BTV NEWS

សម្ដេចធិបតី ហ៊ុន ម៉ាណែត ថ្លែងអំណរគុណដល់បងប្អូនមហាគ្រួសារខ្មែរ ដែលបានជួបជុំគ្នាជាលើកទីពីរ ជាសារលើកទឹកចិត្តដ៏ធំធេងទៅដល់វីរកងទ័ពជួរមុខ

ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ

ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ

កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា

ព័ត៌មានជាតិ

អភិបាលខណ្ឌបឹងកេងកង ណែនាំសមត្ថកិច្ចរក្សាឱ្យបានគោលនយោបាយភូមិ-សង្កាត់ មានសុវត្ថិភាព

នៅក្នុងកិច្ចប្រជុំគណៈបញ្ជាការឯកភាពខណ្ឌបឹងកេងកង នាព្រឹកថ្ងៃទី២៧ ខែកញ្ញា ឆ្នាំ២០២៤ លោក សុខ សម្បត្តិ អភិបាលខណ្ឌបឹងកេងកង បានធ្វើការណែនាំអាជ្ញាធរសមត្ថកិច្ចមូលដ្ឋាននីមួយៗ ត្រូវរួមគ្នាថែការពាររក្សាឲ្យបាននូវគោលនយោបាយភូមិ-សង្កាត់ មានសុវត្ថិភាព ដើម្បីធានាបានការពង្រឹងសន្តិសុខ សុវត្ថិភាព និងសណ្តាប់ធ្នាប់សាធារណៈ នាឱកាសពិធីបុណ្យភ្ជុំបិណ្ឌ ចាប់ពីថ្ងៃទី០១ ដល់ថ្ងៃទី០៤ ខែតុលា ឆ្នាំ២០២៤ ខាងមុខនេះ។លោក សុខ សម្បត្តិ បានលើកឡើងថា សាលាសង្កាត់ នគរបាល អាវុធហត្ថខណ្ឌ ត្រូវប្រើប្រាស់កម្លាំងអោយបានគ្រប់គ្រាន់តាមគោលដៅទាំងអស់ ពិសេស តាមទីតាំង វត្តអារាម សាលារៀន និងទឹកន្លែងកំសាន្តនានា។ កងកម្លាំងទាំងអស់ ត្រូវយកចិត្តទុកដាក់ និងមានការទទួលខុសត្រូវខ្ពស់ ដោយបានកំណត់គោលដៅដែលអាចមានបញ្ហា ពិសេសដីឡូត៍ដែលទុកចោលទំនេរ ផ្ទះទុកចោល ត្រូវផ្សព្វផ្សាយឲ្យម្ចាស់ទីតាំងនីមួយៗសំអាត កាប់ឆ្ការព្រៃឲ្យអស់ ពីព្រោះទីតាំងបែបនេះ គឺជាការផ្ដល់ជំរកឲ្យជនអាណាថា ក្មេងហិតកាវ សេពគ្រឿងញៀនជាដើម ហើយពួកនេះក៏អាចបង្កជាបទល្មើស លួច ឆក់ ប្លន់ ដែលធ្វើឲ្យប្រជាពលរដ្ឋភ័យខ្លាយ ។អភិបាលខណ្ឌបឹងកេងកង បាននបន្ថែមថា គណៈបញ្ជាការឯកភាពខណ្ឌត្រៀមចាត់កម្លាំងការពារ សន្តិសុខ សុវត្ថិភាព និងសណ្តាប់ធ្នាប់សាធារណៈនៅតាមវត្តអារាមនីមួយៗ ជាពិសេស ដើម្បីជួយសម្រួលចរាចរណ៍យានយន្តពុទ្ធបរិស័ទ ចូលក្នុងបរិវេណវត្តអារាម ចៀសវាងការកកស្ទះចរាចរណ៍ ។ បង្ការទប់ស្កាត់បទល្មើសព្រហ្មទណ្ឌគ្រប់ប្រភេទ ដើម្បីថែរក្សាឲ្យបាននូវគោលនយោបាយ ភូមិ-សង្កាត់មានសុវត្ថិភាព ជាពិសេស បទល្មើសគ្រឿងញៀនគ្រប់ប្រភេទ ក្រុមក្មេងទំនើងជាដើម ។ជាមួយគ្នានេះ លោក សុខ សម្បត្តិ អភិបាលខណ្ឌបឹងកេងកង ក៏បានណែនាំសមត្ថកិច្ចគ្រប់គ្រងមុខសញ្ញាគ្រប់ប្រភេទឱ្យបានម៉ត់ចត់ បង្កើនការភ្ជាប់សភាពការណ៍ពាក់ព័ន្ធសន្តិសុខ សុវត្ថិភាព និងសណ្តាប់ធ្នាប់សង្គម និងចាត់វិធានការ បង្ការ ទប់ស្កាត់ និងបង្ក្រាបឱ្យបានទាន់ពេលវេលា និងមានប្រសិទ្ធភាពខ្ពស់។ គ្រប់សាលាសង្កាត់ ត្រូវមានកម្លាំងប្រចាំការ ២៤ម៉ោងលើ២៤ម៉ោង នឹងត្រូវរាយការណ៍រាល់សកម្មភាពក្នុងមូលដ្ឋានជូនគណៈបញ្ជាការឯកភាពខណ្ឌឱ្យបានទាន់ពេលវេលា៕ តារាវុទ្ធី

ត្រឹមចុងខែកញ្ញានេះគ្រោះទឹកជំនន់បានបង្កផលប៉ះពាល់ដល់ដំណាំនៅក្នុងខេត្តចំនួន៧ ប៉ះពាល់លើដំណាំស្រូវ ជាង១ម៉ឺនហិកតា

ភ្នំពេញ៖ គិតត្រឹមថ្ងៃទី២៦ ខែកញ្ញា ឆ្នាំ២០២៤នេះ គ្រោះទឹកជំនន់បានបង្កផលប៉ះពាល់ដល់ដំណាំនៅក្នុងខេត្តចំនួន ៧ ជាអាថិ៍៖ ខេត្តក្រចេះ ស្ទឹងត្រែង មណ្ឌលគិរី ត្បូងឃ្មុំ កំពង់ចាម កំពង់ធំ និងខេត្តសៀមរាប។ នេះបើតាមលោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ។ លោកជំទាវ អ៊ឹម រចនា បានបញ្ជាក់ថា គ្រោះទឹកជំនន់បានបង្ក ផលប៉ះពាល់លើដំណាំស្រូវមានចំនួន ១២ ០០៨ហិកតា ដំណាំស្បៀងរួមផ្សំចំនួន ៤៤៩ហិកតា និងដំណាំទ្រទ្រង់សេដ្ឋកិច្ចចំនួន ៨២២ហិកតា៕

លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង អញ្ជើញកាន់បិណ្ឌទី១០ នៅវត្តបទុមវតី

លោកអ្នកឧកញ៉ា ទ្រី ភាព បេសកជនពិសេស ទីប្រឹក្សាផ្ទាល់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាអគ្គនាយកក្រុមហ៊ុន ទ្រី ភាព គ្រុប និងលោកជំទាវអ្នកឧកញ៉ា គៀន ស្រីនាង ជាឧត្តមភរិយា ព្រមទាំងមាតាបិតា បុត្រា បុត្រី ថ្នាក់ដឹកនាំ និងបុគ្គលិកក្រុមហ៊ុនទាំងអស់ បានមូលមតិគ្នា អញ្ជើញកាន់បិណ្ឌទី១០ នៅវត្តបទុមវតី។ពិធីបុណ្យកាន់បិណ្ឌ និងភ្ជុំបិណ្ឌ ជាពិធីបុណ្យព្រះពុទ្ធសាសនាដ៏ធំមួយនៅក្នុងប្រទេសកម្ពុជា តែងប្រារព្ធធ្វើឡើងចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ ពិធីបុណ្យកាន់បិណ្ឌ និងភ្ជុំបិណ្ឌប្រារព្ធធ្វើឡើង ដើម្បីទ្រទ្រង់ព្រះសង្ឃគង់ចាំព្រះវស្សាតាមទីអារាមក្នុងរដូវវស្សា ដែលជួបការលំបាកក្នុងការនិមន្តបិណ្ឌបាត្រ។ មួយវិញទៀត ការប្រារព្ធពិធីបុណ្យកាន់បិណ្ឌ និងភ្ជុំបិណ្ឌ ជាការបង្ហាញនូវកតញ្ញូគុណចំពោះអ្នកមានឧបការគុណរួមមានឪពុកម្តាយ ជីដូនជីតា ចាស់ព្រឹទ្ធាចារ្យ គ្រូបាចារ្យជាដើម។ បន្ថែមពីលើនោះ ពិធីបុណ្យកាន់បិណ្ឌ និងភ្ជុំបិណ្ឌ ក៏ជាពេលវេលាដែលកូនចៅជួបជុំធ្វើបុណ្យនៅតាមទីអារាម ដើម្បីឧទ្ទិសកុសលផលបុណ្យដល់ជីដូនជីតា និងបុព្វការីជន ដែលបានធ្វើមរណកាលទៅ។ក្នុងពិធីបុណ្យកាន់បិណ្ឌវេនទី១០នេះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង មាតាបិតា បុត្រាបុត្រី ព្រមទាំងបុគ្គលិកក្រុមហ៊ុនទាំងអស់ បានរៀបចំធ្វើឡើងជាលំដាប់លំដោយតាមលំអានប្រពៃណីរបស់ខ្មែរ។ នៅរសៀលថ្ងៃព្រហស្បតិ៍ ៩រោច ខែភទ្របទ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី២៦ ខែកញ្ញា ឆ្នាំ២០២៤ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង មាតាបិតា បុត្រាបុត្រី ព្រមទាំងបុគ្គលិកទាំងអស់ បានជួបជុំគ្នាសូត្រមន្ត។ ក្នុងឱកាសនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង បានបូជាទៀនធូប និងផ្កាផ្ញីថ្វាយដល់ព្រះរតនត្រ័យ។ បន្ទាប់មកលោកតាអាចារ្យបានដឹកនាំនមស្សការសមាទានសីល និងនិមន្តព្រះសង្ឃសូត្រមន្តបន្សុកូលឧទ្ទិសកុសលដល់វិញ្ញាណក្ខន្ធបុព្វការីជនដែលបានចែកឋាន។ក្រៅតែពីសូត្រមន្តបង្សុកូលហើយនោះ ព្រះសង្ឃ ដឹកនាំដោយសម្តេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក និងជាព្រះមេគណរាជធានីភ្នំពេញ បានសូត្រពុទ្ធជ័យប្រោសព្រំប្រសិទ្ធពរជ័យសិរីមហាប្រសើរកើតមានដល់លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងមាតាបិតា បុត្រាបុត្រី បុគ្គលិកប្រុសស្រី គ្រប់រូបដែលមានសទ្ធាជ្រះថ្លា ចូលរួមកាន់បិណ្ឌទី១០ នៅវត្តបទុមវតី។បន្ទាប់ពីការរៀបចំពិធីសូត្រមន្តរួចរាល់ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បាននិមន្តព្រះវិបុលវេទី បណ្ឌិត ពេញ វិបុល សម្តែងព្រះធម្មទេសនាស្តីអំពី «អរិយទ្រព្យ៧យ៉ាង»។ ទ្រព្យដ៏ប្រសើរទាំង៧ ដែលព្រះសម្មាសម្ពុទ្ធទ្រង់ត្រាស់សម្តែងទុកមកនោះរួមមាន៖ ១) សទ្ធាធនំ ទ្រព្យ គឺសទ្ធា, ២) សីលធនំ ទ្រព្យ គឺសីល, ៣) ហិរិធនំ ទ្រព្យ គឺសេចក្តីខ្មាសបាប, ៤) ឱត្តប្បធនំ ទ្រព្យ គឺសេចក្តីខ្លាចបាប, ៥) សុតធនំ ទ្រព្យ គឺសេចក្តីចេះដឹង ចំណេះដឹង ការសិក្សារៀនសូត្រច្រើន, ៦) ចាគធនំ ទ្រព្យ គឺការចេះបរិច្ចាគទានដល់ក្រុមជនក្រីក្រ លំបាកទុគ៌តឬ ពួកសមណៈ អ្នកបួស និង៧) បញ្ញាធនំ ទ្រព្យ គឺបញ្ញា សេចក្តីឈ្លាសវៃ។ក្នុងឱកាសសម្តែងព្រះធម៌ទេសនានោះ ព្រះវិបុលវេទី បណ្ឌិត ពេញ វិបុល ក៏បានមានព្រះពុទ្ធដីកាកោតសរសើរចំពោះលោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ជាព្រះពុទ្ធសាសនិកជន ដែលមានសទ្ធាយ៉ាងមុតមាំចំពោះព្រះពុទ្ធសាសនា ហើយតែងបានលះបង់ទ្រព្យធនរបស់ខ្លួនជួយទ្រទ្រង់ដល់ព្រះពុទ្ធសាសនានៅកម្ពុជា។លុះដល់ព្រឹកថ្ងៃសុក្រ ១០រោច ខែភទ្របទ ឆ្នាំរោង ឆស័ក ព.ស២៥៦៨ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងមាតាបិតា បុត្រាបុត្រី និងបុគ្គលិកទាំងអស់ បានជួបជុំគ្នារៀបចំពិធីប្រគេនទេយ្យទានមានចង្ហាន់ ស្លាដក់ បច្ច័យ និងគ្រឿងឧបភោគបរិភោគនានា ប្រគេនដល់ព្រះសង្ឃ។ បន្ទាប់ពីនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងមាតាបិតា បុត្រាបុត្រី និងបុគ្គលិកទាំងអស់ បានរួមគ្នាធ្វើពិធីរាប់បាត្រ។ បន្ទាប់ពីពិធីរាប់បាត្រហើយនោះ លោកតាអាចារ្យ ក៏បានដឹកនាំពិធីវេរចង្ហាន់ និងទេយ្យទានទាំងឡាយប្រគេនដល់ព្រះសង្ឃ ព្រមទាំងបានឧទ្ទិសមហាកុសលទាំងឡាយជូនដល់បុព្វការីជន ដែលបានធ្វើមរណកាល។ ក្នុងពិធីកាន់បិណ្ឌទី១០នេះ ក្រៅតែបំពេញទានតាមលំអានប្រពៃណីព្រះពុទ្ធសាសនាហើយនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បានបំពេញទានជាមួយលោកតាលោកយាយ ក៏ដូចជាសិស្សានុសិស្សដែលកំពុងស្នាក់នៅក្នុងវត្តផងដែរ។ ពិធីបុណ្យកាន់បិណ្ឌទី១០ ត្រូវបានបញ្ចប់ទៅដោយបរិយាកាសសប្បាយរីករាយ និងពោរពេញដោយទឹកចិត្តជ្រះថ្លាជាទីបំផុត។បន្ទាប់ពីបានបំពេញកិច្ចនានាក្នុងពិធីបុណ្យកាន់បិណ្ឌរួចហើយនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងមាតាបិតា បុត្រាបុត្រី បានអញ្ជើញក្រាបបង្គំទូលសួរសុខទុក្ខសម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជស្តីទីនៃព្រះរាជាណាចក្រកម្ពុជាផងដែរ។សូមបញ្ជាក់ថា ក្នុងពិធីកាន់បិណ្ឌទី១០នេះ ទេយ្យទានដែលលោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងក្រុមគ្រួសារ និងបុគ្គលិកក្រុមហ៊ុន ទ្រី ភាព គ្រុប ប្រគេនដល់ព្រះសង្ឃនោះរួមមាន៖ អង្ករ២តោន មី១៨កេស ស្ករស៥បាវ ទឹកដោះគោ៥កេស ទឹកសុទ្ធ៥០កេស ទឹកក្រូច២០កេស ទឹកផ្លែឈើ ២០កេស ទឹកត្រី១០យួរ ទឹកស៊ីអ៊ីវ១០យួរ ត្រីខ៥កេស អំបិល២០គីឡូ បច្ច័យសម្រាប់តម្កល់ជើងបិណ្ឌការកសាង ៤០លានរៀល។ ក្រៅពីនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បានប្រគេនបច្ច័យដល់ សម្ដេចព្រះមហា សុមេធាធិបតី នន្ទ ង៉ែត ១២លានរៀល សម្តេចព្រះពុទ្ធជ័យមុនី ឃឹម សន ៦លានរៀល ព្រះគ្រូសូធ្យឆ្វេង ២លានរៀល ព្រះសង្ឃសូត្រមន្ត និងតាជីយាយជី-សិស្ស-និស្សិត ៤៨២អង្គ/នាក់ ដែលសរុបជាថវិកាចំនួន ១៩៣,១០០,០០០រៀល៕

កម្ពុជាទទួលបានពានរង្វាន់ចំនួន៥ ពីពិព័រណ៍ចិន-អាស៊ាន លើកទី២១នៅប្រទេសចិន

ក្រសួងពាណិជ្ជកម្មកម្ពុជាបានបញ្ជាក់ឲ្យដឹងថា តាមរយៈព្រឹត្តការណ៍ពិព័រណ៍ចិន-អាស៊ាន លើកទី២១ ឆ្នាំ២០២៤នេះ ប្រទេសកម្ពុជាទទួលបានពានរង្វាន់រហូតចំនួន ៥គ្រឿងឯណោះ ដែលលទ្ធផលនេះបង្ហាញឲ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក៏ដូចជាវិស័យឯកជនក្នុងស្រុកបានខិតខំប្រឹងប្រែងក្នុងការរៀបចំ និងនាំយកអ្វីដែលល្អៗទៅបង្ហាញជូនកម្មវិធីដ៏ធំមួយនេះនៅប្រទេសចិន។យោងតាមមន្រ្តីក្រសួងពាណិជ្ជកម្មកម្ពុជា នៅព្រឹកថ្ងៃទី២៧ ខែកញ្ញានេះ បានឲ្យព័ត៌មាន ប៊ីធីវី ដឹងថា ពានរង្វាន់ចំនួន៥ ដែលកម្ពុជាទទួលបានក្នុងព្រឹត្តការណ៍ពិព័រណ៍ចិន-អាស៊ាន លើកទី២១ រួមមាន ១.ពានរង្វាន់ក្នុងការរៀបចំពន្លាជាតិបានស្រស់ឆើតឆាយ, ២.ពានរង្វាន់ក្នុងការរៀបចំអ្នកតាំងពិព័រណ៍, ៣.ពានរង្វាន់ក្នុងការកៀរគរក្រុមហ៊ុនឯកជនចូលរួមពិព័រណ៍អនឡាញ, ៤.ពានរង្វាន់ក្នុងការជំរុញកិច្ចសហប្រតិបត្តិការវិនិយោគ និង៥.ពានរង្វាន់ក្នុងការរៀបចំផលិតផលតាំងពិព័រណ៍តាមផ្នែកបានល្អ។លោក ធា កក្កដា អ្នកគ្រប់គ្រងផ្នែកលក់ នៃក្រុមហ៊ុន ថៃហ្គ័រ ផោវ័រ (Tiger Power) ដែលបានចូលរួមតាំងបង្ហាញផលិតផលខ្មែរជាច្រើនមុខទំនិញនៅក្នុងកម្មវិធីពិព័រណ៍នេះបានឲ្យដឹងថា នេះគឺជាទីលើក១ ដែលក្រុមហ៊ុនលោកបានចូលរួម និងយល់ឃើញថា ពិតជាមានអារម្មណ៍រំភើបសប្បាយរីករាយ ដោយសារកម្ពុជាកាន់តែមានសមត្ថភាពក្នុងការនាំយកផលិតផល ក៏ដូចជាបង្ហាញនូវអ្វីដែលខ្មែរកំពុងមានទៅកាន់អ្នកចូលរួមក្នុងព្រឹត្តការណ៍នេះទាំងមូលជាពិសេសការបង្ហាញនូវវប្បធម៌ ប្រពៃណី និងសក្តានុពលរបស់កម្ពុជា។ឧកញ៉ា ស៊ិន ចន្ធី សមាជិកក្រុមប្រឹក្សាភិបាលក្រុមហ៊ុន ខេមបូឌាន អេស អឹម អ៊ី ត្រេឌីង ម.ក បានលើកឡើងថា ពីមួយឆ្នាំទៅមួយឆ្នាំ ខ្មែរកាន់តែអស្ចារ្យក្នុងការនាំយកនូវអ្វីដែលថ្មី ហើយប្លែក និងលើគ្រប់វិស័យទៅបង្ហាញជូនពិភពលោក។ លោបានបន្តថា ជាលទ្ធផលផ្លែផ្កាដែលកម្ពុជាទទួលបានក្នុងពេលនេះ ដោយសារការដឹកនាំដ៏ល្អរបស់ប្រមុខរាជរដ្ឋាភិបាលកម្ពុជា ពិសេសក្នុងអាណត្តិដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានបង្ហាញពីទិសដៅខាងមុខ ដែលអាស៊ាននិងចិន ត្រូវបន្តកិច្ចខិតខំពង្រឹងកិច្ចសហប្រតិបត្តិការ និងការពឹងពាក់គ្នាទៅវិញទៅមក។សូមបញ្ជាក់ថា ពិព័រណ៍ចិន-អាស៊ាន លើកទី២១ និងពិព័រណ៍នាំចេញតំបន់ស្វយ័តក្វាងស៊ី មានរយៈ ៥ថ្ងៃ ចាប់ពីថ្ងៃទី២៤ ដល់២៨ ខែកញ្ញា ឆ្នាំ២០២៤ ដែលរៀបចំឡើងនៅទីក្រុងណាននីង តំបន់ស្វយ័តក្វាងស៊ី ប្រទេសចិន។ ព្រឹត្តការណ៍នេះ គឺជាវេទិកានៃការផ្លាស់ប្តូរពាណិជ្ជកម្ម និងវិនិយោគដ៏សំខាន់ រវាងបណ្តាប្រទេសជាមាជិកអាស៊ាន និងប្រទេសចិន។ ក្នុងកម្មវិធីនេះដែរ កម្ពុជាបានរៀបចំសាងសង់ពន្លាជាតិ ដោយជ្រើសរើសខេត្តសៀមរាប ជាទីក្រុងស្រស់ប្រិមប្រិយ ដើម្បីបង្ហាញអំពី វប្បធម៌ អរិយធម៌ខ្មែរ សេដ្ឋកិច្ច ពាណិជ្ជកម្ម ទេសចរណ៍ និងវិនិយោគ។ ក្រៅពីនេះក៏មានការតាំងបង្ហាញផលិតផលរបស់ខ្មែរជាច្រើនមុខទំនិញ ដើម្បីស្វែងរកដៃគូពាណិជ្ជកម្មក៏ដូចជាផ្សព្វផ្សាយសក្តានុពលកម្ពុជាទៅកាន់អ្នកចូលរួមទស្សនាក្នុងកម្មវិធីដ៏ធំនិងអស្ចារ្យមួយនេះ៕ អត្ថបទ ឈិត បូរ៉ាវី

អាជ្ញាធរអេដស៍បើកកិច្ចប្រជុំអំពីការឆ្លើយតបនឹងមេរោគអេដស៍ និងការបង្ការការចម្លងមេរោគអេដស៍

អាជ្ញាធរប្រយុទ្ធនឹងជំងឺអេដស៍ ថ្ងៃទី២៧ ខែកញ្ញា ឆ្នាំ២០២៤ បានបើកកិច្ចប្រជុំក្រុមប្រឹក្សាបច្ចេកទេសអាជ្ញាធរជាតិប្រយុទ្ធនឹងជំងឺអេដស៍ ប្រចាំខែកញ្ញា ឆ្នាំ២០២៤ ក្រោមប្រធានបទ “ការឆ្លើយតបនឹងមេរោគអេដស៍ ក្នុងការបង្ការការចម្លងមេរោគអេដស៍ក្នុងចំណោមប្រជាជនគន្លឹះ”។ កិច្ចប្រជុំនេះ មានការអញ្ជើញជាអធិបតីដោយ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ អាជ្ញាធរជាតិប្រយុទ្ធនឹងជំងឺអេដស៍ និងមានការចូលរួមពីឯកឧត្តម លោកជំទាវ លោក លោកស្រី ជាក្រុមការងារក្រុមប្រឹក្សាបច្ចេកទេស នៃគណៈកម្មាធិការប្រយុទ្ធជំងឺអេដស៍ក្រសួង ស្ថាប័ន និងរាជធានី ខេត្ត តាមរយៈចូលរួមដោយផ្ទាល់ និងតាមប្រព័ន្ធ zoom ផង។ក្នុងឱកាសនោះ ឯកឧត្តមបណ្ឌិតបានកោតសរសើរក្រុមប្រឹក្សាបច្ចេកទេស ដែលបានប្រឹងប្រែងក្នុងការអនុវត្តការឆ្លើយតបនឹងមេរោគអេដស៍កន្លងមក ជាពិសេសការជំរុញការងារបង្ការលើក្រុមប្រជាជនគន្លឹះដែលបង្កឱ្យអត្រាប្រេវ៉ាឡង់មេរោគអេដស៍ នៅកម្ពុជា បានធ្លាក់ចុះជាបន្តបន្ទាប់មកនៅត្រឹមតែ ៥% នៅឆ្នាំ២០២៣។ ឯកឧត្តមបន្តថា លទ្ធផលប្រសើរនេះ បានមកអាស្រ័យដោយមានការយកចិត្តទុកដាក់ពីថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ ដឹកនាំដោយ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដោយមានការគាំទ្រពី អតីតប្រមុខរាជរដ្ឋាភិបាល សម្តេចតេជោ ហ៊ុន សែន ដែលបានអំពាវនាវជាចលនាជាតិតែមួយក្នុងការឆ្លើយតបនឹងមេរោគអេដស៍ និងគិតគូរប្រកបដោយគតិបណ្ឌិតរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ចំណែកលោកវេជ្ជបណ្ឌិត វិត ស្រេង សមាជិកក្រុមប្រឹក្សាបច្ចេកទេស និងជាប្រធានគម្រោងបង្ការអេដស៍ភូមិភាគឧត្តរ នៃអង្គការ RHAC បានបង្ហាញពីគោលបំណងនៃគម្រោង គឺបង្កើនការស្វែងរកករណីវិជ្ជមានថ្មី ក្នុងចំណោមក្រុមប្រឈមខ្ពស់ (នារីធ្វើការនៅសេវាកម្សាន្ត បុរសស្រឡាញ់ភេទដូចគ្នា និងអ្នកក្លែងភេទ) តាមអន្តរាគមន៍ថ្មីៗ និងពង្រីកតំបន់គ្របដណ្តប់ និងជំរុញការប្រើថ្នាំប្រឹព និងស្រោមអនាម័យ ដែលមានតំបន់គ្របដណ្តប់ និងអ្នកទទួលផល នៃគម្រោងរ៉ាក់នេះដែលគ្របដណ្តប់១៣ខេត្តនៅភាគខាងលិច និងខាងជើងនៃប្រទេស (កំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ មណ្ឌលគីរី ស្ទឹងត្រែង ក្រចេះ ព្រះវិហារ និងរតនគិរី) និងមានក្រុមគោលដៅ ជាង ៤ ម៉ឺននាក់ទៀត៕ អត្ថបទ៖ រដ្ឋា

ក្រសួងទេសចរណ៍ ប្តេជ្ញាប្រែក្លាយកម្ពុជាជាគោលដៅទេសចរណ៍លំដាប់ពិភពលោក

នៅរសៀលថ្ងៃទី២៧ ខែកញ្ញា ឆ្នាំ២០២៤នេះ ក្រសួងទេសចរណ៍នឹងប្រារព្ធទិវាទេសចរណ៍ពិភពលោក ២៧ កញ្ញា ឆ្នាំ២០២៤ ក្រោមប្រធានបទ៖ «សន្តិភាព និងទេសចរណ៍»។ តាមរយៈព្រឹត្តិការណ៍នេះ ក្រសួងទេសចរណ៍បានប្តេជ្ញាអនុវត្តតាមអនុសាសន៍សម្តេចធិបតី ហ៊ុន ម៉ាណែត នាយករដ្ឋមន្ត្រី ដោយបង្កើនការអភិវឌ្ឍវិស័យទេសចរណ៍របស់កម្ពុជាពង្រឹងគុណភាពផលិតផលទេសចរណ៍ និងសេវាកម្មទេសចរណ៍ជាដើម ក្នុងគោលដៅប្រែក្លាយកម្ពុជាជាគោលដៅទេសចរណ៍លំដាប់ពិភពលោក។ទិវាទេសចរណ៍ពិភពលោកឆ្នាំ២០២៤នេះ ប្រារព្ធក្នុងគោលបំណង ស្វែងយល់ពីចំណុចប្រសព្វនៃទេសចរណ៍ និងការកសាងសន្តិភាព ដោយគូសបញ្ជាក់ពីរបៀបនៃការធ្វើដំណើរ ការផ្លាស់ប្តូរគ្នានូវវប្បធម៌ដ៏សម្បូបែប និងការអភិវឌ្ឍទេសចរណ៍ប្រកបដោយនិរន្តភាពជាឈ្នាន់ រួមចំណែកដល់ការដោះស្រាយជម្លោះ ការផ្សព្វផ្សារ និងការលើកកម្ពស់សន្តិភាពទូទាំងពិភពលោក។តាមរយៈទិវាទេសចរណ៍ពិភពលោកនេះដែរ ឯកឧត្តម ជុក ជំនោរ អគ្គនាយក អគ្គនាយដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ ក្នុងសន្និសីទសារព័ត៌មានយប់ថ្ងៃទី២៦ ខែកញ្ញានេះក៏បានបញ្ជាក់ដែរថា ក្រសួងទេសចរណ៍ជាសេនាធិការរបស់រាជរដ្ឋាភិបាលនៅក្នុងអណត្តិទី៧នេះ បានដាក់ចេញនូវផែនការយុទ្ធសាស្ត្រជាច្រើន តាមផែនទីបង្អុលផ្លូវ សម្រាប់ការអភិវឌ្ឍវិស័យទេសចរណ៍ និងបាននិងកំពុងអនុវត្តយុទ្ធនាការឆ្នាំទស្សនាសៀមរាប២០២៤ យុទ្ធនាការឆ្នាំទេសចរណ៍កម្ពុជា ឥណ្ឌា និងយុទ្ធនាការឆ្នាំផ្លាស់ប្តូរទស្សនៈកិច្ចប្រជាជនកម្ពុជា ចិន សម្រេចបានលទ្ធផលផែ្លផ្កាជាច្រើន ក្រោមម្លប់សន្តិភាព។នៅក្នុងសារលិខិត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រះរាជាណាចក្រកម្ពុជាឱកាសអបអរសាទរទិវាទេសចរណ៍ពិភពលោក ឆ្នាំ២០២៤ ដែលពិភពលោកតែងប្រារព្ធនៅរៀងរាល់ឆ្នាំ នៅថ្ងៃទី២៧ ខែកញ្ញានេះ សម្តេចបានអំពាវនាវប្រជាពលរដ្ឋគ្រប់រូប និងក្រសួងស្ថាប័នរដ្ឋ ឯកជន និងអង្គការសមាគមជាតិអន្តរជាតិពាក់ព័ន្ធទាំងអសសូមគាំទ្រ និងរក្សាឲ្យបានសុខសន្តិភាព វិបុលភាពទោះក្នុងតម្លៃណាក៏ដោយ មានសន្តិភាពទើបមានការអភិវឌ្ឍគ្រប់វិស័យ ជាពិសេសរួមគ្នាអភិរក្សវិស័យទេសចរណ៍វប្បធម៌ ធម្មជាតិ សហគមន៍ទេសចរណ៍ ការពារបរិស្ថាន ជំរុញបង្កើនគុណភាពផលិផលទេសចរណ៍ សេវាកម្មទេសចរណ៍ សុវត្ថិភាពទេសចរ រក្សាស្នាមញញឹមរួសរាយ បដិសណ្ឋារកិច្ចល្អ ការជំរុញចលនាប្រឡងប្រណាំងទីក្រុងស្អាត និង ប្រែក្លាយកម្ពុជាជាគោលដៅទេសចរណ៍លំដាប់ពិភពលោក និងសាកសម កម្ពុជា ព្រះរាជាណាចក្រអច្ឆរិយៈ៕ អត្ថបទ ស៊ុម សុខជា

ចិនសម្រេចជ្រើសរើសកម្ពុជាជាប្រទេសគំរូ សម្រាប់ការអភិវឌ្ឍទេសចរណ៍ឆ្លាតវៃមុនគេក្នុងតំបន់អាស៊ាន

នៅក្នុងព្រឹត្តិការណ៍តាំងពិព័រណ៍ទេសចរណ៍ចិន-អាស៊ាន China-ASEAN EXPO Tourism Exhibition លើកទី១០ នៅទីក្រុង Guilin (គួយលីន) តំបន់ស្វយ័តក្វាងស៊ី នៃសាធារណរដ្ឋប្រជាមានិតចិន ចាប់ពីថ្ងៃទី២៥ ថ្ងៃទី២៦ ខែកញ្ញានេះ ហើយក្នុងព្រឹត្តិការណ៍នេះភាគីចិនបានសម្រេចជ្រើសរើសកម្ពុជា ជាប្រទេសគំរូ សម្រាប់ការអភិវឌ្ឍទេសចរណ៍ឆ្នាតវៃមុនគេក្នុងតំបន់អាស៊ាន។ឯកឧត្តម ជុក ជំនោរ អគ្គនាយក អគ្គនាយដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ ក្នុងសន្និសិទសារព័ត៌មានយប់ថ្ងៃទី២៦ ខែកញ្ញានេះ បានថ្លែងថា នៅក្នុងដំណើរចូលរួមព្រឹត្តិការណ៍តាំងពិព័រណ៍ទេសចរណ៍ចិន-អាស៊ានលើកទី១០ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ទទួលជួបពិភាក្សាការងារជាមួយមន្ត្រី អ្នកវិនិយោគផ្នែកឯកជន និងប្រព័ន្ធផ្សព្វផ្សាយចិន ដឹកនាំដោយ ឯកឧត្តម កាង លីន ប្រធានលេខាធិការបក្សមន្ទីរវប្បធម៌ និងទេសចរណ៍ខេត្តក្វាងស៊ី ហើយក្នុងជំនួបនេះ ភាគីចិន បានលើកកិច្ចសហប្រតិបត្តិការអភិវឌ្ឍន៍ថ្នាលទេសចរណ៍ឆ្នាតវៃ SMAR TOURISM PLATFORM នៅកម្ពុជា តភ្ជាប់ជាមួយទីក្រុងទេសចរណ៍ឆ្នាតវៃគួយលីនមុនគេក្នុងតំបន់អាស៊ាន ។ឯកឧត្តម កាង លីន ក៏បានសន្យាជាមួយរដ្ឋមន្ត្រីទេសចរណ៍កម្ពុជា ផ្តល់ការបណ្តុះបណ្តាលទេសចរណ៍ចាំបាច់នានានៅក្នុងឆ្នាំ២០២៥ផងដែរ។សូមជម្រាបតាម តាមរយៈជំនួបនេះ ឯកឧត្តម ហួត ហាក់ ជាមួយមន្ត្រី អ្នកវិនិយោគផ្នែកឯកជន ឯកឧត្តមក៏បានស្នើភាគីមិត្តចិនជួយបង្កើនជើងហោះហើរត្រង់ពីទីក្រុងគួយលីនមកកម្ពុជា និងស្នើសុំក្រុមហ៊ុនអាកាសចរណ៍ចិន ក៏ដូចក្រុមហ៊ុនទេសចរណ៍នានាទៀតរបស់ប្រទេសចិន ជួយបង្កើនការផ្សព្វផ្សាយគោលដៅទេសចរណ៍កម្ពុជា បង្កើនការផ្សព្វផ្សាយលក់កញ្ចប់ទេសចរណ៍ទស្សនាកម្ពុជា និងជួយផ្សព្វផ្សាយព័ត៌មានពិតពីកម្ពុជា ខណៈក្រោមម្លប់សន្តិភាពនៅកម្ពុជា គឺកម្ពុជាគោលដៅទេសចរណ៍សុវត្ថិភាព និងបៃតង ហើយមានភាពទាក់ទាញបំផុត៕ អត្ថបទ៖ ស៊ុម សុខជា

ស៊ីម៉ាក់ ជំរុញសិក្ខាកាមខិតខំបន្តចំណេះដឹងរបស់ខ្លួនអោយកាន់តែល្អ នឹងអាចមានឱកាសក្លាយជាថ្នាក់ដឹកនាំ

កំពង់ឆ្នាំង៖ ឯកឧត្តម ឯក ប៉ូលីន ប្រធាននាយកដ្ឋានកណ្តាល តំណាងឯកឧត្តម ហេង រតនា ប្រតិភូរាជរដ្ឋាភិបាល និងជាអគ្គនាយកស៊ីម៉ាក់ នៅថ្ងៃទី២៧ ខែកញ្ញា ឆ្នាំ២០២៤នេះ បានជំរុញសិក្ខាកាមក្នុងវគ្គហ្វឹកហ្វឺនរំលឹកបច្ចេកទេសកម្ទេចយុទ្ធភណ្ឌមិនទាន់ផ្ទុះកម្រិត៣, វគ្គហ្វឹកហ្វឺនបច្ចេកទេសអ្នកបញ្ជាសុនខប្រតិបត្តការប្រឆាំងភេវរកម្ម, និងសិក្ខាសាលាស្តីពីបច្ចេកទេសសុនខល្បាត អោយយកចិត្តទុកដាក់ខិតខំរៀនសូត្របន្ត ដើម្បីអាចប្រែក្លាយខ្លួនទៅជាប្រធានក្រុម ឬជាថ្នាក់ដឹកនាំតាមច្ចេកទេសរបស់ខ្លួន ជាពិសេសបានជួយដល់សង្គមជាតិ ប្រជាជន និងរំដោះដីដែលមានមីន យុទ្ធភណ្ឌមិនទាន់ផ្ទុះ អោយមានសុវត្ថិភាព សន្តិសុខល្អដល់ការអភិវឌ្ឍន៍ផងដែរ។ឯកឧត្តម ឯក ប៉ូលីន បានលើកឡើងថា៖ វគ្គបច្ចេកទេសកទាំង៣នេះ បង្កើតឡើងក្នុងគោលបំណងហ្វឹកហ្វឺនកសាង និងបង្កើនសមត្ថភាពដល់សិក្ខាកាមមកពីអង្គភាពស៊ីម៉ាក់ នគរបាល កងរាជអាវុធហត្ថ យោធា ក្នុងការពង្រឹងសមត្ថភាព ដើម្បីចូលរួមក្នុងការដោះយុទ្ធភណ្ឌមិនទាន់ផ្ទុះ និងការរំដោះដីមានមីន អោយមានសុវត្ថិភាព សន្តិសុខល្អ ។ វិទ្យាស្ថានបច្ចេកទេសសកម្មភាពកំចាត់មីនរបស់អង្គភាពស៊ីម៉ាក់ បាន និងកំពុងដើរតួនាទីយ៉ាងសំខាន់ ក្នុងការហ្វឹកហ្វឺនជំនាញបច្ចេកទេស និងចែករំលែកចំណេះដឹង ក៏ដូចជាបទពិសោធន៍ ក្នុងវិស័យសកម្មភាពមីន និងសំណល់យុទ្ធភណ្ឌសង្គ្រាមទាំងក្នុងក្របខណ្ឌជាតិ និងអន្តរជាតិ ពិសេសបណ្តាប្រទេស ដែលទទួលរងផលប៉ះពាល់ ដោយសារគ្រាប់មីន និងសំណល់យុទ្ធភណ្ឌសង្គ្រាម ដើម្បីសង្រ្គោះជីវិត និងការអភិវឌ្ឍនៅក្នុងប្រទេសកម្ពុជា។ ឯកឧត្តមបានបន្តថា៖ សិក្ខាកាមនៃមជ្ឈមណ្ឌលសកម្មភាពកំចាត់មីនកម្ពុជាទាំងអស់ នៅពេលដែលចេញពីសាលាហ្វឹកហ្វឺន ទៅបម្រើការងារត្រូវយកចិត្តទុកដាក់ដោយយកចំណេះជំនាញទាំងអស់នេះ ទៅអនុវត្ត និងបម្រើការងារឲ្យមានប្រសិទ្ធភាពខ្ពស់ ព្រោះអ្នកទាំងអស់នេះហើយដែលស្នងពីជនាន់មុន ដូច្នេះរាល់បទពិសោធន៍ និងចំណេះដឹងដែលទទួលបាន សង្ឃឹមថានៅថ្ងៃអនាគតពិតជាអាចធ្វើបាន និងត្រូវអភិវឌ្ឍខ្លួនជានិច្ច ដើម្បីរួមចំណែកកសាង និងអភិវឌ្ឍន៍ជាតិមាតុភូមិឲ្យមានការរីកចម្រើន និងមានសុខសន្តិភាព៕ កាំង ហុងវាស្នា

ផ្លូវជនបទស្ថិតក្នុងខេត្តសៀមរាប កំពុងផ្តល់អត្ថប្រយោជន៍ដល់ប្រជាពលរដ្ឋនៅមូលដ្ឋាន

សៀមរាប ៖ ផ្លូវជនបទចំនួនពីរខ្សែ និងសំណង់សិល្បការ្យផ្សេងៗ ក្នុងស្រុកចំនួនបី នៅខេត្តសៀមរាប បានកំពុងផ្តល់អត្ថប្រយោជន៍ សម្រួលដល់ការធ្វើដំណើរ ការដឹកជញ្ជូនកសិផល និងការប្រកបរបរអាជីវកម្មផ្សេងៗ ដោយបានកំពុងលើកកម្ពស់ជីវភាពនៃការរស់នៅ របស់ប្រជាពលរដ្ឋនៅតាមមូលដ្ឋាន ឱ្យកាន់តែប្រសើរ។ជុំវិញការអភិវឌ្ឍន៍ផ្លូវនៅតាមជនបទ, ក្រសួងអភិវឌ្ឍន៍ជនបទ ដែលជាសេនាធិការរាជរដ្ឋាភិបាល បាននិងកំពុងផ្ដោតការ យកចិត្តទុកដាក់យ៉ាងខ្លាំង លើការងារស្ថាបនា ដោយបានគិតគូរពីភាពធន់ នឹងការប្រែប្រួលអាកាសធាតុ ទាំងផ្លូវក្រាលដីស ផ្លូវក្រាល ល្បាយក្រួស ផ្លូវកៅស៊ូពីរជាន់ និងផ្លូវក្រាលបេតុង, ព្រោះផ្លូវពិតជាមានសារៈសំខាន់បំផុត ក្នុងការជំរុញដំណើរអន្តរកម្មផ្នែកសេដ្ឋកិច្ច និងសង្គមកិច្ចនៅតំបន់ជនបទ និងកាត់បន្ថយគម្លាតរវាងតំបន់ជនបទ និងទីប្រជុំជនជាដើម។ទាក់ទិនផ្លូវជនបទនេះ, ឯកឧត្តម ជា ស៊្រុន រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួង អភិវឌ្ឍន៍ជនបទ នៅថ្ងៃទី ២៦ ខែ កញ្ញា ឆ្នាំ ២០២៤, បានដឹកនាំគណៈកម្មការអន្តរក្រសួង ចុះត្រួតពិនិត្យ វាយតម្លៃបញ្ចប់ការងារ ស្ថាបនា ១០០ ភាគរយ លើការស្ថាបនាផ្លូវក្រាលកៅស៊ូ DBST នៅស្រុកស្រីស្នំ, ការងារជួសជុលផ្លូវក្រាលដីល្បាយក្រួស នៅស្រុកវារិន និងសាងសង់លូប្រអប់មុខពីរចំនួន ២ កន្លែង នៅស្រុកស្វាយលើ, ក្នុងនោះឯកឧត្តមរដ្ឋលេខាធិការ បានវាយតម្លៃខ្ពស់ ចំពោះការខិតខំ ប្រឹងប្រែងស្ថាបនារបស់នាយកដ្ឋានវិស្វកម្ម ក្រសួងការពារជាតិ សម្រេចបានតាមផែនការ និងប្រកបដោយគុណភាព ព្រោះការស្ថាបនា ការស្តារ ការថែទាំ ក៏ដូចជាការកែលម្អហេដ្ឋារចនាសម្ព័ន្ធរូបវន្ត គឺជាការវិនិយោគដ៏ចាំបាច់ ដែលជាការចូលរួមចំណែកលើកកម្ពស់ ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋនៅជនបទ។ទាក់ទិនការស្ថាបនានេះ, ឧត្តមសេនីយ៍ឯក លន់ សុធី នាយករងនាយកដ្ឋានវិស្វកម្ម ក្រសួងការពារជាតិ លើកឡើងថា ដោយ ទទួលបានគោលការណ៍ឯកភាពពី ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុរួចមក នាយកដ្ឋានវិស្វកម្ម នៃក្រសួង ការពារជាតិ ក៏បានចាប់ផ្តើមអនុវត្តការងារស្ថាបនាផ្លូវ និងសាងសង់លូប្រអប់ទាំងនោះ ដោយអនុវត្តសម្រេចបាន ១០០ ភាគរយ ដើម្បី ផ្តល់ភាពងាយស្រួលក្នុងការធ្វើចរាចរទៅមក ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋនៅតាមតំបន់ទាំងនោះ។បន្ទាប់ពីចុះពិនិត្យគម្រោងទាំងនោះរួច, ឯកឧត្តម ជា ស៊្រុន និងគណៈកម្មការអន្តរក្រសួង បានចុះជួបសំណេះសំណាល ជាមួយអាជ្ញាធរមូលដ្ឋាន និងប្រជាពលរដ្ឋជាច្រើនគ្រួសារ ដោយក្នុងនោះឯកឧត្តមរដ្ឋលេខាធិការ បានពាំនាំនូវប្រសាសន៍ផ្តាំផ្ញើសាក សួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន កាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ពេជ ចន្ទមុន្នី និងឯកឧត្តម ឆាយ ឫទ្ធិសែន រដ្ឋមន្ត្រីក្រសួង អភិវឌ្ឍន៍ជនបទ និងលោកជំទាវ, ដែលសម្តេចនិងលោកជំទាវបណ្ឌិត ឯកឧត្តម-លោកជំទាវ តែងតែ គិតគូរពីសុខទុក្ខ និងការរស់នៅរបស់ប្រជាពលរដ្ឋ ។ ក្នុងជំនួបនេះដែរ, ឯកឧត្តម រដ្ឋលេខាធិការ ក៏បាននាំយកអំណោយដ៏ថ្លៃថ្លា របស់ឯកឧត្តមរដ្ឋមន្ត្រី ឆាយ ឫទ្ធិសែន ជូនដល់ប្រជាពលរដ្ឋជាច្រើន ដោយម្នាក់ៗទទួលបានក្រម៉ា១ រួមជាមួយថវិកាមួយចំនួន របស់ ឧត្តមសេនីយ៍ឯក លន់ សុធី ផងដែរ ៕អត្ថបទ៖ សុន រ៉ាឌី

កងទ័ពកម្ពុជា ឡាវ និងវៀតណាម នឹងធ្វើសមុទ្ធរួមគ្នារយៈពេល១៥ថ្ងៃក្នុងខែវិច្ឆិកាឆ្នាំ២០២៤នេះ

នាយឧត្តមសេនីយ៍ ទៀ សីហា ឧបនាយរដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា នៅថ្ងៃទី២៦ ខែកញ្ញា ឆ្នាំ២០២៤នេះ បានដឹកនាំកិច្ចប្រជុំគណៈកម្មការអន្តរក្រសួង ដើម្បីពិភាក្សាគ្នាអំពីការធ្វើលំហាត់សមយុទ្ធរួមរវាងកងទ័ពបីប្រទេស កម្ពុជា ឡាវ វៀតណាម។សូមបញ្ជាក់ថា កងទ័ពកម្ពុជា ឡាវ និងវៀតណាម នឹងធ្វើសមយុទ្ធរួមគ្នារយៈពេល១៥ គឺចាប់ពីថ្ងៃទី១១ដល់ថ្ងៃទី២៤ ខែវិច្ឆិកា ឆ្នាំ២០២៤នេះ នៅភ្នំជុំសែនរីករាយ ខេត្តកំពង់ឆ្នាំងប្រទេសកម្ពុជា លើរបៀបវារៈការគ្រប់គ្រងគ្រោះមហន្តរាយ ជាពិសេសផ្តោតលើការបាក់រំលំអគារតែម្តង។នៅក្នុងកិច្ចប្រជុំ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការ ចម្រុះនៃកងយោធពលខេមរភូមិន្ទ និងជាអនុប្រធានប្រចាំការ គណៈកម្មការអន្តរក្រសួង បានរាយការណ៍ជូនកិច្ចប្រជុំនូវរបាយការណ៍សង្ខេប ស្តីពីសកម្មភាពការងារ និងទិសដៅអនុវត្តបន្តរបស់លេខាធិការដ្ឋាន និងអនុគណៈកម្មការជំនាញពាក់ព័ន្ធ នៃគណៈកម្មការអន្តរក្រសួងដែលបានអនុវត្តភារកិច្ចរបស់ខ្លួន ក្នុងពេលកន្លងមកដូចជា ការងារពិធីការ ការងាររៀបចំផែនការធ្វើលំហាត់សមយុទ្ធការរៀបចំខ្លឹមសារ កម្មវិធីកីឡា សិល្បៈ ការផ្សព្វផ្សាយព័ត៌មាន ការងារធានា ការងារការពារសន្តិសុខ និងការចុះទៅពិនិត្យទីតាំងសម្រាប់ធ្វើលំហាត់សមយុទ្ធជាដើម។នៅក្នុងកិច្ចប្រជុំនោះ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង បានកោតសរសើរ និងវាយតំលៃខ្ពស់ចំពោះអនុគណៈកម្មការជំនាញពាក់ព័ន្ធ នៃគណៈកម្មការអន្តរក្រសួង ដែលបានខិតខំបំពេញការងារក្នុងពេលកន្លងមក។ នាយឧត្តមសេនីយ៍ ទៀ សីហា បានជំរុញអោយ អនុគណៈកម្មការជំនាញទាំងអស់បន្តការសហគ្នាជាមួយ ស្ថាប័នដែលមានការពាក់ព័ន្ធ ដើម្បីធ្វើជាធាតុចូលក្នុងការរៀបចំកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួមរវាងកងទ័ពបីប្រទេសកម្ពុជា ឡាវ វៀតណាម នៅព្រះរាជាណាចក្រកម្ពុជាអោយសម្រចបានជោគជ័យ៕ អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ

មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877