BTV NEWS

ក្រសួងមុខងារសាធារណៈ និងក្រសួងសុខាភិបាល សហការរៀបចំពិធីប្រកាសបើក «យុទ្ធនាការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធនៃសុខាភិបាលមូលដ្ឋាន»

ឯកឧត្តម ហេង សួរ និងលោកជំទាវ ដឹកនាំនិយោជកនៃក្រុមហ៊ុន រោងចក្រ សហគ្រាសចុះសួរសុខទុក្ខជនភៀសសឹក ១ពាន់គ្រួសារនៅស្រុកគូលែន ខេត្តព្រះវិហារ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញគោរពវិញ្ញាណក្ខន្ធយុទ្ធជនពលីចំនួន ៣រូប ក្នុងបុព្វហេតុការពារបូរណភាពជាតិ និងអធិបតេយ្យជាតិ

រដ្ឋមន្រ្ដីក្រសួងអប់រំដឹកនាំកិច្ចប្រជុំពិនិត្យឡើងវិញអាទិភាពការជួសជុល និងសាងសង់សាលារៀនខូចពីការផលប៉ះពាល់ពីវិវាទព្រំដែនជាមួយប្រទេសជិតខាង

ព័ត៌មានជាតិ

អគ្គនាយកដ្ឋានពន្ធនាគារចាក់វ៉ាក់សាំងកូវីដ-១៩ ដុសជំរុញ ដល់មន្ត្រី និងជនជាប់ឃុំ ជាង៥ម៉ឺននាក់

នៅពេលដែលក្រសួងសុខាភិបាល បានប្រកាសពីសារសំខាន់នៃការបន្តចាក់វ៉ាក់សាំងដុសជំរុញ ដើម្បីបង្ការជំងឺកូវីដ-១៩ ប្រភេទថ្មី អគ្គនាយកដ្ឋានពន្ធនាគារក្រសួងមហាផ្ទៃ បានទទួលគោលការណ៍ណែនាំភ្លាមពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឱ្យប្រញាប់ចាត់ចែងរៀបចំចាក់វ៉ាក់សាំងទាំងមន្ត្រីពន្ធនាគារ និងអ្នកជាប់ឃុំ ដែលជាសត្យានុម័ត គឺពន្ធនាគារ និងមណ្ឌលអប់រំកែប្រែ ជាកន្លែងប្រមូលផ្ដុំមនុស្សជាអចិន្ត្រៃយ៍។ជាលទ្ធផល នៅតាមមណ្ឌលអប់រំកែប្រែ និងពន្ធនាគារទូទាំងប្រទេស មានមន្ត្រី និងអ្នកជាប់ឃុំ ជាង៥ម៉ឺននាក់ បានទទួលការចាក់វ៉ាក់សាំងដុសជំរុញជាស្ថាពរ។ បើតាមឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ការចាក់វ៉ាក់សាំងដុសជំរុញនេះ ផ្ដើមអនុវត្តតាំងពីថ្ងៃទី៦ ខែមិថុនា ឆ្នាំ២០២៥ ដោយមានកិច្ចសហការគាំទ្រពីក្រសួងសុខាភិបាល រហូតបញ្ចប់រួចរាល់ កាលពីថ្ងៃទី១១ ខែកក្កដាកន្លងទៅ។បើតាមឯកឧត្តម ឈន សាណាត គឺរាជរដ្ឋាភិបាលកម្ពុជា ក្រោមការដឹកនាំប្រកបដោយបញ្ញាញាណរបស់សម្ដេចធិបតី ហ៊ុន ម៉ាណែត ដោយមានឯកឧត្តមអភិសន្តិបណ្ឌិត ស សុខា ប្រមុខក្រសួងមហាផ្ទៃ ជាសេនាធិការ កាន់តែបង្កើនការយកចិត្តទុកដាក់ខ្ពស់ចំពោះសុខភាពអ្នកជាប់ឃុំ។ ជាក់ស្ដែងចាប់ពីដើមនីតិកាលទី៧មក អត្រាអ្នកជាប់ឃុំឈឺ និងស្លាប់បានថយចុះគួរឱ្យកត់សម្គាល់ ខណៈអង្គការ សមាគម និងប្រទេសជាដៃគូ ដែលមានកិច្ចសហការជាមួយអគ្គនាយកដ្ឋានពន្ធនាគារ ក៏កត់សម្គាល់ពីភាពប្រសើរឡើងនេះ និងបានផ្ដល់ការលើកទឹកចិត្ត ព្រមទាំងបន្តចាប់ដៃសហការលើការងារថ្មីៗបន្ថែមទៀត ជាមួយអគ្គនាយកដ្ឋាន។គួរកត់សម្គាល់ថា ជាទឡ្ហីករណ៍ជាក់ស្ដែងបង្ហាញថារាជរដ្ឋាភិបាល ពិតជាបាននិងកំពុងគិតគូរយ៉ាងល្អិតល្អន់ចំពោះសុខភាពអ្នកជាប់ឃុំ នៅខែកក្កដា ឆ្នាំ២០២៥នេះ ក្រសួងមហាផ្ទៃ បានប្រកាសប្រឡងចម្រាញ់យកវេជ្ជបណ្ឌិតចំនួន២៩រូប វេជ្ជបណ្ឌិតឯកទេសរោគស្ដ្រី៥រូប និងគិលានុបដ្ឋាកចំនួន៣៨រូប ដើម្បីបំពេញការងារតាមមណ្ឌលអប់រំកែប្រែ និងពន្ធនាគារទូទាំងប្រទេស។ ការប្រកាសជ្រើសរើសនេះ បានទទួលការចាប់អារម្មណ៍ និងអបអរសាទរទាំងពីសិស្ស និស្សិតជំនាញសុខាភិបាល ព្រមទាំងសាធារណជន៕

CMAC បញ្ជូនគ្រូបង្គោលបណ្តុះបណ្តាលជំនាញ អប់រំយល់ដឹងពីមីន និងសំណល់គ្រាប់យុទ្ធភណ្ឌដល់មន្ត្រីនគរបាលប៉ុស្តិ៍រដ្ឋបាល ទូទាំងខេត្តកណ្តាល

មជ្ឈមណ្ឌលសកម្មភាពកំចាត់មីនកម្ពុជាធ្វើការបើកវគ្គបណ្តុះបណ្តាលជំនាញអប់រំយល់ដឹងពីមីននិងសំណល់គ្រាប់យុទ្ធភណ្ឌមិនទាន់ផ្ទុះសង្គ្រាមជូនដល់មន្ត្រីនគរបាល ប៉ុស្តិ៍រដ្ឋបាលទូទាំងខេត្តកណ្តាលសរុបចំនួន ១៥០នាក់ នាថ្ងៃទី១៧ ខែកក្កដា ឆ្នាំ២០២៥ នេះ។ ពិធីនេះធ្វើឡើងក្រោមវត្តមានឯកឧត្តម អ៊ុំ ភូមិរ៉ូ អគ្គនាយករងស៊ីម៉ាក់ តំណាងឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា និងលោកឧត្តមសេនីយ៍ត្រី សេង គឹមឃន ស្នងការរងនគរបាលខេត្តកណ្តាល ទទួលផែនការងារធន ធានមនុស្សកងកម្លាំងប្រដាប់អាវុធ ។ឯកឧត្តម អ៊ុំ ភូមិរ៉ូ អគ្គនាយករងតំណាងឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានថ្លែងថា គោលបំណងនៃវគ្គបណ្តុះបណ្តាលនេះបន្ទាប់ ពីCMAC បានបង្កើនកិច្ចសហប្រតិបត្តិការយ៉ាងជិត ស្និទ្ធជាមួយអគ្គស្នងការនគរបាលជាតិ នៃក្រសួងមហា ផ្ទៃ លើការងារកាត់បន្ថយអត្រាគ្រោះថ្នាក់ដោយសារមីន និងសំណល់គ្រាប់យុទ្ធភណ្ឌសង្គ្រាម តាមការអនុវត្ត « អនុស្សរណៈយោគយល់គ្នា រវាងCMAC និងអគ្គស្នងការនគរបាលជាតិ ក្រសួងមហាផ្ទៃ » ដោយផ្តោតលើការបញ្ជ្រាបការងារអប់រំផ្សព្វផ្សាយ និងប្រមូលព័ត៌មានគ្រាប់មីន និងគ្រាប់យុទ្ធភណ្ឌសង្គ្រាម និងបានផ្តល់ជំនាញអប់រំផ្សព្វផ្សាយយល់ដឹងពីព័ត៌មានសុវត្ថិភាពគ្រាប់ មីននិងសំណល់គ្រាប់យុទ្ធភណ្ឌពីសង្គ្រាម ប្រកបដោយនិរន្តរភាពនៅក្នុងសហគមន៍មូលដ្ឋាន(ប៉ុស្តិ៍រដ្ឋបាលឃុំ/សង្កាត់) ផ្តល់ចំណេះដឹងទាក់ទងទៅនឹងការលើកកម្ពស់តួនាទីភារកិច្ចរបស់ពួកគាត់ ក្នុងការអនុវត្តគោលនយោបាយ “ភូមិ-ឃុំ មានសុវត្ថិភាព” ប្រកបដោយប្រសិទ្ធភាពខ្ពស់ និងបង្កើនសមត្ថភាពបន្ថែមលើជំនាញអភិវឌ្ឍសហគមន៍ ទំនាក់ ទំនងសម្របសម្រួលក្នុងសកម្មភាពមីន ដើម្បីមានសមត្ថភាពគ្រប់គ្រាន់ក្នុងការធ្វើផែនការ ហើយស្វែងយល់ផ្តល់ព័ត៌មានពីទី តាំងគ្រាប់មីន និង សំណល់គ្រាប់យុទ្ធភណ្ឌសង្គ្រាម ។ឯកឧត្តម អ៊ុំ ភូមិរ៉ូ បានថ្លែងបន្ទាប់ពី CMAC បានចុះអនុស្សារណៈយោគយល់គ្នាជាមួយអគ្គស្នងការនគរបាលជាតិ ក្រសួងមហាផ្ទៃចំនួនពីរលើកកាលពីថ្ងៃទី ២១ ខែមិថុនា និងកាលពីថ្ងៃទី១៤ ខែមករា ឆ្នាំ២០២៥ កន្លងទៅស្តីពីកិច្ចសហប្រតិបត្តិការលើការហ្វឹកហ្វឺនជំនាញបច្ចេកទេសបញ្ជាសុខន និងការផ្គត់ផ្គង់សុនខជំនាញបច្ចេកទេស និងការងារកាត់ បន្ថយគ្រោះថ្នាក់ដោយសារមីន និងសំណល់គ្រាប់យុទ្ធភណ្ឌសង្គ្រាម។ យើងក៏បង្កើតបានអ្នកស្ម័គ្រចិត្ត(អាជ្ញាធរមូលដ្ឋាន ប្រជាជន ព្រះសង្ឃ ពិសេសមន្ត្រីនគរបាលជាតិ) រហូតមក ដល់បច្ចុប្បន្ននេះ យើងក៏បានពង្រឹងពង្រីកអ្នកស្ម័គ្រចិត្តទាំងនោះបាន១៨ ខេត្ត រួមមាន ខេត្តបាត់ដំបង ពោធិ៍សាត់ បន្ទាយមានជ័យ ឧត្តរមានជ័យ កំពង់ធំ សៀមរាប ព្រះវិហារ ស្ទឹងត្រែង រតនៈគីរី មណ្ឌលគីរី ក្រចេះ ត្បូងឃ្មុំ ព្រៃវែង ស្វាយរៀង តាកែវ កំពង់ស្ពឺ ខេត្តកំពត និងខេត្តកណ្តាល។ ក្នុងនោះមានបុគ្គលិកជាប់កិច្ចសន្យា ដែលជានាយតំណាងគ្រាប់ប្រចាំខេត្តទាំង១៨(ជាមន្ត្រីនគរបាលក្នុងខេត្តនីមួយៗ មានតួនាទីចាប់ពីនាយរងការិយាល័យរហូតដល់ស្នងការរង) ។មានបណ្តាញស្ម័គ្រចិត្ត (មន្ត្រីបង្គោល) ជាអាជ្ញាធរភូមិ-ឃុំ ប្រជាពលរដ្ឋ ព្រះសង្ឃ មន្ត្រីនគរបាល សរុបទូទាំងប្រទេសចំនួន ១០,២៥៩នាក់ ក្នុងនោះមន្ត្រីនគរបាលមានចំនួនជាង ៥,៥៨៨នាក់ ភាគច្រើនជាមន្ត្រីនគរ បាលថ្នាក់ឃុំ និង សង្កាត់។ បច្ចុប្បន្នកំពុងបន្តពង្រីកបុគ្គលិកជាប់កិច្ចសន្យាជានាយតំណាងគ្រប់សមាស ភាពជាមន្ត្រីនគរបាលខេត្តថ្មីជាបន្តបន្ទាប់ ដែលនៅ សល់ចំនួន ៦ ខេត្តទៀត រួមមាន ខេត្តព្រះសីហនុ កោះកុង កែប ប៉ៃលិន កំពង់ឆ្នាំង និង ខេត្តកំពង់ចាម។ឯកឧត្តមបន្តថា លទ្ធផលសម្រេចបានផ្នែកការងារអប់រំផ្សព្វផ្សាយមីនគិតចាប់ពីឆ្នាំ១៩៩៤ -២០២៤ (រយៈពេល៣០ឆ្នាំ) យើងអប់រំបាន២៨៨,៧៧៣ លើក គិតជាមនុស្សសរុបចំនួន ១៤,៧០៤,៥៨០នាក់ ស្មើ នឹង ៤៩០,១៥៣នាក់ ក្នុង១ឆ្នាំ ។ដោយឡែកក្នុងឆ្នាំ ២០២៥ (រយៈពេល៦ខែ)ពីខែមករា-មិថុនា ឆ្នាំ២០២៥ បន្ទាប់ពីយើងពង្រីកបណ្តាញស្ម័គ្រ ចិត្តបានចំនួន១៨ ខេត្តខាងលើការងារអប់រំផ្សព្វផ្សាយមានការកើនឡើង ដែលលទ្ធផលរយៈពេល៦ខែលទ្ធផលធ្វើការអប់រំបានចំនួន១៣,០៨៦លើក គិតជាមនុស្សសរុប១,២១៨, ២៥៩នាក់ស្មើនឹង២០៣,០៤៣នាក់ក្នុង១ខែ។រីឯផ្នែកប្រមូលព័ត៌មាន និងកម្ទេចសំណល់គ្រាប់យុទ្ធភណ្ឌសង្គ្រាមចាប់ពីឆ្នាំ១៩៩៤-២០២៤ (រយៈ ពេល ៣០ ឆ្នាំ) យើងទទួលសំណើបានចំនួន ១១០,៧៤៩ សំណើ ក្នុងនោះឆ្លើយតបបាន១០៧,០៥៦សំណើ រួមមាន(AP=៥៧,២០៩គ្រាប់ AT=១,៣៨៩គ្រាប់ UXO=៦១២,៨៦០គ្រាប់ និងគ្រាប់កាំភ្លើងតូចៗចំនួន ៣៤,៨២៣ គ.ក្រ។ដោយឡែកក្នុងរយៈពេល៦ខែពីខែមករាដល់ខែមិថុនា ឆ្នាំ២០២៥ ក្រោយពេលស៊ីម៉ាក់ទទួលសំណើរបានចំនួន២,៣៣៦ សំណើ ក្នុងនោះឆ្លើយតបបាន ២,២៩៩ សំណើរ រួមមាន(AP=១,៥៩៥គ្រាប់ AT= ១១៨គ្រាប់ UXO=៧,៩២៨គ្រាប់ និងគ្រាប់កាំភ្លើងតូចៗចំនួន២៤៦គ.ក្រ។ ចំណែក ផ្នែកកាត់បន្ថយអត្រាគ្រោះថ្នាក់ដោយសារមីន និងគ្រាប់យុទ្ធភណ្ឌសល់ពីសង្គ្រាមវិញចាប់ពីឆ្នាំ១៩៧៩-២០២៤ (រយៈពេល ៤៥ឆ្នាំ) មានអត្រាគ្រោះថ្នាក់កើនឡើងខ្ពស់សរុប ៦៥, ០៨៦ នាក់ (គ្រោះថ្នាក់ដោយសារមីនចំនួន ៥១,២០៦ នាក់ និងដោយសារគ្រាប់ចំនួន ១៣,៨៨០នាក់) អត្រាគ្រោះថ្នាក់នេះថយចុះជាលំដាប់។ ដោយឡែកក្នុងឆ្នាំ ២០២៥នេះ (រយៈពេល៦ខែ) ពីខែមករា-មិថុនា ឆ្នាំ ២០២៥ អត្រាគ្រោះថ្នាក់បានថយចុះមកនៅត្រឹមតែ ២៤នាក់(គ្រោះថ្នាក់ដោយសារមីនចំនួន ១២នាក់ និងដោយសារគ្រាប់ចំនួន១២នាក់) ៕ អត្ថបទ,ភារម្យ

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា រហូតមកដល់ពេលនេះ ប្រជាកសិករចំនួនប្រហែលជាង ១ ៤០០គ្រួសារហើយ ដែលបានចងក្រងគ្នាជាសហគមន៍កសិកម្មទំនើប នៅលើផ្ទៃដីជាង ១ម៉ឺនហិចតា។ ខណៈ បច្ចុប្បន្ន សហគមន៍កសិកម្មទំនើបមានចំនួន១៣ នៅលើមុខដំណាំចំនួន៤ប្រភេទធំៗ គឺបន្លែ ស្រូវ ម្រេច និងស្វាយចន្ទីរ។មានប្រសាសន៍ប្រាប់ព័ត៌មានប៊ីធីវី កាលពីរាត្រីថ្ងៃទី១៦ ខែកក្កដា ឆ្នាំ២០២៥នេះ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ជាគោលការណ៍ ក្រសួងកំពុងជំរុញលើកទឹកចិត្តឱ្យបងប្អូនកសិករអ្នកដាំដំឡូងមី អ្នកដាំពោត ជាពិសេសអ្នកជាប់ព្រំដែនកម្ពុជា និងថៃ គួរពិចារណារយៈពេលមធ្យម និងរយៈពេលវែង ធ្វើពិពិធកម្មចេញពីដំណាំប្រភេទនេះ ហើយងាកទៅដាំដំណាំប្រភេទផ្សេងដែលអាចមានទីផ្សារច្បាស់លាស់ជាងនេះ និងមានតម្រូវការទីផ្សារ។ ឯកឧត្តម បានបន្តថា ហើយជាគម្រោងរបស់ក្រសួងកសិកម្ម គឺជួយបងប្អូននៅក្នុងដំណាក់កាលនេះ ដើម្បីធ្វើពិពិធកម្មបានដោយជោគជ័យ ក្នុងនោះមានការជួយគាំទ្រជាដើមទុនជាបច្ចេកទេស និងទីផ្សារ ហើយជាការលើកទឹកចិត្តរបស់ក្រសួង គឺជាការចងក្រងទៅជាសហគមន៍កសិកម្មទំនើប ហើយធ្វើពិពិធកម្មតែម្តង។ ជាក់ស្តែង ប្រជាកសិករអ្នកដាំដំឡូងមីជាង ៥០គ្រួសារ នៅឃុំអន្លង់រាប ស្រុកវាលវែង ខេត្តពោធិ៍សាត់ បានស្ម័គ្រចិត្តចងក្រងជាសហគមន៍ទំនើប និងរួមគ្នាធ្វើពិពិធកម្មចេញពីដំណាំដំឡូងមី ដែលជាប្រភេទដំណាំតែងជួបបញ្ហាប្រឈមខាងផ្នែកទីផ្សារច្រើន និងងាកទៅដាំឈើហូបផ្លែជំនួសវិញ ដូចជា ដូចជា សាវម៉ាវ មង្ឃុត ប័រ និងផាស្យុងជាដើម។ ដូច្នេះនៅរដូវកាលបន្ទាប់ ក្រសួងគ្រោងជួយពួកគាត់កាត់បន្ថយ ៥០%សិន ហើយរដូវកាលបន្ទាប់មកទៀត នឹងកាត់បន្ថយ ១០០%តែម្តង ដោយក្នុងនោះក្រសួងកសិកម្មនឹងជួយពួកគាត់ ដើម្បីឱ្យគាត់មានប្រាក់ចំណូលជាជន្ទល់ក្នុងដំណាក់កាលដែលគាត់ធ្វើការកែប្រែពីមុខដំណាំមួយ ហើយចាប់យកមុខដំណាំមួយទៀត។ឯកឧត្តម ឃឹម ហ្វីណង់ បានបញ្ជាក់ថា ដើម្បីធានាឱ្យបានថា ប្រជាកសិករជាសមាជិកមានប្រាក់ចំណូលគ្រប់គ្រាន់ និងអាចទ្រង់ទ្រង់ជីវភាពប្រចាំថ្ងៃ ក្នុងអំឡុងពេលផ្លាស់ប្តូរពីដំណាំរដូវកាលទៅដំណាំរយៈពេលវែង ក្រសួងកសិកម្ម នឹងជួយបង្កើតមុខរបរថ្មី ២ទៀត សម្រាប់សហគមន៍ ដោយរៀបចំផលិតកម្មបន្លែនិងមាន់ស្រែរួមគ្នានៅលើទីតាំងរួម ដែលមានប្រព័ន្ធស្រោចស្រពពេញលេញ ហើយយ៉ាងហោចណាស់មួយគ្រួសារ នឹងមានផ្ទះសំណាញ់មួយខ្នង និងទ្រង់មាន់មួយទៅតាមលទ្ធភាព។ ដោយឡែក ដើម្បីទទួលបានចំណូលបន្ថែមដែរ សហគមន៍ក៏នឹងដាំដំណាំរយៈពេលខ្លីមួយចំនួននៅចន្លោះឈើហូបផ្លែទាំងនោះ ដូចជាល្មៀត ស្លឹកគ្រៃ សណ្តែកសៀង និងចេកជាដើម។ ក្រសួងកសិកម្ម នឹងផ្តល់ការគាំទ្រទាំងស្រុងទាំងលើដើមទុន បច្ចេកទេស និងទីផ្សារ ជូនដល់សហគមន៍ ដើម្បីអនុវត្តផែនការពិពិធកម្មនេះប្រកបដោយជោគជ័យ៕ អត្ថបទ៖ ឈិត បូរ៉ាវី

រដ្ឋមន្ត្រីក្រសួងធនធានទឹក អញ្ជើញជាអធិបតីក្នុងសិក្ខាសាលាពិគ្រោះយោបល់ថ្នាក់ជាតិស្តីពីកម្មវិធីអភិបាលកិច្ចធនធានទឹកដែលធន់នឹងការប្រែប្រួលអាកាសធាតុនៅកម្ពុជា

ភ្នំពេញ៖ នៅព្រឹកថ្ងៃទី១៧ ខែកក្កដា ឆ្នាំ២០២៥នេះ នៅសណ្ឋាគារសាន់&មូន ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា បានអញ្ជើញជាសហអធិបតីក្នុងសិក្ខាសាលាពិគ្រោះយោបល់ថ្នាក់ជាតិស្តីពីកម្មវិធីអភិបាលកិច្ចធនធានទឹកដែលធន់នឹងការប្រែប្រួលអាកាសធាតុនៅព្រះរាជាណាចក្រកម្ពុជា ដោយមានវត្តមានអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី តំណាងក្រសួងស្ថាប័នពាក់ព័ន្ធ ដៃគូអភិវឌ្ឍន៍ សង្គមស៊ីវិល ស្ថាប័នសិក្សាស្រាវជ្រាវ និងភាគីពាក់ព័ន្ធនានាសរុបប្រមាណ ១៧០រូប។សូមជម្រាបថា កម្មវិធីអភិបាលកិច្ចធនធានទឹកដែលធន់នឹងការប្រែប្រួលអាកាសធាតុ ហៅកាត់ថា CCRWGP ត្រូវបានក្រសួងធនធានទឹក និងឧតុនិយមដឹកនាំផ្តួចផ្តើមជាគំនិត និងដំណើរការអនុវត្តរយៈពេល៥ឆ្នាំ ក្រោមការគាំទ្រពីរដ្ឋាភិបាលនៃប្រទេសអូស្ត្រាលី។ កម្មវិធីនេះមានគោលបំណងបង្កើតឡើងនូវយុទ្ធសាស្ត្រទឹក ការកសាងផែនការមេ និងការគ្រប់គ្រងធនធានទឹកគ្រប់ជ្រុងជ្រោយ ក្នុងលក្ខណៈនៃការសម្របសម្រួល បរិយាបន្ន និងឆ្លើយតបទៅនឹងហានិភ័យអាកាសធាតុ។ថ្លែងក្នុងឱកាសអញ្ជើញបើកសិក្ខាសាលា ឯកឧត្តមរដ្ឋមន្ត្រី បានមានប្រសាសន៍លើកឡើងពីសារសំខាន់នៃធនធានទឹក ដែលជាដង្ហើមជីវិតនៃប្រព័ន្ធអេកូឡូស៊ី សេដ្ឋកិច្ច និងជីវិតរស់នៅប្រចាំថ្ងៃ ព្រមទាំងបញ្ហាប្រឈមនានាដូចជា ការកើនឡើងនៃតម្រូវការទឹក ការប្រែប្រួលអាកាសធាតុ ការកើនឡើងនៃទឹកជំនន់ និងគ្រោះរាំងស្ងួត ដែលមិនត្រឹមតែជាកង្វល់ផ្នែកបរិស្ថានប៉ុណ្ណោះទេ ប៉ុន្តែជាបញ្ហាប្រឈមចំពោះការអភិវឌ្ឍសេដ្ឋកិច្ច-សង្គម សន្តិសុខស្បៀង និងសុខុមាលភាពរបស់ប្រជាពលរដ្ឋផងដែរ ហើយដែលទាមទារឱ្យមានការរៀបចំយុទ្ធសាស្ត្រ ផែនការមេ និងការគ្រប់គ្រងធនធានទឹកដែលមានលក្ខណៈគ្រប់ជ្រុងជ្រោយ ដើម្បីធានានូវសន្តិសុខទឹក ប្រកបដោយនិរន្តរភាព។ជាមួយគ្នានេះដែរ ឯកឧត្តមរដ្ឋមន្ត្រី បានផ្តល់អនុសាសន៍ជាគោលការណ៍ ៦ចំណុច ដល់ក្រុមការងារដើម្បីរៀបចំកម្មវិធី CCRWGP ឱ្យមានមានលក្ខណៈគ្រប់ជ្រុងជ្រោយ និងឆ្លើយតបបានទៅនឹងភាពចាំបាច់នៃអភិបាលកិច្ចទឹកសម្រាប់ប្រទេសកម្ពុជា គឺ៖ ទី១)ផ្តើមដឹកនាំដោយរដ្ឋាភិបាលក្នុងភាពជាម្ចាស់ ទី២)ផ្តោតលើអភិបាលកិច្ចជាចម្បង ទី៣)មានបរិយាបន្ន និងពិគ្រោះយោបល់ ទី៤)បន្តកសាងលើអ្វីដែលបានបង្កើតឡើង ទី៥)ដើរតួជាដំបូលឆ័ត្ររួមសម្រាប់ការសម្របសម្រួល និងទី៦)មានភាពជាម្ចាស់រួមគ្នា៕

ឯកឧត្តម ហ៊ុន ម៉ានី ជួបសំណេះសំណាលជាមួយសមាជិកថ្មី គ្រូពេទ្យស្ម័គ្រចិត្ត ប្រចាំសាកលវិទ្យាល័យវិទ្យាសាស្ត្រសុខាភិបាល

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានអញ្ជើញជួបសំណេះសំណាលជាមួយសមាជិកថ្មី របស់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល សរុបជាង៥០០នាក់, នាព្រឹកថ្ងៃទី១៧ ខែកក្កដា ឆ្នាំ២០២៥នេះ។ឯកឧត្តមសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការ នៃសាកលវិទ្យាល័យវិទ្យាសាស្រ្តសុខាភិបាល និងជាអនុប្រធានប្រតិបត្តិទទួលបន្ទុកជាប្រធានប្រតិបត្តិក្រុមការងារគ្រូពេទ្យស័្មគ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្រ្តសុខាភិបាល បានសម្តែងនូវគារវៈកិច្ចគោរពដ៏ខ្ពង់ខ្ពស់ចំពោះវត្តមានដ៏ខ្ពង់ខ្ពស់របស់ឯកឧត្តម ហ៊ុន ម៉ានី។ ឯកឧត្តមសាស្រ្តាចារ្យ បានគោរពរាយការណ៍ជាសង្ខេបជូនគណៈអធិបតី និងអង្គពិធីពីដំណើរ និងសកម្មភាពជាឧត្តមប្រយោជន៍របស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល ថា គិតចាប់តាំងពីឆ្នាំ២០២៣ មកដល់បច្ចុប្បន្ននេះ ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្រ្តសុខាភិបាល បានចូលរួមចំណែកផ្តល់សេវាអប់រំ ថែទាំ ព្យាបាលសុខភាពជូនប្រជាពលរដ្ឋ ដោយឥតគិតថ្លៃ បានចំនួន២០លើក សរុបប្រជាពលរដ្ឋមកទទួលសេវា ចំនួន១៥៦,៩១៥នាក់។ ក្រៅពីសកម្មភាពចុះអប់រំ ថែទាំ ព្យាបាលសុខភាពនេះ មន្រ្តី បុគ្គលិក និស្សិតសាកលវិទ្យាល័យវិទ្យាសាស្រ្តសុខាភិបាល បានចូលរួមយ៉ាងសកម្មជាមួយការងារសង្គមផ្សេងៗ ដែលរួមមានការចូលរួមសកម្មភាពក្នុងនាមជាសមាជិកសហភាពសហព័ន្ធយុវជនកម្ពុជា សកម្មភាពកាកបាទក្រហមកម្ពុជា សកម្មភាពសប្បុរសធម៌ជួយនិស្សិតដែលខ្វះខាតលទ្ធភាពបន្តការសិក្សា ការងារបរិច្ចាគឈាម ការងារបរិស្ថាន កីឡា និងសិល្បៈ និងជាពិសេសការចូលរួមជាមួយរាជរដ្ឋាភិបាល គាំទ្រលើកទឹកចិត្តកងទ័ពដែលកំពុងប្រចាំការ ការពារប្រទេស នៅសមរភូមិមុខ។ឯកឧត្តមឧបនាយករដ្ឋមន្រ្តី ហ៊ុន ម៉ានី បានថ្លែងអំណរគុណឯកឧត្តម លេង ផាលី សមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី និងអរគុណចំពោះក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល។ ឯកឧត្តមឧបនាយករដ្ឋមន្រ្តី លើកឡើងពីវឌ្ឍនភាពវិស័យសុខាភិបាលមានការបោះជំហានពីមួយដំណាក់កាលទៅមួយដំណាក់កាល។ ឯកឧត្តមឧបនាយករដ្ឋមន្រ្តីបានរំលេចពីសារៈសំខាន់នៃការងារស្ម័គ្រចិត្តដែលត្រូវការទឹកចិត្តចេញពីបេះដូង សរពីការវាស់វែងភាពអត់ធ្មត់ និងការជួបប្រទះនូវការប្រតិបត្តិដោយផ្ទាល់រវាងការរៀននៅក្នុងថ្នាក់ និងការអនុវត្តជាក់ស្តែង ដើម្បីទទួលនូវការហ្វឹកហាត់ជាក់ស្តែង និងទទួលនូវបទពិសោធន៍ នាំមកនូវអនុស្សាវរីយ៍យូរអង្វែង។ក្នុងឱកាសនោះ ឯកឧត្តមឧបនាយករដ្ឋមន្រ្តី ហ៊ុន ម៉ានី បានផ្តល់កិត្តិយសថតរូបអនុស្សាវរីយ៍ជាមួយនឹងសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាលទាំងអស់៕ អត្ថបទ រដ្ឋា

កសិករអ្នកដាំបន្លែ និងចិញ្ចឹមមាន់ស្រែ ៨១គ្រួសារមកពីសហគមន៍កសិកម្មមាន់ស្រែអូរផុត ស្រុកត្រាំកក់ ទទួលបានជំនួយឥតសំណងប្រមាណ ១,២ លានដុល្លារ ពីគម្រោង CASDP

ភ្នំពេញ៖ កសិករអ្នកដាំបន្លែនិងចិញ្ចឹមមាន់ស្រែចំនួន ៨១គ្រួសារ មកពីសហគមន៍កសិកម្មមាន់ស្រែអូរផុត នៅស្រុកត្រាំកក់ ខេត្តតាកែវ ទទួលបានជំនួយឥតសំណងក្នុងទំហំទឹកប្រាក់ប្រមាណ ១,២លានដុល្លារ ពីគម្រោងពិពិធកម្មកសិកម្មកម្ពុជា(CASDP)។ នេះបើតាម ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។ឯកឧត្តម ឃឹម ហ្វីណង់ នៅព្រឹកថ្ងៃទី១៧ ខែកក្កដានេះ បានសរសេរថា អបអរសាទរបងប្អូនកសិករអ្នកដាំបន្លែនិងចិញ្ចឹមមាន់ស្រែចំនួន ៨១គ្រួសារ មកពីសហគមន៍កសិកម្មមាន់ស្រែអូរផុត នៅស្រុកត្រាំកក់ ខេត្តតាកែវ ទទួលបានជំនួយឥតសំណងក្នុងទំហំទឹកប្រាក់ប្រមាណ ១,២លានដុល្លារ ពីគម្រោងពិពិធកម្មកសិកម្មកម្ពុជា(CASDP) ដែលជាកម្មវិធីគាំទ្រហិរញ្ញប្បទានដោយធនាគារពិភពលោក ក្នុងនោះ ១៤ម៉ឺនដុល្លារសម្រាប់គាំទ្រ៤០%ដល់ការវិនិយោគដាំបន្លែក្នុងផ្ទះសំណាញ់ និងការចិញ្ចឹមមាន់ស្រែយកស៊ុត និងប្រហែល១លានដុល្លារទៀតសម្រាប់សាងសង់ផ្លូវកៅស៊ូប្រវែង ៦,៤ គីឡូម៉ែត្រនៅក្នុងសហគមន៍។ ឯកឧត្តម ឃឹម ហ្វីណង់ ថ្លែងថា គិតជាមធ្យម ក្រុមកសិករអ្នកដាំបន្លែក្នុងមួយគ្រួសារទទួលបានជំនួយឧបត្ថម្ភចំនួន ២៣០០ដុល្លារ ចំណែកឯក្រុមអ្នកចិញ្ចឹមមាន់ស្រែទទួលបាន១២០០ ដុល្លារ/គ្រួសារ។ អ្វីដែលគួរឱ្យចាប់អារម្មណ៍នោះ គឺសហគមន៍គ្រោងនឹងសហការជាមួយក្រសួងកសិកម្មដើម្បីប្រែក្លាយខ្លួនទៅជាសហគមន៍កសិកម្មទំនើប ដែលនឹងអនុញ្ញាតឱ្យសហគមន៍អាចទទួលការគាំទ្របន្ថែមខាងផ្នែកដើមទុនការប្រាក់ទាប បច្ចេកទេសតាមស្តង់ដា និងការធានាពីទីផ្សារ៕

កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

មន្រ្តីជាន់ខ្ពស់រាជរដ្ឋាភិបាល និងក្រុមហ៊ុនអភិវឌ្ឍន៍បច្ចេកវិទ្យាមួយ ពិភាក្សាលើការចាប់យកឌីជីថលូបនីយកម្ម ក្នុងការធ្វើបរម- ភាវូបនីយកម្ម សម្រាប់ដំណើរប្រតិបត្តិការនៅក្នុងស្ថាប័នរដ្ឋ និងផ្នែកឯកជន សំដៅជំរុញនវានុវត្តន៍ឌីជីថលនៅកម្ពុជាឱ្យកាន់តែមានភាព រីកចម្រើន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៧ ខែកក្កដា ឆ្នាំ២០២៥ នេះ បានអនុញ្ញាតឱ្យប្រតិភូក្រុមហ៊ុន HUAWEI Cambodia Co., LTD. ដឹកនាំដោយ លោក TAO Guangyao ប្រធានក្រុមហ៊ុន HUAWEI ប្រចាំពហុប្រទេសនៅក្នុងតំបន់អាស៊ីអាគ្នេយ៍ និងជានាយកប្រតិបត្តិក្រុមហ៊ុន HUAWEI Cambodia Co., LTD. ចូលជួបសម្តែងការគួរសម និងពិភាក្សាការងារ។លោក TAO Guangyao បានសម្តែងនូវអំណរគុណយ៉ាងជ្រាលជ្រៅ ដល់ក្រុមប្រឹក្សាអភិវឌ្ឍន៍កម្ពុជា ក.អ.ក. ចំពោះការគាំទ្រ កន្លងមក ដែលបានដើរតួនាទីយ៉ាងសំខាន់ ក្នុងការជំរុញបរិយាកាសអំណោយផល សម្រាប់ការរីកលូតលាស់របស់ក្រុមហ៊ុន Huawei នៅក្នុងព្រះរាជាណាចក្រកម្ពុជាផ្ទាល់។ បន្ថែមពីនេះ លោកក៏បានជម្រាបជូនអំពីរបាយការណ៍សង្ខេប ជុំវិញវឌ្ឍនភាពរបស់ Huawei Group និង Huawei Cambodia ដោយផ្តោតលើលទ្ធផលការងារឆ្នាំ២០២៤ និងបច្ចុប្បន្នភាព នៃស្ថានភាពអាជីវកម្មរបស់ក្រុមហ៊ុន ផងដែរ។នៅក្នុងជំនួបនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានរំលេចអំពីគំនិតផ្តួចផ្តើមដ៏ខ្ពង់ខ្ពស់របស់សម្តេចធិបតី នាយករដ្ឋមន្ត្រី ក្នុងការបង្កើតឱ្យមាននូវសួនឧស្សាហម្មបច្ចេកវិទ្យាឌីជីថលនៅកម្ពុជា ដែលជាគំនិតផ្តួចផ្តើម ក្នុងការជំរុញបរិយាកាស វិនិយោគនៅកម្ពុជា ពាក់ព័ន្ធនឹងឧស្សាហកម្មឌីជីថល និងបច្ចេកវិទ្យាទំនើបជាន់ខ្ពស់ឱ្យកាន់តែមានភាពរស់រវើក។ ក្នុងជំនួបនេះ ឯកឧត្តមឧបនាយករដ្ឋមន្ត្រី និងលោក TAO Guangyao បានធ្វើការពិភាក្សា ជុំវិញការចាប់យកឌីជីថលូបនីយ- កម្ម ក្នុងការធ្វើបរមភាវូបនីយកម្ម ដំណើរប្រតិបត្តិការនៅក្នុងស្ថាប័នរដ្ឋ និងផ្នែកឯកជន សំដៅជំរុញនវានុវត្តន៍ឌីជីថលនៅកម្ពុជា ឱ្យកាន់តែមានភាពរីកចម្រើន ប្រកបប្រសិទ្ធភាព និងស័ក្តិសិទ្ធភាពខ្ពស់ ដើម្បីជាការចូលរួមបង្កើនល្បឿនការអភិវឌ្ឍសង្គម និងសេដ្ឋ កិច្ចឌីជីថលនៅកម្ពុជា ឱ្យស្របទៅតាមយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ ដោយផ្ដោតលើ អាទិភាពគន្លឹះចំណុចទី១ និងទី៥ គឺមនុស្ស និងបច្ចេកវិទ្យា ក៏ដូចជា ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ផងដែរ៕ អត្ថបទ៖ សុន រ៉ាឌី

ប្រតិភូក្រសួងទេសចរណ៍ទស្សនកិច្ចសារមន្ទីរ ព្រះស្រីឦសានវរ្ម័ន ស្វែងយល់ពីប្រវត្តិសេដ្ឋកិច្ច និងរូបិយវត្ថុកម្ពុជា

ឯកឧត្តម ហួត ហាក់ ដឹកនាំប្រតិភូក្រសួងទេសចរណ៍ ទស្សនកិច្ចនៅសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) ដើម្បីស្វែងយល់ទាក់ទងទៅនឹងប្រវត្តិសាស្ត្ររបស់កម្ពុជា និងបច្ចុប្បន្នភាពនៃនវានុវត្តន៍ហិរញ្ញវត្ថុ និងគំនិតផ្តួចផ្តើមថ្មីៗ។លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ក្នុងជំនួបពិភាក្សាការងារ និងទស្សនកិច្ចនៅសារមន្ទីរ សេដ្ឋកិច្ចនិងរូបិយវត្ថុ ព្រះស្រីឦសានវរ្ម័ន (ស.ស.រ) ប្រតិភូក្រសួងទេសចរណ៍ នៅរសៀលថ្ងៃទី១៦ ខែកក្កដា ឆ្នាំ២០២៥ នេះ, លោកជំទាវ បានលើកឡើងពីការចូលរួមគាំទ្រដល់ការអភិវឌ្ឍវិស័យទេសចរណ៍កម្ពុជា របស់ធនាគារជាតិ នៃកម្ពុជានាពេលកន្លងមក តាមរយៈនវានុវត្តន៍ហិរញ្ញវត្ថុ និងគំនិតផ្តួចផ្តើមថ្មីៗដូចជា ការសម្រេចបានការតភ្ជាប់ប្រព័ន្ធទូទាត់ឆ្លងដែន ជាមួយបណ្តាប្រទេស ជាច្រើន ការដាក់ឱ្យដំណើរការកម្មវិធីបាគងទេសចរ និងការដំណើរការសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) នៅរាជធានីភ្នំពេញ ព្រមទាំងគម្រោងដំណើរការសារមន្ទីរ ស.ស.រ ខេត្តបាត់ដំបង និងខេត្តកំពត នាពេលខាងមុខជាដើម។ លោកជំទាវបណ្ឌិត ក៏បានលើកឡើងពីសារៈសំខាន់ នៃការប្រមូល និងចងក្រងស្ថិតិទេសចរ ព្រមទាំងបញ្ជាក់ពីឆន្ទៈចូលរួម សហការ និងគាំទ្រក្នុងការធ្វើឱ្យប្រសើរឡើង នូវគុណភាពទិន្នន័យទេសចរប្រកបដោយប្រសិទ្ធភាព។ជាការឆ្លើយតប ឯកឧត្តមរដ្ឋមន្រ្តី ហួត ហាក់ រដ្ឋមន្រ្តីក្រសួងទេសចរណ៍ បានលើកឡើងនូវវឌ្ឍនភាពគួរឱ្យកត់សម្គាល់ នៃ វិស័យទេសចរណ៍នាពេលកន្លងមក ក្រោមដំបូលសុខសន្តិភាព និងស្ថិរភាពនយោបាយ ដែលឆ្លុះបញ្ចាំងតាមរយៈការកើនឡើង នៃភ្ញៀវ អន្តរជាតិ និងទេសចរក្នុងស្រុក។ ឯកឧត្តមរដ្ឋមន្ត្រី ក៏បានលើកសរសើរ ពីការរួមចំណែករបស់ធនាគារជាតិនៃកម្ពុជា ក្នុងការជំរុញ វិស័យទេសចរណ៍នាពេលកន្លងមក តាមរយៈការដាក់ឱ្យដំណើរការផលិតផលហិរញ្ញវត្ថុថ្មីៗ ដែលទាំងនេះបានជួយសម្រួលយ៉ាងច្រើន ដល់ការទូទាត់ របស់ទេសចរ និងចូលរួមផ្សព្វផ្សាយពីសក្តានុពលទេសចរកម្ពុជាផងដែរ៕ អត្ថបទ៖ សុន រ៉ាឌី

សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក

ភ្នំពេញ៖ នៅព្រឹកថ្ងៃព្រហស្បតិ៍ ទី១៧ កក្កដា ២០២៥ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអញ្ជើញ ដឹកនាំគណ:ប្រតិភូរាជរដ្ឋាភិបាលកម្ពុជា ចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុត នៅព្រះបរមរាជវាំង ដើម្បីគោរពទូលថ្វាយអំពីលទ្ធផលរាជរដ្ឋាភិបាលទើបសម្រេចបានការចុះបញ្ជីបូជនីយដ្ឋានចងចាំនៃកម្ពុជាពីទីតាំងឧក្រិដ្ឋកម្មមកជាមណ្ឌលផ្សះផ្សា និងសន្តិភាព ទៅក្នុងបញ្ជីបេតិកភណ្ឌពិភពលោកកាលពីថ្ងៃ១១ ខែកក្កដាកន្លងទៅ ក្នុងនោះរួមមានទីតាំង៖ ១/ អតីតមន្ទីរឃុំឃាំង ម-១៣, ២/ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ស-២១ និង៣/ មជ្ឈមណ្ឌលឧក្រិដ្ឋកម្មប្រល័យពូជសាសន៍ជើងឯក។

ឯកឧត្តមបណ្ឌិត ប៉ាន់ខែម ប៊ុនថន នាំយកអំណោយគ្រឿងឧបភោគបរិភោគជាច្រើនមុខ ប្រគល់ជូនបញ្ជាការដ្ឋានទិសទី១ បន្ទាយមានជ័យ សម្រាប់ចែកជូនកម្លាំងជួរមុខ

បន្ទាយមានជ័យ៖ ឯកឧត្តមបណ្ឌិត ប៉ាន់ខែម ប៊ុនថន បាននាំយកគ្រឿងឧបភោគបរិភោគជាច្រើនមុខ ប្រគល់ជូនបញ្ជាការដ្ឋានទិសទី១បន្ទាយមានជ័យ សម្រាប់ចែកជូនកម្លាំងជួរមុខ នៅថ្ងៃទី១៧ ខែកក្កដា ឆ្នាំ២០២៥ ។ជាមួយគ្នានោះដែរលោកឧត្តមសេនីយ៍ទោ សេង ធារិន មេបញ្ជាការរង និងជានាយសេនាធិការយោធភូមិភាគទី៥ បានលើកឡើងថា ក្រោយស្ថានភាពតាមបន្ទាត់ព្រំដែនកម្ពុជា-ថៃ ដែលបង្កឡើងដោយភាគីថៃ មានការបិទបើកច្រកដោយ ឯកតោភាគី កម្ពុជាបានពង្រឹងស្ថានការការពារតាមបន្ទាត់ព្រំដែន ដើម្បីការពារបូរណភាពទឹកដីនិងមាតុភូមិកម្ពុជា មិនអោយប្រទេសជិតខាងឈ្លានពានបានឡើយ ហើយកងកម្លាំងកម្ពុជា មានភាពទន់ភ្លន់តែរឹងមាំង និងក្លាហាន។លោកឧត្តមសេនីយ៍ទោ បានថ្លែងអំណរគុណចំពោះឯកឧត្តមបណ្ឌិត ប៉ាន់ខែម ប៊ុនថន នាយរងខុទ្ទកាល័យសម្តេច នាយករដ្ឋមន្ត្រី និងជារដ្ឋលេខា ទីស្តីការគណៈរដ្ឋមន្ត្រី ជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត ដែលបានដឹកនាំក្រុមការងារ និងសប្បុរសជនក្រុងប៉ោយប៉ែត នាំយកគ្រឿងឧបភោគបរិភោគមកប្រគល់ជូនមេបញ្ជាការទិសទី១ បន្ទាយមានជ័យ នៅពេលនេះ ដើម្បីទទួលយកទៅបែងចែកបន្តជូនកម្លាំងជួរមុខដែលកំពុងឈជើងការពារបូរណភាពទឹកដីតាមបន្ទាត់ព្រំដែន។ អំណោយរួមមាន៖ អង្ករ១៥០ការ៉ុង ទឹកត្រី៣០០យួរ ទឹកស៊ីអ៊ីវ៣០០យួរ មីជាតិ៣០០កេស ទឹកបរិសុទ្ធ១១២កេស បាយក្តាំង៩០០ថង់ សូឡា២០គ្រឿង។ឯកឧត្តមបណ្ឌិត ប៉ាន់ខែម ប៊ុនថន មានប្រសាសន៍បញ្ជាក់ថា កម្លាំងជួរក្រោយនៅតែបន្តជួយកម្លាំងជួរមុខជានិច្ចដើម្បីរកជំនួយពីសប្បុរសជនបានជួយជាកម្លាំងចិត្តដល់កងកម្លាំងកំពុងបំពេញភារកិច្ចការពារមាតុភូមិ និងបូរណភាពទឹកដីនេះ ជាយន្តការរបស់រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕ដោយឃិនសារិទ្ធ

បណ្ដាញសង្គម

ព័ត៌មានថ្មីៗ

មនុស្សរាប់លាននាក់វិលទៅផ្ទះសម្បែងវិញ ខណៈការព្រមានរលកយក្សស៊ូណាមិ នៅប៉ាស៊ីហ្វិក ត្រូវបានដក

លោក Trump៖ កិច្ចព្រមព្រៀងពាណិជ្ជកម្មជាមួយកាណាដា អាចនឹងពិបាក ក្រោយទទួលស្គាល់រដ្ឋប៉ាឡេស្ទីន

អន្តោប្រវេសន៍ ជំរុញឱ្យមានការកើនឡើងចំនួនប្រជាជននៅអង់គ្លេសនិងដែនដីវេលស៍

UN៖ កុមារប្រហែល៨០.០០០នាក់ប្រឈមជំងឺអាសន្នរោគនៅទូទាំងអាហ្វ្រិកកណ្តាលនិងខាងលិច

ការតវ៉ារបស់អ្នកចូលនិវត្តន៍អាហ្សង់ទីន បញ្ចប់ទៅដោយការប៉ះទង្គិចគ្នា និងមានអ្នកត្រូវឃុំខ្លួន

លោក Trump ថាសហរដ្ឋអាមេរិក នឹងមាន "កិច្ចព្រមព្រៀងដ៏យុត្តិធម៌" លើពាណិជ្ជកម្មជាមួយចិន

ក្រសួងការពារជាតិចិន អំពាវនាវឱ្យប្រទេសពាក់ព័ន្ធដោះស្រាយបញ្ហាកោះតៃវ៉ាន់ ដោយប្រយ័ត្នប្រយែង

ធនាគារកណ្តាលអាមេរិក រក្សាអត្រាការប្រាក់មិនផ្លាស់ប្តូរជាលើកទី៥ ទោះមានសម្ពាធខ្លាំងក៏ដោយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

អគ្គនាយកដ្ឋានពន្ធនាគារចាក់វ៉ាក់សាំងកូវីដ-១៩ ដុសជំរុញ ដល់មន្ត្រី និងជនជាប់ឃុំ ជាង៥ម៉ឺននាក់

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

អគ្គនាយកដ្ឋានពន្ធនាគារចាក់វ៉ាក់សាំងកូវីដ-១៩ ដុសជំរុញ ដល់មន្ត្រី និងជនជាប់ឃុំ ជាង៥ម៉ឺននាក់

មកដល់ពេលនេះ កសិករចំនួនជាង ១៤០០គ្រួសារ ងាកមកចង​ក្រងគ្នា ដើម្បី​ក្លាយ​ជា​សហគមន៍​កសិកម្ម​ទំនើប

កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប