នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ខេត្តតាកែវទទួលបានភ្ញៀវទេសចរណ៍ជិត១លានាក់ក្នុងរយ:ពេល៣ថ្ងៃនៃពិធីបុណ្យចូលឆ្នាំខ្មែរ
ភ្ញៀវទេសចរជិត ២លាននាក់ ទៅទស្សនាខេត្ដសៀមរាប នាឱកាសចូលឆ្នាំថ្មីរយៈពេលបីថ្ងៃ
ស្នងការនគរបាលរាជធានីភ្នំពេញ ប្រជុំពង្រឹងសន្តិសុខ សណ្ដាប់ធ្នាប់ សុវត្ថិភាពបន្ថែមជូន ភ្ញៀវជាតិ និងអន្តរជាតិ ដែលមកដើរលេងកំសាន្តសប្បាយ
បីថ្ងៃនៃពិធីបុណ្យចូលឆ្នាំថ្មី ប្រពៃណីជាតិខ្មែរ ប្រជាពលរដ្ឋ និងភ្ញៀវទេសចរមកលេងកម្សាន្តនៅរមណីយដ្ឋានព្រែកកាំពីរ យ៉ាងច្រើនកុះករ

ព័ត៌មានជាតិ

ICRC​ ប្រគល់សារដំណឹង​គ្រួសារវីរយុទ្ធជនទាំង១៨នាក់ជូន​ CRC

2025/09/09 01:48:12 pm        272
Facebook Telegram Linkin
នៅទីស្នាក់ការកណ្តាលកាកបាទក្រហមកម្ពុជា​ កាលពីរសៀលថ្ងៃទី៨​ ខែកញ្ញា​ ឆ្នាំ២០២៥​ លោកជំទាវ​ ពុំ​ ចន្ទីនី​ អគ្គលេខាធិការ​ កាកបាទក្រហមកម្ពុជា​ និងសហការី​ បានទទួលជួបសវនាការ​ និងពិភាក្សាការងារជាមួយ​ គណ:ប្រតិភូគណ:កម្មាធិការ អន្តរជាតិ នៃកាកបាទក្រហម​ ហៅកាត់ថា (​ ICRC ) ដឹកនាំដោយ លោក​ ចូង ម៉ុងតានី​ (​ Jurg Montani​ )​ ប្រធានប្រចាំតំបន់ដែលមានទីតាំងនៅទីក្រុងបាងកក ប្រទេសថៃ​។ បើយោងតាមឯកឧត្តម​ យូ​ ឡាណា​ អគ្គលេខាធិការរងទី២​ កាកបាទក្រហមកម្ពុជា​ បានមានប្រសាសន៍​ថា​៖​ ក្នុងជំនួបនេះ​ ICRC បានប្រគល់សារដំណឹងគ្រួសារ ពីវីរ:យុទ្ធជនទាំង១៨នាក់​ ប្រគល់ជូន​ កាកបាទក្រហមកម្ពុជា​ (​ CRC ) ដើម្បីបន្តនាំយកទៅជូនដល់ផ្ទាល់ដៃគ្រួសារវីរ:យុទ្ធជនទាំង១៨នាក់​ក្នុងប្រទេសកម្ពុជា​។ ក្នុងឱកាសនោះដែរ លោកជំទាវ ពុំ ចន្ទីនីអគ្គលេខាធិការ កាកបាទក្រហមកម្ពុជាក៏បានជម្រាបជូនទៅ ប្រធាន ICRC អំពីការងាររបស់ កាកបាទក្រហមកម្ពុជា ព្រមទាំងការឆ្លើយតប នឹងការជួយផ្ដល់ស្បៀងអាហារដល់ជនភៀសសឹក។ ទន្ទឹមហ្នឹងនោះក៏មានការចុះអប់រំសុខភាពហើយនិងបណ្ដុះបណ្ដាល អ្នកស្ម័គ្រចិត្តនិង យុវជន កាកបាទក្រហម នៅតាមសុខភាព និង សហគមន៍មួយចំនួនផងដែរ ជាពិសេសអប់រំអំពីគ្រាប់យុទ្ធភណ្ឌមិនទាន់ផ្ទុះ។ ជាមួយគ្នានេះលោកប្រធាន ICRC ប្រចាំតំបន់ បានថ្លែងអំណរគុណ ចំពោះ កក្រក ដែលបានធ្វើការងារនេះបានល្អ និងឆាប់រហ័សទាន់ពេលវេលា ជាពិសេសបានប្រើប្រាស់នូវអ្វីដែលជាធនធានរបស់កក្រក ផ្ទាល់។ សូមបញ្ជាក់ថា​៖​ មកដល់ពេលនេះវីរ:យុទ្ធជន​កម្ពុជាទាំង១៨នាក់​ ដែលភាគីថៃចាប់ខ្លួន ក្រោយមានបទឈប់បាញ់ចូលជាធរមាន​ ដែលរហូតមកពេលនេះមានរយពេល៤២ថ្ងៃកន្លងមកហើយ៕ អត្ថបទ: សំ ងីម

សូមចូលរួមគោរពច្បាប់ចរាចរណ៍! ៧ថ្ងៃមុនកាន់បិណ្ឌ គ្រោះថ្នាក់ចរាចរណ៍ ផ្តាច់ជីវិតពលរដ្ឋ ២៤ នាក់ និងរបួសជិត៦០នាក់

2025/09/09 01:38:42 pm        316
Facebook Telegram Linkin
ក្នុងរយៈពេល៧ថ្ងៃមុនពិធីបុណ្យកាន់បិណ្ឌ នៅកម្ពុជា មានករណីគ្រោះថ្នាក់ចរាចរណ៍ផ្លូវគោកទូទាំងប្រទេសកើតឡើងសរុបចំនួន៤៣ករណី បណ្តាលឱ្យមានមនុស្សស្លាប់២៤នាក់ និងរងរបួស៥៨នាក់។ ចំនួននេះគិតចាប់ពីថ្ងៃទី១ ដល់ថ្ងៃទី៧ ខែកញ្ញា ឆ្នាំ២០២៥។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។បើតាមអ្នកនាំពាក្យរងក្រសួងមហាផ្ទៃ ករណីគ្រោះថ្នាក់ចរាចរណ៍ដែលបានកើតឡើង រួមមាន ថ្ងៃទី១កញ្ញា មាន៨ករណី ស្លាប់៣នាក់ របួស១៤នាក់ ថ្ងៃទី២មាន៤ករណី ស្លាប់៤នាក់ របួស៦នាក់ ថ្ងៃទី៣មាន៤ករណី ស្លាប់១នាក់ របួស៦នាក់ ថ្ងៃទី៤មាន៨ករណី ស្លាប់៦នាក់ របួស៥នាក់ ថ្ងៃទី៥មាន៦ករណី ស្លាប់១នាក់ របួស១៣នាក់ ថ្ងៃទី៦ មាន៥ករណី ស្លាប់៤នាក់ របសួស៤នាក់ និងថ្ងៃទី៧ មាន៨ករណី ស្លាប់៥នាក់ និងរបួស១០នាក់។ផ្អែកតាមរបាយការណ៍ អ្នកនាំពាក្យរងក្រសួងមហាផ្ទៃ បានលម្អិតទៀតថា ករណីគ្រោះថ្នាក់ចរាចរណ៍ដែលបានកើតឡើងរយៈពេល៧ថ្ងៃដើមខែកញ្ញានោះ រួមមាននៅរាជធានីភ្នំពេញ ខេត្តកណ្តាល កំពង់ស្ពឺ តាកែវ ព្រះសីហនុ ពោធិ៍សាត់ បាត់ដំបង បន្ទាយមានជ័យ សៀមរាប ព្រះវិហារ កំពង់ចាម ត្បូងឃ្មុំ និងខេត្តស្វាយរៀង។អ្នកនាំពាក្យរងបានឱ្យដឹងទៀតថា ដើម្បីទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាស ពិធីបុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរ ចាប់ពីថ្ងៃទី៨ ដល់ថ្ងៃទី២៣ ខែកញ្ញា ឆ្នាំ២០២៥ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីអំពាវនាវ ចំនួន៨ចំណុច ដល់អ្នកប្រើប្រាស់ផ្លូវទាំងអស់ចូលរួមគោរព និងអនុវត្ត ច្បាប់ស្តីពីចរាចរណ៍ផ្លូវគោកយ៉ាងផុសផុល និងរួមចំណែកក្នុងការកាត់បន្ថយការបាត់បង់ជីវិត រងរបួស និងការខូចខាតទ្រព្យសម្បត្តិជាដើម។សេចក្តីអំពាវនាវទាំង៨ចំណុច របស់គណៈកម្មាធិការជាតិសុវត្ថិភាពចរាចរណ៍ផ្លូវគោក រួមមាន ១-កុំបើកបរលើសល្បឿនកំណត់ ២-សូមកុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន ៣-ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ហារបស់មន្ត្រីនគរបាលចរាចរណ៍ផ្លូវគោក ៤-ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញាបែងចែកគន្លងផ្លូវ ៥-ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់ ៦-ត្រូវត្រួតពិនិត្យមុនចេញដំណើរនូវលក្ខណៈបច្ចេកទេសយានយន្ត ដូចជាសំបកកង់ ហ្វ្រាំង ភ្លើងបំភ្លឺ និងចង្កូត ជាដើម ៧-ត្រូវពាក់មួកសុវត្ថិភាពឱ្យបានត្រឹមត្រូវជានិច្ច ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ និងទី៨-សូមកុំផ្ទុកអ្នកដំណើរ ឬទំនិញលើសច្បាប់កំណត់។បន្ថែមពីនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានអំពាវនាវ ដល់រថយន្តដឹកអ្នកដំណើរ ឬដឹកកម្មករមិនឱ្យផ្ទុកអ្នកដំណើរ ឬកម្មករលើដំបូល និងសូមមេត្តាកុំដំឡើងថ្លៃ ចំពោះការធ្វើដំណើររបស់បងប្អូនប្រជាពលរដ្ឋ នៅក្នុងឱកាសពិធីបុណ្យប្រពៃណីជាតិនេះ៕

ក្របខណ្ឌគំនិតផ្តួចផ្តើមខ្សែក្រវាត់ និងផ្លូវរបស់ចិន នាំឱ្យកម្ពុជាឱ្យមានការអភិវឌ្ឍរីកចម្រើន

2025/09/09 01:34:58 pm        181
Facebook Telegram Linkin
ឯកឧត្តម ស៊ុន ចាន់ថុល ថ្លែងថា ក្របខណ្ឌនៃគំនិតផ្តួចផ្តើមខ្សែក្រវាត់ និងផ្លូវ ភាពជាដៃគូរវាងកម្ពុជានិងចិន បានកំពុង នាំមកនូវការអភិវឌ្ឍហេដ្ឋារចនាសម្ព័ន្ធ ការអភិវឌ្ឍជំនាញ ការផ្ទេរបច្ចេកវិទ្យា និងការធ្វើឱ្យប្រសើរឡើងនូវឧស្សាហកម្មជាដើម។  ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៨ ខែកញ្ញា ឆ្នាំ២០២៥ នេះ បានអញ្ជើញថ្លែងសុន្ទរកថាគន្លឹះក្នុងពិធីបើក “ពិព័រណ៍អន្តរជាតិចិនលើកទី២៥ សម្រាប់ការវិនិយោគ និងពាណិជ្ជកម្ម”(CIFIT) ដែលរៀបចំឡើងនៅទីក្រុងសៀមិន ខេត្តហ្វូជៀន សាធារណរដ្ឋប្រជាមានិតចិន, ក្នុងនោះឯកឧត្តមបានថ្លែងការចូលរួមអបអរសាទរ និងថ្លែងអំណរគុណចំពោះរដ្ឋាភិបាលនៃសាធារណរដ្ឋប្រជាមានិតចិន ជាម្ចាស់ផ្ទះរៀបចំព្រឹត្តិការណ៍ដ៏សំខាន់នេះឡើង សម្រាប់លើក កម្ពស់កិច្ចសហប្រតិបត្តិការវិនិយោគ និងពាណិជ្ជកម្ម ព្រមទាំងជំរុញចក្ខុវិស័យនៃគំនិតផ្តួចផ្តើមខ្សែក្រវាត់ និងផ្លូវ។ ឯកឧត្តមឧបនាយករដ្ឋមន្ត្រី ក៏បានជម្រាបជូនអំពីវឌ្ឍនភាពនៃកិច្ចការងារវិនិយោគរបស់កម្ពុជា ដែលសម្រេចបានកាលពីឆ្នាំ ២០២៤ អនុម័តដោយក្រុមប្រឹក្សាអភិវឌ្ឍន៍កម្ពុជា មានចំនួន ៤១៤ គម្រោង ដែលមានទុនប្រមាណ ៦,៩ ពាន់លានដុល្លារ កើនឡើង ៤០% បើធៀបនឹងឆ្នាំ២០២៣។ ចំណែកក្នុងរយៈពេល ៨ ខែដំបូង ឆ្នាំ២០២៥នេះ កម្ពុជាបានអនុម័តគម្រោងវិនិយោគចំនួន ៤៩១ គម្រោង មានទុន ៧,២ ពាន់លានដុល្លារ នឹងរំពឹងថា ចំនួនគម្រោងវិនិយោគនៅឆ្នាំ២០២៥នេះ នឹងកើនឡើងជាបន្តបន្ទាប់បន្ថែមទៀត ដែលអាចបង្កើតការងារបានជាង ៤០ ម៉ឺនកន្លែងជូនប្រជាពលរដ្ឋ។ ដោយឡែកការនាំចេញវិញ, កម្ពុជាបាននាំចេញទៅក្នុងទីផ្សារតំបន់ និងពិភពលោក បានបន្តកើនឡើង, ពោលនៅឆ្នាំ២០២៤ ការនាំចេញពីកម្ពុជាឈានដល់ ២៦,៦ ពាន់លានដុល្លារ កើនឡើង១៣,៦% បើធៀបនឹងឆ្នាំ២០២៣, តួលេខទាំងនេះបានបង្ហាញអំពីភាពធន់ និងបរិយាកាសស្វាគមន៍របស់កម្ពុជាទៅកាន់វិនិយោគិន។ឯកឧត្តម ស៊ុន ចាន់ថុល ក៏បានជម្រាបជូនបន្ថែម អំពីវឌ្ឍនភាពគម្រោងហេដ្ឋារចនាសម្ព័ន្ធសំខាន់ៗទាំងផ្លូវគោក កំពង់ផែ អាកាសយានដ្ឋាន និងប្រព័ន្ធឌីជីថលជាដើម ដែលចិនគឺជាដៃគូដ៏សំខាន់ បានចូលរួមវិនិយោគលើគម្រោងជាច្រើន។ គម្រោងទាំង នោះមានអាទិ៍ ផ្លូវល្បឿនលឿនភ្នំពេញ-ក្រុងព្រះសីហនុ, អាកាសយានដ្ឋានអន្តរជាតិសៀមរាប-អង្គរ, និងតំបន់សេដ្ឋកិច្ចពិសេសក្រុង ព្រះសីហនុ ដែលជាគម្រោងបានចូលរួមបង្កើតការងារ និងធ្វើសមាហរណកម្មតំបន់កាន់តែស៊ីជម្រៅ។ ឯកឧត្តមឧបនាយករដ្ឋមន្ត្រី ក៏បានយកឱកាសនេះ ដើម្បីជម្រាបជូនអំពីការបើកឱ្យដំណើរការជាផ្លូវការអាកាសយានដ្ឋានអន្តរជាតិតេជោ នៅថ្ងៃទី ៩ ខែកញ្ញា ឆ្នាំ ២០២៥ផងដែរ ដែលនឹងចូលរួមពង្រឹងតួនាទីរបស់កម្ពុជាជាមជ្ឈមណ្ឌលពាណិជ្ជកម្ម ទេសចរណ៍ និងការវិនិយោគក្នុងអាស៊ាន៕ អត្ថបទ៖ សុន រ៉ាឌី

ប្រធានាធិបតី ហ្វីលីពីន និងលោកជំទាវអញ្ជើញនិវត្តន៍ទៅមាតុប្រទេសវិញ ក្រោយបញ្ចប់ទស្សនកិច្ចនៅកម្ពុជា

2025/09/09 12:43:05 pm        485
Facebook Telegram Linkin
នៅព្រឹកថ្ងៃទី៩ ខែកញ្ញា ឆ្នាំ២០២៥នេះ ឯកឧត្តម ហ្វឺឌីណាន់ រ៉ូម៉ូលដេស ម៉ាកូស ជូញៀ (Ferdinand Romualdez Marcos Jr.) ប្រធានាធិបតី នៃសាធារណរដ្ឋហ្វីលីពីន និងលោកជំទាវទី១ លូអ៊ីស អារ៉ាណេតា-ម៉ាកូស (Louise Araneta-Marcos) បានអញ្ជើញដឹកនាំគណៈប្រតិភូធ្វើមាតុភូមិនិវត្តន៍ទៅកាន់ប្រទេសហ្វីលីពីនវិញនៅអាកាសយានដ្ឋានអន្តរជាតិតេជោ បន្ទាប់ពីបញ្ចប់ទស្សនកិច្ចផ្លូវរដ្ឋរយៈពេលបីថ្ងៃដោយជោគជ័យនៅកម្ពុជា ខណៈឯកឧត្តម គឺជាប្រធានាធិបតីដំបូងគេដែលបានឆ្លងកាត់ក្នុងឱកាសបើកជើងហោះហើរដំបូងនៅអាកាសយានដ្ឋានអន្តរជាតិតេជោរបស់កម្ពុជា។ សូមជម្រាបថា ក្នុងឱកាសដំណើរទស្សនកិច្ចផ្លូវរដ្ឋរយៈពេលបីថ្ងៃនៅកម្ពុជា មេដឹកនាំកម្ពុជា-ហ្វីលីពីន បានប្តេជ្ញាចិត្តយ៉ាងមុតមាំក្នុងការលើកកម្ពស់ទំនាក់ទំនង និងកិច្ចសហប្រតិប្រត្តិការជាមួយគ្នាលើវិស័យសំខាន់ៗជាច្រើន។សម្ដេចធិបតី មានប្រសាសន៍ ក្នុងឱកាសចូលរួមធ្វើសន្និសីទសារព័ត៌មានរួមគ្នាជាមួយ ឯកឧត្តម ហ្វឺឌីណាន់ រ៉ូម៉ូលដេស ម៉ាកូស ជូញៀ (Ferdinand Romualdez Marcos Jr.) ប្រធានាធិបតីហ្វីលីពីន កាលពីថ្ងៃទី៨ ខែកញ្ញាម្សិលមិញនេះថា កម្ពុជាផ្ដល់សារៈសំខាន់ ចំពោះទំនាក់ទំនងយូរអង្វែងជាមួយហ្វីលីពីន ដោយឈរលើមូលដ្ឋាននៃគោលការណ៍គោរពគ្នាទៅវិញទៅមក និងផលប្រយោជន៍រួម។ រយៈពេលជាច្រើនឆ្នាំកន្លងមក ភាពជាដៃគូនៃប្រទេសយើងទាំងពីរ បានរីកចម្រើនលើគ្រប់វិស័យ រួមមាន៖ វិស័យការពារជាតិ និងសន្តិសុខ, ពាណិជ្ជកម្ម និងវិនិយោគ, កិច្ចសហប្រតិបត្តិការសេដ្ឋកិច្ច និងការតភ្ជាប់រវាងប្រជាជន និងប្រជាជន។សម្ដេចនាយករដ្ឋមន្រ្ដីបានបន្តថា តាមរយៈជំនួបពិភាក្សារវាងសម្ដេច និងឯកឧត្តមប្រធានាធិបតីហ្វីលីពីន បានប្រព្រឹត្តិទៅប្រកបដោយលទ្ធផលជាផ្លែផ្កា ដោយមានការចុះហត្ថលេខាលើអនុស្សរណៈនៃការយោគយល់គ្នាចំនួនពីរ ស្តីពី «សេវាអាកាសចរណ៍ និងកិច្ចសហប្រតិបត្តិការលើវិស័យអប់រំ» រួមទាំងលិខិតប្តូរសារស្ដីពី «កិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋកម្មឆ្លងដែន»។ជាមួយគ្នានេះ ឯកឧត្តមប្រធានាធិបតីហ្វីលីពីន ម៉ាកូស ជូនៀ និងសម្ដេចធិបតី ហ៊ុន ម៉ាណែត បានឯកភាពបន្តពង្រីកកិច្ចសហប្រតិបត្តិការលើគ្រប់វិស័យ ដើម្បីនាំមកនូវកំណើន, សុខុមាលភាព និងវិបុលភាពរួម ជូនប្រជាជនកម្ពុជា និងហ្វីលីពីន។ ហើយសម្ដេចធិបតី បានអរគុណ លោកប្រធានាធិបតី ម៉ាកូស ជូនៀ ដែលបានដឹកនាំគណៈប្រតិភូធុរជនហ្វីលីពីន មកចូលរួមវេទិកាធុរកិច្ចនៅកម្ពុជា ដែលអនុញ្ញាតឱ្យវិស័យឯកជននៃប្រទេសទាំងពីរ តភ្ជាប់គ្នា និងកសាងភាពជាដៃគូសម្រាប់កំណើន និងនវានុវត្តន៍៕

សម្ដេចតេជោជំរុញឱ្យអ្នកទទួលពានរង្វាន់ណូបែលរូបវិទ្យា សហការជាមួយ​ក្រសួង​ពាក់ព័ន្ធ​ចូល​រួម​បណ្ដុះ​បណ្ដាល​យុវជន​កម្ពុជាលើមុខជំនាញរូបវិទ្យា និងវិទ្យាសាស្រ្ត

2025/09/09 12:22:38 pm        273
Facebook Telegram Linkin
នៅព្រឹកថ្ងៃទី៩ ខែកញ្ញា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី​នៃ​ព្រះរាជា​ណាចក្រកម្ពុជា បានអនុញ្ញាតឲ្យលោកសាស្ត្រាចារ្យបណ្ឌិត Sir Konstantin (Kostya) S. Novoselov FRS អ្នកទទួលពានរង្វាន់ ណូបែលរូបវិទ្យា និងប្រតិភូ ចូលជួប​សម្តែង​ការ​គួរសម នៅវិមានព្រឹទ្ធសភា រាជធានីភ្នំពេញ។ឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភានៃកម្ពុជា បានឱ្យដឹងនៅក្រោយជំនួបនេះថា ជាកិច្ច​ចាប់​ផ្ដើមសម្ដេចតេជោ ប្រមុខរដ្ឋស្ដីទី បានស្វាគមន៍លោកសាស្រ្ដាចារ្យបណ្ឌិត និង​សហការី​ហើយ​សង្ឃឹម​ថា វត្តមានរបស់លោ​ក​សាស្រ្ដា​ចារ្យ​នៅ​ព្រះរាជា​ណាចក្រ​កម្ពុជា​នឹង​ជា​ផ្នែក​មួយ​ដ៏​សំខាន់​ក្នុង​ការ​ចូលរួមចំណែកពង្រីកនូវផ្នែករូបវិទ្យា ក៏ដូចជាបច្ចេកវិទ្យា វិទ្យាសាស្រ្ដនៅ​កម្ពុជា​បន្ថែម​ទៀត​។ ក្នុងឱកាសនោះ លោកសាស្ត្រាចារ្យបណ្ឌិត បានស​ម្ដែង​នូវ​ការអរគុណយ៉ាង​ក្រៃលែង​ចំពោះ​សម្ដេច​តេជោ ហ៊ុន សែន ដែលបានអនុញ្ញាតឱ្យរូបលោក និងសហការីចូល​ជួប​សម្ដែង​ការ​គួរ​សម​នា​ពេល​នេះ។ លោកបានលើកឡើងថា នេះគឺជា​លើកទីមួយ​សម្រាប់​រូបលោក​ដែល​បាន​អញ្ជើញ​មក​កាន់​ព្រះរាជាណាចក្រកម្ពុជា ហើយបានឃើញពីភាពរីកចម្រើន។ លោកលើកឡើងថា ពី​មុន​លោក​ធ្លាប់តែបានដឹងពីសាវតារបស់ប្រទេសកម្ពុជាដែលធ្លាប់តែបែកបាក់ក្នុងសង្គ្រាម ប៉ុន្ដែពេល​នេះ​មិនគួរឱ្យជឿសោះតាមរយៈការដឹកនាំរបស់សម្ដេចតេជោ​អាចសង្គ្រោះប្រទេសជាតិ​ចេញ​ពី​របប​ប្រល័យ​ពូជសាសន៍ ហើយនាំឱ្យកម្ពុជាមានការឯកភាពទឹកដី ឯកភាពជាតិ មានសន្ដិភាព និង​មានការអភិវឌ្ឍសេដ្ឋកិច្ចមានភាពរីកចម្រើន។ លោកសាស្រ្ដាចារ្យ តាមរយៈដំណើរទស្សនកិច្ចប៉ុន្មានថ្ងៃរបស់លោកនៅកម្ពុជាកន្លងមកនេះ គឺ​បានឃើញពីសក្ដានុពលនៃយុវជនរបស់កម្ពុជាដែលមានសមត្ថភាព។ លោកបញ្ជាក់ថា ក្នុង​បេសកកម្ម​របស់លោកនៅកម្ពុជានាពេលនេះ នឹងស្វែងរកយុវជន និងនិស្សិតកម្ពុជាដែល​មាន​សមត្ថភាព​ផ្នែក​រូបវិទ្យា វិទ្យាសាស្រ្ដ និងបច្ចេកវិទ្យា ដើម្បីបណ្ដុះបណ្ដាលពួក​គាត់​បន្ថែម​ទៀត​ឱ្យក្លាយ​ជា​ធនធានដ៏ពូកែលើមុខជំនាញទាំងនេះ។ ជាការឆ្លើយតបសម្ដេចតេជោ បានសម្ដែងនូវការពេញចិត្តជាខ្លាំងចំពោះការលើកឡើង​របស់​លោក​ស្រ្ដាចារ្យ​ និងបានសម្លឹងឃើញឱកាសនៅកម្ពុជា និងមានផែនការ​ក្នុង​ការ​បណ្ដុះ​បណ្ដាល​យុវជន​កម្ពុជា​។ សម្ដេចតេជោ បានលើកឡើងទៀតថា យុវជនកម្ពុជានាពេលបច្ចុប្បន្ន គឺមានសមត្ថភាព​គួរ​ឱ្យក​ត់សម្គាល់ ពួកគេបានរីកចម្រើនតាមរយៈការខិតខំប្រឹងប្រែងលត់ដំខ្លួន ហើយតាម​រយៈ​ការ​ចូល​រួម​របស់​លោកសាស្រ្ដាចារ្យនៅកម្ពុជា និងក្លាយជាក្ដីសង្ឃឹមបន្ថែមទៀតសម្រាប់កម្ពុជា ក្នុង​ការ​ពង្រីក​នូវ​វិស័យបច្ចេកវិទ្យា វិទ្យាសាស្រ្ដ ជាពិសេសផ្នែករូបវិ​ទ្យា​នៅ​កម្ពុជា​ឱ្យ​កាន់​តែមា​នភា​ព​រីក​ចម្រើន​។ សម្ដេចតេជោក៏បានជំរុញដល់លោកសាស្រ្ដាចារ្យបន្តខិតខំធ្វើការងារលើវិស័យអបរំនេះជាមួយក្រសួង​ពាក់ព័ន្ធជាពិសេសក្រសួងអប់រំ យុវជន និងកីឡា ដើម្បីធ្វើ​យ៉ាង​ណា​ឱ្យ​យុវជន​កម្ពុជា​កាន់​តែ​មាន​សមត្ថភាពនៅក្នុងវិទ្យាស្រ្ដនេះកាន់តែច្រើន។ ក្នុងឱកាសនោះលោកសាស្រ្ដាចារ្យ Novoselov បានបង្ហាញចម្ងល់ និងសួរទៅ​កាន់​សម្ដេច​តេជោ​ថា តើសម្ដេចមានយុទ្ធសាស្រ្ដ ឬចក្ខុវិស័យអ្វីខ្លះ​បាន​ជា​សម្ដេច​តេជោ​អាច​ដឹកនាំ​ប្រទេសក​ម្ពុជា​ចេញ​ពី​របបប្រល័យពូជសាសន៍ ពីប្រទេសដែលខ្ទេច​ខ្ទី​ឱ្យក្លាយ​ជា​ប្រទេស​ដែល​មាន​ការ​ឯកភាព​ជាតិ​តែមួ​យ និងមានសន្ដិភាពបែបនេះ?។ ក្នុងឱកាសនោះ សម្ដេចតេជោមានក្ដីរីករាយនឹងបានបង្ហាពីសារបាននៃការតស៊ូរបស់សម្ដេចតេជោ រួម​ទាំងការដាក់ចេញនូវយុទ្ធសាស្រ្ដជាបន្តបន្ទាប់​ដើម្បីសម្រេច​ផែនការ​ក្នុង​ការ​ធ្វើ​យ៉ាង​ណា​ឱ្យប្រ​ទេស​កម្ពុជា​មានសន្ដិភាពនៅឆ្នាំ១៩៩៨ ជាពិសេសការដាក់ចេញនូវនយោបាយ ឈ្នះ ឈ្នះ ដែល​សម្ដេច​តេជោបានដាក់ចេញ និងសម្ដេចបានកាលពីជាង២៦ឆ្នាំមុន រួមនឹងការ​អភិវឌ្ឍ​សេដ្ឋកិច្ច​ក្រោយ​ពេល​កម្ពុជាទទួលបានសន្ដិភាព។ លោកសាស្រ្ដាចារ្យបង្ហាញការចាប់អារម្មណ៍ចំពោះការដាក់ចេញនូវនយោបាយ ឈ្នះ ឈ្នះ របស់​សម្ដេច​តេជោក្នុងការបញ្ចប់សង្គ្រាមនៅកម្ពុជា។ លោកបន្តថា លោកនឹងយកទ្រឹស្ដី​នៃ​នយោបាយ​នេះយ​ក​ទៅអនុវត្តជាពិសេសក្នុងការជជែក និងបណ្ដុះបណ្ដាលបន្ថែមទៀតដល់និស្សិតកម្ពុជា និង​និស្សិតរបស់លោកនៅបណ្ដាប្រទេសផ្សេងៗទៀតនាពេលខាងមុខ៕

ប្រហុកម្សៅកម្ពុជា មានការគាំទ្រនៅទីផ្សារអ៊ឺរ៉ុប ហុចផលល្អ​ឲ្យពលរដ្ឋ​ខ្មែរ​ពង្រីក​ការ​ផលិត​ក្នុង​ការ​នាំចេញ​បន្ថែម

2025/09/09 11:15:33 am        284
Facebook Telegram Linkin
ភ្នំពេញ៖ ផលិតផលជលផលកែច្នៃរបស់កម្ពុជា កាន់តែមានការគាំទ្រ នៅលើទីផ្សារអន្តរជាតិ ដោយ​ក្នុងនេះ ប្រហុកម្សៅកម្ពុជា ទទួលបានការគាំទ្រសម្រាប់ការនាំចេញ ទៅទីផ្សារទី្វបអឺរ៉ុប បន្ទាប់​ពី​មានការជួយជ្រោមជ្រែង ពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ដែលគាំទ្រថវិកាពីសហភាពអឺរ៉ុប ដើម្បីអភិវឌ្ឍន៍ខ្សែច្រវាក់ផលិតកម្ម ការវេចខ្ចប់ និង​ការ​អនុវត្តប្រព័ន្ធគុណភាព សុវត្ថិភាពម្ហូបអាហារ ។ ក្នុង​ពិធីសម្ពោធសិប្បកម្មផលិត និងកែច្នៃផលិតផលជលផល ខនហ្វីរេល នៅថ្ងៃទី៨ ខែកញ្ញា ឆ្នាំ​២០២៥ ក្រោមកម្មវិធីទស្សនកិច្ចសិក្សា និង​ផ្សព្វផ្សាយ​របស់​គម្រោង​អភិវឌ្ឍន៍​ជល​ផល​ក្រោយ​ប្រមូល​ផល ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាអគ្គនាយករដ្ឋបាលជល នៃ​ក្រសួង​កសិកម្ម រុក្ខាប្រមាញ់ និងនេសាទ បានថ្លែងថា នៅលើទីផ្សារ​ក្នុង​ប្រទេសក​ម្ពុជា​នា​ពេលប​ច្ចុប្បន្ន ប្រហុកម្សៅកម្ពុជា ក៏ទទួលបានការគាំទ្រ ដោយកំណើនលក់បានប្រមាណ១០ពាន់កែវ បន្ទាប់​ពីបានចុះបញ្ជីជាផ្លូវការក្នុងបញ្ជីផលិត ផលម៉ាកសម្គាល់ភូមិសាស្ត្រទំនិញ(GI) កម្ពុជា ។ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកក្រុមហ៊ុនខនហ្វីរេល ដែលកែច្នៃប្រហុកម្សៅ សម្រាប់​ទីផ្សារក្នុងស្រុក និងការនាំចេញ បានឲ្យដឹងថា បច្ចុប្បន្ន​ផលិត​កម្ម​បាន​កែ​ច្នៃ​បាន​៥​ពាន់​កែវ ស្មើនឹងទម្ងន់១តោនប្រហុក ក្នុងមួយថ្ងៃ ហើយប្រហុកម្សៅ ត្រូវបានបញ្ចុះក្លិន បញ្ចុះជាតិ​អំបិល និងបញ្ចុះសារធាតុហាមឃាត់ ដែលធ្វើឲ្យមានផលប៉ះពាល់ទៅដល់សុខភាព ជាមួយ​នឹង​ការ​ជម្រោម​ជ្រែងពីគម្រោង CAPFISH-Capture ទើបសិប្បកម្មបានពង្រីកខ្លួន និងផលិតកាន់​តែ​ច្រើន​ជាង​មុន ក្នុងការនាំចេញទៅទីផ្សារអន្តរជាតិ ។លោក សុខ ណារិន តំណាងអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម ហៅកាត់ UNIDO ប្រចាំនៅកម្ពុជា បានឱ្យដឹងថា ប្រហុកម្សៅនេះ ត្រូវបានធ្វើតេស្តសុវត្ថិភាពម្ហូបអាហារ ដោយ​វិទ្យាស្ថានប៉ាស្ទ័រកម្ពុជា ដើម្បីធានាដល់គុណភាព និងសុវត្ថិភាពម្ហូបអាហារ ។ឯកឧត្តម អ៊ីហ្គ័រ ឌ្រីសម៉ាន់ (Igor Driesman) អគ្គរដ្ឋទូតសហភាពអ៊ឺរ៉ុបប្រចាំនៅកម្ពុជា បានថ្លែងថា ប្រហុកម្សៅកម្ពុជា គឺមានរសជាតិឆ្ងាញ់ ហើយក៏ជំរុញ​ដល់សិប្បកម្ម​កែច្នៃ​ផល​ជល​ផល​ និងកសិផលផ្សេងទៀត បើចង់មានការនាំចេញទៅទីផ្សារអន្តរជាតិ មានទីផ្សារ​អ៊ឺរ៉ុប​ជា​ដើម​នោះ គួរនាំគ្នាពង្រឹងគុណភាព សុវត្ថិភាពផលិតឲ្យមានស្ដង់ដារ ។ឯកឧត្តម ហាស់ សារ៉េត រដ្ឋលេខា ធិការក្រសួងកសិកម្ម រុក្ខាប្រមាញ់ និងនេសាទ បានថ្លែងថា រាជ​រដ្ឋាភិបាលកម្ពុជា បានខិតខំនិងយកចិត្តទុកដាក់ក្នុងការធ្វើពិពិធកម្មផលិតផល និង​ពង្រីក​ទីផ្សារ​នាំ​ចេញ ព្រមទាំងជំរុញផលិត ផលកសិកម្មកម្ពុជា​ទៅ​កាន់​ទីផ្សារ​អន្តរជាតិ​កាន់​តែ​ទូលំ​ទូលាយ ។ ដោយមានការគាំទ្រពីដៃគូអភិវឌ្ឍន៍ផ្សេងៗ ដូចជាគម្រោង CAPFISH បានជួយដល់​សិប្បកម្ម​កែច្នៃ​ម្សៅប្រហុកទទួលបាននូវវិញ្ញាបនបត្រហាសឹប (HACCP) ដែលជាស្តង់ដារសុវត្ថិ ភាព​ម្ហូបអាហារអន្តរជាតិ៕ អត្ថបទ បាន សុខរិទ្ធិ 

អាកាសយានដ្ឋានអន្តរជាតិតេជោ ស្វាគមន៍យ៉ាងកក់ក្ដៅភ្ញៀវទេសចរ​ដំបូងគេមកពីប្រទេស​ចិន​នៅព្រឹក​នេះ

2025/09/09 10:01:15 am        243
Facebook Telegram Linkin
នៅព្រឹកថ្ងៃទី៩ ខែកញ្ញា ឆ្នាំ២០២៥នេះ អាកាសយានដ្ឋានអន្តរជាតិតេជោ សមិទ្ធ​ផល​ប្រវត្ដិ​សាស្ដ្រ​កម្ពុជា ស្ថិតក្នុងខេត្ដកណ្ដាល និងមួយផ្នែកស្ថិតក្នុងខេត្ដតាកែវ មានតម្លៃប្រមាណ ១៥០០​លាន​ដុល្លារ​អាមេរិក ដែលជាច្រកទ្វារថ្មីភ្ជាប់កម្ពុជាទៅកាន់ពិភពលោក បានចាប់​ផ្តើម​ដំណើរ​ការ​ទទួល​ជើង​ហោះហើរហើយ។ជើងហោះហើរដំបូងគេ ដែលចូលចតក្នុងអាកាសយានដ្ឋានថ្មីនេះ គឺក្រុមហ៊ុនអាកាសចរណ៍ជាតិ Air Cambodia (K6 611) ដឹកភ្ញៀវទេសចរមកពីប្រទេសចិន ត្រូវបានទទួលស្វាគមន៍ ដោយ​ឯកឧត្តម​បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរស៊ីវិល និង​រដ្ឋ​មន្ត្រី​ក្រសួង​ទេសចរណ៍ លោក ហួត ហាក់ ដែលមានការបាញ់ទឹកទទួលស្វាគមន៍យន្តហោះ ការ​លេង​ឆៃយាំ បំពាក់កម្រងផ្កា និងចែកវត្ថុអនុស្សាវរីយ៍ដល់អ្នកដំណើរផងដែរ។អាកាសយានដ្ឋានអន្តរជាតិថ្មីនេះ មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្ត​កណ្តាល​។ អាកាសយានដ្ឋាននេះ សាងសង់លើផ្ទៃដីសរុប ២,៦០០ ហិកតា ជាអាកាស​យាន​ដ្ឋាន​ប្រភេទ​ 4F ដែលអាចនឹងស្រូបយក និងទទួលបាន​ការ​ហោះ​ហើរ​ពី​ឆ្ងាយ​ឆ្លង​ទ្វី​ប​អាច​ឲ្យ​ប្រភេទ​យន្ត​ហោះធុនយក្សចុះចតបាន។ សូមបញ្ជាក់ថា អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក គឺជាក្រុមហ៊ុន​ចម្រុះ​បង្កើតឡើ​ងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋាន​អាកាសចរ​ស៊ីវិល​កម្ពុជា​ក្នុង​ឆ្នាំ​២​០១៨ ក្រោមការណែនាំរបស់សម្តេចអគ្គមហាសេនាបតីតេជោ ហ៊ុន សែន អតីត​នាយក​រដ្ឋ​មន្រ្តី​ បច្ចុប្បន្នជាប្រធានព្រឹទ្ធសភាកម្ពុជា ដើម្បីធ្វើការងារសាងសង់ព្រលានថ្មីមួយនេះ។ តាម​ការ​គ្រោង​ទុក ព្រលាននេះ នឹងសម្ពោធបើកឱ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ២០២៥ ក្រោម​អធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋ​​មន្ដ្រី​នៃ​កម្ពុជា​៕

ឯកឧត្តម ហ៊ុន ម៉ានី៖ អាកាសយានដ្ឋានអន្តរជាតិតេជោ គឺជាសក្ខីភាព​នៃ​ការរី​ក​ចម្រើន​លើ​គ្រប់​វិស័យ

2025/09/09 09:25:05 am        353
Facebook Telegram Linkin
ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានថ្លែងថា «​អាកាស​យាន​​ដ្ឋាន​​អន្តរជាតិតេជោ» ដែលបានបើកឲ្យដំណើរការចាប់ពីថ្ងៃទី៩ ខែកញ្ញា ឆ្នាំ២០២​៥​នេះ​តទៅ គឺជាសក្ខីភាព នៃការរីកចម្រើនលើគ្រប់វិស័យ ជាពិសេសវិស័យពាណិជ្ជកម្ម វិនិយោគ ទេសចរណ៍ និងដឹកជញ្ជូនជាដើម។តាមរយៈបណ្តាញសង្គមហ្វេសបុក នាព្រឹកថ្ងៃទី៩ ខែកញ្ញា ឆ្នាំ ២០២៥នេះ ឯកឧត្តមឧបនាយក រដ្ឋម​ន្រ្តី ហ៊ុន ម៉ានី បានលើកឡើងថា សូមអបអរសាទរសមិទ្ធផលថ្មីរបស់ព្រះរាជាណាចក្រកម្ពុជា នោះគឺ «អាកាសយានដ្ឋានអន្តរជាតិតេជោ»។ ថ្ងៃនេះព្រះរាជាណាចក្រកម្ពុជាបានធ្វើដំណើរមកដល់ចំណុចមួយទៀត នៃប្រវត្តិសាស្រ្ត​អាកាស​ចរណ៍​ស៊ីវិល​របស់​ខ្លួន ដោយបើកឱ្យដំណើរការជាផ្លូវការនូវអាកាសយានដ្ឋានខ្នាតយក្ស ប្រភេទ​4F ដែល​បង្ហាញ​ពីការអភិវឌ្ឍ និងសមត្ថភាពរបស់កម្ពុជាក្នុង​ការ​ទទួល​ជើ​ងហោះ​ហើរ​ដែល​កាន់​តែ​មមា​ញឹក​ឡើង​។ឯកឧត្តមឧបនាយករដ្ឋមន្រ្តី បានគូសបញ្ជាក់ថា«ការពង្រីកអាកាសយានដ្ឋាន គឺជាសក្ខីភាព នៃ​ការ​រីកចម្រើនលើគ្រប់វិស័យជាពិសេសវិស័យពាណិជ្ជកម្ម វិនិយោគ ទេសចរណ៍ និងដឹកជញ្ជូន។ ដោយមានចក្ខុវិស័យដឹកនាំច្បាស់លាស់របស់រាជរដ្ឋាភិបាលកម្ពុជា ក្រោមការ​ដឹក​នាំ​របស់​សម្តេច​មហា​បវរធិបតី ហ៊ុន ម៉ាណែត បោះជំហានឆ្ពោះទៅមុខក្នុងការអភិវឌ្ឍសេដ្ឋកិច្ច ដើម្បីសម្រេច​បាន​គោល​ដៅ​ក្លាយ​ជាប្រទេសអភិវឌ្ឍន៍»។តាមរយៈសំណេរអបអរសាទរអាកាសយានដ្ឋានអន្តរជាតិ​នេះ ឯកឧត្តម ហ៊ុន ម៉ានី ក៏បាន រំ លេចផងដែរថា អាកាសយានដ្ឋានអន្តរជាតិតេជោ ត្រូវបាន​កសាង​ឡើង​ក្រោម​គំនិត​ផ្តួច​ផ្តើម​ដ៏​ខ្ពង់​ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី ដែល​ការដ្ឋាន​សាង​សង់បានចាប់ផ្តើមនៅឆ្នាំ២០២០ ដោយស្នាដៃស្ថាបត្យករ វិស្វករ និងអ្នកសាង​សង់​ជា​កូន​ខ្មែរ។ នេះជាការ​បង្ហាញ​ឱ្យ​ឃើញ​នូវ​សមត្ថភាព​របស់​កូន​ខ្មែរ​ក្នុង​ការ​កសាង​សមិទ្ធ​ផល​ជា​ប្រវត្តិសាស្រ្ត​នៅគ្រ​ប់សម័យកាល។ឯកឧត្តម ឧបនាយករដ្ឋមន្រ្តី ហ៊ុន ម៉ានី បានបន្ថែមទៀតថា ជាមួយនឹងអាកាសយានដ្ឋានដ៏ថ្មី និងប្រណីតនេះ កម្ពុជាកំពុងឈរលើទីតាំងដ៏អំណោយផលមួយក្នុងការទាក់ទាញវិនិយោគិន និងភ្ញៀវទេសចរពីគ្រប់ទិសទីផងដែរ៕ អត្ថបទ៖ បាន ចក់

សម្តេចធិបតី៖ អាកាសយានដ្ឋានអន្តរជាតិតេជោ បានតភ្ជាប់ជើងមេឃកម្ពុជា​ទៅកាន់​ពិភពលោក​កាន់តែធំ

2025/09/09 08:46:50 am        491
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានផ្ញើសារអបអរសាទរ​អាកាស​យានដ្ឋាន​អន្តរជាតិតេជោ ដែលបានចាប់ផ្តើមបើកដំណើរការបម្រើសេវាកម្មហោះហើរជូនភ្ញៀវជាតិ និង​អន្តរជាតិ ចាប់ពីថ្ងៃទី៩ ខែកញ្ញា ឆ្នាំ២០២៥នេះតទៅ ហើយ​សម្តេច​បាន​ចាត់​ទុក​ថា​អាកាស​យាន​ដ្ឋាន​អន្តរជាតិតេជោដ៏ធំសំបើមរបស់កម្ពុជាថ្មីនេះ គឺនឹងតភ្ជាប់ជើង​មេឃ​កម្ពុជា​ទៅ​កាន់​ពិភព​លោក​កាន់​តែធំ និងទូលាយជាងមុនបន្ថែមទៀត។តាមរយៈបណ្តាញសង្គមហ្វេសបុក និងតេលេក្រាម នាព្រឹកថ្ងៃទី៩ ខែកញ្ញា ឆ្នាំ២០២៥នេះ ស្រប ពេល​កម្ពុជា ផ្តើមបើកឲ្យដំណើរការនូវអាកាសយានដ្ឋានអន្តរជាតិតេជោថ្មីនោះ សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើង​ថា​«​អបអរ​សាទរ​អាកាស​យាន​ដ្ឋាន​អន្តរ​ជាតិ​តេជោ ដែលបានចាប់ផ្តើមដំណើរការបម្រើសេវាកម្មហោះហើរជូនភ្ញៀវជាតិ និង​អន្តរជាតិ តភ្ជាប់ជើងមេឃកម្ពុជាទៅកាន់ពិភពលោកកាន់តែធំ និងទូលាយជាងមុន»។សម្តេចធិបតី នាយករដ្ឋមន្រ្តីនៃកម្ពុជា បានបន្ថែមថាវិស័យអាកាសចរ គឺជា​មធ្យោបាយ​ធ្វើ​ដំណើរ​ដឹកជ​ញ្ជូន​មួយ​ក្នុងចំណោមមធ្យោបាយជាច្រើន ដែលអាចភ្ជាប់ទំនាក់ទំនងរបស់អ្នកទេសចរណ៍ ធុរកិច្ច នយោបាយ និងបេសកកម្មពហុបំណង និងជាប្រ​ភព​សេដ្ឋ​កិច្ច​យ៉ាង​សំខាន់​សម្រាប់​ប្រទេស​ ពិសេសឈរលើគោលនយោបាយយ៉ាងជាក់លាក់ក្នុងការទាក់ទាញការវិនិយោគ ទំនាក់​ទំនង កាទូត និងគោលដៅផ្សេងៗរាប់មិនអស់។ អាស្រ័យហេតុនេះ កម្ពុជា ក៏បានពង្រឹង និង​ពង្រីក​ខ្លួន​យ៉ាង​សកម្មក្នុងការកសាងអាកាសយានដ្ឋានកម្រិតអន្តរជាតិនេះ ដើម្បីចូលរួម​ចំណែ​ក​ក្នុង​ការ​បម្រើ​ដល់​សេចក្តីត្រូវការ កំណើននៃការធ្វើដំណើរ តភ្ជាប់ទំនាក់ទំនងយ៉ា​ងស​កម្ម​របស់​អ្នក​ដំណើរ ​ពិសេសការតម្រង់គោលដៅមកកាន់កម្ពុជា។សូមរំលឹកថាអាកាសយានដ្ឋានអន្តរជាតិតេជោ ត្រូវបានកសាងឡើងក្រោមគំនិតផ្តួចផ្តើមដ៏ខ្ពង់ ខ្ពស់​របស់សម្តេចអគ្គមហាសេនាបតីតេជោហ៊ុន សែន អតីតនាយក​រដ្ឋ​មន្រ្តី​នៃ​កម្ពុ​ជា​ដែល​បាន​បើក​ការ​ដ្ឋាន​សាងសង់នៅឆ្នាំ២០២០ ដោយស្នាដៃស្ថាបត្យករ វិស្វករ និងអ្នកសាង​សង់​ជា​កូន​ខ្មែរ​។ អាកាសយានដ្ឋានអន្តរជាតិតេជោនេះគឺជាច្រកទ្វារថ្មីភ្ជាប់កម្ពុជាទៅកាន់ពិភពលោក ដោយ​មានផ្ទៃដី ២៦០០ហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និង​មួយ​ផ្នែក​ស្ថិតនៅស្រុកបាទីខេត្តតាកែវ។ អាកាសយានដ្ឋានអន្តរជាតិតេជោ គឺជា​ប្រភេទ​ព្រលាន​យន្ត​​ហោះខ្នាតធំ ប្រភេទ 4F ដែលអាចស្រូបយក និងទទួលបានការហោះហើរពីឆ្ងាយឆ្លងទ្វីប ដែ​ល​អាច​ឲ្យ​ប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន៕ អត្ថបទ៖ បាន ចក់

អ្នកនាំពាក្យក្រសួងការពារជាតិ៖ កិច្ចប្រជុំលេខាធិការដ្ឋាន GBC កម្ពុជា-ថៃ បីថ្ងៃមកនេះ ប្រទេស​ទាំងពីរ​បាន​ចូលរួមពិភាក្សាក្នុងបរិយាកាសប្រកបដោយមិត្តភាព និងស្ថាបនា

2025/09/09 07:40:05 am        340
Facebook Telegram Linkin
អ្នកនាំពាក្យក្រសួងការពារជាតិនៃព្រះរាជាណាចក្រកម្ពុជា បានបញ្ជាក់ថា កិច្ច​ប្រជុំ​លេខា​ធិការដ្ឋាន នៃគណៈកម្មាធិការព្រំដែនទូទៅកម្ពុជា-ថៃ (GBC) រយៈពេលបី​ថ្ងៃ​មកនេះ ប្រទេស​ទាំង​ពីរ​បានចូលរួមពិភាក្សាក្នុងបរិយាកាសប្រកបដោយមិត្តភាព និងស្ថាបនា។ អ្នកនាំពាក្យក្រសួងការពារជាតិ បានបន្តថា កិច្ចប្រជុំលេខាធិការដ្ឋាន នៃគណៈ​កម្មាធិការ​ព្រំដែន​ទូទៅ​កម្ពុជា-ថៃ (GBC) បានប្រព្រឹត្តទៅនៅថ្ងៃទី៧-៩ ខែកញ្ញា ឆ្នាំ២០២៥ នៅខេត្តកោះកុង ព្រះរាជាណាចក្រកម្ពុជា។ បើតាម អ្នកនាំពាក្យក្រសួងការពារជាតិក្នុងរយៈពេលបីថ្ងៃមកនេះ ក្រុមការងារលេខាធិការដ្ឋាន​នៃប្រទេសទាំងពីរបានចូលរួមពិភាក្សាក្នុងបរិយាកាសប្រកបដោយមិត្តភាព និងស្ថាបនា ក្នុង​គោល​បំណងជំរុញកិច្ចសន្ទនាប្រកបដោយផ្លែផ្កា លើកកម្ពស់ការកសាងទំនុកចិត្ត និងស្វែង​រក​កិច្ច​សហ​ប្រតិបត្តិការជាក់ស្តែង ដើម្បីត្រៀម​សម្រាប់​កិច្ច​ប្រជុំ​ពិសេស​របស់​គណៈកម្មាធិការ​ព្រំដែន​ទូទៅ​កម្ពុជា-ថៃ (GBC) ដែលនឹងប្រព្រឹត្តទៅនៅថ្ងៃទី១០ ខែកញ្ញា ឆ្នាំ២០២៥៕

បណ្ដាញសង្គម

ព័ត៌មានថ្មីៗ

ខេត្តតាកែវទទួលបានភ្ញៀវទេសចរណ៍ជិត១លានាក់ក្នុងរយ:ពេល៣ថ្ងៃនៃពិធីបុណ្យចូលឆ្នាំខ្មែរ
04/17/2026 04:04 PM
Facebook Telegram Linkin
រដ្ឋមន្ត្រីក្រសួងការពារជាតិអេស្តូនី៖ ណាតូនឹងមិនដួលរលំទេ ហើយអាមេរិកនឹងការពារសម្ព័ន្ធមិត្តរបស់ខ្លួន
04/17/2026 04:04 PM
Facebook Telegram Linkin
លោក Trump បានបដិសេធថា តម្លៃប្រេងឥន្ធនៈខ្ពស់ គឺ «ក្លែងក្លាយ» ក្នុងសុន្ទរកថាសេដ្ឋកិច្ចនៅ Las Vegas
04/17/2026 04:04 PM
Facebook Telegram Linkin
ភ្ញៀវទេសចរជិត ២លាននាក់ ទៅទស្សនាខេត្ដសៀមរាប នាឱកាសចូលឆ្នាំថ្មីរយៈពេលបីថ្ងៃ
04/17/2026 04:04 PM
Facebook Telegram Linkin
លោក Todd Lyons នាយកស្តីទីនៃទីភ្នាក់ងារ ICE មានផែនការចាកចេញពីតួនាទីនេះ
04/17/2026 04:04 PM
Facebook Telegram Linkin
លោក Trump ជំរុញឲ្យក្រុមហេសបូឡា «ធ្វើអ្វីដោយប្រយ័ត្នប្រយែង» ខណៈសាទរ «ថ្ងៃប្រវត្តិសាស្ត្រ» សម្រាប់លីបង់
04/17/2026 03:04 PM
Facebook Telegram Linkin
អ៊ីរ៉ង់៖ ការគំរាមដាក់ទណ្ឌកម្មថ្មីបង្ហាញពី «ភេរវកម្មសេដ្ឋកិច្ច» របស់សហរដ្ឋអាមេរិក
04/17/2026 03:04 PM
Facebook Telegram Linkin
ប្រជាជនទីក្រុងគីវ បង្ហាញកំហឹង និងភាពអស់សង្ឃឹម ក្រោយការវាយប្រហារថ្មីចុងក្រោយរបស់រុស្ស៊ី
04/17/2026 03:04 PM
Facebook Telegram Linkin
ស្នងការនគរបាលរាជធានីភ្នំពេញ ប្រជុំពង្រឹងសន្តិសុខ សណ្ដាប់ធ្នាប់ សុវត្ថិភាពបន្ថែមជូន ភ្ញៀវជាតិ និងអន្តរជាតិ ដែលមកដើរលេងកំសាន្តសប្បាយ
04/17/2026 03:04 PM
Facebook Telegram Linkin
ទួរគីធ្វើជាម្ចាស់ផ្ទះនៃកិច្ចខិតខំប្រឹងប្រែងផ្នែកការទូតដ៏សំខាន់បំផុត ដើម្បីបញ្ចប់សង្គ្រាមមជ្ឈិមបូព៌ា
04/17/2026 03:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.