BTV NEWS

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

ក្រុមប្រឹក្សាធម្មនុញ្ញប្រារព្ធពិធីសូត្រមន្តចម្រើនសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

ខែមីនា ឆ្នាំ២០២៦នេះ កម្ពុជាទទួលបានការចុះបញ្ជីតាមប្រព័ន្ធ CamDX មានទុនវិនិយោគ ២៩៤ លានដុល្លារ

ក្រុមការងារអន្តរក្រសួងចុះពិនិត្យផ្ទៀងផ្ទាត់ទីតាំងត្រៀមរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅថ្ងៃទី១១ ខែមេសានេះ ក្រោមអធិបតីភាពសម្ដេចធិបតី

ព័ត៌មានជាតិ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ

ភ្នំពេញ ៖ នាព្រឹកថ្ងៃទី១០ ខែកញ្ញា ឆ្នាំ២០២៥ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក.) ដឹកនាំដោយឯកឧត្តម នៅ លក្ខណា រដ្ឋលេខាធិការក្រសួងមហាផ្ទៃ និងជាប្រធាន គ.ប.ផ.ក. ចូលជួបសម្តែងការគួរសម និងសុំការណែនាំអំពីកិច្ចសហការលើការងារប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម។ ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានស្វាគមន៍យ៉ាងកក់ក្តៅដល់ក្រុមការងារទាំងអស់ ដែលឆ្លៀតឱកាសដ៏មានតម្លៃចូលជួបសំណេះសំណាលនិងពិភាក្សាការងារ។ឯកឧត្តម នៅ លក្ខណា ប្រធានគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក.) បានកោតសសើរ នូវការរីកចម្រើនរបស់វិស័យសុខាភិបាល ជាពិសេសការផ្តល់សេវាសុខាភិបាលសាធារណៈ នៅតាមមូលដ្ឋានសុខាភិបាល។ ទន្ទឹមគ្នានេះដែរឯកឧត្តមបានគោរពស្នើសុំគោលការណ៍ណែនាំ ក្នុងការទប់ស្កាត់ផលិតផលក្លែងក្លាយ ដែលធ្វើឱ្យប៉ះពាល់ដល់សុខុមាលភាពប្រជាជន។ឯកឧត្តមសាស្រ្តាចារ្យរដ្ឋមន្រ្តី បានជម្រាបជូនពីយន្តការដែលក្រសួងសុខាភិបាល បាននិងកំពុងអនុវត្ត ដើម្បីពង្រឹង និងលើកកម្ពស់គុណភាពសេវាសុខាភិបាល ទាំងសេវាសុខាភិបាលសាធារណៈ និងឯកជន ឱ្យកាន់តែប្រសើរឡើងថែមទៀត។ ជាមួយគ្នានេះ ក្រសួងសុខាភិបាល បាននិងកំពុងពង្រឹងការគ្រប់គ្រងគុណភាពឱសថ ផលិតផលបំប៉នសុខភាព ឱសថបុរាណ និងគ្រឿងសម្អាង ដោយធ្វើការត្រួតពិនិត្យគុណភាពផលិតផលនៅលើទីផ្សារជាប្រចាំ ក៏ដូចជាអប់រំណែនាំដល់ធុរជន និងប្រជាពលរដ្ឋ ចំពោះផលិតផលឱសថ ផលិតផលបំប៉នសុខភាព ឱសថបុរាណ ត្រូវមានលេខបញ្ជិកា និងគ្រឿងសម្អាងត្រូវមានប្រវេទន៍ ពីក្រសួងសុខាភិបាល ព្រមទាំងចាត់វិធានការតឹងរ៉ឹងតាមនីតិវិធីចំពោះបុគ្គលដែលបានប្រព្រឹត្តល្មើសច្បាប់។ ជាទីបញ្ចប់ ក្នុងនាមក្រសួងសុខាភិបាល ឯកឧត្តមសាស្រ្តាចារ្យរដ្ឋមន្រ្តី ស្វាគមន៍ចំពោះកិច្ចសហការតាមបច្ចេកទេស ដោយធ្វើយ៉ាងណាឱ្យកិច្ចសហការនេះបានល្អ ស្របតាមច្បាប់ និងលិខិតបទដ្ឋានគតិយុត្តជាធរមាន សំដៅបម្រើផលប្រយោជន៍ ប្រជាពលរដ្ឋទូទៅឱ្យបានកាន់តែប្រសើរឡើង ដើម្បីចូលរួមលើកកម្ពស់សេដ្ឋកិច្ចជាតិ និងសុខភាពប្រជាជន៕អត្ថបទ រដ្ឋា

ក្រុមបារាំងកៀរគរគ្នាដើម្បីបេតិកភណ្ឌកម្ពុជា

លោកស្រី Yannick Lintz ប្រធានសារមន្ទីរហ្គីម៉េសម្រាប់សិល្បៈអាស៊ី និង លោក Jean Luc Martinezឯកអគ្គរដ្ឋទូតសម្រាប់កិច្ចសហប្រតិបត្តិការអន្តរជាតិក្នុងវិស័យបេតិកភណ្ឌ បានអញ្ជើញមកប្រទេសកម្ពុជាដើម្បីពង្រឹង និងពង្រីកកិច្ចសហប្រតិបត្តិការរវាងប្រទេសយើងទាំងពីរ ក្នុងវិស័យបេតិកភណ្ឌ។ នេះបើតាមការផ្សាយរបស់ ស្ថាបទូតបារាំងប្រចាំនៅកម្ពុជា នៅរាត្រីថ្ងៃទី១០ ខែកញ្ញា ឆ្នាំ២០២៥ នេះ។ជាមួយលោក អូលីវ្យេ រីឆា ឯកអគ្គរដ្ឋបារាំងប្រចាំកម្ពុជា លោក Jean Luc Martinez និងលោកស្រី Yannick Lintz បានទស្សនាសារមន្ទីរជាតិភ្នំពេញ និងសាកលវិទ្យាល័យភូមិន្ទវិចិត្រសិល្បៈ។ ជំនួបខាងលើ គឺជាឱកាសពិនិត្យលើការសិក្សាដែលកំពុងដំណើរការ ស្តីពី ការពង្រីកសារមន្ទីរជាតិភ្នំពេញ ដែលនឹងផ្តល់ជូន ក្រសួងវប្បធម៌ និងវិចិត្រសិល្ប: នូវជម្រើសក្នុងការលើកស្ទួយតម្លៃសារមន្ទីរជាតិបន្ថែមទៀត ក៏ដូចជាសមុច្ច័យនានារបស់សារមន្ទីរនេះ៕

ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”

កំពង់ស្ពឺ ៖ នៅថ្ងៃទី១០ ខែកញ្ញា ឆ្នាំ២០២៥ នេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកស្រី Dr. Marianna Trias ប្រធានអង្គការសុខភាពពិភពលោកប្រចាំកម្ពុជា បានអញ្ជើញជាគណៈអធិបតីក្នុងពិធីប្រកាសជាផ្លូវការ “ក្រុងច្បារមនជាទីក្រុងទេសចរណ៍គ្មានផ្សែងបារី” ជាជ័យលាភីមួយដែលមានការទទួលស្គាល់ជាផ្លូវការពីក្រសួងទេសចរណ៍ ចំពោះបណ្តាក្រុង/ស្រុក/ខណ្ឌណា ដែលបានអនុវត្តបរិស្ថានគ្មានផ្សែងបារីក្នុងវិស័យទេសចរណ៍បានល្អប្រសើរ ហើយជ័យលាភីនេះក៏មានការទទួលស្គាល់ដោយបណ្តាញទីក្រុងគ្មានផ្សែងបារីនៅតំបន់អាស៊ីប៉ាស៊ីហ្វិក, សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ និង អង្គការសុខភាពពិភពលោកផងដែរ។ក្នុងពិធីនេះ មានការអញ្ជើញចូលរួមពី ឯកឧត្ដមរដ្ឋលេខាធិការក្រសួងសុខាភិបាល ឯកឧត្ដមរដ្ឋលេខាធិការក្រសួងទេសចរណ៍ ឯកឧត្ដម លោកជំទាវ លោក លោកស្រីទាំងអស់មកពីក្រសួង ស្ថាប័នពាក់ព័ន្ធ មន្ទីរជំនាញ ព្រមទាំងរដ្ឋបាលខេត្ត ក្រុង ស្រុក ឃុំ សង្កាត់ គ្រប់ជាន់ថ្នាក់ ប្រមាណ ២៣៨នាក់។ឯកឧត្តម ហួត ហាក់ បានមានប្រសាសន៍ថា ខេត្តកំពង់ស្ពឺ បាន និងកំពុងអភិវឌ្ឍលើគ្រប់វិស័យយ៉ាងឆាប់រហ័ស ទាំងហេដ្ឋារចនាសម្ព័ន្ធរូបវ័ន្ត និងការវិនិយោគ គឺជាខេត្តមានលក្ខណៈអំណោយផល ដោយកត្តាភូមិសាស្ត្រមានទីតាំងនៅជិតរាជធានីភ្នំពេញ, សម្បូរដោយព្រៃភ្នំ, វាលស្មៅដ៏ស្រស់ស្អាត, ទេសភាពធម្មជាតិដ៏ស្រស់ត្រកាល, មានសហគមន៍ជនជាតិដើមភាគតិច, និងក៏ជាខេត្តមានភាពល្បីល្បាញខាងការផលិតស្ករត្នោត និងអំពៅផងដែរ។ជាមួយគ្នានេះ ឯកឧត្តមរដ្ឋមន្ត្រី ក៏បានបញ្ជាក់បន្ថែមថា ទាំងអស់នេះគឺជាកត្តាអំណោយផលដល់ការអភិវឌ្ឍតំបន់សក្តានុពលទេសចរណ៍ធំៗរបស់ខេត្ត ដែលរួមមាន តំបន់ទេសចរណ៍វប្បធម៌ ប្រវត្តិសាស្ត្រ, តំបន់សហគមន៍ទេសចរណ៍, តំបន់ទេសចរណ៍ធម្មជាតិ, ទេសចរណ៍កែច្នៃ, តំបន់កសិ-ទេសចរណ៍ និងតំបន់គោលដៅទេសចរណ៍ថ្មីៗ ស្របតាមផែនការអភិវឌ្ឍន៍ទេសចរណ៍បច្ចុប្បន្នកម្ម ឆ្នាំ២០២១-២០២៥ ខេត្តកំពង់ស្ពឺ៕

អូស្ត្រាលីកំពុងក្លាយជាទីផ្សារល្អ សម្រាប់ការនាំជលផលកែច្នៃពីកម្ពុជាក្នុងមួយឆ្នាំៗ រាប់សិបតោន

សៀមរាប៖ ប្រទេសអូស្ត្រាលី កំពុងក្លាយជាទីផ្សារល្អមួយសម្រាប់កម្ពុជា ដោយផលិត ផលជលផលកែច្នៃរបស់កម្ពុជា រាប់សិបតោនក្នុងមួយឆ្នាំៗ ត្រូវបាននាំទៅកាន់ទីនោះ ខណៈផលិតផលនេសាទនេះ ក៏កំពុងពេញនិយមផងដែរ នៅក្នុងទីផ្សារអ៊ឺរ៉ុប អាមេរិក និងប្រទេសមួយចំនួន នៅក្នុងតំបន់អាស៊ី ។ជាក់ស្ដែងសហគ្រាស សាន់នី ហ្វីស (Sunny Fish) មានទីតាំងស្ថិតក្នុងសង្កាត់ ជ្រាវ ក្រុងសៀមរាប ខេត្តសៀមរាប ដែលក្នុងមួយឆ្នាំៗ បាននាំនូវផលិតផលជលផល កែច្នៃមួយចំនួន ទៅកាន់ទីផ្សារអូស្ត្រាលីចំនួន ៤កុងទីន័រ ដែលស្មើនឹងប្រមាណជា ៣២ តោន ជាមួយនឹងការចុះកុងត្រាប្រចាំឆ្នាំផងដែរ នេះបើតាមការឲ្យដឹងពីលោកស្រី ស៊ឹម សិរីរត្ន ម្ចាស់សហគ្រាស សាន់នី ហ្វីស ។លោកស្រី បានឲ្យដឹងថា សហគ្រាសនេះ មានអាយុកាលជាង២៥ឆ្នាំមកហើយ ដោយជំហាន ដំបូងការផលិតកែច្នៃជលផល ក្នុងមួយសប្ដាហ៍ត្រឹមតែជាង ៥គីឡូក្រាម ប៉ុណ្ណោះ ប៉ុន្តែក្នុងពេលបច្ចុប្បន្ននេះ ដោយសារមានការជួយជ្រោមជ្រែង ពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) របស់សហភាពអ៊ឺរ៉ុប (EU) អនុវត្តដោយអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) និងកម្មវិធី ហិរញ្ញវត្ថុគាំទ្រ ការវិនិយោគ (ISF) នៃក្រសួងសេដ្ឋកិច្ច និងហិរញ្ញវត្ថុ រួមទាំងមានការ គាំទ្រច្រើនទាំងក្នុង និងក្រៅប្រទេសនោះ សហគ្រាសបាន ពង្រីកការផលិតក្នុងមួយថ្ងៃ ត្រីចំនួនប្រមាណ ១តោនកន្លះ ។លោកស្រីបន្តថា សម្រាប់ផលិតផលជលផលដែលសិប្បកម្មបានកែច្នៃ មានដូច ជា ត្រីស្រស់បង្កក ត្រីងៀត ត្រីឆ្អើរ ត្រីផាត់ ផ្អក និងប្រហុកសាច់ត្រីជាដើម ដោយក្រៅ ពីផ្គត់ផ្គង់ទីផ្សារក្នុងស្រុក សហគ្រាសនេះ ក៏បាននាំចេញទៅក្រៅប្រទេសផងដែរ ។លោកស្រី ស៊ឹម សិរីរត្ន បានគូសបញ្ជាក់ថា បន្ទាប់ពីប្រជាពលរដ្ឋខ្មែរ បាននាំគ្នា ពហិកា មិនប្រើប្រាស់ផលិតផលពីប្រទេសថៃ ធ្វើឱ្យការលក់ផលិតផលជលផល ក្នុង សហគ្រាសសាន់នីហ្វីស មានចំនួនកើនឡើង ទាំងតម្រូវកាក្នុងស្រុក និងតម្រូវការនៅ ក្រៅប្រទេស ។លោកស្រី បានបន្ថែមថា បន្ទាប់ពីមានការគាំទ្របច្ចេកទេស ថវិកា និងស្តង់ដារ អនាម័យ ធានាបាននូវសុវត្ថិភាពចំណីអាហារ សហគ្រាសសាន់នីហ្វីស ក៏កំពុងត្រៀម ទទួលបានវិញ្ញាបន័បត្រ បញ្ជាក់គុណភាពសុវត្ថិភាពពីសហភាពអឺរ៉ុប ដើម្បីនាំផលិត ផលចូលទីផ្សារសហភាពអឺរ៉ុបកាន់តែទូលំទូលាយជាងមុន។ ការណ៍ដែលអាចនាំចេញ ផលិតផលមួយចំនួន ទៅកាន់ទីផ្សារសហភាពអឺរ៉ុប ព្រោះតែផលិតផលទាំងនេះ ធានា នូវសុវត្ថិភាពចំណីអាហារ និងគ្មានផ្ទុកសារធាតុគីមី ហើយក្រៅពីនេះសហគ្រាសក៏ បាន ជួយលើកកម្ពស់ជីវភាពប្រជានេសាទ និងផ្តល់ឱកាសការងារដល់ប្រជាពលរដ្ឋ បានប្រាក់ចំណូលទ្រទ្រង់ជីវភាពគ្រួសារល្អប្រសើរជាងមុន ។លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទ បានមានប្រសាសន៍ថា ការនាំទៅកាន់ទីផ្សារអូស្ត្រាលី សម្រាប់ផលិតផល ជលផលកែច្នៃ របស់សិប្បកម្មសាន់នីហ្វីសនេះ គឺជាជោគជ័យមួយរបស់កម្ពុជា ក្នុងការ ខិតខំលើកកម្ពស់គុណភាព សុវត្ថិភាពផលិតផលខ្មែរ ឲ្យមានលក្ខណៈស្ដង់ដារ និង មានការប្រកួតប្រជែង ជាមួយប្រទេសជិតខាង និងក្នុងតំបន់ ក្នុងការនាំផលិតផលខ្មែរ ទៅកាន់ទីផ្សារអន្តរជាតិ ។ជាមួយនេះលោកជំទាវ បានបញ្ជាក់ថា ក្រសួងកសិកម្ម នឹងបន្តនៅជាមួយសហ គ្រាស និងសិប្បកម្មកែច្នៃផលនេសាទ ដែលទទួលបានគម្រោង CAPFISH-Capture បើទោះបីជាគម្រោងនេះ នឹងបញ្ចប់នៅចុងឆ្នាំ២០២៥ ដើម្បីពង្រឹងនូវគុណភាពបន្ថែម ទៀត ក្នុងការនាំផលិតផលជលផលខ្មែរទៅកាន់ទីផ្សារអន្តរជាតិ ឲ្យបានកាន់តែច្រើន៕អត្ថបទ បាន សុខរិទ្ធិ

ជប៉ុនសាទរចំពោះលទ្ធផលកិច្ចប្រជុំ GBC កម្ពុជា-ថៃ ហើយសង្ឃឹមភាគីទាំងពីបន្តគោរពតាមកិច្ចព្រមព្រៀងបទឈប់បាញ់ធ្វើឱ្យភាពតានតឹងនឹងត្រូវបានបន្ធូរបន្ថយដោយសន្តិវិធី

ភ្នំពេញ៖ប្រទេសជប៉ុនសាទរចំពោះលទ្ធផលកិច្ចប្រជុំ GBC កម្ពុជា-ថៃ ហើយសង្ឃឹមភាគីទាំងពីបន្តគោរពតាមកិច្ចព្រមព្រៀងបទឈប់បាញ់ធ្វើឱ្យភាពតានតឹងនឹងត្រូវបានបន្ធូរបន្ថយដោយសន្តិវិធី។ នេះបើតាមសេសេចក្តីថ្លែងការណ៍របស់អ្នកនាំពាក្យក្រសួងការបរទេស លោក គីតាមឹរ៉ា តូស៊ីហ៊ីរូ បន្ទាប់ពី កិច្ចប្រជុំគណៈកម្មាធិការព្រំដែនទូទៅ GBC ដោយប្រទេសកម្ពុជា និងថៃ នៅថ្ងៃទី១០ ខែកញ្ញានេះ។ អ្នកនាំពាក្យក្រសួងការបរទេស បានលើកឡើងថា រដ្ឋាភិបាលជប៉ុនសូមចូលរួមសាទរដែលប្រទេសកម្ពុជា និងថៃបានបើកកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ នៅថ្ងៃទី១០ ខែកញ្ញា ជាមួយនឹងវឌ្ឍនភាពនៃកិច្ចពិភាក្សាទាក់ទងនឹង ការបង្កើតក្រុមអ្នកសង្កេតការណ៍អាស៊ាន ការដោះមីន និងការបើកឡើងវិញនូវដឹកជញ្ជូនតាមច្រកព្រំដែនដែលនេះបង្ហាញពីលទ្ធផលដ៏សំខាន់ដើម្បីជំរុញការអនុវត្តនូវកិច្ចព្រមព្រៀងបទឈប់បាញ់រវាងប្រទេសទាំងពីរ។អ្នកនាំពាក្យក្រសួងការបរទេស បញ្ជាក់ថា រដ្ឋាភិបាលជប៉ុន វាយតំលៃខ្ពស់ ចំពោះកិច្ចខិតខំប្រឹងប្រែងការទូតរបស់គ្រប់ភាគីពាក់ព័ន្ធក្នុងការរៀបចំកិច្ចប្រជុំគណៈកម្មាធិការព្រំដែនទូទៅនេះ រួមទាំងប្រទេសម៉ាឡេស៊ី ដែលបានសម្របសម្រួលយ៉ាងសកម្មក្នុងការជំរុញការអនុវត្តនូវកិច្ចព្រមព្រៀងបទឈប់បាញ់ ក្នុងនាមជាប្រធានអាស៊ាន។អ្នកនាំពាក្យក្រសួងការបរទេស បានបន្ថែមថា រដ្ឋាភិបាលជប៉ុនសង្ឈឹមថា ប្រទេសកម្ពុជា និងថៃនឹងបន្តគោរពតាមកិច្ចព្រមព្រៀងបទឈប់បាញ់ ហើយភាពតានតឹងរវាងប្រទេសទាំងពីរនឹងត្រូវបានបន្ធូរបន្ថយដោយសន្តិវិធី តាមរយៈការសន្ទនា ដោយជប៉ុនបានចាត់ទុកថាកិច្ចសហប្រតិបត្តិការល្អរវាងប្រទេសទាំងពីរពិតជាមានសារៈសំខាន់ខ្លាំងណាស់សម្រាប់សន្តិភាពនិងការអភិវឌ្ឍន៍ក្នុងតំបន់។ ជប៉ុននឹងបន្តខិតខំប្រឹងប្រែង ដើម្បីជំរុញការអនុវត្តយ៉ាងប្រាកដប្រជានូវកិច្ចព្រមព្រៀងបទឈប់បាញ់ និងបន្ថយភាពតានតឹងដោយសម្របសម្រួលជាមួយប្រទេសពាក់ព័ន្ធ៕

កម្ពុជា ចិន ចុះអនុស្សារណៈ ជំរុញការនាំចេញបន្លែ ផ្លែឈើកម្ពុជាទៅចិន ក្នុងទំហំទឹកប្រាក់ ៣០លានដុល្លារ

ភ្នំពេញ ៖ នារសៀលថ្ងៃពុធ ទី១០ ខែកញ្ញា ឆ្នាំ២០២៥ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអនុញ្ញាតជូន ឯកឧត្តម Zheng Haiyang អភិបាលរងខេត្តហឺណាន នៃសាធារណរដ្ឋប្រជាមានិតចិន និងគណៈប្រតិភូ ចូលជួបសម្តែងការគួរសម និងពិភាក្សាការងារអំពីការពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងព្រះរាជាណាចក្រកម្ពុជា និងខេត្តហឺណាន និងពិធីចុះអនុស្សារណៈនៃការយោគយល់គ្នារវាងក្រុមហ៊ុនចិន និងកម្ពុជា ក្នុងគោលបំណងនាំចេញផលិតផលកសិកម្មកម្ពុជា។ជាកិច្ចចាប់ផ្តើម លោកជំទាវរដ្ឋមន្រ្តី បានសម្តែងនូវការស្វាគមន៍ និងថ្លែងអំណរគុណចំពោះ ឯកឧត្តម Zheng Haiyang អភិបាលរងខេត្តហឺណាន ដែលចូលជួបសម្តែងការគួរសម និងពិភាក្សាការងារអំពីការពង្រឹង និងលើកកម្ពស់កិច្ចសហប្រតិការវាងកម្ពុជា-ចិនឱ្យកាន់តែស៊ីជម្រៅលើវិស័យពាណិជ្ជកម្ម និងសេដ្ឋកិច្ច ក្នុងទិសដៅពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងព្រះរាជាណាចក្រកម្ពុជា និងខេត្តហឺណាន ជាពិសេសលើការនាំចេញផលិតផលកសិកម្មកម្ពុជាទៅកាន់ទីផ្សារប្រទេសចិន។ជាមួយគ្នានេះ លោកជំទាវរដ្ឋមន្ត្រី បានបង្ហាញអំពីការគាំទ្រ និងលើកទឹកចិត្តឱ្យវិនិយោគិនចិន មកបណ្តាក់ទុនធ្វើប្រតិបត្តិការអាជីវកម្មឱ្យកាន់តែច្រើនឡើងបន្ថែមទៀតនៅកម្ពុជា៕

ការអភិវឌ្ឍសេដ្ឋកិច្ចចក្រានៅកម្ពុជាលើកកម្ពស់ការចូលរួមឆ្ពោះទៅកម្ពុជាមានភាពស្អាត ភាពបៃតង និងចីរភាព

«ការអភិវឌ្ឍសេដ្ឋកិច្ចចក្រានៅកម្ពុជា គឺជាការឆ្លើយតបសំខាន់ ដល់យុទ្ធសាស្រ្តចក្រាវិស័យបរិស្ថាន ដែលបាននិងកំពុងអនុវត្តផង និងការបោះជំហានទៅរកភាពស្អាត ភាពបៃតង ឱ្យកាន់តែល្អប្រសើរ ដែលអាចឱ្យយើងរួមគ្នា សម្រេចបានចីរភាពតរៀងទៅ» ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន មានប្រសាសន៍ដូចនេះ នៅក្នុងក្នុងឱកាសអញ្ជើញជាអធិបតី បើកវេទិកាសេដ្ឋកិច្ចចក្រាកម្ពុជា ឆ្នាំ២០២៥ ដែលរៀបចំឡើងក្រោមប្រធានបទ៖ ផែនទីបង្ហាញផ្លូវឆ្ពោះទៅរកភាពស្អាត ភាពបៃតង និងចីភាពកម្ពុជា ចាប់ពីថ្ងៃទី១០-១២ ខែកញ្ញា ឆ្នាំ២០២៥ នៅនៅរាជធានីភ្នំពេញ។ វេទិកាខាងលើនេះ រៀបចំឡើងដោយក្រសួងបរិស្ថាន និងទីភ្នាក់ងារអាល្លឺម៉ង់ សម្រាប់កិច្ចសហប្រតិបត្តិការអន្តរជាតិ(GIZ) និងទទួលបានការអញ្ជើញចូលរួមពី លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ឯកឧត្តម កែវ អូម៉ាលីស្ស រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងស្ថានទូតអាល្លឺម៉ង់ប្រចាំកម្ពុជា ថ្នាក់ដឹកនាំតំណាងក្រសួង ស្ថាប័ន រដ្ឋបាលថ្នាក់ក្រោមជាតិ ផ្នែកឯកជន អ្នកស្រាវជ្រាវ អង្គការសង្គមស៊ីវិល ដៃគូអភិវឌ្ឍន៍ តំណាងសហគមន៍ ភ្ញៀវជាតិនិងអន្តរជាតិជាច្រើ់ននាក់។ ឯកឧត្តមរដ្ឋមន្រ្តី បានថ្លែងថា វេទិកានាថ្ងៃនេះ បានបង្កើតភាពជាដៃគូបន្ថែមទៀត ក្នុងការពង្រឹងការប្តេជ្ញាចិត្ត ការបង្កើតគំរូការងារ ប្រកបដោយចីរភាព ក្នុងការគ្រប់គ្រងសំរាម សំណល់ប្លាស្ទិកឱ្យបានត្រឹមត្រូវ ពង្រឹងការគ្រប់គ្រងធនធានធម្មជាតិ ជំរុញការបណ្តុះ ចែកកូនឈើ ការដាំស្តារព្រៃឈើ ដើម្បីបង្កើនភាពបៃតង ការរលើកកម្ពស់ជីវភាពសហគមន៍ ក្នុងគោលដៅអភិវឌ្ឍន៍ដោយចីរភាព។ ឯកឧត្តមបណ្ឌិត អ៊ាង សុផល្លែត បានថ្លែងកោតសរសើរ ចំពោះការការចូលរួម និងការខិតខំប្រឹងប្រែងពីអ្នកពាក់ព័ន្ធទាំងអស់ ជាពិសេសពី សិស្សានុសិស្ស លោកគ្រូ អ្នកគ្រូ អាជ្ញាធរមូលដ្ឋានគ្រប់ថ្នាក់ និងប្រជាពលរដ្ឋ ក្នុងការអនុវត្តយុទ្ធនាការនានា របស់ក្រសួងបរិស្ថាន នាពេលកន្លងមក ក្នុងនោះភាពស្អាត បានចាប់ផ្តើមពីក្នុងខ្លួន ភាពស្អាតនៅក្រៅខ្លួន និងភាពស្អាតរបស់កម្ពុជា នៅលើឆាកអន្តរជាតិ។ក្នុងឱកាសនេះដែរ ឯកឧត្តមរដ្ឋមន្រ្តីក្រសួងបរិស្ថាន បានថ្លែងសង្កត់ធ្ងន់លើវិស័យបរិស្ថាន និងធនធានធម្មជាតិ ដែលជាវិស័យអាទិភាពមួយ របស់រាជរដ្ឋាភិបាលកម្ពុជា។ រាជរដ្ឋាភិបាល នីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចកម្ពុជា បានផ្តល់ការគាំទ្រឱ្យដាក់ចេញយុទ្ធសាស្រ្តចក្រាវិស័យបរិស្ថាន ដែលមានសសរស្តម្ភបឺ គឺ ភាពស្អាត ភាពបៃតង និងចីរភាព ស្របតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ដោយមានបេសសកម្ម និងការប្តេជ្ញាចិត្តរបស់រាជរដ្ឋាភិបាលក្នុងវិស័យបរិស្ថាន ដើម្បីឆ្លើយតបទៅនឹងបំណងប្រាថ្នា របស់ប្រជាពលរដ្ឋទូទៅសំដៅឈានឆ្ពោះទៅកាន់ ការអភិវឌ្ឍប្រកបដោយចីរភាព។ សូមបញ្ជាក់ថា វេទិកាសេដ្ឋកិច្ចចក្រាកម្ពុជាឆ្នាំ២០២៥ នេះត្រូវបានរៀបចំឱ្យមានបទបង្ហាញ និងការចូលរួមពិភាក្សាគ្នាលើអាទិភាពសំខាន់ចំនួន៣៖ ទី១) វិស័យកសិម្មក្នុងបរិបទសេដ្ឋកិច្ចចក្រា៖ ការចែករំលែកបទពិសោធ និងគំនិតច្នៃប្រឌិតនៃការកែច្នៃសំណល់កសិកម្មទៅជាគុណតម្លៃបន្ថែមសម្រាប់ កាសសេដ្ឋកិច្ច ដូចជាតាមរយៈការកែច្នៃសំណល់កសិកម្មទៅជាជីវឥន្ធនៈ ឬជីវម៉ាស ការគិតគូរអំពីការប្រែប្រួលអាកាសធាតុដែលបញ្ចេញពីវិស័យកសិកម្ម និងគិតគូរអំពីខ្សែសង្វាក់ផលិតកម្មដែលអាចកាត់បន្ថយសំណល់កសិកម្ម សំណល់ប្លាស្ទិកកសិកម្ម ឬបម្លែងទៅជាគុណតម្លៃផ្សេងៗទី២) គោលនយោបាយ ការអនុវត្តផែនការគ្រប់គ្រងសំណល់រឹងតាមបែបសេដ្ឋកិច្ចចក្រា៖ ជំរុញការអនុវត្តអាទិភាព និងសរសរស្តម្ភដែលមានចែងក្នុងយុទ្ធសាស្រ្តចក្រាវិស័យបរិស្ថាន ២០២៣ - ២០២៨ គឺ ភាពស្អាត ភាពបៃតង និងនិរន្តរភាព។ និងទី៣) ពាណិជ្ជកម្ម ឧស្សាហកម្ម ទេសចរណ៍ និងយេនឌ័រ៖ ការគិតគូរវិស័យបរិស្ថាន និងការគ្រប់គ្រងសំណល់រឹងនឹងត្រូវបានបញ្ជ្រាប ទៅក្នុងខ្សែចង្វាក់ផលិតកម្ម ក្នុងវិស័យពាក់ព័ន្ធ និងមានទំនាក់ទំនងគ្នា៕

ពលរដ្ឋជាង ៣០០គ្រួសារ នៅឃុំពង្រ ស្រុកចុងកាល់ ចាប់ឆ្នោតជ្រើសដីឡូត៍លំនៅឋាន និងដីឡូត៍កសិកម្ម គម្រោង LASED III

ឧត្តរមានជ័យ៖ ប្រជាពលរដ្ឋចំនួន ៣៣៣គ្រួសារ នៅឃុំពង្រ ស្រុកចុងកាល់ ចូលរួមចាប់ឆ្នោតជ្រើសដីឡូត៍លំនៅឋាន និងដីឡូត៍កសិកម្ម ក្រោមកម្មវិធីសម្បទានដីសង្គមកិច្ចថ្នាក់មូលដ្ឋានរបស់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III)។ពិធីនេះបានប្រព្រឹត្តទៅក្រោមអធិបតីភាព ឯកឧត្តម សូ ខនឫទ្ធីគុណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការដឹកនាំគម្រោង LESED III តំណាង ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់, ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ និងឯកឧត្ដម ប្រធានក្រុមប្រឹក្សាខេត្ត ដែលពិធីនេះប្រព្រឹត្តធ្វើឡើងនៅបរិវេណ សាលាស្រុកចុងកាល់ នាព្រឹកថ្ងៃទី១០ ខែកញ្ញាឆ្នាំ ២០២៥ នេះ។ ឯកឧត្ដម មាន ចាន់យ៉ាដា បានលើកឡើងថា ពិធីចាប់ឆ្នោតនេះមិនត្រឹមតែជាការបែងចែកដីធ្លីធម្មតានោះទេ ប៉ុន្តែជាជំហានដ៏សំខាន់មួយក្នុងការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាដីធ្លី និងកាត់បន្ថយភាពក្រីក្រ។ គោលបំណងចម្បង នៃកម្មវិធីនេះគឺដើម្បីផ្តល់ឱកាសឱ្យប្រជាពលរដ្ឋមានដីសម្រាប់សង់លំនៅឋាន និងដីសម្រាប់បង្កបង្កើនផល ដើម្បីលើកកម្ពស់ជីវភាពរស់នៅរបស់ពួកគេប្រកបដោយនិរន្តរភាព។ ជាមួយគ្នានោះ ឯកឧត្ដម សូ ខនឫទ្ធីគុណ បានគូសបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាល និងក្រសួងពាក់ព័ន្ធ ក្នុងការរៀបចំដីសម្បទានសង្គមកិច្ចនេះឡើង ក្នុងគោលដៅធានាថាប្រជាពលរដ្ឋគ្រប់រូបមានសុវត្ថិភាពដីធ្លី និងអាចកសាងអនាគតដ៏ល្អប្រសើរ។ ឯកឧត្តមក៏បានថ្លែងអំណរគុណចំពោះរដ្ឋបាលខេត្ត និងក្រុមការងារគ្រប់លំដាប់ថ្នាក់ ដែលបានខិតខំប្រឹងប្រែងសម្របសម្រួលដំណើរការគម្រោងនេះប្រកបដោយតម្លាភាព និងប្រសិទ្ធភាព។ ឯកឧត្ដម សូ ខនឫទ្ធីគុណ បានបន្តថា កន្លងមកគណៈកម្មាធិការគម្រោង LASED III បានអនុវត្តការងារជាច្រើនដោយយកចិត្តទុកដាក់ខ្ពស់ រាប់ចាប់ពីការធ្វើជំរឿនដល់ប្រជាពលរដ្ឋដែលគ្មានដីធ្លីពិតប្រាកដ រហូតដល់ការជ្រើសរើសទីតាំងដីសម្បទាន និងរៀបចំហេដ្ឋារចនាសម្ព័ន្ធចាំបាច់។ ដំណើរការទាំងនេះត្រូវបានធ្វើឡើងប្រកបដោយតម្លាភាព និងយុត្តិធម៌ ដើម្បីធានាថាប្រជាពលរដ្ឋដែលត្រូវបានជ្រើសរើស គឺជាក្រុមគោលដៅពិតប្រាកដរបស់រាជរដ្ឋាភិបាល។អត្ថបទ៖ ឃិន សារិទ្ធ

ឯកឧត្តមរដ្ឋមន្រ្តី ចាយ បូរិន និងមន្រី្តរាជការក្រោមឱវាទក្រសួងធម្មការ អញ្ជើញកាន់បិណ្ឌវេនទី៣ នៅវត្តបទុមវតីរាជវរារាម

ភ្នំពេញ ៖ នាព្រឹកថ្ងៃទី១០ ខែកញ្ញា ឆ្នាំ២០២៥ ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា និងលោកជំទាវ សូ ភត្រ្តា ចាយបូរិន ព្រមទាំងលោកជំទាវ ករុណាសិរីសុវឌ្ឍិនី លុយ គន្ធី អគ្គមហាឧបាសិកាពុទ្ធសាសនូបត្ថម្ភក៍ , ឯកឧត្តម តេជាតិរ័ក្ខសិរីរ័ត សូ ជុងហូរ មហាឧបាសកពុទ្ធសាសនូបត្ថម្ភក៍ និងលោកជំទាវ ក្រុមគ្រួសារ រួមជាមួយមន្រ្តីរាជការក្រោមឱវាទ អញ្ជើញកាន់បិណ្ឌវេនទី៣ នៅវត្តបទុមវតីរាជវរារាម ខណ្ឌដូនពេញ រាជធានីភ្នំពេញ។គោរពតាមគន្លងប្រពៃណីព្រះពុទ្ធសាសនា ឯកឧត្តមរដ្ឋមន្រ្តី ចាយ បូរិន និងលោកជំទាវ ករុណាសិរីសុវឌ្ឍិនី លុយ គន្ធី អគ្គមហាឧបាសិកាពុទ្ធសាសនូបត្ថម្ភក៍ ព្រមទាំងក្រុមគ្រួសារ បានអញ្ជើញអុជទៀនធូប ប្រគេនគន្ធពិដោរ ថ្វាយបង្គំព្រះពុទ្ធបដិមា និងសម្តេចព្រះពុទ្ធជ័យមុនីបណ្ឌិត ឃឹម សន សម្តេចព្រះសង្ឃនាយករងទី៣ និងជាព្រះគ្រូសូត្រស្តាំ និងថេរានុថេរគ្រប់ព្រះអង្គ ដែលគង់ក្នុងវត្តបទុមវតីរាជវរារាម ព្រមសមាទានសីល រម្លឹកដល់គុណបុណ្យព្រះរតនៈត្រៃយ៍ព្រះពុទ្ធសាសនា ពិសេសរម្លឹកដល់ព្រះសម្មាសម្ពុទ្ធព្រះបរមគ្រូនៃយើង ដែលព្រះអង្គបានត្រាស់ដឹងនូវអនុត្តរៈសម្មាសម្ពុទ្ធធិញាណ និងព្រះធម៌វិន័យដ៏វិសេសវិសាល បន្សល់ទុកឱ្យពុទ្ធបរិស័ទគ្រប់ជំនាន់ បានគោរពប្រតិបត្តិជាដ៏រាបរៀងមក។ពិធីបុណ្យកាន់បិណ្ឌ-ភ្ជុំបិណ្ឌ គឺជាពិធីបុណ្យ ដែលមានរយៈពេលវែងជាងគេរហូតដល់ ១៥ថ្ងៃជារៀងរាល់ឆ្នាំ ដែលបងប្អូនកូនចៅ សាច់ញាតិនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេស ឪពុកម្ដាយ នៅស្រុកកំណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតិការទាំង៧សណ្តាន រួមមាន មាតា បិតា ជីដូន ជីតា បងប្អូនកូនចៅ គ្រូឧជ្ឈាយាចារ្យ បុព្វការីជន-បុព្វបុរសជាតិ និងបងប្អូនជនរួមជាតិទាំងឡាយ ដែលបានលាចាកលោកនេះទៅកាន់លោកខាងមុខ ហើយនោះសូមអញ្ជើញមកទទួលយកផល្លានិសង្ឃបានគ្រប់ៗគ្នា។ លោកជំទាវ ករុណាសិរីសុវឌ្ឍិនី លុយ គន្ធី អគ្គមហាឧបាសិកាពុទ្ធសាសនូបត្ថម្ភក៍ ដែលជាមាតាបង្កើតនិងជាម្តាយក្មេក ឯកឧត្តម រដ្ឋមន្រ្តី ចាយ បូរិននិង លោកជំទាវ ព្រមទាំងក្រុមគ្រួសារ រួមជាមួយមន្រ្តីរាជការក្រោមឱវាទ នៃក្រសួងធម្មការនិងសាសនា បានប្រគេនយាគូ រាប់បាត្រ និងវេរភត្តាហារ និមន្តព្រះសង្ឃ ដារបង្សុកូលពហូឆ្លង ដើម្បីជាកិច្ចឧទ្ទិសមនុញ្ញផល មហាកុសលផលបុណ្យជូនចំពោះឧកញ៉ា មហាសប្បុរសធម្មសិរីញាណ ចាយ ស៊ាងអ៊ី អគ្គមហាឧបាសកពុទ្ធសាសនូបត្ថម្ភក៍ ដែលត្រូវជាឪពុកបង្កើត ឯកឧត្តមរដ្ឋមន្រ្តី ចាយ បូរិន និងញាតិកាទាំង៧សន្តាន ព្រមទាំងសូមឧទ្ទិសកុសលផលបុណ្យជូនចំពោះវិញ្ញាណក្ខន្ធវីរៈកងទ័ពដ៏អង់អាចក្លាហានដែលបានពលីក្នុងបុព្វហេតុជាតិ ការពារបូរណភាពទឹកដី ក្នុងអំឡុងពេលនៃជម្លោះព្រំដែន កម្ពុជា-ថៃ សូមបានទៅកាន់លោកខាងមុខសូមជួបតែសេចក្តីស្ងប់ក្នុងសុខគតិភពជារៀងរហូត។ តាមរយៈពិធីកាន់បិណ្ឌនេះ ឯកឧត្តមរដ្ឋមន្រ្តី និងលោកជំទាវ សូមជូនមហាកុសលផលបុណ្យ ជូនដល់ថ្នាក់ដឹកនាំ មន្រ្តីរាជការទាំងអស់ ដែលកំពុងបំពេញភារកិច្ចរៀងៗខ្លួនយ៉ាងសស្រាក់សស្រាំ ក្នុងការអភិរក្ស ការពារ និងអភិវឌ្ឍន៍ព្រះពុទ្ធសាសនា និងរក្សាភាពសុខដុនីយកម្មសាសនាផ្សេងៗនៅទូទាំងព្រះរាជាណាចក្រកម្ពុជា ព្រមទាំងក្រុមគ្រួសារ ញាតិមិត្ត សូមទទួលបាននូវសុខភាពល្អបរិបូណ៍ កម្លាំងមាំមួន ប្រាជ្ញាឈ្លាសវៃ ជោគជ័យគ្រប់ភារកិច្ចការងារ និងរកទទួលទានបានដ៏ល្អប្រពៃ ក្នុងសន្តិភាពដ៏ល្អផូរផង់នៃយើងទាំងអស់គ្នា។អត្ថបទ រដ្ឋា

តំណាងប្រជាពលរដ្ឋក្នុងខេត្តស្វាយរៀងគាំទ្រគោលនយោបាយរាជរដ្ឋាភិបាលក្នុងការដោះស្រាយបញ្ហាព្រំដែនជាមួយថៃ

ស្វាយរៀង ៖ តំណាងប្រជាពលរដ្ឋក្នុងខេត្តស្វាយរៀង បានបង្ហាញការគាំទ្រចំពោះយន្តការដោះស្រាយបញ្ហាព្រំ ដែនរបស់ថ្នាក់ដឹកនាំរាជរដ្ឋាភិបាល តាមរយៈការអត់ធ្មត់ និងគោរពកិច្ចព្រមព្រៀងបទឈប់បាញ់យ៉ាង ខ្ជាប់ខ្ជួនដើម្បីបញ្ចៀសការប៉ះទង្គិចគ្នាដោយអាវុធសារជាថ្មីទៀត ដែលនាំឱ្យបាត់បង់អាយុជីវិតមនុស្ស។មន្ត្រីក្រុមប្រឹក្សាសង្កាត់ស្វាយរៀង ក្រុងស្វាយរៀង តំណាងឱ្យពលរដ្ឋ បានប្រកាសគាំទ្រយ៉ាង ពេញទំហឹងចំពោះរាជរដ្ឋាភិបាល ក្នុងការដោះស្រាយជម្លោះព្រំដែនកម្ពុជា-ថៃដោយសន្តិវិធី ព្រោះការប្រើ ប្រាស់កម្លាំងប្រដាប់អាវុធមិនមែនជាក្ដីប្រាថ្នាចង់បានរបស់ប្រជាពលរដ្ឋកម្ពុជា ដែលស្រលាញ់សុខសន្តិ ភាពនោះឡើយ ។ឆ្លៀតក្នុងឱកាសនេះដែរ ប្រជាពលរដ្ឋកម្ពុជា ក៏បន្តអំពាវនាវដល់សហគមន៍អន្តរជាតិ ឱ្យជួយអន្ត រាគមន៍សារជាថ្មីឱ្យភាគីថៃ ធ្វើការដោះលែងវីរយុទ្ធជនកម្ពុជា១៨រូប ដែលភាគីថៃបានចាប់ទៅដោយខុស ច្បាប់ រំលោភលើបទឈប់បាញ់ ឱ្យមកភាគីកម្ពុជាវិញ ដោយឥតលក្ខខណ្ឌ ៕ អត្ថបទ៖ ភា សារិត

បណ្ដាញសង្គម

ព័ត៌មានថ្មីៗ

កសិករបង់ក្លាដែសជួបការលំបាកហិរញ្ញវត្ថុ ស្របពេលវិបត្តិអ៊ីរ៉ង់បង្កឲ្យមានវិបត្តិប្រេងឥន្ធនៈ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ

របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz

ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់

ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ

អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ

ចក្រភពអង់គ្លេសបានដាក់ពង្រាយយោធា ដើម្បីរារាំងនាវាមុជទឹករុស្ស៊ីកុំឲ្យចូលដែនទឹករបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877