BTV NEWS

ក្រសួងព័ត៌មាន ប្រគល់ថវិកា ១០៦លានរៀល ប្រមូលបានពីព្រឹត្តិការណ៍រត់ដើម្បីមនុស្សធម៌ «ដើម្បីកុមារ ដើម្បីអនាគតយើង» ជូនមូលនិធិគន្ធបុប្ផាកម្ពុជា សម្រាប់គាំទ្រការព្យាបាល និងថែទាំសុខភាពកុមារដោយឥតគិតថ្លៃ

អាជ្ញាធរខេត្តប៉ៃលិនចុះពិនិត្យការប្រមូលផលទុរេន ដើម្បីបង្ការការក្លែងបន្លំ ខណៈឆ្នាំនេះទីផ្សារល្អជាងឆ្នាំមុន

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

គណៈកម្មការទី១ ព្រឹទ្ធសភា រួមជាមួយក្រុមសមាជិកព្រឹទ្ធសភាភូមិភាគទី៤ ប្រារព្ធទិវាកុមារអន្តរជាតិ និងទិវាប្រឆាំងពលកម្មកុមារ នៅខេត្តបាត់ដំបង

ព័ត៌មានជាតិ

តំណាងសមាគមស្វាយចន្ទី៖ ការប្រមូលគ្រាប់ស្វាយចន្ទីឆ្នាំនេះ អាចបានផលច្រើន បើអាកាសធាតុល្អ

តំណាងសមាគមស្វាយចន្ទីកម្ពុជា ព្រួយបារម្ភរណ៍ទាក់ទិននិងការប្រែប្រួលអាកាសធាតុកំពុងអូសបន្លាយ ដែលនឹង អាចធ្វើឱ្យ ប៉ះពាល់នៅក្នុងរដូវស្វាយចន្ទីចេញផ្កា ប៉ុន្តែប្រសិនបើអាកាសធាតុនឹងបញ្ចប់ក្នុងយៈពេលខ្លី ការប្រមូលគ្រាប់ស្វាយចន្ទីក្នុងឆ្នាំ២០២៦នេះនឹងទទួលបានផលច្រើន ។លោក ស៊ុយ កុកធាន អនុប្រធានសមាគមស្វាយចន្ទីកម្ពុជា លើកឡើងក្នុងកិច្ចសម្ភាសន៍ជាមួយសារព័ត៌មាន ស្តីពីការដាំដុះ និងការនាំចេញគ្រាប់ស្វាយចន្ទី នេះថា ជុំវិញការដាំដុះស្វាយចន្ទី កម្ពុជាគឺជាប្រទេសដែលផលិតគ្រាប់ស្វាយចន្ទីឆៅធំទី២ នៅលើ ពិភពលោក ជាក់ស្តែងនៅក្នុងឆ្នាំកន្លងមកនេះ កម្ពុជាទទួលបានការបញ្ជាទិញពីក្រៅប្រទេសជាច្រើន ដែលធ្វើការនាំចេញបានចំនួន ក្នុងរង្វង់ ១ លានតោន បើគិតជាទឹកប្រាក់ក្នុងរង្វង់ប្រមាណ ១,៥ ពាន់លានដុល្លាអាម៉េរិក ចំណែកទីផ្សារធំៗដែលបាននាំចេញរួមមាន ប្រទេសវៀតណាម, ឥណ្ឌា, ចិន និងការនាំចេញទៅបណ្តាលប្រទេសមួយចំនួនផ្សេងទៀត។លោក បន្តឱ្យដឹងថា សម្រាប់ឆ្នាំ២០២៥នេះ យើងទទួលបានជោគជ័យល្អប្រសើរ ទាំងកំណើនការប្រមូលផល និងមានតម្លៃ ល្អ ប៉ុន្តែចំពោះអ្នកកែច្នៃក្នុងស្រុកជួបបញ្ហាខ្លះៗ អំពីការកើនឡើងនៃវត្ថុធាតុដើមសម្រាប់ផ្គត់ផ្គង់ក្នុងការកែច្នៃ ព្រោះការកែច្នៃគឺយើង ត្រូវប្រកួតប្រជែងទាំងទីផ្សារក្នុងនិងក្រៅស្រុក ក្នុងនោះសម្រាប់អ្វីដែលជាបញ្ហានៅក្នុងឆ្នាំ២០២៦នេះវិញ គឺបញ្ហាអាកាសធាតុ ដែល បាននិងកំពុងអូសបន្លាយ អាចនឹងធ្វើឱ្យមានការប៉ះពាល់ដល់ស្វាយចន្ទីដែលកំពុងចេញផ្កា ក្នុងនោះប្រសិនអាកាសធាតុនៅតែអូស បន្លាយ វានឹងអាចធ្វើឱ្យប៉ះពាល់ក្នុងការប្រមូលផលគ្រាប់ស្វាយចន្ទីក្នុងឆ្នាំនេះ។លោក ស៊ុយ កុកធាន លើកឡើងបន្តថា ជុំវិញស្វាយចន្ទីនេះ គោលនយោបាយជាតិស្វាយចន្ទីឆ្នាំ២០២២-២០២៧ និងការ យកចិត្តទុកដាក់របស់រាជរដ្ឋាភិបាល នៅក្នុងរយៈពេលខាងមុខ, កម្ពុជានឹងអាចនាំចេញគ្រាប់ស្វាយចន្ទីកាន់តែច្រើន ខណៈដែលរាជ- រដ្ឋាភិបាលបានកំពុងពន្លឿនក្នុងការបង្កើតសួនឧស្សាហកម្មស្វាយចន្ទី (CIP) មានផ្ទៃដីជាង ៤០០ ហិចតា។ ហើយក្រោយពីដាក់ឱ្យ ដំណើរ គម្រោងនេះនឹងអាចស្រូបយកវិនិយោគមកបណ្តាក់ទុនបន្ថែមទៀតផងដែរ។សូមបញ្ជាក់ថា បច្ចុប្បន្នខេត្តកំពង់ធំមានរោងចក្រមួយកំពុងដំណើរ ដែលមានឈ្មោះថា MIRARTH Agritech ដោយរោងចក្រនោះ កែច្នៃគ្រាប់ស្វាយចន្ទី និងបានកំពុងស្រូបយកគ្រាប់ស្វាយចន្ទីស្រស់ក្នុងស្រុកប្រមាណ ៦ តោន នៅក្នុង១ថ្ងៃៗ សម្រាប់ការកែច្នៃ ហើយ ក្រុមហ៊ុនមួយនេះក៏មានមហិច្ឆិតា ពង្រីកសមត្ថភាពកែច្នៃបន្ថែមទៀតឱ្យបានជាង ២ ម៉ឺនតោន ក្នុង១ឆ្នាំ សម្រាប់បម្រើទីផ្សារនាំចេញ ផងដែរ៕ អត្ថបទ៖ សុន រ៉ាឌី,

គ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្តេជ្ញាផ្តល់សេវាសុខភាពជូនពលរដ្ឋនៅតាមមូលដ្ឋានកាន់តែប្រសើរ

ក្នុងកិច្ចប្រជុំបូកសរុបលទ្ធផលការងារ ផ្សព្វផ្សាយ និងទំនាក់ទំនងសាធារណៈ ប្រចាំ២០២៥ និងលើកទិសដៅអនុវត្តបន្ត ឆ្នាំ២០២៦ នៅព្រឹកថ្ងៃទី២០ ខែមករា ឆ្នាំ២០២៦នេះ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានប្តេជ្ញាចិត្តខិតខំព្យាយាមបន្តការងារផ្តល់សេវាសុខភាព ជូនប្រជាពលរដ្ឋនៅតាមបណ្តាលមូលដ្ឋានផ្សេងៗ និងនៅតាមខ្នងផ្ទះឱ្យកាន់តែប្រសើរឡើងថែមទៀត។ឯកឧត្តម លេង ផាលី រដ្ឋលេខាធិការក្រសួងផែនការ ជាសមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានថ្លែងថា សមិទ្ធផលរបស់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី គិតចាប់ពីថ្ងៃទី១៤ ខែមិថុនា ឆ្នាំ២០២៥ ដល់ថ្ងៃទី១៦ ខែមករា ឆ្នាំ២០២៦ ក្រុមការងារគ្រូពេទ្យស្ម័គ្រចិត្តឯកឧត្តមហ៊ុន ម៉ានី ថ្នាក់កណ្តាល ចំនួន ៥៦៣នាក់ បាននាំយកសម្ភារបរិក្ខារថ្នាំពេទ្យ និងស្បៀងអាហារមួយចំនួន ដោយសហការជាមួយក្រុមការងារគ្រូពេទ្យស្ម័គ្រចិត្តរាជធានី-ខេត្ត បានចុះអប់រំសុខភាព ពិនិត្យ ព្យាបាលជំងឺ ចែកថ្នាំ ផ្តល់សេវា និងគ្រឿងឧបភោគបរិភោគ ជូនប្រជាជនភៀសសឹក នៅខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តសៀមរាប ខេត្តបាត់ដំបង ខេត្តពោធិ៍សាត់ និងខេត្តកោះកុង បានចំនួន២៦៤,៣៦៥នាក់។ ក្នុងឱកាសនោះ ឯកឧត្តម បានបញ្ជាក់ទៀតថា ក្នុងរយៈពេល១ឆ្នាំចុងក្រោយនេះក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានបន្តបំពេញបេសកកម្មដ៏ថ្លៃថ្លារបស់ខ្លួន តាមរយៈការចូលរួមអប់រំផ្សព្វផ្សាយ វគ្គបណ្តុះបណ្តាល សង្គ្រោះបឋម និងពិនិត្យព្យាបាលជំងឺជូនប្រជាពលរដ្ឋផ្តល់សេវាដោយឥតគិតថ្លៃ ក្នុង២៥រាជធានី-ខេត្ត នៃព្រះរាជាណាចក្រកម្ពុជា បានចំនួន៣១០លើក ព្យាបាលជំងឺជូនប្រជាពលរដ្ឋ បានចំនួន៣០០,១០៧នាក់ (សាមសិបម៉ឺនមួយរយប្រាំពីរនាក់) ក្នុងនោះស្ត្រីមានចំនួន ១៨៤,៥១២នាក់ (ដប់ប្រាំបីម៉ឺន បួនពាន់ ប្រាំរយ ដប់ពីរនាក់) ជាពិសេសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី គឺជាកងទ័ពអាវស នៅប្រកៀរស្មាគ្នាជាមួយវីរៈកងទ័ព និងប្រជាជនភៀសសឹក គ្រប់កាលៈទេសៈ និងគ្រាលំបាក៕

ឯកឧត្តម ប៉េង ពោធិ៍នា៖ អញ្ជើញជាអធិបតី នៅក្នុងកម្មវិធីផ្តល់ឈាមដោយស្ម័គ្រចិត្តរបស់ថ្នាក់ដឹកនាំ មន្ត្រីរាជការ និងនិស្សិត នៃវិទ្យាស្ថានតេជោសែន សាធារណការ និងដឹកជញ្ជូន

នាព្រឹកថ្ងៃអង្គារ ទី២០ ខែមករា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញជាអធិបតីនៅក្នុងកម្មវិធីផ្តល់ឈាមដោយស្ម័គ្រចិត្តរបស់ថ្នាក់ដឹកនាំ មន្ត្រីរាជការ និងនិស្សិត នៃវិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមពី លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម នៃក្រសួងសុខាភិបាល ឯកឧត្តម លោកជំទាវ ថ្នាក់ដឹកនាំក្រសួង លោកគ្រូពេទ្យ អ្នកគ្រូពេទ្យ និងមន្រ្តីរាជការជាច្រើនរូបទៀត។កម្មវិធីផ្ដល់ឈាមនាពេលនេះមានគោលបំណងរួម គឺដើម្បីយកទៅជួយសង្គ្រោះដល់ជនគោលដៅមានដូចជា វីរយុទ្ធជនកម្ពុជាដែលរងរបួស និងមានតម្រូវការឈាមក្នុងស្ថានភាពចាំបាច់ និងប្រជាជនស្ថិតក្នុងការសង្គ្រោះអាយុជីវិតបន្ទាន់។ ទន្ទឹមនឹងនេះ ការផ្តល់ឈាមមាន អត្ថន័យ និងគោលបំណងសំខាន់២ គឺបង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត ដើម្បីជំរុញការលើកកម្ពស់ឱ្យយុវជន និងប្រជាជនទូទៅចូលរួមធ្វើសកម្មភាពជាមួយសេវាកម្មជាតិផ្ដល់ឈាមនៅទូទាំងប្រទេស ដើម្បីធានាឱ្យមានការផ្គត់ផ្គង់ឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាមនៅគ្រប់មន្ទីរពេទ្យទាំងអស់ដោយគ្មានការរើសអើង មិនប្រកាន់ជាតិសាសន៍ សាសនា ឬនិន្នាការនយោបាយ និងផ្សារភ្ជាប់សកម្មភាពនៃការបរិច្ចាគឈាមដោយស្ម័គ្រចិត្ត ទៅនឹងសកម្មភាពមនុស្សធម៌ដ៏ល្អប្រពៃក្នុងសង្គម។ឯកឧត្តមរដ្ឋមន្ត្រី បានបន្តអំពាវនាវដល់ថ្នាក់ដឹកនាំក្រសួង និងមន្ត្រីរាជការទាំងអស់សូមបន្តគាំទ្រ និងចូលរួមក្នុងកិច្ចការមនុស្សធម៌ដ៏មានតម្លៃនេះបន្តទៀត ដើម្បីជួយសង្គ្រោះអាយុជីវិតមនុស្ស ជាពិសេសអ្នកដែលមានតម្រូវការឈាមចាំបាច់បំផុត ព្រោះការផ្ដល់អំណោយឈាមនាពេលនេះគឺជាកាដូនៃសេចក្តីស្រឡាញ់ចេញពីបេះដូងយ៉ាងពិតប្រាកដជូនចំពោះវីរកងទ័ពជួរមុខ និងជនរួមជាតិខ្មែរទាំងអស់គ្នាក្នុងស្មារតីសាមគ្គីភាព ជាភាតរភាពរបស់ប្រជាជនកម្ពុជាយើង៕

គ្រាប់បែកចង្កោម បន្តនៅមានរាយប៉ាយដោយសារការបាញ់ផ្លោងរបស់ភាគីថៃ

ក្រោយបទឈប់បាញ់ចូលជាធរមាន ក្រុមការងារជំនាញនៃអង្គភាពស៊ីម៉ាក់ បានចុះបំពេញការងារយ៉ាងសកម្មដើម្បីធានាសុវត្ថិភាពជូនប្រជាពលរដ្ឋ ខណៈគ្រាប់បែកចង្កោម បន្តនៅមានរាយប៉ាយពេញផ្ទៃដី និងភូមិឋានស៊ីវិលរបស់ពលរដ្ឋដោយសារការបាញ់ផ្លោងរបស់ភាគីថៃ។ ការងាររបស់អង្គភាពស៊ីម៉ាក់ពេលនេះ មានទាំងការចុះអប់រំប្រជាពលរដ្ឋ ក៏ដូចជាការចុះរុករក និងការកម្ទេចគ្រាប់មិនទាន់ផ្ទុះទាំងនោះ។ មន្ត្រីជំនាញក្រុមការងារស៊ីម៉ាក់ កំពុងចុះបំពេញការងារយ៉ាងសកម្មក្នុងការអប់រំ រុករក និងកម្ទេចគ្រាប់មីន គ្រាប់យុទ្ធភ័ណ្ឌមិនទាន់ផ្ទុះទាំងឡាយដែលបន្សល់ទុកដោយការបាញ់ផ្លោងរបស់ភាគីថៃ។ ក្រុមការងារ បានបែងចែកការទទួលខុសត្រូវ ចុះអនុវត្តការងារ ទៅតាមទីតាំងខេត្ត តំបន់រៀងៗខ្លួនភ្លាមៗ ក្នុងគោលដៅរួមមួយគឺធានាសុវត្ថិភាពជូនប្រជាពលរដ្ឋ។ លោកឧត្តមសេនីយ៍ត្រី នេត រដ្ឋា ប្រធានកងឯកភាពកម្ចាត់មីនទី១ ប្រចាំខេត្តឧត្តរមានជ័យ ខេត្តបន្ទាយមានជ័យ លើកឡើងថា ខេត្តទាំងពីរសុទ្ធតែរងផលប៉ះពាល់ជាច្រើនភូមិ។ ជាក់ស្ដែងក្រុមការងារបានបែងចែក ទៅខេត្តឧត្តរមានជ័យចំនួន ១២ក្រុម រីខេ្តតបន្ទាយមានជ័យ១១ក្រុម។ គិតត្រឹមថ្ងៃទី ១៩ ខែមករាកន្លងទៅនេះ ក្រុមការងារបានចុះផ្សព្វផ្សាយដល់ប្រជាពលរដ្ឋជាច្រើនលើក បានរុករកឃើញគ្រាប់យុទ្ធភ័ណ្ឌមិនទាន់ផ្ទុះជាច្រើន និងបានយកគ្រាប់ទាំងនោះបានមួយចំនួនដែរទៅតាមជំនាញដើម្បីសុវត្ថិភាព។ក្នុងចំណោមគ្រប់ផ្លោងជាច្រើនប្រភេទ ក៏មានប្រភេទគ្រាប់បែកចង្កោម ត្រូវបានរកឃើញនៅតាមផ្ទះប្រជាពលរដ្ឋផងដែរ។ លោក ឡុង ផាវុទ្ធីយ៉ា ប្រធានផ្នែកកម្ទេចយុទ្ធភ័ណ្ឌមិនទាន់ផ្ទុះ កងឯកភាពទី១ ក៏បានពន្យល់លម្អិតពីគ្រាប់បែកចង្កោម នៅទីតាំងផ្ទាល់ផងដែរ។ លោកថា គ្រាប់បែកចង្កោមនេះមកជាមួយគ្រាប់មេ។ គ្រាប់មេមួយគ្រាប់ មានគ្រាប់បែកចង្កោមតូចៗចំនួនជាង ៦០គ្រាប់ ដែលនឹងរាយប៉ាយក្នុងបរិវេណ ២០០ម៉ែត្របួនជ្រុង។សម្រាប់ពលរដ្ឋ រស់នៅស្រុកអូរជ្រៅ ដែលផ្ទះរបស់ពួកគាត់រងការបំផ្លិចបំផ្លាញដោយសារគ្រាប់បែកចង្កោម និងនៅបន្សល់ទុកគ្រាប់បែកចង្កោមដែលមិនទាន់ផ្ទុះ បង្ហាញការសោកស្ដាយជាខ្លាំងដែលផ្ទះរងការខូចខាតបែបនេះ។ ពួកគាត់ត្រឡប់មកពីភៀសសឹកវិញ បានឃើញផ្ទះមានការខូចខាត និងរណ្ដៅគ្រាប់បែកចង្កោមជាច្រើន និងនៅសល់មានគ្រាប់មិនទាន់ផ្ទុះ ក្រោយមកក្រុមការងារស៊ីម៉ាក់ក៏បានចុះមកពិនិត្យភ្លាមៗដែរ។ ក្រុមការងារស៊ីម៉ាក់ បានបំពេញការងារគ្រប់ទីតាំងរងផលប៉ះពាល់ ចាប់ពីបទឈប់បាញ់ចូលធរមាន។ ការបំពេញការងារ ដើម្បីធានាជូនសុវត្ថិភាពសម្រាប់ការវិលទៅរស់នៅភូមិឋានវិញ សុវត្ថិភាពសម្រាប់ការបំពេញការងារ សុវត្ថិភាពសម្រាប់ការចូលរៀនរបស់សិស្សវិញ៕ អត្ថបទ៖ គឹម ហុក

ឯកឧត្តម ហេង សួរ អញ្ជើញសំណេះសំណាល និងទទួលទានអាហារថ្ងៃត្រង់ជាមួយបងប្អូនកម្មករនិយោជិតនៅរោងចក្រ ស៊ិនគី អឹភែរឹល ក្នុងខេត្តកំពង់ឆ្នាំង

កំពង់ឆ្នាំ៖ នាព្រឹកថ្ងៃអង្គារ ទី២០ ខែមករា ឆ្នាំ២០២៦ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង រួមជាមួយថ្នាក់ដឹកនាំជាច្រើនរូប និងលោកស្រី ស៊ាវយៀន ឈាន (Xiaoyan Qian) នាយិកាការិយាល័យប្រចាំប្រទេសថៃ កម្ពុជា និងឡាវ នៃអង្គការអន្តរជាតិខាងការងារ (ILO) បានចុះជួបសំណេះសំណាលសួរសុខទុក្ខ និងទទួលទានអាហារថ្ងៃត្រង់យ៉ាងស្និទ្ធស្នាលជាមួយបងប្អូនកម្មករនិយោជិតនៅរោងចក្រ ស៊ិនគី អឹភែរឹល (SHINKI APPAREL (CAMBODIA) CO., LTD.) ក្នុងខេត្តកំពង់ឆ្នាំង។ការចុះជួបសំណេះសំណាលប្រកបដោយភាពស្និទ្ធស្នាល និងបរិយាកាសដ៏រីករាយនាពេលនេះ បានធ្វើឱ្យបងប្អូនកម្មករនិយោជិតសម្តែងនូវក្តីត្រេកអរយ៉ាងខ្លាំងចំពោះវត្តមានរបស់ថ្នាក់ដឹកនាំក្រសួង និងថ្នាក់ដឹកនាំខេត្ត ដែលសបញ្ជាក់ពីការយកចិត្តទុកដាក់ខ្ពស់ និងផ្តល់នូវភាពកក់ក្តៅយ៉ាងខ្លាំងដល់បងប្អូនកម្មករនិយោជិត។ការអញ្ជើញចុះជួប និងទទួលទានអាហារផ្ទាល់ជាមួយកម្មករនិយោជិតនេះ គឺជាឱកាសដ៏សំខាន់សម្រាប់ថ្នាក់ដឹកនាំក្នុងការស្វែងយល់ពីស្ថានភាពការងារប្រចាំថ្ងៃ និងទុក្ខធុរៈរបស់បងប្អូនកម្មករនិយោជិតដោយផ្ទាល់ ស្របតាមអនុសាសន៍ដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។បច្ចុប្បន្ន រោងចក្រ ស៊ិនគី អឹភែរឹល មានកម្មករនិយោជិតបំពេញការងារសរុបប្រមាណ ៦ ៨០០នាក់ ហើយក៏កំពុងមានតម្រូវការកម្លាំងពលកម្មបន្ថែមទៀតផងដែរ។ បងប្អូនកម្មករនៅទីនេះ ទទួលបានប្រាក់ឈ្នួលសមរម្យ និងអត្ថប្រយោជន៍ផ្សេងៗជាច្រីនតាមគោលការណ៍របស់រាជរដ្ឋាភិបាល ជាមួយលក្ខខណ្ឌការងារល្អប្រសើរ រួមមានអាហារដ្ឋានស្តង់ដា និងកន្លែងទទួលទានអាហារថ្ងៃត្រង់ប្រកបដោយផាសុកភាព។ឯកឧត្តមរដ្ឋមន្ត្រី ក៏បានថ្លែងអំណរគុណដល់ម្ចាស់រោងចក្រដែលបានសម្របសម្រួលរៀបចំកម្មវិធីសំណេះសំណាលដ៏មានអត្ថន័យនេះ និងដែលតែងតែចូលរួមគោរពច្បាប់ស្តីពីការងារ អនុវត្តនូវស្ដង់ដាការងារបានយ៉ាងល្អប្រសើរ ក៏ដូចជាផ្តល់អត្ថប្រយោជន៍នានាជូនដល់បងប្អូនកម្មករ ស្របតាមគោលការណ៍ណែនាំរបស់រាជរដ្ឋាភិបាល៕

ទេសចរអន្តរជាតិយល់ស្របចំពោះចំណាត់ថ្នាក់ខេត្តសៀមរាបជាគោលដៅវប្បធម៌ល្អបំផុតសម្រាប់ទស្សនា

ខេត្តសៀមរាប របស់ព្រះរាជាណាចក្រកម្ពុជា ឆ្នាំ២០២៦នេះ បានស្ថិតនៅក្នុងចំណោម២៥ គោលដៅទេសចរណ៍វប្បធម៌ដ៏ល្អបំផុតរបស់ពិភពលោក (Best Cultural Destinations in the World 2026)។ ទេសចរអន្តរជាតិ ដែលបានទស្សនាកម្ពុជា បានយល់ស្របចំពោះការចាត់ចំណាត់ថ្នាក់នេះ ដោយបញ្ជាក់ថា ខេត្ត សៀមរាប ជាគោលដៅទេសចរណ៍ដ៏សំខាន់សម្រាប់ទៅទស្សនាដោយមិនអាចអាក់ខានបាន។ទេសចរអន្តរជាតិមកពីប្រទេសអង់គ្លេស អ៊ីតាលី និងប្រទេសនានាទៀត បានប្រាប់BTV នៅថ្ងៃទី២០ខែមករា នេះថា ជាការពិតណាស់ នៅមុនពេលដាក់គោលដៅ ដាក់ផែនការមកទស្សនាកម្ពុជា គឺគ្រប់ទេសចរ ទាំងអស់ មានផែនការទៅទស្សនាប្រាសាទអង្គរវត្ត ខេត្តសៀមរាប ដោយមិនអាចអាក់ខាន ដោយសារខេត្ត សៀមរាប ជាគោលដៅទេសចរណ៍វប្បធម៌ ប្រវត្តិសាស្ត្រល្អឯក ដែលគេត្រូវដឹង ត្រូវសិក្សា ស្វែងឲ្យបានស៊ីជម្រៅ។សូមបញ្ជាក់ថា តាមហ្វេសប៊ុកផ្លូវការ SEA Infographics បានផ្សាយថា ខេត្តសៀមរាប នៃព្រះរាជាណាចក្រកម្ពុជា បានជាប់ចំណាត់ថ្នាក់លេខ១៣ នៅក្នុងចំណោម២៥គោលដៅវប្បធម៌ល្អបំផុតលើពិភពលោក។ ការ វាយតម្លៃ និងការផ្តល់ចំណាត់ថ្នាក់ គឺផ្អែកតាមប្រមូលការស្ទាបស្ទង់មតិ ការចែករំលែកបទពិសោធន៍ និងរឿងរ៉ាវ ពិតពីអ្នកដំណើរអន្តរជាតិ និងភ្ញៀវទេសចរអន្តរជាតិ ក្នុងរយៈពេល១២ខែ ដែលដើរកម្សានន្តនៅតាមបណ្តាប្រ ទេសនានានៅជុំវិញពិភពលោក។ តាមតារាងគោលគោលដៅទេសចរណ៍វប្បធម៌កំពូលៗរបស់ពិភពលោក សម្រាប់ឆ្នាំ២០២៦ លំដាប់ លេខ១ ប្រទេសសិង្ហបូរី លេខ២ ទីក្រុងឡុងក៏ ប្រទេសអង់គ្លេស លេខ៣ ទីក្រុងក្រាកូវ ប្រទេសប៉ូឡូញ ខណៈ លេខ១៣ គឺខេត្តសៀមរាប បន្ទាប់មកទីក្រុងអ៊ីស្តង់ប៊ុល ប្រទេសតួគី និងទីក្រុងញូវយ៉ក សហរដ្ឋអាមេរិក៕ អត្ថបទ៖ ស៊ុម សុខជា

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញចូលរួមសម្ពោធអគារសិក្សាថ្មីវិទ្យាល័យអប់រំពិសេសក្រុងតាខ្មៅ

ខេត្តកណ្តាល៖ នៅព្រឹកថ្ងៃទី២០ ខែមករា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីដ៏ខ្ពង់ខ្ពស់ចូលរួមសម្ពោធអគារសិក្សាថ្មីរបស់វិទ្យាល័យអប់រំពិសេស ក្រុងតាខ្មៅ។ អគារសិក្សាថ្មីដែលមានចំនួន ២ខ្នង កម្ពស់ ៣ជាន់ ស្មើនឹង ៣៦បន្ទប់នេះ នឹងបម្រើបន្ថែមដល់ការបង្ហាត់បង្រៀនកុមារអូទីស្សឹមកម្ពុជា ដែលមានចំនួនជាង ៣០០នាក់ កំពុងសិក្សានៅក្នុងវិទ្យាល័យនេះ គិតមកត្រឹមឆ្នាំ២០២៥ ហើយនឹងជាកន្លែងព្យាបាលដល់កុមារអូទីស្សឹមឱ្យមានសុខភាពល្អ មានសមត្ថភាព មានទំនាក់ទំនង និងមានរបៀបរស់នៅល្អប្រសើរជាងមុន រួមទាំងនឹងក្លាយជាធនធានមនុស្សមួយសម្រាប់ជាតិកម្ពុជាផងដែរ។ក្នុងឱកាសប្រកបដោយក្តីរីករាយចំពោះសមិទ្ធផលថ្មីនេះ លោកជំទាវបណ្ឌិត បានកោតសរសើរ និងថ្លែងអំណរគុណយ៉ាងជ្រាលជ្រៅជូនដល់ គណៈគ្រប់គ្រង លោកគ្រូ អ្នកគ្រូ នៃវិទ្យាល័យអប់រំពិសេសនេះ ដែលបានស្រឡាញ់ អត់ធ្មត់ និងលះបង់កម្លាំងកាយចិត្តបង្ហាត់បង្រៀនដល់កុមារអូទីស្សឹមទាំងអស់ ព្រោះការអប់រំដល់កុមារអូទីស្សឹមគឺត្រូវការជំនាញពិសេសបំផុតមួយ។សូមបញ្ជាក់ផងដែរថា អូទីស្សឹមជាជំងឺប្រព័ន្ធប្រសាទមួយប្រភេទកើតឡើងលើកុមារដែលគាត់មានការលូតលាស់ខាងសតិបញ្ញាយឺត មានសមត្ថភាពខ្សោយក្នុងការរស់នៅ មានទំនាក់ទំនងទាបបំផុត និងកត្តាសុខភាពផ្សេងស្តែងចេញតាមចរិតលក្ខណៈប្លែកៗរបស់គាត់។ ទោះជាយ៉ាងណាក្តី រាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខ បាននិងកំពុងខិតខំលើកកម្ពស់វិស័យអប់រំទូទាំងប្រទេស ជាពិសេសការអប់រំពិសេសដល់កុមារអូទីស្សឹមកម្ពុជា ដោយមានការផ្គត់ផ្គង់ទាំងទីកន្លែង សម្ភារៈបរិក្ខារចាំបាច់គ្រប់បែបយ៉ាង បច្ចេកទេស និងសមត្ថភាពបង្ហាត់បង្រៀនយ៉ាងពិសេស ដើម្បីធានាថា កុមារទាំងនេះនឹងល្អប្រសើរ អាចក្លាយជាធនធានមនុស្សសម្រាប់ជាតិ៕

ឯកឧត្តម ប៉ែន បូណា៖ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ

ភ្នំពេញ៖ តាមរយៈសន្និសីទសារព័ត៌មាននៅថ្ងៃទី២០ ខែមករា ឆ្នាំ២០២៦នេះ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់ជាថ្មីថា កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ ហើយនេះគឺជាជំហរការពារអធិបតេយ្យភាព និងបូរណភាពទឹកដីដែលមិនអាចធ្វើសម្បទានបានឡើយ។ អ្នកនាំពាក្យរាជរដ្ឋភិបាលបានឱ្យដឹងថា ទន្ទឹមនឹងការគិតគូរដោះស្រាយ និងស្តារឡើងវិញនូវជីវភាពជនភៀសសឹក ក៏ដូចជាហេដ្ឋារចនាសម្ព័ន្ធដែលរងការខូចខាត រាជរដ្ឋាភិបាលក៏កំពុងខិតខំយ៉ាងខ្លាំងផ្នែកនយោបាយការទូតដើម្បីដោះស្រាយបញ្ហាព្រំដែនជាមួយប្រទេសថៃដោយសន្តិវិធីតាមស្មារតីនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាសេចក្តីថ្លែងការណ៍រួមទីក្រុងគូឡាឡំពួរ ចុះថ្ងៃទី២៦ ខែតុលា ឆ្នាំ២០២៥ រួមទាំងកិច្ចព្រមព្រៀងផ្សេងទៀតដែលបានធ្វើកាលពីពេលកន្លងទៅ។ កម្ពុជាបន្តការតវ៉ាយ៉ាងខ្លាំងប្រឆាំងរាល់សកម្មភាពរំលោភបំពានរបស់យោធាថៃនៅតាមព្រំដែនក្នុងអំឡុងពេលអនុវត្តបទឈប់បាញ់។អ្នកនាំពាក្យរាជរដ្ឋាភិបាលបញ្ជាក់ជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ «កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។ នេះគឺជាជំហរការពារអធិបតេយ្យភាព និងបូរណភាពទឹកដីដែលមិនអាចធ្វើសម្បទានបាន»។ នេះបើតាមការបញ្ជាក់របស់ ឯកឧត្តម ប៉ែន បូណា។ បើតាម ឯកឧត្តម ប៉ែន បូណា គិតមកទល់ពេលនេះ មានពលរដ្ឋភៀសសឹកជាង៥សែន១ម៉ឺននាក់ហើយដែលបានវិលត្រឡប់ទៅលំនៅឋានវិញហើយក្នុងចំណោមជនភៀសសឹកសរុបជាង ៦៤ម៉ឺននាក់។ ដូច្នេះ មានពលរដ្ឋភៀសសឹកជាង១៣ម៉ឺននាក់ទៀត ដែលកំពុងបន្តស្នាក់នៅក្នុងមណ្ឌលសុវត្ថិភាពនៅឡើយ ហើយអាជ្ញាធរកំពុងសម្របសម្រួលដើម្បីឱ្យពួកគេវិលទៅកាន់ភូមិឋានរបស់ខ្លួនវិញជាបន្តបន្ទាប់ក្រោមការយកចិត្តទុកដាក់ខ្ពស់ដល់ជីវភាព សុវត្ថិភាព និងសុខុមាលភាពរបស់ពួកគេ។ ចំណែកឯសាលារៀន មន្ទីរពេទ្យ មណ្ឌលសុខភាព និងស្ថាប័នផ្តល់សេវាសាធារណៈជាច្រើនក៏បានបើកដំណើរការឡើងវិញដែរ។ចំណែកប្រជាពលរដ្ឋភៀសសឹកដែលបានវិលត្រឡប់ទៅកាន់លំនៅឋានរបស់ខ្លួនវិញក៏ត្រូវបានរាជរដ្ឋាភិបាល តាមរយៈអាជ្ញាធរមូលដ្ឋាន និងក្រុមការងារពាក់ព័ន្ធយកចិត្តទុកដាក់ជួយដោះស្រាយរាល់បញ្ហានានាដែលពួកគេជួបប្រទះ។ សម្តេចបវរធិបតី នាយករដ្ឋមន្ត្រី បានបញ្ជាក់រួចហើយថា ចំពោះមុខនេះ រាជរដ្ឋាភិបាលផ្តោតការយកចិត្តទុកដាក់ជាពិសេសលើផលប៉ះពាល់លើផលដំណាំ លើស្ថានភាពបំណុល និងការស្តារឡើងវិញជាបន្ទាន់នូវសេវាចាំបាច់ដូចជា សេវាទូរគមនាគមន៍ ទឹក និងភ្លើងអគ្គិសនីជាដើម ដើម្បីបម្រើសេចក្តីត្រូវការចាំបាច់របស់បងប្អូននៅក្នុងមូលដ្ឋាន។ដើម្បីបានព័ត៌មានជាមូលដ្ឋានជាក់លាក់ក្នុងការអន្តរាគមន៍ដោះស្រាយឱ្យមានប្រសិទ្ធភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានតែងតាំងសមាសភាពក្រុមការងារចំពោះកិច្ចមួយកាលពីថ្ងៃទី២៣ ខែធ្នូ ឆ្នាំ២០២៥ ដែលមានភារកិច្ចរៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធដែលខូចខាតដោយការបាញ់ផ្លោង និងទម្លាក់គ្រាប់បែករបស់ទាហានថៃដោយបំពានចូលក្នុងដែនអធិបតេយ្យរបស់កម្ពុជា។ បច្ចុប្បន្ន ក្រុមការងារចំពោះកិច្ចនេះកំពុងចុះពិនិត្យមើលស្ថានភាពជាក់ស្តែងនៅតាមបណ្តាខេត្តជាប់ព្រំដែនដែលរងផលប៉ះពាល់ដើម្បីវាយតម្លៃអំពីការខូចខាតហេដ្ឋារចនាសម្ព័ន្ធស៊ីវិល ក៏ដូចជាផលប៉ះពាល់លើជីវភាពរបស់ប្រជាពលរដ្ឋដើម្បីរាជរដ្ឋាភិបាលចាត់វិធានការដោះស្រាយ៕

NEA រៀបចំសិក្ខាសាលាស្ដីពី៖ ការរៀបចំផែនការអាជីព និងការជ្រើសរើសជំនាញសិក្សាដល់សិស្សវិទ្យាល័យ

មជ្ឈមណ្ឌលការងារខេត្តតាកែវរបស់ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំសិក្ខាសាលាស្ដីពី៖ ការរៀបចំផែនការអាជីព និងការជ្រើសរើសជំនាញសិក្សា ដល់សិស្សានុសិស្សមធ្យមសិក្សាទុតិយភូមិ ដែលត្រៀមនឹងបញ្ចប់ការសិក្សានៅថ្នាក់វិទ្យាល័យ នៅវិទ្យាល័យសុខអានថ្នល់បំបែក នាថ្ងៃទី២០ ខែមករា ឆ្នាំ២០២៥ ។សិក្ខាសាលានេះរៀបចំឡើងក្នុងគោលបំណងតម្រង់ទិសដល់សិស្សមធ្យមសិក្សាទុតិយភូមិ និងការចែករំលែកពីគន្លឹះសំខាន់ៗក្នុងការត្រៀមខ្លួនជ្រើសរើសជំនាញសិក្សាសម្រាប់ថ្នាក់ឧត្តមសិក្សា ការរៀបចំផែនការអាជីព និងការសិក្សា និងព័ត៌មានទីផ្សារការងារដល់យុវជនផងដែរ។

យល់ដឹងពីភាពខុសគ្នារវាងអ័ព្ទ (Fog) និងអ័ព្ទផ្សែង (Haze) នៅក្នុងខ្យល់

ភ្នំពេញ៖ អ័ព្ទ និងអ័ព្ទផ្សែង គឺជាបាតុភូតបរិយាកាសដែលគេជួបឃើញជាញឹកញាប់ ហើយជាញឹកញាប់ត្រូវបានយល់ច្រឡំថាជារឿងដូចគ្នា។ ទោះជាយ៉ាងណា បាតុភូតទាំងពីរនេះមានប្រភព ការបង្កើត និងផលប៉ះពាល់ខុសគ្នា ជាពិសេសចំពោះសុខភាពមនុស្ស និងបរិស្ថាន។ ការយល់ដឹងពីភាពខុសគ្នារវាងអ័ព្ទ និងអ័ព្ទផ្សែងមានសារៈសំខាន់ក្នុងការបកស្រាយបញ្ហាគុណភាពខ្យល់ និងការការពារសុខភាពសាធារណៈ។ជាមុនសិន អ័ព្ទ (Fog) គឺជាបាតុភូតធម្មជាតិដែលកើតឡើងនៅពេលខ្យល់មានសំណើមខ្ពស់ ហើយសីតុណ្ហភាពធ្លាក់ចុះដល់ចំណុចដែលឧស្ម័នទឹកក្លាយជាចំណុចទឹកតូចៗ ឬគ្រីស្តាល់ទឹកកក ដែលព្យួរនៅជិតផ្ទៃដី។ អ័ព្ទភាគច្រើនកើតឡើងនៅពេលព្រឹកព្រលឹម ឬពេលយប់ ជាពិសេសនៅតំបន់ភ្នំ ជិតទន្លេ បឹង ឬសមុទ្រ។ អ័ព្ទធ្វើឱ្យការមើលឃើញថយចុះ ប៉ុន្តែ មិនមានសារធាតុពុល ហើយជាទូទៅមិនបង្កគ្រោះថ្នាក់ដល់សុខភាពមនុស្សនោះទេ លើកលែងតែប៉ះពាល់ដល់សុវត្ថិភាពចរាចរណ៍។ផ្ទុយទៅវិញ អ័ព្ទផ្សែង (Haze) គឺជាបាតុភូតដែលកើតឡើងពីការបំពុលខ្យល់។ វាបង្កឡើងដោយការប្រមូលផ្តុំភាគល្អិតល្អិត និងឧស្ម័នពុលនៅក្នុងបរិយាកាស ដូចជា៖ PM2.5 ផ្សែងយានយន្ត ការបញ្ចេញឧស្ម័នពីរោងចក្រ ការដុតសំរាម និងអគ្គីភ័យព្រៃឈើ។ អ័ព្ទផ្សែងធ្វើឱ្យមេឃមើលទៅពណ៌ប្រផេះ ឬលឿង និងបន្ថយការមើលឃើញរយៈពេលយូរ ជាពិសេសនៅតំបន់ទីក្រុង និងតំបន់ឧស្សាហកម្ម។ភាពខុសគ្នាសំខាន់មួយទៀតគឺសមាសធាតុ។ អ័ព្ទបង្កឡើងដោយទឹកសុទ្ធជាចម្បង ខណៈអ័ព្ទផ្សែងមានផ្ទុកភាគល្អិតពុល និងសារធាតុគីមីគ្រោះថ្នាក់។ ដោយសារតែសមាសធាតុនេះអ័ព្ទផ្សែង មានផលប៉ះពាល់ធ្ងន់ធ្ងរដល់សុខភាព ដូចជា៖ ជំងឺផ្លូវដង្ហើម ជំងឺហឺត ជំងឺបេះដូង និងមហារីក នៅពេលប៉ះពាល់រយៈពេលវែង។ កុមារ មនុស្សចាស់ និងអ្នកមានជំងឺប្រចាំកាយ គឺជាក្រុមងាយរងគ្រោះជាងគេ។ពីមុខងារ និងរយៈពេលអ័ព្ទភាគច្រើន ជាបាតុភូតបណ្តោះអាសន្ន ដែលរលាយបាត់នៅពេលព្រះអាទិត្យឡើងកម្តៅ និងសីតុណ្ហភាពកើនឡើង។ អ័ព្ទផ្សែងវិញអាចនៅយូរជាច្រើនថ្ងៃ ឬសប្តាហ៍ ប្រសិនបើមិនមានខ្យល់ ឬភ្លៀងជួយបណ្តេញភាគល្អិតចេញពីបរិយាកាស។ នេះធ្វើឱ្យអ័ព្ទផ្សែងក្លាយជាបញ្ហាបរិស្ថាន និងសុខភាពសាធារណៈធ្ងន់ធ្ងរ។សរុបមក អ័ព្ទ និងអ័ព្ទផ្សែង ខុសគ្នាតាំងពីប្រភព សមាសធាតុ រយៈពេល និងផលប៉ះពាល់។ អ័ព្ទ ជាបាតុភូតធម្មជាតិដែលភាគច្រើនគ្មានគ្រោះថ្នាក់ ខណៈអ័ព្ទផ្សែង ជាលទ្ធផលនៃការបំពុលខ្យល់ដែលបណ្តាលមកពីសកម្មភាពមនុស្ស និងមានគ្រោះថ្នាក់ដល់សុខភាព និងសង្គម។ ការយល់ដឹងពីភាពខុសគ្នានេះជួយឲ្យប្រជាពលរដ្ឋអាចការពារខ្លួនបានល្អប្រសើរ និងជំរុញឱ្យមានវិធានការកាត់បន្ថយការបំពុលខ្យល់ ដើម្បីធានាបរិយាកាសស្អាត និងជីវិតមានគុណភាពល្អសម្រាប់មនុស្សទាំងអស់៕

បណ្ដាញសង្គម

ព័ត៌មានថ្មីៗ

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877