BTV NEWS

កម្ពុជាប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ”

មន្ត្រីជាន់ខ្ពស់ក្រសួងអភិវឌ្ឍន៍ ចាត់ទុកការថែទាំផ្លូវជារឿងចាំបាច់ សម្រួលការធ្វើដំណើរ និងការប្រកបមុខរបរផ្សេងៗ

សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា

យុវជន០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបុកពីមុខយ៉ាងពេញទំហឹង

ព័ត៌មានជាតិ

ក្រសួងបរិស្ថាន ប្រារព្ធទិវាជីវៈចម្រុះអន្តរជាតិ ២២ ឧសភា ក្រោមប្រធានបទ «អនុវត្តសកម្មភាពជាតិ ដើម្បីសម្រេចលទ្ធផលសកល» នៅខេត្តកែប

ខេត្តកែប នាព្រឹកថ្ងៃទី២២ ខែឧសភា ឆ្នាំ២០២៦ ឯកឧត្តម ជួប ប៉ារីស៍ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអញ្ជើញជាអធិបតីប្រារព្ធទិវាជីវៈចម្រុះអន្តរជាតិ ២២ ឧសភា ក្រោមប្រធានបទ «អនុវត្តសកម្មភាពជាតិ ដើម្បីសម្រេចលទ្ធផលសកល»។ ទិវានេះ ក៏មានការអញ្ជើញចូលរួមពីលោកស្រី អ៊ុល ភីរុណ អភិបាលរងនៃគណៈអភិបាលខេត្តកែប ឯកឧត្តម លោកជំទាវ លោក លោកស្រីតំណាងក្រសួងស្ថាប័ន មន្ទីរ អង្គភាពជុំវិញខេត្ត កងកម្លាំងទាំងបីប្រភេទ អង្គការដៃគូ លោកគ្រូ អ្នកគ្រូ និងសិស្សានុសិស្ស ជាង៤០០នាក់។ថ្លែងទៅកាន់អង្គពិធី ឯកឧត្តម ជួប ប៉ារីស៍ បានឱ្យដឹងថា ជីវៈចម្រុះជាប្រភពជីវិត និងជាមូលដ្ឋានគ្រឹះដ៏សំខាន់សម្រាប់ការអភិវឌ្ឍសេដ្ឋកិច្ច-សង្គមប្រកបដោយចីរភាព។ ជាមួយគ្នានេះ ឯកឧត្តមបានគូសបញ្ជាក់ពីការខិតខំប្រឹងប្រែងរបស់កម្ពុជាក្នុងការអភិរក្សជីវៈចម្រុះ ដូចជា ការពង្រីកតំបន់ការពារធម្មជាតិ ការដាំដើមឈើ ការស្តារប្រព័ន្ធអេកូឡូស៊ី និងការលើកកម្ពស់ការចូលរួមពីសហគមន៍ក្នុងការអភិរក្សធនធានធម្មជាតិ។ឯកឧត្តមក៏បានអំពាវនាវដល់សាធារណជនទាំងអស់ ត្រូវចូលរួមការពារព្រៃឈើ សត្វព្រៃ ប្រភពទឹក និងប្រព័ន្ធអេកូឡូស៊ីផ្សេងៗ ព្រមទាំងប្រើប្រាស់ធនធានធម្មជាតិប្រកបដោយការទទួលខុសត្រូវ។ ឯកឧត្តមបានសង្កត់ធ្ងន់ថា «ការអភិរក្សជីវៈចម្រុះ មិនមែនជាការទទួលខុសត្រូវរបស់រដ្ឋាភិបាលតែមួយទេ ប៉ុន្តែគឺជាភារកិច្ចរបស់ពលរដ្ឋគ្រប់រូប និងសង្គមទាំងមូល»។គួរបញ្ជាក់ឱ្យដឹងថា ទិវាអន្តរជាតិជីវៈចម្រុះ (International Day for Biological Diversity - IDB) ត្រូវបានប្រារព្ធជារៀងរាល់ឆ្នាំនាថ្ងៃទី២២ ខែឧសភា ដើម្បីលើកកម្ពស់ការយល់ដឹងអំពីសារៈសំខាន់នៃ ជីវៈចម្រុះសម្រាប់ជីវិតលើផែនដី។ នៅប្រទេសកម្ពុជា ជីវៈចម្រុះមានតួនាទីយ៉ាងសំខាន់ក្នុងការគាំទ្រ សេដ្ឋកិច្ច ជាតិ ជីវភាពប្រជាពលរដ្ឋ និងវប្បធម៌ជាតិ។ ទោះយ៉ាងណា ក៏មានបញ្ហាប្រឈមជាច្រើន ដូចជា ការបាត់បង់ព្រៃឈើ ការប្រែប្រួលអាកាសធាតុ និងបញ្ហាផ្សេងៗដែលបង្កឡើងដោយសកម្មភាពមនុស្ស។ ដូច្នេះ ការចូលរួមរបស់សហគមន៍ និងភាគីពាក់ព័ន្ធគឺជាចំណុចសំខាន់ក្នុងការអភិរក្សជីវៈចម្រុះ និងប្រើប្រាស់ធនធានធម្មជាតិ ដោយចីរភាព៕

រយៈពេល៤ខែអគ្គនាយកដ្ឋានពន្ធដារប្រមូលចំណូលពន្ធអាករគ្រប់ប្រភេទបានជាង ១ ៧៨១ លានដុល្លារ

អគ្គនាយកដ្ឋានពន្ធដារ នៅក្នុងរយៈពេល៤ខែ ឆ្នាំ២០២៦ ប្រមូលចំណូលពន្ធអាករគ្រប់ប្រភេទ បានចំនួនជាង ១ ៧៨១ លាន ដុល្លារអាមរិក ស្មើប្រមាណជាង ៤៦ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៦។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយក ដ្ឋានពន្ធដារ លើកឡើងក្នុងពិធីសម្ភោធដាក់ឱ្យប្រើប្រាស់ជាផ្លូវការអគារទីស្នាក់ការកណ្ដាលថ្មី អគ្គនាយកដ្ឋានពន្ធដារ នៃក្រសួងសេដ្ឋ កិច្ច និងហិរញ្ញវត្ថុ នៅថ្ងៃទី២១ ខែឧសភា ឆ្នាំ២០២៦ ម្សិលមិញថា ផ្អែកតាមលទ្ធផលនៃកំណែទម្រង់ជាច្រើនរបស់អគ្គនាយកដ្ឋាន ពន្ធដារ ជាលទ្ធផល គឺសម្រេចបានជោគជ័យក្នុងការប្រមូលចំណូលពន្ធផ្ទៃក្នុងជាបន្តបន្ទាប់ ដែលមានការកើនឡើងដល់កម្រិតខ្ពស់ និងបានក្លាយជាអង្គភាពប្រមូលចំណូលខ្ពស់ជាងគេ ក្នុងចំណោមអង្គភាពប្រមូលចំណូលនានា។ ការប្រមូលចំណូលដោយជោគ ជ័យនេះ គឺជាសមិទ្ធផលនៃការកែទម្រង់របស់រដ្ឋបាលសារពើពន្ធកម្ពុជា ដើម្បីប្រមូលពន្ធឱ្យអស់សក្តានុពល និងប្រកបដោយតម្លាភាព បើទោះបីជាស្ថិតក្នុង បរិការណ៍ដែលមិនមានការបង្កើតប្រភេទពន្ធថ្មី, មិនដំឡើងអត្រាពន្ធនិងអាករ និងមានការបន្តការផ្ដល់ការលើក ទឹកចិត្តពន្ធដារជាច្រើនជាបន្តបន្ទាប់ក៏ដោយ។ ស្របគ្នានេះ ការកែទម្រង់រដ្ឋបាលសារពើពន្ធដោយជោគជ័យ បានធ្វើឱ្យលទ្ធផលនៃការប្រមូលចំណូលពន្ធមានភាពល្អប្រសើរ អាចឆ្លើយតបបានគ្រប់គ្រាន់នឹងតម្រូវការហិរញ្ញវត្ថុសាធារណៈ ជាក់ស្តែងការប្រមូលចំណូលក្នុងរយៈពេល៤ខែឆ្នាំ២០២៦, អគ្គនាយក ដ្ឋានពន្ធដារប្រមូលចំណូលអាករគ្រប់ប្រភេទបានចំនួនជាង ៧ ១០០ ប៊ីលានរៀល ត្រូវនឹងប្រមាណជាង ១ ៧៨១ លានដុល្លារ អាមរិក ស្មើជាង ៤៦ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៦។ ឯកឧត្តម បន្តថា លើសពីនេះការប្រមូលចំណូលបានលើសផែនការនាពេលកន្លងមក ក៏ផ្តល់លទ្ធភាពដល់រាជរដ្ឋាភិបាល បំពេញបន្ថែមនូវកញ្ចប់ថវិកាសន្សំ ដើម្បីអភិវឌ្ឍនិងអនុវត្តគោលនយោបាយនានា ជាពិសេសការចាត់វិធានការដោះស្រាយ ដើម្បីឆ្លើយ តបយ៉ាងសមស្រប និងទាន់ពេលវេលា ជាមួយនឹងវិបត្តិនៃការរីករាលដាលនៃជំងឺកូវីដ-១៩ និងវិធានការអន្តរាគមន៍ចាំបាច់នានា កន្លងមក។ ទន្ទឹមនឹងការប្រមូលចំណូលដែលមានការកើនឡើងនេះ ទំហំការងាររបស់អគ្គនាយកដ្ឋានពន្ធដារ ក៏មានការកើនឡើង យ៉ាងឆាប់រហ័ស ធ្វើឱ្យតម្រូវការនៃចំនួនមន្ត្រី និងហេដ្ឋារចនាសម្ព័ន្ធសម្រាប់គាំទ្រដល់ប្រតិបត្តិការប្រមូលចំណូល មានការកើនឡើង ជាបន្តបន្ទាប់។ ស្ថានភាពនេះ ធ្វើឱ្យទីស្នាក់ការកណ្តាលចាស់ដែលមានភាពតូចចង្អៀតនិងបែកខ្ញែក ពុំអាចឆ្លើយតបនឹងតម្រូវការ នៃការវិវត្តរបស់ស្ថាប័នមួយនេះ ទោះបីជាមានការជួលអគារ ឬផ្ទះល្វែងដែលមានទីតាំងនៅក្បែរអគ្គនាយកដ្ឋានពន្ធដារ ជាការិយាល័យ បណ្តោះអាសន្នក៏ដោយ៕អត្ថបទ៖ សុន រ៉ាឌី

គណៈកម្មការទី១រដ្ឋសភា ចុះពិនិត្យយន្តការដោះស្រាយវិវាទដីធ្លីក្រៅប្រព័ន្ធតុលាការនៅខេត្តត្បូងឃ្មុំ ដើម្បីធានាការពារសិទ្ធិពលរដ្ឋ

ត្បូងឃ្មុំ៖ គណៈកម្មការសិទ្ធិមនុស្ស ទទួលពាក្យបណ្តឹង និងអង្កេត និងអធិការកិច្ច នៃរដ្ឋសភា (គណៈកម្មការទី១) បានចុះបំពេញបេសកកម្មនៅខេត្តត្បូងឃ្មុំ ដើម្បីតាមដានការអនុវត្តច្បាប់ និងជំរុញយន្តការដោះស្រាយទំនាស់ដីធ្លីក្រៅប្រព័ន្ធតុលាការ ឱ្យកាន់តែមានប្រសិទ្ធភាព តម្លាភាព និងយុត្តិធម៌ ក្នុងគោលបំណងធានាការពារសិទ្ធិ និងផលប្រយោជន៍ស្របច្បាប់របស់ប្រជាពលរដ្ឋ។នៅក្នុងកិច្ចប្រជុំពិភាក្សាការងារ កាលពីរសៀលថ្ងៃទី២១ ខែឧសភា ឆ្នាំ២០២៦ ដឹកនាំដោយ ឯកឧត្តម សរ ចំរុង ប្រធានគណៈប្រតិភូគណៈកម្មការទី១ នៃរដ្ឋសភា ជាមួយរដ្ឋបាលខេត្តត្បូងឃ្មុំ ដែលដឹកនាំដោយ ឯកឧត្តម ប៉ែន កុសល្យ អភិបាលខេត្ត ដោយមានការចូលរួមពីតំណាងរាស្ត្រមណ្ឌលខេត្តត្បូងឃ្មុំ និងមន្ទីរ-អង្គភាពជំនាញ ភាគីរដ្ឋសភាបានគូសបញ្ជាក់ពីគោលបំណងសំខាន់នៃការចុះមកនេះ គឺដើម្បីសិក្សាស្វែងយល់ឱ្យកាន់តែច្បាស់អំពីយន្តការ លទ្ធផល និងបញ្ហាប្រឈមនានា ក្នុងការដោះស្រាយទំនាស់ដីធ្លីរបស់អាជ្ញាធរខេត្តនាពេលកន្លងមក។ឯកឧត្តម សរ ចំរុង បានមានប្រសាសន៍ថា បេសកកម្មនេះធ្វើឡើងដើម្បីតាមដានការអនុវត្តច្បាប់ និងស្វែងយល់អំពីវឌ្ឍនភាពការងារនៅថ្នាក់ក្រោមជាតិ ឱ្យស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។ ជាមួយគ្នានេះ ឯកឧត្តមប្រធានគណៈប្រតិភូ ក៏បានកោតសរសើរនិងវាយតម្លៃខ្ពស់ចំពោះរដ្ឋបាលខេត្តត្បូងឃ្មុំ ដែលបានយកចិត្តទុកដាក់លើការផ្តល់សេវាសាធារណៈ និងខិតខំដោះស្រាយទុក្ខកង្វល់នានារបស់ប្រជាពលរដ្ឋនៅមូលដ្ឋាន សំដៅលើកកម្ពស់ភាពសុខដុមរមនាក្នុងសង្គម។ទាក់ទិននឹងបញ្ហាអធិបតេយ្យ និងការងារព្រំដែន ឯកឧត្តម សរ ចំរុង បានបញ្ជាក់បន្ថែមថា កន្លងមកគណៈកម្មការទី១ តែងតែតាមដានយ៉ាងយកចិត្តទុកដាក់ និងបានចេញញត្តិថ្កោលទោសចំពោះរាល់ការរំលោភបំពាននានា។ ឯកឧត្តមបានសង្កត់ធ្ងន់ថា រាជរដ្ឋាភិបាលកម្ពុជានៅតែបន្តប្រកាន់ខ្ជាប់នូវជំហរអត់ធ្មត់ និងដោះស្រាយបញ្ហាព្រំដែនដោយសន្តិវិធី ស្របតាមច្បាប់អន្តរជាតិ ដើម្បីប្រែក្លាយតំបន់ព្រំដែនឱ្យទៅជាខ្សែបន្ទាត់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ ពិតប្រាកដ។ជាការឆ្លើយតប ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានរាយការណ៍លម្អិតជូនគណៈប្រតិភូរដ្ឋសភាអំពីសមិទ្ធផលលើវិស័យរៀបចំដែនដី ការចុះបញ្ជីដីធ្លី និងការដោះស្រាយទំនាស់ដីធ្លី។ ឯកឧត្តមបានឱ្យដឹងថា នៅក្នុងយុទ្ធនាការជំរុញការងារចុះបញ្ជីដីធ្លីមានលក្ខណៈជាប្រព័ន្ធ ដែលបានបិទបញ្ចប់ជាផ្លូវការកាលពីថ្ងៃទី២៤ ខែឧសភា ឆ្នាំ២០២៥ កន្លងទៅ រដ្ឋបាលខេត្តសម្រេចបាននូវជោគជ័យដ៏ធំធេង តាមរយៈការខិតខំរបស់មន្ត្រីបច្ចេកទេស និងការចូលរួមពីប្រជាពលរដ្ឋ។ចំពោះយន្តការដោះស្រាយទំនាស់ដីធ្លី ឯកឧត្តមអភិបាលខេត្តបានបញ្ជាក់ថា រដ្ឋបាលខេត្តបានអនុវត្តយ៉ាងខ្ជាប់ខ្ជួនតាមយន្តការច្បាប់ តាមរយៈគណៈកម្មការសុរិយោដីគ្រប់កម្រិត (ថ្នាក់ក្រុង-ស្រុក ថ្នាក់ខេត្ត និងថ្នាក់ជាតិ) ដោយប្រកាន់ខ្ជាប់នូវគោលការណ៍ «ដោះស្រាយក្រៅប្រព័ន្ធតុលាការ» ផ្អែកលើមូលដ្ឋានយុត្តិធម៌ សច្ចធម៌ និងការយោគយល់គ្នា។ បន្ថែមលើនេះ រដ្ឋបាលខេត្តក៏បានប្ដេជ្ញាចិត្តពង្រឹងយន្តការអធិការកិច្ច និងសវនកម្មផ្ទៃក្នុង ដើម្បីធានាថាមន្ត្រីរាជការបំពេញតួនាទីដោយភាពស្មោះត្រង់ និងមិនរំលោភសិទ្ធិរបស់ប្រជាពលរដ្ឋឡើយ៕

សម្តេចធិបតី ហ៊ុន ម៉ាណែត អញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រីពិភាក្សា និងឆ្លងលើរបៀបវារៈសំខាន់ៗ មួយចំនួន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាសចក្រកម្ពុជា អញ្ជើញជាអធិបតីភាពដ៏ខ្ពង់ខ្ពស់ដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព នាព្រឹកថ្ងៃទី២២ ខែឧសភា ឆ្នាំ២០២៦ ។ កិច្ចប្រជុំពេញអង្គគណៈរដ្ឋមន្ត្រី ពិភាក្សា និងឆ្លងលើរបៀបវារៈសំខាន់ៗ មួយចំនួនរួមមាន៖ ១-សេចក្តីព្រាងរបាយការណ៍វឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន លើកទី១៩ ប្រចាំឆមាសទី២ ឆ្នាំ២០២៥។ ២-សេចក្តីព្រាងរបាយការណ៍តាមដាននិ ងត្រួតពិនិត្យការអនុវត្តយុទ្ធសាស្ត្របញ្ចកោណដំណាក់កាលទី១ ឆ្នាំ២០២៥។ ៣-សេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់។ ៤-បញ្ហាផ្សេងៗ៕

ឧបនាយករដ្ឋមន្ត្រី ប្រាក់ សុខុន នឹងអញ្ជើញចូលរួមកិច្ចប្រជុំបើកចំហ កម្រិតខ្ពស់របស់ក្រុមប្រឹក្សាសន្តិសុខអង្គការសហប្រជាជាតិ និងកិច្ចប្រជុំពាក់ព័ន្ធ នៅថ្ងៃទី២៦ ខែឧសភានេះ

តបតាមការអញ្ជើញរបស់ភាគីចិន ក្នុងនាមជាប្រធានប្តូរវេននៃក្រុមប្រឹក្សាសន្តិសុខអង្គការសហប្រជាជាតិ (អ.ស.ប.) ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃ ព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ អញ្ជើញចូលរួមកិច្ចប្រជុំបើកចំហកម្រិតខ្ពស់របស់ ក្រុមប្រឹក្សាសន្តិសុខ អ.ស.ប. ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៦ នៅទីក្រុងញូវយ៉ក សហរដ្ឋអាម៉េរិក។ កិច្ចប្រជុំកម្រិតខ្ពស់នេះ នឹងប្រព្រឹត្តទៅក្រោមប្រធានបទ «ការលើកកម្ពស់គោលបំណង និងគោលការណ៍ របស់ធម្មនុញ្ញ អ.ស.ប. និងការពង្រឹងប្រព័ន្ធអន្តរជាតិផ្តោតលើ អ.ស.ប.» ដោយមាន ឯកឧត្តម វ៉ាង យី រដ្ឋមន្ត្រី ការបរទេស និងជាសមាជិកការិយាល័យនយោបាយនៃគណៈកម្មាធិការកណ្តាលបក្សកុម្មុយនីស្តចិន ធ្វើជា អធិបតី និងចូលរួមថ្លែងសុន្ទរកថា។ក្នុងអំឡុងពេលស្នាក់នៅទីក្រុងញូវយ៉ក ឯកឧត្តមឧបនាយករដ្ឋមន្ត្រី រំពឹងថានឹងអញ្ជើញចូលរួម ព្រឹត្តិការណ៍អមដែលពាក់ព័ន្ធ ហើយក៏នឹងមានជំនួបទ្វេភាគីដាច់ដោយឡែកពីគ្នាជាមួយសមភាគីពីបណ្តា ប្រទេសឯទៀត ដើម្បីពង្រឹងទំនាក់ទំនងទ្វេភាគី ជំរុញកិច្ចសហប្រតិបត្តិការ និងផ្លាស់ប្តូរយោបល់លើបញ្ហា នានាដែលជាផលប្រយោជន៍ និងជាក្តីបារម្ភរួមទៅវិញទៅមកផងដែរ៕

អណ្ដូងទឹក ១២៥ អណ្ដូង ត្រូវបានប្រគល់ជូនអតីតយុទ្ធជន និងនិវត្តជន ក្នុងខេត្តពោធិ៍សាត់

ដើម្បីបំពេញសេចក្ដីត្រូវការ និងសម្រួលដល់ការនៅរបស់បងប្អូនអតីតយុទ្ធជន និងនិវត្តជន ក្នុងភូមិប៊ុនរ៉ានីសែនជ័យដំណាក់ទ្រយឹង ស្ថិតក្នុងឃុំ ព្រងិល ស្រុកភ្នំក្រវាញ ខេត្តពោធិ៍សាត់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានផ្ដល់ជូនអំណោយដ៏ថ្លៃថ្លានូវអណ្ដូងទឹកចំនួន ១២៥ អណ្ដូង ដល់គ្រួសារអតីតយុទ្ធជន ដែលនេះគឺជាការយកចិត្តទុកដាក់ខ្ពស់គិតគូរពីសុខទុក្ខរបស់បងប្អូនប្រជាពលរដ្ឋនៅមូលដ្ឋានដែលជួបការខ្វះខាត។ អណ្ដូងទឹកចំនួន ១២៥ អណ្ដូង ត្រូវបានប្រគល់ជូន ក្នុងឱកាសពិធីសំណេះសំណាល និងប្រគល់ផ្ទះជូនអតីតយុទ្ធជន និងនិវត្តជន កាលពីថ្ងៃទី ២១ ខែឧសភា ឆ្នាំ២០២៦ ក្នុងភូមិប៊ុនរ៉ានីសែនជ័យដំណាក់ទ្រយឹង។ សូមជម្រាបថា បច្ចុប្បន្នបងប្អូនអតីតយុទ្ធជន និងនិវត្តជន ក្នុងភូមិប៊ុនរ៉ានីសែនជ័យដំណាក់ទ្រយឹង ទទួលបានអណ្ដូងទឹកប្រើប្រាស់សឹងគ្រប់ខ្នងផ្ទះ ខណៈពីមុន អណ្ដូងទឹក ១ ត្រូវប្រើរួមគ្នា២គ្រួសារ។ យោងតាមរបាយការណ៍របស់គណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តពោធិ៍សាត់ ពេលនេះ អណ្ដូងទឹកសរុបចំនួន ៥៧៩អណ្ដូង ត្រូវប្រគល់ជូនបងប្អូនប្រើប្រាស់៕

ក្រសួងការបរទេស និងសហប្រតិបត្តិការអន្តរជាតិជាក្រសួងទី៧បានបញ្ចប់ការធ្វើជំរឿនមន្ត្រីជាក់ស្តែង ដោយមានថ្នាក់ដឹកនាំ និងមន្ត្រីប្រមាណជិត ៦០០នាក់បានចូលរួម

រយៈពេល ២ថ្ងៃពេញ ចាប់ពីថ្ងៃទី២០ និងទី២១ ខែឧសភា ឆ្នាំ២០២៦ គណៈកម្មការធ្វើបច្ចុប្បន្នភាព និងជំរឿនមន្ត្រីជាក់ស្តែង បានបញ្ចប់ការចុះធ្វើជំរឿនមន្ត្រីជាក់ស្តែងនៅតាមរចនាសម្ព័ន្ធរបស់អង្គភាពចំណុះទីស្តីការក្រសួងការបរទេស និងសហប្រតិបត្តិការអន្តរជាតិ រួចរាល់តាមការគ្រោងទុក។ ក្នុងដំណើរការចុះជំរឿនមន្ត្រីជាក់ស្តែងនេះ គណៈកម្មការជំរឿន បានចុះពិនិត្យផ្ទៀងផ្ទាត់រចនាសម្ព័ន្ធ និងវត្តមានមន្ត្រីរាជការក្របខ័ណ្ឌ មន្ត្រីជាប់កិច្ចសន្យា និងមន្ត្រីផ្សេងទៀត ដែលកំពុងបំពេញការងារជាក់ស្តែងនៅតាមអង្គភាពចំណុះទីស្តីការក្រសួងការបរទេស និងសហប្រតិបត្តិការអន្តរជាតិដោយមានអ្នកចូលរួមប្រមាណជិត ៦០០នាក់ បានចូលរួមក្នុងដំណើរការនៃការធ្វើជំរឿននេះផងដែរ។ គណៈកម្មការជំរឿនមន្ត្រីជាក់ស្តែង សូមថ្លែងអំណរគុណដល់ថ្នាក់ដឹកនាំ និងមន្ត្រីគ្រប់ជាន់ថ្នាក់ទាំងអស់របស់ក្រសួងការបរទេស និងសហប្រតិបត្តិការអន្តរជាតិ ដែលបានចូលរួមសហការ និងបំពេញភារកិច្ចស្របតាមបែបបទ នីតិវិធីតាមការណែនាំរបស់គណៈកម្មការជំរឿន ដើម្បីឱ្យដំណើរការនៃការចុះជំរឿន បានប្រព្រឹត្តទៅដោយរលូនតាមការគ្រោងទុក។ សូមជម្រាបថា ក្រសួងការបរទេស និងសហប្រតិបត្តិការអន្តរជាតិ ជាក្រសួងទី៧ ដែលបានបញ្ចប់ការធ្វើជំរឿនមន្ត្រីជាក់ស្តែងរួចរាល់ បន្ទាប់ពីក្រសួងពាណិជ្ជកម្ម៕

តំណាងអចិន្ត្រៃយ៍កម្ពុជា ប្រាប់ក្រុមប្រឹក្សា UNថា សង្គ្រាមឈ្លានពានរបស់ថៃមកលើកម្ពុជាពីរលើកក្នុងឆ្នាំ២០២៥ បង្កឱ្យមានវិបត្តិមនុស្សធម៌ធ្ងន់ធ្ងរ, ជនភៀសសឹកជាង ៦៤ ម៉ឺននាក់ និងហេដ្ឋារចនាសម្ព័ន្ធស៊ីវិលមួយចំនួនត្រូវបានបំផ្លាញ

ឯកឧត្តម កែវ ឈា ឯកអគ្គរាជទូត/តំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិ (អ.ស.ប.) បានចូលរួមថ្លែងការណ៍នៅក្នុងកិច្ចប្រជុំបើកចំហររបស់ក្រុមប្រឹក្សាសន្តិសុខអ.ស.ប. ស្តីពី "កិច្ចការពារជនស៊ីវិលក្នុងជម្លោះប្រដាប់អាវុធ" រៀបចំដោយស្ថានបេសកកម្មសាធារណរដ្ឋប្រជាមានិតចិន ក្នុងនាមជាប្រធាននៃក្រុមប្រឹក្សាសន្តិសុខអ.ស.ប. សម្រាប់ខែឧសភា ឆ្នាំ២០២៦ នៅទីស្នាក់ការអ.ស.ប. ទីក្រុងញូវយ៉ក នៅរសៀលនៅថ្ងៃទី២១ ខែឧសភា ឆ្នាំ២០២៦។ក្នុងឱកាសនោះ ឯកឧត្តមបានគូសបញ្ជាក់អំពីគោលការណ៍ និងសារៈសំខាន់នៃការគោរពច្បាប់មនុស្សធម៌អន្តរជាតិ និងកិច្ចការពារជនស៊ីវីលនៅក្នុងគ្រប់ជម្លោះប្រដាប់អាវុធ ខណៈដែលសង្គ្រាមឈ្លានពានរបស់ថៃទាំងពីរលើកកាលពីឆ្នាំ២០២៥ បានបង្កឱ្យមានវិបត្តិជនស៊ីវិលនៅកម្ពុជា។ ឯកឧត្តមក៏បានជម្រាបជូនកិច្ចប្រជុំបើកចំហររបស់ក្រុមប្រឹក្សាសន្តិសុខ អ.ស.ប. អំពីការរំលោភច្បាប់មនុស្សធម៌អន្តរជាតិដែលកំពុងកើតមាននៅតាមតំបន់ជាច្រើនលើពិភពលោក រួមទាំងនៅអាស៊ីអាគ្នេយ៍ ហើយបានសង្កត់ធ្ងន់ថា៖ «នៅកម្ពុជា អំពើឈ្លានពានកាលពីខែកក្កដា និងខែធ្នូ ឆ្នាំ២០២៥ បានបង្កផលវិបាកមនុស្សធម៌យ៉ាងធ្ងន់ធ្ងរ ដែលក្នុងនោះ ជនស៊ីវិលកម្ពុជាប្រមាណ ៦៤៩ ០០០ នាក់បានរត់ភៀសសឹក ហេដ្ឋារចនាសម្ព័ន្ធស៊ីវីលជាច្រើនត្រូវបានបំផ្លិចបំផ្លាញ ហើយប្រាសាទព្រះវិហារ ដែលជាបេតិកភណ្ឌពិភពលោករបស់អង្គការយូណេស្កូ បានរងការខូចខាតយ៉ាងធ្ងន់ធ្ងរ។គិតត្រឹមថ្ងៃទី២១ ខែឧសភា ឆ្នាំ២០២៦ នៅមានជនភៀសសឹកកម្ពុជាប្រមាណ ៣០ ៩៣៤នាក់ទៀត (ស្រ្តី១៥ ៩៤២នាក់ និងកុមារ ១០ ៣៥៦នាក់) ពុំទាន់អាចវិលទៅលំនៅឋានវិញ ដោយសារកងកម្លាំងថៃបានរាយបន្លាលួស ដាក់ទូកុងតឺន័រ កាន់កាន់ផ្នែកខ្លះនៃភូមិឋានរបស់ពួកគាត់ បន្ទាប់ពីបទឈប់បាញ់ចូលជាធរមាន។

រយៈពេល ១០ថ្ងៃ គិតចាប់១១ រហូតដល់ថ្ងៃទី២០ ខែឧសភា គ្រោះថ្នាក់ចរាចរណ៍ផ្ដាច់ជីវិតមនុស្ស៣៣នាក់ និងមានគ្រោះអគ្គិភ័យបំផ្លាញផ្ទះ ១៤ខ្នង

ក្នុងរយៈពេល ១០ថ្ងៃ គិតចាប់១១ រហូតដល់ថ្ងៃទី២០ ខែឧសភា ឆ្នាំ២០២៦ គ្រោះថ្នាក់ចរាចរណ៍ផ្លូវគោគបានកើតឡើងចំនួន៥៥ករណី បណ្តាលឱ្យមានមនុស្ស៣៣នាក់ស្លាប់ និង៩៥នាក់ផ្សេងទៀតរងរបួសធ្ងន់ស្រាល។ នេះបើយោងតាមរបាយការណ៍ក្រសួងមហាផ្ទៃ។បើតាមរបាយការណ៍ គ្រោះថ្នាក់ទាំងនោះ កើតមាននៅរាជធានីភ្នំពេញ ខេត្តកណ្តាល តាកែវ កំពង់ស្ពឺ ព្រះសីហនុ កំពត កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំក្រចេះ ស្ទឹងត្រែង រតនគិរី និងខេត្តស្វាយរៀង។ ចំណែកករណីគ្រោះអគ្គិភ័យវិញ ក្នុងរយៈពេលដូចគ្នានេះ បានកើតឡើង២៦ករណី និងបណ្ដាលឱ្យផ្ទះសំបែង ខូចខាត១៤ខ្នង មាននៅរាជធានីភ្នំពេញ កណ្តាល តាកែវ កំពត កំពង់ឆ្នាំង ពោធិ៍សាត់ កំពង់ធំ ស្ទឹងត្រែង ព្រះវិហារ កំពង់ចាម ក្រចេះ ត្បូងឃ្មុំ និងខេត្តព្រៃវែង។ គ្រោះអគ្គិភ័យនេះ ក៏បានបណ្តាលឱ្យមានការខូចខាតនូវសម្ភារផ្សេងទៀតរួមមាន រថយន្ត១៨គ្រឿង ម៉ូតូ១គ្រឿង កុដិ២ សាលាឆាន់១ ហាងលក់ស៊ុប១ រោង២ និងឃ្លាំង២កន្លែង៕

សម្ដេចធិបតី៖ បញ្ជូនទណ្ឌិតក្មេងទំនើងចំនួន ៧៩០នាក់ ឱ្យទៅបម្រើការងារជួយដល់ជួរមុខ ក្នុងការធ្វើពុម្ពលេណដ្ឋាន និងការងារផ្សេងៗ ដែលសមស្រប

អនុវត្តតាមអនុសាសន៍ដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២៦ ខែមេសា ឆ្នាំ២០២៦កន្លងទៅ ដោយបានឱ្យស្ថាប័នជំនាញរួមមាន ក្រសួងយុត្តិធម៌, អគ្គមបញ្ជាការដ្ឋានកងយោធពលខេមរភូមិន្ទ និងអគ្គស្នងការនគរបាលជាតិ គិតគូររៀបចំនិងបញ្ជូនទណ្ឌិតក្មេងទំនើងឱ្យទៅបម្រើការងារជួយដល់ជួរមុខក្នុងការធ្វើពុម្ពលេណដ្ឋាន និងការងារផ្សេងៗដែលសមស្រប ដើម្បីជួយដល់កងទ័ពជួរមុខក៏ដូចជាកងវិស្វកម្ម។ជាក់ស្តែងកាលពីថ្ងៃទី២១ ខែឧសភា ឆ្នាំ២០២៦នេះ អគ្គនាយកដ្ឋានពន្ធនាគារ បានចាត់ចែងផ្ទេរទណ្ឌិតជាក្មេងទំនើង (ភេទប្រុស) សរុបចំនួន ៧៩០នាក់ ពីបណ្តាមណ្ឌលអប់រំកែប្រែ និងពន្ធនាគាររាជធានី-ខេត្ត ទៅអនុវត្តទោសបន្តនៅមណ្ឌលអប់រំកែប្រែ និងពន្ធនាគារគោលដៅ ចំនួន០២ គឺ មណ្ឌលអប់រំកែប្រែទី៤ (ខេត្តពោធិ៍សាត់) ចំនួន៦៥១នាក់ និងពន្ធនាគារខេត្តឧត្តរមានជ័យ ចំនួន ១៣៩នាក់។ ការផ្ទេរទណ្ឌិតជាក្មេងទំនើងទាំងនេះ គឺក្នុងគោលបំណងបង្កើនការអប់រំកែប្រែ និងលត់ដំខ្លួន តាមរយៈការចូលរួមកម្មវិធីបណ្តុះបណ្តាលវិជ្ជាជីវៈ ដើម្បីកសាងសមត្ថភាពជំនាញផ្ទាល់ខ្លួនផង និងដើម្បីធ្វើសកម្មភាពដែលមានប្រយោជន៍ជួយដល់សមរភូមិមុខផង។

បណ្ដាញសង្គម

ព័ត៌មានថ្មីៗ

អ្នកវិភាគ៖ លោក Kim Jong Un អាចនឹងប្រើប្រាស់ដំណើរទស្សនកិច្ចរបស់លោក Xi ដើម្បីបង្ហាញកម្លាំងកូរ៉េខាងជើង

ស្នងការដឹកជញ្ជូនសហភាពអឺរ៉ុប៖ EU ពុំមើលឃើញកង្វះខាតប្រេងយន្តហោះនោះទេខណៈតម្លៃប្រេងហក់ឡើងខ្ពស់

លោក Putinនិយាយថា រុស្ស៊ីបានទាក់ទងអាមេរិកពាក់ព័ន្ធនឹងបញ្ហាវិបត្តិនៅប្រទេសគុយបា

អ្នកថែសន្តិភាព UNម្នាក់ ស្លាប់ និង ២នាក់ រងរបួស អំឡុងការផ្លោងគ្រាប់កាំភ្លើងត្បាល់នៅលីបង់

អាហ្វ្រិកខាងត្បូងបញ្ជូនបេ្រសិតទៅកាន់អាហ្វ្រិក និងទ្វីបផ្សេងទៀត ក្រោយការវាយប្រហាររើសអើងជនបរទេស

ក្រុមមេដឹកនាំជួបជុំគ្នា មុនកិច្ចប្រជុំកំពូល សហភាពអឺរ៉ុប-តំបន់បាល់កង់ខាងលិច នៅប្រទេសម៉ុនតេណេហ្គ្រូ

អាមេរិកបង្កើនសម្ពាធលើគុយបា ខណៈពួកគេដាក់ទណ្ឌកម្មលោកប្រធានាធិបតី Diaz-Canel

រដ្ឋមន្រ្តីការពារជាតិអាមេរិកចាត់ទុកបាតុកម្មនៅបូលីវីថា ប្រៀបបាននឹងការផ្តួលរំលំរដ្ឋាភិបាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877