នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អនុប្រធានប្រចាំការ គ.ប.ឆ.ប.៖ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជួយកម្ពុជាកម្ចាត់ឧក្រិដ្ឋកម្មបច្ចេកវិទ្យាឱ្យអស់ និងមិនឱ្យឧក្រិដ្ឋកម្មនេះវិលត្រលប់មកវិញឡើយ
អ្នកនាំពាក្យក្រសួងការបរទេសកម្ពុជា ៖ វាជារឿងគួរឱ្យសោក​ស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោ​ភាគីពីអនុស្សរណៈឆ្នាំ២០០១
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា
គណៈកម្មការគ្រប់គ្រងល្បែងពាណិជ្ជកម្មកម្ពុជាដកហូតអាជ្ញាបណ្ណកាស៊ីណូពីក្រុមហ៊ុន ខេ ប៊ី អាយ (ខេមបូឌា) ភីអិលស៊ី

ព័ត៌មានជាតិ

ភូមិបណ្តោះអាសន្នថ្មី បានផ្តល់ការរស់នៅកាន់តែប្រសើរឡើង ដល់ជនភៀសសឹកក្នុងខេត្តបន្ទាយមានជ័យ

2026/03/23 11:34:31 am        204
Facebook Telegram Linkin
ក្រុមគ្រួសារជនភៀសសឹក បាននិងកំពុងផ្លាស់ទីលំនៅពីជំរំតង់ ទៅកាន់ភូមិបណ្ដោះអាសន្នថ្មី ដែលរៀបចំដោយរដ្ឋាភិបាល ដើម្បីផ្តល់លក្ខខណ្ឌរស់នៅកាន់ប្រសើរឡើង ខណៈយន្តការការទូតកំពុងដំណើរការដើម្បីដោះស្រាយជម្លោះព្រំដែនជាមួយថៃ។ឯកឧត្តម ឃ្លោក នួយ អភិបាលរងខេត្តបន្ទាយមានជ័យ បានប្រាប់អ្នកសារព័ត៌មានថា ក្នុងដំណាក់កាលដំបូង ជនភៀសសឹកជាង ៨០០គ្រួសារ ដែលស្នាក់នៅជំរំក្នុងវត្តកណ្តោល បាននិងកំពុងផ្លាស់ទីទៅ រស់នៅផ្ទះបណ្តោះអាសន្នថ្មីជាបណ្តើៗហើយ។ ផ្ទះបណ្ដោះអាសន្ននេះ គឺសាងសង់សម្រាប់ផ្ដល់ជូនអតីតយុទ្ធជន ប៉ុន្ដែពេលនេះរាជរដ្ឋាភិបាលបានសម្រេចផ្តល់ឱ្យជនភៀសសឹករស់នៅជាបណ្តោះអាសន្នសិន រហូតដល់រាជរដ្ឋាភិបាលទាមទាផ្ទះសម្បែងពួកគាត់វិញ ពីយោធាថៃ ដែលបានដាក់ទូកុងតឺន័រ និងបន្លាលួសព័ន្ធកាន់កាប់ បន្ទាប់ពីមានបទឈប់បាញចូលជាធរមានកាលពីថ្ងៃទី២៧ ខែធ្នូ ឆ្នាំ ២០២៥។ឯកឧត្តម បន្ថែមថា ផ្ទះបណ្តោះអាសន្ននេះត្រូវបានសាងសង់លើដីទំហំ ២០ម៉ែត្រ គុណនឹង ៣០ម៉ែត្រ ជាមួយនឹងហេដ្ឋារចនាសម្ព័ន្ធពេញលេញ ដែលមាន ផ្លូវថ្នល់ ទឹកស្អាត អគ្គិសនី សាលារៀន មណ្ឌលសុខភាព និងទីស្នាក់ការភូមិ ជាដើម។ ទីតាំងផ្ទះបណ្តោះអាសន្ននេះ ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជួយ ដែលមានចម្ងាយប្រមាណ ១៥គីឡូម៉ែត្រពីជំរំចាស់។ជាមួយគ្នានេះ ពលរដ្ឋភៀសសឹកបានថ្លែងអំណរគុណរាជរដ្ឋាភិបាល ដែលបានផ្តល់ជម្រកបណ្តោះអាសន្នសមរម្យដល់ពួកគាត់។ ទោះបីយ៉ាងណាពួកគាត់ នៅតែចង់ទៅរស់នៅភូមិកំណើតរបស់ពួកគាត់វិញ ដោយជឿជាក់លើរាជរដ្ឋាភិបាលនឹងទាបទាមដីពីថៃវិញបានតាមរយៈយន្តការការទូត។សូមបញ្ជាក់ថា ជំរំក្នុងវត្តកណ្តោល គឺជាជំរំធ្វើពីតង់កៅស៊ូ និងក្រាលពីឈើផ្ទាល់ដី ដែលពិបាករស់នៅក្នុងស្ថានភាពអាកាសធាតុមិនអំណោយផល ជាពិសេសរដូវវស្សាខិតជិតមកដល់ ដូច្នេះទើបរាជរដ្ឋាភិបាលសម្រេចផ្លាស់ទីដល់ពលរដ្ឋភៀសសឹកឱ្យទៅរស់នៅក្នុងផ្ទះបណ្តោះអាសន្នថ្មីដែលរៀបចំជូនប្រមាណ ៣,០០០ ខ្នង ដើម្បីផ្ដល់ភាពងាយស្រួល និងអាចធ្វើកកម្មចិញ្ចឹមជីវិតបានថែមទៀត៕ អត្ថបទ៖ ធូ វិរៈ 

សមាគមពាណិជ្ជករដឹកជញ្ជូន៖ ប្រតិបត្តិករដឹកជញ្ជូនត្រូវកំណត់ថ្លៃឱ្យបានសមរម្យបន្តប្រតិបត្តិការដឹកជញ្ជូន

2026/03/23 10:52:32 am        72
Facebook Telegram Linkin
ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា អំពាវនាវដល់អ្នកប្រកបសេវាកម្មដឹកជញ្ជូន នៅក្នុងស្ថានភាព ដ៏លំបាកនេះ សូមកុំផ្អាកលើប្រតិបត្តិការដឹកជញ្ជូនរបស់ខ្លួន និងសូមកំណត់ថ្លៃលើសេវាដឹកជញ្ជូនឱ្យបានសមរម្យ ព្រោះការដឹកជញ្ជូន មានសារៈសំខាន់ក្នុងការតភ្ជាប់អន្តរកម្មទំនិញ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើកឡើងក្នុងកិច្ចសម្ភាសន៍ នៅ ក្នុងសន្និបាទប្រចាំឆ្នាំលើកទី៨ របស់សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា នៅល្ងាចថ្ងៃទី២១ ខែមីនា ឆ្នាំ ២០២៦ ថា ជុំវិញការហក់ឡើងនៃតម្លៃប្រេងឥន្ធនៈនេះ បានប៉ះពាល់លើសេវាកម្មដឹកជញ្ជូនមុនគេ ហើយបញ្ហានេះដែរម្ចាស់រោងចក្រ សហគ្រាសនានា ក៏មិនចង់ឱ្យមានបញ្ហានៃការឡើងថ្លៃលើសេវាដឹកជញ្ជូននេះផងដែរ។ បញ្ហានេះចំពោះភាគីអ្នកដឹកជញ្ជូន ត្រូវផ្តល់ ដំណឹងអំពីការឡើងថ្លៃលើការដឹកជញ្ជូនទៅដល់អតិថិនរបស់ខ្លួន (ម្ចាស់រោងចក្រ) ឬត្រូវជជែកពិភាក្សាគ្នាឱ្យបានច្បាស់លាស់លើការ កំណត់ថ្លៃថ្មី សម្រាប់ប្រតិបតិការដឹកជញ្ជូន។លោកប្រធានសមាគមរូបនេះ លើកឡើងបន្ថែមថា វិស័យដឹកជញ្ជូនមានសារៈណាស់ ដូច្នេះនៅក្នុងស្ថានភាពដ៏លំបាក ដែល កំពុងមានបញ្ហាប្រឈមអំពីការហក់ឡើងតម្លៃប្រេងសាំងនេះ អ្នកដឹកជញ្ជូនទាំងអស់ សូមកំណត់ថ្លៃលើសេវាដឹកជញ្ជូនឱ្យបានសមរម្យ ជាពិសេសសូមកុំផ្អាកលើប្រតិបតិការដឹកជញ្ជូនរបស់ខ្លួន ព្រោះការដឹកជញ្ជូនគឺជាបណ្តាញនៃការតភ្ជាប់អន្តរកម្មទំនិញ ទៅកាន់រោង ចក្រ សហគ្រាស និងបណ្តាសកម្មភាពផ្សេងៗដែលបម្រើឱ្យសេដ្ឋកិច្ច។ លោក ជា ចាន់ដារ៉ា លើកឡើងឱ្យដឹងថា ជុំវិញតម្លៃប្រេងឥន្ធនៈឡើងថ្លៃនេះ ឃើញថា ទាក់ទិនការដឹកជញ្ជូនជាអន្តរជាតិ បច្ចុប្បន្នតម្លៃការដឹកជញ្ជូនតាមកប៉ាល់មួយចំនួន បានឡើងថ្លៃពីប្រមាណ២០ ទៅ៣០% ខណៈការដឹកជញ្ជូនតាមរថយន្តនៅក្នុងស្រុក មួយចំនួនបានហក់ឡើង ដោយការដឹកជញ្ជូនក្នុង១ទូ ឡើងក្នុងរង្វង់ ២៥ ទៅ ៣០%។សូមបញ្ជក់ថា នៅក្នុងសន្និបាទប្រចាំឆ្នាំ របស់សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជានេះដែរ ក៏មានកិច្ចពិភាក្សា អំពីបញ្ហាប្រឈមនៅកំពង់ផែ ក្នុងការពន្លឿន និងបញ្ចេញទំនិញ និងបញ្ចៀសចរាចរកក់ស្ទះប្រចាំថ្ងៃលើការដឹកជញ្ជូន រវាងតំណាង អគ្គនាយកដ្ឋានគយ និងរដ្ឋាករកម្ពុជា ជាមួយវិស័យឯកជន និងអ្នកពាក់ព័ន្ធផងដែរ៕អត្ថបទ៖ សុន រ៉ាឌី

ក្រុមប្រឹក្សាអភិវឌ្ឍន៍កម្ពុជា ពិនិត្យពិភាក្សាលើសំណើសុំចុះបញ្ជីគម្រោងវិនិយោគថ្មី ៦គម្រោង មានទុនវិនិយោគសរុប ១៧៤លានដុល្លារ

2026/03/23 10:41:43 am        171
Facebook Telegram Linkin
គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ពិនិត្យ ពិភាក្សាលើ​សំណើសុំ​ចុះ​បញ្ជី​គម្រោង​វិនិយោគមានលក្ខណៈ សម្បត្តិគ្រប់គ្រាន់ចំនួន ៦គម្រោង មានទុន​វិនិយោគ​សរុប​ប្រមាណ ១៧៤ លានដុល្លារអាម៉េរិក ដោយគម្រោងទាំងនោះអាចបង្កើត ការងារបាន​ប្រមាណ​ជា​ង​៣​ពាន់កន្លែង។  ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ក្រុមប្រឹក្សាអភិវឌ្ឍន៍កម្ពុជា នៅ​សប្តាហ៍កន្លងមកនេះ បានដឹក នាំកិច្ចប្រជុំច្រកចេញ-ចូលតែមួយ ដើម្បីពិនិត្យ ពិភាក្សា លើ​សំណើ​សុំ​ចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៦ គម្រោង ដែល​គម្រោង​វិនិយោគ​ទាំង ៦នេះ បានជ្រើសរើសទីតាំងវិនិយោគរបស់ខ្លួន នៅខេត្តស្វាយរៀង បាត់ដំបង តាកែវ ពោធិ៍សាត់ កណ្តាល និងកំពង់ស្ពឺ។ជុំវិញគម្រោងវិនិយោគខាងលើនេះ មានទុនវិនិយោគសរុបប្រមាណ ១៧៤ លានដុល្លារអាម៉េរិក អាច​បង្កើតការងារបានជាង ៣ពាន់កន្លែង ក្នុងនោះវិនិយោគ​លើ​វិស័យ​ឧស្សាហកម្ម​ចំនួន​៤​គម្រោង​រួម​មាន៖ ផលិតដើមណូអែល អំពូលភ្លើងលំអ និងសម្ភារៈតុប តែង​សម្រា​ប់​ពិធី​បុណ្យ​ណូអែល, ផលិតដីសគ្រប់ប្រភេទ និងគ្រឿងតុបតែងលម្អពីប្លាស្ទិក, ផ្គុំដំឡើងរថយន្ត និង​ផលិត​សម្ភារៈតុបតែង សម្រាប់ពិធីបុណ្យ ប្រដាប់ប្រដាក្មេងលេង កាបូប វាំងនន និងបោះពុម្ភ​ផលិត​ផល​សម្រេច​។ វិស័យកសិកម្ម និងកសិ-ឧស្សាហកម្ម ចំនួន ១គម្រោង៖ បង្កើតកសិដ្ឋាន​ដាំដំណាំ​ឈើ​ហូប​ផ្លែ ​(មៀនប៉ៃលិន) និងសាងសង់រោងចក្រកែច្នៃ។ និងវិស័យហេដ្ឋារចនាសម្ព័ន្ធចំនួន ១​គម្រោង​៖ អភិវឌ្ឍន៍ស្ថានីយផលិតអគ្គិសនីដើរដោយថាមពលជីវម៉ាសអានុភាព ៥០ មេហ្គាវ៉ាត់ និ​​ង​ស្ថានីយផលិតអគ្គិសនី ដើរដោយ ថាមពលពន្លឺព្រះអាទិត្យអានុភាព ៤០ មេហ្គាវ៉ាត់។សូមបញ្ជាក់ថា នៅក្នុងខែកុម្ភៈ ឆ្នាំ២០២៦ កន្លងមកនេះ ក្រុមប្រឹក្សាអភិវឌ្ឍន៍កម្ពុជា បាន​អនុម័​ត​គម្រោង​វិនិយោគសរុបចំនួន ៤២គម្រោង មានទុនវិនិយោគប្រមាណ ១៦៦លានដុល្លារអាមេរិក ក្នុ​ង​នោះចំ​នួន១៨ គម្រោង ចុះបញ្ជីដោយក្រុមប្រឹក្សាអភិវឌ្ឍន៍កម្ពុជា (ក.អ.ក.) និង​គម្រោង​ចំនួន​ ២៤ ត្រូវបានចុះបញ្ជីដោយអនុគណៈកម្មាធិការវិនិយោគរាជធានី-ខេត្ត (អ.គ.វ.រ.ខ.)៕ អត្ថបទ៖ សុន រ៉ាឌី

រដ្ឋមន្ដ្រីធនធានទឹក ដឹកនាំកិច្ចប្រជុំបន្ទាន់ ពិភាក្សា និងវាយតម្លៃផលប៉ះពាល់នៃវិបត្តិថាមពលសកលលើការងារវិស្វកម្ម និងកិច្ចអន្តរាគមន៍ធនធានទឹក

2026/03/23 10:34:04 am        112
Facebook Telegram Linkin
ភ្នំពេញ៖ នៅព្រឹកថ្ងៃទី២៣ ខែមីនា ឆ្នាំ២០២៦ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំបន្ទាន់ ដើម្បីពិភាក្សា និងវាយតម្លៃលើស្ថានភាពរីករាលដាលនៃសង្រ្គាមនៅតំបន់មជ្ឈិមបូព៌ា ដែលកំពុងបង្កឱ្យមានការហក់ឡើងខ្ពស់នៃតម្លៃប្រេងឥន្ធនៈលើទីផ្សារសកល នៅទីស្ដីការក្រសួង។ កិច្ចប្រជុំនេះបានផ្ដោតសំខាន់ទៅលើការសិក្សាពីផលប៉ះពាល់ដោយផ្ទាល់ និងដោយប្រយោល មកលើគម្រោងវិស្វកម្ម ហេដ្ឋារចនាសម្ព័ន្ធធនធានទឹក និងការងារអន្តរាគមន៍នានាដែលស្ថិតក្រោមសមត្ថកិច្ចរបស់ក្រសួង។ ក្នុងឱកាសនោះ ឯកឧត្តមរដ្ឋមន្ត្រី ក៏បានណែនាំឱ្យគ្រប់នាយកដ្ឋាន និងមន្ទីរជំនាញទាំងអស់ប្រើប្រាស់ទឹក និងថាមពលដោយមានភាពសន្សំសំចៃខ្ពស់បំផុត និងកាត់បន្ថយការចំណាយមួយចំនួនដែលពុំចាំបាច់ដើម្បីជួយសន្សំការចំណាយ ដើម្បីធានាថាការងារសាងសង់ និងថែទាំប្រព័ន្ធធារាសាស្ត្រនៅទូទាំងប្រទេស នៅតែអាចដំណើរការទៅបានដោយរលូន ទោះបីជាស្ថិតក្នុងសម្ពាធនៃវិបត្តិថាមពលក៏ដោយ ព្រមទាំងបង្កើនប្រសិទ្ធភាពការងារ និងការត្រៀមលក្ខណៈកែសម្រួលវិធានការបច្ចេកទេសឱ្យស្របតាមស្ថានភាពជាក់ស្តែង សំដៅការពារផលប្រយោជន៍របស់ប្រជាកសិករ និងធានាសុវត្ថិភាពសន្តិសុខទឹកក្នុងបរិបទដែលសេដ្ឋកិច្ចសកលកំពុងមានភាពប្រែប្រួលខ្លាំង៕

កម្លាំងសមត្ថកិច្ចបើកប្រតិបត្តិការបង្ក្រាបសំបុក Online Scams នៅសង្កាត់​អូរបែក​ក្អម​ឃាត់​ខ្លួន​មនុស្ស ​៤៩នាក់

2026/03/23 10:31:44 am        192
Facebook Telegram Linkin
ភ្នំពេញ៖ កម្លាំងសមត្ថកិច្ចនៃស្នងការដ្ឋាននគរបាលរាជធានីភ្នំពេញ បានបើក​ប្រតិបត្តិកា​រ​ចុះ​បង្ក្រាប​ទីតាំង​ឆបោក​តាម​ប្រព័ន្ធបច្ចេកវិទ្យា Online Scam នៅសណ្ឋាគារជីនបៀនមេនឌូ  ផ្លូវ​១០១៩ ភូមិទ្រុងមាន់ សង្កាត់អូរបែកក្អម ខណ្ឌសែនសុខ។លេខាធិការដ្ឋាន​គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)​បានឱ្យដឹងថា ការបង្រ្កាបនេះ ធ្វើឡើងនៅរសៀលថ្ងៃទី២២ ខែមីនា ឆ្នាំ២០២៦ ដោយ​មាន​ការបញ្ជាពីឯកឧត្តម ឃួង ស្រេង ប្រធានគណៈ​បញ្ជា​ការ​ឯកភាព​រដ្ឋបាល​រាជ​ធានី​ភ្នំពេញ​ និងប្រើប្រាស់វិធានការជំនាញ ដឹកនាំដោយឯកឧត្តម ជួន ណារិន្ទ ស្នងការ​នគរបាល​រាជ​ធានី​ភ្នំពេញ​ ដោយមានការសម្របសម្រួលនីតិវិធីច្បាប់ដោយលោក ឆាយ ហុង ព្រះរាជអាជ្ញារង​នៃ​អយ្យការ​អម​សាលាដំបូងរាជធានីភ្នំពេញ។លទ្ធផលនៃការ​បង្ក្រាបនេះ កម្លាំងសមត្ថកិច្ចបានឃាត់ខ្លួនមនុស្សសរុបចំនួន ៤៩នាក់។ ក្នុងនោះ នៅ​ជាន់​ផ្ទាល់ដីបន្ទប់កាមេរ៉ាសុវត្ថិភាពមាន០៧នាក់ ក្នុងនោះជនជាតិចិន០៦នាក់ និងស្ត្រី​វៀតណាម​១​នាក់​។ នៅជាន់ទី ២និងទី៣ បន្ទប់ស្នាក់នៅមានចំនួន២៦នាក់ ក្នុងនោះ​មាន​ជន​ជាតិ​​ចិ​ន​២៥នាក់ និងម៉ាឡេស៊ីចំនួន១នាក់ និងជាន់ដំបូល ជាទីតាំងប្រព្រឹត្ត Online Scams មាន​១៦​នាក់ ក្នុងនោះជនជាតិចិន ១២នាក់ ម៉ាឡេស៊ី០២នាក់ ស្ត្រីមីយ៉ាន់ម៉ា០១នាក់ និងស្ត្រី​ខ្មែរ​ចំនួ​ន១នាក់។ ចំណែក វត្ថុតាង មានដូចជាៈ កុំព្យូទ័រ All In One ៦០ គ្រឿង, CPU ៣១ គ្រឿង និង Laptop ០១ គ្រឿង, ទូរសព្ទដៃ ៦៨៧ គ្រឿង និងស៊ីមកាត ម៉ាឡេស៊ី ចំនួន៤៦ ស៊ីម។តាមការស៊ើបអង្កេតបឋម ក្រុមជនសង្ស័យបានប្រើប្រាស់ទឹកដីកម្ពុជាធ្វើជាមូលដ្ឋាន ដើម្បី​ធ្វើ​សកម្ម​ភាព​ឆបោកក្នុងរូបភាព "វិនិយោគក្លែងក្លាយ" ដោយមានគោលដៅ​អូស​ទាញ​ជន​រ​ង​គ្រោះ​នៅ​​ប្រទេសម៉ាឡេស៊ី និងប្រទេសផ្សេងៗទៀត។ គួរបញ្ជាក់ថា ក្រុមនេះ​ទើប​តែ​បាន​ផ្លាស់​ប្ដូរ​ទីតាំង​មក​ពី​ខេត្ត​ត្បូង​ឃ្មុំ។បច្ចុប្បន្នចំពោះជន​សង្ស័យ និងវត្ថុតាងខាងលើនេះ ត្រូវបានប្រគល់ជូនសមត្ថ​កិច្ច​ជំនាញ​នៃ​ស្នងការដ្ឋាន​នគរបាលរាជធានីភ្នំពេញ ដើម្បីអនុវត្តតាមនីតិវិធីច្បាប់ និងឈានទៅ​កំណត់​មុខ​សញ្ញា​មេ​ខ្លោង​ពាក់ព័ន្ធជាបន្តទៀត។ អាជ្ញាធរក៏បានអំពាវនាវដល់ម្ចាស់ផ្ទះជួលទាំងអស់ ត្រូវ​បង្កើន​ការ​ប្រុងប្រយ័ត្នចំពោះការស្នាក់នៅរបស់ជនបរទេសដែលខុសច្បាប់ និងសង្ស័យ​មាន​ការ​ពាក់​ព័ន្ធ​នឹង​បទ​ល្មើសបច្ចេកវិទ្យា។សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រ​កម្ពុជា​បាន​ប្ដេជ្ញា​ចិត្ត​បោស​សម្អាត​ឱ្យអស់នូវបទល្មើសឆបោកតាមប្រព័ន្ធបច្ចេកវិទ្យាចេញពីកម្ពុជានៅត្រឹមខែមេសា ឆ្នាំ​២០២៦។ សម្តេចធិបតីបានបញ្ជាក់ថា កម្ពុជាមិនមែនជាកន្លែងសម្រាប់ឧក្រិដ្ឋជន បច្ចេកវិទ្យា​ប្រើ​ប្រាស់​ក្នុង​ការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬ​អង្គ​ភាព​ទាំ​ង​ឡាយ​ណា​ដែល​នៅ​ពីក្រោយសកម្មភាព ឆបោកទាំងនេះ នឹងត្រូវប្រឈមមុខ​នឹង​ទោស​ទណ្ឌ​ខ្ពស់​បំផុត​ដោយ​ គ្មានការយោគយល់ ឬការអន្តរាគមន៍ណាមួយឡើយ៕

រដ្ឋមន្រ្តី៖ កម្ពុជានៅតែមានហ្គាសសម្រាប់ប្រើប្រាស់ ទោះបីជាមាន​ក្រុមហ៊ុន​មួយ​ប្រកាស​ផ្អាក​ការ​ផ្គត់ផ្គង់​

2026/03/23 10:20:53 am        240
Facebook Telegram Linkin
រដ្ឋមន្រ្តីក្រសួងរ៉ែ និងថាមពលកម្ពុជា ឯកឧត្តម កែវ រតនៈ បានបញ្ជាក់ថា កម្ពុជានឹងមិនខ្វះហ្គាស ប្រើ​​ប្រា​ស់នោះទេ បើទោះបីជាក្រុមហ៊ុនសូគីសម៉ិច ប្រកាសផ្អាកផ្គត់ផ្គង់ឧស្ម័ន្រ LPG ឬ​ហ្គាស​ជា​បណ្តោះ​អាសន្ន​ក៏ដោយ ហើយឯកឧត្តមបានអំពាវនាវ​កុំ​ឲ្យបងប្អូន​ប្រជាពលរដ្ឋ​ខ្មែរ​ទាំង​អស់​មាន​ការ​ព្រួយ​បារម្ភ​ និងស្លន់ស្លោរឲ្យសោះ ខណៈកម្ពុជានៅតែមានប្រភពធំទៀត សម្រាប់​នាំ​ហ្គាស​ផ្គត់ផ្គង់​ប្រទេសកម្ពុជាបាន។តាមរយៈវីដេអូឃ្លីប​ដែលបានចេញនៅព្រឹកថ្ងៃទី២៣ ខែមីនា ឆ្នាំ២០២៦ នេះ ឯកឧត្តម កែវ រតនៈ​ បានបញ្ជាក់ថា «ក្រុមហ៊ុនសូគីម៉ិច ផ្គត់ផ្គង់ឧស្ម័ន្រ LPG បានត្រឹម​តែ​ប្រមាណ​បីភាគ​រយ​ប៉ុណ្ណោះ ​នៅ​ក្នុង​ទីផ្សា​សរុបរបស់កម្ពុជា ដូច្នេះមានន័យថា ប្រសិន​បើ​ក្រុម​ហ៊ុន​សូគីម៉ិច​មិន​អាច​ផ្គត់​ផ្គង់​ ចាប់​ពីខែមេសា​តទៅ ហើយមិនអាចរកប្រភពបន្ថែម កម្ពុជា​ក៏​នៅ​តែ​មាន​ប្រភព​មួយ​ចំនួន​ធំ​ទៀត​ ដែលយើងអាចផ្គត់ផ្គង់ជូន​ប្រជាពលរដ្ឋបានដែរ។ ដូច្នេះ​សូម​បង​ប្អូន​កុំទាន់​អាល​មាន​ការ​ព្រួយ​បារម្ភ​ ភ័​យស្លន់ស្លោរ នៅក្នុងស្ថានភាពនេះ»។​សូមបញ្ជាក់ថា កាលពីថ្ងៃទី២១ ខែមីនា ក្រុមហ៊ុន សូគីម៉ិច បានប្រកាសថាខ្លួនមិនអាចនាំចូល នូវ​ឧស្ម័ន្រ​LPG​ បានទៀតទេ ចាប់តាំងពីដើមខែមីនា ឆ្នាំ២០២៦មក ដោយសារតែស្ថានភាពសង្រ្គាម នៅ​តំបន់​មជ្ឈិមបូព៌ា បានប៉ះពាល់យ៉ាងធ្ងន់ធ្ងរដល់ការដឹកជញ្ជូនប្រេង និងឧស្ម័ន្រទូទាំង​ពិភព​លោក​នោះ​។​ យ៉ាងណាក៏ដោយរដ្ឋមន្រ្តីក្រសួងរ៉ែ និងថាមពលបានអះអាងថា កម្ពុជានៅ​តែ​មាន​ឧស្ម័ន្រ​LPG​ប្រើ​ដដែលដោយកម្ពុជានៅមានប្រភពជាច្រើនទៀតសម្រាប់នាំហ្គាស់ចូលមកកម្ពុជា៕

សម្តេចធិបតី ហ៊ុន ម៉ាណែត៖ កម្ពុជាបានក្លាយជាប្រទេសគំរូមួយ​សម្រាប់ពិភពលោក ចំពោះ​ការងារ​កំចាត់​ជំងឺរបេង​យ៉ាង​សកម្ម និងប្រកបដោយប្រសិទ្ធភាព

2026/03/23 10:05:48 am        162
Facebook Telegram Linkin
តាមរយៈសារលិខិតក្នុងឱកាសប្រារព្ធទិវាពិភពលោកកំចាត់រោគរបេងឆ្នាំ២០២៦ ​សម្តេច​ធិបតី​ ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា កម្ពុជាបានក្លាយ​ជា​ប្រទេស​គំរូមួ​​យ សម្រាប់​ពិភពលោក ចំពោះការងារកំចាត់ជំងឺរបេងយ៉ាងសកម្ម និងប្រកប​ដោយ​ប្រសិទ្ធភាព​។ សម្តេចធិបតីក៏បានសម្តែងនូវការអបអរសាទរជាមួយបងប្អូនជនរួមជាតិ ទាំងអស់ នា​ឱកាស​ប្រារព្ធ​ទិវា​ពិភពលោកកំចាត់រោគរបេង ដែលប្រព្រឹត្តទៅនៅថ្ងៃទី២៤ ខែមីនា ឆ្នាំ២០២៦ ក្រោម​ប្រធា​ន​បទ «មែនហើយ ! យើងអាចបញ្ចប់ជំងឺរបេង៖ ដឹកនាំដោយប្រទេសជាតិ ជំរុញ ដោយ​ប្រជាជន» (Yes! We can End TB! Led by countries. Powered by people.)។ ការ​រៀប​ចំ​ប្រារព្ធ​ទិវា​នេះ គឺនៅក្នុងគោលបំណងបន្តជំរុញ និងយកចិត្តទុកដាក់បន្ថែមទៀត ក្នុងការ​លើក​កម្ពស់​សុខភាពរបស់ប្រជាជនឱ្យ បានកាន់តែទូលំទូលាយ និងបំផុសការយល់ដឹង ការយក​ចិត្ត​ទុក​ដាក់​ក្នុង​ការ​ប្រយុទ្ធ​នឹងជំងឺរបេង ការផ្សព្វផ្សាយជូន ដល់បងប្អូនប្រជាពលរដ្ឋឱ្យ​បាន​យល់​អំពី​ទំហំ​នៃ​បញ្ហា ​និងផលវិបាកនៃជំងឺរបេង សំដៅចូលរួមចំណែកលើកកម្ពស់ សុខុមាលភាពសង្គម ព្រម​ទាំង​លើកកម្ពស់តម្លៃ និងសេចក្តីថ្លៃថ្នូររបស់សង្គមជាតិទាំងមូល។ សម្តេចធិបតីបានបន្តថា ស្ថិតក្នុងឱកាសដ៏ប្រពៃនេះ សូមសម្តែងនូវសេចក្តីរីករាយជាអនេកប្បការ ដែល​ព្រះរាជាណាចក្រកម្ពុជាយើង បានសម្រេចសមិទ្ធផលគួរជាទីមោទនៈ ក្នុងការ​ប្រយុទ្ធ​នឹង​ជំងឺ​របេង​អស់​រយៈពេល ប៉ុន្មានឆ្នាំកន្លងមកនេះ ខណៈដែលកាលពីប្រមាណ២០ឆ្នាំមុន ប្រទេស​កម្ពុជា​ស្ថិត​ក្នុងចំណោមប្រទេសដែលមាន អត្រាអ្នកកើតជំងឺរបេងខ្ពស់ជាងគេក្នុងពិភពលោក តែ​ក្នុង​រយៈ​ពេលយ៉ាងខ្លី កម្ពុជាបានក្លាយជាប្រទេសគំរូមួយ សម្រាប់ពិភពលោក ចំពោះការ​ងារ​កំចាត់​ជំងឺ​របេងយ៉ាងសកម្ម និងប្រកបដោយប្រសិទ្ធភាព។ លទ្ធផលដ៏គាប់ ប្រសើរនេះបានកើត ចេញ​ពី​កិច្ចខិតខំប្រឹងប្រែងរួមគ្នារបស់ប្រជាជាតិយើង ដែលក្នុងនោះរាជរដ្ឋាភិបាលបានពង្រីក សេវា​ពិនិត្យ និងព្យាបាលជំងឺរបេង នៅគ្រប់មន្ទីរពេទ្យបង្អែក និងមណ្ឌលសុខភាព និងប៉ុស្តិ៍​សុខភាព​ទាំង​អស់ ​រួមទាំង ថ្នាក់សហគមន៍ នៅទូទាំងប្រទេសផងដែរ។ យើងក៏បានធ្វើការស្រាវជ្រាវ និងផ្តល់ការព្យាបាលជំងឺរបេងជូនប្រជាជនដោយឥតគិតថ្លៃ ដែល​កិច្ច​ការ​នេះ ​មានការរីកចម្រើនគួរឱ្យកត់សម្គាល់ និងជាហេតុ​ធ្វើ​ឱ្យ​អត្រា​ឈឺ​ និង​ស្លាប់​ដោយ​សារ​ជំងឺ​របេង​ មានការធ្លាក់ចុះយ៉ាងខ្លាំង ធៀបនឹងបណ្តាប្រទេសដទៃ។ ជាក់ស្តែង អត្រា​ស្លាប់​ដោយ​សារ​ជំងឺ​របេង​បានថយចុះពី ៨០ករណី ក្នុងចំណោមប្រជាជន ១០០ ០០០នាក់ នៅឆ្នាំ២០០០ មក​ត្រឹម ​១៨ករណី ក្នុងចំណោមប្រជាជន ១០០ ០០០នាក់ ក្នុងឆ្នាំ២០២៤ ដែលមាន អត្រា​ធ្លាក់​ចុះ​ស្មើ​នឹង​៧៨%។ រីឯអត្រាកើតមានជំងឺថ្មី (អាំងស៊ីដង់) បានធ្លាក់ចុះពី ៨៥៣ករណី ក្នុងចំណោម​ប្រជាជន​ ១០០ ០០០នាក់ នៅឆ្នាំ២០០០ មកត្រឹម ២៧២ករណី ក្នុងចំណោមប្រជាជន ១០០ ០០០​នាក់ នៅឆ្នាំ២០២៤ គឺបានថយចុះ ៦៨% ផងដែរ។តាមរយៈសារដដែល សម្តេចធិបតីបានបញ្ជាក់ថា ទោះបីជាយើងទទួលបានជោគជ័យ ក៏ប្រទេស​កម្ពុជា​នៅ​មាន​អត្រាឈឺ និងស្លាប់ដោយសារជំងឺរបេងក្នុង កម្រិតខ្ពស់នៅឡើយ បើប្រៀប​ធៀប​នឹង​បណ្តា​ប្រទេស​មួយចំនួនទៀតនៅសកលលោក។ បញ្ហានេះតម្រូវឱ្យយើងត្រូវ បង្កើនល្បឿន​នៃ​កិច្ច​ខិត​ខំ​ប្រឹង​ប្រែងបំពេញកិច្ចការបន្ថែមទៀត ដើម្បីកាត់បន្ថយជាអតិបរមានៃអត្រាឈឺ និងស្លាប់ ដោយ​សារ​ជំងឺរបេង ស្របតាមគោលដៅអភិវឌ្ឍន៍ប្រកបដោយចីរភាព។ ក្នុងស្មារតីនេះ យើង​ទាំង​អស់​គ្នាត្រូ​វបន្តជំរុញ ការយកចិត្តទុកដាក់ដោះស្រាយបញ្ហាជំងឺរបេង ប្រកបដោយស័ក្តិសិទ្ធភាព និង​ប្រសិទ្ធភាពខ្ពស់ ដើម្បីលើកកម្ពស់ សុខភាព គុណភាពនៃការរស់នៅ និងសេចក្តី​ថ្លៃ​ថ្នូរ​របស់​ប្រជា​ពលរដ្ឋ​យើង​។ ប្រជាពលរដ្ឋមានសុខុមាលភាព រួមចំណែក ដល់ការអភិវឌ្ឍធនធានមនុស្ស និង​សកម្មភាពសង្គម សេដ្ឋកិច្ច ដើម្បីបង្កើនលទ្ធភាព និងជីវភាពរស់នៅកាន់តែល្អប្រសើរ ស្រប​តាម​គោល​ដៅនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃ​រដ្ឋសភា។សម្តេចធិបតីបានអះអាងថា រាជរដ្ឋាភិបាលមានជំនឿយ៉ាងមុតមាំថា ប្រធាន​បទ​ដែល​ត្រូវ​បាន​កំណត់​នៅ​ក្នុង​ឆ្នាំនេះ នឹងសង្កត់ធ្ងន់ឱ្យ ពិភពលោកទាំងមូលមានជំនឿយ៉ាងមុតមាំថា យើង​ទាំង​អស់​គ្នា​អាច​បញ្ចប់ជំងឺរបេងបាន ដោយយើងទាំងអស់គ្នា ត្រូវរួបរួមប្តេជ្ញា វិនិយោគ អនុវត្ត និង​បង្កើន​ល្បឿន ​ដើម្បីបំពេញកិច្ចការដ៏ច្រើនបន្ថែមទៀត ជាពិសេសពង្រឹងសេវាថែទាំ បង្កើន​ការ​ស្រាវ​ជ្រាវ​ និងព្យាបាលជំងឺរបេងជាសកលនៅគ្រប់ទីកន្លែងសម្រាប់ជនគ្រប់រូប៕ អត្ថបទ៖ វង្ស សុភាព

ក្នុងវិបត្តិជាសាកល៖ សហជីពគ្រប់និន្នាការនៅកម្ពុជាគាំទ្រ និង​ថ្លៃង​អំណរ​គុណ​ចំពោះ​ចំណាត់​ការ​រាជ​រដ្ឋាភិបាល​ដែល​បន្ថែម​ថ្លៃ​ធ្វើ​ដំណើរ​ ២,៥​ដុល្លា​រ​ដល់​កម្មករ​ព្រោះចំ​ពេល​ម្ចាស់​ឡាន​ត្រៀម​ដំឡើង​

2026/03/23 08:38:00 am        142
Facebook Telegram Linkin
ភ្នំពេញ៖ សហជីពគ្រប់និន្នាការនៅកម្ពុជា បានប្រកាស​គាំទ្រ​ពេញ​ទំហឹង​ចំពោះ​ចំណាត់​ការ​របស់​រាជ​រដ្ឋាភិបាល បន្ទាប់ពីទទួលបានប្រាក់សោហ៊ុយធ្វើដំណើរ ២,៥០ដុល្លារអាម៉េរិក ក្នុងមួយខែ បន្ថែម​លើសោហ៊ុយធ្វើដំណើរ និងស្នាក់នៅដែលកំពុងអនុវត្ត ខណៈកិច្ចអន្តរាគមន៍នេះ គឺជា​វិធាន​ការ​បណ្តោះ​អាសន្នក្នុងអំឡុងពេលមានវិបត្តិប្រេងឥន្ធនៈជាសកល។ អ្នកស្រី ទូច សើ ប្រធានសហព័ន្ធសហជីពសេរីកម្មករនៃព្រះរាជាណាចក្រកម្ពុជា(FTUWKC) បានថ្លែង​ថា អ្នកស្រីគាំទ្រ​ចំណាត់ការ​របស់​រាជ​រដ្ឋាភិបាល​ដែល​បាន​ជួយ​អន្ត​រាគមន៍​បញ្ហា​វិបត្តិ​ប្រេង​ឥន្ធនៈ​ជា​សកលបានទាន់ពេល។ តំណាងកម្មករនិយោជិត និងនិយោជក បាន​ពិភាក្សា​គ្នា​យ៉ាង​ផុស​ផុល ដើម្បីស្វែងរក​ដំណោះ​ស្រាយ​សមរម្យ​ជួយ​សម្រាល​បន្ទុក​ការ​ចំណាយ​របស់​កម្មករ​និយោជិត​។អ្នកស្រីបញ្ជាក់ថា «ខ្ញុំអត់មានពាក្យអ្វីនិយាយទេ ព្រោះរំភើបខ្លាំងពេក ព្រោះកន្លង​មក​យើង​ធ្លាប់​ជជែក​គ្នា​ច្រើន​ពីរឿងអត្ថប្រយោជន៍កម្មករ ទម្រាំតែជជែកគ្នារកចំណុចរួមមួយសមរម្យ ដែល​អាច​ទទួ​លយ​កទាំងអស់គ្នា ប៉ុន្ដែការប្រជុំលើកនេះ គឺយើងអត់បានជជែកគ្នាខ្លាំងទេ ហើយ​និយាយ​ឆាប់​ត្រូវ​គ្នា​ទៀត ដោយសារ​យើង​បាន​ដឹងច្បាស់​ពី​ស្ថានភាព​ដែល​បាន​កើត​ឡើង​នៅ​លើស​កល​លោក​»។​លើសពីនេះអ្នកស្រី ទូច សើ បានបន្ថែមថា អ្នកស្រី ក៏ដូចជាកម្មករនឹងសប្បាយរីករាយខ្លាំង ក្រោ​យ​ពី​បានទទួលដំណឹងនេះ ដោយសាររាជរដ្ឋាភិបាលបា​នយ​កចិត្តទុកដាក់​នៅ​ក្នុង​បរិបទ​វិបត្តិ​ប្រេ​ង​ឥន្ធ​នៈ​ជា​សកលនេះ។ អ្នកស្រីបានអំពាវនាវដល់កម្មករនិយោជិតទាំងអស់ គាំទ្រដល់​ចំណាត់​ការ​នេះ ​និង​ចូលរួមអនុវត្តទទួលយកដំណោះស្រាយដ៏សមរម្យនេះ។ ជុំវិញចំណាត់ការបែបនេះ អ្នកស្រី កេន ឆេងឡាង អនុប្រធានសហភាព​ចលនា​កម្មករ​កម្ពុជា​បាន​និយាយ​ថា ​ក្នុងនាមតំណាងកម្មករនិយោជិតពិតជាសប្បាយរីករាយយ៉ាងខ្លាំង និងពេញចិត្ត​ចំពោះ​ចំណាត់​ការ​អន្តរាគមន៍​ក្នុង​ការ​ផ្ដល់​អត្ថ​ប្រយោជន៍​បន្ថែម​ដល់​កម្មករ​និយោជិត​នៅ​ក្នុង​បរិបទ​ដ៏​លំបាក​នេះ​។ អ្នកស្រីបញ្ជាក់ថា៖«ខ្ញុំសប្បាយរីករាយចចំពោះចំណាត់ការនេះ បើទោះបីជា​ចំនួន​នៃ​ការ​ផ្ដល់​ជូន​ទៅ​កម្មករ​មិន​បានច្រើនក៏ដោយ ប៉ុន្ដែវាជាចំណែកដ៏សំខាន់​មួយជួយស​ម្រាលប​ន្ទុក​ការ​ចំណាយ​រប​ស់​បង​ប្អូនកម្មករនិយោជិតរបស់យើង។ ការទាមទារដំឡើងប្រាក់ឧបត្ថម្ភនានាពីនិយោជក គឺ​មិន​ងាយ​ពិភាក្សាបានជោគជ័យទេ ប៉ុន្ដែលើកនេះ គឺមានការអន្តរាគមន៍ពីរាជរដ្ឋាភិបាល គឺ​យើង​មិន​បាន​ជជែកគ្នាអ្វីច្រើនទេ តែយើងទទួលបានលទ្ធផលជាវិជ្ជមាន»។ សូមជំរាបជូនថា កាលពីរសៀលថ្ងៃទី២០ ខែមីនា ឆ្នាំ២០២៦នេះ ក្រុមប្រឹក្សា​ជាតិ​ប្រាក់​ឈ្នួល​អប្ប​បរមាបានឯកភាពគ្នាផ្តល់ប្រាក់សោហ៊ុយធ្វើដំណើរបណ្តោះអាសន្នចំនួន ២,៥​ដុល្លារអាម៉េរិក ក្នុងមួយខែ ចាប់ពីថ្ងៃទី១ ខែមេសា ឆ្នាំ២០២៦ បន្ថែមលើប្រាក់សោហ៊ុយធ្វើដំណើរនិងស្នាក់នៅ ដែល​សហគ្រាស ក្រុមហ៊ុន រោងចក្រកំពុងអនុវត្ត រហូតដល់​ស្ថាន​ភាព​តម្លៃ​ប្រេង​ឥន្ធ​នៈ​វិល​មក​រក​ប្រក្រតី​ភាព​វិញ ដើម្បីជួយសម្រាល​បន្ទុក​ចំណាយ​ថ្លៃ​ធ្វើ​ដំណើរ​របស់​កម្មករ​និយោជិត​ក្នុង​វិស័យ​វាយ​នភណ្ឌ កាត់ដេរ ផលិតស្បែកជើង និងផលិតផលធ្វើដំណើរនិងកាបូប។សូមរម្លឹកទៀតថា កិច្ចប្រជុំបន្ទាន់របស់ក្រុមប្រឹក្សាជាតិប្រាក់ឈ្នួលអប្បបរមានេះធ្វើឡើងបន្ទាប់ សម្ដេច​ធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំឱ្យ ឯកឧត្តម ហេង សួរ រដ្ឋមន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីននិយោជក និង​ភាគី​សហជីព​ ដែលតំណាងកម្មករនិយោជិត ដើម្បីពិនិត្យពិភាក្សា​ស្វែង​រកលទ្ធភាព​ជួយ​សម្រាល​បន្ទុក​ចំណាយ​ថ្លៃ​ធ្វើដំណើររបស់កម្មករនិយោជិត ដើម្បីរកដំណោះស្រាយសមរម្យមួយ ដែល​អាច​ជួយ​​សម្រាលបន្ទុកថ្លៃធ្វើដំណើររបស់កម្មករនិយោជិតផង និងអាចរក្សាបាន​នូវ​ភាព​ប្រកួត​ប្រជែង​ផង​នៃ​ឧស្សាហកម្មរបស់កម្ពុជាផងដែរ៕

អ្នកទេសចរណ៍ជាង១ម៉ឺន២ពាន់នាក់ បន្ដទស្សនាព្រឹត្ដិការណ៍សមរាត្រីថ្ងៃទី៣

2026/03/23 08:30:53 am        51
Facebook Telegram Linkin
អ្នកទេសចរណ៍ជាតិ និងអន្ដរជាតិ នៅបន្ដទៅទស្សនាព្រះអាទិត្យរះចំកំពូលប្រាសាទអង្គរ ឬសមរាត្រី ដែលនៅថ្ងៃទី៣ នាថ្ងៃទី២៣ខែមីនឆ្នាំ២០២៦នេះ អ្នកទេសចរជាង១ម៉ឺន២ពាន់នាក់ ខណៈដែលនៅថ្ងៃទី២ មានអ្នកទេសចរជិត៤ម៉ឺននាក់ មកទស្សនាព្រឹត្ដិការណ៍សមរាត្រី។  នេះបើយោងតាមរបាការណ៍អាជ្ញាធរជាតិអប្សរា។

ជន​ជាតិចិន ៣៣១នាក់ ត្រូវបានបណ្ដេញចេញ​ពីកម្ពុជា ពាក់​ព័ន្ធករណីឆបោកតាមប្រព័ន្ធអនឡាញ

2026/03/23 07:28:49 am        234
Facebook Telegram Linkin
នៅយប់ថ្ងៃទី២១ ឈានចូលថ្ងៃទី២២ ខែមីនា ឆ្នាំ២០២៦ អនុវត្តតាម​អនុសាសន៍​​ដ៏ខ្ពង់ខ្ពស់ របស់​ឯកឧត្តម​អភិ​សន្តិ​បណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម សន្តិបណ្ឌិត និង​ថ្នាក់​ដឹកនាំ​ក្រសួងមហាផ្ទៃ ឯកឧត្តម ឧត្តមសេនីយ៍ឯក សុខ វាសនា អគ្គនាយក​អន្តោ​ប្រវេសន៍ បានណែនាំឱ្យនាយកដ្ឋានស៊ើបអង្កេត និង​អនុវត្ត​នីតិវិធី សហការជាមួយស្ថានទូតចិនប្រចាំនៅព្រះរាជាណាចក្រកម្ពុជា បន្តធ្វើ​ការ​បណ្តេញ​ជន​ជាតិចិនសរុបចំនួន ៣៣១នាក់ (ស្រី១៦នាក់) ពាក់​ព័ន្ធករណីឆបោកតាមប្រព័ន្ធអនឡាញ (Online Scams) និងករណីលួចស្នាក់នៅ ធ្វើការងារខុសច្បាប់ ត្រូវបានបណ្ដេញចេញ​តាមរយៈយន្តហោះពិសេស នៅប៉ុស្តិ៍នគរបាលច្រកទ្វារអាកាសអន្តរជាតិតេជោ ។ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល នៃព្រះរាជាណាចក្រកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

បណ្ដាញសង្គម

ព័ត៌មានថ្មីៗ

អនុប្រធានប្រចាំការ គ.ប.ឆ.ប.៖ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជួយកម្ពុជាកម្ចាត់ឧក្រិដ្ឋកម្មបច្ចេកវិទ្យាឱ្យអស់ និងមិនឱ្យឧក្រិដ្ឋកម្មនេះវិលត្រលប់មកវិញឡើយ
04/08/2026 07:04 PM
Facebook Telegram Linkin
ថៃបញ្ជាក់ពីការស្លាប់នាវិក ៣នាក់ ដោយសារការវាយប្រហារ លើនាវា នៅច្រកសមុទ្រ Hormuz
04/08/2026 07:04 PM
Facebook Telegram Linkin
លោក Zelenskyy បញ្ជាក់ថា អ៊ុយក្រែនត្រៀម សម្រាប់បទឈប់បាញ់ជាមួយរុស្ស៊ី ក្រោយស្វាគមន៍ភាពធូរស្រាល នៅអ៊ីរ៉ង់
04/08/2026 07:04 PM
Facebook Telegram Linkin
អ្នកនាំពាក្យក្រសួងការបរទេសកម្ពុជា ៖ វាជារឿងគួរឱ្យសោក​ស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោ​ភាគីពីអនុស្សរណៈឆ្នាំ២០០១
04/08/2026 07:04 PM
Facebook Telegram Linkin
អ៊ីរ៉ង់បញ្ជាក់ពីការចូលរួមរបស់ក្រុងតេអេរ៉ង់ក្នុងកិច្ចចរចាអ៊ីស្លាម៉ាបាដ ក្រោយមានបទឈប់បាញ់ជាមួយអាមេរិក
04/08/2026 07:04 PM
Facebook Telegram Linkin
ប្រធានាធិបតីអ៊ីរ៉ង់ និងនាយករដ្ឋមន្ត្រីជប៉ុន ពិភាក្សាតាមទូរស័ព្ទ អំពីការវិវត្តបទឈប់បាញ់
04/08/2026 06:04 PM
Facebook Telegram Linkin
ទីភ្នាក់ងារ៖ ការខូចខាតដែលបង្កឡើងដល់អ៊ីរ៉ង់ នឹងត្រូវបានផ្តល់សំណងពីមូលនិធិវិនិយោគ ដែលកំពុងត្រូវបានបង្កើតឡើង
04/08/2026 06:04 PM
Facebook Telegram Linkin
នាយករដ្ឋមន្ត្រី៖ សហរដ្ឋអាមេរិកបញ្ជាក់ប្រាប់អ៊ីស្រាអែលថា ខ្លួននៅតែប្តេជ្ញាចិត្តចំពោះគោលដៅរួម
04/08/2026 06:04 PM
Facebook Telegram Linkin
រដ្ឋអារ៉ាប់អំពាវនាវឲ្យមានសន្តិភាពយូរអង្វែង បន្ទាប់ពីបទឈប់បាញ់រវាងអាមេរិក និងអ៊ីរ៉ង់ ខណៈដែល អារ៉ាប់រួមអះអាងពី«ជ័យជម្នះ»
04/08/2026 06:04 PM
Facebook Telegram Linkin
ឥណ្ឌាកំពុងពិចារណាប្រលែងពស់និងក្រពើ នៅតាមព្រំដែនបង់ក្លាដែស
04/08/2026 06:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.