BTV NEWS

អាជ្ញាធរខេត្តកោះកុង បំភ្លឺថាមិនមានការបង្រ្កាបទីតាំងល្បែងអនឡាញទេ មានការស្រាវជ្រាវករណីឃាតកម្ម

សម្ដេចធិបតី៖បូជនីយដ្ឋានចងចាំនៃកម្ពុជានឹងក្លាយជាការចងចាំជាសាកល និងជាមជ្ឈមណ្ឌលអន្តរជាតិ

លោកអ្នកឧកញ៉ាបណ្ឌិត ទ្រី ភាព ជួបសំណេះសំណាលជាមួយនិស្សិតជ័យលាភីអាហារូបករណ៍ទៅសិក្សានៅប្រទេសហុងគ្រីចំនួន ១៦រូប

សម្ដេចធិបតី៖ខែកក្កដាជាពេលវេលាដ៏មានអត្ថន័យ ខណៈសម្បត្តិបេតិកភណ្ឌជាតិ៣ត្រូវបានចុះបញ្ជីនៅយូណេស្កូ

ព័ត៌មានជាតិ

កម្ពុជាស្វាគមន៍កូនផ្សោតទី២ នាដើមឆ្នាំ២០២៥ នៅអន្លង់ត្បូងខ្លា ខេត្តស្ទឹងត្រែង

គ្រាន់តែនៅក្នុងខែមករា ដើមឆ្នាំ២០២៥នេះ កម្ពុជាទទួលបានកូនផ្សោតកើតថ្មីចំនួន ២ក្បាល ដែលកូនផ្សោតកើតថ្មីទាំង២ក្បាលនេះ ប្រទះឃើញនៅអន្លង់ត្បូងខ្លា ខេត្តស្ទឹងត្រែង ដោយក្រុមការងារស្រាវជ្រាវនៃរដ្ឋបាលជលផល និងអង្គការ WWF។ក្រុមការងារស្រាវជ្រាវកំណត់អត្តសញ្ញាណកូនផ្សោតកើតថ្មីទី២ នាវេលាម៉ោង២:១៥នាទីរសៀល នាថ្ងៃទី២៤ ខែមករា ឆ្នាំ២០២៥ នៅត្រង់ចំណុចអន្លង់ត្បូងខ្លា ក្នុងភូមិសាស្ត្រភូមិត្បូងខ្លា ឃុំអូម្រះ ស្រុកសៀមបូក ខេត្តស្ទឹងត្រែង។ កូនផ្សោតនេះស្ថិតនៅក្នុងក្រុមសត្វផ្សោតពេញវ័យចំនួន៨ក្បាលផ្សេងទៀត និងបណ្តើរដោយផ្សោតមេដែលមានលេខកូដ៨៩។សូមជម្រាបថា នេះជាកូនផ្សោតទី២ ដែលបានកើតនៅដើមឆ្នាំ២០២៥នេះ ដោយកូនផ្សោតកើតថ្មីទី១ក្នុងឆ្នាំ២០២៥ ត្រូវក្រុមអ្នកស្រាវជ្រាវប្រទះឃើញនៅថ្ងៃទី២៣ ខែមករា ឆ្នាំ២០២៥ ពោលគឺតែមួយថ្ងៃប៉ុណ្ណោះ មុនពេលប្រទះឃើញកូនផ្សោតកើតថ្មីទី២។ក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផល សូមអរគុណចំពោះបងប្អូនឆ្នាំទន្លេ អាជ្ញាធរមូលដ្ឋាន និងប្រជាពលរដ្ឋ ដែលបានចូលរួមថែរក្សានិងការពារធនធានជលផលដ៏មានតម្លៃ។ ទន្ទឹមនេះប្រសិនបងប្អូនប្រជានេសាទ បានប្រទះឃើញសត្វផ្សោត ពិសេសកូនផ្សោត សូមផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ ០១២៨៩៧៩៤៣ ០១១៣៥៥៨៨៣ ០៩៩៧៩១៩១៩ ០៩២៩១៨១៤៤ និង ០១៧៨១៨៣៨២៕

ស្រូវប្រាំងជាង៥០០ហិចតានៅខេត្តស្វាយរៀងត្រូវបានសង្គ្រោះ

ស្វាយរៀង ÷ ស្រូវប្រាំងចំនួន៥៧៦ហិចតា ស្ថិតនៅក្នុងឃុំធ្មា និងឃុំម៉ឺនជ័យ ស្រុករំដួល ខេត្តស្វាយរៀង ត្រូវបានមន្ទីរធនធានទឹកនិងឧតុនិយមខេត្ត បញ្ចុះម៉ាស៊ីនធ្វើការបូមទឹកសង្គ្រោះ ដើម្បីបញ្ជៀសការខូចខាត បន្ទាប់ពីស្រូវទាំងនោះបានប្រឈមកង្វះទឹកស្រោចស្រប់ ។ លោក នៃ សរ អភិបាលស្ដីទីស្រុករំដួល ក្នុងពេលចុះពិនិត្យស្ថានភាពស្រូវ និងការងារបូមទឹកសង្គ្រោះស្រូវ ក្នុងភូមិសាស្ត្រឃុំទាំងពីរបានប្រាប់ទូរទស្សន៍ btv នៅថ្ងៃទី ២៥ ខែមករា ឆ្នាំ២០២៥នេះថា នៅក្នុងរដូវប្រាំងចុងឆ្នាំ២០២៤ និងដើមរដូវប្រាំងឆ្នាំ២០២៥ ពលរដ្ឋដែលមានអំណោយផលពីប្រព័ន្ធធារាសាស្ត្រ និងអាងស្តុបទឹកទាំង ១០ឃុំ បានធ្វើការងារបង្កបង្កើនស្រូវរដូវប្រាំង ប្រមាណជាង១ពាន់ហិចតា លើសផែនការផលិតស្រូវប្រាំងរបស់ស្រុកចំនូនតែ៧០០ហិចតា ។ លោកបានបន្ថែមថា ក្នុងចំណោមស្រូវប្រាំង ដែលពលរដ្ឋបង្កបង្កើនផលជាង១ពាន់ហិចតាស្ថិតនៅក្នុងឃុំទាំង១០ បច្ចុប្បន្ន មានស្រូវចំនួជាង៥០០ហិចតា បានរងប៉ះពាល់កង្វះទឹក ដោយមានការណែនាំពីរដ្ឋបាលខេត្ត នៅប៉ុន្មានថ្ងៃមុននេះមន្ទីរធនធានទឹកបានបញ្ចុះម៉ាស៊ីនបូមទឹកខ្នាតធំចំនួន ២គ្រឿងដើម្បីធ្វើការបូមទឹកពីអាស្តុបទឹកទន្លេវ៉ៃកូ ដាក់ប្រឡាយចែកជូនពលរដ្ឋបូមបន្តធ្វើការសង្គ្រោះស្រូវ ខណៈដែលស្រូវមួយចំនួនត្រៀមនិងប្រមូលផលនៅបុន្មានថ្ងៃខាងមុខ។ សំឡេង.... អភិបាលស្រុកស្ដីទី ស្ថិតនៅក្នុងពេលរួមដំណើរចុះពិនិត្យស្ថានភាពស្រូវនិងការងារបូមបាចទឹក តំណាងពលរដ្ឋដែលប្រឈមនឹងកង្វះទឹកស្រោចស្របលើផ្ទៃដីស្រែប្រាំង បានមានចំណាប់អារម្មណ៍ដោយគោរពថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី ដែលសម្ដេចតែងតែតាមដាន និងជំរុញណែនាំដល់រដ្ឋបាលខេត្ត មន្ទីរជំនាញ ចុះតាមដាននិងធ្វើការឆ្លើយតបរាល់តម្រូវការរបស់ពលរដ្ឋស្តែង ថ្ងៃនេះពលរដ្ឋនៅក្នុងឃុំដែលប្រឈមនិងទឹកត្រូវបានមន្ទីរជំនាញធ្វើការឆ្លើយតបជាបន្ទាន់ដើម្បីបញ្ជៀសការរងប៉ះពាល់និងខូចខាត។ តាមរបាយការណ៍របស់មន្ទីរកសិកម្មរុក្ខាប្រម៉ាញ់និងនេសាទនិងមន្ទីរធនធានទឹកនិងឧតុនិយមខេត្ត នៅរដូវប្រាំង ឆ្នាំ២០២៤.២០២៥ នេះកសិករខេត្តស្វាយរៀង សម្រេចផលិតស្រូវលើសផែនការជាង៥ពាន់ ហិចតា ខណៈដែលការងារផ្គត់ផ្គង់ទឹកត្រូវបានធានានិងគ្រប់គ្រងបានល្អ ។

កងរាជអាវុធហត្ថខេត្តបាត់ដំបងបង្ក្រាបមេក្លោងជួញដូរគ្រឿងញៀន និងបក្ខពួកជាង ១០នាក់ រួមទាំងរឹបអូសថ្នាំញៀនជាង ២០០គីឡូក្រាម

ភ្នំពេញ ៖ មេក្លោងជួញដូរគ្រឿងញៀន និងបក្ខពួកជាង ១០នាក់ និងថ្នាំញៀនជាង ២០០គីឡូក្រាម រួមទាំងកាំភ្លើងចំនួន ៣ដើម ត្រូវបានកម្លាំងកងរាជអាវុធហត្ថខេត្តបាត់ដំបង បើកប្រតិបត្តិការបង្ក្រា កាលពីថ្ងៃទី២១-២២ ខែមករា ឆ្នាំ២០២៥។បើយោងតាមរបាយការណ៍របស់អាវុធហត្ថខេត្តបាត់ដំបងបានឲ្យដឹងថា នៅថ្ងៃទី២១ ខែមករា ឆ្នាំ២០២៥ កម្លាំងការិយាល័យជំនាញឃាត់ខ្លួនជនសង្ស័យចំនួន ០៣ នាក់ មានដូចជា ៖១-ឈ្មោះ ញឹប សាណី ភេទប្រុស អាយុ ៣២ឆ្នាំ មុខរបរ កម្មករ ទីលំនៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបង។២-ឈ្មោះ វិន ផាន់និ ហៅ ឃីម ភេទប្រុស អាយុ ២២ឆ្នាំ មុខរបរ កម្មករ ទីលំនៅភូមិករហាល ឃុំពាមឯក ស្រុកឯកភ្នំ ខេត្តបាត់ដំបង។៣-ឈ្មោះ សុខ វ៉ាន់ដា ហៅ ទ្រូ ភេទប្រុស អាយុ ២៥ឆ្នាំ មុខរបរ កម្មករ មានទីលំនៅភូមិចុងព្រែក សង្កាត់ក្តុលដូនទាវ ក្រុងបាត់ដំបង។ពីបទ ជួញដូរដោយខុសច្បាប់នូវសារធាតុញៀន ដកហូតវត្ថុតាង ៖ គ្រឿងញៀនប្រភេទម៉ាទឹកកក (ICE) ចំនួន ០២ កញ្ចប់ ទម្ងន់ ១០,៦៨ក្រាម។ក្រោយពេលសួរចម្លើយ នៅថ្ងៃទី២២ ខែមករា ឆ្នាំ២០២៥ ក្រោមការបញ្ជាផ្ទាល់របស់លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង កម្លាំងមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តបាតង់ដំបង កម្លាំងកងអន្តរាគមន៍ កម្លាំងកងរាជអាវុធហត្ថក្រុងបាត់ដំបង និងកម្លាំងកងរាជអាវុធហត្ថស្រុកពាក់ព័ន្ធ ដឹកនាំដោយលោក វរសេនីយ៍ឯក ជា តារា មេបញ្ជាការរងខេត្ត បានចុះប្រត្តិបត្តការដល់លំនៅដ្ឋានមេក្លោងជួញដូរគ្រឿងញៀន ស្ថិតនៅបុរីឯកភ្នំវីឡា ភូមិចុងព្រែក សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង។ បានធ្វើការចាប់ខ្លួនមេក្លោង និងបក្ខពួកបានចំនួន ០៨ នាក់ទៀត ១-ឈ្មោះ វី វិនហាយ ភេទប្រុស អាយុ ៣០ឆ្នាំ (មេក្លោង) ស្នាក់នៅចំណុចកន្លែងកើតហេតុខាងលើ២-ឈ្មោះ មួង ឌី ភេទប្រុស អាយុ ៤០ឆ្នាំ (មេក្លោង) ស្នាក់នៅបណ្តោះអាសន្នជាមួយឈ្មោះ វី វិនហាយ ៣-ឈ្មោះ សន បញ្ញា ភេទប្រុស អាយុ ៣០ឆ្នាំ ស្នាក់នៅបណ្តោះអាសន្នជាមួយឈ្មោះ វី វិនហាយ ៤-ឈ្មោះ រុំ សុវណ្ណ ភេទប្រុស អាយុ ៣៦ឆ្នាំ ស្នាក់នៅបណ្តោះអាសន្នជាមួយឈ្មោះ វី វិនហាយ ៥-ឈ្មោះ ថេត ស្រីនា ភេទស្រី អាយុ ២៨ឆ្នាំ (ជាប្រពន្ធរបស់ឈ្មោះ វី វិនហាយ) ៦-ឈ្មោះ សុច ចរិយា ភេទស្រី អាយុ ១៧ឆ្នាំ (ជាប្រពន្ធរបស់ឈ្មោះ មួង ឌី)៧-ឈ្មោះ រដ្ឋ ចន្ថា ភេទប្រុស អាយុ ៣៥ឆ្នាំ មុខរបរ ជាងដែក ស្នាក់នៅភូមិចុងព្រែក សង្កាត់ក្តុលដូនទាវ ក្រុងបាត់ដំបង៨-ឈ្មោះ ឡឹប លីដា ហៅ អឹក ភេទប្រុស អាយុ ២៩ឆ្នាំ ស្នាក់នៅ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ (ពន្លាតដែនដីចាប់ខ្លួនបាន នៅក្រុងច្បារមន ខេត្តកំពង់ស្ពឺ) +បានឆែកឆេរក្នុងរថយន្ត និងលំនៅដ្ឋានរបស់ឈ្មោះ វី វិនហាយ រកឃើញគ្រឿងញៀន ២១៣ ដុំ ទម្ងន់ប្រមាណ ទម្ងន់ប្រមាណ ២១៣គីឡូក្រាម រួមមាន ៖-គ្រឿងញៀនប្រភេទម៉ាទឹកកក (ICE) ចំនួន ៦៩ ដុំ ទម្ងន់ប្រមាណ ៦៩គីឡូក្រាម-គ្រឿងញៀនប្រភេទហេរ៉ូអ៊ីន ចំនួន ៤៤ ដុំ ទម្ងន់ប្រមាណ ៤៤គីឡូក្រាម-គ្រឿងញៀនប្រភេទកេតាមីន (ខេ) ចំនួន ១០០ ដុំ ទម្ងន់ប្រមាណ ១០០គីឡូក្រាម-អាវុធ អាកា ៤៧ ចំនួន ០២ ដើម បង់ចំនួន ០២ គ្រាប់ ចំនួន ១៣ គ្រាប់-អាវុធខ្លី កា៥៤ ចំនួន ០១ ដើម ( គ្មានគ្រាប់ )-រថយន្ត ចំនួន ០២ គ្រឿង.ម៉ាក TOYOTA HIACE ស៊េរីឆ្នាំ២០១០ ពណ៌ ស.ម៉ាក TOYOTA LANDCRUISER ពណ៌ ស និងសម្ភារពាក់ព័ន្ធមួយចំនួនទៀត។

លោកឧកញ៉ា ជា ធីឡាយ អញ្ជើញបើកកិច្ចប្រជុំបូកសរុបការងារ ឆ្នាំ២០២៤ និងលើកទិសដៅបន្ត ឆ្នាំ២០២៥ នៃស្ថាប័នអប់រំ អ៊ិនធីស៊ីគ្រុប(NTC Group)

លោកឧកញ៉ា ជា ធីឡាយ អគ្គនាយក អ៊ិនធីស៊ី គ្រុប បានអញ្ជើញជាអធិបតីក្នុងពិធីបើកកិច្ចប្រជុំបូកសរុបការងារ ឆ្នាំ២០២៤ និងលើកទិសដៅបន្ត ឆ្នាំ២០២៥ នៃស្ថាប័នអប់រំ អ៊ិនធីស៊ី គ្រុប នាព្រឹកថ្ងៃទី២៥ ខែមករា ឆ្នាំ២០២៥នេះ។កិច្ចប្រជុំបូកសរុបការងារនេះ មានការអញ្ជើញនិមន្តចូលរួមពីសំណាក់សម្តេចព្រះមហាអរិយវង្សបណ្ឌិត យ៉ន សេងយៀត ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ និងជាព្រះចៅអធិការវត្តឧណ្ណាលោម និងលោកជំទាវ យូ ឃីម ធីឡាយ និងលោក ឃឹម ផុន ប្រធាននាយកប្រតិបតិ្ត អ៊ិន ធី ស៊ី គ្រុប ថ្នាក់ដឹកនាំ លោកគ្រូ អ្នកគ្រូ បុគ្គលិក គ្រប់លំដាប់ថ្នាក់។ក្រោយពីបានឃើញរបាយការណ៍របស់ការិយាល័យធនធានមនុស្ស ជាតំណាង បុគ្គលិកគ្រប់សេវាកម្មទាំងអស់ និងការឡើងធ្វើបទបង្ហាញពីសមិទ្ធផលផ្សេងៗ របស់លោក ឃឹម ផុន ប្រធាននាយកប្រតិបតិ្ត បានបញ្ជាក់ថា សាលារៀនសុវណ្ណភូមិមានការអភិវឌ្ឍ និងការរីក ចម្រើនយ៉ាងលឿន ដែលជាសញ្ញាណបញ្ជាក់ថា សមិទ្ធផលទាំងនេះគឺ “ជាការខិតខំរបស់ យើងទាំងអស់គ្នា”។ ជាពិសេសគិតត្រឹមដើមឆ្នាំ២០២៥នេះ សាលារៀនសុវណ្ណភូមិ មានអាយុកាល២៩ឆ្នាំ(ឆ្នាំ១៩៩៦-ឆ្នាំ២០២៥)មកហើយ សព្វថ្ងៃសាលារៀនសុវណ្ណភូមិ មានចំនួន៤៣ទីតាំង ហើយយើងនឹងដាក់ដំណើរការចំនួន៥ទីតាំងបន្ថែមទៀត សរុប៤៨ទីតាំង និងពង្រីកការសាងសង់អគារសាលារៀនសុវណ្ណភូមិ ចំនួន៣ទីតាំងបន្ថែមទៀត សរុបមានចំនួន៥១ទីតាំង នេះជាសមិទ្ធផលរួមក្នុងឆ្នាំ២០២៥នេះ។ ជាក់ស្តែងយើងមានបុគ្គលិកបម្រើការងារក្នុងស្ថាប័នអប់រំ អ៊ិន ធី ស៊ី គ្រុប ចំនួនជាង៤០០០នាក់ និងសិស្សានុសិស្ស ក្នុងកំពុងសិក្សា មានចំនួនជាង៦០០០០នាក់។នាឱកាសនោះលោកឧកញ៉ា ជា ធីឡា សូមចូលរួមអបអរជាអនេកប្បការ និងកោតសរសើរចំពោះ លោកប្រធាននាយកប្រតិបត្តិ ថ្នាក់ដឹកនាំគ្រប់លំដាប់ថ្នាក់ លោកគ្រូ-អ្នកគ្រូបុគ្គលិកគ្រប់ផ្នែក និងគ្រប់សេវាកម្មទាំងអស់ ដែលបានខិតខំប្រឹងប្រែងទាំងកម្លាំងកាយ កម្លាំងចិត្ត និងប្រាជ្ញា ស្មារតី និងមានទំនួលខុសត្រូវខ្ពស់ ចំពោះការងាររបស់ខ្លួនសម្រេចបានតាមផែនការដែលបានកំណត់ បង្កើតបាននូវសមិទ្ធផលជាច្រើនគួរជាទីមោទកភាព និងនូវតែបន្តជាស្ថាប័នអប់រំ ឯកជនឈានមុខគេ ក្នុងការផ្តល់សេវាអប់រំដល់សិស្សប្រកបដោយគុណភាពខ្ពស់ នៅក្នុងព្រះរាជាណាចក្រកម្ពុជា។ ផែនការការងារបន្តសម្រាប់ឆ្នាំ២០២៥ របស់យើងទាំងអស់ ពិតជាមានល្អិតល្អន់ និងចាំបាច់ក្នុងការអភិវឌ្ឍជាបន្តទៀត ដើម្បីលើកកម្ពស់គុណភាពអប់រំ និងជំរុញស្ថាប័ន យើងឆ្ពោះទៅរកឧត្តមភាពនៃវិស័យអប់រំ ដោយស្របទៅនឹងគោលនយោបាយអប់រំជាតិរបស់ក្រសួង អប់រំ យុវជន និងកីឡា។ ជាចុងក្រោយលោកឧកញ៉ា ជា ធីឡាយ បានសង្កត់ធ្ងន់ថា ពិតណាស់ វិស័យអប់រំមានតួនាទីយ៉ាងសំខាន់ ក្នុងការចូលរួមចំណែកដល់ការអភិវឌ្ឍជាតិ។ កុមារគ្រប់រូប ត្រូវទទួលបានការសិក្សា និងការអប់រំពេញលេញមួយទៅតាមចំណង់ចំណូលចិត្តរបស់ពួកគាត់ម្នាក់ៗ និងតម្រូវការទីផ្សារការងារបច្ចុប្បន្ន និងអនាគត។ ជាងនេះទៅទៀត ការអប់រំមិនត្រឹមតែផ្តោតទៅលើចំណេះដឹងតាមមុខវិជ្ជាក្នុងសៀវភៅសិក្សា គោលតែមួយមុខនោះទេ ត្រូវមានការយកចិត្តទុកដាក់ខ្ពស់ក្នុងការអប់រំឥរិយាបថសិស្សផងដែរ។ យើងដឹងហើយថា “ចំណេះដឹងគឺសំខាន់ ប៉ុន្តែឥរិយាបថសំខាន់ជាងនេះទៅទៀត ដើម្បីរស់នៅ និងធ្វើការងារប្រកបដោយសុខដុមរមនា”។ ដើម្បីសម្រេចបានគោលដៅទាំងនោះយើង ត្រូវបន្តការអភិវឌ្ឍវិជា្ជជីវៈជាប្រចាំ ទៅតាមតួនាទី និងភារកិច្ចរៀងៗខ្លួន ក្នុងការឆ្លើយតបទៅនឹងតម្រូវការរបស់សិស្សានុសិស្ស មាតាបិតា អ្នកអាណាព្យាបាលសិស្ស និងសង្គមជាតិទាំងមូល។សូមបញ្ជាក់ផងដែរថា បុត្រសម្ព័ន្ធស្ថាប័នអប់រំ អ៊ិន ធី ស៊ី គ្រុប មានចំនួន៥ ដូចជា៖ សាលាកុមារប៉ាស៊ីហ្វិក, សាលាអន្តរជាតិ អាមេរិកាំងប៉ាស៊ីហ្វិក, សាលាសុវណ្ណភូមិ, សាលាអ៊ិស វ៉េស និង NTC Exam Centre៕ អត្ថបទ រដ្ឋា

ឃាត់ខ្លួនជនសង្ស័យម្នាក់ករណីរឹតក.ប្លន់យករថយន្ដនៅខេត្តត្បូងឃ្មុំ

កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ ស្រាវជ្រាវបង្ក្រាបករណីរឹតក.ប្លន់យករថយន្ដនៅស្រុកពញាក្រែក ខេត្តត្បូងឃ្មុំ ជនដៃដល់ត្រូវបានចាប់ខ្លួននៅខណ្ឌកំបូល រាជធានីភ្នំពេញ។នគរបាលប្រាប់ឲ្យដឹងថា កាលពីថ្ងៃទី២១ ខែមករា ឆ្នាំ២០២៥ វេលាម៉ោង២១ និង៥៥នាទី នៅចំណុចភូមិអន្លង់ជ្រៃឃុំកក់ ស្រុកពញាក្រែក ខេត្តត្បូងឃ្មុំ មានជនមិនស្គាល់អត្តសញ្ញាណម្នាក់ ភេទប្រុស បានធ្វើសកម្មភាពយកខ្សែភ្លើងរឹតក និងវាយជនរងគ្រោះឈ្មោះ មាស មករា ភេទប្រុស អាយុ៣២ឆ្នាំ ជនជាតិខ្មែរ ជាអ្នករត់តាក់ស៊ី ដើម្បីប្លន់យករថយន្ត ០១គ្រឿង ម៉ាក TOYOTA PRUIS ពណ៍ខ្មៅ ពាក់ផ្លាកលេខ ភ្នំពេញ 2BH-1033 បានសម្រេច រួចយកទៅផ្លុងចោល ។នគរបាលបន្តថា ក្រោយពីទទួលបានព័ត៌មានលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន បានដឹកនាំកម្លាំងសហការជាមួយកម្លាំងជំនាញ នៃស្នងការដ្ឋានគរបាលខេត្តត្បូងឃ្មុំ ស្នងការដ្ឋាននគរបាលខេត្តព្រៃវែង និងអធិការដ្ឋាននគរបាលខណ្ឌកំបូល ធ្វើការស្រាវជ្រាវតាមនីតិវិធីយ៉ាងយកចិត្តទុកដាក់ រហូតដល់ថ្ងៃទី២៤ ខែមករា ឆ្នាំ២០២៥ វេលាម៉ោង២៣ និង១០នាទី កម្លាំងជំនាញបានឃាត់ខ្លួនជនសង្ស័យឈ្មោះ ស៊ុយ ដុល្លា ភេទប្រុស អាយុ២៨ឆ្នាំ ជនជាតិខ្មែរ នៅចំណុចមុខតំបន់សេដ្ឋកិច្ចពិសេសកំបូល ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ។ ចំពោះជនសង្ស័យសមត្ថកិច្ចកំពុងឃាត់ខ្លួនបណ្តោះអាសន្ននៅនាយកដ្ឋាននគរបាលព្រហ្មទណ្ឌ ដើម្បីបន្តនីតិវិធីតាមច្បាប់៕ តារាវុទ្ធី

សម្តេចធិបតី៖ ប្រព័ន្ធធារាសាស្ត្រទំនប់កំពង់គោមានសក្តានុពលស្រោចស្រពលើផ្ទៃដីបង្កបង្កើនផលប្រមាណ ៣ម៉ឺនហិកតា

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានឲ្យដឹងថា គម្រោងសាងសង់ប្រព័ន្ធធារាសាស្ត្រទំនប់កំពង់គោ ដែលគ្របដណ្ដប់ក្នុងក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់នោះ មានសក្តានុពលស្រោចស្រពលើផ្ទៃដីបង្កបង្កើនផលប្រមាណបីម៉ឺនហិកតា ខណៈគម្រោងនេះកំពុងសាងសង់បានប្រមាណ១០ភាគរយហើយ នោះ។ តាមរយៈឆាណែលតេលេក្រាមនារសៀលថ្ងៃទី២៥ ខែមករា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានបានលើកឡើងថា គម្រោងសាងសង់ប្រព័ន្ធធារាសាស្ត្រទំនប់កំពង់គោ នៅផ្នែកខាងក្រោមតាមបណ្តោយស្ទឹងសែន ស្ថិតនៅក្នុងភូមិកំពង់គោលើ ឃុំកំពង់គោ ស្រុកកំពង់ស្វាយ ខេត្តកំពង់ធំ បច្ចុប្បន្នសាងសង់បានប្រមាណ ១០% ហើយ ដោយក្នុងនោះរួមមាន ចាក់បាតធ្វើគ្រឹះ និងចងដែកមុខកប៉ាល់របស់តួសំណង់បានប្រវែងចំនួន ១៥០ម៉ែត្រ និងកំពុងទប់ទឹកស្ទឹងបន្តធ្វើគ្រឹះទៅម្ខាងទៀតផ្នែកខាងឆ្វេងរបស់ស្ទឹងសែនក្នុងប្រវែង ១៥០ ម៉ែត្រទៀតដែលក្នុងរង្វង់រយៈពេល១ខែទៀតនឹងធ្វើគ្រឹះរបស់តួសំណង់ទាំងមូល។ សម្តេចធិបតី នាយករដ្ឋមន្រ្តីបានបញ្ជាក់ថា«គម្រោងសាងសង់ប្រព័ន្ធធារាសាស្ត្រទំនប់កំពង់គោនេះ គ្របដណ្ដប់ក្នុងក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់ និងមានសក្តានុពលស្រោចស្រពលើផ្ទៃដីបង្កបង្កើនផល ប្រមាណ ៣០០ ០០០ ហិកតា រួមមានដំណាំស្រូវ និងដំណាំរួមផ្សំគ្រប់ប្រភេទ ព្រមទាំងបម្រើដល់ការប្រើប្រាស់ក្នុងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ»។សូមបញ្ជាក់ថាការងារសំខាន់ៗ នៃគម្រោងសាងសង់ប្រព័ន្ធធារាសាស្ត្រទំនប់កំពង់គោ រួមមាន សំណង់កាត់ស្ទឹងសែនប្រវែង២៨០ម៉ែត្រ សំណង់សិល្បការ្យតូចធំចំនួន ១២០កន្លែង ស្តារស្ទឹងស្លាប់ ២៥គីឡូម៉ែត្រ សាងសង់ទំនប់សណ្តស្ទឹងសែន ៣០គីឡូម៉ែត្រ និងរៀបថ្មជើងទេរច្រាំងស្ទឹង ៥គីឡូម៉ែត្រ៕ អត្ថបទ៖ បាន ចក់

អបអរសាទរ!! កម្ពុជាទទួលបានពានរង្វាន់ស្ដង់ដាទេសចរណ៍អាស៊ាន នៅក្នុងវេទិកា "ទេសចរណ៍អាស៊ាន លើកទី២៨" ទីក្រុងចូហូ ប្រទេសម៉ាឡេស៊ី

កាលពីល្ងាចថ្ងៃទី២០ ខែមករា ឆ្នាំ២០២៥ នៅទីក្រុងចូហូ ប្រទេសម៉ាឡេស៊ី ក្នុងពិធីបិទវេទិកាទេសចរណ៍អាស៊ានលើកទី២៨ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានប្រគល់រង្វាន់ ដល់ ជ័យលាភីកម្ពុជា ដែលទទួលបានពានរង្វាន់ស្តង់ដាទេសចរណ៍អាស៊ាន ដោយក្នុងឆ្នាំ២០២៥នេះ កម្ពុជាពិតជាមានមោទកភាពខ្ពស់ណាស់ ដែលកម្ពុជាទទួលបានពានរង្វាន់ស្តង់ដាទេសចរណ៍អាស៊ានច្រើនជាងគេ រហូតដល់ទៅចំនួន ២០ រួមមាន៖១. បង្គន់អនាម័យសាធារណៈស្តង់ដាអាស៊ានមានចំនួន៥- បង្គន់សាធារណៈ ផ្សារទំនើបអ៊ីអនម៉ល មានជ័យ រាជធានីភ្នំពេញ- បង្គន់សាធារណៈ ស្ថានីយប្រេងឥន្ធនៈ BVM ព្រែកអញ្ជាញ ខេត្តកណ្តាល- បង្គន់សាធារណៈ ស្រះស្រង់ ខេត្តសៀមរាប- បង្គន់សាធារណៈ កំពង់ផែទេសចរណ៍ ខេត្តព្រះសីហនុ- បង្គន់សាធារណៈ សួនច្បារស្តូបឈ្នះឈ្នះ ខេត្តកោះកុង២. សេវាកម្មស្ប៉ា-ម៉ាស្សាស្តង់ដាអាស៊ានមានចំនួន៥- សេវាកម្មស្ប៉ា-ម៉ាស្សា សិន អេន ស៉្បា រាជធានីភ្នំពេញ- សេវាកម្មស្ប៉ា-ម៉ាស្សា រ៉ូយ៉ាល់រេស៊ីដេន ហូថេល អេន រីហ្សត (ហាយ៉ាត់ រីជីនស៊ី ភ្នំពេញ) រាជធានីភ្នំពេញ- សេវាកម្មស្ប៉ា-ម៉ាស្សា សុខា អូតែល រីហ្សត ខេត្តព្រះសីហនុ- សេវាកម្មស្ប៉ា-ម៉ាស្សា បូឌា ស៉្បា ផ្សារចាស់ ខេត្តសៀមរាប- សេវាកម្មស្ប៉ា-ម៉ាស្សា ជម្រកស៉្បា ស្ថិតក្នុងសណ្ឋាគារហ្វាមហៅស៍ រីហ្សត និងស៉្បា ខេត្តកំពង់ឆ្នាំង៣. សហគមន៍ទេសចរណ៍ស្តង់ដាអាស៊ានមានចំនួន៥- សហគមន៍ទេសចរណ៍បាគងភូមិខ្ញុំ ខេត្តសៀមរាប- សហគមន៍ទេសចរណ៍បឹងឈូកបន្ទាយស្រី ខេត្តសៀមរាប- សហគមន៍ទេសចរណ៍បន្ទាយឆ្មារ ខេត្តបន្ទាយមានជ័យ- សហគមន៍អេកូទេសចរណ៍ផាត់សណ្តាយ ខេត្តកំពង់ធំ- សហគមន៍ទេសចរណ៍ព្រែកកោងកាង ខេត្តព្រះសីហនុ៤. ផ្ទះស្នាក់ស្តង់ដាអាស៊ានមានចំនួន៥- ផ្ទះស្នាក់សហគមន៍ទេសចរណ៍សំបូរព្រៃគុក ខេត្តកំពង់ធំ- ផ្ទះស្នាក់សហគមន៍ទេសចរណ៍ផាត់សណ្ដាយ ខេត្តកំពង់ធំ- ផ្ទះស្នាក់សហគមន៍ខ្មែរហូមស្ទេ ខេត្តកំពង់ធំ- ផ្ទះស្នាក់សហគមន៍ទេសចរណ៍ចំបក់ ខេត្តកំពង់ស្ពឺ - ផ្ទះស្នាក់សហគមន៍ទេសចរណ៍កំពង់សាមគ្គី ខេត្តកំពត។

ឯកឧត្តម ប៉ែន បូណា៖ «ប្រពៃណីបម្រើប្រជាពលរដ្ឋតជំនាន់របស់គណបក្សប្រជាជនកម្ពុជា»

«ប្រជាពលរដ្ឋជាម្ចាស់ ចំណែកឯមន្ត្រីគឺជាអ្នកបម្រើ» នេះគឺជាទស្សនវិជ្ជានៃការដឹកនាំរបស់គណបក្សប្រជាជនកម្ពុជាដែលស្របទៅនឹងរបបប្រជាធិបតេយ្យសេរីពហុបក្ស។ ទាំងសម្តេចតេជោ ហ៊ុន សែន អតីតនាយករដ្ឋមន្ត្រី ទាំងសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន សុទ្ធតែធ្លាប់បានក្រើនរម្លឹកជារឿយៗដល់មន្ត្រីគ្រប់លំដាប់ថ្នាក់ដើម្បីកុំឱ្យពួកគេភ្លេចតួនាទីជាអ្នកបម្រើប្រជាពលរដ្ឋ។ មិនត្រឹមតែក្រើនរម្លឹកមន្ត្រីក្រោមឱវាទប៉ុណ្ណោះទេ ប៉ុន្តែ អតីតប្រមុខដឹកនាំរាជរដ្ឋាភិបាលក៏ដូចជាប្រមុខដឹកនាំបច្ចុប្បន្ន សុទ្ធតែបានបង្ហាញគំរូជាអ្នកបម្រើប្រជាពលរដ្ឋយ៉ាងសកម្មក្លៀវក្លាបំផុត។ «ទីណាមានទុក្ខ មានមុខសម្តេចតេជោ» នេះគឺជាសារដ៏មានអត្ថន័យមួយឃ្លាទៀតដែលសម្តេចអតីតនាយករដ្ឋមន្ត្រីធ្លាប់បានលើកឡើងនិងបានអនុវត្តយ៉ាងខ្ជាប់ខ្ជួន។ មើលចុះ ចាប់តាំងពីការតស៊ូរំដោះជាតិដោយប្រើជីវិតរបស់ខ្លួនជាដើមទុន និងដំណើរស្វែងរកសុខសន្តិភាពជូនប្រទេសជាតិ រហូតដល់កសាងបាននូវប្រវត្តិសាស្ត្រថ្មីមួយជូនប្រទេសជាតិនិងប្រជាពលរដ្ឋខ្មែរដែលមិនធ្លាប់មានពីមុន ជីវិតសម្តេចតេជោ ហ៊ុន សែន បានផ្សារភ្ជាប់ជាមួយសុខទុក្ខរបស់ប្រជាពលរដ្ឋខ្មែរជានិច្ច មិនដែលដាច់ជាពិសេសក្នុងគ្រាលំបាក។ ជាក់ស្តែង ពេលពលរដ្ឋជួបគ្រោះអាសន្នដូចជាទឹកជំនន់ ឬជួបប្រទះគ្រោះថ្នាក់ផ្សេងៗទៀតជាយថាហេតុ សម្តេចតេជោ សម្តេចកិត្តិព្រឹទ្ធបណ្ឌិត និងមន្ត្រីពាក់ព័ន្ធតែងតែមានវត្តមានជានិច្ចដើម្បីដោះស្រាយការលំបាកជូនពួកគេ។ ក្រៅពីនោះ សម្តេចតែងឆ្លៀតពេលជួបសំណេះសំណាល សួរសុខទុក្ខ និងដោះស្រាយបញ្ហាជូនប្រជាពលរដ្ឋគ្រប់មជ្ឈដ្ឋានជាប្រចាំដោយទឹកចិត្តអាណិតស្រឡាញ់អស់ពីបេះដូង។ បច្ចុប្បន្ន សម្តេចធិបតី ហ៊ុន ម៉ាណែត និងលោកជំទាវបណ្ឌិតជាភរិយា បានបន្តប្រពៃណីដឹកនាំដ៏ល្អនេះដដែលដោយផ្សារភ្ជាប់ជាមួយសុខទុក្ខរបស់ប្រជាពលរដ្ឋជានិច្ច។ ជាក់ស្តែង ក្នុងរយៈពេលជាងមួយឆ្នាំដំបូងនៃការឡើងកាន់តំណែងជានាយករដ្ឋមន្ត្រី សម្តេចធិបតី និងភរិយា បានចំណាយពេលវេលាជួបជាមួយពលរដ្ឋនៅគ្រប់ទិសទី។ កម្មករ កសិករ អាជីវករ សិល្បករ កីឡាករ មន្ត្រីរាជការ កងកម្លាំងប្រដាប់អាវុធ សិស្ស និស្សិត លោកគ្រូអ្នកគ្រូ រួមទាំងអ្នកសារព័ត៌មានផង សុទ្ធតែធ្លាប់បានជួបជាមួយប្រមុខដឹកនាំរបស់ខ្លួនដោយផ្ទាល់ ឬបានឃើញសកម្មភាពទាំងនេះជាប្រចាំ។ ដោយទទួលបានការណែនាំ និងដោយបានឃើញគំរូរបស់ប្រមុខដឹកនាំ មន្ត្រីក្នុងជួររាជរដ្ឋាភិបាលក៏ដូចជាមន្ត្រីអាជ្ញាធរគ្រប់លំដាប់ថ្នាក់ បានខិតខំបម្រើប្រជាពលរដ្ឋយ៉ាងសកម្មបំផុត។ ជាក់ស្តែង ប៉ុន្មានថ្ងៃចុងក្រោយនេះ ពួកគេបានមូរដៃអាវ លាត់ជើងខោ ដើម្បីចុះជួយដោះស្រាយបញ្ហាជូនកសិករក៏ដូចជាបូមទឹកជូនពួកគេ ដើម្បីធ្វើស្រែប្រាំង។ ជារៀងរាល់ចុងសប្តាហ៍ ឆ្លៀតពេលទំនេរពីការងារបម្រើប្រជាពលរដ្ឋក្នុងនាមមន្ត្រីរាជរដ្ឋាភិបាល តែងចុះជាប់ជាមួយប្រជាពលរដ្ឋនៅឯមូលដ្ឋានរៀងៗខ្លួន ដើម្បីស្វែងយល់ពីការលំបាករបស់ពួកគេ និងដោះស្រាយបញ្ហាជូនពលរដ្ឋភ្លាមៗដោយមិនបង្អង់។ នេះហើយ គឺជាប្រពៃណីបម្រើប្រជាពលរដ្ឋរបស់គណបក្សប្រជាជនកម្ពុជា ដែលបន្តពីជំនាន់មួយទៅជំនាន់មួយទៀតឥតដាច់។ នេះ ក៏ជាហេតុផលដែលរាជរដ្ឋាភិបាលដឹកនាំដោយគណបក្សប្រជាជនកម្ពុជាទទួលបានទំនុកចិត្តពីប្រជាពលរដ្ឋជារៀងរហូតមក៕

មន្ទីរមុខងារសាធារណៈទូទាំងប្រទេស ជួបជុំគ្នាដើម្បីពិភាក្សាទៅលើស្ថានភាព និងទិន្នន័យមន្ត្រីសុខាភិបាលតាមមណ្ឌលសុខភាពរបស់ខេត្តនីមួយៗ

ក្នុងគោលបំណងឆ្ពោះទៅកាន់ការជ្រើសរើស និងគ្រប់គ្រងមន្ត្រីសុខាភិបាលនៃមណ្ឌលសុខភាពនៅទូទាំងប្រទេស ឱ្យបានគ្រប់ចំនួនតាមការកំណត់ជាអប្បរមា ក្រសួងមុខងារសាធារណៈ បានអញ្ជើញប្រធានមន្ទីរមុខងារសាធារណៈទូទាំងប្រទេស មកជួបជុំពិភាក្សា នៅទីស្តីការក្រសួងមុខងារសាធារណៈ។ កិច្ចប្រជុំនេះ ដឹកនាំដោយឯកឧត្តម ពេជ្រ វិជ្ជាគន្ធី អគ្គនាយកនៃអគ្គនាយកដ្ឋានគ្រប់គ្រងមុខងារសាធារណៈ នៃក្រសួងមុខងារសាធារណៈ នារសៀលថ្ងៃទី២៤ ខែមករា ឆ្នាំ២០២៥។ នៅក្នុងកិច្ចប្រជុំនេះ ប្រធានមន្ទីរមុខងារសាធារណៈរាជធានី ខេត្តទាំង២៥ បានរាយការណ៍ និងពិនិត្យផ្ទៀងផ្ទាត់ទិន្នន័យមួយចំនួន ទៅតាមស្ថានភាពតម្រូវការរួមមាន៖ ១).រាយការណ៍ចំនួនមន្ត្រីដែលកំពុងបម្រើការក្នុងមណ្ឌលសុខភាពជាក់ស្តែង ២).ផ្ទៀងផ្ទាត់ចំនួនមន្ត្រីក្របខណ្ឌក្នុងប្រព័ន្ធ និងចំនួនក្នុងស្វ័យប្រកាស ៣).ពិនិត្យទិន្នន័យតម្រូវការមន្ត្រីផ្អែកលើកិច្ចព្រមព្រៀង ដើម្បីបង្គ្រប់ចំនួនកំណត់ និង ៤).ពិនិត្យលើមុខតំណែង និងកម្រិតបណ្តុះបណ្តាលសម្រាប់ការជ្រើសរើស។ក្រោយពីបានស្តាប់ការរាយការណ៍ និងការចូលរួមមតិយោបល់ជាធាតុចូលយ៉ាងច្រើនពីប្រធានមន្ទីរទូទាំងប្រទេសរួចរាល់ ឯកឧត្តមអគ្គនាយក ប្រធានអង្គប្រជុំ បានកំណត់ការងារបន្តទៀតចំនួន៣ រួមមាន៖ ១).រៀបចំលើកបញ្ហាលើសមន្ត្រីក្នុងមណ្ឌលសុខភាព និងមណ្ឌលសុខភាពដែលមិនដំណើរការជូនថ្នាក់ដឹកនាំពិនិត្យពិភាក្សា ២).រៀបចំលិខិតណែនាំទៅរដ្ឋបាលរាជធានី ខេត្ត សុំផ្អាកការផ្ទេរមន្ត្រីសុខាភិបាល និង ៣).ស្នើឱ្យមន្ទីររៀបចំរបាយការណ៍ជាក់ស្តែងជូនរដ្ឋបាលរាជធានី ខេត្ត ជ្រាបជាដំណឹង៕

ក្រសួងមុខងារសាធារណៈ និងKOICA សហការគ្នាពង្រឹងទំនាក់ទំនងកម្ពុជា-កូរ៉េ តាមរយៈការអនុវត្តគម្រោង«ការពង្រឹងសមត្ថភាពរបស់សាលាភូមិន្ទរដ្ឋបាលសម្រាប់ការធ្វើកំណែទម្រង់ និងការពង្រឹងអភិបាលកិច្ចនៃប្រទេសកម្ពុជា»

នារសៀលថ្ងៃទី២៤ ខែមករា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានទទួលជួបជាមួយប្រតិភូទីភ្នាក់ងារសហប្រតិបត្តិការអន្តរជាតិកូរ៉េប្រចាំកម្ពុជា (KOICA) ដឹកនាំដោយលោកស្រី ស៊ីន ជុងយ៉ុង នាយិកាស្តីទី ទីភ្នាក់ងារសហប្រតិបត្តិការកូរ៉េប្រចាំកម្ពុជា (KOICA) ក្នុងគោលបំណង ពិភាក្សាការងារលើគម្រោងស្តីពី«ការពង្រឹងសមត្ថភាពរបស់សាលាភូមិន្ទរដ្ឋបាលសម្រាប់ការធ្វើកំណែទម្រង់ និងការពង្រឹងអភិបាលកិច្ចនៃប្រទេសកម្ពុជា»។កិច្ចប្រជុំនេះបានចាប់ផ្ដើមដោយមតិស្វាគមន៍ដ៏ខ្ពង់ខ្ពស់ពី ឯកឧត្ដមឧបនាយករដ្ឋមន្រ្តី បានលើកឡើងពីវិធានការគន្លឹះសំខាន់ៗនៃកំណែទម្រង់រដ្ឋបាលសាធារណៈរបស់រាជរដ្ឋាភិបាលកម្ពុជា រួមមាន៖ ការអនុវត្តប្រព័ន្ធជ្រើសរើសមន្ត្រីរាជការ ការកសាងសមត្ថភាពស្ថាប័ន និងប្រព័ន្ធលើកទឹកចិត្ត។ បន្ទាប់មកទៀត លោកស្រីនាយិកាស្តីទី (KOICA) បានធ្វើមតិដោយសង្ខេបអំពីកិច្ចសហប្រតិបត្តិការរវាងស្ថាប័នទាំងពីរ ក្នុងនោះដែរលោកស្រីរំលេចអំពីសកម្មភាពសំខាន់ៗ ដែលត្រូវអនុវត្ត ដើម្បីចាប់ផ្តើមគម្រោង និងបានបញ្ជាក់ឡើងវិញនូវការប្តេជ្ញាចិត្ត ចំពោះការអភិវឌ្ឍរបស់កម្ពុជា តាមរយៈការសន្យាផ្តល់ហិរញ្ញប្បទានចំនួន ១១,៧លានដុល្លារ សម្រាប់កំណែទម្រង់អភិបាលកិច្ច ដើម្បីពង្រឹងសមត្ថភាពរបស់សាលាភូមិន្ទរដ្ឋបាល។នៅក្នុងកិច្ចប្រជុំដដែលនេះ អ្នកជំនាញការកូរ៉េ ក៏បានធ្វើបទបង្ហាញសង្ខេបអំពីលទ្ធផលនៃការចុះធ្វើទស្សនកិច្ចសិក្សាស៊ីជម្រៅ ដើម្បីឈានទៅដល់ការអនុវត្តគម្រោង។ តាមរយៈបទបង្ហាញនេះ អ្នកជំនាញការកូរ៉េ បានបង្ហាញយ៉ាងលំអិត ទៅលើកិច្ចការនីមួយៗ ដែលភាគីទាំងពីរត្រូវអនុវត្ត ផ្អែកតាមលទ្ធផលជាក់ស្តែង។ ការសិក្សាស៊ីជម្រៅដែលធ្វើឡើងពីថ្ងៃទី២០ ដល់ថ្ងៃទី២៤ ខែមករា ឆ្នាំ២០២៥ ដោយមានការចូលរួមពីក្រុមអ្នកជំនាញរបស់ KOICA និងមន្ត្រីមកពីក្រសួងមុខងារសាធារណៈ និងសាលាភូមិន្ទរដ្ឋបាលរបស់កម្ពុជា។ ក្រោយពីការបានស្តាប់ការធ្វើបទបង្ហាញរបស់អ្នកជំនាញការកូរ៉េ រួចមក ឯកឧត្តមឧបនាយករដ្ឋមន្ត្រី បានសំដែងនូវការសាទរ ចំពោះកិច្ចខិតខំប្រឹងប្រែងរបស់ស្ថាប័នទាំងពីរ ដែលបានដើរតួនាទីក្នុងនាមជាប្រតិបត្តិករក្រោមស្មារតី នៃទិសដៅរបស់ថ្នាក់ដឹកនាំនៃប្រទេសទាំងពីរ ដោយឯកភាពចំពោះទិសដៅ នៃការអនុវត្តគម្រោង ដែលកើតចេញពីលទ្ធផលនៃការសិក្សាស៊ីជម្រៅលើគម្រោង ព្រមទាំងជឿជាក់ថា កិច្ចសហប្រតិបត្តិការនៃស្ថាប័នទាំងពីរ នឹងនាំមកនូវលទ្ធផលល្អប្រសើរនាពេលឆាប់ៗខាងមុខនេះ ជាពិសេសចូលរួមលើកកម្ពស់វិស័យមុខងារសាធារណៈ និងអភិបាលកិច្ចនៅកម្ពុជាកាន់តែប្រសើរ៕