BTV NEWS

សមត្ថកិច្ចរាជធានីភ្នំពេញបង្ក្រាបទីតាំងបទល្មើសឆបោកតាមអនឡាញ២កន្លែងទៀតឃាត់ខ្លួនមនុស្សបាន១៣៣នាក់

បទបញ្ជាបោសសម្អាតការឆបោកតាមប្រព័ន្ធបច្ចេកវិទ្យា នឹងជួយទាក់ទាញអ្នកវិនិយោគកាន់តែច្រើនថែមទៀតមកកាន់កម្ពុជា

កម្ពុជា-ហ្វីលីពីន ឯកភាពបន្តពង្រឹងកិច្ចសហប្រតិបត្តិការលើវិស័យការពារជាតិ ជាពិសេសការបណ្តុះបណ្តាលធនធានមនុស្ស

មន្ត្រីរាជការក្រសួងប្រៃសណីយ៍ ចូលរួមដាំដើមកោងកាងចំនួន៥៥០ ដើម ក្រោមប្រធានបទ “ឌីជីថល ផ្សារភ្ជាប់បរិស្ថាន”

ព័ត៌មានជាតិ

សមាគមនិស្សិតបញ្ញវ័ន្តក្មេងវត្តសហការជាមួយតំណាងក្រសួងការងារចុះផ្សព្វផ្សាយពីកម្មវិធីបណ្តុះបណ្តាលជំនាញដល់ពលរដ្ឋ

ភ្នំពេញ៖ សាខាសមាគម សិស្ស និស្សិត បញ្ញវ័ន្តក្មេងវត្តខណ្ឌព្រែកព្នៅ សហការជាមួយតំណាងក្រសួងការងារ និងបណ្តុះបណ្តាលវិជ្ញាជីវៈ រៀបចំពិធីផ្សព្វផ្សាយពីកម្មវិធីបណ្តុះបណ្តាលជំនាញ វិជ្ជាជីវៈ និងបច្ចេកទេស ជូនប្រជាពលរដ្ឋ និងយុវជនចំនួនជិត៣០០នាក់ ក្នុងខណ្ឌព្រែកព្នៅ រាជធានីភ្នំពេញ។ នៅថ្ងៃទី២៦ ខែមករា ឆ្នាំ២០២៥ ឯកឧត្តម ផៃ សុខខេង បានដឹកនាំក្រុមការងារ ដែលមានការចូលរួមពីលោក ព្រះ ហុកលី តំណាងលោកបណ្ឌិត ហាន បូរិន ប្រធានសមាគម សិស្ស និស្សិត បញ្ញវ័ន្តក្មេងវត្តសាខាខណ្ឌព្រែកព្នៅ និងមានការចូលរួមពីលោក ហួរ ហួត អភិបាលរងខណ្ឌ តំណាងលោកអភិបាលខណ្ឌ និងលោក ទេព សេងហ៊ន តំណាងក្រសួងការងារ បានរៀបចំផ្សព្វផ្សាយកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១លាន៥សែននាក់ (TVET) ជូនគ្រួសារក្រីក្រចំនួនជិត៣០០គ្រួសារ ក្នុងសង្កាត់គោករកាខណ្ឌព្រែកព្នៅ។ នាឱកាសនោះ ឯកឧត្តម ផៃ សុខខេង មានប្រសាសន៍ថា ក្រោមដំបូលសុខសន្តិភាព និងការដឹកនាំក្នុងយុទ្ធសាស្រ្តបញ្ចកោណរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តី និងបន្តវេនលើសមិទ្ធផលបន្សល់ពីការដឹកនាំដ៏ឈ្លាសវៃរបស់សម្តេចតេជោ ហ៊ុន សែន អតីតនាយករដ្ឋមន្រ្តី នោះគឺបន្តយកចិត្តទុកដាក់ខ្ពស់ធ្វើយ៉ាងណាឱ្យប្រជាពលរដ្ឋទទួលបានសុខដុមនីយកម្មប្រកបដោយទៅដោយជីវភាពរស់នៅប្រសើរ។ឯកឧត្តម មានប្រសាសន៍ទៀតថា ដើម្បីសម្រេចបាននូវចក្ខុវិស័យរបស់រាជរដ្ឋាភិបាល ដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និង ចំណូលខ្ពស់ឆ្នាំ២០៥០ មានតែជំរុញការបណ្តុះបណ្តាលធនធានមនុស្សតាមរយៈកម្មវិធីការអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) ដើម្បីរួមចំណែកដល់សេដ្ឋកិច្ចជាតិ និង ស្វែងរកការងារកាន់តែប្រសើរ ។ ឯកឧត្តម ថ្លែងថា តាមរយៈកម្មវិធីនៅថ្ងៃនេះ ជាការរួមចំណែកជាមួយយុទ្ធនាការផ្សព្វផ្សាយអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល អាណត្តិទី៧ ក្នុងនោះអគ្គនាយកដ្ឋានជំនាញ មន្ទីរការងារ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ គ្រប់រាជធានី-ខេត្តបានចេញយុទ្ធនាការផ្សព្វផ្សាយអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសនៅតាមខ្នងផ្ទះប្រជាពលរដ្ឋតាមគោលដៅ ព្រមទាំងនៅតាមទីតាំងសាធារណៈតាមរយៈការចែកខិតប័ណ្ណផងដែរ។ឯកឧត្តម បញ្ជាក់ថា ការណ៍មានចំណេះជំនាញពិតប្រាកដ គឺពិតជាមានសារសំខាន់ណាស់ ពិសេសគឺការមានទំនុកចិត្តលើខ្លួនឯងក្នុងការរស់នៅក្នុងសង្គមស៊ីរីល័យបច្ចុប្បន្ន ដែលងាយស្រួលស្វែងរកការងារធ្វើ និងការបង្កើតមុខរបរ និងបង្កើតប្រាក់ចំណូលកាត់បន្ថយភាពក្រីក្រ ។ឯកឧត្តម បានបញ្ជាក់ទៀតថា វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស បាននិងកំពុងចូលរួមយ៉ាងសកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយតបតាមតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោលនយោបាយរបស់រាជរដ្ឋាភិបាល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត» និងអនុវត្តតាមអភិក្រមរបស់សម្ដេចធិបតី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឱ្យមានការងារធ្វើ”។ឯកឧត្តម បានអំពាវនាវដល់យុវជនដែលមិនទាន់បានចុះឈ្មោះចូលរៀនជំនាញវិជ្ជាជីវៈ និងបច្ចេកទេស សូមអញ្ជើញចុះឈ្មោះចូលរៀនជំនាញវិជ្ជាជីវៈ នៅវិទ្យាស្ថានដែលនៅក្បែរមូលដ្ឋានរបស់ខ្លួន និងយុវជនដែលមកពីគ្រួសារក្រីក្រ និងគ្រួសារងាយរងហានិភ័យ នៅតែទទួលការរៀនជំនាញដោយឥតគិតថ្លៃ និងថែមទាំងទទួលបានប្រាក់ឧបត្ថម្ភ។សូមជម្រាបថា ដំណើរការអនុវត្តកម្មវិធីគោលនយោបាយផ្តល់ការបណ្តុះ បណ្តាលជំនាញវិជ្ជាជីវៈ និងបច្ចេកទេសដល់យុវជន១,៥លាននាក់ ក្នុងឆ្នាំ២០២៤កន្លងទៅ គឺបានទទួលសិស្សចុះឈ្មោះចូលរៀនប្រមាណ ៨ម៉ឺន៣ពាន់នាក់ ក្នុងនោះសិស្សកំពុងសិក្សា មានចំនួន ២ម៉ឺន៨ពាន់នាក់ សិស្សបានបញ្ចប់ការសិក្សា ចំនួន១ម៉ឺន៧ពាន់នាក់ និងសិស្សទទួលបានការងារធ្វើ ចំនួនជិត១ម៉ឺននាក់៕

គណបក្សប្រជាជនកម្ពុជា ទទួលបានសំឡេងគាំទ្រច្រើនជាងគេ ក្នុងការបោះឆ្នោតជ្រើសរើសក្រុមប្រឹក្សាក្រុងកំពង់សោម

ព្រះសីហនុ៖ គណៈកម្មាធិការជាតិរៀបចំបោះឆ្នោត (គ.ជ.ប) បានបញ្ចប់ដំណើរការបោះឆ្នោតក្រុមប្រឹក្សាក្រុងកំពង់សោម ក្នុងខេត្តព្រះសីហនុ បញ្ចប់យ៉ាងរលូន និងសន្តិសុខស្ងប់ស្ងាត់ ខណៈគណបក្សនយោបាយចំនួន៤ ចុះបញ្ជីចូលរួមប្រកួតប្រជែង គឺគណបក្សប្រជាជនកម្ពុជាទទួលបានសំឡេងគាំទ្រជាងគេ។ នៅថ្ងៃទី២៦ ខែមករា ឆ្នាំ២០២៥ គណៈកម្មាធិការជាតិរៀបចំបោះឆ្នោត (គ.ជ.ប) បានដំណើរការបោះឆ្នោតជ្រើសរើសក្រុមប្រឹក្សាក្រុងកំពង់សោម ខេត្តព្រះសីហនុ ដែលមានគណបក្សនយោបាយចំនួន៤ ចូលរួមប្រកួតប្រជែងសម្រាប់មុខតំណែងក្រុមប្រឹក្សាក្រុងចំនួន១៣អាសនៈ ដោយអង្គបោះឆ្នោតមានចំនួន៣១រូប ជាសមាជិកក្រុមប្រឹក្សាឃុំក្នុងមុខតំណែង។ ក្នុងការបោះឆ្នោតជ្រើសរើសក្រុមប្រឹក្សាក្រុងកំពង់សោម ខេត្តព្រះសីហនុ មានការអញ្ជើញចុះពិនិត្យពីឯកឧត្តម ហង្ស ពុទ្ធា សមាជិក គ.ជ.ប, ភ្នាក់ងារគណបក្សនយោបាយ, អ្នកសង្កេតការណ៍ជាតិ។ បន្ទាប់ពីដំណើរការបោះឆ្នោត និងរាប់សន្លឹកឆ្នោតបានបញ្ចប់ជាមួយការទទួលយកបានពីគ្រប់ភាគីពាក់ព័ន្ធ បង្ហាញថា ក្នុងគណបក្សនយោបាយទាំង៤ ដែលចុះបញ្ជីចូលរួមប្រកួតប្រជែង រួមមាន គណបក្សប្រជាជនកម្ពុជា, គណបក្សហ៊្វុនស៊ិនប៉ិច, គណបក្សឆន្ទះខ្មែរ និងគណបក្សកម្លាំងជាតិ គឺគណបក្សប្រជាជនកម្ពុជា ទទួលបានសំឡេងគាំទ្រច្រើនជាង។ឯកឧត្តម ហង្ស ពុទ្ធា វាយតម្លៃខ្ពស់ចំពោះតួនាទី និងភារកិច្ចទាំងមន្រ្តីរៀបចំការបោះឆ្នោត អាជ្ញាធរ និង សមត្ថកិច្ច សហការគ្នាយ៉ាងល្អដើម្បីចូលរួមការពារសន្តិសុខ សុវត្ថិភាព និងសណ្តាប់ធ្នាប់ សំដៅធានាឱ្យដំណើរការបោះឆ្នោត និងអង្គបោះឆ្នោតបានចូលរួមបោះឆ្នោតប្រកបការពេញចិត្ត និងគ្មានការបង្ខិតបង្ខំ។ការបោះឆ្នោតជ្រើសរើសក្រុមប្រឹក្សាក្រុងកំពង់សោមធ្វើឡើង បន្ទាប់ពីរាជរដ្ឋាភិបាល សម្រេចកាត់ឃុំចំនួន៥ រួមមាន ឃុំបិតត្រាំង ឃុំរាម ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ ក្លាយជាភូមិសាស្រ្តក្រុងទី៣ បួករួមទាំង ក្រុងព្រះសីហនុ និងក្រុងកោះរ៉ុង។ចំពោះតួនាទី និងភារកិច្ចរបស់ក្រុមប្រឹក្សានីមួយៗ ត្រូវបង្កើត ជំរុញ និងធ្វើឱ្យមានចីរភាព ជាពិសេសក្រុមប្រឹក្សាមានតួនាទីចាត់ចែងកិច្ចការចាំបាច់នានា ដើម្បីសម្រេចនូវគោលបំណង ក្នុងការបង្កើតការជំរុញ និងការធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យ៕

ត្រឹមរសៀលនេះ ស្ថានភាពខ្យល់នៅភ្នំពេញ និងខេត្តភាគច្រើនមានគុណភាពល្អ ខណៈខេត្តសៀមរាប និងពោធិ៍សាត់បន្តនៅសន្ទស្សន៍ក្រហម

ភ្នំពេញ៖ គិតត្រឹមរសៀលម៉ោង២ ថ្ងៃទី២៦ ខែមករា ឆ្នាំ២០២៤នេះ ស្ថានភាពខ្យល់នៅរាជធានីភ្នំពេញ និងខេត្តភាគច្រើនមានគុណភាពល្អ មានតែខេត្តសៀមរាប និងពោធិ៍សាត់ប៉ុណ្ណោះដែលនៅបន្តក្នុងសន្ទស្សន៍ក្រហម ដែលមានខ្យល់ពុលខ្លាំង។ នេះបើយោងតាមសេក្ដីជូនដំណឹងរបស់ក្រសួងបរិស្ថាន។ក្រសួងបរិស្ថាន បានឱ្យដឹងថា ស្ថានភាពគុណភាពខ្យល់នៅកម្ពុជាសម្រាប់ថ្ងៃទី២៦ ខែមករា ឆ្នាំ២០២៥ ចាប់ពីម៉ោង ៧ ព្រឹក ដល់ម៉ោង ២ រសៀល ដែលមានកំហាប់ភាគល្អិតនិចលគិតជាមធ្យមស្មើនឹង ៤៨.៣៤ µg/m3 ធៀបនឹងស្តង់ដា ៥០ ug/m3 និងគិតជាសន្ទស្សន៍គុណភាពខ្យល់គឺ “ល្អ”។សេចក្ដីជូនដំណឹងរបស់ក្រសួងបញ្ជាក់ថា នៅក្នុងរបាយការណ៍ ដែលស្រង់បានតាមរយៈឧបករណ៍និងស្ថានីយត្រួតពិនិត្យគុណភាពខ្យល់ បានបង្ហាញថាសន្ទស្សន៍គុណភាពខ្យល់៖ពណ៌ខៀវ គុណភាពខ្យល់ល្អណាស់៖ មានខេត្តកំពត រាជធានីភ្នំពេញ ខេត្តរតនគិរី ខេត្តស្វាយរៀង ខេត្តកែប និងខេត្តត្បូងឃ្មុំពណ៌បៃតង គុណភាពខ្យល់ល្អ៖ មានខេត្តកំពង់ចាម ខេត្តកំពង់ឆ្នាំង ខេត្តកំពង់ស្ពឺ ខេត្តកំពង់ធំ ខេត្តកណ្តាល ខេត្តមណ្ឌលគីរី ខេត្តព្រៃវែង ខេត្តព្រះសីហនុ ខេត្តតាកែវ និងខេត្តស្ទឹងត្រែងពណ៌លឿង៖ មានខេត្តបាត់ដំបង ខេត្តប៉ៃលិន និងខេត្តឧត្តរមានជ័យពណ៌ទឹកក្រូច៖ មានខេត្តបន្ទាយមានជ័យ និងខេត្តកោះកុងពណ៌ក្រហម៖ ខេត្តពោធិ៍សាត់ និងខេត្តសៀមរាប

ត្រឹមថ្ងៃទី២៥ ខែមករានេះដំណើរការសាងសង់ស្ពានអាកាសភ្លោះ «សម្តេចមហាបវរធិបតី» សម្រេចបានប្រមាណ៤៥%ហើយ

ភ្នំពេញ៖ គិតត្រឹមថ្ងៃទី២៥ ខែមករា ឆ្នាំ២០២៥ វឌ្ឍនភាពនៃដំណើរការសាងសង់ស្ពានអាកាសភ្លោះ "សម្តេចមហាបវរធិបតី" គិតមកដល់ពេលនេះ ការដ្ឋានទាំងមូល សម្រេចបានប្រមាណ៤៥%ហើយ ដោយគ្រោងនឹងបញ្ចប់ស្ពានទី១ (មហាវិថីសម្តេច ហ៊ុន សែន ទៅព្រលានតេជោ) នៅមុនខែមេសា ឆ្នាំ២០២៥ និងបញ្ចប់គម្រោងទាំងមូលនៅខែមិថុនាឆ្នាំ២០២៥។គម្រោងសាងសង់ស្ពានអាកាសភ្លោះនេះ ស្ពានជាប្រភេទបេតុងអាមេ ( ធ្នឹមរាងអក្សរ I ) ដែលមានបណ្ដោយស្ពានសរុប ៦២២ម៉ែត្រ, បណ្ដោយតួស្ពាន ២៨១ម៉ែត្រ, ផ្លូវតភ្ជាប់ក្បាលស្ពានទៅមក ខាងមហាវិថីសម្តេចតេជោ ហ៊ុន សែន ប្រវែង ១៨០ម៉ែត្រ, ផ្លូវតភ្ជាប់ក្បាលស្ពានទៅមកខាងព្រលានយន្តហោះ អន្តរជាតិតេជោ ១៦១ម៉ែត្រ៕

អាជ្ញាធរខេត្តកណ្តាល ចុះត្រួតពិនិត្យស្ថានភាពបូមទឹកដាក់ស្រូវប្រាំងជូនពលរដ្ឋ ក្នុងភូមិសាស្ត្រស្រុកមុខកំពូល ខេត្តកណ្តាល

កណ្តាល៖ ឯកឧត្តម ខុន សេរីរដ្ឋា អភិបាលរងខេត្តកណ្តាល នាថ្ងៃទី២៦ ខែមករា ឆ្នាំ២០២៥ បានដឹកនាំមន្ទីរជំនាញចុះត្រួតពិនិត្យស្ថានភាពម៉ាស៊ីនបូមទឹកចំនួន ២ទីតាំងដែលឧបត្ថម្ភដោយមន្ទីរធនធានទឹក និងឧត្តុនិយមខេត្ត កណ្តាលសម្រាប់ស្រោចស្រព ដំណាំស្រូវប្រាំងរបស់ប្រជាពលរដ្ឋក្នុងស្រុកមុខកំពូល ចំនួន២ឃុំ ស្មើនឹង៤៨០ហិតារួមមាន៖ ទីតាំងរកាកោងទី១ មានចំនួន១៨០ ហិតា ស្ថិតនៅចំណុចបឹងត្រាំសសរ ទីតាំងរកាកោងទី២ ស្ថិតនៅចំណុចព្រែកគោហ៊េ មានចំនួន ៣០០ហិតា។ ក្នុងឱកាសនោះឯកឧត្តម ខុន សេរីរដ្ឋា បានថ្លែងអំណរគុណដល់អាជ្ញាធរមូលដ្ឋាន និងមន្ត្រីជំនាញពាក់ព័ន្ធទាំងអស់ដែលបានយកចិត្តទុកដាក់អស់លទ្ធភាពក្នុងការដោះស្រាយបញ្ហាប្រឈមខ្វះខាតទឹកដល់ប្រជាកសិករ។ឯកឧត្តមបានណែនាំឱ្យអាជ្ញាធរ និងមន្ទីរជំនាញពាក់ព័ន្ធ ខិតខំរកដំណោះ ស្រាយទឹកជួយសង្គ្រោះដំណាំស្រូវរបស់ប្រជាកសិករឱ្យអស់លទ្ធភាពនឹងត្រូវគិតគូរចាំបាច់បំផុតលើការរក្សាទឹកទុកព្រោះរដូវប្រាំងឆ្នាំនេះអាចអូសបន្លាយរយៈពេលវែង។ ឯកឧត្តម អភិបាលរងខេត្ត បានស្នើដល់អាជ្ញាធរស្រុកឃុំ ណែនាំដល់ប្រជាកសិករ ត្រូវផ្អាកការបង្កបង្កើនផលដំណាំស្រូវលើកទី២ បន្ទាប់ពីបងប្អូនប្រមូលផលរួចរាល់ព្រោះខណៈនាពេលខាងមុខ អាចនឹងប្រឈមនឹងបញ្ហាខ្វះខាតទឹក។ ឯកឧត្តម បានថ្លែងទៀតថា ការធ្វើស្រែ ត្រូវការស្រូវពូជ និងទឹក បើមានស្រូវពូជខ្វះទឹក ឬមានតែទឹកខ្វះស្រូវពូជ ក៏យើងមិនអាចដំណើរការទៅបានដែរ នេះជាគោលនយោបាយមួយ របស់រាជរដ្ឋាភិបាល ក៏ដូចជាការអនុវត្តតួនាទីភារកិច្ចនៅរដ្ឋបាលថ្នាក់ក្រោមជាតិ ក្នុងនាមជាអ្នកបម្រើរាស្ត្រ មិនត្រូវសម្ងំស្ងៀម ពេលប្រជាពលរដ្ឋជួបបញ្ហានោះឡើយ។ ឯកឧត្តម ក៏សូមកោតសរសើរ ចំពោះបងប្អូនប្រជាកសិករទាំងអស់ ដែលខិតខំប្រឹងប្រែងយ៉ាងសស្រាក់ស្រាំ ក្នុងការធ្វើស្រែប្រាំងស្ទើរតែគ្មានដីទំនេរ។ទាំងនេះក៏អាស្រ័យដោយប្រទេសជាតិមានសុខសន្តិភាព ក្រោមការដឹកនាំដ៏ត្រឹមត្រូវ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ៕

ក្រុមការងារអន្តរាគមន៍ចុះបូមទឹកជួយសង្គ្រោះស្រូវប្រាំងរបស់ប្រជាពលរដ្ឋស្រុកចំនួន៤ ក្នុងភូមិសាស្ត្រខេត្តកំពង់ធំ

ភ្នំពេញ៖ នៅថ្ងៃអាទិត្យ ទី២៦ ខែមករា ឆ្នាំ២០២៥នេះ ក្រុមការងារអន្តរាគមន៍ក្រសួង និងមន្ទីរធនធានទឹក និងឧតុនិយមខេត្តកំពង់ធំ បានបន្តរាយការណ៍ពីលទ្ធផលការងារបូមទឹកជួយសង្រ្គោះស្រូវប្រាំងរបស់ប្រជាពលរដ្ឋក្នុងស្រុកចំនួន៤គឺ ស្រុកកំពង់ស្វាយ ស្រុកសន្ទុក ស្រុកតាំងគោក និងស្រុកស្ទោង ខេត្តកំពង់ធំ។សូមជម្រាបថា ក្រុមការងារអន្តរាគមន៍បានប្រើប្រាស់ម៉ាស៊ីនបូមទឹកចំនួន ៨គ្រឿង ដោយធ្វើការបូមទឹកពីប្រភពបឹងបន្ទះជៀល អាងទឹកស្ទឹងជីនិត ប្រឡាយមេស្ទឹងជីនិត ស្ទឹងស្ទោង និងបូមបន្តចូលប្រឡាយរង ដើម្បីជួយសង្គ្រោះស្រូវរដូវប្រាំងប្រមាណ ១៧៤៩ ហិកតា នៅតាមបណ្តាឃុំ ក្នុងស្រុកចំនួន៤ នៃខេត្តកំពង់ធំ ក្នុងនោះ ទី១)ឃុំសាន់គ ស្រុកកំពង់ស្វាយចំនួន ១០០០ហិកតា ទី២)ឃុំកំពង់ថ្ម ស្រុកសន្ទុក ១៦០ហិកតា ទី៣)ឃុំទ្រៀល ស្រុកតាំងគោកចំនួន ២០៤ហិកតា និងទី៤)ឃុំបន្ទាយស្ទោង ស្រុកស្ទោងចំនួន ៣៨៥ហិកតា។ជាលទ្ធផល គិតត្រឹមថ្ងៃទី២៦ ខែមករា ឆ្នាំ២០២៥នេះ ក្រុមការងារបានអន្តរាគមន៍បូមទឹកជួយសង្គ្រោះស្រូវប្រាំងបានចំនួន ៧៧៨ហិកតា ក្នុងនោះ ឃុំសាន់គបានចំនួន ៣៦៧ហិកតា ឃុំកំពង់ថ្មបាន ១៥០ហិកតា ឃុំទ្រៀលបាន ១៤៦ហិកតា និងឃុំបន្ទាយស្ទោងបាន ១១៥ហិកតា។សូមបញ្ជាក់ថា ក្រុមការងារអន្តរាគមន៍ក្រសួង និងមន្ទីរធនធានទឹក និងឧតុនិយមខេត្តកំពង់ធំ កំពុងបន្តបូមទឹកជួយសង្រ្គោះស្រូវប្រាំងរបស់បងប្អូនប្រជាពលរដ្ឋក្នុងភូមិសាស្ត្រខាងលើ ដោយយកការចិត្តទុកដាក់បំផុត៕

អគ្គីភ័យឆាប់ឆេះផ្ទះលក់គ្រឿងបន្លាស់រថយន្តយីហោ "99" បណ្ដាលឲ្យរងការខូចខាតសម្ភារៈមួយចំនួន

ភ្នំពេញ៖ ផ្ទះលក់គ្រឿងបន្លាស់រថយន្តមួយកន្លែងយីហោ ៩៩ ត្រូវបានអគ្គីភ័យឆាប់ឆេះ បណ្ដាលឲ្យសម្ភារៈមួយចំនួនរងការខូចខាត តែសំណាងល្អមិនបណ្ដាលឲ្យរាលដាលដល់ផ្ទះជិតខាងឡើយ។ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង១០និង៤០នាទីព្រឹកថ្ងៃទី ២៦ខែមករា ឆ្នាំ២០២៥ ស្ថិតនៅតាមផ្លូវលេខ២២៣ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ។ តាមប្រភពព័ត៌មាន បានឲ្យដឹងថា នៅមុនពេលកើតហេតុគេឃើញភ្លើងបានឆាប់ចេះចេញពីជាន់ទី១ ផ្នែកខាងក្រោយ នៃផ្ទះលក់គ្រឿងបន្លាស់រថយន្តយីហោ៩៩ បង្កឲ្យមានការភ្ញាក់ផ្អើលដល់ប្រជាពលរដ្ឋនាំគ្នាជួយអន្តរាគមន៍បាញ់ពន្លត់ និងទាក់ទងរថយន្តពន្លត់អគ្គីភ័យជាច្រើនគ្រឿងទៅអន្តរាគមន៍បាញ់ទឹកពន្លត់។តាមនគរបាលមូលដ្ឋាន បានអោយដឹងថា អគ្គីភ័យនេះ បណ្ដាលហើយសម្ភារៈមួយចំនួននៅជាន់ទី១ បានរងការខួចខាត ទោះបីជាយ៉ាងណាពុំបណ្ដាឲ្យឆេះរាលដាលធ្ងន់ធ្ងរឡើយ។ ទាក់ទិននឹងការកើតមានអគ្គីភ័យនេះ គេសង្ស័យថា បណ្ដាលមកពីឆ្លងចរន្តអគ្គិសនី៕ អត្ថបទ៖ កុម្ភៈ

នៅក្នុងសន្និបាតថ្ងៃទី២នេះ គណបក្សប្រជាជនកម្ពុជា បានសម្រេចបញ្ចូលឥស្សរជន៤រូបទៀត ជាសមាជិកគណៈកម្មាធិការអចិន្ត្រៃយ៍ របស់គណបក្សប្រជាជន

ការសម្រេចបានបញ្ចូលសមាជិកចិន្រ្តៃយ៍ថ្មីបន្ថែមនេះ បានធ្វើឡើង នៅក្នុងសន្និបាតគណៈកម្មាធិការកណ្តាល គណបក្សប្រជាជនកម្ពុជា នាថ្ងៃទី២៦ ខែមករា ឆ្នាំ២០២៥នេះ ក្រោមអធិបតីភាពសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា អមដោយអនុប្រធានទាំង៥រូប និងមានសមាជិកគណៈកម្មាធិការកណ្តាលចូលរួម ១១៩១រូប។ឥស្សរជន៤រូបដែលត្រូវបានបញ្ចូលជាសមាជិកអចិន្រ្តៃយ៍នាពេលនេះរួមមាន៖១៖ សម្តេចមហាមន្ត្រី គុយ សុផល ដែលបច្ចុប្បន្នជាឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង២៖ លោក ធន វឌ្ឍនា អនុប្រធានទី២ នៃរដ្ឋសភា៣៖ លោក ម៉ម សារិន ប្រធានខុទ្ទកាល័យគណបក្សប្រជាជនកម្ពុជា ៤៖ លោក តាក់ ស៊ុនអី ប្រធានគណៈឃោសនាអប់រំ នៃគណៈកម្មាធិការកណ្តាលគណបក្សប្រជាជនកម្ពុជា ។សូមជម្រាបថា រហូតដល់ពេលនេះ គណបក្សប្រជាជនកម្ពុជា មានសមាជិកអចិន្រ្តៃយ៍នៃគណៈកម្មាធិការកណ្តាលសរុបចំនួន៦២រូប និងមានសមាជិកគណៈកម្មាធិការកណ្តាលឍ ១៣១២រូប៕

ពលរដ្ឋខ្មែរកាត់ខ្សែស្រឡាយចិន ចាប់ផ្តើមនាំគ្នាទិញដើមផ្កាអង្គារសីល ដែលជាជំនឿហុងស៊ុយរបស់ពួកគាត់

នៅថ្ងៃទី២៥ មករាឆ្នាំ២០២៥នេះ ប្រជាពលរដ្ឋខ្មែរកាត់ខ្សែស្រឡាយចិនជាច្រើនរូប រស់នៅក្នុងក្រុងសំរោង ខេត្តឧត្តរមានជ័យ ដែលមានជំនឿកាត់ឆុង ចាប់ផ្តើមនាំគ្នាទិញផ្កាអង្គារសីល ដើម្បីដាក់តាំងលម្អរសោភ័ណភាព ក្នុងគេហដ្ឋាន ដើម្បីអបអរពិធីបុណ្សចូលឆ្នាំថ្មីប្រពៃណីចិន ដែលនឹងខិតជិតមកដល់ នាពេលខាងមុខដ៏ខ្លីនេះ។ប្រជាពលរដ្ឋខ្មែរកាត់ខ្សែស្រឡាយចិន មួយរូប បានរៀបរាប់ថា សម្រាប់រូបគាត់ក៏ដូចជាពលរដ្ឋខ្មែរកាត់ខ្សែស្រឡាយចិនដទៃទៀតនោះ បានចាត់ទុកថា ផ្កាអង្គារសីលគឺជាវត្ថុហុងស៊ុយដ៏មានតម្លៃសម្រាប់យកមកដាក់តាំងលម្អរឲ្យមានសោភ័ណភាពក្នុងគេហដ្ឋាន ដើម្បីនាំលាភសំណាងជូនដល់ក្រុមគ្រួសាររបស់ពួកគាត់ ក្នុងឱកាសអបអរពិធីបុណ្សចូលឆ្នាំថ្មីប្រពៃណីចិន។ពលរដ្ឋខ្មែរកាត់ខ្សែស្រឡាយចិនរូបនេះ បានបន្តទៀតថា ក្នុងរដូវកាលពិធីបុណ្សចូលឆ្នាំថ្មីប្រពៃណីចិនម្តងៗ ភាគច្រើនពលរដ្ឋខ្មែរដែលបានកាត់ខ្សែស្រឡាយចិនតែងតែនាំគ្នាគោរពប្រតិបត្តិទៅតាមប្រពៃណីសាសនារបស់គេរៀងៗខ្លួនទៅតាមតំបន់ផ្សេងៗគ្នា លើអបីជំនឿផងដែរ៕

ក្រុមប្រឹក្សាគណៈវិស្វករកម្ពុជា ប្រជុំបូកសរុបការងារឆ្នាំ២០២៤ និងលើកទិសដៅការងារបន្ត ឆ្នាំ២០២៥

ក្រុមប្រឹក្សាគណៈវិស្វករកម្ពុជា នារសៀលថ្ងៃទី២៤ ខែមករានេះ បានរៀបចំកិច្ចប្រជុំបូកសរុបសកម្មភាពការងាររបស់គណៈវិស្វករកម្ពុជា ឆ្នាំ២០២៤ និងលើកទិសដៅការងារបន្ត ឆ្នាំ២០២៥ ក្រោមអធិបតីភាព ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាគណៈវិស្វករកម្ពុជា។ ក្នុងកិច្ចប្រជុំ ឯកឧត្តមរដ្ឋមន្រ្តី បានកោតសរសើរ និងវាយតម្លៃខ្ពស់ដល់គណៈវិស្វករកម្ពុជា ដែលបានខិតខំបំពេញភារកិច្ចរបស់ខ្លួនក្នុងរយៈពេលមួយឆ្នាំកន្លងមកនេះ ប្រកបដោយផ្លែផ្កា និងមានប្រសិទ្ធភាពក្នុងការបណ្តុះបណ្តាល ការចុះបញ្ជី និងការផ្សព្វផ្សាយតាមក្រសួង ស្ថាប័ន និងរាជធានី ខេត្ត។ គិតត្រឹមឆ្នាំ២០២៤ មានវិស្វករដែលបានចុះបញ្ជីនៅគណៈវិស្វករកម្ពុជាសរុបចំនួនជាង ៨,០០០នាក់ ក្នុងនោះវិស្វករបរទេស ចំនួន ១១៧នាក់។ ដើម្បីបង្កើនប្រសិទ្ធភាព និងប្រសិទ្ធផលនៃក្រុមប្រឹក្សាគណៈវិស្វករកម្ពុជា ឯកឧត្តម ហេង សួរ បានផ្ដល់នូវអនុសាសន៍សម្រាប់សមាជិក សមាជិកា ក្រុមប្រឹក្សាគណៈវិស្វករកម្ពុជា ដូចជា៖ ត្រូវជួយសម្រួលនិងបង្កលក្ខណៈងាយស្រួលជូនថ្នាក់ដឹកនាំដែលមានបទពិសោធន៍ជំនាញ វិស្វកម្ម ចូលរួមវាយតម្លៃសម្បទាវិជ្ជាជីវៈវិស្វកម្មដល់បេក្ខជនវិស្វករអាជីពជាតិ វិស្វករអាស៊ាន និងវិស្វករអាជីពឆ្នើមអាស៊ាន និងជួយជំរុញឱ្យមន្ដ្រី បុគ្គលិកក្រោមឱវាទ ឬពាក់ព័ន្ធការងារវិស្វកម្មក្នុងវិស័យរបស់ខ្លួនដែលជាវិស្វករ មកចុះបញ្ជីនៅគណៈវិស្វករកម្ពុជា, ជួយគាំទ្រនូវធនធានបច្ចេកទេសដល់ការងារបណ្តុះបណ្តាលបង្កើនសមត្ថភាពប្រតិបត្តិវិជ្ជាជីវៈ ដល់វិស្វករចុះបញ្ជីនៅគណៈវិស្វករកម្ពុជាឱ្យស្របទៅតាមការវិវត្តនៃបច្ចេកវិទ្យានាពេលបច្ចុប្បន្ន និងអនាគត។ និងចូលរួមសហការក្នុងទំនាក់ទំនងអន្តរជាតិ ជាមួយនឹងស្ថាប័នវិស្វកម្មអាស៊ាន, គណៈកម្មការសម្របសម្រួលអាជីពឆ្នើមអាស៊ាន និងស្ថាប័នសហព័ន្ធវិស្វកម្មអាស៊ី និងប៉ាស៊ីហ្វិក ដើម្បីសម្រួលចល័តភាពសេវាវិស្វកម្មក្នុងតំបន់។ ទន្ទឹមនេះ ឯកឧត្តមរដ្ឋមន្រ្តី ក៏បានផ្ដល់នូវអនុសាសន៍សម្រាប់អគ្គលេខាធិការដ្ឋានគណៈវិស្វករកម្ពុជាផងដែរដូចជា៖ ត្រូវយកចិត្តទុកដាក់អនុវត្តតួនាទីភារៈកិច្ចរបស់ខ្លួន ដូចជាការត្រួតពិនិត្យ វាយតម្លៃ ចុះបញ្ជី និងផ្តល់គោរមងារជាវិស្វករអាជីពជាតិ វិស្វករអាស៊ាន និងវិស្វករអាជីពឆ្នើមអាស៊ាន ប្រកបដោយគុណវុឌ្ឍិ ពិសេសគឺការនាំយកនូវជំនាញ និងបទពិសោធន៍ល្អៗ ផ្តល់ជូនដល់វិស្វករចុះបញ្ជីក្នុងការបង្កើនសមត្ថភាពប្រតិបត្តិវិជ្ជាជីវៈ ឱ្យកាន់តែប្រសើរស្របតាមតម្រូវការនៃការអនុវត្តសង្គមជាដើម៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

នាយករដ្ឋមន្ត្រីបារាំង ប្រឹងប្រែងបន្ទន់ជំហរប្រឆាំង ចំពោះច្បាប់ថវិការបស់លោក ដើម្បីបញ្ចៀសវិបត្តិថ្មី

អ៊ីរ៉ង់៖ ប្រទេសអឺរ៉ុបគ្មានមូលដ្ឋានសីលធម៌ និងផ្លូវច្បាប់ ដើម្បីអនុវត្តទណ្ឌកម្មមានឡើងវិញភ្លាមៗ

វិមានក្រឹមឡាំង ប្រាប់ថា រុស្ស៊ីបានបង្កើតអភ័យឯកសិទ្ធិជាក់លាក់ បន្ទាប់ពី EU ចេញទណ្ឌកម្មថ្មី

លោក Zelenskyy៖ លោកបានពិភាក្សាអំពីការផ្គត់ផ្គង់មីស៊ីល និងការបណ្តុះបណ្តាលអ្នកបើកយន្តហោះជាមួយលោក Macron

ប្រធានការិយាល័យសិទ្ធិមនុស្ស UN ជំរុញឲ្យមានការទទួលខុសត្រូវ ចំពោះការសម្លាប់ នៅទីក្រុង Sweida របស់ស៊ីរី

រុស្ស៊ីចាប់ខ្លួនស្ត្រីសញ្ជាតិអាមេរិក-រុស្ស៊ី នៅអាកាសយានដ្ឋាន ពីបទរត់ពន្ធកាំភ្លើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877