BTV NEWS

មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើការងារស្ថាបនាផ្លូវ នៅទីតាំងដីសម្បទានសង្គមកិច្ច ខេត្តឧត្តរមានជ័យ

ហ៊ុន ចាន់ បញ្ញាបុត្រ ចៅសម្តេចតេជោ ហ៊ុន សែន និស្សិតខ្មែរទី២ បញ្ចប់ការសិក្សាពីរាជបណ្ឌិតសភាយោធាសាន់ហឺស ក្នុងប្រទេសអង់គ្លេស

នាវាទេសចរណ៍ខ្នាតយក្ស VIKING VENUS នាំភ្ញៀវបរទេសជិត ៩០០ នាក់ ចូលចតនៅកំពង់ផែស្វយ័តក្រុងព្រះសីហនុ

ភ្ញៀវបរទេស ចាប់អារម្មណ៍ខ្លាំងចំពោះដំណើរកម្សាន្តនៅកម្ពុជា អំឡុងពិធីបុណ្យចូលឆ្នាំថ្មី

ព័ត៌មានជាតិ

រដ្ឋមន្ត្រីក្រសួងទេសចរណ៍ ទាក់ទាញ ក្រុមហ៊ុនទេសចរណ៍ធំវៀតណាម បង្កើនវិនិយោគនៅកម្ពុជា

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ទាក់ទាញ ប្រធានក្រុមហ៊ុន Saigontourist Group ជាក្រុមហ៊ុន ដ៏ធំ និងឈានមុខគេមួយបង្កើតឡើងជាង៥០ឆ្នាំ នៅសាធារណរដ្ឋសង្គមនិយមវៀតណាម ពិនិត្យលទ្ធភាពដាក់ទុនវិនិយោគក្នុងវិស័យទេសចរណ៍នៅកម្ពុជា។ការទាក់ទាញនេះ ធ្វើឡើងក្នុងឱកាស ឯកឧត្តម ហួត ហាក់ អនុញ្ញាតជូន លោក Pham Huy Bình ប្រធានក្រុមហ៊ុន Saigontourist Group និងសហការី អញ្ជើញចូលជួបសម្តែងការគួរសម និងពិភាក្សាការងារ ស្តីពី ការពង្រឹង និងពង្រីកកិច្ចប្រតិបត្តិការលើវិស័យទេសចរណ៍ជាមួយប្រទេសកម្ពុជា នៅសណ្ឋាគារ Rex Hotel នាទីក្រុងហូជីមិញ នាថ្ងៃទី៣ ខែកញ្ញា ឆ្នាំ២០២៥ នេះ។ក្នុងជំនួបដ៏មានសារៈសំខាន់ និងប្រកបដោយផ្លែផ្កានេះ ឯកឧត្តមរដ្ឋមន្ត្រី បានថ្លែងអំណរគុណ កោតសរសើរ និងវាយតម្លៃខ្ពស់ចំពោះការចូលរួមចំណែកដ៏សំខាន់ក្នុងវិស័យទេសចរណ៍កម្ពុជា តាមរយៈការរៀបចំកញ្ចប់ទស្សនកិច្ចនៅកម្ពុជាដល់ភ្ញៀវទេសចរវៀតណាម និងអន្តរជាតិកន្លងមក។ ឯកឧត្តមរដ្ឋមន្រ្តី ក៏បានស្នើក្រុមហ៊ុនពិនិត្យលទ្ធភាពដាក់ទុនវិនិយោគក្នុងវិស័យទេសចរណ៍នៅកម្ពុជា ដោយនាពេលបច្ចុប្បន្នរាជរដ្ឋាភិបាលកម្ពុជា បានផ្តល់នូវការលើកទឹកចិត្តជាច្រើនយ៉ាង និងអាទិភាពកដល់វិនិយោគិនបរទេសមកវិនិយោគនៅប្រទេសកម្ពុជា។ឯកឧត្តមរដ្ឋមន្ត្រី ក៏បានស្នើឱ្យជួយផ្សព្វផ្សាយយ៉ាងទូលំទូលាយ និងទប់ស្កាត់នូវព័ត៌មានក្លែងក្លាយពីកម្ពុជា ដែលកម្ពុជាជាគោលដៅមានសន្តិសុខ និងសុវត្ថិភាពល្អសម្រាប់អ្នកទេសចរ និងអ្នកវិនិយោគទាំងអស់ រួមទាំងប្រជាពលរដ្ឋនៅជុំវិញផងដែរ តួយ៉ាង ការផ្សព្វផ្សាយព័ត៌មានមិនពិតពីកម្ពុជា ដែលអាចជះឥទ្ធិពលមិនល្អពីប្រទេសកម្ពុជា ពិសេសវិស័យទេសចរណ៍ និងទំនាក់ទំនងរវាងប្រទេសម្ពុជា និងពិភពលោក ដោយកន្លងមកក្រសួង និងស្ថានទូតបរទេសប្រចាំនៅកម្ពុជាមួយចំនួន បានសហការយ៉ាងជិតស្និទ្ធិ ដើម្បីផ្តល់កិច្ចការពារ សុខសុវត្ថិភាព និងសន្តិសុខដល់អ្នកទេសចរ និងប្រជាពលរដ្ឋបរទេសកំពុងស្នាក់នៅនៅកម្ពុជា ជាពិសេសសម្របសម្រួលដល់ដំណើរកម្សាន្ត FAM Trip មកកាន់ប្រទេសកម្ពុជា ដើម្បីស្វែងយល់ពីសក្តានុពលទេសចរណ៍របស់កម្ពុជា។តាមរយៈជំនួបប្រកបដោយផ្លែផ្កា គូភាគី បានឯកភាពសហការរៀបចំដំណើរទស្សនកិច្ចឈ្វេងយល់ពីសក្តានុពលទេសចរណ៍របស់កម្ពុជា ដើម្បីសិក្សាជាមួយវិស័យឯកជនកម្ពុជារៀបចំបង្កើតកញ្ចប់ទេសចរណ៍រួមគ្នា (Joint Tour Packages) ថ្មីបន្ថែម ដែលមានលក្ខណៈទាក់ទាញ និងច្នៃប្រឌិត ជាពិសេសមានលក្ខណៈប្រកួតប្រជែង ព្រមទាំងជួយ សហការផ្សព្វផ្សាយឱ្យបានទូលំទូលាយប្រកបដោយប្រសិទ្ធិភាពទៅដល់ភ្ញៀវទេសចរវៀតណាម និងមកពីប្រទេសទីបី៕

រដ្ឋមន្រ្តីសុខាភិបាល «ជំរុញឱ្យមូលដ្ឋានសុខាភិបាលគ្រប់កម្រិត មានការស្រាវជ្រាវ ដើម្បីពិនិត្យឆ្លុះបញ្ចាំង ស្វែងរករបកគំហើញ សំដៅពង្រឹងគុណភាពក្នុងអង្គភាពខ្លួនកាន់តែប្រសើរឡើង»

ភ្នំពេញ ៖ នាព្រឹកថ្ងៃទី៤ ខែកញ្ញា ឆ្នាំ២០២៥នេះ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាអធិបតីក្នុងពិធីបើក សន្និសីទថ្នាក់ជាតិលើកទីមួយស្តីពី ទស្សនវិស័យ និងការផ្លាស់ប្តូរបទពិសោធន៍គោលនយោបាយសុខភាពសាធារណៈ (Cambodia Public Health Outlook and Policy Exchange Conference:C-HOPE2025) ក្រោមមូលបទ “ការដោះស្រាយបន្ទុកនៃជំងឺមិនឆ្លង៖ យុទ្ធសាស្ត្រថែទាំសុខភាពបឋមប្រកបដោយភាពច្នៃប្រឌិត”។សន្និសីទនេះមានគោលបំណងបង្កើតជាវេទិកាថ្នាក់ជាតិសំរាប់ការពិភាក្សារវាងភាគីពាក់ព័ន្ធពីស្ថាប័នរដ្ឋាភិបាលស្ថាប័នអប់រំ សង្គមស៊ីវិល វិស័យឯកជន និងដៃគូអភិវឌ្ឍន៍ក្នុងវិស័យសុខាភិបាល ដើម្បីឱ្យមានការពិភាក្សារួមគ្នាលើ អាទិភាពសុខាភិបាលជាតិ និងយុទ្ធសាស្ត្រកំណែទម្រង់លើគោលនយោបាយសុខភាពសាធារណៈដោយប្រើប្រាស់លទ្ធផលចេញពីការសិក្សាស្រាវជ្រាវក្នុងប្រទេសនិងតាមតំបន់។ឯកឧត្តមសាស្រ្តាចារ្យរដ្ឋមន្រ្តី បានថ្លែងថា ការបង្កើតគោលនយោបាយទាមទារការពិភាក្សារវាងភាគីពាក់ព័ន្ធដើម្បីស្វែងរកយុទ្ធសាស្រ្ត និងប្រមូលរបកគំហ៊ើញពីការសិក្សាស្រាវជ្រាវផ្សេងៗគ្នាដែលផ្តោត លើប្រធានបទតែមួយ មកធ្វើការបង្ហាញ និងពិភាក្សាគ្នានៅក្នុងកំរិតវិទ្យាសាស្រ្ត អាចរំលេចចេញនូវចំនុចខ្វះចន្លោះនៃការសិក្សាស្រាវជ្រាវ ហើយក៏អាចរកឃើញនូវដំណោះស្រាយមួយចំនួនដែលអាចជួយកែលំអ សំរួចនិងតំរង់ទិសគោលនយោបាយសុខាភិបាលជាតិឱ្យកាន់តែមានភាពប្រាកដនិយមខ្ពស់ និងចំគោលដៅ ឈានទៅជំរុញការអនុវត្តកាន់តែមានប្រសិទ្ធភាព និងសក្តិសិទ្ធិភាព។ឯកឧត្តមសាស្រ្តាចារ្យ ឈាង រ៉ា បានផ្តល់អនុសាសន៍ដល់វិទ្យាស្ថានជាតិសុខភាពសាធារណៈ និងមូលដ្ឋានសុខាភិបាលទាំងអស់ឱ្យបន្តពង្រឹងសមត្ថភាពរបស់អង្គភាព ជាពិសេសលើកិច្ចការងារស្រាវជ្រាវរបស់ខ្លួន ឱ្យមានគុណភាពខ្ពស់ និងកាន់តែឆ្លើយតបទៅនឹងអាទិភាពជាតិ ដូចខាងក្រោម÷(១) ការពង្រឹងកិច្ចសហប្រតិបត្តិការជាមួយស្ថាប័នស្រាវជ្រាវក្នុងប្រទេស និងតំបន់ ដើម្បីពង្រឹងសមត្ថភាពរបស់ស្ថាប័នក្នុងការវិភាគ សិក្សាស្រាវជ្រាវលើវិស័យសុខាភិបាល និងគាំទ្រគោលនយោបាយសុខាភិបាលជាតិ។(២) បន្តពង្រឹងការងារអភិបាលកិច្ចការងារស្រាវជ្រាវលើវិស័យសុខាភិបាល តាមរយៈការប្រមូលផ្តុំ និងចំរាញ់យកការងារស្រាវជ្រាវដែលបានធ្វើឡើងក្នុងប្រទេសកម្ពុជាផ្ទាល់ ក៏ដូចជាក្នុងតំបន់ ក្នុងការផ្លាស់ប្តូរយោបល់ ដើម្បីប្រមូលធាតុចូលសម្រាប់កែលំអរគោលនយោបាយសុខាភិបាល។(៣) បន្តបំពេញតួនាទីរបស់ខ្លួនជាសេនាធិការបច្ចេកទេសវិទ្យាសាស្រ្ត របស់ក្រសួងសុខាភិបាលលើការងារ សិក្សាស្រាវជ្រាវលើវិស័យសុខាភិបាល។(៤) ពង្រឹងតួនាទីជាលេខាធិការនៃគណៈកម្មការជាតិក្រមសីលធម៌ សំរាប់ការសិក្សាស្រាវជ្រាវលើមនុស្ស ដោយបន្តពិនិត្យ និងគ្រប់គ្រងលើការសិក្សាស្រាវជ្រាវអោយឆ្លើយតបបានច្រើនបំផុតទៅនឹង អាទិភាពនៃប្រពន្ធ័សុខាភិបាលជាតិ។(៥) ចូលរួមជួយបណ្តុះបណ្តាល និងពង្រឹងសមត្ថភាពធ្វើការសិក្សាស្រាវជ្រាវ ដល់អង្គភាពផ្សេងៗទៀត ដើម្បីពង្រីកមូលធនមនុស្សលើការងារសិក្សាស្រាវជ្រាវ ដែលជាទុនក្នុងការពង្រឹងការផ្តល់សេវា ក៏ដូចជាការធ្វើនវានុវត្តនៃការធ្វើរោគវិនិច្ឆ័យដោយផ្អែកលើមូលដ្ឋានវិទ្យាសាស្រ្ត។ឯកឧត្តមសាស្រ្តាចារ្យរដ្ឋមន្រ្តី បានគូសរំលឹកអំពីសុខភាពបឋម ដែលទាមទារការយកចិត្តទុកដាក់ខ្ពស់ រាប់ចាប់ពីកម្រិតមណ្ឌលសុខភាព ដែលជួយស្វែងរក និងការពារជំងឺមិនឆ្លងចម្បង ដូចជាលើសឈាម ទឹកនោមផ្អែក និងការវិត្តន៍ទៅជាជំងឺមហារីក បានទាន់ពេលវេលា និងការផ្តល់សេវាប្រឹក្សាបានទាន់ពេលវេលា។ ឯកឧត្តមសាស្រ្តាចារ្យ បានណែនាំដល់ថ្នាក់ដឹកនាំ ត្រូវពង្រឹងសមត្ថភាពមន្រ្តីសុខាភិបាលបន្ថែមទៀតដោយការ បណ្តុះបណ្តាល រកយន្តការនៃការជំរុញ និងការស្វែងយល់ បង្កើនមធ្យោយបាយជួយគាំទ្រ និងជួយតាមដាន ជាពិសេសការប្រើប្រាស់ Telemedicine សុខភាពឌីជីថល។ ឯកឧត្តមសាស្រ្តាចារ្យ បានណែនាំដល់មន្ទីរសុខាភិបាល ត្រូវបង្កើនការសហការជាមួយអាជ្ញាធរមូលដ្ឋាន សហគមន៍ ដោយត្រូវជួយជំរុញប្រជាពលរដ្ឋ ទៅទទួលសេវាសុខាភិបាល ឱ្យបានទាន់ពេលវេលា និងត្រូវឱ្យមានការចូលរួមពីវិស័យឯកជន ដើម្បីដើរស្របតាមគោលនយោបាយក្រសួងសុខាភិបាល។សន្និសីទនេះ រៀបចំឡើងដោយវិទ្យាស្ថានជាតិសុខភាពសាធារណ: មានការអញ្ជើញចូលរួមពីសំណាក់ភ្ញៀវកិត្តិយស ដែលមកពី មន្ទីរសុខាភិបាលរាជធានី-ខេត្ត នាយកដ្ឋាននៃក្រសួងសុខាភិបាល មជ្ឈមណ្ឌលជាតិនៃក្រសួងសុខាភិបាល មន្ទីរពេទ្យជាតិ គ្រឹះស្ថានសិក្សាលើវិស័យសុខាភិបាល អង្គភាពស្រាវជ្រាវជាតិនិងអន្តរជាតិ តំណាងស្ថានទូត និងតំណាងដៃគូសហការជាតិនិងអន្តរជាតិ ប្រមាណ២២០នាក់៕អត្ថបទ រដ្ឋា

មន្រី្តជាន់ខ្ពស់សុខាភិបាល អញ្ជើញបើកទិវាសល្យសាស្ត្រ សម្ភព និងរោគស្ត្រី លើកទី៣ស្តីពី«ការពង្រឹង និងបង្កើនសេវាព្យាបាលថែទាំសង្រ្គោះប្រកបដោយគុណភាព»

ភ្នំពេញ ៖ លោកជំទាវសាស្រ្តាចារ្យ អ៊ឹម សិទ្ធិការ្យ រដ្នលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលនៃមជ្ឈមណ្ឌលជាតិគាំពាមាតា និងទារក បានអញ្ជើញបើកទិវាសល្យសាស្ត្រ សម្ភព និងរោគស្ត្រី លើកទី៣ស្តីពី«ការពង្រឹង និងបង្កើនសេវាព្យាបាលថែទាំសង្រ្គោះប្រកបដោយគុណភាព» រយៈពេល០២ថ្ងៃ ចាប់ពីថ្ងៃទី៤-៥ ខែកញ្ញា ឆ្នាំ២០២៥។លោកស្រីសាស្រ្តាចារ្យជំនួយ គឹម រ័ត្ននា ប្រធានមជ្ឈមណ្ឌលជាតិគាំពាមាតា និងទារក បានលើកឡើងថា ឆ្នាំនេះជាឆ្នាំទី៣ ដែលមជ្ឈមណ្ឌលជាតិបានរៀបចំទិវាសល្យសាស្រ្ត សម្ភព និងរោគស្រ្តី ក្នុងគោលបំណង៖ (១)ចែករំលែកនូវបទពិសោធន៍ក្នុងការថែទាំ ព្យាបាល និងសង្គ្រោះមាតា និងទារក ដើម្បីកាត់បន្ថយនូវហានិភ័យនានា និងអត្រាមរណៈភាពដែលអាចបង្ការបាន។ (២)បង្ហាញរបកគំហើញថ្មីៗនៃការព្យាបាលដើម្បីបង្កើនគុណភាពនៃការបម្រើសេវាសុខភាព និង(៣)លើកកម្ពស់ការអនុវត្តនៃការថែទាំ ព្យាបាលនិងគាំពារ សុខភាពមាតា និងទារកប្រកបដោយសុវត្តិភាព។ ដោយឡែកប្រធានបទដែលនឹងលើកយកមកបង្ហាញ និងពិភាក្សាក្នុងរយៈពេល២ថ្ងៃនេះ គឺពាក់ព័ន្ធ នឹងការគ្រប់គ្រងការធ្លាក់ឈាមក្រោយសម្រាល, ការគ្រប់គ្រង និងព្យាបាលសុកស្អិតជាប់ស្បូន(Placenta Accreta spectrum), ការគ្រប់គ្រងការស្លោកខួរក្បាលលើស្រ្តីប្រកាច់ដោយជំងឺក្រឡាភ្លើង, ពិធីសារជាតិស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយតប, ការគ្រប់គ្រង ព្យាបាលវះកាត់ដោយចោះ, កម្មវិធីស្រាវជ្រាវមហារីកមាត់ស្បូន, សារៈសំខាន់នៃការពិនិត្យអេកូសាស្រ្តលើគភ៌កូនពង, អត្ថប្រយោជន៍ការបំបៅកូនដោយទឹកដោះម្ដាយ, ជំងឺគ្រុនឈាមលើស្រ្តីមានផ្ទៃពោះ(ករណីសិក្សា), ការថែទាំផ្ទៃពោះមុនសម្រាល ផ្ទៃពោះដែលប្រឈមនឹងគ្រោះថ្នាក់ និងការគ្រប់គ្រង និងការព្យាបាល ការជាប់ហ្វ្រាំងអណ្ដាតលើទារក។ សិក្ខាសាលានេះមានការចូលរួមពីៈ• លោក លោកស្រីសាស្រ្តាចារ្យ វេជ្ជបណ្ទិតផ្នែកសម្ភព និងរោគស្រ្តីនៃមន្ទីពេទ្យជាតិទាំង៨• ឯកឧត្តម លោកជំទាវប្រធានមន្ទីរសុខាភិបាល ប្រធានគាំពារមាតា និងទារក មន្ទីរពេទ្យខេត្ត ស្រុក២៥រាជធានី ខេត្ត • គណៈវិជ្ជាជីវៈ សមាគមឆ្មប • សាកលវិទ្យាល័យវេជ្ជសាស្ត្រសុខាភិបាល សាលាបច្ចេកទេសថែទាំវេជ្ជសាស្ត្រ• សាលាមធ្យមសិក្សាសុខាភិបាលភូមិភាគទាំង៤ • គ្លីនិកឯកជន ចំនួន ២៩(មកពីភ្នំពេញ ១៩ និងខេត្ត១០កន្លែង)សរុបអ្នកចូលរួមផ្ទាល់ ៖ ៣០០ នាក់សរុបអ្នកចូលរួមតាមប្រព័ន្ធនិម្មិត ៖ ១៣០០ នាក់។ នាឱកាសនោះដែរ លោកជំទាវសាស្រ្តាចារ្យ អ៊ឹម សិទ្ធិការ្យ បានថ្លែងថា កិច្ចខិតខំប្រឹងប្រែងរបស់រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំដ៏ប៉ិនប្រសប់ របស់សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា គឺបានផ្តល់អាទិភាពដល់វិស័យសុខាភិបាល និង ការគាំពារសុខភាពសង្គម ជាអាទិភាពសំខាន់មួយសម្រាប់ការ អភិវឌ្ឍមូលធនមនុស្ស ជាពិសេសមុំទី៣នៃបញ្ចកោណទី១ គឺការលើកកម្ពស់សុខុមាលភាព និងសុខភាពប្រជាជន។ ដូច្នេះ ទិវាសល្យសាស្ត្រ សម្ភព និង រោគស្ត្រីនាថ្ងៃនេះក្រោមប្រធានបទ «ពង្រឹង និងបង្កើនសេ វាថែទាំ ព្យាបាល និងសង្គ្រោះ ប្រកបដោយគុណភាព» គឺពិតជាឆ្លើយតបនឹងយុទ្ធសាស្ត្រអាទិភាពរបស់រាជរដ្ឋាភិបាល នីតិកាលទី៧នេះ។លោកជំទាវ រដ្ឋលេខាធិការ បានបញ្ជាក់ទៀតថា ការបណ្តុះបណ្តាលជំនាញ ចំណេះដឹង ដល់មន្ត្រីសុខាភិបាល ជារឿងដែលថ្នាក់ដឹកនាំសុខាភិបាលគ្រប់ឋានានុក្រមត្រូវយកចិត្តទុកដាក់ខ្ពស់។ ការអភិវឌ្ឍជំនាញច្ចេកទេសថ្មីៗជា ប្រចាំ ការចែករំលែកបទពិសោធន៍ ការសិក្សាពីចំនុចខ្វះខាតនិងធ្វើការកែលម្អ គឺជាកត្តាដែលមិនអាចខ្វះបានសម្រាប់យើងជាអ្នកផ្តល់សេវាសុខាភិបាលជូនដល់ប្រជាពលរដ្ឋ។ ដើម្បីពង្រឹងគុណភាពសេវា និងបង្កើនជំនឿទុកចិត្តរបស់ប្រជាពលរដ្ឋមកលើវិស័យសុខាភិបាលរបស់ជាតិ មន្ត្រីសុខាភិបាលគម្បី៖ ១) ត្រូវខិតខំ សិក្សាបង្កើនចំណេះដឹងលើជំនាញ បច្ចេកទេសថ្មីៗដែលប្រទេសជិតខាងរបស់យើង និងពិភពលោកមាន។ ២) ត្រូវបុរេសកម្មលើការងារវេជ្ជសាស្ត្រ។ ៣) ត្រូវគិតនូវអ្វីដែលថ្មី និងធ្វើអ្វីដែលថ្មីទើបយើងអាចទទួលបានលទ្ធ ផលថ្មី។ ៤) ត្រូវមានក្រមសីលធម៌វិជ្ជាជីវៈ គឺជាកត្តាគន្លឹះចាំបាច់សម្រាប់មន្ត្រីសុខាភិបាលគ្រប់រូបត្រូវប្រកាន់ឱ្យបានខ្ជាប់ខ្ជួនដើម្បីទាក់ទាញការពេញចិត្តរបស់ប្រជាជនមកលើ សុខាភិបាលជាតិយើង។ នៅក្នុងអាណត្តិ ថ្មីនេះ យើងឃើញថា សេវាសុខាភិបាលរបស់រដ្ឋ មានការប្រែប្រួលមុខមាត់ ទាំងថ្នាក់ជាតិ និងអន្តរជាតិ គួរជាទីមោទនៈ ជាក់ស្តែងប្រជាពលរដ្ឋដែលបានមកប្រើប្រាស់ សេវាសុខាភិបាលរបស់រដ្ឋបានសម្តែងនូវការពេញចិត្តមកលើមន្ត្រីសុខាភិបាលយើង ទាំងថ្នាក់ ជាតិ និង ថ្នាក់ក្រោមជាតិ។ទាំងអស់នេះគឺកើតឡើងដោយការខិតខំប្រឹងប្រែងរបស់ បងប្អូនទាំងអស់តាមរយះការខិតខំ បង្កើនគុណភាពនៃការថែទាំ ព្យាបាលប្រកបដោយការទទួលខុស ត្រូវខ្ពស់៕អត្ថបទ រដ្ឋា

បច្ចេកវិទ្យាឌីជីថល ក្លាយជាកាតាលីករដ៏សំខាន់ជួយជំរុញកំណើន និងការពង្រឹងភាពធន់នៃសេដ្ឋកិច្ចកម្ពុជា

ភ្នំពេញ ៖បច្ចេកវិទ្យាឌីជីថលបានក្លាយជាផ្នែកមួយដ៏សំខាន់ និងមិនអាចខ្វះបាននៃការរស់នៅ រៀនសូត្រ ការប្រកបអាជីវកម្ម និង គ្រប់សកម្មភាពសង្គម-សេដ្ឋកិច្ច និងបានក្លាយជាកាតាលីករដ៏សំខាន់ ក្នុងការជំរុញកំណើននិងការពង្រឹងភាពធន់នៃសេដ្ឋកិច្ច។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ថ្លែងក្នុងពិធីបើកវេទិកាជាតិគណនេយ្យ ក្រោមប្រធានបទ៖ សុខដុមនីយកម្ម បទប្បញ្ញត្តិ «ការរាយការណ៍ព័ត៌មានចីរភាព និងរបាយការណ៍ហិរញ្ញវត្ថុឌីជីថល» នៅថ្ងៃទី៤ ខែកញ្ញា ឆ្នាំ២០២៥ នេះថា ការ ប្រារព្ធវេទិកាជាតិគណនេយ្យនាថ្ងៃនេះ គឺជាការបង្ហាញពីឆន្ទៈមោះមុតរបស់កម្ពុជា ក្នុងការលើកស្ទួយស្តង់ដារ បាយការណ៍ព័ត៌មានចីរភាព និងរបាយការណ៍ហិរញ្ញវត្ថុឌីជីថលដូចមានចែងក្នុងយុទ្ធសាស្ត្របញ្ចកោណ-ដំណាក់កាលទី១, ជាពិសេស បញ្ចកោណទី៤ ស្តីពីការអភិវឌ្ឍប្រកបដោយភាពធន់ ចីរភាព និងបរិយាបន្ន និងបញ្ចកោណទី៥ ស្តីពីការកសាងសេដ្ឋកិច្ច និងសង្គមឌីជីថល។ ឯកឧត្តមអគ្គបណ្ឌិតសភាចារ្យ លើកឡើងបន្តថា ក្នុងយុគសម័យបច្ចុប្បន្ន, បច្ចេកវិទ្យាឌីជីថលបានក្លាយជាផ្នែកមួយ ដ៏សំខាន់ និងមិនអាចខ្វះបាននៃការរស់នៅ, ការរៀនសូត្រ, ការប្រកបអាជីវកម្ម, ការរាយការណ៍ព័ត៌មាន និងការផ្តល់សេវា សាធារណៈជូនធុរជន ក៏ដូចជាជូនប្រជាជនទូទៅ។ ក្នុងន័យនេះ, បច្ចេកវិទ្យាឌីជីថលបានចាក់ស្រេះក្នុងគ្រប់សកម្មភាពសង្គម-សេដ្ឋកិច្ច, ហើយបានក្លាយជាកាតាលីករដ៏សំខាន់ ក្នុងការជំរុញកំណើននិងការពង្រឹងភាពធន់នៃសេដ្ឋកិច្ច ក្នុងនោះសម្រាប់វិស័យឯកជន ការចាប់យកនិងការប្រើប្រាស់បច្ចេកវិទ្យាឌីជីថល ទាំងក្នុងការបំពេញការងារ និងក្នុងការរាយការណ៍ព័ត៌មាន គឺជាឧត្តមភាពមួយថ្មី ដែលជួយលើកកម្ពស់ប្រសិទ្ធភាពការងារ កាត់បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានានូវភាព-ប្រកួតប្រជែងក្នុងទីផ្សារជាដើម។នៅក្នុងវេទិកានេះ, ឯកឧត្តមអគ្គបណ្ឌិតសភាចារ្យ បានផ្តល់នូវអនុសាសន៍មួយចំនួន ដល់គ្រប់តួអង្គពាក់ព័ន្ធ ក្នុងវិស័យ គណនេយ្យនិងសវនកម្មរួមមាន៖ និយ័តករគណនេយ្យ និងសវនកម្ម ត្រូវអនុវត្តយុទ្ធសាស្រ្ដអភិវឌ្ឍន៍វិស័យគណនេយ្យ និងសវនកម្មនៅកម្ពុជា ២០២៥-២០៣៥ ប្រកបដោយស្មារតីបុរេសកម្ម, ម្ចាស់ការនិងការទទួលខុសត្រូវខ្ពស់។ ការរៀបចំស្តង់ ដារបាយការណ៍ហិរញ្ញវត្ថុ, គោលនយោបាយ និងបទប្បញ្ញត្តិគណនេយ្យនិងសវនកម្ម, និយ័តករគណនេយ្យនិងសវនកម្ម ត្រូវបន្តធានាឲ្យបាននូវគោលការណ៍សមភាព ដើម្បីបង្កើតនូវសមាមាត្រភាព នៃការធ្វើបញ្ញត្តិកម្ម រវាងទំហំនិងវិស័យរបស់ សហគ្រាស។ ក្រុមហ៊ុនគណនេយ្យនិងសវនកម្ម, សហគ្រាស, អង្គការមិនស្វែងរកប្រាក់ចំណេញ, វិទ្យាស្ថានគណនេយ្យករ ជំនាញ និងសវនករកម្ពុជា ព្រមទាំងនិយ័តករគណនេយ្យ និងសវនកម្ម ត្រូវបន្តរួមគ្នាជំរុញនិងលើកកម្ពស់កម្រិតអនុលោម ភាពក្នុងការរាយការណ៍ហិរញ្ញវត្ថុ និងព័ត៌មានចីរភាព ដើម្បីបង្កើនទំនុកចិត្ត និងស្ថិរភាពនៃប្រព័ន្ធហិរញ្ញវត្ថុនៅកម្ពុជា។ និយ័តករគណនេយ្យ និងសវនកម្ម ត្រូវប្រកាន់យកនូវអភិក្រមចំនួន៣រួមមាន៖ ទទួលយក, បន្សាំ, និងនវានុវត្ត ក្នុងការជំរុញ បរិវត្តកម្មឌីជីថលក្នុងសេវាកម្មគណនេយ្យនិងសវនកម្ម។ និយ័តករគណនេយ្យ និងសវនកម្ម និងអង្គភាពពាក់ព័ន្ធ ត្រូវបន្ត វិនិយោគជាយុទ្ធសាស្រ្តលើការអភិវឌ្ឍមូលធនមនុស្ស, ជាពិសេសជំនាញវិជ្ជាជីវៈក្នុងការរាយការណ៌ព័ត៌មានចីរភាព និង របាយការណ៍ហិរញ្ញវត្ថុឌីជីថលដែលចំាបាច់ ដើម្បីការអភិវឌ្ឍវិស័យគណនេយ្យ និងសវនកម្ម រក្សាបាននូវស្តង់ដាខ្ពស់៕អត្ថបទ៖ សុន រ៉ាឌី

ក្រុមប្រឹក្សាស្តង់ដារជាតិអនុម័តស្តង់ដារថ្មីចំនួន ២១ ដើម្បីជំរុញវឌ្ឍនភាពផលិតកម្មកម្ពុជា

ភ្នំពេញ ៖ ក្រុមប្រឹក្សាស្តង់ដារជាតិ បានអនុម័តស្តង់ដារអន្តរជាតិចំនួន ២១ មកជាស្តង់ដារកម្ពុជា ដោយស្តង់ដារទាំងនេះគឺជាមូលដ្ឋានគ្រឹះ ដ៏សំខាន់ សម្រាប់វឌ្ឍនភាព និងពង្រឹងអធិបតេយ្យភាពផលិតកម្មរបស់កម្ពុជា និងជាចលនាគាំទ្រដល់ការផលិតក្នុងស្រុក។ ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បចេ្ចកវិទ្យា និងនវានុវត្តន៍ និងជាប្រធានក្រុមប្រឹក្សាស្ដង់ ដារជាតិ លើកឡើងនៅក្នុងកិច្ចប្រជុំលើកទី៣១ លើអនុម័តស្តង់ដារអន្តរជាតិចំនួន ២១ ជាស្តង់ដារកម្ពុជា របស់ក្រុមប្រឹក្សាស្តង់ដារ ជាតិ ថ្ងៃទី៣ ខែកញ្ញា ឆ្នាំ២០២៥ នេះថា ជុំវិញបញ្ហាស្តង់ដារនេះ ក្រុមប្រឹក្សាស្តង់ដារជាតិបានយកចិត្តយ៉ាងខ្លាំង ក្នុងការអនុម័តយក ស្តង់ដារថ្មីៗ ដើម្បីឆ្លើយតបទៅនិងការរីកចម្រើនកម្ពុជា ក្នុងការបង្កើននូវប្រសិទ្ធភាពផលិតកម្ម គុណភាព និងសុវត្ថិភាពផលិតផល និងសេវាកម្ម និងប្រើប្រាស់ជាឧបករណ៍ស្នូលសម្រួបសម្រួលដល់ការធ្វើពាណិជ្ជកម្មទំនិញ, ជាក់ស្តែងស្តង់ដារអន្តរជាតិ ISO, IEC និង ISO/IEC ទាំង២១ ដែលអនុម័តខាងលើនេះ បានគ្របដណ្តប់លើផ្នែកសារធាតុ និងផលិតផលគីមី ផ្នែកប្រព័ន្ធគ្រប់គ្រងថាមពល ផលិតផលអគ្គិសនី និងអេឡិចត្រូនិក គ្រឿងបន្លាស់រថយន្ត គ្រឿងសម្អាង ផលិតផលសង្ហារឹមធ្វើពីឫស្សី និងផ្នែកវាយនភ័ណ្ឌ។ឯកឧត្តមរដ្ឋមន្ត្រី បន្តលើកឡើងថា ស្តង់ដារទាំងនេះគឺជាមូលដ្ឋានគ្រឹះដ៏សំខាន់សម្រាប់វឌ្ឍនភាព និងពង្រឹងអធិបតេយ្យភាព ផលិតកម្មរបស់កម្ពុជា ពិសេសខណៈដែលកម្លាំងសាមគ្គីជាតិដ៏រឹងមាំ និងចលនាគាំទ្រផលិតផលក្នុងស្រុកដ៏ក្លៀវក្លា ដោយបានកំពុង គាំទ្រដល់ការផលិតក្នុងស្រុក។ តាមរយៈការអនុលោមតាមស្តង់ដារទាំងនេះ ធុរកិច្ចកម្ពុជាអាចធ្វើសមាហរណកម្មចូលទៅក្នុងខ្សែច្រវាក់ ផ្គត់ផ្គង់ក្នុងស្រុក និងសកល ទន្ទឹមនឹងនោះ, ក៏ជាការចូលរួមការពារសុខភាពសាធារណៈ លើកកម្ពស់សុវត្ថិភាពសម្រាប់អ្នកប្រើប្រាស់ និងភាពប្រកួតប្រជែងនៃឧស្សាហកម្មកម្ពុជាផងដែរ។ទន្ទឹមនឹងការពិនិត្យ និងអនុម័តស្តង់ដារនេះ ក្រុមប្រឹក្សាជាតិក៏បានអនុម័តបង្កើតគណៈកម្មាធិការជាតិថ្មីចំនួន៣ ដើម្បីសម្រប សម្រួល និងលើកកម្ពស់ការចូលរួមរបស់កម្ពុជានៅក្នុងសកម្មភាពស្តង់ដារូបនីយកម្មអន្តរជាតិ នៅក្រោមក្របខ័ណ្ឌស្ថាប័នស្តង់ដារ អន្តរជាតិដូចជា៖ ISO, IEC និង Codex, ការកែសម្រួលនេះ ស្របពេលដែលប្រទេសកម្ពុជាកំពុងរៀបចំចូលជាសមាជិកពេញសិទ្ធ របស់អង្គការស្តង់ដារអន្តរជាតិ ISO និងជាសមាជិកសហការ (associate member) របស់អង្គការ IEC ត្រឹមឆ្នាំ២០២៦ ខាងមុខ៕អត្ថបទ៖ សុន រ៉ាឌី

រដ្ឋមន្ត្រីក្រសួងអប់រំ បំផុសឱ្យ ផ្តោតលើការអប់រំឌីជីថល និងបញ្ញាសិប្បនិម្មិត (AI)

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានរដ្ឋមន្ត្រីក្រសួងអប់រំ បំផុសឱ្យ ផ្តោតលើការអប់រំឌីជីថល និងបញ្ញាសិប្បនិម្មិត (AI) ក្នុងការរៀបចំប្រារព្ធ ទិវាគ្រូបង្រៀន ឆ្នាំ២០២៥។ការបំផុសនេះ ធ្វើឡើងក្នុងឱកាស ឯកឧត្តមបណ្ឌិតសភាចារ្យ ហង់ជួន ណារ៉ុន ដឹកនាំកិច្ចប្រជុំពិភាក្សាស្តីពី ការត្រៀមប្រារព្ធ ទិវាគ្រូបង្រៀនឆ្នាំ២០២៥ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួង លោក លោកស្រី និងមន្ត្រីមកពីនាយកដ្ឋានពាក់ព័ន្ធក្រោមឱវាទ នាព្រឹកថ្ងៃទី៤ ខែកញ្ញា ឆ្នាំ២០២៥ នៅទីស្តីការក្រសួង។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារពាក់ព័ន្ធទាំងអស់ ដែលបានជំរុញឱ្យការរៀបចំ ទិវាគ្រូបង្រៀន ដំណើរការទៅដោយរលូន និងជោគជ័យជារៀងរាល់ឆ្នាំ ហើយសម្រាប់ឆ្នាំ២០២៥ នេះ ឯកឧត្តមបណ្ឌិតសភាចារ្យលើកទឹកចិត្តក្រុមការងារ បន្តសហការគ្នាឱ្យកាន់តែល្អប្រសើរ ដោយត្រូវបន្តយកចិត្តទុកដាក់លើកិច្ចការងារតាមជំនាញ ជ្រើសរើសប្រធានបទ និងពាក្យស្លោកសម្រាប់កម្មវិធីស្របតាមចក្ខុវិស័យ និងការវិវឌ្ឍថ្មីៗក្នុងវិស័យអប់រំ ជាពិសេសផ្តោតលើការអប់រំឌីជីថល និងបញ្ញាសិប្បនិម្មិត (AI) ចាត់ចែងរៀបចំការប្រឡងតែងនិពន្ធ និងស្មូតកំណាព្យឱ្យដំណើរការរលូន បង្ហាញសមិទ្ធផលនានារបស់គ្រូបង្រៀន ក៏ដូចជាត្រៀមរៀបចំរបាយការណ៍សម្រាប់កម្មវិធី។ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ពីសារៈសំខាន់ នៃការប្រារព្ធ ទិវាគ្រូបង្រៀន ៥ តុលា ដែលត្រូវបានចាត់ទុកជាទិវាកម្រិតសាកល ប្រារព្ធឡើងក្នុងគោលបំណង ដើម្បីបំផុសនូវវប្បធម៌ និងប្រពៃណី នៃការរំឭកគុណូបការៈដ៏ថ្លៃថ្លាជូនចំពោះគ្រូបង្រៀននៅគ្រប់ភូមិសិក្សាទូទាំងប្រទេស ដែលបានចំណាយពេលវេលា កម្លាំងកាយ កម្លាំងចិត្ត ស្មារតី និងវិជ្ជាជីវៈ ក្នុងការបំពេញភារកិច្ចជាអ្នកបណ្ដុះបណ្ដាលដែលមិនមែនផ្ទេរត្រឹមតែចំណេះដឹងនិងចំណេះវិជ្ជាប៉ុណ្ណោះទេ ថែមទាំងទូន្មានឱ្យសិស្សានុសិស្សធ្វើតែអំពើល្អ ស្គាល់ខុស ស្គាល់ត្រូវ និងចេះគោរពចាស់ទុំ ក្លាយខ្លួនជាធនធានមនុស្សដ៏មានសក្ដានុពលសម្រាប់ប្រទេសជាតិ។គួរបញ្ជាក់ថា កិច្ចប្រជុំនេះរៀបចំឡើងដើម្បីពិនិត្យពិភាក្សា សម្រេចលើប្រធានបទ និងពាក្យស្លោកកម្មវិធី, របាយការណ៍រៀបចំទិវាគ្រូបង្រៀននាឆ្នាំកន្លងមក, ពិនិត្យលើសេចក្តីព្រាងកម្មវិធី និងរូបភាព នៃការរៀបចំ ក៏ដូចជាខ្លឹមសារនានាពាក់ព័ន្ធនឹងការរៀបចំ ទិវាគ្រូបង្រៀន ដែលនឹងប្រារព្ធធ្វើឡើងនៅថ្ងៃទី៣ ខែតុលា ឆ្នាំ២០២៥ ខាងមុខនេះ៕

ក្រសួងកសិកម្ម បង្ហាញ គោលនយោបាយអាទិភាពកសាងសហគមន៍កសិកម្មទំនើប ដល់ ស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា

ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឯកឧត្តមរដ្ឋមន្រ្តី ឌិត ទីណា បានលើកឡើងបង្ហាញ គោលនយោបាយអាទិភាព ក្នុងការកសាងសហគមន៍កសិកម្មទំនើប ដល់ ស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា (AmCham)។ការលើកបង្ហាញនេះ ធ្វើឡើងក្នុងឱកាស ឯកឧត្តម ប្រាក់ ដាវីដ ទទួលជួបជាមួយស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា (AmCham) ក្នុងជំនួបសម្តែងការគួរសម និងពិភាក្សាការងារលើវិស័យកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៤ ខែកញ្ញា ឆ្នាំ២០២៥។ឯកឧត្តម ប្រាក់ ដាវីដ បានលើកឡើងពីគោលនយោបាយអាទិភាព ក្នុងការកសាងសហគមន៍កសិកម្មទំនើប ការរក្សាស្ថេរភាពថ្លៃ និងការដាក់ពង្រាយមន្រ្តីកសិកម្មឃុំ។ មិនតែប៉ុណ្ណោះ ឯកឧត្តមរដ្ឋលេខាធិការ បានអំពាវនាវដល់សមាគម (AmCham) គាំទ្រវគ្គបំប៉នភាសាអង់គ្លេសដល់មន្រ្តីកសិកម្មឃុំ-សង្កាត់ សំដៅបង្កើនសមត្ថភាពភាសា និងអាចជួយដល់ការងារស្រាវជ្រាវផ្សេងៗផងដែរ។នាឱកាសនៃជំនួបនេះ ឯកឧត្តម ប្រាក់ ដាវីដ បានសម្តែងការស្វាគមន៍ក្នុងការភ្ជាប់ទំនាក់ទំនង និងបានគូសបញ្ជាក់អំពីកសិផលកម្ពុជាដូចជា៖ ស្រូវអង្ករ ស្វាយ ស្វាយចន្ទី ម្រេច និងផលិតផលវារីវប្បកម្ម ដែលជាឱកាសសម្រាប់វិនិយោគក្នុងការកែច្នៃ ជាពិសេសការវិនិយោគលើការចិញ្ចឹមគោទឹកដោះគោ ដែលមានតម្រូវទីផ្សារក្នុងស្រុក។ជាមួយគ្នានេះ ឯកឧត្តមរដ្ឋលេខាធិការ បានជម្រាបជូនពីការរៀបចំកម្មវិធី (CAFE25) ដែលជាកម្មវិធីអភិវឌ្ឍន៍វិស័យកសិកម្មផ្សារភ្ជាប់ការវិនិយោគទៅនឹងពាណិជ្ជកម្ម និងបានអញ្ជើញគណៈប្រតិភូសមាគម (AmCham) អញ្ជើញចូលរួម និងពិនិត្យលទ្ធភាពជួយគាំទ្រក្នុងកម្មវិធីនេះ ដើម្បីបង្កើនការវិនិយោគ និងជំរុញការនាំចេញកសិផលកម្ពុជាទៅកាន់ទីផ្សារអន្តរជាតិ។គួរបញ្ជាក់បន្ថែមថា ជាការឆ្លើយតបតាមការលើកឡើងរបស់ (AmCham) ពាក់ព័ន្ធនឹងជម្លោះព្រំដែនកម្ពុជា-ថៃ ឯកឧត្តម ប្រាក់ ដាវីដ បានអះអាងថា ប្រទេសកម្ពុជាប្រកាន់ភ្ជាប់នូវជំហរស្រឡាញ់សន្តិភាព និងគោរពនូវបទឈប់បាញ់ ក៏ដូចជាអំពាវនាវឱ្យគ្រប់ភាគីទាំងអស់បន្តនូវការអត់ធ្មត់ ជៀសវាងធ្វើសកម្មភាពនានាដែលនាំឱ្យមានការកើនឡើងនៃកម្ពៅ ដែលមិនអាចជួយដល់ការដោះស្រាយបញ្ហាព្រំដែន និងប៉ះពាល់ដល់ការធ្វើពាណិជ្ជកម្មផងដែរ៕

ក្រសួងការបរទេសកម្ពុជាបញ្ជូនលិខិតតវ៉ាជាផ្លូវការជាថ្មីទៅភាគីថៃ ជុំវិញសកម្មភាពពង្រីកតំបន់ជម្លោះដោយកងកម្លាំងយោធា ចូលតំបន់ពលរដ្ឋខ្មែរ បាននឹងកំពុងរស់នៅ

ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានបញ្ជូនលិខិតតវ៉ាជាផ្លូវការរបស់រាជរដ្ឋាភិបាលកម្ពុជាជាថ្មីម្តងទៀត ជុំវិញសកម្មភាពពង្រីកតំបន់ជម្លោះដោយកងកម្លាំងយោធាថៃ នៅតំបន់ព្រំដែនគោកកម្ពុជា-ថៃ ជាពិសេសតំបន់ដែលប្រជាពលរដ្ឋខ្មែរបាននិងកំពុងរស់នៅជាច្រើនទសវត្សរ៍មកហើយ។ នេះបើតាមសេចក្តីថ្លែងការណ៍របស់ក្រសួងការបរទេស និង សហប្រតិបត្តិការអន្តរជាតិ នៃព្រះរាជាណាចក្រកម្ពុជា នៅថ្ងៃទី៤ ខែកញ្ញា ឆ្នាំ២០២៥នេះ។ក្រសួងការបរទេសកម្ពុជាបានបញ្ជាក់ថា ការរាយបន្លាលួស សំណាញ់ របាំង និងកង់ឡានដោយយោធាថៃ កាលពីខែសីហា ឆ្នាំ២០២៥ នៅ ចំណុចភូមិចំនួនពីរ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានបង្កនូវទុក្ខលំបាក យ៉ាងធ្ងន់ធ្ងរដល់ប្រជាជនខ្មែរជាច្រើនគ្រួសារ ដែលត្រូវបានបណ្តេញចេញពីផ្ទះសម្បែង និងដីស្រែ ចម្ការរបស់ពួកគេ និងកំពុងទន្ទឹងរង់ចាំដំណោះស្រាយស្ថានភាពនេះ។ក្រសួងការបរទេសកម្ពុជាបានឱ្យដឹងថា នៅថ្ងៃទី ២៦ និង ២៨ ខែសីហា ឆ្នាំ ២០២៥ ឧត្តមសេនីយ៍ទោ Wanchana Sawasdee ប្រធាន ការិយាល័យសម្របសម្រួលបេសកកម្មសន្តិសុខជាតិ ក្រោមការដឹកនាំ ប្រតិបត្តិការយោធានៃកង ទ័ពភូមិន្ទថៃ បានប្រកាសជាសាធារណៈនូវឱសានវាទឱ្យកម្ពុជា «ជម្លៀស» ពលរដ្ឋរបស់ខ្លួនចេញពីភូមិជោគជ័យ ក្នុងរយៈពេល ៣-៦ ខែខាងមុខ បើពុំដូច្នោះទេនឹងត្រូវប្រឈមមុខពីការបណ្តេញចេញដោយការប្រើប្រាស់កម្លាំងពីសំណាក់យោធាថៃ។ ស្របពេលដែលអាជ្ញាធរថៃបានដំឡើងផ្ទាំងបដាផ្សព្វផ្សាយប្រកាសខាងលើ អភិបាលខេត្តស្រះកែវនៃព្រះរាជាណាចក្រថៃក៏បានផ្ញើលិខិត ផ្លូវការមួយច្បាប់ទៅកាន់អភិបាលខេត្តបន្ទាយមានជ័យ នៃព្រះរាជាណាចក្រកម្ពុជា ពាក់ព័ន្ធបញ្ហា នេះផងដែរ។បើតាម ក្រសួងការបរទេសកម្ពុជាបញ្ជាក់ថា រាល់សកម្មភាពខាងលើ និងផែនការដែលបានប្រកាសក្នុងការចេញប័ណ្ណកម្មសិទ្ធិដីធ្លីជូនពលរដ្ឋថៃ លើតំបន់ដែលពលរដ្ឋខ្មែររាប់រយគ្រួសារបាននិងកំពុងរស់នៅរាប់ទស្សវត្សរ៍មកនោះ បង្កឱ្យមានការព្រួយបារម្មយ៉ាងខ្លាំងស្របនឹងការប៉ុនប៉ងបោះបង្គោលព្រំដែនជាឯកតោភាគី តាមរយៈការប្រើប្រាស់មធ្យោបាយយោធា។ នេះគឺជាការរំលោភលើអាណត្តិការងាររបស់គណៈកម្មាធិការចម្រុះខណ្ឌសីមាព្រំដែនគោក (JBC) និងផ្ទុយពីស្មារតីនៃអនុស្សារណៈយោគយោលគ្នាឆ្នាំ ២០00 (MOU-2000) ស្តីពីការវាស់វែង និងខណ្ឌសីមាព្រំដែនគោករវាងកម្ពុជា-ថៃ កិច្ចព្រមព្រៀងស្តីពីបទ ឈប់បាញ់ថ្ងៃទី២៨ ខែកក្កដា ឆ្នាំ២០២៥ និងកំណត់ហេតុនៃកិច្ចប្រជុំវិសាមញ្ញនៃគណៈកម្មាធិការ ព្រំដែនទូទៅ (GBC) នៅថ្ងៃទី ៧ ខែសីហា ឆ្នាំ២០២៥ និងលទ្ធផលកិច្ចប្រជុំវិសាមញ្ញនៃគណៈ កម្មាធិការព្រំដែនថ្នាក់យោធភូមិភាគ (RBC) នៅថ្ងៃទី២២ ខែសីហា ឆ្នាំ២០២៥។តាមរយៈសេចក្ដីថ្លែងការណ៍ក្រសួងការបរទេសកម្ពុជា បានបញ្ជាក់ជាថ្មីថា រាជរដ្ឋាភិបាលកម្ពុជា នៅតែប្តេជ្ញាចិត្តយ៉ាងមុតមាំ ក្នុងការស្វែងរកដំណោះស្រាយប្រកបដោយ ស្មារតីមិត្តភាព ចំពោះវិវាទព្រំដែនជាមួយប្រទេសជិតខាងទាំងអស់ តាមរយៈមធ្យោបាយសន្តិវិធី ស្រប តាមច្បាប់អន្តរជាតិ និងបន្តការរក្សាការប្តេជ្ញាចិត្តយ៉ាងម៉ឺងម៉ាត់ ប្រកាន់នូវជំហរជាគោលការណ៍របស់ ខ្លួនថា ព្រំដែនមិនត្រូវបានផ្លាស់ប្តូរដោយការប្រើប្រាស់កម្លាំងបង្ខំនោះទេ។ រាជរដ្ឋាភិបាលកម្ពុជា ជំរុញឱ្យភាគីថែរក្សាស្ថានភាពដូចដើម និងចូលរួមដោះស្រាយជម្លោះព្រំ ដែនខាងលើ តាមរយៈយន្តការ GBC និង JBC ដូចដែលភាគីទាំងពីរឯកភាពគ្នា៕

អគ្គបញ្ជាការដ្ឋានកងយោធពលខេមរភូមិន្ទ ទាត់ចោលការប្រឌិតព័ត៌មានរបស់ជនក្បត់ជាតិ៣ជំនាន់ ថា រាជរដ្ឋាភិបាលគំរាមកំហែងនិងកាត់ប្រាក់ខែទ័ពជួរមុខ

ភ្នំពេញ៖ អគ្គមេបញ្ជាការ អគ្គមេបញ្ជាការរង នាយទាហាន នាយទាហានរង និងពលទាហាន ទាំងអស់នៃកងយោធពលខេមរភូមិន្ទ នៅថ្ងៃទី៤ ខែកញ្ញា ឆ្នាំ២០២៥នេះ បានចេញមកបដិសេធទាំងស្រុង ចំពោះការផ្សព្វផ្សាយព័ត៌មានបំភ្លៃបំផ្លើសការពិតរបស់ ជនក្បត់ជាតិ៣ជំនាន់ សម រង្ស៉ី និងបក្ខពួក ដែលថា «រាជរដ្ឋាភិបាល បានគំរាមកំហែង និងកាត់ប្រាក់ខែកងទ័ពជួរមុខ»។រាជរដ្ឋាភិបាលកម្ពុជា ក្រសួងការពារជាតិ និងអគ្គបញ្ជាការដ្ឋាន បានយកចិត្តទុកដាក់ខ្ពស់ក្នុងការផ្តល់គោលរបប និងផ្គត់ផ្គង់បន្ថែមដល់កងទ័ពជួរមុខ ព្រមទាំងមានគោលរបបពិសេសចំពោះយោធិនពលី ពិការដើម្បីការពារជាតិ មាតុភូមិ។កងយោធពលខេមរភូមិន្ទ សូមបដិសេធទាំងស្រុង និងថ្កោលទោសដាច់អហង្ការចំពោះការផ្សព្វផ្សាយព័ត៌មានបំភ្លៃបំផ្លើសការពិតរបស់ជនក្បត់ជាតិ៣ជំនាន់ សម រង្ស៊ី និងបក្សពួក ដែលមានគោលបំណងបំបាក់ស្មារតីនិងប្រមាថយ៉ាងធ្ងន់ធ្ងរបំផុតចំពោះកងយោធពលខេមរភូមិន្ទ ក៏ដូចជាប្រទេសជាតិ និងប្រជាជនខ្មែរដែលរងគ្រោះការរំលោភបំពានទាំងកម្រោលមកលើបូរណទឹកដីនៃព្រះរាជាណាចក្រកម្ពុជា។ ជនក្បត់ជាតិ៣ជំនាន់ សម រង្សី និងបក្សពួក បាននិងកំពុងលុបបំបាត់កិត្តិយសវីរៈយុទ្ធជន និងជនរងគ្រោះ បំផ្លាញស្មារតីសាមគ្គីជាតិ ខណៈរាជរដ្ឋាភិបាល ប្រជាជនកម្ពុជាទាំងក្នុងនិងក្រៅប្រទេស ក៏ដូចជា កងយោធពលខេមរភូមិន្ទ បាននិងកំពុងតស៊ូក្រាញននៀលប្រយុទ្ធយ៉ាងប្តូរផ្តាច់ ហ៊ានបូជាសាច់ស្រស់ ឈាមស្រស់ ដើម្បីបុព្វហេតុការពារបូរណភាពទឹកដី អធិបតេយ្យជាតិ និងប្រជាជន។អគ្គបញ្ជាការដ្ឋានកងយោធពលខេមរភូមិន្ទ ថ្កោលទោសដាច់អហង្ការ និងស្នើសុំឱ្យអនុវត្តច្បាប់ដកសញ្ជាតិ និងបទល្មើសព្រហ្មទណ្ឌផ្សេងៗទៀត ចំពោះជនក្បត់ជាតិ៣ជំនាន់ សម រង្សី និងបក្សពួក៕

ក្រុមប្រឹក្សាស្តង់ដារជាតិអនុម័តស្តង់ដារថ្មីចំនួន ២១ ដើម្បីជំរុញវឌ្ឍនភាពផលិតកម្មកម្ពុជា

ក្រុមប្រឹក្សាស្តង់ដារជាតិ បានអនុម័តស្តង់ដារអន្តរជាតិចំនួន ២១ មកជាស្តង់ដារកម្ពុជា ដោយស្តង់ដារទាំងនេះគឺជាមូលដ្ឋានគ្រឹះ ដ៏សំខាន់ សម្រាប់វឌ្ឍនភាព និងពង្រឹងអធិបតេយ្យភាពផលិតកម្មរបស់កម្ពុជា និងជាចលនាគាំទ្រដល់ការផលិតក្នុងស្រុក។ ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បចេ្ចកវិទ្យា និងនវានុវត្តន៍ និងជាប្រធានក្រុមប្រឹក្សាស្ដង់ ដារជាតិ លើកឡើងនៅក្នុងកិច្ចប្រជុំលើកទី៣១ លើអនុម័តស្តង់ដារអន្តរជាតិចំនួន ២១ ជាស្តង់ដារកម្ពុជា របស់ក្រុមប្រឹក្សាស្តង់ដារ ជាតិ ថ្ងៃទី៣ ខែកញ្ញា ឆ្នាំ២០២៥ នេះថា ជុំវិញបញ្ហាស្តង់ដារនេះ ក្រុមប្រឹក្សាស្តង់ដារជាតិបានយកចិត្តយ៉ាងខ្លាំង ក្នុងការអនុម័តយក ស្តង់ដារថ្មីៗ ដើម្បីឆ្លើយតបទៅនិងការរីកចម្រើនកម្ពុជា ក្នុងការបង្កើននូវប្រសិទ្ធភាពផលិតកម្ម គុណភាព និងសុវត្ថិភាពផលិតផល និងសេវាកម្ម និងប្រើប្រាស់ជាឧបករណ៍ស្នូលសម្រួបសម្រួលដល់ការធ្វើពាណិជ្ជកម្មទំនិញ, ជាក់ស្តែងស្តង់ដារអន្តរជាតិ ISO, IEC និង ISO/IEC ទាំង២១ ដែលអនុម័តខាងលើនេះ បានគ្របដណ្តប់លើផ្នែកសារធាតុ និងផលិតផលគីមី ផ្នែកប្រព័ន្ធគ្រប់គ្រងថាមពល ផលិតផលអគ្គិសនី និងអេឡិចត្រូនិក គ្រឿងបន្លាស់រថយន្ត គ្រឿងសម្អាង ផលិតផលសង្ហារឹមធ្វើពីឫស្សី និងផ្នែកវាយនភ័ណ្ឌ។ឯកឧត្តមរដ្ឋមន្ត្រី បន្តលើកឡើងថា ស្តង់ដារទាំងនេះគឺជាមូលដ្ឋានគ្រឹះដ៏សំខាន់សម្រាប់វឌ្ឍនភាព និងពង្រឹងអធិបតេយ្យភាព ផលិតកម្មរបស់កម្ពុជា ពិសេសខណៈដែលកម្លាំងសាមគ្គីជាតិដ៏រឹងមាំ និងចលនាគាំទ្រផលិតផលក្នុងស្រុកដ៏ក្លៀវក្លា ដោយបានកំពុង គាំទ្រដល់ការផលិតក្នុងស្រុក។ តាមរយៈការអនុលោមតាមស្តង់ដារទាំងនេះ ធុរកិច្ចកម្ពុជាអាចធ្វើសមាហរណកម្មចូលទៅក្នុងខ្សែច្រវាក់ ផ្គត់ផ្គង់ក្នុងស្រុក និងសកល ទន្ទឹមនឹងនោះ, ក៏ជាការចូលរួមការពារសុខភាពសាធារណៈ លើកកម្ពស់សុវត្ថិភាពសម្រាប់អ្នកប្រើប្រាស់ និងភាពប្រកួតប្រជែងនៃឧស្សាហកម្មកម្ពុជាផងដែរ។ទន្ទឹមនឹងការពិនិត្យ និងអនុម័តស្តង់ដារនេះ ក្រុមប្រឹក្សាជាតិក៏បានអនុម័តបង្កើតគណៈកម្មាធិការជាតិថ្មីចំនួន៣ ដើម្បីសម្រប សម្រួល និងលើកកម្ពស់ការចូលរួមរបស់កម្ពុជានៅក្នុងសកម្មភាពស្តង់ដារូបនីយកម្មអន្តរជាតិ នៅក្រោមក្របខ័ណ្ឌស្ថាប័នស្តង់ដារ អន្តរជាតិដូចជា៖ ISO, IEC និង Codex, ការកែសម្រួលនេះ ស្របពេលដែលប្រទេសកម្ពុជាកំពុងរៀបចំចូលជាសមាជិកពេញសិទ្ធ របស់អង្គការស្តង់ដារអន្តរជាតិ ISO និងជាសមាជិកសហការ (associate member) របស់អង្គការ IEC ត្រឹមឆ្នាំ២០២៦ ខាងមុខ៕ អត្ថបទ៖ សុន រ៉ាឌី,

បណ្ដាញសង្គម

ព័ត៌មានថ្មីៗ

អ៊ីរ៉ង់ ចង់ចរចាជាមួយអនុប្រធានាធិបតីអាមេរិក ព្រោះនឹងសម្រេចបានបំណងរបស់ខ្លួន

ការចរចាបទឈប់បាញ់អាមេរិក-អ៊ីស្រាអែល កំណត់ពេលចាប់ផ្តើមនៅប៉ាគីស្ថាន ខណៈអ៊ីស្រាអែល បាញ់ផ្លោងលើលីបង់

មេដឹកនាំអូស្រ្តាលី និងសិង្ហបុរី សន្យាជំរុញទំនាក់ទំនងថាមពល ដើម្បីធានាការផ្គត់ផ្គង់សកល

EU អំពាវនាវឲ្យបញ្ឈប់ការវាយប្រហារជាបន្ទាន់ នៅលីបង់ និងជំរុញឲ្យការការពារជនស៊ីវិល

វិមានក្រឹមឡាំង៖ ទស្សនកិច្ចដោយប្រេសិត នៅអាមេរិក មិនមានន័យថា ការចរចាអ៊ុយក្រែន ចាប់ផ្តើមវិញឡើយ

អ៊ីស្រាអែលគំរាមវាយប្រហាររថយន្តសង្គ្រោះបន្ទាន់ នៅលីបង់ ដោយចោទថា ត្រូវបានក្រុមហេសបូឡាប្រើប្រាស់

អនុប្រធានាធិបតីសហរដ្ឋអាមេរិកនិយាយថា លោករំពឹងថាជំនួបអ៊ីរ៉ង់នឹងវិជ្ជមាន

ហេតុការណ៍លិចទូកក្រោយបុកស្ពានបណ្តែតនៅភាគខាងជើងឥណ្ឌាសម្លាប់មនុស្សយ៉ាងហោច ១០នាក់

អ៊ីរ៉ង់ខាតបង់ ១៤៥ពាន់លានដុល្លារ និងរងការបំផ្លិចបំផ្លាញយ៉ាងធំធេង ក្រោយសង្គ្រាម ៤០ថ្ងៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

រដ្ឋមន្ត្រីក្រសួងទេសចរណ៍ ទាក់ទាញ ក្រុមហ៊ុនទេសចរណ៍ធំវៀតណាម បង្កើនវិនិយោគនៅកម្ពុជា

បច្ចេកវិទ្យាឌីជីថល ក្លាយជាកាតាលីករដ៏សំខាន់ជួយជំរុញកំណើន និងការពង្រឹងភាពធន់នៃសេដ្ឋកិច្ចកម្ពុជា

ក្រុមប្រឹក្សាស្តង់ដារជាតិអនុម័តស្តង់ដារថ្មីចំនួន ២១ ដើម្បីជំរុញវឌ្ឍនភាពផលិតកម្មកម្ពុជា

រដ្ឋមន្ត្រីក្រសួងអប់រំ បំផុសឱ្យ ផ្តោតលើការអប់រំឌីជីថល និងបញ្ញាសិប្បនិម្មិត (AI)

ក្រុមប្រឹក្សាស្តង់ដារជាតិអនុម័តស្តង់ដារថ្មីចំនួន ២១ ដើម្បីជំរុញវឌ្ឍនភាពផលិតកម្មកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី