BTV NEWS

TOP STORY | ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យ នឹងព្យាបាលដោយវះកាត់ នៅក្នុងមន្ទីរពេទ្យរដ្ឋធានីប៉េកាំង

ថ្ងៃទី៥នៃ «នគរសង្រ្កាន្ត» ពលរដ្ឋ យុវជន បន្តមកដើរលេងកម្សាន្ត និងកោតសរសើរពីការតាំងពិព័រណ៍ ក្នុងភូមិវប្បធម៌ ពិសេសការរៀបចំផ្សេងៗនៅភ្នំពេញ

ថ្លៃលក់រាយប្រេងសាំង និងម៉ាស៊ូត បន្តធ្លាក់ចុះ ខណៈរដ្ឋបន្តទម្លាក់ពន្ធដល់សូន្យ% ដើម្បីជួយពលរដ្ឋ

អ្នកនាំពាក្យ៖ ការប្រារព្ធពិធីចូលឆ្នាំថ្មីមិនត្រឹមតែជាការថែរក្សាទំនៀមទម្លាប់ប្រពៃណី និងវប្បធម៌ពីដូនតាប៉ុណ្ណោះទេ ប៉ុន្ដែបានរួមចំណែកដល់ចរន្តសេដ្ឋកិច្ចជាតិថែមទៀត

ព័ត៌មានជាតិ

ព្រឹកនេះ ក្រុមអ្នកសង្កេតការណ៍អន្តរកាលចំនួន៥ប្រទេស ចុះទៅផ្ទៀងផ្ទាត់តាមព្រំដែនខេត្តពោធិ៍សាត់

នៅព្រឹកថ្ងៃពុធ ទី៣ ខែកញ្ញា ឆ្នាំ២០២៥នេះក្រសួងការពារជាតិ នៃព្រះរាជាណាចក្រកម្ពុជា បានបន្តសម្របសម្រួលជូនក្រុមអ្នកសង្កេតការណ៍អន្តរកាល (IOT) ចំនួន៥ប្រទេសបន្តចុះសង្កេតការណ៍ ផ្ទៀងផ្ទាត់ អំពីស្ថានភាពតាមព្រំដែនខេត្តពោធិ៍សាត់ក្រោយបទឈប់បាញ់ រវាងកម្ពុជា និងថៃ។តាមឆាណែលតេក្រាម និងហ្វេសបុកក្រសួងការពារជាតិ បានបញ្ជាក់ថា ប្រទេសចំនួន៥ ដែលបន្ត ចុះសង្កេតការណ៍ដោយផ្ទាល់នៅតាមបណ្តោយព្រំដែនខេត្តពោធិ៍សាត់នេះ រួមមានប្រទេសម៉ាឡេស៊ី ឥណ្ឌូនេស៊ី ឡាវ ហ្វីលីពីន និងវៀតណាម ហើយដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ីប្រចាំព្រះរាជាណាចក្រកម្ពុជា បានចេញដំណើរពីក្រសួងការពារជាតិ នាព្រឹកថ្ងៃទី៣ ខែកញ្ញានេះ ឆ្ពោះទៅ ខេត្តពោធិ៍សាត់ ដើម្បីចុះសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពព្រំដែនក្រោយបទឈប់បាញ់។ តាមក្រសួងការពារជាតិបានគួរបញ្ជាក់ផងដែរថា បេសកកម្មរបស់ក្រុមអ្នកសង្កេតការណ៍ អន្តរកាល (IOT) ខាងលើនេះគឺ បានកើតចេញពីលទ្ធផលនៃកិច្ចប្រជុំពិសេស ដែលបានធ្វើឡើងនៅថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាយៃយ៉ា ប្រទេសម៉ាឡេស៊ី និងកិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានបញ្ចប់កាលពីថ្ងៃទី៧ ខែសីហា ឆ្នាំ២០២៥ កន្លងទៅ៕

ឯកអគ្គរដ្ឋទូតចិនប្រចាំកម្ពុជា៖ ចិន ជាប្រទេសផ្ដល់ជំនួយ មុនគេ និងច្រើនជាងគេ ដល់កម្ពុជា ក្នុងជម្លោះព្រំដែន កម្ពុជា-ថៃ

នារាត្រីថ្ងៃទី២ កញ្ញា ឆ្នាំ២០២៥ នេះ លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានបង្ហោះសារលើបណ្ដាញសង្គមហ្វេសប៊ុកថា៖ "ប្រទេសចិនគឺជាប្រទេសដំបូងគេដែលផ្តល់ជំនួយដល់កម្ពុជាបន្ទាប់កាលពីមានជម្លោះព្រំដែនរវាងកម្ពុជា-ថៃ ក៏ជាប្រទេសដែលបានផ្តល់ជំនួយច្រើនជាងគេផងដែរ។ ប្រទេសចិនគឺជាដៃគូដែលអាចទុកចិត្តបានរបស់កម្ពុជាទាំងកាលពីអតីតកាល បច្ចុប្បន្នកាល និងអនាគតកាល"។ គួរបញ្ជាក់ថា រដ្ឋាភិបាលទីក្រុងប៉េកាំងបានប្រកាសផ្តល់ជំនួយប្រមាណជាង ២០លានយ័ន ឬជិត ៣លានដុល្លារអាមេរិក ដល់ជនភៀសសឹកនៅប្រទេសកម្ពុជា ដែលរងគ្រោះពីការឈ្លានពានរបស់កងទ័ពថៃ។ ការផ្តល់ជំនួយនេះធ្វើឡើងក្នុងជំនួបរវាង សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា និង លោក ស៊ី ជីងពីង ប្រធានាធិបតីចិន នៅក្រៅកិច្ចប្រជុំកំពូលអង្គការសហប្រតិបត្តិការសៀងហៃបូក (SCO) ក្នុងទីក្រុងធានជីង ប្រទេសចិន កាលពីថ្ងៃទី៣០ ខែសីហា ដល់ថ្ងៃទី១ ខែកញ្ញា ឆ្នាំ២០២៥។

កម្ពុជា នឹងរៀបចំមហោស្រពភាពយន្តកម្ពុជា-អាស៊ីលើកទី៣ ឆ្នាំ២០២៥

ភ្នំពេញ ៖ លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ នាព្រឹកថ្ងៃទី២ ខែកញ្ញា ឆ្នាំ២០២៥នេះ បានដឹកនាំកិច្ចប្រជុំស្តីអំពី ការរៀបចំមហោស្រពភាពយន្តកម្ពុជា-អាស៊ីលើកទី៣ ឆ្នាំ២០២៥ ដែលកម្មវិធីនេះនឹងប្រព្រឹត្តទៅនាថ្ងៃទី០៦ ខែកញ្ញា ឆ្នាំ២០២៥ នាសាលាបុរីកោះពេជ្រ។លោក ប៉ុក បូរក្ស បានលើកឡើងថា កម្មវិធី “មហោស្រព ភាពយន្តកម្ពុជាអាស៊ី លើកទី៣” ដែលគ្រោងនឹងរៀបចំប្រារព្ធក្រោមកិច្ចសហការរវាងគណៈកម្មការរៀបចំមហោស្រពភាពយន្តកម្ពុជាអាសុី ជាមួយនឹងនាយកដ្ឋានសិល្បៈភាពយន្តនិងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ គឺ មិនត្រឹមតែជាសកម្មភាពនៃការជួបជុំផលិតករ សិល្បករ ក្នុងរង្វង់នៃឧស្សាកម្មភាពយន្តក្នុងតំបន់អាសុី ប៉ុណ្ណោះទេ ប៉ុន្តែក៏ជាការរួមចំណែកយ៉ាងសំខាន់បន្ថែមទៀត ក្នុងការពូនជ្រុំនូវ ចំណងមិត្តភាព និង ជាសក្ខីភាពនៃការបង្កើត ភាពជាដៃគូយូរអង្វែង ការគោរពគ្នាទៅវិញទៅ មកក្នុងចំណោម ប្រជាជាតិនានា ព្រមទាំងបានរួមចំណែកក្នុងការលើកកម្ពស់ កិច្ចសន្ទនាវប្បធម៌ និងបង្កើនទំនាក់ទំនងរវាងប្រជាជននិងប្រជាជនផងដែរ។ លើសពីនេះ ក្រៅពីការរៀបចំមហោស្រព គណៈកម្មការក៏នឹងរៀបចំកម្មវិធីវេទិកាឧស្សាហកម្មភាពយន្ត ដែលនឹងក្លាយជាកម្មវិធីដ៏សំខាន់ដើម្បីចែករំលែកចំណេះដឹងបទពិសោធក្នុងឧស្សាហកម្មភាពយន្ត ដោយមានការចូលរួមពីវាគ្មិនកិត្តិយសដែលមកពីបណ្ដាប្រទេសនានានៅក្នុងតំបន់អាស៊ី និងមានបទពិសោធច្រើនឆ្នាំនៅក្នុងឧស្សាហកម្មភាពយន្ត ។ វេទិកានេះនឹងផ្តល់ជាចំណេះដឹងបន្ថែម ព្រមទាំងបទពិសោធថ្មីជូនដល់អ្នកចូលរួមទាំងអស់។សូមបញ្ជាក់ផងដែរថា យោងតាមរបាយការណ៍សង្ខេបនៃការរៀបចំមហោស្រពខាងលើនេះ ចាប់ពីបើកទទួលពាក្យចូលរួម នាដើមខែឧសភា ដល់ថ្ងៃទី២៥ ខែកក្កដា ឆ្នាំ២០២៥ គណៈកម្មការទទួលបានភាពយន្តខ្នាតវែងមកពីទូទាំងអាស៊ី ចូលរួមប្រកួតប្រជែងសរុប៦០ចំណងជើង និងភាពយន្តខ្នាតខ្លីចំនួន៩០ចំណងជើង ដោយក្នុងនោះមានភាពយន្តខ្នាតវែងកម្ពុជា ចំនួន២ និងខ្នាតខ្លីចំនួន១៧។ គណៈមេប្រយោគ សម្រាប់ពិនិត្យវាយតម្លៃភាពយន្តមានចំនួន ៤រូប មកពីប្រទេសចិន ឥណ្ឌា ម៉ាសេដូនេ និងកម្ពុជា នឹងធ្វើការជ្រើសរើសស្នាដៃភាពយន្ត និងម្ចាស់ជ័យលាភីដើម្បីទទួលពានរង្វាន់សរុបចំនួន ២១ពានរង្វាន់។ ជាមួយនេះ ស្នាដៃភាពយន្តដែលទទួលបានជ្រើសរើសនឹងត្រូវធ្វើការចាក់បញ្ចាំងនៅរោងភាពយន្ត Fable Cinema ចាប់ពីថ្ងៃទី៤ ដល់ថ្ងៃទី៨ ខែកញ្ញា ឆ្នាំ២០២៥៕អត្ថបទ រដ្ឋា

ពលករខេត្តស្វាយរៀង ជិត ៤ ពាន់នាក់ ត្រឡប់មកពីប្រទេសថៃ ក្រោមការសម្របសម្រួលដោយ រដ្ឋបាលខេត្ត

ស្វាយរៀង ៖ បន្ទាប់ពីមានព្រឹត្តិការណ៍វិវាទព្រំដែនរវាងប្រទេសកម្ពុជា និងថៃ ដែលបានឈានដល់ការផ្ទុះអាវុធ មកដល់ពេលនេះ ពលករខ្មែរខេត្តស្វាយរៀងដែលបម្រើការងារនៅប្រទេសថៃ ជិត ៤ពាន់នាក់ បានធ្វើដំណើរវិលត្រឡប់មកដល់ផ្ទះសម្បែង។ លោក ដាំ ឃុនពិសី ប្រធានមន្ទីរព័ត៌មានខេត្តស្វាយរៀង និងជាអ្នកសម្របសម្រួល ទទួលពលករមកពីប្រទេសថៃ បានប្រាប់ “ទូរទស្សន៍ BTV” នៅរសៀលថ្ងៃទី២ ខែកញ្ញា ឆ្នាំ២០២៥ នេះថា គិតមកដល់ពេលនេះ ពលករខ្មែរមានដើមកំណើតក្នុងខេត្តស្វាយរៀង ដែលបានទៅធ្វើការនៅប្រទេសថៃ បានវិលត្រឡប់មកភូមិករ ផ្ទះសម្បែង ដើម្បីបញ្ជៀសគ្រោះថ្នាក់ ដោយអំពើហិង្សានៅប្រទេសថៃ មានចំនួន ៣ ៧៧៨ នាក់ ក្រោមការសម្របសម្រួលរបស់រដ្ឋបាលខេត្ត។លោក ដាំ ឃុនពិសី បានបញ្ជាក់បន្ថែមថា នៅក្នុងចំណោមពលករដែលវិលមកពីប្រទេសថៃ ជិត ៤ពាន់នាក់នោះ បានទៅចុះឈ្មោះស្វែងរកការងារធ្វើដោយខ្លួនឯង និងតាមរយៈ វេទិកាស្វែងរកការងារ ដែលរៀបចំដោយរដ្ឋបាលខេត្ត ដោយបានចូលបម្រើការងារនៅតាមរោងចក្រសហគ្រាសក្នុងភូមិសាស្ត្រខេត្ត ចំនួន ១ ៨១១ នាក់។គួរបញ្ជាក់ថា តាមរបាយការណ៍របស់ មន្ទីរការងារបណ្តុះបណ្តាលវិជ្ជាជីវៈខេត្ត បានបញ្ជាក់ថា ខេត្តស្វាយរៀងបន្ទាប់ពីរាជរដ្ឋាភិបាល បានបង្កើតឱ្យមានតំបន់សេដ្ឋកិច្ចពិសេស នៅឆ្នាំ២០០៥ បច្ចុប្បន្ន មានក្រុមអ្នកវិនិយោគ និងវិសយ័ឯកជន បានចូលមកបង្កើតរោងចក្រ សហគ្រាស គ្រឹះស្ថាន ផ្ទះសំណាក់ សណ្ឋាគារ ក្លឹបកំសាន្ត សរុប ១ ០០៣ កន្លែង មានកម្មករនិយោជិតបម្រើការងារ សរុបជាង ១៤០ ២០០ នាក់។ បច្ចុប្បន្ន នៅទូទាំងខេត្តប្រឈមខ្វះកម្លាំងពលកម្មបម្រើការងារជាង ១០ ពាន់កន្លែងបន្ទាប់ពីក្រុមអ្នកវិនិយោគចូលមកបង្កើតរោងចក្រសហគ្រាសបន្ថែម នៅក្នុងស្រុក កំពង់រោទ៍ និងស្រុកចន្ទ្រា៕ ដោយ ៖ ភា សារិទ្ធ

អ្នកនាំពាក្យព្រឹទ្ធសភាកម្ពុជា៖នាយករដ្ឋមន្ត្រីវៀតណាមប្ដេជ្ញាចិត្តចូលរួមធ្វើការជាមួយម៉ាឡេស៊ីជំរុញការអនុវត្តបទឈប់បាញ់រវាងកម្ពុជា និងថៃ

ភ្នំពេញ ៖ ក្នុងជំនួបរវាងសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាពនៃព្រះរាជានាចក្រកម្ពុជា និងជាប្រធានគណបក្សប្រជាជនកម្ពុជានៅព្រឹកថ្ងៃទី២ ខែកញ្ញា ឆ្នាំ២០២៥នេះ នៅប្រទេសវៀតណាម, ឯកឧត្តម Pham Minh Chinh នាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានបង្ហាញការប្ដេជ្ញាចិត្តចូលរួមធ្វើការជាមួយឯកឧត្តម អ៊ីនវ៉ា អ៊ីប្រាហ៊ីម នាយករដ្ឋមន្រ្ដីម៉ាឡេស៊ី និងជាប្រធានប្ដូរវេនអាស៊ាន ដើម្បីធ្វើយ៉ាងណាឱ្យការអនុវត្តកិច្ចព្រមព្រៀងបទឈប់បាញ់រវាងកម្ពុជា និងថៃអាចអនុវត្តទៅដោយប្រសិទ្ធភាព និងពេញលេញ។ នេះបើតាមការបញ្ជាក់របស់ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភាកម្ពុជា ក្នុងសន្និសីទសារព័ត៌មាន ក្រោយពីសម្ដេចតេជោ ហ៊ុន សែន និវត្តមកដល់កម្ពុជាវិញបន្ទាប់ពីបញ្ចប់ការបំពេញទស្សនកិច្ចនៅប្រទេសវៀតណាម។ ឯកឧត្តម ជា ធីរិទ្ធ បាថ្លែងថាក្នុងឱកាសជំនួបជាមួយមេដឹកនាំកំពូលប្រទេសវៀតណាម ក្នុងឱកាសបំពេញទស្សនកិច្ចរយៈពេលពីរនេះ សម្ដេចតេជោ ហ៊ុន សែន បានប្រាប់ទៅកាន់មេដឹកនាំកំពូលវៀតណាម អំពីជំហររបស់កម្ពុជាក្នុងការប្រកាន់ខ្ជាប់នូវការអនុវត្តបទឈប់បាញ់យ៉ាងខ្ជាប់ខ្ជួនរបស់កម្ពុជា ហើយកម្ពុជាប្រកាន់ជំហរចង់បានអ្នកសង្កេតការណ៍កិច្ចព្រមព្រៀងបទឈប់បាញ់ ដើម្បីធ្វើយ៉ាងណាឱ្យមានការអនុវត្តបានពេញលេញ និងមានប្រសិទ្ធភាព ធ្វើឱ្យព្រំដែនកម្ពុជា និងថៃអាចវិលត្រឡប់មករកប្រក្រតីភាពឡើងវិញ។សូមជម្រាបថា ដំណើរទស្សនកិច្ចរបស់សម្ដេចតេជោ លើកទី៣ហើយក្នុងឆ្នាំ២០២៥ ក្នុងនាមជាប្រធានព្រឹទ្ធសភា និងជាប្រធានគណបក្សប្រជាជនកម្ពុជា ទៅកាន់សាធារណរដ្ឋសង្គមនិយមវៀតណាម, ដំណើរទស្សនកិច្ចនេះបានឆ្លុះបញ្ចាំងពីការយកចិត្តទុកដាក់ និងការប្តេជ្ញាចិត្តខ្ពស់បំផុតពីថ្នាក់ដឹកនាំនៃព្រះរាជាណាចក្រកកម្ពុជា ចំពោះសារៈសំខាន់នៃការកសាងភាពជឿទុកចិត្តគ្នា និងការពង្រឹងទំនាក់ទំនងមិត្តភាពដ៏ល្អប្រសើរជាមួយប្រទេសជិតខាងនៅគ្រប់កម្រិត និងគ្រប់វិស័យ ជាពិសេសរវាងថ្នាក់ដឹកនាំនៃប្រទេសទាំងពីរក្នុងគោលដៅធានាសន្តិភាព ស្ថិរភាព និងការអភិវឌ្ឍប្រកបដោយចីរភាពស្របតាមស្មារតី «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង»៕

អ្នកនាំពាក្យព្រឹទ្ធសភា៖ វៀតណាមចង់ជំរុញការដឹកជញ្ជូនប្រទេសទាំង២ ឈានដល់គោលដៅ ២០ ពាន់លានដុល្លារ

នៅក្នុងសន្និសីទសារព័ត៌មាន ស្ដីពី លទ្ធផលដំណើរទស្សនកិច្ច និងចូលរួមបុណ្យឯករាជ្យជាតិវៀតណាម របស់ សម្ដេចតេជោ ហ៊ុន សែន នាល្ងាចថ្ងៃទី២ ខែកញ្ញា ឆ្នាំ២០២៥ នេះ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ភាគីទាំងពីរបានជជែកពង្រឹងទំនាក់ទំនងកម្ពុជា វៀតណាមឱ្យកាន់តែស៊ីជម្រៅបន្ថែមទៀត តាមរយៈពាណិជ្ជកម្ម សេដ្ឋកិច្ច ដោយ លោក ផាម មិញជិញ នាយករដ្ឋមន្ត្រីវៀតណាម ចង់ជំរុញការដឹកជញ្ជូនប្រទេសទាំង២ ឈានដល់គោលដៅ ២០ ពាន់លានដុល្លារ។ឯកឧត្តម ជា ធីរិទ្ធ បញ្ជាក់ថា នាយករដ្ឋមន្ត្រី វៀតណាម បានកត់សម្គាល់ និងបញ្ជាក់ជូនសម្ដេចតេជោថា ធ្វើយ៉ាងណាភាគីទាំង២ ជម្រុញបន្ថែមទៀតដល់ការដឹកជញ្ជូនទំនិញរវាងប្រទេសទាំង២ ឱ្យកាន់តែល្អប្រសើរ ដើម្បីសម្រេចគោលដៅ ផែនការពាណិជ្ជកម្មដែលប្រទេសទាំង២ ចង់បានគឺ ២០ ពាន់លានដុល្លារ ដែលជាចំណុចស្នូលសំខាន់ក្នុងការពង្រីកពាណិជ្ជកម្មរវាងប្រទេសទាំង២ ខណៈភាគីទាំង២ បានសម្រេចគោលដៅ ១០ពាន់លានដុល្លាររួចហើយ។គួរបញ្ជាក់ថា នៅព្រឹកថ្ងៃទី២ ខែកញ្ញា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានដឹកនាំគណប្រតិភូជាន់ខ្ពស់កម្ពុជា អញ្ជើញចូលរួម ពិធីរំលឹកខួបអនុស្សាវរីយ៍លើកទី៨០ នៃបដិវត្តខែសីហា និងទិវាបុណ្យឯករាជ្យជាតិ វៀត ណាម (២ កញ្ញា ១៩៤៥ - ២ កញ្ញា ២០២៥) ដែលបានប្រារព្ធធ្វើនៅទីលានបាឌិញ ក្នុងរដ្ឋធានីហាណូយ នៃសាធារណរដ្ឋសង្គមនិយមវៀតណាម។ ក្នុងឱកាសបំពេញទស្សនកិច្ចនៅប្រទេសវៀតណាម សម្តេចតេជោ បានពិភាក្សាការងារដាច់ដោយឡែកពីគ្នា ជាមួយថ្នាក់ដឹកនាំវៀតណាម រួមមានលោក តូ ឡឹម អគ្គលេខាធិការបក្សកុម្មុយនីស្តវៀតណាម, លោក ជិន ថាញ់មិន ប្រធានរដ្ឋសភា និងលោក ផាម មិញជិញ នាយករដ្ឋមន្ត្រី៕

សម្តេចតេជោ ហ៊ុន សែន អញ្ជើញដឹកនាំគណៈប្រតិភូធ្វើមាតុភូមិនិវត្តន៍មកដល់កម្ពុជាវិញប្រកបដោយសុវត្ថិភាពបន្ទាប់ពីបំពេញទស្សនកិច្ចរយៈពេលពីរថ្ងៃនៅប្រទេសវៀតណាម

ភ្នំពេញ ៖ នៅល្ងាចថ្ងៃទី២ ខែកញ្ញា ឆ្នាំ២០២៥នេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានអញ្ជើញដឹកនាំគណៈប្រតិភូកម្ពុជាធ្វើដំណើរមាតុភូមិនិវត្តន៍ បន្ទាប់ពីបានអញ្ជើញបំពេញទស្សនកិច្ច និងចូលរួមពិធីរំលឹកខួបអនុស្សាវរីយ៍លើកទី៨០ នៃបដិវត្តន៍ខែសីហា និងទិវាបុណ្យឯករាជ្យជាតិវៀតណាម។សូមជម្រាបថា តបតាមការអញ្ជើញរបស់ឯកឧត្តម តូ ឡឹម អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាម នៅព្រឹកថ្ងៃទី១ ខែកញ្ញា ឆ្នាំ២០២៥នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានដឹកនាំគណៈប្រតិភូជាន់ខ្ពស់កម្ពុជា អញ្ជើញបំពេញទស្សនកិច្ច និងចូលរួមពិធីរំលឹកខួបអនុស្សាវរីយ៍លើកទី៨០ នៃបដិវត្តន៍ខែសីហា និងទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាម ចាប់ពីថ្ងៃទី១ដល់ទី២ ខែកញ្ញា ឆ្នាំ២០២៥ នៅរដ្ឋធានីហាណូយ សាធារណរដ្ឋសង្គមនិយមវៀតណាម។អ្នកនាំពាក្យពាក្យព្រឹទ្ធសភាកម្ពុជា ឯកឧត្តម ជា ធីរិទ្ធ បានថ្លែងថា សម្តេចតេជោ ហ៊ុន សែន តែងតែផ្តល់សារៈសំខាន់ខ្លាំងណាស់ចំពោះប្រទេសជិតខាង ដែលជាប្រទេសភូមិផងរបងតែជាមួយគ្នា ហើយសម្ដេច តែងតែផ្តល់តម្លៃក្នុងការធ្វើទំនាក់ទំនងល្អជាមួយប្រទេសជិតខាងជានិច្ច។ក្នុងឱកាសអញ្ជើញចូលរួមព្រឹត្តិការណ៍ជាប្រវត្តិសាស្ត្រនេះ សម្តេចតេជោ ប្រធានព្រឹទ្ធសភា មានជំនួបពិភាក្សាការងារដាច់ដោយឡែកពីគ្នា ជាមួយថ្នាក់ដឹកនាំវៀតណាមរួមមាន ឯកឧត្តម តូ ឡឹម អគ្គលេខាធិការបក្សកុម្មុយនីស្តវៀតណាម ឯកឧត្តម ជិន ថាញ់មិន ប្រធានរដ្ឋសភា និងឯកឧត្តម ផាម មិញជិញ នាយករដ្ឋមន្ត្រី។ ជាមួយនេះសម្តេចតេជោក៏គ្រោងជួបពិភាក្សាការងារជាមួយថ្នាក់ដឹកនាំបរទេសដទៃទៀតដែលនឹងអញ្ជើញចូលរួមពិធីរំលឹកខួបនេះផងដែរ។សូមជម្រាបថា ដំណើរទស្សនកិច្ចរបស់សម្ដេចតេជោនាពេលនេះ គឺជាទស្សនកិច្ចលើកទី៣ក្នុងឆ្នាំ២០២៥ របស់សម្តេចតេជោ ក្នុងនាមជាប្រធានព្រឹទ្ធសភា និងជាប្រធានគណបក្សប្រជាជនកម្ពុជា ទៅកាន់សាធារណរដ្ឋសង្គមនិយមវៀតណាម ដែលជាការឆ្លុះបញ្ចាំងពីការយកចិត្តទុកដាក់ និងការប្តេជ្ញាចិត្តខ្ពស់បំផុតពីថ្នាក់ដឹកនាំ នៃព្រះរាជាណាចក្រកកម្ពុជា ចំពោះសារៈសំខាន់នៃការកសាងភាពជឿទុកចិត្តគ្នា និងការពង្រឹងទំនាក់ទំនង មិត្តភាពដ៏ល្អប្រសើរជាមួយប្រទេសជិតខាង នៅគ្រប់កម្រិត និងគ្រប់វិស័យ ជាពិសេសរវាងថ្នាក់ដឹកនាំ នៃប្រទេសទាំងពីរ ក្នុងគោលដៅធានាសន្តិភាព ស្ថិរភាព និងការអភិវឌ្ឍប្រកបដោយចីរភាព ស្របតាមស្មារតី «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង»៕

សម្តេចតេជោ ហ៊ុន សែន បញ្ចប់ទស្សនកិច្ចរយៈពេលពីរថ្ងៃនៅប្រទេសវៀតណាម ប្រកបដោយផ្លែផ្កា

តបតាមការអញ្ជើញរបស់ឯកឧត្តម តូ ឡឹម អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាម នៅព្រឹកថ្ងៃទី១ និងទី២ ខែកញ្ញា ឆ្នាំ២០២៥នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានដឹកនាំគណៈប្រតិភូជាន់ខ្ពស់កម្ពុជា អញ្ជើញបំពេញទស្សនកិច្ច និងចូលរួមពិធីរំលឹកខួបអនុស្សាវរីយ៍លើកទី៨០នៃបដិវត្តន៍ខែសីហា និងទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាមនៅរដ្ឋធានីហាណូយ សាធារណរដ្ឋសង្គមនិយមវៀតណាម។នៅវេលាម៉ោង ១០.១៥ នាទី ព្រឹកថ្ងៃទី១ ខែកញ្ញា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានដឹកនាំគណៈប្រតិភូជាន់ខ្ពស់កម្ពុជា អញ្ជើញដល់អាកាសយានដ្ឋានអន្តរជាតិ ណយ បៃ នៃទីក្រុងហាណូយ សាធារណរដ្ឋសង្គមនិយមវៀតណាម ដោយសុវត្ថិភាពហើយ។ ក្នុងដំណើរអញ្ជើញដល់របស់សម្តេចតេជោ និងគណៈប្រតិភូជាន់ខ្ពស់កម្ពុជា ត្រូវបានទទួលបដិសណ្ឋារកិច្ចយ៉ាងកក់ក្ដៅបំផុតពីសំណាក់ ឯកឧត្តម Mai Van Chinh សមាជិកមជ្ឈិមបក្សកុម្មុយនីស្តវៀតណាម និងជាឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម, ឯកឧត្តម Ngyuen Manh Cuong សមាជិកមជ្ឈិមបក្សកុម្មុយនីស្តវៀតណាម និងជាអនុរដ្ឋមន្ត្រីការបរទេស, លោកជំទាវ ជា គឹមថា ឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាមរួមនឹងមន្ត្រីទូតកម្ពុជាប្រចាំវៀតណាមជាច្រើនរូបទៀត។អ្នកនាំពាក្យពាក្យព្រឹទ្ធសភាកម្ពុជា ឯកឧត្តម ជា ធីរិទ្ធ បានឱ្យដឹងថា បន្ទាប់ពីអញ្ជើញដល់ប្រទេសវៀតណាមនៅព្រឹកថ្ងៃទី១ ខែកញ្ញា ឆ្នាំ២០២៥នេះសម្តេចតេជោ ហ៊ុន សែន បានជួបជាមួយថ្នាក់ដឹកនាំវៀតណាមចំនួនពីររូប រួមមាន ឯកឧត្តម ជិន ថាញ់មិន ប្រធានរដ្ឋសភានៃសាធារណរដ្ឋសង្គមនិយមវៀតណាម និងឯកឧត្តម តូ ឡឹម អគ្គលេខាធិការគណបក្សកុម្មុយនីស្តវៀតណាម។នៅក្នុងជំនួបនោះថ្នាក់ដឹកនាំកំពូលវៀតណាម បានសម្ដែងនូវការស្វាគមន៍យ៉ាងកក់ក្តៅចំពោះសម្ដេចតេជោ និងគណៈប្រតិភូកម្ពុជា ដែលបានអញ្ជើញមកបំពេញទស្សនកិច្ច និងចូលរួមខួប៨០ឆ្នាំនៃបដិវត្តន៍ខែសីហា និងអបអរសាទរទិវាឯករាជ្យជាតិវៀតណាម។ ឯកឧត្តមបានចាត់ទុកដំណើររបស់សម្ដេចតេជោ និងគណៈប្រតិភូនៅពេលនេះ គឺបានបង្ហាញយ៉ាងច្បាស់អំពីទំនាក់ទំនងដ៏រឹងមាំ ស្អិតរមួតរវាងកម្ពុជា និងវៀតណាម ដែលមាននាពេលកន្លងមក ក៏ដូចជាពេលបច្ចុប្បន្ននេះ។ នៅក្នុងឱកាសនោះសម្ដេចតេជោ បានសម្ដែងនូវការអរគុណចំពោះការបដិសណ្ឋារកិច្ចយ៉ាងកក់ក្តៅពីភាគីវៀតណាមចំពោះសម្ដេច និងគណៈប្រតិភូកម្ពុជា។ សម្ដេចតេជោបានចាត់ទុកបដិវត្តន៍ខែសីហា នាឆ្នាំ១៩៤៥ គឺជាផ្នែកមួយដ៏សំខាន់ និងមានអត្ថន័យសម្រាប់ប្រទេសវៀតណាម ហើយក៏កត្តានាំឲ្យមានចលនាតស៊ូប្រឆាំងអាណានិគមក្នុងការទាមទារឯករាជ្យនៅក្របខ័ណ្ឌតំបន់ និងពិភពលោក។ សម្ដេចតេជោ ក៏បានបង្ហាញនូវការពេញចិត្តចំពោះទំនាក់ទំនងកម្ពុជា និងវៀតណាមដែលមាននាពេលកន្លងមក និងពេលបច្ចុប្បន្ន ដែលប្រទេសទាំងពីរបានបង្ហាញនូវជំហរទំនាក់ទំនងដ៏រឹងមាំទាំងក្របខ័ណ្ឌនីតិប្បញ្ញត្តិ ក្របខ័ណ្ឌនីតិប្រតិបត្តិ និងក្របខ័ណ្ឌគណបក្ស និងគណបក្ស ដែលមានការរីកចម្រើនជាបន្តបន្ទាប់។ ឯកឧត្តមប្រធានរដ្ឋសភាវៀតណាម និងឯកឧត្តមអគ្គលេខាធិការគណបក្សកុម្មុយនីស្តវៀតណាម បានអរគុណចំពោះសម្ដេចតេជោដែលបានមានប្រសាសន៍លើកឡើងត្រង់ទៅត្រង់មក។ ឯកឧត្តមក៏បានសរសើរចំពោះភាពរីកចម្រើនរបស់កម្ពុជា ដោយឯកឧត្តមបានកត់សម្គាល់ឃើញថាកាលពីឆ្នាំ២០២៤ ឯកឧត្តមបានឃើញពីការរីកចម្រើនរបស់ប្រទេសកម្ពុជា ជាពិសេសរាជធានីភ្នំពេញមានការអភិវឌ្ឍន៍រីកចម្រើន ដែលកន្លងមកកម្ពុជាបានឆ្លងកាត់និងការលំបាកជាបន្តបន្ទាប់ តែពេលនេះកម្ពុជាបានផ្លាស់ប្ដូរ ជាពិសេសជីវភាពរស់នៅរបស់ប្រជាពលរដ្ឋ។ ឯកឧត្តមក៏បានមើលឃើញពីកិត្យានុភាពរបស់កម្ពុជាលើឆាកអន្តរជាតិកាន់តែមានភាពល្អប្រសើរ និងមានការទទួលស្គាល់គ្រប់មជ្ឈដ្ឋាននាពេលបច្ចុប្បន្ន។ តាមរយៈជំនួបនេះថ្នាក់ដឹកនាំកំពូលរបស់ប្រទេសវៀតណាម បានចាត់ទុកវត្តមានសម្ដេចតេជោគឺបានឆ្លុះបញ្ចាំងយ៉ាងច្បាស់អំពីទំនាក់ទំនងល្អរវាងកម្ពុជា និងវៀតណាមដ៏រឹងមាំដែលមាននាពេលកន្លងមកដល់ពេលបច្ចុប្បន្ននេះ។ ឯកឧត្តមលើកឡើងថា វៀតណាមបានផ្ដល់តម្លៃយ៉ាងខ្ពស់ ចំពោះទំនាក់ទំនងរវាងកម្ពុជានិងវៀតណាម។ សម្ដេចតេជោបានសម្តែងនូវការពេញចិត្តចំពោះទំនាក់ទំនងរវាងបក្សនៃប្រទេសទាំងពីរ ក្នុងឋានៈសម្ដេចតេជោ ជាប្រធានគណបក្សប្រជាជនកម្ពុជា ហើយក្នុងឋានៈឯកឧត្តម តូ ឡឹម ជាអគ្គលេខាធិការបក្សកុម្មុយនិស្តវៀតណាម ហើយសម្ដេចបានបង្ហាញនូវក្តីរីករាយដែលទំនាក់ទំនងទាំងក្នុងក្របខ័ណ្ឌរដ្ឋាភិបាលក៏មានភាពល្អប្រសើរ។ សម្ដេចតេជោបានបញ្ជាក់ផងដែរថា ស្នូលសំខាន់នោះ គឺក្របខ័ណ្ឌនៃទំនាក់ទំនងបក្សនៃប្រទេសទាំងពីរមានការរីកចម្រើន ហើយជំនួបកំពូលនៃមេដឹកនាំគណបក្សទាំងពីរកាលពីពេលកន្លងទៅគឺជាផ្នែកមួយដ៏សំខាន់ នៃការអនុវត្តទំនាក់ទំនងរវាងប្រទេសទាំងពីរ កាន់តែមានភាពដ៏ប្រសើរ។សម្តេចតេជោក៏បានមានប្រសាសន៍ពីការពង្រីកទំនាក់ទំនង រវាងប្រទេសទាំងពីរជាពិសេសលើវិស័យ សេដ្ឋកិច្ច យោធា ពាណិជ្ជកម្ម ដែលប្រទេសទាំងពីរមានភាពរីកចម្រើននាពេលបច្ចុប្បន្ននេះ។ សម្ដេចបានបញ្ជាក់ថារយៈពេល៧ខែក្នុងឆ្នាំនេះ កម្ពុជាបាននាំចេញទំនិញមកកាន់ប្រទេសវៀតណាម ច្រើនជាងទំនិញវៀតណាមនាំមកកាន់កម្ពុជា ដែលក្នុងនោះកម្ពុជានាំទៅកាន់វៀតណាមគឺមានប្រមាណ៣,៨ពាន់លានដុល្លារ និងវៀតណាមនាំមកកាន់ប្រទេសកម្ពុជាគឺប្រមាណ៣,២ពានលានដុល្លារ ដែលការណ៍នេះ គឺជាការបំពេញឲ្យគ្នាទៅវិញទៅមក លើវិស័យពាណិជ្ជកម្មរវាងប្រទេសទាំងពីរដែលកម្ពុជាជាប្រទេសមាននូវវត្ថុធាតុដើម ហើយវៀតណាមជាប្រទេសកែច្នៃ។ ជាចុងក្រោយភាគីទាំងពីរបានសម្តែងនូវក្តីរីករាយ និងបន្តពូនជ្រុំទំនាក់ទំនងរវាងប្រទេសទាំងពីរឲ្យកាន់តែមានការរីកចម្រើនតទៅមុខទៀត។ បន្ទាប់ពីបញ្ចប់ជំនួបពិភាក្សារួចហើយនោះ សម្តេចតេជោ ហ៊ុន សែន និងគណៈប្រតិភូជាន់ខ្ពស់កម្ពុជា ក៏អញ្ជើញចូលរួមក្នុងពិធីលៀងសាយភោជន៍ ដែលរៀបចំដោយ ឯកឧត្តម To Lam ជូនចំពោះថ្នាក់ដឹកនាំ និងគណៈប្រតិភូគ្រប់បណ្តាប្រទេស ដែលអញ្ជើញចូលរួមពិធីរំលឹកខួបអនុស្សាវរីយ៍លើកទី៨០ នៃបដិវត្តខែសីហា និងទិវាបុណ្យឯករាជ្យជាតិវៀតណាម ក្នុងបរិយាកាសរីករាយ និងស្និទ្ធស្នាលយ៉ាងក្រៃលែង។ឈានចូលដល់ព្រឹកថ្ងៃទី២ ខែកញ្ញា ឆ្នាំ២០២៥, សម្ដេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា អញ្ជើញចូលរួមពិធីរំលឹកខួបអនុស្សាវរីយ៍លើកទី៨០ នៃបដិវត្តខែសីហា និងទិវាបុណ្យឯករាជ្យជាតិ វៀត ណាម (២ កញ្ញា ១៩៤៥ - ២ កញ្ញា ២០២៥) ដែលពិធីដ៏ធំនេះបានប្រារព្ធធ្វើនៅទីលានបាឌិញក្នុងរដ្ឋធានីហាណូយ នៃសាធារណរដ្ឋសង្គមនិយមវៀតណាម។ក្នុងពិធីដ៏មហោឡាឬកនេះក៏មានការបង្ហាញក្បួនព្យុហយាត្រា ទាំងស៊ីវិល និងយោធា ដែលមានកងកម្លាំងទ័ព និងកងកម្លាំងសន្តិសុខ សាធារណៈរបស់វៀតណាម ចូលរួមសរុបជិត ១៦,០០០នាក់។ ដោយឡែកកងទ័ពបរទេសចំនួន៣ប្រទេស ក៏បានចូលរួមផងដែរ ក្នុងនោះមាន កងទ័ពនៃសាធារណរដ្ឋសហព័ន្ធរុស្ស៊ី,កងទ័ពនៃសាធារណរដ្ឋប្រជាធិបតេយ្យប្រជាមានិតឡាវ និងកងយោធពលខេមរភូមិន្ទកម្ពុជា។ នៅក្នុងពីធីនេះក្រៅពីវត្តមាន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ក៏មានការអញ្ជើញចូលរួមពីថ្នាក់ដឹកនាំនៃប្រទេសមួយចំនួនទៀតក្នុងនោះរួមមាន ឯកឧត្តម ថងលូន ស៊ីសូលី ប្រធានរដ្ឋ ឡាវ និងជាអគ្គលេខាធិការគណបក្សប្រជាជនបដិវត្តឡាវ និងឯកឧត្តម មីហ្គែល ឌីយែស ខានែល បឺមុដេហ្ស (Miguel Diaz-Canel Bermudez) ប្រធានាធិបតីនៃប្រទេសគុយបា និងឯកឧត្តមZhao Leji ប្រធានសភាប្រជាជនចិនផងដែរ។នៅថ្ងៃទី២ ខែកញ្ញាដដែលនេះ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានបន្តអញ្ជើញជួបពិភាក្សាការងារជាមួយ ឯកឧត្តម Pham Minh Chinh នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នៅវិមាននាយករដ្ឋមន្ត្រី ទីក្រុងហាណូយ។បន្ទាប់ពីជំនួបជាមួយនាយករដ្ឋមន្រ្ដីវៀតណាម, នៅរសៀលថ្ងៃទី២ កញ្ញាដដែលនេះ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានអញ្ជើញដឹកនាំប្រតិភូជាន់ខ្ពស់នៃព្រះរាជាណាចក្រកម្ពុជា ធ្វើមាតុភូមិនិវត្តន៍បន្ទាប់ពីបញ្ចប់ដំណើរទស្សនកិច្ចរយៈពេល ២ថ្ងៃ នៅទីក្រុងហាណូយ សាធារណរដ្ឋសង្គមនិយមវៀតណាមត្រឡប់មកកាន់មាតុប្រទេសវិញ៕

ឯកឧត្តមទេសរដ្ឋមន្រ្តី លី ធុជ៖ សម្តេចធិបតីចាត់ទុកវិស័យសកម្មភាពមីនជាបេះដូងនៃការអភិវឌ្ឍ និងកិច្ចការមនុស្សធម៌របស់កម្ពុជា

ក្នុងខណៈទទួលស្វាគមន៍ដំណើរទស្សនកិច្ចមកកាន់អាជ្ញាធរមីន របស់ក្រុមមន្រ្តីបច្ចេកទេសគ្រប់គ្រងព័ត៌មានសកម្មភាពមីនសកល នៃអង្គការជំនួយប្រជាពលរដ្ឋន័រវេស្ស (NPA Global IM)ដែលមកពីជុំវិញពិភពលោក ដើម្បីសិក្សាឈ្វេងយល់អំពីប្រព័ន្ធគ្រប់គ្រងទិន្នន័យសកម្មភាពមីននៅកម្ពុជានាថ្ងៃទី២ ខែកញ្ញា ឆ្នាំ២០២៥នេះ ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១អាជ្ញាធរមីនបានថ្លែងបញ្ជាក់ថា កម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីតែងតែយកចិត្តទុកដាក់ខ្ពស់ និងចាត់ទុកវិស័យសកម្មភាពមីន ជាបេះដូងនៃការអភិវឌ្ឍ និងកិច្ចការមនុស្សធម៌របស់កម្ពុជា។ វឌ្ឍនភាពសកម្មភាពមីនបច្ចុប្បន្ននេះ គឺជាការឆ្លុះបញ្ចាំងពីការប្តេជ្ញាចិត្តយ៉ាងមុះមុតរបស់សម្តេច ហើយវត្តមានរបស់ NPA នាថ្ងៃនេះ គឺជាសក្ខីភាពបញ្ចាក់ភាពជាដៃគូដែលជួយប្រែក្លាយចក្ខុវិស័យគ្មានមីនទៅជាការពិត។ក្នុងឱកាសនោះ ឯកឧត្តមទេសរដ្ឋមន្រ្តី លី ធុជ បានវាយតម្លៃខ្ពស់ និងចាត់ទុកអង្គការជំនួយប្រជាពលរដ្ឋន័រវេស្ស មិនត្រឹមជាអ្នកផ្តល់ជំនួយប៉ុណ្ណោះទេ ប៉ុន្តែជាដៃគូពិតរបស់កម្ពុជាអស់រយៈពេលជាង ៣ទសវត្សរ៍ ហើយបាននិងកំពុងឈរជាមួយកម្ពុជាទទួលបានជោគជ័យយ៉ាងធំធេង ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាមផងដែរ។តាងនាមឱ្យ សម្តេចធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមទេសរដ្ឋមន្រ្តី លី ធុជ បានថ្លែង អំណរគុណយ៉ាងជ្រាលជ្រៅជូនចំពោះអង្គការ NPA ក៏ដូចជាដៃគូអន្តរជាតិដទៃទៀត ដែលបានរួមចំណែកដល់កិច្ចខិតខំប្រឹងប្រែងក្នុងវិស័យសកម្មភាពមីននៅកម្ពុជា។ ឯកឧត្តម លី ធុជ បានបញ្ជាក់ទៀតថា សម្តេចធិបតី តែងតែយកចិត្តទុកដាក់ខ្ពស់ និងចាត់ទុកវិស័យសកម្មភាពមីន ជាបេះដូងនៃការអភិវឌ្ឍ និងកិច្ចការមនុស្សធម៌របស់កម្ពុជា។ កម្ពុជា មិនត្រឹមតែបានពន្លឿនការងារបោសសម្អាតរបស់ខ្លួនប៉ុណ្ណោះទេ ថែមទាំងឈានមុខក្នុងការធ្វើនវានុវត្តន៍ ពង្រឹងកិច្ចសហប្រតិបត្តិការ អន្តរជាតិ និងឆ្ពោះទៅសម្រេចបាននូវចក្ខុវិស័យអនាគតមួយដែលគ្មានមីន។ឯកឧត្តមទេសរដ្ឋមន្រ្តី បានសង្កត់ធ្ងន់ទៀតថា ប្រព័ន្ធគ្រប់គ្រងព័ត៌មានសកម្មភាពមីននៅកម្ពុជា ដែលគាំទ្រដោយ NPA ពិត ជាមានសារៈសំខាន់ណាស់ ហើយមិនត្រឹមតែរក្សានូវកំណត់ត្រាទិន្នន័យឱ្យបានល្អប្រសើរជាងមុននោះទេ តែវាគឺជាប្រព័ន្ធឆ្លាតវៃជាលក្ខណៈយុទ្ធសាស្ត្រ ព្រមទាំងជួយធ្វើឱ្យការសម្រេចចិត្ត និងការប្រើប្រាស់ធនធាន កាន់តែមានប្រសិទ្ធភាព និង ទាន់ពេល វេលា៕ អត្ថបទ៖ ភារម្យ

អ្នកនាំពាក្យរាជរដ្ឋាភិបាលប្រកាសទាត់ចោលព័ត៌មានប្រឌិតរបស់ជនក្បត់ជាតិបីជំនាន់ ដែលចោទថា សម្ដេចតេជោទិញភាគហ៊ុនក្នុងក្រុមហ៊ុនថាមពលថៃ

អ្នកនាំពាក្យរាជរដ្ឋាភិបាល នៅថ្ងៃទី២ ខែកញ្ញា ឆ្នាំ២០២៥ បានចេញមកប្រកាសបដិសេធចោលទាំងស្រុងនូវព័ត៌មានមិនពិតដែលផ្សាយលើគណនី ហ្វេសប៊ុកឈ្មោះ Sam Rainsy ដោយបានចោទប្រកាន់ទាំងបំពានថា សម្ដេចតេជោ ហ៊ុន សែន ប្រធានព្រឹទ្ធសភា មានជាប់ពាក់ព័ន្ធនឹងការទិញភាគហ៊ុន ២៤% នៃក្រុមហ៊ុនថាមពលថៃដ៏ធំមួយឈ្មោះ Bangchak ក្នុងតម្លៃរាប់ពាន់លានដុល្លារ តាមរយៈឈ្មួញកណ្ដាលជនជាតិអាហ្វ្រិកខាងត្បូង ប៉ុន្តែមូលនិធិសន្តិសុខសង្គមថៃបដិសេធមិនព្រមលក់ឲ្យ។ក្នុងសេចក្ដីប្រកាសបដិសេធ អ្នកនាំពាក្យរាជរដ្ឋាភិបាល បានអះអាងថា សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ព្រមទាំងក្រុមគ្រួសារ គ្មានទំនាក់ទំនងអ្វីជាមួយជនជាតិអាហ្វ្រិកខាងត្បូង ដូចដែលបានលើកឡើងនោះឡើយ ហើយក៏មិនដែលបានទិញភាគហ៊ុនពីក្រុមហ៊ុនណាមួយពីប្រទេសថៃដូចបាន លើកឡើងខាងលើនោះដែរ។អ្នកនាំពាក្យរាជរដ្ឋាភិបាល កត់សម្គាល់ឃើញថា គណនីហ្វេសប៊ុកខាងលើនេះតែងចុះផ្សាយរឿងមិនពិត ប្រឌិត បំផ្លើស បំភ្លៃ ឬចម្លងយកព័ត៌មានមិនពិតផ្សេងៗ ពីប្រភពដែលគ្មានមូលដ្ឋានច្បាស់លាស់ យកមកចុះផ្សាយ ក្នុងចេតនាអាក្រក់ដើម្បីបង្អួចកេរ្តិ៍ឈ្មោះ សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ព្រមទាំងក្រុមគ្រួសារសម្តេច ក៏ដូចជាមន្ត្រីជាន់ខ្ពស់របស់រាជរដ្ឋាភិបាលផ្សេងៗទៀត តាមទម្លាប់ដែលបានធ្វើកន្លងមកដើម្បីកាច់បំបាក់ប្រជាប្រិយភាពរបស់ថ្នាក់ដឹកនាំ ដែលទទួលបានការគោរពស្រឡាញ់និងគាំទ្រយ៉ាងខ្លាំង ពីប្រជាពលរដ្ឋ និងបានផ្ដល់ភាពកក់ក្ដៅដល់ប្រជាពលរដ្ឋ នៅគ្រប់កាលៈទេសៈ។អ្នកនាំពាក្យរាជរដ្ឋាភិបាល កត់សម្គាល់ទៀតថា រាល់សកម្មភាពរបស់បុគ្គលរូបនេះដែលបានធ្វើកន្លងមក ជាពិសេសរយៈពេលចុងក្រោយនេះ គឺបានបង្ហាញច្បាស់ពីអំពើក្បត់ជាតិ និងមានចេតនាបំផ្លាញជាតិខ្លួនឯង យ៉ាងចំហរដែលធ្វើឲ្យមហាជនទាំងក្នុង និងក្រៅប្រទេសថ្កោលទោសយ៉ាងខ្លាំង។ ទោះជាយ៉ាងនេះក៏ដោយ ក៏បុគ្គលរូបនេះនៅតែបន្តភាពពិសពុលរបស់ខ្លួន តាមរយៈការផ្សាយព័ត៌មានមិនពិតមានចរិតញុះញង់បំបែកបំបាក់ សាមគ្គីភាពជាតិខ្មែរដោយមិនព្រមកែប្រែឡើយ។អ្នកនាំពាក្យរាជរដ្ឋាភិបាល បានបន្ថែមទៀតថា រាជរដ្ឋាភិបាល នៃគណបក្សប្រជាជនកម្ពុជា ដែលមានសម្តេចតេជោ ហ៊ុន សែន អតីតនាយករដ្ឋមន្ត្រី និងសម្ដេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន បានលះបង់គ្រប់បែបយ៉ាងដើម្បីផលប្រយោជន៍ជាតិ និងប្រជាពលរដ្ឋខ្មែរ ជាពិសេសឈរជារបាំងការពារយ៉ាងរឹងមាំ នៅពេលប្រទេសជាតិ និងប្រជាជនជួបការលំបាក៕

បណ្ដាញសង្គម

ព័ត៌មានថ្មីៗ

អ៊ីរ៉ង់គំរាមបិទច្រកសមុទ្រហ័រមូស (Hormuz) ប្រសិនបើអាមេរិកនៅតែបន្តបិទកំពង់ផែរបស់ខ្លួន

លោក Trump និយាយថាបទឈប់បាញ់អ៊ីរ៉ង់អាចបញ្ចប់ប្រសិនបើគ្មានកិច្ច្រមព្រៀងណាមួយសម្រេចបានត្រឹមថ្ងៃពុធ

អ៊ីរ៉ង់និយាយថា ការផ្ទេរអ៊ុយរ៉ាញ៉ូមដែលចម្រាញ់រួចទៅឲ្យអាមេរិក ពុំមែនជាជម្រើសទេ

សហរដ្ឋអាមេរិក គ្រោងអនុវត្តដំណើរការប្រព័ន្ធសងប្រាក់ដំឡើងពន្ធវិញនៅថ្ងៃទី២០ ខែមេសា

វិបត្តិស្រេកឃ្លាននៅហៃទី កាន់តែធ្ងន់ធ្ងរ ខណៈមនុស្សជិត៦លាននាក់ប្រឈមនឹងអសន្តិសុខស្បៀង ធ្ងន់ធ្ងរ

មនុស្សរាប់ពាន់នាក់ប្រមូលផ្តុំគ្នានៅយេម៉ែន ខណៈក្រុមហ៊ូទី បង្ហាញការគាំទ្រចំពោះលីបង់ ក្រោយបទឈប់បាញ់

ក្រុមហ៊ុនដឹកជញ្ជូន ស្វែងរកការបញ្ជាក់ច្បាស់ មុនពេលឆ្លងកាត់ច្រកសមុទ្រ Hormuz

UN ព្រមានថា ស៊ូដង់ខាងត្បូងប្រឈមនឹងហានិភ័យនៃ «ទុរ្ភិក្សទ្រង់ទ្រាយធំ» ខណៈការប្រយុទ្ធគ្នាកាន់តែខ្លាំង

ពិភពលោក ប្រតិកម្មចំពោះការបើកឡើងវិញច្រកសមុទ្រ Hormuz ក្នុងពេលមានជម្លោះរវាងអាមេរិក និងអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877