BTV NEWS

កម្ពុជាប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ”

មន្ត្រីជាន់ខ្ពស់ក្រសួងអភិវឌ្ឍន៍ ចាត់ទុកការថែទាំផ្លូវជារឿងចាំបាច់ សម្រួលការធ្វើដំណើរ និងការប្រកបមុខរបរផ្សេងៗ

សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា

យុវជន០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបុកពីមុខយ៉ាងពេញទំហឹង

ព័ត៌មានជាតិ

ក្រសួងបរិស្ថាន និង EU សិក្សាពីលទ្ធភាពនៃការកែច្នៃសំរាម ប្លាស្ទិកជាថាមពលអគ្គិសនី

រសៀលថ្ងៃទី១៩ ខែឧសភា ឆ្នាំ២០២៦ នៅទីស្តីការក្រសួងបរិស្ថាន ឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន បានដឹកនាំសហការីរួមមាន៖ ឯកឧត្តម ស៊ុ ធី អគ្គនាយកគោលនយោបាយនិងយុទ្ធសាស្ត្រ លោក កែ វង្សវឌ្ឍនា អគ្គនាយករងគាំពារបរិស្ថាន លោក ឡុង សូណា ប្រធាននាយដ្ឋានប្រែប្រួលអាកាសធាតុ លោក ឌី គីដែន ប្រធាននាយកដ្ឋានគ្រប់គ្រងសំណល់រឹង និងសហការី ជួបប្រជុំជាមួយភាគីសហភាពអឺរ៉ុប (EU) ដើម្បីពិនិត្យ និងពិភាក្សាអំពីគម្រោងវិនិយោគក្នុងគ្រប់គ្រងសំណល់នៅក្នុងខេត្តសៀមរាប ដែលគម្រោងនេះគ្រោងនឹងចំណាយថវិកាវិនិយោគប្រមាណ ២២.៣ លានដុល្លារសហរដ្ឋអាមេរិក ដោយផ្តោតលើការសាងសងរោងចក្របែងចែក និងកែច្នៃសំណល់ដែលជាបច្ចេកវិទ្យាមកពីអឺរ៉ុប ហើយអាចបែងចែក និងកែច្នៃសំណល់ប្រមាណ ២២ ដល់ ៣៥ តោនក្នុងមួយថ្ងៃ ព្រមទាំងអាចផលិតថាមពលពីសំណល់ទាំងនោះបានប្រមាណ ៣៥ ដល់ ៧៥ មេហ្គាវ៉ាត់ម៉ោងក្នុងមួយថ្ងៃ (MWh/d) និងអាចកាត់បន្ថយការបញ្ចេញឧស្ម័នផ្ទះកញ្ចក់ បានប្រហែល ២៥,០០០ តោនក្នុងមួយឆ្នាំ ផងដែរ។ ឯកឧត្តម សាបូ អូហ្សាណូ បានបង្ហាញការគាំទ្រនូវគម្រោងវិនិយោគនេះ និងបានស្នើឱ្យភាគីសហភាពអឺរ៉ុប និងក្រុមហ៊ុនវិនិយោគចែករំលែកនូវឯកការលទ្ធផលនៃការសិក្សាបឋមលើគម្រោងនេះ និងត្រូវពិភាក្សាបន្ថែមជាមួយក្រសួងសា្ថប័នពាក់ព័ន្ធ ដូចជា៖ក្រុមប្រឹក្សាជាតិអភិវឌ្ឍន៍កម្ពុជា (CDC) ក្រសួងរ៉ែនិងថាមពល (MME) អគ្គិសនីកម្ពុជា(EDC) និងនាយកដ្ឋានវាយតម្លៃផលប៉ះពាល់បរិស្ថាន (EIA) ក្រសួងបរិស្ថាន និងរដ្ឋបាល និងអាជ្ញាធរខេត្តសៀមរាប។ ទាក់ទងនឹងការប្រើប្រាស់ថវិកាពីការលក់ឥណទានកាបូន ឯកឧត្តម ស៊ុ ធី បានស្វាគមន៍ចំពោះបំណងក្នុងការប្រើប្រាស់ថវិកានេះសម្រាប់ការវិនិយោគ និងត្រូវពិនិត្យ និងអនុវត្តអនុលោមតាមគោលការណ៍ និងនិតិវិធីរបស់កម្ពុជាផងដែរ ហើយត្រូវពិភាក្សាជាមួយលេខាធិការដ្ឋានកិច្ចការឥណទានកាបូនរបស់ក្រសួងបរិស្ថាន។ ឯកឧត្តម សាបូ អូហ្សាណូ បានចាត់តាំង លោក ឡុង សូណា ជាជនបង្គោលលើគម្រោងនេះ ដោយសហការជាមួយលោក ឌី គីដែន ប្រធាននាយកដ្ឋានគ្រប់គ្រងសំណល់រឹង។

អភិបាលខេត្តឧត្តរមានជ័យ៖ មន្ត្រីរាជការស៊ីវិល គឺជាអ្នកបម្រើរាស្ត្រ និងរក្សាសន្តិសុខជូនសង្គម

ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ បានមានប្រសាសន៍ថា មន្ត្រីរាជការស៊ីវិល គឺជាអ្នកបម្រើរាស្ត្រ និងរក្សាសន្តិសុខជូនសង្គម។ ឯកឧត្តម មានប្រសាសន៍បែបនេះ ក្នុងពិធីប្រកាសតួនាទីមន្ត្រីមន្ទីរ អង្គភាព នៃរចនាសម្ព័ន្ធរដ្ឋបាលខេត្តឧត្តរមានជ័យ និងការពង្រឹងវិន័យ ដើម្បីលើកកម្ពស់ប្រសិទ្ធភាពការងាររបស់មន្ត្រីរាជការស៊ីវិលឱ្យកាន់មានប្រសិទ្ធភាពខ្ពស់ ដែលបានធ្វើឡើងនៅថ្ងៃទី២០ ខែឧសភា ឆ្នាំ២០២៦។ ឯកឧត្ដម មាន ចាន់យ៉ាដា បានលើកឡើងថា ការដំឡើងតួនាទី និងមុខតំណែងជូនមន្ត្រីរាជការគ្រប់រូបនាពេលនេះ គឺពិតជាបានប្រកាន់ខ្ជាប់យ៉ាងម៉ឺងម៉ាត់នូវគោលការណ៍ច្បាប់ នីតិវិធី ព្រមទាំងសេចក្តីណែនាំនានាជាធរមាន ដោយរដ្ឋបាលខេត្តបានធ្វើការវាយតម្លៃយ៉ាងល្អិតល្អន់តាមលក្ខណៈសម្បត្តិគ្រប់ជ្រុងជ្រោយ ផ្អែកលើសមត្ថភាព ស្នាដៃ និងការខិតខំប្រឹងប្រែងពិតប្រាកដ ដោយធានាបាននូវតម្លាភាព មិនមានការលម្អៀង មិនបក្សពួកនិយម និងមិនក្បត់មនសិការវិជ្ជាជីវៈ គុណធម៌ ព្រមទាំងព្រហ្មវិហារធម៌។ ឯកឧត្ដម បានរំលឹកថា មន្ត្រីរាជការ គឺជាតួអង្គស្នូលដ៏មានសារសំខាន់បំផុត និងជាកម្លាំងចលករចម្បង ក្នុងការអនុវត្តច្បាប់ គោលនយោបាយ និងគោលការណ៍ណែនាំនានារបស់ក្រសួងមហាផ្ទៃ ក៏ដូចជារាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតដ៏ឈ្លាសវៃ និងប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ទន្ទឹមគ្នានោះឯកឧត្ដម អភិបាលខេត្ត បានអំពាវនាវដល់ថ្នាក់ដឹកនាំមន្ទីរ អង្គភាព និងមន្ត្រីទាំងអស់ ត្រូវរួមគ្នាយកចិត្តទុកដាក់លើកកម្ពស់សមត្ថភាពវិជ្ជាជីវៈរបស់ខ្លួនជាប្រចាំ ដើម្បីបង្កើនប្រសិទ្ធភាពការងារ បម្រើផលប្រយោជន៍ជូនអង្គភាព និងឆ្លើយតបទៅនឹងតម្រូវការរបស់ប្រជាពលរដ្ឋឱ្យបានទាន់ពេលវេលាផងដែរ៕

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញបូជាទៀន ធូប ផ្កា ភ្ញី ថ្វាយព្រះរតនត្រ័យ និងនាំយកទេយ្យវត្ថុប្រគេនព្រះសង្ឃគង់ នៅវត្តប៊ុនរ៉ានីសែនជ័យ ដំណាក់ទ្រយឹង

ក្នុងឱកាសបំពេញបេសកកម្មមនុស្សធម៌នៅលើទឹកដីខេត្តពោធិ៍សាត់, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី២១ ខែឧសភា ឆ្នាំ២០២៦នេះ បានអញ្ជើញបូជាទៀន ធូប ផ្កា ភ្ញី ថ្វាយព្រះរតនត្រ័យ ធ្វើបទនមស្ការ សមាទានសីល និងនាំយកទេយ្យវត្ថុប្រគេនព្រះសង្ឃ ដែលគង់នៅវត្តប៊ុនរ៉ានីសែនជ័យដំណាក់ទ្រយឹង ដែលស្ថិតនៅក្នុងភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានមានសទ្ធាជ្រះថ្លាវេរប្រគេននូវទេយ្យវត្ថុ ចំពោះវត្តប៊ុនរ៉ានីសែនជ័យដំណាក់ទ្រយឹង រួមមាន៖ អង្ករចំនួន ១០០គីឡូក្រាម, មី១០កេស, ត្រីខ ២កេស, សាច់ក្រក-ត្រីងៀត ១២គីឡូក្រាម, ឆៃប៉ូវផ្អែម ១២កំប៉ុងជ័រ, ទឹកដោះគោខាប់ ១កេស, កាហ្វេហ្គោរូស ៥កញ្ចប់ធំ, ស្ករស ១០គីឡូក្រាម, តែ ២គីឡូក្រាម, ភេសជ្ជៈប៉ូការីស្វេត ៥កេស, ភេសជ្ជៈវីកូឡា ៥កេស, ទឹកបរិសុទ្ធ ១០កេស និងបច្ច័យចំនួន ៥លានរៀល។ ប្រគេនចំពោះព្រះចៅអធិការវត្ត នូវ សាដក១ និងបច្ច័យ ១លានរៀល។ ប្រគេនព្រះសង្ឃ ៤អង្គ ក្នុង១អង្គៗ ប្រគេន សាដក១ និងបច្ច័យ ៤០ម៉ឺនរៀល។ ជូនលោកតាអាចារ្យ គណៈកម្មការវត្ត តាជី យាយជី ចំនួន ២៤នាក់ ក្នុងម្នាក់ៗ ក្រណាត់ស១ដុំ និងថវិកា ២ម៉ឺនរៀល (ជាអំណោយរបស់សម្តេចតេជោ និងសម្តេចធិបតី) និងថវិកា ៥ម៉ឺនរៀលទៀត (ជាអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន)៕

រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ផ្លូវកៅស៊ូ៦ខ្សែនៅក្នុងខេត្តពោធិ៍សាត់

ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ រួមដំណើរដោយឯកឧត្តមជាថ្នាក់ដឹកនាំក្រសួង មន្ដ្រីបច្ចេកទេសក្រសួង និងមន្ទីរអភិវឌ្ឍន៍ជនបទខេត្ត អញ្ជើញចុះទៅពិនិត្យវឌ្ឍនភាពការងារស្ថាបនាផ្លូវចំនួន៦ខ្សែ នៅក្នុងខេត្តពោធិ៍សាត់។ផ្លូវចំនួន៦ខ្សែ ក្នុងខេត្តពោធិ៍សាត់ ដែលក្នុងនោះពីរខ្សែ ជាឥណទានសហប្រតិបត្តិការពីធនាគារពិភពលោក (WB) កំពុងត្រូវបានកសាង ដែលខ្សែទី១៖ ផ្លូវភូមិបាគូ-ផ្ទះស្រែ ក្រាលកៅស៊ូ (DBST) និងក្រាលបេតុង មានប្រវែងជាង៧គីឡូម៉ែត្រកន្លះ តភ្ជាប់ពីភូមិផ្ទះស្រែ ឃុំស្វាយលួង ទៅដល់ភូមិបាគូ ឃុំស្រែស្ដុក ស្រុកកណ្ដៀង ដែលចាប់ផ្ដើមសាងសង់កាលពីខែឧសភា ឆ្នាំ២០២៥ មកដល់បច្ចុប្បន្ន សម្រេចលទ្ធផលបាន៨៧ភាគរយ។ ខ្សែទី២៖ ផ្លូវវត្តព្រះធាតុ-ភូមិថ្មី ក្រាលកៅស៊ូ (DBST) និងក្រាលបេតុង មានប្រវែង៥,៣៧គ.ម តភ្ជាប់ពីភូមិបាគូ ទៅដល់ភូមិធ្លាអំពិល ឃុំស្រែស្តុក ស្រុកកណ្ដៀង ដែលចាប់ផ្ដើមសាងសង់កាលពីខែសីហា ឆ្នាំ២០២៥ មកដល់បច្ចុប្បន្នសម្រេចលទ្ធផលបាន៤៧,៩៣%។ ខ្សែទី៣៖ P8R08 ឈ្មោះផ្លូវ ស្ថានីយ-ធ្លក-បឹងចក ក្រាលកៅស៊ូ (DBST) និងក្រាលបេតុង មានប្រវែង១១គ.ម តភ្ជាប់ពីភូមិស្ថានីយ ឃុំកណ្តៀង ទៅដល់ភូមិបឹងចក ឃុំស្យា ស្រុកកណ្ដៀង ចាប់ផ្ដើមសាងសង់កាលពីខែសីហា ឆ្នាំ២០២៥ មកដល់បច្ចុប្បន្នសម្រេចលទ្ធផលបាន៥៣,៤៨%។ ខ្សែទី៤៖ ផ្លូវ បន្ទាយត្រោក-កំពង់សំបួរ ក្រាលកៅស៊ូ (DBST) និងក្រាលបេតុង មានប្រវែង៤,២៧គ.ម. តភ្ជាប់ពីភូមិបន្ទាយត្រោក ឃុំស្រែស្តុក ទៅដល់ភូមិបឹងឈូក ឃុំកណ្តៀង ស្រុកកណ្ដៀង ចាប់ផ្ដើមកសាងកាលពីខែសីហា ឆ្នាំ២០២៥ មកដល់បច្ចុប្បន្នសម្រេចលទ្ធផលបាន៤៤,៤%។ផ្លូវទាំង៤ខ្សែនេះ ស្ថិតក្នុងក្របខ័ណ្ឌគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) នៃក្រសួងអភិវឌ្ឍន៍ជនបទ ដោយប្រើប្រាស់ហិរញ្ញប្បទានសហប្រតិបត្តិការរវាងរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ធនាគារវិនិយោគអឺរ៉ុប (EIB) និងមូលនិធិវិនិយោគអាស៊ី នៃសហភាពអឺរ៉ុប (EU-AIF)។ចំណែកខ្សែទី៥៖ ផ្លូវ ភ្នៅ-ផ្ទះព្រីង ក្រាលកៅស៊ូ (DBST) និងក្រាលបេតុង ប្រវែង១២,២៦គ.ម តភ្ជាប់ពីភូមិក្រពើរោទិ៍ ឃុំស្នាមព្រះ ស្រុកបាកាន ទៅកាន់ភូមិដំរីស ឃុំ កោះជុំ ស្រុកកណ្តៀង បានចាប់ផ្ដើមសាងសង់នៅខែឧសភា ឆ្នាំ២០២៥ មកដល់បច្ចុប្បន្នសម្រេចលទ្ធផលបាន៤៦,២% គ្រោងនឹងបញ្ចប់នៅខែវិច្ឆិកា ឆ្នាំ២០២៦ និងខ្សែទី៦៖ ផ្លូវ អូរស្ដៅ-វត្តវាល ក្រាលកៅស៊ូ (DBST) និងក្រាលបេតុង មានប្រវែងសរុប៤,៩៩គ.ម. តភ្ជាប់ពីភូមិអូរស្តៅ ឃុំស្វាយអាត់ ស្រុកពោធិ៍សាត់ ទៅកាន់ភូមិផ្សារលើ ឃុំលលកស ស្រុកពោធិ៍សាត់ បានចាប់ផ្ដើមសាងសង់នៅឧសភា ឆ្នាំ២០២៥ សម្រេចវឌ្ឍនភាព ៣៥,៦៣%។ខ្សែផ្លូវទី៥ និងទី៦នេះ ស្ថិតក្នុងក្របខ័ណ្ឌគម្រោងគ្រប់គ្រងគ្រោះមហន្តរាយនៅកម្ពុជា និងអាស៊ីអាគ្នេយ៍ ជំហាន ២ នៃក្រសួងអភិវឌ្ឍន៍ជនបទ ដោយទទួលបានឥណទានសហប្រតិបត្តិការពីធនាគារពិភពលោក (WB)។សូមជម្រាបជូនដែរថា ក្នុងឱកាសពិនិត្យការដ្ឋានសាងសង់ផ្លូវទាំង៦ខ្សែនេះ ឯកឧត្តមរដ្ឋមន្ដ្រីក្រសួងអភិវឌ្ឍន៍ជនបទ បានណែនាំដល់ទីប្រឹក្សាបច្ចេកទេស និងក្រុមហ៊ុនទទួលការសាងសង់ប្រចាំការនៅការដ្ឋានផ្ទាល់ ឱ្យពន្លឿនការ ងារសាងសង់ស្របតាមកិច្ចសន្យា និងត្រូវអនុវត្តឱ្យបានត្រឹមត្រូវតាមបទដ្ឋានបច្ចេកទេស ដើម្បីឱ្យផ្លូវមានគុណភាពល្អ អាចបម្រើផលប្រយោជន៍ជូនប្រជាពលរដ្ឋក្នុងមូលដ្ឋានបានយូរអង្វែង៕ អត្ថបទ ៖ ភារុន

គណៈកម្មការទី១ នៃរដ្ឋសភា វាយតម្លៃខ្ពស់ចំពោះយន្តការដោះស្រាយវិវាទដីធ្លីរបស់រដ្ឋបាលខេត្តស្វាយរៀង

គណៈប្រតិភូគណៈកម្មការសិទ្ធិមនុស្ស ទទួលពាក្យបណ្តឹង និងអង្កេត និងអធិការកិច្ច នៃរដ្ឋសភា (គណៈកម្មការទី១) ដឹកនាំដោយ ឯកឧត្តម សរ ចំរុង នារសៀលថ្ងៃទី២០ ខែឧសភា ឆ្នាំ២០២៦ បានអញ្ជើញប្រជុំពិភាក្សាការងារជាមួយរដ្ឋបាលខេត្តស្វាយរៀង ដឹកនាំដោយ ឯកឧត្តម ប៉េង ពោធិ៍សា អភិបាលខេត្តស្វាយរៀង ដើម្បីសិក្សាពីវឌ្ឍនភាព និងយន្តការដោះស្រាយទំនាស់ដីធ្លី។ឯកឧត្តម ប៉េង ពោធិ៍សា បានរាយការណ៍ពីកិច្ចខិតខំប្រឹងប្រែងដោះស្រាយវិវាទជូនប្រជាពលរដ្ឋដោយសន្តិវិធី តាមគោលការណ៍ច្បាប់ និងនីតិវិធីជាធរមាន ជាពិសេសតាមរយៈវប្បធម៌សន្តិភាព និងយន្តការដែលមានស្រាប់ ដូចជា គណៈកម្មការសុរិយោដីគ្រប់កម្រិត និងកិច្ចសហការជាមួយអាជ្ញាធរជាតិដោះស្រាយវិវាទក្រៅប្រព័ន្ធតុលាការ (MoU ថ្ងៃទី២៤ កក្កដា ២០២៥)។ ជារួម គិតចាប់ពីឆ្នាំ២០២៥ ដល់ខែឧសភា ឆ្នាំ២០ cylinders២៦ នេះ លទ្ធផលនៃការដោះស្រាយសម្រេចបាន រួមមាន៖ សំណុំរឿងពីក្រសួងរៀបចំដែនដី បង្វែរមកខេត្ត (សរុប ៥៦ករណី) ដោះស្រាយបញ្ចប់ ១៤ករណី, ច្រានចោល ២៨ករណី, ស្ថិតក្នុងសមត្ថកិច្ចតុលាការ ១០ករណី, បង្វែរទៅខេត្តព្រៃវែង ១ករណី និងកំពុងដោះស្រាយ ៣ករណី។ និងសំណុំរឿងរដ្ឋបាលខេត្តទទួលផ្ទាល់ (សរុប ៣៨ករណី) ដោះស្រាយបញ្ចប់ ៧ករណី, បញ្ជូនទៅស្ថាប័នពាក់ព័ន្ធ ៥ករណី, ស្ថិតក្នុងសមត្ថកិច្ចតុលាការ ៣ករណី និងកំពុងដោះស្រាយ ២៣ករណី។ទន្ទឹមនឹងនេះ រដ្ឋបាលខេត្តប្តេជ្ញាបន្តជំរុញការដោះស្រាយក្រៅប្រព័ន្ធតុលាការ បង្កើនការផ្សព្វផ្សាយច្បាប់ដើម្បីទប់ស្កាត់ទំនាស់ និងខិតខំចេញវិញ្ញាបនបត្រសម្គាល់ម្ចាស់អចលនវត្ថុ (ប្លង់ដី) ជូនប្រជាពលរដ្ឋឱ្យបាន ១០០% ក្នុងឆ្នាំ២០២៦។ ក្រោយពីស្តាប់របាយការណ៍ ឯកឧត្តម សរ ចំរុង បានកោតសរសើរ និងវាយតម្លៃខ្ពស់ចំពោះរដ្ឋបាលខេត្តស្វាយរៀង ក្នុងការផ្តល់សេវាសាធារណៈ និងដោះស្រាយទុក្ខកង្វល់របស់ពលរដ្ឋ។ឯកឧត្តមប្រធានគណៈកម្មការ ក៏បានលើកឡើងពីសារៈសំខាន់នៃការគោរពសិទ្ធិមនុស្ស ដោយអំពាវនាវឱ្យមានការដោះស្រាយបញ្ហាតាមយន្តការការទូត និងកិច្ចសហប្រតិបត្តិការព្រំដែន ដើម្បីការពារជនភៀសសឹកកម្ពុជាស្របតាមច្បាប់អន្តរជាតិ។ ជាមួយគ្នានោះដែរ ឯកឧត្តមបានជំរុញឱ្យអាជ្ញាធរពង្រឹងការផ្សព្វផ្សាយព័ត៌មានពិត ដើម្បីប្រយុទ្ធប្រឆាំងព័ត៌មានក្លែងក្លាយ ដែលបង្កភាពវឹកវរក្នុងសង្គម និងដើម្បីបង្កើនទំនុកចិត្តរបស់ប្រជាពលរដ្ឋមកលើការដឹកនាំរបស់រាជរដ្ឋាភិបាល ៕ អត្ថបទ៖ ភា សារិត

អគ្គមេបញ្ជាការកងយោធពលខេមរភូមិន្ទ៖ កម្ពុជាប្រកាន់ខ្ជាប់គោលការណ៍ព្រំដែនមិនត្រូវបានកែប្រែដោយការប្រើប្រាស់កម្លាំង

ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានអះអាងជាថ្មីពីការប្រកាន់ខ្ជាប់គោលការណ៍ព្រំដែនមិនត្រូវបានកែប្រែដោយការប្រើប្រាស់កម្លាំង ព្រមទាំងការខិតខំធ្វើឲ្យស្ថានការណ៍នៅតាមបណ្តោយព្រំដែនកម្ពុជា-ថៃ វិលត្រឡប់ទៅរកភាពប្រក្រតីឡើងវិញ។ ការអះអាងនេះ ក្នុងឱកាសអញ្ជើញចូលរួមកិច្ចប្រជុំអគ្គមេបញ្ជាការកងទ័ពអាស៊ានលើកទី២៣ (ACDFM-23) ដែលប្រព្រឹត្តទៅតាមប្រព័ន្ធវីដេអូ ក្រោមប្រធានបទ «ធានាអនាគតរបស់យើងរួមគ្នា» នៅព្រឹកថ្ងៃទី២១ ខែឧសភា ឆ្នាំ២០២៦។ ឯកឧត្តម នាយឧត្តមសេនីយ៍ វង្ស ពិសេន បានថ្លែងអំណរគុណដល់បណ្តាប្រទេសសមាជិកអាស៊ាន ជាពិសេស ប្រទេសម៉ាឡេស៊ី ដែលជាប្រធានប្តូរវេនអាស៊ានឆ្នាំ២០២៥ និងប្រទេសហ្វីលីពីន ប្រធានប្តូរវេនអាស៊ានឆ្នាំ២០២៦ ចំពោះតួនាទីដ៏សំខាន់ក្នុងការគាំទ្របទឈប់តាមបណ្តោយព្រំដែនកម្ពុជា-ថៃ។ ឯកឧត្តម នាយឧត្តមសេនីយ៍ វង្ស ពិសេន ក៏បានថ្លែងអំណរគុណ និងវាយតម្លៃខ្ពស់ចំពោះការបញ្ជូននាយទាហានមកចូលរួមក្នុងបេសកកម្មជាអ្នកសង្កេតការណ៍បទឈប់បាញ់ (AOT) នៅកម្ពុជា ដែលជាព្រឹត្តិការណ៍ប្រវត្តិសាស្ត្រ និងបញ្ជាក់ថា អាស៊ានអាចដោះស្រាយបញ្ហាផ្ទៃក្នុងអាស៊ានដោយខ្លួនឯង។ ឯកឧត្តមបានបញ្ជាក់ថា កម្ពុជាបានត្រៀមខ្លួនរួចជាស្រេចក្នុងការបន្តធ្វើការយ៉ាងជិតស្និទ្ធក្នុងអាណត្តិដឹកនាំដោយប្រទេសហ្វីលីពីន។ ក្នុងសុន្ទរកថាបើក ឯកឧត្តម នាយឧត្តមសេនីយ៍ រ៉ូមេអូ ប្រាវនើ ចេអរ នាយសេនាធិការកងទ័ពហ្វីលីពីន ដែលជាប្រធាននៃកិច្ចប្រជុំ បានលើកឡើងពីប្រធានបទ "ធានាអនាគតរបស់យើងរួមគ្នា" ឆ្លុះបញ្ចាំងពីការពិតត្រូវទទួលស្គាល់ទាំងអស់គ្នា លើបញ្ហាប្រឈមសន្តិសុខនាពេលបច្ចុប្បន្ន និងការឆ្លើយតប។ ឯកឧត្តមបានគូសបញ្ជាក់ថា កត្តាសន្តិភាព ស្ថិរភាព និងភាពធន់នៅក្នុងតំបន់របស់យើងអាចរក្សាបានតែតាមរយៈកិច្ចសហប្រតិបត្តិការ ការជឿទុកចិត្ត និងការទទួលខុសត្រូវរួមគ្នាប៉ុណ្ណោះ។ ឯកឧត្តមបានកោតសរសើរម៉ាឡេស៊ី ដែលជាម្ចាស់ផ្ទះនៃកិច្ចប្រជុំលើកទី២២ ចំពោះភាពជាអ្នកដឹកនាំដ៏រឹងមាំ និងការរួមចំណែកដ៏មានអត្ថន័យក្នុងការជំរុញកិច្ចសហប្រតិបត្តិការការពារជាតិអាស៊ានក្នុងរយៈពេលមួយឆ្នាំកន្លងមក។ ឯកឧត្តមបានទទួលស្គាល់ការគ្រប់គ្រងរបស់ម៉ាឡេស៊ី លើក្រុមអ្នកសង្កេតការណ៍អាស៊ាន និងកិច្ចខិតខំប្រឹងប្រែងរបស់ខ្លួនក្នុងការគាំទ្រយន្តការត្រួតពិនិត្យបទឈប់បាញ់នៅតាមបណ្តោយព្រំដែនកម្ពុជា-ថៃ។ ឯកឧត្តម ចាត់ទុកកិច្ចខិតខំប្រឹងប្រែងរបស់ម៉ាឡេស៊ី បានបង្ហាញពីតម្លៃដ៏យូរអង្វែងនៃការសន្ទនា ការអត់ធ្មត់ និងកិច្ចសហប្រតិបត្តិការក្នុងការរក្សាស្ថិរភាពក្នុងតំបន់ស្របតាមមាគ៌ាអាស៊ាន៕ អត្ថបទ៖ វង្ស សុភាព

អភិបាលខេត្តកណ្ដាល ជំរុញឱ្យអាជ្ញាធរស្រុកកៀនស្វាយពន្លឿននីតិវិធីការផ្ដល់បណ្ណកម្មសិទ្ធិដីធ្លីដល់ពលរដ្ឋ ខណៈការចុះបញ្ជីបានបញ្ចប់អស់ហើយ

ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានមានប្រសាសន៍ថា ស្រុកកៀស្វាយបានបញ្ចប់ការចុះបញ្ជីដីធ្លីលក្ខណៈជាប្រព័ន្ធរួចរាល់ហើយ តែការចែកបណ្ណប្រជាពលរដ្ឋមិនទាន់មកយកបានគ្រប់គ្នានៅឡើយទេ ដូច្នេះមន្ត្រីជំនាញ និងអាជ្ញាធរស្រុកត្រូវបន្តខិតខំរកកវិធីសាស្ត្រ ដើម្បីឱ្យម្ចាស់កម្មសិទ្ធិដីធ្លី រួសរាន់មកទទួលយកបណ្ណកម្មសិទ្ធិដីធ្លីរបស់ខ្លួន សម្រាប់ប្រើប្រាស់ស្របទៅតាមច្បាប់ឱ្យបានគ្រប់ៗគ្នា។ ឯកឧត្តម គួច ចំរើន ថ្លែងបញ្ជាក់បែបនេះ ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ចំនួន ១៣ភូមិ រួមមាន៖ ភូមិពោធិ៍មៀវ ភូមិគគីរធំ ភូមិគគីរធំ២ ភូមិរាំងដេក ភូមិរាំងដេក២ ស្ថិតក្នុងឃុំគគីធំ និងភូមិចន្លក់ ភូមិចន្លក់ក្រៅ ភូមិទួលក្របៅ ភូមិទួលត្នោត ភូមិគគីរ ភូមិដូនស ភូមិទួលដួង ភូមិតារាបជូនស ស្ថិតឃុំគគី ស្រុកកៀនស្វាយ សរុប ១២,៧៥២បណ្ណ ក្រោមអធិបតី ឯកឧត្តម ឈឿន ប៊ុណ្ណារ័ត្ន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងឯកឧត្តម នូ សាខន ប្រធានក្រុមប្រឹក្សាខេត្ត កាលពីព្រឹកថ្ងៃទី២០ ខែឧសភា ឆ្នាំ២០២៦ នៅបរិវេណសាលាស្រុកកៀនស្វាយ។ បន្ថែមពីលើនេះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋដែលមានបានកម្មសិទ្ធិដីធ្លីទាំងអស់ សូមអញ្ជើញមកទទួលយកប័ណ្ណពីមន្ត្រីសូរិយោដី និងមន្ត្រីច្រកចេញចូលតែមួយ ស្ថិតក្នុងស្រុកកៀនស្វាយ ជាពិសេសសូមបងប្អូនប្រជាពលរដ្ឋដែលចូលរួមក្នុងពិធីនាថ្ងៃនេះ មេត្តាជួយផ្សព្វផ្សាយ និងផ្ដាំផ្ញើដល់បងប្អូនប្រជាពលរដ្ឋផ្សេងៗទៀតឱ្យអញ្ជើញមកទទួលបានប័ណ្ណកម្មសិទ្ធិពីការិយាល័យច្រកចេញតែមួយស្រុកឱ្យបានគ្រប់ៗគ្នាផងដែរ ។ ដោយឡែក ចំពោះអាជ្ញាធរស្រុក និងមន្ត្រីពាក់ព័ន្ធទាំងអស់ ឯកឧត្តម គូច ចំរើន បានក្រើនរំលឹក ដាច់ខាតមិនត្រូវចុះហត្ថលេខាបញ្ជាក់ឯកសារផ្សេងៗពាក់ព័ន្ធនិងរឿងដីធ្លីជូនប្រជាពលរដ្ឋ ក្រៅពីប័ណ្ណកម្មសិទ្ធិដីធ្លីដែលបានចុះបញ្ជីរួចហើយនោះទេ អាជ្ញាធរត្រូវទទួលស្គាល់តែបណ្ណកម្មសិទ្ធតែមួយគត់ប៉ុណ្ណោះ ជៀសវាងបង្កភាពស្មុគស្មាញ និងបង្កើតបញ្ហាផ្សេងៗ ពាក់ព័ន្ធនិងរឿងដីធ្លីតទៅទៀត បើមន្ត្រីណានៅតែបន្តចុះហត្ថលេខាទៀត ត្រូវទទួលខុសត្រូវចំពោះមុខច្បាប់។

មន្ទីរពេទ្យព្រះអង្គឌួង ដាក់ឱ្យប្រើប្រាស់ជាផ្លូវការ នូវម៉ាស៊ីន Endoscope សំរាប់ពិនិត្យ ព្យាបាល បញ្ហាក្នុងបំពង់ទឹកប្រមាត់ និងលំពែង

មន្ទីរពេទ្យព្រះអង្គឌួង នៃក្រសួងសុខាភិបាល បានសម្ពោធដាក់ឱ្យប្រើប្រាស់ជាផ្លូវការ នូវម៉ាស៊ីន Olympus Endoscope Evis Exera III CV-190 សម្រាប់ធ្វើ ERCP ពិនិត្យ និងព្យាបាល បញ្ហាក្នុងបំពង់ទឹកប្រមាត់ និងលំពែង, កាលពីរសៀលថ្ងៃទី២០ ខែឧសភា ឆ្នាំ២០២៦។ឯកឧត្តមសាស្រ្តាចារ្យ រង លូ លីឃាង ទីប្រឹក្សាក្រសួងសុខាភិបាល និងជានាយកមនី្ទរពេទ្យព្រះអង្គឌួង បានថ្លែងថា ថ្ងៃនេះមនី្ទរពេទ្យព្រះអង្គឌួង មានកិតិ្តយសដែលបានដាក់ឲ្យដំណើរការនូវម៉ាស៊ីន Olympus Endoscope Evis Exera III CV-190 នេះ សម្រាប់ធ្វើ ERCP និងមានតួនាទីសម្រាប់ពិនិត្យ និងព្យាបាល បញ្ហាក្នុងបំពង់ទឹកប្រមាត់ និងលំពែង រួមមាន៖ ការប្រើ Laser ជំនួយក្នុងការបាញ់បំបែកក្រួសឱ្យតូចៗ ក្នុងករណីក្រួសធំៗមិនអាចចាប់បាន, ការចាប់ក្រួសក្នុងបំពង់បង្ហូរទឹកប្រមាត់, ការពិនិត្យការស្ទះ ឬការរលាក, ការដាក់បំពង់តូច (stent) ដើម្បីបើកការស្ទះ, ការយកគំរូកោសិកា (biopsy) ដើម្បីពិនិត្យរកជំងឺមហារីក មិនចាំបាច់វះកាត់ធំ អ្នកជំងឺសម្រាកពេទ្យរយៈពេលខ្លី។ ឯកឧត្តមសាស្រ្តាចារ្យ រង លូ លីឃាង សង្ឃឹមថា ការដាក់ឲ្យដំណើរការម៉ាស៊ីនថ្មីនេះ និងបម្រើសេវាជូនប្រជាពលរដ្ឋ ដែលអញ្ជើញមកទទួលសេវាពីក្រុមពេទ្យគ្រូជំនាញ នៃមនី្ទរព្រះអង្គឌួងយើងកាន់តែប្រសិទ្ធភាព សុវតិ្ថភាព និងភាពកក់ក្តៅទ្វេដងជូនបងប្អូនប្រជាពលរដ្ឋ។ទន្ទឹមគ្នានោះដែរលោកស្រីសាស្រ្តាចារ្យជំនួយ ជុកម៉ុល កុសុម៉ា នាយិការង និងលោកស្រីវេជ្ជបណ្ឌិត ជា ស៊ីហ្សែនី្ន ប្រធានផ្នែកយូនីតក្រពះ ពោះវៀន ថ្លើម និងឬសដូងបាត និងលោកវេជ្ជបណ្ឌិត ស្រ៊ាង គីមឡុង ឯកទេសវះកាត់ប្រព័ន្ធរំលាយអាហារ នៃមនី្ទរពេទ្យព្រះអង្គឌួង បានបង្ហាញចំណាប់អារម្មណ៍ពិតជាមានសេចកី្តរំភើបរីករាយមែនទែន នៃការធ្វើទំនើបកម្មរបស់មន្ទីរពេទ្យព្រះអង្គឌួង បានបំពាក់ឧបករណ៍វេជ្ជសាស្ត្រទំនើបៗ Endoscope ERCPនាថ្ងៃនេះ ក្នុងគោលដៅចម្បង គឺបង្កើនគុណភាព ការពារសុវត្ថិភាពអ្នកជំងឺ និងកាត់បន្ថយការចំណាយរបស់ប្រជាពលរដ្ឋទៅព្យាបាលនៅក្រៅប្រទេស។ជាចុងក្រោយក្រុមគ្រូពេទ្យជំនាញនៃមនី្ទរពេទ្យព្រះអង្គឌួង បានអំពាវនាវដល់បងប្អូនប្រជាពលរដ្ឋដែលមានអាការៈឈឺចាប់ និងមានបញ្ហាសុខភាពអ្វីមួយកើតឡើង សូមប្រញាប់មកកាន់មនី្ទរពេទ្យ ដើម្បីពិនិត្យឲ្យឃើញបានទាន់ពេលវេលា ដើម្បីទទួលការព្យាបាលឲ្យបានត្រឹមត្រូវ និងមានប្រសិទ្ធភាពខ្ពស់៕ អត្ថបទ រដ្ឋា

មន្ត្រីជាន់ខ្ពស់កងទ័ពជើងគោក ណែនាំដល់កងកម្លាំងទាំងអស់ត្រូវមានស្មារតី និងឆន្ទៈមោះមុតស្រឡាញ់ជាតិ និងទឹកដី ការពារមិនឲ្យខ្មាំងសត្រូវរំលោភបំពាននៅគ្រប់ទម្រង់

ភ្នំពេញ៖ ឯកឧត្ដម ឧត្តមសេនីយ៍ទោ ម៉ៅ ផល្លា នាយរងសេនាធិការ នាយការិយាល័យទី៥ កងទ័ពជើងគោក បានបញ្ជាក់ថា កងកម្លាំងយើងទាំងអស់ត្រូវមានស្មារតី និងឆន្ទៈមោះមុតស្រឡាញ់ទឹកដីស្រឡាញ់ជាតិមាតុភូមិការពារឲ្យបាននូវអធិបតេយ្យភាពជាតិ ដោយមិនឲ្យខ្មាំងសត្រូវរំលោភបំពាននៅគ្រប់ទម្រង់នៃការឈ្លានពានបានឡើយ និងជានិច្ចកាលធានាកម្លាំង សម្ភារៈគ្រឿងបំពាក់ មធ្យោបាយ ដើម្បីត្រៀមអនុវត្តមុឺងម៉ាត់តាមបទបញ្ជារបស់ថ្នាក់លើ ពេលមានសភាពការណ៍ចាំបាច់។ការបញ្ជាក់នេះ ក្នុងពិធីផ្សព្វផ្សាយសភាពការណ៍ ជាតិ អន្តរជាតិ និងពង្រឹងតួនាទីភារកិច្ចកងយោធពលខេមរភូមិន្ទ ជូនដល់នាយទាហាន នាយទាហានរង និងពលទាហាន នៃបញ្ជាការដ្ឋានកងទ័ពជើងគោក នៅព្រឹកថ្ងៃទី២១ ខែឧសភាឆ្នាំ២០២៦។ ឯកឧត្ដមឧត្តមសេនីយ៍ទោ ម៉ៅ ផល្លា បានមានប្រសាសន៍ថា៖ ពិភពលោកបច្ចុប្បន្នស្ថិតនៅជាពហុប៉ូល ក្នុងន័យនេះមហាអំណាចបានពង្រីកភូមិសាស្ត្រនយោបាយដើម្បីផលប្រយោជន៍ខ្លួន កត្តាទាំងនេះបានជះឥទ្ធិពលវិជ្ជមាន និងអវិជ្ជមាន ដល់លំនឹងសេដ្ឋកិច្ចពិភពលោក ពិសេសជះឥទ្ធិពលមិនល្អដល់ប្រទេសកំពុងអភិវឌ្ឍន៍ ។ឯកឧត្ដមបានលើកឡើងអំពីវិបត្តិសង្គ្រាមដែលនិងបានកំពុងកើតឡើងនៅក្នុងពិភពលោកដែលធ្វើឲ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចពិភពលោក សេដ្ឋកិច្ចតំបន់ វិបត្តិជនភៀសសឹក និងផលិតផលនានាមួយចំនួនទៀត ។ឧត្តមសេនីយ៍ទោ ម៉ៅ ផល្លា បានបន្ថែមទៀតថា៖ កម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដាក់ចេញនូវគោលនយោបាយអភិវឌ្ឍន៍សេដ្ឋកិច្ចជាតិប្រកបដោយចក្ខុវិស័យច្បាស់លាស់ និងគោលនយោបាយគន្លឹះរបស់រាជរដ្ឋាភិបាល នីតិកាលទី៧ នៃរដ្ឋសភាសំដៅធានាការអភិវឌ្ឍន៍ប្រកបទៅដោយថាមពល ភាពធន់ និងចីរភាព ។

គណៈកម្មការសិទ្ធិមនុស្សនៃរដ្ឋសភា វាយតម្លៃខ្ពស់ចំពោះយន្តការដោះស្រាយវិវាទដីធ្លីរបស់រដ្ឋបាលខេត្តស្វាយរៀង

គណៈប្រតិភូគណៈកម្មការសិទ្ធិមនុស្ស ទទួលពាក្យបណ្តឹង និងអង្កេត និងអធិការកិច្ច នៃរដ្ឋសភា (គណៈកម្មការទី១) ដឹកនាំដោយ ឯកឧត្តម សរ ចំរុង នារសៀលថ្ងៃទី២០ ខែឧសភា ឆ្នាំ២០២៦ បានអញ្ជើញប្រជុំពិភាក្សាការងារជាមួយរដ្ឋបាលខេត្តស្វាយរៀង ដឹកនាំដោយ ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ដោយមានការចូលរួមពីតំណាងរាស្ត្រមណ្ឌលខេត្តស្វាយរៀង និងមន្ទីរ-អង្គភាពជំនាញ ដើម្បីសិក្សាពីវឌ្ឍនភាព និងយន្តការដោះស្រាយទំនាស់ដីធ្លី។ក្នុងជំនួបនោះ ឯកឧត្តម ប៉េង ពោធិ៍សា បានរាយការណ៍ពីកិច្ចខិតខំប្រឹងប្រែងដោះស្រាយវិវាទជូនប្រជាពលរដ្ឋដោយសន្តិវិធី តាមគោលការណ៍ច្បាប់ និងនីតិវិធីជាធរមាន ជាពិសេសតាមរយៈវប្បធម៌សន្តិភាព និងយន្តការដែលមានស្រាប់ ដូចជា គណៈកម្មការសុរិយោដីគ្រប់កម្រិត និងកិច្ចសហការជាមួយអាជ្ញាធរជាតិដោះស្រាយវិវាទក្រៅប្រព័ន្ធតុលាការ (MoU ថ្ងៃទី២៤ កក្កដា ២០២៥)។ជារួម គិតចាប់ពីឆ្នាំ២០២៥ ដល់ខែឧសភា ឆ្នាំ២០ cylinders២៦ នេះ លទ្ធផលនៃការដោះស្រាយសម្រេចបាន រួមមាន៖ សំណុំរឿងពីក្រសួងរៀបចំដែនដី បង្វែរមកខេត្ត (សរុប ៥៦ករណី) ដោះស្រាយបញ្ចប់ ១៤ករណី, ច្រានចោល ២៨ករណី, ស្ថិតក្នុងសមត្ថកិច្ចតុលាការ ១០ករណី, បង្វែរទៅខេត្តព្រៃវែង ១ករណី និងកំពុងដោះស្រាយ ៣ករណី។ និងសំណុំរឿងរដ្ឋបាលខេត្តទទួលផ្ទាល់ (សរុប ៣៨ករណី) ដោះស្រាយបញ្ចប់ ៧ករណី, បញ្ជូនទៅស្ថាប័នពាក់ព័ន្ធ ៥ករណី, ស្ថិតក្នុងសមត្ថកិច្ចតុលាការ ៣ករណី និងកំពុងដោះស្រាយ ២៣ករណី។ទន្ទឹមនឹងនេះ រដ្ឋបាលខេត្តប្តេជ្ញាបន្តជំរុញការដោះស្រាយក្រៅប្រព័ន្ធតុលាការ បង្កើនការផ្សព្វផ្សាយច្បាប់ដើម្បីទប់ស្កាត់ទំនាស់ និងខិតខំចេញវិញ្ញាបនបត្រសម្គាល់ម្ចាស់អចលនវត្ថុ (ប្លង់ដី) ជូនប្រជាពលរដ្ឋឱ្យបាន ១០០% ក្នុងឆ្នាំ២០២៦។ក្រោយពីស្តាប់របាយការណ៍ ឯកឧត្តម សរ ចំរុង បានកោតសរសើរ និងវាយតម្លៃខ្ពស់ចំពោះរដ្ឋបាលខេត្តស្វាយរៀង ក្នុងការផ្តល់សេវាសាធារណៈ និងដោះស្រាយទុក្ខកង្វល់របស់ពលរដ្ឋ។ឯកឧត្តមប្រធានគណៈកម្មការ ក៏បានលើកឡើងពីសារៈសំខាន់នៃការគោរពសិទ្ធិមនុស្ស ដោយអំពាវនាវឱ្យមានការដោះស្រាយបញ្ហាតាមយន្តការការទូត និងកិច្ចសហប្រតិបត្តិការព្រំដែន ដើម្បីការពារជនភៀសសឹកកម្ពុជាស្របតាមច្បាប់អន្តរជាតិ។ជាមួយគ្នានោះដែរ ឯកឧត្តមបានជំរុញឱ្យអាជ្ញាធរពង្រឹងការផ្សព្វផ្សាយព័ត៌មានពិត ដើម្បីប្រយុទ្ធប្រឆាំងព័ត៌មានក្លែងក្លាយ ដែលបង្កភាពវឹកវរក្នុងសង្គម និងដើម្បីបង្កើនទំនុកចិត្តរបស់ប្រជាពលរដ្ឋមកលើការដឹកនាំរបស់រាជរដ្ឋាភិបាល៕

បណ្ដាញសង្គម

ព័ត៌មានថ្មីៗ

អ្នកវិភាគ៖ លោក Kim Jong Un អាចនឹងប្រើប្រាស់ដំណើរទស្សនកិច្ចរបស់លោក Xi ដើម្បីបង្ហាញកម្លាំងកូរ៉េខាងជើង

ស្នងការដឹកជញ្ជូនសហភាពអឺរ៉ុប៖ EU ពុំមើលឃើញកង្វះខាតប្រេងយន្តហោះនោះទេខណៈតម្លៃប្រេងហក់ឡើងខ្ពស់

លោក Putinនិយាយថា រុស្ស៊ីបានទាក់ទងអាមេរិកពាក់ព័ន្ធនឹងបញ្ហាវិបត្តិនៅប្រទេសគុយបា

អ្នកថែសន្តិភាព UNម្នាក់ ស្លាប់ និង ២នាក់ រងរបួស អំឡុងការផ្លោងគ្រាប់កាំភ្លើងត្បាល់នៅលីបង់

អាហ្វ្រិកខាងត្បូងបញ្ជូនបេ្រសិតទៅកាន់អាហ្វ្រិក និងទ្វីបផ្សេងទៀត ក្រោយការវាយប្រហាររើសអើងជនបរទេស

ក្រុមមេដឹកនាំជួបជុំគ្នា មុនកិច្ចប្រជុំកំពូល សហភាពអឺរ៉ុប-តំបន់បាល់កង់ខាងលិច នៅប្រទេសម៉ុនតេណេហ្គ្រូ

អាមេរិកបង្កើនសម្ពាធលើគុយបា ខណៈពួកគេដាក់ទណ្ឌកម្មលោកប្រធានាធិបតី Diaz-Canel

រដ្ឋមន្រ្តីការពារជាតិអាមេរិកចាត់ទុកបាតុកម្មនៅបូលីវីថា ប្រៀបបាននឹងការផ្តួលរំលំរដ្ឋាភិបាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877