នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានសមាគម៖ កម្ពុជាក្លាយជាទីផ្សារចាប់អារម្មណ៍ពីធុរកិច្ចបរទេស ទោះបីមានជម្លោះព្រំដែន និងបញ្ហាសកល
សម្តេចធិបតី និងលោកជំទាវបណ្ឌិត អញ្ជើញដល់​អាកាស​យាន​ដ្ឋាន​អន្តរជាតិ ទីក្រុងហាណូយ ដើម្បីចូលរួមវេទិកា​អនាគត​របស់​អាស៊ាន ​លើកទី៣ និងទស្សនកិច្ចផ្លូវការនៅវៀតណាម
សម្តេចធិបតី អញ្ជើញដឹកនាំគណៈប្រតិភូជាន់ខ្ពស់កម្ពុជាទៅបំពេញទស្សនកិច្ចផ្លូវការ និងចូលរួមវេទិកាអនាគតអាស៊ាន នៅទីក្រុងហាណូយ
ប្រាសាទសួរព្រ័ត៖ «ទីកាត់ក្ដីតាមជំនឿ» និង «ទីតម្កល់ទេពតំណាងអំណាចខេត្ត-ក្រុង» នៃចក្រភពអង្គរ

ព័ត៌មានជាតិ

ក្រសួងអភិវឌ្ឍន៍ជនបទ បង្កើតហេដ្ឋរចនាសម្ព័ន្ធផ្លូវជនបទកាន់តែរឹងមាំ បង្កើតបរិយាកាសរស់នៅដល់ប្រជាជន

2025/11/14 03:08:50 pm        134
Facebook Telegram Linkin
ក្រសួងអភិវឌ្ឍន៍ជនបទ បានកំពុងចូលរួមចំណែកគាំទ្រគោលនយោបាយរបស់រាជរដ្ឋាភិបាល ជំរុញបង្កើតហេដ្ឋរចនាសម្ព័ន្ធ ផ្លូវជនបទកាន់តែរឹងមាំ ដើម្បីបង្កបរិយាកាសដល់ជីវិតរស់នៅរបស់ប្រជាពលរដ្ឋ ប្រកបដោយបរិយាបន្ន ទាំងផ្នែកសេដ្ឋកិច្ចនិងសង្គម។ឯកឧត្តម ប៉ែន ពេជ្រសាលី រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើក ឡើងនៅក្នុងចុះត្រួតពិនិត្យ វាយតម្លៃ និងបញ្ចប់សុពលភាព លើការងារជួសជុលស្តារឡើងវិញ និងស្ថាបនាផ្លូវចំនួន២គម្រោង ស្ថិតនៅ ខេត្តតាកែវ និងខេត្តកំពង់ស្ពឺ នៅថ្ងៃទី១៤ ខែវិច្ឆកា ឆ្នាំ២០២៥ នេះថា ជុំវិញការអភិវឌ្ឍហេដ្ឋារចនាសម្ព័ន្ធផ្លូវនៅជនបទនេះ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានយកចិត្តទុកដាក់យ៉ាងខ្លាំង ដោយឯកឧត្តមរដ្ឋមន្រ្តីតែងតែអញ្ជើញចុះពិនិត្យមើល ជាប្រចាំ លើការងារស្ថាបនា ការស្តារ ការថែទាំ និងការកែលម្អហេដ្ឋារចនាសម្ព័ន្ធផ្សេងៗ ដែលស្ថិតនៅក្រោមក្របខណ្ឌរបស់ក្រសួង ដើម្បីធ្វើយ៉ាងណាជំរុញការស្ថាបនា ជាពិសេសផ្លូវជនបទឱ្យឆ្លើយតបទៅនឹងតម្រូវការរបស់ប្រជាពលរដ្ឋ។ឯកឧត្តមរដ្ឋលេខាធិការ លើកឡើងបន្ថែមថា ទាក់ទិនហេដ្ឋារចនាសម្ព័ន្ធផ្លូវនៅតាមជនបទនេះ គឺជាការវិនិយោគដ៏ចាំបាច់ របស់រាជរដ្ឋាភិបាល ដោយក្នុងមួយឆ្នាំៗរាជរដ្ឋាភិបាលបានចំណាយថវិកាយ៉ាងច្រើន ក្នុងគោលដៅជំរុញការស្ថាបនាផ្លូវឱ្យមានភាព ប្រទាក់ក្រឡា និងជាផ្លូវប្រកបដោយគុណភាព ជួយសម្រួលដល់ការរស់នៅរបស់ប្រជាពលរដ្ឋនៅតាមសហគមន៍មូលដ្ឋាន មានផ្លូវល្អ សម្រាប់ធ្វើដំណើរ ការដឹកជញ្ជូន និងក៏ជាផ្នែកមួយនៃការជំរុញដល់ដំណើរការអន្តរកម្មសេដ្ឋកិច្ច និងកិច្ចការសង្គមនៅតាមជនបទ ផងដែរ។ ជុំវិញផ្លូវខាងលើនេះ, ឯកឧត្តមបានឯកភាព និងវាយតម្លៃខ្ពស់ ចំពោះការខិតខំប្រឹងប្រែងរបស់នាយកដ្ឋានវិស្វកម្ម ក្រសួង ការពារជាតិ ដែលបានអនុវត្តសម្រេចទៅតាមផែនការ ជាក់ស្តែងការងារជួសជុលស្តារឡើងវិញផ្លូវក្រាលកៅស៊ូពីរជាន់ DBST ចំនួន ១ ខ្សែ ប្រវែង ២ ៥០០ម៉ែត្រ ទទឹង ៧ម៉ែត្រ ស្ថិតនៅភូមិតាឡូង ឃុំកំពែង ស្រុកព្រៃកប្បាស ទៅភូមិអំពិល ឃុំពន្លៃ ស្រុកអង្គរបុរី ខេត្ត តាកែវ និងគម្រោងមួយទៀតនៅលើការងារស្ថាបនាផ្លូវក្រាលដីល្បាយថ្មភ្នំចំនួន ២ខ្សែ ប្រវែងសរុប ៣ ៥០០ ម៉ែត្រ ទទឹង ៨ ម៉ែត្រ និងសំណង់សិល្បការ្យផ្សេងៗទៀត ស្ថិតនៅភូមិដំណាក់ត្រាច ទៅភូមិព្រៃស្រឡែង ឃុំទួលអំពិល ស្រុកបរសេដ្ឋ ខេត្តកំពង់ស្ពឺ (ជាគម្រោងបញ្ចប់សុពលភាព) ដោយផ្លូវទាំងនោះបាននិងកំពុងផ្តល់ប្រយោជន៍គ្រប់បែបយ៉ាង គឺមិនត្រឹមបម្រើដល់ប្រជាជននៅ មូលដ្ឋានប៉ុណ្ណោះទេ ផ្លូវទាំងនេះក៏បម្រើដល់ការដឹកជញ្ជូនគ្រប់អន្តរវិស័យ ការធ្វើដំណើរ និងការរកស៊ីទទួលទានផ្សេងៗជាដើម៕អត្ថបទ៖សុនរ៉ាឌី

ឧបនាយករដ្ឋមន្ត្រី ស៊ុន ចាន់ថុល បង្ហាញបច្ចុប្បន្នភាពបរិបទសេដ្ឋកិច្ច និងសង្គមកម្ពុជា​ ពិសេស​សក្តានុពល​វិនិយោគ និងបរិយាកាសធុរកិច្ចអំណោយផលដល់ក្រុមអ្នកសារព័ត៌មានបារាំង

2025/11/14 03:06:22 pm        236
Facebook Telegram Linkin
នៅព្រឹកថ្ងៃទី១៤ ខែវិច្ឆិកា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតជូនក្រុមអ្នកសារព័ត៌មានបារាំង និងជាក្រុមអ្នកផលិតភាពយន្តឯកសារ រួមមាន លោក Michael Damon និងលោក Yves Deria ចូលជួបសម្តែងការគួរសម និងពិភាក្សាការងារ ផ្តោតលើគម្រោងក្នុងការរៀបចំថតភាពយន្តឯកសារនៅកម្ពុជា ដែលនឹងបង្ហាញអំពីការវិវឌ្ឍន៍របស់កម្ពុជា លើផ្នែកនយោបាយ និងការអភិវឌ្ឍសង្គម សេដ្ឋកិច្ច ប្រកបដោយចីរភាព។នៅក្នុងជំនួបនាព្រឹកនេះ ឯកឧត្តមឧបនាយករដ្ឋមន្ត្រី បានជម្រាបអំពីបច្ចុប្បន្នភាពនៃបរិបទសេដ្ឋកិច្ច និងសង្គមរបស់កម្ពុជា ដោយបានគូសបញ្ជាក់អំពីសក្តានុពលវិនិយោគ និងបរិយាកាសធុរកិច្ចដ៏អំណោយផល។ ឯកឧត្តម ក៏បានឆ្លៀតឱកាសពន្យល់បន្ថែមអំពី គោលនយោបាយកំណែទម្រង់ស៊ីជម្រៅរបស់រាជរដ្ឋាភិបាល ដែលជាមូលដ្ឋានគ្រឹះសម្រាប់ការអភិវឌ្ឍលើគ្រប់វិស័យ និងការប្តេជ្ញាចិត្តក្នុងការសម្រេចឱ្យបាននូវ ចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។ ក្រុមអ្នកសារព័ត៌មានបារាំង បានសម្តែងការកោតសរសើរយ៉ាងខ្លាំងចំពោះ វឌ្ឍនភាពគួរឱ្យកត់សម្គាល់របស់កម្ពុជា និងបានថ្លែងអំណរគុណចំពោះការផ្តល់ព័ត៌មានយ៉ាងសម្បូរបែប ដែលនឹងរួមចំណែកយ៉ាងសំខាន់ដល់ខ្លឹមសារជាក់ស្តែង និងស៊ីជម្រៅ នៃភាពយន្តឯកសាររបស់ពួកគេ ដើម្បីផ្សព្វផ្សាយអំពីកម្ពុជាដល់ទស្សនិកជនអន្តរជាតិ។ភាគីទាំងពីរក៏បានផ្លាស់ប្តូរទស្សនៈពាក់ព័ន្ធនឹងទំនាក់ទំនងការទូត និងសេដ្ឋកិច្ច រវាងកម្ពុជា និងប្រទេសបារាំង ក៏ដូចជាសហគមន៍អន្តរជាតិនានា ពិសេស។ ជាពិសេស អំពីការចូលរួមរបស់ភាគីបារាំងក្នុងការជំរុញឱ្យមាន ការចុះកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ផងដែរ។ជំនួបនេះបានបង្ហាញពីការគាំទ្រដល់កិច្ចខិតខំប្រឹងប្រែងក្នុងការផ្សព្វផ្សាយព័ត៌មានវិជ្ជមាន និងកំណែទម្រង់ជាផ្លែផ្កាដែលរាជរដ្ឋាភិបាលកម្ពុជាបាននិងកំពុងខិតខំប្រឹងប្រែងយកចិត្តទុកដាក់ តាំងពីដើមរៀងមក៕

ឯកឧត្តម ហេង សួរ អញ្ជើញបើកវេទិកាអន្តរជាតិអ្នកលក់ដូរតាមដងផ្លូវ លើកទី១៣ ក្រោមប្រធានបទ «គាំពារសង្គមដើម្បីអន្តរកាលយុត្តិធម៌ បរិស្ថាន និងបរិបទឌីជីថល»

2025/11/14 02:40:09 pm        217
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អញ្ជើញ​ជា​អធិបតី​ក្នុង​ពិធីបើកវេទិកាទិវាអន្តរជាតិអ្នកលក់ដូរតាមដងផ្លូវ ១៤ វិច្ឆិកា លើកទី១៣ ក្រោម​ប្រធាន​បទ ស្តីពី“គាំពារសង្គមដើម្បីអន្តរកាលយុត្តិធម៌ បរិស្ថាន និងបរិបទឌីជីថល” នាព្រឹក​ថ្ងៃ​ទី១៤ ខែវិច្ឆិកា ឆ្នាំ២០២៥ នៅសណ្ឋាគារ Raffles Hotel Le Royal ដោយ​មាន​អ្នក​ចូល​រួម​ប្រមាណ​ជាង ២០០នាក់ ដែលជាអ្នកលក់ដូរតាមផ្លូវ តំណាងមកពីវិស័យសេដ្ឋកិច្ចក្រៅប្រព័ន្ធ អង្គការ​សង្គមស៊ីវិល ដៃគូអភិវឌ្ឍ និងតំណាងក្រសួងស្ថាប័នពាក់ព័ន្ធ។វេទិកា​អន្តរជាតិនេះ មានគោលបំណង បន្តផ្សព្វផ្សាយ និងរម្លឹកទិវាអន្តរជាតិអ្នកលក់ដូរតាមដងផ្លូវ ដើម្បីលើកកម្ពស់សិទ្ធិការងារ និងការទទួលស្គាល់ចំពោះអ្នកលក់ដូរតាមដងផ្លូ, ពង្រឹងប្រសិទ្ធភាព និងពង្រីកវិសាលភាពប្រព័ន្ធគាំពារសង្គមសម្រាប់អ្នកលក់ដូរតាមដងផ្លូវ និងស្ថាប័នពាក់ព័ន្ធ, ពង្រឹងកិច្ចសហប្រតិបត្តិការរវាងអ្នកលក់ដូរតាមផ្លូវជាមួយអ្នកផ្តល់សេវា ជាពិសេស ផ្ដល់ឱកាសដល់អ្នកលក់ដូរតាមដងផ្លូវចូលរួមកិច្ចពិភាក្សានិងចែករំលែកពីស្ថានភាពការងារ និងបញ្ហា និងលើកជាសំណូមពរទៅកាន់អ្នកពាក់ព័ន្ធនានា។ថ្លែងក្នុងវេទិកានេះ ឯកឧត្តមរដ្ឋមន្ត្រី បានថ្លែងអំណរគុណ កោតសរសើរ និងវាយតម្លៃខ្ពស់ ចំពោះគំនិតផ្តួចផ្តើម និងការចូលរួមគាំទ្រក្នុងការរៀបចំទិវានេះជារៀងរាល់ឆ្នាំ ជាពិសេស ឆ្នាំ២០២៥នេះ តាមរយៈកិច្ចសហការដ៏ល្អ រវាងសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) អង្គការអុកស្វាម (OXFAM) ដៃគូអភវិឌ្ឍ អង្គការសង្គមស៊ីវិល និងនិងតំណាងក្រសួងស្ថាប័នពាក់ព័ន្ធ។តាមរយៈប្រធានបទដ៏មានសារសំខាន់នាពេលនេះ ឯកឧត្តមរដ្ឋមន្ត្រី បានលើកទឹកចិត្តដល់អ្នកសេដ្ឋកិច្ចក្រៅប្រព័ន្ធចូលរៀនជំនាញការលក់តាមអនឡាញនៅតាមសាលាបណ្តុះបណ្តាលមុខជំនាញវិជ្ជាជីវៈ និងបច្ចេកទេសក្រោមឱវាទក្រសួងទាំង៣៧នៅទូទាំងប្រទេសព្រោះថា ឌីជីថល បដិវត្តន៍ឧស្សាហកម្មបានជ្រាបចូលទៅគ្រប់ផ្នែក នៃសកម្មភាពសេដ្ឋកិច្ច ក្នុងនោះរួមទាំងសេដ្ឋកិច្ចក្រៅប្រព័ន្ធផងដែរ។ ក្រៅពីនេះ ឯកឧត្តមរដ្ឋមន្ត្រី បានបន្ថែមថា ការប្រែប្រួលអាកាសធាតុបានក្លាយជាបញ្ហាប្រឈមដល់អ្នកលក់ដូរតាមដងផ្លូវ ប៉ុន្តែទន្ទឹមនេះការប្រែប្រួលចំណង់ចំណូលចិត្តរបៀបរស់នៅនិងធ្វើការងារក៏ទាមទារចាំបាច់ឱ្យអ្នកលក់ដូរតាមដងផ្លូវ ត្រូវតែផ្លាស់ប្តូរទៅតាមរបៀបរស់នៅតាមបែបធូរធារជាងមុន បើទោះបីនៅមានអ្នកលំបាកខ្លះ ប៉ុន្តែការលំបាកនោះបើប្រៀបធៀបក្នុងរយៈពេលជាច្រើនឆ្នាំមុនគឺងាយស្រួលជាងមុនច្រើន។ជាមួយគ្នានេះ ឯកឧត្តមរដ្ឋមន្ត្រី ក៏បាន រំលេចអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១,៥លាននាក់ របស់រាជរដ្ឋាភិបាល និងលើកទឹកចិត្តអ្នកនៅក្នុងសេដ្ឋកិច្ចក្រៅប្រព័ន្ធចាប់ឱកាសចូលសិក្សារៀនសូត្រដើម្បីមានជំនាញបន្ថែម ព្រមទាំងមានចំណេះដឹងដើរតម្រូវការសង្គម។ ឯកឧត្តមរដ្ឋមន្ត្រី ក៏បានលើកទឹកចិត្តអ្នកនៅក្នុងសេដ្ឋកិច្ចក្រៅប្រព័ន្ធទៅចុះបញ្ជិកាដើម្បីកំណត់អត្ថសញ្ញាណអ្នកលក់ដូរតាមដងផ្លូវ ដើម្បីមានភាពងាយស្រួលសម្រាប់រដ្ឋាភិបាលអាចជួយបានកាន់តែចំគោលដៅ។ជាមួយគ្នានេះ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានសរសើរប្រព័ន្ធគាំពារសង្គម តាមរយៈប្រព័ន្ធសន្តិសុខសង្គម ឬប្រព័ន្ធជំនួយសង្គមរបស់រាជរដ្ឋាភិបាល ប៉ុន្តែប្រព័ន្ធទាំងនោះបានអនុវត្តនៅកម្រិតនៅឡើយ។ដោយឡែក លោកស្រី ភាណ សោភ័ណ នាយិកាអង្គការអុកស្វាម គូសបញ្ជាក់ពីសារៈសំខាន់ នៃការទទួលស្គាល់អ្នកលក់តាមដងផ្លូវថា ជាអ្នករួមចំណែកដ៏សំខាន់ដល់ការអភិវឌ្ឍរបស់ប្រទេសកម្ពុជា។ អ្នកលក់តាមផ្លូវគឺជាឆ្អឹងខ្នងនៃសេដ្ឋកិច្ចក្រៅប្រព័ន្ធរបស់ប្រទេស ជាអ្នកធ្វើការច្រើនម៉ោងក្នុងស្ថានភាពលំបាកដើម្បីផ្តល់អាហារ ទំនិញ និងសេវាកម្មដែលទ្រទ្រង់ប្រទេសជាតិ៕

ឯកឧត្តមបណ្ឌិត គឹម សន្តិភាព ដឹកនាំកិច្ចប្រជុំបច្ចេកទេសដើម្បីពិនិត្យ​លើសេចក្តីព្រាង​សេចក្តី​ណែនាំ​​ស្តីពី​ការដោះលែង​ដោយ​មាន​លក្ខខណ្ឌ

2025/11/14 02:29:54 pm        136
Facebook Telegram Linkin
នាព្រឹកថ្ងៃសុក្រ ទី១៤ ខែវិច្ឆិកា ឆ្នាំ២០២៥ ឯកឧត្តមបណ្ឌិត គឹម សន្តិភាព ប្រធាន​គណៈ​កម្មការ​ជាតិ​ដោះ​លែង​ដោយមានលក្ខខណ្ឌ បានអញ្ជើញដឹក​នាំ​កិច្ច​ប្រជុំ​បច្ចេក​ទេស​របស់​គណៈ​កម្មការ​ជាតិ​ដោះ​លែងដោយមានលក្ខខណ្ឌ ដើម្បីពិនិត្យលើសេចក្តី​ព្រាង​សេច​ក្តី​ណែនាំ​ស្តីពី​ការ​ដោះលែង​ដោយ​មាន​លក្ខខណ្ឌ។ កិច្ចប្រជុំ បានផ្តោតលើការពិភាក្សាចុងក្រោយអំពីខ្លឹមសារ និងទម្រង់នៃការ​រៀបចំ​សេចក្តី​ព្រាង​សេចក្តី​ណែនាំស្តីពីការដោះលែងដោយមានលក្ខខណ្ឌ និងទម្រង់ដីកា រួមទាំងឯកសារ​នានា​ពាក់​ព័ន្ធ​ ដែលបានរៀបចំតាក់តែងឡើងដោយក្រុមការងារ​បច្ចេកទេស​របស់​គណៈកម្មការ​ជាតិ​ដោះលែង​ដោយ​មានលក្ខខណ្ឌ ដែលការរៀបចំសេចក្តីណែនេះក្នុងគោលបំណង ដំណោះ​ស្រាយ​មួយ​ចំនួន​លើ​ផ្នែកបច្ចេកទេស ក្នុងក្របខណ្ឌនៃយន្តការដោះលែងដោយមានលក្ខខណ្ឌនេះ ដោយ​ឈរលើមូលដ្ឋានមាត្រា៥១២ ដល់មាត្រា៥១៦ នៃក្រមនីតិវិធីព្រហ្មទណ្ឌ និង​គោល​ការណ៍​ណែនាំ ​ឬសេចក្តីណែនាំរបស់ក្រសួងយុត្តិធម៌ រួមទាំងបទប្បញ្ញត្តិជាធរមាន ដែលមាន​ការ​ពាក់ព័ន្ធ​។

ភូមិប៊ុនរ៉ានីសែនជ័យដំណាក់ទ្រយឹងនឹងទទួលបានសំណង់ធារាសាស្រ្តធំៗ ២បន្ថែម​ទៀត​ក្នុង​ឆ្នាំ​២​០២៦ខាងមុខនេះ

2025/11/14 02:21:19 pm        235
Facebook Telegram Linkin
រាជរដ្ឋាភិបាលកម្ពុជាតាមរយៈក្រសួងធនធានទឹក និងឧត្តុនិយម គ្រោង​សាង​សង់​សំណង់​ធារា​សាស្រ្ត​ធំ​ៗ​ចំនួន ២បន្ថែមទៀត ក្នុងភូមិប៊ុនរ៉ានីសែនជ័យដំណាក់ទ្រយឹង ដើម្បីបំពេញ​តម្រូវ​ការ​ប្រើ​ប្រាស់​ទឹក និងស្រោចស្រពដំណាំកសិកម្មរបស់បងប្អូនអតីតយុទ្ធជន។ ក្នុងឱកាសដឹកនាំក្រុមការងារក្រសួងចុះពិនិត្យប្រព័ន្ធធារាស្រ្តក្នុងភូមិប៊ុនរ៉ានីសែនជ័យដំណាក់ទ្រយឹង ស្ថិតក្នុងឃុំព្រងិល ស្រុកភ្នំក្រវាញ ខេត្តពោធិ៍សាត់ កាលពីពេលថ្មីៗនេះ លោក តាំង សុផាត អគ្គ​នាយករងនៃអគ្គនាយកដ្ឋានកិច្ចការបច្ចេកទេស ក្រសួងធនធានទឹក និងឧតុនិយម បាន​ប្រាប់​ឱ្យ​ដឹ​ងថា ក្រសួងនឹងបន្តសាងសង់សំណង់ស្ទាក់ទឹកធំចំនួន២ទីតាំងបន្ថែមទៀត ដែលមាន​វិសាល​ភាព​ស្តុកទឹកបានរហូតដល់ជាង២លានម៉ែត្រគូប ស្ថាបនា​ដោយប្រើ​ប្រាស់​ថវិកា​ជាតិ​ក្នុង​ទំហំ​ទឹក​ប្រាក់​ប្រមាណ ២លានដុល្លារអាមេរិច។ លោក តាំង សុផាត បានគូសបញ្ជាក់ទៀតថា បេសកកម្មការងារ​របស់​ក្រសួងក្នុង​ការ​ស្ថាបនា​នូវ​ហេដ្ឋា​រចនាសម្ព័ន្ធប្រព័ន្ធធារាសាស្រ្តនេះ ដើម្បីបំពេញតម្រូវការផ្គត់ផ្គ​ង់​ទឹក​ជូន​ដល់​បង​ប្អូន​អតីត​យុទ្ធជន ​និងនិវត្តជន ប្រើប្រាស់បានខួបប្រាំងខួបវស្សាក្នុងការរស់នៅប្រចាំថ្ងៃ និងជាពិសេស​អាច​បំពេញ​តម្រូវ​ការស្រោចស្រពដំណាំកសិកម្ម ស្របពេលដែល​អ្នក​ភូមិ​បាន​នឹង​កំពុង​អនុវត្ត​គម្រោង​សហគមន៍​កសិកម្មទំនើបម្ទេសដំណាក់ទ្រយឹង។ សូមជម្រាបជូនថា បច្ចុប្បន្នប្រព័ន្ធធារាសាស្រ្តនៅក្នុងភូមិប៊ុនរ៉ានីសែន​ជ័យ​ដំណាក់ទ្រយឹង​មាន​ទំនប់​ស្ទាក់​ទឹកមួយ និងទំនប់បង្ហៀរមួយ ដែលពុំទាន់អាច​បំពេញ​តម្រូវ​ការ​ទឹកសម្រាប់​ប្រជា​ពលរដ្ឋ​បាន​គ្រប់គ្រាន់នៅឡើយ។ ដើម្បីចូលរួមដោះស្រាយបញ្ហាទឹកនៅទីនេះ ទើប​ក្រសួង​ធន​ធាន​ទឹក និងឧត្តុនិយមបានបន្តសាងសង់ទំនប់ស្ទាក់ទឹក ២បន្ថែមទៀត ហើយ​ក្រៅ​ពី​នេះក្រ​សួង​ក៏​បន្ត​កៀរ​គរ​ថវិកាសម្រាប់គាំទ្រសម្រាប់អនុវត្តគម្រោងសាងសង់ទំនប់ដី ២ខ្សែ បន្ថែមទៀតដែរ មាន​ប្រវែងប្រមាណ ៣៥០០ម៉ែត្រ ដែលនេះជាផែនការបន្ទាប់៕

រម្លឹកដល់បងប្អូនពលករខ្មែរត្រឡប់មកពីប្រទេសថៃ! ស្អែកនេះ​ក្រសួង​ការងារ​នឹង​បើក​ពិព័រណ៍​ផ្តល់​ឱកាសការងារនៅខេត្តបាត់ដំបង

2025/11/14 01:28:53 pm        147
Facebook Telegram Linkin
ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំពិព័រណ៍ការងារ សន្តិសុខសង្គម និង​បណ្តុះ​បណ្តាល​វិជ្ជាជីវៈ នៅស្រុកចំនួន ២ របស់ខេត្តបាត់ដំបងគឺស្រុកថ្មគោល និងស្រុកមោងឫស្សី ដើម្បី​ផ្តល់​ឱកាសការងារ អត្ថប្រយោជន៍នៃរបបបេឡាជាតិសន្តិសុខសង្គម(ប.ស.ស.) និងវគ្គ​បណ្តុះ​បណ្តាល​ជំនាញបច្ចេកទេស និងវិជ្ជាជីវៈដោយឥតគិតថ្លៃជូនប្រជាពលរដ្ឋ ជាពិសេស អតីត​ពលករ​ដែល​ត្រឡប់មកពីប្រទេសថៃ។អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានឱ្យដឹងថា ក្នុង​ពិព័រណ៍នេះ នឹងមានសហគ្រាស ក្រុមហ៊ុន និងរោងចក្រជាច្រើនចូលរួមផ្ដល់ឱកាសការងារជាង ៧​ម៉ឺន​កន្លែងជាមួយការសម្ភាសជ្រើសរើសបុគ្គលិកនៅកន្លែងផ្ទាល់។ ក្នុងនោះអ្នកចូលរួមទាំងអស់នឹងទទួលបានព័ត៌មានអំពីឱកាសការងារដ៏សម្បូរបែប វគ្គបណ្តុះបណ្តាលបច្ចេកទេស និងអត្ថប្រយោជន៍របស់បេឡាជាតិសន្តិសុខសង្គមផងដែរ។ បន្ថែមពីនេះ អ្នកចូលរួមនឹងទទួលបាន សេវាកាត់សក់ អាហារ ភេសជ្ជៈ និងអាវយឺតដោយឥតគិតថ្លៃថែមទៀតផង។ទន្ទឹមនឹងនេះ លោក ស៊ុន មេសា បានអំពាវនាវឱ្យអតីតពលករទាំងអស់ ដែលបានត្រឡប់មកពីប្រទេសថៃ ចូលរួមឱ្យបានច្រើនក្នុងពិព័រណ៍នេះ ដើម្បីរកឱកាសការងារថ្មី បង្កើនជំនាញ និងបង្កើនគុណភាពជីវិត។សូមបញ្ជាក់ផងដែរថា ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈនេះ ចំនួន ៣ខេត្តគឺ ក្នុងខេត្តបាត់ដំបងពីថ្ងៃទី១៥-១៦ ខែវិច្ឆិកា ឆ្នាំ២០២៥ ក្នុងខេត្តបន្ទាយមានជ័យពី ថ្ងៃទី២២-២៣ ខែវិច្ឆិកា ឆ្នាំ២០២៥ និងក្នុងខេត្តសៀមរាបពីថ្ងៃទី២៩-៣០ ខែវិច្ឆិកា ឆ្នាំ២០២៥៕

តំណាងរាស្រ្តមណ្ឌលខេត្តបន្ទាយមានជ័យ ជួបសំណេះសំណាលជាមួយប្រជាពលរដ្ឋភៀសសឹកស្នាក់នៅបណ្តោះអាសន្ន ខេត្តបន្ទាយមានជ័យ

2025/11/14 01:25:36 pm        123
Facebook Telegram Linkin
តំណាងរាស្ត្រមណ្ឌលខេត្តបន្ទាយមានជ័យ រួមមាន៖ ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ តំណាងរាស្រ្តមណ្ឌលខេត្តបន្ទាយមានជ័យ ឯកឧត្តម ខេង ស៊ុម, ឯកឧត្តម គោស៊ុ សារឿត, លោក ជំទាវ នូម សុភ័ណ, ឯកឧត្តម អ៊ី ឡុង, ឯកឧត្តម សេរី កុសល និងលោក កែវ ដារ៉ារស្មី អភិបាលរងស្រុកអូជ្រៅ នាព្រឹកថ្ងៃទី១៤ ខែ វិច្ឆិកា ឆ្នាំ២០២ បានចុះជួបសំណេះសំណាលជាមួយប្រជាពលរដ្ឋភៀសសឹក ៤០០គ្រួសារ មកពីឃុំចំនួនពីរ គឺឃុំព្រៃចាន់ និងឃុំជោគជ័យ ដែលកំពុងស្នាក់នៅបណ្តោះអាសន្ននៅកន្លែងមានសុវត្ថិភាព នៅវត្តច័ន្ទស៊ីសាមគ្គីរតនារាម ស្ថិតក្នុងឃុំកូប ស្រុកអូរជ្រៅ ខេត្តបន្ទាយមានជ័យ។ ក្នុងឱកាសនោះ ឯកឧត្តម កែ គឹមយ៉ាន បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា, ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និង ឯកឧត្តម វង សូត អនុប្រធានទី២ រដ្ឋសភា, សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់បងប្អូនទាំងអស់ដោយក្តីនឹករលឹក និងការគិតគូរដល់បងប្អូនប្រជាពលរដ្ឋគ្រប់ពេលវេលា ព្រមទាំងបានអំពាវនាវឱ្យប្រជាពលរដ្ឋខ្មែរទាំងអស់ សូមមេត្តាតស៊ូ អត់ធ្មត់ ត្រូវជឿទុកចិត្តទៅលើថ្នាក់ដឹកនាំ និងរួមសាមគ្គីគ្នាជាធ្លុងមួយឱ្យបានរឹងមាំ ក្នុងគ្រាដែលប្រទេសជាតិកំពុងជួបប្រទះសង្រ្គាមឈ្លានពានពីកងទ័ពសៀម។ ជាមួយគ្នានេះ សូមមេត្តាមានជំនឿជឿជាក់លើថ្នាក់ដឹកនាំរបស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅក្នុងនីតិកាលទី៧ នៃរដ្ឋសភា ក្នុងការដោះស្រាយជម្លោះព្រំដែនប្រកបដោយពុទ្ធិបញ្ញាញាណឈ្លាសវៃប្រកាន់ខ្ជាប់នូវសន្តិភាព និងអហិង្សាជាស្នូលក្រោមម្លប់សន្តិភាព។ ឯកឧត្តម បានគូសបញ្ជាក់ថា ប្រជាពលរដ្ឋខ្មែរយើងទាំងអស់ គឺជាកម្លាំងមួយដ៏កក់ក្ដៅពោរពេញទៅដោយថាមពលរបស់រាជរដ្ឋាភិបាល និងបងប្អូនកងកម្លាំងប្រដាប់អាវុធដែលជាស្នូលនៃខឿនការពារជាតិមាតុភូមិយើង បូរណភាពដែនដី ស្ថិរភាពប្រកបដោយភាពអង់អាចក្លាហាន ហ៊ានលះបង់កម្លាំងកាយចិត្តអាយុជីវិតដើម្បីជាតិមាតុភូមិរុងរឿងនៃកម្ពុជាសន្តិសុខសង្គមជាតិ ស្ថិរភាពល្អផងដែរ។ ឯកឧត្តម បានបន្តថា ការចាកចោលភូមិឋានរបស់បងប្អូនប្រជាពលរដ្ឋខ្មែរភៀសសឹកទៅកាន់ទីតាំងសុវត្ថិភាព ឬស្នាក់នៅតាមផ្ទះសាច់ញាតិនេះ ត្រូវប្រឈមនឹងការខ្វះទីជម្រក ខ្វះអាហារហូបចុក ខ្វះទឹកស្អាតប្រើប្រាស់ បាត់បង់មុខរបរ បាត់បង់ចំណូល ជួបការលំបាកក្នុងជីវភាព ក្មេងៗបាត់បង់ការសិក្សាសាលារៀន និងប្រឈមការលំបាកជាច្រើនផ្សេងទៀត អនាម័យនិងប៉ះពាល់ផ្លូវចិត្តចំពោះពួកគាត់យ៉ាងធ្ងន់ធ្ងរ។ ស្ថិតក្នុងឱកាសនោះ តំណាងរាស្រ្តមណ្ឌលខេត្តបន្ទាយមានជ័យ បានឧបត្ថម្ភដល់ប្រជាពលរដ្ឋភៀសសឹកចំនួន៤០០ គ្រួសារ ដោយក្នុងមួយគ្រួសារទទួលបាន ម៉ី១កេស សារ៉ុង១ ក្រម៉ា១ ទឹកបរិសុទ្ធ១យួរ និងថវិកា ៥ម៉ឺនរៀលផងដែរ។សូមជម្រាបថា ប្រជាពលរដ្ឋខ្មែរចំនួន ៤០០គ្រួសារ បានចាកចោលផ្ទះសម្បែងជាទីជម្រកសុខសាន្ត បន្ទាប់ពីមានការបាញ់ប្រហាររបស់កងទ័ពសៀមទៅលើជនស៊ីវិលខ្មែរស្លូតត្រង់ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី១២ ខែវិច្ឆិកា ឆ្នាំ ២០២៥ ដែលបានបណ្តាលឱ្យពលរដ្ឋខ្មែរស្លូតត្រង់ម្នាក់បានសា្លប់ភ្លាមៗ នៅកន្លែងកើតហេតុ និងរងរបួសមានចំនួន ៣នាក់៕

អាជ្ញាធរមីនដឹកនាំកិច្ចជាមួយភាគីពាក់ព័ន្ធអំពីការចុះសិក្សាវាយតម្លៃទំហំផលប៉ះពាល់ទីតាំងសាលារៀនពីសង្រ្គាមនៅតាមព្រំដែនកម្ពុជា-ថៃ

2025/11/14 01:19:10 pm        97
Facebook Telegram Linkin
ភ្នំពេញ៖ ព្រឹកថ្ងៃទី១៤ ខែវិច្ឆិកា ឆ្នាំ២០២៥ ឯកឧត្តម ព្រំ សុភមង្គល អនុប្រធានអាជ្ញាធរមីន តំណាងដ៏ខ្ពង់ខ្ពស់ ឯកឧត្តមបណ្ឌិត លី ធុជ អនុប្រធានទី១អាជ្ញាធរមីន បានដឹកនាំកិច្ចប្រជុំពិភាក្សាពីការចុះសិក្សាវាយតម្លៃទំហំផលប៉ះពាល់ទីតាំងសាលារៀនដែលរងផលប៉ះពាល់ពីសង្រ្គាមនៅតាមព្រំដែនកម្ពុជា-ថៃ។ កិច្ចប្រជុំនេះមានការចូលរួមពីតំណាង ក្រសួងអប់រំ យុវជន និងកីឡា រដ្ឋបាលខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តពោធិ៍សាត់ ស៊ីម៉ាក់ កងទ័ពជើងគោក NPMEC។

ឯកឧត្តម ហង់ជួន ណារ៉ុន៖ «ប្រតិភូកាយ​រឹទ្ធិ​ជាតិ​កម្ពុជា​ទៅ​ចូល​រួម​ការ​បោះ​ជំរំ​នៅ​សិង្ហបុរី​ទាំង​អស់​ត្រូវ​ចង​ចាំជានិច្ចថា ខ្លួន​​ជា​ទូត​សុឆន្ទៈ​របស់​ជាតិ រាល់សកម្មភាព ឥរិយាបថ គឺបង្ហាញពីវប្បធម៌ សុជីវធម៌ និងមុខមាត់ជាតិយើង»

2025/11/14 01:16:12 pm        288
Facebook Telegram Linkin
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និង​កីឡា នៅថ្ងៃទី១៣ ខែវិច្ឆិកា ឆ្នាំ២០២៥ បានទទួលជួបសម្តែងការគួរសម និ​ង​សំណេះ​សំណាល​ជា​មួយ​ប្រតិ​ភូកាយរឹទ្ធិជាតិកម្ពុជាចំនួន ៣៨នាក់ ដែលនឹងចូល​រួម​ការបោះ​ជំរំ​កាយ​រឹទ្ធិអ​ន្តរ​ជាតិ​សិង្ហ​បុរី​ (Singapore International Jamboree 2025) ប្រព្រឹត្តទៅចាប់ពីថ្ងៃទី១៨ ដល់​ថ្ងៃ​ទី​២៣ ខែវិច្ឆិកា ឆ្នាំ២០២៥ នៅប្រទេសសិង្ហបុរី ដោយមានការចូលរួមពីសំណាក់ លោកជំទាវ អគ្គ​នាយកនៃអគ្គនាយកដ្ឋានយុវជន និងជាប្រធានស្នងការ កាយរឹទ្ធិជាតិកម្ពុជា (ក.ជ.ក) ឯកឧត្តម លោក​ជំទាវ លោក លោកស្រី សមាជិក សមាជិកា ក.ជ.ក។នាឱកាស ឯកឧត្តមបណ្ឌិតសភាចារ្យ ហង់ជួន ណារ៉ុន អបអរសាទរ​ដល់​ប្រតិភូ​កាយ​រឹទ្ធិ​ជាតិ​កម្ពុជា​ទាំង​៣៦នាក់ និងមេដឹកនាំកាយរិទ្ធិ២នាក់ ដែលមានឱកាសជាតំ​ណាង​ឱ្យកា​យ​រឹទ្ធិ​ជាតិ​កម្ពុជា ​ចូលរួមក្នុងការបោះជំរំអន្តរជាតិសិង្ហបុរី ដែលជាកិត្តិយសដ៏ធំធេងមួយ។ ដូច្នេះហើយ ក្នុង​ពេល​បំពេញបេសកកម្ម សូមប្រតិភូកាយរឹទ្ធិជាតិកម្ពុជាទាំងអស់ត្រូវចងចាំជានិច្ចថា ខ្លួន​គឺ​ជា​ទូត​សុឆន្ទៈ​របស់​ជាតិ រាល់សកម្មភាព ឥរិយាបថ និងការប្រាស្រ័យទាក់ទង គឺបង្ហាញពីវប្បធម៌ សុជីវធម៌ និងមុខមាត់របស់ប្រជាជនកម្ពុជាយើង ហើយត្រូវប្រឹងប្រែងឱ្យអស់ពីសមត្ថភាព ដើម្បី​សិក្សា​រៀន​សូត្រ ផ្លាស់ប្ដូរបទពិសោធ និងពង្រីកចំណេះដឹងថ្មីៗពីមិត្តភក្ដិកាយរឹទ្ធិអន្តរជាតិ។ បន្ថែម​លើនេះ សូមក្រុមការងារ រៀបចំកិច្ចប្រជុំដោយឡែក ដើម្បីណែនាំប្រតិភូកាយរឹទ្ធិជាតិកម្ពុជា លម្អិត​លើកា​រត្រៀមខ្លួនបន្ថែម ពាក់ព័ន្ធនឹងដំណើរការនៃកម្មវិធី ការត្រៀមលក្ខណៈ និង​សម្ភា​រៈចាំ​បាច់ និងសំខាន់បំផុត គឺសុវត្ថិភាពទាំងផ្នែកសុខភាព រាងកាយ និងស្មារតី។តាង​នាមថ្នាក់ដឹកនាំកាយរិទ្ធិជាតិកម្ពុជា ឯកឧត្តមបណ្ឌិតសភាចារ្យ ឧបនាយករដ្ឋមន្រ្ដី បាន​ជូន​ពរ​ប្រតិភូ​កាយ​រិទ្ធិទាំង ៣៨នាក់ ឱ្យបំពេញបេសកកម្មប្រកបដោយភាពជោគជ័យ និងសូមយក​ឱកាស​ដ៏​មាន​តម្លៃនេះ ដើម្បីសិក្សារៀនសូត្រ​ឱ្យ​បាន​ទូលំ​ទូលាយ​ពី​ប្រទេស​សិង្ហបុរី​ដែល​ជា​ម្ចាស់​ផ្ទះ ​និងបណ្តាប្រទេសផ្សេងទៀតដែលចូលរួម ដើម្បីពង្រីកទស្សនៈវិស័យរបស់ខ្លួន និងត្រៀ​មខ្លួ​ន​ក្លាយ​ជា​ពលរដ្ឋសកលប្រកបដោយគុណភាព។ ទន្ទឹមនឹងការរៀនសូត្រនេះ ក្មួយៗក៏ត្រូវ​ប្រកាន់​ខ្ជាប់​នូវ​វិន័យ ក្រមសីលធម៌ សណ្ដាប់ធ្នាប់ ច្បាប់របស់កាយរិទ្ធិ និងគោរ​ព​មេដឹ​ក​នាំ​ក្រុម​ឱ្យ​បាន​ម៉ឺង​ម៉ាត់ ហើយអ្វីដែលសំខាន់បំផុត គឺត្រូវរក្សាស្មារតីសាមគ្គីភាពផ្ទៃក្នុងដ៏រឹងមាំ និងយក​ចិត្ត​ទុក​ដាក់​ខ្ពស់​បំផុត​លើសុវត្ថិភាពផ្ទាល់ខ្លួន និងសុវត្ថិភាពក្រុមទាំងមូល រហូតដល់បញ្ចប់​បេសកកម្ម​ដោយ​ជោគ​ជ័យ និងវិលត្រឡប់មកកាន់ជាតិមាតុភូមិវិញ ប្រកបដោយសុខសុវត្ថិភាព។សូមបញ្ជាក់ថា សមាគមកាយរឹទិ្ធសិង្ហបុរី (Singapore Scout Association – SSA) រៀប​ចំ​ការ​បោះជំរំកាយរឹទ្ធិជំទង់ អន្តរជាតិសិង្ហបុរី(Singapore International Jamboree 2025) ចាប់ពី​ថ្ងៃ​ទី១៨ ដល់ថ្ងៃទី២៣ ខែវិច្ឆិកា ឆ្នាំ២០២៥ ដើម្បីអបអរសាទរខួប ៦០ឆ្នាំ នៃឯករាជ្យ​ជាតិ​សិង្ហ​បុរី និងប្រមូលផ្តុំកាយរឹទិ្ធមកពីក្នុងតំបន់ ធើ្វការបណ្តុះបណ្តាល អភិវឌ្ឍសមត្ថភាព ផ្លាស់​ប្តូរ​បទ​ពិសោធ និងសិក្សារួមគ្នារវាងវប្បធម៌ចម្រុះ របស់ជាតិ​សាសន៍​មក​ពី​បណ្តាប្រ​ទេស​ជា​សមាជិក​អាស៊ាន និងតំបន់អាស៊ី-ប៉ាស៊ីហ្វិក។ តាមការរំពឹងទុកគណៈកម្មការរៀបចំជំរំ មាន​កាយ​រឹទិ្ធ​ចូល​រួម​ចំនួន​ប្រមាណ ១០០០នាក់ មកពីបណ្តាប្រទេស ជាសមាជិកតំបន់អាស៊ាន និងតំបន់អាស៊ី-ប៉ាស៊ីហ្វិក​៕

សម្តេចរដ្ឋសភាធិបតី ឃួន សុដារី៖ បេសកកម្មក្នុងការលើកកម្ពស់សមភាពយេនឌ័រ និងផ្តល់ភាពអង់អាចដល់ស្រ្តី អាចសម្រេចទៅបានអាស្រ័យលើសន្តិភាព

2025/11/14 01:12:54 pm        160
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានសម្តែងការពេញចិត្តនិងអបអរសាទរចំពោះការសម្រេចបានជោគជ័យគួរជាទីមោទនៈក្នុងការលើកម្ពស់សមភាពយេនឌ័រនៅកម្ពុជា។ សម្តេចប្រធានរដ្ឋសភាបានគូសបញ្ជាក់ថា ក្នុងរយៈពេល ៣ ទសវត្សរ៍ កន្លងមកនេះ ក្រោមម្លប់សន្តិភាព និងស្ថិរភាពនយោបាយដ៏រឹងមាំ តាមរយៈការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ជាបុរេលក្ខខណ្ឌមិនអាចខ្វះបាន និងជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍលើគ្រប់វិស័យ រួមទាំងការលើកកម្ពស់សមភាពយេនឌ័រ និងការបង្កើនភាពអង់អាចដល់«ស្រ្តី និងក្មេងស្រី»។ សម្តេចរដ្ឋសភាធិបតី ឃួន សុដារី បានលើកឡើងដូច្នេះ នៅក្នុងឱកាស អញ្ជើញជាអធិបតីដ៏ខ្ពង់ខ្ពស់ បើកវេទិកាជាតិស្តីពី «ស្រ្តីក្នុងភាពជាអ្នកដឹកនាំនិងអភិបាលកិច្ច» ក្រោមប្រធានបទ «ភាពជាអ្នកដឹកនាំរបស់ស្ត្រីនិងក្មេងស្រី ដើម្បីទាំងអស់គ្នា» ដែលរៀបចំឡើងដោយក្រសួងកិច្ចការនារី នៅព្រឹកថ្ងៃទី១៤ ខែវិច្ឆិកា ឆ្នាំ២០២៥នៅសណ្ឋាគាររ៉េស៊ីដង់សុខាភ្នំពេញ។ "សម្តេចតេជោ តែងតែយកចិត្តទុកដាក់ គាំទ្រ និងជំរុញការអនុវត្តគោលនយោបាយលើកកម្ពស់សមភាពយេនឌ័រ ដោយបានពន្លឿនដំណើរឆ្ពោះទៅសម្រេចបានសមិទ្ធផលគួរជាទីមោទនៈ និងជាប្រយោជន៍ពុំអាចកាត់ថ្លៃបានសម្រាប់«ស្រ្តី និងក្មេងស្រី»ដោយបានដាក់ចេញ និង អនុវត្តគោលនយោបាយសមភាពយេនឌ័រនៅកម្ពុជាប្រកបដោយប្រសិទ្ធភាព តាមរយៈយុទ្ធសាស្ត្រចតុកោណ ទាំងបួនដំណាក់កាល ដែលបានកំណត់ «ស្រ្តីជាឆ្អឹងខ្នងនៃសេដ្ឋកិច្ច និងសង្គមជាតិ» និងបានបង្កើនឱ្យមានវត្តមានស្រ្តីកាន់តែច្រើនឡើងៗ នៅក្នុងថ្នាក់ធ្វើសេចក្តីសម្រេចចិត្ត និងជាតំណាង ទាំងនៅថ្នាក់ជាតិ និងថ្នាក់ក្រោមជាតិ។"សម្តេចប្រធានរដ្ឋសភា បានគូសបញ្ជាក់ថា រាជរដ្ឋាភិបាលកម្ពុជានីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ ប៉ិនប្រសប់ និងមានចក្ខុវិស័យវែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្តេជ្ញាពង្រឹងភាពជាប្រជាពលរដ្ឋក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ក្នុងនោះ«ស្រ្តី គឺជាស្នូល»។ រាជរដ្ឋាភិបាលបានបន្តបង្កើនការវិនិយោគ សំខាន់ៗលើសមភាពយេនឌ័រ និងផ្តល់ភាពអង់អាចដល់ស្រ្តី ដែលក្នុងនោះមានវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បីទាញយកអត្ថប្រយោជន៍ពីភាគលាភយេនឌ័រ ការបង្កលក្ខណៈអំណោយផលដល់ស្រ្តីក្នុងការប្រើប្រាស់សិទ្ធិលើការសម្រេចចិត្តលើផែនការគ្រួសារ, ការកាត់បន្ថយភាពងាយរងគ្រោះដោយអំពើហិង្សាទាក់ទងនឹងយេនឌ័រ និងការលើកកម្ពស់ ទំនាក់ទំនងអន្តរជំនាន់។ សម្តេចធិបតី ក៏បានបញ្ជាក់យ៉ាងច្បាស់ថា «ពិភពលោកនឹងកាន់តែមានសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន»។ក្នុងក្របខណ្ឌអង្គនីតិប្បញ្ញត្តិ សម្តេចរដ្ឋសភាធិបតី បានគូសបញ្ជាក់ថា រដ្ឋសភាបានអនុម័តច្បាប់នានាដែលមានលក្ខណៈទូលំទូលាយ និងឆ្លើយតបនឹងយេនឌ័រ ។ គោលនយោបាយសាធារណៈ និងច្បាប់បានគិតគូរ និងដោះស្រាយបញ្ហាប្រឈមរបស់«ស្រ្តីនិងក្មេងស្រី» ព្រមទាំងពង្រឹងសមត្ថភាពស្រ្តី តាមរយៈគំនិតផ្តួចផ្តើម និងវេទិកាសភាជាច្រើន រួមមានក្រុមសភាជាតិកម្ពុជានៃអ្នកនយោបាយសភាស្រ្តី ដែលជាសេនាធិការរបស់ស្ថាប័នរដ្ឋសភា ក្នុងការបញ្ជ្រាបយេនឌ័រ សំដៅរួមចំណែក ក្នុងការលើកកម្ពស់សមភាព យេនឌ័រ និងផ្តល់ភាពអង់អាចដល់«ស្រ្តីនិងក្មេងស្រី» និងការបង្កើតឱ្យមានវេទិកានិងកម្មវិធី ដែលផ្តោតទៅលើសិទ្ធិនិងសុខុមាលភាពរបស់ស្រ្តីនិងយុវជន និងការអភិវឌ្ឍសេដ្ឋកិច្ចសង្គម ដើម្បីផ្តល់នូវការងារសមរម្យ និងសម្រេចចក្ខុវិស័យរួម។ ទាំងនេះគឺជាកិច្ចការដ៏សំខាន់ ក្នុងការលើកកម្ពស់សមភាពយេនឌ័រ និងផ្តល់ភាពអង់អាចដល់ស្រ្តី។នៅក្នុងវេទិកាដែលមានអ្នកចូលរួមផ្ទាល់និងតាមប្រព័ន្ធនិម្មិត សរុបប្រមាណជាង២០០នាក់ មកពីក្រសួងស្ថាប័នថ្នាក់ជាតិ ថ្នាក់ក្រោមជាតិ ឯកអគ្គរាជទូត ឯកអគ្គរដ្ឋទូត តំណាងអង្គទូត ដៃគូអភិវឌ្ឍន៍ អង្គការ សមាគមនិង បណ្តាញសង្គមស៊ីវិល ស្ថាប័នស្រាវជ្រាវ វិស័យឯកជន និងនិស្សិត សម្តេចរដ្ឋសភាធិបតី បានសង្កត់ធ្ងន់ថា បេសកកម្មក្នុងការលើកកម្ពស់សមភាពយេនឌ័រ និងផ្តល់ភាពអង់អាចដល់ស្រ្តីអាចសម្រេចទៅបាន អាស្រ័យលើសន្តិភាព។ បើគ្មានសន្តិភាពគឺគ្មានអ្វីទាំងអស់ គ្មានការលើកកម្ពស់យេនឌ័រ គ្មានការអភិវឌ្ឍ ហើយអ្វីនៅសេសសល់គឺមានតែទុក្ខវេទនាសោកសៅ ការខ្ទេចខ្ទាំ ផេះផង់បន្សល់ពីភ្នក់ភ្លើងនៃសង្រ្គាម។ អ្នកដែលរងគ្រោះធ្ងន់ធ្ងរជាងគេបំផុតគឺស្រ្តីនិងកុមារ ដែលតែងតែទទួលរងការរំលោភបំពាន បៀតបៀន ជិះជាន់ និងអំពើហិង្សា គ្រប់ប្រភេទ។សម្តេចប្រធានរដ្ឋសភា វាយតម្លៃខ្ពស់ការរៀបចំ «វេទិកាជាតិ ស្តីពីស្រ្តីក្នុងភាពជាអ្នកដឹកនាំនិងអភិបាលកិច្ច»ក្នុងគោលបំណង លើកកម្ពស់ភាពជាតំណាងរបស់ «ស្រ្តីនិងក្មេងស្រី» ដើម្បីពង្រឹងបណ្តាញសាមគ្គីភាពនិងគាំទ្រគ្នាទៅវិញទៅមក ក្នុងចំណោមថ្នាក់ដឹកនាំជាស្រ្តីនៅគ្រប់កម្រិតនិងគ្រប់ជំនាន់ ព្រមទាំងសំដៅជំរុញការគាំទ្រពីដៃគូពាក់ព័ន្ធ ក្នុងការលើកកម្ពស់សមភាពយេនឌ័រ និងតួនាទីរបស់ស្រ្តី ក្នុងភាពជាអ្នកដឹកនាំ និងអភិបាលកិច្ចនៅគ្រប់កម្រិត។ សម្តេចបានសម្តែងការកោតសរសើរ និងវាយតម្លៃខ្ពស់ចំពោះក្រសួងកិច្ចការនារី និងដៃគូពាក់ព័ន្ធទាំងអស់ ដែលបានរួមសហការគ្នារៀបចំព្រឹត្តិការណ៍ដ៏មានសារៈសំខាន់នេះ ឱ្យក្លាយជាព្រឹត្តិការណ៍ជាតិប្រចាំឆ្នាំ ដើម្បីផ្តល់ឱកាសឱ្យស្រ្តីជាថ្នាក់ដឹកនាំគ្រប់កម្រិត ទទួលបាននូវបទពិសោធន៍ល្អៗ និងគន្លឹះល្អៗ នៃភាពជាអ្នកដឹកនាំរបស់ស្រ្តី និងស្វែងរកនូវវិធានការសមស្រប ដើម្បីឈានទៅសម្រេចបាននូវបេសកកម្មរួមគ្នា គឺការលើក កម្ពស់ភាពជាអ្នកដឹកនាំរបស់ស្រ្តីនៅគ្រប់ទិដ្ឋភាព ទាំងក្នុងវិស័យសាធារណៈ វិស័យឯកជន នយោបាយ សេដ្ឋកិច្ច សង្គម ថ្នាក់ជាតិ និងថ្នាក់ក្រោមជាតិ។ឆ្លៀតនៅក្នុងឱកាសនោះ ជំនួសមុខឱ្យអង្គពីធីទាំងមូល សម្តេចប្រធានរដ្ឋសភាបានថ្កោលទោសដាច់អហង្ការ ចំពោះការបាញ់ប្រហាររបស់ទាហានថៃមកលើប្រជាជនខ្មែរ ដែលជាជនស៊ីវិលស្លូតត្រង់ ក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពី ថ្ងៃទីពុធ ទី១២ ខែវិច្ឆិកា ឆ្នាំ២០២៥ ដែលបណ្តាលឱ្យប្រជាជនខ្មែរ ០១ រូប បាត់បង់អាយុជីវិត និងជាច្រើននាក់ទៀតរងរបួស។ការវាយប្រហារនេះ ជាអំពើឃោរឃៅយង់ឃ្នង អមនុស្សធម៌ ដែលមិនត្រឹមជាការំលោភបំពានលើអធិបតេយ្យរបស់កម្ពុជាប៉ុណ្ណោះទេ ប៉ុន្តែថែមទំាងរំលោភបំពានធ្ងន់ធ្ងរលើសេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាព ដែលនាយករដ្ឋមន្រ្តីនៃប្រទេសទំាងពីរបានចុះហត្ថលេខា កាលពីថ្ងៃទី២៦ ខែតុលាថ្មីៗកន្លងទៅ អំឡុងពេលដំណើរការកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួ ប្រទេសម៉ាឡេស៊ី ដោយមានវត្តមានជាសាក្សី ពី ឯកឧត្តម ដូណាល់ ត្រំា ប្រធានាធិបតីសហរដ្ឋអាមេរិក និងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី និងជាប្រធានប្តូរវេនអាស៊ាន។    ការបាញ់ប្រហារនេះ ក៏ជាការរំលោភបំពានយ៉ាងធ្ងន់ធ្ងរ ដល់ច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។សម្តេចប្រធានរដ្ឋសភា បានមានប្រសាសន៍ថា ក្នុងកាលៈទេសៈប្រទេសជាតិប្រឈមនឹងការគំរាមកំហែង និងភាពមិនប្រាកដប្រជាបែបនេះ ជាពេលវេលាសំខាន់ជាងពេលណាៗទាំងអស់ ដែលយើងទាំងអស់គ្នាត្រូវមានការជឿជាក់ និងការគាំទ្រពេញទំហឹងដល់រាជរដ្ឋាភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងការដោះស្រាយជម្លោះព្រំដែន រក្សានិងការពារ សុខសន្តិភាព ឯករាជ្យ អធិបតេយ្យ និងបូរណភាពទឹកដីកម្ពុជា។ កម្ពុជាត្រូវពង្រឹងសាមគ្គីភាពឱ្យកាន់តែខ្លាំងក្លាឡើង ដើម្បីប្រែក្លាយបញ្ហាទៅជាឱកាស ក្នុងការពង្រឹងភាពម្ចាស់ការ អធិបតេយ្យសេដ្ចកិច្ច និងភាពធន់របស់ជាតិឱ្យបានរឹងមាំ។ “យើងត្រូវចាំថា «ខ្មែរមានសាមគ្គី ខ្មែរខ្លាំង និងមានភាពធន់» ហើយអាចបោះជំហានទៅមុខ ដោយមានភាពជឿជាក់ និងក្តីសង្ឃឹម។”នេះជាការគូសបញ្ជាក់របស់សម្តេចប្រធានរដ្ឋសភា៕

បណ្ដាញសង្គម

ព័ត៌មានថ្មីៗ

[UPDATE]នគរបាលហ្វីលីពីននិយាយថា មនុស្ស៣នាក់ស្លាប់ក្នុងគ្រោះរញ្ជួយដីកម្រិត៧,៨ រ៉ិចទ័រ
06/08/2026 11:06 AM
Facebook Telegram Linkin
[BREAKING NEWS] លោកប្រធានាធិបតីចិន Xi Jinping បានទៅដល់កូរ៉េខាងជើងហើយសម្រាប់ជំនួបជាមួយលោក Kim Jong Un
06/08/2026 10:06 AM
Facebook Telegram Linkin
ប្រធានសមាគម៖ កម្ពុជាក្លាយជាទីផ្សារចាប់អារម្មណ៍ពីធុរកិច្ចបរទេស ទោះបីមានជម្លោះព្រំដែន និងបញ្ហាសកល
06/08/2026 10:06 AM
Facebook Telegram Linkin
[UPDATE] ឥណ្ឌូនេស៊ី បញ្ជាឱ្យជម្លៀសប្រជាជននៅតំបន់ភាគខាងជើងដែលរងការគំរាមកំហែងពីរលកយក្សស៊ូណាមិ ក្រោយរញ្ជួយដីនៅហ្វីលីពីន
06/08/2026 10:06 AM
Facebook Telegram Linkin
សម្តេចធិបតី និងលោកជំទាវបណ្ឌិត អញ្ជើញដល់​អាកាស​យាន​ដ្ឋាន​អន្តរជាតិ ទីក្រុងហាណូយ ដើម្បីចូលរួមវេទិកា​អនាគត​របស់​អាស៊ាន ​លើកទី៣ និងទស្សនកិច្ចផ្លូវការនៅវៀតណាម
06/08/2026 10:06 AM
Facebook Telegram Linkin
អ៊ីរ៉ង់ បង្ហាញភាពអត់ធ្មត់ ប៉ុន្តែព្រមានពីការឆ្លើយតបខ្លាំងក្លា ប្រសិនបើអ៊ីស្រាអែលសងសឹក
06/08/2026 10:06 AM
Facebook Telegram Linkin
ព្រឹត្តិការណ៍បាល់ទាត់ Freestyle លំដាប់ពិភពលោកនៅកម្ពុជា បញ្ចប់ដោយជោគជ័យ និង​ការ​សាទរ​យ៉ា​ងខ្លាំង
06/08/2026 10:06 AM
Facebook Telegram Linkin
[UPDATE] ហ្វីលីពីន កំពុងផ្ទៀងផ្ទាត់របាយការណ៍នៃការស្លាប់មនុស្សយ៉ាងហោចណាស់៥នាក់បន្ទាប់ពីរញ្ជួយដីកម្រិត ៧,៨ រ៉ិចទ័រ
06/08/2026 10:06 AM
Facebook Telegram Linkin
ពាន Soccer League មិនត្រឹមជាការផ្ដល់ឱកាស តែជា​វេទិកា​បង្ហាញ​នូវ​ស្មារតី​សាមគ្គី​ភាព​ជាតិ​ដ៏​រឹ​ងមាំ
06/08/2026 10:06 AM
Facebook Telegram Linkin
តម្លៃប្រេងឡើងថ្លៃជាង ២ ដុល្លារក្នុងមួយបារ៉ែល ដោយសារការវាយប្រហាររបស់អ៊ីស្រាអែលលើ លីបង់
06/08/2026 09:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.