BTV NEWS

សម្ដេចពិជ័យសេនា ទៀ បាញ់ ណែនាំដល់ស្ថាប័នពាក់ព័ន្ធឱ្យបន្ដរៀបចំអភិវឌ្ឍន៍តំបន់ប្រវត្តិសាស្ត្រយោធាកម្ពុជា X-16

សម្តេចពិជ័យសេនា ទៀ បាញ់ អញ្ជើញជាអធិបតី ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧) នៅខេត្តត្បូងឃ្មុំ

ជនជាតិចិន១៦៤នាក់ពាក់ ព័ន្ធករណី Online Scams ត្រូវបានបណ្ដេញចេញពីកម្ពុជា

កម្មវិធី “បរិច្ចាគឈាម ចងចាំវីរភាព"រំលឹកដល់ការលះបង់របស់សម្ដេចតេជោ និងដើម្បីជួយសង្គ្រោះជីវិត

ព័ត៌មានជាតិ

ពលរដ្ឋជាប់សែចិនកុះករនាំគ្នាបួងសួងសុំលាភជ័យ និងសុខសន្តិភាពនៅវិហារអ្នកតាចិនក្រុងតាខ្មៅ

នៅថ្ងៃទី១៧ខែកុម្ភៈនេះ ពលរដ្ឋខ្មែរជាប់សែស្រឡាយចិន បន្តនាំគ្នាទៅវិហារអ្នកតាចិន នៅក្នុងក្រុងតាខ្មៅ ខេត្តកណ្តាល ដើម្បីបួងសួង សុំលាភ សុំជ័យ សេចក្តីសុខក្នុងគ្រួសារ និងប្រទេសជាតិមានសុខសន្តិភាព រីកចម្រើនរៀងរហូត។ពលរដ្ឋចាស់ក្មេង បានថ្លែងថា រៀងរាល់ឆ្នាំគេតែងជំនឿជឿជាក់ខ្លាំង និងនាំគ្នាមកវិហារអ្នកតាចិន នៅក្រុងតាខ្មៅ ដោយមានការទិញដើមអំពៅ ផ្លែទទឹម ក្រូច ធូបទៀន និងគ្រឿងសែននានា យកទៅសែនព្រេន សុំសេចក្តីសុខ ហេងលាភ មានជ័យ កាត់គ្រោះចង្រៃផ្សេងៗ ហើយតាមរយៈការបួងសួងនេះដែរ គេក៏បានបួងសួងប្រទេសជាតិ មានសុខសន្តិភាព ស្ថេរភាព រីកចម្រើន មានទេសចរអន្តរជាតិ និងអ្នកវិនិយោគមកកម្ពុជាកាន់តែច្រើនផងដែរ។សូមបញ្ជាក់ថា ឆ្នាំនេះ ក៏ដូចឆ្នាំកន្លងមក កូនខ្មែរកាត់សែស្រឡាយចិនតែងនាំគ្នា សម្រុកចូលមកវិហារអ្នកតាចិន ស្ថិតនៅក្រុងតាខ្មៅ ខេត្តកណ្ដាល ច្រើនហូរហែរ ចូលទៅអុជធូប ធ្វើពិធីសែនព្រេងស្ទើរគ្រប់រយៈពេល២៤ម៉ោង ក្នុងរយៈពេល៤ថ្ងៃ នៃពិធីសែន និងបុណ្យចូលឆ្នាំថ្មីប្រពៃណីចិន ដើម្បីសុំសេចក្តីសុខពីអ្នកតាចិនយកហេងលាភ មានជ័យ និងយកយ័ន្ត យកដើមអំពៅនោះទៅដាំនៅក្នុងផ្ទះ ហើយផ្លែទទឹមទៅដាក់នៅក្នុងផ្ទះដើម្បីសេចក្តីសុខ រកទទួលទានមានបាន តាមអបិយជំនឿរបស់អ្នកកាត់ខ្សែស្រឡាយចិន៕ អត្ថបទ៖ ស៊ុម សុខជា

អ្នកនាំពាក្យ៖ រាជរដ្ឋាភិបាលកំពុងយកចិត្តទុកដាក់យ៉ាងខ្លាំង ចំពោះពលរដ្ឋភៀសសឹកដែលមិនទាន់អាចទៅផ្ទះវិញបាន

រាជរដ្ឋាភិបាលកំពុងយកចិត្តទុកដាក់យ៉ាងខ្លាំងចំពោះប្រជាពលរដ្ឋភៀសសឹក ដែលមិនទាន់អាចទៅផ្ទះសំបែងវិញបាន ក្នុងនោះក្រុមការងាររាជរដ្ឋាភិបាល កំពុងបញ្ចុះបឋមសិលាដើម្បីចាប់ផ្តើមសាងសង់ជម្រកបណ្តោះអាសន្នជូនប្រជាពលរដ្ឋភៀសសឹកបានប្រព្រឹត្តទៅជាបន្តបន្ទាប់ប៉ុន្មានថ្ងៃចុងក្រោយនេះក្នុងបណ្តាខេត្តមួយចំនួនតាមជាយដែន ក្រោយពីក្រសួងរៀបចំដែនដី នគរូបនីយកម្ម និងសំណង់បានកំណត់ទីតាំងនិងសិក្សារួចរាល់។ នេះបើតាមអ្នកនាំពាក្យរាជរដ្ឋាភិបាលកម្ពុជា។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា ថ្លែងតាមរយៈសន្និសីទសារព័ត៌មាននៅថ្ងៃទី១៧ ខែកុម្ភៈ ឆ្នាំ២០២៦នេះថា ដូចការគ្រោងទុក ពិធីបញ្ចុះបឋមសិលាដើម្បីចាប់ផ្តើមសាងសង់ជម្រកបណ្តោះអាសន្នជូនប្រជាពលរដ្ឋភៀសសឹកបានប្រព្រឹត្តទៅជាបន្តបន្ទាប់ប៉ុន្មានថ្ងៃចុងក្រោយនេះក្នុងបណ្តាខេត្តមួយចំនួនតាមជាយដែន ក្រោយពីក្រសួងរៀបចំដែនដី នគរូបនីយកម្ម និងសំណង់បានកំណត់ទីតាំងនិងសិក្សារួចរាល់។ ការរៀបចំជម្រកបណ្តោះអាសន្នជូនប្រជាពលរដ្ឋភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបានគឺជាការគិតគូរប្រកបដោយការទទួលខុសត្រូវខ្ពស់របស់រាជរដ្ឋាភិបាលដើម្បីឱ្យពួកគេមានកន្លែងស្នាក់នៅសមរម្យ ដោយគិតគូរទាំងសុវត្ថិភាព ទាំងបរិស្ថាន និងសុខុមាលភាព ទម្រាំដល់ពេលដែលពួកគេអាចវិលត្រឡប់ទៅកាន់ផ្ទះសម្បែងវិញនាពេលខាងមុខ។ឯកឧត្តមបន្តថា ក្រៅពីផ្តល់ជូនជម្រកបណ្តោះអាសន្ន រាជរដ្ឋាភិបាលក៏ផ្តល់ជូនបងប្អូនជនភៀសសឹកទាំងនោះនូវដំណោះស្រាយសមរម្យមួយទៅតាមស្ថានភាពជាក់ស្តែងដើម្បីរក្សាលំនឹងជីវភាពប្រចាំថ្ងៃក្នុងអំឡុងពេលដ៏លំបាកនេះ ខណៈដែលរាជរដ្ឋាភិបាលបាននិងកំពុងធ្វើការងារការទូតយ៉ាងសកម្មដើម្បីការពារអធិបតេយ្យភាព និងបូរណភាពទឹកដី ក៏ដូចជាការពារសិទ្ធិប្រជាពលរដ្ឋដែលត្រូវបានរារាំងដោយកងកម្លាំងប្រដាប់អាវុធថៃមិនឱ្យវិលត្រឡប់ទៅផ្ទះសម្បែងវិញ។ គិតមកទល់នឹងពេលនេះ នៅសល់ពលរដ្ឋភៀសសឹកចំនួនជាង៧ម៉ឺននាក់ទៀតនៅមិនទាន់អាចវិលត្រឡប់ទៅកាន់ផ្ទះសម្បែងវិញបាននៅឡើយក្នុងចំណោមជនភៀសសឹកសរុបជាង៦៤ម៉ឺននាក់។ ឯកឧត្តម អ្នកនាំពាក្យរាជរដ្ឋាភិបាលបានបញ្ជាក់ថា ការផ្តល់ជម្រកបណ្តោះអាសន្នជូនបងប្អូនជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន មិនមែនមានន័យថា រាជរដ្ឋាភិបាលបោះបង់សិទ្ធិទាមទារទឹកដីដែលកងកម្លាំងថៃកំពុងកាន់កាប់ដោយខុសច្បាប់នោះឡើយ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ជំហរយ៉ាងម៉ឺងម៉ាត់ចំពោះមុខប្រជាពលរដ្ឋរួចហើយថា រាជរដ្ឋាភិបាលដាច់ខាតមិនបោះបង់សិទ្ធិទាមទារទឹកដីក្នុងដែនអធិបតេយ្យស្របច្បាប់របស់កម្ពុជានោះឡើយ ហើយ រាជរដ្ឋាភិបាលបាននិងកំពុងធ្វើការងារយ៉ាងសកម្មនិងម៉ឺងម៉ាត់បំផុតដើម្បីឈានទៅរកដំណោះស្រាយបញ្ហាព្រំដែនដោយសន្តិវិធីតាមយន្តការដែលភាគីទាំងពីរបានឯកភាពគ្នា និងដោយអនុលោមតាម អនុសញ្ញា សន្ធិសញ្ញា និងច្បាប់អន្តរជាតិជាធរមាន។ ឯកឧត្តមបន្តថា ជាក់ស្តែង រាជរដ្ឋាភិបាល តាមរយៈក្រសួង ស្ថាប័ន នានាជាសេនាធិការ បានតវ៉ាជំទាស់យ៉ាងខ្លាំងក្លានិងជាផ្លូវការនូវរាល់ការរំលោភបំពានទាំងឡាយមកលើដែនអធិបតេយ្យភាព និងបូរណភាពទឹកដីកម្ពុជា ពីសំណាក់កងកម្លាំងប្រដាប់អាវុធថៃ ដែលធ្វើឱ្យមានការកែប្រែនូវបរិយាកាសសន្តិសុខនៅក្នុង ឬជុំវិញតំបន់ជនស៊ីវិល ការពង្រឹងការគ្រប់គ្រងយោធា ឬការបង្កើតស្ថានភាពថ្មីនៅលើទីតាំងជាក់ស្តែង ក៏ដូចជាការរារាំងជនស៊ីវិលមិនឱ្យវិលត្រឡប់ទៅកាន់ផ្ទះសំបែងរបស់ពួកគេវិញបាន។ ការតវ៉ាទាំង នេះគឺជាភស្តុតាងបញ្ជាក់ពីការប្រើសិទ្ធិស្របច្បាប់របស់កម្ពុជា ក្នុងការការពារបូរណភាពទឹកដីក៏ដូចជាការពារសិទ្ធិ និងសេចក្តីថ្លៃថ្នូររបស់ប្រជាពលរដ្ឋ ប្រឆាំងនឹងការរំលោភបំពាន។ រាជរដ្ឋាភិបាលចាត់ទុកការការពារទឹកដីនិងប្រជាជនជាអាទិភាពខ្ពស់បំផុតរបស់ខ្លួន។ ក្នុងឱកាសអញ្ជើញចុះជួបសំណេះសំណាលនិងសួរសុខទុក្ខប្រជាពលរដ្ឋភៀសសឹកនាពេលថ្មីៗនេះ សម្តេចបវរធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលបានគិតគូរដោយយកចិត្តទុកដាក់បំផុតចំពោះប្រជាពលរដ្ឋភៀសសឹក ទាំងពលរដ្ឋភៀសសឹកដែលអាចត្រឡប់ទៅលំនៅឋានវិញបាន ទាំងពលរដ្ឋភៀសសឹកដែលមិនទាន់អាចត្រឡប់ទៅលំនៅឋានវិញបាននៅឡើយនិងការស្តារឡើងវិញនូវហេដ្ឋានរចនាសម្ព័ន្ធដែលខូចខាត។សម្រាប់ពលរដ្ឋភៀសសឹកដែលអាចវិលត្រឡប់ទៅលំនៅឋានវិញបាន ក្រសួងស្ថាប័នពាក់ព័ន្ធ និងអាជ្ញាធរមូលដ្ឋាន បាននិងកំពុងខ្នះខ្នែងរៀបចំសម្របសម្រួលឱ្យពួកគេអាចវិលត្រឡប់ទៅលំនៅឋានវិញឱ្យបានឆាប់តាមដែលអាចធ្វើទៅបានដោយធានាសុវត្ថិភាពតាមរយៈការបោសសំអាតអាវុធយុទ្ធភ័ណ្ឌមិនទាន់ផ្ទុះនៅតាមទីតាំងទាំងនោះ ក៏ដូចជាជួយសម្រួលជីវភាពរបស់ពួកគេតាមរយៈការដោះស្រាយតម្រូវការចាំបាច់នានាដែលពួកគេត្រូវការ។ជាមួយគ្នានោះ រាជរដ្ឋាភិបាលក៏បានបង្កើតគណៈកម្មការចំពោះកិច្ចមួយដើម្បីសិក្សាអំពីផលប៉ះពាល់ឱ្យបានជាក់លាក់ដើម្បីចេញវិធានការអន្តរាគមន៍ឱ្យមានប្រសិទ្ធភាព។ ចំពោះហេដ្ឋារចនាសម្ព័ន្ធដែលបានរងការខូចខាត មានជាអាទិ៍សាលារៀន មណ្ឌលសុខភាព មន្ទីរពេទ្យបង្អែក ផ្សារ ផ្លូវ ស្ពាន បណ្តាញទឹកស្អាត អគ្គិសនី និងទូរគមនាគមន៍ជាដើម រាជរដ្ឋាភិបាលនឹងស្តារឡើងវិញឱ្យបានឆាប់បំផុតតាមស្ថានភាពជាក់ស្តែង នៅក្រោយពេលដែលក្រុមការងារចំពោះកិច្ចសិក្សារួចរាល់។ ទន្ទឹមនឹងនោះ ការការពារបូរណភាពទឹកដីក្នុងដែនអធិបតេយ្យស្របច្បាប់របស់កម្ពុជាក៏ត្រូវបានធ្វើឡើងដំណាលគ្នានិងយ៉ាងម៉ឺងម៉ាត់បំផុត។អ្នកនាំពាក្យរាជរដ្ឋាភិបាលគូសបញ្ជាក់ជាថ្មីថា កម្ពុជាប្រកាន់ជំហរដាច់ខាតក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ(Uti Possidetis Juris)គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង៕

កម្ពុជាបន្តបណ្ដេញចេញជនបរទេសចំនួន ១,០៨៩ នាក់ ពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់

ភ្នំពេញ៖ នៅថ្ងៃទី១៤ ១៥ ១៦ខែកុម្ភៈ ឆ្នាំ២០២៦ កម្ពុជា បានបណ្ដេញចេញជនបរទេសចំនួន ១,០៨៩ នាក់ ពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់។ នេះបើតាមការបញ្ជាក់របស់អគ្គនាយកអន្តោប្រវេសន៍នៃក្រសួងមហាផ្ទៃ។អគ្គនាយកអន្តោប្រវេសន៍ បានឱ្យដឹងនៅថ្ងៃទី១៧ ខែកុម្ភៈ ឆ្នាំ២០២៦នេះថា ដោយអនុវត្តតាមអនុសាសន៍ដ៏ខ្ពង់ខ្ពស់ របស់ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី បន្តធ្វើការបណ្តេញជនបរទេសសរុបចំនួន ១០៨៩នាក់ (ស្រី ៥៧នាក់) មាន ១៤សញ្ជាតិ រួមមាន ចិន យ៉ូហ្គង់ដា ម៉ាឡេស៊ី ឥណ្ឌូនេស៊ី ប៉ាគីស្ថាន កូរ៉េ វៀតណាម ចិនតៃវ៉ាន់ ហ្វីលីពីន នីហ្សេរីយ៉ា ឥណ្ឌា បង់ក្លាដេស កេនយ៉ា និងនេប៉ាល់ ត្រូវបានបណ្ដេញចេញតាមប៉ុស្តិ៍នគរបាលច្រកទ្វារអាកាសអន្តរជាតិតេជោ និងជនជាតិវៀតណាមបណ្ដេញចេញតាមប៉ុស្តិ៍នគរបាលច្រកទ្វារអន្តរជាតិព្រែកចាក ជនបរទេសទាំងអស់នេះពាក់ព័ន្ធករណីលួចឆ្លងដែន ឆបោកតាមប្រព័ន្ធអនឡាញ លេងល្បែងស៊ីសងតាមប្រព័ន្ធអនឡាញ ស្នាក់នៅគ្មានលិខិតឆ្លងដែន និងធ្វើការងារខុសច្បាប់នៅកម្ពុជា។អគ្គនាយកអន្តោប្រវេសន៍ បានបញ្ជាក់ថា ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល នៃកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

រដ្ឋបាលខេត្តរតនគិរី បន្តរៀបចំអភិវឌ្ឍន៍សួនច្បារផ្នែកខាងលិចនៃបឹងកន្សែងបន្ថែម បន្ទាប់ពីបានអភិវឌ្ឍន៍ផ្នែកខាងកើតយ៉ាងល្អស្អាតសម្រាប់ពលរដ្ឋ និងទេសចរលេងកម្សាន្ត

រតនគិរី៖ ក្រោមការគិតគូរយកចិត្តទុកដាក់ពីសំណាក់ ឯកឧត្តម ញ៉ែម សំអឿន អភិបាលខេត្តរតនគិរី បឹងកន្សែងបានប្រែមុខមាត់ថ្មី ដ៏ស្រស់ត្រកាល និងបានក្លាយជាកន្លែងដែលមានបរិស្ថានស្អាត សោភណ្ឌភាពល្អ និងជារមណីយដ្ឋានប្រកបដោយភាពទាក់ទាញ។ បន្ទាប់ពីធ្វើការអភិវឌ្ឍន៍ផ្នែកខាងកើត បានយ៉ាងល្អស្អាត និងស្រស់បំព្រងហើយនោះ ឯកឧត្តម អភិបាលខេត្ត បន្តធ្វើការអភិវឌ្ឍន៍ផ្នែកខាងលិច បន្តទៀត ដោយនឹងរៀបចំសួនច្បារ មានមាត្រដ្ឋាន១/១០០០ មានជណ្តើចុះ២កន្លែងថែមទៀតផង។ នេះបើតាមការបញ្ជាក់របស់រដ្ឋបាលខេត្តរតនគិរី។សូមបញ្ជាក់ថា បឹងកន្សែង ជាបឹងធម្មជាតិមួយ ស្ថិតនៅចំកណ្តាលបេះដូងនៃខេត្តរតនគិរី និងជាតំបន់រមណីយដ្ឋានទេសចរណ៍ដ៏មានសក្តានុពលបំផុតមួយក្នុងខេត្តរតនគិរី។ បច្ចុប្បន្ន នឹងកន្សែង មានការរៀបចំដាក់ឧបករណ៍ហាត់ប្រាណ និងឧបករណ៍សម្រាប់ក្មេង ជិះលេងតាមមាត់បឹង មានខ្សែរ៉តជិះលេងកំសាន្ត មានរៀបចំសួនច្បារស្រស់បំព្រង និងបំពាក់ភ្លើងបំភ្លឺសាធារណៈ សាងសង់រូបសំណាក់គ្រួសារដំរី រូបសំណាក់សត្វ អក ព្រមទាំងរូបសំណាកសត្វដ៏ទៃច្រើនទៀត គួរជាទីចាប់អារម្ម និងជាកន្លែងដ៏ទាក់ទាញបំផុតរបស់ប្រជាពលរដ្ឋក្នុងក្រុងបានលុង និងភ្ញៀវទេសចរជាតិ អន្តរជាតិ ឱ្យមកគយគន់ជាមួយសម្រស់ធម្មជាតិដ៏ស្រស់ត្រកាល ។ជាពិសេស អាចគយគន់ សត្វប្រវឹក សត្វទម សត្វកុក និងសត្វស្លាបជាច្រើនប្រភេទផ្សេង ផងដែរ។រមណីយដ្នានធម្មជាតិមួយនេះគឺជាទីកន្លែង អារម្មណ៍យ៉ាងខ្លាំងពីសំណាក់ភ្ញៀវទេសចរដែលទៅលេងនៅបឹងនេះហើយទទួលបានអារម្មណ៍ស្រស់ស្រាយ និងបង្កើតអនុស្សារីយ៍ល្អៗជាច្រើនដែលមិនអាចបំភ្លេចបាន។ដូច្នេះភ្ញៀវទេសចរជាតិ អន្តរជាតិបើបានកមលេងខេត្តរតនគិរីហើយ សូមកុំរំលងរមណីយដ្ឋានធម្មជាតិនេះឱ្យសោះ៕

ប្រតិបត្តិករទេសចរណ៍អរគុណចំពោះរដ្ឋាភិបាលបន្តផ្តល់ការលើកទឹកចិត្តពន្ធដារដល់ដំណាច់ឆ្នាំ២០២៦

ប្រតិបត្តិករទេសចរណ៍ បានថ្លែងអំណរគុណរាជរដ្ឋាភិបាល ជាពិសេសសម្ដេចមបហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ដែលតែងតែយកចិត្តទុកដាក់ចំពោះវិស័យឯកជន បានបន្តផ្តល់ការលើកទឹកចិត្តពន្ធដារចំពោះសហគ្រាសក្នុងវិស័យទេសចរណ៍ដែលមានមូលដ្ឋាននៅក្នុងខេត្តសៀមរាប ខណៈពួកគាត់សង្ឃឹមថា ប្រមុខរដ្ឋាភិបាលនឹងពង្រីកវិសាលភាព ការលើកទឹកចិត្តពន្ធដារ ចំពោះសហគ្រាសក្នុងវិស័យទេសចរណ៍ ក្នុងក្របខណ្ឌទូទាំងប្រទេស។ការថ្លែងអំណរគុណនេះ ធ្វើឡើងបន្ទាប់ពី ក្រសួងសេដ្ឋកិច្ច និងហិរញ្ញវត្ថុ បានប្រកាសផ្តល់ការលើកទឹកចិត្តពន្ធដារ ចំពោះសហគ្រាសក្នុងវិស័យទេសចរណ៍នៅខេត្តសៀមរាប ក្នុងគោលបំណងផ្តល់ការលើកទឹកចិត្តដល់សហគ្រាសក្នុងវិស័យទេសចរណ៍ រួមមាន សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុន ភ្នាក់ងារទេសចរណ៍។ប្រធានសមាគមមគ្គុទេសក៍អង្គរខេត្តសៀមរាប លោក ខៀវ ធី បានប្រាប់ BTV ថា ការលើកលែងពន្ធដារ សហគ្រាសក្នុងវិស័យទេសចរណ៍ នាពេលនេះ នឹងជួយសម្រាលបន្ទុកពួកគាត់បានមួយកម្រិត ដើម្បីផ្តល់លទ្ធភាពឱ្យពួកគាត់អាចបន្តអាជីវកម្មរបស់ខ្លួន បន្ទាប់ពីរងផលប៉ះពាល់ដោយសារជម្លោះព្រំដែនកម្ពុជា-ថៃ។ បណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា យល់ថា នេះគឺជាទឹកចិត្តដ៏ប្រពៃរបស់ប្រមុខរដ្ឋាភិបាល ដែលបានបន្តអនុគ្រោះទៅដល់វិស័យទេសចរណ៍នៅក្នុងខេត្តសៀមរាប ដោយលោកបណ្ឌិត សង្ឃឹមថា ការលើកលែងនេះ នឹងអនុវត្តនៅមូលដ្ឋានសក្តានុពលទេសចរណ៍ផ្សេងទៀត ដូច រាជធានីភ្នំពេញ, ទេសចរណ៍តំបន់ឆ្នេរ និងតំបន់ផ្សេងៗទៀត។សូមបញ្ជាក់ថា ការលើកទឹកចិត្តពន្ធដារចំពោះសហគ្រាសក្នុងវិស័យទេសចរណ៍ដែលមានមូលដ្ឋាននៅក្នុងខេត្តសៀមរាប បានអនុវត្តគិតចាប់ពីខែមករា ឆ្នាំ២០២៦ ដល់ដំណាច់ ខែធ្នូ ឆ្នាំ២០២៦។ ការលើកទឹកចិត្តពន្ធដារ រួមមាន ៖ ទី១- លើកលែងការបង់ពន្ធអាករប្រចាំខែគ្រប់ប្រភេទ វៀរលែងតែអាករលើតម្លៃបន្ថែម និងអាករលើការស្នាក់នៅ គិតចាប់ពីខែមករា ឆ្នាំ២០២៦ រហូតដល់ដំណាច់ ខែធ្នូ ឆ្នាំ២០២៦។ទី២- លើកលែងពន្ធលើប្រាក់ចំណូលប្រចាំឆ្នាំ២០២៦, ចំពោះប្រាក់រំដោះពន្ធលើប្រាក់ចំណូលដែលសហគ្រាសបានបង់រួចឆ្នាំ២០២៧ នឹងត្រូវបានអនុញ្ញាតជាឥណទានពន្ធសម្រាប់កាត់កងជាមួយពន្ធលើប្រាក់ចំណូលប្រចាំ និង ទី៣- មិនទទួលរងការធ្វើសវនកម្មពន្ធដារ សម្រាប់ការិយបរិច្ឆេទឆ្នាំ២០២៦៕ អត្ថបទ៖ ធូ វិរៈ

ចំពោះមុខសម្ដេចតេជោ, អនុរដ្ឋមន្ត្រីក្រសួងការពារប្រទេសឡាវ ប្ដេជ្ញាខិតខំប្រឹងប្រែងពូនជ្រំទំនាក់ទំនងកងទ័ពកម្ពុជា-ឡាវឱ្យកាន់តែរីកចម្រើនបន្ថែមទៀត

ឯកឧត្តមឧត្តមសេនីយ៍ឯក សាយចៃ គុមម៉ាស៊ីត (Saichay Kommasith) អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការកងទ័ពប្រជាជនឡាវ បានបង្ហាញនូវការប្ដេជ្ញាខិតខំប្រឹងប្រែងពូនជ្រំទំនាក់ទំនងកងទ័ពកម្ពុជា-ឡាវឱ្យកាន់តែរីកចម្រើនបន្ថែមទៀត ខណៈបច្ចុប្បន្នទំនាក់ទំនងរវាងប្រទេសទាំងពីរកំពុងមានភាពល្អប្រសើរ ជាពិសេសសន្ដិសុខ សុវត្ថិភាពនៅតាមបន្ទាប់ព្រំដែនប្រទេសទាំងពីរ។ ឯកឧត្តមឧត្តមសេនីយ៍ឯក សាយចៃ គុមម៉ាស៊ីត អនុរដ្ឋមន្ត្រីក្រសួងការពារប្រទេសឡាវ បានបង្ហាញនូវការប្ដេជ្ញាចិត្តបែបនេះ ក្នុងឱកាស សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អនុញ្ញាតចូលជួបម្តែងការគួរសម និងពិភាក្សាការងារនៅព្រឹកថ្ងៃទី១៧ ខែកុម្ភៈ ឆ្នាំ២០២៦នេះ នៅវិមានសាមគ្គីភាព រាជធានីភ្នំពេញ។ឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភានៃកម្ពុជា បានឱ្យដឹងនៅក្រោយជំនួបនេះថា ជាកិច្ចចាប់ផ្ដើម សម្ដេចតេជោ ហ៊ុន សែន បានសម្ដែងនូវក្ដីស្វាគមន៍យ៉ាងកក់ក្ដៅចំពោះឯកឧត្តម អនុរដ្ឋមន្ត្រីក្រសួងការពារប្រទេសឡាវ រួមទាំងប្រទេតិភូ ដែលបានអញ្ជើញមកបំពេញទស្សនកិច្ចនៅក្នុងព្រះរាជាណាចក្រកម្ពុជានាពេលនេះ។ សម្ដេចតេជោ បានចាត់ទុកដំណើរទស្សនកិច្ចរបស់ឯកឧត្តម អនុរដ្ឋមន្ត្រីក្រសួងការពារប្រទេសឡាវ រួមទាំងប្រទេតិភូមកកាន់ប្រទេសកម្ពុជានាក្នុងឱកាសនេះ នឹងជាចលករដ៏សំខាន់ក្នុងការជំរុញទំនាក់ទំនងទ្វេភាគីរវាងកម្ពុជា និងឡាវឱ្យកាន់តែរីកចម្រើនបន្ថែមទៀត ជាពិសេសទំនាក់ទំនងកងទ័ពនៃប្រទេសទាំងពីរកាន់តែស៊ីជម្រៅ។ ក្នុងឱកាសនោះ សម្ដេចតេជោ ក៏បានរំលេចអំពីព្រឹត្តិការណ៍កាលពីពេលថ្មីៗនេះ ថ្នាក់ដឹកនាំកំពូលរបស់ប្រទេសឡាវ គឺ ឯកឧត្តមបណ្ឌិត ថងលុន ស៊ីសុលីត(Thongloun Sisoulith) អគ្គលេខាធិការបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញមកបំពេញទស្សនកិច្ចនៅកម្ពុជា ដែលនេះជាចំណុចដ៏សំខាន់ជាការឆ្លុះបញ្ចាំងអំពីទំនាក់ទំនងដ៏ល្អរវាងកម្ពុជា និងឡាវនាពេលបច្ចុប្បន្ន។ នៅក្នុងឱកាសនោះឯកឧត្តមឧត្តមសេនីយ៍ឯក សាយចៃ គុមម៉ាស៊ីត អនុរដ្ឋមន្ត្រីក្រសួងការពារប្រទេសឡាវ បានសម្ដែងនូវការអរគុណជាអនេកដែលសម្ដេចតេជោបានអនុញ្ញាតឱ្យឯកឧត្តម និងប្រតិភូបានចូលជួបសម្ដែងការគួរសមនាឱកាសនេះ។ឯកឧត្តម បានលើកឡើងអំពីទំនាក់ទំនងដ៏ល្អរវាងប្រទេសកម្ពុជា និងឡាវ នាពេលបច្ចុប្បន្ន ជាពិសេសសង្គត់ធ្ងន់ទៅលើទំនាក់ទំនងវិស័យការពារជាតិ និងកងទ័ពរវាងប្រទេសទាំងពីរ ហើយឯកឧត្តមបានប្ដេជ្ញានៅចំពោះមុខសម្ដេចតេជោថា នឹងខិតខំប្រឹងប្រែងពូនជ្រំនៃទំនាក់ទំនងរវាងកងទ័ពប្រទេសទាំងពីរឱ្យកាន់តែរីកចម្រើនបន្តទៀត។ ឯកឧត្តម អនុរដ្ឋមន្ត្រីក្រសួងការពារប្រទេសឡាវ បានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរនៅតាមព្រំដែន ដែលជាព្រំដែនសន្ដិភាព សហប្រតិបត្តិការជាមួយគ្នា ហើយមាននូវសុខសន្ដិភាព សុវត្ថិភាពជាមួយគ្នាបានល្អតាមរយៈការសហការរវាងប្រទេសទាំងពីរកងទ័ព និងអាជ្ញាធរនៃប្រទេសទាំងពីរផងដែរ។ឆ្លៀតនៅក្នុងឱកាសនោះ ឯកឧត្តមឧត្តមសេនីយ៍ឯក សាយចៃ គុមម៉ាស៊ីត ក៏បានរាយការណ៍ជូនសម្ដេចតេជោ អំពីសកម្មភាពក៏ដូចជាកិច្ចសហប្រតិបត្តិការដែលឯកឧត្តមបានជួបពិភាក្សាជាមួយ ឯកឧត្តម អគ្គមេបញ្ជាការនៃកងយោធពលខេមរភូមិន្ទ រួមទាំងរដ្ឋមន្រ្ដីក្រសួងការពារជាតិកម្ពុជា ក្នុងពេលដែលឯកឧត្តមបានបំពេញទស្សនកិច្ចនៅព្រះរាជាណាចក្រកម្ពុជា ដែលជាកត្តាដ៏សំខាន់ក្នុងការដាក់ចេញនូវផែនការពង្រីកនូវទំនាក់ទំនងទ្វេភាគី ក្នុងក្របខណ្ឌនៃកងទ័ពកម្ពុជា និងកងទ័ពប្រជាជនឡាវ។ នៅក្នុងឱកាសនោះ សម្ដេចតេជោ បានសម្ដែងនូវក្ដីរីករាយក្រៃលែងចំពោះរបាយការណ៍ ក៏ដូចជាលទ្ធផលដែលឯកឧត្តមឧត្តមសេនីយ៍ឯក សាយចៃ គុមម៉ាស៊ីត បានបំពេញទស្សនកិច្ចនៅកម្ពុជា ហើយបានជួបពិភាក្សាជាមួយថ្នាក់ដឹកនាំជាន់ខ្ពស់នៃកងទ័ពរបស់កម្ពុជាដែលជាចំណុចដ៏សំខាន់ក្នុងការពង្រីកទំនាក់ទំនងកងទ័ពនៃប្រទេសទាំងពីរ។ សម្ដេចតេជោ ក៏បានជំរុញបន្ថែមឱ្យវិស័យការពារជាតិ និងកងទ័ពកម្ពុជា និងឡាវ ពង្រីកនូវការចែករំលែកបទពិសោធន៍ជាមួយគ្នា និងការបណ្ដុះបណ្ដាលនូវធនធានរវាងគ្នាទៅវិញទៅមកឱ្យកាន់តែផុលផុស និងមានចំនួនច្រើនជាងមុនតាមរយៈការផ្ដល់អាហាររូបករណ៍ជាដើមនៅក្នុងវិស័យការពារជាតិដើម្បីជាផ្នែកក្នុងការរុញច្រានក្នុងការបណ្ដុះបណ្ដាលមូលធនមនុស្សនៅក្នុងវិស័យការពារជាតិឱ្យកាន់តែរីកចម្រើនរវាងប្រទេសទាំងពីរ។ សម្ដេចតេជោ ក៏បានបង្ហាញនូវក្ដីរីករាយ និងបានឃើញនូវកិច្ចសហប្របត្តិបត្តិការដ៏ល្អនៅតាមព្រំដែនរវាងកម្ពុជា និងឡាវដែលមានមកជាមួយគ្នានាពេលកន្លងមក ហើយសម្ដេចសង្ឃឹមនឹងជំរុញបន្ថែមឱ្យអាជ្ញាធរ ក៏ដូចជាកងទ័ពនៃប្រទេសទាំងពីរធ្វើការជាមួយគ្នាបន្ថែមទៀតដើម្បីធ្វើយ៉ាងណារក្សានូវសន្ដិភាពសន្ដិសុខនៅតាមព្រំដែនឱ្យកាន់តែល្អប្រសើរបន្តទៀត៕

សមាគមមិត្តភាពកម្ពុជា-ចិន រៀបចំកម្មវិធីរាត្រីសមោសរ អបអរចូលឆ្នាំប្រពៃណីចិន និងជាសញ្ញានៃមិត្តភាពយ៉ាងជ្រាលជ្រៅនៃប្រទេសទាំងពីរ

ភ្នំពេញ៖ សមាគមមិត្តភាពកម្ពុជា-ចិន បានរៀបចំកម្មវិធីរាត្រីសមោសរ ចូលឆ្នាំប្រពៃណីចិន ឆ្នាំមមី ២០២៦ នាថ្ងៃទី១៦ ខែកុម្ភៈ ប្រព្រឹត្តទៅក្នុងបរិយាកាសអធិកអធម និងពោរពេញដោយស្នាមញញឹមនៃមិត្តភាព ក្រោមអធិបតីភាពរបស់ឯកឧត្តម ឯក សំអុល ឧត្តមប្រឹក្សាព្រះមហាក្សត្រ និងជាប្រធានសមាគមមិត្តភាពកម្ពុជា-ចិន ព្រមទាំង យុវជន ប្រទេសទាំងពីរ និងភ្ញៀវកិត្តិយស ចូលរួមយ៉ាងច្រើនកុះករ ។លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានឲ្យដឹងថា ក្រោយពេលដែលពិធីបុណ្យចូលឆ្នាំចិន ត្រូវបានចុះបញ្ជីជាបេតិកភណ្ឌវប្បធម៌អរូបី នៃមនុស្សជាតិ ដោយ UNESCO នាថ្ងៃទី៤ ខែធ្នូ ឆ្នាំ២០២៤ ពិធីបុណ្យដែលមានអាយុកាលជិ ត៤ពាន់ឆ្នាំនេះ កាន់តែមានវិសាលភាពសកល និងរួមចំណែកបង្កើនកម្លាំង ដល់កិច្ចកសាងសហគមន៍ជោគវាសនារួម នៃមនុស្សជាតិ។ឯកឧត្តម ឯក សំអុល ចាត់ទុកការជួបជុំគ្នានេះ មិនត្រឹមតែជាការអបអរសាទរពិធីបុណ្យវប្បធម៌ដ៏សំខាន់មួយរបស់ប្រជាជនចិនប៉ុណ្ណោះទេ ថែមទាំងជាសញ្ញា នៃមិត្តភាពជ្រាលជ្រៅ និងការតភ្ជាប់បេះដូងរវាងប្រជាជន និងប្រជាជនកម្ពុជា-ចិនទៀតផង។ឯកឧត្តមបន្តថា ក្រោមការដឹកនាំរបស់ថ្នាក់ដឹកនាំកំពូល នៃប្រទេសទាំងពីរ ទំនាក់ទំនងកម្ពុជា–ចិន ត្រូវបានលើកកម្ពស់ទៅជាសហគមន៍វាសនារួមកម្ពុជា-ចិនគ្រប់រដូវកាល ក្នុងយុគសម័យថ្មី ហើយកម្មវិធីនារាត្រីនេះ បានរំលេចកាន់តែច្បាស់ពីការតភ្ជាប់បេះដូង រវាងប្រជាជននៃប្រទេសយើងទាំងពីរ។ អំឡុងកម្មវិធីនាពេលនោះដែរ ក៏មានការចាក់បញ្ចាំងផ្ទាំងទស្សនីយភាព ផ្សាយផ្ទាល់ ព្រឹត្តិការណ៍ដ៏អស្ចារ្យអំពីការសម្តែងសិល្បៈដោយរួមបញ្ចូលនូវបច្ចេកវិទ្យាក្នុងទម្រង់ 8K+AI ព្រមទាំង បញ្ចេញឧត្តមភាពនៃការផ្សព្វផ្សាយជាភាសា ៨៥ភាសា ក្រោមកិច្ចខិតខំរបស់អគ្គស្ថានីយវិទ្យុ និងទូរទស្សន៍មជ្ឈិមចិន ដែលចាប់រាប់តាំងពី១៩៨៣មក។ ក្រៅពីនេះ ក៏មានការធ្វើនំគៀវរួមគ្នា និងសកម្មភាពកម្សាន្ត ដើម្បីអបអរសាទរបុណ្យឆ្នាំថ្មី របស់ចិនជាច្រើនទៀត ក្នុងបរិយាកាសយ៉ាងសប្បាយរីករាយ៕ អត្ថបទ បាន សុខរិទ្ធិ

ម្ចាស់សិប្បកម្មជាស្រ្តីកំពុងបង្កើនការផលិត រុញផលិតផលខ្មែរចូលទីផ្សារជំនួសការនាំចូលពីបរទេស

ម្ចាស់សិប្បកម្មជាស្រ្តី បាននិងកំពុងបង្កើនកិច្ចដំណើរការផលិត និងវេចខ្ចប់នៅក្នុងខ្សែច្រវាក់ផលិតកម្មរបស់ខ្លួន ដោយមានសម្ទុះ កើនឡើង៣ទៅ៤ដង បើធៀបមុនការផ្ទុះឡើងនូវជម្លោះព្រំដែន ដើម្បីផលិតរុញចូលទីផ្សារជំនួសការនាំចូល គាំទ្រ និងឆ្លើយតបដល់ការ ប្រើប្រាស់របស់ប្រជាពលរដ្ឋ។លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីកិច្ចដំណើរការ ផលិត វេចខ្ចប់ និងការផ្គត់ផ្គត់ទំនិញចូលទីផ្សាររបស់សហគ្រិនជាស្តី្រ នេះថា ជុំវិញផលិតផលក្នុងស្រុកឃើញថា ពីមួយឆ្នាំទៅមួយ មានការរីកចម្រើនគួរឱ្យកត់សម្គាល់ ខណៈដែលកម្ពុជាមានដៃគូរជាច្រើន ក្នុងការកសាងសមត្ថភាព ចំណេះ-ជំនាញ ដើម្បីត្រួសត្រាយ ផ្លូវ ផ្តល់ឱកាសដល់សហគ្រិន ជាពិសេសសហគ្រិនជាស្រ្តី មានឱកាសបង្ហាញផលិតផលរបស់ខ្លួន នៅទីផ្សារក្នុងស្រុកនិងការនាំចេញ។លោកជំទាវ បន្តថា ខណៈប្រជាពលរដ្ឋធ្វើពហិការ បន្ទាប់ពីការផ្ទុះឡើងនូវជម្លោះព្រំដែនកម្ពុជា-ថៃ សហគ្រិនជាស្រ្តីបានជួប បញ្ហាប្រឈមភ្លាមៗមួយចំនួនផងដែរដូចជា លទ្ធភាពនៅក្នុងដំណើរការផលិត និងដើមទុនសម្រាប់ពង្រីកអាជីវកម្មជាដើម។ តែទោះបី យ៉ាងណា នៅក្នុងបរិការណ៍ផ្លាស់ប្តូរនេះ សហគ្រិនជាស្រ្តីបានពង្រីកខ្លួននៅក្នុងដំណើរការផលិតបានទាន់ពេលវេលា ជាក់ស្តែងមកដល់ពេលនេះ ខ្សែច្រវាក់ផលិតកម្មជាច្រើន បាននិងកំពុងជំរុញការផលិត កើនឡើង ៣ ទៅ៤ដង ដើម្បីរុញចូលទីផ្សារផង និងបង្កើន ប្រាក់ចំណូលរបស់ខ្លួនផង ដែលនេះជាការចូលរួមចំណែក ដោយមិនត្រឹមផ្គត់ផ្គត់ផលិតផលជំនួសការនាំចូលប៉ុណ្ណោះទេ ថែមទាំង បង្កើតការងារ និងចូលរួមលើកកម្ពស់ដល់កសិករដែលជាអ្នកផ្គត់ផ្គត់វត្ថុធាតុដើមផងដែរ។សូមបញ្ជាក់ថា ជុំវិញផលិតផលខ្មែរនេះ នៅក្នុងកម្មវិធីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញ នូវយុទ្ធសាស្រ្តជំរុញការប្រើប្រាស់ផលិតផលខ្មែរនៅទីផ្សារក្នុងស្រុក និងទីផ្សារអន្តរជាតិ តាមរយៈការរៀបចំពិព័រណ៍ក្នុងស្រុក និងអន្តរ ជាតិនានា ព្រមទាំងជួយដល់វិស័យឯកជន ក្នុងការបង្កើតសភាពាណិជ្ជកម្មនៅតាមបណ្តារាជធានី-ខេត្ត និងបណ្តាសភាពាណិជ្ជកម្ម នៅក្រៅប្រទេសដូច ការបង្កើតសមាគមតាមមុខរបរ និងផលិតផល ដើម្បីចូលរួមចំណែកខ្សែច្រវាក់ផ្គត់ផ្គង់ និងចាប់យកឱកាស ពាណិជ្ជកម្មជាដើម៕ អត្ថបទ៖ សុន រ៉ាឌី

ធុរជនចិនដាក់ទិសដៅផលិតអាហារហាឡាល់ (Halal) នៅកម្ពុជាដើម្បីនាំចេញ

អ្នកវិនិយោគនៃប្រទេសចិន បានចាប់អារម្មណ៍ចំពោះប្រទេសកម្ពុជា ក្នុងការផលិតអាហារប្រភេទហាឡាល់ បែបអាហារចិន ដែលអាចបរិភោគបានទាំងជនជាតិ ដែលជាសាសនិកឥស្លាម និងជនជាតិផ្សេងៗទៀត ដើម្បីនាំចេញទៅកាន់ទីផ្សារអន្តរជាតិ ខណៈបច្ចុប្បន្នបានចាប់ផ្ដើម ផលិតសម្រាប់ទីផ្សារក្នុងស្រុកខ្មែរ។ក្នុងឱកាសដាក់ឲ្យដំណើរការការផលិតអាហារហាឡាល់របស់ណាហ្វីអឺ អ៊ិនដាស្ទ្រី នៅតំបន់ជ្រោយចង្វារកាលពីរសៀលថ្ងៃទី១៦ ខែកុម្ភៈ ឆ្នាំ២០២៦ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានមានប្រសាសន៍ថា នេះគឺជាជោគជ័យមួយបន្ថែមទៀត សម្រាប់ប្រទេសកម្ពុជា ដែលមានធុរជនពីបរទេស មកផលិតចំណីអាហារនៅក្នុងស្រុក ហើយគ្រោងនាំចេញទៅកាន់ទីផ្សារអន្តរជាតិ ជាប្រភេទអាហារមានលក្ខណៈស្ដង់ដារអន្តរជាតិ ហើយអាហារប្រភេទនេះ សម្រាប់សាសនិកឥស្លាមនៅកម្ពុជា កំពុងរងចាំជាយូរមកហើយ ។ឯកឧត្តមទេសរដ្ឋមន្ត្រី បានបន្តថា ជាការពិតស្របពេលជាប្រទេស ដែលមានសុខដុមនីយកម្មនៃសាសនា និងជាតិសាសន៍នានា គឺកម្ពុជាមានលំហូរនូវភ្ញៀវទេសចរជាច្រើន បូករួមទាំងទេសចរណ៍នៃសាសនិកឥស្លាម ហើយក៏មានថ្នាក់ដឹកនាំនៃប្រទេសនៅតំបន់អារ៉ាប់ជាច្រើន ក៏បានអញ្ជើញមកទស្សនកិច្ចនៅកម្ពុជាជាបន្តបន្ទាប់ ដែលនេះបានបង្ហាញថា កម្ពុជាបានត្រៀមខ្លួនរួចរាល់។ឯកឧត្តមបណ្ឌិត អូស្មាន ហាស្សាន់ បានបង្ហាញការគាំទ្រ ចំពោះគម្រោងរបស់ណាហ្វីអឺ ដែលគ្រោងយកកម្ពុជា ដើម្បីផលិតអាហារហាឡាល់ ប្រភេទប្រហិតនេះ ទៅកាន់ទីផ្សារអន្តរជាតិ ដែលជាការពង្រីកបន្ថែមនូវការវិនិយោគ និងឱកាសការងារក្នុងស្រុក និងជួយជំរុញកំណើនសេដ្ឋកិច្ចកម្ពុជា។លោក ម៉ា បាវ (Ma Biao) នាយកក្រុមហ៊ុនណាហ្វីអឺ បានឲ្យដឹងថា ការបោះទុនវិនិយោគនៅកម្ពុជានេះ មិនមែនដើម្បីតែប្រាក់ចំណេញនោះទេ គឺជាការចូលរួមអភិវឌ្ឍន៍សេដ្ឋកិច្ចនៅកម្ពុជាជាយូរអង្វែងទៅខាងមុខ ក៏ដូចជាបង្កើតឱកាសការងារដល់ប្រជាពលរដ្ឋខ្មែរ ដើម្បីមានប្រាក់ចំណូលបន្ថែម។លោកបានបន្តថា មួយវិញទៀត ការសម្រេចចិត្តបោះទុនវិនិយោគនៅក្នុងប្រទេសកម្ពុជា គឺក្រោយពីការវាយតម្លៃអស់រយៈពេលវែង ឆ្លើយតបទៅនឹងតម្រូវការរបស់កម្ពុជាជាយូរមកហើយនោះ លើប្រភេទអាហារហាឡាល់ ជាមួយនឹងស្ដង់ដារគុណភាពមិនមានការប្រែប្រួល ដោយប្រកាន់ខ្ជាប់នូវបទបញ្ញត្តិហាឡាល់ និងសុវត្ថិភាពចំណីអាហារពិភពលោក ។ លោក ម៉ា បាវ (Ma Biao) បានគូសបញ្ជាក់ថា ទីតាំងផលិតអាហារហាឡាល់បែបចិននេះ នឹងមិនត្រឹមជាទីតាំងផលិតអាហារប៉ុណ្ណោះទេ ដោយនៅពេលអនាគតនឹងអាចឲ្យមហាជនបណ្ដុះទេពកោសល្យ ការងារ និងផ្សារភ្ជាប់នឹងទីផ្សារផងដែរ ។គួរបញ្ជាក់ថា ក្រោយពីដាក់ឲ្យដំណើរការនូវព្រលានយន្តហោះថ្មី កម្ពុជាបានភ្ជាប់ជើងហោះហើរជាច្រើនខ្សែ ជាមួយបណ្ដាប្រទេសនៅតំបន់អារ៉ាប់ និងប្រទេសមួយចំនួនទៀត ដែលធ្វើឲ្យកំណើននៃភ្ញៀវទេសចរ នៃសាសនិកឥស្លាម មកលេងកម្សាន្តនៅកម្ពុជាកើនឡើង គួរឲ្យកត់សម្គាល់ផងដែរ៕ អត្ថបទ បាន សុខរិទ្ធិ

កម្ពុជា-ជប៉ុន ពង្រឹងកិច្ចសហប្រតិបត្តិការឆ្លើយតបការប្រែប្រួលអាកាសធាតុ និងការគ្រប់គ្រងសំណល់ផ្អែកលើយន្តការឥណទានរួម (Joint Credit Mechanism - JCM)

កម្ពុជា-ជប៉ុន បានពង្រឹងកិច្ចសហប្រតិបត្តិការរួមគ្នា ឆ្លើយតបនឹងការប្រែប្រួលអាកាសធាតុ និងការគ្រប់គ្រងសំណល់ ដោយផ្អែកលើយន្តការឥណទានរួម (JCM)។ ខ្លឹមសារនេះ បានធ្វើឡើងនៅក្នុងជំនួបទ្វេភាគីរវាងឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានកម្ពុជា ជាមួយ ឯកឧត្តម ISHIHARA Hirotaka រដ្ឋមន្ត្រីក្រសួងបរិស្ថានជប៉ុន នារសៀលថ្ងៃទី១៦ ខែកុម្ភៈ ឆ្នាំ២០២៦ នៅទីក្រុងតូក្យូ ប្រទេសជប៉ុន។ការជំរុញឱ្យកម្ពុជាសម្រេចបាននូវការអភិវឌ្ឍប្រកបដោយចីរភាព និងកាបូនទាប ក្រោមកិច្ចសហប្រតិបត្តិការទ្វេភាគីកម្ពុជា-ជប៉ុន។ ភាគីទាំងពីរបានយល់ស្របជាមួយគ្នាលើចំណុចទាំង៦ ដែលរួមមាន ទី១.យន្តការឥណទានរួម(JCM) ដែលមានស្រាប់ និងគម្រោងផ្នែកជីវម៉ាស ទី២ សកម្មភាពឆ្លើយតបនឹងការប្រែប្រួលអាកាសធាតុក្នុងក្របខណ្ឌអាស៊ាន ទី៣ ការគាំទ្រលើផែនការជាតិ ការបន្ស៊ាំនឹងការប្រែប្រួលអាកាសធាតុជាពិសេសប្រព័ន្ធព្រមានជាមុន(Early Warning System) ទី៤ គឺការកែច្នៃសំរាម-សំណល់ឡើងវិញ និងការទាញយកថាមពលអគ្គីសនីពីសំណល់ ទី៥ ការផ្សព្វផ្សាយព័ត៌មានអំពីផលប៉ះពាល់នៃសំរាម-សំណល់ ការផលិតថង់ជីវម៉ាសងាយបំបែកធាតុ និងទី៦ ការផ្លាសប្តូរបទពិសោធន៍លើការគ្រប់គ្រងឧទ្យានជាតិ។សូមជម្រាបជូនថា យន្តការឥណទានរួម (Joint Credit Mechanism - JCM) គឺជាកិច្ចសហប្រតិបត្តិការរវាងរដ្ឋាភិបាលកម្ពុជា និងរដ្ឋាភិបាលជប៉ុន ដែលបានចុះហត្ថលេខា កាលពីថ្ងៃទី១១ ខែមេសា ឆ្នាំ២០១៤ កន្លងទៅ ក្នុងគោលបំណងសំខាន់ គឺដើម្បីជំរុញការវិនិយោគ និងការដាក់ឱ្យប្រើប្រាស់នូវបច្ចេកវិទ្យា ផលិតផល ប្រព័ន្ធ សេវាកម្ម និងហេដ្ឋារចនាសម្ព័ន្ធដែលមានកាបូនទាប៕

បណ្ដាញសង្គម

ព័ត៌មានថ្មីៗ

មេដឹកនាំប្រឆាំងវ៉េណេស៊ុយអេឡា ធ្វើដំណើរទៅទស្សនកិច្ចសហរដ្ឋអាមេរិក បន្ទាប់ពីពិភាក្សាជាមួយរដ្ឋាភិបាលបណ្ដោះអាសន្ន

ប្រទេសន័រវែសស្វែងរកការហាមឃាត់ការធ្វើពាណិជ្ជកម្មជាមួយនឹងអ្នកតាំងលំនៅឋានអ៊ីស្រា អែលខុសច្បាប់

ជនអន្តោប្រវេសន៍នីហ្សេរីយ៉ាដែលវិលត្រឡប់មកពីអាហ្វ្រិកខាងត្បូង កំពុងប្រឈមនឹងបញ្ហាសេដ្ឋកិច្ច

មេដឹកនាំសហភាពអឺរ៉ុបឯកភាពគ្នាបន្តទណ្ឌកម្មលើប្រទេសរុស្ស៊ីរយៈពេលមួយឆ្នាំទៀត

មន្ត្រីជាន់ខ្ពស់៖ អ៊ីរ៉ង់មិនដកពីការចរចាអំពីបទឈប់បាញ់នៅប្រទេសលីបង់ជាមួយអាមេរិកទេ

WHOនិយាយថា ការផ្ទុះឡើងនៃជំងឺអេបូឡានៅកុងហ្គោបានឆ្លងដល់គ្រូពេទ្យចំនួន ៧៥នាក់ ចាប់តាំងពីខែឧសភាមក

ការវាយប្រហាររបស់អ៊ីស្រាអែលនៅទូទាំងលីបង់បណ្តាលឲ្យមនុស្សយ៉ាងតិច ៤៧នាក់ ស្លាប់ និង ៩៧នាក់រងរបួស

ជនជាតិចិន១៦៤នាក់ពាក់ ព័ន្ធករណី Online Scams ត្រូវបានបណ្ដេញចេញពីកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ពលរដ្ឋជាប់សែចិនកុះករនាំគ្នាបួងសួងសុំលាភជ័យ និងសុខសន្តិភាព​នៅ​វិហារ​អ្នកតាចិន​ក្រុងតាខ្មៅ