BTV NEWS

ក្រសួងរៀបចំដែនដី ដោះស្រាយវិវាទលេីបុរីខេភី ម៉ន ដានី ឈានដល់ការបិទបញ្ចប់វិវាទដែលជាប់គាំង ទាំង៣៦គម្រោង ដល់អតិថិជន

ធនាគារជាតិឱ្យពលរដ្ឋប្រុងប្រយ័ត្នចំពោះការផ្សព្វផ្សាយនៅលើហ្វេសប៊ុកអំពីវត្តមានមាសសន្លឹកមាន logo របស់ធនាគារជាតិ ខណៈធនាគារជាតិមិនដែលបោះផ្សាយមាសនេះនោះទេ

មន្ត្រីជាន់ខ្ពស់សុខាភិបាល ចាត់ទុក JCI ជាដៃគូដ៏សំខាន់ក្នុងការពង្រឹងប្រព័ន្ធសុខាភិបាលជាតិកាន់តែរឹងមាំ

ក្រសួងសុខាភិបាល បើកសន្និសីទនៃការថែទាំស្តីអំពីតួនាទីគិលានុបដ្ឋាក និងឆ្មប ក្នុងប្រព័ន្ធសុខាភិបាល

ព័ត៌មានជាតិ

មន្រ្ដីនាំពាក្យក្រសួងព័ត៌មាន៖អ្នកសារព័ត៌មានត្រូវស្គាល់តួនាទី និងកាតព្វកិច្ចខ្លួនឱ្យច្បាស់ដើម្បីធានាសុវត្ថិភាពក្នុងការចុះយក ផលិត និងផ្សព្វផ្សាយព័ត៌មាន

បាត់ដំបង៖ អ្នកសារព័ត៌មានត្រូវតែស្វែងយល់ឱ្យបានច្បាស់ស៊ីជម្រៅអំពីសិទិ្ធ ករណីយកិច្ច និងការទទួលខុសត្រូវរបស់ខ្លួនជាអ្នកសារព័ត៌មាន និងត្រូវបន្តដុសខាត់ជំនាញនិងពង្រឹងសមត្ថភាព បទពិសោធន៍វិជ្ជាជីវៈសារព័ត៌មាន ដើម្បីបំពេញតួនាទីដោយក្រមសីលធម៌ពេញលេញ បម្រើដល់ប្រយោជន៍សាធារណៈ រួមចំណែកលើកកម្ពស់សិទ្ធិទទួលព័ត៌មានរបស់ប្រជាពលរដ្ឋ។ នេះជាប្រសាសន៍ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ដែលបានថ្លែងក្នុងឱកាសឯកឧត្តមផ្តល់បទអន្តរាគមន៍ក្នុងវគ្គបំពាក់បំប៉នស្តីពីការពង្រឹងសមត្ថភាពលើការងារព័ត៌មាននិងសាធារណមតិ នៅសាលាខេត្តបាត់ដំបង កាលព្រឹកថ្ងៃទី១៨ ខែកញ្ញា ឆ្នាំ២០២៥ ។ ឯកឧត្តមបានមានប្រសាសន៍ក្រើនរំលឹកដល់អ្នកសារព័ត៌មានឱ្យស្វែងយល់ឱ្យច្បាស់ពីច្បាប់ និងព្រំដែននៃសេរីភាព ហើយត្រូវអនុវត្តសិទ្ធិចុះយកព័ត៌មាន ផលិត និង រាយការណ៍ព័ត៌មានដោយ អនុលោមតាមក្របខណ្ឌច្បាប់កំណត់។ ឯកឧត្តមបានមានប្រសាសន៍បន្ថែមថា៖ «អ្នកសារព័ត៌មានមានតួនាទីសំខាន់ក្នុងការចូលរួមធានាការផ្សព្វផ្សាយប្រកបដោយភាពសុក្រឹត មានគុណភាព ផ្តល់ព័ត៌មានពិតជូនសាធារណៈជន និងរួមចំណែករក្សាទំនុកចិត្តរបស់ប្រជាពលរដ្ឋមកលើប្រព័ន្ធផ្សព្វផ្សាយ។ ហេតុដូច្នេះ អ្នកសារព័ត៌មានត្រូវសិក្សា ស្វែងយល់ និងធ្វើការស្រាវជ្រាវឱ្យបានច្រើនអំពីប្រធានបទនីមួយៗ ពិសេសពេលចុះយក និងរាយការណ៍ព័ត៌មានស្តីពីប្រធានបទពិបាក ឬរសើប និងដោយត្រូវស្វែងរកការសហការពីជំនាញ អាជ្ញាធរពាក់ព័ន្ធ ដើម្បីធ្វើឱ្យសេចក្តីរាយការណ៍ និងការផ្សព្វផ្សាយព័ត៌មាននោះមានភាពគ្រប់ជ្រុងជ្រោយ ដោយយោងប្រភពច្បាស់លាស់ ផ្លូវការ ហើយបានផ្តល់សំឡេងដល់ភាគីពាក់ព័ន្ធក្នុងសាច់រឿង ឬប្រធានបទនោះ»។ កន្លងទៅក្រសួងបានកត់សម្គាល់មានអ្នកសារព័ត៌មានខ្លះបានប្រព្រឹត្តផ្ទុយទៅនឹងនិយាមប្រតិបត្តិវិជ្ជាជីវៈ ផ្ទុយនឹងក្រមសីលធម៌ និងការដើរហួសគន្លងនៃច្បាប់។ ឯកឧត្តមបានគូសបញ្ជាក់ថាការអនុវត្តច្បាប់ពុំមែនជាការរិតត្បិតសិទ្ធិសេរីភាពឡើយ ប៉ុន្តែជាការអនុវត្តនៅក្នុងក្របខណ្ឌសង្គមដែលមានលទ្ធិប្រជាធិបតេយ្យនីតិរដ្ឋ ចំពោះទង្វើប្រាសចាកក្រមសីលធម៌ ឬការបំពានច្បាប់ លិខិតបទដ្ឋានជាធរមាន។ នៅពេលអ្នកសារព័ត៌មានបានផ្សាយប្រាសចាកការពិត ក្រមសីលធម៌វិជ្ជាជីវៈ បំពានសិទ្ធិ និងករណីយកិច្ចរបស់ខ្លួនជាអ្នកសារព័ត៌មាន ក្រសួងតែងតែធ្វើការណែនាំ និងតម្រង់ទិស ដើម្បីឱ្យអនុវត្តដោយគោរពតាមនិយាមវិជ្ជាជីវៈ និងក្រមសីលធម៌វិញ ព្រមទាំងបានឱ្យអ្នកសារព័ត៌មាននោះផ្សាយអត្ថបទកែតម្រូវជាមួយព័ត៌មានត្រឹមត្រូវវិញ ហើយបើនៅតែបន្តសកម្មភាពបំពានលើវិជ្ជាជីវៈ និងក្រមសីលធម៌ធ្ងន់ធ្ងរ ក្រសួងនឹងអាចឈានទៅសម្រេចលុបអាជ្ញាបណ្ណ ដែលទាំងនេះជាការអនុវត្តនីតិវិធីក្នុងក្របខណ្ឌច្បាប់ និងដោយអនុលោមតាមច្បាប់ស្តីពីរបបសារព័ត៌មាន។ ឯកឧត្តម ទេព អស្នារិទ្ធ បានបន្ថែមទៀតថាសេរីភាពខាងសារព័ត៌មាន មិនផ្តល់អភ័យឯកសិទ្ធិឱ្យអ្នកអនុវត្ត រួចផុតពីការទទួលខុសត្រូវចំពោះទង្វើបំពានច្បាប់ឡើយ។ឆ្លៀតក្នុងឱកាសនោះដែរ ឯកឧត្តមអ្នកនាំពាក្យបានសង្កត់ធ្ងន់ថាអ្នកសារព័ត៌មានត្រូវប្រតិបត្តិតាមក្រមសីលធម៌ និងនិយាមវិជ្ជាជីវៈឱ្យបានត្រឹមត្រូវ និងត្រូវមានមនសិការ និងចូលរួមការពារឧត្តមប្រយោជន៍របស់ជាតិ។ អ្នកសារព័ត៌មានត្រូវចៀសវាងការផ្សាយព័ត៌មាន ដែលបង្កមហន្តរាយដល់សន្តិសុខជាតិ ឬប៉ះពាល់ដល់ស្ថិរភាពនយោបាយ សង្គម។ឯកឧត្តមបានរំលឹកដល់អ្នកសារព័ត៌មានថា ត្រូវបែងចែកឱ្យច្បាស់រវាងការផ្ដល់ព័ត៌មាន និងការបញ្ចេញមតិផ្ទាល់ខ្លួន ព្រមទាំងធានារាល់ការបញ្ចេញមតិ ឬការរិះគន់ ត្រូវធ្វើឡើងដោយភាពថ្លៃថ្នូរ និងគោរពសិទ្ធិអ្នកដទៃ។ ជាងនេះទៀតអ្នកសារព័ត៌មាន ត្រូវមានកាតព្វកិច្ចរាយការណ៍ព័ត៌មាន ដោយមានប្រភពច្បាស់លាស់ ត្រូវផ្ទៀងផ្ទាត់ព័ត៌មាន និងចូលរួមទប់ស្កាត់ព័ត៌មានក្លែងក្លាយ ព័ត៌មានក្លែងបន្លំ ព័ត៌មានបំភ្លៃ និងព័ត៌មានភាន់ច្រឡំ។ ជាមួយគ្នានេះ ឯកឧត្តមអនុរដ្ឋលេខាធិការ ក៏បានអំពាវនាវដល់អ្នកសារព័ត៌មាន ទាំងអាជីព និងមិនមែនអាជីព ត្រូវមានទំនួលខុសត្រូវខ្ពស់ចំពោះការផ្សព្វផ្សាយព័ត៌មាន ដោយចៀសវាងការបំផ្លើស បំភ្លៃ ឬការកាឡៃព័ត៌មានប្រាសចាកពីការពិត ដើម្បីចូលរួមក្នុងការធានាសណ្តាប់ធ្នាប់ ស្ថិរភាព និងសន្តិសុខសង្គម ព្រមទាំងតម្កល់ លើកតម្កើងឧត្តមប្រយោជន៍ជាតិជាធំ។ សូមបញ្ជាក់ថា គិតត្រឹមខែសីហា ឆ្នាំ២០២៥នេះ ក្រសួងព័ត៌មានបានចេញបណ្ណសារព័ត៌មានជាង ៨៧០០បណ្ណ ដែលមានអង្គភាពចំនួន ១៦២០ អង្គភាព ទាំងប្រពៃណី និងទំនើប៕

ប្រតិភូក្រសួងមហាផ្ទៃ ពិភាក្សាការងារជាមួយ ក្រុមអ្នកជំនាញបច្ចេកទេសតួកគី លេីវិស័យសន្តិសុខបច្ចេកវិទ្យាឌីជីថល

ក្នុងឱកាសអញ្ជេីញចូលរួម កម្មវិធី តាំងពិព័រណ៍គ្រឿងបរិក្ខាសន្តិសុខផ្ទៃក្នុង (Internal Security Equipment Exhibition - IGEF 2025) នៅមជ្ឈមណ្ឌលសន្និបាត និងពិព័រណ៍ Ankara ATO សាធារណរដ្ឋតួកគី នាថ្ងៃព្រហស្បត្តិ៍ ទី១៨ ខែកញ្ញា ឆ្នាំ២០២៥នេះ ឯកឧត្តមបណ្ឌិត ទូច វិសាលសុខ រដ្ឋលេខាធិការ ក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញដឹកនាំគណៈប្រតិភូជាន់ខ្ពស់ក្រសួងមហាផ្ទៃ ទទួលជួបពិភាក្សាការងារជាមួយ ក្រុមអ្នកជំនាញបច្ចេកទេសរបស់តួកគី លេីវិស័យសន្តិសុខបច្ចេកវិទ្យាឌីជីថល។

ក្រុមហ៊ុន Yunhong Group ស្វែងរកដៃគូពាណិជ្ជកម្មនៅកម្ពុជា លើការផលិត និងកែច្នៃចំណីអាហារ និងភេសជ្ជៈគុណភាពនាំចេញ

ភ្នំពេញ ៖ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានអនុញ្ញាតជូន លោក Wu Dong ប្រធានក្រុមហ៊ុន Yunhong Group ចូលជួបសម្តែងការគួរសម និងពិភាក្សាការងារលើកិច្ចសម្របសម្រួលពាណិជ្ជកម្ម និងវិនិយោគនៅកម្ពុជា។ តាមរយៈវេទិកាជំរុញពាណិជ្ជកម្ម វិនិយោគ និងទេសចរណ៍កម្ពុជា ដែលប្រព្រឹត្តទៅនៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន នារសៀលថ្ងៃពុធ ទី១៧ ខែកញ្ញា ឆ្នាំ២០២៥ ក្រុមហ៊ុនបានឃើញអំពីឱកាស និងសក្តានុពលរបស់ប្រទេសកម្ពុជា ក្នុងការធ្វើកិច្ចសហប្រតិបត្តិការពាណិជ្ជកម្ម និងវិនិយោគ។ក្រុមហ៊ុនមានបំណងពង្រីកពាណិជ្ជកម្មរបស់ខ្លួននៅប្រទេសកម្ពុជា និងបានស្នើសុំកិច្ចសម្របសម្រួលរបស់ក្រសួងពាណិជ្ជកម្ម ដើម្បីស្វែងរកដៃគូពាណិជ្ជកម្មនៅកម្ពុជា លើការផលិត និងកែច្នៃចំណីអាហារ ទឹកផ្លែឈើ និងភេសជ្ជៈដែលមានគុណភាព និងសុវត្ថិភាពសម្រាប់អ្នកប្រើប្រាស់ទាំងក្នុងប្រទេសកម្ពុជា និងការនាំចេញ។ជាកិច្ចឆ្លើយតប ឯកឧត្តមរដ្ឋលេខាធិការ បានស្វាគមន៍ចំពោះក្រុមហ៊ុនដែលមានចំណាប់អារម្មណ៍ក្នុងការពង្រីកអាជីវកម្ម និងជ្រើសយកកម្ពុជាជាប្រទេសគោលដៅក្នុងការចាប់ដៃគូសហការពាណិជ្ជកម្ម នៅកម្ពុជា។ ក្រសួងពាណិជ្ជកម្ម តែងតែយកចិត្តទុកដាក់លើការសម្របសម្រួលវិស័យឯកជន ជាពិសេសក្នុងការពង្រឹង និងពង្រីកកិច្ចសហការប្រតិបត្តិការពាណិជ្ជកម្មនៅកម្ពុជា ដើម្បីទទួលបាននូវកំណើនសេដ្ឋកិច្ច៕

អ្នកនាំពាក្យក្រសួងព័ត៌មាន៖ ការតម្រង់ទិសដល់អ្នកសារព័ត៌មានឱ្យយល់ដឹងពីក្រមសីលធម៌វិជ្ជាជីវៈ គឺជាការការពារពួកគាត់ឱ្យរួចផុតពីបញ្ហាប្រឈមផ្លូវច្បាប់

បាត់ដំបង៖ អ្នកនាំពាក្យក្រសួងព័ត៌មានបញ្ជាក់ថា ការតម្រង់ទិសដល់អ្នកសារព័ត៌មានឱ្យយល់ដឹងច្បាស់អំពីច្បាប់ និងក្រមសីលធម៌វិជ្ជាជីវៈ គឺជាការផ្តល់ការការពារ និងជួយឱ្យពួកគេអាចចៀសផុតពីការប្រឈមនឹងការប្តឹងផ្តល់ផ្លូវច្បាប់។ ទោះយ៉ាងណាក៏ដោយ អ្នកសារព័ត៌មានទាំងអស់ត្រូវអនុវត្តតួនាទី និងភារកិច្ចខ្លួនដោយគោរពច្បាប់ ក្រមសីលធម៌វិជ្ជាជីវៈ លិខិតបទដ្ឋានពាក់ព័ន្ធនឹងវិស័យព័ត៌មាន ហើយមិនត្រូវប្រើសិទ្ធិសេរីភាពហួសពីព្រំដែនច្បាប់កំណត់ ធ្វើឱ្យប៉ះពាល់ដល់សិទ្ធិបុគ្គល ឬបង្កមហន្តរាយដល់សន្តិសុខជាតិឡើយ។តាមរយៈបទអន្តរាគមន៍ក្នុងវគ្គបំពាក់បំប៉នស្តីពីការពង្រឹងសមត្ថភាពលើការងារព័ត៌មាននិងសាធារណមតិ នៅសាលាខេត្តបាត់ដំបង នាព្រឹកថ្ងៃទី១៨ ខែកញ្ញា ឆ្នាំ២០២៥ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានមានប្រសាសន៍អំពីសារៈសំខាន់នៃការពង្រឹងទំនាក់ទំនងជាមួយអ្នកសារព័ត៌មាន ដោយបានគូសបញ្ជាក់ថាមន្ទីរព័ត៌មានរាជធានី-ខេត្តត្រូវបន្តផ្តល់ការតម្រង់ទិសជាប្រចាំលើការប្រតិបត្តិក្រមសីលធម៌ដល់អ្នកសារព័ត៌មានទាំងប្រពៃណី និងទំនើប ដែលកំពុងអនុវត្តការងារនៅក្នុងមូលដ្ឋានរបស់ខ្លួន ខណៈត្រូវបន្តយកចិត្តទុកដាក់ចំពោះបញ្ហានានា ដែលមួយផ្នែក បានកើតឡើងបណ្តាលមកពីសកម្មភាពផ្ទុយក្រមសីលធម៌វិជ្ជាជីវៈ និងការប្រព្រឹត្តហួសបន្ទាត់ដែលច្បាប់កំណត់របស់អ្នកសារព័ត៌មាន។ ឯកឧត្តមអ្នកនាំពាក្យក្រសួងព័ត៌មានបានបញ្ជាក់ថា៖ «ការប្រឈមនឹងការប្តឹងផ្តល់ ឬបញ្ហាផ្លូវច្បាប់របស់អ្នកសារព័ត៌មាន គឺដោយសារអ្នកសារព័ត៌មានពុំបានយល់ច្បាស់អំពីច្បាប់ អំពីព្រំដែននៃសិទ្ធិសេរីភាពរបស់ខ្លួនក្នុងនាមជាអ្នកសារព័ត៌មាន»។ ក្នុងន័យនេះ ឯកឧត្តមបានមានប្រសាសន៍ណែនាំដល់មន្ទីរព័ត៌មានរាជធានី-ខេត្ត ឱ្យគិតគូររៀបចំការបណ្តុះបណ្តាលដល់អ្នកសារព័ត៌មាន អំពីច្បាប់ លិខិតបទដ្ឋានពាក់ព័ន្ធនឹងវិស័យព័ត៌មាន ធម្មនុញ្ញវិជ្ជាជីវៈសារព័ត៌មាន ព្រមទាំងបន្តផ្សព្វផ្សាយជាប្រចាំអំពីសិទ្ធិ ករណីយកិច្ច និងការទទួលខុសត្រូវរបស់អ្នកសារព័ត៌មាន ដើម្បីឱ្យពួកគេទទួលបានការយល់ដឹងគ្រប់គ្រាន់ ដើម្បីធានាសុវត្ថិភាពក្នុងការអនុវត្តការងារប្រចាំថ្ងៃ។ មិនតែប៉ុណ្ណោះ មន្ទីរត្រូវយកចិត្តទុកដាក់ជួយដោះស្រាយបញ្ហាដែលអ្នកសារព័ត៌មានជួបប្រទះ ក្នុងពេលពួកគេអនុវត្តការងារតាមបណ្តារាជធានី-ខេត្ត។សម្រាប់អ្នកសារព័ត៌មាន អង្គភាពសារព័ត៌មានវិញ ទាំងប្រពៃណី និងទំនើប ឯកឧត្តមអនុរដ្ឋលេខាធិការបានមានប្រសាសន៍រំលឹកជាថ្មី ថាអ្នកសារព័ត៌មានត្រូវរាយការណ៍ព័ត៌មានរបស់ខ្លួនដោយផ្សារភ្ជាប់សិទ្ធិ កាតព្វកិច្ច ជាមួយការទទួលខុសត្រូវសង្គម ផ្នែកវិជ្ជាជីវៈ និងផ្លូវច្បាប់។ អ្នកសារព័ត៌មាន មានសិទ្ធិចុះយកព័ត៌មាន ស្វែងរកប្រភពព័ត៌មាននានា ដោយសេរី ប៉ុន្តែក៏ត្រូវមានកាតព្វកិច្ចគោរពសិទ្ធិបុគ្គល ក្រមសីលធម៌ និងគោលការណ៍ច្បាប់ជាធរមានផងដែរ។ក្រសួងព័ត៌មានបន្តធានាបរិយាកាសការងារប្រកបដោយសុវត្ថិភាពសម្រាប់អ្នកសារព័ត៌មាននៅកម្ពុជា អភិវឌ្ឍធនធានមនុស្សប្រកបដោយវិជ្ជាជីវៈ ធានាសន្តិសុខព័ត៌មាន និងលើកកម្ពស់សិទ្ធិសេរីភាពសារព័ត៌មាន។ ឯកឧត្តមអ្នកនាំពាក្យក្រសួងព័ត៌មានបានថ្លែងថា៖ «ខ្ញុំចង់ឃើញអ្នកសារព័ត៌មានទាំងអស់គោរពតួនាទី និងកាតព្វកិច្ចរបស់ខ្លួនឱ្យបានប្រត្យក្ស ត្រឹមត្រូវ។ ដូច្នេះសូមអ្នកសារព័ត៌មាននិងអង្គភាពសារព័ត៌មាន ទាំងបែបប្រពៃណី និងទំនើប ស្វែងយល់ឱ្យច្បាស់ពីច្បាប់ និងព្រំដែននៃសេរីភាព ហើយអនុវត្តសិទ្ធិចុះយកព័ត៌មាន ផលិត និង រាយការណ៍ព័ត៌មានដោយ អនុលោមតាមក្របខណ្ឌដែលកំណត់ដោយច្បាប់»៕

ឧត្តមសេនីយ៍ឯក ម៉ឹង ពន្លក អញ្ជើញបិទវគ្គហ្វឹកហ្វឺនបំប៉នជំនាញហិរញ្ញវត្ថុថ្នាក់មធ្យមជំនាន់ទី៥ ឆ្នាំ២០២៥

ឧត្តមសេនីយឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ នៅព្រឹកថ្ងៃទី១៩ ខែកញ្ញា ឆ្នាំ២០២៥នេះ បានអញ្ជើញជាអធិបតី ក្នុងពិធីបិទវគ្គហ្វឹកហ្វឺនបំប៉នជំនាញហិរញ្ញវត្ថុ ថ្នាក់មធ្យម ជំនាន់ទី៥ ឆ្នាំ២០២៥ ដែលប្រារព្ធឡើងនៅសាលប្រជុំទីស្តីការក្រសួងការពារជាតិ។ថ្លែងក្នុងពិធីនោះ ឯកឧត្តមឧត្តមសេនីយ៍ឯក ម៉ឹង ពន្លក បានមានប្រសាសន៍លើកទឹកចិត្តឲ្យមន្ត្រីជំនាញបន្តការសិក្សារៀនសូត្រជារៀងរហូត ព្រោះបច្ចុប្បន្ននេះបច្ចេកវិទ្យាវិវត្តន៍ថ្មីៗជានិច្ច និងបានផ្ដាំផ្ញើឲ្យសិក្ខាកាមដែលទើបតែបញ្ចប់វគ្គទាំងអស់ ត្រូវយកចំណេះជំនាញដែលខ្លួនបានរៀន យកទៅបម្រើការនៅតាមបណ្តាអង្គភាពរបស់ខ្លួន ប្រកបដោយសីលធម៌ និងទំនួលខុសត្រូវខ្ពស់ និងត្រូវស្ដាប់បទបញ្ជារបស់មេបញ្ជាការ។ បើយោងតាមរបាយការណ៍របស់ឧត្តមសេនីយ៍ទោ គឹម សុណារ៉ា នាយកនាយកដ្ឋានហិរញ្ញវត្ថុ បានបញ្ជាក់ថាវគ្គហ្វឹកហ្វឺនបំប៉នជំនាញដែលទើបបញ្ចប់នាពេលនេះ គឺសិក្ខាកាមបានសិក្សាររយៈ ពេល ៩៦ថ្ងៃ និងបានបញ្ចប់ប្រកបដោយជោគជ័យ៕

ប្រជាពលរដ្ឋរងគ្រោះដោយជម្លោះ ព្រំដែន កម្ពុជា -ថៃ ៤៥០គ្រួសារ ទទួលបានជំនួយសង្រ្គោះបន្ទាន់

ឧត្តរមានជ័យ៖ នៅថ្ងៃទី១៩ ខែកញ្ញា ឆ្នាំ២០២៥នេះ ប្រជាពលរដ្ឋចំនួន ៤៥០គ្រួសារ មកពីភូមិចំនួន១៦ ក្នុងសង្កាត់កូនគ្រៀល ក្រុងសំរោង ខេត្តឧត្តរមានជ័យ ទទួលបានជំនួយពី កម្មវិធីផ្តល់ជំនួយសង្គ្រោះបន្ទាន់ឆ្លើយតបរិបត្តិកង្វះខ្វះស្បៀងអាហារ ដល់គ្រួសាររងគ្រោះដែលរងផលប៉ះពាល់ដោយជម្លោះព្រំដែន កម្ពុជា-ថៃ។ពិធីនេះបានធ្វើឡើងក្រោមវត្តមាន លោក ផុន ចាន់និល អភិបាលក្រុងសំរោង ខេត្តឧត្តរមានជ័យ និង អ្នកស្រី ថៃ បុណេ នាយិការប្រតិប័ត្ត អង្គការ ក្តីសង្ឃឹមលូថេវ៉ានកម្ពុជា ព្រមទាំងមន្ត្រីពាក់ព័ន្ធ និងប្រជាពលរដ្ឋជាច្រើនរូបទៀត។លោក ផុន ចាន់នឹល អភិបាលក្រុងសំរោង បានលើកឡើងថា កម្មវិធីនេះទទួលបានមូលនិធីពីរអង្គការ អាក់ អាឡាយអិន (Act. Alliance) និងអនុវត្តដោយ អង្គការក្តីសង្ឃឹមលូថេវ៉ាន កម្ពុជា (LHCO) ដោយមានការគាំទ្រពីអាជ្ញាធរមូលដ្ឋាន។ ក្នុងនោះដែរ ជំនួយមនុស្សធម៌នេះ នឹងផ្តល់ជូនដល់គ្រួសាដែល រងគ្រោះដោយសារជម្លោះព្រំដែន កម្ពុជា-ថៃ ដែលកំពុងជួបប្រទះនឹងវិបត្តិកង្វះស្បៀងអាហារ។លោកអភិបាលក្រុងសំរោង បានបន្តថា គ្រួសារទាំងនោះត្រូវបានជ្រើសរើសដោយមានការសហការ ជាមួយរដ្ឋបាលសង្កាត់កូនគ្រៀល ក្រុងសំរោង ខេត្តឧត្តរមានជ័យ ស្របតាមលក្ខណៈវិនិច្ឆ័យច្បាស់លាស់ និងមានការណែនាំពីម្ចាស់មូលនិធិ អង្គការ អាត់ អាឡាយអិន (Act Alliance)។ ជំនួយនេះត្រូវបានផ្តល់ជូនប្រជាពលរដ្ឋចំនួន ៤៥០គ្រួសារ ដោយក្នុងនោះមួយគ្រួសារៗទទួលបាន ជាសាច់ប្រាក់ចំនួន ១២០ ដុលារ អង្ករចំនួន ៣០ គីឡូក្រាម និងម៉ាស់ពាក់ចំនួន ១ប្រអប់តូច៕អត្ថបទ៖ ឃិន សារិទ្ធ

អាជ្ញាធរខេត្តកំពង់ឆ្នាំង ដាក់ពង្រាយកម្លាំងជិត ៨ពាន់នាក់ ពង្រឹងសន្តិសុខ សណ្ដាប់ធ្នាប់ បុណ្យកាន់បិណ្ឌ និងភ្ជុំបិណ្ឌ

កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង នៅថ្ងៃទី១៩ ខែកញ្ញា ឆ្នាំ២០២៥ នេះ បានឱ្យដឹងថា ឯកឧត្តមបានដាក់ពង្រាយកម្លាំងនគរបាល កម្លាំងកងរាជអាវុធហត្ថ និងកម្លាំងប្រជាការពារប្រមាណជិត ៨ពាន់នាក់ នៅតាមវត្តអារាម តាមផ្លូវសាធារណៈសំខាន់ៗ ទីរមណីយដ្ឋាននានាក្នុងខេត្ត កំពង់ចម្លងដទៃទៀត ដើម្បីធានាឱ្យបាននូវស្ថិរភាពសន្តិសុខ សណ្ដាប់ធ្នាប់សាធារណៈ។ ឯកឧត្តម ស៊ុន សុវណ្ណារិទ្ធិ បានមានប្រសាសន៍ថា តាមទីវត្តអារាម រមណីយដ្ឋាននានា កំពង់ចម្លងដរទទឹងក្រុងកំពង់ឆ្នាំង និងស្រុកកំពង់លែង នៅតាមដងផ្លូវសំខាន់ៗក្នុងខេត្ត ត្រូវបានដាក់ពង្រាយកម្លាំង ដើម្បីធានាបាននូវស្ថិរភាពសន្តិសុខ សណ្ដាប់ធ្នាប់សាធារណៈ រក្សាបាននូវចរាចរណ៍កុំឱ្យកកស្ទះ និងសុវត្ថិភាពសង្គម ក្នុងឱកាសពិធីបុណ្យកាន់បិណ្ឌ បុណ្យភ្ជុំបិណ្ឌ ជូនពលរដ្ឋ និងភ្ញៀវទេសចរមកលេងស្រុកកំណើត មកធ្វើបុណ្យ និងមកកម្សាន្តតាមទីរមណីយដ្ឋាននានា។ ក្នុងនោះមានកម្លាំងនគរបាលប្រមាណ១២០០នាក់ កម្លាំងប្រជាការពារ ៦០០០នាក់ និងកងរាជអាវុធហត្ថប្រមាណជាង ២០០នាក់ ដើម្បីរក្សាការពារក្នុងអំឡុងបុណ្យកាន់បិណ្ឌ និងភ្ជុំបិណ្ឌនេះ។ ក្នុងនោះវិធានការទាំង ៨ចំណុច ដែលបានដាក់ចេញរួមមាន ការយកចិត្តទុកដាក់ក្តាប់សភាពការណ៍ក្នុងដែនសមត្ថកិច្ចរបស់ខ្លួនពាក់ព័ន្ធសន្តិសុខ សណ្ដាប់ធ្នាប់សង្គម ពិសេសសកម្មភាពភេវរកម្ម ឧក្រិដ្ឋកម្មឆ្លងដែនគ្រប់ប្រភេទ និងចាត់វិធានការឱ្យបានទាន់ពេលវេលា។ បន្ត និងពង្រឹងការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព គ្រប់គ្រងឱ្យបានហ្មត់ចត់ មុខសញ្ញាប្រព្រឹត្តបទល្មើស ការប្រើប្រាស់អាវុធ រំសេវ គ្រឿងផ្ទុះ ការជួញដូរ និងប្រើប្រាស់គ្រឿងញៀន សកម្មភាពក្មេងទំនើង។ ពង្រឹងវិធានការសន្តិសុខ សណ្ដាប់ធ្នាប់នៅគោលដៅប្រារព្ធពិធីបុណ្យ កន្លែងកម្សាន្ត រួមមានវត្តអារាម ប្រាសាទ និងតំបន់រមណីយដ្ឋានទេសចរណ៍។ ការពង្រឹងការអនុវត្តច្បាប់ចរាចរណ៍ផ្លូវគោក ដាក់កម្លាំងតាមគោលដៅ ដើម្បីកាត់បន្ថយការកកស្ទះ និងគ្រោះថ្នាក់នានា និងបង្កើនការផ្សព្វផ្សាយដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះភ្លើងទៀន ធូប និងការប្រើប្រាស់ចរន្តអគ្គិសនី បង្ការគ្រោះថ្នាក់អគ្គិភ័យជាយថាហេតុ៕ អត្ថបទ៖ កាំង ហុងវាស្នា

រថយន្ដក្រុងសាធារណៈបានរៀបចំរួចរាល់សម្រាប់ជូនបងប្អូន «ជិះដោយមិនបង់ប្រាក់» ទៅលេងស្រុកកំណើតជួបជុំក្រុមគ្រួសារក្នុងឱកាសពិធីបុណ្យភ្ជុំបិណ្ឌ

ភ្នំពេញ៖ លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រថយន្ដក្រុងសាធារណ:របស់រដ្ឋបាលរាជធានីភ្នំពេញ បានឱ្យដឹងថា មកទល់រសៀលថ្ងៃទី១៩ ខែកញ្ញានេះ រថយន្ដក្រុងសាធារណ:របស់រដ្ឋបាលរាជធានីភ្នំពេញ បានរៀបចំរួចរាល់ហើយ “ជិះដោយមិនបង់ប្រាក់” ដើម្បីជួយសម្រួលដល់ការចំណាយជូនប្រជាពលរដ្ឋក្នុងការធ្វើដំណើរទៅលេងស្រុកកំណើត ជួបជុំបងប្អូនក្រុមគ្រួសារ ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ ដែលមានរយៈពេល ០៦ថ្ងៃ ចាប់ពីថ្ងៃទី២០ ដល់ថ្ងៃទី២៥ ខែកញ្ញា ឆ្នាំ២០២៥ ។លោក កែវ ចាន់ណារិទ្ធ ជម្រាបប្រជាពលរដ្ឋទាំងអស់សូមមកទទួលសេវារថយន្តក្រុងសាធារណៈ “ដោយជិះមិនបង់ប្រាក់” ។សូមប្រជាពលរដ្ឋទាំងអស់ សូមមកទទួលសេវារថយន្តក្រុងសាធារណៈ - ជិះដោយមិនបង់ប្រាក់- ជិះមិនតម្រូវឱ្យមានការចុះឈ្មោះ- ជិះមិនតម្រូវឱ្យមានការបង្ហាញអត្តសញ្ញាណប័ណ្ណ ឬ ឯកសារផ្សេងៗ ដែលរៀបចំដោយរដ្ឋបាលរាជធានីភ្នំពេញ ដើម្បីធ្វើដំណើរទៅលេងស្រុកកំណើតជួបជុំ គ្រួសារ ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ សូម ធ្វើដំណើរប្រកបដោយសុវត្ថិភាព និងផាសុកភាព ។ដើម្បីទទួលបានព័ត៌មាន អំពីទីតាំងចេញដំណើរ សូមអញ្ជើញចុចលើ Link ដែលបានជូនភ្ជាប់នៅខាងក្រោម៖https://citybus.phnompenh.gov.khhttps://heylink.me/PPCITYBUS/

សម្តេច ម៉ែន សំអន អញ្ជើញថ្វាយគ្រឿងសក្ការៈដល់បារមីនាងក្រពុំឈូក និងអញ្ជើញចូលរួមវេនកាន់បិណ្ឌទី១២ នៅវត្តវិហារធំសសរ១០០

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិ រណសិរ្សសាមគ្គី អភិវឌ្ឍន៍មាតុភូមិកម្ពុជា បានអញ្ជើញថ្វាយគ្រឿងសក្ការៈ ដល់បារមីព្រះនាងក្រពុំឈូក ដើម្បីសុំសេចក្តីសុខ សេចក្តីចម្រើន ជូនដល់ប្រទេសជាតិ និងចូលរួមវេនកាន់បិណ្ឌទី១២ នៅវត្តវិហារធំសសរ១០០ ស្ថិតក្នុងភូមិសំបូរ ឃុំសំបូរ ស្រុកសំបូរ ខេត្តក្រចេះ នាព្រឹកថ្ងៃសុក្រ ១២រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹង ថ្ងៃទី១៩ ខែកញ្ញា ឆ្នាំ២០២៥។ ជារៀងរាល់ឆ្នាំ សម្តេចកិត្តិសង្គហបណ្ឌិត បានអញ្ជើញចូលរួមវេនកាន់បិណ្ឌនៅស្រុកកំណើតរបស់សម្តេច និងបានវេរប្រគេននូវទេយ្យវត្ថុមួយចំនួនដល់ព្រះសង្ឃចំនួន ៣វត្ត រួមមាន ៖ វត្តវិហារធំសសរ១០០ វត្តព្រះវិហារលាវ និងវត្តវិហារគោក។ នៅក្នុងពិធីនោះផងដែរ ក៏មានការអញ្ជើញចូលរួមពីសំណាក់ រដ្ឋបាលខេត្តក្រចេះ កងកម្លាំំប្រដាប់អាវុធទាំង៣ប្រភេទ មន្ត្រីរាជការ ព្រមទាំងពុទ្ធបរិស័ទ ដោយបានបូជាទៀនធូបផា្កភ្ញី ចំពោះព្រះរតនត្រៃសមាទានសិល ធ្វើកិច្ចនមស្សការបង្សុកុល ព្រមទាំងបាននាំយកនូវបច្ច័យ ទេយ្យទានគ្រឿងឧបភោគ បរិភោគ ភេសជ្ជៈ ផ្លែឈើជាច្រើនមុខ វេរប្រគេនព្រះសង្ឃ ដើម្បីឧទ្ទិសនូវផល្លាអានិសង្ឃជូនទៅដល់ព្រះវិញ្ញាណក្ខន្ធ ព្រះចៅធិការវត្តសសរ១០០គ្រប់ៗជំនាន់ និងឧទ្ទិសដល់ដួងវិញ្ញានក្ខន្ធ និងបុព្វការីជនមានមាតាបិតាជីដូនជីតាញាតិការទាំង ៧សណ្ដាន និងជូនចំពោះវិញ្ញាណក្ខន្ធវិរកងទ័ព បុព្វបុរសអ្នកស្នេហាជាតិ ដែលបានពលីអាយុជីវិត ដើម្បីភាពគង់វង្សនៃបូរណភាពទឹកដី ជាតិមាតុភូមិឱ្យទទួលបានសុខសន្ដិភាព ភាពរីកចម្រើនសម្បូរណ៍រុងរឿង ។ សម្តេចកិត្តិសង្គហបណ្ឌិត ក៏បានបួងសួងថ្វាយព្រះពរជ័យបវរមហាប្រសើរ ថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និងប្រគេនពរជ័យដល់ព្រះថេរានុត្ថេរៈគ្រប់ព្រះអង្គ និងសូមគោរពជូនពរ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារ ក៏ដូចជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុនី ថ្នាក់ដឹកនាំ សមាជិក សមាជិកា ព្រឹទ្ធសភា រដ្ឋសភា ព្រមទាំងប្រជាពលរដ្ឋនៅទូទាំងប្រទេស ជួបតែសេចក្តីសុខចម្រើនគ្រប់ៗព្រះអង្គ និងគ្រប់ៗគ្នា ជាពិសេស សូមគ្រប់ក្រុមគ្រួសារចៀសផុតពីជំងឺកាចសាហាវ ប្រទេសជាតិជួបតែនឹងសេចក្តីសុខ សេចក្តីចម្រើន មានសុខសន្តិភាព សម្បូរណ៍កសិផល សម្បូរណ៍ទេសចរណ៍ ជៀសផុតពីគ្រោះរាំងស្ងួត៕

ឯកអគ្គរដ្ឋទូតបារាំងថ្មី ប្ដេជ្ញាជំរុញការពង្រឹង និងពង្រីកទំនាក់ទំនងទ្វេភាគី បារាំង-កម្ពុជា ឱ្យកាន់តែរឹងមាំ

នាព្រឹកថ្ងៃទី១៩ ខែកញ្ញា ឆ្នាំ២០២៥, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានទទួលឯកឧត្តម Olivier RICHARD ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំង ប្រចាំព្រះរាជាណាចក្រកម្ពុជា ចូលសម្តែងការគួរសម និងពិភាក្សាការងារ នៅវិមានសន្តិភាព។ក្នុងឱកាសនៃជំនួប, ឯកឧត្តមឯកអគ្គរដ្ឋទូតបានគោរពថ្លែងអំណរគុណយ៉ាងជ្រាលជ្រៅចំពោះសម្តេចបវរធិបតី ដែលបានចំណាយពេលវេលាដ៏មមាញឹកអនុញ្ញាតឱ្យរូបឯកឧត្តម និងសហការីចូលជួបសម្តែងការគួរសម និង ពិភាក្សាការងារ។ ឯកឧត្តមឯកអគ្គរដ្ឋទូតបានគូសបញ្ជាក់ថា បារាំង និងកម្ពុជាគឺជាដៃគូដ៏យូរអង្វែង ហើយទំនាក់ទំនង និងកិច្ចសហប្រតិបត្តិការនេះត្រូវបានពង្រឹង និងពង្រីកជាបន្តបន្ទាប់ និង ប្រកបដោយភាពរឹងមាំ។ ជាមួយគ្នានេះ, ឯកឧត្តមបានគូសបញ្ជាក់ពីការប្ដេជ្ញាចិត្តក្នុងការធ្វើការយ៉ាងជិតស្និទ្ធជាមួយក្រសួង-ស្ថាប័នកម្ពុជា ដើម្បីបន្តជំរុញ និងលើកកម្ពស់ទំនាក់ទំនង ក៏ដូចជាកិច្ចសហប្រតិបត្តិការ ទ្វេភាគី ឱ្យកាន់តែខ្លាំងក្លា, រីកចម្រើន និង រឹងមាំថែមទៀត។ជាការឆ្លើយតប, សម្ដេចបវរធិបតីបានសម្តែងការស្វាគមន៍យ៉ាងកក់ក្តៅ និងអបអរសាទរចំពោះឯកឧត្តម Olivier RICHARD ដែលត្រូវបានតែងតាំងជាឯកអគ្គរដ្ឋទូតបារាំងថ្មីប្រចាំកម្ពុជា។ សម្ដេចបវរធិបតីបានបង្ហាញជំនឿជឿជាក់ថា បេសកកម្មការទូតរបស់ឯកឧត្តមនឹងក្លាយជាកម្លាំងចលករបន្ថែមទៀតក្នុងការរឹតចំណង និងពង្រឹងទំនាក់ទំនង និងមិត្តភាព ព្រមទាំង កិច្ចសហប្រតិបត្តិការទ្វេភាគី ទាំងក្នុងក្របខណ្ឌនៃទំនាក់ទំនងរវាងរដ្ឋាភិបាល និងរដ្ឋាភិបាល, ប្រជាជន និងប្រជាជន រួមទាំងវិស័យឯកជន និង វិស័យ ឯកជន ។ សម្ដេចបវរធិបតីបានបន្ថែមថា វឌ្ឍនភាពនៃទំនាក់ទំនងកម្ពុជា-បារាំង ជាកាលានុវត្តភាពសម្រាប់កិច្ចសហប្រតិបត្តិការលើវិស័យសក្តានុពលជាច្រើន និងបានបើកឱកាសបន្ថែមជាច្រើនទៀត សម្រាប់ប្រទេសទាំងពីរ។សម្ដេចបវរធិបតី និងឯកឧត្តមឯកអគ្គរដ្ឋទូត បានពិភាក្សា និងឯកភាពគ្នាបន្តជំរុញការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ លើវិស័យសំខាន់ៗរួមមានជាអាទិ៍៖ សេដ្ឋកិច្ច, ពាណិជ្ជកម្ម និងវិនិយោគ, អប់រំ, សុខាភិបាល, ថាមពល, វប្បធម៌ និងបរិស្ថាន៕ចំពោះបញ្ហាព្រំដែនកម្ពុជា-ថៃ, សម្ដេចបវរធិបតីបានថ្លែងអំណរគុណដល់ប្រធានាធិបតីបារាំង ឯកឧត្តម Emmanuel Macron ដែលបានគាំទ្រដល់បទឈប់បាញ់កន្លងមក និងបានជម្រាបជូនឯកឧត្តមអគ្គរដ្ឋទូតអំពីបច្ចុប្បន្នភាពស្តីពីការវិវឌ្ឍនៃស្ថានភាពព្រំដែនកម្ពុជា-ថៃ ព្រមទាំងបានគូសបញ្ជាក់ពីជំហររបស់កម្ពុជាក្នុងការដោះស្រាយបញ្ហាព្រំដែនជាមួយភាគីថៃ ដោយសន្តិវិធី ដោយផ្អែកលើកិច្ចព្រមព្រៀងទ្វេភាគី អនុសញ្ញា សទ្ធិសញ្ញា ដែលមានស្រាប់ និងច្បាប់អន្តរជាតិ។ ឯកឧត្តមឯកអគ្គរដ្ឋទូតបានជម្រាបជូនសម្ដេចបវរធិបតីថា ឯកឧត្តមបានចុះទៅពិនិត្យដោយផ្ទាល់នៅតំបន់ព្រំដែន និងបានបន្តតាមដាន និងរាយការណ៍អំពីស្ថានភាពនេះជូនថ្នាក់ដឹកនាំបារាំង ជាប្រចាំ៕

បណ្ដាញសង្គម

ព័ត៌មានថ្មីៗ

សារព័ត៌មាន៖ អនុប្រធានាធិបតីអាមេរិក អាចចូលរួមក្នុងការចរចាដោយផ្ទាល់ជាមួយអ៊ីរ៉ង់

ក្រសួងការពារជាតិ៖ បំណែកមីស៊ីលរបស់អ៊ីរ៉ង់ ធ្លាក់លើទីតាំងថាមពលនៅអារ៉ាប៊ីសាអ៊ូឌីត

កូរ៉េខាងត្បូង៖ ការឆ្លើយតបរបស់ក្រុងព្យុងយ៉ាង ចំពោះការសូមអភ័យទោស ជាវឌ្ឍនភាពឆ្ពោះទៅរកភាពធូរស្រាល

មេដឹកនាំប្រឆាំងតៃវ៉ាន់ ទៅបំពេញបេសកកម្មសន្តិភាព នៅចិន ខណៈអាជ្ញាធរកោះប្រាប់ពីការដាក់ពង្រាយនាវាចម្បាំង

អ៊ីរ៉ង់៖ វត្តមានយោធាអាមេរិកនាំមក «គ្មានអ្វីក្រៅពីភាពអសន្តិសុខ» ដល់មជ្ឈិមបូព៌ានោះទេ

UN៖ ការវាយប្រហារដោយយានដ្រូននៅស៊ូដង់ បង្កគ្រោះថ្នាក់ដល់ជនស៊ីវិល និងធ្វើឱ្យការឆ្លើយតបជំនួយពិបាកខ្លាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877