BTV NEWS

រដ្ឋមន្ត្រីការបរទេសកម្ពុជា- អគ្គនាយកអង្គការយូណេស្កូ ផ្លាស់ប្តូរទស្សនៈអំពីការវិវត្តន៍ថ្មីៗពាក់ព័ន្ធនឹងស្ថានការណ៍នៅព្រំដែនកម្ពុជា-ថៃ

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

ក្រុមប្រឹក្សាធម្មនុញ្ញប្រារព្ធពិធីសូត្រមន្តចម្រើនសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

ខែមីនា ឆ្នាំ២០២៦នេះ កម្ពុជាទទួលបានការចុះបញ្ជីតាមប្រព័ន្ធ CamDX មានទុនវិនិយោគ ២៩៤ លានដុល្លារ

ព័ត៌មានជាតិ

កម្ពុជា នឹងធ្វើជាម្ចាស់រៀបចំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី១៣ (13th AMMDM)

ភ្នំពេញ៖ នៅថ្ងៃទី៩ ខែកញ្ញា ឆ្នាំ២០២៥ ឯកឧត្តម គីម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជាអធិបតីភាព ដឹកនាំកិច្ចប្រជុំត្រៀមរៀបចំ កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី១៣ (13th AMMDM) និងកិច្ចប្រជុំពាក់ព័ន្ធ។កិច្ចប្រជុំខាងលើបានការអញ្ជើញចូលរួមពី លោកជំទាវ សុខ ស៊ីថន អនុរដ្ឋលេខាធិការ ទីស្តីការគណៈរដ្ឋមន្ត្រី, លោកជំទាវ នេត ធីតាវិឈុណា អនុរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ, ឯកឧត្តម ក្រឹម សត្យា ប្រធាននាយកដ្ឋានពិធីការ នៃគណៈកម្មាធិការជាតិរៀបចំបុណ្យជាតិ អន្តរជាតិ, ឯកឧត្តម នាយកខុទ្ទកាល័យ ,ឯកឧត្តម អគ្គលេខាធិការរង, លោកប្រធាននាយកដ្ឋាន និងមន្ត្រីពាក់ព័ន្ធ។កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ (AMMDM) គឺជាវេទិកាសំខាន់មួយសម្រាប់រដ្ឋមន្ត្រីបណ្ដាប្រទេសជាសមាជិកអាស៊ាន ពិភាក្សាអំពីកិច្ចសហប្រតិបត្តិការក្នុងតំបន់លើវិស័យគ្រប់គ្រងគ្រោះមហន្តរាយ។ កន្លងមក កម្ពុជាធ្លាប់ទទួលធ្វើជាម្ចាស់ផ្ទះ និងភាពជាប្រធានក្នុងការរៀបចំ ដឹកនាំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ ចំនួន២លើករួចមកហើយ។គោលបំណងសំខាន់នៃកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយនេះគឺ៖– ពង្រឹងកិច្ចសហប្រតិបត្តិការ: សម្របសម្រួលនិងពង្រឹងកិច្ចសហប្រតិបត្តិការរវាងប្រទេសជាសមាជិកដើម្បីឆ្លើយតបទៅនឹងគ្រោះមហន្តរាយធម្មជាតិនិងមហន្តរាយដែលបង្កឡើងដោយមនុស្ស។– អនុវត្តផែនការការងារ: ត្រួតពិនិត្យនិងវាយតម្លៃការអនុវត្តកម្មវិធី កិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និងការឆ្លើយតបបន្ទាន់ (AADMER)។– ផ្លាស់ប្តូរបទពិសោធន៍: ចែករំលែកចំណេះដឹង បទពិសោធន៍ និងការអនុវត្តល្អៗពាក់ព័ន្ធនឹងការគ្រប់គ្រងគ្រោះមហន្តរាយដូចជា ការត្រៀមខ្លួនជាមុន ការឆ្លើយតប និងការស្តារឡើងវិញ។– កំណត់ទិសដៅទៅមុខ និងដាក់ចេញនូវគោលនយោបាយថ្មីៗ និងយុទ្ធសាស្ត្រដើម្បីបង្កើនសមត្ថភាពរបស់អាស៊ានក្នុងការទប់ទល់នឹងគ្រោះមហន្តរាយនាពេលអនាគត។កិច្ចប្រជុំ AMMDM នេះត្រូវបានប្រារព្ធធ្វើឡើងជារៀងរាល់ឆ្នាំ ដោយមានកិច្ចប្រជុំពាក់ព័ន្ធផ្សេងទៀតដូចជា កិច្ចប្រជុំ គណៈកម្មាធិការអាស៊ានស្តីពីការគ្រប់គ្រងគ្រោះមហន្តរាយ (ACDM) និងកិច្ចប្រជុំជាមួយប្រទេស ជាដៃគូសន្ទនាអាស៊ាន (ACDM Plus) ផងដែរ។ លើសពីនេះ កិច្ចប្រជុំខាងលើដើរតួនាទីយ៉ាងសំខាន់ក្នុងការជំរុញឲ្យមានការសម្របសម្រួល “អាស៊ានតែមួយ ការឆ្លើយតបតែមួយ” ដើម្បីធានាបាននូវការឆ្លើយតបប្រកបដោយប្រសិទ្ធភាពនិងទាន់ពេលវេលា នៅពេលមានគ្រោះមហន្តរាយកើតឡើងក្នុងតំបន់៕

សេចក្តីព្រាងរបាយការណ៍ យន្តការវេទិការាជរដ្ឋាភិបាល-ផ្នែកឯកជន គ្រោងដាក់ជូន ទីស្តីការគណៈរដ្ឋមន្ត្រី នាពេលឆាប់ខាងមុខ

សេចក្តីព្រាងរបាយការណ៍វឌ្ឍនភាពការងារ នៃយន្តការវេទិការាជរដ្ឋាភិបាល-ផ្នែកឯកជន ប្រចាំឆមាសទី១ឆ្នាំ២០២៥ ដែលក្រុមប្រឹក្សាអភិវឌ្ឍន៍កម្ពុជាបានរៀបចំឡើង និងគ្រោងដាក់ជូនទីស្តីការគណៈរដ្ឋមន្ត្រី ដើម្បីពិនិត្យ និងបន្តតាមនីតិវិធី នាពេលឆាប់ៗខាងមុខ។ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា(គ.វ.ក) និងជាប្រធានលេខាធិការដ្ឋាននៃគណៈកម្មាធិការសម្របសម្រួលការងារ នៃយន្តការវេទិការាជរដ្ឋាភិបាល-ផ្នែកឯកជន(គ.ស.រ.ជ) បានដឹកនាំកិច្ចប្រជុំអន្តរក្រសួងដើម្បីពិនិត្យពិភាក្សាលើ សេចក្តីព្រាងរបាយការណ៍ ស្តីពី វឌ្ឍនភាពការងារ ប្រចាំឆមាសទី១ ឆ្នាំ២០២៥ នៃយន្តការវេទិការាជរដ្ឋាភិបាល-ផ្នែកឯកជន។ ក្រោយពីបានស្តាប់នូវបទបង្ហាញដែលធ្វើដោយថ្នាក់ដឹកនាំ និងមន្ត្រីបច្ចេកទេស និងការចូលរួមពិភាក្សាយ៉ាងផុលផុស កិច្ចប្រជុំបានសម្តែងនូវការវាយតម្លៃខ្ពស់ និងឯកភាពទាំងស្រុងទៅលើខ្លឹមសារ នៃសេចក្តីព្រាងរបាយការណ៍វឌ្ឍនភាពការងារ នៃយន្តការវេទិការាជរដ្ឋាភិបាល-ផ្នែកឯកជន ប្រចាំឆមាសទី១ឆ្នាំ២០២៥ ដែលក្រុមប្រឹក្សាអភិវឌ្ឍន៍កម្ពុជាបានរៀបចំឡើង និងគ្រោងដាក់ជូនទីស្តីការគណៈរដ្ឋមន្ត្រី ដើម្បីពិនិត្យ និងបន្តតាមនីតិវិធី នាពេលឆាប់ៗខាងមុខ ឈានទៅដល់ការគោរពរាយការណ៍ជូនកិច្ចប្រជុំពេញអង្គគណៈរដ្ឋមន្ត្រី។កិច្ចប្រជុំនេះ ត្រូវបានរៀបចំឡើងក្នុងគោលបំណង ៖ ១. ពិនិត្យពិភាក្សាលើសេចក្តីព្រាងរបាយការណ៍ស្តីពីវឌ្ឍនភាពការងារប្រចាំឆមាសទី១ ឆ្នាំ២០២៥ ជាលើកចុងក្រោយ មុនស្នើសុំគោលការណ៍ឯកភាពដ៏ខ្ពង់ខ្ពស់ពី ឯកឧត្តមឧបនាយករដ្ឋមន្រ្តី អនុប្រធានទី១ ក.អ.ក. ក្នុងការដាក់សេចក្តីព្រាងរបាយការណ៍វឌ្ឍនភាពនេះ ជូនទីស្តីការគណៈរដ្ឋមន្រ្តីនាពេលឆាប់ៗ ខាងមុខ និង ២. ចែករម្លែកព័ត៌មានអំពីកិច្ចសហការជាមួយ CAPREDក្នុងការពន្លឿនការរៀបចំ និងដាក់ឱ្យប្រើប្រាស់សៀវភៅណែនាំស្តីពីស្តង់ដានីតិវិធី ប្រតិបត្តិ (SOP) នៃការរៀបចំនិងប្រព្រឹត្តទៅនៃយន្តការវេទិកា G-PSF, ការពន្លឿនការរៀបចំថ្នាលគ្រប់គ្រងព័ត៌មានវិទ្យា(Management Information System-MIS)ដែលអនុញ្ញាតឱ្យក្រសួងស្ថាប័នអាចរាយការណ៍វឌ្ឍនភាពនៃការអនុវត្តវិធានការក្រោមដែនសមត្ថកិច្ចរបស់ខ្លួន, និងពន្លឿនការបង្កើតគេហទំព័រសម្រាប់យន្តការ G-PSF។ គួររំលឹកថា ក្នុងការធានាបាននូវវឌ្ឍនភាពជាប្រចាំ ប្រសិទ្ធភាព និងសង្គតិភាព នៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន (G-PSF) លើកទី១៩ ព្រមទាំងការដោះស្រាយបញ្ហាជូនវិស័យឯកជន រាជរដ្ឋាភិបាលបានប្រគល់ភារកិច្ចជូនក្រុមប្រឹក្សាអភិវឌ្ឍន៍កម្ពុជាក្នុងការតាមដាន និងវាយតម្លៃលើវឌ្ឍនភាព នៃការអនុវត្តវិធានការ។ ចាប់តាំងពីការប្រគល់ភារកិច្ច របាយការណ៍វឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុង G-PSF លើកទី១៩ ចំនួន ២លើកត្រូវបានរៀបចំនិងទទួលការឯកភាពពីគណៈរដ្ឋមន្រ្តី ហើយដែលរបាយការណ៍វឌ្ឍនភាពប្រចាំឆមាសទី២ ឆ្នាំ២០២៤ បានទទួលការឯកភាពពីគណៈរដ្ឋមន្រ្តីក្នុងសម័យប្រជុំពេញអង្គ កាលពីថ្ងៃទី២៣ ខែឧសភាឆ្នាំ២០២៥ កន្លងទៅ។គួរបញ្ជាក់ថា កិច្ចប្រជុំនេះ រៀបចំនៅថ្ងៃទី៨ ខែកញ្ញា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា (ក.អ.ក) ដោយមានការអញ្ជើញចូលរួមពីសំណាក់ ឧកញ៉ាបណ្ឌិត តាន់ មុន្នីវណ្ណ អនុប្រធានសភាពាណិជ្ជកម្មកម្ពុជានិងជាអនុប្រធានចំពោះកិច្ចសម្រាប់អនុវត្តសម្របសម្រួលក្រុមការងារទាំង១៦ ផ្នែកឯកជន នៃវេទិការាជរដ្ឋាភិបាល-ផ្នែកឯកជន, តំណាងក្រសួង ស្ថាប័នពាក់ព័ន្ធជាសមាជិក គ.ស.រ.ជ., អ្នកជំនាញនៃកម្មវិធី CAPRED និងមន្ត្រីពាក់ព័ន្ធ ជាច្រើនរូប៕

ឯកឧត្តម ហ៊ុន ម៉ានី អំពាវនាវជនរួមជាតិ បន្តជឿជាក់រាជរដ្ឋាភិបាលលើការដោះស្រាយរឿងព្រំដែន និងវីរកងទ័ព

ឯកឧត្តម ហ៊ុន ម៉ានី បានអំពាវនាវដល់បងប្អូនជនរួមជាតិ សូមបន្តជឿជាក់លើថ្នាក់ដឹកនាំ ជាពិសេស រាជរដ្ឋាភិបាល ក្រោមការដឹកនាំរបស់សម្តេចធិបតី ដែលកំពុងដឹកនាំការងារលើគ្រប់សមរភូមិសំដៅបញ្ចប់ជម្លោះទាំងស្រុងដោយសន្តិវិធី និងដើម្បីវីរកងទ័ពរបស់យើងបានវិលត្រឡប់មកផ្ទះវិញដោយសុវត្ថិភាព ជួបជុំក្រុមគ្រួសារ ជាពិសេស ធ្វើឱ្យស្ថានភាពតាមតំបន់ព្រំដែនត្រលប់មករកប្រក្រតីភាពវិញ។ ការលើកឡើងដូចនេះ ធ្វើឡើងក្នុងឱកាស ឯកឧត្តម អញ្ជើញជួបសំណេះសំណាលសាកសួរទុក្ខ និងស្តាប់អ្វីដែលជាស្ថានភាពមូលដ្ឋានជាមួយគណៈកម្មការបក្សឃុំ-សង្កាត់ ជាមួយបក្សភូមិនៅឃុំរលាំងគ្រើល និងឃុំរលាំងចក ស្រុកសំរោងទង ខេត្តកំពង់ស្ពឺ។ ក្នុងឱកាសជួបសំណេះសំណាលនេះ ឯកឧត្តម ហ៊ុន ម៉ានី បានចែករំលែកនូវបច្ចុប្បន្នភាពភាពជម្លោះព្រំដែនកម្ពុជា-ថៃ ជូនទៅដល់សមាជិក សមាជិកា នៃអង្គប្រជុំ ដោយឯកឧត្តមបានលើកឡើងថា សង្រ្គាមដែលយើងបានឆ្លងកាត់កន្លងទៅថ្មីៗនេះ សរបញ្ជាក់អំពីសមត្ថភាពរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ក្នុងការការពារបូរណភាពទឹកដី និងអធិបតេយ្យជាតិ។ ឯកឧត្តម បានអំពាវនាវដល់បងប្អូនជនរួមជាតិ សូមបន្តជឿជាក់លើថ្នាក់ដឹកនាំរបស់យើង ជាពិសេស រាជរដ្ឋាភិបាល ក្រោមការដឹកនាំរបស់សម្តេចធិបតី ដែលកំពុងដឹកនាំការងារលើគ្រប់សមរភូមិសំដៅបញ្ចប់ជម្លោះទាំងស្រុងដោយសន្តិវិធី ដើម្បីវីរកងទ័ពរបស់យើងបានវិលត្រឡប់មកផ្ទះវិញដោយសុវត្ថិភាព ជួបជុំក្រុមគ្រួសារ ជាពិសេស ធ្វើឱ្យស្ថានភាពតាមតំបន់ព្រំដែនត្រលប់មករកប្រក្រតីភាពវិញ។ឯកឧត្តម បានលើកឡើងដែរថា ការផ្ទុះអាវុធរយៈពេល ៥ ថ្ងៃ នេះបានធ្វើឱ្យវីរកងទ័ពពលី និងរបួស ព្រមទាំងបំផ្លិចបំផ្លាញ ហេដ្ឋរចនាសម្ព័ន្ធ លំនៅដ្ឋាន ទ្រព្យសម្បត្តិប្រជាពលរដ្ឋ។ ដោយមានគោលការណ៍ដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលសម្រេចឱ្យរាជរដ្ឋាភិបាលទទួលបន្ទុកលើការរៀបចំបុណ្យសពជូនដំណើរវីរកងទ័ពឱ្យបានសក្តិសមប្រកបដោយកិត្តិយស។ បន្ថែមពីនេះទៀត តំណាងឱ្យសម្តេចធិបតី ឯកឧត្តម ក៏បានទៅសាកសួរសុខទុក្ខ និងជូនពរដល់ពូៗ បងៗ វីរកងទ័ពដែលកំពុងសម្រាកព្យាបាលនៅតាមបណ្តាមន្ទីរពេទ្យនានាផងដែរ។ ថ្វីត្បិតតែពួកគាត់មានរបួសពិតមែន ប៉ុន្តែទឹកចិត្តស្មារតីនិងឆន្ទៈនៅតែខ្លាំងក្លាជានិច្ចក្នុងការការពារមាតុភូមិ៕អត្ថបទ៖គឹមហុក

រដ្ឋមន្ត្រីសុខាភិបាល ជំរុញមន្រ្តីរំលឹកដល់សហភាតរៈ កំពុងបម្រើសេវាសុខាភិបាល ក្នុងវិស័យឯកជន ឱ្យចូលរួមជាមួយសេវាសាធារណៈ ក្នុងការលើកកំពស់គុណភាពសេវាថែទាំ និងព្យាបាលឱ្យបានជាប្រយោជន៍ច្រើនបំផុតដល់ប្រជាជនកម្ពុជា

ភ្នំពេញ ៖ នារសៀលថ្ងៃទី៩ ខែកញ្ញា ឆ្នាំ២០២៥ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានចែករំលែកបទពិសោធន៍នៃភាពជាអ្នកដឹកនាំ និងនវានុវត្តន៍ និងលទ្ធិសម្ភារៈនិយមវិចារវិទ្យា ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រម ក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ (Zoom) ដែលមានសមាសភាពចូលរួមសរុបចំនួន ៣,២៤២នាក់។ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានរំលេចនូវភាពចាំបាច់នៃការទទួលខុសត្រូវខ្ពស់របស់សេវាឯកជន ដើម្បីធ្វើជាដៃគូរជាមួយសេវាសាធារណៈ ក្នុងការលើកកំពស់គុណភាពសេវាថែទាំ និងព្យាបាលជូនប្រជាជន និងសំដៅទៅលើការបង្កើនភាពទាក់ទាញរបស់សេវាសុខភាពរបស់កម្ពុជា។ ឯកឧត្តមសាស្ត្រាចារ្យ ឈាង រ៉ា បានបន្តលើកយកចំនុចគន្លឺះ២បន្ថែមទៀត នៅក្នុងចំនុចគន្លឹះទាំង៨ ដែលអ្នកដឹកនាំម្នាក់ៗត្រូវបំពេញ ដើម្បីក្លាយទៅជាអ្នកដឹកនាំស្ថិតនៅក្នុងភាពសកម្ម (a leader needs to be in action)។ ចំនុចគន្លឹះបន្ថែមទាំង២ រួមមាន៖ (១)អ្នកដឹកនាំជាអ្នកមានទំនាក់ទំនងយ៉ាងល្អ(good communicator)(២)អ្នកដឹកនាំត្រូវជាអ្នកចរចារ/អ្នកសម្របសម្រួលយ៉ាងល្អ (good negotiator) ដែលជាអ្នកមានសមត្ថភាពសម្របសម្រួលក្នុងក្របខណ្ឌត្រឹមត្រូវ និងប្រកបដោយជំហរច្បាស់លាស់ ក្នុងការចរចារ ដើម្បីផលប្រយោជន៍របស់វិស័យ អង្គភាព ឬប្រជាជន។ ក្រៅពីចំនុចគន្លឺះលើភាពជាអ្នកដឹកនាំទាំងពីរខាងលើនេះ ឯកឧត្តមសាស្រ្តាចារ្យរដ្ឋមន្រី្ត បានបន្តលើកយកទ្រឺស្តី នៃការយល់ដឹងរបស់មនុស្សតាមលទ្ធិសំភារៈនិយមវិចារវិទ្យា ដោយធ្វើការបង្ហាញពី(១)សកម្មភាពរបស់មនុស្សក្នុងការកែប្រែសង្គម និងធម្មជាតិដែលបណ្តាលអោយមានវិវិត្តន៍នៃការយល់ដឹង និង (២)ទ្រឹស្តីដែលថាចំណេះដឹងរបស់មនុស្សជាតិគ្មានដែនកំណត់ ដែលនេះជាមូលដ្ឋានឱ្យមនុស្សលោក បន្តរកឃើញនូវការរកឃើញថ្មីៗ ដើម្បីបម្រើផលប្រយោជន៍ឱ្យមនុស្សលោក។ជាចុងបញ្ចប់ ដោយមានការអនុញ្ញាតពីឯកឧត្តមសាស្រ្តាចារ្យរដ្ឋមន្ត្រី នៅក្នុងសប្តាហ៍នេះមានបទបង្ហាញចំនួន២ផ្តោតលើការកាត់បន្ថយការឆ្លងរោគ គឺបទបង្ហាញមកពីមន្ទីរពេទ្យបង្អែកពញាឮ នៃមន្ទីរសុខាភិបាលនៃរដ្ឋបាលខេត្តកណ្តាល និងមកពីមន្ទីរពេទ្យបង្អែកបាទី នៃមន្ទីរសុខាភិបាលនៃរដ្ឋបាលខេត្តតាកែវ៕អត្ថបទ រដ្ឋា

ការប្រារព្ធ ទិវាអន្តរជាតិជនជាតិដើមភាគតិច ជាការយកចិត្តទុកដាក់ខ្ពស់ ពីរាជរដ្ឋាភិបាលកម្ពុជា

ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានគូសបញ្ជាក់ថា ការប្រារព្ធទិវាអន្តរជាតិជនជាតិដើមភាគតិចពិភពលោក គឺជាការបញ្ជាក់អំពីការរួមចំណែកយ៉ាងសកម្មក្នុងការលើកកម្ពស់គុណតម្លៃ នៃសីលធម៌ វប្បធម៌ ប្រពៃណីដ៏ល្អផូរផង់ រស់រវើក និងក៏ជាឱកាសក្នុងការប្រមូលផ្តុំទស្សនៈ ដែលជាគន្លឹះសម្រាប់ជួយអភិវឌ្ឍន៍ជូនបងប្អូនជនជាតិដើមភាគតិច ហើយក៏ជាសក្ខីភាពមួយបង្ហាញពីការយកចិត្តទុកដាក់ដល់បងប្អូនជនជាតិដើមភាគតិច ពីសំណាក់រាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។ការថ្លែងនេះ ធ្វើឡើងនៅថ្ងៃទី៩ ខែកញ្ញា ឆ្នាំ២០២៥ ក្នុងឱកាស ឯកឧត្ដម ឆាយ ឫទ្ធិសែន បានអញ្ជើញជាអធិបតីក្នុងពិធី អបអរសារទរទិវាអន្តរជាតិជនជាតិដើមភាគតិចពិភពលោកលើកទី៣១ និងលើកទី២១ នៅកម្ពុជាក្រោមប្រធានបទ “ការការពារសិទ្ធិ និងតម្រង់ទិសអនាគតជនជាតិដើមភាគតិចក្នុងបរិបទបរិវត្តកម្មឌីជីថល” នៅបរិវេណសួនស្ទឹងសែន ទីរួមខេត្តកំពង់ធំ។ ក្នុងឱកាសនោះ ឯកឧត្ដមរដ្ឋមន្ត្រី បានសម្ដែងសេចក្ដីសោមន្ស និងអបអរសាទរក្នុងទិវាប្រកបដោយអត្ថន័យនេះ ព្រមទាំងបានអាននូវសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងឱកាសអបអរសាទរទិវាអន្តរជាតិជនជាតិដើមភាគតិចពិភពលោកលើកទី៣១ និងលើកទី២១ នៅកម្ពុជា។ តាមរយៈសារលិខិតរបស់សម្ដេចធិបតី បានបង្ហាញថា គិតត្រឹមត្រីមាសទី៣ ឆ្នាំ២០២៥នេះ ក្រសួងអភិវឌ្ឍន៍ជនបទ បានចេញលិខិតទទួលស្គាល់អត្តសញ្ញាណសហគមន៍ជនជាតិដើមភាគតិចចំនួន ២១៣សហគមន៍ បានចុះបញ្ជីជានីតិបុគ្គលពីក្រសួងមហាផ្ទៃចំនួន ១៥៥សហគមន៍ និងបានចេញបណ្ណកម្មសិទ្ធិដីសមូហភាពចំនួន ៤២សហគមន៍ ដែលជាការសបញ្ជាក់ឱ្យឃើញថា រាជរដ្ឋាភិបាលកម្ពុជា បាន និងកំពុងចូលរួមយ៉ាងសកម្មក្នុងការងារអភិវឌ្ឍន៍ និងអភិរក្សជនជាតិដើមភាគតិច ការលើកកម្ពស់សិទ្ធិ និងការការពារឧត្តមប្រយោជន៍របស់ជនជាតិដើមភាគតិច។ គួរបញ្ជាក់ថា អង្គពិធីនេះមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ ឯកឧត្តម លោកជំទាវ ជាថ្នាក់ដឹកនាំក្រសួងអភិវឌ្ឍន៍ជនបទ និងតំណាងក្រសួងស្ថាប័នពាក់ព័ន្ធ ឯកឧត្តម នួន ផារ័ត្ន អភិបាលនៃគណៈអភិបាលខេត្ត, ឯកឧត្តម លោកជំទាវក្រុមប្រឹក្សាខេត្ត អភិបាលរងខេត្ត, តំណាងអង្គការ ដៃគូអភិវឌ្ឍន៍ ភ្ញៀវកិត្តិយសជាតិ និងអន្តរជាតិ, អាជ្ញាធរមូលដ្ឋានគ្រប់លំដាប់ថ្នាក់, លោកគ្រូ អ្នកគ្រូ យុវជន សិស្សានុសិស្ស និងបងប្អូនជនជាតិដើមភាគតិចទាំងអស់ សរុបប្រមាណជាង ៨០០នាក់៕

រដ្ឋមន្រ្តីក្រសួអបរិស្ថាន នាំយកអំណោយសម្ដេចធិបតី ចែកជូនកងទ័ព នៃបញ្ជាការដ្ឋានយោធភូមិភាគ១ នៅខេត្តស្ទឹងត្រែង

ឯកឧត្ដមបណ្ឌិត អ៊ាង សុផល្លែត រដ្ឋមន្រ្តីក្រសួអបរិស្ថាន បានដឹកនាំប្រតិភូថ្នាក់ដឹកនាំ និងមន្រ្តីរាជការក្រសួងបរិស្ថាន រួមជាមួយក្រុមហ៊ុន អាន ម៉ាឌី ហ្គ្រុប ចំការកៅស៊ូពាមជាំង រដ្ឋបាលខេត្តស្ទឹងត្រែង ចុះសួរសុខទុក្ខ និងនាំយកអំណោយ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅចែកជូនដល់កងទ័ពនៃបញ្ជាការដ្ឋានយោធភូមិភាគទី១ នៃកងយោធពលខេមរភូមិន្ទ ស្ថិតនៅក្នុងភូមិសាស្ត្រខេត្តស្ទឹងត្រែង។ឯកឧត្ដមបណ្ឌិត អ៊ាង សុផល្លែត បានមានប្រសាសន៍ថា៖ កងទ័ពជាខឿនការពារជាតិដ៏រឹងមាំ មិនអាចខ្វះបាន ក្នុងនាមសម្ព័ន្ធមេត្រីជាមួយកងទ័ព ក្រសួងបរិស្ថានរួមជាមួយក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានយកចិត្តទុកដាក់ ដល់សុខទុក្ខកងទ័ពជួរមុខ ការពារព្រំដែនជានិច្ច ទោះក្នុងកាលៈទេសណាក៏ដោយ ជាពិសេសបាននាំយកជាស្បៀង គ្រឿងឧបភោគ បរិភោគ និងសម្ភារៈប្រើប្រាស់ យកទៅជូនកងទ័ព ដែលកំពុងឈរជើងប្រយុទ្ធប្រឆាំងជាមួយសត្រូវឈ្លានពានទឹកដី ប្រកបភាពអង់អាចក្លាហាន លះបង់កម្លាំងកាយ ចិត្ត និងអាយុជីវិត ក្នុងការពារជាតិ បូរណភាពទឹកដី និងប្រជាជនកម្ពុជា។ ក្នុងឱកាសនោះឯកឧត្ដមរដ្ឋមន្រ្តី បាននាំយកប្រសាសន៍ផ្តាំសួរសុខទុក្ខ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ព្រមទាំងថ្នាក់ដឹកនាំគ្រប់ថ្នាក់ នៃរាជរដ្ឋាភិបាលកម្ពុជា និងជាពិសេសរបស់ក្រសួងបរិស្ថានផងដែរ។ ជាមួយអំណោយដថ្លៃថ្លារបស់សម្តេចធិបតី និងលោកជំទាវបណ្ឌិត ក្នុងឱកាសនោះរួមមាន អង្ករ ត្រីខ គ្រឿងឧបភោគបរិភោគជាច្រើន កុំព្យុទ័រយួរដៃ ម៉ាស៊ីនព្រីនធ័រ និងសម្ភារប្រើប្រាស់ជាច្រើនផ្សេងទៀត រួមជាមួយថវិកាមួយចំនួនផងដែរ ឯកឧត្ដមបណ្ឌិត អ៊ាង សុផល្លែត បានប្រកាសផ្តល់អំណោយដ្រូនចំនួន៥គ្រឿង ដល់បញ្ជាការដ្ឋានយោធភូមិភាគ១ នៃកងយោធពលខេមរភូមិន្ទ ដើម្បីចូលរួមពង្រឹងខឿនការពារជាតិ ជាពិសេសក្នុងការឆ្លើយតបនឹងកិច្ចសហប្រតិបត្តិការល្អ ក្នុងការទប់ស្កាត់បទល្មើសធនធានធម្មជាតិ នៅតាមតំបន់ការពារធម្មជាតិ ក្នុងភូមិខេត្តស្ទឹងត្រែងផងដែរ។ជាការឆ្លើយតប ឯកឧត្តម ឧត្តមសេនីយ៍ទោ លី សូរ៉ារិទ្ធ មេបញ្ជាការយោធភូមិភាគទី១ បានថ្លែងអំណរគុណ ដល់ការបង្កើតឱ្យមានការចងសម្ព័ន្ធមេត្រីភាពរវាងកងទ័ព ជាមួយក្រសួង ស្ថាប័ន និងវិស័យឯកជន។ សម្ព័ន្ធមេត្រីនេះ បានធ្វើឱ្យទំនាក់ទំនងរវាងអង្គភាពកងទ័ព ជាពិសេសទ័ពជួរមុខនៃយោធភូមិភាគទី១ ក្នុងខេត្តស្ទឹងត្រែង កាន់តែមានភាពមុះមុត ក្នុងការការពារជាតិមាតុភូមិ ការពារបូរណភាពទឹកដីកម្ពុជា ឱ្យបានដាច់ខាតប្តេជ្ញា ប្រឆាំងដាច់ខាតរាល់ការឈ្លានពានពីសត្រូវ គាំទ្រការដឹកនាំរបស់រាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៕

ទីស្តីការគណៈរដ្ឋមន្រ្តី ពង្រឹងចំណេះដឹង និងលទ្ធភាពប្រើប្រាស់ AI ក្នុងការងារ ដល់ថ្នាក់ដឹកនាំ និងមន្រ្តីរាជការ

ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នាព្រឹកថ្ងៃទី៩ ខែកញ្ញា ឆ្នាំ២០២៥ នេះ បានអញ្ជើញជាអធិបតីក្នុងសិក្ខាសាលាស្តីពី «មូលដ្ឋានគ្រឹះនៃបញ្ញាសិប្បនិម្មិត (AI)» ក្នុងគោលបំណងដើម្បីពង្រឹងចំណេះដឹងអំពី AI និងមានលទ្ធភាពអាចប្រើប្រាស់ AI ក្នុងការងាររបស់ខ្លួន។សិក្ខាសាលានេ មានការអញ្ជើញចូលរួមពី ឯកឧត្តម ឆែម គាតរិទ្ធី ទេសរដ្ឋមន្រ្តីទទួលបន្ទុក បេសកកម្មពិសេស ប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ (ECOSOCC) និងឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្រ្តីរាជការ នៃទីស្តីការគណៈរដ្ឋមន្រ្តី។ឯកឧត្តមឧបនាយករដ្ឋមន្រ្តីប្រចាំការ បានវាយតម្លៃខ្ពស់ ចំពោះ ECOSOCC ព្រមទាំងថ្នាក់ដឹកនាំ និងមន្ត្រីរាជការនៃទីស្តីការគណៈរដ្ឋមន្ត្រី ដែលបានរៀបចំនិងចូលរួមសិក្ខាសាលាដ៏ទូលំទូលាយនិងមានសំខាន់នេះ ស័ក្តិសមទៅនឹងបរិបទបច្ចុប្បន្ន ដែល AI កំពុងវិវត្តទៅមុខយ៉ាងលឿន និងបាននាំមកនូវការប្រែប្រួលមិនធ្លាប់មាន (Radical Transformation) នៅគ្រប់វិស័យ ទាំងក្នុងវិស័យសេដ្ឋកិច្ច សង្គម វិទ្យាសាស្ត្រ រួមទាំងវិស័យអភិបាលកិច្ចសាធារណៈ ជាពិសេសសិក្ខាសាលានេះបានឆ្លុះបញ្ចាំងពីស្មារតីបុរេសកម្ម និងឆន្ទៈរបស់ថ្នាក់ដឹកនាំនិងមន្ត្រីរាជការនៃទីស្តីការគណៈរដ្ឋមន្ត្រី ក្នុងការពង្រឹង និងលើកកម្ពស់ប្រសិទ្ធភាព ផលិតភាព និងគុណភាពការងារ ដោយប្រើប្រាស់បច្ចេកវិទ្យាថ្មីៗ ដើម្បីគាំទ្រដល់ការបំពេញមុខងារ និងតួនាទីរបស់ខ្លួនក្នុងនាមជាសេនាធិការជូននាយករដ្ឋមន្ត្រី និងគណៈរដ្ឋមន្ត្រី។ឯកឧត្តមឧបនាយករដ្ឋមន្រ្តីប្រចាំការ បានគូសបញ្ជាក់ថា ការកំណត់យកបច្ចេកវិទ្យាឌីជីថលជាចលករដ៏សំខាន់មួយក្នុងការអភិវឌ្ឍសង្គម-សេដ្ឋកិច្ចជាតិ គឺជាគំនិតផ្តួចផ្តើម ប្រកបដោយគតិបណ្ឌិត និងចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា តាមរយៈការដាក់ឱ្យអនុវត្តនូវ «ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥» និង គោលនយោបាយពាក់ព័ន្ធផ្សេងទៀត រួមមាន «គោលនយោបាយរដ្ឋាភិបាលឌីជីថលកម្ពុជា ២០២២-២០៣៥» និង គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨» ដែលបានក្លាយជាផែនទីបង្ហាញផ្លូវ ក្នុងដំណើរការនៃការធ្វើបរិវត្តកម្មឌីជីថលសម្រាប់ប្រទេសកម្ពុជា។ រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំដ៏ប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានបន្តនូវឆន្ទៈមោះមុតនេះ តាមរយៈ «យុទ្ធសាស្រ្តបញ្ចកោណ-ដំណាក់កាលទី១» ដោយក្នុងនោះ «បច្ចេកវិទ្យា» គឺជាអាទិភាពគន្លឹះមួយ ហើយ «ការអភិវឌ្ឍសេដ្ឋកិច្ច និងសង្គមឌីជីថល» ត្រូវបានកំណត់ជារបៀបវារៈថ្មីនៃគោលនយោបាយប្រទេសជាតិ។ឯកឧត្តមឧបនាយករដ្ឋមន្រ្តីប្រចាំការ បានលើកឡើងថា ទីស្តីការគណៈរដ្ឋមន្ត្រី ដែលមានមុខងាររួមចំណែកក្នុងការសម្រេចចិត្តសំខាន់ៗរបស់រាជរដ្ឋាភិបាល ជាពិសេសការសម្រេចចិត្តជាគោលនយោបាយ ជាយុទ្ធសាស្ត្រ និងការរៀបចំតាក់តែងច្បាប់ និងលិខិតបទដ្ឋានគតិយុត្តនានា ដែលកំណត់ទិសដៅនៃការកសាង និងការអភិវឌ្ឍជាតិ ការធ្វើទំនើបកម្ម និងការទាញយកផលប្រយោជន៍ពីបច្ចេកវិទ្យា គឺជាកាតព្វកិច្ចសំខាន់ ហើយទីស្តីការគណៈរដ្ឋមន្ត្រីបានដាក់ឱ្យអនុវត្តនូវ ផែនការយុទ្ធសាស្រ្តទីស្តីការគណៈរដ្ឋមន្រ្តី ឆ្នាំ២០២៤-២០២៨, ផែនទីបង្ហាញផ្លូវស្តីពីការជំរុញបរិវត្តកម្មឌីជីថលនៃទីស្តីការគណៈរដ្ឋមន្រ្តី ២០២៤-២០២៨ និងឆាប់ៗនេះក៏នឹងដាក់ចេញនូវ កម្មវិធីបរិវត្តកម្មឌីជីថលនៅទីស្ដីការគណៈរដ្ឋមន្ត្រី សម្រាប់បម្រើដល់ការអនុវត្តការងារ ព្រមទាំងមានការផ្សារភ្ជាប់នឹងការប្រើប្រាស់បច្ចេកវិទ្យាបញ្ញាសិប្បនិម្មិតផងដែរ៕

ក្រសួងការងារ អំពាវនាវឱ្យមានការយោគយល់ដល់អ្នកផ្តល់សេវាកម្ម និងម្ចាស់អាជីវកម្ម ដែលនឹងមមាញឹក ក្នុងរដូវកាលភ្ជុំបិណ្ឌ

ក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់សាធារណជនឱ្យមានការយោគយល់ និងអធ្យាស្រ័យដល់បងប្អូនកម្មករ-និយោជិត អ្នកផ្តល់សេវា និងម្ចាស់អាជីវកម្ម ប្រសិនបើមានករណីយឺតយ៉ាវ ឬខ្វះខាតដោយប្រការណាមួយ ក្នុងអំឡុងពេលបុណ្យភ្ជុំបិណ្ឌខាងមុខ។ យោតាមសេចក្តីអំពាវនាវ និងជូនព័ត៌មានរបស់ក្រសួង ចុះនៅថ្ងៃទី៨ ខែកញ្ញានេះ បានលើកឡើងថា ក្នុងពិធីបុណ្យភ្ជុំបិណ្ឌដែលនឹងខិតជិតមកដល់ បងប្អូនកម្មករ-និយោជិត ម្ចាស់អាជីវកម្ម និងប្រជាពលរដ្ឋនៅទូទាំងប្រទេសភាគច្រើន នឹងធ្វើដំណើរទៅស្រុកកំណើត ដើម្បីជួបជុំគ្រួសារ និងប្រារព្ធពិធីផ្សេងៗតាមទំនៀមទម្លាប់ ប្រពៃណី សាសនា និងមានការធ្វើដំណើរកម្សាន្តទៅកាន់រមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា ប្រកបដោយភាពសប្បាយរីករាយ។ប៉ុន្តែបងប្អូនកម្មករ-និយោជិតមួយចំនួន ដែលបម្រើការងារនៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា នឹងមានភាពមមាញឹកទ្វេដង ក្នុងការផ្តល់សេវាជូនអតិថិជន និងភ្ញៀវទេសចរជាតិ និងអន្តរជាតិ។សេចក្តីអំពាវនាវបញ្ជាក់បន្ថែមថា ក្នុងន័យនេះ ក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់បងប្អូនប្រជាពលរដ្ឋ កម្មករ-និយោជិត និងសាធារណជន ដែលបានឈប់សម្រាក និងធ្វើដំណើរកម្សាន្ត ឬទៅទទួលសេវានៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា មានការយោគយល់អធ្យាស្រ័យដល់បងប្អូនកម្មករ-និយោជិត អ្នកផ្តល់សេវា និងម្ចាស់អាជីវកម្ម ប្រសិនបើមានករណីយឺតយ៉ាវ ឬខ្វះខាតដោយប្រការណាមួយក្នុងអំឡុងពេលនេះ៕

ម្ចាស់ជ័យលាភីរង្វាន់ណូបែល ចែករំលែកពីរូបធាតុសម្រាប់អនាគត ដល់អ្នកវិទ្យាសាស្ត្រនិងនិស្សិតកម្ពុជា

ភ្នំពេញ ៖ សាស្ត្រាចារ្យ Konstantin Novoselov ម្ចាស់ជ័យលាភីរង្វាន់ណូបែលផ្នែករូបវិទ្យាឆ្នាំ២០១០ បានចែករំលែកចំណេះដឹង និង ទស្សនវិស័យនៃការស្រាវជ្រាវដ៏អស្ចារ្យរបស់លោកស្តីពី ”រូបធាតុសម្រាប់អនាគត” ជូនដល់ថ្នាក់ដឹកនាំក្រសួង-ស្ថាប័នពាក់ព័ន្ធ អ្នកវិទ្យាសាស្ត្រ និងនិស្សិតកម្ពុជា។សាស្ត្រាចារ្យ Konstantin Novoselov ជ័យលាភីរង្វាន់ណូបែលផ្នែករូបវិទ្យាឆ្នាំ២០១០ នៅថ្ងៃទី៨ ខែកញ្ញា ឆ្នាំ២០២៥ ម្សិល មិញនេះ បានចែករំលែកចំណេះដឹង និងទស្សនវិស័យនៃការស្រាវជ្រាវដ៏អស្ចារ្យរបស់លោក ខណៈដែលសាស្ត្រាចារ្យរូបនេះ ត្រូវបាន ទទួលស្គាល់ទូទាំងពិភពលោក ចំពោះតួនាទីដ៏សំខាន់របស់លោក ក្នុងការស្រាវជ្រាវអំពីរូបធាតុក្រាហ្វិន (graphene) ជាស្រទាប់តែ មួយនៃអាតូមកាបូន ដែលបាននាំមកនូវបដិវត្តន៍វិទ្យាសាស្ត្ររូបធាតុ។ ការស្រាវជ្រាវរបស់លោក បានរកឃើញលក្ខណៈសម្បត្តិដ៏អស្ចារ្យ នៃរូបធាតុដែលមានកម្លាំងដ៏ពិសេស មានភាពបត់បែន និងចរន្តអគ្គិសនីខ្ពស់ ដែលផ្តល់ក្តីសង្ឈឹមសម្រាប់ការអភិវឌ្ឍបច្ចេកវិទ្យាជំនាន់ ថ្មី នៃឧបករណ៍អេឡិចត្រូនិក ឧបករណ៍ចាប់សញ្ញាការរក្សាទុកថាមពល និងអេក្រង់ដែលអាចបត់បែនបាន។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាជាតិ វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា វត្តមានរបស់លោកសាស្ត្រាចារ្យ បានផ្តល់ជាកិត្តិយស និងការគាំទ្រដល់កម្ពុជា ក្នុង ការអភិវឌ្ឍវិស័យវិទ្យាសាស្ត្រ និងបច្ចេកវិទ្យាដ៏មានសក្តានុពលសម្រាប់សង្គមជាតិ។ ឯកឧត្តមបន្ថែមថា ប្រធានបទ “រូបធាតុសម្រាប់ អនាគត” បានឆ្លើយតបនឹងការសិក្សាស្រាវជ្រាវពាក់ព័ន្ធ នឹងរបៀបវារៈស្រាវជ្រាវជាតិ និងប្រព័ន្ធអេកូឡូស៊ីវិទ្យាសាស្ត្រ បច្ចេកវិទ្យា និង នវានុវត្តន៍ទាំងមូលរបស់កម្ពុជា។ សំណួរជាមូលដ្ឋានដែលនៅចំពោះមុខយើង មិនមែនត្រឹមតែការចង់ដឹង ចង់ឃើញ នៃរបកគំហើញ វិទ្យាសាស្ត្រប៉ុណ្ណោះទេ ប៉ុន្តែគឺការផ្ទេរចំណេះដឹងទាំងនេះ ទៅជាសារៈប្រយោជន៍ដល់ការអភិវឌ្ឍសេដ្ឋកិច្ចសង្គម និងវឌ្ឍនភាព ជាមូលដ្ឋានរួម។ ឯកឧត្តមបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡា បានលើកឡើងផងដែរថា ចំណេះដឹងដែល ទទួលបាននាពេលនេះ មិនត្រឹមតែសម្រាប់ការអភិវឌ្ឍខ្លួនឯងប៉ុណ្ណោះទេ ប៉ុន្តែក៏ជាចំណេះដឹងមួយ ដែលជាមធ្យោបាយក្នុងការត្រួស ត្រាយផ្លូវ នៃការអប់រំផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ នៅថ្ងៃក្រោយ ជាពិសេសក្នុងដំណាក់កាលដែលពិភពលោកកំពុង មានការប្រែប្រួល ខណៈការយកចិត្តទុកដាក់ទៅលើបច្ចេកវិទ្យា និងនវានុវត្តន៍ គឺជាអាទិភាពខ្ពស់របស់រាជរដ្ឋាភិបាល។សូមបញ្ជាក់ថា ជ័យលាភីរង្វាន់ណូបែលផ្នែករូបវិទ្យា ឆ្នាំ២០១០ របស់លោកសាស្រ្តាចារ្យ Konstantin Novoselov ជារូបវិទូដែលកំពុងបង្រៀន និងស្រាវជ្រាវនៅសាកលវិទ្យាល័យជាតិសិង្ហបុរី(NUS)៕អត្ថបទ៖ សុន រ៉ាឌី

ឯកអគ្គរដ្ឋទូតចិនប្រចាំកម្ពុជា អបអរសាទរយ៉ាងកក់ក្តៅចំពោះការបើកជាផ្លូវការ នៃអាកាសយានដ្ឋានអន្តរជាតិតេជោ

តាមរយៈការបង្ហោះសារលើបណ្ដាញសង្គមហ្វេសប៊ុក នៅថ្ងៃទី៩ ខែកញ្ញា ឆ្នាំ២០២៥នេះ ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានបញ្ជាក់បន្ថែមថា នេះជាព្រឹត្តិការណ៍សំខាន់មួយទៀតក្នុងការធ្វើទំនើបកម្មរបស់កម្ពុជា។ ការស្ដារភាពរស់រវើកឡើងវិញដ៏មហិមារបស់ប្រជាជាតិខ្មែរ គឺមិនអាចរារាំងបានឡើយ។ជាមួយគ្នានេះ ឯកអគ្គរដ្ឋទូតចិនប្រចាំកម្ពុជា បានលើកឡើងថា ភ្ញៀវទេសចរចិនដែលធ្វើដំណើរតាមជើងហោះហើរលើកដំបូងបន្ទាប់ពីការបើកជាផ្លូវការ នៃអាកាសយានដ្ឋានអន្តរជាតិតេជោ។ ឯកឧត្ដមជឿជាក់ថា ការបើកដំណើរការ នៃអាកាសយានដ្ឋានថ្មី និងតាមរយ: "ឆ្នាំទេសចរណ៍ចិន-កម្ពុជា" នឹងនាំឱ្យចំនួនភ្ញៀវទេសចរចិនមកកម្ពុជាកើនឡើងខ្ពស់សារជាថ្មីម្ដងទៀត៕

បណ្ដាញសង្គម

ព័ត៌មានថ្មីៗ

កសិករបង់ក្លាដែសជួបការលំបាកហិរញ្ញវត្ថុ ស្របពេលវិបត្តិអ៊ីរ៉ង់បង្កឲ្យមានវិបត្តិប្រេងឥន្ធនៈ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ

របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz

ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់

ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ

អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877