BTV NEWS

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

ក្រុមប្រឹក្សាធម្មនុញ្ញប្រារព្ធពិធីសូត្រមន្តចម្រើនសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

ខែមីនា ឆ្នាំ២០២៦នេះ កម្ពុជាទទួលបានការចុះបញ្ជីតាមប្រព័ន្ធ CamDX មានទុនវិនិយោគ ២៩៤ លានដុល្លារ

ក្រុមការងារអន្តរក្រសួងចុះពិនិត្យផ្ទៀងផ្ទាត់ទីតាំងត្រៀមរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅថ្ងៃទី១១ ខែមេសានេះ ក្រោមអធិបតីភាពសម្ដេចធិបតី

ព័ត៌មានជាតិ

ឧបនាយករដ្ឋមន្ត្រី ប្រាក់ សុខុន អនុញ្ញាតជូនឯកអគ្គរដ្ឋទូតបារាំងប្រចាំកម្ពុជា ចូលជួបសម្តែងការគួរសម និងពិភាក្សាការងារ

ភ្នំពេញ៖ នៅព្រឹកថ្ងៃទី១០ ខែកញ្ញា ឆ្នាំ២០២៥នេះ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ អនុញ្ញាតជូនឯកឧត្តម Olivier RICHARD ឯកអគ្គរដ្ឋទូតសាធារណរដ្ឋបារាំង ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅទីស្តីការក្រសួងការបរទេស រាជធានីភ្នំពេញ។

ក្រសួងការងារនឹងបន្តបើកកិច្ចប្រជុំប្រាក់ឈ្នួលអប្បបរមាត្រីភាគី លើកទី៣ នៅព្រឹកថ្ងៃទី១០ កញ្ញានេះ

ភ្នំពេញ៖ តាមការកំណត់ នៅព្រឹកថ្ងៃទី១០ ខែកញ្ញានេះ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរនិងកាបូប ត្រីភាគី ជាលើកទី៣ សម្រាប់ឆ្នាំ២០២៦ នៅទីស្តីការក្រសួង។សូមជំរាបជូនថា មុនចាប់ផ្តើមកិច្ចប្រជុំលើកទី៣ ត្រីភាគី រួមមាន៖ ភាគីសហជីពតំណាងកម្មករនិយោជិត, ភាគីតំណាងនិយោជក និងភាគីរដ្ឋាភិបាល ដឹកនាំដោយ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា គឺភាគីសហជីពតំណាងកម្មករនិយោជិត និងភាគីតំណាងនិយោជក បានរៀបចំកិច្ចប្រជុំផ្ទៃក្នុងសិន ថាតើគួរប្រកាន់គោលជំហរយ៉ាងដូចម្តេច ដើម្បីលើកជូនអង្គប្រជុំធំតែម្តង។គួររម្លឹកថា ឆ្លងកាត់កិច្ចប្រជុំចរចាប្រាក់ឈ្នួលអប្បបរមា លើកទី២កន្លងទៅ ភាគីសហជីពតំណាងឱ្យកម្មករនិយោជិត បានស្នើសុំតម្លើងចំនួន ១០ដុល្លារ បន្ថែមលើប្រាក់ឈ្នួលបច្ចុប្បន្ន។ ដោយឡែក ភាគីនិយោជក បានស្នើសុំរក្សាប្រាក់ឈ្នួលអប្បបរមានៅដដែល គឺចំនួន ២០៨ដុល្លារអាម៉េរិក។

ប្រធានធនាគារ CEXIM សន្យាជួយជំរុញវិនិយោគិនចិន ពិនិត្យលទ្ធភាពមកបណ្ដាក់ទុននៅកម្ពុជា

ប្រធានធនាគារ CEXIM សន្យានឹងជំរុញបន្ថែម ដល់វិនិយោគិនចិន ពិនិត្យលទ្ធភាពមកបណ្ដាក់ទុននៅកម្ពុជា ស្របតាម ចក្ខុវិស័យរបស់ថ្នាក់ដឹកនាំទាំងពីរ និងការសម្រេចថ្មីៗនេះ នៅក្នុងកិច្ចប្រជុំអង្គការកិច្ចសហប្រតិបត្តិការសៀងហៃបូក នឹងបន្តជំរុញដល់ ក្រុមហ៊ុនចិនដែលទទួលបានគម្រោងវិនិយោគរួចរាល់ បន្តអនុវត្តឱ្យបានលទ្ធផលល្អប្រសើរ។លោក ឈិន ហួយអ៊ី (Chen Huaiyu) ប្រធានធនាគារនាំចេញ-នាំចូលចិន (CEXIM) នៅខេត្តហ្វូជៀន សាធារណរដ្ឋប្រជា មានិតចិន ក្នុងជំនួបពិភាក្សាអំពីការវិនិយោគរបស់ក្រុមហ៊ុនចិននៅកម្ពុជា ជាមួយឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៩ ខែកញ្ញា ឆ្នាំ២០២៥នេះ, លោកថ្លែងនូវការកោតសរសើរយ៉ាងជ្រាលជ្រៅ ចំពោះសុន្ទរកថាគន្លឹះរបស់ឯកឧត្តមឧបនាយករដ្ឋមន្រ្តី ថ្លែងក្នុងវេទិកាខ្សែក្រវាត់ និងផ្លូវ សម្រាប់ការផ្លាស់ប្តូរកិច្ចសហប្រតិបត្តិការវិនិយោគ អន្តរជាតិ ពិសេសកម្ពុជាបានបង្ហាញឧទាហរណ៍ជាក់ស្ដែង អំពីភាពរីកចម្រើនតាមរយៈគំនិតផ្ដួចផ្ដើមនេះ។ សុន្ទរកថាគន្លឹះនេះបាន ជួយពង្រឹងទំនុកចិត្តដល់ការវិនិយោគរបស់ក្រុមហ៊ុនចិននៅកម្ពុជា និងចំពោះធនាគារ CEXIM ផងដែរ។ លោក ឈិន ហួយអ៊ី បានលើកឡើងអំពីកិច្ចសហប្រតិបត្តិការ និងការវិនិយោគនានាដែលធនាគារ CEXIM បានគាំទ្រដល់ វិនិយោគិនចិន ដើម្បីបណ្ដាក់ទុនវិនិយោគនៅកម្ពុជាមានជាអាទិ៍ គម្រោងព្រែកជីកហ្វូណនតេជោជាដើម។ ក្នុងនាមជាប្រធានធនាគារ លោកក៏បានសន្យានឹងជំរុញបន្ថែមទៀត ឱ្យវិនិយោគិនចិនពិនិត្យលទ្ធភាពមកបណ្ដាក់ទុននៅកម្ពុជា ស្របតាមចក្ខុវិស័យរបស់ថ្នាក់ ដឹកនាំទាំងពីរ និងការសម្រេចថ្មីៗនេះ នៅក្នុងកិច្ចប្រជុំអង្គការកិច្ចសហប្រតិបត្តិការ សៀងហៃបូក (SCO Plus 2025)។ បន្ថែមពីនេះ លោកក៏នឹងជំរុញឱ្យក្រុមហ៊ុនចិន ដែលទទួលបានគម្រោងវិនិយោគរួចរាល់ បន្តអនុវត្តឱ្យបានលទ្ធផលល្អប្រសើរ ស្របតាមផែនការ ដែលបានកំណត់។ជាការឆ្លើយតប ឯកឧត្តមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅ ចំពោះក្រសួងពាណិជ្ជកម្មចិន, ធនាគារ CEXIM, គណៈកម្មាធិការជាតិអភិវឌ្ឍន៍ និងកំណែទម្រង់ចិន (NDRC), និងទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិន (CIDCA) ចំពោះការគាំទ្រដល់គម្រោងអភិវឌ្ឍន៍របស់កម្ពុជា ពិសេសលើវិស័យហេដ្ឋារចនាសម្ព័ន្ធ។ ជាការពិតក្នុងគម្រោងអភិវឌ្ឍន៍ ផ្លូវជាតិប្រវែងប្រមាណជាង ៣០០០ គីឡូម៉ែត្រ និងស្ពានធំៗចំនួន១៦ ដែលបានលើកឡើងក្នុងសុន្ទរកថា ក៏មានការគាំទ្រពីធនាគារ CEXIM ផងដែរ។ ឯកឧត្តមឧបនាយករដ្ឋមន្ត្រី បានជម្រាបជូនអំពីវឌ្ឍនភាពថ្មីៗ និងផែនការបន្ទាប់ ចំពោះគម្រោងព្រែកជីកហ្វូណនតេជោ និង ភាពរីកចម្រើនរបស់តំបន់សេដ្ឋកិច្ចពិសេសក្រុងព្រះសីហនុ ដែលជានិច្ចកាលឯកឧត្តម តែងលើកទឹកចិត្ត ឱ្យវិនិយោគិនចិនទៅបណ្ដាក់ ទុនវិនិយោគនៅទីនោះ។ ថ្មីៗនេះឯកឧត្តមក៏បានជំរុញឱ្យក្រុមហ៊ុន BYD វិនិយោគ បង្កើតរោងចក្រដំឡើងរថយន្តរបស់ខ្លួន នៅក្នុងតំបន់សេដ្ឋកិច្ចពិសេសនោះផងដែរ កាលពីខែវិច្ឆិកា ឆ្នាំ២០២៤កន្លងទៅ៕ អត្ថបទ៖ សុន រ៉ាឌី

ប្រតិភូក្រុមសភាជាតិកម្ពុជា នៃអ្នកនយោបាយសភាស្រ្តី អញ្ជើញចុះសួរសុខទុក្ខវីរកងទ័ព ដែលកំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប

លោកជំទាវ ឡោក ខេង ប្រធានគណៈកម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណកម្មការទី៨) និងជាប្រធានក្រុមសភាជាតិកម្ពុជា នៃអ្នកនយោបាយសភាស្រ្តី តំណាងដ៏ខ្ពង់ខ្ពស់របស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នារសៀលថ្ងៃទី៩ ខែកញ្ញា ឆ្នាំ២០២៥ បានអញ្ជើញជួបសំណេះសំណាល និងសាកសួរសុខទុក្ខវីរកងទ័ពរងរបួសនៅសមរភូមិជួរមុខ ដែរកំពុងសម្រាកព្យាបាលជម្ងឺចំនួន ១៦នាក់ នៅមន្ទីពេទ្យបង្អែកខេត្តសៀមរាប។ លោកជំទាវ ឡោក ខេង បាននាំនូវការផ្តាំផ្ញើរសាកសួរសុខទុក្ខពីសំណាក់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់បងប្អូនទាំងអស់ដោយក្តីនឹករលឹក និងការគិតគូរដល់បងប្អូនកងទ័ពគ្រប់ពលវេលា។ ឆ្លៀតក្នុងឱកាសនោះដែរ លោកជំទាវ ព្រមទាំងប្រតិភូទាំងអស់ បានជូនពរឱ្យវីរយុទ្ធជនមានសុខភាពល្អ និងឆាប់ជាសះស្បើយ ដើម្បីបានទៅបម្រើជាតិមាតុភូមិ ។ ជាមួយគ្នានេះ លោកជំទាវ ឡោក ខេង បានបញ្ជាក់ពីទឹកចិត្តគោរពកោតសរសើរ និងដឹងគុណដល់វីរភាពកងទ័ព ដែលបានតស៊ូ លះបង់សាច់ស្រស់ ឈាមស្រស់ ដើម្បីបុព្វហេតុការពារបូរណភាព និងសេចក្តីសុខ សន្តិភាពជូនជាតិ និងប្រជាជន ព្រមទាំងសម្តែងនូវអំណរគុណក្រុមគ្រូពេទ្យ និងបុគ្គលិកសុខាភិបាលទាំងអស់ ដែលបាននិងកំពុងបំពេញតួនាទីជាកងទ័ពអាវសជួរក្រោយ ដោយឈរលើសាមគ្គីភាពជាធ្លុងមួយ យកចិត្តទុកដាក់មិនរាថយ បម្រើការថែទាំព្យាបាលអ្នកជំងឺគ្រប់ស្ថានការណ៍ ប្រកបដោយវិជ្ជាជីវៈ និងសេចក្តីស្រឡាញ់។ ក្នុងឱកាសនោះ លោកជំទាវ ឡោក ខេង បាននាំយកថវិកាផ្តល់ជូនដល់វីរកងទ័ពដែលរបួសចំនួន ១៦នាក់ ក្នុងម្នាក់ៗទទួលបានថវិកាចំនួន ១ លានរៀល និងក្រមា១ ដោយក្នុងនោះ ថវិកាសម្តេចមហារដ្ឋសភាធិការធិបតី ប្រធានរដ្ឋសភា ចំនួន ២០ម៉ឺនរៀល ក្នុងមួយនាក់ ថវិកាក្រុមសភាជាតិកម្ពុជា នៃអ្នកនយោបាយសភាស្រ្តី ចំនួន ២០ម៉ឺនរៀល ថវិកាគណៈកម្មការទី៤ ចំនួន ២០ម៉ឺនរៀល ថវិកាគណៈកម្មការទី៨ ចំនួន ២០ម៉ឺនរៀល និងថវិកាគណៈកម្មការទី៩ ចំនួន ២០ម៉ឺនរៀល។ ដោយឡែកសម្រាប់មន្ទីរពេទ្យខេត្តសៀមរាប ទទួលបានថវិកាចំនួន ៤លានរៀល ក្នុងនោះថវិកាសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ចំនួន ២លានរៀល ថវិកាក្រុមសភាជាតិកម្ពុជា នៃអ្នកនយោបាយសភាស្រ្តី ចំនួន ៥០ម៉ឺនរៀល ថវិកាគណៈកម្មការទី៤ ចំនួន ៥០ម៉ឺនរៀល ថវិកាគណៈកម្មការទី៨ ចំនួន ៥០ម៉ឺនរៀល និងថវិកាគណៈកម្មការទី៩ ចំនួន ៥០ម៉ឺនរៀល ៕

កាកបាទក្រហមអន្តរជាតិ៖ កងទ័ពកម្ពុជា១៨នាក់ ដែលថៃចាប់ទៅ គឺមានសុវត្ថិភាព និងមានសុខភាពល្អទាំងអស់គ្នា

លោក Jurg Montani ប្រធានគណៈប្រតិភូថ្នាក់តំបន់ នៃគណៈកម្មាធិការកាកបាទក្រហមអន្តរជាតិ បាន ឲ្យដឹងថា កងទ័ពកម្ពុជាទាំង១៨នាក់ ដែលថៃចាប់ទៅដោយខុសច្បាប់នោះ ពួកគេមានសុវត្ថិភាពល្អ និង សុខភាពល្អធម្មតាទាំងអស់គ្នា។យោងតាមផេកផ្លូវការរបស់ក្រសួងការពារជាតិ បានឲ្យដឹងថា នៅថ្ងៃទី៩ ខែកញ្ញា ឆ្នាំ២០២៥នេះ ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ បានជួបពិភាក្សាជាមួយលោក Jurg Montani ប្រធានគណៈប្រតិភូថ្នាក់តំបន់ នៃគណៈកម្មាធិការកាកបាទក្រហមអន្តរជាតិ ហើយក្នុងកិច្ចជំនួបនោះ ភាគីកាកបាទក្រហមអន្តរជាតិ បានចែករំលែកនូវព័ត៌មានអំពីការចុះសួរសុខទុក្ខជាលើកទី២ដល់នាយទាហានទាំង ១៨រូបរបស់កម្ពុជា ដែលថៃចាប់ទៅ កាលពីថ្ងៃទី២៩ ខែកក្កដា ឆ្នាំ២០២៥ ក្រោយបទឈប់បាញ់ចូលជាធរមាន។ ចំពោះការចុះសួរសុខទុក្ខលើកទី២ពីសំណាក់គណៈកម្មាធិការកាកបាទក្រហមអន្តរជាតិ (ICRC)នោះ បានទទួលព័ត៌មានថា «ទាហានយើងទាំង ១៨រូប នៃកងយោធពលខេមរភូមិន្ទ ដែលកំពុងស្ថិតក្រោមការឃុំគ្រងរបស់ភាគីថៃនោះ គឺមានសុវត្ថិភាព និងមានសុខភាពល្អទាំងអស់គ្នា»។នៅក្នុងកិច្ចជំនួបនោះលោក Jurg Montani បានបញ្ជាក់ដែរថា ក្រុមការងារគណៈកម្មាធិការកាកបាទក្រហមអន្តរជាតិ បានប្រគល់សារដំណឹងគ្រួសារ ដែលកាកបាទក្រហមកម្ពុជាទទួលបានពីភរិយា បងប្អូន និងកូនៗរបស់ពួកគាត់ទាំង១៨នាក់ ហើយពួកគាត់ទាំង១៨នាក់ក៏បានសរសេរសារតបត្រឡប់មកវិញ ដោយស្របតាមអនុសញ្ញាទីក្រុងហ្សឺណែវ។ លោកមានប្រសាសន៍សង្កត់ធ្ងន់ថា «សារដំណឹងគ្រួសារនេះ មិនមាននរណាម្នាក់ដឹងពីខ្លឹមសារនៅក្នុងលិខិតក្រៅពីសាមីខ្លួន និងក្រុមគ្រួសារតែប៉ុណ្ណោះ សូម្បីតែមន្ត្រីបុគ្គលិករបស់កាកបាទក្រហមកម្ពុជា ក៏មិនអាចដឹងបានដែរ ព្រោះនេះជាការសម្ងាត់។ ដោយឡែកពាក់ព័ន្ធជាមួយរូបភាពវីរយុទ្ធជន គឺយើងមិនអាចបញ្ចេញរូបភាពបានទេ គឺស្របទៅតាមច្បាប់មនុស្សធម៌អន្តរជាតិ»។សូមគូសបញ្ជាក់ផងដែរថា រាជរដ្ឋាភិបាលកម្ពុជា បាននឹងកំពុងធ្វើការយ៉ាងសក្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងកងកម្លាំងរបស់យើងទាំង១៨នាក់នោះ វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព។ រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ។ទាក់ទងនឹងយោធាកម្ពុជា១៨នាក់ ដែលថៃចាប់ទៅដោយខុសច្បាប់នេះដែរ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក៏បានផ្ដល់អាទិភាពខ្ពស់បំផុត លើការធានាឱ្យមានការដោះលែង និងធ្វើមាតុភូមិនិវត្តន៍ របស់កងទ័ពកម្ពុជាទាំង១៨រូប ដែលកងកម្លាំងថៃបានឃុំខ្លួន បន្ទាប់ពីបទឈប់បាញ់ ថ្ងៃទី២៨ ខែកក្កដា ឆ្នាំ២០២៥ផងដែរ ។ ដោយសម្តេចធិបតី បានណែនាំដោយផ្ទាល់ដល់ស្ថាប័នរបស់រាជរដ្ឋាភិបាល ក្នុងការរិះរកគ្រប់មធ្យោបាយដែលអាចធ្វើទៅបានតាមទ្វេភាគី តំបន់ និង អន្តរជាតិ ដើម្បីធានានូវការវិលត្រឡប់មកវិញយ៉ាងឆាប់រហ័សនៃកងទ័ពទាំងនោះ ដោយសង្កត់ធ្ងន់ថា «សុខុមាលភាពរបស់កងទ័ពដែលត្រូវបានឃុំខ្លួន គឺជាបញ្ហានៃសេចក្ដីថ្លៃថ្នូររបស់ជាតិ និងជាកង្វល់ផ្នែក មនុស្សធម៌ជាបន្ទាន់»៕អត្ថបទបាបនចក់

គណៈកម្មការទី១ នៃរដ្ឋសភា នាំយកអំណោយជូនប្រជាពលរដ្ឋ នៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ

ឯកឧត្តម សរ ចំរុង ប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងអធិការកិច្ច នៃរដ្ឋសភា (គណៈកម្មការទី១) នាព្រឹកថ្ងៃទី៩ ខែកញ្ញា ឆ្នាំ២០២៥ នៅសាលាខេត្តបន្ទាយមានជ័យ បានអញ្ជើញដឹកនាំគណៈប្រតិភូគណៈកម្មការទី១ នៃរដ្ឋសភា ជួបសំណេះសំណាលជាមួយអាជ្ញាធរខេត្តបន្ទាយមានជ័យនិងនាំយកអំណោយជូនប្រជាពលរដ្ឋដែលរងគ្រោះដោយទាហានសៀមរាយបន្លាលួសព័ទ្ធយកភូមិដ្ឋានរបស់ពួកគាត់ មិនឱ្យពលរដ្ឋចូលផ្ទះវិញ ស្ថិតនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយមានការអញ្ជើញចូលរួមពីសំណាក់ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ។ឯកឧត្តម អ៊ុំ រាត្រី បានធ្វើសេចក្តីរាយការណ៍អំពីស្ថានភាពទូទៅ ជូនគណៈប្រតិភូ បានជ្រាបថា នៅភូមិជោគជ័យ និងភូមិព្រៃចាន់ ច្រកព្រំដែនជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវបានយោធាថៃដេញប្រជាពលរដ្ឋកម្ពុជាចេញពីលំនៅដ្ឋាន និងដាក់បន្លាលួស មិនឱ្យពលរដ្ឋចូលផ្ទះវិញ ចាប់ពីថ្ងៃ១២ សីហាមក។ ក្នុងចំណោមពលរដ្ឋខ្មែរដែលថៃដេញចេញពីលំនៅដ្ឋាននេះ គឺមានជនពិការ ៤នាក់ ស្ត្រីមានផ្ទៃពោះ ២នាក់ និងកុមារ ៦នាក់ផងដែរ។ ឯកឧត្តម អភិបាលខេត្ត បានឲ្យដឹងដែរថា ក្រោយពីបានលុកលុយចូលទឹកដីកម្ពុជា នៅខេត្តបន្ទាយមានជ័យហើយ កងទ័ពថៃ ក៏បានសង់ទីស្នាក់ការរបស់ខ្លួន ដែលនេះជាសកម្មភាពរំលោភបំពាន ម្ដងហើយម្ដងទៀត របស់យោធាថៃ។ ឯកឧត្តម ក៏ជំរុញឱ្យភាគីថៃ រើចេញជាបន្ទាន់នូវបន្លាលួស និងកង់ឡាន ដែលបានដាក់ ពង្រាយខុសច្បាប់នៅលើទឹកដីកម្ពុជា ព្រមទាំងទាមទារឱ្យថៃត្រូវធានាការប្រគល់មកវិញ នូវទ្រព្យសម្បត្តិ និងដីស្រែចម្ការជាកម្មសិទ្ធិរបស់ពលរដ្ឋកម្ពុជា ដែលពួកគេបានបំពាន និងកាន់កាប់។ ជាមួយគ្នានេះ ក៏បានអំពាវនាវឱ្យថៃ បញ្ឈប់ការលុកលុយ ការកាន់កាប់ដោយខុសច្បាប់ និងដករាល់កម្លាំងយោធា និងសម្ភាររបស់ខ្លួន ទៅទីតាំងដែលកំណត់ដោយច្បាប់។ បន្ទាប់ពីបានស្តាប់របាយការណ៍របស់ខេត្តរួចមក ឯកឧត្តម សរ ចំរុង បានថ្លែងអំណរគុណ និងកោតសរសើរចំពោះរដ្ឋបាលខេត្ត ដែលជានិច្ចកាលបានយកចិត្តទុកដាក់ក្នុងការបម្រើសេវា និងខិតខំដោះស្រាយរាល់ការលំបាកជូនប្រជាពលរដ្ឋ ដោយឈរលើគោលការណ៍ និងភាពសុខដុមរមនា។ ឯកឧត្តម ប្រធាន ក៏បាននាំនូវការផ្តាំផ្ញើសាកសួរសុខទុក្ខពីសំណាក់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នូវសេចក្តីនឹករលឹក និងការគិតគូរដល់បងប្អូនប្រជាពលរដ្ឋគ្រប់ពលវេលា។ ឆ្លៀតក្នុងឱកាសនោះ ឯកឧត្តម បានប្រគល់នូវសម្ភារប្រើប្រាស់ជូនប្រជាពលរដ្ឋរងគ្រោះ ដោយក្នុងមួយគ្រួសារទទួលបាន ៖ ភួយចំនួន១ ក្រមាចំនួន១ ត្រីងៀត និងសាច់ក្រក ព្រមទាំងថវិកាចំនួន ២០០.០០០ រៀល៕

សិប្បកម្មមួយនៅកំពង់ធំ គ្រោងពង្រីកការកែច្នៃផលនេសាទពីត្រឹម៤តោនក្នុង១ឆ្នាំ ទៅ៣០តោន ស្របនឹងសម្ទុះគាំទ្រសព្វថ្ងៃ

កំពង់ធំ៖ សិប្បកម្មកែច្នៃផលនេសាទ ចាវ សួស្តី ស្ថិតនៅភូមិជីមាស ឃុំម្សាក្រង ស្រុកស្ទោង ខេត្តកំពង់ធំ ដែលផលិតប្រហុកម្សៅ គ្រោងពង្រីកការកៃច្នៃផលនេសាទ ដែលមួយឆ្នាំត្រឹម ៣ ទៅ៤តោន ឈានទៅដល់ ២០ ទៅ៣០តោន ស្របនឹងសម្ទុះគាំទ្រយ៉ាងខ្លាំង ពីប្រជាពលរដ្ឋខ្មែរនាពេលបច្ចុប្បន្ន ហើយបានពហិការមិនប្រើប្រាស់ផលិតផលមកពីប្រទេសថៃនោះ។ការពង្រីកទំហំនៃផលិតកម្មនេះ ព្រោះមានការជួយជ្រោមជ្រែង ពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) របស់សហភាពអ៊ឺរ៉ុប (EU) អនុវត្តដោយអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) និងកម្មវិធីហិរញ្ញវត្ថុគាំទ្រការវិនិយោគ (ISF) នេះបើតាមការឲ្យដឹងរបស់លោក ចាវ សួស្ដី ស្ថាបនិកសិប្បកម្មកែច្នៃផលនេសាទ ។លោកបានឲ្យដឹងថា សិប្បកម្មកែច្នៃជលផល ចាវ សួស្តី បានចាប់ផ្តើមនៅក្នុងឆ្នាំ២០២១ ដោយផលិតប្រហុកម្សៅ ប្រើប្រាស់ផលិតផលក្នុងស្រុក ទាំងគ្រឿងផ្សំ និងរសជាតិធានានូវអនាម័យ និងគុណភាពសុវត្ថិភាព ដោយទទួលបានការគាំទ្រសម្ភារបរិក្ខា តាមរយៈកម្មវិធី ISFហើយ CAPFISH-Capture គាំទ្រជំនួយបច្ចេកទេស លើការរៀបចំផែនការអាជីវកម្ម ការបណ្តុះបណ្តាលស្តីពីមូលដ្ឋានសុវត្ថិភាពម្ហូបអាហារ ការបង្វឹកដល់សហគ្រាស និងបុគ្គលិករបស់សិប្បកម្ម រួមទាំងដៃគូអាជីវកម្ម។លោកបានបន្តថា ផលិតកម្មប្រហុកម្សៅ បានប្រើប្រាស់ផលិតផលក្នុងស្រុក ផលិតពីត្រីឆ្តោផ្អាប់ជាមួយអំបិល ម្សៅអង្ករលីង ឬអង្ករលីងបន្ទំទុកក្នុងពាងខាប់ជាច្រើនខែ ដោយប្រហុកម្សៅនេះ មានក្លិនឈួលមុត រសជាតិឆ្ងាញ់ដិតជាប់អណ្តាត។ វត្ថុធាតុដើមសម្រាប់ផលិត គឺបានប្រមូលទិញត្រីពីអ្នកនេសាទ និងវារីវប្បករក្នុងស្រុក ហើយប្រហុកម្សៅមណ្ឌល មានម្សៅត្រីប្រម៉ា និងផលិតផលប្រហុក ជាផលិតផលស្នូលរបស់សិប្បកម្មកែច្នៃផលនេសាទ ។លោក ចាវ សួស្តី បានបន្ថែមថា ប្រហុកចាវសួស្តី បានកែច្នៃពីត្រីរ៉ស់ ត្រីឆ្តោ ត្រីប្រម៉ា និងកូនត្រីតូចៗ ចែកចាយតាមទីផ្សារមានតម្លៃទាប និងមធ្យមក្នុងស្រុក ហើយមានដៃគូចែកចាយតាមបណ្តាខេត្តចំនួន ៣០កន្លែង និងកំពុងរៀបចំចុះបញ្ជី ដើម្បីផ្គត់ផ្គង់ចូលទីផ្សារទំនើប និងអតិថិជននៅក្រៅប្រទេស ហើយមួយខែៗអាចរកចំណូលបាន ៣ទៅ៤ពាន់ដុល្លារផងដែរ។ តែទន្ទឹមនិងមានការគាំទ្រខ្លាំងនេះ សិប្បកម្មក៏បាននិងកំពុងប្រឈម ចំពោះការខ្វះខាតហេដ្ឋារចនាសម្ព័ន្ធ ដើម្បីកែលម្អ និងពង្រីកចង្វាក់ផលិតកម្ម ដូចជាកន្លែងហាលសម្ងួត ម៉ាស៊ីនវេចខ្ចប់ ម៉ាស៊ីនច្រកផលិតផល ការផ្សព្វផ្សាយទីផ្សារ និងវិញ្ញាបនបត្រគុណភាព ផលិតផលជលផល (CQS) ដើម្បីឆ្ពោះការនាំចេញទៅទីផ្សារអន្តរជាតិ។លោកបានបញ្ជាក់ថា ទោះបីជានៅមានការខ្វះខាតមួយចំនួន ប៉ុន្តែសិប្បកម្មនេះ កំពុងជួយបណ្ដុះបណ្ដាលដល់សិស្សជិត២០នាក់ មកពីខេត្តកំពង់ធំ និងខេត្តកំពង់ឆ្នាំង លើការងារកែច្នៃផលនេសាទនេះ ជាមួយនឹងការស្នាក់នៅ និងហូបចុកដោយឥតគិតថ្លៃ ។លោកស្រី សាន សុខរិណា មន្ត្រីជាន់ខ្ពស់ ប្រធានការិយាល័យអភិវឌ្ឍផលិតផល និងសហប្រតិបត្តិការ នៃសាជីវកម្មធានាឥណទានកម្ពុជា កម្មវិធីហិរញ្ញវត្ថុគាំទ្រការវិនិយោគ (ISF) មានគោលបំណងចម្បង ក្នុងការជំរុញ និងគាំទ្រទៅដល់សហគ្រាស ឬដៃគូអាជីវកម្មស្ថិតក្នុងវិស័យជលផល ក្រោយប្រមូលផល ដើម្បីបង្កើននូវផលិតភាពផលផលរបស់ពួកគេ ក្នុងការលើកកម្ពស់ផលិតផលឲ្យមានស្ដង់ដារ គុណភាព មានលក្ខណៈប្រកួតប្រជែង ក្នុងការត្រៀមខ្លួនចាប់យកទីផ្សារថ្មីៗ ទាំងក្នុងស្រុក និងក្រៅស្រុក ខណៈអាជីវកម្មទទួលបានផលពីកម្មវិធីនេះ ផលិតផលរបស់ពួកគេ បាននាំទៅកាន់ផ្សារទំនើប និងទៅផ្សារអន្តរជាតិ មាននៅអ៊ឺរ៉ុប អាស៊ី និងអាមេរិកជាដើម។លោកស្រីបានបញ្ជាក់ថា សម្រាប់អ្នកចង់បានកម្ចីនេះ ជាដំបូងគឺជាជនជាតិខ្មែរ ជាអាជីវកម្មជលផលក្រោយប្រមូលផល ឬអ្នកពាក់ព័ន្ធនឹងវិស័យជលផលក្រោយប្រមូលផល ការផលិតរបស់អាជីវកម្មទាំងអស់នោះ មានលក្ខណៈសុវត្ថិភាព និងមានបុគ្គលិកបម្រើការងារដោយច្រើនជាស្ត្រីជាដើម៕ អត្ថបទ បាន សុខរិទ្ធិ

រដ្ឋមន្ត្រីកសិកម្មកម្ពុជា ជូនដំណើរ រដ្ឋមន្ត្រីកសិកម្មហ្វីលីពីន បំពេញទស្សនកិច្ច សហគមន៍កសិកម្មទំនើប

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញនាំ ឯកឧត្តម Francisco P.Tiu Laurel, Jr. រដ្ឋមន្រ្តីក្រសួងកសិកម្ម នៃសាធារណរដ្ឋហ្វីលីពីន បំពេញទស្សនកិច្ចក្រុមហ៊ុន ខ្មែរហ្វ៊ូតគ្រុប និងសហគមន៍កសិកម្មទំនើបត្រាំកក់ នៅខេត្តកំពង់ស្ពឺ និងខេត្តតាកែវ នាព្រឹកថ្ងៃទី៩ ខែកញ្ញា ឆ្នាំ២០២៥ នេះ។ក្នុងដំណើរទស្សនកិច្ចនេះ ឯកឧត្តមរដ្ឋមន្រ្តីទាំងពីររូប និងគណៈប្រតិភូអមដំណើរ បានចុះត្រួតពិនិត្យរោងម៉ាស៊ីនកិនស្រូវ ភ្លក់នូវរសជាតិបាយដាំពីអង្ករកម្ពុជា និងការធ្វើបទបង្ហាញផ្តោតសំខាន់ទៅលើពូជស្រូវផ្ការំដួល សែនក្រអូប និងស្រងែជាពូជស្រូវក្នុងស្រុក ដាំដុះដោយសហគមន៍កសិកម្មទំនើបក្នុងតម្លៃតាមកិច្ចសន្យាផលិតកម្ម និងបានពិភាក្សាជាមួយតំណាងក្រុមហ៊ុនអំពីលទ្ធភាពជំរុញការនាំចេញអង្ករកម្ពុជា ទៅកាន់ទីផ្សារប្រទេសហ្វីលីពីន។ជាកិច្ចបន្ទាប់ ឯកឧត្តមរដ្ឋមន្រ្តី ឌិត ទីណា បានអញ្ជើញនាំគណៈប្រតិភូហ្វីលីពីន បន្តចុះត្រួតពិនិត្យកសិដ្ឋានបន្លែ នៃសហគមន៍កសិកម្មទំនើបត្រាំកក់ ដែលផ្តោតទៅលើផលិតកម្មដំណាំបន្លែជាច្រើនប្រភេទរួមមាន៖ បន្លែស្លឹក ខាត់ណាដើម ប៉េងប៉ោះឈើរី ។ល។ ដែលមានតម្រូវការផងដែរ។តាមរយៈដំណើរទស្សនកិច្ចនេះ ឯកឧត្តមរដ្ឋមន្ត្រី Francisco P.Tiu Laurel, Jr. បានថ្លែងអំណរគុណដល់ ឯកឧត្តមរដ្ឋមន្ត្រី ឌិត ទីណា ដែលផ្តល់ធាតុចូលសំខាន់ៗអំពីកសិផលសក្តានុពលកម្ពុជា មានគុណភាពល្អ និងរសជាតិឆ្ងាញ់ ដែលអាចនាំចូលទៅកាន់ទីផ្សារប្រទេសហ្វីលីពីន និងជំរុញកសិ-ពាណិជ្ជកម្មនៃប្រទេសទាំងពីរ៕

សម្តេចតេជោ ហ៊ុន សែន បញ្ជាក់ថា បញ្ហាជម្លោះព្រំដែនកម្ពុជាថៃ ជាជម្លោះរវាងប្រទេស និងប្រទេស មិនមែនជម្លោះព្រំដីរវាងប្រជាជននិងប្រជាជនទេ សូមមើលអោយទូលាយបន្តិច

ការបញ្ជាក់បែបនេះរបស់សម្តេចតេជោ ក្នុងសំណេរតបខមមិនក្នុងហ្វេសប៊ុករបស់សម្តេចជាមួយគណនីហ្វេសប៊ុកឈ្មោះ Chilang Pich ដែលបានខមមិនក្នុងហ្វេសប៊ុកសម្តេចតេជោដោយលើកឡើងពីបញ្ហាកងទ័ពថៃរាយបន្លាលួសនៅក្នុងដីកម្ពុជា យកដីពលរដ្ឋកម្ពុជាក្នុងភូមិសាស្ត្រខេត្តបន្ទាយមានជ័យ ចំនុចឃុំអូរបីជាន់ ខណៈដែលម្ចាស់គណនីហ្វេសប៊ុកនេះបានសរសេរថា ប្រជាពលរដ្ឋកំពុងតែពិបាកចិត្តដែលគ្មានទីលំនៅជ្រកកោន កំពុងរងចាំរាជរដ្ឋាភិបាលដោះស្រាយ តែឥលូវពួកគាត់មិនទាន់ឃើញមានយន្តការណ៍ដោះស្រាយជូនពួកគាត់ទេនោះ សម្តេចតេជោ បានបញ្ជាក់ក្នុងសំណេរតបទៅវិញថា «សូមមើលឲ្យទូលាយបន្តិចនេះមិនមែនជាជម្លោះព្រំដីរវាងប្រជាជននិងប្រជាជនទេតែជាជម្លោះរវាងប្រទេសនិងប្រទេសដែលយន្តការដោះស្រាយគឺរវាងប្រទេសនិងប្រទេស។សម្រាប់យន្តការដោះស្រាយនៅហ្នឹងកន្លែងអាជ្ញាធរមូលដ្ឋាននិងកម្លាំងប្រដាប់អាវុធរកវិធីជួយដល់ប្រជាជនតែខិតខំបញ្ចៀសកុំឲ្យកើតសង្រ្គាមឡើងវិញដែលនាំទៅដល់ការបាត់បង់ជិវិតទាំងសងខាង។» សូមបញ្ជាក់ថា ទាក់ទងបញ្ហាជម្លោះព្រំដែនកម្ពុជាថៃ ដែលមានចម្ងល់ពីប្រជាពលរដ្ឋ មានការជជែកគ្នា នៅក្នុងបណ្ដាញសង្គមលើប្រធានបទមួយចំនួន រួមទាំងការចោទនូវសំណួរមួយចំនួនដែលបង្កើតជាភាពស្រពិចស្រពិល រហូតដល់មានបុគ្គលខ្លះយកទៅធ្វើអាជីវកម្មដើម្បីកេងចំណេញនយោបាយផងនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅថ្ងៃនេះ ក៏បានបង្ហោះតាមបណ្តាញសង្គមហ្វេសប៊ុកផ្លូវការរបស់សម្តេចដោយបញ្ជាក់ដែរថា កន្លងមករាល់លទ្ធផលនៃកិច្ចប្រជុំ (រាប់ទាំងប្រជុំពិសេសថ្ងៃទី ២៨ កក្កដា, ប្រជុំវិសាមញ្ញ GBC និង RBC) សុទ្ធតែបង្ហាញជាសាធារណៈទាំងអស់។ គ្មានការលាក់បាំងទេ។ ហើយក៏គ្មាន ការចរចារសំងាត់ណាផ្សេង ក្រៅពីកិច្ចប្រជុំទាំងនោះដែរ។ ចំពោះកិច្ចការចរចារព្រំដែន កម្ពុជានៅតែប្រកាន់យកជំហរនៃការដោះស្រាយបញ្ហាព្រំដែនដោយសន្តិវិធី តាមរយៈការប្រើប្រាស់យន្តការព្រំដែនដែលមានស្រាប់ គឺគណៈកម្មការចម្រុះព្រំដែនកម្ពុជា-ថៃ (JBC) ដោយផ្អែកលើមូលដ្ឋាននៃកិច្ចព្រមព្រៀងរវាងកម្ពុជានិងថៃដែលមានជាធរមាន សន្ធិសញ្ញាពាក់ព័ន្ធ និងច្បាប់អន្តរជាតិ។ រាជរដ្ឋាភិបាលមិនដែលបោះបង់ការទទួលខុសត្រូវរបស់ខ្លួនចំពោះបងប្អូនវីរៈកងទ័ព វីរៈនគរបាលជាតិ និងប្រជាពលរដ្ឋដែលរស់នៅក្នុងតំបន់ប៉ះពាល់ដោយសារការប្រយុទ្ធគ្នា ឬមានការបំពានផ្សេងៗនោះទេ។ហេតុដូច្នេះសូមបងប្អូនប្រជាពលរដ្ឋជនរួមជាតិទាំងអស់ ជឿទុកចិត្តលើរាជរដ្ឋាភិបាលដែលបាននិងកំពុងធ្វើកិច្ចការងារយ៉ាងសកម្ម ក្នុងការស្វែងរកដំណោះស្រាយបញ្ចប់បញ្ហាអោយបានឆាប់រហ័ស ដើម្បីឧត្តមប្រយោជន៍របស់ជាតិនិងប្រជាជន បើទោះជាកិច្ចការជាច្រើនមិនត្រូវបានផ្សព្វផ្សាយជាសាធារណៈ ដែលមើលទៅហាក់ដូចជាមានភាពស្ងាត់ស្ងៀមពេកក៏ដោយ៕

កម្ពុជា នឹងធ្វើជាម្ចាស់រៀបចំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី១៣ (13th AMMDM)

ភ្នំពេញ៖ នៅថ្ងៃទី៩ ខែកញ្ញា ឆ្នាំ២០២៥ ឯកឧត្តម គីម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជាអធិបតីភាព ដឹកនាំកិច្ចប្រជុំត្រៀមរៀបចំ កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី១៣ (13th AMMDM) និងកិច្ចប្រជុំពាក់ព័ន្ធ។កិច្ចប្រជុំខាងលើបានការអញ្ជើញចូលរួមពី លោកជំទាវ សុខ ស៊ីថន អនុរដ្ឋលេខាធិការ ទីស្តីការគណៈរដ្ឋមន្ត្រី, លោកជំទាវ នេត ធីតាវិឈុណា អនុរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ, ឯកឧត្តម ក្រឹម សត្យា ប្រធាននាយកដ្ឋានពិធីការ នៃគណៈកម្មាធិការជាតិរៀបចំបុណ្យជាតិ អន្តរជាតិ, ឯកឧត្តម នាយកខុទ្ទកាល័យ ,ឯកឧត្តម អគ្គលេខាធិការរង, លោកប្រធាននាយកដ្ឋាន និងមន្ត្រីពាក់ព័ន្ធ។កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ (AMMDM) គឺជាវេទិកាសំខាន់មួយសម្រាប់រដ្ឋមន្ត្រីបណ្ដាប្រទេសជាសមាជិកអាស៊ាន ពិភាក្សាអំពីកិច្ចសហប្រតិបត្តិការក្នុងតំបន់លើវិស័យគ្រប់គ្រងគ្រោះមហន្តរាយ។ កន្លងមក កម្ពុជាធ្លាប់ទទួលធ្វើជាម្ចាស់ផ្ទះ និងភាពជាប្រធានក្នុងការរៀបចំ ដឹកនាំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ ចំនួន២លើករួចមកហើយ។គោលបំណងសំខាន់នៃកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយនេះគឺ៖– ពង្រឹងកិច្ចសហប្រតិបត្តិការ: សម្របសម្រួលនិងពង្រឹងកិច្ចសហប្រតិបត្តិការរវាងប្រទេសជាសមាជិកដើម្បីឆ្លើយតបទៅនឹងគ្រោះមហន្តរាយធម្មជាតិនិងមហន្តរាយដែលបង្កឡើងដោយមនុស្ស។– អនុវត្តផែនការការងារ: ត្រួតពិនិត្យនិងវាយតម្លៃការអនុវត្តកម្មវិធី កិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និងការឆ្លើយតបបន្ទាន់ (AADMER)។– ផ្លាស់ប្តូរបទពិសោធន៍: ចែករំលែកចំណេះដឹង បទពិសោធន៍ និងការអនុវត្តល្អៗពាក់ព័ន្ធនឹងការគ្រប់គ្រងគ្រោះមហន្តរាយដូចជា ការត្រៀមខ្លួនជាមុន ការឆ្លើយតប និងការស្តារឡើងវិញ។– កំណត់ទិសដៅទៅមុខ និងដាក់ចេញនូវគោលនយោបាយថ្មីៗ និងយុទ្ធសាស្ត្រដើម្បីបង្កើនសមត្ថភាពរបស់អាស៊ានក្នុងការទប់ទល់នឹងគ្រោះមហន្តរាយនាពេលអនាគត។កិច្ចប្រជុំ AMMDM នេះត្រូវបានប្រារព្ធធ្វើឡើងជារៀងរាល់ឆ្នាំ ដោយមានកិច្ចប្រជុំពាក់ព័ន្ធផ្សេងទៀតដូចជា កិច្ចប្រជុំ គណៈកម្មាធិការអាស៊ានស្តីពីការគ្រប់គ្រងគ្រោះមហន្តរាយ (ACDM) និងកិច្ចប្រជុំជាមួយប្រទេស ជាដៃគូសន្ទនាអាស៊ាន (ACDM Plus) ផងដែរ។ លើសពីនេះ កិច្ចប្រជុំខាងលើដើរតួនាទីយ៉ាងសំខាន់ក្នុងការជំរុញឲ្យមានការសម្របសម្រួល “អាស៊ានតែមួយ ការឆ្លើយតបតែមួយ” ដើម្បីធានាបាននូវការឆ្លើយតបប្រកបដោយប្រសិទ្ធភាពនិងទាន់ពេលវេលា នៅពេលមានគ្រោះមហន្តរាយកើតឡើងក្នុងតំបន់៕

បណ្ដាញសង្គម

ព័ត៌មានថ្មីៗ

កសិករបង់ក្លាដែសជួបការលំបាកហិរញ្ញវត្ថុ ស្របពេលវិបត្តិអ៊ីរ៉ង់បង្កឲ្យមានវិបត្តិប្រេងឥន្ធនៈ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ

របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz

ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់

ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ

អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ

ចក្រភពអង់គ្លេសបានដាក់ពង្រាយយោធា ដើម្បីរារាំងនាវាមុជទឹករុស្ស៊ីកុំឲ្យចូលដែនទឹករបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ក្រសួងការងារនឹងបន្តបើកកិច្ចប្រជុំប្រាក់ឈ្នួលអប្បបរមាត្រីភាគី លើកទី៣ នៅព្រឹកថ្ងៃទី១០ កញ្ញានេះ

ប្រធានធនាគារ CEXIM សន្យាជួយជំរុញវិនិយោគិនចិន ពិនិត្យលទ្ធភាពមកបណ្ដាក់ទុននៅកម្ពុជា

កាកបាទក្រហមអន្តរជាតិ៖ កងទ័ពកម្ពុជា១៨នាក់ ដែលថៃចាប់ទៅ គឺមានសុវត្ថិភាព និងមានសុខភាពល្អទាំងអស់គ្នា

រដ្ឋមន្ត្រីកសិកម្មកម្ពុជា ជូនដំណើរ រដ្ឋមន្ត្រីកសិកម្មហ្វីលីពីន បំពេញទស្សនកិច្ច សហគមន៍កសិកម្មទំនើប

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ក្រសួងការងារនឹងបន្តបើកកិច្ចប្រជុំប្រាក់ឈ្នួលអប្បបរមាត្រីភាគី លើកទី៣ នៅព្រឹកថ្ងៃទី១០ កញ្ញានេះ

ប្រធានធនាគារ CEXIM សន្យាជួយជំរុញវិនិយោគិនចិន ពិនិត្យលទ្ធភាព​មកបណ្ដាក់​ទុន​នៅ​កម្ពុជា

កាកបាទក្រហមអន្តរជាតិ៖ កងទ័ពកម្ពុជា១៨នាក់ ដែលថៃចាប់ទៅ គឺមានសុវត្ថិភាព និងមានសុខភាពល្អទាំងអស់គ្នា

រដ្ឋមន្ត្រីកសិកម្មកម្ពុជា ជូនដំណើរ រដ្ឋមន្ត្រីកសិកម្មហ្វីលីពីន បំពេញទស្សនកិច្ច សហគមន៍កសិកម្មទំនើប

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ប្រធានធនាគារ CEXIM សន្យាជួយជំរុញវិនិយោគិនចិន ពិនិត្យលទ្ធភាពមកបណ្ដាក់ទុននៅកម្ពុជា