BTV NEWS

សមត្ថកិច្ចកំណត់បានហើយក្រុមមនុស្សដែលវាយបំផ្លាញរថយន្តនៅខណ្ឌដូនពេញ បើមិនចូលខ្លួននឹងមានវិធានការច្បាប់

បីថ្ងៃចូលឆ្នាំនៅស្វាយរៀងមានប្រជាពលរដ្ឋ ភ្ញៀវជាតិ-អន្តរជាតិ មកដើរលេងកម្សាន្តជាង ៤សែននាក់

៣ថ្ងៃនៃសង្រ្កាន្តឆ្នាំថ្មីកោះកុង ទទួលបានភ្ញៀវទេសចរជាង២ម៉ឺននាក់

ខេត្តតាកែវទទួលបានភ្ញៀវទេសចរណ៍ជិត១លានាក់ក្នុងរយ:ពេល៣ថ្ងៃនៃពិធីបុណ្យចូលឆ្នាំខ្មែរ

ព័ត៌មានជាតិ

ក្រសួងកសិកម្ម បង្ហាញ គោលនយោបាយអាទិភាពកសាងសហគមន៍កសិកម្មទំនើប ដល់ ស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា

ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឯកឧត្តមរដ្ឋមន្រ្តី ឌិត ទីណា បានលើកឡើងបង្ហាញ គោលនយោបាយអាទិភាព ក្នុងការកសាងសហគមន៍កសិកម្មទំនើប ដល់ ស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា (AmCham)។ការលើកបង្ហាញនេះ ធ្វើឡើងក្នុងឱកាស ឯកឧត្តម ប្រាក់ ដាវីដ ទទួលជួបជាមួយស្ថាប័នសមាគមសភាពាណិជ្ជកម្មអាមេរិកប្រចាំកម្ពុជា (AmCham) ក្នុងជំនួបសម្តែងការគួរសម និងពិភាក្សាការងារលើវិស័យកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៤ ខែកញ្ញា ឆ្នាំ២០២៥។ឯកឧត្តម ប្រាក់ ដាវីដ បានលើកឡើងពីគោលនយោបាយអាទិភាព ក្នុងការកសាងសហគមន៍កសិកម្មទំនើប ការរក្សាស្ថេរភាពថ្លៃ និងការដាក់ពង្រាយមន្រ្តីកសិកម្មឃុំ។ មិនតែប៉ុណ្ណោះ ឯកឧត្តមរដ្ឋលេខាធិការ បានអំពាវនាវដល់សមាគម (AmCham) គាំទ្រវគ្គបំប៉នភាសាអង់គ្លេសដល់មន្រ្តីកសិកម្មឃុំ-សង្កាត់ សំដៅបង្កើនសមត្ថភាពភាសា និងអាចជួយដល់ការងារស្រាវជ្រាវផ្សេងៗផងដែរ។នាឱកាសនៃជំនួបនេះ ឯកឧត្តម ប្រាក់ ដាវីដ បានសម្តែងការស្វាគមន៍ក្នុងការភ្ជាប់ទំនាក់ទំនង និងបានគូសបញ្ជាក់អំពីកសិផលកម្ពុជាដូចជា៖ ស្រូវអង្ករ ស្វាយ ស្វាយចន្ទី ម្រេច និងផលិតផលវារីវប្បកម្ម ដែលជាឱកាសសម្រាប់វិនិយោគក្នុងការកែច្នៃ ជាពិសេសការវិនិយោគលើការចិញ្ចឹមគោទឹកដោះគោ ដែលមានតម្រូវទីផ្សារក្នុងស្រុក។ជាមួយគ្នានេះ ឯកឧត្តមរដ្ឋលេខាធិការ បានជម្រាបជូនពីការរៀបចំកម្មវិធី (CAFE25) ដែលជាកម្មវិធីអភិវឌ្ឍន៍វិស័យកសិកម្មផ្សារភ្ជាប់ការវិនិយោគទៅនឹងពាណិជ្ជកម្ម និងបានអញ្ជើញគណៈប្រតិភូសមាគម (AmCham) អញ្ជើញចូលរួម និងពិនិត្យលទ្ធភាពជួយគាំទ្រក្នុងកម្មវិធីនេះ ដើម្បីបង្កើនការវិនិយោគ និងជំរុញការនាំចេញកសិផលកម្ពុជាទៅកាន់ទីផ្សារអន្តរជាតិ។គួរបញ្ជាក់បន្ថែមថា ជាការឆ្លើយតបតាមការលើកឡើងរបស់ (AmCham) ពាក់ព័ន្ធនឹងជម្លោះព្រំដែនកម្ពុជា-ថៃ ឯកឧត្តម ប្រាក់ ដាវីដ បានអះអាងថា ប្រទេសកម្ពុជាប្រកាន់ភ្ជាប់នូវជំហរស្រឡាញ់សន្តិភាព និងគោរពនូវបទឈប់បាញ់ ក៏ដូចជាអំពាវនាវឱ្យគ្រប់ភាគីទាំងអស់បន្តនូវការអត់ធ្មត់ ជៀសវាងធ្វើសកម្មភាពនានាដែលនាំឱ្យមានការកើនឡើងនៃកម្ពៅ ដែលមិនអាចជួយដល់ការដោះស្រាយបញ្ហាព្រំដែន និងប៉ះពាល់ដល់ការធ្វើពាណិជ្ជកម្មផងដែរ៕

ក្រសួងការបរទេសកម្ពុជាបញ្ជូនលិខិតតវ៉ាជាផ្លូវការជាថ្មីទៅភាគីថៃ ជុំវិញសកម្មភាពពង្រីកតំបន់ជម្លោះដោយកងកម្លាំងយោធា ចូលតំបន់ពលរដ្ឋខ្មែរ បាននឹងកំពុងរស់នៅ

ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានបញ្ជូនលិខិតតវ៉ាជាផ្លូវការរបស់រាជរដ្ឋាភិបាលកម្ពុជាជាថ្មីម្តងទៀត ជុំវិញសកម្មភាពពង្រីកតំបន់ជម្លោះដោយកងកម្លាំងយោធាថៃ នៅតំបន់ព្រំដែនគោកកម្ពុជា-ថៃ ជាពិសេសតំបន់ដែលប្រជាពលរដ្ឋខ្មែរបាននិងកំពុងរស់នៅជាច្រើនទសវត្សរ៍មកហើយ។ នេះបើតាមសេចក្តីថ្លែងការណ៍របស់ក្រសួងការបរទេស និង សហប្រតិបត្តិការអន្តរជាតិ នៃព្រះរាជាណាចក្រកម្ពុជា នៅថ្ងៃទី៤ ខែកញ្ញា ឆ្នាំ២០២៥នេះ។ក្រសួងការបរទេសកម្ពុជាបានបញ្ជាក់ថា ការរាយបន្លាលួស សំណាញ់ របាំង និងកង់ឡានដោយយោធាថៃ កាលពីខែសីហា ឆ្នាំ២០២៥ នៅ ចំណុចភូមិចំនួនពីរ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានបង្កនូវទុក្ខលំបាក យ៉ាងធ្ងន់ធ្ងរដល់ប្រជាជនខ្មែរជាច្រើនគ្រួសារ ដែលត្រូវបានបណ្តេញចេញពីផ្ទះសម្បែង និងដីស្រែ ចម្ការរបស់ពួកគេ និងកំពុងទន្ទឹងរង់ចាំដំណោះស្រាយស្ថានភាពនេះ។ក្រសួងការបរទេសកម្ពុជាបានឱ្យដឹងថា នៅថ្ងៃទី ២៦ និង ២៨ ខែសីហា ឆ្នាំ ២០២៥ ឧត្តមសេនីយ៍ទោ Wanchana Sawasdee ប្រធាន ការិយាល័យសម្របសម្រួលបេសកកម្មសន្តិសុខជាតិ ក្រោមការដឹកនាំ ប្រតិបត្តិការយោធានៃកង ទ័ពភូមិន្ទថៃ បានប្រកាសជាសាធារណៈនូវឱសានវាទឱ្យកម្ពុជា «ជម្លៀស» ពលរដ្ឋរបស់ខ្លួនចេញពីភូមិជោគជ័យ ក្នុងរយៈពេល ៣-៦ ខែខាងមុខ បើពុំដូច្នោះទេនឹងត្រូវប្រឈមមុខពីការបណ្តេញចេញដោយការប្រើប្រាស់កម្លាំងពីសំណាក់យោធាថៃ។ ស្របពេលដែលអាជ្ញាធរថៃបានដំឡើងផ្ទាំងបដាផ្សព្វផ្សាយប្រកាសខាងលើ អភិបាលខេត្តស្រះកែវនៃព្រះរាជាណាចក្រថៃក៏បានផ្ញើលិខិត ផ្លូវការមួយច្បាប់ទៅកាន់អភិបាលខេត្តបន្ទាយមានជ័យ នៃព្រះរាជាណាចក្រកម្ពុជា ពាក់ព័ន្ធបញ្ហា នេះផងដែរ។បើតាម ក្រសួងការបរទេសកម្ពុជាបញ្ជាក់ថា រាល់សកម្មភាពខាងលើ និងផែនការដែលបានប្រកាសក្នុងការចេញប័ណ្ណកម្មសិទ្ធិដីធ្លីជូនពលរដ្ឋថៃ លើតំបន់ដែលពលរដ្ឋខ្មែររាប់រយគ្រួសារបាននិងកំពុងរស់នៅរាប់ទស្សវត្សរ៍មកនោះ បង្កឱ្យមានការព្រួយបារម្មយ៉ាងខ្លាំងស្របនឹងការប៉ុនប៉ងបោះបង្គោលព្រំដែនជាឯកតោភាគី តាមរយៈការប្រើប្រាស់មធ្យោបាយយោធា។ នេះគឺជាការរំលោភលើអាណត្តិការងាររបស់គណៈកម្មាធិការចម្រុះខណ្ឌសីមាព្រំដែនគោក (JBC) និងផ្ទុយពីស្មារតីនៃអនុស្សារណៈយោគយោលគ្នាឆ្នាំ ២០00 (MOU-2000) ស្តីពីការវាស់វែង និងខណ្ឌសីមាព្រំដែនគោករវាងកម្ពុជា-ថៃ កិច្ចព្រមព្រៀងស្តីពីបទ ឈប់បាញ់ថ្ងៃទី២៨ ខែកក្កដា ឆ្នាំ២០២៥ និងកំណត់ហេតុនៃកិច្ចប្រជុំវិសាមញ្ញនៃគណៈកម្មាធិការ ព្រំដែនទូទៅ (GBC) នៅថ្ងៃទី ៧ ខែសីហា ឆ្នាំ២០២៥ និងលទ្ធផលកិច្ចប្រជុំវិសាមញ្ញនៃគណៈ កម្មាធិការព្រំដែនថ្នាក់យោធភូមិភាគ (RBC) នៅថ្ងៃទី២២ ខែសីហា ឆ្នាំ២០២៥។តាមរយៈសេចក្ដីថ្លែងការណ៍ក្រសួងការបរទេសកម្ពុជា បានបញ្ជាក់ជាថ្មីថា រាជរដ្ឋាភិបាលកម្ពុជា នៅតែប្តេជ្ញាចិត្តយ៉ាងមុតមាំ ក្នុងការស្វែងរកដំណោះស្រាយប្រកបដោយ ស្មារតីមិត្តភាព ចំពោះវិវាទព្រំដែនជាមួយប្រទេសជិតខាងទាំងអស់ តាមរយៈមធ្យោបាយសន្តិវិធី ស្រប តាមច្បាប់អន្តរជាតិ និងបន្តការរក្សាការប្តេជ្ញាចិត្តយ៉ាងម៉ឺងម៉ាត់ ប្រកាន់នូវជំហរជាគោលការណ៍របស់ ខ្លួនថា ព្រំដែនមិនត្រូវបានផ្លាស់ប្តូរដោយការប្រើប្រាស់កម្លាំងបង្ខំនោះទេ។ រាជរដ្ឋាភិបាលកម្ពុជា ជំរុញឱ្យភាគីថែរក្សាស្ថានភាពដូចដើម និងចូលរួមដោះស្រាយជម្លោះព្រំ ដែនខាងលើ តាមរយៈយន្តការ GBC និង JBC ដូចដែលភាគីទាំងពីរឯកភាពគ្នា៕

អគ្គបញ្ជាការដ្ឋានកងយោធពលខេមរភូមិន្ទ ទាត់ចោលការប្រឌិតព័ត៌មានរបស់ជនក្បត់ជាតិ៣ជំនាន់ ថា រាជរដ្ឋាភិបាលគំរាមកំហែងនិងកាត់ប្រាក់ខែទ័ពជួរមុខ

ភ្នំពេញ៖ អគ្គមេបញ្ជាការ អគ្គមេបញ្ជាការរង នាយទាហាន នាយទាហានរង និងពលទាហាន ទាំងអស់នៃកងយោធពលខេមរភូមិន្ទ នៅថ្ងៃទី៤ ខែកញ្ញា ឆ្នាំ២០២៥នេះ បានចេញមកបដិសេធទាំងស្រុង ចំពោះការផ្សព្វផ្សាយព័ត៌មានបំភ្លៃបំផ្លើសការពិតរបស់ ជនក្បត់ជាតិ៣ជំនាន់ សម រង្ស៉ី និងបក្ខពួក ដែលថា «រាជរដ្ឋាភិបាល បានគំរាមកំហែង និងកាត់ប្រាក់ខែកងទ័ពជួរមុខ»។រាជរដ្ឋាភិបាលកម្ពុជា ក្រសួងការពារជាតិ និងអគ្គបញ្ជាការដ្ឋាន បានយកចិត្តទុកដាក់ខ្ពស់ក្នុងការផ្តល់គោលរបប និងផ្គត់ផ្គង់បន្ថែមដល់កងទ័ពជួរមុខ ព្រមទាំងមានគោលរបបពិសេសចំពោះយោធិនពលី ពិការដើម្បីការពារជាតិ មាតុភូមិ។កងយោធពលខេមរភូមិន្ទ សូមបដិសេធទាំងស្រុង និងថ្កោលទោសដាច់អហង្ការចំពោះការផ្សព្វផ្សាយព័ត៌មានបំភ្លៃបំផ្លើសការពិតរបស់ជនក្បត់ជាតិ៣ជំនាន់ សម រង្ស៊ី និងបក្សពួក ដែលមានគោលបំណងបំបាក់ស្មារតីនិងប្រមាថយ៉ាងធ្ងន់ធ្ងរបំផុតចំពោះកងយោធពលខេមរភូមិន្ទ ក៏ដូចជាប្រទេសជាតិ និងប្រជាជនខ្មែរដែលរងគ្រោះការរំលោភបំពានទាំងកម្រោលមកលើបូរណទឹកដីនៃព្រះរាជាណាចក្រកម្ពុជា។ ជនក្បត់ជាតិ៣ជំនាន់ សម រង្សី និងបក្សពួក បាននិងកំពុងលុបបំបាត់កិត្តិយសវីរៈយុទ្ធជន និងជនរងគ្រោះ បំផ្លាញស្មារតីសាមគ្គីជាតិ ខណៈរាជរដ្ឋាភិបាល ប្រជាជនកម្ពុជាទាំងក្នុងនិងក្រៅប្រទេស ក៏ដូចជា កងយោធពលខេមរភូមិន្ទ បាននិងកំពុងតស៊ូក្រាញននៀលប្រយុទ្ធយ៉ាងប្តូរផ្តាច់ ហ៊ានបូជាសាច់ស្រស់ ឈាមស្រស់ ដើម្បីបុព្វហេតុការពារបូរណភាពទឹកដី អធិបតេយ្យជាតិ និងប្រជាជន។អគ្គបញ្ជាការដ្ឋានកងយោធពលខេមរភូមិន្ទ ថ្កោលទោសដាច់អហង្ការ និងស្នើសុំឱ្យអនុវត្តច្បាប់ដកសញ្ជាតិ និងបទល្មើសព្រហ្មទណ្ឌផ្សេងៗទៀត ចំពោះជនក្បត់ជាតិ៣ជំនាន់ សម រង្សី និងបក្សពួក៕

ក្រុមប្រឹក្សាស្តង់ដារជាតិអនុម័តស្តង់ដារថ្មីចំនួន ២១ ដើម្បីជំរុញវឌ្ឍនភាពផលិតកម្មកម្ពុជា

ក្រុមប្រឹក្សាស្តង់ដារជាតិ បានអនុម័តស្តង់ដារអន្តរជាតិចំនួន ២១ មកជាស្តង់ដារកម្ពុជា ដោយស្តង់ដារទាំងនេះគឺជាមូលដ្ឋានគ្រឹះ ដ៏សំខាន់ សម្រាប់វឌ្ឍនភាព និងពង្រឹងអធិបតេយ្យភាពផលិតកម្មរបស់កម្ពុជា និងជាចលនាគាំទ្រដល់ការផលិតក្នុងស្រុក។ ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បចេ្ចកវិទ្យា និងនវានុវត្តន៍ និងជាប្រធានក្រុមប្រឹក្សាស្ដង់ ដារជាតិ លើកឡើងនៅក្នុងកិច្ចប្រជុំលើកទី៣១ លើអនុម័តស្តង់ដារអន្តរជាតិចំនួន ២១ ជាស្តង់ដារកម្ពុជា របស់ក្រុមប្រឹក្សាស្តង់ដារ ជាតិ ថ្ងៃទី៣ ខែកញ្ញា ឆ្នាំ២០២៥ នេះថា ជុំវិញបញ្ហាស្តង់ដារនេះ ក្រុមប្រឹក្សាស្តង់ដារជាតិបានយកចិត្តយ៉ាងខ្លាំង ក្នុងការអនុម័តយក ស្តង់ដារថ្មីៗ ដើម្បីឆ្លើយតបទៅនិងការរីកចម្រើនកម្ពុជា ក្នុងការបង្កើននូវប្រសិទ្ធភាពផលិតកម្ម គុណភាព និងសុវត្ថិភាពផលិតផល និងសេវាកម្ម និងប្រើប្រាស់ជាឧបករណ៍ស្នូលសម្រួបសម្រួលដល់ការធ្វើពាណិជ្ជកម្មទំនិញ, ជាក់ស្តែងស្តង់ដារអន្តរជាតិ ISO, IEC និង ISO/IEC ទាំង២១ ដែលអនុម័តខាងលើនេះ បានគ្របដណ្តប់លើផ្នែកសារធាតុ និងផលិតផលគីមី ផ្នែកប្រព័ន្ធគ្រប់គ្រងថាមពល ផលិតផលអគ្គិសនី និងអេឡិចត្រូនិក គ្រឿងបន្លាស់រថយន្ត គ្រឿងសម្អាង ផលិតផលសង្ហារឹមធ្វើពីឫស្សី និងផ្នែកវាយនភ័ណ្ឌ។ឯកឧត្តមរដ្ឋមន្ត្រី បន្តលើកឡើងថា ស្តង់ដារទាំងនេះគឺជាមូលដ្ឋានគ្រឹះដ៏សំខាន់សម្រាប់វឌ្ឍនភាព និងពង្រឹងអធិបតេយ្យភាព ផលិតកម្មរបស់កម្ពុជា ពិសេសខណៈដែលកម្លាំងសាមគ្គីជាតិដ៏រឹងមាំ និងចលនាគាំទ្រផលិតផលក្នុងស្រុកដ៏ក្លៀវក្លា ដោយបានកំពុង គាំទ្រដល់ការផលិតក្នុងស្រុក។ តាមរយៈការអនុលោមតាមស្តង់ដារទាំងនេះ ធុរកិច្ចកម្ពុជាអាចធ្វើសមាហរណកម្មចូលទៅក្នុងខ្សែច្រវាក់ ផ្គត់ផ្គង់ក្នុងស្រុក និងសកល ទន្ទឹមនឹងនោះ, ក៏ជាការចូលរួមការពារសុខភាពសាធារណៈ លើកកម្ពស់សុវត្ថិភាពសម្រាប់អ្នកប្រើប្រាស់ និងភាពប្រកួតប្រជែងនៃឧស្សាហកម្មកម្ពុជាផងដែរ។ទន្ទឹមនឹងការពិនិត្យ និងអនុម័តស្តង់ដារនេះ ក្រុមប្រឹក្សាជាតិក៏បានអនុម័តបង្កើតគណៈកម្មាធិការជាតិថ្មីចំនួន៣ ដើម្បីសម្រប សម្រួល និងលើកកម្ពស់ការចូលរួមរបស់កម្ពុជានៅក្នុងសកម្មភាពស្តង់ដារូបនីយកម្មអន្តរជាតិ នៅក្រោមក្របខ័ណ្ឌស្ថាប័នស្តង់ដារ អន្តរជាតិដូចជា៖ ISO, IEC និង Codex, ការកែសម្រួលនេះ ស្របពេលដែលប្រទេសកម្ពុជាកំពុងរៀបចំចូលជាសមាជិកពេញសិទ្ធ របស់អង្គការស្តង់ដារអន្តរជាតិ ISO និងជាសមាជិកសហការ (associate member) របស់អង្គការ IEC ត្រឹមឆ្នាំ២០២៦ ខាងមុខ៕ អត្ថបទ៖ សុន រ៉ាឌី,

កម្ពុជាត្រៀមរួចរាល់បើកសម្ពោធការហោះហើរផ្លូវការ អាកាសយានដ្ឋានអន្តរជាតិតេជោ នៅថ្ងៃទី៩កញ្ញានេះ

បន្ទាប់ពីអាកាសយានដ្ឋានអន្តរជាតិតេជោ (KTI) បានអនុវត្តការសាកល្បងហោះហើរជាលើកទី២ ដោយជោគជ័យរួចមក អាកាសយានដ្ឋានថ្មីនេះ នឹងបើកឱ្យហោះហើរចេញ-ចូល ជាផ្លូវការ ចាប់ពីថ្ងៃទី៩ ខែកញ្ញា ឆ្នាំ២០២៥ខាងមុខនេះតទៅ។អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) នៅរសៀលថ្ងៃទី៤ ខែកញ្ញានេះ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា នេះជាលើកទី២ ដែលព្រលានយន្តហោះថ្មីនេះ បានធ្វើតេស្តការហោះហើរសាកល្បងរបស់ក្រុមហ៊ុនអាកាសចរណ៍ អ៊ែរ ខេមបូឌា (Air Cambodia) និង ស្កាយ អង្គរ អ៊ែរឡាញ (Sky Angkor Airline) ទៅលើយន្តហោះចំនួន២ជើង ទី១.ហោះក្នុងស្រុក ពីអាកាសយានដ្ឋានអន្តរជាតិតេជោ (TIA) ទៅខេត្តសៀមរាប និងពីសៀមរាប ត្រឡប់មក TIA ចំនួន១០៥នាក់ ទី២.យន្តហោះអន្តរជាតិ គឺហោះចេញពីភ្នំពេញ ទៅហូជីមិញ ប្រទេសវៀតណាម និងពីហូជីមិញ មក TIA ។អ្នកឧកញ៉ា បានបន្តថា អំឡុងពេលហោះចេញពីភ្នំពេញមានចំនួន ១៣៧នាក់ ក្នុងនោះចំនួន ២៧នាក់ បានចុះនៅសៃហ្កន (ហូជីមិញ) ហើយត្រឡប់មកវិញពី សៃហ្កន មក TIA មានចំនួន ១១០នាក់ ហើយជើងហោះហើរទាំងពីរ ទាំងក្នុងស្រុក និងអន្តរជាតិនេះ គឺទទួលបានជោគជ័យនិងទាំងសុវត្ថិភាព ទាំងប្រតិបត្តិ ទាំងការថែទាំ ទាំងធាតុអាកាស ដែលប្រព្រឹត្តិទៅដោយរលូនទាំងអស់ រួមទាំង SCA ក៏ឃើញថា នៅក្នុងការប្រតិបត្តិការក៏គ្មានរអាក់រអួនផងដែរ។អាកាសយានដ្ឋានអន្តរជាតិតេជោថ្មីនេះ មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ អាកាសយានដ្ឋាននេះ សាងសង់លើផ្ទៃដីសរុប ២,៦០០ហិកតា ជាអាកាសយានដ្ឋាន 4F ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីបអាចឲ្យប្រភេទយន្តហោះធុនយក្សចុះចតបាន។សូមបញ្ជាក់បន្ថែមថា អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជាក្នុងឆ្នាំ២០១៨ ក្រោមការណែនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ធសភាកម្ពុជា ដើម្បីធ្វើការងារសាងសង់ព្រលានថ្មីមួយនេះ។ តាមការគ្រោងទុក ព្រលាននេះ នឹងសម្ពោធបើកឱ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា៕ អត្ថបទ៖ ឈិត បូរ៉ាវី

កម្ពុជាជោគជ័យក្នុងការនាំស្វាយចន្ទីទៅកាន់ប្រទេសអ៊ីតាលី លើកដំបូង ប្រមាណ១៤តោន

ភ្នំពេញ៖ ប្រទេសអ៊ីតាលី បានក្លាយជាទីផ្សារថ្មីមួយទៀត ក្នុងការនាំចូលគ្រាប់ស្វាយចន្ទីរបស់កម្ពុជា ដែលជំហានដំបូងនេះ គឺចំនួន១៤តោន តាមរយៈក្រុមហ៊ុនអ៊ែបភល អាហ្គ្រោ ប្រដាក់ ឯ.ក ក្រោមការជួយសម្របសម្រួលពីគម្រោងនានា របស់សហភាពអ៊ឺរ៉ុប និងប្រទេសអង់គ្លេស ។ក្នុងពិធីសម្ពោធជាផ្លូវការ ការនាំចេញផលិតផលស្វាយចន្ទីជាកុងតឺន័រ លើកដំបូងទៅកាន់ប្រទេសអ៊ីតាលី នៅថ្ងៃទី៤ ខែកញ្ញា ឆ្នាំ២០២៥ លោកស្រី សម្បត្តិ កល្យាណ នាយកប្រតិ បត្តិក្រុមហ៊ុនអ៊ែបភល បានឲ្យដឹងថា សម្រាប់ស្វាយចន្ទីនាំទៅអ៊ីតាលី ជាជំហានដំបូងនេះ គឺជារសជាតិដើម ដែលភាគីខាងអ្នកនាំចូល នឹងធ្វើការចែកចាយបន្ត និងវេចខ្ចប់ប្រេនរបស់ពួកគេ លក់ដូរនៅលើទីផ្សារអ៊ីតាលី ។លោកស្រីបន្តថា ផលិផលស្វាយចន្ទីរបស់ក្រុមហ៊ុនអ៊ែបភល បាននាំចេញទៅទីផ្សារអ៊ឺរ៉ុប បានប្រមាណជាង ១០០តោនហើយ ខណៈទីផ្សារអាស៊ីក៏បានច្រើនប្រទេសផងដែរ ហើយសម្រាប់ទីផ្សារអ៊ឺរ៉ុបនេះ ក៏គ្រោងនាំទៅកាន់ប្រទេសអង់គ្លេសនៅពេលឆាប់ៗខាងមុខ ។ឯកឧត្តម ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ស្វាយចន្ទី គឺជាដំណាំអទិភាពមួយរបស់កម្ពុជា ក្នុងចំណោមដំណាំចំនួន១២មុខ ដែលរាជរដ្ឋាភិបាលកំពុងយកចិត្តទុកដាក់ ក្នុងការបង្កើនផលិតភាព ការកែច្នៃ និងការប្រកួតប្រជែងនាំចេញ តាមរយៈការធ្វើពិពិធកម្មសេដ្ឋកិច្ច ដែលជំរុញឲ្យវិស័យនេះ អាចរកបាននូវប្រាក់កម្រៃខ្ពស់ ។ឯកឧត្តម បានបន្តថា សម្រាប់ការនាំចេញផលិតផលស្វាយចន្ទី របស់កម្ពុជាទៅកាន់ទីផ្សារអ៊ីតាលីនេះ គឺជាជំហានយ៉ាងសំខាន់ ក្នុងការចូលរួម និងអនុវត្តគោលនយោបាយជាតិស្ដីពី ស្វាយចន្ទី ឆ្នាំ២០២២-២០២៧ ហើយរំពឹងថា ផលិតផលស្វាយចន្ទីរបស់កម្ពុជា នឹងមានតាំងលក់ក្នុងម៉ាត និងផ្សារទំនើបរបស់អ៊ីតាលី និងសហភាពអ៊ឺរ៉ុបទាំងមូល ។លោក អាន តារា ប្រធានក្រុមប្រឹក្សាភិបាលសហព័ន្ធស្វាយចន្ទីកម្ពុជា បានលើកឡើងថា បច្ចុប្បន្នគ្រាប់ស្វាយចន្ទីរបស់កម្ពុជា បានជាប់ចំណាត់ថ្នាក់លេខ១ លើគុណភាព និងលេខ២ លើការផលិតគ្រាប់ចន្ទីស្រស់ច្រើនជាងគេ នៅលើពិភពលោក ។ លោកបានបន្ថែមថា គិតត្រឹមបំណាច់ខែមិថុនា ឆ្នាំ២០២៥ កម្ពុជាបាននាំគ្រាប់ស្វាយចន្ទី ដែលមិនទាន់ច្នៃទៅកាន់ប្រទេសវៀតណាម ចំនួនជាង៩១ម៉ឺនតោន គិតជាទឹកប្រាក់ជាង ១ពាន់លានដុល្លារអាមេរិក ខណៈដែលបច្ចុប្បន្នកម្ពុជាមានសិប្បកម្ម សហគ្រាស និងរោងចក្រកែច្នៃគ្រាប់ស្វាយចន្ទីសរុបចំនួន ៤២កន្លែង មានសមត្ថភាពកែច្នៃបានប្រមាណជា ១៥ភាគរយប៉ុណ្ណោះ នៃផលគ្រាប់ស្វាយចន្ទីទូទាំងប្រទេស ។ឯកឧត្តម ដូមីនិក វីល្លៀម (Dominic Williams) ឯកអគ្គរាជទូតអង់គ្លេសប្រចាំកម្ពុជា និងឯកឧត្តម ឌ្រីសម៉ាន់ អ៊ីហ្គោរ៍ (Driesmans Igor) ឯកអគ្គរដ្ឋទូតសហភាពអ៊ឺរ៉ុបប្រចាំកម្ពុជា បានបង្ហាញនូវការអបអរសាទរ ចំពោះការនាំផលិតផលស្វាយចន្ទីទៅកាន់ប្រទេសអ៊ីតាលី ជាមួយនឹងការសន្យាបន្តនាំយកផលិតផលស្វាយចន្ទីរបស់កម្ពុជា ទៅកាន់ទីផ្សារអ៊ឺរ៉ុបបន្ថែមទៀត ៕អត្ថបទ បាន សុខរិទ្ធិ

៦ខែដើមឆ្នាំនេះមន្រ្តីទទួលពាក្យសុំកែទិន្នន័យ និងមោឃភាពបញ្ជីអត្រានុកូលដ្ឋានជិត២ម៉ឺនច្បាប់ ខណៈចុងឆ្នាំនេះអគ្គនាយកដ្ឋានអត្តសញ្ញាណកម្មនឹងដាក់ឱ្យដំណើរការសេវាឌីជីថល

ភ្នំពេញ៖ ក្នុងឆមាសទី១ ឆ្នាំ២០២៥នេះ អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានទទួលពាក្យស្នើសុំកែតម្រូវទិន្នន័យ និងមោឃភាពបញ្ជីអត្រានុកូលដ្ឋានពីរដ្ឋបាលក្រុង ស្រុក ខណ្ឌ តាមរយៈរដ្ឋបាលរាជធានី ខេត្ត និងការមកស្នើផ្ទាល់នៅអគ្គនាយកដ្ឋាន បានសរុប១៩.៦៥៨ច្បាប់។ ក្នុងនោះ អគ្គនាយកដ្ឋានអត្តសញ្ញាណកម្ម បានទទួលពាក្យស្នើសុំដោយផ្ទាល់ចំនួន ១១.៦៩៤ច្បាប់ និងទទួលពាក្យស្នើសុំតាមរយៈរដ្ឋបាលរាជធានី-ខេត្ត ចំនួន ៧.៩៦៤ច្បាប់។ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានរម្លឹកថា ក្រសួងមហាផ្ទៃ បានធ្វើយុទ្ធនាការចុះបញ្ជីអត្រានុកូលដ្ឋានចល័តនៅទូទាំងប្រទេសរយៈពេលជាង២ឆ្នាំ នៅឆ្នាំ២០០៤ និងឆ្នាំ២០០៦ ដើម្បីផ្តល់សំបុត្រកំណើតឡើងវិញជូនប្រជាពលរដ្ឋ។ ទន្ទឹមនឹងភាពជោគជ័យនៃការចុះបញ្ជីអត្រានុកូលដ្ឋានក្នុងអំឡុងពេលយុទ្ធនាការ ឯកឧត្តមបានឱ្យដឹងថា ការអនុវត្តចុះបញ្ជីនោះ ក៏ជួបបញ្ហាប្រឈមមួយចំនួន គឺកំហុសឆ្គងទិន្នន័យ ជាអាទិ៍ ខុសអក្ខរាវិរុទ្ធលើនាមត្រកូល-នាមខ្លួន ឬខុសថ្ងៃខែឆ្នាំកំណើត ឬខុសទីកន្លែងកំណើត និងប្រជាពលរដ្ឋខ្លះបានចុះបញ្ជីអត្រានុកូលដ្ឋានប្រភេទតែមួយលើសពីមួយដង។ ឯកឧត្តម ឧត្តមសេនីយ៍ឯក បន្ថែមថា ដើម្បីដោះស្រាយបញ្ហាទាំងនេះ ក៏ដូចជាសម្រួលដល់ការផ្តល់សេវាសាធារណៈជូនប្រជាពលរដ្ឋ រាជរដ្ឋាភិបាលកម្ពុជាក៏បានដាក់ចេញអនុក្រឹត្យស្តីពីមន្ត្រីអត្រានុកូលដ្ឋានថ្នាក់ជាតិ ដោយបានផ្តល់សមត្ថកិច្ចពិនិត្យសម្រេចកែតម្រូវ និងមោឃភាពទិន្នន័យបញ្ជីអត្រានុកូលដ្ឋាន ហើយបន្ទាប់មក ក្រសួងមហាផ្ទៃក៏បានចេញសេចក្តីណែនាំជាបន្តបន្ទាប់ រួមមាន សេចក្តីណែនាំ ស្តីពីការកែតម្រូវ និងការធ្វើមោឃភាពនៃបញ្ជីអត្រានុកូលដ្ឋាន ដែលត្រូវអនុវត្តក្នុងរយៈពេល០២ឆ្នាំ ចាប់ពីឆ្នាំ២០១៧ រហូតឆ្នាំ២០១៩ សេចក្តីណែនាំ ស្ដីពីការបន្តដំណើរការកែតម្រូវ និងការធ្វើមោឃភាពទិន្នន័យនៃបញ្ជីអត្រានុកូលដ្ឋាន និង សេចក្តីណែនាំ ស្តីពីបែបបទ នីតិវិធីនៃការកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន ដែលកំពុងអនុវត្តជាធរមាននាពេលបច្ចុប្បន្ន។ បើតាម សេចក្តីណែនាំទាំងនេះ ទិន្នន័យនៃបញ្ជីអត្រានុកូលដ្ឋានដែលអាចកែតម្រូវបាន គឺជាទិន្នន័យដែលបានសរសេរខុស ឬភាន់ច្រឡំព័ត៌មាន ឬខកខានមិនបានបំពេញព័ត៌មាន ដោយមន្ត្រីអត្រានុកូលដ្ឋានឃុំ សង្កាត់ ក្នុងនោះមាន ខុសឆ្គងអក្ខរាវិរុទ្ធលើនាមត្រកូល និង/ឬនាមខ្លួន “ជាអក្សរខ្មែរ” និង “អក្សរឡាតាំង” របស់សាមីខ្លួន ឬរបស់ឪពុក ឬរបស់ម្តាយ ការសរសេរខុស “ភេទ” ការចុះបញ្ជីដោយភាន់ច្រឡំលើថ្ងៃខែឆ្នាំកំណើតរបស់សាមីខ្លួន ឬរបស់ឪពុក ឬរបស់ម្តាយ ខុសថ្ងៃកំណើតសុរិយគតិ ខុសថ្ងៃកំណើតចន្ទគតិ ការភាន់ច្រឡំទីតាំងភូមិសាស្ត្ររដ្ឋបាល ខុសខ្ទង់ទីកន្លែងកំណើតសាមីខ្លួន ខកខានមិនបានចុះព័ត៌មាននៅក្នុងបញ្ជីអត្រានុកូលដ្ឋាន និងកែតម្រូវទិន្នន័យនៃបញ្ជីអត្រានុកូលដ្ឋានតាមសេចក្តីសម្រេចរបស់តុលាការ។ សម្រាប់ប្រជាពលរដ្ឋដែលមានកំហុសឆ្គងទិន្នន័យក្នុងបញ្ជីអត្រានុកូលដ្ឋានដូចបានរៀបរាប់ខាងលើ សូមដាក់ពាក្យស្នើសុំ ១.សម្រាប់បញ្ជីនៅក្នុងឆ្នាំកំពុងអនុវត្ត (គិតពីថ្ងៃទី១ ខែមករា ដល់ថ្ងៃទី៣១ ខែធ្នូ មិនទាន់ឆ្លងចូលឆ្នាំថ្មី) ប្រជាពលរដ្ឋអាចដាក់ពាក្យស្នើសុំកែតម្រូវទិន្នន័យ ឬមោឃភាពទិន្នន័យនៃបញ្ជីអត្រានុកូលដ្ឋាន នៅរដ្ឋបាល ឃុំ សង្កាត់ ។ ២.សម្រាប់បញ្ជីនៅក្នុងឆ្នាំកន្លងផុត (ហួសឆ្នាំកំពុងអនុវត្តនៃការចុះបញ្ជី) ប្រជាពលរដ្ឋអាចដាក់ពាក្យស្នើសុំកែតម្រូវទិន្នន័យ ឬមោឃភាពទិន្នន័យនៃបញ្ជីអត្រានុកូលដ្ឋាន នៅទីតាំងណាមួយដូចជា រដ្ឋបាលក្រុង ស្រុក ខណ្ឌ ឬ នាយកដ្ឋានអត្រានុកូលដ្ឋាន។ ដោយឡែក ការកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន ក្រៅពី៩ចំណុចដែលបានកំណត់រៀបរាប់ខាងលើ មិនមែនជាសមត្ថកិច្ចរបស់មន្រ្តីអត្រានុកូលដ្ឋានថ្នាក់ជាតិទេ គឺជាសមត្ថកិច្ចរបស់តុលាការ ដែលមានសមត្ថកិច្ចតាមច្បាប់កំណត់។ ផ្អែកលើមូលដ្ឋាននៃការអនុវត្ត ការងារកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន ឯកឧត្តមអគ្គនាយកអត្តសញ្ញាណកម្មបានកត់សម្គាល់ជារួមថា កំហុសទិន្នន័យនៃបញ្ជីអត្រានុកូលដ្ឋាន របស់បងប្អូនប្រជាពលរដ្ឋមានលក្ខណៈចម្រុះ និងស្មុគស្មាញ ខណៈកំហុសមួយចំនួនបានកើតឡើងដោយអចេតនា ដោយកង្វះការប្រុងប្រយ័ត្នរបស់មន្ត្រី និងកំហុសមួយចំនួនទៀតបានកើតឡើងដោយបងប្អូនប្រជាពលរដ្ឋផ្តល់ទិន្នន័យមិនត្រឹមត្រូវ។បើតាមឯកឧត្តមអគ្គនាយក ដើម្បីចៀសបង្កើតកំហុសទិន្នន័យក្នុងបញ្ជីអត្រានុកូលដ្ឋាន អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ក៏បានណែនាំដល់ជំនួយការរដ្ឋបាលឃុំ សង្កាត់ ឬស្មៀន និងមន្ត្រីអត្រានុកូលដ្ឋានថ្នាក់ឃុំ សង្កាត់ ពិនិត្យផ្ទៀងផ្ទាត់រាល់ទិន្នន័យជាមួយឯកសារភ្ជាប់ឱ្យបានច្បាស់លាស់ និងត្រូវសាកសួរបញ្ជាក់អ្នកស្នើសុំចុះបញ្ជីមុនសម្រេចចុះបញ្ជី និងចេញសំបុត្រអត្រានុកូលដ្ឋានជូនប្រជាពលរដ្ឋ។ សម្រាប់ប្រជាពលរដ្ឋ ដែលជាអ្នកស្នើសុំ សូមពិនិត្យរាល់ទិន្នន័យក្នុងបញ្ជីអត្រានុកូលដ្ឋានរបស់ខ្លួនឱ្យបានច្បាស់លាស់ និងត្រឹមត្រូវជាមុនសិន។ ក្នុងករណីឃើញមានកំហុសប្រជាពលរដ្ឋត្រូវស្នើសុំមន្ត្រីអត្រានុកូលដ្ឋានឃុំ សង្កាត់ កែតម្រូវទិន្នន័យកំហុសភ្លាមៗ។ បច្ចុប្បន្ន ឯកឧត្តម បណ្ឌិត តុប នេត បានបង្ហើបឱ្យដឹងថា អនុវត្តតាមគោលការណ៍ណែនាំឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អគ្គនាយកដ្ឋានអត្តសញ្ញាណកម្ម បាននឹងកំពុងរៀបចំសេចក្ដីព្រាង កំណត់ពីសមត្ថកិច្ចកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន ដោយមន្ត្រីអត្រានុកូលដ្ឋាន ឃុំ សង្កាត់ ក្រុង ស្រុក ខណ្ឌ និងរាជធានី ខេត្ត និងរៀបចំប្រព័ន្ធកែតម្រូវទិន្នន័យ និងមោឃភាពបញ្ជីអត្រានុកូលដ្ឋានតាមប្រព័ន្ធអេឡិចត្រូនិក នៅថ្នាក់ ក្រុង ស្រុក ខណ្ឌ រាជធានី ខេត្ត ដើម្បីផ្ដល់ជម្រើសជូនពលរដ្ឋ អាចស្នើសុំតាមប្រព័ន្ធអេឡិចត្រូនិក បន្ថែមលើការស្នើសុំដោយផ្ទាល់ ដោយការងារនេះអាចនឹងដាក់ដំណើរការនៅត្រីមាសទី៤ ឆ្នាំ២០២៥៕

រដ្ឋបាលរាជធានីភ្នំពេញប្រជុំបូកសរុបលទ្ធផលការងារត្រួតពិនិត្យ និងជំរុញការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ប្រចាំឆមាសទី១ ឆ្នាំ២០២៥

ភ្នំពេញ ៖ នាព្រឹកថ្ងៃទី៤ ខែកញ្ញា ឆ្នាំ២០២៥ ឯកឧត្ដម ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារទី១ ត្រួតពិនិត្យ និងជំរុញការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” រាជធានីភ្នំពេញ និងឯកឧត្ដម ឃួង ស្រេង អភិបាលរាជធានីភ្នំពេញ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារត្រួតពិនិត្យ និងជំរុញការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ប្រចាំឆមាសទី១ ឆ្នាំ២០២៥ នៅសាលារាជធានីភ្នំពេញ។ក្នុងឱកាសនោះ ឯកឧត្ដម ឃួង ស្រេង បានមានប្រសាសន៍ថា អាជ្ញាធររាជធានីភ្នំពេញបានរក្សានូវសន្តិសុខ សុវត្ថិភាពយ៉ាងល្អប្រសើរ ដោយមិនធ្វើឱ្យប្រជាពលរដ្ឋមានការព្រួយបារម្ភឡើយ ខណៈមានការប៉ះទង្គិចគ្នាដោយអាវុធ នៅតាមព្រំដែន។ រដ្ឋបាលរាជធានីភ្នំពេញបាននាំយកអំណោយដូចជា ចង្ក្រានហ្គាស ចានឆ្នាំង និងម៉ូតូ ដែលជាអំណោយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត និងសម្តេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន និងគ្រឿងឧបភោគ បរិភោគ ព្រមទាំងសម្ភារៈផ្សេងៗ ដែលបានមកពីសប្បុរសជនទៅចែកជូនវីរកងទ័ពជួរមុខ និងជនភៀសសឹកចំនួន ២១លើក។ បន្ថែមពីនេះ អនុវត្តតាមការចង្អុលណែនាំពីសម្តេចធិបតី ហ៊ុន ម៉ាណែត នាយករដ្ឋមន្ត្រី ចាប់ពីថ្ងៃទី២៦ កក្កដា ដល់ថ្ងៃទី១ ខែកញ្ញា ឆ្នាំ២០២៥ រដ្ឋបាលរាជធានីបានរៀបចំរថយន្តក្រុងសម្រាប់ដឹកជញ្ជូនពលករមកពីប្រទេសថៃ ដោយបានប្រើប្រាស់រថយន្តក្រុងរាប់រយគ្រឿង និងបានដឹកពលករមកពីប្រទេសថៃបានចំនួនជាង ៥ម៉ឺននាក់។ឯកឧត្ដមឃួង ស្រេង បានបន្តថា រដ្ឋបាលរាជធានីភ្នំពេញបានអនុវត្តគោលនយោបាយភូមិ សង្កាត់មានសុវត្ថិភាពបានល្អ ដោយបង្ការ ទប់ស្កាត់ បង្ក្រាបបទល្មើសគ្រប់ប្រភេទ មានទាំងបទល្មើស លួច ឆក់ ប្លន់ និងល្បែងតាមអនឡាញជាដើម។ក្នុងឱកាសនោះដែរ ឯកឧត្ដម ឃួង ស្រេង បានឱ្យមន្ត្រីទាំងអស់ជឿជាក់លើការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការដឹកនាំប្រទេសជាតិ និងកិច្ចការពារបូរណភាពទឹកដីកម្ពុជា។ ចំណែក ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក្នុងឱកាសនោះបានលើកឡើងពីការអនុវត្តគោលនយោបាយភូមិ សង្កាត់ មានសុវត្ថិភាព នៅរាជធានីភ្នំពេញបានល្អប្រសើរ ធ្វើឱ្យប្រជាពលរដ្ឋ ភ្ញៀវជាតិ អន្តរជាតិ អ្នកវិនិយោគ និងអ្នកទេសចរណ៍ទទួលបានភាពកក់ក្តៅ។ បានការពារព្រះមហាក្សត្រ និងថ្នាក់ដឹកនាំបាន ២០២លើក ប្រកបដោយសុវត្ថិភាព និងបានធ្វើឱ្យបទល្មើសថយចុះ។ ឧត្តមសេនីយ៍ឯក ជួន ណារិន្ទ បានបន្តថា ដើម្បីឆ្លើយតបបទល្មើសដែលបានកើតឡើង ស្នងការដ្ឋាននគរបាលរាជធានីបានបង្ក្រាបបទល្មើសបាន២២៦ករណី ឃាត់ខ្លួនជនសង្ស័យបាន ២៩៩នាក់។ បង្ក្រាបក្មេងទំនើងបាន ១០៦ករណី ឃាត់ខ្លួនបានជាង ៣០០នាក់ បង្ក្រាបល្បែងស៊ីសងបាន ១៣២ករណី ឃាត់ខ្លួនបាន២៣៤នាក់ បានផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព បានចំនួន ៦២២លើក ដែលមានមនុស្សចូលរួមប្រមាណជាង ៣៦៧ពាន់នាក់។ ឯកឧត្ដម ប៊ុន ហុន រដ្ឋលេខាធិការក្រសួងមហាផ្ទៃបានថ្លែងនូវការកោតសរសើរចំពោះ គណៈបញ្ជាការឯកភាពរាជធានីភ្នំពេញ ដែលបានអនុវត្តគោលនយោបាយភូមិ សង្កាត់មានសុវត្ថិភាពបានល្អ ដោយមិនមានអ្វីគួរឱ្យកត់សំគាល់ឡើយ។ ទោះបីជាយ៉ាងណាក្តី ឯកឧត្ដម ជំរុញឱ្យអាជ្ញាធររាជធានីភ្នំពេញបន្តពង្រឹងការអនុវត្តវិធានការរដ្ឋបាល ពិសេសនៅតំបន់ស្មុគស្មាញ។ ឯកឧត្ដម ប៊ុន ហុន បានបញ្ជាក់ថា ក្នុងនាមជាអាជ្ញាធរ រដ្ឋមានសិទ្ធិគ្រប់គ្រាន់ ក្នុងការអនុវត្តវិធានការរដ្ឋបាល ទោះក្នុងបុរី ខុនដូ ឬសណ្ឋាគារក៏ដោយ ដើម្បីរក្សាឱ្យបានសន្តិសុខ សុវត្ថិភាព ក្នុងតំបន់ដែលខ្លួនគ្រប់គ្រង។ តែមន្ត្រីអនុវត្ត សូមកុំធ្វើជាត្រីងៀត ឆ្លៀតពង៕

សម្តេចប្រមុខរដ្ឋស្ដីទី ប្រាប់ទូតប្រទេសបួគីណាហ្វាសូថា «ក្នុងនាមប្រទេសក្រីក្រអ្វីដែលត្រូវប្រយ័ត្នបំផុតគឺជំនួយ និងការផ្ដល់យោបល់ពីបរទេស»

ភ្នំពេញ៖ នៅព្រឹកថ្ងៃទី៤ ខែកញ្ញា ឆ្នាំ២០២៥នេះ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Daouda Bitie ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតបួគីណាហ្វាសូ ប្រចាំកម្ពុជា ចូលជួប និងប្រគល់សារតាំង នៅវិមានព្រឹទ្ធសភា រាជធានីភ្នំពេញ។ក្រោយជំនួបនេះ អ្នកនាំពាក្យព្រឹទ្ធសភា ឯកឧត្តម ជា ធីរិទ្ធ បានឱ្យដឹងថា នៅក្នុងជំនួបទទួលសារតាំងនេះ សម្ដេចតេជោ ហ៊ុន សែន បានសម្ដែងនូវការស្វាគមន៍ និងអបអរសាទរចំពោះឯកឧត្តម Daouda Bitie ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតបួគីណាហ្វាសូ ប្រចាំកម្ពុជា, សម្ដេចតេជោ សង្ឃឹមថា វត្តមានរបស់ឯកឧត្តមឯកអគ្គរដ្ឋទូតនៅពេលនេះនឹងធ្វើឱ្យទំនាក់ទំនងរវាងកម្ពុជា និងបួគីណាហ្វាសូនឹងកាន់តែរីកចម្រើនបន្ថែមទៀតបន្ទាប់ពីប្រទេសនេះ បានបង្កើតទំនាក់ទំនងការទូតផ្លូវការជាមួយកម្ពុជាអស់រយៈពេល១៥ឆ្នាំកន្លងមកនេះ។នៅក្នុងឱកាសនោះ ឯកឧត្តម Daouda Bitie ឯកអគ្គរដ្ឋទូត សាធារណរដ្ឋប្រជាមានិតបួគីណាហ្វាសូ ប្រចាំកម្ពុជា បានសម្ដែងនូវការអរគុណចំពោះសម្ដេចអគ្គមហាសេនាបតីតេជោ ហ៊ុន សែន ដែលបានផ្ដល់មហាកិត្តិយសដ៏ធំធេងសម្រាប់ឯកឧត្តមបានប្រគល់សារតាំងនៅក្នុងឱកាសនេះ។ ឯកឧត្តម បានជម្រាបជូនសម្ដេចតេជោថា ជាមោទនភាពសម្រាប់ឯកឧត្តមដែលបានមកបំពេញការងារជាឯកអគ្គរដ្ឋទូតរបស់ បួគីណាហ្វាសូប្រចាំនៅព្រះរាជាណាចក្រកម្ពុជា ដែលជាឯកអគ្គរដ្ឋទូតដំបូងគេបំផុតតំណាងឱ្យប្រទេសរបស់ឯកឧត្តម។ក្នុងឱកាសនោះ ឯកឧត្តមក៏បានជម្រាបសម្ដេចតេជោដែរថា នេះជាឱកាសមួយដ៏ល្អណាស់ ដោយឯកឧត្តមអាចបាននាំនូវពាក្យផ្ដាំផ្ញើរបស់ឯកឧត្តមប្រធានាធិបតីរបស់សាធារណរដ្ឋប្រជាមានិតបួគីណាហ្វាសូ ថា នៅពេលដែលឯកឧត្តមមកបំពេញការងារនៅព្រះរាជាណាចក្រកម្ពុជានឹងជាឱកាសមួយបានរៀនសូត្របន្ថែមទៀត និងដកស្រង់បទពិសោធន៍ដ៏សំខាន់ចេញពីព្រះរាជាណាចក្រកម្ពុជា។ឯកឧត្តមបានបញ្ជាក់ថា ប្រទេសកម្ពុជា និងបួគីណាហ្វាសូ គឺមានប្រវត្តិធ្លាប់ឋិតនៅក្រោមអាណានិគមរបស់បារាំងដូចគ្នា ដូច្នេះប្រវត្តិមួយចំនួនមានភាពប្រហាក់ប្រហែលគ្នា ហើយជាពិសេសឯកឧត្តមចាប់អារម្មណ៍ផ្ទាល់ទៅលើបទពិសោធន៍ផ្ទាល់របស់សម្ដេចតេជោ ដែលបានដឹកនាំប្រទេសនាពេលកន្លងមកដែលនេះជាបទពិសោធន៍មួយដែលឯកឧត្តមទន្ទឹងរងចាំក្នុងការរៀនសូត្រក្នុងពេលដែលឯកឧត្តមបំពេញការងារនៅព្រះរាជាណាចក្រកម្ពុជា។ក្នុងឱកាសនោះសម្ដេចតេជោ បានសម្ដែងនូវក្ដីរីករាយក្រោយបានស្ដាប់នូវការលើកឡើងរបស់ឯកឧត្តមឯកអគ្គរដ្ឋទូត បួគីណាហ្វាសូ ដោយសម្ដេចតេជោ បានបញ្ជាក់ថា សម្ដេចពេញចិត្តនៅក្នុងការចែករំលែកនូវបទពិសោធន៍ និងទទួលស្គាល់ដែលប្រទេសកម្ពុជា និងបួគីណាហ្វាសូ មានភាពប្រហាក់ប្រហែលគ្នា ជាពិសេសឋិតនៅក្រោមអាណានិគមរបស់បារាំងដូចគ្នា។ក្នុងឱកាសនោះសម្ដេចតេជោបានប្រាប់ទៅឯកឧត្តមឯកអគ្គរដ្ឋទូតថា ក្នុងនាមយើងជាប្រទេសក្រីក្រ អ្វីដែលយើងត្រូវប្រយ័ត្នបំផុតនោះ គឺជំនួយរបស់បរទេស ពីព្រោះជំនួយរបស់បរទេសនេះ គឺសំខាន់ណាស់ពីព្រោះជំនួយខ្លះអាចជះផលអវិជ្ជមានសម្រាប់ប្រទេសរបស់ខ្លួនក៏អាចថាបានដែរ ប្រសិនបើខ្វះការគិតគូរឱ្យបានស៊ីជម្រៅ។ ទន្ទឹមនឹងនេះ សម្ដេចតេជោ បានបន្តថា សម្រាប់ការវិនិយោគពីបរទេសគឺសំខាន់ហើយ ប៉ុន្ដែអ្វីដែលសំខាន់បំផុត គឺការវិនិយោគនៅក្នុងស្រុក ការធ្វើពាណិជ្ជកម្មនៅក្នុងស្រុក ដែលជាចំណុចសំខាន់មួយដើម្បីទាក់ទាញវិនិយោគិនពីក្រៅប្រទេសបន្ថែមទៀតពីព្រោះអ្នកវិនិយោគនៅក្រៅប្រទេសមើលឃើញពីការវិនិយោគល្អប្រសើរ និងស្ថិរភាពនៅក្នុងប្រទេសទើបគេមកវិនិយោគ។សម្ដេចតេជោ ក៏បានចែករំលែកដល់ឯកឧត្តម ឯកអគ្គរដ្ឋទូត ពាក់ព័ន្ធទៅនឹងការផ្ដល់យោបល់ គឺត្រូវមានការប្រុងប្រយ័ត្នចំពោះការផ្ដល់យោបល់ពីបរទេស ជាពិសេសប្រទេសអ្នកមានមួយចំនួនផងដែរ ដោយការផ្ដល់យោបល់ទាំងនោះមិនប្រាកដថាត្រឹមត្រូវទាំងស្រុងទេ ដូច្នេះយោបល់របស់ពួកគេគឺត្រូវថ្លឹងថ្លែងឱ្យបានស៊ីជម្រៅពីព្រោះបទពិសោធន៍របស់កម្ពុជា គឺបានឆ្លងកាត់រួចមកហើយដូចជាការផ្ដល់យោបាល់ឱ្យកម្ពុជាលក់ វិស័យគយទៅឱ្យវិស័យឯកជនជាដើមដែលនេះជារឿងមិនត្រឹមត្រូវ។សម្ដេចតេជោបានថ្លែងថា ពេលខ្លះប្រទេសអ្នកមានមួយចំនួនពួកគេមានសំណាង គ្រាន់តែបានកើតនៅក្នុងប្រទេសអ្នកមានប៉ុន្ដែមិនប្រាកដថា ពួកគេមានខួរក្បាលល្អជាងប្រទេសអ្នកក្រ ឬក៏មេដឹកនាំ ឬប្រជាជនប្រទេសអ្នកក្រនោះទេ។ទាក់ទងនឹងទំនាក់ទំនងរវាងប្រទេសកម្ពុជា និងប្រទេសបួគីណាហ្វាសូ ឯកឧត្តមឯកអគ្គរដ្ឋទូតបានជំរុញឱ្យប្រទេសទាំងពីរពង្រឹងទៅលើវិស័យសេដ្ឋកិច្ច និងពាណិជ្ជកម្ម ខណៈប្រទេសបួគីណាហ្វាសូសម្បូរទៅដោយធនធានរ៉ែ ដែលអាចពង្រីកកិច្ចសហប្រតិបត្តិការជាមួយកម្ពុជា។ ក្រៅពីនេះក៏ពង្រឹងកិច្ចសហប្រតិបត្តិការផ្នែកយោធា និងដោះមីនជាដើម និងការពង្រីកទៅលើកិច្ចសហប្រតិបត្ដិការសំខាន់ៗដ៏ទៃទៀតចំពោះការគាំទ្រគ្នានៅលើឆាកអន្តរជាតិ។សម្ដេចតេជោ បានស្វាគមន៍ចំពោះការលើកឡើងរបស់ឯកឧត្តមឯកអគ្គរដ្ឋទូត ទាក់ទងការពង្រឹងកិច្ចសហប្រតិបត្តិការរវាងប្រទេសទាំងពីរនេះ ដោយសម្ដេចតេជោបានបញ្ជាក់ថា ភាគីទាំងពីរគួរតែបង្កើតឱ្យមាននូវកិច្ចព្រមព្រៀងដែលមានអនុស្សរណៈនៃការយោគយល់គ្នាមួយ ដើម្បីពិភាក្សាគ្នា ក្នុងការធ្វើយ៉ាងណារកចំណុចដែលត្រូវអភិវឌ្ឍរវាងប្រទេសទាំងពីរឱ្យបាន ក្នុងទិសដៅណាមួយដែលប្រទេសទាំងពីរមាន និងបង្កើតឱ្យមានក្រុមការងារដើម្បីពិភាក្សា និងធ្វើការងារជាមួយគ្នា៕

ក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តីបើកវគ្គបណ្តុះបណ្តាលស្តីពី «គោលការណ៍ណែនាំស្តីពីនីតិវិធី និងវិធាននៃការតាក់តែងសេចក្តីព្រាងច្បាប់ និងលិខិតបទដ្ឋានគតិយុត្តផ្សេងទៀត»

នៅថ្ងៃទី៣ ខែកញ្ញា ឆ្នាំ២០២៥ វេលាម៉ោង៨ព្រឹក នៅសាលប្រជុំ C អគារមិត្តភាព ទីស្តីការគណៈរដ្ឋមន្ត្រី ក្រុមប្រឹក្សាអ្នកច្បាប់ បានបើកវគ្គបណ្តុះបណ្តាលស្តីពី «គោលការណ៍ណែនាំស្តីពីនីតិវិធីនិងវិធាននៃការតាក់តែងសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត» ក្រោមអធិបតីភាព ឯកឧត្ដមសាស្រ្តាចារ្យបណ្ឌិត ឆែម គាតរិទ្ធី ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងដ៏ខ្ពង់ខ្ពស់ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់។ វគ្គបណ្តុះបណ្តាលនេះដែរត្រូវបានធ្វើបទបង្ហាញដោយ ឯកឧត្តមបណ្ឌិត ស៊ា ម៉ៅ រដ្ឋលេខាធិការទីស្តីការគណៈរដ្ឋមន្រ្តី អនុប្រធាននិងជាអគ្គលេខាធិការក្រុមប្រឹក្សាអ្នកច្បាប់ និង ឯកឧត្តម អ៊ុត ស៊ីណាត អនុរដ្ឋលេខាធិការទីស្តីការគណៈរដ្ឋមន្រ្តី សមាជិកនិងជាអគ្គលេខាធិការរងក្រុមប្រឹក្សាអ្នកច្បាប់ ជូនដល់ថ្នាក់ដឹកនាំ និងមន្រ្តីរាជការនៃទីស្តីការគណៈរដ្ឋមន្រ្តី ព្រមទាំងតំណាងគណៈកម្មាធិការ ក្រុមប្រឹក្សា អាជ្ញាធរ និងអង្គភាពចំណុះទីស្តីការគណៈរដ្ឋមន្រ្តី មានចំនួនជាងប្រមាណ៥០០នាក់។ថ្លែងក្នុងពិធីបើកវគ្គបណ្តុះបណ្តាលនេះ ឯកឧត្តម ឆែម គាតរិទ្ធី បានមានប្រសាសន៍ថា « រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត ថាមពល និងជាក់ស្តែងនិយមរបស់សម្តេចធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលមុំទី១ បានកំណត់យក «ការពង្រឹងនិងការកែទម្រង់ស្ថាប័ន» ជាចំណុចស្នូល តាមរយៈការបន្តកែទម្រង់ស្ថាប័ននិងអភិបាលកិច្ច ហើយបំពេញការងារនៅក្នុង «ជវភាពនៃប្រព័ន្ធតួអង្គតែមួយ» និងមុំទី៤ «ការលើកកម្ពស់និងពង្រឹងប្រសិទ្ធភាពច្បាប់និងប្រព័ន្ធយុត្តិធម៌» ដែលមានគោលដៅពង្រឹងគោលការណ៍នីតិរដ្ឋដែលរួមចំណែកធានាថែរក្សាស្ថិរភាពសង្គម សណ្តាប់ធ្នាប់សាធារណៈនិងភាពសុខដុមរមនាក្នុងសង្គមជាតិ។ក្នុងឱកាសនោះដែរ ឯកឧត្តម ស៊ា ម៉ៅ បានមានប្រសាសន៍ថា « ក្រោមគំនិតផ្តួចផ្តើមដ៏ខ្ពង់ខ្ពស់របស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់ ក្នុងឆ្នាំ២០២៤ ក្រុមប្រឹក្សាអ្នកច្បាប់ បានរៀបចំវគ្គបណ្តុះបណ្តាលចំនួន៧លើករួចមកហើយ ពាក់ព័ន្ធនឹងសេដ្ឋកិច្ច ពាណិជ្ជកម្ម នយោបាយ និងច្បាប់»។ ឯកឧត្តម បានបន្តថា «ទន្ទឹមគ្នានេះផងដែរ អស់រយៈពេលជាង១ឆ្នាំមកនេះ ក្រោយរាជរដ្ឋាភិបាលដាក់ឱ្យអនុវត្តគោលការណ៍ណែនាំស្តីពីនីតិវិធីនិងវិធាននៃការតាក់តែងសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត តាមរយៈអនុក្រឹត្យលេខ១៧០ កាលពីខែកក្កដា ឆ្នាំ២០២៤ ក្រុមប្រឹក្សាអ្នកច្បាប់ សង្កេតឃើញថាសេចក្តីព្រាងច្បាប់និងលិខិតបទដ្ឋានគតិយុត្តដែលក្រសួង ស្ថាប័ន បានដាក់ឆ្លងតាមរយៈយន្តការទីស្តីការគណៈរដ្ឋមន្រ្តី នៅពុំទាន់មានភាពត្រឹមត្រូវគ្រប់ជ្រុងជ្រោយតាមគោលការណ៍ណែនាំនៅទ្បើយ។ ហេតុនេះហើយ ទើបក្រុមប្រឹក្សាអ្នកច្បាប់រៀបចំវគ្គបណ្តុះបណ្តាលក្រោមប្រធានបទខាងលើនាព្រឹកនេះ ដែលជាលើកទី៣ក្នុងឆ្នាំ២០២៥ មានគោលដៅសំខាន់ដើម្បីពង្រឹងសមត្ថភាពនិងជាមូលដ្ឋានគ្រឹះដ៏រឹងមាំ ក្នុងការពិនិត្យនិងផ្តល់យោបល់លើសេចក្តីព្រាងច្បាប់និងលិខិតបទដ្ឋានគតិយុត្តនានា»៕

បណ្ដាញសង្គម

ព័ត៌មានថ្មីៗ

អ្នកវិទ្យាសាស្ត្របកស្រាយប្រវត្តិភូគព្ភសាស្ត្រនៃជ្រលងភ្នំ Grand Canyon

វិមានក្រឹមឡាំង៖ សហប្រតិបត្តិការយានដ្រូនរបស់អឺរ៉ុបជាមួយអ៊ុយក្រែន គឺជាការចូលរួមខ្លាំងឡើងៗ នៅក្នុងសង្គ្រាម

អតីតប្រធានាធិបតីមីយ៉ាន់ម៉ា មានសេរីភាព ក្រោយការលើកលែងទោស ពាក់ព័ន្ធការផ្ដន្ទាទោសក្រោយរដ្ឋប្រហារ

UN៖ ស្រ្តី និងក្មេងស្រី ៤៧នាក់ ត្រូវបានសម្លាប់ក្នុង ១ថ្ងៃ អំឡុងសង្រ្គាមហ្កាហ្សា

លោក Macron និងលោក Starmer រៀបចំកិច្ចប្រជុំកំពូលស្តីពីសន្តិសុខច្រកសមុទ្រ Hormuz

ប្រធានាធិបតីលីបង់ បញ្ជាក់ថា កិច្ចចរចាដោយផ្ទាល់ជាមួយអ៊ីស្រាអែល គឺ «សំខាន់ណាស់»

មនុស្ស ៦នាក់ ស្លាប់ និងមនុស្ស ៤៣នាក់ រងរបួសនៅអ៊ុយក្រែន ក្នុងការវាយប្រហាររបស់រុស្ស៊ី រយៈពេល ១ថ្ងៃកន្លងមកនេះ

រដ្ឋមន្រ្តីការពារជាតិ៖ អ៊ីស្រាអែលនឹងបន្តគ្រប់គ្រងទឹកដីដែលពួកគេដណ្តើមបាននៅភាគខាងត្បូងលីបង់

អាល្លឺម៉ង់មិនចូលរួមបេសកកម្មច្រកសមុទ្រ Hormuz នោះទេ រហូតដល់សន្តិភាពសម្រេចបាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877