសការណែនាំរបស់រដ្ឋបាលខណ្ឌ ។ក្នុងនាមអាជ្ញាធរ នៃរដ្ឋបាលខណ្ឌ លោក ថេង សុថុល អភិបាលខណ្ឌ សង្ឃឹមថា បងប្អូនប្រជាពលរដ្ឋទាំងអស់ក្នុងមូលដ្ឋានខណ្ឌ៧មករា នឹងចូលរួមអនុវត្តការណែនាំរបស់អាជ្ញាធរឲ្យបានល្អខ្ជាប់ខ្ជួនទាំងអស់គ្នា ដើម្បីជាការរួមចំណែកកែរលម្អរ និងរក្សាបានសោភ័ណ្ឌភាពខ្ពស់ក្នុងទីក្រុងរបស់យើង ខណៈរាជធានីភ្នំពេញរបស់យើងបច្ចុប្បន្នកំពុងត្រូវបានសកលលោកទទួលស្គាល់ថា ជាទីក្រុងដែលពោរពេញភាពសប្បាយរីករាយ និងសុខសន្តិភាព ៕ កុម្ភៈ

អនុប្រធានទី១ គ.ជ.គ.ម.៖ ការបន្តរៀបចំជម្រកចល័តជូនជនភៀសសឹកជាយុទ្ធសាស្រ្តវែងឆ្ងាយរបស់ សម្តេចធិបតី នាយករដ្ឋមន្រ្ដី

ឯកឧត្តម ទេសរដ្ឋមន្រ្តី គន់ គីម ថ្លែងថា ការបន្តរៀបចំជម្រកចល័តជូនជនភៀសសឹកជាយុទ្ធសាស្រ្តគិតគូរវែងឆ្ងាយរបស់សម្តេចធិបតី ហ៊ុន ម៉ាណែត និងចាត់ទុកសុខសុវត្ថិភាពរបស់ប្រជាពលរដ្ឋជាអាទិភាពចម្បងបំផុត។នៅថ្ងៃទី២៦ ខែមករា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) បានអញ្ជើញចុះពិនិត្យការបន្តរៀបចំជម្រកចល័តជូនជនភៀសសឹក ដែលមិនទាន់អាចត្រឡប់ទៅលំនៅដ្ឋាន នៅតាមបណ្តាមណ្ឌលសុវត្ថិភាព ដើម្បីបង្កភាពងាយស្រួលជូនជនភៀសសឹក ពិសេសប្រជាពលរដ្ឋចាស់ជរា ស្រ្តីមានផ្ទៃពោះ និងកុមារ។ក្នុងនាម គណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម ទេសរដ្ឋមន្រ្តី សូមថ្លែងអំណរគុណយ៉ាងជ្រាលជ្រៅជូនចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ដែលបានផ្តល់គោលការណ៍ក្នុងការរៀបចំជម្រកចល័តនេះជូនបងប្អូនភៀសសឹក។ក្នុងឱកាសចុះពិនិត្យនេះ ឯកឧត្តម ទេសរដ្ឋមន្ត្រី បានគូសបញ្ជាក់ថា សកម្មភាពនាពេលនេះ គឺជាការអនុវត្តតាមបទបញ្ជាយ៉ាងម៉ឺងម៉ាត់ និងខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ដែលជានិច្ចកាល សម្តេចតែងតែយកចិត្តទុកដាក់ និងចាត់ទុកសុខសុវត្ថិភាពរបស់ប្រជាពលរដ្ឋជាអាទិភាពចម្បងបំផុត។ឯកឧត្តម ទេសរដ្ឋមន្រ្តី បានសង្កត់ធ្ងន់ថា ការរៀបចំជម្រកចល័តនេះ មិនត្រឹមតែជាការឆ្លើយតបចំពោះមុខប៉ុណ្ណោះទេ ប៉ុន្តែគឺជាយុទ្ធសាស្ត្រគិតគូរវែងឆ្ងាយរបស់រាជរដ្ឋាភិបាល ក្នុងការគ្រប់គ្រងគ្រោះមហន្តរាយ ទាំងដែលបង្កដោយមនុស្ស និងធម្មជាតិ ដើម្បីធានាថាប្រជាពលរដ្ឋមានជម្រកសមរម្យ និងសុវត្ថិភាពបំផុតក្នុងគ្រាអាសន្ន។ឯកឧត្តម ទេសរដ្ឋមន្រ្តី ថ្លែងថា ក្រុមការងារបានខិតខំប្រឹងប្រែងពន្លឿនរហូតសម្រេចរៀបចំរួច និងដំឡើងជម្រកចល័តនេះជាបន្តបន្ទាប់ជូនប្រជាពលរដ្ឋភៀសសឹកចូលស្នាក់នៅជាបណ្តើរៗ ក្នុងមណ្ឌលសុវត្ថិភាពតាមបណ្តាខេត្តមួយចំនួន។ឯកឧត្តម ទេសរដ្ឋមន្រ្តី ថ្លែងទៀតថា ការរៀបចំជម្រកចល័តនេះ មានអំណោយផលដែលទទួលជនភៀសសឹកច្រើនគ្រួសារ និងអាចការពារពីអាកាសធាតុក្នុងពេលបច្ចុប្បន្ន ហើយអាចផ្តល់លទ្ធភាពដល់គ្រួសារភៀសសឹកដែលមានសមាជិកគ្រួសារផងដែរ។ឯកឧត្តម ទេសរដ្ឋមន្រ្តី បន្ថែមថា សម្តេចធិបតី ហ៊ុន ម៉ាណែត ប្រមុខរាជរដ្ឋាភិបាល តែងតែដល់ផ្តល់អនុសាសន៍ និងរម្លឹកជាប់ជាប្រចាំពីសុខទុក្ខជនភៀសសឹក និងមណ្ឌលសុវត្ថិភាពដែលជាជម្រកសំខាន់ដោះស្រាយក្នុងគ្រាមានជម្លោះព្រំដែនដែលប្រជាពលរដ្ឋស្លូតត្រង់ត្រូវបង្ខំចិត្តចាកចេញពីផ្ទះសម្បែងរបស់ខ្លួន ជាពិសេសគោលការណ៍បន្តរៀបចំជម្រកចល័តនេះ បានឆ្លុះបញ្ចាំងយ៉ាងច្បាស់ពីមនោសញ្ចេតនា និងការទទួលខុសត្រូវរបស់រាជរដ្ឋាភិបាលកម្ពុជា ក្នុងនាមជា រាជរដ្ឋាភិបាលដែលកើតចេញពីប្រជាជន និងធ្វើអ្វីៗគ្រប់យ៉ាងដើម្បីប្រជាជន៕

សម្ដេចតេជោពេញចិត្តចំពោះទំនាក់ទំនងល្អរវាងកម្ពុជា និងឥណ្ឌូណេស៊ី ខណៈឥណ្ឌូណេស៊ីបានដើរតួនាទីយ៉ាងសំខាន់រុញច្រានកម្ពុជាឱ្យឈានទៅរកដំណើរការនៃសន្ដិភាព

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញការពេញចិត្តចំពោះទំនាក់ទំនងល្អរវាងប្រទេសកម្ពុជា និងឥណ្ឌូណេស៊ី ហើយសម្ដេចបញ្ជាក់ថា ឥណ្ឌូណេស៊ីបានដើរតួនាទីយ៉ាងសំខាន់ក្នុងការរុញច្រានកម្ពុជាឱ្យឈានទៅរកដំណើរការនៃសន្ដិភាពមកដល់បច្ចុប្បន្ននេះ។ សម្ដេចតេជោ ហ៊ុន សែន ប្រធានព្រឹទ្ធសភា បានបញ្ជាក់បែបនេះ ក្នុងឱកាសអនុញ្ញាតឱ្យឯកឧត្តម Santo Darmosumarto ឯកអគ្គរដ្ឋទូតនៃសាធារណរដ្ឋឥណ្ឌូណេស៊ី ចូលជួបសម្តែងការគួរសម និងជម្រាបលា នៅវិមានសាមគ្គីភាព នៃព្រឹទ្ធសភា នៅព្រឹកថ្ងៃទី២៦ ខែមករា ឆ្នាំ២០២៦នេះ។ក្នុងឱកាសនោះ សម្តេចតេជោ បានបំពាក់គ្រឿងឥស្សរិយយស «សហមេត្រី» ថ្នាក់ មហាសេរីវឌ្ឍន៍ ជូនឯកឧត្តមឯកអគ្គរដ្ឋទូតនៃសាធារណរដ្ឋឥណ្ឌូណេស៊ី ចំពោះការខិតខំរួមប្រឹងប្រែងរួមចំណែកជំរុញទំនាក់ទំនងទ្វេភាគីកម្ពុជា-ឥណ្ឌូណេស៊ី។ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ចចាប់ផ្ដើមសម្ដេចតេជោ បានសម្ដែងនូវការស្វាគមន៍ និងរីករាយដែលបានជួប ឯកឧត្តម ឯកអគ្គរដ្ឋទូតឥណ្ឌូណេស៊ី សារជាថ្មី។ សម្ដេចតេជោ ក៏បានវាយតម្លៃខ្ពស់ចំពោះតួនាទីរបស់ឯកឧត្តម ក្នុងនាមជាឯកអគ្គរដ្ឋទូតឥណ្ឌូណេស៊ីប្រចាំនៅកម្ពុជា ដោយបានខិតខំយ៉ាងខ្លាំង ក្នុងការពូនជ្រំនូវទំនាក់ទំនងរវាងកម្ពុជា និងឥណ្ឌូណេស៊ីឱ្យមានភាពរីកចម្រើន ជាពិសេសសម្ដេចតេជោបានអរគុណជាពន្លឹកចំពោះការរៀបចំនូវដំណើរទស្សនកិច្ចរបស់សម្ដេចកាលពីខែឧសភា ឆ្នាំ២០២៥ នៅឥណ្ឌូណេស៊ីប្រកបដោយភាពជោគជ័យ តាមរយៈការទទួលស្វាគមន៍យ៉ាងកក់ក្ដៅពីសំណាក់ ឯកឧត្តមប្រធានាធិបតីឥណ្ឌូណេស៊ីនៅពេលនោះ។ក្នុងឱកាសនោះ ឯកឧត្តម ឯកអគ្គរដ្ឋទូតផុតអាណត្តិ បានសម្ដែងនូវការអរគុណជាអនេកដែលសម្ដេចតេជោបានផ្ដល់ឱកាសដ៏មានតម្លៃឱ្យឯកឧត្តម និងសហការីបានជួបសម្ដែងការគួរសម និងជម្រាបលានាឱកានេះ។ ឯកឧត្តម ឯកអគ្គរដ្ឋទូតឥណ្ឌូណេស៊ី បានវាយតម្លៃចំពោះកិច្ចសហប្រតិបត្តិការរវាងកម្ពុជា និងឥណ្ឌូណេស៊ី ដែលកំពុងមានភាពរីកចម្រើនស្ទើគ្រប់វិស័យ។ ឯកឧត្តម បញ្ជាក់ថា ក្នុងពេលដែលបំពេញបេសកម្មជាឯកអគ្គរដ្ឋទូតនៅកម្ពុជាឯកឧត្តមបានខិតខំប្រឹងប្រែងនៅក្នុងការរៀបចំនូវទំនាក់ទំនងរវាងកម្ពុជា និងឥណ្ឌូណេស៊ីឱ្យកាន់តែមានភាពរឹងមាំបន្ថែមទៀត ជាពិសេសឯកឧត្តមបានវាយតម្លៃចំពោះការផ្លាស់ប្ដូរទស្សនកិច្ចដំណើរទស្សនកិច្ចរវាងថ្នាក់ដឹកនាំប្រទេសទាំងពីរ។ ឯកឧត្តមបញ្ជាក់ថា នៅក្នុងអាណត្តិរបស់ឯកឧត្តម ក៏បានរៀបចំដំណើរទស្សនកិច្ចផ្លូវការរបស់ឯកឧត្តម ប្រធានាធិបតីឥណ្ឌូណេស៊ី ប្រ៉ាបូវ៉ូ ស៊ូប៊ីយ៉ាតូ (Prabowo Subianto) មកកាន់កម្ពុជាផងដែរ ដែលទស្សនកិច្ចនេះ គឺជាផ្នែកមួយដ៏សំខាន់ក្នុងការញ៉ាំងទំនាក់ទំនងរវាងកម្ពុជា និងឥណ្ឌូណេស៊ីឱ្យកាន់តែរីកចម្រើនថែមទៀត។ ជាមួយគ្នានេះឯកឧត្តមក៏បានរៀបចំដំណើរទស្សនកិច្ចរបស់សម្ដេចតេជោទៅកាន់ប្រទេសឥណ្ឌូណេស៊ីផងដែរ ដែលទាំងអស់នេះ បានឆ្លុះបញ្ចាំងអំពីទំនាក់ទំនងដ៏ល្អរវាងកម្ពុជា និងឥណ្ឌូណេស៊ី។ នៅក្នុងឱកាសនោះ សម្ដេចតេជោក៏បានបង្ហាញនូវការពេញចិត្តបន្ថែម ចំពោះការលើកឡើងរបស់ឯកឧត្តមឯកអគ្គរដ្ឋទូត ហើយសម្ដេចតេជោ ក៏បានលើកឡើងអំពីតួនាទីរបស់ ឥណ្ឌូណេស៊ី តាំងពីសម័យកាលដឹកនាំដោយសម្ដេចព្រះបរមរតនកោដ្ឋ រហូតមកដល់ពេលបច្ចុប្បន្ននេះ ក្នុងការចូលរួមស្វះស្វែងរកសន្តិភាពសម្រាប់កម្ពុជា ដោយឥណ្ឌូណេស៊ីក៏បានដើរតួនាទីយ៉ាងសំខាន់ក្នុងការជំរុញឱ្យមានកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ដែលជាផ្នែកដ៏សំខាន់ក្នុងការរុញច្រានកម្ពុជាឱ្យឈានទៅរកដំណើរការនៃសន្ដិភាពកើតមានឡើង។ សម្ដេចតេជោ ចាត់ទុកថា ទាំងនេះ គឺជាផ្លែផ្កានៃទំនាក់ទំនងល្អរវាងប្រទេសទាំងពីរដែលបានកើតមានឡើង។ ជាចុងក្រោយសម្ដេចតេជោក៏បានជូនពរដល់ឯកឧត្តមឯកអគ្គរដ្ឋទូតជោគជ័យនៅក្នុងភារកិច្ច បន្តទៀត ហើយសង្ឃឹមថា ឯកឧត្តមនឹងវិលត្រឡប់មកបំពេញទស្សនកិច្ចនៅកម្ពុជានៅពេលណាមួយ៕

សាលាភូមិន្ទរដ្ឋបាល នៃក្រសួងមុខងារសាធារណៈ ចុះ MoU ជាមួយក្រសួងទេសចរណ៍ពង្រឹងសមត្ថភាពមន្រ្តី

សាលាភូមិន្ទរដ្ឋបាល នៃក្រសួងមុខងារសាធារណៈ និងក្រសួងទេសចរណ៍ នៅព្រឹកថ្ងៃទី២៦ ខែមករានេះ បានចុះអនុស្សរណៈនៃការយោគយល់គ្នា (MoU) ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល និងឯកឧត្តម ហួត ហាក់ រដ្ឋមន្រ្តីក្រសួងទេសចរណ៍។ឯកឧត្តម ឧបនាយករដ្ឋមន្ត្រី ហ៊ុន ម៉ានី បានថ្លែងថា ការចុះអនុស្សរណៈនៅពេលនេះ គឺផ្តោតលើការបង្កើតកិច្ចសហប្រតិបត្តិការ និងលើកកម្ពស់ការគាំទ្រពីគ្នាទៅវិញទៅមកពាក់ព័ន្ធនឹងការអភិវឌ្ឍសមត្ថភាព, ការបណ្តុះបណ្តាល, គម្រោងសិក្សាស្រាវជ្រាវ និងសកម្មភាពផ្សេងៗ ដោយផ្អែកលើគោលការណ៍ពិគ្រោះ យោបល់ ឯកភាពគ្នា សមភាព យុត្តិធម៌ និងផ្ដល់អត្ថប្រយោជន៍ដល់គូភាគីទៅវិញទៅមក។ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានថ្លែងថា កិច្ចសហប្រតិបត្តិការរវាងសាលាភូមិន្ទរដ្ឋបាលនៃក្រសួងមុខងារសាធារណៈ និងក្រសួងទេសចរណ៍ក្នុងពេលនេះ គឺពិតជាឆ្លើយតបចំគោលដៅរបស់ក្រសួងទាំងពីរ និងរាជរដ្ឋាភិបាល ស្របតាមយុទ្ធសាស្រ្តបញ្ចកោណដំណាក់កាលទី១ ដោយផ្តោតទៅលើអាទិ ភាពគន្លឹះចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា។ដោយផ្អែកតាមស្មារតីនៃអនុស្សរណៈនៃការយោគយល់គ្នា សាលាភូមិន្ទរដ្ឋបាល នៃក្រសួងមុខងារសាធារណៈ និងក្រសួងទេសចរណ៍ នឹងឯកភាពក្នុងការផ្ដល់កិច្ចសហការយ៉ាងជិតស្និទ្ធ ដើម្បីអភិវឌ្ឍសមត្ថភាព មន្ត្រីរាជការ នៃក្រសួងទេសចរណ៍ តាមរយៈគោលការណ៍៦ចំណុចរួមមាន៖ ទី១.ការសហការរៀបចំវគ្គបណ្ដុះ បណ្ដាលពង្រឹងសមត្ថភាពជូនដល់ថ្នាក់ដឹកនាំ និងមន្ត្រីរាជការ។ ទី២.ការផ្លាស់ប្ដូរទស្សនកិច្ចសិក្សា និងបទ ពិសោធការងាររបស់ថ្នាក់ដឹកនាំ និងមន្ត្រីរាជការ ទី៣.ការអនុវត្តគម្រោងសហប្រតិបត្តិការផ្សេងៗទៀត ទី៤. ការចូលរួម និងការរៀបចំសន្និសីទ សិក្ខាសាលា និងព្រឹត្តិការណ៍នានា ទី៥.ការលើកកម្ពស់កិច្ចសហប្រតិបត្តិ ការសិក្សាអប់រំផ្សេងទៀតតាមការឯកភាពគ្នា និងទី៦.ការផ្លាស់ប្ដូរវាគ្មិនសម្រាប់បង្រៀនទៅវិញទៅមក៕ អត្ថបទ៖ ទូច សោភ័ណ

រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ និងបូរណភាពទឹកដី

គិតចាប់តាំងពីកម្ពុជាទទួលរងសង្គ្រាមឈ្លានពានពីប្រទេសថៃកាលពីថ្ងៃទី២៤ ខែកក្កដា ឆ្នាំ២០២៥មក ទាំងថ្នាក់ដឹកនាំ ទាំងអាជ្ញាធរគ្រប់លំដាប់ថ្នាក់ ចាប់តាំងពីអាជ្ញាធរមូលដ្ឋាន រហូតដល់ក្រសួង និងស្ថាប័ននានាដែលជាសេនាធិការរបស់រាជរដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ បូរណភាពទឹកដី ក៏ដូចជាការយកចិត្តទុកដាក់ជួយប្រជាពលរដ្ឋភៀសសឹកដោយចាត់ទុកជាកិច្ចការងារអាទិភាពចម្បងបំផុតរបស់រាជរដ្ឋាភិបាល។ នេះបើតាមការបញ្ជាក់របស់អ្នកនាំពាក្យរាជរដ្ឋាភិបាល។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បញ្ជាក់តាមរយៈសន្និសីទសារព័ត៌មាន នៅព្រឹកថ្ងៃទី២៦ ខែមករា ឆ្នាំ២០២៦នេះថា គិតចាប់តាំងពីកម្ពុជាទទួលរងសង្គ្រាមឈ្លានពានពីប្រទេសថៃកាលពីថ្ងៃទី២៤ ខែកក្កដា ឆ្នាំ២០២៥ មក ទាំងថ្នាក់ដឹកនាំ ទាំងអាជ្ញាធរគ្រប់លំដាប់ថ្នាក់ ចាប់តាំងពីអាជ្ញាធរមូលដ្ឋាន រហូតដល់ក្រសួង និងស្ថាប័ននានាដែលជាសេនាធិការរបស់រាជរដ្ឋាភិបាលបានបំពេញការងារយ៉ាងសកម្មបំផុតដើម្បីការពារអធិបតេយ្យភាពជាតិ បូរណភាពទឹកដី ក៏ដូចជាការយកចិត្តទុកដាក់ជួយប្រជាពលរដ្ឋភៀសសឹក ដោយចាត់ទុកជាកិច្ចការងារអាទិភាពចម្បងបំផុតរបស់រាជរដ្ឋាភិបាល។ជាក់ស្តែងក្នុងអំឡុងពេល៦ខែចុងក្រោយនេះ ក្រសួងនិងស្ថាប័ននានារបស់រាជរដ្ឋាភិបាលបានចេញសេចក្តីប្រកាសព័ត៌មាន កំណត់ទូតតវ៉ា សេចក្តីថ្លែងការណ៍ ញ្ញតិថ្កោលទោស និងលិខិតបកស្រាយ ឬលិខិតបំភ្លឺឆ្លើយតបផ្សេងៗ គ្រប់ទម្រង់សរុបចំនួនជិត ៧០០ លើកក្នុងនោះមានដូចជា ក្រសួងការពារជាតិចំនួន ៣៨៣ លើក, ក្រសួងមហាផ្ទៃចំនួន ៨៣ លើក, ក្រសួងវប្បធម៌ និងវិចិត្រសីល្បៈចំនួន ៦៤លើក, ក្រសួងការបរទេសនិងសហប្រតិបត្តិការអន្តរជាតិ៤៩លើក, គណៈកម្មាធិការសិទ្ធិមនុស្សកម្ពុជា ២៧ លើក, អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន ២៥លើក, រដ្ឋលេខាធិការដ្ឋានកិច្ចការព្រំដែន២០ លើក, មជ្ឈមណ្ឌលម្ចាត់មីនកម្ពុជា ១៦ លើក និងក្រសួងធម្មការនិងសាសនាចំនួន១លើក។ដោយឡែក អង្គភាពអ្នកនាំពាក្យរាជរដ្ឋាភិបាលសហការណ៍ជាមួយក្រសួង ស្ថាប័ននានា ដោយមានការសម្របសម្រួលពីបញ្ជាការដ្ឋានព័ត៌មានក៏បានរៀបចំធ្វើបច្ចុប្បន្នភាព(Press Briefing) ប្រចាំថ្ងៃចំនួនជិត ២០០ លើកដើម្បីផ្តល់ព័ត៌មានដល់ប្រជាពលរដ្ឋឬឆ្លើយតបជាមួយភាគីថៃ និងបញ្ជាក់ជំហរច្បាស់លាស់របស់កម្ពុជាចំពោះការការពារអធិបតេយ្យភាព និងបូរណភាពទឹកដីជូនដល់ប្រជាពលរដ្ឋខ្មែរក៏ដូចជាសហគមន៍អន្តរជាតិបានជ្រាប។ក្រៅពីនោះ ក្រសួងការបរទេសនិងសហប្រតិបត្តិការអន្តរជាតិ ក៏បានធ្វើបទបង្ហាញចំនួន១៤លើកជូនប្រធាន និងតំណាងនៃស្ថានបេសកកម្មការទូត និងអង្គការអន្តរជាតិអំពីបច្ចុប្បន្នភាពនៃការវិវត្តន៍ស្ថានការណ៍តាមបណ្តោយព្រំដែនកម្ពុជាថៃ និងបានដឹកនាំអង្គទូត និងអង្គការអន្តរជាតិចុះពិនិត្យមើលស្ថានភាពជាក់ស្តែងតាមបណ្តាខេត្តជាប់ព្រំដែនបាន៤លើក។ ចំណែកស្ថានតំណាងកម្ពុជានៅក្រៅប្រទេសក៏បានធ្វើចលនាការទូតយ៉ាងសកម្មដើម្បីឱ្យបណ្តាប្រទេសជាមិត្ត និងសហគមន៍អន្តរជាតិបានយល់ពីការពិត និងពីជំហរដ៏ត្រឹមត្រូវរបស់កម្ពុជាក្នុងការការពារអធិបតេយ្យភាពជាតិ និងបូរណភាពទឹកដីរបស់ខ្លួនដោយសន្តិវិធីតាមគោលការណ៍ច្បាប់អន្តរជាតិ។ក្រសួងការពារជាតិក៏បានសម្របសម្រួលក្រុមអនុព័ន្ធយោធាបរទេសប្រចាំកម្ពុជា និងអ្នកសង្កេតការណ៍អាស៊ាន(AOT)ចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពនៅតាមព្រំដែនជាបន្តបន្ទាប់ និងសម្របសម្រួលកិច្ចប្រេជុំ RBC និង GBC ជាច្រើនលើកទៀត។ ដោយឡែក ក្រសួងព័ត៌មានក៏បានសម្របសម្រួលឱ្យអ្នកសារព័ត៌មានជាតិ និងអន្តរជាតិជាច្រើនចុះទៅដល់តំបន់ព្រំដែនដើម្បីរាយការណ៍ព័ត៌មានអំពីការខូចខាតហេដ្ឋារចនាសម្ព័ន្ធស៊ីវិល និងផលប៉ះពាល់លើជនស៊ីវិលស្លូតត្រង់កម្ពុជាដោយសារការវាយប្រហារពីយោធាថៃបំពានមកលើដែនអធិបតេយ្យភាពកម្ពុជា។ ទាំងអស់នេះសបញ្ជាក់អំពីការងារយ៉ាងសកម្ម មោះមុត ម៉ត់ចត់ និងគ្រប់ជ្រុងជ្រោយរបស់រាជរដ្ឋាភិបាលលើគ្រប់ចំណុចទាំងអស់ដោយគ្មានខ្វះចន្លោះឬធ្វេសប្រហែសឡើយ។ងាកទៅមើលប្រជាពលរដ្ឋខ្មែរគ្រប់មជ្ឈដ្ឋាន និងគ្រប់ទិសទី រាប់ទាំងព្រះសង្ឃ អ្នកសារព័ត៌មាន និងអ្នកមានឥទ្ធិពលក្នុងបណ្តាញសង្គម បានបង្ហាញស្មារតីស្នេហាជាតិ និងសាមគ្គីភាពយ៉ាងរឹងមាំដោយរួមគ្នាការពារអធិបតេយ្យភាពជាតិ និងបូរណភាពទឹកដីយ៉ាសកម្មក្លៀវក្លាជាមួយរាជរដ្ឋាភិបាល។ ប្រតិកម្មរបស់ប្រជាពលរដ្ឋខ្មែរត្រូវបានធ្វើឡើងតាមគ្រប់រូបភាព ទាំងនៅលើបណ្តាញសង្គម នៅតាមវេទិកាសាធារណនានា ក៏ដូចជាការប្រមូលផ្តុំគ្នាដើម្បីបញ្ចេញសំឡេងតវ៉ា និងការស្វះស្វែងរកអន្តរាគមន៍ពីសហគមន៍អន្តរជាតិឱ្យដឹងលឺ និងជួយគាំទ្របុព្វហេតុដ៏ត្រឹមត្រូវរបស់កម្ពុជាក្នុងការការពារអធិបតេយ្យភាពនិងបូរណភាពទឹកដី តាមគោលការណ៍ជាមូលដ្ឋាន និងមិនអាចបដិសេធបាននៃច្បាប់អន្តរជាតិដែលហាមឃាត់ការកាន់កាប់ទឹកដីដោយប្រើប្រាស់កម្លាំង។ និយាយជារួម ទីណាមានប្រជាពលរដ្ឋខ្មែររស់នៅ ទីនោះមានសំឡេងការពារអធិបតេយ្យភាព និងបូរណភាពទឹកដីកម្ពុជាលាន់លឺយ៉ាងកងរំពង។ បន្ថែមពីលើនេះ សកម្មភាពសប្បុរសធម៌ដើម្បីជួយដល់វីរកងទ័ព និងវីរនគរបាលជាតិដែលឈរជើងនៅជួរមុខ ក៏ដូចជាជួយដល់ជនភៀសសឹក ក៏កើតមានយ៉ាងគគ្រឹគគ្រេងពីគ្រប់មជ្ឈដ្ឋាន។ នេះគឺជាកម្លាំងចលករដ៏ខ្លាំងក្លាក្នុងការការពារអធិបតេយ្យភាព និងបូរណភាពទឹកដីកម្ពុជាតាមរយៈការរក្សាជំហររឹងមាំ និងស្រុះគ្នាជាសំឡេងតែមួយរវាងរាជរដ្ឋាភិបាល និងប្រជាពលរដ្ឋដែលជាកម្លាំងសាមគ្គីដ៏រឹងមាំនៃមហាគ្រួសារខ្មែរ ដើម្បីថែរក្សាការពារបូរណភាពទឹកដីក្នុងដែនអធិបតេយ្យស្របច្បាប់របស់ខ្លួនយ៉ាងប្តូរផ្តាច់បំផុតនិងឥតងាករេ។អ្នកនាំពាក្យរាជរដ្ឋាភិបាលកម្ពុជា បញ្ជាក់ជូនជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងឡើយ៕

សម្ដេចតេជោ ជំរុញកម្ពុជានិងឡាវបន្តខិតខំពង្រីកវិស័យសេដ្ឋកិច្ច ពាណិជ្ជកម្ម វិនិយោគជាមួយគ្នាឱ្យស្របទៅនឹងទំនាក់ទំនងល្អរវាងប្រទេសទាំងពីរ

សម្ដេចអគ្គមហាសេនាបតីតេជោ ហ៊ុន សែន បានជំរុញឱ្យរាជរដ្ឋាភិបាលកម្ពុជា និងឡាវ បន្តខិតខំប្រឹងប្រែងពង្រីកលើវិស័យពាណិជ្ជកម្ម វិនិយោគ ជាពិសេសវិស័យសេដ្ឋកិច្ចប្រទេសទាំងពីរបន្ថែមទៀត ដើម្បីឱ្យសមស្របទៅនឹងទំនាក់ទំនងដ៏ល្អរវាងប្រទេសទាំងពីរ ទាំងទំនាក់ទំនងផ្នែកសេដ្ឋកិច្ច និងនយោបាយ។ សម្តេចតេជោ ហ៊ុន សែន ប្រធានព្រឹទ្ធសភា បានជំរុញបែបនេះ ក្នុងឱកាសអនុញ្ញាតឱ្យឯកឧត្តម ប៊ួកែវ ភុំវង្សសាយ (Buakeo Phumvongsay) ឯកអគ្គរដ្ឋទូត នៃសាធារណរដ្ឋប្រជាធិបតេយ្យប្រជាមានិតឡាវប្រចាំកម្ពុជា ចូលជួបសម្តែងការគួរសម និងជម្រាបលា ព្រឹកថ្ងៃទី២៦ ខែមករា ឆ្នាំ២០២៦នេះ នៅវិមានសាមគ្គីភាព នៃព្រឹទ្ធសភារាជធានីភ្នំពេញ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ក្នុងឱកាសនោះសម្ដេចតេជោ បានសម្ដែងនូវការស្វាគមន៍ និងរីករាយដែលបានជួបជាមួយនឹង ឯកឧត្តម ឯកអគ្គរដ្ឋទូតនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជា សារជាថ្មី ដោយសម្ដេចតេជោបានវាយតម្លៃខ្ពស់ចំពោះបេសកកម្មរបស់ឯកឧត្តម ឯកអគ្គរដ្ឋទូត ក្នុងពេលបំពេញបេសកកម្មនៅកម្ពុជា ដោយបាននាំនៅទំនាក់ទំនងរវាងកម្ពុជា និងឡាវឱ្យកាន់តែមានភាពរីកចម្រើនបន្ថែមទៀត។ ក្នុងឱកាសនោះ ឯកឧត្តម ឯកអគ្គរដ្ឋទូតនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជា បានសម្ដែងនូវក្ដីអរគុណជាអនេកដែលសម្ដេចតេជោបានអនុញ្ញាតឱ្យឯកឧត្តម និងសហការីបានជួប ដើម្បីជម្រាបលាក្នុងឱកាសនេះ។ ឯកឧត្តម ឯកអគ្គរដ្ឋទូត បានចាត់ទុកប្រទេសកម្ពុជា គឺជាផ្ទះទីពីររបស់ឯកឧត្តម ដោយឯកឧត្តមបានបញ្ជាក់ថា ក្នុងពេលបំពេញបេសកកម្មការងារនៅកម្ពុជារយៈពេលបួនឆ្នាំ ឯកឧត្តមមានអនុស្សាវរីយ៍ជាច្រើនជាមួយប្រជាជនកម្ពុជាជាពិសេសប្រទេសកម្ពុជាតែម្ដង។ ឯកឧត្តម ឯកអគ្គរដ្ឋទូត ក៏បានលើកឡើងអំពីទំនាក់ទំនងរវាងកម្ពុជា និងឡាវ ដោយបានបញ្ជាក់ថា ក្នុងឱកាសបំពេញបេសកកម្មទូតនៅកម្ពុជានេះ ឯកឧត្តមបានពង្រីកទំនាក់ទំនងរវាងកម្ពុជា និងឡាវឱ្យមានភាពល្អប្រសើរ និងការផ្លាស់ប្ដូរនូវដំណើរទស្សនកិច្ចថ្នាក់ដឹកនាំរវាងប្រទេសទាំងពីរជាបន្តបន្ទាប់។ សម្ដេចតេជោ ហ៊ុន សែន បានបង្ហាញក្ដីរីករាយចំពោះទំនាក់ទំនងដ៏ល្អរវាងកម្ពុជា និងឡាវ និងសម្ដេចការពេញចិត្តចំពោះអ្វីដែល ឯកឧត្តម ឯកអគ្គរដ្ឋទូត បានលើកឡើង ជាពិសេសការផ្លាស់ប្ដូរនូវទំនាក់ទំនងរវាងប្រទេសទាំងពីរ តាមរយៈដំណើរទស្សនកិច្ចនៃថ្នាក់ដឹកនាំប្រទេសទាំងពីរ។ ក្នុងឱកាសនោះសម្ដេចតេជោ ក៏បានជំរុញបន្ថែមទៀតឱ្យឡាវ និងកម្ពុជា បន្តខិតខំប្រឹងប្រែងពង្រីកលើវិស័យពាណិជ្ជកម្ម វិនិយោគ ជាពិសេសវិស័យសេដ្ឋកិច្ចប្រទេសទាំងពីរតែម្ដង ដើម្បីឱ្យសមស្របទៅនឹងទំនាក់ទំនងដ៏ល្អរវាងប្រទេសទាំងពីរ ទាំងទំនាក់ទំនងផ្នែកសេដ្ឋកិច្ច និងនយោបាយ។ សម្ដេចតេជោ បានបញ្ជាក់ថា នៅពេលដែលទំនាក់ទំនងល្អទាំងផ្នែកសេដ្ឋកិច្ច និងនយោបាយរវាងប្រទេសទាំងពីរមានការកើនឡើងនោះនឹងធ្វើឱ្យទំនាក់ទំនងរវាងប្រទេសទាំងពីរកាន់តែមានភាពរឹងមាំបន្ថែមទៀត។ ជាចុងក្រោយសម្ដេចតេជោ បានជូនពរ ឯកឧត្តម ឯកអគ្គរដ្ឋទូតឡាវឱ្យទទួលជោគជ័យលើកិច្ចការងារបន្តទៀត និងសង្ឃឹមថាវិលត្រឡប់មកទស្សនកិច្ចនៅប្រទេសកម្ពុជានៅពេលណាមួយបន្ថែមទៀត៕

ពលករច្រើននាក់បានទទួលការងារធ្វើក្នុងវេទិកាការងារនៅក្នុងខេត្តបាត់ដំបង និងបន្ទាយមានជ័យ កាលពីចុងសប្ដាហ៍មុន

បន្ទាយមានជ័យ-បាត់ដំបង៖ អតីតពលករច្រើននាក់ដែលបានវិលត្រឡប់មកពីប្រទេសថៃ បានទទួលការងារធ្វើ តាមរយៈវេទិកាការងារដែលត្រូវបានរៀបចំនៅក្នុងខេត្តបាត់ដំបង និងបន្ទាយមានជ័យ កាលពីចុងសប្ដាហ៍មុន។ ពួកគេបានថ្លែងអំណរគុណរាជរដ្ឋាភិបាល និងរោងចក្រសហគ្រាសនានាដែលបានផ្ដល់ឱ កាសការងារដល់ពួកគេ។ក្នុងស្មារតី «ខ្មែរជួយរកការងារឱ្យខ្មែរ ខ្មែរផ្តល់ការងារឱ្យខ្មែរ» វេទិកាការងារ សន្តិសុខសង្គម និង បណ្ដុះបណ្ដាលវិជ្ជាជីវៈ ត្រូវបានរៀបចំឡើង កាលពីថ្ងៃទី២៤-២៥ ខែមករា ឆ្នាំ២០២៦ នៅក្នុងស្រុកបវេល និងស្រុកមោងឫស្សី ខេត្តបាត់ដំបង និងស្រុកមង្គលបូរី និងក្រុងសិរីសោភ័ណ ខេត្តបន្ទាយមានជ័យ ដើម្បីផ្ដល់ឱកាសការងារដល់អតីតពលករវិលត្រឡប់មកពីថៃ និងយុវជនក្នុងមូលដ្ឋានឱ្យទទួលបាន ការងារធ្វើភ្លាមៗ និងចុះឈ្មោះរៀនជំនាញបច្ចេកទេស។ប្រជាពលរដ្ឋដែលសម្ភាសន៍ការងារជាប់ បានបង្ហាញអារម្មណ៍សប្បាយរីករាយដែលទទួលបានការ ងារធ្វើដើម្បីមានប្រាក់ចំណូលផ្គត់ផ្គង់ជីវភាពគ្រួសារ។ ពួកគេបានថ្លែងអំណរគុណរាជរដ្ឋាភិបាល តាមរយៈក្រសួងការងារ និងបណ្ដុះបណ្ដាលវិជ្ជាជីវៈ ដែលបាននាំយកឱកាសការងារជូនប្រជាពលរដ្ឋដល់មូលដ្ឋានផ្ទាល់តែម្ដង។ពួកគេបានបញ្ជាក់ផ្ដាំតកូនចៅឈប់វិលទៅធ្វើការងារនៅប្រទេសថៃវិញហើយ ព្រោះក្នុងស្រុកមាន ការងារច្រើនកន្លែង សុវត្ថិភាព ប្រាក់ខែសមរម្យមិនចាញ់នៅប្រទេសថៃ ពិសេសគឺបាននៅជិតជុំគ្រួសារ។ សូមជម្រាបថា វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ដែលរៀបចំដោយក្រសួងការងារ និងបណ្ដុះបណ្ដាលវិជ្ជាជីវៈ គឺវេទិកាជំនួបដ៏ធំមួយរវាងអ្នកស្វែងរកការងារ និងនិយោជក ដើម្បីដាក់ពាក្យស្វែងរកការងារ ជ្រើសរើស បុគ្គលិក សម្ភាស និងទទួលបានការងារភ្លាមៗនៅមូលដ្ឋានផ្ទាល់តែម្តង តាមរយៈក្រុមហ៊ុនធំៗដែលត្រូវការ កម្លាំងពលកម្មបន្ថែម ដើម្បីកុំឱ្យបងប្អូនពិបាកចំណាយពេលវេលា និងថវិកាក្នុងការធ្វើដំណើរទៅឆ្ងាយ៕

បណ្ដាញសង្គម

ព័ត៌មានថ្មីៗ

លោក Putin៖ រុស្ស៊ី នឹងធ្វើកិច្ចចរចាសន្តិភាពជាមួយអ៊ុយក្រែន នៅប្រទេសទីបី

រដ្ឋអឺរ៉ុប នឹងបញ្ជូនយន្តហោះទៅជម្លៀសពលរដ្ឋចេញពីនាវាទេសចរណ៍ដែលរងគ្រោះដោយការផ្ទុះវីរុស hanta

កងកម្លាំងឆ្មាំបដិវត្តន៍អ៊ីរ៉ង់ គំរាមវាយប្រហារទីតាំងអាមេរិកនៅមជ្ឈិមបូព៌ា ខណៈលោក Trumpរង់ចាំការឆ្លើយតបពីតេអេរ៉ង់

លីបង់និយាយថា ការវាយប្រហាររបស់អ៊ីស្រាអែលបានសម្លាប់មនុស្ស ៣៩នាក់ ទោះមានបទឈប់បាញ់ក៏ដោយ

ទ័ពមួកខៀវកម្ពុជាជាង ១៨០រូប វិលត្រឡប់ពីប្រទេសលីបង់ ដោយសុវត្ថិភាព

លោក Putin និយាយថា សង្រ្គាមអ៊ុយក្រែនទំនងជានឹងបញ្ចប់ក្នុងពេលឆាប់ៗនេះ ទោះការប្រយុទ្ធគ្នានៅតែខ្លាំងក្លាក៏ដោយ

សម្ដេចធិបតី អំពាវនាវឱ្យអនុវត្ដពេញលេញភ្លាមៗនូវសេចក្ដីប្រកាសរួមកម្ពុជា-ថៃ និងវាស់វែង និងខណ្ឌសីមាព្រំដែនប្រទេសទាំងពីរជាបន្ទាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877