នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
កម្ពុជាបន្តស្នើទៅថៃឱ្យរៀបចំកិច្ចប្រជុំពិសេសបន្ទាន់ JBC និងជំរុញឱ្យបន្តអនុវត្តការងារនៅលើដីជាក់ស្តែង
គណៈកម្មការគ្រប់គ្រងល្បែងពាណិជ្ជកម្មកម្ពុជានឹងចាត់វិធានការ​តាមផ្លូវច្បាប់ចំពោះម្ចាស់កាស៊ីណូផ្តល់ទីតាំងឱ្យក្រុមឧក្រិដ្ឋជនប្រព្រឹត្តបទល្មើស Online Scams
សម្ដេចធិបតី នាយករដ្ឋមន្ត្រី អញ្ជើញចូលរួមកិច្ចប្រជុំចង្អៀតជាមួយ ប្រធានាធិបតីបារាំង, អគ្គនាយក WHO និងមេដឹកនាំប្រទេសមួយចំនួនទៀត

ព័ត៌មានជាតិ

រដ្ឋបាលខេត្តព្រះសីហនុ បានបើកវគ្គបណ្តុះបណ្តាលស្តីពីការគ្រប់គ្រងសំរាម សំណល់រឹង ទីប្រជុំជន

2026/03/25 12:25:14 pm        105
Facebook Telegram Linkin
ថ្ងៃទី២៤ ខែមីនា ឆ្នាំ២០២៦ លោក ឡុង ឌីម៉ង់ អភិបាលរងខេត្តព្រះសីហនុ បាន​អញ្ជើញ​ជា​អធិបតី​ក្នុង​ពិធីបើកវគ្គបណ្តុះបណ្តាល ស្តីពី ការគ្រប់គ្រងសំរាម សំណល់រឹង ទីប្រជុំជន ដោយ​មាន​ការ​ចូលរួមពីតំណាងមន្ទីរ-អង្គភាពពាក់ព័ន្ធ នៅសណ្ឋាគារ Seascape Palace ខេត្តព្រះសីហនុ​។បន្ថែមពីលើការសំណេះសំណាល លោកអភិបាលរង បានគួសបញ្ជាក់ថាបញ្ហាសំរាម សំណល់​រឹង​ទី​ប្រជុំ​ជន និងសំណល់ប្លាស្ទិក ជាបញ្ហាសមូហភាព ដែលទាមទារជាដាច់ខាតនូវ ការចូលរួម​ពី​សំណាក់​គ្រប់​ភាគី និងគ្រប់ស្ថាប័ន អង្គភាពទាំងអស់ ហើយត្រូវចាប់ផ្តើមចេញពីខ្លួនយើង និង​ពង្រឹក​ទៅ​កាន់មនុស្សជុំវិញខ្លួន។ យើងក៏ត្រូវការជាចាំបាច់នូវការជំរុញ និងការគាំទ្រនានា សំដៅ​ធ្វើ​យ៉ាង​ណា​ពង្រឹងការយល់ដឹង និងពង្រឹងឆន្ទៈក្នុងការចូលរួមពីគ្រប់ភាគី ព្រោះបើមាន​ការ​យល់​ដឹង​ហើយ​ តែនៅខ្វះឆន្ទៈអនុវត្ត នោះយើងពិតជាមិនអាចសម្រេចបាននូវភាពស្អាតក្នុងសហគមន៍ ក៏​ដូចជាក្នុងខេត្តទាំងមូល ដែលបង្ហាញពីតម្លៃ និងសេចក្តីថ្លៃថ្នូររបស់ខេត្តឡើយ។ជាមួយគ្នានេះ លោកអភិបាលរងក៏បានអំពាវនាវដល់អ្នកចូលរួមទាំងអស់ សូម​ងាក​មក​ចាប់​យក​ទម្លាប់​ល្អ ​និងស្វែងយល់ឱ្យកាន់តែច្បាស់បន្ថែមអំពី ការគ្រប់គ្រងសំរាម សំណល់រឹង និងវិធីសាស្រ្ត​នានា​ក្នុង​កាត់​បន្ថយសំណល់ប្លាស្ទិក ដើម្បីរួមគ្នាកសាងកម្ពុជាស្អាត ព្រះសីហនុស្អាត គ្មាន​សំណល់​ប្លាស្ទិក​៕

មេសិទ្ធិមនុស្សកម្ពុជា៖ ការអនុវត្តយ៉ាងម៉ឺងម៉ាត់បទដ្ឋានសិទ្ធិមនុស្ស និងសន្ធិសញ្ញាអន្តរជាតិ ជា​ការ​ប្តេជ្ញា​ចិត្ត​លើក​កម្ពស់ និងការការពារសិទ្ធិមនុស្សរបស់កម្ពុជា

2026/03/25 12:11:34 pm        203
Facebook Telegram Linkin
រតនគិរី៖ ឯកឧត្តម កែវ រ៉េមី ទេសរដ្ឋមន្រ្តី ប្រធានគណៈកម្មាធិការសិទ្ធិមនុស្សកម្ពុជា បាន​អញ្ជើញ​ជា​អធិបតី​ដ៏ខ្ពង់ខ្ពស់​ក្នុង​ពិធី​បើក​សិក្ខាសាលា​ផ្សព្វ​ផ្សាយ​របាយការណ៍​ជាតិ​ពី​ការ​អនុវត្ត​អនុ​សញ្ញា​អន្តរជាតិ​ស្តីពីកា​រលុបបំបាត់រាល់ទម្រង់នៃការរើសអើងពូជសាសន៍ ក្រោមកិច្ចសហការ​រវាង​គ​ណៈ​កម្មាធិការ​សិទ្ធិ​មនុស្សកម្ពុជា និងរដ្ឋបាលខេត្តរតនគិរី នាព្រឹកថ្ងៃទី២៤ ខែមីនា ឆ្នាំ២០២៦ នៅសាល​មហោ​ស្រពខេត្តរតនគិរី។ថ្លែងក្នុងឱកាសនោះ ឯកឧត្តមទេសរដ្ឋមន្ត្រី បានលើកឡើងថា ការផ្តល់សច្ចាប័នលើសន្ធិ​សញ្ញា​អន្តរជាតិ​ ស្តីពីសិទ្ធិមនុស្សចំនួន ៨ ក្នុងចំណោម៩ និងការអនុវត្តយ៉ាង​ម៉ឺងម៉ា​ត់​នូវ​រាល់​បទ​ដ្ឋាន​សិទ្ធិ​មនុស្សអន្តរជាតិ និងសន្ធិសញ្ញាអន្តរជាតិស្តីពីសិទ្ធិមនុស្សដែលកម្ពុជាជារដ្ឋភាគី បាន​បង្ហាញ​ពីការ​ប្តេជ្ញាចិត្តដ៏មុតមាំ ក្នុងការគោរព ការលើកកម្ពស់ និងការការពារសិទ្ធិមនុស្ស។ កម្ពុជា​បាន​ខិត​ខំ​លុបបំបាត់រាល់ទម្រង់នៃការរើសអើង ដោយមិនគិតពណ៌សម្បុរ ភេទ ជាតិសាសន៍ ស្រប​តាម​គោល​នយោបាយ “មិនទុកនរណាម្នាក់ចោល”។ ក្នុងន័យនេះ ក៏រួមបញ្ចូលទាំង​ការ​មិន​រើស​អើង​ចំពោះ​អ្នក​ស្រឡាញ់ភេទដូចគ្នា (LGBT) ផងដែរ ដោយពួកគេត្រូវ​បាន​លើក​ទឹក​ចិត្ត​ និ​ង​គាំទ្រ​ឱ្យមា​នការចូលរួមក្នុងសង្គមយ៉ាងស្មើភាព និងមានសក្តានុពលដូចគ្នា។ភ្ជាប់ទៅ​នឹងគោលការណ៍មិនរើសអើងពូជសាសន៍នេះ រាជរដ្ឋាភិបាលកម្ពុជា នៅតែបន្ត​រក្សា​គោល​ជំហរ​ដ៏​ច្បាស់​លាស់ក្នុងការមិនរើសអើង ទោះបីជាកម្ពុជា​កំពុង​ប្រឈម​នឹង​វិបត្តិ​ជម្លោះ​ព្រំដែន​ជា​មួយ​ប្រទេស​ថៃក៏ដោយ។ ជាក់ស្តែង សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាន​ផ្តល់​អនុសាសន៍ណែនាំដល់មន្ត្រីរាជការគ្រប់ជាន់ថ្នាក់ និងប្រជាពលរដ្ឋទូទៅ ឱ្យគោរព​អនុវត្ត​ច្បាប់​ជាធរមានយ៉ាងម៉ឺងម៉ាត់ ដោយមិនត្រូវមានការរើសអើង មិនប្រើអំពើហិង្សា ឬបង្កគ្រោះ​ថ្នាក់​ណាមួ​យ​ចំពោះប្រជាជន ពលករ ឬអ្នកជំនួញជនជាតិថៃ ដែលកំពុងរស់នៅ និងបំពេញ​ការងារ​នៅ​ក្នុង​ប្រទេសកម្ពុជា ដែលអាចនាំឱ្យកើតមានការរើសអើងពូជសាសន៍ ឬជាតិសាសន៍ឡើយ។លើស​ពីនេះទៅទៀត ជនជាតិថៃដែលកំពុងជាប់ឃុំនៅក្នុងពន្ធនាគារ ក៏ទទួល​បាន​ការ​ធានា​សុវត្ថិភាព និងការពារយ៉ាងត្រឹមត្រូវ ដោយគ្មានអំពើហិង្សាណាមួយឡើយ។ ទាំងនេះ​បង្ហាញ​យ៉ាង​ច្បាស់​ពី​ការគោរពតម្លៃមនុស្សជាតិ និងការប្តេជ្ញាចិត្តរបស់កម្ពុជា ក្នុងការរក្សាសន្តិភាព និង​សហ​អភិវឌ្ឍ​ជាមួ​យប្រទេសជិតខាង ដែលផ្ទុយពីរដ្ឋាភិបាលថៃ ដែលតែងអះអាង​ថា​ជាប្រទេស​ស៊ីវិល័យ ​និងគោរពច្បាប់អន្តរជាតិ ប៉ុន្តែបានប្រព្រឹត្តសកម្មភាពឈ្លានពាន និងអំពើល្មើ​ស​ច្បាប់​អន្តរជាតិ​ ច្បាប់សិទ្ធិមនុស្ស និងច្បាប់មនុស្សធម៌អន្តរជាតិគ្រប់បែបយ៉ាង រួមមានការ​បិទ​ច្រក​ព្រំដែន​ដោយ​ឯកតោភាគី ការចាប់ខ្លួនទាហានខ្មែរ ២០ នាក់ដោយខុសច្បាប់ ការរំលោភ​បូក​លើ​ពលការិនី​កម្ពុជា ការប្រើអំពើហិង្សាលើពលករខ្មែរ ដែលរស់នៅក្នុងប្រទេសថៃ ការប្រើប្រាស់​សំឡេង​រំខាន​ដោយហ្រ្វេកង់ខ្ពស់ ការប្រើប្រាស់គ្រាប់បែកចង្កោម ដែលជាអាវុធត្រូវបានហាមឃាត់ និងការបាញ់ប្រហារលើជនស៊ីវិល និងទីសាធារណៈជាដើម។ទន្ទឹមនេះ ឯកឧត្តមទេសរដ្ឋមន្រ្តី បានគូសបញ្ជាក់ថា រាជរដ្ឋាភិបាលកម្ពុជា នៅតែប្រកាន់ជំហរយ៉ាងម៉ឺងម៉ាត់ក្នុងការពារអធិបតេយ្យភាព និងបូរណភាពទឹកដី តាមរយៈវិធានការការទូត និងច្បាប់ ព្រមទាំងយន្ដការនានាទាំងកម្រិតតំបន់ អាស៊ាន និងអន្តរជាតិ។ គណៈកម្មាធិការសិទ្ធិមនុស្សកម្ពុជា ក៏បានរួមចំណែកជាមួយរាជរដ្ឋាភិបាល ដោយបានចេញញត្តិប្តឹងតវ៉ា សេចក្តីថ្លែងការណ៍ ការថ្កោលទោស និងលិខិតផ្សេងៗ សរុបចំនួន ៦០ ព្រមទាំងបានទៅបំពេញបេសកកម្មសិទ្ធិមនុស្សនៅទីក្រុងហ្សឺណែវ ប្រទេសស្វ៊ីស ដោយបានជួបពិភាក្សាទ្វេភាគីផ្សេងៗចំនួន ២៩ ជំនួប រួមមាន ក្រុមប្រឹក្សាសិទ្ធិមនុស្សអង្គការសហប្រជាជាតិ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បណ្តាប្រទេសដែលជាសមាជិកក្រុមប្រឹក្សាសិទ្ធិមនុស្ស ព្រមទាំងអ្នករាយការណ៍ពិសេសទទួលបន្ទុកសិទ្ធិតាមវិស័យនានាដើម្បីប្រាប់ពីស្ថានភាពពិតជាក់ស្តែងនូវទង្វើឈ្លានពានរបស់ថៃមកលើកម្ពុជា។ឯកឧត្តមទេសរដ្ឋមន្រ្តី បានកោតសរសើរចំពោះ ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី ដែលបានដឹកនាំយ៉ាងស្វាហាប់ ក្នុងការរៀបចំនិងអភិវឌ្ឍខេត្តឱ្យមានភាពរីកចម្រើនគួរឱ្យកត់សម្គាល់។ ឯកឧត្តមបានដឹងច្បាស់ពីសក្តានុពល និងតម្រូវការអភិវឌ្ឍបន្ថែមដើម្បីជំរុញខេត្តឱ្យកាន់តែរីកចម្រើន។ ជាមួយគ្នានេះ ការសហការរវាងរដ្ឋបាលខេត្តរតនគិរី ជាមួយគណៈកម្មាធិការសិទ្ធិមនុស្សកម្ពុជា ក្នុងការផ្សព្វផ្សាយរបាយការណ៍ជាតិពីការអនុវត្តអនុសញ្ញាអន្តរជាតិស្តីពីការលុបបំបាត់រាល់ទម្រង់នៃការរើសអើងពូជសាសន៍ថ្ងៃនេះ មានសារៈសំខាន់ណាស់ ក្នុងការបង្ហាញពីកិច្ចខិតខំប្រឹងប្រែង និងសមិទ្ធផលសំខាន់ៗរបស់រាជរដ្ឋាភិបាល។ ព្រមទាំងជំរុញការចូលរួមពីអង្គភាពថ្នាក់ជាតិ និងក្រោមជាតិ ក្នុងការបន្តរក្សា ការពារ និងលើកកម្ពស់សិទ្ធិមនុស្សនៅកម្ពុជា។បន្ថែមពីនេះ ឯកឧត្តមទេសរដ្ឋមន្រ្តី បានបញ្ជាក់ជូនអង្គសិក្ខាសាលាថា បញ្ហាទឹកដីគឺជារឿងអាយុជីវិតសំខាន់បំផុតសម្រាប់ជាតិ ដែលរាជរដ្ឋាភិបាលកំពុងបន្ដទាមទារយកត្រឡប់មកវិញជាដាច់ខាត ពីការកាន់កាប់ដោយខុសច្បាប់របស់យោធាថៃ។ ឯកឧត្តមទេសរដ្ឋមន្រ្តី ក៏បានអំពាវនាវឱ្យប្រជាពលរដ្ឋបន្ដជឿជាក់និងទុកចិត្តលើរាជរដ្ឋាភិបាលក្នុងការដោះស្រាយបញ្ហានេះ ព្រមទាំងត្រូវរួបរួមសាមគ្គីគ្នាជាធ្លុងដើម្បីការពារនិងកសាងជាតិឱ្យរីកចម្រើនជាលំដាប់៕ 

រដ្ឋមន្ត្រីក្រសួងយុត្តិធម៌៖ កម្ពុជាជាប្រទេសឈានមុខគេ​ក្នុងតំបន់បាន​បង្កើត​ច្បាប់​ព្រហ្ម​ទណ្ឌ​ពិសេស​ពាក់ព័ន្ធ​ការ​ឆបោកតាមប្រព័ន្ធបច្ចេកវិទ្យា

2026/03/25 11:10:18 am        305
Facebook Telegram Linkin
រដ្ឋមន្ត្រីក្រសួងយុត្តិធម៌បញ្ជាក់ថា ប្រទេសកម្ពុជាជាប្រទេសឈានមុខគេក្នុងតំបន់ ក្នុង​ការ​បង្កើត​ច្បាប់​ព្រហ្ម​ទណ្ឌ​ពិសេស ពាក់ព័ន្ធការឆបោកតាមប្រព័ន្ធបច្ចេកវិទ្យា ដោយ​បាន​កំណត់​ទោស​យ៉ាង​ធ្ងន់​ធ្ងរ​បំផុត​រហូត​ដល់​ជាប់​ពន្ធនាគារ​អស់​មួយ​ជីវិត​ចំពោះ​មេខ្លោង​ដែល​បង្ក​ឲ្យ​មាន​ការ​បាត់ប​ង់​ជីវិត​នៅ​ក្នុង​មជ្ឈមណ្ឌលឆបោក។ឯកឧត្តម ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌បានមានប្រសាសន៍ប្រាប់ BTV នៅ​ព្រឹក​ថ្ងៃ​ទី២៥​ខែមីនានេះថា ក្នុងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា នឹង​បង្កើត​ឲ្យ​មាន​​បទល្មើសបន្ថែមចំនួន៥ ដោយក្នុងនោះមានទោសពី ៥ឆ្នាំ ទៅ ១០ឆ្នាំ និងកើនរហូតដល់ ៣០​ឆ្នាំ ​ឬអស់មួយជីវិត បើក្នុងករណីមានសម្លាប់មនុស្ស ចាប់ជម្រិតជាដើម។ ហើយ​ច្បាប់​នេះ​នឹងត្រូ​វ​បាន​អនុម័ត​នៅ​ពេល​ខាង​មុខនេះ ក្នុង​ការ​លើក​កម្ពស់​ប្រសិទ្ធ​ភាព​ក្នុង​ការ​បោស​សម្អាត​ការ​ឆបោក​តាម​ប្រព័ន្ធ​បច្ចេក​វិទ្យា​ក្នុង​ទ្រង់​ទ្រាយ​ជា​យន្តនាការ​ដែល​រាជ​រដ្ឋាភិបាល​បាន​ដាក់​ចេញ​កន្លង​មក​នេះ។​ ច្បាប់នេះនឹងចូលរួមចំណែកក្នុងការធានាថា ការឆបោក​តាម​ប្រព័ន្ធ​បច្ចេក​វិទ្យា​នឹង​មិន​កើត​មាន​ជា​ថ្មីទេ ក្រោយពេលដែលរាជរដ្ឋាភិបាលបានបោសសម្អាតរួច។ឯកឧត្តមថ្លែងថា ប្រទេសកម្ពុជា ជាប្រទេសឈានមុខគេ​ក្នុង​តំបន់​បាន​បង្កើត​ច្បាប់​ព្រហ្ម​ទណ្ឌ​ពិសេស ​ស្ដីពីការឆបោកតាមប្រព័ន្ធបច្ចេកវិទ្យា ដោយបានកំណត់​ទោស​ទណ្ឌ​យ៉ាង​ធ្ងន់​ធ្ងរ​បំផុត​ចំពោះ​ឧក្រិដ្ឋ​ជន​រហូតដល់ជាប់ពន្ធនាគារពី ៣០ឆ្នាំ ដល់អស់មួយជីវិត​ក្នុង​ករណី​មាន​បទ​ល្មើស​ផ្សេង​ទៀត​កើត​ឡើង ឬមេខ្លោងដែលបង្ក​ឲ្យមាន​ការ​បាត់​បង់​ជីវិត​នៅ​ក្នុង​បទ​ល្មើស​ឆបោក​ដែល​ពួក​គេ​បាន​ប្រព្រឹត្ត»។សូមជម្រាបថា នៅថ្ងៃទី២៤ ខែមីនា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រី​ក្រសួង​យុត្តិធម៌​ បានអញ្ជើញផ្តល់ការពន្យល់ និងបំភ្លឺអំពីភាពចាំបាច់ និងគោល​បំណង​យុទ្ធសាស្ត្រ​នៃ​សេចក្តីព្រាងច្បាប់ពីការប្រឆាំងការឆបោកតាមប្រព័ន្ធបច្ចេកវិទ្យា ជូនអន្តរ​គណៈកម្មការ​ជំនាញ​នៃ​រដ្ឋសភា។ តំណាង​រាជរដ្ឋាភិបាល​បាន​គូស​បញ្ជាក់​ជូន​អន្ត​រ​គណៈកម្មការ​រដ្ឋសភា​ថា ​ឧក្រិដ្ឋកម្មឆបោកឆ្លងដែនតាមប្រព័ន្ធបច្ចេកវិទ្យាបានវិវត្តក្លាយជាកង្វល់សកល ដែល​ទាម​ទារ​ឱ្យ​កម្ពុជាមាន "ឧបករណ៍គតិយុត្តិ" ដ៏រឹងមាំសម្រាប់បង្ក្រាប។ សេចក្តីព្រាងច្បាប់នេះមាន ៥ ជំពូក និង ២៤ មាត្រា ដោយក្នុងនោះបានកំណត់បង្កើតបទល្មើសព្រហ្មទណ្ឌថ្មីចំនួន ៥ បន្ថែម​ទៀត ​រួមមាន៖ បទឆបោកតាមប្រព័ន្ធបច្ចេកវិទ្យា, បទរៀបចំឬដឹកនាំមជ្ឈមណ្ឌលឆបោក, បទ​ជ្រើស​រើសឬបណ្តុះបណ្តាលបុគ្គលឱ្យប្រព្រឹត្តបទល្មើស, បទប្រមូល​ទិន្នន័យ​ឯកជន​ក្នុង​ចេតនា​ទុច្ចរិត​ និងការបង្កើតទម្រង់ពិសេសនៃបទល្មើសសម្អាតប្រាក់៕ អត្ថបទ៖ វង្ស សុភាព 

ក្របខ័ណ្ឌយុទ្ធនាការ «ខ្មែរត្រូវតែខ្លាំង» ដើម្បីបញ្ជាក់ពីការចូលរួមចំណែកលើកតម្កើងវិស័យទេសចរណ៍កម្ពុជាឱ្យកាន់តែរឹងមាំ

2026/03/25 11:09:09 am        105
Facebook Telegram Linkin
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញទទួលជួបពិភាក្សាការងារជាមួយវិទ្យាស្ថានស៊ីអ៊ីអូ ដឹកនាំដោយ ឯកឧត្តមបណ្ឌិត អោម សេងបូរ៉ា ប្រធានក្រុមប្រឹក្សាភិបាល នៃវិទ្យាស្ថានស៊ីអ៊ីអូ ព្រមទាំងសហការីសរុបចំនួន ៧០នាក់ ក្នុងគោលបំណងពង្រឹងកិច្ចសហប្រតិបត្តិការរវាងក្រសួងទេសចរណ៍ និងវិទ្យាស្ថានស៊ីអ៊ីអូ ក្នុងការអភិវឌ្ឍធនធានមនុស្ស និងការចូលរួមលើកកម្ពស់វិស័យទេសចរណ៍នៅកម្ពុជា។ក្នុងឱកាសនោះ ឯកឧត្តមរដ្ឋមន្ត្រី បានលើកឡើងអំពីយុទ្ធសាស្ត្រសំខាន់ៗរបស់ក្រសួង ក្នុងការជំរុញវិស័យទេសចរណ៍ឱ្យមានភាពប្រកួតប្រជែង និងមានចីរភាព ជាពិសេសការផ្តោតលើការបណ្តុះបណ្តាលធនធានមនុស្សដែលមានជំនាញ និងគុណភាពខ្ពស់។ជាមួយគ្នានេះ ឯកឧត្តមបណ្ឌិត បានបង្ហាញពីតួនាទី និងសកម្មភាពរបស់វិទ្យាស្ថានស៊ីអ៉ីអូ ក្នុងការរៀបចំស្តង់ដាសម្រាប់អាជីវកម្មក្នុងវិស័យទេសចរណ៍កម្ពុជា ការកសាងសមត្ថភាពសម្រាប់សហគ្រិនវិស័យទេសចរណ៍ ពោលគឺផ្តល់ការអប់រំ និងបណ្តុះបណ្តាលជំនាញដល់យុវជន និងមន្ត្រីជំនាញ ដើម្បីឆ្លើយតបទៅនឹងតម្រូវការនៃទីផ្សារការងារ និងការអភិវឌ្ឍសេដ្ឋកិច្ចជាតិ ពិសេសឯកឧត្តមបណ្ឌិត ក៏បានស្នើសុំពិនិត្យលទ្ធភាពចុះ MoU ក្រោមយុទ្ធនាការ “ខ្មែរត្រូវតែខ្លាំង” ដើម្បីជួយជំរុញការអភិវឌ្ឍវិស័យទេសចរណ៍កម្ពុជាឱ្យកាន់តែខ្លាំង និងមាននិរន្តរភាព។ជាមួយគ្នានេះ ឯកឧត្តមបណ្ឌិត ក៏បានពិភាក្សាអំពីការរៀបចំកម្មវិធីបណ្តុះបណ្តាល ការស្រាវជ្រាវ និងការចែករំលែកបទពិសោធន៍ ដើម្បីរួមចំណែកលើកកម្ពស់គុណភាពសេវាកម្មទេសចរណ៍ និងបង្កើនភាពទាក់ទាញដល់ភ្ញៀវទេសចរជាតិ និងអន្តរជាតិ។ជំនួបបានប្រព្រឹត្តទៅក្នុងបរិយាកាសស្និទ្ធស្នាលនេះត្រូវបានចាត់ទុកថាជាជំហានសំខាន់មួយ ក្នុងការពង្រឹងទំនាក់ទំនង និងកិច្ចសហប្រតិបត្តិការរវាងរដ្ឋ និងវិស័យអប់រំ ដើម្បីជំរុញការអភិវឌ្ឍវិស័យទេសចរណ៍ឱ្យកាន់តែរីកចម្រើន និងមានប្រសិទ្ធភាពខ្ពស់៕

ម្ចាស់អាជីវកម្មជាស្ត្រីបង្ហាញគោលជំហ មិនដំឡើងថ្លៃទំនិញ គាំទ្រដល់អ្នកប្រើប្រាស់ក្នុងស្ថានភាពលំបាក

2026/03/25 10:37:55 am        146
Facebook Telegram Linkin
ម្ចាស់អាជីវកម្មជាស្ត្រី បង្ហាញនូវគោលជំហខ្ពស់ ក្នុងកាពង្រឹង និងពង្រីកការផលិតឱ្យមានទំហំកាន់តែធំ ដើម្បីរុញចូលទីផ្សារ ជាពិសេសការប្តេជ្ញាចិត្តមិនឡើងថ្លៃលើមុខទំនិញរបស់ខ្លួនដើម្បីគាំទ្រដល់តម្រូវការរបស់ប្រជាពលរដ្ឋ និងដើម្បីចូលរួមចំណែកក្នុង សេដ្ឋកិច្ចជាមួយរាជរដ្ឋាភិបាល។  ម្ចាស់អាជីវកម្មជាស្រ្តី ដែលផលិតគ្រឿងបរិភោគ-ឧបភោគ, សម្លៀកបំពាក់ គ្រឿងសំអាង និងគ្រឿងអលង្ការ ដែលចូលរួមក្នុង ពិព័រណ៍ផលិតផល នៅក្នុងសន្និបាតបូកសរុបលទ្ធផលការងារប្រចាំឆ្នាំ២០២៥ និងខួបអនុស្សាវរីយ៍ឆាំ្នទី១៤ របស់សមាគមសហគ្រិន ស្ត្រីកម្ពុជា បានផ្តល់កិច្ចសម្ភាសន៍ជាមួយ BTV ថា នៅក្នុងអន្តរកាលនៃជម្លោះព្រំដែនដែលបង្កដោយប្រទេសជិតខាង ខ្សែច្រវាក់ផលិត- កម្មក្នុងស្រុកបានចាប់ផ្តើមងើបឡើងជាបណ្តើរៗ ដោយបាននិងកំពុងជំរុញផលិតទំនិញបម្រើតម្រូវការទីផ្សារ និងបានបង្ហាញឱ្យឃើញ នូវភាពរឹងមាំជាបណ្តើរៗ ក្នុងកិច្ចដំណើរការអាជីវកម្ម ព្រមទាំងជំរុញបង្កើតនូវផលិតផលថ្មីៗឱ្យកាន់តែសម្បូរបែប ដើម្បីភាព រីកម្រើននៅក្នុងប្រទេស។ សហគ្រិនស្រ្តីទាំងនោះ លើកឡើងស្រដៀងគ្នាទៀតថា ចំណែកបច្ចុប្បន្ន ខណៈតម្លៃប្រេងឥន្ធនៈឡើងថ្លៃ ពិតណាស់និងធ្វើឱ្យ ម្ចាស់អាជីវកម្មជួបប្រទះនៅក្នុងខ្សែច្រវាក់ផលិតកម្មរបស់ខ្លួន ព្រោះការផលិតមួយចំនួនត្រូវទិញសំបកវិចខ្ចប់ និងការប្រមូលទិញវត្ថុ ធាតុដើមសម្រាប់ផ្គត់ផ្គង់ការផលិតជាដើម។ តែទោះបីមានបញ្ហាប្រឈមខ្លះៗ ពួកគាត់នៅតែបង្កើនការផលិត និងកែច្នៃដើម្បីរុញចូល ទីផ្សារជាបន្តបន្ទាប់ ជាពិសេសការប្តេជ្ញាចិត្តមិនឡើងថ្លៃនៅក្នុងស្ថានភាពដ៏លំបាកនេះ ដើម្បីឆ្លើយតបទៅនិងតម្រូវការហូបចុក ឬផ្គត់ ផ្គង់ការប្រើប្រាស់របស់ប្រជាពលរដ្ឋ និងដើម្បីចូលរួមចំណែកក្នុងសេដ្ឋកិច្ចជាមួយរាជរដ្ឋាភិបាលផងដែរ។លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី សូមលើកទឹកចិត្តដល់សហគ្រិនស្ត្រីទាំងអស់ ត្រូវផ្តោតការយក ចិត្តទុកដាក់ខ្ពស់លើការពង្រឹងគុណភាព និងស្តង់ដារផលិតផល ក៏ដូចជាសេវាកម្មរបស់ខ្លួន ដើម្បីកសាង និងរក្សាឱ្យបាននូវទំនុកចិត្តពី សំណាក់អតិថិជនទាំងក្នុងជាតិនិងអន្តរជាតិ ខណៈបច្ចុប្បន្នផលិតផលខ្មែរ មានចំណែកលើទីផ្សារជិត ៣០% ប៉ុណ្ណោះ និងប្រមាណ ជាង ៧០% ជាផលិតផលដែលនាំចូល ដូច្នេះយើងត្រូវរួមគ្នាយកចិត្តទុកដាក់ផលិត នូវផលិតផលខ្មែរឱ្យបានច្រើន។លោកស្រី លឹម ពិសី ប្រធានគម្រោងនៃកម្មវិធីរបស់សមាគមសហគ្រិនស្ត្រីកម្ពុជា លើកឡើងថា ជុំវិញសហគ្រិនជាស្រ្តីនេះ សមាគមបាននិងកំពុងជំរុញកសាងសមត្ថភាពសហគ្រិនស្រ្តី ឱ្យជោគជ័យបានកាន់តែច្រើន ដើម្បីចំណែកអភិវឌ្ឍន៍សេដ្ឋកិច្ចជាតិឱ្យ កាន់តែខ្លាំងខ្លា ដូចពាក្យលើកឡើងថា ស្រ្តីជាឆ្នឹងខ្នងនៃសេដ្ឋកិច្ចជាតិ។ បញ្ហានេះ សមាគមសហគ្រិនស្ត្រីកម្ពុជា នឹងបន្តធ្វើរៀបចំវេទិកា ដើម្បីជំរុញការអភិវឌ្ឍសមត្ថភាព, បង្កើតឱកាសថ្មីៗភ្ចាប់បណ្តាញ និងពង្រឹងភាពជាអ្នកដឹកនាំសម្រាប់ស្ត្រី និងការបង្កើតឱកាស អាជីវកម្មសម្រាប់ស្ត្រីជាដើម៕អត្ថបទ៖ សុន រ៉ាឌី

ក្រសួងមុខងារសាធារណៈ កំពុងពិនិត្យឡើងវិញ និង វិភាគមុខងារ​សំខាន់ៗ​ដែល​មាន​ភាព​ប្រទាក់​ក្រឡា​ស្មុគ​ស្មាញ

2026/03/25 10:22:47 am        218
Facebook Telegram Linkin
ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានលើកឡើងថា បច្ចុប្បន្ន​ក្រសួង​មុខងារសាធារណៈកំពុងធ្វើការពិនិត្យឡើងវិញ និងការវិភាគ​មុខ​ងារ​សំខាន់​ៗ​មួយ​ចំនួន​ដែល​មាន​ភាព​ប្រទាក់​ក្រឡាស្មុគស្មាញ។ ការ​លើក​ឡើង​ដូច​នេះ​ធ្វើ​ឡើង​ក្នុង​«​សន្និបាត​បូក​សរុប​លទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់​ក្រសួង​មុខ​ងារ​សាធារណៈ» ដែលធ្វើឡើងនាព្រឹកថ្ងៃទី២៥ ខែមីនា ឆ្នាំ២០២៦ នៅដឹព្រេមៀសេនធ័រ សែនសុខ រាជធានីភ្នំពេញ។ឯកឧត្តម ឧបនាយករដ្ឋមន្ត្រី ហ៊ុន ម៉ានី បានលើកឡើងក្នុងការបើកសន្និបាតនៅថ្ងៃនេះថា បច្ចុប្បន្ន​ក្រសួងមុខងារសាធារណៈ កំពុងធ្វើការពិនិត្យឡើងវិញ និងការ វិភាគ​មុខ​ងារ​សំខាន់​ៗ​មួយ​ចំនួន​ដែលមានភាពប្រទាក់ក្រឡាស្មុគ្រស្មាញ រួមមាន មុខងារបណ្តុះបណ្តាល បណ្ណាល័យ មន្ទីរ​ពិសោធន៍ ត្រួតពិនិត្យសុវត្ថិភាពចំណី អាហារ និងកម្មសិទ្ធិបញ្ញា រួមទាំង​ពិនិត្យ​លើ​ប្រភេទ​សេវា​សាធារណៈ​នានា ដែលផ្តល់ ដោយក្រសួង ស្ថាប័ន។ ក្រៅពីនេះ ក្រសួងមុខងារសាធារណៈក៏បាន និងកំពុងដឹកនាំ និងជំរឿនមន្ត្រីជាក់ស្តែងនៅតាម សម្រប​សម្រួលការធ្វើបច្ចុប្បន្នភាពរចនាសម្ព័ន្ធ រចនាសម្ព័ន្ធរបស់ក្រសួង ស្ថាប័ន​ចំណុះ​អង្គការ​នីតិ​ប្រ​តិបត្តិ គ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន ដែលបានបញ្ចប់រួចរាល់ សម្រាប់​ក្រសួង​មុខងារសាធារណៈ គ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន នៅក្នុងភូមិសាស្រ្តរាជធានីភ្នំពេញ ដោយបាន និងកំពុងបន្តអនុវត្តកិច្ចការជំរឿនសម្រាប់ ក្រសួង ស្ថាប័ន​ដទៃ​ទៀត ព្រមទាំងគ្រឹះស្ថានសិក្សាសាធារណៈ និងអង្គភាព សុខាភិបាល​មូល​ដ្ឋាន​នៃ​ខេត្ត​ទាំង​២៤ ដទៃទៀត។ជាសមិទ្ធផលផងដែរ ក្រសួងមុខងារសាធារណៈ បានដឹកនាំរៀបចំសារាចររបស់រាជរដ្ឋាភិបាល ស្តីពី​ការ​កំណត់ និងការអនុវត្តមុខងារនៅតាមក្រសួង ស្ថាប័នចំណុះអង្គការនីតិប្រតិបត្តិដែល​ជា​មូល​ដ្ឋាន​ផ្សារភ្ជាប់ការពិនិត្យឡើងវិញ និងការវិភាគមុខងារនិងរចនា សម្ព័ន្ធក្រសួង ស្ថាប័ន និង​ការ​រៀប​ចំ​អនុ​ក្រឹត្យស្តីពីការរៀបចំ និងការប្រព្រឹត្តទៅរបស់ក្រសួង-ស្ថាប័ន។ ផ្អែក​លើ​មូល​ដ្ឋាននេះ ក្រសួងមុខងារសាធារណៈបានដឹកនាំ សម្រប សម្រួល​កិច្ច​ពិភាក្សា​ជា​បន្ត​បន្ទាប់​រហូត​រាជ​រដ្ឋាភិបាល​បានដាក់ឱ្យអនុវត្តអនុក្រឹត្យ ស្តីពីការរៀបចំ និង​ការ​ប្រព្រឹត្ត​ទៅ​របស់​ក្រសួង-ស្ថាប័ន​បាន​ចំនួន ១២អនុក្រឹត្យ និង ១ព្រះរាជក្រឹត្យ និង​កំពុង​ពិភាក្សា​លើ​សេចក្តី​ព្រាង​អនុ​ក្រឹត្យរ​បស់​ក្រសួង-ស្ថាប័ន ចំនួន ១០ផ្សេងទៀតផងដែរ។ក្រសួង​មុខងារសាធារណៈ ក៏សម្រេចបាននូវសមិទ្ធផលសំខាន់ៗ ជាច្រើន​គួរ​ជាទី​មោទនៈ​រួម​មាន​៖ ​ការជ្រើសរើសមន្ត្រីចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និង​ប្រសិទ្ធភាព, ការរៀបចំ និងកែលម្អរចនាសម្ព័ន្ធក្រសួង ស្ថាប័ន តាមរយៈការ​អនុវត្ត​ការ​វិភាគ​មុខ​ងារ ​និងការធ្វើបច្ចុប្បន្នភាពមន្ត្រីរាជការស៊ីវិល ថ្នាក់ជាតិ និងថ្នាក់ក្រោមជាតិ សម្រាប់​វិស័យ​អប់រំ ​និងវិស័យសុខាភិបាល, ការពង្រឹងការគ្រប់គ្រង, ការវិវឌ្ឍអាជីព​របស់​មន្ត្រី​រាជ​ការ និង​ការ​អភិវឌ្ឍ​ធន​ធាន​មនុស្ស និងស្ថាប័ន, ការកែលម្អការផ្តល់សេវាសាធារណៈ, ការកែទម្រង់​ប្រព័ន្ធ​បៀវត្ស និងការលើកកម្ពស់កិច្ចសហប្រតិបត្តិការជាមួយបណ្តាប្រទេសក្នុងតំបន់ និងក្រៅតំបន់ រួម​ទាំង​ជា​មួយ​ដៃ​គូអភិវឌ្ឍន៍នានាជាដើម៕ អត្ថបទ៖ គឹមហុក 

ក្រសួងមុខងារសាធារណៈបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦

2026/03/25 09:56:47 am        183
Facebook Telegram Linkin
នៅព្រឹកថ្ងៃទី២៥ ខែមីនា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួង​មុខងារ​សាធារណៈ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើក «សន្និបាតបូកសរុប​លទ្ធផល​ការងារ​ឆ្នាំ​២០២៥ និងលើកទិសដៅការងារឆ្នាំ២០២៦ របស់ក្រសួងមុខងារសាធារណៈ» នៅ ដឺ ព្រេមៀ សេនធ័រ សែនសុខ រាជធានីភ្នំពេញ។សន្និបាតនេះមានការអញ្ជើញចូលរួមពី ឯកឧត្តមរដ្ឋលេខាធិការប្រចាំការ ឯកឧត្តម លោកជំទាវជារដ្ឋលេខាធិការ អនុរដ្ឋលេខាធិការ ឯកឧត្តម លោកជំទាវ លោក លោកស្រីជាថ្នាក់ដឹកនាំ និងមន្ត្រីរាជការនៃក្រសួងមុខងារសាធារណៈ តំណាងក្រសួង-ស្ថាប័ន រដ្ឋបាលរាជធានី ខេត្ត ក្រុង ស្រុក ខណ្ឌ និងមន្ទីរមុខងារសាធារណៈ រាជធានី-ខេត្ត ព្រមទាំងអ្នកសារព័ត៌មាន សរុបប្រមាណ ៦៥០នាក់។ក្នុងឆ្នាំ២០២៥ ក្រសួងមុខងារសាធារណៈ ក្រោមការដឹកនាំរបស់ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួង មុខងារសាធារណៈ បានដឹកនាំប្រកបដោយ ឆន្ទៈ និងការប្តេជ្ញាចិត្តយ៉ាងមុតមាំ ឈ្លាសវៃ ហ្មត់ចត់ មានចក្ខុវិស័យ និងទស្សនៈវិស័យច្បាស់លាស់ ក្នុងការគ្រប់គ្រង និងអភិវឌ្ឍវិស័យមុខងារសាធារណៈ ជាពិសេសការអនុវត្តវិធានការគន្លឹះ របស់រាជរដ្ឋាភិបាល ក្នុងការកែទម្រង់រដ្ឋបាលសាធារណៈ ដោយសម្រេចបាននូវសមិទ្ធផលសំខាន់ៗ ជាច្រើនគួរជាទីមោទនៈរួមមាន៖ ការជ្រើសរើសមន្ត្រីចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព, ការរៀបចំ និងកែលម្អរចនាសម្ព័ន្ធក្រសួង ស្ថាប័ន តាមរយៈការអនុវត្តការវិភាគមុខងារ និងការធ្វើបច្ចុប្បន្នភាពមន្ត្រីរាជការស៊ីវិល ថ្នាក់ជាតិ និងថ្នាក់ក្រោមជាតិ សម្រាប់វិស័យអប់រំ និងវិស័យសុខាភិបាល, ការពង្រឹងការគ្រប់គ្រង, ការវិវឌ្ឍអាជីពរបស់មន្ត្រីរាជការនិងការអភិវឌ្ឍធនធានមនុស្ស និងស្ថាប័ន, ការកែលម្អការផ្តល់សេវាសាធារណៈ, ការកែទម្រង់ប្រព័ន្ធបៀវត្ស និង ការលើកកម្ពស់កិច្ចសហប្រតិបត្តិការជាមួយបណ្តាប្រទេសក្នុងតំបន់ និងក្រៅតំបន់ រួមទាំងជាមួយដៃគូអភិវឌ្ឍន៍នានាជាដើម។ផ្អែកលើទិសដៅការងារដែលបានកំណត់ ក្រសួងមុខងារសាធារណៈ នឹងបន្តប្រឹងប្រែងឱ្យអស់លទ្ធភាពដើម្បី សម្រេចបាននូវសមិទ្ធផលថ្មីៗបន្ថែមទៀត ក្នុងគោលបំណងកែលម្អ និងពង្រឹងវិស័យមុខងារសាធារណៈកម្ពុជា​ ឱ្យឆ្លើយតប ទៅនឹងការវិវឌ្ឍនៃសង្គមសេដ្ឋកិច្ច និងនយោបាយក្នុងប្រទេស និងសកលលោក។ ក្នុងន័យនេះរដ្ឋបាលសាធារណៈកម្ពុជា នឹងត្រូវប្រែក្លាយឱ្យកាន់តែមានភាពទំនើប ធន់ ខ្លាំង វៃឆ្លាត គុណភាព ស្អាតស្អំ វិជ្ជាជីវៈ និងមានប្រសិទ្ធភាពក្នុងការបំពេញមុខងារ និងភារកិច្ចរបស់ខ្លួន ដើម្បីបម្រើប្រជាពលរដ្ឋឱ្យបានកាន់តែល្អប្រសើរ។សូមជម្រាបថា បន្ទាប់ពីពិធីបើកត្រូវបានបញ្ចប់ អង្គសន្និបាតក៏នឹងមានការធ្វើបទបង្ហាញរបស់វាគ្មិនជាថ្នាក់ដឹកនាំជាន់ខ្ពស់នៃក្រសួងមុខងារសាធារណៈ និងវេទិកាសំណួរ ចម្លើយ លើប្រធានបទដែលបានបង្ហាញ និងការងារពាក់ព័ន្ធ។ សន្និបាតនឹងប្រពឹត្តទៅរយៈពេល ២ថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែមីនា ឆ្នាំ២០២៦៕

អគ្គព្រះរាជអាជ្ញានៃមហាអយ្យការអមតុលាការកំពូល៖ សេចក្តីព្រាងច្បាប់ស្តីពី ការប្រឆាំង​ការ​ឆបោក​តាម​ប្រព័ន្ធ​បច្ចេកវិទ្យា​បានកំណត់ទោសធ្ងន់ធ្ងរ​រហូតដល់ជាប់ពន្ធនាគារអស់មួយជីវិត

2026/03/25 09:30:28 am        207
Facebook Telegram Linkin
លោកជំទាវ ជា លាង អគ្គព្រះរាជអាជ្ញា នៃមហាអយ្យការអមតុលាការកំពូល បាន​មាន​ប្រសាសន៍​បញ្ជាក់​ថា «សេចក្តីព្រាងច្បាប់ស្តីពី ការប្រឆាំងការឆបោកតាមប្រព័ន្ធបច្ចេកវិទ្យា» បាន​កំណត់​ទោស​ធ្ងន់ធ្ងរ​​រហូត​ដល់​ជាប់​ពន្ធនាគារ​អស់​មួយ​ជីវិត​ចំពោះ​មេ​ខ្លោង​ដែល​បង្ក​ឲ្យ​មាន​ការ​បាត់​បង់​ជីវិត​នៅ​ក្នុង​មជ្ឈ​មណ្ឌលឆបោក។ ការបញ្ជាក់នេះ សន្និបាតបូក​សរុប​លទ្ធផល​ការងារ​វិស័យ​យុត្តិធម៌​ឆ្នាំ​២០២៥ ​និងកំណត់ទិសដៅការងារជាអាទិភាពឆ្នាំ២០២៦ នៅព្រឹកថ្ងៃទី២៥ ខែមីនា ឆ្នាំ២០២៦ នៅសណ្ឋាគារសុខា។លោកជំទាវ ជា លាង បានមានប្រសាសន៍ថា សូមអបអរសាទរដែលគណរដ្ឋមន្ត្រីអនុម័ត «សេចក្តី​ព្រាង​ច្បាប់​ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» កាលពីថ្ងៃទី១៩ ខែមីនា ឆ្នាំ២០២៦ ដោ​យ​ច្បាប់នេះ កំណត់ទោស​ធ្ងន់ធ្ងរ​រហូតដល់​ជាប់​ពន្ធនាគារ​អស់​មួយ​ជីវិត​ចំពោះ​មេក្លោង​ដែល​បង្ក​ឲ្យ​មាន​ការបាត់បង់ជីវិតនៅក្នុងមជ្ឈមណ្ឌលឆបោក។អន្តរគណៈកម្មការជំនាញនៃរដ្ឋសភា ក្នុងស្មារតីបុរេសកម្មដើម្បីពង្រឹងសន្តិសុខឌីជីថល និង​កិច្ច​ការ​ពារ​ផលប្រយោជន៍ប្រជាពលរដ្ឋឱ្យកាន់តែមានប្រសិទ្ធភាព នៅថ្ងៃទី២៤ ខែមីនា ឆ្នាំ២០២៦ បាន​បើកកិច្ចប្រជុំពិភាក្សា និងដេញដោលស៊ីជម្រៅជាមួយតំណាងរាជរដ្ឋាភិបាល ដើម្បីពិនិត្យលើ «សេចក្តីព្រាងច្បាប់ស្តីពី ការប្រឆាំងការឆបោកតាមប្រព័ន្ធបច្ចេកវិទ្យា»។តំណាងរាជរដ្ឋាភិបាល ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បាន​អញ្ជើញ​មក​ឆ្លើយតប ក៏ដូចជាផ្តល់ការពន្យល់ និងបំភ្លឺយ៉ាងលម្អិតអំពីភាពចាំបាច់ និង​គោល​បំណង​យុទ្ធសាស្ត្រនៃសេចក្តីព្រាងច្បាប់នេះ។ក្នុងឱកាសនោះ តំណាងរាជរដ្ឋាភិបាលបានគូសបញ្ជាក់ជូនអន្តរគណៈកម្មការរដ្ឋសភាថា ឧក្រិដ្ឋ​កម្ម​ឆបោកឆ្លងដែនតាមប្រព័ន្ធបច្ចេកវិទ្យាបានវិវត្តក្លាយជាកង្វល់សកល ដែលទាមទារ​ឱ្យ​កម្ពុជា​មាន ​"ឧបករណ៍គតិយុត្តិ" ដ៏រឹងមាំសម្រាប់បង្ក្រាប។ សេចក្តីព្រាងច្បាប់នេះមាន ៥ ជំពូក និង ២៤ មា​ត្រា​ ដោយក្នុងនោះបានកំណត់បង្កើតបទល្មើសព្រហ្មទណ្ឌថ្មីចំនួន ៥ បន្ថែមទៀត រួមមាន៖ បទ​ឆបោក​តាមប្រព័ន្ធបច្ចេកវិទ្យា, បទរៀបចំឬដឹកនាំមជ្ឈមណ្ឌលឆបោក, បទជ្រើស​រើស​ឬ​បណ្តុះ​បណ្តាល​បុគ្គល​ឱ្យ​ប្រព្រឹត្តបទល្មើស, បទប្រមូលទិន្នន័យឯកជនក្នុងចេតនាទុច្ចរិត និងការ​បង្កើត​ទម្រង់​ពិសេស​នៃបទល្មើសសម្អាតប្រាក់៕ អត្ថបទ៖ វង្ស សុភាព

ក្រសួងយុត្តិធម៌ បើក​សន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៥ និង​កំណត់​ទិសដៅ​ការងារជាអាទិភាពឆ្នាំ២០២៦

2026/03/25 08:34:59 am        131
Facebook Telegram Linkin
ក្រសួងយុត្តិធម៌បានរៀបចំ “សន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៥ និង​កំណត់ ទិសដៅការងារជាអាទិភាពឆ្នាំ២០២៦” រយៈពេល ២ថ្ងៃ គិតចាប់ពីថ្ងៃទី២៥ ដល់​ថ្ងៃ​ទី២៦ ខែមីនា ឆ្នាំ២០២៦ នៅសណ្ឋាគារសុខាភ្នំពេញ។ ពិធីបើក​សន្និបាត​នេះ​ប្រព្រឹត្ត​ទៅ​ក្រោម​អធិប​តី​ភាព​​ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, ឯកឧត្តមបណ្ឌិត ជីវ កេង ប្រធានតុលាការកំពូល និងលោកជំទាវ ជា លាង អគ្គព្រះរាជអាជ្ញា នៃមហាអយ្យ​ការ​អម​តុលា​ការ​កំពូល និងមានការចូលរួមពីថ្នាក់ដឹកនាំក្រសួងយុត្តិធម៌, ថ្នាក់ដឹកនាំនៃសាលាជម្រះក្តី និង​អង្គ​ការអយ្យការអមសាលាជម្រះក្តីគ្រប់ជាន់ថ្នាក់នៅទូទាំងប្រទេស, ថ្នាក់ដឹកនាំនៃ អង្គភាព​រដ្ឋ​បាលតុលាការ, ថ្នាក់ដឹកនាំអង្គភាពអាជ្ញាសាលា, តំណាងក្រឡាបញ្ជី ព្រមទាំង​តំណាង​ស្ថាប័ន​អនុវត្ត​ច្បាប់ ដែលមានការពាក់ព័ន្ធ រួមមាន អង្គភាពប្រឆាំងអំពើពុករលួយ, អគ្គស្នង​ការដ្ឋាន​នគរបាល​ជាតិ, បញ្ជាការដ្ឋាន កងរាជអាវុធហត្ថលើផ្ទៃប្រទេស និងគណៈមេធាវី​នៃ​ព្រះរាជា​ណា​ច​ក្រ​កម្ពុជា ដែលមានចំនួនសរុបប្រមាណ ៥០០ រូប។ សន្និបាតនេះ រៀបចំឡើងក្នុងគោលបំណងដើម្បីបូកសរុបលទ្ធផលការងាររបស់វិស័យយុត្តិធម៌ ដែល​សម្រេច បានក្នុងឆ្នាំ២០២៥ ក៏ដូចជា ដើម្បីពិនិត្យ និងវាយតម្លៃ​អំពី​ស្ថាន​ភាព​នៃ​វិស័យ​យុត្តិធម៌, ស្វែងរកឱ្យឃើញនូវបញ្ហា ប្រឈមនៅក្នុងវិស័យនេះ ទាំងលើការអនុវត្តច្បាប់ ទាំង​លើ​ការ​បំពេញការងារនៅក្នុងវិស័យយុត្តិធម៌ ព្រមទាំងដាក់ចេញ នូវដំណោះស្រាយ និង​ទិស​ដៅ​ការ​ងារ​ជា​អាទិភាពបន្តសម្រាប់ឆ្នាំ២០២៦ ដើម្បីលើកកម្ពស់ប្រសិទ្ធភាពនៃការ អនុវត្តច្បាប់ និង​ការ​កែ​ទម្រង់ប្រព័ន្ធយុត្តិធម៌នៅកម្ពុជា ស្របតាមគោលនយោបាយ និងទិសដៅយុទ្ធសាស្ត្រ ដូច​បាន​កំណត់​ក្នុងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃ​រដ្ឋសភា និងវិធានការគន្លឹះទី៥ ដែលបានដាក់ចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

រាជរដ្ឋាភិបាល សម្រេចកាត់ចំណាយ៣០ភាគរយ សម្រាប់បេសកកម្មក្នុង និងក្រៅប្រទេស, ចំណាយប្រេងឥន្ធនៈ និងប្រេងរំអិលគ្រប់ក្រសួងស្ថាប័ន

2026/03/25 07:59:44 am        224
Facebook Telegram Linkin
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានចេញសារាចរស្ដីពីការធ្វើវិចារណកម្ម និងការពង្រឹងប្រសិទ្ធភាពចំណាយ ឆ្នាំ២០២៦, កាត់ ព្យួរឥណទានចំណាយ ប្រេងឥន្ធនៈ នឹងប្រេងរំអិលចំនួន៣០% គ្រប់ក្រសួង-ស្ថាប័ន រួមទាំងស្ថាប័នកំពូល។ក្នុងសារាចរ បានបញ្ជាក់ថា ស្ថិតក្នុងបរិការណ៍នៃវិបត្តិថាមពលប្រេងឥន្ធនៈកំពុងកើតមាន និងពុំអាចព្យាករបាន, ដើម្បីធានាបាន នូវការសន្សំសំចៃប្រេងឥន្ធនៈ សម្រាប់បំពេញតម្រូវការប្រើប្រាស់ក្នុងវិស័យអាទិភាព និងមានលក្ខណៈយុទ្ធសាស្ត្រ, ក្រសួងសេដ្ឋកិច្ចនិងហិរញ្ញវត្ថុ, ផ្អែកតាមសារាចររបស់រាជរដ្ឋាភិបាលលេខ ០៤ សរ ចុះថ្ងៃទី ១៩ ខែ មីនា ឆ្នាំ ២០២៦ និងការសម្រេចដ៏ខ្ពង់ខ្ពស់របស់ សម្តេចមហាបវរធិបតីនាយករដ្ឋមន្ត្រី, សូមដាក់ចេញនូវវិធានការ វិចារណកម្ម និងការពង្រឹងប្រសិទ្ធភាពចំណាយថវិកាថ្នាក់ជាតិផ្នែកចំណាយមិនមែនបន្ទុកបុគ្គលិករបស់ក្រសួង ស្ថាប័ន ថ្នាក់កណ្តាល សម្រាប់អនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៦ ដូចខាងក្រោម៖ ១- ការធ្វើវិចារណកម្មចំណាយមិនមែនបន្ទុកបុគ្គលិករបស់ក្រសួង ស្ថាប័ន ថ្នាក់កណ្តាល កាត់ព្យួរឥណទានចំណាយប្រេងឥន្ធនៈ នឹងប្រេងរំអិលចំនួន ៣០% នៃឥណទានសរុបរបស់ គ្រប់ក្រសួង ស្ថាប័នទាំងអស់ រួមទាំងស្ថាប័នកំពូល រួមមាន : ព្រឹទ្ធសភា, រដ្ឋសភា និងក្រុមប្រឹក្សាធម្មនុញ្ញ ដោយលើកលែងតែក្រសួងការពារជាតិ និងក្រសួងមហាផ្ទៃ (ផ្នែកសន្តិសុខសាធារណៈ) ក្នុងគោលដៅរក្សា ឥណទានទុកសម្រាប់យថាហេតុដែលមានតម្រូវការប្រេងឥន្ធនៈបន្ថែមសម្រាប់កិច្ចការយុទ្ធសាស្ត្ររបស់ រាជរដ្ឋាភិបាល។ ទោះជាយ៉ាងនេះក្តី, ជាគោលការណ៍ ក្រសួងការពារជាតិ និងក្រសួងមហាផ្ទៃ (ផ្នែកសន្តិសុខ សាធារណៈ) ត្រូវប្រើប្រាស់ប្រេងឥន្ធនៈ ត្រឹមកម្រិតឥណទានដែលមានក្នុងច្បាប់ថវិកាឆ្នាំ ២០២៦ តែប៉ុណ្ណោះ ដោយពុំមានការបន្ថែមថវិកាជូនទេ, លើកលែងតែមានតម្រូវការពិសេសដូចបានគូសរំលេចខាងលើ។ - កាត់ព្យួរឥណទានចំណាយបេសកកម្មក្នុងប្រទេស និងចំណាយបេសកកម្មក្រៅប្រទេសចំនួន ៣០% នៃឥណទានសរុបរបស់គ្រប់ក្រសួង ស្ថាប័នទាំងអស់ រួមទាំងស្ថាប័នកំពូល រួមមាន : ព្រឹទ្ធសភា, រដ្ឋសភា និង ក្រុមប្រឹក្សាធម្មនុញ្ញ។ ក្នុងស្មារតីនេះ, គ្រប់ក្រសួង ស្ថាប័នទាំងអស់ ត្រូវពិនិត្យកាត់បន្ថយជាអតិបរមានូវ ការធ្វើដំណើរឆ្ងាយក្នុងការរៀបចំសិក្ខាសាលា និងកិច្ចប្រជុំនានា ជាលក្ខណៈរូបវ័ន្ត ដោយលើកទឹកចិត្តឱ្យធ្វើតាម ប្រព័ន្ធអនឡាញជំនួសវិញ លើកលែងតែករណីចាំបាច់បំផុតប៉ុណ្ណោះ។ ចំពោះការចូលរួមកិច្ចប្រជុំនានា នៅ ក្រៅប្រទេស, ស្នើក្រសួង ស្ថាប័ន ផ្អាកការចូលរួមក្នុងកិច្ចប្រជុំដែលពុំសូវចាំបាច់, ហើយក្នុងករណីចាំបាច់ ខានមិនបាន ដែលតម្រូវ ដែលតម្រូវឱ្យមានតំណាងរបស់កម្ពុជាចូលរួមប្រជុំ, ក្រសួង ស្ថាប័ន គប្បីស្នើសុំទៅក្រសួង ការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះ ចូលរួម កិច្ចប្រជុំនោះ ជំនួសវិញ។ ក្នុងន័យនេះ, ចំពោះការចូលរួមកិច្ចប្រជុំជាលក្ខណៈរូបវ័ន្តនៅក្រៅប្រទេស ស្នើក្រសួង ស្ថាប័ន ជ្រើសរើសតែកិច្ចប្រជុំដែលមានលក្ខណៈយុទ្ធសាស្ត្រ និងចាំបាច់ខ្លាំងបំផុតប៉ុណ្ណោះ។ - ទន្ទឹមនេះ, ក្នុងកម្រិតឥណទានគ្រប់មុខសញ្ញាចំណាយដែលមានក្នុងច្បាប់ថវិកាឆ្នាំ ២០២៦, ក្រសួង ស្ថាប័ន ត្រូវធ្វើអាទិភាវូបនីយកម្មចំណាយ ដោយបង្វែរថវិកាពីចំណាយមិនសូវចាំបាច់ ឬលែងចាំបាច់ ទៅមុខចំណាយដែលចាំបាច់ខ្លាំង ព្រមជាមួយការខិតខំសន្សំសំចៃ និងការបង្កើនសក្តិសិទ្ធិភាពតម្លៃនៃលុយ។ ២- ស្ថាប័ន និងអង្គភាព ដែលត្រូវបានលើកលែងការធ្វើវិចារណកម្មចំណាយ ការធ្វើវិចារណកម្មព្យួរឥណទានចំណាយ ត្រូវបានលើកលែងចំពោះគ្រឹះស្ថានសាធារណៈរដ្ឋបាល, សាលាដំបូង និងអយ្យការអមសាលាដំបូងរាជធានី ខេត្ត, សាលាឧទ្ធរណ៍តំបន់ទាំង ៤, មន្ទីរជំនាញរាជធានី ខេត្ត, និងមុខងារដែលបានប្រគល់ដោយមានភ្ជាប់លក្ខខណ្ឌ ក្នុងវិស័យសុខាភិបាល និងវិស័យអប់រំ ទៅ រដ្ឋបាលថ្នាក់ក្រោមជាតិ។ ទោះជាយ៉ាងនេះក្តី, ស្ថាប័ន និងអង្គភាពទាំងនេះ ត្រូវចូលរួមប្រើប្រាស់ប្រេងឥន្ធនៈ ក្នុងស្មារតីសន្សំសំចៃខ្ពស់ ដោយចៀសវាងការប្រើប្រាស់ខ្ជះខ្ជាយ និងប្រើប្រាស់មិនចំគោលដៅអាទិភាព ស្របតាមសារាចររបស់រាជរដ្ឋាភិបាល។ លើសពីនេះ, ក្នុងកម្រិតឥណទានគ្រប់មុខសញ្ញាចំណាយដែលមាន ក្នុងច្បាប់ថវិកាឆ្នាំ ២០២៦, ស្ថាប័ន និងអង្គភាពពាក់ព័ន្ធ ត្រូវធ្វើអាទិភាវូបនីយកម្មចំណាយ ព្រមជាមួយ ការខិតខំសន្សំសំចៃ និងការបង្កើនសក្តិសិទ្ធិភាពតម្លៃនៃលុយ ដូចក្រសួង ស្ថាប័ន ថ្នាក់កណ្តាល ផងដែរ។ ក្រសួងសេដ្ឋកិច្ច បានឱ្យដឹងថា វិធានការធ្វើវិចារណកម្មព្យួរឥណទានចំណាយ និងការពង្រឹងប្រសិទ្ធភាពចំណាយដែលបានដាក់ចេញនេះ ត្រូវបានគិតគូររៀបចំក្នុងក្របខ័ណ្ឌនៃការធានាប្រក្រតីភាពនៃស្ថាប័នរដ្ឋ រក្សាបាននូវគោលនយោបាយអាទិភាព របស់រាជរដ្ឋាភិបាល និងក្នុងស្មារតីធានាឱ្យបាននូវការរក្សាតុល្យភាព និងប្រសិទ្ធភាពថវិកាឆ្នាំ ២០២៦។

បណ្ដាញសង្គម

ព័ត៌មានថ្មីៗ

ប្រភពប៉ាគីស្ថាន៖ កិច្ចប្រឹងប្រែង ដើម្បីសម្រួលដល់ការចរចា រវាងសហរដ្ឋអាមេរិក និងអ៊ីរ៉ង់ កំពុងបន្ត
04/07/2026 08:04 PM
Facebook Telegram Linkin
អាមេរិកវាយប្រហារគោលដៅយោធាលើកោះ Kharg របស់អ៊ីរ៉ង់ ខណៈលោក Vance ប្រាប់ថា គ្មានការប្តូរយុទ្ធសាស្ត្រទេ
04/07/2026 08:04 PM
Facebook Telegram Linkin
ប្រេងឡើងថ្លៃ និងកង្វះខាតប្រេង រុញច្រានឲ្យអ្នកប្រើប្រាស់ប៉ាគីស្ថានងាកមករកម៉ូតូអគ្គិសនី
04/07/2026 08:04 PM
Facebook Telegram Linkin
លោក Trumpថា សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
[UPDATE] លោក Trump បញ្ជាក់ថា «អារ្យធម៌ទាំងមូលនឹងលែងមាននៅយប់នេះ» បើអ៊ីរ៉ង់មិនធ្វើកិច្ចព្រមព្រៀង
04/07/2026 08:04 PM
Facebook Telegram Linkin
ចិនសង្ឃឹមថា ភាគីពាក់ព័ន្ធនឹងសង្រ្គាមអ៊ីរ៉ង់អាចក្តាប់ឱកាស ដើម្បីសន្តិភាព និងចាប់ផ្តើមកិច្ចពិភាក្សាឡើងវិញ
04/07/2026 08:04 PM
Facebook Telegram Linkin
អ៊ីរ៉ង់គំរាមរំខានការផ្គត់ផ្គង់ប្រេង និងឧស្ម័ន ក្នុងតំបន់ «ជាច្រើនឆ្នាំ» បើហេដ្ឋារចនាសម្ព័ន្ធស៊ីវិលត្រូវបានវាយប្រហារ
04/07/2026 08:04 PM
Facebook Telegram Linkin
WHO ៖ ការជម្លៀសផ្នែកវេជ្ជសាស្រ្តនៅតំបន់ហ្កាហ្សា បានផ្អាក ក្រោយកម្មករជាប់កិច្ចសន្យាម្នាក់ត្រូវបានសម្លាប់
04/07/2026 08:04 PM
Facebook Telegram Linkin
BREAKING NEWS ៖ សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
04/07/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.