BTV NEWS

កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា

ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ

កូនត្រីចម្រុះប្រមាណ៣ម៉ឺនក្បាល និងត្រីមេពូជ១០០គីឡូក្រាម ត្រូវបានលែងចូលស្រះជំរកត្រីសហគមន៍នេសាទបឹងកំពែង ក្នុងទិវាមច្ឆជាតិ១កក្កដា

ព័ត៌មានជាតិ

ទេសរដ្ឋមន្រ្តី គន់ គីម ចុះពិនិត្យស្រូវកសិករដែលខ្វះទឹកស្រោចស្រព និងខូចខាតជាង១ពាន់ហិកតា ក្នុងខេត្តបន្ទាយមានជ័យ

បន្ទាយមានជ័យ៖ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បន្តអញ្ជើញចុះពិនិត្យផលប៉ះពាល់ដំណាំស្រូវរបស់កសិករដោយសារកង្វះទឹកស្រោចស្រព និងខូចខាត។ចំនួនជាង១ពាន់ហិកតា ស្ថិតក្នុងស្រុកមង្គលបុរី ខេត្តបន្ទាយមានជ័យ។ នារសៀលថ្ងៃទី២៨ ខែមករា ឆ្នាំ២០២៥ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បន្តអញ្ជើញដឹកនាំក្រុមការងារ អាជ្ញាធរខេត្តបន្ទាយមានជ័យ និងមន្ទីរ-អង្គភាពពាក់ព័ន្ធ ដើម្បីពិនិត្យដំណាំស្រូវរបស់កសិករស្ថិតក្នុងឃុំចំនួន៤ នៃស្រុកមង្គលបុរី។ ក្នុងពេលចុះពិនិត្យ ឯកឧត្តម ទេសរដ្ឋមន្រ្តី បានវាយតម្លៃខ្ពស់ចំពោះការយកចិត្តទុកដាក់របស់អាជ្ញាធរខេត្ត និងមន្ទីរជំនាញ ដែលបានចុះជួបជាមួយប្រជាកសិករ ក្នុងការពិនិត្យ និងឆ្លើយតបពីបញ្ហាដែលកំពុងប្រឈមដោយសារការកង្វះទឹកស្រោចស្រពដែលអាចខូចខាតដំណាំទាំងស្រុងរបស់កសិករ។ ឯកឧត្តម ទេសរដ្ឋមន្រ្តី ពិនិត្យឃើញថាដំណាំស្រូវក្នុងឃុំចំនួន៤នេះ មិនអាចសង្គ្រោះបានឡើយ ដោយសារមិនមានប្រព័ន្ធធារាសាស្រ្តណាមួយដែលអាចជួយអន្តរាគមន៍ទឹកនោះទេ ខណៈអាជ្ញាធរខិតខំរកប្រភពទឹកពីការជីកអណ្តូង។ ឯកឧត្តម ទេសរដ្ឋមន្រ្តី បញ្ជាក់ថា ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ ជាសេនាធិការរបស់រាជរដ្ឋាភិបាល នឹងលើកសំណើទៅក្រសួងធនធានទឹក និងឧតុនិយម ដើម្បីរៀបចំគម្រោងសាងសង់ប្រព័ន្ធធារាសាស្រ្តដែលមានលទ្ធភាពស្តុកទឹក ដើម្បីបញ្ជូនទៅដំណាំស្រូវរបស់កសិករក្នុងឃុំដែលប្រឈមនឹងកង្វះទឹកនេះ។ អំឡុងចុះពិនិត្យនោះ ឯកឧត្តម ទេសរដ្ឋមន្រ្តី បានពន្យល់ដល់បងប្អូនប្រជាកសិករនូវការគិតគូររបស់រាជរដ្ឋាភិបាល គឺតាមរយៈក្រសួងកសិកម្ម រុក្ខាប្រមាញ់ និងនេសាទ អំពីការរៀបចំការបង្កបង្កើនផលស្រូវរបស់កសិករដែលតែងប្រឈមនោះទៅជាសហគមន៍កសិកម្មទំនើប ដើម្បីកសិករទទួលបានផលល្អ ព្រមទាំងអាចបង្កបង្កើនទៅតាមតម្រូវការទីផ្សារ។ ជាចុងបញ្ចប់ ឯកឧត្តម ទេសរដ្ឋមន្រ្តី បានណែនាំដល់អាជ្ញាធរ និងមន្ទីរជំនាញបន្តការយកចិត្តទុកដាក់លើសកម្មភាពអន្តរាគមន៍ផ្តល់ទឹកស្រូវប្រាំងរបស់កសិករគ្រប់ៗគ្នា ដើម្បីបង្ការការខូចខាតដំណាំស្រូវ៕ សូមជម្រាបថា ខេត្តបន្ទាយមានជ័យ មានផ្ទៃដីស្រូវចំនួន១,៤៧០ហិកតាប៉ះពាល់ដោយសារកង្វះទឹក ក្នុងឃុំចំនួន៤ ដូចជា ឃុំបត់ត្រង់ ឃុំសឿ ឃុំចំណោម និងឃុំរហាត់ទឹក៕

អ្នកស្រាវជ្រាវ៖ ការចាយវាយរបស់ពលរដ្ឋនៅអំឡុងចូលឆ្នាំចិន ជាចំណែកនាំឱ្យមានកំណើនសេដ្ឋកិច្ច

ការចំណាយលើកិច្ចពិធីចូលឆ្នាំថ្មីប្រពៃណីចិនរបស់បងប្អូនប្រជាពលរដ្ឋខ្មែរសែស្រឡាយចិននៅក្នុងឆ្នាំនេះឃើញថា កើតមានតាំងពីច្រើនថ្ងៃមុនកិច្ចពិធីចូលឆ្នាំថ្មីមកដល់ទៅទៀត តាមរយៈការកក់របស់របរសម្រាប់សែនព្រេននានាមានដូចជាជ្រូកខ្វៃជាដើម។ ករណីនេះ ត្រូវបានអ្នកស្រាវជ្រាវមើលឃើញថា ជាចំណែកសំខាន់មួយនៅក្នុងការជួយជំរុញបន្ថែមដល់កំណើនសេដ្ឋកិច្ចជាតិ។ការចំណាយរបស់ពលរដ្ឋខ្មែរសែស្រឡាយចិននៅអំឡុងកិច្ចពិធីចូលឆ្នាំថ្មីឆ្នាំនេះឃើញថា មានទំហំ ប្រហាក់ប្រហែលនឹងឆ្នាំមុនដែរ។ នេះបើតាមបណ្ឌិត គី សេរីវឌ្ឍន៍ អ្នកស្រាវជ្រាវនៅរាជបណ្ឌិត្យសភាកម្ពុជាបានមើលឃើញ។ យ៉ាងនេះក្ដីក៏លោកបណ្ឌិតបានមើលឃើញដែរថា ការចាយវាយរបស់ពលរដ្ឋ នៅក្នុងឆ្នាំថ្មីនេះ មានចំនួនច្រើនជាងឆ្នាំមុន ជាពិសេសចាប់តាំងពីការឆ្លងឆ្នាំសកលមក។លោកបណ្ឌិតបន្ថែមថា ការចំណាយរបស់ពលរដ្ឋនៅអំឡុងចូលឆ្នាំចិននេះ គឺជាផ្នែកសំខាន់មួយនៅក្នុងការរួមចំណែកជួយដល់កំណើនសេដ្ឋកិច្ចជាតិ។នៅរៀងរាល់ឆ្នាំយើងសង្កេតឃើញថា ពលរដ្ឋខ្មែរសែស្រឡាយចិនតែងនិយមសែនព្រេននៅអំឡុងចូលឆ្នាំថ្មីមានចំនួនច្រើនសន្ធឹកសន្ធាប់ ជាពិសេសជ្រូកខ្វៃ។ ការសែនព្រេនកាន់តែធំពីមួយឆ្នាំទៅមួយ ឆ្នាំត្រូវបានគេជឿថា នឹងជួយដល់កូនចៅជាពិសេសក្រុមគ្រួសារដែលរៀបចំកិច្ចពិធីបានធំ ក៏ទទួលបានសំណាងលាភធំផងដែរ៕ ដោយ៖ គង់ ឌិន

រដ្ឋមន្រ្តីក្រសួងពាណិជ្ជកម្មកម្ពុជា និងឡាវ ដឹកនាំកិច្ចប្រជុំគណៈកម្មាធិការពាណិជ្ជកម្មចម្រុះកម្ពុជា-ឡាវ លើកទី២

នាព្រឹកថ្ងៃទី២៨ ខែមករា ឆ្នាំ២០២៥ នៅទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ ដោយអនុវត្តតាមអនុសាសន៍ណែនាំដ៏ខ្ពស់ខ្ពស់របស់ថ្នាក់ដឹកនាំរបស់ប្រទេសទាំងពីរ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម នៃព្រះរាជាណាចក្រកម្ពុជា និងឯកឧត្តម Malaithong KOMMASITH រដ្ឋមន្ត្រីក្រសួងឧស្សាហកម្ម និងពាណិជ្ជកម្ម នៃសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញជាសហប្រធានដឹកនាំកិច្ចប្រជុំថ្នាក់រដ្ឋមន្រ្តីនៃគណៈកម្មាធិការពាណិជ្ជកម្មចម្រុះកម្ពុជា-ឡាវ លើកទី២ ដោយមានការចូលរួមពីថ្នាក់ដឹកនាំអន្តរក្រសួង-ស្ថាប័នពាក់ព័ន្ធ និងអាជ្ញាធរខេត្តជាប់ព្រំដែនរបស់ភាគីទាំងពីរ។ កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យវឌ្ឍនភាពកិច្ចការពាណិជ្ជកម្ម កំណត់គោលដៅទំហំពាណិជ្ជកម្ម ស្វែងរកកាលានុវត្តភាពសំដៅបង្កើនទំហំពាណិជ្ជកម្ម កិច្ចសហប្រតិបត្តិការ និងបង្កើតយន្តការអំណោយផលសម្រាប់ធុរកិច្ច និងវិនិយោគរបស់ប្រទេសទាំងពីរ និងបានពិភាក្សាលើចំណុចសំខាន់ៗ មួយចំនួនរួមមាន៖ (១) ការកំណត់គោលដៅពាណិជ្ជកម្មទ្វេភាគី (២) កិច្ចសហប្រតិបត្តិការតំបន់ពាណិជ្ជកម្មសេរី (៣)ពនិត្យលទ្ធភាពបង្កើតយន្តការផ្សេងៗដើម្បីពង្រីកទំហំពាណិជ្ជកម្មទ្វេភាគី (៤) កិច្ចប្រជុំប្រចាំឆ្នាំរបស់រដ្ឋបាលខេត្តជាប់ព្រំដែន (៥) ការតាំងពិព័រណ៍/ពិព័រណ៍ពាណិជ្ជកម្ម ការផ្សព្វផ្សាយពាណិជ្ជកម្ម និងការវិនិយោគ (៦) ទេសចរណ៍ និងភស្តុភារកម្ម និង (៧) សភាពាណិជ្ជកម្ម និងកិច្ចសហប្រតិបត្តិការឧស្សាហកម្ម។គួរបញ្ជាក់ផងដែរថា កាលពីព្រឹកថ្ងៃទី២៧ ខែមករា ឆ្នាំ២០២៥ មុនពេលកិច្ចប្រជុំថ្នាក់រដ្ឋមន្ត្រីនាព្រឹកនេះ ក៏មានកិច្ចប្រជុំថ្នាក់ឧត្តមមន្រ្តីដែលភាគីកម្ពុជាដឹកនាំដោយ ឯកឧត្តម ឡុង កែមវិចិត្រ អគ្គនាយកពាណិជ្ជកម្មអន្តរជាតិ នៃក្រសួងពាណិជ្ជកម្មកម្ពុជា និងភាគីឡាវដឹកនាំឯកឧត្តម Sayana SAYYAKONE អគ្គនាយកនៃនាយកដ្ឋានចចារពាណិជ្ជកម្ម និងកិច្ចសហប្រតិបត្តិការសេដ្ឋកិច្ច នៃក្រសួងឧស្សាហកម្មនិងពាណិជ្ជកម្មឡាវ ដើម្បីពិនិត្យ និងពិភាក្សាលំអិតអំពីអាទិភាពការងារដែលនឹងត្រូវសហការអនុវត្តបន្តដើម្បីដាក់ជូនកិច្ចប្រជុំថ្នាក់រដ្ឋមន្ត្រីពិនិត្យ និងផ្តល់អនុសាសន៍ណែនាំ៕

កម្ពុជានឹងអនុវត្តសកម្មភាពអាទិភាពមួយចំនួន ដើម្បីបន្តលើកកម្ពស់មីក្រូហិរញ្ញវត្ថុនៅកម្ពុជា

កម្ពុជានឹងពង្រឹងការផ្តល់ឥណទាន, ការធ្វើឱ្យប្រសើរឡើងនូវគោលការណ៍លើកទឹកចិត្ត, កិច្ចការពារផ្លូវច្បាប់, យន្តការការពារអ្នកប្រើ ប្រាស់ និងដោះស្រាយបណ្ដឹង, ប្រព័ន្ធអេកូឡូស៊ីទិន្នន័យ និងការរៀបចំឥណទានឡើងវិញ និងនវានុវត្តន៍សេវាធានារ៉ាប់រង ដើម្បីពង្រីក វិសាលភាពផ្នែកទាំងនេះឱ្យប្រសើរ។ធនាគារជាតិនៃកម្ពុជា និងអង្គការសហប្រជាជាតិប្រចាំនៅកម្ពុជា ចេញសេចក្ដីថ្លែងការណ៍រួម ស្តីពីបច្ចុប្បន្នភាពនៃដំណើរការ ពិគ្រោះយោបល់ជាមួយពហុភាគីពាក់ព័ន្ធ ស្ដីពីមីក្រូហិរញ្ញវត្ថុនៅកម្ពុជា ដើម្បីតាមដានវឌ្ឍនភាពសកម្មភាពអាទិភាពចំនួន ២២ ដែល ត្រូវបានអនុម័តក្នុងកិច្ចសន្ទនាកម្រិតខ្ពស់លើកទី១ កាលពីឆ្នាំ២០២៤ កន្លងមក ដើម្បីឆ្លើយតបនឹងការព្រួយបារម្ភ ចំពោះកំណើន យ៉ាងឆាប់រហ័សនៃវិស័យមីក្រូហិរញ្ញវត្ថុនៅកម្ពុជា និងភាពប្រទាក់ក្រឡាគ្នា ជាមួយបញ្ហាប្រឈមផ្សេងទៀត ដូចជាការជំពាក់បំណុល លើសលប់ជាដើម ក្នុងដំណើរការពិគ្រោះយោបល់កាលពីឆ្នាំ២០២៣ ក្នុងគោលបំណងសម្របសម្រួល ឱ្យមានការចូលរួមពិភាក្សា ពីភាគីពាក់ព័ន្ធ ក្នុងន័យស្ថាបនា។ក្នុងចំណោមសកម្មភាពអាទិភាពចំនួន២២, សកម្មភាពអាទិភាពចំនួន៤ ត្រូវបានអនុវត្តបានទាំងស្រុង សកម្មភាពអាទិភាព ចំនួន១៥ កំពុងត្រូវបានអនុវត្ត និងសកម្មភាពអាទិភាពចំនួន៣ កំពុងត្រូវបានចាប់ផ្តើមអនុវត្ត។ ចំនុចសំខាន់ៗពាក់ព័ន្ធនឹងការអនុវត្ត សកម្មភាពអាទិភាពរួមមាន៖ ការលើកកម្ពស់ស្តង់ដារ ក្នុងការផ្តល់ឥណទានប្រកបដោយការទទួលខុសត្រូវ ដោយរួមបញ្ចូលទាំងការ ពង្រឹងការអនុវត្តក្រមប្រតិបត្តិ និងការប្រើប្រាស់ឧបករណ៍វាយតម្លៃ និងតាមដានសុខដុមនីយកម្មនៃកិច្ចការពារអតិថិជន និងមាន គោលការណ៍ជាច្រើនទៀតដែលត្រូវអនុវត្ត។ ចំណែកគោលការណ៍លើកទឹកចិត្តរបស់គ្រឹះស្ថានធនាគារនិងហិរញ្ញវត្ថុ ក្នុងនោះសូចនាករ សមិទ្ធកម្មគន្លឹះរបស់គ្រឹះស្ថានធនាគារនិងហិរញ្ញវត្ថុ សម្រាប់វាយតម្លៃបុគ្គលិកកំពុងត្រូវបានពិនិត្យ និងកែសម្រួលឱ្យស្រប តាម គោលការណ៍ដែលមានចែងក្នុងក្រមប្រតិបត្តិ សម្រាប់គ្រឹះស្ថានធនាគារនិងហិរញ្ញវត្ថុជាដើម។ចំណែកកិច្ចការពារផ្លូវច្បាប់, សេចក្ដីថ្លែងការណ៍រួមត្រូវបានរៀបចំឡើង ដើម្បីពង្រឹងបទប្បញ្ញត្តិដែលមានស្រាប់ សម្រាប់ទប់ ស្កាត់ការប្រើប្រាស់មិនត្រឹមត្រូវ នូវឯកសារសម្គាល់អត្តសញ្ញាណដូចជា បណ្ណសមធម៌ អត្តសញ្ញាណបណ្ណ និងសៀវភៅគ្រួសារ ធ្វើជា ទ្រព្យធានាសម្រាប់ឥណទានគ្រប់រូបភាព។ ចំពោះយន្តការការពារអ្នកប្រើប្រាស់ ដោះស្រាយបណ្ដឹងវិញ, គំនិតផ្ដួចផ្ដើមដើម្បីពង្រឹង ការពារអ្នកប្រើប្រាស់ និងពង្រឹងយន្តការដោះស្រាយបណ្តឹងកំពុងត្រូវបានអនុវត្ត។ ចំពោះប្រព័ន្ធអេកូឡូស៊ីទិន្នន័យ និងការរៀបចំឥណទានឡើងវិញ, កិច្ចខិតខំប្រឹងប្រែងដើម្បីបង្កើតប្រព័ន្ធចែករំលែក វិភាគ និង រាយការណ៍ទិន្នន័យ សម្រាប់វិស័យធនាគារនិងហិរញ្ញវត្ថុ និងវិស័យហិរញ្ញវត្ថុមិនមែនធនាគារ កំពុងត្រូវបានពិនិត្យ ដោយត្រូវអនុវត្ត តាមវិធាននិងគោលការណ៍មួយចំនួន ខណៈដែលនវានុវត្តន៍សេវាធានារ៉ាប់រង នឹងអនុវត្តកម្មវិធីសាកល្បង ពាក់ព័ន្ធនឹងការធានារ៉ាប់រង ដំណាំក្រោមសហគមន៍កសិកម្មទំនើប ដោយមានការគាំទ្រពីវិស័យឯកជន។ ការសិក្សាបន្ថែមត្រូវបានរៀបចំឡើង ដើម្បីស្វែងរកគំរូ ធានារ៉ាប់រងដ៏ល្អប្រសើរ សម្រាប់ពង្រីកវិសាលភាពនៃគំនិតផ្ដួចផ្ដើមនេះ។ បន្ថែមពីនេះ ការពង្រឹងការសម្របសម្រួល និងការគាំទ្រផ្នែក ហិរញ្ញវត្ថុជាកត្តាចាំបាច់ ដើម្បីផ្ដល់សិទ្ធិដល់សហគមន៍កសិកម្មទំនើប សម្រាប់លទ្ធភាពចូលទីផ្សារ និងឱកាសទទួល បានឥណទាន សម្រាប់សហគមន៍ជនជាតិដើមភាគតិច។ សូមបញ្ជាក់ថា វឌ្ឍនភាពនៃការអនុវត្តសកម្មភាពអាទិភាព នឹងត្រូវបានបន្តការពិនិត្យ និង តាមដាន ហើយកិច្ចសន្ទនាកម្រិតខ្ពស់ជាមួយពហុភាគីពាក់ព័ន្ធបន្ទាប់ គ្រោងនឹងរៀបចំឡើងក្នុងខែ សីហា ឆ្នាំ២០២៥ ខាងមុខ៕ អត្ថបទ៖ សុន រ៉ាឌី

ក្រុមការងារមន្ទីរធនធានទឹក តម្លើងម៉ាស៊ីនបូមទឹកបញ្ចូលអាងស្ដុបទុក ដើម្បីត្រៀមជួយសង្គ្រោះស្រូវប្រាំងកសិករដែលខ្វះទឹកស្រោចស្រព

ឧត្តរមានជ័យ៖ ក្រុមការងារមន្ទីរធនធានទឹក និងឧតុនិយមខេត្តឧត្តរមានជ័យ បានបញ្ជូនគ្រឿងចក្រចុះកាយប្រឡាយ និងដំឡើងម៉ាស៊ីនបូមទឹកខ្នាតមធ្យមកម្លាំង៦៥សេះ បូមទឹកបញ្ចូលដាក់អាងទឹកចុងកាល់ ដើម្បីត្រៀមអន្តរាគមន៍សង្គ្រោះស្រូវប្រាំងចំនួន ២៥៩ ហិកតា ដែលខ្វះទឹកស្រោចស្រព។នៅរសៀលថ្ងៃទី២៧ មករា ឆ្នាំ២០២៥នេះ លោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ បានដឹកនាំក្រុមការងារមន្រ្តីជំនាញធនធានទឹកធ្វើការបញ្ជូនគ្រឿងចក្រចុះជួយអន្តរាគមន៍កាយប្រឡាយ និងតម្លើងម៉ាស៊ីនប៉ូមទឹកខ្នាតមធ្យមកម្លាំង៦៥សេះ ដើម្បីបូមទឹកបញ្ជូនដាក់អាងទឹកចុងកាល់ ត្រៀមទុកធ្វើការអន្តរាគមន៍ជួយសង្រ្គោះស្រូវប្រាំងរបស់ប្រជាពលរដ្ឋចំនួន២៥៩ ហិកតាដែលខ្វះខាតទឹកធ្វើស្រែប្រាំង។លោក ញឺន កួន បានបញ្ជាក់ថា ការដាក់ម៉ាស៊ីនបូមទឹកនៅពេលនេះ ខណៈតំបន់មួយចំនួនរបស់ប្រជាពលរដ្ឋមានការខ្វះខាតប្រភពទឹកក្នុងការស្រោចស្រពទើបមន្រ្តីជំនាញយើងបានធ្វើការអន្តរាគមន៍ភ្លាមៗស្របពេលទៅតាមគោលការណ៍របស់រាជរដ្ឋាភិបាល។សូមបញ្ជាក់ថា អាងទឹកចុងកាល់នេះ ជាប្រភពទឹកសម្រាប់ផ្គត់ផ្គង់ឲ្យការផលិតទឹកស្អាតប្រើប្រាស់ក្នុងទីប្រជុំជនស្រុកចុងកាល់ ហើយកន្លងមក ក្នុងរដូវវស្សាអាងទឹកនេះទទួលបានបរិមាណទឹកភ្លៀងតិច ទឹកក្នុងអាងបានប្រមាណ ៨០% ប៉ុណ្ណោះ។ កត្ដាទាំងអស់នេះហើយទើបក្រុមការងារធ្វើការបូមប្រមូលទឹកត្រៀមទុកអន្តរាគមន៍ និងបង្ហូរចូលស្រែរបស់បងប្អូននៅពេល ដែលរងការខ្វះខាតទឹកផងដែរ៕

ក្រសួងមហាផ្ទៃ សម្រេចដាក់ឱ្យដំណើរការប្រព័ន្ធគ្រប់គ្រងលំហូរឯកសារ Document Management System (DMS) ដើម្បីបង្កើនប្រសិទ្ធភាពការងារផ្ដល់សេវាសាធារណៈជូនប្រជាពលរដ្ឋ

អនុវត្តតាមផែនការយុទ្ធសាស្ត្រ ស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ឆ្នាំ២០២៤-២០២៨ និងផែនការយុទ្ធសាស្ត្របច្ចេកវិទ្យាឌីជីថល ឆ្នាំ២០២៣-២០២៧ របស់ក្រសួងមហាផ្ទៃ ក្នុងការពង្រឹងប្រសិទ្ធភាពការងារលើកកម្ពស់ការផ្តល់សេវាសាធារណៈ និងជំរុញការការពារសន្តិសុខជាតិតាមរយៈប្រព័ន្ធបច្ចេកវិទ្យា ដើម្បីឆ្លើយតបឱ្យកាន់តែឆាប់រហ័ស មានប្រសិទ្ធភាព និងស័ក្តិសិទ្ធិភាព ក្រសួងមហាផ្ទៃ បានធ្វើទំនើបកម្មប្រព័ន្ធគ្រប់គ្រងលំហូរឯកសារ DMS ដើម្បីបង្កើនប្រសិទ្ធភាពការងាររដ្ឋបាល ជំរុញលំហូរការងារផ្ទៃក្នុងរបស់ក្រសួងឱ្យកាន់តែឆាប់រហ័ស ពង្រឹងយន្តការស្ថាប័ន និងការផ្ដល់សេវាសាធារណៈឱ្យកាន់តែល្អប្រសើរឆាប់រហ័សជូនដល់ប្រជាពលរដ្ឋ។ តាមរយៈសេចក្ដីណែនាំស្ដីពី នីតិវិធីលំហូរឯកសាររដ្ឋបាលតាមប្រព័ន្ធឌីជីថល ចេញផ្សាយ នាថ្ងៃទី២៧ ខែមករា ឆ្នាំ២០២៥ នេះ បានឱ្យដឹងថា អនុវត្តតាមផែនការយុទ្ធសាស្ត្រ ស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ឆ្នាំ២០២៤-២០២៨ និងផែនការយុទ្ធសាស្ត្របច្ចេកវិទ្យាឌីជីថល ឆ្នាំ២០២៣-២០២៧ របស់ក្រសួងមហាផ្ទៃ ក្នុងការពង្រឹងប្រសិទ្ធភាពការងារលើកកម្ពស់ការផ្តល់សេវាសាធារណៈ និងជំរុញការការពារសន្តិសុខជាតិតាមរយៈប្រព័ន្ធបច្ចេកវិទ្យា ក្រសួងមហាផ្ទៃ បានសម្រេចដាក់ឱ្យដំណើរការ ប្រព័ន្ធគ្រប់គ្រងលំហូរឯកសារ DMS (Document Management System) ជំនាន់ទី១ តាមបណ្តាអគ្គនាយកដ្ឋាន និងអង្គភាពចំណុះក្រសួងមហាផ្ទៃ។ ប្រព័ន្ធ DMS ជំនាន់ទី១ ដែលមានភាពបត់បែន អាចកែសម្រួលជាបន្តបន្ទាប់ ក្រោយពីដាក់ឱ្យប្រើប្រាស់ស្របទៅតាមស្ថានភាពខុសគ្នា និងការប្រែប្រួលនៃបរិបទលំហូរឯកសាររដ្ឋបាលក្នុង អង្គភាព៕ដើម្បីធានាបាននូវប្រសិទ្ធភាព និងស័ក្តិសិទ្ធិភាពនៃការប្រើប្រាស់ ក្រសួងមហាផ្ទៃ បានរៀបចំប្រតិបត្តិ ស្តង់ដា និងនីតិវិធីលំហូរឯកសាររដ្ឋបាលតាមប្រព័ន្ធ DMS ចំនួន ៩ចំណុច៕

អ្នកបើកបរ២៥នាក់ ក្នុងចំណោម២៧៧នាក់ ត្រូវបាននគរបាលឃាត់យកមកអប់រំភ្លាមៗ ក្រោយរកឃើញបើកបរមានជាតិស្រវឹង លើសកម្រិត

បន្ទាយមានជ័យ៖ ដើម្បីធានាបានសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានចេញបទបញ្ជា ដល់ផែនជំនាញ និងបណ្តាអធិការដ្ឋាននគរបាលក្រុង/ស្រុក ឲ្យបើកប្រតិបត្តិការត្រួតពិនិត្យ លើអ្នកបើកបរមានជាតិស្រវឹង (ជាតិអាកុល) ពេលរាត្រី ដើម្បីរួមចំណែកកាត់បន្ថយអត្រាគ្រោះថ្នាក់ នឹងស្លាប់ ដោយគ្រោះថ្នាក់ចរាចរណ៍ឲ្យនៅកម្រិតទាបបំផុត នាយប់ថ្ងៃទី២៧មករាឆ្នាំ២០២៥នេះ។ក្នុងការចុះប្រតិបត្តិការនោះដែរ លោកឧត្តមសេនីយ៍ត្រី ង៉ាន់ ចិន្តា ស្នងការរង ផែនការងារសណ្តាប់ធ្នាប់ បានដឹកនាំកម្លាំងការិយាល័យនគរបាលចរាចរណ៍ផ្លូវគោក សហការជាមួយកម្លាំងអធិការដ្ឋាននគរបាលក្រុងប៉ោយប៉ែត បើកប្រតិបត្តិការចុះឆែកអាវុធលើកំណាត់ផ្លូវជាតិលេខ៥ ចំណុចមុខសាលាក្រុងប៉ោយប៉ែត ដើម្បីទប់ស្កាត់អ្នកបើកបរមានជាតិស្រវឹង។ ជាលទ្ធផលនគរបាលជំនាញយើងមានការសង្ស័យ បានធ្វើតេសលើអ្នកបើកបរ រថយន្តតូច ២៧២គ្រឿង , អ្នកបើកបររថយន្តធំ ០៤គ្រឿង ,ម៉ូតូ ៤១២ គ្រឿង, ម៉ូតូកង់បី ១១គ្រឿង, ពិនិត្យអ្នកបេីកបរសរុប ២៧៧ នាក់ ស្រី៥៩ នាក់។ ក្នុងនោះអ្នកបើកបរមាន ជាតិអាល់កុល ២៥នាក់ ។- ម៉ូតូ ១៩គឿង - រថយន្តតូច ០៦គ្រឿង ត្រូវបានធ្វើការអប់រំនៅ និងកន្លែង អោយថយជាតិអាល់កុល និងឱ្យសាច់ញាតិមកយកត្រឡប់ទៅលំនៅដ្ឋានវិញ៕

កម្ពុជាលើកកម្ពស់ការយល់ដឹងអំពីហិរញ្ញវត្ថុលំនៅឋាន និងមូលបត្រធានាដោយអចលនទព្យ

កម្ពុជាលើកកម្ពស់ការយល់ដឹងអំពីតម្រូវការ និងគំរូហិរញ្ញវត្ថុលំនៅឋាន, ទស្សនទាននៃមូលបត្រ ដែលធានាដោយអចលនទ្រព្យ និង ករណីសិក្សាពាក់ព័ន្ធផ្នែកហិរញ្ញវត្ថុលំនៅឋានប្រទេសជប៉ុន និងមូលបត្រដែលធានាដោយអចលនទ្រព្យ របស់ប្រទេសក្នុងតំបន់ អាស៊ាន។ឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនិយ័តករមូលបតកម្ពុជា លើកឡើងនៅក្នុងសិក្ខាសា- លាកសាងសមត្ថភាពស្ដីពី“ហិរញ្ញវត្ថុលំនៅឋាន និងមូលបត្រដែលធានាដោយអចលនទព្យ" នៅថ្ងៃទី ២៧ ខែ មករា ម្សិលមិញនេះ ឯកឧត្តមបានគូសបញ្ជាក់ថា នៅពេលយើងឈានទៅមុខ យើងរំពឹងថា ទីផ្សារមូលបតដែលមិនត្រឹមតែមានថាមវន្ត និងភាពធន់ ប៉ុណ្ណោះទេ ប៉ុន្តែក៏ជាកត្តាជំរុញដ៏សំខាន់នៃកំណើនសេដ្ឋកិច្ចប្រកបដោយនិរន្តរភាព នៅក្នុងវិស័យលំនៅដ្ឋានផងដែរ, តាមរយៈការ ណែនាំអំពីឧបករណ៍ប្រកបដោយនវានុវត្តន៍ដូចជា៖ មូលបត្រដែលធានាដោយអចលនទ្រព្យ និយ័តករមូលបតកម្ពុជា មានគោល បំណងពង្រឹងទំនុកចិត្តវិនិយោគិន បង្កើនលទ្ធភាពទទួលបានហិរញ្ញប្បទានលំនៅដ្ឋាន ដែលមានតម្លៃសមរម្យ និងរួមចំណែកដល់ការ អភិវឌ្ឍសេដ្ឋកិច្ច និងសង្គមរបស់ជាតិកាន់តែទូលំទូលាយ។លោក Takahiro Yamakawa នាយករងការិយាល័យកិច្ចសហប្រតិបត្តិការហិរញ្ញវត្ថុក្នុងតំបន់ នៃក្រសួងហិរញ្ញវត្ថុជប៉ុន លើក ឡើងថា តាមរយៈមូលនិធិជំនួយបច្ចេកទេសហិរញ្ញវត្ថុជប៉ុន-អាស៊ាន ប្រទេសជប៉ុនបានជួយដល់ការអភិវឌ្ឍទីផ្សារសញ្ញាបណ្ណ ជា ក្នុងរយៈពេល ២០ ឆ្នាំកន្លងមកហើយ ក្រោមគំនិតផ្ដួចផ្ដើមទីផ្សារសញ្ញាបណ្ណអាស៊ានបូក៣ ABMI ។ លោកបញ្ជាក់ថា ចំណែកសិក្ខា សាលាដ៏សំខាន់នេះ នឹងជួយដល់និយ័តករ និងអ្នកចូលរួមក្នុងទីផ្សារកម្ពុជា សិក្សាស្វែងយល់អំពីឥទ្ធិពលនៃមាគ៌ាអភិវឌ្ឍហិរញ្ញវត្ថុ លំនៅឋាន និងមូលបត្រដែលធានាដោយអចលនទ្រព្យនៅក្នុងប្រទេសជប៉ុន និងអាស៊ាន។ចំណែក លោក Satoru Yamadera ទីប្រឹក្សា នៃ ADB បានសង្កត់ធ្ងន់ថា ហិរញ្ញវត្ថុលំនៅឋានកាន់តែមានសារៈសំខាន់ ជាពិសេសសម្រាប់ការរីកលូតលាស់នៃគ្រួសារដែលមានប្រាក់ចំណូលកម្រិតមធ្យម និងកម្រិតទាបនៅក្នុងទីក្រុង នៃតំបន់អាស៊ី ។ ADB ដែលជាលេខាធិការដ្ឋានរបស់ ABMI នឹងបន្តជួយដល់និយ័តករនៅកម្ពុជា ក្នុងការធ្វើពិពិធកម្មផលិតផលហិរញ្ញវត្ថុដូចជា កម្ចីទិញផ្ទះ និងមូលបត្រដែលធានាដោយអចលនទ្រព្យនាពេលអនាគត។សូមបញ្ជាក់ថា សិក្ខាសាលាកសាងសមត្ថភាពស្ដីពីហិរញ្ញវត្ថុលំនៅឋាន និងមូលបត្រដលធានាដោយអចលនទព្យ មានគោលបំណង លើកកម្ពស់ការយល់ដឹងអំពីតម្រូវការ និងគំរូហិរញ្ញវត្ថុលំនៅឋាន, ទស្សនទាននៃមូលបត្រដែលធានាដោយអចលនទ្រព្យ និងករណី សិក្សាពាក់ព័ន្ធនឹងហិរញ្ញវត្ថុលំនៅឋានប្រទេសជប៉ុន និងមូលបត្រដែលធានាដោយអចលនទ្រព្យរបស់ប្រទេសក្នុងតំបន់អាស៊ានដូចជា ឥណ្ឌូនេស៊ី ម៉ាឡេស៊ី ហ្វីលីពីន ថៃ និងវៀតណាម ដែលបានគូសបញ្ជាក់ពីឧត្តមានុវត្តន៍ និងកម្មវិធីក្នុងតំបន់សម្រាប់នវានុវត្តន៍ ហិរញ្ញវត្ថុ៕ អត្ថបទ៖ សុន រ៉ាឌី

ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញជាអធិបតីក្នុង «ពិធីសម្ពោធរោងចក្រកែច្នៃកៅស៊ូធម្មជាតិ និងបើកមុខចៀរជ័រកៅស៊ូថ្មី» នៅខេត្តព្រះវិហារ

នាព្រឹកថ្ងៃទី២៨ ខែមករា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីក្នុង «ពិធីសម្ពោធរោងចក្រកែច្នៃកៅស៊ូធម្មជាតិ និងបើកមុខចៀរជ័រកៅស៊ូថ្មី» របស់ក្រុមហ៊ុនចម្ការកៅស៊ូ ទ្រី ភាព អ៊ឹមផត អិចផត ឯ.ក ដែលស្ថិតក្នុងឃុំរមណីយ ស្រុករវៀង ខេត្តព្រះវិហារ។ ពិធីនេះមានការអញ្ជើញចូលរួមពីសំណាក់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ អ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាពគ្រុប ព្រមទាំងឯកឧត្តម លោកជំទាវ សមាជិក សមាជិកាព្រឹទ្ធសភា កងកម្លាំងប្រដាប់អាវុធ អាជ្ញាធរស្រុក ឃុំ បងប្អូនកម្មករ កម្មការនី ប្រជាពលរដ្ឋ លោកគ្រូអ្នកគ្រូ សិស្សានុសិស្ស យុវជន យុវនារី និងភ្ញៀវកិត្តិយស សរុបចំនួនប្រមាណ ៣០០០នាក់។ជាកិច្ចចាប់ផ្ដើម ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ បានថ្លែងអំណរគុណចំពោះវត្តមាន ឯកឧត្តមឧបនាយករដ្ឋមន្រ្តី ហ៊ុន ម៉ានី តំណាងដ៏ខ្ពង់ខ្ពស់សម្តេចមហាបវរធិបតីនាយករដ្ឋមន្រ្តី អញ្ជើញជាអធិបតីភាពក្នុងពិធីសម្ពោធរោងចក្រកែច្នៃកៅស៊ូធម្មជាតិ និងបើកមុខចៀរជ័រកៅស៊ូថ្មី នាឱកាសនេះ។ ឯកឧត្តមបានបន្តថា សមិទ្ធផលនេះនឹងជំរុញដល់កំណើនសេដ្ឋកិច្ច និងលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើងនៅក្នុងខេត្តព្រះវិហារ និងទូទាំងប្រទេស។ ឯកឧត្តមបានបន្ថែមថា ពិធីសម្ពោធនាឱកាសនេះ បានប្រព្រឹត្តទៅក្រោមម្លប់សុខសន្តិភាព ស្ថិរភាពនយោបាយ និងការអភិវឌ្ឍរីកចម្រើនលើគ្រប់វិស័យ ក្រោមការដឹកនាំប្រកបដោយគតិបណ្ឌិតដ៏ឈ្លាសវៃ និងប៉ិនប្រសព្វរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ផ្សារភ្ជាប់ជាមួយនឹងការលើកឡើងរបស់ឯកឧត្តមអភិបាលខេត្តព្រះវិហារ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា វិស័យឯកជន គឺជាដៃគូមិនអាចខ្វះបាន និងជាកម្លាំងចលករដ៏សំខាន់ ដែលបានចូលរួមចំណែកដល់ការអភិវឌ្ឍ។ ជាមួយគ្នានេះ ឯកឧត្តមបានបង្ហាញការគាំទ្រ ក្រុមហ៊ុន ទ្រី ភាព អុឹមផត អិចផត ឯ.ក និងក្រុមហ៊ុនដ៏ទៃទៀត ដែលបានកំពុងបោះទុនវិនិយោគ ក្នុងវិស័យកសិកម្ម ព្រមទាំងលើកទឹកចិត្តឱ្យមានការវិនិយោគកាន់តែច្រើន ដើម្បីបង្កើតការងារ លើកកម្ពស់ប្រាក់ចំណូលប្រជាពលរដ្ឋ ជំរុញការនាំចេញ និងលើកស្ទួយកំណើនសេដ្ឋកិច្ចជាតិផងដែរ។មានប្រសាសន៍ជូនដល់អង្គពិធីទាំងមូល ឯកឧត្តមឧបនាយករដ្ឋមន្រ្តី បាននាំយកការសួរសុខទុក្ខ និងក្ដីនឹករលឹកពីសំណាក់សម្ដេចធិបតីនាយករដ្ឋមន្រ្តី ជូនចំពោះលោកយាយ លោកតា អុំ ពូ មីង និងក្មួយៗ សិស្សានុសិស្សដែលបានចូលរួម ព្រមទាំងចូលរួមអបអរសាទរជាមួយប្រជាពលរដ្ឋខេត្តព្រះវិហារ ជាពិសេសអ្នក ឃុំរមណីយ ស្រុករវៀង នូវសមិទ្ធផលថ្មី ដែលនឹងចូលរួមជំរុញឱ្យមានការងារ ក្នុងស្រុកបន្ថែមក្នុងមូលដ្ឋាន ជាពិសេសខេត្តព្រះវិហារផ្ទាល់។ ឯកឧត្តមឧបនាយករដ្ឋមន្រ្តី បានរំលេចអំពីភាពសំខាន់នៃការចូលរួមរបស់វិស័យឯកជន ដែលបានអនុវត្តការងារស្របតាមគោលនយោបាយ របស់រាជរដ្ឋាភិបាល បាន និងកំពុងជំរុញវិស័យឯកជនអនុវត្ត និងលើកកម្ពស់ការកែច្នៃផលិតផលកសិកម្ម តាមរយៈការធ្វើឱ្យប្រសើរឡើង និងការធ្វើទំនើបកម្មផ្នែកកសិ-ឧស្សាហកម្ម ក៏ដូចជាការជំរុញឱ្យមានការវិនិយោគលើកសិផលកែច្នៃ៕

លោកជំទាវវេជ្ជបណ្ឌិត យក់ សម្បតិ្ត ជួបពិភាក្សាការងារជាមួយគណៈប្រតិភូមូលនិធិសកល សម្រាប់គម្រោងលុបបំបាត់ជំងឺគ្រុនចាញ់នៅក្នុងតំបន់ទន្លេមេគង្គ

ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នារសៀលថ្ងៃទី២៧ ខែមករា ឆ្នាំ២០២៥ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជានាយកគម្រោងមូលនិធិសកល នៃក្រសួងសុខាភិបាល បានទទួលជួបគណៈប្រតិភូមូលនិធិសកល ដឹកនាំដោយលោកស្រី Rosie Ameyan មន្ត្រីជាន់ខ្ពស់ផ្នែកកម្មវិធី នៃមូលនិធិសកលសម្រាប់គម្រោងលុបបំបាត់ជំងឺគ្រុនចាញ់នៅក្នុងតំបន់ទន្លេមេគង្គ។ជាកិច្ចចាប់ផ្តើម លោកជំទាវរដ្ឋលេខាធិការ បានស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់គណៈប្រតិភូ ដែលបានអញ្ជើញមកសិក្សាស្វែងយល់បន្ថែម និងពិភាក្សាលម្អិតអំពី សមិទ្ធផលការងារគ្រប់គ្រង និងលុបបំបាត់ជំងឺគ្រុនចាញ់នៅកម្ពុជា និងផែនការអនាគត នៃការបន្តនិរន្តរភាពការងារគ្រប់គ្រងជំងឺគ្រុនចាញ់។ លោកស្រី Rosie Ameyan បានអបអរសាទរកម្ពុជា ដែលសម្រេចបានការគ្រប់គ្រង និងលុបបំបាត់ជំងឺគ្រុនចាញ់យ៉ាងរហ័ស លោកស្រី ក៏បានអបអរសាទរ គោរពជូនពរឯកឧត្តមសាស្ត្រាចារ្យ ឈាង រ៉ា ដែលទទួលដំណែងជារដ្ឋមន្ត្រីក្រសួងសុខាភិបាល ក្នុងអាណត្តិថ្មី។ លោកស្រី បានគូសបញ្ជាក់ ពីភាពជោគជ័យរបស់កម្ពុជា ក្នុងការទប់ស្កាត់ជំងឺកូវីដ-១៩ ក្នុងរយៈកាលកន្លងមកនេះ ដែលធ្វើឲ្យកម្ពុជា កាន់តែមានភាពរឹងមាំ ពិសេសភាពជោគជ័យ ក្នុងការលុបបំបាត់ជំងឺគ្រុនចាញ់ គួរឱ្យកត់សម្គាល់ បើប្រៀបធៀបទៅនឹងប្រទេសនៅក្នុងតំបន់។លោកស្រីបានជម្រាបជូនអំពីគោលបំណង នៃដំណើរទស្សនកិច្ចមកកាន់កម្ពុជានាពេលនេះ ដើម្បី៖១) ពិភាក្សាអំពីផែនការអនាគតសម្រាប់ការផ្តល់ហិរញ្ញប្បទានលុបបំបាត់ជំងឺគ្រុនចាញ់ ក្រោមគម្រោង RAI ពីម្ចាស់ជំនួយផ្សេងទៀត និងក្នុងស្រុក និងការរំពឹងទុកសម្រាប់វដ្តជំនួយនាពេលខាងមុខ (២០២៧-២០២៩)។២) ពិភាក្សាអំពី ការអនុវត្តកម្មវិធីលទ្ធផល និងបញ្ហាប្រឈម លើសកម្មភាពសំខាន់ៗសម្រាប់ឆ្នាំ២០២៥។៣) ពិភាក្សាអំពី និរន្តរភាព និងផែនការអន្តរកាល និងតួនាទីរបស់ក្រុមប្រឹក្សាសម្របសម្រួលជំនួយមូលនិធិសកល (CCC) ក្នុងការបង្កើតផែនទីបង្ហាញផ្លូវធានានិរន្តរភាពសម្រាប់ជំងឺគ្រុនចាញ់ (រួមទាំងមេរោគអេដស៍ និងជំងឺរបេង)។លោកជំទាវរដ្ឋលេខាធិការ បានជម្រាបជូនអំពីសមិទ្ធផលសំខាន់ៗ នៃកម្មវិធីគ្រុនចាញ់សម្រេចបានដោយក្រសួងសុខាភិបាល និងផែនការបន្ទាប់របស់ក្រសួង ឈានទៅលុបបំបាត់ជំងឺគ្រុនចាញ់នៅឆ្នាំ២០២៥ នេះ និងឈានទៅដល់ប្រទេសកម្ពុជា គ្មានជំងឺគ្រុនចាញ់ប្រកបដោយចីរភាព និងនិរន្តភាពឆ្នាំ២០២៩។ កម្ពុជាគ្មានអ្នកស្លាប់ដោយសារជំងឺគ្រុនចាញ់ចាប់តាំងពីឆ្នាំ២០១៨មក ហើយចំនួនករណីជំងឺគ្រុនចាញ់ ក៏ត្រូវបានកាត់បន្ថយគួរឱ្យកត់សម្គាល់។ មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (CNM) បានកំពុងដំណើរការរៀបចំផែនការយុទ្ធសាស្រ្តជាតិគ្មានជំងឺគ្រុនចាញ់នៅក្នុងព្រះរាជាណាចក្រកម្ពុជា ឆ្នាំ២០២៧-២០៣៥ ដើម្បីធានានិរន្តភាពប្រទេសកម្ពុជាគ្មានជំងឺគ្រុនចាញ់។ លោកជំទាវរដ្ឋលេខាធិការ បានសំណូមពរដល់គណៈប្រតិភូជាន់ខ្ពស់ នៃមូលនិធិសកល បន្តការគាំទ្របន្ថែមទាំងបច្ចេកទេស និងហិរញ្ញវត្ថុ ប្រកបដោយភាពបត់បែនសម្រាប់ពន្លឿនការងារលុបបំបាត់ជំងឺគ្រុនចាញ់នៅកម្ពុជា។លោកស្រី Rosie Ameyan បានបញ្ជាក់ពីគោលជំហរបន្តគាំទ្រកម្ពុជាក្នុងការលុបបំបាត់ជំងឺគ្រុនចាញ់។ ការពិភាក្សាគ្នាថ្ងៃនេះ មានសារៈសំខាន់ណាស់ក្នុងការរៀបចំត្រៀមលក្ខណៈគ្រប់ជ្រុងជ្រោយ ទាំងបច្ចេកទេស គោលនយោបាយ ថវិកា និងធនធានមនុស្ស ដើម្បីលុបបំបាត់ជំងឺគ្រុនចាញ់ ព្រមទាំងជំងឺរបេង និងជំងឺអេដស៍ផងដែរ៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

នាយករដ្ឋមន្ត្រីជប៉ុន លោក Ishiba ប្រឈមនឹងឧបសគ្គដ៏ធំក្រៃលែង នៅក្នុងការបោះឆ្នោតសភាជាន់ខ្ពស់

រដ្ឋមន្ត្រីការបរទេសទួរគី ប្រាប់លោក Rubio ថា ជម្លោះ នៅស៊ីរី ត្រូវតែបញ្ចប់ឥឡូវនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877