BTV NEWS

កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦

ឱកាសការងារ ៣៥៥០កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវបាននាំយកទៅផ្សព្វផ្សាយជូនពលរដ្ឋដល់មូលដ្ឋានខេត្តសៀមរាប

វិស័យរដ្ឋបញ្ជាក់ពីការប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់ និងនីតិវិធីគយដល់វិស័យ SMEs

សមត្ថកិច្ចរាជធានីភ្នំពេញ បន្តត្រួតពិនិត្យទីតាំងស្នាក់នៅប្រមូលផ្ដុំ ដើម្បីស្វែងរក និងបោសសម្អាតបទល្មើស Online Scams

ព័ត៌មានជាតិ

អាជ្ញាធរបង្កើនការត្រួតពិនិត្យទីតាំងនានាដើម្បីទប់ស្កាត់ និងបង្ក្រាបឧក្រិដ្ឋកម្មឆបោកតាមអនឡាញ

កម្លាំងអាជ្ញាធរមានសមត្ថកិច្ចនៅតាមថ្នាក់មូលដ្ឋាន បាននិងកំពុងបន្តបង្កើនការចុះត្រួតពិនិត្យជាប្រចាំទៅលើទីតាំងជួលការស្នាក់នៅនានាសម្រាប់ជនបរទេស ដើម្បីតាមដានលើឧក្រិដ្ឋកម្មឆបោកតាមប្រព័ន្ធបច្ចេកវិទ្យា ។ ដើម្បីជាការឆ្លើយតប ក្រោយការទទួលបានបទបញ្ជាដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី កងកម្លាំងអាជ្ញាធរមានសមត្ថកិច្ចនៅគ្រប់ជាន់ថ្នាក់ ទាំងថ្នាក់ជាតិ និងរដ្ឋបាលក្រោមជាតិ បាននិងកំពុងបន្តការយកចិត្តទុកដាក់ខ្ពស់ក្នុងយុទ្ធនាការទប់ស្កាត់ និងបង្ក្រាបឲ្យមានប្រសិទ្ធភាពខ្ពស់ លើបទល្មើសឧក្រិដ្ឋកម្មឆបោកតាមប្រព័ន្ធបច្ចេកវិទ្យា ( Online Scams ) ។ យុទ្ធនាការ នៃការចុះរដ្ឋបាលត្រួតពិនិត្យនេះ គឺតែងបានធ្វើឡើងជារឿយៗទៅតាមទីតាំងជួលការស្នាក់នៅតាមទីតាំងផ្ទះជួល ,អគារបន្ទប់ជួល , អគារខុនដូរ , ផ្ទះសំណាក់ និងសណ្ឋាគារនានា ដើម្បីធ្វើបច្ចុប្បន្នភាពកំណត់ឲ្យបានច្បាស់អំពីការរស់នៅដោយស្របច្បាប់ត្រឹមត្រូវរបស់ជនបរទេសទាំងឡាយ ជៀសវៀងការស្នាក់នៅដោយលួចលាក់ប្រព្រឹត្តិឧក្រិដ្ឋកម្មឆបោកតាមប្រព័ន្ធបច្ចេកវិទ្យា។ ពលរដ្ឋ បង្ហាញនូវការគាំទ្រខ្ពស់ ចំពោះវិធានការដ៏ម៉ឺងម៉ាត់ ក្នុងការកម្ទេចបទល្មើសឧក្រិដ្ឋទាំងឡាយដែលបានបង្កអសន្តិសុខ និងអស្ថេរភាពដល់ប្រទេសជាតិ ។ ពលរដ្ឋ មិនចង់ឲ្យកម្ពុជា ក្លាយជាជម្រក នៃបទល្មើសឧក្រិដ្ឋទាំងឡាយនោះទេ ពោលចង់ឲ្យកម្ពុជាលេចមុខលេចមាត់នៅឆាកអន្តរជាតិ តាមរយៈលទ្ធផលវិជ្ជមានជាច្រើន ដូចជាវប្បធម៌ ទំនៀមទំលាប់ ប្រពៃណី សន្តិភាព ក៏ដូចជាការអភិវឌ្ឍន៍ជាដើម ។ គួរបញ្ជាក់ថា ការចុះរដ្ឋបាលពិនិត្យជាប្រចាំនេះ ក៏មានការសហការចូលរួមល្អ ពីតាមបណ្តាម្ចាស់ទីតាំងពាក់ព័ន្ធទាំងអស់ផងដែរ ដើម្បីឲ្យដំណើរការ ទប់ស្កាត់ និងបង្ក្រាបឧក្រិដ្ឋឆបោកនេះ កាន់តែមានប្រសិទ្ធភាពខ្ពស់។ ទន្ទឹមនឹងនោះដែរ សមត្ថកិច្ច ស្នើដល់ម្ចាស់អាជីវកម្មជួលការស្នាក់នៅទាំងអស់ សូមកុំចូលដៃចូលជើងពាក់ពាក់ព័ន្ធបទល្មើសទាំងនេះឲ្យសោះ ក្នុងករណីប្រសិនបើរកឃើញថាមានការគប់គិតគ្នា នោះសមត្ថកិច្ចនឹងចាត់វិធានការច្បាប់ជាធរមាន ដោយមិនលើកលែងនោះឡើយ៕ អត្ថបទ៖ លីហេង

សម្តេចព្រះមហាក្សត្រី នរោត្តម មុនិនាថ សីហនុ ប្រោសព្រះរាជទានព្រះរាជទ្រព្យ ១០ម៉ឺនដុល្លារ ដល់ស៊ីម៉ាក់

ភ្នំពេញ៖ មជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) ទទួលបានការ សព្វព្រះរាជហឫទ័យពី សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ប្រោសព្រះរាជទានព្រះរាជទ្រព្យ ១០ម៉ឺនដុល្លារ ដើម្បីប្រើប្រាស់ក្នុងសកម្មភាពបោសសម្អាតមីន។ឯកឧត្តម ហេង រតនា អគ្គនាយកស៊ីម៉ាក់ កាលពីថ្ងៃទី៣កុម្ភៈ បានគូសបញ្ជាក់ថា ព្រះរាជអំណោយរបស់សម្ដេចព្រះមហាក្សត្រី ព្រះវររាជមាតាជាតិខ្មែរ នាពេលនេះ ក៏ដូចជាពេលកន្លងមក ទាំងព្រះរាជអំណាយជាថវិកា និងជាសម្ភារ បានចូលរួមចំណែកយ៉ាងសំខាន់ក្នុងការកាត់បន្ថយអត្រាគ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះសំណល់សង្គ្រាម។ឯកឧត្តម ហេង រតនា បន្តថា ជាពិសេសព្រះរាជអំណោយរបស់ទ្រង់ បានបង្ហាញពីព្រះរាជហឫទ័យទុកដាក់ខ្ពស់បំផុតដល់កងកម្លាំងទាំងអស់នៃអង្គភាពស៊ីម៉ាក់ ដែលកំពុងបំពេញប្រតិបត្តិការបោសសម្អាតគ្រាប់មីន សំណល់យុទ្ធភណ្ឌសង្គ្រាមចាស់ និងសំណល់យុទ្ធភណ្ឌសង្គ្រាមបន្សល់ទុកដោយយោធាសៀមឈ្លានពានថ្មីៗនេះ។ សូមរំឭកថា កាលពីដើមខែកញ្ញា ឆ្នាំ២០២៥ កន្លងទៅ សម្តេចព្រះមហាក្សត្រីព្រះវររាជមាតាជាតិខ្មែរ ទ្រង់សព្វព្រះរាជហឫទ័យ ប្រោសព្រះរាជទានព្រះរាជទ្រព្យចំនួន២ម៉ឺនដុល្លារស៊ីម៉ាក់រួចមកហើយ៕

ពលរដ្ឋភៀសសឹកមានភាពកក់ក្ដៅ ចំពោះការមើលថែរបស់រាជរដ្ឋាភិបាល ក្នុងការផ្តល់ដីលំនៅឋានថ្មី

នៅព្រឹកថ្ងៃទី ៣ ខែកុម្ភៈ ឆ្នាំ២០២៦នេះ ប្រជាពលរដ្ឋដែលកំពុងបន្តស្នាក់នៅជាបណ្តោះអាសន្ន ក្នុងជំរំសុវត្ថិភាព ក្នុងភូមិសាស្រ្តខេត្តបន្ទាយមានជ័យ បានសម្តែងក្តីសង្ឃឹមជឿជាក់យ៉ាងមុតមាំ និងថ្លែងអំណរអរគុណលើការដឹកនាំរបស់ប្រមុខរាជរដ្ឋាភិបាលសម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលបានផ្តល់ដីលំនៅឋាន ជាជម្រកថ្មីរស់នៅបណ្តោះអាសន្នជូនបងប្អូនដែលភៀសសឹកទាំងអស់នៅពេលនេះ ដែលមិនអាចទាន់បានវិលត្រឡប់ចូលទៅលំនៅឋានរបស់ខ្លួនវិញ ។ប្រជាពលរដ្ឋភៀសសឹករូបនេះ បានបន្តទៀតថា ដោយសារតែការឈ្លានពានរបស់ទាហានសៀមធ្វើការបាញ់ប្រហារមកលើភូមិឋានរស់នៅរបស់ពួកគាត់ ក្បែរតំបន់ព្រំដែនដោយគឃ្លើនយ៉ាងសាហាវព្រៃផ្សៃរំលោភចូលអធិបតេយ្យភាពកម្ពុជាដោយមិនគោរពច្បាប់អន្តរជាតិនោះឡើយ ។សកម្មភាពទាំងអស់នេះហើយ ធ្វើឲ្យពលរដ្ឋកម្ពុជាទាំងចាស់ ទាំងក្មេង ត្រូវបង្ខំចិត្តចាកចេញពីលំនៅឋាន និងផ្ទះសម្បែងរបស់ខ្លួនជាច្រើនកន្លែងត្រូវបានក្រុមទាហានសៀមធ្វើការកម្ទេចបំផ្លាញរបស់បងប្អូនប្រជាពលរដ្ឋស៊ីវិលស្លូតត្រង់កម្ពុជាផងដែរ៕ អត្ថបទ៖ ឃិន សារិទ្ធ

ក្រសួងទេសចរណ៍ រៀបចំព្រាងខ្សែទស្សនកិច្ច CLUSTER វៃឆ្លាតទាក់ទាញភ្ញៀវទេសចរអន្តរជាតិស្នាក់នៅយូរ

ក្រសួងទេសចរណ៍ និងក្រុមអ្នកជំនាញ បានរួមគ្នាបង្កើតខ្សែទស្សនកិច្ច CLUSTER វៃឆ្លាត ដើម្បីបង្កើនតម្លៃបន្ថែម និងទាក់ទាញភ្ញៀវទេសចរអន្តរជាតិមកទស្សនាកម្ពុជា មានឱកាសស្នាក់នៅយូរ និងជំរុញផ្តល់ប្រភពចំណូលជូនសហគមន៍ ពលរដ្ឋនានាដែលប្រកបរបរពឹងអាស្រ័យវិស័យទេសចរណ៍។នៅក្នុងសន្និបាតបូកសរុបលទ្ធផលការងារវិស័យទេសចរណ៍ឆ្នាំ២០២៥ និងលើកទិសដៅអនុវត្តបន្តសម្រាប់ឆ្នាំ២០២៦ ឯកឧត្តម នី ផល្លី រដ្ឋលេខាធិការក្រសួងទេសចរណ៍ បានថ្លែងប្រាប់BTV នៅថ្ងៃទី៤ ខែកុម្ភៈនេះ ថាមកដល់ពេលនេះ ក្រសួងទេសចរណ៍ បានរៀបចំសេចក្តីព្រាងខ្សែទស្សនកិច្ច CLUSTER វៃឆ្លាត បានប្រមាណ១០០កញ្ចប់ខ្សែទស្សនកិច្ច ហើយក៏មានក្រុមហ៊ុន ការីទេសចរណ៍មួយចំនួនបានយកទៅអនុវត្ត និងបន្តផ្សព្វផ្សាយលក់ទៅក្រៅប្រទេសរួចហើយ ហើយបច្ចុប្បន្នក្រសួងក៏កំពុងពិនិត្យពិភាក្សាកែសម្រួល សេចក្តីព្រាងខែ្សទស្សនកិច្ច CLUSTER ផ្សេងៗទៀត ដើម្បីបង្កើនការផ្តល់នូវភាពប្រទាក់ក្រឡាគ្នាពីគោលដៅទេសចរណ៍មួយទៅគោលដៅទេសចរណ៍មួយទៀត ចំណាយពេលស្នាក់នៅដើរកម្សាន្តរយៈពេលយូរ និងធានាបាននូវភាពទាក់ទាញម្តងទៀតហើយម្តងទៀត។ក្រុមអ្នកជំនាញ បានលើកឡើងដែរថា កញ្ចប់ខ្សែទស្សនកិច្ចទស្សនាកម្ពុជា ដែលភ្ញៀវទេសចរអន្តរ ជាតិទិញ ភាគច្រើនគឺមានរយៈពេលតែ៣ទៅ៤ថ្ងៃ ហើយការជំរុញបង្កើតខ្សែទស្សនកិច្ច CLUSTER វៃឆ្លាត ចំណាយពេលវេលាស្នាក់នៅយូរ ១០ថ្ងៃ ដែលមានពង្រីកគោលដៅដើរកម្សាន្តច្រើនកន្លែង មានភាពប្រទាក់ប្រឡាគ្នា និងមានភាពទាក់ទាញ។សូមបញ្ជាក់ថា នៅក្នុងសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅអនុវត្តបន្ត ឆ្នាំ០២២៦ រយៈពេល២ថ្ងៃ ចាប់ពីថ្ងៃទី៣ ដល់ថ្ងៃទី៤ ខែកុម្ភៈ នេះ គឺមានប្រធានបទគន្លឹះចំនួន៩ ដែលក្រុមអ្នកជំនាញបើកការពិភាក្សាដោះស្រាយ និងប្រមូលធាតុចូល ជំរុញការអនុវត្តដើម្បីទាក់ទាញទេសចរទស្សនា រួមមានៈ ការជំរុញការពង្រឹងគុណភាពសេវាកម្មទេសចរណ៍៖ ពីស្តង់ដាទៅភាពជឿជាក់ និងការវិលត្រឡប់ មកវិញរបស់ភ្ញៀវ, ការបង្កើតខែ្សទស្សនកិច្ច CLUSTER វៃឆ្លាត, យុទ្ធនាការទស្សនាកម្ពុជា រដូវកាលបៃតង, ការ ទូតទេសចរណ៍ និងម្ហូបអាហារ, យុទ្ធសាស្ត្រទីផ្សារ និងផ្សព្វផ្សាយទេសចរណ៍កម្ពុជា និងប្រធានបទ បរិវត្តកម្ម ទេសចរណ៍ឌីជីថល៖ ទិសដៅថ្មី សម្រាប់បង្កើនការប្រកួតប្រជែងជាដើម៕ អត្ថបទ៖ ស៊ុម សុខជា

សម្តេចប្រធានរដ្ឋសភា និងឯកឧត្តមប្រធានព្រឹទ្ធសភាប៉ាគីស្ថាន ប្តេជ្ញាពង្រឹងកិច្ចសហប្រតិបត្តិការសភាប្រទេសទំាងពីរ ដើម្បីលើកកម្ពស់ផលប្រយោជន៍ប្រជាពលរដ្ឋ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និង ឯកឧត្តម ស៊ីយ៉េដ យូសាហ្វ រ៉ាហ្ស៉ា ហ្គីឡានី (Syed Yusaf Raza Gilani) ប្រធានព្រឹទ្ធសភានៃសាធារណរដ្ឋអ៊ីស្លាមប៉ាគីស្ថាន បានប្តេជ្ញាចិត្តរួមគ្នានៅក្នុងការលើកកម្ពស់ពង្រឹងកិច្ចសហប្រតិបត្តិការទំនាក់ទំនងប្រជាជននៃប្រទេសទំាងពីរឱ្យកាន់តែជិតស្និទ្ធឡើង ស្របតាមចំណងមិត្តភាព កិច្ចសហប្រតិបត្តិការដ៏ល្អរវាងប្រទេសទំាងពីរ ដែលបានឈរយ៉ាងរឹងមាំ ឈ្មោះត្រង់ ជឿទុកចិត្តគ្នា ក្នុងការស្វែងរកផលប្រយោជន៍ជូនពលរដ្ឋទំាងសងខាង។សម្តេចរដ្ឋសភាធិបតី ឃួន សុដារី បានជួបពិភាក្សាការងារជាមួយ ឯកឧត្តម ស៊ីយ៉េដ យូសាហ្វ រ៉ាហ្ស៉ា ហ្គីឡា នៅព្រឹកថ្ងៃទី៤ ខែកុម្ភៈឆ្នាំ២០២៦ នៅវិមានរដ្ឋសភា នៅក្នុងពេល ឯកឧត្តមប្រធានព្រឹទ្ធសភា បានដឹកនាំគណៈប្រតិភូបំពេញទស្សនកិច្ចផ្លូវការនិងមិត្តភាពនៅកម្ពុជា តបតាមការអញ្ជើញរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា។សម្ដេចរដ្ឋសភាធិបតី ឃួន សុដារី បានសម្ដែងនូវការស្វាគមន៍ដោយក្តីរីករាយចំពោះវត្តមានឯកឧត្តមប្រធានព្រឹទ្ធសភា និងបានចាត់ទុកវត្តមាន ឯកឧត្តមនៅកម្ពុជាជាផ្នែកដ៏សំខាន់ក្នុងការធ្វើឱ្យទំនាក់ទំនងរវាងប្រទេសទាំងពីរកាន់តែរីកចម្រើនបន្ថែមទៀត ទាំងក្នុងក្របខ័ណ្ឌស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ។សម្តេចប្រធានរដ្ឋសភា បានអបអរសាទរចំពោះភាពជោគជ័យថ្មីៗនេះរបស់ប៉ាគីស្ថាន ដែលបានរៀបចំនូវសន្និសីទ ប្រធានសភានៃអន្តរសភា(ISC) កាលពីខែវិច្ឆិកាកន្លងទៅ ដែលសន្និសីទនេះក៏បានចេញសេចក្តីប្រកាសគំាទ្រចំពោះកិច្ចព្រមព្រៀងសន្តិភាពកម្ពុជា-ថៃ និងបានជំរុញឱ្យភាគីទំាងពីរ អនុវត្តកិច្ចព្រមព្រៀងនោះ ឱ្យមានប្រសិទ្ធភាពខ្ពស់ក្នុងការដោះស្រាយជម្លោះព្រំដែនរវាងគ្នា។ ឯកឧត្តមប្រធានព្រឹទ្ធសភាប៉ាគីស្ថានបានសម្ដែងនូវការអរគុណចំពោះសម្តេចប្រធានរដ្ឋសភា ដែលបានទទួលស្វាគមន៍ដ៏កក់ក្តៅជូនគណៈប្រតិភូនាឱកាសនេះ ជាពិសេសឯកឧត្តមបានអរគុណសម្ដេចតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងពលរដ្ឋកម្ពុជា ទំាងអស់ដែលបានទទួលស្វាគមន៍គណៈប្រតិភូព្រឹទ្ធសភាប៉ាគីស្ថានយ៉ាងកក់ក្តៅជាទីបំផុតចាប់តំាងពេលអញ្ជើញដល់កម្ពុជា។ ឯកឧត្តមប្រធានព្រឹទ្ធសភាបានវាយតម្លៃខ្ពស់ចំពោះការរីកចម្រើនគ្រប់វិស័យនៅកម្ពុជា និងបានគូសបញ្ជាក់ថា ឯកឧត្តមបានអញ្ជើញមកកាន់ប្រទេសកម្ពុជា ចំនួន៣លើករួចមកហើយ ពោលគឺតាំងពីឆ្នាំ២០១៩ បន្ទាប់មកនៅឆ្នាំ២០២៣ ដែលពេលនោះឯកឧត្តមក៏បានអញ្ជើញចូលរួមក្នុងការសង្កេតការណ៍បោះឆ្នោតនៅកម្ពុជា និងលើកទី៣នេះ ជាដំណើរទស្សនកិច្ចក្នុងនាមឯកឧត្តមជាប្រធានព្រឹទ្ធសភាប៉ាគីស្ថាន។ សម្ដេចប្រធានរដ្ឋសភានិងឯកឧត្តមប្រធានព្រឹទ្ធសភាប៉ាគីស្ថានក៏បានពិភាក្សាបន្ថែមទៀតទៅលើការជំរុញ និងពង្រីកកិច្ចសហប្រតិបត្តិការ រវាងរដ្ឋសភាកម្ពុជានិងព្រឹទ្ធសភាប៉ាគីស្ថាន ក្នុងការលើកកម្ពស់ទំនាក់ទំនងប្រជាជននៃប្រទេសទំាងពីរឱ្យកាន់តែជិតស្និទ្ធ ដែលជាមូលដ្ឋានគ្រឹះក្នុងការឈានដល់ការពង្រីកកិច្ចសហប្រតិបត្តិការបន្ថែមទៀតនៅលើវិស័យនានា មានដូចជាវិស័យពាណិជ្ជកម្ម ទេសចរណ៍ អប់រំ វប្បធម៌ បច្ចេកវិទ្យាព័ត៍មាន និងកសិកម្មជាដើម។ រដ្ឋសភាកម្ពុជានិងព្រឹទ្ធសភាប៉ាគីស្ថាន នឹងជំរុញឱ្យមានកិច្ចសហប្រតិបត្តិការ និងការផ្លាស់ប្តូរដំណើរទស្សនកិច្ចគ្នាទៅវិញទៅមក ទំាងកម្រិតថ្នាក់ដឹកនាំកំពូល ក្រុមមិត្តភាពនិងកម្រិតអគ្គលេខាធិការដ្ឋាន។ ថ្នាក់ដឹកនាំសភាប្រទេសទំាងពីរបានឯកភាពគ្នាពីសារៈសំខាន់នៅក្នុងការគោរពច្បាប់អន្តរជាតិ ការគោរព ឱ្យតម្លៃគ្នាទៅវិញទៅមក ដើម្បីផលប្រយោជន៍រួម ជំរុញសុខសន្តិភាព វិបុលភាពមនុស្សជាតិ។ មិនថាទេសតូច ឬប្រទេសធំនោះទេ ត្រូវគោរពអធិបតេយ្យភាពគ្នានិងឱ្យតម្លៃគ្នាទៅវិញទៅមក។ សម្តេចប្រធានរដ្ឋសភា បានស្នើផងដែរសុំឱ្យប៉ាគីស្ថានពិចារណានៅក្នុងការផ្សារភ្ជាប់ជើងហោះហើរត្រង់រវាងប្រទេសទំាងពីរ។សម្តេចរដ្ឋសភាធិបតីឃួន សុដារី បានជម្រាបជូនឯកឧត្តមប្រធានព្រឹទ្ធសភាប៉ាគីស្ថានថាសម្តេចតេជោ ហ៊ុន សែន បានទទួលយកសំណើរបស់ឯកឧត្តមប្រធានព្រឹទ្ធសភានៅក្នុងការទទួលរៀបចំសន្និសីទ ប្រធានសភានៃអន្តរសភាលើកទី២ នៅក្នុងឆ្នាំ២០២៦នេះ។ ថ្នាក់ដឹកនាំសភាប្រទេសទំាងពីរបានវាយតម្លៃខ្ពស់ចំពោះ សន្និសីទ ប្រធានសភានៃអន្តរសភា ថាជាវេទិកាអន្តរសភាមួយដ៏មានសារៈសំខាន់នៅក្នុងការលើកកម្ពស់វប្បធម៌សន្ទនា ការកសាងទំនុកចិត្តនិងការយោគយល់គ្នាដើម្បីផលប្រយោជន៍រួម នៅក្នុងកាលៈទេសៈដែលសកលលោកកំពុងប្រឈមការគំរាមកំហែងបញ្ហាជាច្រើនទំាងភូមិសាស្រ្តនយោបាយនិងសេដ្ឋកិច្ចជាដើមនោះ។ សម្តេចប្រធានរដ្ឋសភា បានលើកឡើងពីសុខដុមនីយកម្មសាសនា នៅកម្ពុជា ដែលបានដើរតួនាទីដ៏សំខាន់ សម្រាប់សុខសន្តិភាព និងការអភិវឌ្ឍរីកចម្រើនរបស់ប្រទេសជាតិ ។ ជាមួយគ្នានេះ ឯកឧត្តម ស៊ីយ៉េដ យូសាហ្វ រ៉ាហ្ស៉ា ហ្គីឡានី បានប្រកាសថាប៉ាគីស្ថាន គំាទ្រកម្ពុជាដើម្បីក្លាយជាសមាជិកអង្គការឥស្លាម (OIC)។ ជាមួយគ្នានេះ ឯកឧត្តមសង្ឃឹមថា កម្ពុជានឹងបើកស្ថានទូតជាផ្លូវការនៅប៉ាគីស្ថានក្នុងពេលឆាប់ៗនេះ៕

ពលករខ្មែរមកពីថៃជាង ៦២ម៉ឺននាក់មានការងារធ្វើនៅក្នុងប្រទេស និងទទួលបានប្រាក់ខែសមរម្យ

ក្រោមការសម្របសម្រួលពីក្រសួងការងារ និងបណ្ដុះបណ្តាលវិជ្ជាជីវៈ និងដៃគូពាក់ព័ន្ធ ពលករខ្មែរ ត្រឡប់មកពីប្រទេសថៃ ចំនួនជាង៦២ម៉ឺននាក់ ក្នុងចំណោមពលករសរុបជាង ៨០ម៉ឺនាក់ មានការងារធ្វើ នៅក្នុងប្រទេស ដោយទទួលបានប្រាក់ខែសមរម្យ។តាមរយៈបទសម្ភាសជាមួយ BTV នៅថ្ងៃទី០៤ ខែកុម្ភៈ នេះ ឯកឧត្តម ស៊ុន មេសា អ្នកនាំពាក្យក្រ សួងការងារ និងបណ្ដុះបណ្តាលវិជ្ជាជីវៈ បានឲ្យដឹងថា គិតត្រឹមចុងខែមករា ឆ្នាំ២០២៦នេះ ពលរដ្ឋខ្មែររស់នៅប្រទេសថៃ ត្រឡប់មកប្រទេសកម្ពុជាវិញ មានចំនួនជិត ៩៦ម៉ឺននាក់ ក្នុងនោះមានជាង ៨០ម៉ឺននាក់ ជា ពលករ និងទទួលបានការងារធ្វើ មានជាង៦២ម៉ឺននាក់ តាមរយៈយន្តការក្រសួងការងារ និងបណ្តុះ បណ្តាលវិជ្ជាជីវៈ និងដៃគូពាក់ព័ន្ធនានា។ឯកឧត្តមបានបន្តថា ការជួយសម្របសម្រួលឲ្យពលករមានការងារធ្វើនេះ ក្រសួងការងារបានបែង ចែកជា ៤ដំណាក់ធំៗ ហើយពលករទទួលបានប្រាក់ខែសមរម្យ។លោក សំ សឿន ប្រធានសហជីពពលកម្មជាតិកម្ពុជា (NLC) បានលើកឡើងដែរថា តាមការ សង្កេតក្រសួងការងារ និងបណ្តុះបណ្តាលវិជ្ជាជីវៈ បានយកចិត្តទុកដាក់ខ្ពស់ពីសុខទុក្ខ សុវត្ថិភាពរបស់ពលករខ្មែរពេលត្រឡប់មកពីប្រទេសថៃ ដោយរង់ចាំទទួលពលករទាំងនោះនៅតាមច្រកព្រំដែន និងជួយសម្រួលការធ្វើដំណើរ និងរកការងាជូន ជាដើម។ លោកបានកោតសរសើរចំពោះការខិតខំប្រឹងប្រែងរបស់ក្រសួងការងារផងដែរ។ បន្ទាប់ពីប្រទេសថៃបង្កសង្គ្រាមឈ្លានពានប្រទេសកម្ពុជា នៅក្នុងឆ្នាំ២០២៥មក ពលរដ្ឋខ្មែររស់នៅប្រទេសថៃ រាប់បញ្ចូលទាំងពលករដែលនោះ បានត្រឡប់មកកាន់មាតុប្រទេសវិញជាបន្តបន្ទាប់ស្របតាមការអំពាវនាវរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា៕ អត្ថបទ៖ ទូច សោភ័ណ

អ្នកនាំពាក្យរាជរដ្ឋាភិបាល៖ កម្ពុជា កំពុងជំរុញឱ្យមានដំណោះស្រាយបញ្ហាព្រំដែនជាមួយភាគីថៃដោយសន្តិវិធី

រាជរដ្ឋាភិបាលកម្ពុជា មិននៅស្ងៀមឡើយចំពោះមុខសកម្មភាពរំលោភបំពានមកលើដែនអធិបតេយ្យភាពរបស់កម្ពុជា និងកំពុងជំរុញឱ្យមានដំណោះស្រាយបញ្ហាព្រំដែនជាមួយភាគីថៃដោយសន្តិវិធី និងតាមច្បាប់អន្តរជាតិ។ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បញ្ជាក់នៅក្នុងសន្និសីទសារព័ត៌មាននៅថ្ងៃទី៤ ខែកុម្ភៈ ឆ្នាំ២០២៦នេះថា ជាក់ស្ដែងក្នុងពេលថ្មីៗនេះ រាជរដ្ឋាភិបាលកម្ពុជា បន្តប្រកាសតវ៉ាជាថ្មីទៀតប្រឆាំងនឹងសកម្មភាពរបស់ភាគីថៃនៅក្នុងទីតាំងដែលខ្លួនដណ្តើមកាន់កាប់ដោយកម្លាំងយោធាក្នុងដែនអធិបតេយ្យរបស់កម្ពុជា។ ឯកឧត្តមបញ្ជាក់ថា កម្ពុជាបដិសេធ និងជំទាស់យ៉ាងដាច់អហង្ការចំពោះប្រតិបត្តិការ ដែលធ្វើឡើងដោយកងកម្លាំងយោធាថៃ រួមទាំងការអនុវត្តអធិបតេយ្យរបស់ថៃដោយខុសច្បាប់ នៅលើដែនអធិបតេយ្យភាពកម្ពុជា ដែលសកម្មភាពនេះ ជាការរំលោភលើធម្មនុញ្ញអង្គការសហប្រជាជាតិ និងធម្មនុញ្ញអាស៊ាន និងជាការប៉ុនប៉ងធ្វើឱ្យស្របច្បាប់នូវការកាន់កាប់របស់ខ្លួនលើទឹកដីអធិបតេយ្យរបស់កម្ពុជា។សូមបញ្ជាក់ថា រាជរដ្ឋាភិបាលកម្ពុជា ប្តេជ្ញាចិត្តដ៏ខ្ជាប់ខ្ជួន និងឥតងាករេរបស់ខ្លួនក្នុងការស្វែងរកដំណោះស្រាយចំពោះជម្លោះព្រំដែនទាំងអស់ជាមួយប្រទេសថៃ ក៏ដូចជាជាមួយប្រទេសជិតខាងទាំងអស់ តាមរយៈមធ្យោបាយសន្តិភាព ស្របតាមច្បាប់អន្តរជាតិ ហើយកម្ពុជានៅតែប្តេជ្ញាចិត្តក្នុងការរក្សាជំហរជាគោលការណ៍របស់ខ្លួនថា ព្រំដែនមិនត្រូវផ្លាស់ប្តូរដោយកម្លាំងឡើយ៕

សាលាបណ្តុះបណ្តាលជំនាញ អំពាវនាវពលករ និងជនភៀសសឹកមករៀនជំនាញបន្ថែមដើម្បីបង្កើតការងារថ្មី

អ្នកជំនាញក្នុងវិស័យអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ (ធីវ៉េត) បានផ្ញើសារអំពាវនាវជូនដល់សាធារណជនទូទៅ ជាពិសេសប្រជាពលរដ្ឋត្រឡប់មកពីថៃ ក៏ដូចជាជនភៀសសឹក ឱ្យឆ្លៀតពេលរៀនជំនាញបន្ថែមដើម្បីពង្រឹងជំនាញ ពង្រឹងសេដ្ឋកិច្ច ផ្តល់ឱកាសខ្លួនឯងដើម្បីស្វែងរកការងារថ្មីធ្វើ និងឱកាសការងារជាច្រើនផ្សេងៗទៀត ក្រៅពីការងារនៅប្រទេសថៃ។ នៅក្នុងបទសម្ភាសន៍ជាមួយព័ត៌មាន ប៊ីធីវី ឯកឧត្តម ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ថ្មីៗនេះ ក្រៅពីប្រទេសបានជួបនូវបញ្ហាវិបត្តិតាមព្រំដែន កម្ពុជា-ថៃ បានមើលឃើញថា ប្រជាពលរដ្ឋដែលរស់នៅ និងធ្វើការនៅប្រទេសថៃជាច្រើន បានវិលត្រឡប់មកស្រុកកំណើតរៀងៗខ្លួនវិញ ហើយរាជរដ្ឋាភិបាលកម្ពុជាដែលមានក្រសួងការងារ និងបណ្តុះបណ្តាលជីវៈ ជាសេនាធិការក៏បានខិតខំប្រឹងប្រែងក្នុងការជួយសម្របសម្រួលទាំងការដឹកជញ្ជូន អាហារ ការស្វែងរកការងារ និងការផ្តល់វគ្គបណ្តុះបណ្តាលជំនាញ ដោយឥតគិតថ្លៃជាដើម ជូនដល់ប្រជាពលរដ្ឋ។ឯកឧត្តមនាយក បានបន្តថា ដោយឡែក ជនភៀសសឹក ក៏ទទួលស្គាល់ថា មួយរយៈកន្លងមក ក៏មានបញ្ហាស្មារតីដែលមានការព្រួយបារម្ភ មិននឹងន ប៉ុន្តែចំពោះមុខ យើងគួរប្រែក្លាយការឈឺចាប់នេះ ឱ្យទៅជាការប្រឹងប្រែង មានន័យថា បើយើងមានជំនាញ យើងមានក្រុមហ៊ុនវិនិយោគនៅប្រទេសយើងច្រើន ប្រទេសនឹងរីកចម្រើនខាងផ្នែកសេដ្ឋកិច្ច យើងនឹងរឹងមាំ យើងនឹងមិនពឹងផ្អែកលើប្រទេសជិតខាងដែលគេមើលងាយ មើលស្រាយលនោះទេ។ ឯកឧត្តមបន្ថែមទៀតថា យើងត្រូវរកការងារដោយខ្លួនឯង និងរកប្រទេសណាដែលមានអរិយធម៌ល្អ មានវប្បធម៌ល្អ ហើយមានការងារល្អធ្វើសម្រាប់ត្រឡប់មកជួយប្រទេសជាតិវិញ ខណៈកម្ពុជាមានប្រទេសជាច្រើនផ្សេងទៀតជាដៃគូក្នុងការផ្តល់កូតាការងារល្អ និងមានប្រាក់បៀវត្សរ៍ខ្ពស់ ជូនដល់ប្រជាពលរដ្ឋ ក្នុងនោះមានដូចជា កូរ៉េ ជប៉ុន សឹង្ហបុរី ម៉ាឡេស៊ី និងជាមួយបណ្តាប្រទេសអឺរ៉ុប ដូចជាអូស្រ្តាលីជាដើម។ ជាក់ស្តែងថ្មីៗនេះ វិទ្យាស្ថាន ITI ក៏មានកិច្ចសហការជាមួយមជ្ឈមណ្ឌលបណ្តុះបណ្តាលជំនាញយានយន្ត ដែលជាស្តង់ដារអូស្រ្តាលី ដូច្នេះយើងមានឱកាសច្រើនណាស់ កុំប្រែក្លាយពីការឈឺចាប់ ទៅបាក់ទឹកចិត្ត យើងគួរប្រែក្លាយពីការឈឺចាប់ ទៅជាការពង្រឹងជំនាញ ការពង្រឹងសេដ្ឋកិច្ច ពង្រឹងឱកាសខ្លួនឯង ដើម្បីស្វែងរកការងារថ្មីធ្វើ។ជុំវិញការលើកឡើងខាងលើនេះ លោក សំ សឿន ប្រធានសហភាពពលកម្មជាតិកម្ពុជា បានគាំទ្រចំពោះការអំពាវនាវ នេះទៅកាន់អតីពលករមកពីថៃ ក៏ដូចជាជនភៀសសឹកក្តី ការទទួលយកការបណ្តុះបណ្តាលជំនាញរបស់រាជរដ្ឋាភិបាល ពិតជាមានសារៈសំខាន់សម្រាប់អ្នកដែលមានជំនាញហើយ និងងាយស្រួលក្នុងការស្វែងរកការងារធ្វើ ឬការប្រកបមុខរបរជាអាជីវកម្មខ្លួនឯងក្តី។ ជាពិសេសការរៀនជំនាញ ដោយមិនគិតថ្លៃ ដែលជាឱកាសដ៏កម្រមាន ព្រោះថា ក្រៅពីមិនចំណាយប្រាក់លើថ្លៃរៀន ថែមទាំងទទួលនូវចំណេះ ជំនាញមួយពិតប្រាកដ ដើម្បីងាយស្រួលស្វែងរកការងារ ឬការបើកអាជីវកម្មផ្ទាល់ខ្លួនជាដើម។គិតមកដល់ពេលនេះ ប្រជាពលរដ្ឋខ្មែរដែលបានវិលត្រឡប់មកស្រុកកំណើតដើមវិញ មានចំនួនជិត ១លាននាក់។ ក្នុងនោះ អ្នកទទួលបានការងារធ្វើក្នុងស្រុកមានចំនួនជាង ៦០ម៉ឺននាក់។ ដោយឡែក គិតមកត្រឹមបំណាច់ឆ្នាំ២០២៥នេះដែរ តាមរយៈកម្មវីធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ឬហៅថា កម្មវិធី TVET 1,5M បានទទលការចុះឈ្មោះដើម្បីចំនួនជិត ១៥ម៉ឺននាក់ ។ ក្នុងនោះ យុវជនជាង ៥ម៉ឺននាក់ មានការងារធ្វើ បន្ទាប់ពីបញ្ចប់ការសិក្សាជំនាញ ធីវ៉េត៕ អត្ថបទ៖ ឈិត បូរ៉ាវី

ក្រសួងការងារ និងតំណាង UN ថ្មី ដាក់គោលដៅបន្តពង្រឹងកិច្ចសហប្រតិបត្តិការលើវិស័យការងារ និងបណ្តុះបណ្តាលជំនាញ

ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបពិភាក្សាការងារជាមួយលោកស្រី វ៉្លាដាន់កា អាន់ឌ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិថ្មីប្រចាំកម្ពុជា ដើម្បីពង្រឹងទំនាក់ទំនង និងបង្កើនកិច្ចសហប្រតិបត្តិការឱ្យកាន់តែស៊ីជម្រៅបន្ថែមទៀត។ក្រោយចប់ជំនួបការងារ កាលពីរសៀលថ្ងៃទី៣ ខែកុម្ភៈ ឆ្នាំ២០២៦ ក្រសួងការងារ និងបណ្ដុះបណ្ដាលវិជ្ជាជីវៈបានសសេរឱ្យដឹងថា ក្រៅពីការអបអរសាទរចំពោះការតែងតាំងជាអ្នកសម្របសម្រួលអង្គការសហប្រជាជាតិថ្មី ប្រចាំកម្ពុជា ឯកឧត្តមរដ្ឋមន្រ្តី បានមានប្រសាសន៍ អំពីយុទ្ធសាស្រ្តសម្រាប់ការបន្តកិច្ចសហប្រតិបត្តិការលើការអភិវឌ្ឍជំនាញ តាមរយៈការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ក៏ដូចជាកម្មវិធីការងារសម្រាប់យុវជន តាមរយៈកម្មវិធីការងារសមរម្យប្រចាំប្រទេសកម្ពុជា (DWCP), កម្មវិធីមុខរបរ និងការងារសមរម្យសម្រាប់យុវជននៅកម្ពុជា ដំណាក់កាលទី៣ (DEY III) និងការអនុវត្តផែនទីបង្ហាញផ្លូវកាតាលីករសកល។ឯកឧត្តម បានលើកឡើងពីកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រសួងការងារ ក្នុងការលើកកម្ពស់លក្ខខណ្ឌការងារឱ្យកាន់តែប្រសើរ, ការកំណត់ប្រាក់ឈ្នួលអប្បបរមាសម្រាប់កម្មករនិយោជិត, ការផ្តល់អត្ថប្រយោជន៍របបសន្តិសុខសង្គម និងការផ្តល់ឱកាសការងារសម្រាប់យុវជន ជាពិសេសបងប្អូនអតីតពលករត្រឡប់មកពីប្រទេសថៃតាមរយៈការរៀបចំវេទិកាការងារនៅទូទាំងប្រទេស។ ឯកឧត្តម បានបញ្ជាក់ឡើងវិញនូវការប្តេជ្ញាចិត្ត និងការត្រៀមខ្លួនជាស្រេចក្នុងការបន្តពង្រឹងភាពជាដៃគូយ៉ាងជិតស្និទ្ធជាមួយអង្គការសហប្រជាជាតិ ដោយបង្ហាញការជឿជាក់យ៉ាងមុតមាំថា កិច្ចសហប្រតិបត្តិការដំណាក់កាលបន្ទាប់នេះ នឹងផ្តោតសំខាន់លើការអភិវឌ្ឍជំនាញសម្រាប់យុវជន និងកម្លាំងពលកម្មកម្ពុជា ប្រកបដោយផលិតភាពខ្ពស់ ប្រសិទ្ធភាព និងសក្ដិសិទ្ធភាព ដែលស្របតាមគោលដៅអភិវឌ្ឍន៍សេដ្ឋកិច្ចកម្ពុជាប្រកបដោយចីរភាព។ ជាការឆ្លើយតប លោកស្រី អាន់ឌ្រេវ៉ា បានកោតសរសើរចំពោះចក្ខុវិស័យរបស់រាជរដ្ឋាភិបាល និងក្រសួងការងារ និងបណ្តុះបណ្តាលវិជ្ជាជីវៈ ព្រមទាំងបានបញ្ជាក់ពីការប្តេជ្ញាចិត្តរបស់អង្គការសហប្រជាជាតិ ដែលបានត្រៀមខ្លួនរួចជាស្រេចក្នុងការបន្តកិច្ចសហការគាំទ្រដល់ការអភិវឌ្ឍកម្ពុជាប្រកបដោយចីរភាព តាមរយៈវិធីសាស្ត្រដ៏មានប្រសិទ្ធភាព ភាពរហ័សរហួន និងការសម្របសម្រួលយ៉ាងល្អ ដើម្បីកសាងអនាគតដែលរួមបញ្ចូល និងមានភាពធន់សម្រាប់ប្រជាជនកម្ពុជា។ លោកស្រីមានជំនឿយ៉ាងមុតមាំថា ភាពជាដៃគូដ៏ចាំបាច់នេះនឹងចូលរួមចំណែកយ៉ាងសំខាន់ដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព និងចក្ខុវិស័យសេដ្ឋកិច្ចរបស់កម្ពុជានាពេលអនាគត៕ អត្ថបទ៖ ឈិត បូរ៉ាវី

សម្តេចប្រធានរដ្ឋសភាកម្ពុជា ទទួលជួបពិភាក្សាការងារជាមួយ ប្រធានព្រឹទ្ធសភាប៉ាគីស្ថាន

នៅព្រឹកថ្ងៃទី៤ ខែកុម្ភៈ ឆ្នាំ២០២៦ នេះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានទទួលជួបជាមួយ ឯកឧត្តម ស៊ីយ៉េដ យូសាហ្វ រ៉ាហ្សា ជីឡានី (Syed Yousaf Raza Gilani) ប្រធានព្រឹទ្ធសភា នៃសាធារណរដ្ឋអ៊ីស្លាមប៉ាគីស្ថាន។ក្រោយជំនួបនេះ ឯកឧត្តមបណ្ឌិត កែវ ពិសិដ្ឋ អគ្គលេខាធិការរង នាយកខុទ្ទកាល័យ និងជាអ្នកនាំពាក្យសម្តេចប្រធានរដ្ឋសភា បានធ្វើសន្និសីទសារព័ត៌មាន ដើម្បីបង្ហាញពីលទ្ធផលផ្លែផ្កានៃជំនួបសម្តែងការគួរសម និងពិភាក្សាការងាររវាង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និង ឯកឧត្តម ស៊ីយ៉េដ យូសាហ្វ រ៉ាហ្សា ជីឡានី (Syed Yousaf Raza Gilani) ប្រធានព្រឹទ្ធសភា នៃសាធារណរដ្ឋអ៊ីស្លាមប៉ាគីស្ថាន។អ្នកនាំពាក្យសម្តេចប្រធានរដ្ឋសភា បានថ្លែងថា ជំនួបដ៏មានសារៈសំខាន់នេះបានប្រព្រឹត្តទៅនៅវិមានរដ្ឋសភា ដើម្បីពង្រឹងចំណងមិត្តភាព និងកិច្ចសហប្រតិបត្តិការអន្តរសភាឱ្យកាន់តែស៊ីជម្រៅ។ចំពោះខ្លឹមសារលម្អិតនៃជំនួបពិភាក្សាដ៏មានសារៈសំខាន់នេះ BTV នឹងជម្រាបជូនបន្ថែមនាពេលខាងមុខនេះ។

បណ្ដាញសង្គម

ព័ត៌មានថ្មីៗ

យន្តហោះចម្បាំងស៊ុយអែត ស្ទាក់យន្តហោះប្រយុទ្ធរបស់រុស្ស៊ី នៅជិតព្រំដែន

លីបង់រាយការណ៍ពីការវាយប្រហាររបស់អ៊ីស្រាអែលនៅភាគខាងត្បូង ក្រោយមានការព្រមានជម្លៀស

ប៉ាគីស្ថាន និងអេហ្ស៊ីបស្វាគមន៍វឌ្ឍនភាព រវាងអាមេរិក និងអ៊ីរ៉ង់ ដោយសង្ឃឹមមានកិច្ចព្រមព្រៀងសន្តិភាពដំបូង

ចំនួនអ្នកស្លាប់ដោយសាររញ្ជួយដី នៅហ្វីលីពីន កើនឡើងដល់ ៦១នាក់ ខណៈប្រតិបត្តិការជួយសង្គ្រោះកំពុងបន្ត

នាយករដ្ឋមន្ត្រីឥណ្ឌា លោក Modi ចាប់ផ្តើមដំណើរទស្សនកិច្ចផ្លូវការទៅកាន់បារាំង និងស្លូវ៉ាគី

[UPDATE] គ្រោះថ្នាក់ធ្លាក់យន្តហោះរបស់កងទ័ពអាកាសឥណ្ឌា មានអ្នកស្លាប់ ៥នាក់

យន្តហោះដឹកជញ្ជូនយោធាធ្លាក់ នៅឥណ្ឌា ខណៈចំនួនអ្នកស្លាប់ និងរបួស មិនទាន់ដឹងនៅឡើយទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

អាជ្ញាធរបង្កើនការត្រួតពិនិត្យទីតាំងនានាដើម្បីទប់ស្កាត់ និងបង្ក្រាប​ឧក្រិដ្ឋកម្ម​ឆបោក​តាម​អនឡាញ

សម្តេចព្រះមហាក្សត្រី នរោត្តម មុនិនាថ សីហនុ ប្រោសព្រះរាជទានព្រះរាជទ្រព្យ ១០ម៉ឺនដុល្លារ ដល់ស៊ីម៉ាក់

ពលរដ្ឋភៀសសឹកមានភាពកក់ក្ដៅ ចំពោះការមើលថែរបស់រាជរដ្ឋាភិបាល ក្នុងការផ្តល់ដីលំនៅឋានថ្មី

ក្រសួងទេសចរណ៍ រៀបចំព្រាងខ្សែទស្សនកិច្ច CLUSTER វៃឆ្លាត​ទាក់ទាញ​ភ្ញៀវទេសចរ​អន្តរជាតិ​ស្នាក់​នៅ​យូរ

ពលករខ្មែរមកពីថៃជាង ៦២ម៉ឺននាក់មានការងារធ្វើនៅក្នុងប្រទេស និង​ទទួល​បាន​ប្រាក់​ខែ​សមរម្យ

សាលាបណ្តុះបណ្តាលជំនាញ អំពាវនាវពលករ និងជនភៀសសឹក​មក​រៀន​ជំនាញ​បន្ថែម​ដើម្បី​បង្កើត​ការងារ​ថ្មី

ក្រសួងការងារ និងតំណាង UN ថ្មី ដាក់គោលដៅបន្តពង្រឹងកិច្ចសហប្រតិបត្តិការលើវិស័យការងារ និង​បណ្តុះបណ្តាលជំនាញ