BTV NEWS

ការរៀបចំសម្រាប់ព្រឹត្តិការណ៍ «នគរសង្ក្រាន្ត» វត្តភ្នំ មានភាពស្រស់ស្អាត និងទាក់ទាញទេសចរ

តំបន់ផ្លូវថ្មើរជើងកាន់តែបង្ហាញវត្តមានទេសចរអន្តរជាតិច្រើន ខណៈបុណ្យចូលឆ្នាំថ្មីចាប់ផ្ដើមនៅថ្ងៃស្អែក

សង្ក្រាន្តទួលទំពូង ទាក់ទាញអ្នកចូលរួម និងទេសចរ ជំរុញកំណើនការលក់ដូររបស់អាជីវករ

កម្មករ កម្មការិនីនៅតាមរោងចក្រសហគ្រាស រៀបចំ “ការលេងល្បែងប្រជាប្រិយ អាហារសាមគ្គី និងការរាំកម្សាន្តយ៉ាងរីករាយ” ដើម្បីអបអរសាទរបុណ្យចូលឆ្នាំថ្មីប្រពៃណីជាតិ

ព័ត៌មានជាតិ

សម្តេចរដ្ឋសភាធិបតី ឃួន សុដារី ចាត់តំាងថ្នាក់ដឹកនាំខុទ្ទកាល័យនាំយកអំណោយជាថវិកា សម្ភារៈប្រើប្រាស់ចែកជូនវីរកងទ័ពនិងពលរដ្ឋភៀសសឹកនៅក្នុងខេត្តឧត្តរមានជ័យ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានចាត់ ឯកឧត្តមបណ្ឌិត កែវ ពិសិដ្ឋ នាយកខុទ្ទកាល័យ និងជាអគ្គលេខាធិការរងប្រចាំការនៃរដ្ឋសភា និងឯកឧត្តម ឃួន ដាវិត អគ្គលេខាធិការរងរដ្ឋសភា នាំយកអំណោយជាថវិកានិងសម្ភារៈប្រើប្រាស់ គ្រឿងឧបភោគបរិភោគ ប្រគល់ជូនឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ ដើម្បីយកទៅចែកជូនបន្តដល់វីរកងទ័ពជួរមុខ ក៏ដូចជាវីរកងទ័ពដែលកំពុងសម្រាកព្យាបាលជំងឺ ព្រមទំាងពលរដ្ឋដែលបានភៀសសឹក នៅក្នុងខេត្តឧត្តរមានជ័យ។ពិធីប្រគល់និងទទួលអំណោយនេះបានប្រារព្ធធ្វើឡើងសាលាខេត្តឧត្តរមានជ័យ នៅព្រឹកថ្ងៃទី៦ ខែកញ្ញាឆ្នាំ២០២៥។ ឯកឧត្តម មាន ចាន់យ៉ាដា បានគោរពថ្លែងអំណរគុណយ៉ាងជ្រាលជ្រៅជូនសម្តេចប្រធានរដ្ឋសភា ក៏ដូចជាសមាជិកសមាជិកាគណៈកម្មាធិការអចិន្រ្តៃយ៍រដ្ឋសភា សមាជិកសមាជិការដ្ឋសភា ព្រមទំាងថ្នាក់ដឹកនាំខុទ្ទកាល័យ សម្តេចប្រធានរដ្ឋសភា អគ្គលេខាធិការដ្ឋានរដ្ឋសភា ដែលបានផ្សារភ្ជាប់សុខទុក្ខ ជាមួយយុទ្ធជនជួរមុខ។ ការយកចិត្តទុកដាក់នេះ ជាកម្លំាងចិត្តដ៏សំខាន់ចំពោះយុទ្ធជនជួរមុខ ឈរការពារបូរណភាពទឹកដី អធិបតេយ្យជាតិ យ៉ាងអង់អាចក្លាហាន របស់យុទ្ឋជនវីរកងទ័ពកម្ពុជា ក្រោមការដឹកនាំដ៏វាងវៃ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ។ឯកឧត្តមអភិបាលខេត្ត បានលើកឡើងពីជោគជ័យរបស់កម្ពុជាប្រឆាំងការឈ្លានពានរបស់ថៃនៅពេលនេះ ដោយសារ កម្ពុជា មានសំណាងមានអ្នកដឹកនាំប្រកបដោយគតិបណ្ឌិតគឺ សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែតដែលមានបទពិសោធន៍បញ្ជាកងទ័ព បទពិសោធន៍ការងារការទូត ការចរចា និងផ្លូវច្បាប់ ប្រកបដោយភាពវាងវៃ មនសិការស្នេហាជាតិនិងពលរដ្ឋដ៏ជ្រាលជ្រៅ រួមជាមួយការលះបង់ខ្ពស់ អង់អាចក្លាហានរបស់វីរកងព័ទគ្រប់ជាន់ថ្នាក់ មានសាមគ្គីភាព សា្មរតីស្នេហាជាតិជាធ្លុងតែមួយ។ ឯកឧត្តមបណ្ឌិត កែវ ពិសិដ្ឋ បានពាំនាំនូវបណ្តាំផ្ញើសាកសួរសុខទុក្ខ និងការកោតសរសើរ ដ៏ជ្រាលជ្រៅ បំផុតពីសម្តេចមហារដ្ឋសភាធិការធិបតី ឃួន សុដារី ជូនដល់បងប្អូនវីរកងទ័ព ដ៏អង់អាចក្លាហានទាំងអស់ ដែលកំពុងឈរជើង នៅតាមបណ្តោយព្រំដែនកម្ពុជា-ថៃ និងថ្នាក់ដឹកនាំ ព្រមទាំងមន្ត្រីរាជការស៊ីវិលចំណុះរដ្ឋបាលខេត្តឧត្តរមានជ័យទាំងអស់។ ឯកឧត្តមបណ្ឌិតបានគូសបញ្ជាក់ថា ជានិច្ចកាល សម្តេចរដ្ឋសភាធិបតី តែងតែគិតគូរពីសុខទុក្ខបងប្អូនវីរកងទ័ព កងកម្លាំង និងថ្នាក់ដឹកនាំ គ្រប់លំដាប់ថ្នាក់ ក៏ដូចជាប្រជាជន នៅតាមព្រំដែន និងបានបន្តឧបត្ថម្ភ គាំទ្រទាំងស្មារតី សម្ភារៈ និង ថវិកាជាហូរហែកន្លងមក។ ឯកឧត្តមបណ្ឌិត បានគូសបញ្ជាក់ថា ក្នុងនាមតំណាងប្រជាពលរដ្ឋ សម្តេចប្រធានរដ្ឋសភា បានខិតខំបំពេញតួនាទី ដើម្បីលើកកម្ពស់សុខសន្តិភាព ស្ថិរភាពសង្គម ទាំងក្នុងប្រទេស និងការងារការទូតសភា នៅលើវេទិកាអន្តរជាតិ ស្របតាមចក្ខុវិស័យសន្តិភាព របស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ។ តាងនាមសម្តេចប្រធានរដ្ឋសភា និងជំនួសមុខឱ្យថ្នាក់ដឹកនាំខុទ្ទកាល័យ និងមន្ត្រីរាជការនៃអគ្គលេខាធិការដ្ឋានរដ្ឋសភា ឯកឧត្តមបណ្ឌិត កែវ ពិសិដ្ឋ បានសម្តែងនូវគាវរកិច្ចគោរពដឹងគុណដ៏ស្មោះអស់ពីដួងចិត្តចំពោះវីរភាពដ៏អង់អាចក្លាហានរបស់កងទ័ព និង កងកម្លាំងគ្រប់ប្រភេទ ដែលកំពុងឈរជើងនៅតាមតំបន់ព្រំដែន តំបន់ប្រាសាទព្រះវិហារ តំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ក្នុងបុព្វហេតុការពារបូរណភាពទឹកដី ឯករាជ្យ អធិបតេយ្យ និងការការពារសុខសន្តិភាពជូនជាតិ មាតុភូមិ និងប្រជាជនកម្ពុជា។ វីរភាពនេះពិតជាការលះបង់ខ្ពស់ដោយបានពលីជីវិត សាច់ស្រស់ ឈាមស្រស់ ដើម្បីប្តូរផ្តាច់ការពារ បូរណភាពទឹកដី និងអធិបតេយ្យជាតិ មាតុភូមិ ជាពិសេសបានធ្វើឱ្យប្រជាជនដែលនៅសមរភូមិក្រោយ មានក្តីអាណិត ស្រឡាញ់ និងគោរពដល់វីរភាពដ៏អង់អាចក្លាហាន និងបានឆ្លាក់ទុកនូវគំរូវីរភាពនេះក្នុងក្រអៅបេះដូងគ្មានថ្ងៃបំភ្លេចបានឡើយ។ ការណ៍នេះបានក្លាយជាកម្លាំងចលករមួយ និងស្មារតីជាតិនិយមគ្រប់ មជ្ឈដ្ឋានទាំងក្នុង និងក្រៅប្រទេស ដែលបង្កើតបានជាមហាសាមគ្គីជាតិដ៏ខ្លាំងក្លា មិនធ្លាប់មាននៅ ក្នុងប្រវត្តិសាស្ត្រកម្ពុជា។ជាមួយគ្នានេះ តំណាងសម្តេចប្រធានរដ្ឋសភា ឯកឧត្តម ឃួន ដាវិត បានមានប្រសាសន៍ថា សម្តេចប្រធានរដ្ឋសភា បានថ្លែងអំណរគុណ ជូនដល់អាជ្ញាធរគ្រប់លំដាប់ថ្នាក់ បើទោះបី ជាមិនបានចូលរួមប្រយុទ្ធផ្ទាល់នៅក្នុងសមរភូមិ ក៏ប៉ុន្តែបានលះបង់ទាំងកម្លាំងកាយ ស្មារតី និងពេលវេលា ដើម្បីរួមសុខរួមទុក្ខជាមួយកងទ័ព និងប្រជាជន ពិសេសជាមួយ ប្រជាជនភៀសសឹក និងបានផ្សព្វផ្សាយពីការវិវត្តន៍ថ្មីៗពីសភាពការណ៍ព្រំដែន ជូនដល់ប្រជាជន ដើម្បីរួមគ្នាអនុវត្ត ឱ្យបានខ្ជាប់ខ្ជួននូវចំណាត់ការ និងជឿជាក់ លើការដឹកនាំរបស់ថ្នាក់ដឹកនាំមាន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានិងជានាយអគ្គភស្តុភារកំពូល នៃកងយោធពលខេមរភូមិន្ទ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែនប្រកបដោយភាពហ្មត់ចត់ ឈ្លាសវៃ តាមរយៈការចរចាការទូត និងការប្រកាន់យកការដោះស្រាយ ជម្លោះស្របតាមច្បាប់អន្តរជាតិ អនុវត្តយ៉ាងម៉ឺងមាត់នូវបទឈប់បាញ់ ដើម្បីការពារសុវត្ថិភាព សុខសន្តិភាព អាយុជីវិតពលរដ្ឋ។ ថ្នាក់ដឹកនាំកម្ពុជាតែងតែតម្តល់ផលប្រយោជន៍ និងសេចក្តីសុខប្រជាពលរដ្ឋជាអាទិភាព។សូមជម្រាបថាអំណោយរបស់សម្តេចប្រធានរដ្ឋសភា ដែលចែកជូនវីរកងព័ទ និងពលរដ្ឋភៀសសឹកនៅក្នុងខេត្តឧត្តរមានជ័យ នៅក្នុងឱកាសនេះ មានថវិកាចំនួន១០៥លានរៀល ម៉ូតូ១២គ្រឿង អង្ករ១០០បាវ រួមនិងសម្ភារៈប្រើប្រាស់ និងគ្រឿងឧបភោគបរិភោគជាច្រើនទៀត។ អំណោយទំាងអស់នេះជារបស់សម្តចប្រធានរដ្ឋសភាផ្ទាល់ និងទទួលពីសប្បុរជនមួយចំនួន ផងដែរ៕

កម្ពុជាត្រៀមលក្ខណៈជាស្រេច ដើម្បីដោះស្រាយស្ថានភាពនៅក្នុងសង្គមទៅនិងការប្រែប្រួលក្នុងពិភពលោក

ភ្នំពេញ ៖ រាជរដ្ឋាភិបាលកម្ពុជាបានត្រៀមលក្ខណៈជាស្រេច ដោយគិតគូររៀបចំគោលនយោបាយជាតិ និងផែនការកែទម្រង់លើវិស័យសំខាន់ៗ ផ្សារភ្ជាប់នឹងចំណេះដឹងនិងប្រជាជន ដើម្បីដោះស្រាយស្ថានភាពជាក់ស្ដែងនៅក្នុងសង្គម ទប់ទល់នឹងការប្រែប្រួលដែលកំពុងប្រឈម នឹង បរិការណ៍នៅក្នុងពិភពលោក។ឯកឧត្ដមបណ្ឌិត វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្រ្តី ក្នុងវេទិកាគោលនយោ- បាយថ្នាក់ជាតិរបស់កម្មវិធីពន្លកចំណេះឆ្នាំ២០២៥ ស្តីពីការតាក់តែងគោលនយោបាយប្រកបដោយបរិយាបន្ននៅក្នុងបរិបទប្រែប្រួល៖ ការ ផ្សាភ្ជាប់ចំណេះដឹង គោលនយោបាយ និងមនុស្សជាតិ» នៅថ្ងៃទី៥ កញ្ញា ម្សិលមិញនេះ ឯកឧត្តមបានគូសរំលេចថា ការសម្រេចចិត្តជា គោលនយោបាយដែលផ្អែកលើភស្តុតាងនិងបរិយាបន្ន គឺមិនមែនជាតម្រូវការទេ តែគឺជាភាពចាំបាច់ដើម្បីពង្រឹងអភិបាលកិច្ចល្អ, នវានុវត្តន៍ ផ្នែកគោលនយោបាយ, សិនិទ្ធពលសង្គម, កាត់បន្ថយវិសមភាពនៃការអភិវឌ្ឍ, កសាងធម្មានុរូបភាពនិងទំនុកចិត្ត, មូលធនមនុស្ស និង ពង្រឹងភាពធន់នៃការអភិវឌ្ឍរបស់ប្រទេស។ ជាងនេះទៀត ផ្អែកលើឧត្ដមានុវត្ត និងបទពិសោធអន្តរជាតិការប្រើប្រាស់ភស្តុតាង ឬទិន្នន័យ ដែលអាចជឿទុកចិត្តបាន ត្រូវបានរួមបញ្ចូលទៅក្នុងកិច្ចពិភាក្សាដោយមានការចូលរួមពីបណ្ដាភាគីពាក់ព័ន្ធ, ធ្វើឱ្យរាជរដ្ឋាភិបាល នឹងមាន លទ្ធភាពខ្ពស់ ក្នុងការធ្វើការសម្រេចចិត្តជាគោលនយោបាយច្បាស់លាស់ គ្រប់ជ្រុងជ្រោយ និងមានលក្ខណៈបត់បែនតាមសភាពការណ៍ ជាក់ស្ដែង ព្រមទាំងអាចអនុវត្តបានប្រកបដោយប្រសិទ្ធភាព ក្នុងការឆ្លើយតបទៅនឹងតម្រូវការនៃការអភិវឌ្ឍប្រទេស។ឯកឧត្តមឧបនាយករដ្ឋមន្ត្រី បន្តថា ខណៈពិភពលោកកំពុងប្រឈមនឹងបរិការណ៍ដែលមានប្រែប្រួលយ៉ាងឆាប់រហ័ស ដែលមិន ធ្លាប់ឆ្លងកាត់ពីមុន កម្ពុជាបានឈានដល់ដំណាក់កាលថ្មីមួយនៃការអភិវឌ្ឍ ដែលទាមទារនូវការគិតគូរ រៀបចំតាក់តែងគោលនយោបាយ និងយុទ្ធសាស្រ្តនានា ប្រកបដោយភាពបន្សាំ និងការប្រមើលទៅមុខ ដើម្បីសម្រេចឱ្យបាននូវចក្ខុវិស័យកម្ពុជាឆ្នាំ២០៥០។ ឯកឧត្ដមបណ្ឌិត វង្សី វិស្សុត លើកឡើងបន្ថែមថា រាជរដ្ឋាភិបាលកម្ពុជាតែងតែធ្វើសេចក្ដីសម្រេចគោលនយោបាយ ដែលផ្អែកលើ ភស្តុតាង និងប្រកបដោយបរិយាបន្ន ដើម្បីធានាថាគោលនយោបាយរបស់យើង ពិតជាបម្រើសេចក្តីត្រូវការ និងបំណងប្រាថ្នារបស់ ប្រជាពលរដ្ឋកម្ពុជាគ្រប់រូប ជាពិសេសអ្នកដែលងាយរងគ្រោះបំផុតនៅចំពោះមុខភាពមិនប្រាកដប្រជា ជាក់ស្តែងរាជរដ្ឋាភិបាលនីតិកាល ទី៧ នៃរដ្ឋសភា បានបន្តប្ដេជ្ញាចិត្តឥតងាករេ ចំពោះការរៀបចំ និងការធ្វើសេចក្ដីសម្រេចចិត្តលើគោលនយោបាយនានាៗ ដោយផ្អែកលើ ភស្តុតាងផ្អែកលើទិន្នន័យលើការវិភាគ មិនផ្អែកលើអារម្មណ៍ និងមិនផ្អែកលើការស្រមើស្រមៃនោះឡើយ ក្នុងស្មារតីទទួលខុសត្រូវខ្ពស់ និងឆន្ទៈមោះមុតលើការអនុវត្តកិច្ចការកែទម្រង់ស៊ីជម្រៅ, រាជរដ្ឋាភិបាលកម្ពុជាបានដាក់ចេញនូវក្របខ័ណ្ឌតាមដានត្រួតពិនិត្យ និងវាយ តម្លៃការអនុវត្តយុទ្ធសាស្ត្របញ្ចកោណដំណាក់កាលទី១ ដែលជាឧបករណ៍ដ៏ចាំបាច់សម្រាប់ជំរុញ និងវាស់វែងសមិទ្ធកម្ម ជាពិសេស តាមដាន និងវាយតម្លៃ ព្រមទាំងការកែតម្រូវការអនុវត្តគោលនយោបាយរបស់រាជរដ្ឋាភិបាល ក្នុងគោលដៅសម្រេចបាននូវគោលបំណង នៃគោលនយោបាយ ក៏ដូចជាពង្រឹងគណនេយ្យភាពរបស់ក្រសួង-ស្ថាប័នពាក់ព័ន្ធចំពោះរាជរដ្ឋាភិបាល ហើយម្ខាងទៀត ក៏ដើម្បីធានាការ កសាង និងពង្រឹងមូលដ្ឋានគ្រឹះនៃការអភិវឌ្ឍ សំដៅឆ្ពោះទៅសម្រេចឱ្យបាននូវចក្ខុវិស័យកម្ពុជឆ្នាំ២០៥០៕អត្ថបទ៖ សុន រ៉ាឌី

កម្ពុជានឹងបញ្ជូនគ្រាប់ស្វាយចន្ទីចំនួន១កុងតឺនឺរថែមទៀតទៅកាន់ម៉ាឡេស៊ីនិងសិង្ហបុរី ខណៈ១៤តោនបាននាំចេញទៅអ៊ីតាលី

ភ្នំពេញ៖ ខណៈដែលកម្ពុជាទើបសម្រេចបានជោគជ័យក្នុងការនាំចេញគ្រាប់ស្វាយចន្ទីកែច្នៃចំនួន ១៤តោន ទៅកាន់ប្រទេសអ៊ីតាលី។ នៅខែតុលាខាងមុខនេះ កម្ពុជាក៏គ្រោងនឹងនាំចេញបន្ថែមទៀតចំនួនមួយកុងតឺនឺរ ទៅកាន់ប្រទេសម៉ាឡេស៊ី និងប្រទេសសិង្ហបុរី។លោកស្រី សម្បតិ កល្យាណ នាយិកាប្រតិបត្តិក្រុមហ៊ុន អ៊ែមភល អាហ្រ្គោប្រដាក់ ឯ.ក បានមានប្រសាសន៍ឱ្យដឹងថា ដោយសារមានការជួយជ្រោមជ្រែងរបស់រាជរដ្ឋាភិបាលកម្ពុជា ក៏ដូចជាមានដៃគូអភិវឌ្ឍន៍នានា ការនាំចេញគ្រាប់ស្វាយចន្ទីនេះ បន្ទាប់ពីប្រទេសអ៊ីតាលី នឹងមានគម្រោងនាំចេញទៅកាន់ប្រទេសម៉ាឡេស៊ី និងសិង្ហបុរីក្នុងខែតុលា។ លោកស្រីបានបន្ថែមថា ការនាំចេញទៅកាន់ចក្រភពអង់គ្លេស ក៏គ្រោងធ្វើនៅខែវិច្ឆិកាផងដែរ។ លោកស្រី បានឱ្យដឹងទៀតថា ការនាំចេញទៅកាន់ទីផ្សារអ៊ឺរ៉ុបបានលើសពី ១០០តោនរួចទៅហើយ ខណៈដែលជាច្រើនរយតោនត្រូវបាននាំចេញទៅកាន់ប្រទេសអាស៊ីផ្សេងទៀត។ បច្ចុប្បន្ន ការនាំចេញគ្រាប់ស្វាយចន្ទីរបស់កម្ពុជាទៅកាន់ទីផ្សារអន្តរជាតិមានសក្ដានុពលខ្លាំងក្នុងការបង្កើតប្រាក់ចំណូលដ៏ច្រើនសម្រាប់សេដ្ឋកិច្ចជាតិ។ ប៉ុន្តែបញ្ហាប្រឈមចំពោះមុខ គឺកង្វះសមត្ថភាពកែច្នៃ។ លោកស្រី បានបញ្ជាក់ថា ការជំរុញការកែច្នៃក្នុងស្រុកកាន់តែច្រើន នឹងជួយដល់កសិករ និងវិស័យកសិកម្មកម្ពុជាតាមរយៈការបន្ថែមតម្លៃដល់ផលិតផលរបស់ពួកគេ ព្រមទាំងរួមចំណែកដល់កំណើនសេដ្ឋកិច្ចជាតិផងដែរ ខណៈគោលដៅរបស់រដ្ឋាភិបាល គឺបង្កើនការកែច្នៃក្នុងស្រុកដល់ ២៥% នៅឆ្នាំ២០២៧ និង ៥០% នៅឆ្នាំ២០៣២ បើធៀបនឹងកែច្នៃនាពេលបច្ចុប្បន្នបានត្រឹមតែ ៥%។លោក អាន តារា ប្រធានក្រុមប្រឹក្សាភិបាលនៃសហព័ន្ធស្វាយចន្ទីកម្ពុជា បានឱ្យដឹងថា គិតត្រឹមខែមិថុនា ឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅទៅប្រទេសវៀតណាមបានជាង ៩១០,០០០ តោន ដែលមានតម្លៃជាង ១ ប៊ីលានដុល្លារ ដោយមិនរាប់បញ្ចូលការកែច្នៃក្នុងស្រុក និងការនាំចេញទៅកាន់ប្រទេសដទៃទៀត។ លោកបានកត់សម្គាល់ថា ស្វាយចន្ទីជាដំណាំយុទ្ធសាស្ត្រអាទិភាពដែលមានសក្ដានុពលខ្លាំងក្នុងការចូលរួមចំណែកដល់កំណើនសេដ្ឋកិច្ច ការអភិវឌ្ឍន៍សង្គម និងចីរភាពបរិស្ថានរបស់កម្ពុជា។ បច្ចុប្បន្ននេះ គ្រាប់ស្វាយចន្ទីកម្ពុជាជាប់ចំណាត់ថ្នាក់លេខ១ លើពិភពលោកសម្រាប់គុណភាព និងលេខ២ លើការផលិត។យោងតាមក្រសួងពាណិជ្ជកម្ម គិតត្រឹមឆមាសទី១ ឆ្នាំ២០២៥ កម្ពុជារកចំណូលបានជាង ៧៥៣ លានដុល្លារ ពីការនាំចេញគ្រាប់ស្វាយចន្ទីប្រមាណ ៦០ ម៉ឺនតោន កើនឡើង ៥៦,៦៧% ធៀបនឹងរយៈពេលដូចគ្នាកាលពីឆ្នាំ២០២៤ ដែលមានទឹកប្រាក់ ៤៨០ លានដុល្លារ៕អត្ថបទ៖ ឈិត បូរ៉ាវី

EU អំពាវនាវឱ្យអនុលោមតាមបទឈប់បាញ់កម្ពុជា-ថៃ និងគាំទ្រតួនាទីសន្តិភាពរបស់អាស៊ាន

អ្នកនាំពាក្យសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោកស្រី Anitta Hipper បានសរសេរនៅលើបណ្តាញសង្គម Twitter របស់លោកស្រី អំពីស្ថានភាពព្រំដែនរវាងកម្ពុជា-ថៃនាពេលបច្ចុប្បន្ន ដោយជំរុញឱ្យប្រទេសទាំងពីរអនុវត្តកិច្ចព្រមព្រៀងឈប់បាញ់ឱ្យបានពេញលេញ គោរពច្បាប់អន្តរជាតិ និងជៀសវាងសកម្មភាពណាមួយដែលធ្វើឱ្យបញ្ហាកើនឡើង។ លើសពីនេះ លោកស្រីក៏បានអះអាងសារជាថ្មីនូវការគាំទ្ររបស់សហភាពអឺរ៉ុបសម្រាប់ការធ្វើជាប្រធានអាស៊ានរបស់ម៉ាឡេស៊ីក្នុងការជំរុញសន្តិភាព និងស្ថិរភាពយូរអង្វែង៕

កម្ពុជា មានបំណងពង្រីកនិងពង្រឹងកសិ-ពាណិជ្ជកម្មរ ជាមួយ អាហ្វ្រិកខាងត្បូង

ភ្នំពេញ ៖ កាលពីរសៀលថ្ងៃទី៥ កញ្ញា ឆ្នាំ២០២៥ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ទទួលជួបជាមួយ ឯកឧត្តម Darkey Africa ឯកអគ្គរដ្ឋទូតអាហ្វ្រិកខាងត្បូងប្រចាំកម្ពុជា ដេីម្បីពិភាក្សាការងារមួយចំនួនពាក់ព័ន្ធវិស័យកសិកម្ម។ យោងតាមក្រសួងកសិកម្ម រុក្ខាប្រមាញ់ និងនេសាទ ក្រោយចប់ជំនួបការងារ បានឱ្យដឹងថា នាឱកាស ឯកឧត្តមរដ្ឋមន្ត្រី បានសម្តែងការស្វាគមន៍ក្នុងការបង្កេីតកិច្ចសហប្រតិបត្តិការក្នុងវិស័យកសិកម្ម និងមានបំណងចង់ផ្សព្វផ្សាយអំពីកសិផលសក្តានុពលរបស់កម្ពុជា ជូនដល់វិនិយោគិន និងធុរជនអាហ្រ្វិកខាងត្បូង ដេីម្បីពង្រីកនិងពង្រឹងកសិ-ពាណិជ្ជកម្មរវាងប្រទេសទាំងពីរ។ជាទីបញ្ចប់ ឯកឧត្តមរដ្ឋមន្ត្រី បានលេីកឡេីងពីការរៀបចំកម្មវិធីវេទិកានិងពិព័រណ៍កសិកម្មកម្ពុជា ២០២៥ (CAFE25) នាពេលខាងមុខនេះដែលជាកម្មវិធីសម្រាប់ផ្សារភ្ជាប់ការវិនិយោគនិងពាណិជ្ជកម្ម ក្នុងវិស័យកសិកម្ម ហើយបានអញ្ជើញគណៈប្រតិភូ ព្រមទាំងវិនិយោគិននិងធុរជនអាហ្វ្រិកខាងត្បូងឱ្យចូលរួម ដេីម្បីស្វែងយល់ពីកសិផលសក្តានុពលកម្ពុជា សំដៅបង្កើនការវិនិយោគកសិ-ពាណិជ្ជកម្មរវាងប្រទេសទាំងពីរ៕អត្ថបទ៖ ឈិត បូរ៉ាវី

ពុទ្ធបដិមាធ្វើអំពីស្ពាន់ទម្ងន់៩តោនបានរៀបចំពុទ្ធាភិសេករួចរាល់ ដើម្បីទុកជាកេតនភណ្ឌដ៏ពិសិដ្ឋ

គណៈសង្ឃជាន់ខ្ពស់ទាំង២គណៈ នៃព្រះរាជាណាចក្រកម្ពុជា និងឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា យាង និមន្តនិងអញ្ជើញ ក្នុងពិធីក្រុងពាលី និងពុទ្ធាភិសេក ព្រះពុទ្ធបដិមាដ៏ធំស្កឹមស្កៃ គង់លើសុវណ្ណអសនៈផ្កាឈូក តម្កល់នៅទីតាំងកណ្ដាលស្ថានីយ៍អ្នកដំណើរ (Terminal) នៃអាកាសយានដ្ឋានអន្តរជាតិតេជោ ដែលស្ថិតនៅក្រុងតាខ្មៅ ខេត្តកណ្តាល នារសៀលថ្ងៃទី ៥ ខែកញ្ញា ឆ្នាំ២០២៥ ។ពិធីនេះមានការយាង និមន្ត និងអញ្ជើញចូលរួមពីសំណាក់ សមេ្តចព្រះអភិសិរីសុគន្ធាមហាសង្ឃរាជាធិបតីកិត្តិឧទេ្ទសបណ្ឌិត បួរ គ្រី សមេ្តចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា , សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា, សម្តេចជាអម្ចាស់ , សម្តេចសង្ឃតាមឋានានុក្រម ព្រះមន្រ្តីសង្ឃ ឯកឧត្តម លោកជំទាវ ថ្នាក់ដឹកនាំក្រសួងធម្មការនិងសាសនា, ថ្នាក់ដឹកនាំអាកាសចរណ៏សុីវិល អ្នកឧកញ៉ា ពុង ឃាវ សែ ប្រធានក្រុមប្រឹក្សាក្រុមហ៊ុន OCIC និងអ្នកឧកញ៉ា ឆារស៍ វ៉ាន់ នាយកគ្រប់គ្រងក្រុមហ៊ុន Cambodia Airport Investment និងបុគ្គលិកនៃអាកាសយានដ្ឋានជាច្រើនរូបទៀត ។នាឱកាសដ៏វិសេសវិសាលនេះ សមេ្តចព្រះអភិសិរីសុគន្ធាមហាសង្ឃរាជាធិបតីកិត្តិឧទេ្ទសបណ្ឌិត បួរ គ្រី និង សម្តេចព្រះមហាសុមេធាធិបតី កិត្តិបណ្ឌិត អំ លីមហេង ព្រមទាំង សម្តេចជាអម្ចាស់ , សម្តេចសង្ឃតាមឋានានុក្រម ព្រះមន្រ្តីសង្ឃ បានយាង និងនិមន្ត ប្រោះព្រំប្រសិទ្ធពរជ័យមង្គល វិបុលសុខ ពិសេសសូមបួងសួងដល់ព្រះតេជៈបារមីព្រះពុទ្ធជាម្ចាស់ តាមបីបាច់ថែរក្សាដល់ថ្នាក់ដឹកនាំ នៃព្រះរាជាណាចក្រកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភានៃព្រះរាជណាចក្រកម្ពុជា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ព្រមទាំងថ្នាក់ដឹកនាំកម្ពុជាគ្រប់លំដាប់ថ្នាក់ ប្រជាជនកម្ពុជាទូទាំងប្រទេស និងភ្ញៀវទេសចរជាតិ-អន្តរជាតិ ជួបប្រទះតែសេចក្តីសុខ ចម្រុងចម្រើនគ្រប់ប្រការ ។ពិធីក្រុងពាលី និងពុទ្ធាភិសេក ព្រះពុទ្ធបដិមាដ៏ធំស្កឹមស្កៃ គង់លើសុវណ្ណអសនៈផ្កាឈូក នៅកណ្ដាលអាកាសយានដ្ឋានតេជោននេះ មានកម្ពស់ដល់៩ម៉ែត្រ មានទម្ងន់៩តោនកសាងពីស្ពាន់និងលោហៈធាតុ រចនាបថខ្មែរ ក្រោមការយកចិត្តទុកដាក់ស្រាវជ្រាវរបស់ថ្នាក់ដឹកនាំជំនាញរបស់ក្រសួងធម្មការនិងសាសនា ដែលដឹកនាំដោយឯកឧត្តម រដ្ឋមន្រ្តី ចាយ បូរិន ដែលចង់បង្ហាញដល់ភ្ញៀវទេសចរជាតិ និង អន្តរជាតិ ស្គាល់កាន់តែច្បាស់ពីប្រទេសកម្ពុជា លើវប្បធម៌ ប្រពៃណី សាសនា និងគុណតម្លៃព្រះពុទ្ធសាសនា ដែលជាសាសនារបស់រដ្ឋ ហើយបន្តជួយផ្សព្វផ្សាយទៅពិភពលោកកាន់តែទូលំទូលាយ ។ក្នុងន័យនេះព្រះពុទ្ធសាសនា ដែលជាសាសនារបស់រដ្ឋ បានដើរតួនាទីយ៉ាងសំខាន់ ក្នុងការអប់រំចិត្តគំនិត សីលធម៌រស់នៅក្នុងសង្គម តាមរយះពុទ្ធឱវាទ ព្រះសម្មាសម្ពុទ្ធព្រះបរមគ្រូនៃយើង ដែលប្រជាពលរដ្ឋកម្ពុជាប្រមាណ៩៥%គោរពប្រតិបត្តិ គ្រប់ទីកន្លែង ទាំងក្នុងនិងក្រៅប្រទេស។សូមជម្រាបជូនថា អាកាសយានដ្ឋានអន្តរជាតិតេជោ ដែលគ្រោងនឹងបើកឱ្យប្រតិបត្តិការទទួលអ្នកដំណើរផ្លូវអាកាសចេញ-ចូលប្រទេសកម្ពុជា នៅថ្ងៃទី៩ ខែកញ្ញា ឆ្នាំ២០២៥ និងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ខាងមុខ លើផ្ទៃដី ២.៦០០ហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ ៕

កម្ពុជា-ឡាវ និងអង្គការ JICAបានចុះអនុស្សរណៈយោគយល់គ្នាលើវិស័យសកម្មភាពមីននិងយុទ្ធភណ្ឌមិនទាន់ផ្ទុះ

នៅព្រឹកថ្ងៃទី០៥ ខែកញ្ញា ឆ្នាំ២០២៥ នៅទីបញ្ជាការស៊ីម៉ាក់ភ្នំពេញ ឯកឧត្តម ហេង រតនា អគ្គនាយកស៊ីម៉ាក់កម្ពុ ជា និងលោកស្រី Eri Komukai ទីប្រឹក្សាជាន់ខ្ពស់នៃទីភ្នាក់ងារសហប្រតិបត្តិការអន្តរជាតិជប៉ុន(JICA)មកពីក្រុងតូក្យូ រួមជាមួយលោក Saomany Manivong នាយករងអង្គភាពជាតិបោសសម្អាតយុទ្ធភណ្ឌមិនទាន់ផ្ទុះនៃប្រទេសឡាវ (UXO-Lao) បានចុះហត្ថលេខាលើអនុស្សរណៈនៃការយោគយល់ រវាងអង្គភាពCMAC អង្គការ JICA និងអង្គភាពUXO Lao សម្រាប់គាំទ្រកិច្ចសហប្រតិបត្តិការត្បូង-ត្បូង រវាងប្រទេសឡាវ-កម្ពុជា លើវិស័យសកម្មភាពមីននិងយុទ្ធភណ្ឌមិនទាន់ផ្ទុះ។ កិច្ចសហការប្រតិបត្តិការនេះ ត្រូវអនុវត្តក្រោមគម្រោងការអភិវឌ្ឍន៍ធនធានមនុស្សដើម្បីពង្រឹងសមត្ថភាពអង្គភាពUXO Lao និងគម្រោងការពង្រឹងមុខងារអង្គភាពCMAC ដំណាក់កាលទី២ ដែលមានមានរយៈពេល៣ឆ្នាំ ចាប់ពីខែកញ្ញា ឆ្នាំ២០២៥ ដល់ខែមិថុនា ឆ្នាំ២០២៨ ដោយផ្តោតលើចំណុចសំខាន់ចំនួន២ គឺ ១ការបង្កើត និងការផ្សព្វផ្សាយផែនការយុទ្ធសាស្រ្តរយៈពេលវែងរបស់អង្គភាព UXO Lao (ឆ្នាំ២០២៧-២០៣៦) រួមទាំងការកៀរគរជំនួយ និងទំនាក់ទំនងសាធារណៈ និង២ការអនុវត្តផែនការយុទ្ធសាស្ត្ររបស់អង្គភាពCMAC។ សូមជម្រាបជូនថា តាមរយៈកិច្ចសហប្រតិបត្តិការត្បូង-ត្បូងដូចគ្នានេះ អង្គភាពCMAC ធ្លាប់បានផ្តល់ការហ្វឹកហ្វឺនដល់អង្គភាពUXO Lao បានចំនួន១៥វគ្គកន្លងមកហើយដែលមានសិក្ខាកាមចូលរួមសរុបចំនួន២៣៥រូប៕

កម្ពុជា ប្រទេសចុងក្រោយដែលមានសត្វត្មាត ខណៈប្រទេសជិតខាងបានផុតពូជសត្វត្មាត

ប្រទេសកម្ពុជាបានក្លាយជាបន្ទាយចុងក្រោយសម្រាប់ទ្រទ្រង់ប្រភេទសត្វត្មាតដែលនៅសេសសល់ ខណៈសត្វត្មាតនៅប្រទេសជិតខាងត្រូវបានផុតពូជ។ លទ្ធផលជំរឿនត្មាតនៅតាមទីតាំងអាហារដ្ឋានត្មាតទូទាំងប្រទេស កត់ត្រាបានត្មាតសរុបចំនួន ១៤៣ក្បាល ដែលជាលទ្ធផលខ្ពស់បំផុត បើគិតចាប់តាំងពីឆ្នាំ២០១៩។ សំបុកត្មាតសរុបមានចំនួន ១៩សំបុក ត្រូវបានរកឃើញ ធ្វើការអង្កេតតាមដាន និងការពារក្នុងឆ្នាំ២០២៤ ជាលទ្ធផលកូនចំនួន ១៦ក្បាលបានញាស់ និងហើរចេញពីសំបុកយ៉ាងជោគជ័យ។ តាមរយៈ របាយការណ៍លទ្ឋផលប្រចាំឆ្នាំ២០២៤ របស់ក្រុមការងារអភិរក្សសត្វត្មាតនៅកម្ពុជា បានរំលេចពីសកម្មភាពអភិរក្សសំខាន់ៗជាច្រើន ដែលក្រុមការងារអភិរក្សត្មាតនៅកម្ពុជាបានអនុវត្តដូចជា ការផ្តល់ចំណីបន្ថែម ឬការធ្វើ "អាហារដ្ឋានសត្វត្មាត" គឺជាសកម្មភាពសំខាន់បំផុត ដើម្បីធានាថា រាល់សាកសពសត្វដែលផ្តល់ជាអាហារបន្ថែមសម្រាប់សត្វត្មាតគឺមានសុវត្ថភាព គ្មានការបំពុល។ ក្នុងឆ្នាំ២០២៤ សាកសពគោចំនួន ១២៦ក្បាល ត្រូវបានផ្តល់ជាអាហារដល់សត្វត្មាតនៅតាមអាហារដ្ឋានត្មាតទាំងអស់ដែលមាន ពោលគឺជាចំនួនសាកសពគោដែលផ្តល់ឱ្យសត្វត្មាតដ៏ច្រើនមិនធ្លាប់មាន ក្នុងនោះអាហារដ្ឋាននៅដែនជម្រកសត្វព្រៃសៀមបាង នាខេត្តស្ទឹងត្រែង ផ្តល់សាកសពគោ ៥២ក្បាល អាហារដ្ឋានត្មាតដែនជម្រកសត្វព្រៃឆែប ផ្តល់ ៤៧ក្បាល ដោយលែកឡែកសាកសពគោ ២៧ក្បាល ទៀតត្រូវបានផ្តល់នៅអាហារដ្ឋានបីទៀតគឺ ដែនជម្រកសត្វព្រៃសំបូរ ដែនជម្រកសត្វព្រៃលំផាត់ និងដែនជម្រកសត្វព្រែស្រែពក។ទោះបីជាមានការខិតខំប្រឹងប្រែងអភិរក្សយ៉ាងខ្លាំងក៏ដោយ ក៏សត្វត្មាតនៅក្នុងប្រទេសកម្ពុជាមិនទាន់ចេញផុតពីស្ថានភាពគ្រោះថ្នាក់ឈានទៅផុតពូជនៅឡើយទេ។ ការរស់រានមានជីវិតរបស់ពួកគេអាស្រ័យទៅលើកិច្ចសហការអភិរក្ស និងការឆ្លើយតបទៅនឹងកត្តាគំរាមកំហែងបន្ទាន់។ របាយការណ៍ឆ្នាំ២០២៤ នេះសង្កត់ធ្ងន់អំពីតម្រូវការក្នុងការពង្រឹងការអនុវត្តច្បាប់ដើម្បីដោះស្រាយបញ្ហាបំពុលសត្វព្រៃ ការពង្រឹងកិច្ចសហការជាមួយសហគមន៍មូលដ្ឋាន និងតម្រូវការមូលនិធិរយៈពេលវែង ដើម្បីបន្តអនុវត្តផែនការអភិរក្ស។គួរបញ្ជាក់ថា អស់រយៈពេលជាង ២០ឆ្នាំមកនេះ ប្រទេសកម្ពុជាគឺជាទីជម្រកដ៏សំខាន់សម្រាប់សត្វត្មាតដែលងាយរងគ្រោះ និងជិតផុតពូជបំផុត ដែលមានសេសសល់នៅអាស៊ីអាគ្នេយ៍។ សត្វត្មាតទាំងនោះរួមមាន៖ ត្មាតផេះ (Gyps bengalensis) ត្មាតត្នោត (Gyps tenuirostris) និងត្មាតភ្លើង (Sarcogyps calvus)។របាយការណ៍លទ្ឋផលប្រចាំឆ្នាំ២០២៤ របស់ក្រុមការងារអភិរក្សសត្វត្មាតនៅកម្ពុជា ជាលទ្ធផលថ្នាក់ជាតិដែលបានមកពីកិច្ចខិតខំប្រឹងប្រែងរបស់សមាជិកក្រុមការងារអភិរក្សសត្វត្មាតនៅកម្ពុជារួមមាន៖ ក្រសួងបរិស្ថាន អគ្គនាយកដ្ឋានតំបន់ការពារធម្មជាតិ រដ្ឋបាលព្រៃឈើ នាយកដ្ឋានសុខភាពសត្វ និងផលិតកម្មសត្វ មជ្ឈមណ្ឌលអង្គរសម្រាប់ការអភិរក្សជីវៈចម្រុះ អង្គការជីវិតធម្មជាតិនៅកម្ពុជា អង្គការសមាគមអភិរក្សសត្វព្រៃ មូលនិធិសាកលសម្រាប់ធានធានធម្មជាតិ, សំ វាសនា ខន់សឺវេសិនធួរ, សមាគមមគ្គុទ្ទេសក៍សត្វស្លាបកម្ពុជា និងមជ្ឈមណ្ឌលអភិរក្សជីវៈចម្រុះ៕

ការថែទាំខួបផ្លូវជារឿងចាំបាច់ សម្រួលដល់ការធ្វើដំណើរ និងការប្រកបមុខរបរផ្សេងៗរបស់ប្រជាពលរដ្ឋ

ក្រសួងអភិវឌ្ឍន៍ជនបទ ចាត់ទុកការស្ថាបនាផ្លូវ ស្តារ ថែទំា និងការកែលម្អហេដ្ឋរចនាសម្ព័ន្ធតាមជនបទ ជារឿងដ៏ចាំបាច់ ដើម្បីសម្រួល ដល់ការធ្វើដំណើរ ការប្រកបមុខរបរផ្សេងៗជាដើម ដែលនេះជាការចូលរួមលើកកម្ពស់កម្រិតជីវភាពរស់នៅ របស់បងប្អូនប្រជាពលរដ្ឋ ឱ្យកាន់តែប្រសើរ ។ ឯកឧត្តម ផូ ផារិទ្ធ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើកឡើងក្នុងការ ចុះត្រួតពិនិត្យ និងវាយតម្លៃ លើការងារថែខួបផ្លូវចំនួន ៣ខ្សែ ក្រាលល្បាយក្រួសប្រវែងជិត ១៩ គីឡូម៉ែត្រ ទទឹង ៦ ម៉ែត្រ និងសំណង់ សិល្បការ្យផ្សេងៗស្ថិតនៅក្នុង ក្រុងស្ទឹងសែន និងស្រុកកំពង់ស្វាយ ខេត្តកំពង់ធំ នៅថ្ងៃទី៥ ខែកញ្ញា ឆ្នាំ២០២៥នេះថា ក្រសួងអភិវឌ្ឍន៍- ជនបទ ក្នុងនាមជាសេនាធិការផ្ទាល់របស់រាជរដ្ឋាភិបាលកម្ពុជា បាននិងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ក្រាលកៅស៊ូពីរជាន់ ឬបេតុង ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ កាត់បន្ថយពេលវេលា និងកាត់បន្ថយចំណាយលើការដឹកជញ្ជូនកសិផល និងទំនិញផ្សេងៗជាដើម។ ឯកឧត្តមរដ្ឋលេខាធិការ លើកឡើងបន្ថែមថា ជុំវិញការអភិវឌ្ឍហេដ្ឋារចនាសម្ព័ន្ធជនបទនេះ ឯកឧត្តម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ បានយកចិត្តទុកដាក់យ៉ាងខ្លាំង ដោយឯកឧត្តមតែងតែអញ្ជើញចុះពិនិត្យមើលជាប្រចាំ លើការងារស្ថាបនា ការស្តារ ការថែទាំ និងការកែលម្អហេដ្ឋារចនាសម្ព័ន្ធ ដើម្បីធ្វើយ៉ាងណាជំរុញស្ថាបនា ជាពិសេសការស្ថាបនាផ្លូវជនបទ ឱ្យឆ្លើយតបទៅនឹង តម្រូវការជូនប្រជាពលរដ្ឋ។ ឯកឧត្តមក៏បានថ្លែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងនាយកដ្ឋានផ្លូវលំជនបទ នៅលើការងារថែទាំផ្លូវខាងលើនេះផងដែរ។ក្នុងការចុះត្រួតពិនិត្យផ្លូវខាងលើនេះដែរ, ឯកឧត្តម ផូ ផារិទ្ធ ក៏បានលើកឡើងពីគុណបំណាច់របស់រដ្ឋាភិបាល ក្រោមការដឹកនាំ ប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងបន្តដឹក នាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី, សម្តេចទាំងទ្វេបានខិតខំប្រឹងប្រែងយ៉ាងខ្លាំង ដើម្បីជំរុញការអភិឌ្ឍន៍ ប្រទេសឱ្យកាន់តែរីកចម្រើន ព្រោះការអភិវឌ្ឍហេដ្ឋារចនាសម្ព័ន្ធ និងគមនាគមន៍ជនបទនេះ គឺជាគន្លឹះគាំទ្រនិងលើកកម្ពស់ដល់ការរស់ នៅរបស់ប្រជាជននៅតាមជនបទឱ្យមានជីវភាពកាន់តែធូធារ៕អត្ថបទ៖ សុន រ៉ាឌី

ស.ស.យ.ក ត្រៀមរៀបចំកម្មវិធីពិព័រណ៍ផលិតខ្មែរដើម្បីពលរដ្ឋបង្ហាញមោទនភាពជាតិ

នៅថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៥ ខាងមុខនេះសហភាពសហព័ន្ធយុវជនកម្ពុជា នឹងរៀបចំកម្មវិធីពិព័រណ៍ផលិតផលខ្មែរ ដែលជាកម្មវិធីមួយបន្ថែមទៀត ដើម្បីផ្តល់វេទិកាសម្រាប់បងប្អូនចូលរួមបង្ហាញមោទនភាពជាតិរបស់ខ្លួន នៅមជ្ឈមណ្ឌលសន្និបាត និងពិពរណ៌កោះពេជ្រ អាគារ(G-L)។កន្លងទៅ កាលពីខែមិថុនា និងកក្កដា កន្លងទៅ ប្រជាពលរដ្ឋទាំងអស់គ្នាបានមកជួបជុំគ្នា ក្នុងស្មារតីរួបរួមសាមគ្គីគ្នា ដើម្បីបង្ហាញមោទនភាពជាតិខ្មែរយ៉ាងច្រើនកុះករ។ ក្តីស្រលាញ់ ទឹកចិត្ត និងឆន្ទៈរបស់ជនរួមជាតិខ្មែរពីគ្រប់ទិសទី សរបញ្ជាក់នូវកម្លាំងរួបរួមនៃមហាគ្រួសារខ្មែរ នៅកាលៈទេសៈដែលប្រទេសជាតិត្រូវការ។ ក្នុងនាមជាអ្នកផ្តួចផ្តើមគំនិតរៀបចំព្រឹត្តិការណ៍ទាំង២ ស.ស.យ.ក. មានមោទនភាពដោយបានចូលរួមចំណែកផ្តល់ជាវេទិកាបង្ហាញទឹកចិត្តស្នេហាជាតិ ក្រោមរូបភាពខឿនការពារជាតិប្រជាជន។

បណ្ដាញសង្គម

ព័ត៌មានថ្មីៗ

នាយករដ្ឋមន្ត្រីអេស្ប៉ាញ ហៅអតុល្យភាពពាណិជ្ជកម្មរបស់ចិនជាមួយ EUថា «មិននាំមកនូវវឌ្ឍនភាពទេ »

លោក TRUMP និយាយថា អាមេរិកនឹងពិនិត្យឡើងវិញយ៉ាងហ្មត់ចត់នូវគោលនយោបាយរបស់ខ្លួន នៅក្នុងណាតូ

ស្វ៊ីសត្រៀមខ្លួនរួចជាស្រេច ដើម្បីធ្វើជាអ្នកសម្របសម្រួលរវាងអាមេរិក និងអ៊ីរ៉ង់ បន្ទាប់ពីកិច្ចចរចានៅប៉ាគីស្ថាន

នាយករដ្ឋមន្ត្រីលីបង់និយាយថា លោកកំពុងធ្វើការ ដើម្បីសម្រេចបាននូវការដកកងទ័ពអ៊ីស្រាអែល

មនុស្ស ២៤ នាក់ ត្រូវបានចាប់ខ្លួននៅគូវ៉ែតពីបទ «ផ្តល់ហិរញ្ញប្បទានដល់ភេរវកម្ម»

រដ្ឋមន្ត្រីការពារជាតិអ៊ីស្រាអែល៖ ប្រតិបត្តិការរុះរើ កំពុងដំណើរការតាមបណ្តោយព្រំដែនអ៊ីស្រាអែល-លីបង់

ប្រធានាធិបតីគុយបាព្រមានអាមេរិកកុំឲ្យវាយប្រហារកោះនេះ ឬព្យាយាមទម្លាក់លោកពីតំណែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877