BTV NEWS

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឧបត្ថម្ភកុមារា២នាក់ដែលឱពុកជាប់បំពេញកាតព្វកិច្ចជូនជាតិ

TOP STORY | សម្តេចតេជោប្រកាសមិនចូលរួមប្រជុំព្រឹទ្ធសភាថ្ងៃស្អែកទេដោយជាប់រវល់ប្រចាំការរួមបញ្ជាកងទ័ព២៤ម៉ោងលើ២៤ម៉ោងក្រោយថៃរៀបចំផែនការវាយប្រហារកម្ពុជា

BREAKING NEWS ÷ ក្រសួងការពារជាតិកម្ពុជា៖កងទ័ពថៃគ្រោងនឹងបើកការវាយលុកតាមបណ្តោយព្រំដែនជាមួយកម្ពុជាឆាប់ៗនេះ

លោកជំទាវ ហ៊ុន ម៉ាណា អញ្ជើញនាំយកទេយ្យវត្ថុប្រគេនព្រះសង្ឃនៅវត្តគោកត្របែក ក្នុងខេត្តកំពង់ធំ និងចែកអំណោយជូនប្រជាពលរដ្ឋ៣៤៩គ្រួសារ

ព័ត៌មានជាតិ

ក្រសួងការងារបដិសេធចំពោះជនខិលខូចប្រើប្រាស់រូប និងឈ្មោះ ឯកឧត្តម ហេង សួរ ក្នុងចេតនាឆបោកសាធារណជន

ភ្នំពេញ៖ ក្រសួងការងារ និងបណ្ដុះបណ្តាលវជ្ជាជីវៈ នៅថ្ងៃទី១៧ ខែកក្កដា ឆ្នាំ២០២៥នេះ បានចេញសេចក្តីបដិសេធចំពោះការដែលពេលថ្មីៗនេះមានបុគ្គល ឬក្រុមខិលខូចនៅតែបន្តប្រើប្រាស់ឈ្មោះ និងរូបភាព ឯកឧត្តម ហេង សួរ រដ្ឋមន្តី ក្រសួងការងារ និងបណ្តុះបណ្តាលវិជ្ជាជីវៈ បង្កើតគណនីតេឡេក្រាមក្លែងក្លាយឈ្មោះថា “HENG_SourCEO" (@HENG_SourCEO) និងយករូបភាព ឯកឧត្តមរដ្ឋមន្ដ្រី មកប្រើជារូបប្រូហ្វាល់តេឡេក្រាម ដោយបង្កើត ក្រុមតេឡេក្រាមឈ្មោះ "OCIC CLUB INVESTMENT COMPANY” ក្នុងចេតនាបោកប្រាស់សាធារណជន ឱ្យយល់ថាជារបស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ការិយាល័យអ្នកនាំពាក្យ នៃក្រសួងការងារ និងបណ្តុះបណ្តាលវិជ្ជាជីវៈ បានជម្រាបជូនសាធារណជនថា គណនីតេឡេក្រាម "HENG_SourCE0” (@HENG_SourCEO) មិនមែនជាគណនីរបស់ ឯកឧត្តម ហេង សួរ នោះទេ ហើយ ឯកឧត្តមរដ្ឋមន្ត្រី ក៏មិនមានជាប់ពាក់ព័ន្ធជាមួយនឹងក្រុមតេឡេក្រាមឈ្មោះ "OCIC CLUB INVESTMENT COMPANY” នោះដែរ។ ក្រសួងមិនទទួលខុសត្រូវនូវរាល់ការបាត់បង់អត្ថប្រយោជន៍ណាមួយដែល បង្កដោយគណនីតេឡេក្រាម ឬក្រុមតេឡេក្រាមខាងលើនោះឡើយ។ ដោយឡែក ឯកឧត្តម ហេង សួរ មានគណនីបណ្តាញទំនាក់ទំនងសង្គមផ្លូវការដូចខាងក្រោម៖១. ហ្វេសប៊ុកផ្លូវការគឺ ៖ https://www.facebook.com/hengsour4all២. តិកតុផ្លូវការគឺhttps://www.tiktok.com/@hengsour៣. តេឡេក្រាមផ្លូវការគឺ ៖ https://t.me/HENG_Sourក្រសួង សូមព្រមានដល់ម្ចាស់គណនីតេឡេក្រាមក្លែងក្លាយទាំងអស់ និងម្ចាស់ក្រុមតេឡេក្រាមខាងលើ ឱ្យលុបចោលនូវគណនីតេឡេក្រាម និងរូបភាពទាំងអស់របស់ ឯកឧត្តម ហេង សួរ ជាបន្ទាន់។ទន្ទឹមនេះ ក្រសួងសូមស្នើសុំអាជ្ញាធរមានសមត្ថកិច្ចពាក់ព័ន្ធធ្វើការស៊ើបអង្កេត និងចាត់វិធានការតាមផ្លូវច្បាប់ឱ្យបានម៉ឺងម៉ាត់ចំពោះករណីនេះ៕

ឯកឧត្តមឧបនាយករដ្ឋមន្ត្រី ហ៊ុន ម៉ានី ជួបសំណេះសំណាលជាមួយសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្រ្តសុខាភិបាល ចំនួន ៥៨៤នាក់

ភ្នំពេញ ៖ នាព្រឹកថ្ងៃទី១៧ ខែកក្កដា ឆ្នាំ២០២៥នេះ សាកលវិទ្យាល័យវិទ្យាសាស្ត្រសុខាភិបាល (ស.វ.ស) នៃក្រសួងសុខាភិបាល បានរៀបចំពិធីសំណេះសំណាលជាមួយសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្រ្តសុខាភិបាល ចំនួន ៥៨៤នាក់។ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី និងជាប្រធានសហភាពសហព័ន្ធយុវជនកម្ពុជា អមដំណើរដោយលោកជំទាវ ដាំ ដារីនី អនុប្រធានសហភាពសហព័ន្ធយុវជនកម្ពុជា ឯកឧត្ដម លេង ផាលី សមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្ដម ហ៊ុន ម៉ានី ឯកឧត្ដម សមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា ចូលរួមពីឯកឧត្ដម លោកជំទាវ លោក លោកស្រី អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី លោក លោកស្រី និងប្អូនៗ សមាជិក សមាជិកា ក្រុមការងារគ្រូពេទ្យស្ម័គ្រចិត្តសរុបចំនួន ៦៣២នាក់។ឯកឧត្តមឧបនាយករដ្ឋមន្ត្រី ហ៊ុន ម៉ានី បានថ្លែងកោតសរសើរ ថ្លែងអំណរគុណ និងវាយតម្លៃខ្ពស់ ព្រមទាំងសូមស្វាគមន៍ប្អូនៗដែលជាសមាជិកទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្ត្រសុខាភិបាល នាពេលនេះ ហើយនិងបានកោតសរសើរ និងវាយតម្លៃខ្ពស់ចំពោះក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី មានការរីកធំធាត់ពីមួយថ្ងៃទៅមួយថ្ងៃឥតឈប់ឈរ ដែលបានខិតខំលះបង់កំលាំងកាយចិត្ត និងពេលវេលា ដើម្បីបុព្វហេតុ និងបេសកកម្មមនុស្សធម៌ និងកិច្ចការងារសង្គមនានា ជាពិសេសគឺការចូលរួមចំណែក ក្នុងការលើកកម្ពស់សុខុមាលភាពប្រជាពលរដ្ឋកម្ពុជា។ហើយ ឯកឧត្តមឧបនាយករដ្ឋមន្ត្រី បានពាក់អាវ «មោទនភាពជាតិខ្មែរ» ដែលរំឮកដល់ព្រឹត្តិការណ៍ ដំណើរថ្មើរជើងដើម្បីបង្ហាញការរួបរួមគ្នាជាធ្លុងមួយបង្ហាញគាំទ្រដល់រាជរដ្ឋាភិបាល និងកងកម្លាំងនៅជួរមុខរបស់យើង (Solidarity March)។ កាលពីថ្ងៃទី១៨ ខែមិថុនា ឆ្នាំ២០២៥ បងប្អូនប្រជាពលរដ្ឋមកពីគ្រប់ទិសទី ប្រមាណ ២០ម៉ឺននាក់ បានមកជួបជុំគ្នា នៅកន្លែងតែមួយ ក្នុងពេលតែមួយ បង្ហាញសម្លេងតែមួយ គឺការគាំទ្រដល់រាជរដ្ឋាភិបាល និងកងកម្លាំងជួរមុខនៅតាមបន្ទាត់ព្រំដែន។ បន្ទាប់មកទៀត ឯកឧត្តមឧបនាយករដ្ឋមន្ត្រី សូមលើកទឹកចិត្ត និងអំពាវនាវដល់កូនខ្មែរគ្រប់រូប ចូលរួមកម្មវិធី «តស់!យើងរួមគ្នាច្រៀងចម្រៀងជាតិ ដើម្បីគាំទ្រដល់វីរកងទ័ពជួរមុខ» ដែលនឹងប្រព្រឹត្តទៅនៅថ្ងៃទី១៩ ខែកក្កដា ឆ្នាំ២០២៥ខាងមុខនេះ នៅពហុកីឡដ្ឋានជាតិអូឡាំពិក។ ការបង្ហាញការគាំទ្រតាមរយៈការមកជួបជុំគ្នាច្រៀងចម្រៀងជាតិ ដែលមានបទ «នគររាជ» បទ «ពង្សាវតារខ្មែរ» បទ «សុវណ្ណភូមិដីខ្មែរ» និងបទ «គន់មើលទៅមេឃ» ដែលជាបទរបស់កងទ័ព គឺជាការបង្ហាញនូវស្មារតី ឆន្ទៈ និងទឹកចិត្តដ៏មោះមុតដែលបង្ហាញពីកម្លាំងគាំទ្រជាបន្តបន្ទាប់ទៅកាន់បងៗកងកម្លាំងជួរមុខ។ វត្តមានរបស់យើងម្នាក់ៗ នៅថ្ងៃទី១៩ ខែកក្កដាខាងមុខ គឺជាកាយវិការស្នេហាជាតិមួយ ក្នុងនាមជាពលរដ្ឋដែលយើងអាចធ្វើបានក្នុងកាលៈទេសៈនេះ។ យើងទាំងអស់គ្នា សូមសម្តែងនូវការដឹងគុណដល់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលជាអគ្គមគ្គទេសក៍ដ៏ឆ្នើម ក្នុងការការពារអធិបតេយ្យ បូរណភាពដែនដី កិត្យានុភាពជាតិ និងដែលតែងតែផ្តល់ភាពកក់ក្តៅ និងសេចក្តីសុខសាន្តដល់ប្រជាជនខ្មែរគ្រប់រូប។ យើងគ្រប់ៗរូប បេ្តជ្ញាបន្តជឿជាក់ និងចូលរួមគ្រប់កាលៈទេសៈទាំងអស់ជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតក្នុងបុព្វហេតុជាតិមាតុភូមិ។ ឯកឧត្តមឧបនាយករដ្ឋមន្ត្រី ហ៊ុន ម៉ានី បានលើកឡើងទៀតថា ក្នុងនាមជាផ្នែកមួយ នៃក្រុមគ្រួសារស.ស.យ.ក. ក្រុមគ្រូពេទ្យស្ម័គ្រចិត្ត បានចូលរួមចំណែកក្នុងចលនារួមរបស់សង្គមជាតិ ក្នុងការទប់ស្កាត់ និងឈានឆ្ពោះទៅបញ្ចប់ការ រីករាលដាលនៃជំងឺកូវីដ-១៩ ដោយរួបរួមជាមួយសកម្មភាពសង្គមរបស់ស.ស.យ.ក.បន្ថែមទៀត។ តាមរយៈការលះបង់នេះ បានសរបញ្ជាក់ពីស្មារតី ២ ធ្នូ ដោយសមាជិក សមាជិកា ស.ស.យ.ក. សមាជិក សមាជិកា ក្រុមការងារក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី មកពីគ្រប់ប្រភព មានតួនាទី និងមុខងារផ្សេងៗ មករួមគ្នា ដាក់ផលប្រយោជន៍ផ្ទាល់ខ្លួនដោយឡែក មកធ្វើការងារជាក្រុម ដើម្បីសម្រេចគោលដៅរួមមួយសម្រាប់ប្រទេសជាតិ និងផ្តល់ជាគំរូដល់សង្គមជាតិ។ការចូលរួមសកម្មភាពបម្រើសង្គម រៀនសូត្របន្ថែមនៅមូលដ្ឋានជាក់ស្តែង និងចូលរួមចំណែកលើកកម្ពស់សុខុមាលភាពប្រជាជន ដែលស្របតាមគោលដៅអភិវឌ្ឍន៍ប្រកបដោយចីរភាព របស់រាជរដ្ឋាភិបាលនៃព្រះរាជាណាចក្រកម្ពុជា អាណត្តិទី៧ ដែលមានសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ។ទន្ទឹមគ្នានោះដែរ ឯកឧត្តមសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការ នៃសាកលវិទ្យាល័យវិទ្យាសាស្រ្តសុខាភិបាល និងជាអនុប្រធានប្រតិបត្តិ ទទួលបន្ទុកជាប្រធានប្រតិបត្តិក្រុមការងារគ្រូពេទ្យស័្មគ្រចិត្តឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្រ្តសុខាភិបាល និងជាសមាជិកគណៈកម្មាធិការកណ្តាលសហភាពសហព័ន្ធយុវជនកម្ពុជា បានលើកឡើងថា មន្រ្តី បុគ្គលិក និស្សិតសាកលវិទ្យាល័យវិទ្យាសាស្រ្តសុខាភិបាល ចំនួន ២.៩៤៨នាក់ បានចូលរួមដោយស្ម័គ្រចិត្តជាសមាជិក សមាជិកា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងបានចូលរួមចំណែកផ្តល់សេវាអប់រំ ថែទាំ ព្យាបាលសុខភាព ដោយឥតគិតថ្លៃចំនួន ២០លើក ដោយមានប្រជាពលរដ្ឋមកទទួលសេវាសរុបចំនួន ១៥៦ ៩១៥ នាក់(ដប់ប្រាំម៉ឺនប្រាំមួយពាន់ប្រាំបួនរយដប់ប្រាំនាក់)។ ក្នុងរយៈពេល ១៣ឆ្នាំ (០២ ធ្នូ ឆ្នាំ២០១២ ដល់ ១៧ កក្កដា ឆ្នាំ២០២៥) ក្រោមការដឹកនាំចង្អុលបង្ហាញដោយផ្ទាល់របស់ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី មានសមាជិក សមាជិកា ចំនួន២៧០០០នាក់ (ពីរម៉ឺន ប្រាំពីរពាន់ នាក់) ក្នុងនោះស្ត្រីមានចំនួន ១៨៦៣០នាក់ (មួយម៉ឺន ប្រាំបីពាន់ ប្រាំមួយរយ សាមសិបនាក់) ដែលមាន២៨សាខា (ក្នុងនោះមានចំនួន ២៥ រាជធានី-ខេត្ត សាខា និងសាកលវិទ្យាល័យ ចំនួន៣សាខា) បានបំពេញបេសកកម្មដ៏ថ្លៃថ្លាដោយទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្ការកូវីដ-១៩ ក្នុងក្របខណ្ឌទូទាំងប្រទេស បណ្តុះបណ្តាលវគ្គសង្គ្រោះបឋម យកសំណាករកវីរុសកូវីដ-១៩ និងពិនិត្យព្យាបាលជំងឺជូនប្រជាពលរដ្ឋផ្តល់សេវា ដោយឥតគិតថ្លៃបានចំនួន២១៨៩លើក មានប្រជាពលរដ្ឋចូលរួមចំនួន១៣.៣៣៨.៦៥៣នាក់ (ដប់បីលាន សាមសិបបីម៉ឺន ប្រាំបីពាន់ប្រាំមួយរយបីនាក់) ក្នុងនោះស្ត្រីមានចំនួន ៦.៨៤៥.៧៧៤នាក់ (ប្រាំមួយលាន ប៉ែតសិបបួនម៉ឺន ប្រាំពាន់ប្រាំពីររយចិតសិបបួន នាក់) គិតត្រឹមថ្ងៃទី១៧ ខែកក្កដា ឆ្នាំ២០២៥ ច្រើនជាង៣ ភាគ៤ នៃប្រជាជនសរុបទូទាំងប្រទេសដែលមានចំនួន ១៧.៥៧៧.៧៦០នាក់ (ដប់ប្រាំពីរលាន ហាសិបប្រាំពីរម៉ឺន ប្រាំពីរពាន់ ប្រាំពីររយ ហុកសិប នាក់) ធៀបនឹងឆ្នាំ២០២៥ បើគិតសេវាជាមធ្យម ប្រជាពលរដ្ឋក្នុងម្នាក់ ចំណាយអស់ ៥០ដុល្លារ សរុបត្រូវចំណាយទាំងអស់ប្រហែល ៦៦៦.៩៣២.៦៥០ដុល្លារ (ប្រាំមួយរយហុកសិបប្រាំមួយលាន កៅសិបបីម៉ឺនពីរពាន់ប្រាំមួយរយហាសិបដុល្លារសហរដ្ឋអាមេរិក)។ ក្នុងពេលកន្លងមកនេះ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន ៤,៦០១នាក់ បានចុះបេសកកម្មតាមការឧទ្ទេសនាមរបស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ និងដោយស្ម័គ្រចិត្តឥតគិតថវិកាបេសកកម្ម ដោយចាក់ជូនប្រជាពលរដ្ឋបានប្រមាណ ១១,៩១១,២០៣ដូស (ដប់មួយលានកៅសិបមួយម៉ឺនមួយពាន់ពីររយបីដូស) ក្នុង២៥រាជធានី-ខេត្ត។ ទទួលបានការពិនិត្យ ព្យាបាល និងចែកថ្នាំជូនដោយឥតគិតថ្លៃពី ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដោយមានកិច្ចសហការជាមួយ សាខាសកម្មជនក្រុមការងារយុវជនរាជធានីភ្នំពេញ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា យុវជនកាយរិទ្ធិកម្ពុជា ក្រុមការងាររាជរដ្ឋាភិបាលចុះជួយរាជធានី ខេត្ត មន្ទីរសុខាភិបាលខេត្ត និងអាជ្ញាធរគ្រប់ជាន់ថ្នាក់៕អត្ថបទ រដ្ឋា

ក្រសួងឧស្សាហកម្ម ដាក់ប្រព័ន្ធបន្សុទ្ធទឹកស្អាតនៅមន្ទីរពេទ្យគន្ធបុប្ផា ជូនដល់អ្នកព្យាបាលជំងឺពិសា

ភ្នំពេញ ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំប្រព័ន្ធបន្សុទ្ធទឹកស្អាត ជាបច្ចេកវិទ្យាទំនើបចុងក្រោយបំផុត ដែលពិសាបាន នៅមន្ទីរពេទ្យគន្ធបុប្ផា ដើម្បីចូលរួមលើកកម្ពស់អនាម័យ និងការកាត់បន្ថយនូវខ្ទង់ចំណាយផ្សេងៗជូនដល់ប្រជាពលរដ្ឋ ដែលយកកូនចៅមកព្យាបាលនៅមន្ទីរពេទ្យ។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងក្នុងពិធីសំណេះ សំណាលជាមួយក្រុមគ្រូពេទ្យ និងអាណាព្យាបាលអ្នកជំងឺ និងប្រគល់-ទទួលឧបករណ៍បរិក្ខារបន្សុទ្ធទឹក ជូនដល់មន្ទីរពេទ្យគន្ធបុប្ផាក្រុង ភ្នំពេញ នៅថ្ងៃទី១៧ ខែកក្កដា ឆ្នាំ២០២៥ នេះថា ក្រោមការគិតគូរយកចិត្តទុកដាក់ដ៏ខ្ពង់ខ្ពស់ របស់សម្តេចមហាវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក្នុងនាមក្រសួងដែលជា សេនាធិការរបស់រាជរដ្ឋាភិបាល បានរៀបចំប្រព័ន្ធម៉ាស៊ីនបន្សុទ្ធទឹកពិសា ផ្គត់ផ្គង់ដល់មន្ទីរពេទ្យគន្ធបុប្ផាភ្នំពេញ ដើម្បីបម្រើដល់ អ្នកសម្រាកព្យាបាលជំងឺ ទទួលពិសាដោយមិនគិតថ្លៃ ក្នុងគោលបំណងកាត់បន្ថយការចំណាយរបស់អ្នកជំងឺ តាមរយៈការផ្គត់ផ្គង់ ទឹកស្អាតដែលមានគុណភាពខ្ពស់ ស្របតាមស្ដង់ដារទឹកស្អាត។ឯកឧត្តមរដ្ឋមន្ត្រី លើកឡើងបន្ថែមថា តាមរយៈការរៀបចំប្រព័ន្ធម៉ាស៊ីនបន្សុទ្ធទឹកពិសានេះ គឺដើម្បីចូលរួមចំណែកលើកកម្ពស់ អនាម័យ និងសុវត្ថិភាព សុខភាព នៅក្នុងមន្ទីរពេទ្យ និងការចូលរួមលើកកម្ពស់សុខុមាលភាពសាធារណៈ និងកាត់បន្ថយហានិភ័យ នៃការចម្លងមេរោគ តាមរយៈការប្រើប្រាស់ទឹកស្អាត។ សម្រាប់បញ្ហានេះ ក្រសួងគ្រោងដាក់ប្រព័ន្ធម៉ាស៊ីនបន្សុទ្ធទឹកពិសា នៅតាម បណ្តាមន្ទីរពេទ្យរដ្ឋធំៗចំនួន ៥ កន្លែងបន្ថែមទៀត ដើម្បីចូលរួមចំណែកកាត់បន្ថយនូវខ្ទង់ចំណាយផ្សេងៗជូនដល់ប្រពលរដ្ឋ ដែលនាំ កូនចៅមកព្យាបាលនៅតាមមន្ទីរពេទ្យទាំងនោះ។ សូមបញ្ជាក់ថា គម្រោងនេះត្រូវបានបំពាក់ប្រព័ន្ធបន្សុទ្ធទឹកបរិសុទ្ធ តាមរយៈម៉ាស៊ីនផលិតទឹកបរិសុទ្ធ មានសមត្ថភាពផលិតបាន ២៥០ លីត្រក្នុងមួយម៉ោង ចំនួន ២ គ្រឿង មានទីតាំងស្ថិតនៅក្នុងបរិវេណនៃអគារគន្ធបុប្ផាទី៤ ចំនួន ១ គ្រឿង និងអគារគន្ធបុប្ផាទី៥ ចំនួន ១ គ្រឿង ដោយយកប្រភពទឹកពីបណ្ដាញទុយោទឹកស្អាតរបស់រដ្ឋាករទឹកស្វយ័តក្រុងភ្នំពេញ។ ជុំវិញប្រព័ន្ធនេះដែរ កន្លងមក ក្រុមការងាររបស់រដ្ឋាករទឹកស្វយ័តក្រុងភ្នំពេញ ក៏បានដំឡើងម៉ាស៊ីនចម្រោះទឹកពិសាបរិសុទ្ធ ជូនមន្ទីរពេទ្យព្រះអង្គឌួងផងដែរ ដោយប្រើ ប្រាស់ថវិកា (ប្រមាណ ៧.១២០ ដុល្លារអាមេរិក) របស់មូលនិធិបម្រើដល់ផលប្រយោជន៍សង្គមនៃរដ្ឋាករទឹកស្វ័យតក្រុងភ្នំពេញ។ គម្រោងនេះបានចាប់ផ្តើមអនុវត្តនៅថ្ងៃទី ៨ ខែ កក្កដា ឆ្នាំ២០២៤ និងបញ្ចប់នៅថ្ងៃទី១៦ ខែកក្កដា ឆ្នាំ២០២៤។ បន្ទាប់ពីការដំឡើង រួចរាល់រដ្ឋាករទឹកស្វយ័តក្រុងភ្នំពេញ បានប្រគល់ប្រព័ន្ធចម្រោះទឹកពិសារបរិសុទ្ធ ជូនទៅមន្ទីរពេទ្យព្រះអង្គឌួងជាផ្លូវការ កាលពីថ្ងៃទី៨ ខែតុលា ឆ្នាំ២០២៤ កន្លងមក៕អត្ថបទ៖ សុន រ៉ាឌី

សាស្ត្រាចារ្យសាកលវិទ្យាល័យតូក្យូ ចាប់អារម្មណ៍ស្វែងយល់បន្ថែមអំពីកម្ពុជា និងការអភិវឌ្ឍសង្គម-សេដ្ឋកិច្ច

នារសៀល ថ្ងៃទី១៧ ខែកក្កដា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោក KAWASHIMA Shin សាស្រ្តាចារ្យផ្នែកទំនាក់ទំនងអន្តរជាតិ នៃសាកលវិទ្យាល័យតូក្យូ ចូលជួបសម្តែងការគួរសម និងពិភាក្សាការងារ នៅវិមានសន្ដិភាព។ក្នុងឱកាសនៃជំនួប, លោកសាស្ត្រាចារ្យបានថ្លែងអំណរគុណយ៉ាងជ្រាលជ្រៅចំពោះ សម្តេចបវរធិបតី ដែលបានចំណាយពេលវេលាដ៏មមាញឹកអនុញ្ញាតឱ្យរូបលោក និង សហការី បានចូលជួបសម្តែងការគួរសម និងពិភាក្សាការងារ។ លោកសាស្ត្រាចារ្យបានគោរពជម្រាបជូនអំពីគោលបំណងនៃដំណើរទស្សនកិច្ចរបស់លោក និងសហការី គឺដើម្បីស្វែងយល់បន្ថែមអំពីប្រទេសកម្ពុជា, ការអភិវឌ្ឍ សង្គម -សេដ្ឋកិច្ច និង នយោបាយការបរទេស តាមរយៈការជួបពិភាក្សាជាមួយតំណាងក្រសួង-ស្ថាប័ន និងគ្រឹះស្ថានឧត្តមសិក្សាមួយចំនួន។ ជាមួយគ្នានេះ, លោកសាស្ត្រាចារ្យក៏បានគោរពស្នេីសុំសម្តេចបវរធិបតី ចែករំលែក អំពីគោលនយោបាយរបស់រាជរដ្ឋាភិបាលក្នុងការអភិវឌ្ឍសង្គម-សេដ្ឋកិច្ច និងការពង្រឹងទំនាក់ទំនងកម្ពុជា-ជប៉ុន។ជាការឆ្លើយតប, សម្តេចបវរធិបតី បានសម្តែងការស្វាគមន៍ចំពោះដំណើរទស្សនកិច្ចរបស់លោកសាស្ត្រាចារ្យ និងសហការី នៅកម្ពុជា ក៏ដូចជាបំណងស្វែងយល់អំពីការអភិវឌ្ឍសង្គម-សេដ្ឋកិច្ចរបស់កម្ពុជា។ សម្ដេចបវរធិបតីក៏បានគូសបញ្ជាក់ថា ជប៉ុនគឺជាមិត្តដ៏ល្អរបស់កម្ពុជា និងជាដៃគូដ៏សំខាន់ ដែលបានចូលរួមចំណែកដល់ដំណើរការស្វែងរកសន្តិភាព និងការអភិវឌ្ឍសង្គម-សេដ្ឋកិច្ចរបស់កម្ពុជា។ សម្តេចបវរធិបតីបានលើកឡើងថា គោលនយោបាយអាទិភាពរបស់រាជរដ្ឋាភិបាល នីតិកាលទី៧ នៃរដ្ឋសភា គឺផ្តោតការយកចិត្តទុកដាក់លើប្រជាជនជាចម្បង សំដៅលើកកម្ពស់ជីវភាពរស់នៅរបស់ប្រជាជនកាន់តែប្រសេីរឡេីង តាមរយៈការជំរុញវិស័យសុខាភិបាល, អប់រំ, ការបង្កើតការងារ និងការបង្កើតបរិយាកាសអំណោយផលសម្រាប់ធុរកិច្ច និង វិនិយោគ។សម្ដេចបវរធិបតី និងលោកសាស្ត្រាចារ្យក៏បានផ្លាស់ប្តូរទស្សនៈលើបញ្ហាតំបន់ និងអន្តរជាតិ ដែលពាក់ព័ន្ធនឹងការរួមចំណែកដល់ការថែរក្សាសន្តិភាព ស្ថិរភាព និងវិបុលភាព របស់តំបន់ និងសកលលោក ក្នុងបរិការណ៍ដែលពិភពលោកកំពុងប្រឈមនឹងភាពមិនប្រាកដប្រជា៕

គណៈបញ្ជាការឯកភាពរដ្ឋបាលខេត្តពោធិ៍សាត់កំពុងអនុវត្តយ៉ាងម៉ឺងម៉ាត់នូវបទបញ្ជា ០១បប របស់រាជរដ្ឋាភិបាល

ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈបញ្ជាការឯកភាពរដ្ឋបាលខេត្ត មានប្រសាសន៍លើកឡើង ចាប់តាំងពីទទួលបានបទបញ្ជលេខ ០១បប របស់រាជរដ្ឋាភិបាលកម្ពុជា ស្តីពីយុទ្ធនាការបោសសម្អាតការឆបោកតាមប្រព័ន្ធប្ចេកវិទ្យា (ONLINE SCAMS) គណៈបញ្ជាការឯកភាពខេត្តពោធិ៍សាត់បាននឹងកំពុងអនុវត្តន៍នូវបទបញ្ជានេះយ៉ាងម៉ឺងម៉ាត និងប្តេជ្ញាធ្វើការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS) ឲ្យអស់ពីភូមិសាស្ត្រខេត្តពោធិ៍សាត់ ។ ឯកឧត្តម ខូយ រីដា មានប្រសាសន៍លើកឡើងដូចនេះ ក្នុងឱកាសអញ្ជើញដឹកនាំកិច្ចប្រជុំស្តីពី ការអនុវត្តបទបញ្ជា ០១បប នៅសាលប្រជុំសាលាខេត្តពោធិ៍សាត់ នារសៀលថ្ងៃទី១៧ ខែកក្កដា ឆ្នាំ២០២៥ ដោយមានការចូលរួមពីឯកឧត្តម តេង រតនា ប្រធានសាលាដំបូងខេត្ត ឯកឧត្តម កូយ កាន់យ៉ា ព្រះរាជអាជ្ញានៃអយ្យការអមសាលាដំបូងខេត្ត មេបញ្ជាការតំបន់ប្រតិបត្តិការសឹករងខេត្ត មេបញ្ជាការកងរាជអាវុធហត្ថខេត្ត តំណាងស្នងការនគរបាលខេត្ត និងអាជ្ញាធរពាក់ព័ន្ធ ។ សូមជម្រាបជូនដែរថា ក្នុងគោលបំណងដើម្បីបង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ឱ្យមាន ប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម រាជរដ្ឋាភិបាលកម្ពុជាបានដាក់ចេញនូវ បទបញ្ជលេខ ០១បប ដែលខ្លឹមសារ៩ចំនុចសំខាន់ៗ ស្តីពីយុទ្ធនាការបោសសម្អាតការឆបោកតាមប្រព័ន្ធប្ចេកវិទ្យា (ONLINE SCAMS) ព្រោះរាជរដ្ឋាភិបាលបានសង្កេតឃើញថា បច្ចុប្បន្នសកម្មភាពឆបោកតាមប្រព័ន្ធបច្ចេកវិទ្យា (ONLINE SCAMS) បាននិងកំពុងបង្កការគំរាមកំហែងនិងអសន្តិសុខក្នុងពិភពលោកនិងតំបន់ ហើយនៅព្រះរាជាណាចក្រកម្ពុជាក្រុមឧក្រិដ្ឋជនបរទេសក៏បានជ្រៀតចូលធ្វើសកម្មភាពឆបោកតាមប្រព័ន្ធបច្ចេកវិទ្យាផងដែរ ៕

ឯកឧត្តម ស៊ុន ចាន់ថុល៖ ពន្ធ ៣៦% ដែលអាមេរិកដាក់មកកម្ពុជា មិនមែនជាពន្ធបដិការចុងក្រោយនោះទេ

ភ្នំពេញ ៖ ឯកឧត្តម ស៊ុន ចាន់ថុល ថ្លែងទៅកាន់អ្នកវិនិយោគក្នុងស្រុក និងបរទេស អំពីពន្ធ ៣៦ ភាគរយ ដែលអាមេរិកដាក់មកកម្ពុជា គឺមិនមែនជាពន្ធបដិការចុងក្រោយនោះទេ ដូច្នេះសូមរក្សានូវភាពស្ងាត់ស្ងៀម និងត្រូវជឿទុកចិត្តលើរាជរដ្ឋាភិបាល ដែលបាននិងកំពុង ខិតខំប្រឹងប្រែងការពារផលប្រយោជន៍របស់បងប្អូន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងពិធីផ្សព្វផ្សាយ របាយការណ៍វឌ្ឍនភាព នៃការអនុវត្តមុតស្រួច ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន លើកទី១៩ ប្រចាំឆមាសទី២ ឆ្នាំ២០២៤ នៅថ្ងៃទី១៧ ខែកក្កដា ឆ្នាំ២០២៥ នេះថា ជុំវិញអត្រាពន្ធគយសហរដ្ឋអាមេរិកនេះ រាជរដ្ឋាភិបាលបានខិតខំប្រឹងប្រែង យ៉ាងខ្លាំង ដែលបានចរចារពន្ធដោយសុចរិត និងស្មោះត្រង់បំផុត ក្រោមការចង្អុលបង្ហាញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលនឹងផ្តល់ផលវិជ្ជមានមកដល់កម្ពុជាក្នុងពេលឆាប់ៗនេះជាមិនខាន។ ឯកឧត្តមឧបនាយករដ្ឋមន្ត្រី លើកឡើងបន្តថា ជុំវិញពន្ធបដិការនេះ កម្ពុជាបាននិងកំពុងរង់ចាំដូចបណ្តាប្រទេសមួយចំនួន នៅលើពិភពលោក នៃពន្ធបដិការចុងក្រោយ។ ឯកឧត្តម បញ្ជាក់ថា បញ្ហានេះកម្ពុជាបានធ្វើកិច្ចការគ្រប់ជ្រុងជ្រោយទាំងអស់ ដើម្បី ការពារផលប្រយោជន៍របស់ប្រទេសជាតិយើង ហើយពន្ធ ៣៦ ភាគរយ ដែលអាមេរិកដាក់មកកម្ពុជានេះ គឺមិនមែនជាពន្ធបដិការចុង ក្រោយនោះទេ ដូច្នេះសូមឱ្យម្ចាស់រោងចក្រ សហគ្រាសដែលកំពុងធ្វើអាជីវកម្មនៅកម្ពុជាទាំងអស់ រក្សានូវភាពស្ងាត់ស្ងៀម និងសូមជឿ ទុកចិត្តលើរាជរដ្ឋាភិបាល ដែលបាននិងកំពុងបន្តខិតខំប្រឹងប្រែងការពារផលប្រយោជន៍របស់បងប្អូនទាំងអស់គ្នា។សូមបញ្ជាក់ថា នៅថ្ងៃទី៧ ខែកក្កដា ឆ្នាំ២០២៥ កន្លងមកនេះ ប្រធានាធិបតីអាមេរិក គឺលោកដូណាល់ត្រាំ បានសម្រេចយកពន្ធគយ បដិការលើប្រទេសដៃគូពាណិជ្ជកម្មចំនួន ១៤ ក្នុងនោះរួមមាន៖ កម្ពុជា ៣៦%, ឥណ្ឌូណេស៊ី ៣២%, ថៃ ៣៦%, មីយ៉ាន់ម៉ា ៤០%, ឡាវ៤០%, ម៉ាឡេស៊ី ២៥%, បង់ក្លាដែស ៣៥%, ជប៉ុន ២៥%, សាធារណរដ្ឋកូរ៉េ ២៥%, ទុយនេស៊ី ២៥%, កាហ្សាក់ស្ថាន ២៥%, អាហ្វ្រិកខាងត្បូង ៣០%, ស៊ែប៊ី ៣៥%, បូស្នៀ និងហឺហ្សេហ្គោវីណា ៣០%៕អត្ថបទ៖ សុន រ៉ាឌី

ឯកឧត្តម ឃឹម ហ្វីណង់៖ផ្លែទុរេនស្រស់កម្ពុជាជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន ខណៈទុរេន៣កុងតឺន័រទៀតត្រៀមនាំចេញបន្ថែមសប្តាហ៍ក្រោយ

ភ្នំពេញ៖ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្មរុក្ខាប្រមាញ់ និងនេសាទ បានឱ្យដឹងថា នៅថ្ងៃទី១៧ ខែកក្កដា ឆ្នាំ២០២៥នេះ ផ្លែទុរេនស្រស់កម្ពុជាជើងដំបូងជាង១៧តោន ត្រូវបាននាំចេញជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារនៃការនាំចេញរួចមក។ ឯកឧត្តមបានឱ្យដឹងថា៖«ទុរេនទាំងនេះនឹងដឹកចេញតាមច្រកសមុទ្រនៅថ្ងៃស្អែក និងគ្រោងទៅដល់ប្រទេសចិនក្នុងរយៈពេល៩ថ្ងៃទៀត។ បើមិនមានអ្វីប្រែប្រួលទេ យើងនឹងមានទុរេន៣កុងតឺន័រទៀត ត្រៀមដឹកជញ្ជូននាំចេញបន្ថែមនៅសប្តាហ៍ក្រោយ»។ បើតាម ឯកឧត្តម ឃឹម ហ្វីណង់ ការនាំចេញនេះគឺជាការជោគជ័យថ្មីមួយទៀតសម្រាប់ការនាំចេញផ្លែឈើស្រស់របស់កម្ពុជាទៅកាន់ទីផ្សារដ៏មានសក្តានុពលមួយនេះ។ សូមចូលរួមអបអរសាទរដល់កសិករនិងម្ចាស់ចម្ការទាំងអស់គ្នាផង៕

កាកបាទក្រហមកម្ពុជា រៀបចំកិច្ចប្រជុំបូកសរុបលទ្ធផលការងាររយៈពេល៦ខែដើមឆ្នាំ២០២៥ និងទិសដៅបន្ត របស់សាខាកាកបាទក្រហមកម្ពុជា ទាំង២៥ រាជធានី-ខេត្ត

ភ្នំពេញ ៖ នៅរសៀលថ្ងៃទី ១៧ ខែកក្កដា ឆ្នាំ២០២៥ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា អញ្ជើញជាអធិបតីក្នុងកិច្ចប្រជុំបូកសរុបលទ្ធផលការងាររយៈពេល៦ខែដើមឆ្នាំ២០២៥ និងទិសដៅបន្ត របស់សាខាកាកបាទក្រហមកម្ពុជា ទាំង២៥ រាជធានី-ខេត្ត។ ដែលកិច្ចប្រជុំនេះមានការអញ្ជើញចូលរួមជាគណៈអធិបតីពី លោកជំទាវអគ្គលេខាធិការរងទី១ ឯកឧត្តមអគ្គលេខាធិការរងទី២ និងវត្តមានចូលរួមពីថ្នាក់ដឹកនាំ មន្ត្រីទីស្នាក់ការកណ្តាល គណៈកម្មាធិការសាខា ក្រុមប្រតិបត្តិសាខា សរុបដោយផ្ទាល់ និងតាមប្រព័ន្ធអនឡាញ ប្រមាណ១០០នាក់។សូមបញ្ជាក់ថាកិច្ចប្រជុំនេះប្រព្រឹត្តទៅតាមរបៀបវារៈដូចតទៅ៖១- បូកសរុបលទ្ធផលការងាររយៈពេល៦ខែឆ្នាំ២០២៥ និងទិសដៅបន្ត២- ការចុះពិនិត្យពាក់កណ្តាលទីយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា៣- បញ្ហាផ្សេងៗ៕

ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញជាអធិបតីភាពក្នុងពិធីបើកវគ្គបណ្តុះបណ្តាល ស្តីពី «ខ្សែច្រវាក់ផលិតកម្មដំណាំស្វាយចន្ទី និងម្រេច» ដល់មន្រ្តីកសិកម្មឃុំ-សង្កាត់ និងកសិករបង្គោល មកពីខេត្តកំពង់ធំ និងក្រចេះ

កំពង់ធំ ៖ នៅថ្ងៃទី១៧ ខែកក្កដា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាព ក្នុងពិធីបើកវគ្គបណ្តុះបណ្តាលស្តីអំពី «ខ្សែច្រវាក់ផលិតកម្មដំណាំស្វាយចន្ទី និងម្រេច» ដល់មន្រ្តីកសិកម្មឃុំ និងកសិករបង្គោល ដែលមកពីខេត្តកំពង់ធំ និងខេត្តក្រចេះ។ វគ្គបណ្តុះបណ្តាលធ្វើឡើងនៅខេត្តកំពង់ធំ ដែលកម្មវិធីនេះស្ថិតនៅក្នុងក្របខ័ណ្ឌគម្រោង CAPSAFE EU–Germany ។ក្នុងវគ្គបណ្តុះបណ្តាល មានការចូលរួម ពីឯកឧត្តមអនុរដ្ឋលេខាធិការ ប៉ក់ សម័យសុនីតិ ឯកឧត្តមអនុរដ្ឋលេខាធិការ ឃឹម ហ្វីណង់ ឯកឧត្តមអនុរដ្ឋលេខាធិការ ខាត់ សុធី លោកស្រី តំណាងគម្រោង CAPSAFE EU-Germany តំណាងអង្គការ GIZ លោកប្រធាននាយកដ្ឋានកសិ-ឧស្សាហកម្ម លោកប្រធាននាយកដ្ឋានអភិវឌ្ឍន៍សហគមន៍ លោកប្រធាន មន្ទីរកសិកម្មខេត្តកំពង់ធំ និងខេត្តក្រចេះ លោកអនុប្រធាននាយកដ្ឋាន ផ្សព្វផ្សាយកសិកម្ម រុក្ខាប្រមាញ់ និងនេសាទ មន្រ្តីកសិកម្មឃុំ-សង្កាត់ និងកសិករបង្គោល សរុបចំនួន១៦៩រូប។ថ្លែងនាឱកាសបើកវគ្គបណ្តុះបណ្តាល ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា ការបណ្តុះបណ្តាលនេះ ជាការចូលរួមចំណែក យ៉ាងសំខាន់ក្នុងការពង្រឹងសមត្ថភាពប្រតិបត្តិការងាររបស់មន្រ្តីកសិកម្មឃុំ-សង្កាត់ ធ្វើការបម្រើកសិករ លើកស្ទួយប្រាក់ចំណូលពីផលិតកម្មកសិកម្ម ជាពិសេស ផលិតកម្មស្វាយចន្ទី និងម្រេច ដែលជាដំណាំមាន សារសំខាន់សម្រាប់សេដ្ឋកិច្ចជាតិ និងជីវភាពកសិករ។ ជាចុងបញ្ចប់ឯកឧត្តមបណ្ឌិត បានបញ្ជាក់ផងដែរថា ស្របតាមគោលនយោបាយអាទិភាពទី៥ និងទី៦ តួនាទី និងភារកិច្ចមន្ត្រីកសិកម្មឃុំ ការអភិវឌ្ឃសហគមន៍កសិកម្មទំនើប គឺជាគន្លឹះដោះស្រាយបញ្ហាប្រឈមរបស់កសិករ បច្ចេកទេស ទុន និងទីផ្សារ ធានាបានលើការបង្កើនប្រាក់ចំណេញ។ ជាមួយគ្នានេះដែរ ដើម្បីពង្រឹងបាននូវការប្រកួតប្រជែង និងនិរន្តរភាពសេដ្ឋកិច្ច យើងត្រូវពិនិត្យមើល ថាតើកសិផលណាដែលនឹងត្រូវជំរុញ ជាអាទិភាព ក្នុងនោះស្វាយចន្ទី និងម្រេច ជាកសិផលអាទិភាព ចូលរួមចំណែកដល់សេដ្ឋកិច្ច និងប្រាក់ចំណូលកសិករ ស្របតាមគោលនយោបាយ «មានហូប មានបាន មានប្រើ និងមានរហូត» របស់ក្រសួងកសិកម្ម រុក្ខាប្រមាញ់ និងនេសាទ៕

អគ្គស្នងការបញ្ជាមន្រ្តីក្រោមឱវាទត្រូវចេញប្រតិបត្តិបង្រ្កាបបទល្មើសបច្ចេកវិទ្យា ជាបន្ទាន់ មិនត្រូវឲ្យកើតមានភាពថ្លោះធ្លោយជាដាច់ខាត

ភ្នំពេញ៖ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បញ្ជាទៅដល់មន្រ្តីក្រោមឱវាទទាំងអស់ ត្រូវចេញប្រតិបត្តិបង្រ្កាបបទល្មើសបច្ចេកវិទ្យា (Online Scams) ជាបន្ទាន់ មិនត្រូវឲ្យកើតមានភាពថ្លោះធ្លោយជាដាច់ខាត ជាពិសេសត្រូវបង្កើតកម្លាំងជំនាញស្ដង់ដារ SOP ដើម្បីការចុះប្រតិបត្តិបង្រ្កាបបទនេះ ឲ្យកាន់តែមានប្រសិទ្ធភាពខ្ពស់បំផុត ស្របតាមបទបញ្ជាដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៃការប្រកាសបើកយុទ្ធនាការបោសសម្អាតបទឧក្រិដ្ឋឆបោកតាមប្រព័ន្ធបច្ចេកវិទ្យានៅទូទាំងប្រទេស ។ ថ្លែងនៅក្នុងកម្មវិធីសន្និបាតបូកសរុបសភាពការណ៍ និងលទ្ធផលនៃកិច្ចប្រតិបត្តិការ ក្នុងការរក្សាសន្តិសុខ សណ្តាប់ធ្នាប់សង្គម ប្រចាំឆមាសទី១ និងដាក់ចេញទិសដៅការងារ សម្រាប់ឆមាសទី២ ឆ្នាំ២០២៥ នាព្រឹកថ្ងៃទី ១៧ ខែកក្កដា ឆ្នាំ២០២៥នេះ នៅទីស្ដីការក្រសួងមហាផ្ទៃ នាយឧត្តមសេនីយ៍ ស ថេត បានណែនាំ ដល់ស្នងការរាជធានីខេត្ត និងអង្គភាពចំណុះឲ្យអគ្គស្នងការដ្ឋាននគរបាលជាតិទាំងអស់ ត្រូវបង្កើនការយកចិត្តទុកដាក់ និងទទួលខុសត្រូវខ្ពស់ក្នុងដោះស្រាយបញ្ហានេះប្រកបដោយប្រសិទ្ធភាពខ្ពស់ ជាពិសេសត្រូវរួមសហការគ្នា បង្កើតក្រុមការងារកម្រិតស្ដង់ដារ SOP ដើម្បីចុះប្រតិបត្តិការ ត្រួតពិនិត្យ ស្រាវជ្រាវ និងបង្រ្កាប ក្រុមប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យា និងល្បែងស៊ីសងខុសច្បាប់តាមអនឡាញគ្រប់ប្រភេទឱ្យអស់នៅទូទាំងប្រទេស ដោយមិនត្រូវបណ្ដែតបណ្ដោយឲ្យក្រុមទាំងអស់នេះត្រឡប់មកប្រព្រឹត្តិបទល្មើសនេះវិញជាដាច់ខាត។ជាមួយគ្នា អគ្គស្នងការក៏បានក្រើនរំលឹក ដល់មន្រ្តីក្រោមឱវាទទាំងអស់ ត្រូវអនុវត្តកិច្ចការងារខាងលើនេះឲ្យទទួលបានជោគជ័យ ស្របទៅតាមបទបញ្ជាលេខ០១ របស់រាជរដ្ឋាភិបាលស្ដីពីការអនុវត្តប្រតិបត្តិការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា និងសេចក្ដីណែនាំនានាដែលរាជរដ្ឋាភិបាលបានដាក់ចុះឲ្យអនុវត្តផងដែរ។ បន្ថែមពីលើកកិច្ចការទាំងអស់នេះឯកឧត្តម អគ្គស្នងការនគរបាលជាតិ ក៏បានណែនាំដល់មន្រ្តីប្រតិកម្មរហ័សនៃអគ្គស្នងការដ្ឋាននគរបាលជាតិ ត្រូវបង្កើនកិច្ចសហការជាមួយប្រព័ន្ធផ្សព្វផ្សាយក្នុងស្រុកនិងក្រៅស្រុកល្បីៗ ដើម្បីធ្វើការបំភ្លឺ និង ឆ្លើយបន្ទាន់ចំពោះការចោទប្រកាន់ លាភពណ៌ បំភ្លៃការពិត និងដាក់បន្ទុក នៃព្រឹត្តិការណ៍បទល្មើសផ្សេងៗមកលើកម្ពុជា ពីសំណាក់ភាគីថៃ។ ទន្ទឹមនិងនេះ ត្រូវកោះអញ្ជើញ មន្រ្តីស្ថានទូតនានានៅកម្ពុជា ដើម្បីពន្យល់បន្ថែមពីសភាពការណ៍បទល្មើសដែលកើតឡើងពិតប្រាកដនៅកម្ពុជា ជូនទៅដល់មន្រ្តីស្ថានទូតបានជ្រាបកាន់តែច្បាស់ កុំឲ្យមានការភាន់ច្រឡំ។យោងតាមរបាយកណ៍របស់ អគ្គស្នងការដ្ឋាននគរបាលជាតិ បានបញ្ជាក់ឲ្យដឹងថា រយៈពេល៦ខែ ឆមាសទី១ ឆ្នាំ២០២៥នេះ សមត្ថកិច្ចពាក់ព័ន្ធ បង្រ្កាបបទល្មើសបច្ចេកវិទ្យា (Online Scams) ចំនួន ១៨លើក នៅរាជធានីខេត្តចំនួន១០ ដោយឃាត់ខ្លួនមនុស្ស ២.៤១៨នាក់ ក្នុងនោះកសាងសំណុំរឿងបញ្ជូនទៅតុលាការ ៧៣នាក់ និងបណ្ដេញចេញ ២.៣២២នាក់ ដែលមានអ្នកប្រព្រឹត្តិបទស្មើសជាជនជាតិខ្មែរ ,ចិន ,ថៃ ,មីយ៉ាន់ម៉ា ,វៀតណាម , ឡាវ, ឥណ្ឌា ,ប៉ាឡេស្ទីន , ឥណ្ឌូនេស៊ី និងម៉ាឡេស៊ីជាដើម។ ដោយឡែក ចំពោះកិច្ចការងារប្រឆាំងការសម្អាតប្រាក់ និងហិរញ្ញប្បទានភេវកម្ម សមត្ថកិច្ច បានដំណើរការស៊ើបអង្កេតបទល្មើសសម្អាតប្រាក់ចំនួន ៦៦ករណី និងបានបញ្ជូន សំណុំរឿងទៅអយ្យការសាលាដំបូងរាជធានី-ខេត្ត ដោយស្នើសុំចោទប្រកាន់ពីបទល្មើសសម្អាតប្រាក់សរុប ចំនួន ៣១ករណ៏ លើជនសង្ស័យចំនួន ៩៦នាក់ ក្នុងនោះ ជនជាតិខ្មែរ ២៧នាក់ ចិន ១៧នាក់ ថៃ ០៧នាក់ មីយ៉ាន់ម៉ា ០២នាក់ វៀតណាម ៣៧នាក់ ឡាវ ០២នាក់ ឥណ្ឌា ០២នាក់ ប៉ាឡេស្ទីន ០១នាក់ និងម៉ាឡេស៊ី ០១នាក់ ដែលពាក់ព័ន្ធនឹងបទល្មើសគ្រឿងញៀន៕អត្ថបទ បានសុខរិទ្ធិ

បណ្ដាញសង្គម

ព័ត៌មានថ្មីៗ

អ្នកនាំពាក្យរាជរដ្ឋាភិបាល៖រាជរដ្ឋាភិបាលកំពុងយកចិត្តទុកដាក់យ៉ាងខ្លាំងចំពោះយោធិន ពិសេសយោធិនពលី និងពលរដ្ឋភៀសសឹក

ព្រះសង្ឃ និងប្រជាពលរដ្ឋខេត្តពោធិ៍សាត់ច្រើនពាន់នាក់ចូលរួម ក្បួនដង្ហែទង់ជាតិខ្មែរ រួមគ្នាថែរក្សាការពារជាតិមាតុភូមិ

សហគមន៍ខ្មែរនៅកូរ៉េប្រមាណជិត២ពាន់នាក់ ប្រមូលផ្តុំអំណរគុណ និងគាំទ្រប្រធានាធិបតីអាមេរិកទទួលពានរង្វាន់សន្តិភាព និងអំពាវនាវឱ្យថៃយល់ព្រមទៅតុលារការអន្តរជាតិ

មនុស្សរាប់ម៉ឺននាក់ប្រមូលផ្ដុំគ្នាទូទាំងពិភពលោកតវ៉ាប្រឆាំងការវាយប្រហាររបស់អ៊ីស្រាអែលនៅហ្កាហ្សា

ប្រតិភូខេត្តកណ្ដាល ចុះសួរសុខទុក្ខ និងនាំយកគ្រឿងឧបភោគបរិភោគដែលទទួលបានពីសប្បជនផ្ដល់ជូនវីរកងទ័ពជួរមុខក្នុងខេត្តព្រះវិហារ

[UPDATE] ចំនួនអ្នកស្លាប់ដោយសារទឹកជំនន់ភ្លៀងមូសុងនៅប្រទេសឥណ្ឌា បានកើនឡើងដល់ជិត១៨០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877