BTV NEWS

ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា

គណៈកម្មការគ្រប់គ្រងល្បែងពាណិជ្ជកម្មកម្ពុជាដកហូតអាជ្ញាបណ្ណកាស៊ីណូពីក្រុមហ៊ុន ខេ ប៊ី អាយ (ខេមបូឌា) ភីអិលស៊ី

ថ្នាក់ដឹកនាំអាកាសចរណ៍ស៊ីវិល ចុះសួរសុខទុក្ខ និងនាំយកអំណោយសម្តេចធិបតីចែកជូនពលទាហានការពារនៅព្រំដែន ៥០៤ ក្នុងឱកាសចូលឆ្នាំថ្មី

ក្រសួងមុខងារសាធារណៈ និងក្រសួងការបរទេសនឹងរៀបចំការប្រឡងប្រជែងជ្រើសរើសមន្ត្រីក្របខ័ណ្ឌប្រភេទ “ក” ចំនួន ៥២កន្លែង

ព័ត៌មានជាតិ

ពលរដ្ឋអរគុណរាជរដ្ឋាភិបាល ដាក់ចេញការកាត់បន្ថយពន្ធលើប្រេងឥន្ធនៈបន្ថែមទៀត

ប្រជាពលរដ្ឋ បានសម្ដែងការពេញចិត្ត និងអរគុណ ខណៈដែលរាជរដ្ឋាភិបាល បានដាក់ចេញនូវការកាត់បន្ថយពន្ធ លើប្រេងឥន្ធនៈបន្ថែមទៀត ដើម្បីគ្រប់គ្រង តម្លៃប្រេង ដើម្បីសម្រួលដល់ការចំណាយលើការរស់នៅ ស្របពេលដែលមានការកើនឡើងតម្លៃប្រេងឥន្ធនៈជាសកល។ ថ្លែងប្រាប់BTVនៅថ្ងៃទី២៣ ខែមីនា ឆ្នាំ២០២៦នេះ ពលរដ្ឋបានប្រាប់ថា ពួកគាត់ ត្រូវធ្វើដំណើរឆ្ងាយក្នុងមួយថ្ងៃៗ ដើម្បីដឹកជញ្ជូនទំនិញ ដែលចំណាយថ្លៃសាំងកើនពីជាង៨ពាន់រៀល ទៅជិត២ម៉ឺនរៀល។ តម្លៃប្រេងបច្ចុប្បន្នឡើងថ្លៃ តែមិនមែនឡើងតែកម្ពុជានោះទេ គឺឡើងគ្រប់ប្រទេសទាំងអស់ ព្រោះឥទ្ធិពលសង្រ្គាមនៅមជ្ឈិមបូព៌ា។ សម្រាប់ពលរដ្ឋ អរគុណរាជរដ្ឋាភិបាល ដែលបន្តបញ្ចុះពន្ធជួយទប់តម្លៃមិនឲ្យឡើងខ្ពស់ពេក និងរក្សាបានស្ថិរភាពប្រេងសម្រាប់ប្រើប្រាស់។លោក ឧត្ដម បុគ្គលិកស្ថានីយ៍ប្រេងឥន្ធនៈ ស្ថិតនៅសង្កាត់ជើងឯក ខណ្ឌដង្កោ រាជធានីភ្នំពេញ បានប្រាប់ថា បច្ចុប្បន្ននេះ ពលរដ្ឋមិនផ្អើលនាំគ្នាមកទិញសាំង និងប្រេងម៉ាស៊ូត ស្ដុកទុកព្រោះខ្លាចគ្មានប្រេង ដូចកាលពីដើមខែមីនានោះទេ។ ការរក្សាបានប្រក្រតីភាពនេះ ក៏ព្រោះពលរដ្ឋមានទំនុកចិត្តលើរាជរដ្ឋាភិបាល លើការធានា ការផ្គត់ផ្គង់ប្រេង ខណៈដែលស្ថានីយ៍របស់លោក ធានាបានស្ថិរភាព ទាំងការផ្គត់ផ្គង់ និងតម្លៃ ស្របតាមការកំណត់របស់ក្រសួង។ សូមជម្រាបជូនថា វិបត្តិតម្លៃប្រេងឡើងថ្លៃបច្ចុប្បន្ននេះ បង្កឡើងព្រោះឥទ្ធិពល សង្រ្គាមនៅមជ្ឈិមបូព៌ាហើយមិនមែនតែកម្ពុជានោះទេ ដែលរងសម្ពាធប្រេងឡើងថ្លៃ ប្រទេសទាំងអស់លើពិភពលោកសុទ្ធតែរងប៉ះពាល់ដូចគ្នា។ សម្រាប់រាជរដ្ឋាភិបាលកម្ពុជា នៅតែអាចរក្សាបានប្រភពផ្គត់ផ្គង់ប្រេង ដោយអាចធានាបានពីស្ថិរភាពប្រេង សម្រាប់ពលរដ្ឋប្រើប្រាស់ប្រចាំថ្ងៃ។ ហើយរដ្ឋាភិបាល បានបន្តបញ្ចុះតម្លៃលក់រាយប្រេងឥន្ធនៈ នៅកម្ពុជា ៦,៥សេនដុល្លារ/លីត្រ ស្មើជាង២០០រៀលលុយខ្មែរ ព្រមទាំងបានបន្តបញ្ចុះ១សេនដុល្លារ/លីត្របន្ថែមទៀត ដោយសារថ្លៃប្រេងសាំងអន្ដរជាតិ ឡើងលើសពី ៩០ដុល្លារ/បារ៉ែល និងប្រេងម៉ាស៊ូតអន្ដរជាតិ ឡើងលើសពី ១០០ដុល្លារ/បារ៉ែល។ លើសពីនេះ រដ្ឋាភិបាល បន្តបញ្ចុះអាករពិសេស លើប្រេងម៉ាស៊ូត ពី ៤% មក ០% និងបញ្ចុះអាករ លើតម្លៃបន្ថែម លើប្រេងសាំង និងប្រេងម៉ាស៊ូត ពី ១០% មក ៤% ដោយរាជរដ្ឋាភិបាលទទួលបន្ទុកជំនួសចំនួន ៦%៕ អត្ថបទ ៖ លៀ ស៊ីណា

ពលរដ្ឋខ្មែររស់នៅអាម៉េរិក និងជប៉ុន ត្រៀមរួចរាល់មកលេងប្រទេសកម្ពុជាក្នុងឱកាសពិធីបុណ្យចូលឆ្នាំថ្មី

ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ នៅខែមេសាខាងមុខនេះ ពលរដ្ឋខ្មែរកំពុងរស់នៅសហរដ្ឋអាម៉េរិក និងប្រទេសជប៉ុន ត្រៀមខ្លួនរួមចរាល់មកលេងប្រទេសកំណើត ដើម្បីចូលរួមចំណែកជំរុញសេដ្ឋកិច្ចជាតិ។តាមរយៈវីឌីអូឃ្លីប ដែលBTVទទួលបាននៅថ្ងៃទី២៣ ខែមីនា នេះ លោក ឃុន សារឿន ពលរដ្ឋខ្មែរកំពុងរស់នៅប្រទេសជប៉ុន បានលើកឡើងថា ដើម្បីជាការចូលរួមចំណែកជំរុញសេដ្ឋកិច្ចជាតិ នៅក្នុងខែមេសាខាងមុខនេះ លោកនឹងមកលេងប្រទេសកម្ពុជា ចូលរួមអបអរពិធីបុណ្យចូលឆ្នាំថ្មី ប្រពៃណីជាតិ ជាពិសេសចង់ចូលរួមក្នុងព្រឹត្តិការណ៍ «នគរសង្ក្រាន្ត» ។ បន្ថែមលើនេះ លោកក៏បានបបួលមិត្តភក្តិជាជនជាតិខ្មែរ និងបរទេសមកលេងប្រទេសកម្ពុជាដែរ។លោក ហ៊ន វណ្ណនាដ ពលរដ្ឋខ្មែរកំពុងរស់នៅសហរដ្ឋអាម៉េរិក បានគាំទ្រការរៀបចំពិធីបុណ្យចូលឆ្នាំថ្មី ប្រពៃណីជាតិ គឺជារឿងត្រឹមត្រូវ ព្រោះជាទំនៀមទម្លាប់ប្រពៃណីខ្មែរតពីដូនតាមក។ ហើយរូបលោក និងគ្រួសារនឹងមកចូលរួមពិធីបុណ្យចូលឆ្នាំ។គួរបញ្ជាក់ដែរថា ពិធីបុណ្យ ចូលឆ្នាំថ្មី ប្រពៃណីជាតិ នឹងប្រព្រឹត្តិទៅ ក្នុងរយៈពេល៣ថ្ងៃ ពោលចាប់ពីថ្ងៃទី១៤ដល់ថ្ងៃទី១៦ ខែមេសា ឆ្នាំ២០២៦ ដោយប្រជាពលរដ្ឋខ្មែរទាំងក្នុង និងក្រៅប្រទេសបានត្រៀមទៅជួបជុំ ឳពុក ម្តាយ បងប្អូន សាច់ញាតិ និងដើរលេងកម្សាន្តនៅទីតាំងទេសចរណ៍ផ្សេងៗក្នុងប្រទេសកម្ពុជា ក្នុងនោះក៏មានព្រឹត្តិការណ៍«នរគសង្ក្រាន្ត»មួយផងដែរ៕ អត្ថបទ៖ ទូច សោភ័ណ

សិប្បករ៖ តម្រូវការក្រមានៅតាមទីផ្សារមានកំណើន ខណៈក្រុមយុវជនធ្វើយុទ្ធនាការ១ម៉ឺនក្រមា ដើម្បីកងទ័ព

អំឡុងពេលក្រុមយុវជនសហភាពសហព័ន្ធយុវជនកម្ពុជា រៀបចំយុទ្ធនាការ ១ម៉ឺនក្រមា និងបណ្ណជូនពរ ដើម្បីវីរកងទ័ពជួរមុខ បានធ្វើឱ្យបណ្តាសិប្បកម្មតម្បាញក្រមានៅជាយរាជធានីភ្នំពេញ បាននឹងកំពុងមានភាពមមាញឹកខ្លាំងក្នុងការត្បាញក្រមា ដើម្បីចែកចាយបោះដុំតាមទីផ្សារ និងការប្រើប្រាស់អំឡុងថ្ងៃបុណ្យចូលឆ្នាំថ្មីប្រពៃណីជាតិខ្មែរឈានចូលមកដល់។សិប្បករត្បាញក្រមាក្នុងខណ្ឌច្បារអំពៅច្បារ រាជធានីភ្នំពេញ បានថ្លែងប្រាប់BTV នៅថ្ងៃទី២៣ ខែមីនានេះថា ព្រឹត្តិការណ៍បុណ្យចូលឆ្នាំថ្មីប្រពៃណីជាតិខ្មែរឆ្នាំនេះ ដែលអមដោយមានរៀបចំព្រឹត្តិការណ៍នគរសង្ក្រាន្ត នៅរាជធានីភ្នំពេញជាលើកដំបូងនេះ គឺបានធ្វើឲ្យអាជីវករលក់បោះដុំតាមទីផ្សារនានា មានតម្រូវការប្រមូលទិញក្រមាពីតាមបណ្តាសិប្បកម្មតម្បាញក្រមាមានកំណើនកើនឡើងច្រើន ដើម្បីយកទៅចែកចាយលក់បន្តជូនពលរដ្ឋ ប្រើប្រាស់ធ្វើជាកាដូ នៅក្នុងឱកាសបុណ្យចូលឆ្នាំថ្មី ហើយបណ្តាសិប្បករ បានស្នើក្រុមយុវជនរៀបចំយុទ្ធនាការ ១ម៉ឺនក្រមា រៀងរាល់ឆ្នាំ ដើម្បីលើកកម្ពស់ការប្រើប្រាស់ក្រមាខ្មែរដែលជាសម្បតិ្តបេតិភណ្ឌរបស់ពិភពលោកឲ្យទទួលបានការគាំទ្រកាន់ខ្លាំងក្លាថែមទៀត។សូមបញ្ជាក់ថា យុវជនសហភាពសហព័ន្ធយុវជនកម្ពុជា រៀបចំយុទ្ធនាការ ១ម៉ឺនក្រមា និងបណ្ណជូនពរដើម្បីវីរកងទ័ពជួរមុខ បានធ្វើឡើងក្នុងគោលបំណងយកទៅជូនពរលើកទឹកចិត្តវីរកងទ័ព និងរំលឹកដឹងគុណវីរកងទ័ពដែលបានលះបង់កម្លាំងកាយចិត្តដើម្បីជាតិមាតុភូមិ នៅក្នុងអំឡុងថ្ងៃបុណ្យចូលឆ្នាំថ្មីប្រពៃ ណីខ្មែរជិតឈានចូលដល់។ពិធីទទួលការបរិច្ចាគក្រមាពីពលរដ្ឋទាំងអស់គ្នា បច្ចុប្បន្នបាននឹងកំពុងធ្វើឡើងនៅទីតាំងសិល្បៈដើម្បីសន្តិភាព នៅសួនច្បារវត្តបុទុមវត្តី ចាប់ពីថ្ងៃទី១៩ ខែមីនា រហូតដល់ថ្ងៃទី៧ ខែមេសា ឆ្នាំ២០២៦ ចាប់ពីម៉ោង៤:៣០នាទីរសៀល ដល់ម៉ោង៨:៣០យប់៕ អត្ថបទ៖ ស៊ុម សុខជា

សេវារថយន្តក្រុងសាធារណៈ បាននិងកំពុងជួយសម្រាលការចំណាយរបស់ពលរដ្ឋ ក្នុងបរិបទវិបត្តិតម្លៃប្រេង

សេវារថយន្តក្រុងសាធារណៈក្នុងរាជធានីភ្នំពេញ បាននិងកំពុងជួយសម្រាលការចំណាយរបស់ពលរដ្ឋក្នុងបរិបទវិបត្តិតម្លៃប្រេង ខណៈប្រតិបត្តិការរថយន្តក្រុង ទាំងខ្សែរត់ និងតម្លៃ នៅថេរ។លោក កែវ ចាន់ណារិទ្ធ អភិបាលរដ្ឋករស្វយ័តដឹកជញ្ជូនរថយន្តក្រុងសាធារណៈ City Bus បានឲ្យដឹងថា ក្រោមការយកចិត្តទុកដាក់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម ឃួង ស្រេង អភិបាលរាជធានីភ្នំពេញ តែងតែគិតគូរដល់ប្រជាពលរដ្ឋគ្រប់កាលៈទេសៈ ពិសេសនោះលើវិស័យដឹកជញ្ជូនសាធារណៈនេះ គឺចាំបាច់ត្រូវបម្រើពលរដ្ឋប្រកបដោយភាពប្រសើរ ដោយមិនមានដំឡើងថ្លៃឈ្នួល ឬកាត់បន្ថយខ្សែរត់ជាប្រចាំនោះឡើយ ខណៈបរិបទពិភពលោកកំពុងជួបវិបត្តិប្រេងឥន្ធនៈឡើងតម្លៃ ចេញមកពីសង្គ្រាមនៅមជ្ឈិមបូព៌ា ហើយសាយភាយឥទ្ធិពលមកដល់កម្ពុជាផងដែរ។ ប្រជាពលរដ្ឋ សម្តែងក្តីសប្បាយរីករាយ នឹងការប្រើប្រាស់សេវារថយន្តក្រុងសាធារណៈរបស់រដ្ឋ ដែលបានជួយសម្រួលភាពងាយស្រួលដល់ការធ្វើដំណើរ និងសម្រាលការចំណាយលើការធ្វើដំណើរប្រចាំថ្ងៃផងដែរ។ អ្នកបើកបររថយន្តក្រុងសាធារណៈ ក៏បានពង្រឹងការទទួលខុសត្រូវខ្ពស់ផងដែរ លើការបើកបរដើម្បីធានាសុខសុវត្ថិភាពជូនប្រជាពលរដ្ឋអ្នកប្រើប្រាស់ ធានាយ៉ាងណា មិនឲ្យកើតមាននូវគ្រោះថ្នាក់ចរាចរណ៍លើដងផ្លូវនោះឡើយ ។ គួរបញ្ជាក់ថា ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខ រាជរដ្ឋាភិបាល បានសម្រេចបញ្ចេញរថយន្តក្រុងសាធារណៈចំនួន៦០០គ្រឿង សម្រាប់ដឹកជញ្ជូនបងប្អូនប្រជាពលរដ្ឋជិះធ្វើដំណើរដោយឥតគិតថ្លៃ ទៅកាន់ស្រុកកំណើត ក្នុងរយៈពេល០៦ថ្ងៃផងដែរ៕ អត្ថបទ៖ លីហេង

នគរសង្ក្រាន្ត៖ ក្រុមការងារកំពុងដំឡើងការសាងសង់ «ភូមិសង្ក្រាន្ត» នៅទីតាំងក្រោយផ្សាររាត្រី

ព្រឹត្តិការណ៍នគរសង្ក្រាន្ត នឹងត្រូវបានរៀបចំឡើងនៅតាមទីតាំងជាច្រើននៅក្នុងរាជធានីភ្នំពេញ។ ក្នុងនោះនៅចំណុចទីតាំងចំណតឡានក្រោយផ្សាររាត្រី រាជធានីភ្នំពេញ នឹងត្រូវបានប្រើប្រាស់រៀបចំជាភូមិសង្ក្រាន្ត។ បច្ចុប្បន្នក្រុមការងារជាង ក៏កំពុងចាប់ផ្ដើមសាងសង់ជាឆាក សាងសង់ផ្ទះ សាងសង់ជារោង ដែលមានមុខងារផ្សេងៗគ្នា ក្នុងការបង្ហាញវប្បធម៌នាឱកាសចូលឆ្នាំខ្មែរខាងមុខ។ភូមិសង្ក្រាន្ត ជាផ្នែកសំខាន់មួយនៃព្រឹត្តិការណ៍នគរសង្ក្រាន្ត ដែលនឹងរៀបចំឡើងដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ។ ការរៀបចំភូមិសង្ក្រាន្ត គឺស្ថិតនៅទីតាំងចំណតរថយន្តក្រោយផ្សាររាត្រី ដែលបច្ចុប្បន្នក្រុមការងារជាងកំពុងសាងសង់រោង សាងសង់ឆាក និងសាងសង់ផ្ទះមួយចំនួន។ ដូចជាឈ្មោះបានបញ្ជាក់ហើយ ភូមិសង្ក្រាន្ត គឺជាទីតាំងភូមិរស់នៅ ដែលនឹងមានបង្ហាញពីវប្បធម៌រស់នៅរបស់ប្រជាពលរដ្ឋខ្មែរ ហើយទីតាំងនេះក៏មានការជាការរៀបចំទីធ្លាសម្រាប់លេងល្បែងប្រជាប្រិយខ្មែរផងដែរ។តាមប្លង់គំរូ «ភូមិសង្ក្រាន្ត» នឹងមានផ្ទះសិប្បកម្ម បរិវេណគំនូរលើមុខ ផ្សារភូមិ ឆាកសម្ដែង សាលាឆទាន បរិវេណកម្មវិធីអុក ផ្ទះនំខ្មែរ ផ្ទះសេដ្ឋីនី និងមានទីធ្លាសម្រាប់លេងល្បែងប្រជាប្រិយខ្មែរផងដែរ។ ការលេងល្បែងប្រជាប្រិយ ដែលប្រជាពលរដ្ឋខ្មែរនាំគ្នាលេងកម្សាន្ត តជំនាន់មកនេះ គឺមានច្រើនប្រភេទរួមមាន ល្បែងស្តេចចង់ ឬអៀវ ល្បែងប្រណាំងកង់យឺត ចោលឈូង ល្បែងខាំប៉ិកគក់ ចាប់កូនខ្លែង ល្បែងពាំពងទា ល្បែងលាក់កន្សែង ល្បែងលោតបាវ លេងអង្គញ់ ទាញព្រ័ត្រ ចងជើងរត់ប្រណាំង ល្បែងរាវបង្កង ល្បែងស្បែកជើងរួមមិត្ត ល្បែងខ្នង ពង្រត់កូនក្រមុំ ល្បែងដណ្តើមស្លឹកឈើ ១កាំ២កាំ ខ្លាស៊ីគោ ល្បែងអូសត្រឡាច ល្បែងថាភ្ជាប់និស្ស័យ និងល្បែងវាយក្អមជាដើម។ ព្រឹត្តិការណ៍នគរសង្ក្រាន្ត ជាព្រឹត្តិការណ៍ដែលរៀបចំឡើងដោយសហភាពសហព័ន្ធយុវជនកម្ពុជា។ កម្មវិធីនេះ នឹងរៀបចំឡើងរយៈពេល ៦ថ្ងៃចាប់ពីថ្ងៃទី ១៤ ដល់ថ្ងៃទី ១៩ ខែមេសា។ នគរសង្ក្រាន្ត នឹងរៀបចំឡើងនៅទីតាំងមួយចំនួន រួមមាន តំបន់សួនច្បារ Vattannac ដល់ផ្សាររាត្រី តំបន់វត្តភ្នំ តំបន់ Walkstreet ក៏ដូចជាតំបន់សួនច្បារវត្តបទុមវតី តំបន់បាសាក់លែន និងផ្សារទួលទំពូង។ តំបន់នីមួយៗ នឹងមានការរៀបចំជាការលេងល្បែងប្រជាប្រិយជូនភាពសប្បាយរីករាយ ដល់អ្នកចូលរួម ហើយក៏ជាការបង្ហាញផ្សព្វផ្សាយទៅកាន់ភ្ញៀវទេសចរបរទេសផងដែរ៕ អត្ថបទ៖ គឹមហុក

រយៈពេលបីថ្ងៃ អ្នកទេសចរណ៍ជាង ៧ម៉ឺន៤ពាន់នាក់មកទស្សនាព្រឹត្ដិការណ៍សមរាត្រីនៅប្រាសាទអង្គរ

មន្ដ្រីអាជ្ញាធរជាតិអប្សរា បានឱ្យដឹងថា អ្នកទេសចរជាតិ និងអន្ដរជាតិ ជាង៧ម៉ឺន៤ពាន់នាក់ បានទៅផ្ដិតយករូបបភាពនិងទស្សនាព្រះអាទិត្យរះចំកំពូលប្រាសាទអង្គរ ឬសមរាត្រី រយៈពេលបីថ្ងៃ ដែលចាប់ពីថ្ងៃទី២១ដល់ថ្ងៃទី២៣ខែមីនឆ្នាំ២០២៦នេះ ។បន្ទាប់ពីបានទស្សនាព្រឹត្ដិការណ៍ដ៏ទាក់ទាញបំផុតនៅក្នុងតំបន់រមណីយដ្ឋានអង្គរ ព្រះសង្ឃនិមន្ដមកពីវត្ដកម្ពុជាក្រោម ក៏ដូចជាអ្នកទេសជាតិ ក៏បានលើកឡើងដែរថា ការមកទស្សនា និងផ្ដិតរូបភាពព្រឹត្ដិការណ៍នេះ មានភ្ញៀវទេសចរជាតិ និងអន្តរជាតិ បានធ្វើដំណើរមកពីគ្រប់ទិសទី ដើម្បីទស្សនាព្រឹត្តិការណ៍សមរាត្រី (Equinox) ដែលជាទិដ្ឋភាពព្រះសូរិយារះឡើងចំកំពូលប្រាង្គកណ្តាល នៃប្រាសាទអង្គរវត្តយ៉ាងស្រស់ត្រកាលបំផុត។ ព្រឹត្ដិការណ៍សមរាត្រីនេះ គឺជាប្រវត្ដិសាស្ដ្រនៃអាណាចក្រខ្មែរ ដែលកូនខ្មែរមិនអាចបំភ្លេចបានឡើយ ហើយជាភស្តុតាងដែលបង្ហាញពីចំណេះដឹងផ្នែកតារាសាស្ត្រ និងស្ថាបត្យកម្មដ៏ខ្ពង់ខ្ពស់របស់អតីតព្រះមហាក្សត្រនៃអាណាចក្រខ្មែរ។អ្នកទេសចរគ្រប់ៗគ្នា ក៏បានបង្ហាញអារម្មណ៍រីករាយ រំលេចដោយសំឡេងហ៊ោរកញ្ជ្រៀវ នៅពេលបានឃើញព្រះអាទិត្យរះចំកំពូលប្រាសាទអង្គរ។យោងតាមរបាយការណ៍ លោក សេង សុធារ៉ា ប្រធានយកដ្ឋានទេសចរណ៍ និងវប្បធម៌ នៃអាជ្ញាធរជាតិអប្សរា បានបង្ហាញថា ក្នុងចំណោមភ្ញៀវទេសចរចំនួនជាង៧ម៉ឺន៤នាក់នោះ មានអ្នកទេសចរជាតិចំនួន ៦៨ ១៣២នាក់ និងអ្នកទេសចរអន្ដរជាតិចំនួន៦,៨៣២នាក់ ដែលពួកគាត់បានទៅទស្សនា ចន្លោះចាប់ពីម៉ោង៥ព្រឹក ដល់ម៉ោង៧និង៣០នាទីព្រឹកព្រលឹម ក្នុងរយៈពេលបីថ្ងៃ។ របាយការណ៍បន្ថែមថា នៅថ្ងៃទី១នៃព្រឹត្ដិការណ៍សមរាត្រីមានចំនួនជាង២ម៉ឺន៤ពាន់នាក់ នៅថ្ងៃទី២មានចំនួនជាង៣ម៉ឺន៨ពាន់នាក់ និងនៅថ្ងៃទី៣ចំនួនជាង១ម៉ឺន២ពាន់នាក់ ដែលសរុបក្នុងរយៈពេលបីថ្ងៃចាប់ពីថ្ងៃទី២១ដល់ថ្ងៃទី២៣ខែមីនាឆ្នាំ២០២៦នេះ មានអ្នកទេសចរជាតិ និងអន្ដរជាតិជាង៧ម៉ឺន៤ពាន់នាក់ ។ ក្នុងនោះ ភ្ញៀវទេសចរខ្មែរចំនួន: ៦៨,១៣២ និងភ្ញៀវទេសចរបរទេសចំនួន៦ ៨៣២នាក់៕

សហជីព និងកម្មករ អរគុណរាជរដ្ឋាភិបាលបានជួយសម្រាលបន្ទុកចំណាយក្នុងវិបត្តិប្រេងឥន្ធនៈសកល

ថ្នាក់ដឹកនាំសហជីព និងកម្មកររោងចក្រកាត់ដេរ បានអរគុណចំពោះរាជរដ្ឋាភិបាលកម្ពុជា ដែលបន្តបន្ថែមការកាត់បន្ថយពន្ធលើការដឹកជញ្ជូន និងប្រេងឥន្ធនៈ ជាពិសេសការជួយសម្របសម្រួលជាមួយម្ចាស់រោងចក្រ សហគ្រាសនានាឱ្យផ្តល់ប្រាក់សោហ៊ុយបន្ថែមលើថ្លៃធ្វើដំណើរបណ្តោះអាសន្នចំនួន ២,៥០ ដុល្លារអាម៉េរិក ក្នុងមួយខែក្នុងកាលៈទេសៈដែលពិភពលោកកំពុងជួបបញ្ហាវិបត្តិប្រេងឥន្ធនៈនេះ។នៅក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៣ ខែមីនានេះ លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា ក្នុងអំឡុងពេលនេះ មនុស្សភាគច្រើនសុទ្ធសឹងតែជួបបញ្ហាសេដ្ឋកិច្ចដូចគ្នាទៅលើការចំណាយនានាក្នុងការរស់នៅ និងប្រកបកិច្ចការងារ។ ជាក់ស្តែងនៅពេលនេះ ប្រទេសទូទាំងពិភពលោក ក៏ដូចជាប្រទេសកម្ពុជាក៏កំពុងជួបបញ្ហាវិបត្តិប្រេងឥន្ធនៈជាសកល ប៉ុន្តែរាជរដ្ឋាភិបាលបានបន្តជួយអន្តរាគមន៍ក្នុងការកាត់បន្ថយថ្លៃចំណាយរបស់វិស័យឯកជន ក៏ដូចជាប្រជាពលរដ្ឋទូទៅ ជាពិសេសកម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ទទួលបានការយកចិត្តទុកដាក់ពីសំណាក់ភាគីនិយោជក និងរាជរដ្ឋាភិបាលភិបាល ដែលបានឯកភាពគ្នាក្នុងការផ្តល់ប្រាក់សោហ៊ុយធ្វើដំណើរបណ្តោះអាសន្ន ២,៥០ ដុល្លារអាម៉េរិក ក្នុងមួយខែ បន្ថែមលើប្រាក់សោហ៊ុយធ្វើដំណើរ និងស្នាក់នៅដែលសហគ្រាស ក្រុមហ៊ុន រោងចក្រកំពុងអនុវត្ត។កម្មករ កម្មការនី រោងចក្រកាត់ដេរសម្លៀកបំពាក់ ស្ថិតនៅផ្លូវជាតិលេខ៣ ខណ្ឌដង្កោ រាជធានីភ្នំពេញ បាននិយាយដោយទឹកមុខសប្បាយរីករាយថា ពិតជាត្រេកអ៊រ ក្រោយពីទទួលបានដំណឹងនេះ ដោយសារាជរដ្ឋាភិបាលបានយកចិត្តទុកដាក់នៅក្នុងបរិបទវិបត្តិប្រេងឥន្ធនៈជាសកល និងពេញចិត្តចំពោះចំណាត់ការអន្តរាគមន៍ក្នុងការផ្ដល់អត្ថប្រយោជន៍បន្ថែមដល់កម្មករនិយោជិតនៅក្នុងបរិបទដ៏លំបាកនេះ។កម្មករ កម្មការនី បានឱ្យដឹងស្រដៀងគ្នាទៀតថា ពាក់ព័ន្ធការផ្តល់ប្រាក់សោហ៊ុយបន្ថែមនេះ បើទោះបីជាមនុស្សមួយចំនួនគិតថាតិច ឬមិនបានច្រើន ក៏ប៉ុន្ដែវាជាចំណែកដ៏សំខាន់មួយជួយសម្រាលបន្ទុកការចំណាយរបស់កម្មករនិយោជិត ពីព្រោះថា អ្នកផ្តល់មានតែម្នាក់ ប៉ុន្តែអ្នកទទួលមានចំនួនច្រើន។ ជាក់ស្តែងនៅក្នុងរោងចក្រនេះ មានកម្មករនិយោជិតសរុបចំនួនជាង ១ ៧០០នាក់ឯណោះ។យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ គិតត្រឹមឆ្នាំ២០២៥ ក្រុមហ៊ុន សហគ្រាសវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប មានចំនួនសរុប ១ ៨៦៧សហគ្រាស។ វិស័យនេះបានផ្តល់ឱកាសការងារជូនប្រជាពលរដ្ឋក្នុងស្រុកកើនឡើងសរុបចំនួនជាង ១លាន ១៣ម៉ឺននាក់៕ អត្ថបទ៖ ឈិត បូរ៉ាវី

ការវាយតម្លៃបឋមការខូចខាតប្រាសាទព្រះវិហារមានចំនួនសរុប ៥៦២កន្លែងហើយមានសភាពធ្ងន់ធ្ងរ

ផ្អែកតាមការវាយតម្លៃបឋម ការខូចខាតប្រាសាទព្រះវិហារមានចំនួនសរុប ៥៦២កន្លែង ហើយមានសភាពធ្ងន់ធ្ងរដល់រចនាសម្ព័ន្ធប្រាសាទ ក្បាច់ចម្លាក់ និងបង្កការខូចខាតចំពោះតម្លៃលេចធ្លោជាសកល។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងឱ្យដឹងតាមរយៈសន្និសីទសារព័ត៌មាននៅថ្ងៃទី២៣ ខែមីនា ឆ្នាំ២០២៦នេះថា កាលពីថ្ងៃទី១៩ ខែមីនា ឆ្នាំ២០២៦ គណៈកម្មាធិការសម្របសម្រួលអន្តរជាតិដើម្បីការពារ និងលើកតម្លៃប្រាសាទព្រះវិហារ (ICC-ព្រះវិហារ) បានរៀបចំកិច្ចប្រជុំពេញអង្គលើកទី១១ នៅខេត្តសៀមរាប ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានគណៈប្រតិភូរាជរដ្ឋាភិបាលកម្ពុជា ដោយមានតំណាងមកពីចិន និងឥណ្ឌា ជាសហប្រធាន។ឯកឧត្តមបានឱ្យដឹងថា កិច្ចប្រជុំនេះក៏មានការចូលរួមពីតំណាងរដ្ឋសមាជិកចំនួន៥ប្រទេស រួមមាន៖បែលហ្សិក បារាំង ជប៉ុន ថៃ និងសហរដ្ឋអាមេរិក រួមទាំងប្រធានលេខាធិការដ្ឋាន អ្នកជំនាញការអាដហុក ស្ថាប័នជាតិនិងអន្តរជាតិ និងអ្នកស្រាវជ្រាវខ្មែរ និងបរទេស ចូលរួមដោយផ្ទាល់ និងតាមប្រព័ន្ធអនឡាញសរុបប្រមាណ១៥៨រូប។ កិច្ចប្រជុំនេះគឺដើម្បីតាមដាននិងត្រួតពិនិត្យការងារអភិរក្ស និងអភិវឌ្ឍន៍តំបន់រមណីយដ្ឋានប្រាសាទព្រះវិហារ និងប្រាសាទកោះកេរ ដែលអនុវត្តដោយអាជ្ញាធរជាតិព្រះវិហារ និងដៃគូអន្តរជាតិ។ឯកឧត្តមអ្នកនាំពាក្យឱ្យដឹងថាអង្គប្រជុំបានស្ដាប់របាយការណ៍ខូចខាតប្រាសាទព្រះវិហារ និងផលប៉ះពាល់លើសហគមន៍ ប្រជាជន និងវិស័យទេសចរណ៍ បណ្តាលមកពីព្រឹត្តិការណ៍ទាំងពីរលើកកាលពីឆ្នាំ២០២៥កន្លងទៅ។ ជាមួយគ្នានេះ អាជ្ញាធរជាតិព្រះវិហារក៏បានបង្ហាញអំពីលទ្ធផលនៃការសិក្សាហានិភ័យបឋមនិងការលើកផែនការអភិរក្សបន្ទាន់ ដើម្បីទប់ស្កាត់ការខូចខាតបន្តទៀតដល់វត្ថុសិល្បៈដែលនៅជ្រុះរាយប៉ាយ និងហេដ្ឋារចនាសម្ព័ន្ធប្រាសាទដែលរងការខូចខាតធ្ងន់ធ្ងរ។ ផ្អែកតាមការវាយតម្លៃបឋម ការខូចខាតប្រាសាទព្រះវិហារមានចំនួនសរុប ៥៦២កន្លែង ហើយមានសភាពធ្ងន់ធ្ងរដល់រចនាសម្ព័ន្ធប្រាសាទ ក្បាច់ចម្លាក់ និងបង្កការខូចខាតចំពោះតម្លៃលេចធ្លោជាសកល។បើតាមអ្នកនាំពាក្យរាជរដ្ឋាភិបាល នៅមុនកិច្ចប្រជុំនេះ អ្នកជំនាញការអាដហុកនៃគណៈកម្មាធិការ ICC-ព្រះវិហារ ក៏បានបំពេញទស្សនកិច្ច និងពិភាក្សាការងារអភិរក្សនិងជួសជុលប្រាសាទនៅក្នុងរមណីយដ្ឋានប្រាសាទព្រះវិហារ និងប្រាសាទកោះកេរ រយៈពេល២ថ្ងៃ ចាប់ពីថ្ងៃទី១៦ ដល់១៧ ខែមីនា ឆ្នាំ២០២៦ ជាពិសេសការចុះពិនិត្យមើលការខូចខាតប្រាសាទព្រះវិហារ និងផលប៉ះពាល់លើវិស័យទេសចរណ៍និងសហគមន៍ ដើម្បីរៀបចំរបាយការណ៍ និងអនុសាសន៍ សម្រាប់កិច្ចប្រជុំ ICC-ព្រះវិហារ។ជាមួយគ្នានេះដែរ អង្គប្រជុំក៏បានជូនដំណឹងអំពីបេសកកម្មប្រឹក្សាយោបល់បច្ចេកទេសរបស់អង្គការយូណេស្កូ និង ICOMOS ចុះមកពិនិត្យប្រាសាទព្រះវិហារនៅសប្តាហ៍ទី១ ក្នុងខែមីនា តាមការអញ្ជើញរបស់កម្ពុជាស្របតាមគោលការណ៍ប្រតិបត្តិសម្រាប់ការអនុវត្តអនុសញ្ញាបេតិកភណ្ឌពិភពលោក។ គោលបំណងនៃបេសកកម្មនេះគឺដើម្បីវាយតម្លៃស្ថានភាពអភិរក្សសម្បត្តិបេតិកភណ្ឌពិភពលោក និងផ្តល់យោបល់បច្ចេកទេសដើម្បីគាំទ្រដល់ការងារអភិរក្សរយៈពេលវែង ស្របតាមគោលបំណងរបស់អនុសញ្ញាបេតិកភណ្ឌពិភពលោក និងគោលការណ៍ប្រតិបត្តិ។ របាយការណ៍នៃបេសកកម្មនេះនឹងផ្ញើជូនភាគីកម្ពុជា ស្របតាមបេសកកម្មផ្តល់យោបល់បច្ចេកទេសដែលធ្លាប់បានអនុវត្តកន្លងមក។អ្នកនាំពាក្យបញ្ជាក់ថា៖«សហប្រធានចិននិងឥណ្ឌា ព្រមទាំងបណ្តាប្រទេសជាសមាជិក រួមជាមួយអ្នកជំនាញការអន្តរជាតិ បានប្តេជ្ញាបន្តចូលរួមជាមួយរាជរដ្ឋាភិបាលកម្ពុជាក្នុងកិច្ចការពារ និងថែរក្សាបេតិកភណ្ឌពិភពលោកប្រាសាទព្រះវិហារសម្រាប់មនុស្សជាតិជំនាន់ក្រោយៗទៀត ជាពិសេសសហប្រធានទាំងពីរបានបង្ហាញអំពីជំហរបន្តកិច្ចការអភិរក្សប្រាសាទព្រះវិហារតាមរយៈវេទិកាពិគ្រោះយោបល់នេះ នៅពេលដែលស្ថានភាពវិលមកប្រក្រតីភាពវិញ»។បើតាមអ្នកនាំពាក្យ អង្គប្រជុំក៏បានពិភាក្សាគ្នាអំពីវិធានការបន្ទាន់នានាដើម្បីអភិរក្សសង្គ្រោះប្រាសាទព្រះវិហារមានដូចជា៖ អនុវត្តការងារបន្ទាន់មួយចំនួនដូចជាការបោសសម្អាតអាវុធយុទ្ធភណ្ឌមិនទាន់ផ្ទុះដើម្បីធានាដល់ការងារអភិរក្ស និងគ្រប់គ្រងប្រាសាទព្រះវិហារ, ការរៀបចំឯកសារវិភាគហានិភ័យប្រាសាទព្រះវិហារនិងបរិវេណភ្នំទាំងមូល និងការរៀបចំឯកសារអំពីវត្ថុសិល្បៈ និងរចនាសម្ព័ន្ធប្រាសាទដែលទទួលរងគ្រោះថ្នាក់ និងចាត់វិធានការសង្គ្រោះបន្ទាន់។សូមរម្លឹកជូនថា កាលពីថ្ងៃទី១២ ខែមករា ឆ្នាំ ២០២៦ ក្រសួងវប្បធម៌ និងវិចិត្រសិល្បៈ ក៏បានចេញសេចក្តីប្រកាសព័ត៌មានមួយស្តីពីស្ថានភាពខូចខាតរមណីយដ្ឋានប្រាសាទព្រះវិហារយ៉ាងធ្ងន់ធ្ងរដោយសារការទម្លាក់គ្រាប់បែកនិងគ្រាប់ផ្លោងរបស់យោធាថៃ ក្នុងនោះមានទាំងការខូចខាតប្រាង្គប្រាសាទ និងតំបន់ជុំវិញ រួមទាំងវត្តកែវសិក្ខាគីរីស្វារៈផងដែរ។ ក្រសួងវប្បធម៌និងវិចិត្រសិល្បៈបានអំពាវនាវដល់អង្គការ និងសហគមន៍អន្តរជាតិផ្តល់ការគាំទ្រចំពោះវិធានការបន្ទាន់នានាសំដៅការពារប្រាសាទពីការវាយប្រហារបន្ថែម និងគាំទ្រដល់ការអភិរក្សបន្ត និងជួសជុលស្តារប្រាសាទឡើងវិញ។ ទន្ទឹមនឹងនោះ ក្រសួងក៏បានអំពាវនាវឱ្យមានការគោរពច្បាប់អន្តរជាតិ អនុសញ្ញា និងពិធីសារក៏ដូចជាច្បាប់មនុស្សធម៌អន្តរជាតិ ដែលត្រូវបានបង្កើតឡើងសម្រាប់ចងភ្ជាប់រដ្ឋភាគីទាំងអស់ឱ្យគោរពនិងការពារបេតិកភណ្ឌវប្បធម៌ដែលមានតម្លៃលេចធ្លោជាសាកល៕

ភូមិបណ្តោះអាសន្នថ្មី បានផ្តល់ការរស់នៅកាន់តែប្រសើរឡើង ដល់ជនភៀសសឹកក្នុងខេត្តបន្ទាយមានជ័យ

ក្រុមគ្រួសារជនភៀសសឹក បាននិងកំពុងផ្លាស់ទីលំនៅពីជំរំតង់ ទៅកាន់ភូមិបណ្ដោះអាសន្នថ្មី ដែលរៀបចំដោយរដ្ឋាភិបាល ដើម្បីផ្តល់លក្ខខណ្ឌរស់នៅកាន់ប្រសើរឡើង ខណៈយន្តការការទូតកំពុងដំណើរការដើម្បីដោះស្រាយជម្លោះព្រំដែនជាមួយថៃ។ឯកឧត្តម ឃ្លោក នួយ អភិបាលរងខេត្តបន្ទាយមានជ័យ បានប្រាប់អ្នកសារព័ត៌មានថា ក្នុងដំណាក់កាលដំបូង ជនភៀសសឹកជាង ៨០០គ្រួសារ ដែលស្នាក់នៅជំរំក្នុងវត្តកណ្តោល បាននិងកំពុងផ្លាស់ទីទៅ រស់នៅផ្ទះបណ្តោះអាសន្នថ្មីជាបណ្តើៗហើយ។ ផ្ទះបណ្ដោះអាសន្ននេះ គឺសាងសង់សម្រាប់ផ្ដល់ជូនអតីតយុទ្ធជន ប៉ុន្ដែពេលនេះរាជរដ្ឋាភិបាលបានសម្រេចផ្តល់ឱ្យជនភៀសសឹករស់នៅជាបណ្តោះអាសន្នសិន រហូតដល់រាជរដ្ឋាភិបាលទាមទាផ្ទះសម្បែងពួកគាត់វិញ ពីយោធាថៃ ដែលបានដាក់ទូកុងតឺន័រ និងបន្លាលួសព័ន្ធកាន់កាប់ បន្ទាប់ពីមានបទឈប់បាញចូលជាធរមានកាលពីថ្ងៃទី២៧ ខែធ្នូ ឆ្នាំ ២០២៥។ឯកឧត្តម បន្ថែមថា ផ្ទះបណ្តោះអាសន្ននេះត្រូវបានសាងសង់លើដីទំហំ ២០ម៉ែត្រ គុណនឹង ៣០ម៉ែត្រ ជាមួយនឹងហេដ្ឋារចនាសម្ព័ន្ធពេញលេញ ដែលមាន ផ្លូវថ្នល់ ទឹកស្អាត អគ្គិសនី សាលារៀន មណ្ឌលសុខភាព និងទីស្នាក់ការភូមិ ជាដើម។ ទីតាំងផ្ទះបណ្តោះអាសន្ននេះ ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជួយ ដែលមានចម្ងាយប្រមាណ ១៥គីឡូម៉ែត្រពីជំរំចាស់។ជាមួយគ្នានេះ ពលរដ្ឋភៀសសឹកបានថ្លែងអំណរគុណរាជរដ្ឋាភិបាល ដែលបានផ្តល់ជម្រកបណ្តោះអាសន្នសមរម្យដល់ពួកគាត់។ ទោះបីយ៉ាងណាពួកគាត់ នៅតែចង់ទៅរស់នៅភូមិកំណើតរបស់ពួកគាត់វិញ ដោយជឿជាក់លើរាជរដ្ឋាភិបាលនឹងទាបទាមដីពីថៃវិញបានតាមរយៈយន្តការការទូត។សូមបញ្ជាក់ថា ជំរំក្នុងវត្តកណ្តោល គឺជាជំរំធ្វើពីតង់កៅស៊ូ និងក្រាលពីឈើផ្ទាល់ដី ដែលពិបាករស់នៅក្នុងស្ថានភាពអាកាសធាតុមិនអំណោយផល ជាពិសេសរដូវវស្សាខិតជិតមកដល់ ដូច្នេះទើបរាជរដ្ឋាភិបាលសម្រេចផ្លាស់ទីដល់ពលរដ្ឋភៀសសឹកឱ្យទៅរស់នៅក្នុងផ្ទះបណ្តោះអាសន្នថ្មីដែលរៀបចំជូនប្រមាណ ៣,០០០ ខ្នង ដើម្បីផ្ដល់ភាពងាយស្រួល និងអាចធ្វើកកម្មចិញ្ចឹមជីវិតបានថែមទៀត៕ អត្ថបទ៖ ធូ វិរៈ

សមាគមពាណិជ្ជករដឹកជញ្ជូន៖ ប្រតិបត្តិករដឹកជញ្ជូនត្រូវកំណត់ថ្លៃឱ្យបានសមរម្យបន្តប្រតិបត្តិការដឹកជញ្ជូន

ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា អំពាវនាវដល់អ្នកប្រកបសេវាកម្មដឹកជញ្ជូន នៅក្នុងស្ថានភាព ដ៏លំបាកនេះ សូមកុំផ្អាកលើប្រតិបត្តិការដឹកជញ្ជូនរបស់ខ្លួន និងសូមកំណត់ថ្លៃលើសេវាដឹកជញ្ជូនឱ្យបានសមរម្យ ព្រោះការដឹកជញ្ជូន មានសារៈសំខាន់ក្នុងការតភ្ជាប់អន្តរកម្មទំនិញ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើកឡើងក្នុងកិច្ចសម្ភាសន៍ នៅ ក្នុងសន្និបាទប្រចាំឆ្នាំលើកទី៨ របស់សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា នៅល្ងាចថ្ងៃទី២១ ខែមីនា ឆ្នាំ ២០២៦ ថា ជុំវិញការហក់ឡើងនៃតម្លៃប្រេងឥន្ធនៈនេះ បានប៉ះពាល់លើសេវាកម្មដឹកជញ្ជូនមុនគេ ហើយបញ្ហានេះដែរម្ចាស់រោងចក្រ សហគ្រាសនានា ក៏មិនចង់ឱ្យមានបញ្ហានៃការឡើងថ្លៃលើសេវាដឹកជញ្ជូននេះផងដែរ។ បញ្ហានេះចំពោះភាគីអ្នកដឹកជញ្ជូន ត្រូវផ្តល់ ដំណឹងអំពីការឡើងថ្លៃលើការដឹកជញ្ជូនទៅដល់អតិថិនរបស់ខ្លួន (ម្ចាស់រោងចក្រ) ឬត្រូវជជែកពិភាក្សាគ្នាឱ្យបានច្បាស់លាស់លើការ កំណត់ថ្លៃថ្មី សម្រាប់ប្រតិបតិការដឹកជញ្ជូន។លោកប្រធានសមាគមរូបនេះ លើកឡើងបន្ថែមថា វិស័យដឹកជញ្ជូនមានសារៈណាស់ ដូច្នេះនៅក្នុងស្ថានភាពដ៏លំបាក ដែល កំពុងមានបញ្ហាប្រឈមអំពីការហក់ឡើងតម្លៃប្រេងសាំងនេះ អ្នកដឹកជញ្ជូនទាំងអស់ សូមកំណត់ថ្លៃលើសេវាដឹកជញ្ជូនឱ្យបានសមរម្យ ជាពិសេសសូមកុំផ្អាកលើប្រតិបតិការដឹកជញ្ជូនរបស់ខ្លួន ព្រោះការដឹកជញ្ជូនគឺជាបណ្តាញនៃការតភ្ជាប់អន្តរកម្មទំនិញ ទៅកាន់រោង ចក្រ សហគ្រាស និងបណ្តាសកម្មភាពផ្សេងៗដែលបម្រើឱ្យសេដ្ឋកិច្ច។ លោក ជា ចាន់ដារ៉ា លើកឡើងឱ្យដឹងថា ជុំវិញតម្លៃប្រេងឥន្ធនៈឡើងថ្លៃនេះ ឃើញថា ទាក់ទិនការដឹកជញ្ជូនជាអន្តរជាតិ បច្ចុប្បន្នតម្លៃការដឹកជញ្ជូនតាមកប៉ាល់មួយចំនួន បានឡើងថ្លៃពីប្រមាណ២០ ទៅ៣០% ខណៈការដឹកជញ្ជូនតាមរថយន្តនៅក្នុងស្រុក មួយចំនួនបានហក់ឡើង ដោយការដឹកជញ្ជូនក្នុង១ទូ ឡើងក្នុងរង្វង់ ២៥ ទៅ ៣០%។សូមបញ្ជក់ថា នៅក្នុងសន្និបាទប្រចាំឆ្នាំ របស់សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជានេះដែរ ក៏មានកិច្ចពិភាក្សា អំពីបញ្ហាប្រឈមនៅកំពង់ផែ ក្នុងការពន្លឿន និងបញ្ចេញទំនិញ និងបញ្ចៀសចរាចរកក់ស្ទះប្រចាំថ្ងៃលើការដឹកជញ្ជូន រវាងតំណាង អគ្គនាយកដ្ឋានគយ និងរដ្ឋាករកម្ពុជា ជាមួយវិស័យឯកជន និងអ្នកពាក់ព័ន្ធផងដែរ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ផែនការចំណុចរបស់អ៊ីរ៉ង់ បញ្ជាក់ថា អាមេរិកត្រូវទទួលយកការបង្កើនអ៊ុយរ៉ានីញ៉ូម និងលុបគ្រប់ទណ្ឌកម្ម

អ៊ីស្រាអែលបន្តវាយប្រហារលើភាគខាងត្បូងលីបង់ ខណៈដែលបទឈប់បាញ់អ៊ីរ៉ង់មិនរាប់បញ្ចូលប្រទេសលីបង់ទេ

អូស្ត្រាលី និងចិន យល់ព្រមស្វែងរកសន្តិសុខថាមពលក្នុងតំបន់

រដ្ឋឈូងសមុទ្រកំពុងសម្លឹងរកយានដ្រូនស្ទាក់ចាប់អាវុធពីអ៊ុយក្រែនមានតម្លៃទាប ខណៈស្តុកមីស៊ីលខើចអំឡុងសង្គ្រាមអ៊ីរ៉ង់

ប្រភព៖ លោក Lam គ្រោងទស្សនកិច្ច នៅចិន សប្តាហ៍ក្រោយ ក្រោយឡើងកាន់តំណែងមេដឹកនាំកំពូលវៀតណាម

លោក ហ្សេឡិនស្គី៖ អាស៊ីបង្ហាញចំណាប់អារម្មណ៍លើជំនាញការពារដែនសមុទ្ររបស់អ៊ុយក្រែន

បេសកជនប្រធានាធិបតីរុស្ស៊ី៖ វិបត្តិអ៊ីរ៉ង់បង្ហាញពីភាពទន់ខ្សោយរបស់ NATO និង EU

លោក ហ្សេឡិនស្គី៖ អ៊ុយក្រែនកំពុងជួយប្រទេសចំនួន ៥ ក្នុងការទប់ទល់នឹងយានដ្រូនរបស់អ៊ីរ៉ង់

មេដឹកនាំប្រឆាំងតៃវ៉ាន់ សន្យាផ្សះផ្សា នៅឯវិមានរំលឹកវិញ្ញាណក្ខន្ធបិតាស្ថាបនិក នៅចិន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ពលរដ្ឋអរគុណរាជរដ្ឋាភិបាល ដាក់ចេញការកាត់បន្ថយពន្ធលើប្រេងឥន្ធនៈបន្ថែមទៀត

ពលរដ្ឋខ្មែររស់នៅអាម៉េរិក និងជប៉ុន ត្រៀមរួចរាល់មកលេងប្រទេសកម្ពុជាក្នុងឱកាសពិធីបុណ្យចូលឆ្នាំថ្មី

សិប្បករ៖ តម្រូវការក្រមានៅតាមទីផ្សារមានកំណើន ខណៈក្រុមយុវជនធ្វើយុទ្ធនាការ១ម៉ឺនក្រមា ដើម្បីកងទ័ព

សេវារថយន្តក្រុងសាធារណៈ បាននិងកំពុងជួយសម្រាលការចំណាយរបស់ពលរដ្ឋ ក្នុងបរិបទវិបត្តិតម្លៃប្រេង

នគរសង្ក្រាន្ត៖ ក្រុមការងារកំពុងដំឡើងការសាងសង់ «ភូមិសង្ក្រាន្ត» នៅទីតាំងក្រោយផ្សាររាត្រី

រយៈពេលបីថ្ងៃ អ្នកទេសចរណ៍ជាង ៧ម៉ឺន៤ពាន់នាក់មកទស្សនាព្រឹត្ដិការណ៍សមរាត្រីនៅប្រាសាទអង្គរ

សហជីព និងកម្មករ អរគុណរាជរដ្ឋាភិបាលបានជួយសម្រាលបន្ទុកចំណាយក្នុងវិបត្តិប្រេងឥន្ធនៈសកល

ការវាយតម្លៃបឋមការខូចខាតប្រាសាទព្រះវិហារមានចំនួនសរុប ៥៦២កន្លែងហើយមានសភាពធ្ងន់ធ្ងរ

ភូមិបណ្តោះអាសន្នថ្មី បានផ្តល់ការរស់នៅកាន់តែប្រសើរឡើង ដល់ជនភៀសសឹកក្នុងខេត្តបន្ទាយមានជ័យ

សមាគមពាណិជ្ជករដឹកជញ្ជូន៖ ប្រតិបត្តិករដឹកជញ្ជូនត្រូវកំណត់ថ្លៃឱ្យបានសមរម្យបន្តប្រតិបត្តិការដឹកជញ្ជូន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ពលរដ្ឋអរគុណរាជរដ្ឋាភិបាល ដាក់ចេញការកាត់បន្ថយពន្ធលើប្រេងឥន្ធនៈបន្ថែមទៀត

សិប្បករ៖ តម្រូវការក្រមានៅតាមទីផ្សារមានកំណើន ខណៈក្រុម​យុវជន​ធ្វើ​យុទ្ធនាការ​១ម៉ឺន​ក្រមា​ ដើម្បី​កងទ័ព

សេវារថយន្តក្រុងសាធារណៈ បាននិងកំពុងជួយសម្រាលការចំណាយរបស់ពលរដ្ឋ ក្នុង​បរិបទ​វិបត្តិ​តម្លៃប្រេង

នគរសង្ក្រាន្ត៖ ក្រុមការងារកំពុងដំឡើងការសាងសង់ «ភូមិសង្ក្រាន្ត» នៅទីតាំងក្រោយផ្សាររាត្រី

រយៈពេលបីថ្ងៃ អ្នកទេសចរណ៍ជាង ៧ម៉ឺន៤ពាន់នាក់មកទស្សនាព្រឹត្ដិការណ៍​សមរាត្រីនៅ​ប្រាសាទអង្គរ

សហជីព និងកម្មករ អរគុណរាជរដ្ឋាភិបាល​បានជួយ​សម្រាល​បន្ទុក​ចំណាយ​ក្នុង​វិបត្តិ​ប្រេង​ឥន្ធនៈ​សកល

ការវាយតម្លៃបឋមការខូចខាតប្រាសាទព្រះវិហារមានចំនួនសរុប ៥៦២កន្លែង​ហើយ​មាន​សភាព​ធ្ងន់ធ្ងរ

ភូមិបណ្តោះអាសន្នថ្មី បានផ្តល់ការរស់នៅកាន់តែប្រសើរឡើង ដល់ជនភៀសសឹកក្នុងខេត្តបន្ទាយមានជ័យ

សមាគមពាណិជ្ជករដឹកជញ្ជូន៖ ប្រតិបត្តិករដឹកជញ្ជូនត្រូវកំណត់ថ្លៃឱ្យបានសមរម្យបន្តប្រតិបត្តិការដឹកជញ្ជូន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សិប្បករ៖ តម្រូវការក្រមានៅតាមទីផ្សារមានកំណើន ខណៈក្រុមយុវជនធ្វើយុទ្ធនាការ១ម៉ឺនក្រមា ដើម្បីកងទ័ព

សេវារថយន្តក្រុងសាធារណៈ បាននិងកំពុងជួយសម្រាលការចំណាយរបស់ពលរដ្ឋ ក្នុងបរិបទវិបត្តិតម្លៃប្រេង

រយៈពេលបីថ្ងៃ អ្នកទេសចរណ៍ជាង ៧ម៉ឺន៤ពាន់នាក់មកទស្សនាព្រឹត្ដិការណ៍សមរាត្រីនៅប្រាសាទអង្គរ

សហជីព និងកម្មករ អរគុណរាជរដ្ឋាភិបាលបានជួយសម្រាលបន្ទុកចំណាយក្នុងវិបត្តិប្រេងឥន្ធនៈសកល

ការវាយតម្លៃបឋមការខូចខាតប្រាសាទព្រះវិហារមានចំនួនសរុប ៥៦២កន្លែងហើយមានសភាពធ្ងន់ធ្ងរ