នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
អូស្ត្រាលីកំពុងក្លាយជាទីផ្សារល្អ សម្រាប់ការនាំជលផលកែច្នៃពីកម្ពុជាក្នុងមួយឆ្នាំៗ រាប់សិបតោន

ព័ត៌មានជាតិ

ក្រសួងមុខងារសាធារណៈ ផ្សព្វផ្សាយពីនីតិវិធី វិធីសាស្រ្តជូនជូនសាលាបឋមសិក្សា អនុវិទ្យាល័យ និងមណ្ឌលសុខភាពទូទាំងប្រទេស ក្នុងបេសកកម្មស្វែងរកអង្គភាពផ្ដល់សេវាសាធារណៈគំរូ ឆ្នាំ២០២៥

2025/05/15 01:50:30 pm        87
Facebook Telegram Linkin
ភ្នំពេញ៖ មកដល់ពេលនេះ សិក្ខាសាលាផ្សព្វផ្សាយស្ដីពីនីតិវិធី វិធីសាស្រ្តវាយតម្លៃ និងការទទួលស្គាល់អង្គភាពផ្ដល់សេវាសាធារណៈគំរូក្នុងវិស័យអប់រំ និងសុខាភិបាល សម្រាប់ឆ្នាំ២០២៥ ដែលរៀបចំឡើងដោយគណៈកម្មការវាយតម្លៃអង្គភាពផ្ដល់សេវាសាធារណៈថ្នាក់ជាតិ (គ.វ.ជ.) នៅតាមតំបន់ចំនួន៤ បានបញ្ចប់ជាស្ថាពរ។ សិក្ខាកាមទាំង៤តំបន់ ទទួលបានការអញ្ជើញចូលរួម ពីសំណាក់រដ្ឋបាលរាជធានី ខេត្តទាំង២៥ អភិបាល និងគណៈអភិបាល គណៈកម្មការវាយតម្លៃអង្គភាពផ្ដល់សេវាសាធារណៈថ្នាក់រាជធានីខេត្ត ថ្នាក់ ក្រុង ស្រុក ខណ្ឌ មន្ត្រីអប់រំនៃការិយាល័យអប់រំស្រុក មន្ត្រីសុខាភិបាលនៃការិយាល័យស្រុកប្រតិបត្តិ សាលាបឋមសិក្សា និងអនុវិទ្យាល័យ និងមណ្ឌលសុខភាពទូទាំងប្រទេស ព្រមទាំងអ្នកពាក់ព័ន្ធ សរុបចំនួន៤២៥២នាក់។ សិក្ខាសាលាទាំង៤នេះ ធ្វើឡើងដើម្បីធានាឱ្យការវាយតម្លៃអង្គភាពផ្តល់សេវាសាធារណៈគំរូ រក្សាបាននូវការអនុវត្តស្របតាមគោលការណ៍សុក្រឹតភាព សុចរិតភាព និងយុត្តិធម៌ ព្រមទាំងផ្ដល់លទ្ធផលស្របតាមគោលបំណងនៃការជំរុញការកែលម្អ និងលើកកម្ពស់គុណភាពសេវាអប់រំ និងសុខាភិបាលមូលដ្ឋាន ដើម្បីវិបុលភាពសង្គមយើងតាមរយៈសេវាសាធារណៈល្អក្នុងវិស័យសំខាន់ទាំង២នេះ ជូនដល់ប្រជាជនរបស់យើង។ សិក្ខាសាលាតំបន់នីមួយៗមានការអញ្ជើញចូលរួមធ្វើបទបង្ហាញណែនាំស្ដីពីគោលការណ៍នានា ក៏ដូចជានីតិវិធីក្នុងដំណើរការអនុវត្តន៍សម្រាប់ការប្រឡងប្រណាំង ក៏ដូចជាការវាយតម្លៃនិងការទទួលស្គាល់អង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាល។ បន្ទាប់ពីការធ្វើបទបង្ហាញស្ដីពីប្រធានបទរបស់វាគ្មិននីមួយៗ សិក្ខាកាម មានឱកាសសួរសំណួរពាក់ព័ន្ធជាច្រើនក្នុងវេទិកាសំណួរ-ចម្លើយ។ បេសកកម្មស្វែងរកអង្គភាពផ្តល់សេវាសាធារណៈ តាមរយៈការប្រឡងប្រជែង ជាការការបន្តអនុវត្តស្មារតីអនុក្រឹត្យលេខ៥៤ ដែលបានដាក់ចេញដោយ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី កាលពីឆ្នាំ២០១៨។ ការដាក់ចេញអនុក្រឹត្យនេះ ដើម្បីផ្ដល់ការលើកទឹកចិត្ត និងសន្ទុះនៃការចូលរួមលើកកម្ពស់គុណភាពសេវាអប់រំ និងសុខាភិបាលមូលដ្ឋានពីគ្រប់តួអង្គពាក់ព័ន្ធ។ជារឿយៗ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក្នុងនាមប្រធាន គ.វ.ជ. តែងតែបានថ្លែងការអរគុណដល់គ្រប់តួអង្គពាក់ព័ន្ធទាំងអស់ដែលបានលះបង់កម្លាំងកាយចិត្តចូលរួមជំរុញចលនានៃការប្រឡងប្រណាំង ក្នុងន័យចូលរួមលើកកម្ពស់ភាពរីកចម្រើននិងភាពទំនើបស៊ីវិល័យនៃរដ្ឋបាលសាធារណៈរបស់កម្ពុជាក្នុងបរិបទបច្ចុប្បន្ន និងបន្តទៅអនាគត។ ឯកឧត្ដមឧបនាយករដ្ឋមន្ត្រី ក៏បានវាយតម្លៃខ្ពស់ចំពោះស្មារតីជំរុញគាំទ្រ និងចូលរួមផ្ទាល់ក្នុងចលនាប្រឡងប្រណាំងអង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាលកន្លងមកពីគ្រប់ភាគី។ ក្នុងនោះ ឯកឧត្តមឧបនាយករដ្ឋមន្ត្រី បានសង្កត់ធ្ងន់ដែរថា កម្មវិធីនេះមិនសំដៅលើការឈ្នះនិងចាញ់ ឬការចង់ទទួលបាននូវពានរង្វាន់តែមួយមុខនោះទេ។ គោលដៅសំខាន់ គឺការផ្ដល់នូវសេវាសាធារណៈល្អនៅមូលដ្ឋាន ប្រកបដោយវិជ្ជាជីវៈ ស្របតាមសេចក្ដីត្រូវការជាក់ស្ដែងរបស់ប្រជាជន។ លើសពីនេះ ចលនាប្រឡងប្រណាំង និងវេទិកាពាក់ព័ន្ធនានា បានអនុញ្ញាតឱ្យអង្គភាពនីមួយៗបាន សិក្សារៀនសូត្រ ចែករំលែកបទពិសោធជូនគ្នាទៅវិញទៅមក ដើម្បីយកទៅអភិវឌ្ឍអង្គភាពរៀងៗខ្លួនឱ្យកាន់តែល្អប្រសើរ។ គួររម្លឹកថា សិក្ខាសាលាផ្សព្វផ្សាយស្ដីពីនីតិវិធី វិធីសាស្រ្តវាយតម្លៃ និងការទទួលស្គាល់អង្គភាពផ្ដល់សេវាសាធារណៈគំរូក្នុងវិស័យអប់រំ និងសុខាភិបាល សម្រាប់ឆ្នាំ២០២៥ ត្រូវបានចែកជា៤តំបន់ផ្សេងៗគ្នា។ សិក្ខាសាលាតំបន់១ ធ្វើឡើងធ្វើឡើងក្នុងខេត្តកំពង់ចាម នៅថ្ងៃទី២៨ និងទី២៩ ខែមេសា ឆ្នាំ២០២៥ ដោយមានអង្គភាពចូលរួមមកពីខេត្តកំពង់ចាម ខេត្តព្រៃវែង ខេត្តត្បូងឃ្មុំ ខេត្តក្រចេះ ខេត្តស្ទឹងត្រែង ខេត្តរតនគិរី និងខេត្តមណ្ឌលគិរី។ សិក្ខាសាលាតំបន់២ ធ្វើឡើងក្នុងខេត្តកំពត នៅថ្ងៃទី២ និងទី៣ ខែឧសភា ឆ្នាំ២០២៥ ដោយមានអង្គភាពចូលរួមមកពី រាជធានីភ្នំពេញ ខេត្តស្វាយរៀង ខេត្តកណ្ដាល ខេត្តតាកែវ ខេត្តកែប និងខេត្តកំពត។ សិក្ខាសាលាតំបន់៣ ធ្វើឡើងក្នុងខេត្តកំពង់ស្ពឺ នៅថ្ងៃទី៦ និងទី៧ ខែឧសភា ឆ្នាំ២០២៥ ដោយមានអង្គភាពចូលរួមមកពី ខេត្តកំពង់ស្ពឺ ខេត្តព្រះសីហនុ ខេត្តកោះកុង ខេត្តកំពង់ឆ្នាំង និងខេត្តពោធិ៍សាត់។ ចំណែកឯសិក្ខាសាលាតំបន់៤ ធ្វើឡើងធ្វើឡើងក្នុងខេត្តសៀមរាប នៅថ្ងៃទី១២ និងទី១៣ ខែឧសភា ឆ្នាំ២០២៥ ដោយមានអង្គភាពចូលរួមមកពី ខេត្តសៀមរាប ខេត្តបាត់ដំបង ខេត្តប៉ៃលិន ខេត្តព្រះវិហារ ខេត្តបន្ទាយមានជ័យ ខេត្តឧត្ដរមានជ័យ និងខេត្តកំពង់ធំ។

កងទ័ពជើងទឹកកម្ពុជា និងកងទ័ពរំដោះប្រជាជនចិន កំពុងធ្វើសមយុទ្ធកងទ័ពជើងទឹក «នាគមាស ឆ្នាំ២០២៥» នៅចន្លោះ កោះរ៉ុង និងកោះតាង ភូមិសាស្ត្រខេត្តព្រះសីហនុ

2025/05/15 01:42:17 pm        297
Facebook Telegram Linkin
ព្រះសីហនុ៖ កងទ័ពជើងទឹក នៃកងយោធពលខេមរភូមិន្ទ និងកងទ័ពរំដោះប្រជាជនចិន កំពុង​ធ្វើ​សមយុទ្ធកងទ័ពជើងទឹក “នាគមាស ឆ្នាំ២០២៥” ក្រោមប្រធានបទ «ប្រតិបត្តិការ​ប្រឆាំង​ភេរវកម្ម​រួមគ្នា និងការងារ សង្គ្រោះមនុស្សធម៌» នៅលើដែនទឹកអធិបតេយ្យភាព របស់​ព្រះរាជា​ណា​ចក្រ​កម្ពុជា ស្ថិតនៅចន្លោះ កោះរ៉ុង និងកោះតាង ភូមិសាស្ត្រខេត្តព្រះសីហនុ ចាប់ពីថ្ងៃទី១៤ ដល់​ថ្ងៃទី២៦ ខែឧសភា ឆ្នាំ២០២៥នេះ។ យោង​តាមសេចក្តីជូនដំណឹង ស្តីពីផែនការធ្វើសមយុទ្ធកងទ័ពជើងទឹក «នាគមាស ឆ្នាំ២០២៥» របស់មូលដ្ឋានសមុទ្ររាម កងទ័ពជើងទឹក នៃកងយោធពលខេមរភូមិន្ទ បានជម្រាបជូន ដំណឹង​ដល់​អាជ្ញាធរ​រដ្ឋបាល ៤ ខេត្ត ជាប់មាត់សមុទ្រ បណ្តាស្ថាប័ន អង្គភាពពាក់ព័ន្ធ ប្រជាពលរដ្ឋ ប្រជា​នេសាទ សាធារណជន និងអ្នកសារព័ត៌មានទាំងអស់ឲ្យបានជ្រាបថា កងទ័ពជើងទឹក នៃកង​យោធ​ពលខេមរភូមិន្ទ និងកងទ័ពរំដោះប្រជាជនចិន នឹងសហការរៀបចំ​ធ្វើ​សម​យុទ្ធ​កង​ទ័ព​ជើង​ទឹក​ «នាគមាស ឆ្នាំ២០២៥» ក្រោមប្រធានបទ «ប្រតិបត្តិការប្រឆាំងភេរវកម្មរួមគ្នា និងការងារ សង្គ្រោះ​មនុស្សធម៌» នៅលើដែនទឹកអធិបតេយ្យភាព របស់ព្រះរាជាណាចក្រកម្ពុជា ស្ថិតនៅ​ចន្លោះ កោះរ៉ុង និងកោះតាង ភូមិសាស្ត្រខេត្តព្រះសីហនុ ចាប់ពីថ្ងៃទី១៤ ដល់ថ្ងៃទី២៦ ខែឧសភា ឆ្នាំ២០២៥។មូលដ្ឋានសមុទ្ររាម កងទ័ពជើងទឹក នៃកងយោធពលខេមរភូមិន្ទ បានបញ្ជាក់ថា ចំពោះ​ផែន​ការ​ធ្វើ​សម​យុទ្ធលើផ្ទៃសមុទ្រមានចំនួន២ថ្ងៃ៖ អនុវត្តសាកល្បង ចំនួន១ថ្ងៃ នៅថ្ងៃទី២៣ ខែឧសភា ឆ្នាំ២០២៥ និងអនុវត្តជាក់ស្តែង ចំនួន ១ថ្ងៃ នៅថ្ងៃទី២៦ ខែឧសភា ឆ្នាំ២០២៥​ មូលដ្ឋាន​សមុទ្ររាម កងទ័ពជើងទឹក នៃកងយោធពលខេមរភូមិន្ទ ជម្រាបដល់បណ្តាស្ថាប័ន អង្គភាព​ពាក់ព័ន្ធ ជាពិសេសបងប្អូន ប្រជាពលរដ្ឋ ប្រជានេសាទ សាធារណជន មេត្តាជ្រាប និង​កុំ​មាន​ការ​ភាន់​ច្រឡំ ពេលមានលឺសម្លេងកាំភ្លើង រួមជាមួយការចល័តកងទ័ព នាវាចម្បាំងនៅលើផ្ទៃសមុទ្រ និង​សូមរក្សាឲ្យបាននូវ សន្តិសុខសណ្តាប់ធ្នាប់ ជុំវិញតំបន់ប្រតិបត្តិការធ្វើសមយុទ្ធកងទ័ពជើងទឹក នាគមាស ឆ្នាំ២០២៥” ដើម្បីជៀសវាងការបង្កគ្រោះថ្នាក់ ឬហានិភ័យណាមួយជាយថាហេតុ៕ 

និស្សិតជាង៧ពាន់នាក់កំពុងសិក្សាជំនាញវិជ្ជាជីវៈនៅវិទ្យាស្ថាន NPIC ខណៈជាង១ម៉ឺន​នាក់​បញ្ចប់​ការ​សិក្សា

2025/05/15 01:33:56 pm        188
Facebook Telegram Linkin
វិទ្យាស្ថានជាតិពហុបច្ចេកទេសកម្ពុជា (NPIC) ដែលជា​គ្រឹះស្ថាន​សាធារណៈ​របស់​រដ្ឋ​ស្ថិត​ក្រោម​អា​ណា​​ព្យាបាល​របស់ក្រសួងការងារ និងបណ្តុះបណ្តាលវិជ្ជាជីវៈ គិតចាប់ពីការផ្តើមក្នុងឆ្នាំ២០០៥ ដែល​មាន​និស្សិតចុះឈ្មោះចូលរៀនចំនួនតែ ២៥០នាក់ រហូតមកដល់បច្ចុប្បន្ននេះ មាននិស្សិត​ប្រមាណ​ ៧ ៥០០នាក់ កំពុងទទួលការបណ្តុះបណ្តាលជំនាញវិជ្ជាជីវៈ និងបច្ចេកទេស (TVET) ខណៈ​និស្សិតបានបញ្ចប់ការសិក្សាសរុបចំនួនជាង ១ម៉ឺន ២ពាន់នាក់។នៅក្នុងបទសម្ភាសន៍ជាមួយក្រុមនិស្សិតដែលកំពុងទទួលការបណ្តុះបណ្តាលជំនាញវិជ្ជាជីវៈ និង​បច្ចេក​ទេស (TVET) នៅវិទ្យាស្ថានជាតិពហុបច្ចេកទេសកម្ពុជា ពួកគាត់ បាននិយាយ​ប្រាប់​ព័ត៌មាន ប៊ីធីវី ឲ្យដឹងស្រដៀងគ្នា ការចាប់យកជំនាញវិស័យ ធីវ៉េត ពិតណាស់មិន​សូវ​មាន​អ្នក​ស្គាល់ និងយល់ច្បាស់ច្រើន ឬយល់ថាពិបាកក្នុងការសិក្សា ប៉ុន្តែវិស័យមួយនេះ គឺមាន​សារៈ​សំខាន់​ខ្លាំង​ក្នុងការជំរុញខឿនសេដ្ឋកិច្ចជាតិ ដោយសារភាព​រីក​ចម្រើន​របស់​ប្រទេស​លើ​វិស័យ​សំណង់​ អគ្គិសនី កសិកម្ម ទេសចរណ៍ និងឧស្សាហកម្មជាដើម ដើម្បីឆ្លើយ​តប​តាម​តម្រូវ​ការ​កម្លាំង​ពលកម្មទៅនឹងទីផ្សារការងារជាក់ស្តែង។យុវជន ម៉ុន សុខម៉ានិត និស្សិតឆ្នាំទី៤ ចាប់យកជំនាញផ្នែកមេកានិក បានលើកទឹក​ចិត្ត​ដល់​យុវជន​​ទាំងអស់ដែលជិតបញ្ចប់ការសិក្សា ឬបោះបង់ការសិក្សាជាដើម អាចចាប់​យក​ជំនាញ​វិជ្ជា​ជីវៈ​ និងបច្ចេកទេសនេះ ដោយកុំគិតថា មានការលំបាក ឬរៀនចប់ហើយអត់មានការងារធ្វើ ព្រោះ​រាជរដ្ឋាភិបាលកម្ពុជាបានយកចិត្តទុកដាក់និងគិតគូរជាខ្លាំងទៅលើការបណ្តុះបណ្តាល ហើយ​បច្ចុប្បន្ន​នេះទីផ្សារការងារទាំងក្នុង និងក្រៅស្រុក ក៏មានតម្រូវការជំនាញទាំងនេះផងដែរ។តំណាងឱ្យយុវជនកំពុងបណ្តុះបណ្តាលជំនាញផ្នែកទេសចរណ៍ និងបដិសណ្ឋារកិច្ច កញ្ញា វឿង ម៉ាលី បានអំពាវនាវយុវជន និងយុវសិស្សវិទ្យាល័យ ឱ្យងាកមកសិក្សាជំនាញបច្ចេកទេសផងដែរ ពី​ព្រោះជំនាញបច្ចេកទេស ទីផ្សារការងារកំពុងមានតម្រូវការខ្ពស់ទាំងពេលបច្ចុប្បន្ន និងទៅ​ថ្ងៃ​អនាគត ដោយសាររាជរដ្ឋាភិបាលកម្ពុជាបានខិតខំប្រឹងប្រែងណាស់ ក្នុងការ​ទាក់​ទាញ​អ្នក​វិនិយោគ​ជា​ច្រើន​ពី​ក្រៅប្រទេស ដើម្បីវិនិយោគនៅក្នុងស្រុក។រាជរដ្ឋាភិបាលកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បាន​យក​ចិត្តទុកដាក់ជាអាទិភាពគន្លឹះក្នុងការបណ្តុះបណ្តាលជំនាញបច្ចេកទេស និងវិជ្ជាជីវៈ​ដើម្បី​ប្រែក្លាយ​កម្ពុជាពីប្រទេសអតិពលកម្មទៅជាប្រទេសដែលប្រើប្រាស់កម្លាំងពលកម្មជំនាញ។ បន្ថែម​ពី​នេះ រាជរដ្ឋាភិបាលកម្ពុជា ក៏បានដាក់​ចេញ​នូវ​កម្ម​វិធី​ថ្នាក់​ជាតិ​ដើម្បី​បណ្តុះ​បណ្តាល​ជំនាញ​វិជ្ជា​ជីវៈ និងបច្ចេកទេស ដល់យុវជនដែលមកពីគ្រួសារក្រីក្រ និងងាយរងហានិភ័យចំនួន ១,៥​លាន​នាក់ដោយរៀនជំនាញឥតគិតថ្លៃ និងទទួលបានប្រាក់ឧបត្ថម្ភប្រចាំខែផងដែរ។សូម​បញ្ជាក់ថា វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស (ធីវ៉េត) បាន​និង​កំពុង​ចូល​រួម​យ៉ាង​សកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថ​ភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយ​តប​តាម​តម្រូវ​ការ​នៃ​ការ​វិវត្ត​យ៉ាង​ឆាប់​រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោល​នយោបាយ​របស់រាជរដ្ឋាភិបាល ដោយធានាថា «ពលរដ្ឋម្នាក់មាន​ជំនាញ​មួយ​យ៉ាង​តិច​ប្រចាំ​ជីវិ​ត​»​ និងអនុវត្តតាមអភិក្រមរបស់ សម្ដេចនាយករដ្ឋមន្រ្តី គឺ “រៀនឱ្យចប់ រៀនឱ្យចេះ ឱ្យ​មាន​ការងារ​ធ្វើ​”​៕អត្ថបទ ឈិត បូរ៉ាវី 

សម្ដេចតេជោ ហ៊ុន សែន អញ្ជើញដង្ហែព្រះមហាក្សត្រ យាងក្នុងព្រះរាជពិធីច្រត់ព្រះនង្គ័ល ឆ្នាំ២០២៥ នៅខេត្តកំពង់ឆ្នាំង

2025/05/15 01:25:29 pm        154
Facebook Telegram Linkin
នៅព្រឹកថ្ងៃព្រហស្បតិ៍​ ៤រោច ខែពិសាខ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី១៥ ខែឧសភា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អញ្ជើញដង្ហែព្រះករុណាព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាងក្នុងព្រះរាជពិធីច្រត់ព្រះនង្គ័ល ឆ្នាំ២០២៥ នៅខេត្តកំពង់ឆ្នាំង។ព្រះរាជពិធីច្រត់ព្រះនង្គ័ល បានប្រព្រឹត្តទៅរយៈពេល៤ថ្ងៃនៅទីព្រះស្រែ ភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ចាប់ពីថ្ងៃទី១២-១៣-១៤ ខែឧសភា ឆ្នាំ២០២៥ ដែលជាថ្ងៃប្រារព្ធហោមពិធី និងពិធីតាមរោងមណ្ឌលជាភារកិច្ចរបស់ក្រុមបារគូ ឯថ្ងៃព្រហស្បតិ៍ ទី១៥ ខែឧសភា ឆ្នាំ២០២៥ បានប្រារព្ធព្រះរាជពិធីច្រត់ព្រះនង្គ័លជាផ្លូវការ ក្រោមអធិបតីភាពដ៏ខ្ពង់ខ្ពស់បំផុតរបស់ព្រះករុណាព្រះបាទ សម្ដេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ព្រះរាជពិធីនេះក៏មានការយាងនឹងអញ្ជើញចូលរួមពីថ្នាក់ដឹកនាំកំពូលៗរបស់ជាតិ រួមមានសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា, សម្ដេចមហារដ្ឋសភាធិកាធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រម្ពុជា ,ព្រះរាជវង្សានុវង្ស, មន្ត្រីអង្គទូតនានាប្រចាំនៅកម្ពុជា ព្រមទាំងមន្ត្រីថ្នាក់ដឹកនាំសំខាន់ៗជាច្រើនទៀត។ជាលទ្ធផល នៃការផ្សងរបស់គោឧសភរាជបានក្នុងព្រះរាជពិធីច្រត់ព្រះនង្គ័ល ដែលត្រូវបានប្រារព្ធធ្វើនៅថ្ងៃទ១៥ ខែឧសភា ឆ្នាំ២០២៥ នេះ បានបង្ហាញថា ស្រូវ ពោត និងសណ្តែក នៅក្នុងឆ្នាំនេះទទួលបានទិន្នផលខ្ពស់។ក្រោយពេលការភ្ជួរ និងព្រោះគ្រាប់ស្រូវអស់រយៈពេល៣ ជុំរួចហើយ ព្រាហ្មណ៍ព្រះរាជគ្រូបុរោហិត បានធ្វើពិធីសូត្រមន្តប្រោះព្រំទឹកលើ«គោឧសភរាជ» និងយកគោឧសភរាជឱ្យទៅបរិភោគគ្រាប់ធញ្ញជាតិ ទឹក និងស្រា ដែលមានទាំងអស់ ៧មុខ រួមមាន ស្រូវ ពោត សណ្តែក ល្ង ស្មៅ ស្រា និងទឹក ដែលបានរៀបចំទុករួចជាស្រេច។ បន្ទាប់ពីគោឧសភរាជបានបរិភោគរួច ព្រាហ្មណ៍ព្រះរាជគ្រូបុរោហិត បាននាំយកលទ្ធផលពីការបរិភោគរបស់គោឧសភរាជថ្វាយជូនព្រះមហាក្សត្រ។ព្រាហ្មណ៍ព្រះរាជគ្រូបុរោហិត បានថ្លែងថា៖ «ខ្ញុំព្រះករុណាសូមថ្វាយ និងជម្រាបជូនពីលទ្ធផលដែលបានមកពីការផ្សងគោឧសភរាជបរិភោគនូវអាហារទាំង ៧ មុខ ទៅតាមបរមបុរាណ ហើយដែលគោឧសភរាជបានបរិភោគ ដែលក្នុងនោះលទ្ធផលគឺ ស្រូវបានចំនួន៩៥ភាគរយ ពោធ៩៥ភាគរយ ខណៈ និងសណ្តែក៨០ភាគរយ។ ព្រាហ្មណ៍ព្រះរាជគ្រូបុរោហិតបានថ្លែងបន្តថា នេះជាការផ្សងប្រផ្នូលតាមទំនៀមទម្លាប់ព្រះរាជបវេណីនៃព្រះរាជពិធីច្រត់ព្រះនង្គ័លដែលមានតាំងពីបុរាណកាលមក ក៏ដូចជាការប្រកាសថា «រដូវវប្បមង្គល» បានចូលមកដល់ហើយ។សូមរំលឹកថា «ព្រះរាជពិធីច្រត់ព្រះនង្គ័ល»គឺជាព្រះរាជពិធីបុណ្យប្រពៃណីជាតិកម្ពុជាមួយ ដែលប្រារព្ធឡើងនៅថ្ងៃ ៤រោច រៀងរាល់ខែ ពិសាខ ត្រូវនិងខែ (ឧសភា) ដែលកំណត់តាម ប្រតិទិនពុទ្ធសាសនា តាមដំណើរគោលចររបស់ ព្រះចន្ទ ដែលរាប់តាមរង្វាស់នៃឆ្នាំ ចន្ទគតិ នៅក្នុងវប្បធម៌របស់កម្ពុជា។ ពិធីបុណ្យនេះត្រូវបានគេហៅថា ពិធីបុណ្យចាប់ផ្ដើមនូវរដូវដាំដុះ ដែលស្ថាប័នព្រះបរមរាជវាំង និង រៀបចំឱ្យមានកិច្ចភ្ជួរព្រះស្រែដើម្បីជានិមិត្តរូប ក្នុងការចាប់ផ្ដើមរបរកសិកម្ម។ព្រះរាជពិធីច្រត់ព្រះនង្គ័ល គឺត្រូវបានធ្វើឡើងក្នុងគោលបំណងផ្សងមើលប្រផ្នូលរបស់ស្រុកទេស ទៅតាមការបរិភោគរបស់ "គោឧសភរាជ"។ ព្រះរាជពិធីបុណ្យនេះ ក៏ជាការដាស់តឿនក្រើនរម្លឹក ដល់ប្រជាពលរដ្ឋខ្មែរ ដែលពឹងផ្អែកលើការធ្វើកសិកម្មជាចម្បងនោះ ឱ្យបានដឹងថា រដូវធ្វើស្រែចំការបានចូលមកដល់ហើយ៕

មន្ត្រីសុខាភិបាលរាជធានី និងតំណាង WHO ប្រចាំកម្ពុជាចុះផ្តល់វ៉ាក់សាំងដល់កុមារ និងស្រ្ដីនៅសហគមន៍

2025/05/15 01:19:02 pm        486
Facebook Telegram Linkin
មនី្ទរសុខាភិបាលនៃរដ្ឋបាលរាជធានីភ្នំពេញ ការិយាល័យសុខាភិបាលស្រុកប្រតិបតិ្តមេគង្គ (OD Megkong) និងតំណាងអង្គការសុខភាពពិភពលោកប្រចាំកម្ពុជា បានចុះផ្តល់វ៉ាក់សាំង១១មុខ និង​ថ្នាំគ្រាប់ជីវជាតិអា (A) និងថ្នាំគ្រាប់ទម្លាក់សត្វល្អិត ជូនដល់កុមារ និងស្រី្ត និងវ៉ាក់សាំងកូវីដ-១៩ ដូសជំរុញ ដល់ក្រុមគោលដៅនៅតាមសហគមន៍ងាយរងគ្រោះ ក្នុងមូលដ្ឋានខណ្ឌឬស្សីកែវ រាជ​ធានីភ្នំពេញ។លោកវេជ្ជបណ្ឌិត ប៉ូ រិទ្ធី ប្រធានការិយាល័យបច្ចេកទេសរបស់មន្ទីរសុខាភិបាល នៃ​រដ្ឋបាល​រាជ​ធានី​ភ្នំពេញ បានថ្លែងប្រាប់ BTV ព័ត៌មាន នាព្រឹកថ្ងៃទី១៥ ខែឧសភា ឆ្នាំ២០២៥នេះថា ការ​ចុះ​ចាក់​វ៉ាក់សាំងនាពេលនេះ គឺជាការចុះជាប្រចាំសម្រាប់បន្ថែមនូវថ្នាំបង្ការជូនដល់កុមារ និង​ស្រី្ត​គោល​ដៅ ដែលមានការខកខានក្នុងការមិនបានមកទទួលវ៉ាក់សាំងនាពេលកន្លងមក។ ហើយ​មន្ត្រី​សុខាភិបាល របស់យើងក៏បានផ្តល់វ៉ាក់សាំងបន្ថែមទៀតផងដែរ ដល់ក្រុមគោលដៅ។ ជា​ទូទៅ​សកម្មភាពនាថ្ងៃនេះ យើងមានជាប្រចាំរៀងរាល់ត្រីមាស ជាពិសេស​ដល់​សហគមន៍​ដែល​ងាយ​រង​គ្រោះ។ ជាក់ស្តែងថ្ងៃនេះ មិនមែនមានតែ​ការិយាល័យ​សុខាភិបា​ល​ស្រុក​ប្រតិប​តិ្ត​មេគ​ង្គ​នោះ​ទេ គឺមន្ត្រីសុខាភិបាល បានចុះផ្តល់វ៉ាក់សាំងតាមសហគមន៍ ទាំង៧​ការិយាល័យ​សុខាភិបាល​ស្រុកប្រតិបតិ្ត ក្នុងនោះយើងជ្រើសរើសយកតំបន់សហគមន៍ងាយរងគ្រោះ ដើម្បី​ផ្តល់​វ៉ាក់​សាំង​ជូន​ដល់​ក្រុម​គោលដៅ។ចំណែកអ្នកស្រី ជា ចាន់ពុំ សមាជិកនារីភូមិ និងបង​ប្អូន​ប្រជាពលរដ្ឋ​នាំ​យក​កូនៗ​មក​ចាក់​វ៉ាក់​សាំងប​ង្ការ​ការពារជំងឺ ស្ថិតក្នុងភូមិក្រោលគោសង្កាត់គីឡូម៉ែត្រលេខ៦ ខណ្ឌឬស្សីកែវ រាជ​ធានី​ភ្នំពេញ បានលើកឡើងរួមគ្នាថា ក្រុមគ្រូពេទ្យនៃការិយាល័យសុខាភិបាលស្រុកប្រតិបតិ្តមេគង្គ តែង​តែចុះផ្តល់វ៉ាក់សាំងបង្ការការពារជំងឺជារៀងដង ហើយ​បង​ប្អូន​ប្រជា​ពលរដ្ឋ​មាន​ចិត្ត​សប្បាយ​រីក​រាយ ដែលធ្វើឲ្យកុមារ និងស្រី្តរស់នៅក្នុងសហគមន៍ បានជៀសផុតពីជំងឺផ្សេងៗ។ជាចុងក្រោយលោកវេជ្ជបណ្ឌិត ប៉ូ រិទ្ធី បានអំពាវនាវដល់មាតា បិតា អាណាព្យាបាល ជាអ្នក​ថែ​ទាំ​កុមារ សូមចូលរួមក្នុងការស្វែងយល់អំពីសារសំខាន់នៃការផ្តល់ថ្នាំបង្ការ ទាំងវ៉ា​ក់សាំ​ង​បង្កា​រ​ជំងឺ​ជា​ប្រចាំ តាមប្រតិទិនកំណត់របស់កម្មវិធីជាតិផ្តល់ថ្នាំបង្ការ ទាំងវ៉ាក់សាំងបង្ការជំងឺកូវីដ-១៩។ ប្រសិន​បើ​កុមារបានទទួលថ្នាំបង្ការគ្រប់មុខតាមប្រតិទិនកំណត់ គឺអាចជួយដល់កុមារ ក្នុងការការ​ពារ​ជំងឺ ដែលអាចការពារបាន ជាពិសេសជំងឺ១១មុខ ដែលកម្មវិធីជាតិផ្តល់ថ្នាំបង្ការបានកំណត់៕អត្ថបទ រដ្ឋា

កម្ពុជា-បារាំងកំពុងពន្លឿនកិច្ចចរចា DTA ដើម្បីជំរុញពាណិជ្ជកម្ម និងវិនិយោគប្រទេសទាំងពីរបន្ថែម

2025/05/15 11:34:38 am        146
Facebook Telegram Linkin
កម្ពុជា-បារាំង បើកប្រជុំចរចាលើកិច្ចព្រមព្រៀង ស្តីពីការចៀសវាងការយកពន្ធត្រួតគ្នាជុំទី៣ (DTA) និងបានកំពុងពន្លឿនកិច្ច ចរចានេះឱ្យបានឆាប់ៗ ដើម្បីជំរុញដល់ការធ្វើពាណិជ្ជកម្ម វិនិយោគ និងការដឹកជញ្ជូន សម្រាប់ផ្តល់អត្ថប្រយោជន៍រវាងប្រទេសទាំងពីរ។អគ្គនាយកដ្ឋានពន្ធដារ នៅថ្ងៃទី១៣ ខែឧសភា ឆ្នាំ២០២៥ នេះ បានរៀបចំកិច្ចប្រជុំចរចាលើកិច្ចព្រមព្រៀង ស្ដីពីការចៀស វាងការយកពន្ធត្រួតគ្នា (DTA) ជុំទី៣ រវាងព្រះរាជាណាចក្រកម្ពុជា និងសាធារណរដ្ឋបារាំង ដែលគណៈប្រតិភូកម្ពុជា ដឹកនាំដោយ លោកបណ្ឌិត សេង ជាសិទ្ធ ប្រធាននាយកដ្ឋាននីតិកម្ម គោលនយោបាយសារពើពន្ធ និងសហប្រតិបត្តិការពន្ធដារអន្តរជាតិ, ចំណែក គណៈប្រតិភូនៃសាធារណរដ្ឋបារាំង ដឹកនាំដោយលោក Martin KLAM ប្រធាននាយកដ្ឋានកិច្ចការអន្តរជាតិ និងអឺរ៉ុប នៃក្រសួង ហិរញ្ញវត្ថុ នៃសាធារណរដ្ឋបារាំង។លោកបណ្ឌិត សេង ជាសិទ្ធ បានបើកកិច្ចប្រជុំចរចា ដោយបានស្វាគមន៍យ៉ាងកក់ក្តៅ ចំពោះវត្តមានរបស់គណៈប្រតិភូ នៃសាធារណរដ្ឋបារាំង ដែលបានចូលរួមកិច្ចប្រជុំចរចានេះ តាមការអញ្ជើញរបស់ភាគីកម្ពុជា និងបានរម្លឹកឡើងវិញ នូវសារបាននិង វឌ្ឍនភាពដែលសម្រេចបានពីកិច្ចប្រជុំចរចាកន្លងមក។ បន្ថែមពីលើនេះ លោកបណ្ឌិតក៏បានគូសបញ្ជាក់អំពីឆន្ទៈក្នុងការបញ្ចប់ការ ចរចាកិច្ចព្រមព្រៀង DTA កម្ពុជា-បារាំងឱ្យបានឆាប់ផងដែរ។ ជាការឆ្លើយតប លោក Martin KLAM បានសម្តែងអំណរគុណ និងបានវាយតម្លៃខ្ពស់ ចំពោះកិច្ចខិតខំរបស់ភាគីកម្ពុជា ក្នុងការរៀបចំឱ្យមានកិច្ចប្រជុំចរចាកិច្ចព្រមព្រៀង DTA ជុំទី៣ ជាលក្ខណៈរូបវន្តនាពេលនេះ លោកក៏មានបំណងចង់ឱ្យការចរចារវាង ប្រទេសទំាងពីរ អាចបញ្ចប់ក្នុងពេលឆាប់ៗតាមដែលអាចធ្វើបាន។ សូមបញ្ជាក់ថា កិច្ចប្រជុំចរចាលើកិច្ចព្រមព្រៀង ស្ដីពីការចៀសវាងការយកពន្ធត្រួតគ្នា (DTA) ភាគីទាំងពីរ បានពិភាក្សាលម្អិត និង ស៊ីជម្រៅលើគ្រប់មាត្រា និងចំណុចដែលនៅសេសសល់ទាំងឡាយ ដែលពុំទាន់បានឯកភាពនៅជុំទី២។ ជាលទ្ធផល, ភាគីទាំងពីរបាន ដោះស្រាយបញ្ហាជាច្រើន ដោយនាំឱ្យកិច្ចចរចាបានបញ្ចប់ទាំងស្រុងនូវត្រឹមកម្រិតបច្ចេកទេស។ គួរបញ្ជាក់ផងដែរថា ជុំវិញកិច្ចព្រមព្រៀងស្ដីពីការចៀសវាងការយកពន្ធត្រួតគ្នា (DTA) ប្រទេសដែលកំពុងមានប្រសិទ្ធភាពអនុវត្ត រួមមាន៖ ប្រទេសសិង្ហបុរី, ចិន, ថៃ, ព្រុយណេ, វៀតណាម, ឥណ្ឌូនេស៊ី, ម៉ាឡេស៊ី, កូរ៉េខាងត្បូង, តំបន់រដ្ឋបាលពិសេសហុងកុង, តំបន់រដ្ឋបាលពិសេសម៉ាកាវ, និងតួកគីជាដើម ក្នុងនោះចំពោះនិវាសនជននៃប្រទេសដែលបានចុះកិច្ចព្រមព្រៀង ត្រូវដាក់ពាក្យស្នើសុំ ត្រួតពិនិត្យលក្ខណសម្បត្តិជាមុន មកអគ្គនាយកដ្ឋានពន្ធដារ ដើម្បីទទួលបានអត្ថប្រយោជន៍ពី DTA នេះ៕ អត្ថបទ៖ សុន រ៉ាឌី

ក្រុមការងារកម្ពុជា និងភាគីអាមេរិកបញ្ចប់កិច្ចប្រជុំចរចាជុំទី១ លើកិច្ចព្រមព្រៀងពាណិជ្ជកម្មបដិការ និងឯកភាពគ្នាប្រជុំចរចាជុំទី២ នៅសប្តាហ៍ទី១ខែមិថុនាខាងមុខ

2025/05/15 10:53:53 am        117
Facebook Telegram Linkin
ភ្នំពេញ៖ ចាប់ពីថ្ងៃទី១៣ ដល់ ថ្ងៃទី១៥ ខែឧសភា ឆ្នាំ២០២៥ នៅរដ្ឋធានីវ៉ាស៊ីនតោន សហរដ្ឋអាម៉េរិក ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានដឹកនាំក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក ចូលរួមកិច្ចប្រជុំចរចាជុំទី១ លើកិច្ចព្រមព្រៀងពាណិជ្ជកម្មបដិការ រវាងកម្ពុជា និងសហរដ្ឋអាម៉េរិក ខណៈភាគីសហរដ្ឋអាម៉េរិកដឹកនាំដោយលោកជំទាវ Sarah Ellerman អនុប្រធានតំណាងពាណិជ្ជកម្មសហរដ្ឋអាម៉េរិកទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។ យោងតាមសេចក្ដីប្រកាសព័ត៌មានរបស់អង្គភាពអ្នកនាំពាក្យរាជរដ្ឋាភិបាលកម្ពុជា នៅព្រឹកថ្ងៃទី១៥ ខែឧសភានេះ បានឱ្យដឹងថា ក្នុងកិច្ចប្រជុំចរចាជុំទី១នេះភាគីទាំងពីរបានផ្លាស់ប្តូរយោបល់ដោយត្រង់ទៅត្រង់មកក្នុងបរិយាកាសយោគយល់គ្នា លើការពង្រឹងបន្ថែមនូវទំនាក់ទំនងពាណិជ្ជកម្មនិងវិនិយោគទ្វេភាគី និងបានពិភាក្សាស៊ីជម្រៅលើ អត្ថបទសេចក្តីព្រាងកិច្ចព្រមព្រៀងពាណិជ្ជកម្មបដិការ។ ភាគីទាំងពីរបានឯកភាពគ្នារៀបចំកិច្ចប្រជុំចរចាជុំទី២ នៅសប្តាហ៍ទី១ ខែមិថុនា ឆ្នាំ២០២៥ នៅរដ្ឋធានីវ៉ាស៊ីនតោន។តាមសេចក្ដីប្រាកសបានឱ្យដឹងថា បញ្ជាក់ថា រាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នឹងបន្ត ធ្វើកិច្ចការងារនេះដោយយកចិត្តទុកដាក់បំផុត។សូមជម្រាបថា រាជរដ្ឋាភិបាលកម្ពុជា បានបង្ហាញពីការប្តេជ្ញាចិត្តខ្ពស់ក្នុងការពង្រឹងនីតិវិធីបង្ការ និងទប់ស្កាត់ការក្លែងបន្លំដើមកំណើតទំនិញ និងជំរុញការអនុវត្តច្បាប់ស្តីពីវិធានដើមកំណើតទំនិញ ប្រកបដោយតម្លាភាពសម្រាប់ការនាំចេញទំនិញមួយចំនួន ទៅកាន់ទីផ្សារសហរដ្ឋអាម៉េរិក តាមរយៈការដាក់ចេញនូវប្រកាសអន្តរក្រសួងរវាងក្រសួងសេដ្ឋកិច្ចនិងហិរញ្ញវត្ថុ ជាមួយក្រសួងពាណិជ្ជកម្ម និងប្រកាសរបស់ក្រសួងពាណិជ្ជកម្ម។ គួររម្លឹកដែរថាកាលពីថ្ងៃទី២ ខែមេសា ឆ្នាំ២០២៥ ឯកឧត្តម Donald J. Trump ប្រធានាធិបតី នៃសហរដ្ឋអាម៉េរិក បានប្រកាសចេញនូវការអនុវត្តពន្ធគយបដិការទៅលើជាង ១៨០ ប្រទេស នៅទូទាំងពិភពលោក ដោយក្នុងនោះក៏មានប្រទេសកម្ពុជាផងដែរ។ ត្រឹមរយៈពេល២ថ្ងៃប៉ុណ្ណោះ ក្រោយការប្រកាសខាងលើ ពោលគឺនៅថ្ងៃទី៤ ខែមេសា ឆ្នាំ២០២៥ សម្តេចធិបតីនាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើលិខិតផ្លូវការទៅកាន់ ឯកឧត្តមប្រធានាធិបតីអាម៉េរិក បង្ហាញអំពីការប្តេជ្ញាចិត្តលើកកម្ពស់ការនាំចូលផលិតផលរបស់សហរដ្ឋអាម៉េរិក ជាមួយនឹងការកាត់បន្ថយភ្លាមៗនូវពន្ធគយសម្រាប់ផលិតផលចំនួន ១៩ប្រភេទ ពីអត្រាពន្ធចងកាតព្វកិច្ច (Bound Rate) អតិបរមា ៣៥% មកត្រឹមអត្រាពន្ធអនុវត្តន៍ ៥% (Applied Rate) និងការប្តេជ្ញាចិត្តយ៉ាងពេញលេញរបស់កម្ពុជា ក្នុងការចូលរួមកិច្ចសន្ទនាប្រកបដោយការស្ថាបនា និងផលិតភាពជាមួយរដ្ឋាភិបាលអាម៉េរិក។ នៅថ្ងៃដដែលលោកជំទាវរដ្ឋមន្ត្រីក្រសួងពាណិជ្ជកម្ម ក៏បានផ្ញើលិខិតផ្លូវការទៅកាន់ ឯកឧត្តមអគ្គរដ្ឋទូតតំណាងពាណិជ្ជកម្មសហរដ្ឋអាម៉េរិក បញ្ជាក់អំពីការប្តេជ្ញាចិត្តនេះម្តងទៀតផងដែរក្នុងនាមស្ថាប័នជំនាញ។បន្ទាប់មកនាថ្ងៃទី១០ ខែមេសា ឆ្នាំ២០២៥ រាជរដ្ឋាភិបាលកម្ពុជាបានចេញសេចក្តីសម្រេចលេខ ៥២ សសរ ស្តីពី ការបង្កើតក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាម៉េរិក ដែលត្រូវបានរៀបចំឡើងក្រោមការដឹកនាំដ៏ខ្ពង់ខ្ពស់ ប្រកបដោយការគិតគូរវែងឆ្ងាយច្បាស់លាស់របស់ សម្តេចធិបតីនាយករដ្ឋមន្ត្រី សំដៅរៀបចំ និងជំរុញការបើកការចរចាជាមួយភាគីពាក់ព័ន្ធរបស់សហរដ្ឋអាម៉េរិក អំពីការអនុវត្តពន្ធគយបដិការ (Reciprocal Tariffs) រវាងប្រទេសទាំងពីរ ពិសេសគឺពង្រឹងនិងជំរុញកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគីឱ្យកាន់តែមានភាពប្រសើរឡើង៕

ប្រតិភូកម្ពុជាជួបពិភាក្សាជាមួយព្រឹទ្ធសភាអាមេរិក ដើម្បីជំរុញទំនាក់ទងប្រទេសទាំងពីរឱ្យកាន់តែស៊ីជម្រៅ

2025/05/15 10:07:33 am        185
Facebook Telegram Linkin
ប្រតិភូកម្ពុជាជួបសម្តែងការគួរសម និងពិភាក្សាការងារ ជាមួយសមាជិកព្រឹទ្ធសភាសហរដ្ឋអាមេរិក ដើម្បីលើកកម្ពស់កិច្ចសហ- ប្រតិបត្តិការ ក៏ដូចជាស្វែងរកកាលានុវត្តភាពថ្មីៗ សំដៅពង្រឹងទំនាក់ទំនងឱ្យកាន់តែស៊ីជម្រៅថែមទៀត ដើម្បីផលប្រយោជន៍រួម នៃប្រជាជាតិទាំងពីរ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៤ ខែឧសភា ឆ្នាំ២០២៥ អញ្ជើញជួបសម្តែងការគួរសម និងពិភាក្សាការងារជាមួយ លោកជំទាវ Tammy Duckworth សមាជិកព្រឹទ្ធសភាសហរដ្ឋអាម៉េរិក ដោយមានការចូលរួមផងដែរពី លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្តម កុយ គួង ឯកអគ្គរាជទូតកម្ពុជា ប្រចាំ សហរដ្ឋអាម៉េរិក និងប្រទេសម៉ិចស៊ិចកូ ក្នុងឱកាសបំពេញបេសកកម្មការងារ ចរចាលើកិច្ចព្រមព្រៀងបដិការនៅសហរដ្ឋអាម៉េរិក។ជំនួបនាឱកាសនោះ, ត្រូវបានរៀបចំឡើងក្នុងគោលបំណង ដើម្បីលើកកម្ពស់កិច្ចសហប្រតិបត្តិការដែលមានស្រាប់ រវាង ព្រះរាជាណាចក្រកម្ពុជា និងសហរដ្ឋអាមេរិក ក៏ដូចជាស្វែងរកកាលានុវត្តភាពថ្មីៗ សំដៅពង្រឹងទំនាក់ទំនងឱ្យកាន់តែស៊ីជម្រៅថែម ទៀត ដើម្បីផលប្រយោជន៍រួមនៃប្រជាជាតិទាំងពីរ។សូមបញ្ជាក់ថា នៅថ្ងៃទី១០ ខែមេសា ឆ្នាំ២០២៥ កន្លងមកនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី បានដឹកនាំប្រតិភូកម្ពុជា ជាក្រុមការងារចំពោះកិច្ច ដែលមកពីក្រសួងស្ថាប័នពាក់ព័ន្ធជាច្រើន ចេញដំណើរទៅចរចារកិច្ចព្រមព្រៀងពាណិជ្ជកម្មជាលើកដំបូង ដោយផ្ទាល់រវាងកម្ពុជា-អាមេរិក (នៅសហរដ្ឋអាមេរិក) ៕ អត្ថបទ៖ សុន រ៉ាឌី,

ប្រធានាធិបតីទីម័រឡេស្តេផ្ញើសារលិខិតជូនសម្តេចតេជោ ហ៊ុន សែន សម្តែងការដឹងគុណចំពោះដំណើរទស្សនកិច្ចរបស់សម្តេចទៅកាន់ទីម័រឡេស្តេ

2025/05/15 10:02:29 am        115
Facebook Telegram Linkin
ភ្នំពេញ៖ ឯកឧត្តម José Ramos-Horta ប្រធានាធិបតីនៃសាធារណរដ្ឋប្រជាធិបតេយ្យទីម័រឡេស្តេ បានផ្ញើសារលិខិតគោរពជូនសម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា ដោយសម្តែងនូវការដឹងគុណចំពោះសម្តេចតេជោ ដែលបានអញ្ជើញធ្វើទស្សនកិច្ច មកកាន់ទីម័រឡេស្តេ រយៈពេល៣ថ្ងៃ ចាប់ពីថ្ងៃទី៧-៩ ខែឧសភា ឆ្នាំ២០២៥កន្លងទៅ។ ប្រធានាធិបតីទីម័រឡេស្តេ បានបញ្ជាក់ក្នុងលិខិតថា ប្រទេស និងប្រជាជនទីម័រឡេស្តេ មានសេចក្តីសប្បាយរីករាយក្រៃលែង ដែលបានទទួលស្វាគមន៍ សម្តេចតេជោ ក្នុងដំណើរទស្សនកិច្ចមកកាន់ទីម័រឡេស្តេ។ ដំណើរទស្សនកិច្ចនេះ គឺជាការចាប់ផ្តើមនៃទំព័រថ្មី នៃការផ្លាស់ប្តូរទៅវិញទៅមក និងកិច្ចសហប្រតិបត្តិការរវាងទីម័រឡេស្តេ និងព្រះរាជាណាចក្រកម្ពុជា។លិខិតរបស់ប្រធានាធិបតីទីម័រឡេស្តេមានខ្លឹមសារទាំងស្រុងដូច្នេះថា «សូមអនុញ្ញាតឱ្យ ខ្ញុំសម្តែងនូវការដឹងគុណ ដោយស្មោះអស់ពីដួងចិត្ត ចំពោះការចូលរួមដ៏ថ្លៃថ្លារបស់សម្តេចតេជោ នៅក្នុងកម្មវិធីផ្លូវការនានា អំឡុងពេលទស្សនកិច្ច រួមទាំងជំនួបទ្វេភាគីកាលពីថ្ងៃទី៨ ខែឧសភា ឆ្នាំ២០២៥ នៅវិមានប្រធានាធិបតីនីកូឡៅឡូបាតូ (Nicolau Lobato), សម័យប្រជុំពិសេសដ៏ឧឡារិករៀបចំដោយសភាជាតិទីម័រឡេស្តេ, ជំនួបជាមួយឯកឧត្តមនាយករដ្ឋមន្ត្រី សាណាណា ហ្គូសម៉ៅ និងពិធីលៀងសាយភោជន៍ផ្លូវការ ដែលសុទ្ធតែជាខណៈពេលដ៏មានសារៈសំខាន់បំផុត សម្រាប់ទំនាក់ទំនងរវាងប្រទេសយើងទាំងពីរ។ជំនួបទ្វេភាគីរបស់យើង បានផ្តល់ឱកាសឱ្យយើងរិះរកមធ្យោបាយ សម្រាប់កិច្ចសហប្រតិបត្តិការជាមួយគ្នា ជាពិសេសលើវិស័យកសិកម្ម សន្តិសុខស្បៀង ការអប់រំ ពាណិជ្ជកម្ម និងការអភិវឌ្ឍសេដ្ឋកិច្ច។ ខ្ញុំសូមសម្តែងការដឹងគុណជាពិសេស ចំពោះការគាំទ្រយ៉ាងមោះមុតរបស់ សម្តេចតេជោ ចំពោះការចូលជាសមាជិកពេញសិទ្ធិ អាស៊ានរបស់ទីម័រឡេស្តេ ក៏ដូចជាការចែករំលែកនូវចំណេះស៊ីជម្រៅ បែបយុទ្ធសាស្ត្រដ៏មានតម្លៃទាក់ទងនឹងមាគ៌ា របស់យើងខ្ញុំឆ្ពោះទៅរកសមាហរណកម្មតំបន់។ខ្ញុំក៏សូមថ្លែងអំណរគុណយ៉ាងស្មោះសរចំពោះសម្តេចតេជោ ដែលបានទទួលយកការអញ្ជើញចូលរួមផ្តល់ បាឋកថាក្នុង កម្មវិធីសិក្ខាសាលារបស់ប្រធានាធិបតី ក្រោមមូលបទ៖ «មេរៀនរបស់ ហ៊ុន សែន -ចេញពីប្រល័យ ពូជសាសន៍ និងភាពក្រីក្រ មកកាន់សេរីភាព និងវិបុលភាព» ដែលបានប្រព្រឹត្តទៅនៅថ្ងៃទី០៩ ខែឧសភា ឆ្នាំ ២០២៥។ សក្ខីកម្មគួរចាប់អារម្មណ៍ខ្លាំងនៃភាពធន់ ភាពជាអ្នកដឹកនាំ និងចក្ខុវិស័យយុទ្ធសាស្ត្ររបស់ សម្តេចតេជោ នឹងនៅតែជាប្រភពនៃការលើកទឹកចិត្ត ដល់ប្រជាជនទីម័រឡេស្តេ។ចំណាប់អារម្មណ៍ដ៏ថ្លៃថ្លារបស់ សម្តេចតេជោ ចំពោះវឌ្ឍនភាពរបស់រដ្ឋធានីឌីលី ចាប់តាំងពីដំណើរទស្សនកិច្ចចុងក្រោយរបស់ សម្តេចតេជោ នៅក្នុងឆ្នាំ២០១៦ គឺជាការលើកទឹកចិត្តយ៉ាងជ្រាលជ្រៅ ហើយពង្រឹងបន្ថែមទៀត នូវការតាំងចិត្តរបស់យើងខ្ញុំ ដើម្បីឈានទៅមុខតាមមាគ៌ាទំនើបកម្ម និងការអភិវឌ្ឍប្រកបដោយចីរភាព។យើងខ្ញុំមានសេចក្តីរំភើបក្រៃលែងផងដែរ ចំពោះការបង្ហាញអំពីសមានចិត្តដ៏ថ្លៃថ្លារបស់ សម្តេចតេជោ ចំពោះពិធីទទួលស្វាគមន៍ដ៏អធិកអធម របស់ប្រជាជនទីម័រឡេស្តេ ក៏ដូចជាកាយវិការជាច្រើន ដែលបញ្ជាក់ពីមិត្តភាពពិតៗ ដែលស្តែងចេញក្នុងអំឡុងទស្សនកិច្ចរបស់សម្តេចតេជោ ដែលក្នុងនោះ ខ្ញុំមានកិត្តិយសដែលបាន បើករថយន្តដោយផ្ទាល់ជូន សម្តេច តាមដងវិថីនានានៃរដ្ឋធានីរបស់យើងខ្ញុំ ដែលជាការសម្តែងចេញជានិមិត្តរូបនៃសេចក្តីគោរព និងភាពស្និទ្ធស្នាល។ដោយសង្ឃឹមថា ដំណើរទស្សនកិច្ចនេះ គឺជាការចាប់ផ្តើមនៃទំព័រថ្មី នៃការផ្លាស់ប្តូរទៅវិញទៅមក និងកិច្ចសហប្រតិបត្តិការរវាងទីម័រឡេស្តេ និងព្រះរាជាណាចក្រកម្ពុជា ខ្ញុំសូមបញ្ជាក់សាជាថ្មី នូវការគោរពរាប់អានដ៏ស្មោះស្ម័គ្របំផុតរបស់ខ្ញុំ ចំពោះសម្តេច»៕

ព្រះករុណាជាអម្ចាស់ជីវិតលើត្បូង ស្តេចយាងជាព្រះរាជាធិបតី ព្រះរាជពិធីច្រត់ព្រះនង្គ័ល នៅខេត្តកំពង់ឆ្នាំង

2025/05/15 09:55:01 am        188
Facebook Telegram Linkin
កំពង់ឆ្នាំង៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត សម្តេចសព្វព្រះរាជហឫទ័យ ស្តេចយាងជាព្រះរាជាធិបតី ព្រះរាជពិធីបុណ្យច្រត់ព្រះនង្គ័ល នៅវាលព្រះស្រែ ក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង នាព្រឹកថ្ងៃទី១៥ ខែឧសភា ឆ្នាំ២០២៥។ព្រះរាជពិធីនេះ មានការយាង និមន្ត និងចូលរួមពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ថ្នាក់ដឹកនាំសង្ឃទាំងពីរគណៈ ព្រះញាតិវង្សានុវង្ស បណ្តាអង្គទូត មន្ត្រីរាជការ សិស្សានុសិស្ស និងប្រជាពលរដ្ឋជាច្រើនរូប។សូមបញ្ជាក់ថា ព្រះរាជពិធីបុណ្យច្រត់ព្រះនង្គ័ល គឺជាព្រះរាជពិធីមួយប្រារព្ធឡើងជារៀងរាល់ឆ្នាំ ដើម្បីផ្សងប្រផ្នូលកម្រិតទឹកភ្លៀង និងភោគផលប្រចាំឆ្នាំនៅគ្រប់តំបន់ខេត្ត-ក្រុងទូទាំងកម្ពុជា តាមរយៈការសោយព្រះស្ងោយ របស់គោឧសភារាជ ហើយជាសញ្ញាប្រាប់ដល់ប្រជានុរាស្ត្រខ្មែរទាំងអស់ដែលមានមុខរបរជាកសិករ អ្នកស្រែចំការឱ្យដឹងថា ដល់ពេលដែលត្រូវចាប់ផ្តើមធ្វើស្រែចំការហើយ។

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
09/10/2025 08:09 PM
Facebook Telegram Linkin
រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»
09/10/2025 08:09 PM
Facebook Telegram Linkin
វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ
09/10/2025 07:09 PM
Facebook Telegram Linkin
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
09/10/2025 07:09 PM
Facebook Telegram Linkin
នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»
09/10/2025 07:09 PM
Facebook Telegram Linkin
សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា
09/10/2025 06:09 PM
Facebook Telegram Linkin
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
09/10/2025 06:09 PM
Facebook Telegram Linkin
ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង
09/10/2025 06:09 PM
Facebook Telegram Linkin
ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល
09/10/2025 06:09 PM
Facebook Telegram Linkin
សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី
09/10/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.