BTV NEWS

ថ្ងៃទី៥នៃ «នគរសង្រ្កាន្ត» ពលរដ្ឋ យុវជន បន្តមកដើរលេងកម្សាន្ត និងកោតសរសើរពីការតាំងពិព័រណ៍ ក្នុងភូមិវប្បធម៌ ពិសេសការរៀបចំផ្សេងៗនៅភ្នំពេញ

ថ្លៃលក់រាយប្រេងសាំង និងម៉ាស៊ូត បន្តធ្លាក់ចុះ ខណៈរដ្ឋបន្តទម្លាក់ពន្ធដល់សូន្យ% ដើម្បីជួយពលរដ្ឋ

អ្នកនាំពាក្យ៖ ការប្រារព្ធពិធីចូលឆ្នាំថ្មីមិនត្រឹមតែជាការថែរក្សាទំនៀមទម្លាប់ប្រពៃណី និងវប្បធម៌ពីដូនតាប៉ុណ្ណោះទេ ប៉ុន្ដែបានរួមចំណែកដល់ចរន្តសេដ្ឋកិច្ចជាតិថែមទៀត

បីថ្ងៃពិធីបុណ្យចូលឆ្នាំមានពលរដ្ឋ និងទេសចរអន្តរជាតិដើរលេងកម្សាន្តជាង ២១ លាននាក់ មានន័យថា ពលរដ្ឋម្នាក់អាចដើរលេងលើសពីមួយដង

ព័ត៌មានជាតិ

ពលករខ្មែរខេត្តស្វាយរៀង បម្រើការងារនៅប្រទេសថៃ ជិត៤ពាន់នាក់ បានវិលត្រឡប់មកផ្ទះសម្បែងវិញ ក្រោមការសម្របសម្រួលរបស់រដ្ឋបាលខេត្ត

លោកដាំ ឃុនពិសី ប្រធានមន្ទីរព័ត៌មានខេត្តស្វាយរៀង និងជាអ្នកសម្របសម្រួល ទទួលពលករមកពីប្រទេសថៃ នៅរសៀលថ្ងៃទី២ ខែកញ្ញា ឆ្នាំ២០២៥នេះ បានឱ្យដឹងថា គិតមកដល់ខែកញ្ញា ២០២៥នេះ ពលករខ្មែរ ដែលមានដើមកំណើត នៅក្នុងភូមិសាស្ត្រខេត្តស្វាយរៀង ហើយបានទៅធ្វើការនៅប្រទេសថៃ ពួកគាត់បានធ្វើការ វិលត្រឡប់ មក ផ្ទះសម្បែងវិញ មានចំនួន៣ពាន់៧៧៨នាក់ហើយ ក្រោមការសម្របសម្រួលរបស់រដ្ឋបាលខេត្ត ។លោកបានបញ្ជាក់បន្ថែមថា នៅក្នុងចំណោម ពលករ ដែលវិលមកពីប្រទេសថៃ ជិត៤ពាន់នាក់នោះ បច្ចុប្បន្នពួកគាត់បានទៅចុះឈ្មោះស្វែងរកការងារធ្វើដោយខ្លួនឯង និងតាមរយៈ វេទិកាស្វែងរកការងារធ្វើ ដែលរៀបចំដោយរដ្ឋបាលខេត្ត ពួកគាត់ បានចូលបម្រើការងារ ចំនួន ១ពាន់៨១១នាក់ នៅតាមរោងចក្រសហគ្រាសក្នុងភូមិសាស្ត្រខេត្ត ដើម្បីនិរន្តភាពជីវភាពប្រចាំថ្ងៃ ។តាមរបាយការណ៍របស់មន្ទីរការងារបណ្តុះបណ្តាលវិជ្ជាជីវៈខេត្ត បានបញ្ជាក់ថា បច្ចុប្បន្ននេះនៅទូទាំងខេត្តស្វាយរៀង កង្វះកំលាំងពលកម្មបំរើការងារជាង ១ម៉ឺនកន្លែង បន្ទាប់ពីក្រុមអ្នកវិនិយោគចូលមកបង្កើតរោងចក្រសហគ្រាសបន្ថែម នៅក្នុងស្រុក កំពង់រោទ៍ និងចន្ទ្រា ។

ម៉ូតូចំនួន៥៦គ្រឿង និងគ្រឿងឧបភោគបរិភោគត្រូវបាននាំយកចែកផ្ដល់ជូនវីរកងទព័ជួរមុខ និងពលរដ្ឋភៀសសឹក

ម៉ូតូចំនួន ៥៦គ្រឿង ថវិកា រួមនិង គ្រឿងឧបភោគបរិភោគ ភេសជ្ជៈ ដែលជា អំណោយសទ្ធាជ្រះថ្លារបស់ព្រះសង្ឃ សប្បុរសជន នៅសហរដ្ឋអាមេរិក ពុទ្ធបរិស័ទក្នុងខេត្ត និងក្រៅខេត្ត ផ្ដល់តាមរយសាលាគណ ត្រូវបាន ព្រះវិសុទ្ទិញ្ញាណ មុំ សយ ព្រះមេគណខេត្ត នាំយកទៅ ចែកផ្ដល់ជូនដល់វីរកងទ័ពជួរមុខ ឈរការពារបូរណភាពទឹកដី រួចរាល់ហើយ កាលពីថ្ងៃទី ៣០ និងថ្ងៃទី៣១ ខែសីហា ឆ្នាំ២០២៥នេះ។ ក្នុងឱកាសនោះដែរ ព្រះវិសុទ្ធញ្ញាណ មុំសយ ក្នុងនាមព្រះសង្ឃ និងសប្បុរសជន ក្នុងនិងក្រៅប្រទេស បាននាំមកនូវសេចក្តី នឹករលឹកជូនចំពោះ វីរកងទ័ព ដែលឈរជើងការពារបូរណភាពទឹកដី ដោយមិនខ្លាចនឿយហត់ និងការលះបង់ សាច់ស្រស់ឈាមស្រស់ៗ ផ្សារភ្ជាប់ ទៅនឹង មហាពលីកម្ម មិនអាចកាត់ថ្លៃបាននេះ ។ព្រះសង្ឃ និងសប្បុរសជនសូម បួងសួងដល់គុណព្រះរតនត្រ័យ ទេវតា ថែរក្សា ប្រាសាទ ព្រះវិហារ និងតំបន់ផ្សេងៗទៀត ជួយប្រោសព្រំ ដល់ វីរកងទ័ព ជួបតែសេចក្តីសុខ គ្រប់ប្រការ ក្នុងមនោសញ្ចេតនា ផ្សារភ្ជាប់ កងទ័ពនៅសមរភូមិក្រោយ ថ្ងៃនេះ តាមរយៈសាលាគណខេត្ត សូម ផ្ញើជូនសម្ភារៈ គ្រឿងឧបភោគបរិភោគថវិកា ដើម្បីសម្រួលដល់កិច្ចការ ដំណើរការ ការពារជាតិ និងជីវភាពបន្ថែម ៕

រដ្ឋបាលខេត្តប៉ៃលិន ដឹកនាំមន្ត្រី ក្រោមឱវាទ យុវជន និងប្រជាពលរដ្ឋ ដាំដើមឈើចម្រុះ ២៥០០ដើម ដើម្បីលើកសោភ័ណភាពស្រុកសាលាក្រៅ

ប៉ៃលិន៖ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន រួមជាមួយឯកឧត្តម លោកជំទាវ សមាជិក ក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រី ប្រធានមន្ទីរអង្គភាពជុំវិញខេត្ត កងកម្លាំងទាំងបីប្រភេទ លោកអភិបាល ក្រុង ស្រុក យុវជន ស.ស.យ.ក ខេត្ត លោកគ្រូ អ្នកគ្រូ សិស្សានុ សិស្ស និងប្រជាពលរដ្ឋ បានរួមគ្នាដាំដើមឈើចម្រុះ ចំនួន២៥០០ដើម ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដើម្បីអបអរសាទរ រុក្ខទិវា ៩ កក្កដា លើកទី៣០។លោកជំទាវ បាន ស្រីមុំ អភិបាល បានមានប្រសាសន៍ថា បច្ចុប្បន្ន រដ្ឋបាលខេត្តប៉ៃលិន បាននឹងកំ ពុងអនុវត្តយ៉ាងសកម្មនូវគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល កម្ពុជា អាណត្តិទី៧ ក្នុងកិច្ចការពារបរិស្ថាន និងអភិរក្សធនធានធម្មជាតិ ព្រមទាំងអេកូឡូស៊ី ដើម្បីលើក កម្ពស់កិត្យានុពលបៃតងជាតិឱ្យល្បីល្បាញរន្ទឺ ជាប្រទេសមានការអភិវឌ្ឍន៍បៃតងគំរូក្នុងតំបន់អាស៊ាន និង អាស៊ីប៉ាស៊ីហ្វិក តាមគោលនយោបាយជាតិ ស្តីពីការអភិវឌ្ឍបៃតង និងផែនការយុទ្ធសាស្ត្រជាតិ ស្តីពីការ អភិវឌ្ឍបៃតង ឆ្នាំ២០១៣-២០៣០។លោកជំទាវ បានធ្វើការអំពាវនាវដល់អង្គការជាតិ-អន្តរជាតិ ដៃគូរអភិវឌ្ឍន៍នានា អាជ្ញាធរមូលដ្ឋាន គ្រប់លំដាប់ថ្នាក់ មន្ទីរអង្គភាពពាក់ព័ន្ធ កងកម្លាំង និងប្រជាពលរដ្ឋ បន្តកិច្ចសហប្រតិបត្តិការតាមគ្រប់រូប ភាពក្នុងការចូលរួមថែរក្សាធនធានព្រៃឈើ និងដាំកូនឈើឱ្យបានជាអតិបរមា ព្រោះដើមឈើដែលដុះដាល រីកចម្រើនច្រើន វាជាពហុប្រយោជន៍ និងបានបំពេញនៅលើដីទំនេរឱ្យមានគម្របព្រៃឈើ ការគ្រប់គ្រងព្រៃ ឈើ ទាំងព្រៃធម្មជាតិ ទាំងព្រៃដាំ និងការអភិវឌ្ឍន៍ ក្នុងវិស័យព្រៃឈើ ត្រូវមានការចូលរួមជាចាំបាច់ ពីគ្រប់ ភាគីទាំងអស់ ជាពិសេសប្រជាពលរដ្ឋមូលដ្ឋាន ជាចលករយ៉ាងសំខាន់ សម្រាប់កិច្ចសហការ ក្នុងការអភិ វឌ្ឍន៍វិស័យព្រៃឈើ ។លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ បានឱ្យដឹងថា ឆ្នាំ២០២៥នេះ ខណ្ឌដ្ឋបាលព្រៃឈើប៉ៃលិន បានកំណត់យកទីតាំងភូមិទំនប់ ឃុំស្ទឹងត្រង់ ដើម្បីប្រារព្ធ រុក្ខទិវា ៩ កក្កដា និងដាំដើមឈើចម្រុះ ចំនួន២៥០០ដើម មានដូចជា៖ បេង គ្រញូង នាងនួន ធ្នង់ ក្ងោក ត្របែកព្រៃ និង ជើងគោ សម្រាប់ដាំក្នុងពិធី “រុក្ខទិវា” និងចែកជូនតាមអង្គភាពស្ថាប័នជុំវិញខេត្ត សាលារៀន និងប្រជាពល រដ្ឋដាំតាមមូលដ្ឋានផងដែរ៕

ក្រុមសមាជិកព្រឹទ្ធសភាប្រចាំភូមិភាគទី៣ អញ្ជើញសំណេះសំណាលជាមួយ អាជ្ញាធរស្រុកអង្គស្នួល ខេត្តកណ្តាល

នាថ្ងៃពុធ ទី៣ ខែកញ្ញា ឆ្នាំ២០២៥ ក្រុមសមាជិកព្រឹទ្ធសភាប្រចាំភូមិភាគទី៣ (ខេត្តកណ្តាល) ដឹកនាំដោយ ឯកឧត្តម ម៉ម ប៊ុននាង ប្រធានក្រុម បានអញ្ជើញជួបសំណេះសំណាលជាមួយក្រុមប្រឹក្សាឃុំ ស្មៀន នាយប៉ុស្តិ៍នគរបាលរដ្ឋបាលឃុំនៅស្រុកអង្គស្នួល ខេត្តកណ្តាល សរុបចំនួន៩៨នាក់។ក្នុងឱកាសនោះ ឯកឧត្តម ម៉ម ប៊ុននាង បាននាំនូវប្រសាសន៍ផ្តាំផ្ញើសួរសុខទុក្ខពីសំណាក់ថ្នាក់ដឹកនាំព្រឹទ្ធសភា និងជម្រាបជូនអំពីគោលបំណងនៃពិធីសំណេះសំណាលនាពេលនេះ ព្រមទាំងបានលើកទឹកចិត្តដល់ក្រុមប្រឹក្សាឃុំ និងអាជ្ញាធរទាំងអស់ត្រូវចេះសាមគ្គីភាពផ្ទៃក្នុង ខិតខំលើកកម្ពស់សមត្ថភាពជាប្រចាំ ដើម្បីប្រើប្រាស់ធនធានដែលមានស្រាប់ឱ្យមានប្រសិទ្ធភាព និងផ្តល់សេវាសាធារណៈជូនដល់ប្រជាពលរដ្ឋ ប្រកបដោយតម្លាភាព គណនេយ្យភាព និងសមធម៌។ ទន្ទឹមនឹងនេះ ឯកឧត្តមប្រធានក្រុម បានអំពាវនាវប្រជាពលរដ្ឋ រួមគ្នាជាកម្លាំងសាមគ្គី ឯកភាពជាតិដ៏រឹងមាំ និងជឿទុកចិត្តលើការដឹកនាំដ៏ត្រឹមត្រូវប្រកបដោយគតិបណ្ឌិតរបស់ សម្តេចតេជោប្រធានព្រឹទ្ធសភា និងសម្តេចធិបតី ហ៊ុន ម៉ាណែត ក្នុងការដោះស្រាយវិវាទព្រំប្រទល់ជាមួយប្រទេសថៃដោយសន្តិវិធី ដើម្បីនិរន្តរភាពសន្តិភាពសម្រាប់ប្រជាជនទាំងពីរកម្ពុជា និងថៃ។ក្នុងឱកាសនោះផងដែរ លោកជំទាវបណ្ឌិត ចាន់ សុទ្ធាវី លេខាធិការក្រុម និងលោកជំទាវ សួស សារ៉ាម សមាជិកាក្រុម ក៏បានផ្សព្វផ្សាយអំពីលទ្ធផលនៃកិច្ចប្រជុំសមាជរដ្ឋសភា និងព្រឹទ្ធសភា។ក្រុមសមាជិកព្រឹទ្ធសភាប្រចាំភូមិភាគទី៣ បានឧបត្ថម្ភភេសជ្ជៈ អំណោយនិងថវិកាជូនក្រុមប្រឹក្សាឃុំ ស្មៀន នាយប៉ុស្តិ៍នគរបាលរដ្ឋបាលឃុំ ដោយក្នុងម្នាក់ៗទទួលបានភេសជ្ជៈ អំណោយរបស់អង្គការមូលនិធិសង្គ្រោះជីវិតសកលចំនួន១កញ្ចប់ និងថវិកាមួយចំនួន៕

ក្រុមសមាជិកព្រឹទ្ធសភាប្រចាំភូមិភាគទី៦ អញ្ជើញចុះជួប និងឈ្វេងយល់ អំពីសភាពការណ៍ថ្មីៗជាមួយរដ្ឋបាលខេត្តស្វាយរៀង

ក្នុងនោះសម័យប្រជុំលើកទី៣ និងលើកទី៤ព្រឹទ្ធសភា នីតិកាលទី៥នេះ គណៈប្រតិភូក្រុមសមាជិកព្រឹទ្ធសភាប្រចាំភូមិភាគទី៦ (ខេត្តព្រៃវែង និងខេត្តស្វាយរៀង) ដឹកនាំដោយលោកជំទាវ មាន សំអាន ប្រធានក្រុម បានអញ្ជើញជួបពិភាក្សាការងារជាមួយអាជ្ញាធរខេត្តស្វាយរៀង ដឹកនាំដោយឯកឧត្តម ប៉េង ពោធិ៍សា អភិបាល នៃគណៈអភិបាលខេត្ត នៅសាលាខេត្តស្វាយរៀង នាព្រឹកថ្ងៃទី៣ ខែកញ្ញា ឆ្នាំ២០២៥។នាឱកាសនោះ លោកជំទាវប្រធានក្រុម បានពាំនាំនូវការផ្តាំផ្ញើសួរសុខទុក្ខប្រកបដោយសេចក្តីនឹករលឹកពីសំណាក់ថ្នាក់ដឹកនាំព្រឹទ្ធសភា និងបានគូសបញ្ជាក់អំពីគោលបំណងរបស់ក្រុមសមាជិកព្រឹទ្ធសភាប្រចាំភូមិភាគទី៦ ចុះជួបនាពេលនេះ គឺដើម្បីទទួលបានព័ត៌មានសំខាន់ៗអំពី សភាពការណ៍ដែលកើតមាននៅតាមសមរភូមិព្រំដែនប្រទេសកម្ពុជា-ថៃ តើក្នុងខេត្តស្វាយរៀង មានកងទ័ពពលី និងរបួស ព្រមទាំងកំពុងឈរជើងក្នុងសមរភូមិព្រំដែនប្រទេសកម្ពុជា-ថៃមានប៉ុន្មាននាក់ និងគ្រួសារបងប្អូនកងទ័ពនៅក្នុងខេត្ត និងតាមតំបន់ភៀសសឹកមានប៉ុន្មានគ្រួសារ។ ទន្ទឹមនឹងនេះ ពលករដែលត្រឡប់ពីប្រទេសថៃវិញមានប៉ុន្មាននាក់ ហើយខេត្តបានចាត់វិធានការណ៍យ៉ាងដូចម្តេចសម្រាប់ពលករវិលត្រឡប់ពីថៃវិញ ដោយខេត្តមានគោលការណ៍យ៉ាងណាក្នុងការដោះស្រាយចំពោះបញ្ហាកងទ័ព គ្រួសារកងទ័ព និងពលករចំណាកស្រុកមកពីប្រទេសថៃ ក៏ស្វែងយល់នូវបញ្ហាប្រឈមផ្សេងទៀតដែលអាជ្ញាធរខេត្តស្វាយរៀងជួបផលវិបាកក្នុងការអនុវត្តការងារ ដើម្បីពិភាក្សារួមគ្នារិះរកវិធីដោះស្រាយ តាមសមត្ថកិច្ច និងតាមលទ្ធភាពជាក់ស្តែង។បន្ទាប់ពីបានស្តាប់របាយការណ៍ និងពិភាក្សាគ្នាយ៉ាងល្អិតល្អន់ លោកជំទាវប្រធានក្រុម បានវាយតម្លៃខ្ពស់ចំពោះប្រសិទ្ធភាពការងារ របស់អាជ្ញាធរខេត្តគ្រប់ជាន់ថ្នាក់ និងបានអំពាវនាវដល់ប្រជាពលរដ្ឋត្រូវតស៊ូ អត់ធ្មត់ ត្រូវជឿទុកចិត្តទៅលើថ្នាក់ដឹកនាំរាជរដ្ឋាភិបាល និងវីរភាពដ៏អង់អាចក្លាហានរបស់វីរយុទ្ធជនយើង និងរួមសាមគ្គីគ្នាជាធ្លុងមួយឱ្យបានរឹងមាំក្នុងគ្រាដែលប្រទេសជាតិកំពុងជួបប្រទះសង្គ្រាមឈ្លានពានពីថៃ៕

កិច្ចប្រជុំចរចាប្រាក់ឈ្នួលកម្មករកាត់ដេរលើកទី២ ចាប់ផ្តើមនាព្រឹកថ្ងៃទី៣ កញ្ញានេះ

ភ្នំពេញ៖ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី៣ ខែកញ្ញា ឆ្នាំ២០២៥នេះ នឹងបើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរនិងកាបូប ជាលើកទី២ ដើម្បីបន្តពិភាក្សាគ្នាលើការកំណត់តួលេខប្រាក់ឈ្នួលអប្បបរមាសម្រាប់កម្មករនិយោជិតសម្រាប់ឆ្នាំ២០២៦ខាងមុខ។សូមជំរាបជូនថា មុនចាប់ផ្តើមកិច្ចប្រជុំលើកទី២ ជាលក្ខណៈត្រីភាគី រួមមាន៖ ភាគីសហជីពតំណាងកម្មករនិយោជិត, ភាគីតំណាងនិយោជក និងភាគីរដ្ឋាភិបាល ដឹកនាំដោយ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា គឺភាគីសហជីពតំណាងកម្មករនិយោជិត និងភាគីតំណាងនិយោជក បានរៀបចំកិច្ចប្រជុំផ្ទៃក្នុងសិន ថាតើគួរប្រកាន់គោលជំហរយ៉ាងដូចម្តេច ដើម្បីលើកជូនអង្គប្រជុំធំជាលក្ខណៈត្រីភាគីតែម្តង។សូមបញ្ជាក់ទៀតថា កិច្ចចចារប្រាក់ឈ្នួលអប្បបរសម្រាប់កម្មករនិយោជិតក្នុងវិស័យកាត់ដេរ គ្រប់ភាគីទាំងអស់ ត្រូវប្រើលក្ខណវិនិច្ឆ័យបែបសង្គម និងសេដ្ឋកិច្ច ដោយផ្តោតលើ ៧ចំណុចសំខាន់ៗ ដូចជា៖ ស្ថានភាពគ្រួសារ, អាត្រាអតិផរណា, ការចំណាយក្នុងការរស់នៅ, ផលិតភាព, ភាពប្រកួតប្រជែងរបស់ប្រទេស, ស្ថានភាពទីផ្សារការងារ និងកម្រិតចំណេញរបស់វិស័យ ក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលអប្បបរមានៅកម្ពុជា។ ហើយគ្រប់ភាគីទាំងអស់ ត្រូវផ្តោតលើទិន្នន័យ និងការស្រាវជ្រាវបែបវិទ្យាសាស្រ្តដោយយោងលើលក្ខណវិនិច្ឆ័យទាំង៧ខាងលើ ដើម្បីធ្វើជាមូលដ្ឋានក្នុងការសម្របសម្រួលផ្ទៃក្នុង និងប្រកាន់គោលជំហររួមជាមួយ។ គិតត្រឹមឆ្នាំ២០២៤នេះ ប្រាក់ឈ្នួលអប្បបរមារបស់កម្មករនិយោជិត មានចំនួន ២០៤ដុល្លារ ក្នុង១ខែ ដោយមិនគិតពីប្រាក់អត្ថប្រយោជន៍ផ្សេងៗ៕អត្ថបទ៖ ឈិត បូរ៉ាវី

ពលរដ្ឋរស់នៅព្រំដែនក្បែរតំបន់ជម្លោះ ក្នុងខេត្តឧត្តរមានជ័យ ជឿជាក់លើរាជរដ្ឋាភិបាលកម្ពុជា

ប្រជាពលរដ្ឋដែលរស់នៅ ឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលជាភូមិសាស្ត្រប្រឈមនឹងជម្លោះប្រដាប់អាវុធរវាងកម្ពុជា និង ថៃ បានបង្ហាញការជឿជាក់លើរាជរដ្ឋាភិបាលកម្ពុជា តាមរយៈការចរចារ យន្តការច្បាប់អន្តរជាតិ ការទូត និង ភាពអត់ធ្មត់ខ្ពស់ ដែលនាំឱ្យ ពលរដ្ឋនៅតំបន់ព្រំដែនមានសុវត្ថិភាព អាចប្រកបរបរតាមធម្មតាឡើងវិញ។ ប្រជាពលរដ្ឋដែលរស់នៅ ឃុំគោកមន ស្រុកបន្ទាយអំពិល ខេត្តឧត្តរមានជ័យ បានវិលត្រឡប់មករស់នៅតាមលំនៅឋានជាប្រក្រតីឡើងវិញ បន្ទាប់ពីបានភៀសខ្លួនទៅតាមមណ្ឌលសុវត្ថិភាព កាលពីថ្ងៃទី២៤ ខែកក្កដា ឆ្នាំ២០២៥ អំឡុងពេលដែល ភាគីថៃបានប្រើប្រាស់អាវុធឈ្លានពានទឹកដីកម្ពុជា។ គិតមកដល់ថ្ងៃទី៣ ខែកញ្ញា ឆ្នាំ២០២៥នេះ ស្ថានភាពនៅព្រំដែនខេត្តឧត្តរមានជ័យ មានសភាពស្ងប់ស្ងាត់ ពលរដ្ឋអាចប្រកបរបរលក់ដូរ បានជាធម្មតា ប៉ុន្តែនៅបន្តប្រុងប្រយ័ត្នខ្ពស់ ព្រោះបារម្ភខ្លាច និងមិនទាន់ជឿទុកចិត្តចំពោះភាគីថៃនៅឡើយ។ តំណាងប្រជាពលរដ្ឋអះអាងថា ពួកគេជឿជាក់លើរាជរដ្ឋាភិបាលកម្ពុជា ដែលបានខិតខំដោះស្រាយបញ្ហាជម្លោះដោយសន្តិវិធី អត់ធ្មត់ខ្ពស់ ព្រោះមិនចង់ឱ្យមានការផ្ទុះអាវុធជាថ្មី។ មកដល់ពេលនេះ ពលរដ្ឋរស់នៅតាមព្រំដែនយល់កាន់តែច្បាស់អំពី តម្លៃនៃពាក្យថា “អរគុណសន្តិភាព” ព្រោះត្រឹមតែ៥ថ្ងៃ នៃការផ្ទុះអាវុធនៅព្រំដែន បានធ្វើអោយប៉ះពាល់យ៉ាងធ្ងន់ធ្ងរ ដល់ជីវភាពរស់នៅរបស់ពលរដ្ឋស្លូតត្រង់ ពួកគេត្រូវរត់ភៀសខ្លួន ទាំងអារម្មណ៍នៅភ័យខ្លាច បាក់ស្បាត។ ប្រជាពលរដ្ឋគាំទ្រ និងកោតសរសើរចំពោះការលះបង់ រួមនឹងភាពអត់ធ្មត់ ការទទួលខុសត្រូវ របស់រាជរដ្ឋាភិបាល និងកងទ័ពជួរមុខ ដើម្បីការពារជាតិ ទឹកដី និង អាយុជីវិតរបស់ប្រជាជន។ សូមបញ្ជាក់ថា ក្រោយបទឈប់បាញ់ចូលជាធរមានកាលពីថ្ងៃទី២៨ ខែកក្កដា ឆ្នាំ២០២៥ ប្រជាពលរដ្ឋដែលរស់ក្នុងឃុំគោកមន ស្រុកបន្ទាយអំពិល ខេត្តឧត្តរមានជ័យ បានវិលត្រឡប់មករស់នៅតាមផ្ទះ ប្រកបរបរ ជាប្រក្រតីឡើងវិញ ប៉ុន្តែនៅបារម្ភ ភ័យខ្លាច ភាគីថៃមិនគោរពបទឈប់បាញ់បានត្រឹមត្រូវ និងគ្មានភាពស្មោះត្រង់៕ អត្ថបទ៖ សូដាវណ្ណ

ឯកឧត្តមកិត្តិសង្គហបណ្ឌិត គន់ គីម ណែនាំឱ្យអាអាជ្ញាធរខេត្ត មានជនភៀសសឹកបន្តតាមដាន និងចុះពិនិត្យជាប់ជាប្រចាំចំពោះបងប្អូនភៀសសឹកត្រឡប់ទៅលំនៅដ្ឋាន

នៅថ្ងៃទី៣ ខែកញ្ញា ឆ្នាំ២០២៥នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ បានពិនិត្យឃើញថា ក្នុងចំណោមបងប្អូនជនភៀសសឹកដែលធ្លាប់ស្នាក់នៅមណ្ឌលសុវត្ថិភាព មានមួយចំនួនបានត្រឡប់ទៅលំនៅដ្ឋានវិញ បន្ទាប់ពីស្ថានភាពព្រំដែនមានសភាពស្ងប់ស្ងាត់ ដើម្បីបានរៀបចំជីវភាព និងអាជីវកម្មឡើងវិញជាប្រក្រតី។ផ្អែកតាមស្ថានភាពនៃការត្រឡប់ទៅលំនៅដ្ឋានរបស់បងប្អូនជនភៀសសឹក ឯកឧត្តមកិត្តិសង្គហបណ្ឌិត គន់ គីម បានណែនាំដល់អាជ្ញាធរខេត្តត្រូវចុះតាមដាន និងពិនិត្យជាប់ជាប្រចាំពីស្ថានភាពរស់នៅរបស់បងប្អូនប្រជាពលរដ្ឋ ហើយក្នុងករណីមានការស្នើសុំជំនួយណាមួយត្រូវយកចិត្តទុកដាក់ឆ្លើយតបឱ្យបានទាន់ពេលវេលា។ដោយឡែកចំពោះបងប្អូនភៀសសឹកបន្តស្នាក់នៅមណ្ឌលសុវត្ថិភាព ឯកឧត្តមកិត្តិសង្គហបណ្ឌិត គន់ គីម សូមឱ្យអាជ្ញាធរខេត្ត និងមន្រ្តីជំនាញចូលរួមផ្តល់ការហូបចុក និងការស្នាក់នៅឱ្យបានប្រសើរ ទាំងការផ្គត់ផ្គង់ស្បៀងបបម្រុងរបស់រាជរដ្ឋភិបាល និងសម្ភារៈប្រើប្រាស់។ ក្នុងនោះ សូមស្នើដល់ក្រុមគ្រូពេទ្យប្រចាំការទាំងអស់នៅមណ្ឌលសុវត្ថិភាពបន្តសកម្មភាពលើកកម្ពស់សុខុមាលភាព តាមរយៈការពិគ្រោះ ពិនិត្យ និងសង្គ្រោះឱ្យបានទាន់ពេលវេលាជូនបងប្អូនភៀសសឹក ពិសេសស្រ្តី និងកុមារ។យោងតាមរបាយការណ៍ គិតត្រឹមថ្ងៃទី២ ខែកញ្ញា ឆ្នាំ២០២៥ មានជនភៀសសឹកក្នុងខេត្តចំនួន៤ សរុបចំនួន ៦,២៦២គ្រួសារ ស្មើនឹងចំនួន ២០,៦៩១នាក់ និងមានជនភៀសសឹកត្រឡប់ទៅលំនៅដ្ឋានវិញ ចំនួន ៥៩៥គ្រួសារ៕

រាជរដ្ឋាភិបាលសម្រេចផ្អាកការប្រារព្ធព្រះរាជពិធីបុណ្យអុំទូក នៅមុខព្រះបរមរាជវាំងរាជធានីភ្នំពេញ ប៉ុន្ដែបណ្តាខេត្តនានា អាចប្រព្រឹត្តទៅជាធម្មតា

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅថ្ងៃទី២៧ ខែសីហា ឆ្នាំ២០២៥ បានចេញសារាចរណែនាំស្ដីពីការ ផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៥ មុខព្រះរមរាជវាំង នៅរាជធានីភ្នំពេញ ប៉ុន្ដែនៅតាមបណ្តាខេត្តនានាអាចប្រព្រឹត្តទៅជាធម្មតាតាមទំនៀមទម្លាប់ប្រពៃណី និងតាមលទ្ធភាពជាក់ស្តែងរបស់អាជ្ញាធរ និងប្រជាពលរដ្ឋ។អនុលោមតាមសារាចរណែនាំរបស់រាជរដ្ឋាភិបាល លេខ០៩ សរណន ចុះថ្ងៃទី១៩ ខែមិថុនា ឆ្នាំ២០០៣ សម្រាប់អនុវត្តជាអចិន្ត្រៃយ៍ ស្តីពីការរៀបចំចាត់តាំងព្រះរាជពិធីបុណ្យទ្វាទសមាស បុណ្យប្រពៃណីជាតិ ប្រពៃណី សាសនា បុណ្យជាតិ-បុណ្យអន្តរជាតិ រាជរដ្ឋាភិបាលតែងតែប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជារៀងរាល់ឆ្នាំ ចំនួន៣ (បី) ថ្ងៃ នៅថ្ងៃ១៤កើត ១៥កើត និង១រោច ខែកត្តិក ដើម្បីអបអរសាទរព្រះរាជពិធីបុណ្យប្រពៃណីជាតិ និងបន្តរក្សាទំនៀមទម្លាប់ដ៏ប្រពៃរបស់ខ្មែរដែលមានតាំងពីយូរលង់មកហើយ ដោយមានរៀបចំពិធីប្រណាំងទូកង បណ្តែតប្រទីប និងសំពះព្រះខែ អកអំបុក នៅតាមដងទន្លេសាប មុខព្រះបរមរាជវាំង រាជធានីភ្នំពេញ និងដោយឡែកនៅតាមបណ្តាខេត្តមួយចំនួនក៏បានរៀបចំពិធីនេះផងដែរ។តាមរយៈសារាចរបានបញ្ជាក់ថា បច្ចុប្បន្ន ព្រះរាជាណាចក្រកម្ពុជាបាននឹងកំពុងបន្តអនុវត្តបទឈប់បាញ់ដោយពេញលេញនិងម៉ឺងម៉ាត់បំផុត ស្របតាមស្មារតីកិច្ចប្រជុំពិសេសដែលបានធ្វើឡើងនៅទីក្រុងគូឡាឡាំពួនៃប្រទេសម៉ាឡេស៊ី កាលពី ថ្ងៃទី២៨ ខែកក្កដា ឆ្នាំ២០២៥ ក្រោមកិច្ចសម្របសម្រួលដែលមានប្រទេសម៉ាឡេស៊ីធ្វើជាម្ចាស់ផ្ទះ និងជាសាក្សី សហរដ្ឋអាម៉េរិកជាសហអ្នករៀបចំ ដោយមានការចូលរួមពីតំណាងសាធារណរដ្ឋប្រជាមានិតចិន និងបណ្តាប្រទេស អាស៊ានជាអ្នកសង្កេតការណ៍។ ក្នុងស្មារតីនេះនិងដោយសាររាជរដ្ឋាភិបាលបាននឹងកំពុងយកចិត្តទុកដាក់ខ្ពស់លើស្ថានការណ៍ចំពោះមុខនៅតាមព្រំដែនកម្ពុជា-ថៃ ជាពិសេសការដោះស្រាយបញ្ហាជូនប្រជាពលរដ្ឋភៀសសឹក និងពលករខ្មែរធ្វើការនៅប្រទេសថៃដែលវិលត្រឡប់ចូលមកក្នុងប្រទេសកម្ពុជាវិញ រាជរដ្ឋាភិបាលសូមដាក់ចេញនូវវិធានការណែនាំ៖១-ផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមដង ទន្លេសាប មុខព្រះបរមរាជវាំង រាជធានីភ្នំពេញ ដែលគ្រោងនឹងប្រព្រឹត្តទៅនៅថ្ងៃ១៤កើត ១៥កើត និង១រោច ខែកត្តិក ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី៤ ទី៥ និងទី៦ ខែវិច្ឆិកា ឆ្នាំ២០២៥។២- ការរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តាខេត្តនានា អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី និងតាមលទ្ធភាពជាក់ស្តែងរបស់អាជ្ញាធរ និងប្រជាពលរដ្ឋ។៣-ការឈប់សម្រាករបស់មន្ត្រីរាជការ និយោជិត កម្មករ ចំនួន៣(បី)ថ្ងៃ ក្នុងឱកាសព្រះរាជពិធីនេះ នៅរក្សាដដែល ដូចខ្លឹមសារដែលមានចែងក្នុងអនុក្រឹត្យលេខ២០៤ អនក្រ.បក ចុះថ្ងៃទី២៩ ខែសីហា ឆ្នាំ២០២៤ ស្តីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០២៥។៤-ក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត និងរដ្ឋបាលរាជធានី ខេត្ត ត្រូវបន្តយកចិត្ត ទុកដាក់ខ្ពស់ដោះស្រាយបញ្ហាស្បៀង ជម្រក ថ្នាំពេទ្យជូនប្រជាពលរដ្ឋភៀសសឹកនៅតាម មូលដ្ឋានរៀងៗខ្លួន។៥- ក្រសួងការងារនិងបណ្តុះបណ្តាលវិជ្ជាជីវៈ ត្រូវបន្តយកចិត្តទុកដាក់ សម្របសម្រួល និងបង្កលក្ខណៈ ងាយស្រួលដល់ការស្វែងរកការងាររបស់ពលករខ្មែរដែលទើបវិលត្រឡប់មកពីប្រទេសថៃវិញ និងបន្តសហការជាមួយក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ដើម្បីផ្សព្វផ្សាយ ឱកាសការងារដល់ប្រជាពលរដ្ឋ ជាពិសេសពលករខ្មែរនៅតាមមូលដ្ឋាននីមួយៗ។៦- ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត ត្រូវយកចិត្តទុកដាក់ពង្រឹងនិងជំរុញសេដ្ឋកិច្ច មូលដ្ឋាន ធានាស្ថិរភាពថ្លៃ ខ្សែច្រវាក់ផលិតកម្ម និងការផ្គត់ផ្គង់ គាំទ្រការផលិតក្នុងស្រុកនិង ធានាការប្រកួតប្រជែង ព្រមទាំងដោះស្រាយនូវបញ្ហាជារចនាសម្ព័ន្ធរ៉ាំរ៉ៃនានាដែលរាំងស្ទះដល់ សកម្មភាពផលិតកម្ម អាជីវកម្ម ធុរកិច្ច និងវិនិយោគ។៧-ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត ត្រូវបន្តយកចិត្តទុកដាក់ខ្ពស់លើការងារត្រៀម បង្ការគ្រោះធម្មជាតិនានា ជាពិសេសគ្រោះទឹកជំនន់ ក៏ដូចជាការត្រៀមរៀបចំទីទួលសុវត្ថិភាព ជម្រក ជូនប្រជាពលរដ្ឋរងគ្រោះនិងងាយរងគ្រោះ។៨- ក្រសួង ស្ថាប័ន រដ្ឋបាលរាជធានី ខេត្ត និងសមត្ថកិច្ចពាក់ព័ន្ធ ត្រូវថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម និងបន្តអនុវត្តយ៉ាងម៉ឺងម៉ាត់នូវគោលនយោបាយ ភូមិ-ឃុំ-សង្កាត់មានសុវត្ថិភាព៕

ព្រឹកនេះ ក្រុមអ្នកសង្កេតការណ៍អន្តរកាលចំនួន៥ប្រទេស ចុះទៅផ្ទៀងផ្ទាត់តាមព្រំដែនខេត្តពោធិ៍សាត់

នៅព្រឹកថ្ងៃពុធ ទី៣ ខែកញ្ញា ឆ្នាំ២០២៥នេះក្រសួងការពារជាតិ នៃព្រះរាជាណាចក្រកម្ពុជា បានបន្តសម្របសម្រួលជូនក្រុមអ្នកសង្កេតការណ៍អន្តរកាល (IOT) ចំនួន៥ប្រទេសបន្តចុះសង្កេតការណ៍ ផ្ទៀងផ្ទាត់ អំពីស្ថានភាពតាមព្រំដែនខេត្តពោធិ៍សាត់ក្រោយបទឈប់បាញ់ រវាងកម្ពុជា និងថៃ។តាមឆាណែលតេក្រាម និងហ្វេសបុកក្រសួងការពារជាតិ បានបញ្ជាក់ថា ប្រទេសចំនួន៥ ដែលបន្ត ចុះសង្កេតការណ៍ដោយផ្ទាល់នៅតាមបណ្តោយព្រំដែនខេត្តពោធិ៍សាត់នេះ រួមមានប្រទេសម៉ាឡេស៊ី ឥណ្ឌូនេស៊ី ឡាវ ហ្វីលីពីន និងវៀតណាម ហើយដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ីប្រចាំព្រះរាជាណាចក្រកម្ពុជា បានចេញដំណើរពីក្រសួងការពារជាតិ នាព្រឹកថ្ងៃទី៣ ខែកញ្ញានេះ ឆ្ពោះទៅ ខេត្តពោធិ៍សាត់ ដើម្បីចុះសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពព្រំដែនក្រោយបទឈប់បាញ់។ តាមក្រសួងការពារជាតិបានគួរបញ្ជាក់ផងដែរថា បេសកកម្មរបស់ក្រុមអ្នកសង្កេតការណ៍ អន្តរកាល (IOT) ខាងលើនេះគឺ បានកើតចេញពីលទ្ធផលនៃកិច្ចប្រជុំពិសេស ដែលបានធ្វើឡើងនៅថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាយៃយ៉ា ប្រទេសម៉ាឡេស៊ី និងកិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានបញ្ចប់កាលពីថ្ងៃទី៧ ខែសីហា ឆ្នាំ២០២៥ កន្លងទៅ៕

បណ្ដាញសង្គម

ព័ត៌មានថ្មីៗ

វិបត្តិស្រេកឃ្លាននៅហៃទី កាន់តែធ្ងន់ធ្ងរ ខណៈមនុស្សជិត៦លាននាក់ប្រឈមនឹងអសន្តិសុខស្បៀង ធ្ងន់ធ្ងរ

មនុស្សរាប់ពាន់នាក់ប្រមូលផ្តុំគ្នានៅយេម៉ែន ខណៈក្រុមហ៊ូទី បង្ហាញការគាំទ្រចំពោះលីបង់ ក្រោយបទឈប់បាញ់

ក្រុមហ៊ុនដឹកជញ្ជូន ស្វែងរកការបញ្ជាក់ច្បាស់ មុនពេលឆ្លងកាត់ច្រកសមុទ្រ Hormuz

UN ព្រមានថា ស៊ូដង់ខាងត្បូងប្រឈមនឹងហានិភ័យនៃ «ទុរ្ភិក្សទ្រង់ទ្រាយធំ» ខណៈការប្រយុទ្ធគ្នាកាន់តែខ្លាំង

ពិភពលោក ប្រតិកម្មចំពោះការបើកឡើងវិញច្រកសមុទ្រ Hormuz ក្នុងពេលមានជម្លោះរវាងអាមេរិក និងអ៊ីរ៉ង់

ប្រជាពលរដ្ឋជាង ១សែននាក់ធ្វើដំណើរតាមរថយន្តក្រុងដោយ ឥតគិតថ្លៃដើម្បីទៅលេងស្រុកកំណើត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877