BTV NEWS

ក្រសួងវប្បធម៌ ថ្កោលទោសចំពោះការបំផ្លិចបំផ្លាញថ្មីៗនេះដោយកងកម្លាំងយោធាថៃទៅលើជណ្តើរឈើឡើងប្រាសាទខ្នារ

សម្តេចប្រធានរដ្ឋសភាកម្ពុជា លើកទឹកចិត្ត ឯកអគ្គរដ្ឋទូតតួកគីយ៉េ ជួយជំរុញការវិនិយោគ ពាណិជ្ជកម្ម និងអ្នកទេសចរណ៍ ពីតួកគីយ៉េមកកម្ពុជាបន្ថែមទៀត

មន្រី្តសុខាភិបាលនៅភ្នំពេញ បន្តសកម្មភាពអប់រំសុខភាព លុបបំបាត់ជម្រកមូសខ្លា បរិស្ថានស្អាត សុខភាពល្អដល់ពលរដ្ឋ

ទេសចរ៖ បរិស្ថានធម្មជាតិស្រស់ស្អាតរបស់កម្ពុជាបានរួមចំណែកខ្លាំងទាក់ទាញទេសចរអន្តរជាតិ

ព័ត៌មានជាតិ

គណៈកម្មការទី៧នៃរដ្ឋសភា ចុះស្វែងយល់ពីស្ថានភាពអប់រំ និងបញ្ហាប្រឈមក្នុងស្រុកកំពង់ត្រឡាច ខេត្តកំពង់ឆ្នាំង

កំពង់ឆ្នាំង៖ នារសៀលថ្ងៃទី៣ ខែមិថុនា ឆ្នាំ២០២៦ ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា បានដឹកនាំគណៈប្រតិភូចុះជួបពិភាក្សាការងារជាមួយនាយកវិទ្យាល័យ និងអនុវិទ្យាល័យ ក្នុងស្រុកកំពង់ត្រឡាច ដើម្បីស្វែងយល់ផ្ទាល់ពីស្ថានភាពអប់រំ និងសភាពការណ៍ជាក់ស្តែងនៅមូលដ្ឋាន។ កិច្ចពិភាក្សានេះ មានការអមដំណើរដោយ ឯកឧត្តម ស៊ីវ រុន ប្រធានក្រុមប្រឹក្សាខេត្ត រួមជាមួយថ្នាក់ដឹកនាំនៃមន្ទីរអប់រំ យុវជន និងកីឡាខេត្តកំពង់ឆ្នាំងផងដែរ។ គោលបំណងសំខាន់នៃកិច្ចពិភាក្សានេះ គឺដើម្បីស្វែងយល់ពីសភាពការណ៍ពិតក្នុងការអនុវត្តវិធានការនានា ដែលដាក់ចេញដោយក្រសួង-ស្ថាប័នពាក់ព័ន្ធ និងស្វែងយល់ពីការលំបាក ក៏ដូចជាបញ្ហាប្រឈមនៅតាមសាលារៀន ដើម្បីរួមគ្នាស្វែងរកដំណោះស្រាយប្រកបដោយប្រសិទ្ធភាព និងទាន់ពេលវេលា។ មានប្រសាសន៍ក្នុងឱកាសនោះ គណៈកម្មការទី៧ នៃរដ្ឋសភា បានសម្តែងការវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកនាយកសាលា និងមន្ត្រីអប់រំទាំងអស់ក្នុងស្រុកកំពង់ត្រឡាច ដែលបានចូលរួមយ៉ាងសកម្មក្នុងការអនុវត្តកម្មវិធីដែលបានដាក់ចេញដោយក្រសួងអប់រំ យុវជន និងកីឡា ក្នុងការផ្តល់ចំណេះដឹងដល់សិស្សានុសិស្សតាមគ្រប់លទ្ធភាព។ គណៈកម្មការទី៧ បានផ្តាំផ្ញើ និងលើកទឹកចិត្តដល់អាជ្ញាធរស្រុក និងគណៈគ្រប់គ្រងសាលារៀនទាំងអស់ ក្នុងករណីជួបការលំបាក អាចរៀបចំជាសំណើ ឬសំណូមពរនានាពាក់ព័ន្ធនឹងវិស័យអប់រំ និងវិស័យផ្សេងៗទៀតដែលស្ថិតក្នុងសមត្ថកិច្ចរបស់គណៈកម្មការ ដើម្បីបញ្ជូនមកកាន់រដ្ឋសភា។ អាជ្ញាធរនិងមន្ត្រីអប់រំគឺជាអ្នកប្រតិបត្តិផ្ទាល់ ដូច្នេះរាល់ព័ត៌មាន និងសំណូមពរទាំងនោះ នឹងក្លាយជាមូលដ្ឋានទិន្នន័យដ៏សំខាន់សម្រាប់គណៈកម្មការក្នុងការពិនិត្យ និងជួយអន្តរាគមន៍។ ដើម្បីជាការលើកទឹកចិត្ត គណៈកម្មការទី៧ នៃរដ្ឋសភា ក៏បានឧបត្ថម្ភថវិកាដល់វិទ្យាល័យ និងអនុវិទ្យាល័យទាំង ១៣សាលា ក្នុងស្រុកកំពង់ត្រឡាច ដោយក្នុងមួយសាលាទទួលបានថវិកាចំនួន ១,០០០,០០០ រៀល (សរុបថវិកាឧបត្ថម្ភទាំងអស់ចំនួន ១៣,០០០,០០០ រៀល)៕

គ្រូពេទ្យកាន់តែល្អ ការថែទាំកាន់តែមានសុវត្ថិភាព៖ ព្រះរាជក្រឹត្យថ្មីធានានូវសេវាថែទាំសុខភាពប្រកបដោយក្រមសីលធម៌ និងគុណភាពខ្ពស់សម្រាប់ប្រជាពលរដ្ឋ

ក្នុងជំហានដ៏ធំមួយឆ្ពោះទៅរកការធ្វើទំនើបកម្មរដ្ឋ ព្រះរាជក្រឹត្យស្តីពី «លក្ខន្តិកៈនៃអង្គសុខាភិបាល» ត្រូវបានប្រកាសឱ្យប្រើប្រាស់ជាផ្លូវការ ក្នុងគោលបំណងកែទម្រង់ស៊ីជម្រៅលើការគ្រប់គ្រងមន្ត្រីសុខាភិបាលនៅកម្រិតថ្នាក់ជាតិ និងថ្នាក់ក្រោមជាតិ។ ប្រជាពលរដ្ឋកម្ពុជា នឹងទទួលបានការលើកកម្ពស់គួរឱ្យកត់សម្គាល់លើសេវាសុខាភិបាលសាធារណៈ ពោលគឺយកការថែទាំសុខភាពសាធារណៈ ការទទួលខុសត្រូវ និងសុវត្ថិភាពអ្នកជំងឺជាចម្បង។សម្រាប់ប្រជាពលរដ្ឋទូទៅដែលទៅទទួលសេវានៅមន្ទីរពេទ្យរដ្ឋ ឬមណ្ឌលសុខភាព កំណែទម្រង់នេះមានន័យថាជាការថែទាំប្រកបដោយសមត្ថភាពជាងមុន។ មាត្រា៤៦ នៃព្រះរាជក្រឹត្យនេះ តម្រូវឱ្យមន្ត្រីសុខាភិបាលទាំងអស់ចូលរួមជាកំហិតនូវវគ្គបណ្តុះបណ្តាល និងសិក្ខាសាលា ដើម្បីធ្វើបច្ចុប្បន្នកម្មចំណេះដឹង បង្កើនសមត្ថភាពវិជ្ជាជីវៈ និងជំនាញគ្រប់គ្រងរបស់ពួកគេ។ អ្វីដែលកាន់តែសំខាន់នោះគឺ ព្រះរាជក្រឹត្យនេះ បានតម្រូវឱ្យគោរពយ៉ាងតឹងរ៉ឹងនូវក្រមសីលធម៌វិជ្ជាជីវៈសុខាភិបាល និងក្រមប្រតិបត្តិមន្ត្រីរាជការស៊ីវិល។ ដើម្បីការពារផលប្រយោជន៍សាធារណៈ ព្រះរាជក្រឹត្យនេះ បានដាក់បញ្ចូលនូវចំណាត់ការដ៏ម៉ឺងម៉ាត់។ ក្នុងករណីដែលមន្ត្រីសុខាភិបាលប្រព្រឹត្តកំហុសឆ្គងក្នុងវិជ្ជាជីវៈ ប្រធានអង្គភាពគ្រប់គ្រងផ្ទាល់ត្រូវបានផ្តល់អំណាចឱ្យសម្រេចផ្អាកមុខងារមន្ត្រីនោះភ្លាមៗ ដើម្បីធានានូវផលប្រយោជន៍សាធារណៈ ខណៈពេលដែលនីតិវិធីបញ្ចប់មុខតំណែងត្រូវបានរៀបចំ។បន្ថែមពីនេះ ព្រះរាជក្រឹត្យនេះរួមបញ្ចូលទាំងការលើកទឹកចិត្តជាយុទ្ធសាស្ត្រ ដូចជាការគិតបន្ថែមនូវអតីតភាពការងារ សម្រាប់មន្ត្រីសុខាភិបាលដែលបម្រើការងារនៅតំបន់ដាច់ស្រយាល ឬតំបន់គ្រោះថ្នាក់។ នេះធានាថាប្រជាពលរដ្ឋងាយរងគ្រោះនៅតាមជនបទនឹងទទួលបានសេវាពីអ្នកជំនាញវេជ្ជសាស្ត្រដែលពោរពេញដោយសមត្ថភាព ដែលធ្វើឱ្យសេវាថែទាំសុខភាពសាធារណៈប្រកបដោយគុណភាពអាចចូលទៅដល់ប្រជាពលរដ្ឋកម្ពុជាគ្រប់រូប ទោះពួកគេរស់នៅទីណាក៏ដោយ។គួរបញ្ជាក់ថា ព្រះរាជក្រឹត្យស្តីពី «លក្ខន្តិកៈនៃអង្គសុខាភិបាល» មានអានុភាពអនុវត្តចាប់ពី ថ្ងៃទី១ ខែមករា ឆ្នាំ២០២៧ តទៅ៕

សម្ដេចតេជោ បង្ហាញចំណារលើលិខិតរបស់អគ្គនាយកដ្ឋានពន្ធដារដែលជាជំហានចំណុចខ្លាំង ដើម្បីជោគជ័យលើកំណែទម្រង់រដ្ឋ និងហិរញ្ញវត្ថុសាធារណៈ

ភ្នំពេញ៖សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា នៅថ្ងៃទី៤ ខែមិថុនា ឆ្នាំ២០២៦នេះ បង្ហាញចំណារលើលិខិតរបស់ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ទាក់ទងដល់កំណែទម្រង់ហិរញ្ញវត្ថុសាធារណៈ ពិសេសការប្រមូលចំណូលចូលថវិកាជាតិ។ សម្ដេចតេជោ បានសរសេរថា សម្ដេចទើបរកឃើញចំណាររបស់ សម្ដេចលើលិខិតរបស់ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ពន្ធដារ ទាក់ទងដល់កំណែទម្រង់ហិរញ្ញវត្ថុសាធារណៈ ពិសេសការប្រមូលចំណូលចូលថវិកាជាតិ។ សម្ដេចតេជោបានសរសេរថា ការលូកដៃរបស់នាយករដ្ឋមន្ត្រី ចូលគាំទ្រអង្គភាពពន្ធដារមិនត្រឹមតែមិនមែនជាកំហុសនោះទេ ប៉ុន្តែវាបង្ហាញនូវចំណុចខ្លាំងដើម្បីជោគជ័យកំណែទម្រង់រដ្ឋ ដែលក្នុងនោះកំណែទម្រង់ហិរញ្ញវត្ថុសាធារណៈជាគន្លឹះសម្រាប់ជោគជ័យនៃកំណែទម្រង់វិស័យផ្សេងទៀត។ សម្ដេចតេជោបានបញ្ជាក់ថាចំណារទាំង៤ដែលសម្ដេចបានចារនៅលើលិខិតរបស់ ឯកឧត្តម គង់ វិបុលនេះគឺជាចលកររុញច្រានកម្ពុជាឲ្យចេញផុតពីកង្វះសាច់ប្រាក់បើកបៀវត្ស (ប្រាក់ខែតិចហើយអត់សាច់ប្រាក់បើកជូនទៀត) មកជាមានសាច់ប្រាក់បើកជាមួយ និងការបង្កើនបៀវត្សជូនមន្ត្រីរាជការ កងកម្លាំង ប្រដាប់អាវុធ។ យើងមានសាច់ប្រាក់សម្រាប់ការវិនិយោគសាធារណៈដូចជា ផ្លូវស្ពាន ប្រឡាយទឹក សាលារៀន មន្ទីរពេទ្យ និងការចំណាយលើការអនុវត្តន៍គោលនយោបាយគាំពារសង្គម ។ល។ សម្ដេចតេជោបានបញ្ជាក់ថា៖«ភាពធន់ខាងសេដ្ឋកិច្ចរបស់យើងបង្ហាញច្បាស់ពីដំណាក់ការកូវីដ១៩ ឆ្នាំ២០២០ រហូតមកដល់ពេលនេះ ដែលយើងមានសាច់ប្រាក់គ្រប់គ្រាន់ដំឡើងបៀវត្ស និងបើកបៀវត្តន៍២ដងក្នុងមួយខែជាមួយ និងការអនុវត្តន៍គោលនយោបាយគាំពារសង្គម និងការវិនិយោគសាធារណៈផ្សេងទៀត»។ សម្ដេចតេជោបានរម្លឹកឡើងវិញថា ចំណាររបស់សម្ដេចនាពេលនោះមុតជាងផ្លែដាវទៅទៀត តែសម្ដេចមិនខ្លាច មិនចុះញ៉ម ព្រោះវាជាផលប្រយោជន៍ជាតិ និងប្រជាជន។ ម្យ៉ាងទៀតប្រទេសកម្ពុជា ខុសប្លែកពី ប្រទេសផ្សេងទៀត ព្រោះយើងត្រូវរៀបចំឡើងវិញទាំងអស់ក្រោយរបបប៉ុលពត ដូចនេះតម្រូវឲ្យនាយករដ្ឋមន្ត្រី មានសេចក្តីក្លាហានហ៊ានធ្វើ និងហ៊ានទទួលខុសត្រូវ។ ចំណាររបស់សម្តេចតេជោ ហ៊ុន សែន កាលពីថ្ងៃទី៤ ខែកក្កដា ឆ្នាំ២០១៤ ក្នុងពេលសម្តេចនៅជានាយករដ្ឋមន្ត្រីនៃកម្ពុជា ដែលបានចារលើលិខិតរបស់ឯកឧត្តម គង់ វិបុល អគ្គនាយកពន្ធដារ នាពេលនេះ សម្តេចបានណែនាំឱ្យអគ្គនាយកដ្ឋានពន្ធដារ បន្តការងារកំណែទម្រង់ពន្ធដារ ដោយក្តីក្លាហាន កុំមានការភ័យខ្លាច ឬបារម្ភពីសម្ពាធពីគ្រប់មជ្ឈដ្ឋានទាំងអស់។ ចំណារដ៏មុតរបស់សម្តេចតេជោបានសរសេរថា៖ «អ្នកអាច Lobby ឱ្យខ្ញុំយល់ខុសមិនទាន់កើត ឬចាប់ជាតិទេ កុំបារម្ភ»។ សូមជម្រាបថា នៅថ្ងៃទី១០ ខែកញ្ញា ឆ្នាំ២០១២ លោក គង់ វិបុល ដែលកាលនោះជារដ្ឋលេខាធិការក្រសួងសេដ្ឋកិច្ចទី១, អនុប្រធានក្រុមប្រឹក្សាអភិវឌ្ឍន៍កម្ពុជា និងជាទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី ត្រូវបានប្រកាសចូលកាន់តំណែងជា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ រហូតមកដល់សព្វថ្ងៃនេះ ដែលសម្ដេចតេជោចាត់ទុកថា សម្ដេចបានជ្រើសរើសមនុស្សត្រូវលើការដឹកនាំការងារវិស័យពន្ធដារកម្ពុជានេះ៕

សម្ដេចធិបតី អំពាវនាវដល់ពលរដ្ឋ និងទេសចរចូលរួមថែរក្សាបរិស្ថាន ពេលធ្វើដំណើរកម្សាន្តនៅតំបន់ភ្នំខ្នងផ្សារ និងតំបន់ទេសចរណ៍ធម្មជាតិផ្សេងៗ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអំពាវនាវដល់ប្រជាពលរដ្ឋ និងទេសចរចូលរួមថែរក្សាបរិស្ថាន ពេលធ្វើដំណើរកម្សាន្តនៅតំបន់ភ្នំខ្នងផ្សារ និងតំបន់ទេសចរណ៍ធម្មជាតិផ្សេងៗ ដោយមិនត្រូវបោះចោលសំរាម ប្លាស្ទិក ឬសំណល់ផ្សេងៗផ្ដេសផ្ដាស ដើម្បីរក្សាសោភណភាពធម្មជាតិ និងទាក់ទាញភ្ញៀវទេសចរបន្ថែម។សម្តេចធិបតីនាយករដ្ឋមន្ត្រី បានអំពាវនាវបែបនេះ ក្នុងពិធីសម្ពោធអគារនិងប្រគល់សញ្ញាបត្រនៅវិទ្យាស្ថានជាតិអប់រំកាយនិងកីឡាកាលពីថ្ងៃទី៣ ខែមិថុនា ឆ្នាំ២០២៦ ម្សិលមិញនេះ។ ក្នុងឱកាសនោះសម្ដេចធិបតីបានថ្លែងថា រាជរដ្ឋាភិបាលកំពុងជំរុញការអភិវឌ្ឍតំបន់រមណីយដ្ឋានធម្មជាតិភ្នំខ្នងផ្សារនិងតំបន់ទេទឹកពុះ ដោយផ្តោតលើរូបមន្តអភិវឌ្ឍន៍ដែលដឹកនាំដោយសហគមន៍ ដើម្បីបង្កើនចំណូលជូនប្រជាពលរដ្ឋ ព្រមទាំងធានាការអភិរក្សធនធានធម្មជាតិឱ្យបានគង់វង្ស។ សម្តេចធិបតី បានបញ្ជាក់ថា ការចុះពិនិត្យដោយផ្ទាល់នៅតំបន់ខ្នងផ្សារ និងទេទឹកពុះ ដើម្បីវាយតម្លៃវឌ្ឍនភាពគម្រោងអភិវឌ្ឍន៍ជាក់ស្តែង ពោលគឺមិនពឹងផ្អែកតែលើរបាយការណ៍របស់មន្ត្រីនោះទេ។ សម្តេចធិបតីបានអះអាងថា ការតាមដានផ្ទាល់នេះមានគោលបំណងធានាថា អនុសាសន៍ និងគោលនយោបាយដែលលោកដាក់ចេញ បានអនុវត្តដល់គោលដៅនៅមូលដ្ឋាន។ សម្តេចធិបតីបានកោតសរសើរដល់ក្រសួង និងអាជ្ញាធរពាក់ព័ន្ធ ដែលបានសហការគ្នាអភិវឌ្ឍតំបន់នេះ ដោយចាត់ទុកថាវឌ្ឍនភាពដែលបានសម្រេចលទ្ធផលល្អប្រសើរ និងសមស្របនឹងទិសដៅអភិវឌ្ឍន៍ទេសចរណ៍ធម្មជាតិរបស់ប្រទេស។ ជាមួយគ្នានេះ សម្តេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋ និងទេសចរចូលរួមថែរក្សាបរិស្ថាន ពេលធ្វើដំណើរកម្សាន្តនៅតំបន់ភ្នំខ្នងផ្សារ និងតំបន់ទេសចរណ៍ធម្មជាតិផ្សេងៗ ដោយមិនត្រូវបោះចោលសំរាម ប្លាស្ទិក ឬសំណល់ផ្សេងៗផ្ដេសផ្ដាស ដើម្បីរក្សាសោភណភាពធម្មជាតិ និងទាក់ទាញភ្ញៀវទេសចរបន្ថែម។ សម្តេចធិបតី បានរំលឹកពីបទពិសោធចុះទៅតំបន់ខ្នងផ្សារកាលពីឆ្នាំ២០២៥ និងការចុះពិនិត្យជាបន្តបន្ទាប់ ដោយអះអាងថា ការអភិវឌ្ឍត្រូវផ្តោតលើការផ្តល់អំណាចដល់សហគមន៍មូលដ្ឋានក្លាយជាម្ចាស់ពិតប្រាកដនៅតំបន់របស់ខ្លួន។ សម្តេចធិបតីបានបន្ថែមថា រូបមន្តនេះបានជួយប្រជាពលរដ្ឋប្តូរពីការពឹងផ្អែកលើការកាប់ឈើនិងធនធានព្រៃឈើមកជាការបង្កើតចំណូលពីវិស័យទេសចរណ៍ ដូចជាការលក់ដូរ និងសេវាបដិសណ្ឋារកិច្ចជាដើម។ សម្តេចធិបតីបានបញ្ជាក់ថា ការវិនិយោគឯកជននឹងត្រូវរៀបចំសមស្រប ដោយមិនជំនួសតួនាទីសហគមន៍ទេ ប៉ុន្តែជួយគាំទ្រនិងបំពេញបន្ថែម ដើម្បីបង្កើតប្រព័ន្ធសេដ្ឋកិច្ចទេសចរណ៍ដែលមានតុល្យភាព។ លោកបានណែនាំដល់ក្រសួងជំនាញនិងអាជ្ញាធរពាក់ព័ន្ធបន្តអភិវឌ្ឍហេដ្ឋារចនាសម្ព័ន្ធ ដូចជាផ្លូវ កន្លែងសម្រាក កន្លែងងូតទឹក និងតំបន់សេវាកម្មសហគមន៍ ដើម្បីបង្កើនភាពទាក់ទាញទេសចរណ៍។ សម្តេចធិបតីបានថ្លែងថា៖«យើងបានដកអាជ្ញាប័ណ្ណវិនិយោគឯកជនគម្រោងតូចៗនៅទីនោះ ព្រោះប្រជាសហគមន៍គាត់បារម្ភ គាត់ខ្លាចការវិនិយោគមិនស្រួលប៉ះដល់អាជីពរបស់គាត់។ អ៊ីចឹងយើងកែសម្រួលការវិនិយោគឯកជន ដោយផ្ដល់ទីតាំងណាដែលជួយគាំទ្រគ្នាទៅវិញទៅមក»។ សម្តេចធិបតីបានបន្ថែមថា ការអភិវឌ្ឍតំបន់ទេសចរណ៍ធម្មជាតិមិនត្រឹមតែជួយលើកកម្ពស់សេដ្ឋកិច្ចមូលដ្ឋានប៉ុណ្ណោះទេ ប៉ុន្តែថែមទាំងជួយពង្រឹងការការពារព្រៃឈើ និងធនធានធម្មជាតិ ដោយសារប្រជាពលរដ្ឋមានជម្រើសអាជីពថ្មី និងកាត់បន្ថយសកម្មភាពប៉ះពាល់ដល់បរិស្ថាន។ សម្តេចធិបតី ហ៊ុន ម៉ាណែត បានសង្កត់ធ្ងន់ថា ការអភិវឌ្ឍតំបន់ខ្នងផ្សារនិងទេទឹកពុះ គឺជាគំរូសម្រាប់ការអភិវឌ្ឍសេដ្ឋកិច្ចមូលដ្ឋានដែលភ្ជាប់ជាមួយការអភិរក្សធម្មជាតិ ដោយរដ្ឋាភិបាលនឹងបន្តអនុវត្តគម្រោងស្រដៀងគ្នានៅតំបន់សក្តានុពលផ្សេងៗទៀតនៅទូទាំងប្រទេស។ សូមជម្រាបថា ភ្នំខ្នងផ្សារជាតំបន់ទេសចរណ៍ធម្មជាតិដ៏ធំមួយដែលមានទីតាំងនៅភូមិតាំងបំពង ឃុំតាសាល ស្រុកឱរ៉ាល់ ខេត្តកំពង់ស្ពឺ។ តំបន់នេះជាតំបន់ទេសចរណ៍ធម្មជាតិដ៏ពេញនិយមសម្រាប់ទេសចរដែលចូលចិត្តដើរកម្សាន្តតាមព្រៃភ្នំនិងតំបន់ធម្មជាតិដ៏ស្រស់ត្រកាល។ ចំណែកទេទឹកពុះ ជាតំបន់ទេសចរណ៍ធម្មជាតិដ៏កម្រមួយ ដែលមានបាតុភូតធម្មជាតិចម្លែក ដោយទឹកមានសីតុណ្ហភាពខ្ពស់រហូតដល់៧០អង្សារសេ និងជាតំបន់ពោរពេញដោយស្មៅខ្ពស់ៗដ៏ស្រស់ស្អាត៕

សម្ដេចតេជោ ហ៊ុន សែន៖ ភាពធន់សេដ្ឋកិច្ចកម្ពុជាបង្ហាញច្បាស់ចាប់តាំងពីដំណាក់ការកូវីដ-១៩ រហូតមកដល់ពេលនេះ ខណៈរដ្ឋមានសាច់ប្រាក់គ្រប់គ្រាន់ដំឡើងបៀវត្ស និងបើកបៀវត្សពីរដងក្នុងមួយខែ

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានមានប្រសាសន៍បញ្ជាក់ថា ភាពធន់ខាងសេដ្ឋកិច្ចរបស់កម្ពុជា បានបង្ហាញច្បាស់ចាប់តាំងពីដំណាក់ការកូវីដ-១៩ រហូតមកដល់ពេលនេះ ខណៈរាជរដ្ឋាភិបាលមានសាច់ប្រាក់គ្រប់គ្រាន់ដំឡើងបៀវត្ស និងបើកបៀវត្សពីរដងក្នុងមួយខែ។សម្ដេចតេជោ ហ៊ុន សែន មានប្រសាសន៍បញ្ជាក់បែបនេះ តាមរយៈសារលើបណ្ដាញសង្គមហ្វេសប៊ុកនៅរសៀលថ្ងៃទី៤ ខែមិថុនា ឆ្នាំ២០២៦នេះ។ សម្ដេចតេជោបានសរសេរថា សម្ដេចទើបរកឃើញចំណាររបស់ សម្ដេចលើលិខិតរបស់ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ទាក់ទងដល់កំណែទម្រង់ហិរញ្ញវត្ថុសាធារណៈ ពិសេសការប្រមូលចំណូលចូលថវិកាជាតិ។ សម្ដេចតេជោបានសរសេរថា ការលូកដៃរបស់នាយករដ្ឋមន្ត្រី ចូលគាំទ្រអង្គភាពពន្ធដារមិនត្រឹមតែមិនមែនជាកំហុសនោះទេ ប៉ុន្តែវាបង្ហាញនូវចំណុចខ្លាំង ដើម្បីជោគជ័យកំណែទម្រង់រដ្ឋ ដែលក្នុងនោះកំណែទម្រង់ហិរញ្ញវត្ថុសាធារណៈជាគន្លឹះសម្រាប់ជោគជ័យនៃកំណែទម្រង់វិស័យផ្សេងទៀត។ សម្ដេចតេជោបានបញ្ជាក់ថា ចំណារទាំង៤ដែលសម្ដេចបានចារនៅលើលិខិតរបស់ ឯកឧត្តម គង់ វិបុលនេះគឺជាចលកររុញច្រានកម្ពុជាឲ្យចេញផុតពីកង្វះសាច់ប្រាក់បើកបៀវត្ស (ប្រាក់ខែតិចហើយអត់សាច់ប្រាក់បើកជូនទៀត) មកជាមានសាច់ប្រាក់បើកជាមួយ និងការបង្កើនបៀវត្សជូនមន្ត្រីរាជការ កងកម្លាំង ប្រដាប់អាវុធ។ យើងមានសាច់ប្រាក់សម្រាប់ការវិនិយោគសាធារណៈដូចជា ផ្លូវស្ពាន ប្រឡាយទឹក សាលារៀន មន្ទីរពេទ្យ និងការចំណាយលើការអនុវត្តន៍គោលនយោបាយគាំពារសង្គម ។ល។ សម្ដេចតេជោបានបញ្ជាក់ថា «ភាពធន់ខាងសេដ្ឋកិច្ចរបស់យើងបង្ហាញច្បាស់ពីដំណាក់ការកូវីដ១៩ ឆ្នាំ២០២០ រហូតមកដល់ពេលនេះ ដែលយើងមានសាច់ប្រាក់គ្រប់គ្រាន់ដំឡើងបៀវត្ស និងបើកបៀវត្ស ២ដងក្នុងមួយខែ ជាមួយ និងការអនុវត្តន៍គោលនយោបាយគាំពារសង្គម និងការវិនិយោគសាធារណៈផ្សេងទៀត»។ សម្ដេចតេជោបានរម្លឹកឡើងវិញថា ចំណាររបស់សម្ដេចនាពេលនោះមុតជាងផ្លែដាវទៅទៀត តែសម្ដេចមិនខ្លាច មិនចុះញ៉ម ព្រោះវាជាផលប្រយោជន៍ជាតិ និងប្រជាជន។ ម្យ៉ាងទៀតប្រទេសកម្ពុជា ខុសប្លែកពី ប្រទេសផ្សេងទៀត ព្រោះយើងត្រូវរៀបចំឡើងវិញទាំងអស់ក្រោយរបបប៉ុលពត ដូចនេះតម្រូវឲ្យនាយករដ្ឋមន្ត្រី មានសេចក្តីក្លាហានហ៊ានធ្វើ និងហ៊ានទទួលខុសត្រូវ។ ចំណាររបស់សម្តេចតេជោ ហ៊ុន សែន កាលពីថ្ងៃទី៤ ខែកក្កដា ឆ្នាំ២០១៤ ក្នុងពេលសម្តេចនៅជានាយករដ្ឋមន្ត្រីនៃកម្ពុជា ដែលបានចារលើលិខិតរបស់ឯកឧត្តម គង់ វិបុល អគ្គនាយកពន្ធដារ នាពេលនេះ សម្តេចបានណែនាំឱ្យអគ្គនាយកដ្ឋានពន្ធដារ បន្តការងារកំណែទម្រង់ពន្ធដារ ដោយក្តីក្លាហាន កុំមានការភ័យខ្លាច ឬបារម្ភពីសម្ពាធពីគ្រប់មជ្ឈដ្ឋានទាំងអស់។ ចំណារដ៏មុតរបស់សម្តេចតេជោបានសរសេរថា៖ «អ្នកអាច Lobby ឱ្យខ្ញុំយល់ខុសមិនទាន់កើត ឬចាប់ជាតិទេ កុំបារម្ភ»។ សូមជម្រាបថា នៅថ្ងៃទី១០ ខែកញ្ញា ឆ្នាំ២០១២ លោក គង់ វិបុល ដែលកាលនោះជារដ្ឋលេខាធិការក្រសួងសេដ្ឋកិច្ចទី១, អនុប្រធានក្រុមប្រឹក្សាអភិវឌ្ឍន៍កម្ពុជា និងជាទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី ត្រូវបានប្រកាសចូលកាន់តំណែងជា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ រហូតមកដល់សព្វថ្ងៃនេះ ដែលសម្ដេចតេជោចាត់ទុកថា សម្ដេចបានជ្រើសរើសមនុស្សត្រូវលើការដឹកនាំការងារវិស័យពន្ធដារកម្ពុជានេះ៕

NEA បន្តរៀបចំសិក្ខាសាលាស្ដីពី៖ ការរៀបចំផែនការអាជីព និងការជ្រើសរើសជំនាញសិក្សាដល់សិស្សវិទ្យាល័យនៅខណ្ឌព្រែកព្នៅ

នាថ្ងៃទី៣ ខែមិថុនា ឆ្នាំ២០២៦នេះ ទីភ្នាក់ងារជាតិមុខរបរ និងការងាររ (NEA) នៃក្រសួងការងារនិងបណ្តុះបណ្តាលវិជ្ជាជីវៈ ដឹកនាំដោយលោក សាម៉េន សុខា អនុប្រធាន NEA តំណាងលោកជំទាវប្រធាន សហការជាមួយរដ្ឋបាលខណ្ឌព្រែកព្នៅ សមាគមសិស្ស និស្សិតបញ្ញាវន្តក្មេងវត្តខណ្ឌព្រែកព្នៅ និង ស.ស.យ.ក. ខណ្ឌ បានរៀបចំសិក្ខាសាលាស្ដីពី៖ ការរៀបចំផែនការអាជីព និងការជ្រើសរើសជំនាញសិក្សា ដល់សិស្សានុសិស្សមធ្យមសិក្សាទុតិយភូមិ ដែលត្រៀមនឹងបញ្ចប់ការសិក្សានៅថ្នាក់វិទ្យាល័យ នៅវិទ្យាល័យ បឹងប្រិយ៍ ស្ថិតនៅខណ្ឌព្រែកព្នៅ ដែលមានអ្នកចូលរួមសរុប ៧២នាក់។សិក្ខាសាលានេះរៀបចំឡើងក្នុងគោលបំណងតម្រង់ទិសដល់សិស្សមធ្យមសិក្សាទុតិយភូមិ និងការចែករំលែកពីគន្លឹះសំខាន់ៗក្នុងការត្រៀមខ្លួនជ្រើសរើសជំនាញសិក្សាសម្រាប់ថ្នាក់ឧត្តមសិក្សា ការរៀបចំផែនការអាជីព និងការសិក្សា និងព័ត៌មានទីផ្សារការងារដល់យុវជនផងដែរ។

ចិនស្នើឱ្យកម្ពុជាពន្លឿនការតភ្ជាប់ប្រព័ន្ធបញ្ជរតែមួយ និងប្រព័ន្ធផ្លាស់ប្តូរទិន្នន័យ ដើម្បីសម្រួលការធ្វើពាណិជ្ជកម្ម

រដ្ឋមន្រ្តីនៃអគ្គរដ្ឋបាលគយ នៃសាធារណរដ្ឋប្រជាមានិតចិន ស្នើឱ្យកម្ពុជាពន្លឿនការតភ្ជាប់នូវប្រព័ន្ធបញ្ជរតែមួយ និងប្រព័ន្ធផ្លាស់ប្តូរ ទិន្នន័យដើមកំណើតទំនិញ តាមទម្រង់អេឡិចត្រូនិក និងផ្តល់គាំទ្រនូវកិច្ចសហប្រតិបត្តិការរដ្ឋបាលគយឆ្លាតវៃរបស់ខ្លួន ដើម្បីពន្លឿន និង សម្រួលពាណិជ្ជកម្មនៃប្រទេសទាំងពីរ។លោកជំទាវ Sun Meijun រដ្ឋមន្រ្តីនៃអគ្គរដ្ឋបាលគយ នៃសាធារណរដ្ឋប្រជាមានិតចិន ជំនួបពិភាក្សាការងារជាមួយ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី៣ ម្សិលមិញនេះ, លោកជំទាវបាន ជម្រាបជូនអំពីលទ្ធផលនៃ “កិច្ចសន្ទនារវាងអគ្គរដ្ឋបាលគយនៃសាធារណរដ្ឋប្រជាមានិតចិន និងអគ្គនាយកនៃរដ្ឋបាលគយអាស៊ានលើក ទី២៤” ដោយអាស៊ាន និងចិនបានសម្រេចចេញនូវ “សេចក្តីថ្លែងការណ៍រួម”។ ជាមួយគ្នានេះ, ថ្ងៃទី៤ ខែមិថុនានេះ, អគ្គរដ្ឋបាលគយ នៃសាធារណរដ្ឋប្រជាមានិតចិន និងអគ្គនាយកនៃរដ្ឋបាលគយអាស៊ាន នឹងរៀបចំពិធីចុះហត្ថលេខាលើកិច្ចព្រមព្រៀង ការទទួលស្គាល់គ្នា ទៅវិញទៅមក នៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (AEO) រវាងរដ្ឋបាលគយកម្ពុជា និងរដ្ឋបាលគយចិនផងដែរ ។លោកជំទាវរដ្ឋមន្រ្តី ក៏បានបញ្ជាក់ជូនអំពីការខិតខំសម្របសម្រួលនីតិវិធី សម្រាប់ការនាំចូលផលិតផលកសិកម្មពីកម្ពុជាទៅកាន់ ទីផ្សារចិន តាមរយៈការជំរុញលើកទឹកចិត្តឱ្យមានការនាំចេញផលិតផលកសិកម្មដូចជា ចេក និងធុរេនពីកម្ពុជា ទៅចិនឱ្យបានច្រើនបន្ថែម ទៀត និងស្នើឱ្យកម្ពុជាពន្លឿនការតភ្ជាប់នូវប្រព័ន្ធបញ្ជរតែមួយ និងប្រព័ន្ធផ្លាស់ប្តូរទិន្នន័យដើមកំណើតទំនិញ តាមទម្រង់អេឡិចត្រូនិក និង ផ្តល់គាំទ្រនូវកិច្ចសហប្រតិបត្តិការរដ្ឋបាលគយឆ្លាតវៃរបស់ខ្លួន ដើម្បីទទួលបានលទ្ធផល និងផលប្រយោជន៍រួមគ្នា ក្នុងការពន្លឿន និង សម្រួលពាណិជ្ជកម្មនៃប្រទេសទាំងពីរ។ក្នុងជំនួបនោះ, ឯកឧត្តមអគ្គបណ្ឌិតសភាចារ្យ បានកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការល្អ រវាងរដ្ឋបាល គយនៃប្រទេសទាំងពីរ នាពេលកន្លងមក ជាពិសេសការផ្តល់ជំនួយបច្ចេកទេសរបស់រដ្ឋបាលគយចិន លើការងារបច្ចេកទេសគយ កិច្ច សម្រួលពាណិជ្ជកម្ម ការកសាងសមត្ថភាពធនធានមនុស្សនិងអភិវឌ្ឍន៍ស្ថាប័ន គំនិតផ្តួចផ្តើមរដ្ឋបាលគយឆ្លាតវៃបញ្ញាសិប្បនិម្មិត ដើម្បី ជំរុញពង្រឹងនិងពង្រីកបន្ថែម ការតភ្ជាប់ក្នុងតំបន់សម្រាប់កម្ពុជា ចិននិងសមាជិកអាស៊ានជាដើម ។ ឯកឧត្តមបានថ្លែងអំណរគុណ ចំពោះរដ្ឋាភិបាលសាធារណរដ្ឋប្រជាមានិតចិន ដែលបាននិងបន្តគាំទ្រដល់ការអភិវឌ្ឍសេដ្ឋកិច្ច និងកិច្ចសម្រួលពាណិជ្ជនៅកម្ពុជា។ភាគីទាំងពីរក៏បានពិភាក្សាអំពីការខិតខំបន្ថែមទៀត ក្នុងការជំរុញកំណើនពាណិជ្ជកម្ម រវាងប្រទេសទាំងពីរកម្ពុជា-ចិន ក្នុងខណៈដែល ពិភពលោកកំពុងប្រឈមនឹងភាពមិនប្រាកដប្រជា បណ្តាលមកពីភាពតានតឹងភូមិសាស្ត្រនយោបាយ ជម្លោះប្រដាប់អាវុធ ការប្រែប្រួល សេដ្ឋកិច្ច ក៏ដូចជានិន្នាការអវិជ្ជមាន នៃការការពារនិយម និងភាគីនិយម ដែលជះឥទ្ធិពលអវិជ្ជមានមកលើពាណិជ្ជកម្មសេដ្ឋកិច្ច-សង្គម និងជីវភាពប្រចាំថ្ងៃរបស់ប្រជាជនជាដើម៕អត្ថបទ៖ សុន រ៉ាឌី,

មន្រ្ដីជាន់ខ្ពស់ក្រសួងធនធានទឹកចុះពិនិត្យវឌ្ឍនភាព និងវាយតម្លៃបញ្ចប់ការងារសាងសង់គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ក្នុងខេត្តបន្ទាយមានជ័យ

នាថ្ងៃពុធ-ថ្ងៃព្រហស្បតិ៍ ថ្ងៃទី៣-៤ ខែមិថុនា ឆ្នាំ២០២៦ ឯកឧត្តម ប៉ុញ សច្ចៈ រដ្ឋលេខាធិការ និងជានាយកគម្រោង ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស ចុះពិនិត្យវឌ្ឍនភាព និងវាយតម្លៃបញ្ចប់ការងារសាងសង់គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ក្នុងភូមិសាស្ដ្រខេត្តបន្ទាយមានជ័យ ដែលទទួលបានហិរញ្ញប្បទានសម្បទានពីធនាគារនីហរណអាហរណកូរ៉េ (KEXIM Bank)។ ក្នុងដំណើរចុះពិនិត្យ ឯកឧត្តមរដ្ឋលេខាធិការ បានគូសបញ្ជាក់ថា សកម្មភាពសំខាន់ៗនៃការចុះពិនិត្យរួមគ្នានេះ រួមមាន៖ ទី១. ពិនិត្យ និងវាយតម្លៃវឌ្ឍនភាពការងារសាងសង់នៃគម្រោងទាំងមូល ដើម្បីត្រៀមលក្ខណៈបញ្ចប់ការដ្ឋានជាស្ថាពរនៅចុងខែមិថុនា ឆ្នាំ២០២៦ ខាងមុខនេះ។ ទី២. ពិនិត្យការងារបណ្តុះបណ្តាលបច្ចេកទេស ដោយក្រុមការងារបច្ចេកទេសរបស់ក្រុមហ៊ុនម៉ៅការសាងសង់ បាននិងកំពុងដំឡើងឧបករណ៍អេឡិចត្រូនិកទ្វារទឹក ព្រមទាំងធ្វើការណែនាំ និងបង្រៀនដល់ប្រតិបត្តិករសហគមន៍អំពីរបៀបបិទ-បើកទ្វារទឹក និងការថែទាំប្រព័ន្ធមេកានិក។ ទី៣. ពិនិត្យសកម្មភាពរបស់មន្ត្រីបច្ចេកទេសផ្នែកសហគមន៍កសិករប្រើប្រាស់ទឹក មកពីក្រសួង ដែលបានសហការជាមួយមន្ទីរធនធានទឹក និងឧតុនិយមខេត្ត ក្នុងការបណ្តុះបណ្តាលសមាជិកសហគមន៍អំពីវិធីសាស្ត្រគ្រប់គ្រង និងថែទាំប្រព័ន្ធធារាសាស្ត្រឱ្យមាននិរន្តរភាព។ ទី៤. ពិនិត្យ និងវាយតម្លៃករណីបាត់បង់ឧបករណ៍បញ្ជាទ្វារទឹក ដោយសារមានជនខិលខូចបានលួចដោះយកប្រព័ន្ធបញ្ជាអគ្គិសនីមួយចំនួននៅតាមសំណង់បញ្ជាបិទ-បើកទឹក។ ជាមួយគ្នានោះដែរ ឯកឧត្តម ប៉ុញ សច្ចៈ បានថ្លែងកោតសរសើរ និងណែនាំឱ្យក្រុមហ៊ុនសាងសង់ ទីប្រឹក្សាគម្រោង និងអ្នកពាក់ព័ន្ធ ជម្រុញការងារដែលសេសសល់ឱ្យរួចរាល់ជាស្ថាពរចុងខែមិថុនាឆ្នាំនេះ។ ទន្ទឹមនឹងនោះ ឯកឧត្តមរដ្ឋលេខាធិការ បានផ្តាំផ្ញើដល់មន្ទីរជំនាញត្រូវបង្កើនការទទួលខុសត្រូវថែទាំរាល់ហេដ្ឋារចនាសម្ព័ន្ធធារាសាស្ត្រក្នុងខេត្ត ដើម្បីធានាប្រសិទ្ធភាពគ្រប់គ្រង និងបែងចែកទឹកជូនប្រជាពលរដ្ឋទាំងក្នុងរដូវវស្សានេះ និងទៅអនាគត ព្រមទាំងបានដាស់តឿនដល់មន្ត្រីជំនាញ និងអាជ្ញាធរ ត្រូវរួមគ្នាឃ្លាំមើល និងស្វែងរកអត្តសញ្ញាណជនល្មើស ដើម្បីទប់ស្កាត់ចោរកម្មលួចឧបករណ៍បញ្ជាទ្វារទឹកកុំឱ្យកើតមានជាបន្តទៀត៕

ត្រីមាសទី១ឆ្នាំនេះ កម្ពុជាប្រមូលថវិកាពីដៃគូ និងការបោះលក់មូលបត្រមានទំហំជាង ៥៦១ លានដុល្លារ សម្រាប់តម្រូវការអភិវឌ្ឍ

នៅក្នុងត្រីមាសទី១ ឆ្នាំ២០២៦នេះ រាជរដ្ឋាភិបាលដកសាច់ប្រាក់ពីឥណទានសម្បទាន ដែលបានចុះកិច្ចព្រមព្រៀងសរុបជាង ១៩២ លានដុល្លារអាម៉េរិក និងការបោះផ្សាយលក់មូលបត្ររដ្ឋប្រមាណជាង ៣៦៩ លានដុល្លារអាម៉េរិក ដើម្បីបំពេញតម្រូវការហិរញ្ញប្បទាន ទ្រទ្រង់ដល់វិស័យអាទិភាព។ក្រសួងសេដ្ឋកិច្ច និងហិរញ្ញវត្ថុ ចេញផ្សាយព្រឹត្តិបត្រស្ថិតិបំណុលសាធារណៈកម្ពុជា ដោយបង្ហាញឱ្យដឹងថា ស្ថានភាពបំណុល សាធារណៈបច្ចុប្បន្នរបស់កម្ពុជា ត្រូវបានវាយតម្លៃថា ស្ថិតក្នុងភាពអាចគ្រប់គ្រងបាន ពោលគឺនៅតែមាន «ចីរភាព» និង «ហានិភ័យ កម្រិតទាប»។ ការរក្សាបាននូវចីរភាពបំណុលសាធារណៈនេះ គឺអាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈមួយដ៏រឹងមាំរួមមាន៖ ១) ក្របខ័ណ្ឌគតិយុត្ត, ២) គោលនយោបាយ, យុទ្ធសាស្ត្រ, និងនីតិវិធីគ្រប់គ្រងប្រតិបត្តិការគ្រប់ជ្រុងជ្រោយ, ៣) សមត្ថភាពស្ថាប័ន និងធនធានមនុស្សគ្រប់គ្រាន់, និង ៤) ប្រព័ន្ធព័ត៌មានវិទ្យាសម្រាប់គ្រប់គ្រងប្រតិបត្តិការ និងរក្សាទុកទិន្នន័យ ដើម្បីជាមូលដ្ឋាននៃការវិភាគ និងតាមដានហានិភ័យបំណុល។ ជាក់ស្តែងបើគិតទាំងបំណុលមរតក ត្រឹមដំណាច់ត្រីមាសទី១ ឆ្នាំ២០២៦, កម្ពុជាមានសន្និធិបំណុលសាធារណៈសរុបចំនួន ជាង ១៣ ប៊ីលានដុល្លារអាម៉េរិក ក្នុងនោះ ៩៦% ត្រូវនឹងប្រមាណជាង ១២ ប៊ីលានដុល្លារអាម៉េរិក ជាបំណុលសាធារណ:ក្រៅប្រទេស (ក្របខ័ណ្ឌទ្វេភាគី ៥៩% និងក្របខ័ណ្ឌពហុភាគីប្រមាណ ៤១%) និង ៤% ត្រូវនឹងប្រមាណជាង ៥៩៦ លានដុល្លារអាម៉េរិក ជាបំណុលសាធារណៈក្នុងប្រទេស។ ដោយឡែកការចុះកិច្ចព្រមព្រៀងឥណទាន នៅក្នុងត្រីមាសទី១ ឆ្នាំ២០២៦នេះវិញ រាជរដ្ឋាភិបាល បានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍនានាមានចំនួនសរុបជិត ៩២ លានដុល្លារអាម៉េរិក សមមូលជាង ៦៧ លានអេសដេអ៊ែ ស្មើនឹងប្រមាណ ៣% នៃពិតានដែលច្បាប់អនុញ្ញាត (២.២៥០ លានអេសដេអ៊ែ) ក្នុងនោះក្របខ័ណ្ឌទ្វេភាគី ៧៥% និងក្របខ័ណ្ឌពហុភាគី ២៥% បើធៀបនឹងត្រីមាសទី១ឆ្នាំ២០២៥ មានកំណើនប្រមាណ ១៧%។ ចំណែកការបោះផ្សាយលក់មូលបត្ររដ្ឋនៅក្នុងត្រីមាសទី១នេះដែរ រាជរដ្ឋាភិបាលបានបោះផ្សាយលក់មូលបត្ររដ្ឋ ក្នុងទំហំទឹក ប្រាក់សរុបប្រមាណ ១,៤៨ ទ្រីលានរៀល សមមូលប្រមាណជាង ៣៦៩ លានដុល្លារអាម៉េរិក ក្នុងនោះមូលបត្ររដ្ឋដែលបោះផ្សាយជា ប្រាក់រៀលមានចំនួន ១៩៨ ប៊ីលានរៀល ខណៈដែលមូលបត្ររដ្ឋជាប្រាក់ដុល្លារអាម៉េរិក មានជាង ៣១៩ លានដុល្លារអាម៉េរិក។ ជារួម, ការបោះផ្សាយមូលបត្ររដ្ឋខាងលើនេះ មានទំហំស្មើនឹងប្រមាណ ៧០% នៃទំហំសរុបដែលច្បាប់អនុញ្ញាត (២.១១៤ ប៊ីលានរៀល) ជាហិរញ្ញប្បទានគាំទ្រគម្រោងវិនិយោគសាធារណៈ ការអនុវត្តវិធានការ គោលនយោបាយគន្លឹះរបស់រាជរដ្ឋាភិបាល និងរក្សាតុល្យភាព ថវិកាជាតិ សំដៅលើកស្ទួយកំណើន និងផលិតភាពសេដ្ឋកិច្ចជាតិ។ ចំណែកការដកសាច់ប្រាក់ នៅក្នុងត្រីមាសទី១នេះ, រាជរដ្ឋាភិបាលបានដកសាច់ប្រាក់ពីឥណទានសម្បទាន ដែលបានចុះកិច្ច ព្រមព្រៀងកន្លងមកមានចំនួនសរុបជាង ១៩២ លានដុល្លារអាម៉េរិក ក្នុងនោះក្របខ័ណ្ឌទ្វេភាគីមានប្រមាណ ៤០% និងក្របខ័ណ្ឌពហុ ភាគីមានប្រមាណ៦០%។ សាច់ប្រាក់ទាំងនេះ ត្រូវបានប្រើប្រាស់ជាក់ស្តែងទៅលើវិស័យហេដ្ឋារចនាសម្ព័ន្ធ ៨២% និងវិស័យអាទិភាព ចំពោះមុខផ្សេងទៀត (មិនមែនហេដ្ឋារចនាសម្ព័ន្ធ) ១៨%៕ អត្ថបទ៖ សុន រ៉ាឌី

ជនជាតិវៀតណាម ១៨០នាក់ទៀត ពាក់ព័ន្ធករណីឆបោកតាមប្រព័ន្ធបច្ចេកវិទ្យាត្រូវបានបណ្ដេញចេញពីកម្ពុជា

ភ្នំពេញ៖ នៅថ្ងៃទី៤ ខែមិថុនា ឆ្នាំ២០២៦ អនុវត្តតាម អនុសាសន៍ ដ៏ខ្ពង់ខ្ពស់ របស់ឯកឧត្តមអភិ សន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយក អន្តោប្រវេសន៍ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី សហការជាមួយខាងភាគីវៀតណាម បានធ្វើការបណ្តេញ ជន ជាតិវៀតណាមចំនួន ១៨០នាក់ ស្រី ៦០នាក់ពាក់ព័ន្ធករណីឆបោកតាមប្រព័ន្ធបច្ចេកវិទ្យា (Online Scams) និងករណីលួចស្នាក់នៅ ធ្វើការងារខុសច្បាប់ ត្រូវបានបណ្ដេញចេញ ពីព្រះរាជាណាចក្រកម្ពុជា តាមប៉ុស្តិ៍នរគបាលច្រកទ្វារព្រំដែនអន្តរជាតិព្រែកចាក (ខេត្តកំពត)។អគ្គនាយកដ្ឋានអន្តោប្រវេសន៍បានបញ្ជាក់ថា ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់ សម្ដេចមហាបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យាដែលកើតមានក្នុងព្រះរាជាណាចក្រកម្ពុជាទាំងអស់ ដើម្បីធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយ ជាពិសេសចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះដល់ជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យាណាមួយហើយត្រូវបានមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

បណ្ដាញសង្គម

ព័ត៌មានថ្មីៗ

លោក Zelenskyy ចង់មានកិច្ចប្រជុំទល់មុខគ្នាជាមួយលោក Putin ខណៈកិច្ចចារចារុស្ស៊ី-អ៊ុយក្រែន ជាប់គាំង

លោក Trump និយាយថា លោកគិតថា វឌ្ឍនភាពកំពុងកើតមានឡើង នៅប្រទេសលីបង់

ការវាយប្រហាររបស់អ៊ីស្រាអែល បានសម្លាប់មនុស្ស ៧នាក់នៅក្នុងទីក្រុង Tyre ភាគខាងត្បូងប្រទេស លីបង់

ប្រមុខការទូតទួរគីសម្តែងការសាទរចំពោះវឌ្ឍនភាពក្នុងកិច្ចចរចារវាងសហរដ្ឋអាមេរិក និងអ៊ីរ៉ង់

លោក LAVROV ៖ អាជ្ញាធរហ្ស៊កហ្ស៊ីដឹងច្បាស់ពីផលវិបាកនៃការចូលរួមជាមួយសហភាពអឺរ៉ុប

UN៖ កង្វះការផ្តល់មូលនិធិជំនួយ គំរាមកំហែងដល់ជីវិតរស់នៅរបស់ពលរដ្ឋក្នុងតំបន់ហ្កាហ្សា

ប្រទេសហុងគ្រី បើកភ្លើងខៀវការចរចាដំណើរការចូលសហភាពអឺរ៉ុបរបស់ប្រទេសអ៊ុយក្រែន

កុងហ្គោ រាយការណ៍ពីការវាយប្រហារលើក្រុមបញ្ចុះសពអ្នកជំងឺអេបូឡា ខណៈករណីកើនឡើង

ទារកទើបកើតប្រឈមហានិភ័យ ខណៈមានកង្វះអុកស៊ីសែនក្នុងរដ្ឋធានីដែលត្រូវបានបិទផ្លូវនៅបូលីវី

ឯកអគ្គរដ្ឋទូត៖ បារាំងត្រៀមផ្តល់យន្តហោះចម្បាំង Rafale និង Mirage 2000-5 ដល់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877