BTV NEWS

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ

ក្រុមបារាំងកៀរគរគ្នាដើម្បីបេតិកភណ្ឌកម្ពុជា

ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”

អូស្ត្រាលីកំពុងក្លាយជាទីផ្សារល្អ សម្រាប់ការនាំជលផលកែច្នៃពីកម្ពុជាក្នុងមួយឆ្នាំៗ រាប់សិបតោន

ព័ត៌មានជាតិ

រដ្ឋមន្រ្ដីក្រសួងបរិស្ថាន អញ្ជើញបើកការដ្ឋានសាងសង់ផ្លូវចូលទៅភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅលំហែបៃតង នៃតំបន់ភ្នំខ្នងផ្សារ

ខេត្តកំពង់ស្ពឺ៖ នៅថ្ងៃទី១៦ ខែឧសភា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអញ្ជើញជាអធិបតីក្នុងពិធីសម្ពោធបើកការដ្ឋានសាងសង់ផ្លូវចូលទៅកាន់ ភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅ លម្ហែបៃតងតំបន់ភ្នំខ្នងផ្សារ នៅភូមិតាំងបំពង់ ស្រុកឱរ៉ាល់ ខេត្តកំពង់ស្ពឺ ។ ពិធីនេះធ្វើឡើងក្នុងគោលបំណងជំរុញការអភិវឌ្ឍសេដ្ឋកិច្ចនិងលើកកម្ពស់ជីវភាពប្រជាពលរដ្ឋក្នុងតំបន់ តាមរយៈគម្រោងលម្ហែបៃតង ។ឯកឧត្តមបណ្ឌិត អ៊ាង សុផល្លែត បានសង្កត់ធ្ងន់ថា គម្រោងនេះ មានន័យលើសពីការសាងសង់ផ្លូវ និងសំណង់ស្ថាបត្យកម្ម ពីព្រោះស្ថាបត្យកម្មនេះ កើតចេញពីការប្តេជ្ញាចិត្តដ៏ខ្ពស់ និងពេញដោយក្តីស្រឡាញ់ គិតគូរពីសុខទុក្ខរបស់ប្រជាសហគមន៍តំបន់ការពារធម្មជាតិទេទឹកពុះ និងភ្នំខ្នងផ្សារពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី។ ជាមួយគ្នានេះ ប្រជាសហគមន៍តំបន់ការពារក៏បានចូលរួមសហការយ៉ាងជិតស្និទ្ធរវាងរដ្ឋាភិបាល សហគមន៍ ដៃគូអភិវឌ្ឍន៍ និងប្រជាពលរដ្ឋមូលដ្ឋាន ដែលបានជំរុញ និងបញ្ចេញសក្តានុពលដ៏សម្ងាត់របស់តំបន់សហគមន៍ទេទឹកពុះ និងភ្នំខ្នងផ្សារ ក្នុងនោះក្រសួងបរិស្ថាន ក្រសួងអភិវឌ្ឍន៍ជនបទ កំពុងអនុវត្តគម្រោងនេះ ដើម្បីជួយដល់ការអភិវឌ្ឍហេដ្ឋារចនាសម្ព័ន្ធ និងសម្បទាបម្រើឱ្យគោលដៅលំហែបៃតងភ្នំខ្នងផ្សារ ក្នុងភូមិសាស្ត្រខេត្តកំពង់ស្ពឺ និងខេត្តកោះកុង។ឯកឧត្តមរដ្ឋមន្រ្តីបានបន្ថែមថាហេដ្ឋារចនាសម្ព័ន្ធទាំងនេះ នឹងត្រូវផ្តល់ជូនសហគមន៍មូលដ្ឋានធ្វើការគ្រប់គ្រង ដើម្បីលើកកម្ពស់ជីវភាពគ្រួសារ និងប្រែក្លាយសហគមន៍ឱ្យទៅជាសហគ្រិនប្រកបដោយភាពជាម្ចាស់ ដែលជាការប្តូរពីការពឹងផ្អែកលើការកាប់ឈើ និងបរបាញ់សត្វព្រៃខុសច្បាប់ មកចូលរួមចំណែកក្នុងការការពារ និងអភិរក្សធនធានធម្មជាតិ។សូមជម្រាបជូនថា ហេដ្ឋារចនាសម្ព័ន្ធថ្មីៗ នាពេលនេះរួមមាន៖ ផ្លូវ ខ្លោងទ្វារ ចំណតយានយន្ត ប្រព័ន្ធបំភ្លឺដោយថាមពលព្រះអាទិត្យ ទឹកស្អាត កន្លែងបោះតង់ ផ្លូវថ្មើរជើងក្នុងព្រៃ ស្លាកសញ្ញា កន្លែងសង្គ្រោះបឋម អាហារដ្ឋាន និងកន្លែងទុកដាក់សំរាម។ ជារួមការសាងសង់ទាំងនេះត្រូវអនុលោមតាមរចនាបទខ្មែរ និងរក្សាបាននូវសោភ័ណភាព សម្រស់ធម្មជាតិ ពេញដោយភាពស្អាត ភាពបៃតង និងចីរភាព ជាសុខដុមរមណីយកម្មនៃមេត្រីភាពបរិស្ថាន ៕ អត្ថបទ បាន សុខរិទ្ធិ

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា

ភ្នំពេញ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៅព្រឹកថ្ងៃទី១៦ ខែឧសភា ឆ្នាំ២០២៥នេះ បានអញ្ជើញជាអធិបតីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា (១៦ ឧសភា ១៩៤៥ - ១៦ ឧសភា ២០២៥) នៅបណ្ឌិត្យសភានគរបាលកម្ពុជា។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការប្រារព្ធខួបលើកទី៨០ឆ្នាំនៃការកកើត កងកម្លាំងនគរបាលជាតិ គឺជាការរំលឹក និងដឹងគុណនូវវីរភាពយុទ្ធមិត្តនគរបាលគ្រប់ជំនាន់ ដែលបានពលីគ្រប់បែបយ៉ាងបុព្វហេតុសន្តិភាព និងមួយវិញទៀត គឺជាការប្តេជ្ញាចិត្តជាថ្មីទៀតរបស់រាជរដ្ឋាភិបាល ក្នុងការពង្រឹងស្ថាប័នមួយនេះ ដើម្បីភាពសុខសាន្តរបស់ប្រជាពលរដ្ឋ។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា៖ កោតសរសើរនូវស្នាដៃរបស់កងកម្លាំងនគរបាលដែលបានចូលរួមការពារសុខសន្តិភាព ការពារបូរណភាពទឹកដី និងផលប្រយោជន៍ជាតិ និងប្រឆាំងមិនឲ្យកើតមានអំពើភេរវកម្ម និងទប់ស្កាត់ការប៉ុនប៉ងផ្ដួលរំលំរាជរដ្ឋាភិបាលស្របច្បាប់។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា កងកម្លាំងនគរបាលជាតិ បានធ្វើការយ៉ាងសកម្មក្នុងការចូលរួមភូមិ ឃុំ-សង្កាត់មានសុវត្ថិភាព និងការជួយអន្តរាគមន៍បង្រ្កាបបទល្មើសគ្រប់ ប្រភេទ និងការបម្រើសេវាសន្តិសុខជូនដល់ប្រជាពលរដ្ឋជាដើម។-សម្ដេចធិបតីនាយករដ្ឋមន្រ្ដី ណែនាំឱ្យអង្គភាពនីមួយៗ នៃកងកម្លាំងនគរបាលជាតិត្រូវក្ដាប់ឱ្យជាប់នៅចំណុចខ្លាំង និងចំណុចខ្សោយរបស់អង្គភាព ក្ដាប់ឱ្យជាប់ និងពង្រីកបន្ថែមនូវចំណុចខ្លាំង និងកាត់បន្ថយឱ្យបានចំពោះចំណុចខ្សោយរបស់អង្គភាពនីមួយៗ ជាពិសេសការអនុវត្តរបស់បងប្អូនជាកងកម្លាំងនគរបាលជាតិកម្ពុជា។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា កម្ពុជាបានប្រែក្លាយពីសង្គមមួយមាន បញ្ហាច្រើន(សង្រ្គាម)ពីមុន និងឯកោបំផុត តែពេលនេះ បានក្លាយជាសង្គមមួយបានកំពុងរីកចម្រើនគ្រប់វិស័យ និងបន្តឆ្ពោះទៅកាន់ភាពរុងរឿងកាន់តែល្អប្រសើរបន្ថែមទៀតនាពេលខាងមុខ។-សម្ដេចធិបតីនាយករដ្ឋមន្រ្ដី៖ ការប្រែប្រួលនៃការអភិវឌ្ឍប្រទេស និងពិភពលោក គឺទាមទារឱ្យកងកម្លាំងនគរបាលជាតិ ត្រូវត្រៀមខ្លួនជានិច្ច និងខិតខំរៀបចំលិខិតបទដ្ឋាន និងគោលនយោបាយនានា ដើម្បីទបស្កាត់បទល្មើសនានាទាំងបទល្មើសបច្ចេកវិទ្យា និងបទល្មើសនៅមូដ្ឋាន ដូចជាករណីក្មេងទំនើងជាដើម។-សម្ដេចមហាបវរធិបតី នាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រី៖ ប្រសិនបើពលរដ្ឋក្រីក្រនោះពិតជាមិនមានក្មេងទំនើងបង្ហោះម៉ូតូល្អៗលេងនោះទេ, ប្រសិនបើកម្ពុជាជាប្រទេសបិទជិត នោះពលរដ្ឋកម្ពុជាក៏មិនអាចប្រើប្រាស់ប្រព័ន្ធបច្ចេកវិទ្យាបច្ចុប្បន្នបាននោះដែរ។ សម្ដេចធិបតីបញ្ជាក់បន្ថែមថា ពលរដ្ឋកម្ពុជាបច្ចុប្បន្នប្រើប្រាស់ប្រព័ន្ធបច្ចេកវិទ្យាទំនើបមានរហូតជាង ៩៩ ភាគរយ។ បច្ចេកវិទ្យាបានជួយសម្រួលដល់ការងារ និងទំនាក់ទំនងនានា ប៉ុន្តែក៏មានក្រុមឧក្រិដ្ឋជនប្រើបច្ចេកវិទ្យាដើម្បីប្រ ព្រឹត្តបទល្មើសនានាផងដែរ ដែលនេះទាមទារឱ្យមានការបង្កើនការទប់ស្កាត់ឱ្យខាងតែបាន។-សម្ដេចធិបតីនាយករដ្ឋមន្រ្ដី៖ ការការពារឱ្យបាននូវសុខសន្ដិភាព ស្ថិរភាព និងសន្ដិសុខជូនដល់ប្រជាពលរដ្ឋ គឺជាអ្វីដែលកងកម្លាំងនគរបាលជាតិត្រូវធ្វើឱ្យបាន មិនអាចឱ្យក្រុមជ្រុលនិយមណាមួយបង្កើតចលនា ព័ត៌មានក្លែងក្លាយ ធ្វើឱ្យប្រទេសជាតិអសន្ដិសុខ អសុវត្ថិភាពបានឡើយ។-សម្ដេចធិបតីនាយករដ្ឋមន្រ្ដី ណែនាំដល់នគរបាលជាតិបន្តជំរុញ និងលើកកម្ពស់តួនាទីស្នូលរបស់កងកម្លាំងនគរបាលជាតិ ជាពិសេសការអនុវត្តគោលនយោបាយភូមិ ឃុំ សង្កាត់មានសុវត្ថិភាពនៅមូលដ្ឋានជូនដល់ប្រជាពលរដ្ឋ និងទប់ស្កាត់នូវបទល្មើសគ្រប់ប្រភេទ។-សម្ដេចធិបតីនាយករដ្ឋមន្រ្ដី ណែនាំដល់កងកម្លាំងនគរបាលជាតិ ជាពិសេសកងកម្លាំងពន្លត់អគ្គិភ័យ ខិតខំហ្វឹកហ្វឺន ដើម្បីត្រៀមជួយសង្គ្រោះប្រជាពលរដ្ឋពេលជួបគ្រោះអគ្គិភ័យ ខណៈបច្ចុប្បន្នដងស៊ីតេនៅក្នុងទីក្រុង ទីប្រជុំជនមានការកើនឡើងខ្លាំង ដូច្នេះទាមទារឱ្យកងកម្លាំងត្រូវមានជំនាញខ្ពស់ និងការងារមមាញឹកជាងមុន។-សម្ដេចមហាបវរធិបតី នាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រី៖ ការអនុវត្តអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ មិនមែនអនុវត្តត្រឹមតែមន្ត្រី និងកងកម្លាំងប្រដាប់អាវុធ គ្រប់ប្រភេទនោះទេ សូម្បីតែពលរដ្ឋក៏ត្រូវចូលរួមអនុវត្តផងដែរ គឺត្រូវចូលរួមអប់រំ ទប់ស្កាត់កូនចៅសាច់ញាតិនានាកុំឱ្យប្រព្រឹត្តបទល្មើស ដែលបណ្ដាលឱ្យមានទោសទណ្ឌ ហើយត្រូវនគរបាលនាំខ្លួន ទៅដាក់មន្ទីរអប់រំកែប្រែនោះអី។-សម្ដេចធិបតីនាយករដ្ឋមន្រ្ដី បន្តណែនាំដល់ការសាងសង់សំណង់ខ្ពស់ៗ គឺត្រូវតែធ្វើឱ្យមានស្ដង់ដា មានប្រព័ន្ធការពារអគ្គិភ័យឱ្យបានត្រឹមត្រូវ។ សម្ដេច ក៏បានណែនាំដល់កងកម្លាំងពន្លត់អគ្គិភ័យ ត្រូវបង្កើនល្បឿន ក្នុងការជួយសង្គ្រោះពលរដ្ឋចំពោះករណីគ្រោះអគ្គិភ័យនេះផងដែរ។-សម្ដេចធិបតីនាយករដ្ឋមន្រ្ដី បានថ្លែងអំណរគុណដល់បណ្ដាប្រទេសជាមិត្តនានា ដែលបានសហការផ្ដល់ការបណ្ដុះបណ្ដាលដល់កងកម្លាំងនគរបាលជាតិកម្ពុជា អាចមានសមត្ថភាពបង្ក្រាបបទល្មើសគ្រប់រូបភាព។ ក្នុងនោះ សម្ដេចបន្តលើកទឹកចិត្តដល់កងកម្លាំងនគរបាលជាតិកម្ពុជា ត្រូវខិតខំបន្តហ្វឹកហ្វឺន ពង្រឹងសមត្ថភាព ដើម្បីអាចអនុវត្តការងារបានល្អ។-សម្ដេចមហាបវរធិបតីនាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រី៖ មន្ត្រីនគរបាលទាំងអស់ត្រូវបង្កើនការបណ្ដុះបណ្ដាលឱ្យមានសមត្ថភាពតាមស្តង់ដាដែលកំណត់ដោយសាលានគរបាល។ សម្ដេចធិបតីបញ្ជាក់បន្ថែមថា មន្ត្រីនគរបាលទាំងអស់ត្រូវប្រកបដោយគុណភាព និងបរិមាណ មានន័យថា មន្ត្រីគ្រប់រូបដែលបម្រើការងារក្នុងកងកម្លាំងនគរបាលត្រូវប្រកបដោយគុណភាព និងសមត្ថភាព, មន្ត្រីនគរបាលគ្រប់រូបត្រូវយល់ដឹងពីច្បាប់ និងការអនុវត្តឱ្យបានត្រឹមត្រូវ ដើម្បីការពារសុខសុវត្ថិភាព និងសណ្ដាប់ធ្នាប់សង្គមជូនពលរដ្ឋឱ្យបានកាន់តែប្រសើរ។-សម្ដេចធិបតីនាយករដ្ឋមន្រ្ដី បានចោទសួរថា បើក្រុមជ្រុលនិយមដែលលើកឡើងថា មានការលក់ព្រលានយន្តហោះអន្តរជាតិពោធិ៍ចិនតុងនោះ សូមបញ្ជាក់ឯកសារមក! ខណៈរាជរដ្ឋាភិបាលតាំងតែពីការដឹកនាំដោយសម្ដេចតេជោ ហ៊ុន សែន ជានាយករដ្ឋមន្រ្ដី និងអាណត្តិទី៧នេះ ក្រោមការដឹកនាំដោយសម្ដេចផ្ទាល់ គឺគ្មានការលក់ព្រលានយន្តហោះអន្តរជាតិពោធិ៍ចិនតុងនេះ នោះទេ។-សម្ដេចធិបតីនាយករដ្ឋមន្រ្ដី បញ្ជាក់ថា ការរក្សាទុកនូវព្រលានយន្តហោះអន្តរជាតិពោធិ៍ចិនតុង គឺដើម្បីការពារក្នុងករណីដែលព្រលានយន្តហោះថ្មី ចៃដន្យមានបញ្ហាណាមួយកើតឡើងគឺអាចយកព្រលានយន្តហោះចាស់នេះ ប្រើប្រាស់ជំនួសវិញបាន។ ក្រៅពីនេះព្រលានយន្តហោះអន្តរជាតិពោធិ៍ចិនតុងនឹងរក្សាទុកជាផលប្រយោជន៍របស់ប្រជាពលរដ្ឋ និងជាទ្រព្យសម្បត្តិរបស់រដ្ឋមិនលក់ឱ្យជារបស់ឯកជនឡើយ ដោយធ្វើយ៉ាងណារក្សាទីតាំងព្រលានយន្តហោះចាស់នេះទុក ជាទីតាំងប្រវត្តិសាស្រ្ដ។-សម្ដេចមហាបវរធិបតី នាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រី បានអំពាវនាវដល់អ្នកដែលមានឯកសារបញ្ជាក់ពីការលក់ព្រលានយន្តហោះអន្តរជាតិភ្នំពេញ(ព្រលានយន្តហោះពោធិ៍ចិនតុង)យកមកបង្ហាញសម្ដេច។ សម្ដេចធិបតីបញ្ជាក់បន្ថែមថា ទាំងសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងសម្ដេចផ្ទាល់(សម្ដេចមហាបវរធិបតី)ជានាយករដ្ឋមន្ត្រីបច្ចុប្បន្ន គឺមិនដែលបានអនុញ្ញាតឱ្យមានការផ្ទេរទៅឱ្យឯកជន ឬ លក់ទៅឱ្យឯកជននោះឡើយ។

សម្តេច ម៉ែន សំអន ៖ បើគ្មានការរីកចម្រើនវិស័យអាណាចក្រនោះទេ វិស័យពុទ្ធចក្រក៏មិនអាចដំណើរការបានល្អដែរ

ភ្នំពេញ ៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានអញ្ជើញសំណេះសំណាលជាមួយប្រជាពលរដ្ឋជួបការលំបាក ចំនួន ២០០គ្រួសារ នៅវត្តសុវណ្ណមុនីសាគរ ហៅវត្តសំរោងអណ្តែត ស្ថិតក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ នារសៀលថ្ងៃព្រហស្បតិ៍ ៤រោច ខែពិសាខ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី១៥ ខែឧសភា ឆ្នាំ២០២៥។ មានសង្ឃដិការនៅក្នុងពិធីនោះ សម្តេចព្រះសាក្យមុនី រ័ត្ន សារឿន បានលើកឡើងថា ការអញ្ជើញរបស់សម្តេចកិត្តិសង្គហបណ្ឌិតនាពេលនេះគឺបានឃើញអំពីសុខទុក្ខផ្ទាល់របស់ប្រជាពលរដ្ឋដែលបាននឹងកំពុងរស់នៅជុំវិញវត្ត ព្រមទាំងបានចែករំលែកនូវធនធានផ្ទាល់ខ្លួនជួយដល់អ្នកជួបការលំបាក។មានប្រសាសន៍សំណេះសំណាលក្នុងឱកាសនោះសម្តេចកិត្តិសង្គហបណ្ឌិត បាននាំមកនូវប្រសាសន៍ផ្ដាំផ្ញើសួរសុខទុក្ខ និង សេចក្ដីនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន, សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី ជូនដល់បងប្អូនប្រជាពលរដ្ឋទាំងអស់ដោយក្តីនឹករលឹកដែលជានិច្ចកាលសម្ដេចតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿ សាសនា ឬនិន្នាការនយោបាយណាមួយឡើយ ។មានប្រសាសន៍ក្នុងពិធីនោះ សម្តេចកិត្តិសង្គហបណ្ឌិត ក៏បានថ្លែងនូវការកោតសសើរចំពោះទឹកចិត្ត និងព្រះទ័យជ្រះថ្លារបស់ សម្តេចព្រះសាក្យមុនី រ័ត្ន សារឿន ដែលបានយកព្រះទ័យទុក្ខដាក់ចំពោះប្រជាពលរដ្ឋទីទ័លក្រ និងជួបការលំបាកជារៀងរាល់ពេល និងបានថ្លែងអំណរគុណដល់ ឯកឧត្តម សៀង សេន និងលោកជំទាវ ព្រមទាំងក្រុមគ្រួសារដែលបាននាំអំណោយមកចែកជូនប្រជាពលរដ្ឋទាំង ២០០គ្រួសារក្នុងថ្ងៃនេះ។ សកម្មភាពទាំងនេះបានបង្ហាញឲ្យឃើញថា បើគ្មានការរីកចម្រើនវិស័យអាណាចក្រនោះទេ វិស័យពុទ្ធចក្រក៏មិនអាចដំណើរការបានល្អដែរ។សម្តេចកិត្តិសង្គហបណ្ឌិតក៏បានផ្តាំផ្ញើបន្ថែមដល់បងប្អូនប្រជាពលរដ្ឋទាំងអស់ត្រូវតែរក្សាសុខសន្តិភាព ត្រូវប្រុងប្រយ័ត្នចំពោះការកើតឡើងវិញនូវជំងឺកូវីដ១៩ ដែលមានលក្ខណៈកាចសាហាវជាងមុន និងស្នើឲ្យបងប្អូនប្រជាពលរដ្ឋដែលគ្រប់អាយុបោះឆ្នោតត្រូវទៅចុះឈ្មោះ និងពិនិត្យឈ្មោះឡើងវិញតាមការណែនាំរបស់គណៈកម្មការជាតិរៀបចំការបោះឆ្នោត ។ អំណោយដែលបានចែកជូនប្រជាពលរដ្ឋទាំង ២០០ គ្រួសារ ថ្ងៃនេះរួមមាន៖ អង្ករ ១០គីឡូក្រាម មី ១កេស ទឹកត្រី ១យួរ ទឹកស៊ីអីវ ១យួរ និងថវិកា ៥ម៉ឺនរៀល ៕

កម្ពុជានឹងរៀបចំពិព័រណ៍គ្រឿងអលង្ការ និងត្បូងកម្ពុជា អន្តរជាតិ ដើម្បីបង្ហាញការវិវត្តន៍រីកចម្រើន

ភ្នំពេញ ៖ កម្ពុជានឹងរៀបចំពិព័រណ៍គ្រឿងអលង្ការ និងត្បូងមានតម្លៃកម្ពុជា អន្តរជាតិ លើកទី១៦ ដើម្បីផ្សព្វផ្សាយឲ្យដល់សាធារណៈជន ភ្ញៀវជាតិអន្ដរជាតិ បានយល់ដឹងអំពីការវិវត្តន៍រីកចម្រើន និងចក្ខុវិស័យយូរអង្វែងរបស់កម្ពុជា លើវិស័យគ្រឿងអលង្ការ និងត្បូងធម្មជាតិ កម្ពុជា។សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា នៅថ្ងៃទី១៥ ខែ ឧសភា ឆ្នាំ២០២៥ នេះ បានរៀបចំពិព័រណ៍ គ្រឿងអលង្ការ និងត្បូងកម្ពុជាអន្តរជាតិលើកទី១៦ ឆ្នាំ២០២៥ ដោយមានគោលបំណងផ្សព្វផ្សាយ និងផ្តល់ជាព័ត៌មានដល់អាជីវករ ម្ចាស់ក្រុមហ៊ុនគ្រឿងអលង្ការ និងត្បូងមានតម្លៃកម្ពុជា-អន្តរជាតិ សហគ្រាស ពាណិជ្ជករ អាជីវករ និងបណ្ដាអ្នកវិនិយោគលើវិស័យ ធនាគារ វិស័យរថយន្ដ វិស័យទូរស័ព្ទ វិស័យអចលនទ្រព្យ និងវិស័យពាក់ព័ន្ធ ផ្សេងៗបានយល់ដឹងអំពីការវិវត្តន៍ទៅមុខ និងចក្ខុវិស័យ យូរអង្វែងរបស់កម្ពុជា លើវិស័យគ្រឿងអលង្ការ និងត្បូងធម្មជាតិកម្ពុជា ការលើកកម្ពស់ស្នាដៃច្នៃប្រឌិតម៉ូត និងស្នាដៃស្រាវជ្រាវលើវិទ្យា សាស្ត្រនិងបច្ចេកវិទ្យា។ នៅក្នុងពិព័រណ៍គ្រឿងអលង្ការ និងត្បូងកម្ពុជានេះ នឹងមានស្តង់ជាច្រើន ទាំងជាតិនិងអន្តរជាតិ បានការដាក់បង្ហាញនូវ ផលិតផលរបស់ខ្លួនលើគ្រឿងអលង្ការ និងត្បូងមានតម្លៃផ្សេងៗជាច្រើន ដល់សាធារណជន បានស្វែងយល់ និងការរកជាវនូវគ្រឿង អលង្ការ និងត្បូងមានតម្លៃផ្សេងៗ ហើយនៅក្នុងពិព័រណ៍នោះផងដែរ ក៏មានការបង្ហាញគ្រឿងអលង្ការដោយក្រុមនារី ដែលនេះជាការលើកកម្ពស់ដល់យេនឌ័ររបស់នារីភេទនៅកម្ពុជាផងដែរ។សូមបញ្ជាក់ថា ពិព័រណ៍គ្រឿងអលង្ការ និងត្បូងកម្ពុជាអន្តរជាតិ បានប្រព្រឹត្តទៅរយៈពេល ៣ ថ្ងៃ ចាប់ពីថ្ងៃទី ១៥ ដល់ថ្ងៃទី ១៨ ខែ ឧសភា ឆ្នាំ ២០២៥ នៅសាលមជ្ឈមណ្ឌលសន្និបាតកោះពេជ្រ ដោយមានការអញ្ជើញចូលរួមពី ឯកឧត្តម សុខ ចិន្តាសោភា ឧបនាយករដ្ឋមន្រ្តី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងតំណាងមក ពីក្រសួងស្ថាប័នផ្សេងៗជាច្រើនទៀត បានជំរុញដល់ព្រឹត្តិការណ៍ពិព័រណ៍គ្រឿងអលង្ការ និងត្បូងកម្ពុជា អន្តរជាតិនេះ ស្ថិតក្រោម បរិយាសប្រកបដោយផ្លែផ្កា៕អត្ថបទ៖ សុន រ៉ាឌី

នៅថ្ងៃទី១៦ ខែឧសភាស្អែកនេះរដ្ឋមន្រ្ដីក្រសួងបរិស្ថានអញ្ជើញបើកការដ្ឋានសាងសង់ផ្លូវចូលទៅភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅលំហែបៃតងនៃតំបន់ភ្នំខ្នងផ្សារ

កំពង់ស្ពឺ ៖ ក្រសួងបរិស្ថាន តាមរយៈគម្រោង “និរន្តរភាពតំបន់ទេសភាព និងទេសចរណ៍ធម្មជាតិកម្ពុជា នឹងសម្ពោធ បើកការដ្ឋានសាងសង់ ផ្លូវចូលទៅភ្នំខ្នងផ្សារ និងហេដ្ឋារចនាសម្ព័ន្ធ បម្រើឱ្យគោលដៅលំហែបៃតងនៃតំបន់ភ្នំខ្នងផ្សារ នាថ្ងៃទី១៦ ខែឧសភា ឆ្នាំ២០២៥ ខាងមុខ ក្រោមអធិបតីភាព ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន និងមានការចូលរួមពីតំណាងក្រសួងស្ថាប័ន រដ្ឋបាលខេត្ត ដៃគូអភិវឌ្ឍន៍ និងប្រជាពលរដ្ឋជាច្រើននាក់ ស្ថិតនៅភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។ នៅថ្ងៃទី១៤ ខែ ឧសភា ឆ្នាំ ២០២៥នេះ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់ថា ការរៀបចំបើកការដ្ឋានសាងសង់ ផ្លូវចូលទៅភ្នំខ្នងផ្សារ និងហេដ្ឋារចនាសម្ព័ន្ធបម្រើឱ្យគោលដៅ លំហែបៃតងតំបន់ភ្នំខ្នងផ្សារគឺឆ្លើយតបទៅ នឹងបទបញ្ជារបស់ប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី ០៨ ខែមីនា ឆ្នាំ ២០២៥ ដែលបានចុះបំពេញទស្សនកិច្ច នៅតំបន់ខ្នងផ្សារផ្ទាល់ ហើយបានជំរុញឱ្យ មានការរៀបចំកម្មវិធីអភិវឌ្ឍន៍ ជីវភាពប្រជាពលរដ្ឋ នៅតាមសហគមន៍មូលដ្ឋាន ដែលទទួលបានប្រយោជន៍ពីការផ្តល់សេវាកម្មទេសចរណ៍ និងបានចូលរួមចំណែក ដល់ការការពារនិងអភិរក្សធនធានធម្មជាតិ ប្រកបដោយនិរន្តរភាព។ គម្រោងនឹងសាងសង់ផ្លូវចូល ទៅភ្នំខ្នងផ្សារ និងហេដ្ឋារចនាសម្ព័ន្ធ បម្រើឱ្យគោលដៅលំហែ ដ៏មានសក្តានុពល់ នៃឧទ្យានជាតិជួរភ្នំក្រវាញ ក្នុងភូមិសាស្រ្តនៃមុំប្រសព្វនៃខេត្តកំពង់ស្ពឺ និងខេត្តកោះកុង សម្រាប់ទាក់ទាញភ្ញៀវទេសចរណ៍ ឱ្យមកទស្សនាទីនេះឱ្យបានរិតតែច្រើន និងជួយលើកកម្ពស់ជីវភាព ប្រជាសហគមន៍ ក្នុងមូលដ្ឋានឱ្យកាន់តែមានភាពរីកចម្រើន។ អ្នកនាំពាក្យក្រសួងបរិស្ថាន បានមានប្រសាសន៍ថា គម្រោងអភិវឌ្ឍន៍គោលដៅលំហែបៃតង នៅតំបន់ខ្នងផ្សារ នឹងជួយផ្សព្វផ្សាយអំពីការគាំទ្រ របស់រាជរដ្ឋាភិបាល និងដៃគូពាក់ព័ន្ធ ក្នុងការរួមចំណែក លើកកម្ពស់សេដ្ឋកិច្ចសង្គម និងគោលដៅ លំហែបៃតងនៅតំបន់ភ្នំខ្នងផ្សារ និង២-ជំរុញចលនា ទេសចរណ៍ជាតិ អន្តរជាតិមកកម្សាន្តតំបន់កាន់តែច្រើន និងចូលរួមការការពារ និងអភិរក្សធនធានធម្មជាតិ ប្រកបដោយនិរន្តរភាព។ សហគមន៍តំបន់ការពារធម្មជាតិតាំងបំពង់ ជាពិសេសសហគមន៍ទេសចរណ៍ខ្នងផ្សារ មានសក្តានុពលគោលដៅលំហែបៃតង នឹងទទួលចំណូលកាន់តែប្រសើរសម្រាប់ជីវភាព ពីការផ្តល់សេវាកម្មទេសចរណ៍ ការអភិវឌ្ឍមូលដ្ឋាន។ ឯកឧត្តម ខ្វៃ អាទិត្យា បានឱ្យដឹងថា ក្រសួងបរិស្ថានក៏មានគម្រោង រៀបចំបន្ថែមទៀតនៃរបៀងគោលដៅលំហែបៃតង ដែលមានតំបន់ខ្នងផ្សារ ខ្នងក្រពើ កន្លែងទេសភាព និងធម្មជាតិនានា នៃតំបន់ជួរភ្នំក្រវាញ ផ្សារភ្ជាប់ឆ្ពោះទៅកាន់តំបន់ទេទឹកពុះ និងបន្តមកតំបន់មាត់សមុទ្រថែមទៀត។គួរបញ្ជាក់ថា ខ្នងផ្សារជាតំបន់ទេសចរណ៍ធម្មជាតិដ៏ស្រស់បំព្រង មានវាលស្មៅដ៏ស្រស់ស្អាត មានខ្យលអាកាសបរិសុទ្ធ មានទេសភាព ធម្មជាតិ ព្រៃឈើ សត្វព្រៃ ដែលជាប្រថ្នានៃការចងមកសម្រាកកម្សាន្ត និងលំហែជាមួយធម្មជាតិបៃតងគ្រប់រដូវកាល នៃឧទ្យានជាតិជួរភ្នំក្រវ៉ាញ។ លើសពីនេះទៀត ទេសចរក៏អាច គយគន់ទិដ្ឋភាពថ្ងៃរះ ថ្ងៃលិច និងជ្រោះពពកផងដែរ ពិសេសគឺទេសភាព ៣៦០ឌឺក្រេដែលជួយលើកសម្រស់ភ្នំនេះ ឱ្យកាន់តែស្អាតនិងទាក់ទាញ ដែលគេអាចហៅបានថាជាឋានសួគ៌ក្រោមមេឃ៕

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្រ្តីចូលរួមរំលែកមរណទុក្ខក្រុមគ្រួសារសពដែលស្លាប់ដោយគ្រោះរញ្ជួយដីនៅថៃ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១៥ ខែឧសភា ឆ្នាំ២០២៥នេះ បានចាត់លោកវេជ្ជ. អ៊ុយ សំអុន នាយក នាយកដ្ឋានគ្រប់គ្រងគ្រោះមហន្តរាយ និងសហការី ដោយមានការចូលរួមពីក្រុមប្រតិបត្តិ សាខាកាកបាទក្រហមកម្ពុជា ខេត្តបន្ទាយមានជ័យ ចូលរួមរំលែកទុក្ខដ៏ក្រៀមក្រំបំផុត ជាមួយក្រុមគ្រួសារសពពលករ សាន់ សឿន អាយុ៣៨ឆ្នាំដែលជាប្តី និងពលការិនី សុខ គិមសី អាយុ៣១ឆ្នាំ ដែលជាប្រពន្ធ ស្ថិតនៅក្នុង សង្កាត់ម្កាក់ ក្រុងសេរីសោភ័ណ្ឌ ខេត្តបន្ទាយមានជ័យ។ក្រោយការបញ្ជាក់អត្តសញ្ញាណច្បាស់លាស់តាមរយៈការធ្វើកោសល្យវិច័យ DNA ពីសំណាក់វិទ្យាស្ថាន វេជ្ជសាស្ត្ររបស់ប្រទេសថៃ កាលពីព្រឹកថ្ងៃទី១៤ ខែឧសភា ដែលអះអាងថាពលករទាំងពីរនាក់ប្តីប្រពន្ធ ពិតជាបានទទួលមរណភាព ក្នុងគ្រោះរញ្ជួយដីនៅថៃ កាលពីថ្ងៃទី២៨ ខែមីនា ឆ្នាំ២០២៥។ ថ្នាក់ដឹកនាំស្ថានឯកអគ្គរាជទូតកម្ពុជាប្រចាំប្រទេសថៃ អនុព័ន្ធការងារអមស្ថានឯកអគ្គរាជទូតកម្ពុជាប្រចាំប្រទេសថៃ បានសម្របសម្រួល ជាមួយអាជ្ញាធរថៃ ក្នុងការរៀបចំការ បញ្ជូន សព និងធ្វើពិធីសាសនាមុននឹងបានដឹកសពតាម រថយន្តចេញពីទីក្រុងបាងកក មកកាន់ច្រកអន្តរជាតិប៉ោយប៉ែត មុននឹងដង្ហែសពបន្តមកលំនៅដ្ឋាន នៅក្រុងសេរីសោភ័ណ្ឌដើម្បីធ្វើបុណ្យតាមប្រពៃណី។ ស្ថិតក្នុងសមានទុក្ខដ៏ក្រៀមក្រំ សោកសង្រេងជាទីបំផុតជាមួយក្រុមគ្រួសារសព ក្នុងឱកាសនេះ លោកវេជ្ជ. អ៊ុយ សំអុន បានថ្លែងថា បន្ទាប់ពីបានទទួលដំណឹងដ៏រន្ធត់ និងសោកសង្រេងនេះភ្លាម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់រូបលោក និងសហការីមកចូលរួមផ្ទាល់ ដោយនាំយកថវិកាចូលរួមបុណ្យសពម្នាក់ចំនួន ២០លានរៀល និងគ្រឿងឧបភោគបរិភោគមួយចំនួន ព្រមជាមួយនូវសាររំលែកទុក្ខដ៏ក្រៀមក្រំ និងសោកស្តាយជាទីបំផុត ជាមួយក្រុមគ្រួសារសព ដែលបានបាត់បង់កូនជាទីស្រលាញ់ បាត់បង់ នូវពលរដ្ឋកម្ពុជាដ៏ល្អមួយរូប ដែលជាធនធានមនុស្សដ៏សំខាន់ ក្នុងការកសាងមូលដ្ឋានគ្រឹះ ក្នុងកិច្ចអភិវឌ្ឍជាតិ មាតុភូមិ។ ក្នុងសមានទុក្ខដ៏ក្រៀមក្រំនេះ ដែរ លោក អ៊ុយ សំអុន សូមបួងសួងដល់វិញ្ញាណក្ខន្ធសពទាំងពីរ បានទៅកាន់សុគតិភពកុំបីឃ្លៀងឃ្លាតឡើយ។សូមបញ្ជាក់ថា រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានយកចិត្តទុកដាក់ដល់ពលករកម្ពុជា ដែលនៅបរទេសទាំងអស់ ជាពិសេសបងប្អូនពលករដែលរងគ្រោះ ក្នុងគ្រោះរញ្ជួយដីនៅប្រទេសថៃ កាលពីថ្ងៃទី២៨ ខែមីនា ឆ្នាំ២០២៥កន្លងទៅនេះ៕ 15/5/25អត្ថបទ៖ សំ ងីម

សម្តេចធិបតី និងលោកជំទាវបណ្ឌិត ចូលរួមរំលែកទុក្ខយ៉ាងក្រៀមក្រំ និងឧបត្ថម្ភថវិកាពីរម៉ឺនដុល្លារដល់គ្រួសារសពលោក សាន់ សឿន និងអ្នកស្រី សុខ គិមសី

បន្ទាយមានជ័យ៖ ឯកឧត្តម សេង សក្ដា រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៥ ខែឧសភា ឆ្នាំ២០២៥នេះ បានដឹកនាំគណៈប្រតិភូជាន់ខ្ពស់ក្រសួងនាំយកសារលិខិតរំលែកមរណទុក្ខរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមទាំងថវិកាពីរម៉ឺនដុល្លារ ប្រគល់ជូនក្រុមគ្រួសារនៃសពលោក សាន់ សឿន និងអ្នកស្រី សុខ គិមសី ដែលបានទទួលមរណភាពដោយសារគ្រោះរញ្ជួយដីនៅប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ កន្លងទៅនេះ។ក្នុងពិធីបុណ្យសពដែលធ្វើឡើងនៅក្រុងសិរីសោភ័ណ ឯកឧត្តម សេង សក្ដា បានសម្តែងនូវសមានទុក្ខក្តុកក្តួលរន្ធត់ចិត្ត សោកស្តាយអាឡោះអាល័យជាទីបំផុត និងបានរំលែកមរណទុក្ខដ៏ក្រៀមក្រំជូនចំពោះលោក សុក សាន់ និងលោកស្រី ហង់ ថេត ដែលបានបាត់បង់លោក សាន់ សឿន ត្រូវជាកូន អាយុ៣៨ឆ្នាំ ក៏ដូចជាជូនចំពោះលោក ភី សុខ និងលោកស្រី ហ៊ុត សុភួន ដែលបានបាត់បង់អ្នកស្រី សុខ គិមសី ត្រូវជាកូន អាយុ៣១ឆ្នាំក្នុងគ្រោះរញ្ជួយដីនៅប្រទេសថៃ។ ជាមួយគ្នានេះ តំណាងក្រុមគ្រួសារនៃសព និងញាតិមិត្តជិតឆ្ងាយដែលចូលរួមបុណ្យសពនោះ ក៏បានលើកដៃប្រណមថ្លែងអំណរគុណចំពោះសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ រួមទាំងអាជ្ញាធរពាក់ព័ន្ធទាំងអស់ដែលបានយកចិត្តទុកដាក់តាមរយៈការផ្តល់សាររំលែកមរណទុក្ខ ថវិកា ការជួយសម្របសម្រួលឯកសារដឹកសព និងដង្ហែសពមកស្រុកកំណើតធ្វើបុណ្យ។ សូមជម្រាបថា សពលោក សាន់ សឿន និងសពលោកស្រី សុខ គិមសី (ត្រូវជាប្ដីប្រពន្ធនឹងគ្នា) ត្រូវបានបញ្ជូនមកដល់ស្រុកកំណើតនៅក្រុងសិរីសោភ័ណ ខេត្តបន្ទាយមានជ័យ នាយប់ថ្ងៃទី១៤ ខែឧសភា ឆ្នាំ២០២៥ ក្រោមការជួយខ្នះខ្នែងសម្របសម្រួលពីសំណាក់ក្រសួងការងារ និងបណ្តុះបណ្តាលវិជ្ជាជីវៈ ស្ថានឯកអគ្គរាជទូតកម្ពុជាប្រចាំប្រទេសថៃ អនុព័ន្ធការងារអមស្ថានឯកអគ្គរាជទូតកម្ពុជាប្រចាំប្រទេសថៃ និងអាជ្ញាធរពាក់ព័ន្ធផងដែរ៕

នាយឧត្តមសេនីយ៍ ឥត សារ៉ាត់អញ្ជើញត្រួតពិនិត្យទីតាំងបើកសមយុទ្ធ«នាគមាស-២០២៥»

ខេត្តកំពង់ឆ្នាំង ៖ ព្រឹកថ្ងៃ ទី១៥ ខែឧសភា ឆ្នាំ២០២៥ ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ និងជាប្រធានគណៈកម្មការដឹកនាំការធ្វើលំហាត់និងសមយុទ្ធ បានអញ្ជើញចុះត្រួតពិនិត្យការរៀបចំពិធីបើកសមយុទ្ធ«នាគមាស-២០២៥» នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ស្ថិតក្នុងភូមិសាស្ត្រភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។

សាស្ត្រាចារ្យ បុគ្គលិកសិក្សា និងនិស្សិតសាកលវិទ្យាល័យន័រតុនជាច្រើនរយនាក់ ប្តេជ្ញាចូលរួមផ្សព្វផ្សាយ និងជំរុញយុទ្ធនាការទេសចរណ៍ក្នុងរដូវកាលបៃតង (Green Season)

ភ្នំពេញ៖ នៅរសៀលថ្ងៃទី១៤ ខែឧសភា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជួបសំណេះសំណាលជាមួយឯកឧត្តម លោក លោកស្រី សាស្រ្តាចារ្យ បុគ្គលិកសិក្សា និងប្អូនៗនិស្សិតនៃសាកលវិទ្យាល័យន័រតុន ដែលកំពុងធ្វើទស្សនកិច្ចសិក្សានៅសារមន្ទីរធម្មជាតិសកល សម្តេចតេជោ ហ៊ុន សែន ព្រះវិហារ ចំនួន៤០៥ អង្គ/នាក់ ដោយទាំងអស់គ្នា ប្តេជ្ញាចូលរួមក្នុងការអនុវត្ត និងផ្សព្វផ្សាយយុទ្ធនាការទេសចរណ៍ក្នុងរដូវកាលបៃតង (Green Season) ឱ្យបានទូលំទូលាយ សំដៅចូលរួមចំណែកជំរុញកំណើនចរន្តភ្ញៀវទេសចរក្នុងស្រុកឱ្យបានកាន់តែច្រើនបន្ថែមទៀត ជាពិសេសនៅរដូវកាលបៃតង។ជាមួយគ្នានេះ ឯកឧត្តមរដ្ឋមន្ត្រី បានសម្តែងនូវសេចក្តីថ្លែងអំណរគុណយ៉ាងជ្រាលជ្រៅ គោរពជូន ឯកឧត្តមបណ្ឌិតសភាចារ្យ ហង់ ជួនណារ៉ង់ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ចំពោះការគាំទ្រ និងជួយបង្កលក្ខណៈដល់ការជំរុញយុទ្ធនាការនេះនៅតាមគ្រឹះស្ថានសិក្សាសាធារណៈ និង ឯកជន។ ឯកឧត្តមរដ្ឋមន្រ្តី ក៏បានថ្លែងអំណរគុណ ឯកឧត្តម ចាន់ សុខឃាង សាកលវិទ្យាធិការនៃសាកលវិទ្យាល័យន័រតុន ថ្នាក់ដឹកនាំ បុគ្គលិកសិក្សា និង និស្សិត ដែលបានធ្វើដំណើរកម្សាន្តដើម្បីជំរុញចរន្តទេសចរណ៍ក្នុងស្រុកនៅរដូវកាលបៃតងដ៏ស្រស់បំព្រង។ឯកឧត្តមរដ្ឋមន្ត្រី ក៏បានអំពាវនាវដល់គ្រឹះស្ថានសិក្សាសាធារណៈ និងឯកជននានា ជំរុញយុទ្ធនាការទេសចរណ៍នៅរដូវកាលបៃតងនេះ ដោយធ្វើដំណើរទស្សនកិច្ចសិក្សា និង វិស្សមកាលនៅតាមបណ្តាគោលដៅទេសចរណ៍ដ៏សម្បូរបែបនៅកម្ពុជាឱ្យបានច្រើនកុះករ។ សូមបញ្ជាក់ជូនបន្ថែមថា សារមន្ទីរធម្មជាតិសកល សម្តេចតេជោ ហ៊ុន សែន ព្រះវិហារ ស្ថិតនៅភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ បានបង្កើតឡើងដើម្បីថែរក្សាការពារសម្បត្តិវប្បធម៌ និងតាំងបង្ហាញវត្ថុសិល្បៈជាតិពន្ធុវិទ្យា សំណាកសត្វ និងសំណាករុក្ខជាតិដែលមានតម្លៃជាសិល្បៈ ប្រវត្តិសាស្ត្រ បុរាណវិទ្យា ព្រមទាំងវប្បធម៌ប្រពៃណីរបស់ជនជាតិដើមភាគតិចកួយ។ សារមន្ទីរនេះបានផ្តួចផ្តើមឡើងដោយ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា និងបានសម្ភោធដាក់ឲ្យប្រើប្រាស់ជាផ្លូវការកាលពីថ្ងៃទី២០ ខែមីនា ឆ្នាំ២០១៨៕

មន្រ្ដីនាំពាក្យ៖ ផ្លូវជាតិលេខ៤៨ (ស្រែអំបិល-កោះកុង) មានសភាពមមាញឹកយ៉ាងខ្លាំង ក្នុងឱកាសថ្ងៃឈប់សម្រាកព្រះរាជពិធីបុណ្យចម្រើនព្រះជន្ម ព្រះមហាក្សត្រ

កោះកុង៖ ឯកឧត្តម ផន រឹម អ្នកនាំពាក្យ ក្រសួងសាធារណការ បានឱ្យដឹងនៅព្រឹកថ្ងៃទី១៥ ខែឧសភានេះថា ផ្លូវជាតិលេខ៤៨ (ស្រែអំបិល-កោះកុង) មានសភាពមមាញឹកយ៉ាងខ្លាំង ក្នុងឱកាសថ្ងៃឈប់សម្រាកព្រះរាជពិធីបុណ្យចម្រើនព្រះជន្ម ព្រះមហាក្សត្រ ព្រះបាទសម្ដេច ព្រះបរមនាថ នរោត្តម សីហមុនី នៅថ្ងៃទី១៤ ខែឧសភា និងព្រះរាជបុណ្យពិធីច្រត់ព្រះនង្គ័ល នៅថ្ងៃទី១៥ ខែឧសភា ឆ្នាំ២០២៥នេះ។ដោយឡែកច្រកចេញផ្លូវល្បឿនលឿន(ភ្នំពេញ-ព្រះសីហនុ)ចំណុចកំពង់សិលា និងស្រែអំបិល ក៏មានសភាពកកស្ទះដោយអន្លើផងដែរ ដោយបងប្អូនប្រជាពលរដ្ឋមានដំណើរកម្សាន្តចេញទៅផ្លូវជាតិលេខ៤៨ ឆ្ពោះទៅទស្សនាខេត្តកោះកុង ,ទីរមនីយដ្ឋាននានាតាមបណ្តោយផ្លូវជាតិលេខ៤៨ ,ឆ្ពោះទៅកាន់ផ្លូវជាតិលេខ១០ ទស្សនាស្ទឹងដំណាក់ក្បូន, ស្ទឹងឫស្សីជ្រុំ,ស្ពានខ្ពស់ជាងគេនៅកម្ពុជា,តំបន់អូរសោម,ប្រម៉ោយ,ផ្លូវអន្ទង់អាំងចំណុចផ្លូវជាតិលេខ៥៥,ច្រកព្រំដែនកម្ពុជា-ថៃ(ថ្មដារ) និងតំបន់សំឡូត នៃផ្លូវជាតិលេខ១០ជាដើម។ល។គួរបញ្ជាក់ថា គិតត្រឹមថ្ងៃទី១៥ ខែឧសភា ឆ្នាំ២០២៥នេះ គម្រោងស្តារ និងលើកកម្រិតគុណភាពផ្លូវជាតិលេខ៤៨ សម្រេចវឌ្ឍនភាព ៩៦,៨៤%ហើយ ដោយឡែកគម្រោងស្ថាបនាផ្លូវជាតិលេខ១០ សម្រេចបាន ៩៩,៦០%ហើយដែរ។សូមបងប្អូនប្រជាពលរដ្ឋធ្វើដំណើរប្រកបដោយសុខសុវត្ថិភាព និងរីករាយក្នុងឱកាសឈប់សម្រាកក្នុងទីដ៏សែនមនោរម្យ និងសុខសន្តិភាពពេញដ៏បរិបូរណ៌៕