BTV NEWS

សម្តេចធិបតីសង្ឃឹមយ៉ាងមុតមាំថា គណៈកម្មការចម្រុះព្រំដែនប្រទេសទាំងពីរកម្ពុជា-ថៃអាចចាប់ផ្តើមអនុវត្តការងារវាស់វែងបានឆាប់រហ័ស តាមស្មារតីដែលបានឯកភាពគ្នាក្នុងសេចក្តីប្រកាសរួម

ផ្ទះទេវតា១ខ្នងដោយមានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ,សម្ដេចធិបតី ហ៊ុន ម៉ាណែត និងលោកជំទាវបណ្ឌិត ត្រូវបានលោកជំទាវ ហ៊ុន ម៉ាណា ប្រគល់ជូនពលរដ្ឋខ្វះខាតជីវភាពនៅខេត្តកំពង់ធំ

សួនរុក្ខជាតិអង្គរ ពិព័រណ៍ “មិត្តសត្វព្រៃ និងពិភពសត្វល្អិត” សម្រាប់អ្នកទេសចរទស្សនា ក្រៅពីអង្គរវត្ដ

សម្ដេចព្រះមហាសង្ឃរាជ បួរ គ្រី ផ្ដល់ព្រះរាជអំណោយដល់កងទ័ព និងធ្វើបុណ្យឧទ្ទិសកុសលដល់យុទ្ធជនពលី

ព័ត៌មានជាតិ

រដ្ឋមន្រ្ដី៖ កម្ពុជាជាគោលដៅទេសចរណ៍សុវត្ថិភាព និងស្វាគមន៍ភ្ញៀវទេសចរពីគ្រប់ទិសទីយ៉ាងកក់ក្តៅ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញចូលរួមថ្លែងសុន្ទរកថាអបអរសាទរក្នុងកម្មវិធី K-WAVE Peace Concert 2026 ដែលរៀបចំឡើងដោយ The Cambodia Branch of the Peaceful Unification Advisory Council (PUAC) មានការចូលរួមជាសារវីដេអូរបស់ឯកឧត្តមប្រធានាធិបតី Lee Jae-myung ប្រធានក្រុមប្រឹក្សាអង្គការ Peaceful Unification Advisory Council (PUAC) និងវត្តមានផ្ទាល់របស់ឯកឧត្តម Kim Chang-yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំកម្ពុជា, ប្រធានអង្គការ Peaceful Unification Advisory Council ប្រចាំកម្ពុជា, ប្រធានសមាគមកូរ៉េប្រចំាកម្ពុជា, ប្រធានសភាពាណិជ្ជកម្មកូរ៉េនៅកម្ពុជា ព្រមទាំងលោក លោកស្រីតំណាងក្រុមហ៊ុន អង្គការ និងធនាគារកូរ៉េនៅកម្ពុជា សិស្សនិសិ្សត និងប្រជាពលរដ្ឋកម្ពុជា និងកូរ៉េជាង២០០នាក់ នៅសណ្ឋាគារ Sun & Moon Riverside រាជធានីភ្នំពេញ។ក្នុងឱកាសនៃកម្មវិធីផ្សព្វផ្សាយវប្បធម៌ដ៏មានសារៈសំខាន់ និងប្រកបដោយអត្ថន័យជ្រាលជ្រៅនេះ គណៈអធិបតីនៃប្រទេសទាំងពីរ បានវាយតម្លៃខ្លស់លើគុណតម្លៃនៃសន្តិភាព ការរួបរួមគ្នា ព្រមទាំងបញ្ជាក់ពីការប្តេជ្ញាពង្រឹង និងពង្រីកទំនាក់ទំនងការទូត "ភាពជាដៃគូយុទ្ធសាស្រ្ត" រវាងព្រះរាជាណាចក្រកម្ពុជា និងសាធារណរដ្ឋកូរ៉េលើគ្រប់វិស័យ ជាពិសេសកិច្ចសហប្រតិបត្តិការជំរុញទេសចរណ៍ ការផ្លាស់ប្តូរប្រជាជន និងវប្បធម៌រវាងប្រទេសទាំងពីរ ការរួមគ្នាប្រយុទ្ធប្រឆាំង និងបោសសំអាតឱ្យអស់ឧក្រិដ្ឋកម្មឆបោកអនឡាញអន្តរជាតិដែលបានជះឥទ្ធិពលជាអវិជ្ជមានលើការធ្វើដំណើរ ប្រកបអាជីវកម្ម និងទេសចរណ៍។ ឆ្លៀតក្នុងឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់លើគំនិតផ្តួចផ្តើមរៀបចំព្រឹត្តិការណ៍វប្បធម៌ដ៏មានអត្ថន័យនេះ ដែលបានរួមចំណែកលើកពីគុណតម្លៃនៃសុខសន្តិភាព ការរួបរួមសាមគ្គីភាពគ្នា ការពង្រឹងចំណងមិត្តភាព និងការផ្លាស់ប្តូរវប្បធម៌រវាងព្រះរាជាណាចក្រកម្ពុជា និងសាធារណរដ្ឋកូរ៉េ ព្រមទាំងការជំរុញការផ្លាស់ប្តូរ និងការស្វែងយល់ពីគ្នា រវាងប្រជាជននៃប្រទេសទាំងពីរតាមរយៈតន្ត្រី សិល្បៈ និងវប្បធម៌។ ឯកឧត្តមរដ្ឋមន្រ្តី ហួត ហាក់ថ្លែអថា៖«កម្ពុជាជាគោលដៅទេសចរណ៍សុវត្ថិភាព និងស្វាគមន៍ភ្ញៀវទេសចរពីគ្រប់ទិសទីប្រកបដោយបដិសណ្ឋារកិច្ចដ៏កក់ក្តៅ»។ ទន្ទឹមនឹងនេះដែរ ឯកឧត្តមរដ្ឋមន្ត្រី ក៏បានថ្លែងអំណរគុណដល់អ្នករៀបចំកម្មវិធី និងបានគូសបញ្ជាក់ជូនភ្ញៀវជាតិ និងអន្តរជាតិដែលមានវត្តមានថាកម្ពុជា ជាគោលដៅទេសចរណ៍សុវត្ថិភាព បដិសណ្ឋារកិច្ចដ៏កក់ក្តៅ និងរាក់ទាក់ សម្រាប់ភ្ញៀវទេសចរពីទូទាំងពិភពលោក។ ឯកឧត្តមរដ្ឋមន្ត្រីបានគូសបញ្ជាក់ថា រាជរដ្ឋាភិបាលកម្ពុជា បាននិងកំពុងចាត់វិធានការយ៉ាងម៉ឺងម៉ាត់ក្នុងការបង្ក្រាប និងលុបបំបាត់ដល់ឬសគល់នៃឧក្រិដ្ឋកម្មឆបោកតាមប្រព័ន្ធបច្ចេកវិទ្យា ដើម្បីធានានូវបរិយាកាសសុវត្ថិភាព និងទំនុកចិត្តសម្រាប់ភ្ញៀវទេសចរ ប្រជាពលរដ្ឋ និងវិនិយោគិន។សូមបញ្ជាក់ថា ក្នុងរយៈពេល ២ ខែដំបូងនៃឆ្នាំ២០២៦នេះ កម្ពុជាទទួលបានភ្ញៀវទេសចរអន្តរជាតិប្រមាណជិត ៦៩០,០០០ នាក់ ដែលក្នុងនោះមានភ្ញៀវទេសចរកូរ៉េជិត ១៥.១០០ នាក់ ដែលបង្ហាញពីសក្តានុពល និងភាពទាក់ទាញទេសចរណ៍របស់កម្ពុជាក្នុងទីផ្សារកូរ៉េ៕

លោកជំទាវបណ្ឌិត ពេជ ចន្ទមុន្នី អញ្ជើញប្រគល់ផ្ទះថ្មី៣ខ្នង ជូនក្រុមគ្រួសាររបស់វីរកងទ័ពពលី ស្ថិតក្នុងមូលដ្ឋានក្រុងតាខ្មៅ និងខណ្ឌព្រែកព្នៅ

នាព្រឹកថ្ងៃទី១៦ ខែមីនា ឆ្នាំ២០២៦នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាវត្តមានប្រគល់ផ្ទះថ្មីចំនួន ៣ខ្នង ជូនក្រុមគ្រួសាររបស់វីរកងទ័ពពលី ដែលក្នុងនោះផ្ទះ ២ខ្នង ស្ថិតនៅក្រុងតាខ្មៅ ខេត្តកណ្ដាល និងផ្ទះ ១ខ្នងទៀត ស្ថិតនៅខណ្ឌព្រែកព្នៅ រាជធានីភ្នំពេញ។លោកជំទាវបណ្ឌិត ពេជ ចន្ទមុន្នី បានពាំនាំប្រសាសន៍ចូលរួមរំលែកមរណទុក្ខដ៏ក្រៀមក្រំបំផុត និងប្រសាសន៍សួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំង សម្តេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារនៃសពវីរកងទ័ពផងដែរ។ ទន្ទឹមនឹងនេះ លោកជំទាវបណ្ឌិត បាននាំយកមកជាមួយនូវអំណោយរបស់ សម្តេចធិបតី និងលោកជំទាវបណ្ឌិត មានដូចជាថវិកា សម្ភារៈបរិក្ខារសម្រាប់ប្រើប្រាស់ និងគ្រឿងឧបភោគបរិភោគ ជូនដល់ក្រុមគ្រួសារនៃសព ដើម្បីជួយសម្រួលដល់ជីវភាពរស់នៅប្រចាំថ្ងៃ។លោកជំទាវបណ្ឌិតមានប្រសាសន៍ថា យើងគ្រប់គ្នាចងចាំវីរភាព និងការលះបង់របស់វីរកងទ័ព ពិសេសក៏បាននឹងកំពុងគិតគូរជាប្រចាំចំពោះក្រុមគ្រួសារវីរកងទ័ព ដោយមិនបោះបង់នរណាម្នាក់ចោលនោះឡើយ។ ជីវភាព និងការរស់នៅដើម្បីបន្តរួមចំណែកជាមួយកម្ពុជា គឺជាកាតព្វកិច្ចរបស់យើងទាំងអស់គ្នា ដែលនេះ គឺសរបញ្ជាក់ច្បាស់ពីការទទួលខុសត្រូវក្នុងនាមរាជរដ្ឋាភិបាលផង និងសមាជិកក្រុមគ្រួសារវីរកងទ័ពផង ក៏ដូចជាប្រជាជនកម្ពុជាទាំងអស់ផងដែរ៕

សម្តេច ម៉ែន សំអន ដឹកនាំកិច្ចប្រជុំគណៈអចិន្ត្រៃយ៍សមាគមនារី និងគណៈចលនាស្រ្តីស្តីពីវឌ្ឍនៈការងារ និងផែនការត្រៀមអនុវត្តនាពេលខាងមុខ

សម្តេចកិត្តិសង្គហបណ្ឌិត ម៉ែន សំអន ប្រធានសមាគមននារីកម្ពុជា ដើម្បីសន្តិភាព និងអភិវឌ្ឍន៍បានដឹកនាំកិច្ចប្រជុំគណៈអចិន្ត្រៃយ៍សមាគមនារី និងគណៈចលនាស្ត្រី ស្តីពីវឌ្ឍនៈការងារ នៅវិមាន ៧មករា រាជធានីភ្នំពេញ នាព្រឹកថ្ងៃទី១៦ ខែមីនា ឆ្នាំ២០២៦។នៅក្នុងកិច្ចប្រជុំនោះផងដែរ ក៏មានរបៀបវារៈដូចតទៅ៖ (១).មតិបើកិច្ចប្រជុំដោយសម្តេចប្រធាន (២).របាយការណ៍វឌ្ឍនៈភាពការងារដែលបានអនុវត្តកន្លងមក (៣).កាលបរិច្ឆេទ និងទីកន្លែងរៀបចំសន្និបាត(៤).កិច្ចពិភាក្សា (៥).មតិបូកសរុបកិច្ចប្រជុំរបស់សម្តេចប្រធាន (៦).ផ្សេងៗ។ មានប្រសាសន៍ក្នុងឱកាសនោះ សម្តេចកិត្តិសង្គហបណ្ឌិត បានប្រគល់ភារកិច្ចជូនដល់ លោកជំទាវ ជូ ប៊ុនអេង ធ្វើសេចក្តីរាយការណ៍អំពីវឌ្ឍនៈភាពការងារដែលបានអនុវត្តកន្លងមក។ លោកជំទាវក៏បានគូសបញ្ជាក់ផងដែរថា ចំពោះក្រុមការងាររៀបចំសន្និបាត ក៏បានការត្រៀមរៀបចំរួចរាល់នូវឯកសារពាក់ព័ន្ធសម្រាប់ការរៀបចំសន្និបាត។ បន្ទាប់មកទៀត លោកជំទាវ មាន សំអាន ក៏បានលើកឡើងនូវបញ្ហាប្រឈមមួយចំនួន និងបានពិភាក្សាដើម្បីរកដំណោះសា្រយសម្រាប់អនុវត្តបន្តនាពេលខាងមុខ។សម្តេចកិត្តិសង្គហបណ្ឌិត ក៏បានថ្លែងនូវការកោតសសើរចំពោះលោកជំទាវ ក៏ដូចជាក្រុមការងារទាំងអស់បានខិតខំទាំងកម្លាំងកាយ កម្លាំងចិត្ត រហូតជន្នះនូវការងារកន្លងមករហូតទទួលបាននូវលទ្ធផលគួរជាទីមោទនៈ។ សម្តេចកិត្តិសង្គហបណ្ឌិតក៏បានស្នើឱ្យក្រុមការងារទាំងអស់បន្តយកចិត្តទុក្ខដាក់តាមដាននូវវឌ្ឍនៈភាពសភាពការណ៍ពិភពលោកដែលបាននឹងកំពុងវិវត្តន៍យ៉ាងលឿន និងត្រូវធ្វើបច្ចុប្បន្នភាពចំពោះសុន្ទរកថា និងឯកសារពាក់ព័ន្ធឱ្យស្របនឹងសភាពការណ៍បច្ចុប្បន្ន៕

ជនជាតិចិន ៥០០នាក់ ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)

នៅយប់ថ្ងៃទី១៥ ឈានចូលថ្ងៃទី១៦ ខែមីនា ឆ្នាំ២០២៦ អនុវត្តតាមអនុសាសន៍ដ៏ខ្ពង់ខ្ពស់ របស់ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី សហាការជាមួយស្ថានទូតចិនប្រចាំនៅព្រះរាជាណាចក្រកម្ពុជា បន្តធ្វើការបណ្តេញជនជាតិចិនសរុបចំនួន ៥០០នាក់ (ស្រី១៣នាក់) ពាក់ព័ន្ធករណីឆបោកតាមប្រព័ន្ធអនឡាញ (Online Scams) និងករណីលួចស្នាក់នៅ ធ្វើការងារខុសច្បាប់ ត្រូវបានបណ្ដេញចេញតាមរយៈយន្តហោះពិសេស នៅប៉ុស្តិ៍នគរបាលច្រកទ្វារអាកាសអន្តរជាតិតេជោ និងប៉ុស្តិ៍នគរបាលច្រកទ្វារអាកាសកងកេង (ខេត្តព្រះសីហនុ)។ នេះបើតាម អគ្គនាយកដ្ឋានអន្តោប្រវេសន៍។អគ្គនាយកដ្ឋានអន្តោប្រវេសន៍ បានឱ្យដឹងថា ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល នៃព្រះរាជាណាចក្រកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

តើ ZO MOTORS ប្រើប្រាស់អគ្គិសនីភាវូបនីយកម្មយានយន្តពាណិជ្ជកម្មដើម្បីដោះស្រាយវិបត្តិនៃការនាំចូលប្រេងឥន្ធនៈឡើងថ្លៃ យ៉ាងដូចម្តេច?

ភ្នំពេញ៖ ថ្ងៃទី១៥ ខែមីនា ឆ្នាំ២០២៦ ស្របពេលដែលស្ថានភាពវិបត្តថាមពលសកលបន្តប្រែប្រួលកម្ពុជាបាននិងកំពុងប្រឈមមុខនឹងសម្ពាធអតិផរណាដែលកើតចេញពីការនាំចូលពីក្រៅប្រទេសដែលមិនធ្លាប់មានពីមុនមក។ យោងតាមសេចក្តីជូនដំណឹងស្តីពីការកែសម្រួលតម្លៃប្រេងឥន្ធនៈថ្មីបំផុត ដែលចេញដោយក្រសួងពាណិជ្ជកម្មកាលពីថ្ងៃទី១៤ ខែមីនា តម្លៃលក់រាយប្រេងឥន្ធនៈបានកើនឡើងជាថ្មីម្ដងទៀត៖ ប្រេងសាំងធម្មតា (92) កើនឡើងដល់ ៥,២០០ រៀល/លីត្រ ខណៈដែលប្រេងម៉ាស៊ូត ដែលជាប្រភពថាមពលស្នូលនៃវិស័យភស្តុភារកម្ម បានហក់ឡើងដល់ ៦,៤០០ រៀល (ប្រមាណ ១.៥៩ ដុល្លារអាមេរិក) ក្នុងមួយលីត្រ។ ក្នុងបរិបទនេះការដាក់ឱ្យដំណើរការរោងចក្រ ZO MOTORS នៅខេត្តពោធិ៍សាត់ មិនត្រឹមតែជាការពង្រីកទំហំឧស្សាហកម្មប៉ុណ្ណោះទេ ប៉ុន្តែក៏បានក្លាយជាឧបករណ៍ការពារជាយុទ្ធសាស្ត្រសម្រាប់សន្តិសុខថាមពលជាតិរបស់កម្ពុជាផងដែរ ។១. បន្ទុកចំណាយដ៏ធ្ងន់ធ្ងរនៃវិស័យថាមពលទិន្នន័យគយថ្មីបំផុតបានបង្ហាញថា នៅក្នុងខែមករា ឆ្នាំ២០២៦ ចំណាយរបស់កម្ពុជាលើការនាំចូលប្រេងឥន្ធនៈ និងឧស្ម័នធម្មជាតិបានឈានដល់ ២១៩.៥ លានដុល្លារអាមេរិក ក្នុងនោះតម្លៃនៃការនាំចូលប្រេងម៉ាស៊ូតបានកើនឡើង ១៥% ធៀបនឹងឆ្នាំមុន ដែលឈានដល់តម្លៃប្រមាណ ១៣៣.១ លានដុល្លារអាមេរិក។ សម្រាប់សេដ្ឋកិច្ចកម្ពុជាដែលពឹងផ្អែកខ្លាំងលើការដឹកជញ្ជូនតាមរយៈផ្លូវគោក "ថាមពលនាំចូល" ដ៏មានតម្លៃក្នុងពេលបច្ចុប្បន្ន កំពុងតែស៊ីរូងប្រាក់ចំណេញរបស់ក្រុមហ៊ុនដឹកជញ្ជូននានា ។ ការសិក្សាស្រាវជ្រាវបានបង្ហាញថាតាមតម្លៃប្រេងបច្ចុប្បន្នថ្លៃដើមប្រតិបត្តិការនៃការប្រើប្រាស់រថយន្តដឹកទំនិញដែលដំណើរការ ដោយប្រេងម៉ាស៊ូតជាប្រពៃណី គឺខុសគ្នាស្ទើរតែ ៥ ដងនៃរថយន្តពាណិជ្ជកម្មអគ្គិសនី។២. អត្ថប្រយោជន៍ប្រកួតប្រជែងពីច្បាប់ស្តីពីការវិនិយោគតាមរយៈការប្រើប្រាស់គោលនយោបាយអនុគ្រោះថ្មីបំផុតក្រោម《ច្បាប់ស្តីពីការវិនិយោគ》នៃព្រះរាជាណាចក្រកម្ពុជា គម្រោងរបស់ក្រុមហ៊ុន ZO MOTORS ត្រូវបានចាត់ថ្នាក់ជាឧស្សាហកម្មបច្ចេកវិទ្យាខ្ពស់ "ក្រុមទី១"។ យោងតាមអនុក្រឹត្យលេខ ១៦១ សហគ្រាសដែលចូល រួមក្នុងការផលិតថាមពលកកើតឡើងវិញ និងយានយន្តថាមពលថ្មី អាចទទួលបានការលើកលែងពន្ធលើប្រាក់ចំណូលសហគ្រាសរហូតដល់ ៩ ឆ្នាំ ព្រមទាំងរួចពន្ធគយលើការនាំចូល ឧបករណ៍ផលិតកម្ម និងវត្ថុធាតុដើមថែមទៀតផង។ ភាគលាភនៃគោលនយោបាយនេះ បាននឹងកំពុងប្រែក្លាយដោយផ្ទាល់ទៅជាសមត្ថភាពក្នុងការប្រកួតប្រជែងទីផ្សារនៃផលិតផល៣. សូចនាករបច្ចេកទេស៖ ពី "ការប្រើប្រាស់ថាមពល" ទៅជា "ប្រសិទ្ធភាព"ស៊េរីរថយន្តដឹកទំនិញ ZM8 របស់ ZO MOTORS នឹងត្រូវសម្រេចបាននូវការស្វែងរកប្រសិទ្ធភាពថាមពលយ៉ាងខ្ពស់បំផុតផ្នែកបច្ចេកទេស។ ប្រព័ន្ធថ្មតង់ស្យុងខ្ពស់ ៩៦ kWh របស់វា អាចបើកបរបានចម្ងាយ ២៧០ គីឡូម៉ែត្រ ក្រោមលក្ខខណ្ឌស្តង់ដារ។ តាមរយៈប្រព័ន្ធប្រ មូលថាមពលមកវិញដ៏ទំនើប (Energy Recovery System) ប្រសិទ្ធភាពនៃការទាញយកថាមពលមកវិញក្នុងស្ថានភាពផ្លូវក្នុងទីក្រុងនឹងអាចបង្កើនចម្ងាយបើកបរបានប្រមាណ ១៥% ទៅ ២០%។ នេះមានន័យថា នៅចំកណ្តាលនៃរលកប្រែប្រួលតម្លៃប្រេងអន្តរជាតិ ZO MOTORS បានផ្តល់នូវ "កំពង់ផែសុវត្ថិភាព" ដែលអាចគ្រប់គ្រងថ្លៃចំណាយ និងមានឯក រាជ្យភាពថាមពល សម្រាប់ប្រតិបត្តិករភស្តុភារកម្មកម្ពុជា។

សម្តេចតេជោ ហ៊ុន សែន អនុញ្ញាតជូនឯកអគ្គរាជទូតដាណឺម៉ាកប្រចាំកម្ពុជា ចូលជួបសម្តែងការគួរសម និងពិភាក្សាការងារ

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា អនុញ្ញាតជូនឯកឧត្តម Danny Annan ឯកអគ្គរាជទូតនៃប្រទេសដាណឺម៉ាក់ ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ នាព្រឹកថ្ងៃទី១៦ ខែមីនា ឆ្នាំ២០២៦ នៅវិមានសាមគ្គីភាព រាជធានីភ្នំពេញ។

រដ្ឋមន្ត្រីការបរទេសកម្ពុជា-ប្រធានសភាអូស្ត្រាលីផ្លាស់ប្តូរទស្សនៈគ្នាទៅវិញទៅមកលើវឌ្ឍនភាពថ្មីៗ នៃស្ថានភាពព្រំដែនកម្ពុជា-ថៃ

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានអញ្ជើញចូលជួបសម្តែងការគួរសមចំពោះ ឯកឧត្តម Milton Dick ប្រធានរដ្ឋសភាអូស្ត្រាលី នៅព្រឹកថ្ងៃទី១៦ ខែមីនា ឆ្នាំ២០២៦។ឯកឧត្តមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម Milton Dick ក្នុងការអនុញ្ញាតអោយមានជំនួបសម្តែងការគួរសមនេះឡើង អំឡុងពេលនៃសប្តាហ៍សម្រាកពីសម័យប្រជុំរដ្ឋសភា (Non-sitting week) ដែលបានបង្ហាញឱ្យឃើញពីការផ្តល់សារៈសំខាន់ខ្ពស់របស់អូស្ត្រាលី ចំពោះទំនាក់ទំនងទ្វេភាគីជាមួយកម្ពុជា។ ក្នុងជំនួបនេះដែរ ឯកឧត្តមឧបនាយករដ្ឋមន្ត្រី បានសង្កត់ធ្ងន់លើតម្លៃនៃការធ្វើការទូតសភា ដែលជាគំនិតផ្តួចផ្តើមរបស់ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលជាយន្តការក្នុងការពង្រឹងទំនាក់ទំនងទ្វេភាគីដ៏យូរអង្វែងកម្ពុជា-អូស្ត្រាលី ឱ្យកាន់តែរឹងមាំបន្ថែមទៀត។ភាគីទាំងពីរ ក៏បានផ្លាស់ប្តូរទស្សនៈគ្នាទៅវិញទៅមកលើវឌ្ឍនភាពថ្មីៗនៃស្ថានភាពព្រំដែនកម្ពុជា-ថៃ ព្រមទាំងបញ្ហាតំបន់ និងអន្តរជាតិនានាដែលជាកង្វល់រួម។ បន្ទាប់ពីជំនួបពិភាក្សាប្រកបដោយផ្លែផ្កា ឯកឧត្តមឧបនាយករដ្ឋមន្ត្រី ក៏បានអញ្ជើញទស្សនាបរិវេណ នៃរដ្ឋសភាអូស្ត្រាលីផងដែរ។ ដោយ: វង្ស សុភាព

ឯកឧត្តម ហ៊ុន ម៉ានី អញ្ជើញប្រគល់រូបថតជូនកុមារតាមខ្នងផ្ទះ នៅឃុំជាំសង្កែ ស្រុកភ្នំស្រួច ខេត្តកំពង់ស្ពឺ

នាព្រឹកថ្ងៃទី១៥ ខែមីនា ឆ្នាំ២០២៦ ឯកឧត្តម ហ៊ុន ម៉ានី ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺបានអញ្ជើញប្រគល់រូបថតជូនកុមារតាមខ្នងផ្ទះ នៅឃុំជាំសង្កែ ស្រុកភ្នំស្រួច ខេត្តកំពង់ស្ពឺ។ ពិធីនេះ មានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រីក្រុមការងារចុះមូលដ្ឋានឃុំជាំសង្កែ គណៈកម្មាធិការគណបក្សឃុំជាំសង្កែ, គណៈសាខាបក្សភូមិ និងក្រុមចលនាភូមិទាំង៩ លោក លោកស្រី សមាជិក សមាជិកា ក្រុមការងារប៉ាម៉ានី នាយកសាលា និងលោកគ្រូ អ្នកគ្រូជាច្រើនរូប។ឯកឧត្តម ហ៊ុន ម៉ានី បានសម្តែងក្ដីសោមនស្សរីករាយ និងថ្លែងអំណរគុណចំពោះក្រុមការងារប៉ាម៉ានី លោកនាយកសាលាទាំង៣ លោកគ្រូ អ្នកគ្រូ អាជ្ញាធរឃុំ ភូមិ និងក្រុមការងារទាំងអស់ ជាពិសេសឯកឧត្តម លី ច័ន្ទតុលា និងលោកជំទាវ ឈីវ ភិរម្យ ដែលបានសម្របសម្រួលរៀបចំកម្មវិធីនេះឡើង។ បន្ទាប់ពីសំណេះសំណាលជាមួយក្រុមការងាររួចមកឯកឧត្តម ហ៊ុន ម៉ានី ក៏បានចុះផ្ទាល់ដល់ខ្នងផ្ទះ យករូបថតទៅប្រគល់ដល់ដៃកូនៗ និងឆ្លៀតឱកាសសួរសុខទុក្ខ លើកទឹកចិត្តកូនៗ ក៏ដូចជាផ្ដាំផ្ញើដល់ឪពុកម្តាយអាណាព្យាបាល ឱ្យខិតខំថែទាំកូនចៅ ជាពិសេសត្រូវយកចិត្តទុកដាក់តាមដានការសិក្សារបស់កូនៗ ដើម្បីអនាគតពួកគេ ក្លាយជាធនធានមានតម្លៃសម្រាប់ប្រទេសជាតិ។សូមជម្រាបថា កម្មវិធីប្រគល់-ទទួល និងចែករូបថតជូនកុមារ ត្រូវបានរៀបចំឡើងក្នុងគោលបំណងផ្តល់ជូនសិស្សានុសិស្សនៅតាមសាលាបឋមសិក្សាទូទាំងខេត្តកំពង់ស្ពឺ នូវអនុស្សាវរីយ៍ដ៏មានន័យនៃវ័យកុមារភាពរបស់ពួកគេ។ឯកឧត្តមរម្លេចដែរថា កម្មវិធីប៉ាម៉ានី បានកើតចេញដំបូងនៅអង្គការផ្ទះបាយកុមារ រាជធានីភ្នំពេញដែលជាកន្លែងបើកទ្វាទទួលកុមារអនាថា កុមារខ្វះជីវភាព ដែលទទួលបានអាហារ សម្លៀកបំពាក់ ការថែទាំព្យាបាល ការឧបត្ថម្ភជាអង្ករ ដែលអង្គការនោះប្រៀបបានដូចជាផ្ទះសម្បែងរបស់ក្មេង។ ឯកឧត្តមក៏បានទៅឧបត្ថម្ភជួយដល់កុមារនៅទីតាំងអង្គការនោះជាទៀតទាត់។ ដោយមាននិស្ស័យ កុមារនៅទីនោះក៏បានហៅ ឯកឧត្តមថា ប៉ាម៉ានី មកទល់បច្ចុប្បន្ន។ អត្ថបទ៖គឹមហុក

អ្នកនាំពាក្យ៖ រាជរដ្ឋាភិបាលកំពុងបំពេញបេសកកម្មការទូតយ៉ាងសកម្មដើម្បីការពារបូរណភាពទឹកដី និងប្រជាជនដែលរងការរំលោភបំពានពីកងកម្លាំងប្រដាប់អាវុធថៃ

អ្នកនាពាក្យរាជរដ្ឋាភិបាលកម្ពុជា បានបញ្ជាក់ជាថ្មីថា រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបាននិងកំពុងបំពេញបេសកកម្មការទូតយ៉ាងសកម្មនិងឥតឈប់ឈរ ទាំងក្នុងនិងក្រៅប្រទេស ដើម្បីការពារបូរណភាពទឹកដី និងប្រជាជនដែលរងការរំលោភបំពានពីកងកម្លាំងប្រដាប់អាវុធថៃ ក៏ដូចជាពង្រឹងស្មារតីសាមគ្គីជាតិឱ្យកាន់តែរឹងមាំក្នុងចំណោមប្រជាពលរដ្ឋខ្មែរនៅគ្រប់ទិសទី។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានបញ្ជាក់តាមរយៈសន្និសីទសារព័ត៌មាន នៅថ្ងៃទី១៥ ខែមីនា ឆ្នាំ២០២៦នេះថា ជាក់ស្តែង ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ កំពុងបន្តដំណើរទស្សនកិច្ចនៅប្រទេសអូស្ត្រាលី បន្ទាប់ពីបញ្ចប់ទស្សនកិច្ចផ្លូវការនៅប្រទេសសិង្ហបុរី និងនូវែលសេឡង់។ អ្នកនាំពាក្យបានឱ្យដឹងថា ក្នុងបេសកកម្មការទូតនេះ នៅសិង្ហបុរី និងនូវែលសេឡង់ ក្រៅពីរឹតចំណងការទូតទ្វេភាគីជាមួយរដ្ឋាភិបាលនីមួយៗ បញ្ហាសន្តិសុខ សន្តិភាព និងស្ថិរភាពក្នុងតំបន់ក៏ដូចជាក្នុងពិភពលោកដែលជាកង្វល់រួមគឺជាប្រធានបទដ៏សំខាន់នៃជំនួបពិភាក្សា ក្នុងនោះ ការវិវត្តថ្មីៗនៃស្ថានការណ៍តាមបណ្តាយព្រំដែនកម្ពុជា-ថៃ ត្រូវបានប្រមុខការទូតកម្ពុជាលើកយកមកពិភាក្សាយ៉ាងស៊ីជម្រៅ។ ឯកឧត្តម ឧបនាយករដ្ឋមន្ត្រី ប្រាក់ សុខុន ក៏បានថ្លែងអំណរគុណប្រទេសជាមិត្តចំពោះការគាំទ្រដល់កម្ពុជាក្នុងការដោះស្រាយជម្លោះដោយសន្តិវិធី ដើម្បីធានាសន្តិភាពយូរអង្វែងតាមបណ្តោយព្រំដែន។ ឯកឧត្តមឧបនាយករដ្ឋមន្ត្រី ប្រាក់ សុខុន ក៏បានអញ្ជើញជួបសំណេះសំណាលជាមួយសហគមន៍ខ្មែរ និងនិស្សិតកម្ពុជាដែលកំពុងរស់នៅ និងសិក្សានៅក្នុងប្រទេសនូវែលសេឡង់ និងអូស្ត្រាលី ដោយបានពាំនាំនូវការសួរសុខទុក្ខពីសំណាក់ព្រះករុណាព្រះមហាក្សត្រ ពីសម្តេចតេជោ ហ៊ុន សែន ប្រធានព្រឹទ្ធសភា និងពីសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាជូនចំពោះសហគមន៍ខ្មែរនៅក្រៅប្រទេសផងដែរ។ ការណ៍នេះបានឆ្លុះបញ្ចាំងឱ្យឃើញពីស្មារតីយកចិត្តទុកដាក់និងក្តីកង្វល់របស់រាជរដ្ឋាភិបាល ក៏ដូចជាថ្នាក់ដឹកនាំ ចំពោះប្រជាពលរដ្ឋខ្មែរពោលគឺ ទាំងអង្គព្រះមហាក្សត្រ ទាំងថ្នាក់ដឹកនាំ មិនដែលបោះបង់បងប្អូនជនរួមជាតិណាម្នាក់ឡើយ ទោះបីជាបងប្អូនរស់នៅទីណាក៏ដោយក្រោមស្មារតីថា ប្រជាជនកម្ពុជាគ្រប់រូបគឺជាផ្នែកមួយនៃមហាគ្រួសារខ្មែរ។ឯកឧត្តមឧបនាយករដ្ឋមន្ត្រី ប្រាក់ សុខុន ក៏បានជម្រាបជូនពួកគេអំពីអាទិភាពខ្ពស់បំផុតរបស់រាជរដ្ឋាភិបាលក្នុងការការពារបូរណភាពទឹកដី តាមគ្រប់មធ្យោបាយទាំងអស់ រួមមាន មធ្យោបាយការទូត នយោបាយ សាធារណមតិ និងផ្លូវច្បាប់ ដែលជាមធ្យោបាយសន្តិវិធី ស្របតាមអនុសញ្ញា សន្ធិសញ្ញានិងច្បាប់អន្តរជាតិ ព្រមទាំងកិច្ចព្រមព្រៀងដែលមានស្រាប់ ដោយមិនភ្លេចការត្រៀមខ្លួនផ្នែកយោធាដើម្បីប្រើសិទ្ធិការពារខ្លួន។ ប្រមុខការទូតកម្ពុជាក៏បានថ្លែងអំណរគុណចំពោះប្រជាពលរដ្ឋខ្មែរនៅក្រៅប្រទេសដែលបានលើកទឹកចិត្តនិងគាំទ្រយ៉ាងមុតមាំចំពោះវីរកងទ័ពជួរមុខដ៏អង់អាចក្លាហានរបស់យើង។នៅឯក្នុងប្រទេសវិញ រាជរដ្ឋាភិបាលបានយកចិត្តទុកដាក់និងតាមដានរាល់សកម្មភាពរបស់កងកម្លាំងប្រដាប់អាវុធថៃ និងបានតវ៉ាភ្លាមៗចំពោះរាល់សកម្មភាពរំលោភបំពានមកលើដែនអធិបតេយ្យភាព និងបូរណភាពទឹកដីកម្ពុជា។ ជាក់ស្តែង កាលពីថ្ងៃទី១៣ ខែមីនា ឆ្នាំ ២០២៦ ការតវ៉ាជាផ្លូវការត្រូវបានធ្វើម្តងទៀតទៅកាន់ភាគីថៃដោយប្រឆាំងជំទាស់យ៉ាងដាច់ខាតចំពោះសកម្មភាពសាងសង់សំណង់នានាដែលមានលក្ខណៈជាការពង្រឹងទីតាំងយោធានិងស៊ីវិល នៅក្នុងទីតាំងដែលខ្លួនបានដណ្តើមកាន់កាប់ដោយខុសច្បាប់តាមរយៈការប្រើកម្លាំងយោធា ហើយទាមទារឱ្យភាគីថៃបញ្ឈប់ជាបន្ទាន់នូវសកម្មភាពទាំងអស់ខាងលើ និងងាកមកគោរពឱ្យបានពេញលេញនូវសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀត។ អ្នកនាំពាក្យរាជរដ្ឋាភិបាលសូមបញ្ជាក់ជូនបងប្អូនជនរួមជាតិជា្របថា រាជរដ្ឋាភិបាល និងថ្នាក់ដឹកនាំដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់ខ្ពស់បំផុតចំពោះការការពារបូរណភាពទឹកដី និងចំពោះសុខទុក្ខប្រជាពលរដ្ឋខ្មែរគ្រប់ទិសទី។ នៅក្នុងប្រទេស បងប្អូនជនភៀសសឹកគឺជាអាទិភាពដែលរាជរដ្ឋាភិបាលយកចិត្តទុកដាក់ដោះស្រាយបញ្ហាគ្រប់បែបយ៉ាងដើម្បីជួយសម្រួលដល់ជីវភាព និងការរស់នៅរបស់ពួកគេ ទាំងបងប្អូនជនភៀសសឹកដែលបានវិលត្រឡប់ទៅកាន់ផ្ទះសម្បែងវិញ ទាំងអ្នកដែលមិនទាន់អាចវិលត្រឡប់ទៅវិញបាននៅឡើយ។នៅក្រៅប្រទេស ប្រជាពលរដ្ឋនិងនិស្សិតខ្មែរនៅក្នុងបណ្តាប្រទេសមជ្ឈឹមបូព៌ាក៏ទទួលបានការយលចិត្តទុកដាក់យ៉ាងខ្លាំងអំពីសុខសុវត្ថិភាពរបស់ពួកគេ ខណៈដែលជនជាតិខ្មែរនៅក្នុងបណ្តាប្រទេសផ្សេងទៀតក៏មិនត្រូវបានបំភ្លេចនោះឡើយ។ ទាំងអស់នេះសបញ្ជាក់ពីការគិតគូរគ្រប់ជ្រុងជ្រោយរបស់រាជរដ្ឋាភិបាល ក៏ដូចជាការបញ្ចេញសកម្មភាពជាក់ស្តែង តាមគ្រប់រូបភាព ទាំងក្នុងនិងក្រៅប្រទេស ដើម្បីការពារបូរណភាពទឹកដី និងការពារសុខសុវត្ថិភាពប្រជាជន ដែលជាអាទិភាពខ្ពស់បំផុតរបស់រាជរដ្ឋាភិបាល។ អ្នកនាំពាក្យរាជរដ្ឋាភិបាលបញ្ជាក់ជាថ្មីថា ក្នុងស្មារតីស្រឡាញ់សន្តិភាពនិងគោរពច្បាប់អន្តរជាតិ កម្ពុជាគោរពយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀត។ កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

ពលរដ្ឋត្រឡប់មកពីថៃជាច្រើនមកចុះឈ្មោះស្វែងរកការងារធ្វើក្នុងឱកាសពិព័រការងារនៅបន្ទាយមានជ័យ

ប្រជាពលរដ្ឋ ជាពិសេសពលរដ្ឋដែលត្រឡប់មកពីធ្វើពលករនៅប្រទេសថៃ នៅតាមបណ្តាលភូមិសង្កាត់ ក្នុងមូលដ្ឋានស្រុកអូរជ្រៅខេត្តបន្ទាយមានជ័យ បាននាំគ្នាមកចុះឈ្មោះដោយផ្ទាល់ជាមួយក្រុមហ៊ុន ដើម្បីជ្រើសរើសជំនាញការងារធ្វើដែលខ្លួនពេញចិត្ត ក្នុងឱកាសពិព័រការងារសន្តិសុខសង្គមបណ្តុះបណ្តាលវិជ្ជាជីវៈ ដែលពិធីនេះបានប្រារព្ធធ្វើឡើងនៅទីតាំងបរិវេណសាលាស្រុកអូរជ្រៅ ខេត្តបន្ទាយមានជ័យ នៅថ្ងៃទី១៤ ខែមីនា ឆ្នាំ២០២៦នេះ។ប្រជាពលរដ្ឋដែលជាពលករមកពីប្រទេសថៃ បានបង្ហាញការត្រេកអរសប្បាយរីករាយ និងគាំទ្រយ៉ាងខ្លាំងខណៈដែលពួកគាត់វិលត្រឡប់មកស្រុកកំណើតវិញ ហើយទទួលបានការយកចិត្តទុកដាក់ពីអាជ្ញាធរខេត្ត និងរាជរដ្ឋាភិបាល ជាពិសេសក្រសួងការងារ និងបណ្ដុះបណ្ដាលវិជ្ជាជីវៈ ដែលបាននាំយកឱកាសការងារ មកដល់ជូនដល់ពួកគាត់នៅមូលដ្ឋានដោយផ្ទាល់តែម្ដងគ្រប់ៗគ្នាទៅតាមជំនាញដែលខ្លួនពេញចិត្ត។ប្រជាពលរដ្ឋដែលត្រឡប់មកពីធ្វើពលករនៅថៃ ហើយបានមកចូលរួមក្នុងវិទិកាការងារនេះ បានលើកឡើងថា ពួកគាត់ក៏ដូចជាបងប្អូនប្រជាពលរដ្ឋផ្សេងៗទៀត គឺមិនចង់ត្រឡប់ទៅធ្វើការនៅឯប្រទេសថៃវិញទេ ដោយសារការងារនៅប្រទេសថៃ មានការលំបាក ហើយត្រូវឃ្លាតឆ្ងាញពីក្រុមគ្រួសារថែមទៀត។សូមជម្រាបថា រោងចក្រ សហគ្រាស និងក្រុមហ៊ុនធំៗចំនួន ៤ បានចូលរួមសម្ភាសជ្រើសរើសបុគ្គលិកភ្លាមៗដោយផ្ទាល់ នៅក្នុងវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅព្រឹកថ្ងៃសៅរ៍ ទី១៤ ខែមីនា ឆ្នាំ២០២៦ នៅក្នុងបរិវេណសាលាស្រុកអូរជ្រៅ ក្នុងខេត្តបន្ទាយមានជ័យ។ តម្រូវការការងារចំនួនប្រមាណ១ ០០០កន្លែង ត្រូវបាននាំយកមកបង្ហាញជូនដល់អ្នកកំពុងស្វែងរកការងារធ្វើ តាមរយៈវេទិកាការងារដែលរៀបចំឡើងរៀងរាល់សប្តាហ៍នៅតាមមូលដ្ឋានស្រុក ខេត្តគោលដៅនានា ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ»។ក្នុងឱកាសអញ្ជើញជាអធិបតីក្នុងវេទិកានេះ ឯកឧត្តម ប៉ុក ប៉ាន់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ក្រសួងការងារ និងបណ្ដុះបណ្ដាលវិជ្ជាជីវៈ បានប្រមូលផ្តុំព័ត៌មានការងារដ៏សម្បូណ៌បែបសម្រាប់បងប្អូន និងកំពុងតែរៀបចំព្រឹត្តិការណ៍ដ៏មានសារៈសំខាន់នេះជារៀងរាល់ចុងសប្តាហ៍ដល់មូលដ្ឋាន ជាពិសេសនៅតាមខេត្តជាប់ព្រំដែនកម្ពុជា-ថៃ ដើម្បីធ្វើការផ្សព្វផ្សាយ។ ជាក់ស្តែងតាមរយៈវេទិកាការងារនេះ មានរោងចក្រ និងក្រុមហ៊ុនធំៗចំនួន ៤បានមកផ្តល់ឱកាសការងារប្រមាណ ១០០០កន្លែង ដែលបងប្អូនអាចចុះឈ្មោះ និងសម្ភាសទទួលបានការងារភ្លាមៗ ជាពិសេសអតីតពលករត្រឡប់ពីប្រទេសថៃ និងយុវជនរកការងារ។

បណ្ដាញសង្គម

ព័ត៌មានថ្មីៗ

អេស្តូនីនឹងមិនឃាត់នាវារុស្ស៊ីនៅក្នុងសមុទ្របាល់ទិក ដោយសារតែហានិភ័យនៃការកើនឡើងភាពតានតឹង

ប្រជាជនលីបង់នៅទីក្រុងបេរូត បង្ហាញពីភាពមិនប្រាកដប្រជា មុនពេលមានការចរចាជាមួយអ៊ីស្រាអែល

កូរ៉េខាងជើងដាក់តាំងបង្ហាញស្ករគ្រាប់រាងដូចមីស៊ីល និងរថក្រោះ នៅក្នុងពិធីតាំងពិព័រណ៍

ក្រុមអ្នកជួយសង្គ្រោះ កំពុងស្វែងរកមនុស្សបាត់ខ្លួន បន្ទាប់ពីទូកទេសចរណ៍លិចនៅភាគខាងជើងឥណ្ឌា

លីប៊ីចុះហត្ថលេខាលើថវិការដ្ឋបង្រួបបង្រួមលើកដំបូង ក្នុងរយៈពេលជាង ១ ទសវត្សរ៍

តាមបណ្តាសាកលវិទ្យាល័យ រៀបចំលេងល្បែងប្រជាប្រិយមុនថ្ងៃចូលឆ្នាំថ្មី និងលើកតម្កើងអត្តសញ្ញាណវប្បធម៌ខ្មែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877