BTV NEWS

អ្នកវិនិយោគចិន គ្រោងពង្រីកសាខាក្រុមហ៊ុន និងបណ្តុះបណ្តាលវិស្វករជំនាញ ក្នុងភូមិសាស្ត្រខេត្តកំពង់ស្ពឺ

ក្រសួងវប្បធម៌ ថ្កោលទោសចំពោះការបំផ្លិចបំផ្លាញថ្មីៗនេះដោយកងកម្លាំងយោធាថៃទៅលើជណ្តើរឈើឡើងប្រាសាទខ្នារ

សម្តេចប្រធានរដ្ឋសភាកម្ពុជា លើកទឹកចិត្ត ឯកអគ្គរដ្ឋទូតតួកគីយ៉េ ជួយជំរុញការវិនិយោគ ពាណិជ្ជកម្ម និងអ្នកទេសចរណ៍ ពីតួកគីយ៉េមកកម្ពុជាបន្ថែមទៀត

មន្រី្តសុខាភិបាលនៅភ្នំពេញ បន្តសកម្មភាពអប់រំសុខភាព លុបបំបាត់ជម្រកមូសខ្លា បរិស្ថានស្អាត សុខភាពល្អដល់ពលរដ្ឋ

ព័ត៌មានជាតិ

ផ្សារបន្លែបោះដុំធំមួយនៅរាជធានីភ្នំពេញ អាចផ្គង់ផ្គង់បន្លែជាង ២៥០ តោនក្នុងមួយថ្ងៃ

ភ្នំពេញ ៖ ផ្សារបន្លែបោះដុំ ធំមួយនៅរាជធានីភ្នំពេញ នៅតែអាចរក្សាស្ថិរភាពនៃការផ្គង់ផ្គង់ដល់អ្នកប្រើប្រាស់ប្រចាំថ្ងៃ ដែលអាចចែកចាយបានប្រមាណ ២៥០ តោន ក្នុងមួយថ្ងៃ ទៅតាមបណ្តាខេត្តផ្សេងៗ។ បន្លែ ផ្លែឈើ នៅផ្សារនេះប្រមាណ៨០% ផលិតក្នុងស្រុក។ក្រុមអាជីវកដែលជាអតីតអាជីវករផ្សារដើមគ ចាស់ ដែលមកលក់នៅ “ផ្សារតាម៉ាប់ព្រែកជ្រៃ” បានលើកឡើងថា ចាប់តាំងពីមកលក់នៅទីនេះ គឺសកម្មភាពលក់បានចាប់ផ្តើមដំណើរល្អជាធម្មតា ព្រោះមានការបញ្ជាទិញច្រើនពីម៉ួយចាស់ៗ ដែលមួយថ្ងៃអាចលក់បានប្រមាណ ចន្លោះពី ១-៥ តោនក្នុងមួយថ្ងៃ។អាជីវករ ថា បន្លែ ផ្លែឈើ លក់នៅទីនេះគឺមានប្រភពមកពីស្រុកស្អាង និងស្រុកកោះធំ ខេត្តកណ្តាល និងមួយចំនួនទៀត មកពីកំពង់ស្ពឺ,កំពង់ចាម និងខេត្តបាត់ដំបង។ ក្រុមអាជីវករ បានបញ្ជាក់ថា នៅផ្សារនេះ មានបន្លែ ផ្លែឈើ ខ្មែរស្ទើរគ្រប់មុខ ពោលគឺធានាដល់ការផ្គត់ផ្គង់មិនឱ្យខ្វះនៅលើទីផ្សារ។ ក្រុមអាជីវករ បានបង្ហាញការពីការពេញចិត្ត ដែលបានមកលក់នៅផ្សារនេះ ព្រោះ ទីតាំងធំទូលលាយ និង មានហេដ្ឋារចនាសម្ព័ន្ធគ្រប់គ្រាន់ ជាពិសេស ពួកគេ អាចលក់បាន ២៤ម៉ោង។ចំណែក លោក ខាវ ថន អ្នកគ្រប់គ្រង “ផ្សារតាម៉ាប់ព្រែកជ្រៃ” បានប្រាប់ BTV ថា នាពលនេះ ស្ថានភាពលក់ដូររបស់អាជីវករទាំង ៧០០តូប នៅក្នុងផ្សារនេះគឺ ដំណើរការល្អ ជាធម្មតា ដែលអាចចែកចាយសរុបទៅតាមបណ្តាខេត្តផ្សេងៗប្រមាណ ២៥០តោនក្នុងមួយថ្ងៃ។ លោកអះអាងថា ចន្លោះពី ៧០-៨០ % គឺជាបន្លែផ្លែឈើ ផលិតក្នុងស្រុក និងក្រៅពីនេះ មានប្រភពមកពីវៀតណាម និងចិន ដែលភាគច្រើនជាបន្លែដែលខ្មែរមិនអាចផលិតបាន។ អ្នកគ្រប់គ្រងផ្សាររូបនេះ បានអំពាវនាវដល់ប្រជាពលរដ្ឋដែលលក់ដូរ គ្មានសណ្ដាប់ធ្នាប់នៅលើដងផ្លូវ និងចិញ្ចើមផ្លូវសាធារណៈអាចមកលក់នៅ “ផ្សារតាម៉ាប់ព្រែកជ្រៃ” ដែលមានតូបទំនេររាប់រយទៀត។ផ្សារនេះ ស្ថិតនៅតាមបណ្ដោយផ្លូវ ២១៧ ភូមិព្រែកកំពិស សង្កាត់ព្រែកកំពិស ខណ្ឌដង្កោ រាជធានីភ្នំពេញ ដែលមានផ្ទៃដីទំហំ ១៤ ហិកតា និងអាចសង់តូបសរុបប្រមាណ២ ០០០តូប ខណៈបច្ចុប្បន្ន ទើបសាងសង់រួចប្រមាណ ១ ០០០ តូប ប៉ុណ្ណោះ៕អត្ថបទ៖ ធូ វិរៈ

គម្រោងវារីអគ្គិសនីស្ទឹងពោធិ៍សាត់១ បានបិទទ្វារស្តុកទឹកជោគជ័យ ឈានទៅលើកកម្ពស់សមិទ្ធផលថាមពលស្អាត និងការអភិវឌ្ឍន៍សេដ្ឋកិច្ចដ៏ធំធេងបន្ថែមទៀតរបស់កម្ពុជា

(ពោធិ៍សាត់)៖ នាព្រឹកថ្ងៃទី០៤ ខែមិថុនា ឆ្នាំ២០២៦ គឺជាទំព័រប្រវត្តិសាស្ត្រថ្មីមួយទៀត សម្រាប់វិស័យថាមពលនៅកម្ពុជា ដោយគម្រោងវារីអគ្គិសនីស្ទឹងពោធិ៍សាត់១ ដែលមានអានុភាព ៨០មេហ្គាវ៉ាត់ បានឈានដល់ដំណាក់កាលបិទទ្វារទឹកជាផ្លូវការ។ ព្រឹត្តិការណ៍ដ៏សំខាន់នេះ គឺជាការចាប់ផ្តើមដំណើរការស្តុកទឹកចូលក្នុងអាង ដែលជាជំហានដ៏ចាំបាច់បំផុត មុននឹងឈានទៅដល់ការដាក់ឱ្យដំណើរការម៉ាស៊ីនផលិតថាមពលអគ្គិសនីស្អាត និងមាននិរន្តរភាពសម្រាប់ផ្គត់ផ្គង់ជូនបណ្តាញជាតិ។ពិធីនេះត្រូវបានប្រារព្ធឡើងយ៉ាងអធិកអធម ក្រោមវត្តមានដ៏ខ្ពង់ខ្ពស់ ឯកឧត្តមបណ្ឌិត ទី នរិន្ទ រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល។ ក្នុងនោះក៏មានការអញ្ជើញចូលរួមពីសំណាក់ ឯកឧត្តមបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា, ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា, ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់, លោក KIM MYUNG IL អគ្គនាយកក្រុមហ៊ុន SPHP (Cambodia) Co., Ltd. ព្រមទាំងប្រតិភូពាក់ព័ន្ធជាច្រើនរូបទៀត។គួរជម្រាបជូនថា គម្រោងវារីអគ្គិសនីស្ទឹងពោធិ៍សាត់១ ត្រូវបានរាជរដ្ឋាភិបាលកម្ពុជា ផ្តល់សិទ្ធិវិនិយោគដល់ក្រុមហ៊ុន SPHP (Cambodia) Co., Ltd. កាលពីថ្ងៃទី០៥ ខែមេសា ឆ្នាំ២០១៩កន្លងទៅ។ ជាមួយនឹងការប្តេជ្ញាចិត្តខ្ពស់ គម្រោងនេះបានចាប់ផ្តើមការសាងសង់ជាក់ស្តែង នៅខែកុម្ភៈ ឆ្នាំ២០២២ ហើយរហូតមកដល់បច្ចុប្បន្ន ការសាងសង់សម្រេចបានប្រមាណ ៨០ភាគរយ ដែលបង្ហាញពីវឌ្ឍនភាពការងារដ៏ឆាប់រហ័ស និងប្រកបដោយគុណភាពខ្ពស់តាមបទដ្ឋានវិស្វកម្ម។គម្រោងនេះមិនត្រឹមតែជាសមិទ្ធផលវិស្វកម្មដ៏ធំធេងនៅក្នុងខេត្តប៉ុណ្ណោះទេ ប៉ុន្តែវាក៏ជាសក្ខីភាពនៃការបន្តយកចិត្តទុកដាក់របស់រាជរដ្ឋាភិបាល ក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការលើកកម្ពស់សន្តិសុខថាមពល និងការប្រើប្រាស់ថាមពលស្អាត ដែលជាកត្តាជំរុញកំណើនសេដ្ឋកិច្ចជាតិ។លើសពីការផលិតថាមពល គម្រោងនេះបានផ្តល់ផលប្រយោជន៍ពហុវិស័យ ជូនប្រជាពលរដ្ឋ រួមមាន៖ទី១-បង្កើនប្រភពថាមពលស្អាត ដែលមានតម្លៃសមរម្យ សម្រាប់បម្រើដល់ការប្រើប្រាស់ ក្នុងវិស័យឧស្សាហកម្ម និងគ្រួសារ។ទី២-កាត់បន្ថយហានិភ័យនៃជំនន់ទឹកភ្លៀង ក្នុងក្រុងពោធិ៍សាត់យ៉ាងមានប្រសិទ្ធភាព និងការបង្កើនសក្តានុពលស្រោចស្រពផ្ទៃដីកសិកម្ម ប្រមាណជាង២០ម៉ឺនហិកតា ក្នុងរដូវប្រាំង (បន្ទាប់ពីការបញ្ចប់គម្រោងទំនប់ស្ទាក់ទឹកទី២ ស្ទឹងអារ៉ៃ រួមបញ្ចូលគ្នា)។ទី៣-បង្កើតជាគោលដៅទេសចរណ៍ បែបធម្មជាតិថ្មី, បង្កើតទីផ្សារការងារក្នុងតំបន់, សាងសង់ផ្លូវកៅស៊ូ ប្រវែង២០គីឡូម៉ែត្រជុំវិញតំបន់ផ្ទៃលិចទឹក និងគម្រោងបង្កើតរោងចក្រផលិតគីមឈី សម្រាប់ការនាំចេញ ដែលនឹងជួយលើកកម្ពស់ជីវភាពរបស់ប្រជាពលរដ្ឋក្នុងមូលដ្ឋាន ឱ្យកាន់តែប្រសើរឡើង។ជុំវិញការបិទទ្វារទឹក នៅព្រឹកថ្ងៃទី០៤ ខែមិថុនា ឆ្នាំ២០២៦នេះ គឺជាមូលដ្ឋានគ្រឹះដ៏សំខាន់ សម្រាប់ត្រៀមលក្ខណៈដាក់ឱ្យដំណើរការម៉ាស៊ីនផលិតថាមពលអគ្គិសនី នាពេលឆាប់ៗខាងមុខ។ នេះគឺជាការបោះជំហាន ដ៏មានអត្ថន័យបំផុត ក្នុងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា អាណត្តិទី៦ និងបន្តបំពេញបន្ថែម ដោយរាជរដ្ឋាភិបាលកម្ពុជា អាណត្តិទី៧ នៃរដ្ឋសភា ដើម្បីធ្វើទំនើបកម្មហេដ្ឋារចនាសម្ព័ន្ធ និងធានាបាននូវការអភិវឌ្ឍប្រកបដោយចីរភាព ជូនដល់ប្រជាពលរដ្ឋកម្ពុជាទាំងមូល៕

សាលាភូមិន្ទរដ្ឋបាលកម្ពុជា ពង្រីកវិសាលភាពភាពជាអ្នកដឹកនាំ និងគុណភាពបណ្តុះបណ្តាល តាមរយៈកិច្ចសហប្រតិបត្តិការជាមួយវិទ្យាស្ថានរដ្ឋបាលសាធារណៈក្វាងស៊ីនៃប្រទេសចិន

ភ្នំពេញ៖ ក្នុងន័យឈានឆ្ពោះទៅរកការពង្រីកវិសាលភាពនៃការគ្រប់គ្រង ដឹកនាំ និងលើកកម្ពស់គុណភាពនៃការបណ្តុះបណ្តាលមន្ត្រីរាជការកម្ពុជាឱ្យកាន់តែមានឧត្តមភាព គណៈប្រតិភូសាលាភូមិន្ទរដ្ឋបាលកម្ពុជា បានបំពេញទស្សនកិច្ចផ្លូវការ និងឈានដល់ការចុះអនុស្សរណៈនៃការយោគយល់គ្នា (MOU) ជាមួយវិទ្យាស្ថានរដ្ឋបាលសាធារណៈក្វាងស៊ី នៅទីក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។ដំណើរទស្សនកិច្ចផ្លូវការរយៈពេល ៥ថ្ងៃ ពោលគឺចាប់ពីថ្ងៃទី២៣ ដល់ថ្ងៃទី២៧ ខែឧសភា ឆ្នាំ២០២៦ នេះ ត្រូវបានដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល ដោយមានការអមដំណើរដោយ លោក តាំង សុខងន អគ្គកុងស៊ុលនៃព្រះរាជាណាចក្រកម្ពុជាប្រចាំទីក្រុងណាននីងផងដែរ។នៅថ្ងៃទី២៤ ខែឧសភា ឆ្នាំ២០២៦ ពិធីចុះអនុស្សរណៈនៃការយោគយល់គ្នា (MOU) ជាផ្លូវការត្រូវបានប្រារព្ធឡើង ក្រោមកិច្ចចុះហត្ថលេខារវាង ឯកឧត្តម សូលី វណ្ណប៉ុក នាយករងសាលាភូមិន្ទរដ្ឋបាល និង លោកស្រី Cui Xiaolin នាយិការងវិទ្យាស្ថានរដ្ឋបាលសាធារណៈក្វាងស៊ី ក្រោមសហអធិបតីភាពរបស់ ឯកឧត្តម យក់ ប៊ុនណា និង លោក Niu Xianfeng នាយករងវិទ្យាស្ថានរដ្ឋបាលសាធារណៈក្វាងស៊ី។ការចុះអនុស្សរណៈនេះ គឺជាជំហានយុទ្ធសាស្ត្រដ៏សំខាន់មួយ ដែលឆ្លុះបញ្ចាំងពីឆន្ទៈ និងការយកចិត្តទុកដាក់ខ្ពស់របស់សាលាភូមិន្ទរដ្ឋបាល ក្នុងការចាប់ដៃគូជាមួយស្ថាប័នអន្តរជាតិ ដើម្បី៖ (១) អភិវឌ្ឍសមត្ថភាព និងពង្រឹងវិស័យមុខងារសាធារណៈកម្ពុជា ឱ្យកាន់តែរឹងមាំ (២) ជំរុញការផ្លាស់ប្តូរ និងការបណ្តុះបណ្តាល រវាងគ្រូឧទ្ទេស សិស្សមន្ត្រី និងកម្មសិក្សាការីនៃប្រទេសទាំងពីរ (៣) ពង្រីកការសិក្សាស្រាវជ្រាវ និងចែករំលែកចំណេះដឹង បទពិសោធន៍ និងនវានុវត្តន៍ថ្មីៗ ស្របតាមស្មារតីនៃកិច្ចសហប្រតិបត្តិការត្បូងពេជ្រ និងភាពជាដៃគូយុទ្ធសាស្ត្រគ្រប់ជ្រុងជ្រោយ កម្ពុជា-ចិន។ក្រៅពីពិធីចុះ MOU គណៈប្រតិភូសាលាភូមិន្ទរដ្ឋបាល ក៏បានចូលជួបសម្តែងការគួរសមជាមួយ ឯកឧត្តម Wang Xinfu សមាជិកអចិន្ត្រៃយ៍ ទទួលបន្ទុកជាប្រធានគណៈចាត់តាំងនៃគណៈកម្មាធិការបក្សកុម្មុយនីស្តចិនប្រចាំតំបន់ស្វយ័តក្វាងស៊ី និងជានាយកវិទ្យាស្ថានរដ្ឋបាលសាធារណៈក្វាងស៊ី។បន្ថែមពីនេះ ដើម្បីពង្រីកចក្ខុវិស័យលើការដឹកនាំ និងការគ្រប់គ្រងបែបទំនើប ក្រុមការងារក៏បានជួបពិភាក្សាការងារជាមួយ លោកស្រី Wang Xinhong អគ្គនាយិការរងមន្ទីរទទួលបន្ទុកតំបន់ពាណិជ្ជកម្មសេរីក្វាងស៊ី ព្រមទាំងបានចុះទស្សនកិច្ចសិក្សាដោយផ្ទាល់នៅទីតាំងសក្តានុពល និងបច្ចេកវិទ្យាទំនើបៗមួយចំនួនរួមមាន៖ មជ្ឈមណ្ឌលបញ្ញាសិប្បនិម្មិត (AI) ស្ថានីយព័ត៌មានវិទ្យាអាស៊ាន-ចិន តំបន់ឧស្សាហកម្មសេដ្ឋកិច្ច និងមជ្ឈមណ្ឌលនវានុវត្តន៍កំពង់ផែវៃឆ្លាត។ តាមរយៈបេសកកម្មនេះ សបញ្ជាក់ឱ្យឃើញយ៉ាងច្បាស់ថា សាលាភូមិន្ទរដ្ឋបាលកម្ពុជា កំពុងបោះជំហានយ៉ាងស្វាហាប់ក្នុងការធ្វើទំនើបកម្មស្ថាប័ន ពង្រីកវិសាលភាពនៃការអភិវឌ្ឍធនធានមនុស្ស និងធានាថាគុណភាពនៃការបណ្តុះបណ្តាលមន្ត្រីរាជការកម្ពុជា អាចដើរទាន់និន្នាការនៃការវិវត្តសកលលោក៕

ចិន-កម្ពុជា ចុះហត្ថលេខាលើកិច្ចព្រមព្រៀងមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៦

ភ្នំពេញ៖ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការ និងឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា អញ្ជើញចុះហត្ថលេខាលើកិច្ចព្រមព្រៀងមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៦ នាព្រឹកថ្ងៃទី០៤ ខែមិថុនា ឆ្នាំ២០២៦ នៅទីស្តីការក្រសួង។ឯកឧត្តម វ៉ាង វិនពីន បានសម្តែងនៅសោមនស្សរីករាយដែលបានចូលរួមពិធីចុះហត្ថលេខានៅកិច្ចព្រមព្រៀងគម្រោងកិច្ចសហប្រតិបត្តិការឡានឆាង-មេគង្គ ឆ្នាំ២០២៦។ ក្នុងនាមស្ថានទូតចិនប្រចាំកម្ពុជាសូមថ្លែងអំណរគុណយ៉ាងជ្រាលជ្រៅចំពោះក្រសួងការបរទេស និងសហប្រតិបត្តិការ លេខាធិការដ្ឋានជាតិនៃកិច្ចសហប្រតិបត្តិការឡានឆាង-មេគង្គ ក្រសួង និងស្ថាប័នពាក់ព័ន្ធនានាចំពោះកិច្ចខិតខំប្រឹងប្រែងឥតឈប់ឈររយៈបេលវែង និងការគាំទ្រយ៉ាងខ្លាំងក្នុងការជម្រុញកិច្ចសហប្រតិបត្តិការឡានឆាង-មេគង្គ។ ហើយនេះជាលើកទី៣ ដែលឯកឧត្តមបានអញ្ជើញចូលរួមចុះហត្ថលេខាលើគម្រោងកិច្ចសហប្រតិបត្តិការឡានឆាង-មេគង្គ ចាប់តាំងពីឯកឧត្តមកាន់តំណែងជាឯកអគ្គរដ្ឋទូតចិនប្រចាំកម្ពុជា រួមទាំងគម្រោងទាំង៧ ដែលចុះហត្ថលេខានាថ្ងៃនេះ។ឯកឧត្តម វ៉ាង វិនពីន បានបញ្ជាក់ថា ចំនួនគម្រោងកិច្ចសហប្រតិបត្តិការឡានឆាង-មេគង្គ ចិននិងកម្ពុជាបានឈានទៅដល់ចំនួន ១១៣។ ក្នុងរយៈពេល២ឆ្នាំកន្លងមកនេះ ស្ថានទូតចិនប្រចាំនៅកម្ពុជាបានចូលរួមកម្មវិធីឡានឆាង-មេគង្គ ជាង៤០ គម្រោងទាំងនេះបានផ្តល់ផលវិជ្ជមាន និងត្រូវបានស្វាគមន៍ដោយប្រទេសកម្ពុជា និងប្រទេសមេគង្គដទៃទៀត ដែលបង្ហាញយ៉ាងច្បាស់ពីចំណងមិត្តភាពរបស់ប្រទេសឡានឆាង-មេគង្គ ដែលថាផឹកទឹកទន្លេតែមួយជោគវាសនាជាប់គ្នាយ៉ាងជិតស្និទ្ធ។ឯកអគ្គរដ្ឋទូតចិនបានសង្កត់ធ្ងន់ថា គម្រោងមូលនិធិពិសេសសម្រាប់កិច្ចសហប្រតិបត្តិការឡានឆាង-មេគង្គ ឆ្នាំ២០២៦ ដែលបានចុះហត្ថលេខាលើកនេះ មិនថាគម្រោងផ្គត់ផ្គង់ទឹក ការលុបបំបាត់ជំងឺរលាកថ្លើម ការកាត់បន្ថយភាពក្រីក្រតាមរយៈការដាំដុះផ្សិត ឬការកែច្នៃវេចខ្ចប់ផលិតផល បច្ចេកវិទ្យាបៃតង និងការផ្លាស់ប្តូរជីឌីថល សុទ្ធតែបង្ហាញពេញលេញថាកិច្ចសហប្រិតិបត្តិការឡានឆាង-មេគង្គ ផ្តល់ការយកចិត្តទុកដាក់លើការអភិវឌ្ឍន៍ និងផ្តល់ផលប្រយោជន៍ដល់ប្រជាជន។ ហើយប្រកាន់ភ្ជាប់ភាពជាអ្នកជិតខាងល្អ និងប្រាក់ភ្ជាប់អនាគតរួមគ្នា និងប្រកាន់ភ្ជាប់ការជម្រុញការអភិវឌ្ឍន៍ដោយនវានុវត្ត និងគំនិតផ្តួចផ្តើមថ្មីៗ។ យើងមានបំណងធ្វើការជាប្រទេសកម្ពុជា និងប្រទេសមេគង្គដទៃទៀតដើម្បីជម្រុញដំណើរការកិច្ចសហប្រតិបត្តិការឡានឆាង-មេគង្គ ដោយធានាថាគម្រោងទាំងនេះនឹងចាក់ឫសគល់និងរីកចំរើន និងទទួលបានផ្លែផ្កាដែលទទួលបានផលប្រយោជន៍ពិតប្រាកដដល់ប្រជាជននៃប្រទេសតាមបណ្តោយទន្លេមេគង្គ។ចំណែកឯកឧត្តម ឧបនាយករដ្ឋមន្ត្រី ប្រាក់ សុខុន បានមានប្រសាសន៍ថា ពិធីចុះហត្ថលេខានេះ គឺជាដំណាក់កាលដ៏សំខាន់មួយនៅក្នុងកិច្ចសហប្រតិបត្តិការមេគង្គឡាន-ឆាង ខណៈពេលអបអរសាទរខួបលើកទី១០ នៃការបង្កើតយន្តការនេះ។ មូលនិធីពិសេសនេះ ដើរតួនាទីស្នូលក្នុងការគាំទ្រគម្រោងអភិវឌ្ឍន៍ក្នុងតំបន់មេគង្គដែលតែងតែជម្រុញសមាហរណកម្មតំបន់ និងការអភិវឌ្ឍន៍ប្រកបដោយចេរភាពសម្រាប់ប្រទេសជាសមាជិកទាំងអស់។ តាមរយៈការអនុវត្តគម្រោងជាច្រើនកន្លងមកមូលនិធីនេះបាននាំមកនៅអត្ថប្រយោជន៍ជាក់ស្តែង និងយូរអង្វែងដល់ប្រជាជនកម្ពុជាក្នុងវវិស័យជាច្រើនដូចជា ការអប់រំ សុខាភិបាល ការកាត់បន្ថយភាពក្រីក្រ ការលើកកម្ពស់សមត្ថភាពស្ត្រី ការគ្រប់គ្រងធនធានទឹក កសិកម្ម អភិវឌ្ឍន៍ជនបទ ការពារបរិស្ថាន និងអភិវឌ្ឍន៍បៃតង ទេសចរណ៍ ការផ្លាស់ប្តូរវប្បធម៌ និងការទប់ស្កាត់ឧក្រិដ្ឋកម្មឆ្លងដែន។ឯកឧត្តម ឧបនាយករដ្ឋមន្ត្រីបានបញ្ជាក់ថា សមិទ្ធផលទាំងនេះបានបញ្ជាក់យ៉ាងច្បាស់ពីតម្លៃ និងសារសំខាន់នៃមូលនិធិនេះ ក្នុងការជម្រុញការអភិវឌ្ឍន៍ប្រកបដោយចេរភាព និងភាពធន់ក្នុងសហគមន៍មេគង្គ។ ចាប់តាំងពីឆ្នាំ២០១៧ ដល់ឆ្នាំ២០២៥ កម្ពុជាទទួលបានគម្រោងសរុបចំនួន ១០៦គម្រោង ក្រោមមូលនិធីនេះស្មើនឹង ៣៧លានដុល្លារអាម៉េរិក។ សម្រាប់ឆ្នាំ២០២៦ កម្ពុជាទទួលបានគម្រោងចំនួន ៧ ជាមួយថវិកាជាង ១លាន ៩សែន ៨ម៉ឺនដុល្លារដែលផ្តោតលើវិស័យអាទិភាពដូចជា កាត់បន្ថយភាពក្រីក្រ អភិវឌ្ឍន៍ជនបទ និងទឹកស្អាត សុខាភិបាល បច្ចេកវិទ្យាបៃតង និងការគ្រប់គ្រងទិន្នន័យធនធានទឹក...។ល៕

មន្រ្ដីជាន់ខ្ពស់ក្រសួងកសិកម្ម ជួបពិភាក្សាជាមួយតំណាងក្រុមហ៊ុន OFI ដើម្បីស្វែងរកកិច្ចសហប្រតិបត្តិការ វិនិយោគការកែច្នៃគ្រាប់ស្វាយចន្ទីនៅកម្ពុជា

នារសៀលថ្ងៃទី៣ ខែមិថុនា ឆ្នាំ២០២៦ ឯកឧត្តម តូច ប៊ុនហួរ និង ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងដោយមានការចូលរួមពីមន្ត្រីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) និងកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ជួបពិភាក្សាការងារជាមួយលោក Dipen Joshi តំណាងក្រុមហ៊ុន Olam Food Ingredients ដើម្បីស្វែងរកកិច្ចសហប្រតិបត្តិការ វិនិយោគការកែច្នៃគ្រាប់ស្វាយចន្ទីនៅកម្ពុជា សម្រាប់នាំចេញទៅកាន់ទីផ្សារអន្តរជាតិ។ជំនួបនេះដែលធ្វើឡើងនៅទីស្តីការក្រសួងកសិកម្ម តបទៅតាមការស្នើសុំរបស់ភាគីក្រុមហ៊ុន ដែលជាក្រុមហ៊ុនអន្តរជាតិ មានការិយាល័យកណ្តាលនៅទីក្រុងសឹង្ហបូរី ដើម្បីពិនិត្យរួមគ្នាដោះស្រាយបញ្ហាប្រឈមសំខាន់ៗរបស់កសិករ និងសហគមន៍កសិកម្ម សំដៅអាចឱ្យក្រុមហ៊ុនទិញបាននូវគ្រាប់ស្វាយចន្ទី ដែលមានបរិមាណច្រើន និងមានគុណភាពសមស្រប។ ជាលទ្ធផលនៃជំនួបកិច្ចសហប្រតិបត្តិការនេះ អង្គប្រជុំយល់ស្របជំរុញការតភ្ជាប់ខ្សែច្រវាក់តម្លៃស្វាយចន្ទីសម្រាប់គ្រប់តួអង្គពាក់ព័ន្ធ ជាពិសេសគឺរួមចំណែកសម្រេចបាននូវគោលនយោបាយជាតិ។ អង្គប្រជុំក៏បានយល់ស្របថានឹងបន្តធ្វើការជាមួយគ្នា ដើម្បីកំណត់បាននូវសកម្មភាពជាក់លាក់ ដែលភាគីក្រុមហ៊ុន និងក្រសួងត្រូវធ្វើជាបន្តទៀត៕

អាជ្ញាធរជាតិអប្សរា និងរដ្ឋបាលស្រុកអង្គរធំ សហការដាំកូនឈើឡើងវិញនៅក្នុងព្រៃអង្គរ

នៅព្រឹកថ្ងៃទី៤ ខែមិថុនា ឆ្នាំ២០២៦ អាជ្ញាធរជាតិអប្សរា សហការជាមួយរដ្ឋបាលស្រុកអង្គរធំ បានរៀបចំកម្មវិធីដាំកូនឈើ ក្នុងបំណងដើម្បីស្តារគម្របព្រៃឈើឡើងវិញក្នុងតំបន់រមណីយដ្ឋានអង្គរ។ កម្មវិធីនេះមានការចូលរួមពីលោកស្រី ឈន សុគន្ធា អភិបាលរងស្រុកអង្គរធំ លោក ឡី គឹមស៊ី អនុប្រធាននាយកដ្ឋានសណ្តាប់ធ្នាប់ នៃអាជ្ញាធរជាតិអប្សរា ក្រុមការងារ ព្រះសង្ឃ សិស្សានុសិស្ស លោកគ្រូអ្នកគ្រូ ស.ស.យ.ក និងប្រជាពលរដ្ឋសរុបប្រមាណ ១៥០នាក់។សូមជម្រាបថា កម្មវិធីដាំកូនឈើនេះ គឺជាយុទ្ធនាការដាំស្តារដើមឈើឡើងវិញនៅក្នុងស្រុកអង្គរធំ ដែលគម្រោងគ្រោងដាំនៅតាមទីតាំងផ្សេងៗគ្នាសរុប ៤ ០០០ដើម។ នៅព្រឹកថ្ងៃទី៤ ខែមិថុនា កម្មវិធីបានដាំកូនឈើចម្រុះសរុប ១ ០០០ដើម នៅក្នុងភូមិសំរោង ឃុំលាងដៃ ស្រុកអង្គរធំ ខេត្តសៀមរាប៕

យុទ្ធនាការជំរឿនមន្ត្រីជាក់ស្តែង បន្តចុះអនុវត្តនៅរដ្ឋលេខាធិការដ្ឋានអាកាសចរណ៍ស៊ីវិលដែលជាស្ថាប័នទី៩

ភ្នំពេញ៖ បន្ទាប់ពីទទួលបានជោគជ័យក្នុងការអនុវត្តនៅតាមក្រសួង និងស្ថាប័នចំនួន៨ រួចមក នាព្រឹកថ្ងៃទី៤ ខែមិថុនា ឆ្នាំ២០២៦ នេះ គណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង បានបន្តបេសកកម្មរបស់ខ្លួន ក្នុងការចុះពិនិត្យផ្ទៀងផ្ទាត់រចនាសម្ព័ន្ធ និងវត្តមានមន្ត្រី ដែលកំពុងបំពេញការងារ នៅតាមអង្គភាពចំណុះរដ្ឋលេខាធិការដ្ឋានអាកាសចរណ៍ស៊ីវិល។ បេសកកម្មចុះធ្វើជំរឿននេះ ដឹកនាំដោយ ឯកឧត្តម សុខ សង្វារ រដ្ឋលេខាធិការក្រសួងមុខងារសាធារណៈ និងជាតំណាងដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការជំរឿនមន្ត្រីជាក់ស្តែង។ ក្នុងដំណើរការនេះ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល ព្រមទាំងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ បានចូលរួមសហការយ៉ាងសកម្ម ដោយបានមកបង្ហាញខ្លួនផ្ទាល់ និងភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែនកម្ពុជាច្បាប់ដើម ទៅតាមការកំណត់របស់គណៈកម្មការជំរឿន។ ដើម្បីធានាថាមិនមានការរំខានដល់ប្រតិបត្តិការការងារប្រចាំថ្ងៃ និងការផ្តល់សេវាសាធារណៈ ក្រុមការងារគណៈកម្មការ បានរៀបចំការចុះធ្វើជំរឿននេះដោយផ្ទាល់ នៅទីតាំងចំនួន២ រួមមាន៖ (១)ទីស្តីការរដ្ឋលេខាធិការដ្ឋានអាកាសចរណ៍ស៊ីវិល (២) វិទ្យាស្ថានជាតិអាកាសចរណ៍ស៊ីវិល។ គួររំលឹកថា រដ្ឋលេខាធិការដ្ឋានអាកាសចរណ៍ស៊ីវិល គឺជាស្ថាប័នទី៩ ហើយ ដែលគណៈកម្មការបានចុះធ្វើជំរឿនមន្ត្រីជាក់ស្តែង បន្ទាប់ពីដំណើរការជំរឿននៅក្រសួងអធិការកិច្ច។ យុទ្ធនាការជំរឿននៅទីតាំងទាំង២ នៃរដ្ឋលេខាធិការដ្ឋានអាកាសចរណ៍ស៊ីវិលនេះ នឹងប្រព្រឹត្តទៅរយៈពេល ២ថ្ងៃពេញ គឺនៅថ្ងៃទី៤ និងទី៥ ខែមិថុនា ឆ្នាំ២០២៦៕

រដ្ឋមន្រ្ដីក្រសួងបរិស្ថាន៖ រាជរដ្ឋាភិបាលកំពុងជំរុញគំរូអភិវឌ្ឍន៍ថ្មីដឹកនាំដោយសហគមន៍ក្នុងតំបន់ទេសចរណ៍ធម្មជាតិនានានៅកម្ពុជា

រដ្ឋមន្ត្រីក្រសួងបរិស្ថាន ឯកឧត្តមបណ្ឌិត អ៊ាង សុផល្លែត បានបញ្ជាក់ថា បច្ចុប្បន្ននេះ រាជរដ្ឋាភិបាលកំពុងជំរុញគំរូអភិវឌ្ឍន៍ថ្មីដឹកនាំដោយសហគមន៍នៅតំបន់ទេសចរណ៍ធម្មជាតិនានានៅក្នុងកម្ពុជា ខណៈតំបន់អភិវឌ្ឍន៍គម្រោងលម្ហែបៃតងនៅតំបន់រមណីយដ្ឋានធម្មជាតិភ្នំខ្នងផ្សារ និងទេទឹកពុះ ដែលនឹងត្រូវគ្រប់គ្រងដោយសហគមន៍មូលដ្ឋានផ្ទាល់ដោយមិនអនុញ្ញាតឱ្យអង្គការ ដៃគូអភិវឌ្ឍន៍ ឬស្ថាប័នណាមួយចូលរួមការគ្រប់គ្រងជំនួសឡើយ។ ឯកឧត្តមបានបញ្ជាក់តាមរយៈសារសំឡេងផ្ដល់ដល់អ្នកសារព័ត៌មាននៅថ្ងៃទី៤ ខែមិថុនា ឆ្នាំ២០២៦នេះ ថា គោលការណ៍អភិវឌ្ឍន៍ក្រោមការដឹកនាំរបស់សម្តេចធិបតីនាយករដ្ឋមន្ត្រី ហ៊ុន ម៉ាណែត គឺផ្តោតលើការពង្រឹងសិទ្ធិ និងតួនាទីរបស់ប្រជាសហគមន៍ ដើម្បីឱ្យក្លាយជាម្ចាស់ពិតប្រាកដនៃសហគមន៍របស់ខ្លួន មានសិទ្ធិពេញលេញក្នុងការដឹកនាំ គ្រប់គ្រង ថែរក្សា និងប្រើប្រាស់ធនធានធម្មជាតិក្នុងមូលដ្ឋានដោយខ្លួនឯង។ ឯកឧត្តមរដ្ឋមន្រ្ដីបានបន្ថែមថា ការរៀបចំគោលការណ៍នេះមានគោលបំណងធានាការគ្រប់គ្រងធនធានធម្មជាតិ និងគម្រោងអភិវឌ្ឍន៍នៅមូលដ្ឋានមានភាពច្បាស់លាស់ប្រកបដោយភាពជាម្ចាស់កម្មសិទ្ធិរបស់សហគមន៍ ព្រមទាំងលើកកម្ពស់ការចូលរួមអភិវឌ្ឍ និងការពារធនធានធម្មជាតិដោយផ្ទាល់របស់ប្រជាពលរដ្ឋ។ ឯកឧត្តមបានបញ្ជាក់ថា៖ «ការអភិវឌ្ឍរបស់សម្ដេចធិបតី គឺពង្រឹងប្រជាសហគមន៍ កែប្រែប្រជាសហគមន៍ ទៅជាម្ចាស់ដឹកនាំ គ្រប់គ្រង និងថែរក្សាសហគមន៍របស់ពួកគាត់ដោយខ្លួនគាត់។ គឺមិនឱ្យក្រសួង អាជ្ញាធរដែនដី ក្រុមហ៊ុន ឬអង្គការទៅគ្រប់គ្រងទេ»។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ថ្លែងក្នុងពិធីសម្ពោធអគារ និងប្រគល់សញ្ញាបត្រនៅវិទ្យាស្ថានជាតិអប់រំកាយនិងកីឡាកាលពីថ្ងៃទី៣ ខែមិថុនា ឆ្នាំ២០២៦ ម្សិលមិញនេះថា រាជរដ្ឋាភិបាលកំពុងជំរុញការអភិវឌ្ឍតំបន់រមណីយដ្ឋានធម្មជាតិភ្នំខ្នងផ្សារនិងតំបន់ទេទឹកពុះ ដោយផ្តោតលើរូបមន្តអភិវឌ្ឍន៍ដែលដឹកនាំដោយសហគមន៍ ដើម្បីបង្កើនចំណូលជូនប្រជាពលរដ្ឋ ព្រមទាំងធានាការអភិរក្សធនធានធម្មជាតិឱ្យបានគង់វង្ស។ សម្តេចធិបតីបានកោតសរសើរដល់ក្រសួង និងអាជ្ញាធរពាក់ព័ន្ធ ដែលបានសហការគ្នាអភិវឌ្ឍតំបន់នេះ ដោយចាត់ទុកថាវឌ្ឍនភាពដែលបានសម្រេចលទ្ធផលល្អប្រសើរ និងសមស្របនឹងទិសដៅអភិវឌ្ឍន៍ទេសចរណ៍ធម្មជាតិរបស់ប្រទេស។ សម្តេចធិបតីបានរំលឹកពីបទពិសោធចុះទៅតំបន់ខ្នងផ្សារកាលពីឆ្នាំ២០២៥ និងការចុះពិនិត្យជាបន្តបន្ទាប់ ដោយអះអាងថា ការអភិវឌ្ឍត្រូវផ្តោតលើការផ្តល់អំណាចដល់សហគមន៍មូលដ្ឋានក្លាយជាម្ចាស់ពិតប្រាកដនៅតំបន់របស់ខ្លួន។ សម្តេចធិបតីបានបន្ថែមថា រូបមន្តនេះបានជួយប្រជាពលរដ្ឋប្តូរពីការពឹងផ្អែកលើការកាប់ឈើនិងធនធានព្រៃឈើមកជាការបង្កើតចំណូលពីវិស័យទេសចរណ៍ ដូចជាការលក់ដូរ និងសេវាបដិសណ្ឋារកិច្ចជាដើម។ សម្តេចធិបតីបានបញ្ជាក់ថា ការវិនិយោគឯកជននឹងត្រូវរៀបចំសមស្រប ដោយមិនជំនួសតួនាទីសហគមន៍ទេ ប៉ុន្តែជួយគាំទ្រនិងបំពេញបន្ថែម ដើម្បីបង្កើតប្រព័ន្ធសេដ្ឋកិច្ចទេសចរណ៍ដែលមានតុល្យភាព។ លោកបានណែនាំដល់ក្រសួងជំនាញនិងអាជ្ញាធរពាក់ព័ន្ធបន្តអភិវឌ្ឍហេដ្ឋារចនាសម្ព័ន្ធ ដូចជាផ្លូវ កន្លែងសម្រាក កន្លែងងូតទឹក និងតំបន់សេវាកម្មសហគមន៍ ដើម្បីបង្កើនភាពទាក់ទាញទេសចរណ៍»។ សម្តេចធិបតីថ្លែងថា៖«យើងបានដកអាជ្ញាប័ណ្ណវិនិយោគឯកជនគម្រោងតូចៗនៅទីនោះ ព្រោះប្រជាសហគមន៍គាត់បារម្ភ គាត់ខ្លាចការវិនិយោគមិនស្រួលប៉ះដល់អាជីពរបស់គាត់។ អ៊ីចឹងយើងកែសម្រួលការវិនិយោគឯកជន ដោយផ្ដល់ទីតាំងណាដែលជួយគាំទ្រគ្នាទៅវិញទៅមក»។ សម្តេចធិបតីបានបន្ថែមថា ការអភិវឌ្ឍតំបន់ទេសចរណ៍ធម្មជាតិមិនត្រឹមតែជួយលើកកម្ពស់សេដ្ឋកិច្ចមូលដ្ឋានប៉ុណ្ណោះទេ ប៉ុន្តែថែមទាំងជួយពង្រឹងការការពារព្រៃឈើ និងធនធានធម្មជាតិ ដោយសារប្រជាពលរដ្ឋមានជម្រើសអាជីពថ្មី និងកាត់បន្ថយសកម្មភាពប៉ះពាល់ដល់បរិស្ថាន។ សម្តេចធិបតី ហ៊ុន ម៉ាណែត បានសង្កត់ធ្ងន់ថា ការអភិវឌ្ឍតំបន់ខ្នងផ្សារនិងទេទឹកពុះ គឺជាគំរូសម្រាប់ការអភិវឌ្ឍសេដ្ឋកិច្ចមូលដ្ឋានដែលភ្ជាប់ជាមួយការអភិរក្សធម្មជាតិ ដោយរដ្ឋាភិបាលនឹងបន្តអនុវត្តគម្រោងស្រដៀងគ្នានៅតំបន់សក្តានុពលផ្សេងៗទៀតនៅទូទាំងប្រទេស។ សូមជម្រាបថា ភ្នំខ្នងផ្សារជាតំបន់ទេសចរណ៍ធម្មជាតិដ៏ធំមួយដែលមានទីតាំងនៅភូមិតាំងបំពង ឃុំតាសាល ស្រុកឱរ៉ាល់ ខេត្តកំពង់ស្ពឺ។ តំបន់នេះជាតំបន់ទេសចរណ៍ធម្មជាតិដ៏ពេញនិយមសម្រាប់ទេសចរដែលចូលចិត្តដើរកម្សាន្តតាមព្រៃភ្នំនិងតំបន់ធម្មជាតិដ៏ស្រស់ត្រកាល។ ចំណែកទេទឹកពុះ ជាតំបន់ទេសចរណ៍ធម្មជាតិដ៏កម្រមួយ ដែលមានបាតុភូតធម្មជាតិចម្លែក ដោយទឹកមានសីតុណ្ហភាពខ្ពស់រហូតដល់៧០អង្សារសេ និងជាតំបន់ពោរពេញដោយស្មៅខ្ពស់ៗដ៏ស្រស់ស្អាត៕

សម្តេចប្រធានរដ្ឋសភា និងតំណាង UN ប្រចាំកម្ពុជា ប្តេជ្ញាបន្តកិច្ចសហការឱ្យកាន់តែជិតស្និទ្ធ ក្នុងការលើកកម្ពស់តួនាទីរដ្ឋសភា បម្រើផលប្រយោជន៍ប្រជាពលរដ្ឋបានកាន់តែច្រើន និងមានប្រសិទ្ធភាពខ្ពស់

ភ្នំពេញ៖សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៤ ខែមិថុនា ឆ្នាំ២០២៦ បានទទួលជួបពិភាក្សាការងារជាមួយ លោកស្រី វ្ល៉ាដាន់កា អាន់ដ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិ ប្រចាំនៅកម្ពុជា នៅវិមានរដ្ឋសភា។សម្តេចប្រធានរដ្ឋសភា បានស្វាគមន៍យ៉ាងកក់ក្តៅចំពោះវត្តមានលោកស្រី វ្ល៉ាដាន់កា អាន់ដ្រេវ៉ា និងសហការី ដែលបាននិងកំពុងបំពេញបេសកកម្មការងារនៅកម្ពុជា។ សម្តេចបានថ្លែងអំណរគុណយ៉ាងជ្រាលជ្រៅ ចំពោះភ្នាក់ងារសហប្រជាជាតិ និងអង្គការដៃគូនានា ដែលបានចូលរួមចំណែកដ៏សំខាន់ដល់ការអភិវឌ្ឍនៅកម្ពុជានាពេលកន្លងមក គិតចាប់តាំងពីដំណាក់កាលស្វែងរកសន្តិភាព ស្តារ កសាង និងអភិវឌ្ឍប្រទេសកម្ពុជា។ជាមួយគ្នានេះ សម្តេចក៏បានថ្លែងអំណរគុណ និងវាយតម្លៃខ្ពស់ចំពោះភ្នាក់ងារសហប្រជាជាតិ ដែលបានផ្តល់កិច្ចសហការយ៉ាងជិតស្និទ្ធជាមួយស្ថាប័ននីតិប្បញ្ញត្តិ និងនីតិប្រតិបត្តិកម្ពុជា ក្នុងរយៈពេលប៉ុន្មានឆ្នាំចុងក្រោយនេះ ហើយបានចាត់ថា ភ្នាក់ងារ UN ជាដៃគូដ៏សំខាន់របស់កម្ពុជា។ ជាក់ស្តែងថ្មីៗនេះ ក្រោមកិច្ចសហការគាំទ្រទាំងផ្នែកបច្ចេកទេស និងហិរញ្ញវត្ថុពីមូលនិធិសហប្រជាជាតិដើម្បីប្រជាជន និងការអភិវឌ្ឍ (UNFPA) និងអង្គការសហប្រជាជាតិដើម្បីស្រ្តី (UN Women) បានសហការជាមួយគណៈកម្មការទី៨ របស់រដ្ឋសភា រៀបចំកម្មវិធី «សភាត្រាប់» សំដៅលើកកម្ពស់សិទ្ធិ និងចំណេះដឹងដល់យុវជន និងយុវតីកម្ពុជា ក្នុងភាពជាអ្នកដឹកនាំ។ កម្មវិធីសភាត្រាប់ នេះ ទទួលបានជោគជ័យនិងទទួលបាននូវការគាំទ្រ និងចំណាប់អារម្មណ៍យ៉ាងខ្លាំងពីសាធារណជន ជាពិសេសពីសំណាក់យុវជនកម្ពុជា។សម្តេចបានគូសបញ្ជាក់ថា នៅកម្ពុជាសម្តេចតេជោ ហ៊ុន សែន ជាបិតាក្នុងការលើកកម្ពស់សមភាពយេនឌ័រ ហើយក្នុងនីតិកាលបន្ទាប់នេះ សម្តេចបានប្តេជ្ញាចិត្តខ្ពស់ក្នុងការបង្កើនចំនួនស្រ្តី ក្នុងតួនាទីសម្រេចចិត្តឱ្យបានកាន់តែច្រើនបន្ថែមទៀត។ ចក្ខុវិស័យនេះ ត្រូវបានបន្តអនុវត្តយ៉ាងខ្លាំងក្លានៅក្នុងរាជរដ្ឋាភិបាលអាណត្តិទី៧ ក្រោមការដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដោយបានចាត់ទុកថាស្រ្តីជាឆ្អឹងខ្នងសេដ្ឋកិច្ចនិងសង្គម។ សម្តេចធិបតី បានលើកឡើងថា ពិភពលោកនឹងកាន់តែមានសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន។ សម្តេចប្រធានរដ្ឋសភា បានគូសបញ្ជាក់ថាកម្ពុជាកំពុងបោះជំហានកាន់តែខិតជិត គោលដៅអភិវឌ្ឍន៍ប្រកបដោយចីរភាពសហប្រជាជាតិ (SDGs) និងចក្ខុវិស័យរបស់ខ្លួន ឆ្នាំ២០៣០ ក្លាយជាប្រទេសមានចំណូលមធ្យមកម្រិតខ្ពស់និងប្រទេសមានចំណូលខ្ពស់នៅឆ្នាំ២០៥០។ ក្រោយពីបានផ្តល់សច្ចាប័នលើរបៀបវារៈ គោលដៅអភិវឌ្ឍន៍ប្រកបដោយចីរភាពឆ្នាំ២០៣០ នាឆ្នាំ២០១៥ រាជរដ្ឋាភិបាលកម្ពុជា បានខិតខំសម្របសម្រួល និងអនុវត្តគោលដៅអភិវឌ្ឍន៍ SDGs ឱ្យស្របទៅនឹងអាទិភាពជាតិ។ ក្របខណ្ឌនេះបានក្លាយជាមូលដ្ឋានគ្រឹះដ៏សំខាន់ សម្រាប់ការរៀបចំផែនការអភិវឌ្ឍន៍ជាតិ និងផែនការតាមវិស័យ រួមទាំងផែនការយុទ្ធសាស្ត្រអភិវឌ្ឍន៍ជាតិ (NSDP) ផងដែរ។ពាក់ព័ន្ធនឹងវិស័យសក្ដានុពល នៃកិច្ចសហប្រតិបត្តិការរវាងរដ្ឋសភា និងទីភ្នាក់ងារអង្គការសហប្រជាជាតិ សម្តេចបានមានប្រសាសន៍ថា គួរតែបន្តពង្រីកវិសាលភាពនៃកិច្ចសហការបន្ថែមទៀត លើការអនុវត្តអាទិភាពគន្លឹះដែលផ្សារភ្ជាប់ទៅនឹងគោលដៅអភិវឌ្ឍន៍ប្រកបដោយចីរភាព (SDGs) ជាពិសេស សមភាពយេនឌ័រ និងការផ្តល់សិទ្ធិអំណាចដល់ស្ត្រី ការធ្វើបរិវត្តកម្មឌីជីថល បញ្ញាសិប្បនិម្មិត (AI), ការប្រែប្រួលអាកាសធាតុ, ការអភិវឌ្ឍបៃតង និងការអភិវឌ្ឍយុវជន ជាដើម។សម្តេចរដ្ឋសភាធិបតី បានមានប្រសាសន៍ថា នៅក្នុងនីតិកាលទី៧នេះ រដ្ឋសភាបានផ្តោតការយកចិត្តទុកដាក់លើការពង្រឹង និងអភិវឌ្ឍស្ថាប័នជាសភាឌីជីថល និងការពង្រឹងសមត្ថភាពមន្ត្រីដើម្បីផ្តល់សេវានិងបច្ចេកទេសកាន់តែល្អប្រសើរដល់តំណាងរាស្ត្រដើម្បីបម្រើប្រជាពលរដ្ឋនៅតាមមូលដ្ឋានឱ្យបានកាន់តែប្រសើរ និងមានប្រសិទ្ធភាព។ ក្នុងនោះអគ្គលេខាធិការដ្ឋានក៏បានប្រុងប្រៀបបង្កើតអង្គភាពស្រាវជ្រាវនិងបណ្តុះបណ្តាល និងជំរុញលើកកម្ពស់សមត្ថភាពមន្ត្រី និងទីស្នាក់ការតំណាងរាស្រ្តខេត្ត ក្រុង ដែលជាអ្នកផ្តល់សេវាជាប់ជាមួយនឹងប្រជាពលរដ្ឋឱ្យកាន់រហ័ស និងមានប្រសិទ្ធភាព។ សម្តេចមានការជឿជាក់យ៉ាងមុតមាំថា បច្ចេកវិទ្យា និងនវានុវត្តន៍ គឺជាកម្លាំងចលករដ៏មានឥទ្ធិពល ក្នុងការជួយជំរុញវឌ្ឍនភាពរបស់យើង ឆ្ពោះទៅរកសេដ្ឋកិច្ចមួយដែលមានផលិតភាពខ្ពស់ និងផ្អែកលើនវានុវត្តន៍ជាគោល។លើសពីនេះទៅទៀត សម្តេចប្រធានរដ្ឋសភា បានជម្រាបជូន លោកស្រី អំពីបច្ចុប្បន្នភាពពាក់ព័ន្ធនឹងស្ថានភាពទំនាស់ព្រំដែនកម្ពុជា-ថៃ និងការសម្រេចរបស់កម្ពុជាក្នុងការផ្តល់សច្ចាប័នលើច្បាប់សមុទ្រ ក៏ដូចជាការប្រើប្រាស់យន្តការផ្សះផ្សាដោយបង្ខំ (Compulsory Conciliation) ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)។ សម្តេចបានសង្កត់ធ្ងន់លើជំហរដ៏រឹងមាំនិងមិនកែប្រែរបស់កម្ពុជាក្នុងការដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ អនុសញ្ញា សន្ធិសញ្ញាពាក់ព័ន្ធ និងកិច្ចព្រមព្រៀងទ្វេភាគីដែលមានស្រាប់។លោកស្រី វ្ល៉ាដាន់កា អាន់ដ្រេវ៉ា បានថ្លែងអំណរគុណជ្រាលជ្រៅ ជូន សម្តេចប្រធានរដ្ឋសភាដែលបានផ្តល់ឱកាសទទួលជួបពិភាក្សាការងារជាមួយលោកស្រីនៅក្នុងឱកាសនេះ និងបានសម្របសម្រួលការងារ ដល់ក្រុមការងារលោកស្រី បានបំពេញភារកិច្ចនានា ប្រកបដោយជោគជ័យនាពេលកន្លងមក។ លោកស្រីបានវាយតម្លៃខ្ពស់ចំពោះការរួមចំណែកដ៏សំខាន់របស់កម្ពុជាក្នុងរយៈពេល ២០ឆ្នាំកន្លងមកនេះ ជាពិសេសបេសកកម្មរក្សាសន្តិភាពពិភពលោក ដោយបានក្លាយពីប្រទេសដែលទទួលកងទ័ពមួកខៀវ ទៅជាប្រទេសដែលបានបញ្ជូនកងកម្លាំងមួកខៀវជាបន្តបន្ទាប់ក្រោមឆត្ររបស់អង្គការសហប្រជាជាតិ។លោកស្រី វ្ល៉ាដាន់កា អាន់ដ្រេវ៉ា បានថ្លែងនូវការកោតសរសើរ និងពេញចិត្តជាខ្លាំងចំពោះកិច្ចសហប្រតិបត្តិការដ៏រឹងមាំរវាងក្រសួង-ស្ថាប័នរបស់កម្ពុជា ពិសេសរវាងរដ្ឋសភាជាមួយនឹងទីភ្នាក់ងារនានារបស់ UN នៅកម្ពុជា លើការអនុវត្តវិស័យសំខាន់ៗរួមមាន វិស័យសុខាភិបាល ការអប់រំ បច្ចេកវិទ្យា និងការលើកកម្ពស់សមភាពយេនឌ័រ និងការផ្តល់សិទ្ធិអំណាចដល់ស្ត្រីនិងក្មេងស្រី។ ក្នុងនោះតាមរយៈកម្មវិធី «សភាត្រាប់» ដែលបានរៀបចំនៅវិមានរដ្ឋសភានាពេលថ្មីៗនេះសម្រេចបានលទ្ធផលយ៉ាងត្រចះត្រចង់។ ទីភ្នាក់ងារ UN នៅកម្ពុជានឹងបន្តពង្រឹងភាពជាដៃគូយ៉ាងសកម្មជាមួយបណ្តាក្រសួង-ស្ថាប័ន និងរដ្ឋសភាកម្ពុជា ដើម្បីគាំទ្រដល់ការអភិវឌ្ឍសង្គម សេដ្ឋកិច្ច ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ដើម្បីជួយកម្ពុជាចាកចេញពីឋានៈប្រទេសអភិវឌ្ឍន៍តិចតួចនាឆ្នាំ២០២៩ ខាងមុខ។ចំពោះបញ្ហាព្រំដែន លោកស្រីបានបង្ហាញការគាំទ្រពេញទំហឹងចំពោះជំហរសន្តិភាព និងការដោះស្រាយបញ្ហាដោយសន្តិវិធីផ្អែកលើច្បាប់អន្តរជាតិរបស់កម្ពុជា ដោយលោកស្រីបានសង្កត់ធ្ងន់ និងសម្តែងការជឿជាក់ក្នុងនាមស្ថាប័នអង្គការសហប្រជាជាតិថា ប្រទេសជិតខាងទាំងពីរ កម្ពុជានិងថៃ នឹងដោះស្រាយការខ្វែងគំនិតគ្នានេះដោយសន្តិវិធី ស្របតាមស្មារតីនៃធម្មនុញ្ញសហប្រជាជាតិ និងច្បាប់អន្តរជាតិ ដើម្បីផលប្រយោជន៍រួមនៃប្រជាជននៃប្រទេសទាំងពីរផងដែរ។ នៅក្នុងជំនួបពិភាក្សាការងារនេះ សម្តេចប្រធានរដ្ឋសភានិងលោកស្រី វ្ល៉ាដាន់កា អាន់ដ្រេវ៉ា បានឯកភាពគ្នានៅក្នុងការពង្រឹងកិច្ចសហប្រតិបត្តិការឱ្យកាន់តែសកម្មបន្ថែមទៀតដើម្បីធ្វើយ៉ាងណាឱ្យការបំពេញ មុខងាររបស់រដ្ឋសភា បម្រើប្រជាពលរដ្ឋ និងប្រទេសជាតិកាន់តែមានប្រសិទ្ធភាពឡើង៕

កម្ពុជាដាក់ចេញព្រះរាជក្រឹត្យស្តីពី «លក្ខន្តិកៈនៃអង្គគ្រូបង្រៀន» ដើម្បីកែទម្រង់អង្គគ្រូបង្រៀន លើកកម្ពស់គុណវុឌ្ឍិគ្រូបង្រៀន និងស្តង់ដារអប់រំ

ក្នុងជំហានដ៏សំខាន់មួយក្នុងការធ្វើទំនើបកម្មមុខងារសាធារណៈ ព្រះរាជាណាចក្រកម្ពុជា បានប្រកាសដាក់ចេញជាផ្លូវការនូវព្រះរាជក្រឹត្យស្តីពី «លក្ខន្តិកៈនៃអង្គគ្រូបង្រៀន» ចុះថ្ងៃទី៣០ ខែឧសភា ឆ្នាំ២០២៦ ក្នុងគោលបំណងប្រមូលផ្តុំ និងគ្រប់គ្រងបុគ្គលិកអប់រំឱ្យមានសង្គតិភាពនៅទូទាំងប្រទេស។ លក្ខន្តិកៈថ្មីនេះ មានវិសាលភាពអនុវត្តចំពោះបុគ្គលិកអប់រំទាំងអស់ ដែលបានទទួលការអប់រំ ការបណ្តុះបណ្តាលគរុកោសល្យ ឬវគ្គតម្រង់ទិស និងកំពុងបំពេញការងារក្នុងវិស័យអប់រំ ទាំងនៅតាមគ្រឹះស្ថានសិក្សា និងអង្គភាពនៃក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ។ ព្រះរាជក្រឹត្យនេះជាចំណុចរបត់ថ្មីមួយក្នុងអភិបាលកិច្ចវិស័យអប់រំ ដោយផ្លាស់ប្តូរពីការគ្រប់គ្រងបែបបែកខ្ញែក មកជាប្រព័ន្ធគ្រប់គ្រងរួមមួយ ដើម្បីកសាងធនធានមនុស្សដ៏រឹងមាំសម្រាប់អនាគតកម្ពុជា។ ព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀនដែលទើបនឹងប្រកាសដាក់ចេញ បាននាំមកនូវរចនាសម្ព័ន្ធឋានានុក្រមច្បាស់លាស់ និងយន្តការលើកទឹកចិត្តថ្មីៗសម្រាប់បុគ្គលិកអប់រំក្នុងក្របខ័ណ្ឌមន្ត្រីរាជការនៅទូទាំងប្រទេស។ យោងតាមព្រះរាជក្រឹត្យថ្មីនេះ បុគ្គលិកអប់រំត្រូវបានរៀបចំឱ្យស្ថិតក្នុងក្របខ័ណ្ឌប្រភេទ «ក» ដែលបែងចែកជា ៣ កម្រិត ផ្អែកលើគុណវុឌ្ឍ និងកម្រិតបង្រៀន រួមមាន៖ (១) ក្របខ័ណ្ឌគ្រូបង្រៀនកម្រិតឧត្តម៖ គ្រប់គ្រងបុគ្គលិកអប់រំចាប់ពីកម្រិតបរិញ្ញាបត្រឡើងទៅ ដែលបំពេញមុខងារនៅកម្រិតឧត្តមសិក្សា និងមធ្យមសិក្សាទុតិយភូមិ។ (២) ក្របខ័ណ្ឌគ្រូបង្រៀនកម្រិតមូលដ្ឋាន៖ គ្រប់គ្រងបុគ្គលិកអប់រំដែលបំពេញមុខងារនៅកម្រិតមធ្យមសិក្សាបឋមភូមិ និង(៣) ក្របខ័ណ្ឌគ្រូបង្រៀនកម្រិតបឋម៖ គ្រប់គ្រងបុគ្គលិកអប់រំនៅកម្រិតបឋមសិក្សា និងមត្តេយ្យសិក្សា។ គួរបញ្ជាក់ថា ព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀន មានអានុភាពអនុវត្តចាប់ពី ថ្ងៃទី១ ខែមករា ឆ្នាំ២០២៧ តទៅ៕

បណ្ដាញសង្គម

ព័ត៌មានថ្មីៗ

នគរបាលបង្ក្រាបកុបកម្ម បង្ខំឲ្យបាតុករចាកចេញ ក្រោយតវ៉ាបញ្ហាកង្វះសន្លឺកឆ្នោត

រដ្ឋមន្ត្រីការបរទេសរុស្ស៊ី៖ អេមីរ៉ាតអារ៉ាប់រួម និងអ៊ីរ៉ង់ ត្រូវតែវិលត្រឡប់ទៅរកការសន្ទនាវិញជាមិនខាន

ប៉ាគីស្ថាន និងអ៊ីរ៉ង់ពិភាក្សាអំពីការបន្ធូរបន្ថយស្ថានការណ៍ ចំពេលមានការកើនឡើងភាពតានតឹងថ្មីក្នុងតំបន់

គេហទំព័រក្រសួងរតនាគារ បង្ហាញថា សហរដ្ឋអាមេរិកដាក់ទណ្ឌកម្មលើប្រធានាធិបតីគុយបា

ហេសបូឡា បញ្ជាក់ថា ខ្លួនបានវាយប្រហារជាច្រើនលើក លើកងទ័ពអ៊ីស្រាអែល នៅជិតប្រាសាទ Beaufort

ឆ្មាំល្បាតឆ្នេរកោះតៃវ៉ាន់ និងចិន ស្ថិតក្នុងការប្រឈមមុខគ្នាថ្មី នៅផ្នែកខាងលើនៃសមុទ្រចិនខាងត្បូង

អ្នកតាំងលំនៅអ៊ីស្រាអែលបំផ្លាញបណ្តាញផ្គត់ផ្គង់ទឹកដែលបម្រើដល់សហគមន៍បេឌូអ៊ីនប៉ាឡេស្ទីន

កូរ៉េខាងត្បូងរំពឹងថា ចិននឹងដើរតួនាទី «ស្ថាបនា» ដោយសារទស្សនកិច្ចរបស់លោក Xi នៅកូរ៉េខាងជើង

លោក Putin នៅតែបន្តជំហរតឹងរ៉ឹង លើសង្គ្រាមនៅអ៊ុយក្រែន តែថា គំនិតរបស់លោក Trump អាចនាំមកនូវសន្តិភាព

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877