BTV NEWS

ឯកឧត្តមសាស្ត្រាចារ្យ ឈាង រ៉ា បន្តធ្វើបាឋកថាលើភាពជាអ្នកដឹកនាំស្តីពីវិធីសាស្រ្តនៃការគិតពិចារណា “សម្ភារៈនិយមវិចារវិទ្យាបែបវិទ្យាសាស្រ្ត”

រាជរដ្ឋាភិបាលបាននិងកំពុងយកចិត្តទុកដាក់អភិវឌ្ឍន៍ផ្លូវនៅតាមជនបទ ដើម្បីជីវភាពរស់នៅរបស់ប្រជាជន

នាយកប្រចាំតំបន់អាស៊ីនៃក្រុមហ៊ុន The Report Company វាយតម្លៃខ្ពស់ ចំពោះការបន្តថែរក្សាបាននូវសន្តិភាព និងស្ថិរភាពយ៉ាងរឹងមាំនៅកម្ពុជា

ផ្លូវជនបទជាសរសៃឈាមជំរុញដល់ដំណើរអន្តរកម្មសេដ្ឋកិច្ចនៅមូលដ្ឋាន

ព័ត៌មានជាតិ

ការប្រឡងជ្រើសរើសគ្រូបង្រៀនបឋមសិក្សា លើកទី១ គ្រោងប្រព្រឹត្តិទៅ នៅខែកក្កដា ឆ្នាំ២០២៤

ក្រសួងមុខងារសាធារណៈ បានប្រកាសថា ការប្រឡងជ្រើសរើសគ្រូបឋមសិក្សា សម្រាំងយកបេក្ខជន លើកទី ១ នឹងប្រព្រឹត្តិទៅក្នុង ខែ កក្កដា ខាងមុខ។ ការប្រកាសនេះ ធ្វើឡើងក្រោយពេលមានការសិក្សា និងរៀបចំការងារបច្ចេកទេស ជាច្រើនដំណាក់កាលរួចមក។ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែងជ្រើសរើសមន្ត្រីរាជការ បានដឹកនាំកិច្ចប្រជុំអន្តរក្រសួង នារសៀលថ្ងៃទី២០ ខែមិថុនា ឆ្នាំ២០២៤ ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ព្រមទាំងថ្នាក់ដឹកនាំ និងមន្ត្រីជំនាញ នៃគណៈកម្មការរៀបចំការប្រឡងប្រជែងជ្រើសរើសគ្រូបង្រៀននៅបឋមសិក្សាជាច្រើនរូប។ឯកឧត្តមឧបនាយករដ្ឋមន្ត្រី បានលើកឡើងថា បេក្ខជនចំនួន ៤,០៤១នាក់ ឬស្មើរបីដងនៃចំនួនដែលត្រូវជ្រើសរើសជាប់ស្ថាពរចុងក្រោយ (១,៣៤៧នាក់) នឹងត្រូវបានជ្រើសរើស សម្រាប់ការប្រឡងលើកទី១។ ការប្រឡងលើកទី ១នេះ ជាការជ្រើសសម្រាំងបេក្ខជនចេញពីបេក្ខជនដែលមានសិទ្ធិប្រឡងចំនួនសរុប ៣៨,១៦៨នាក់ ។ តាមការគ្រោងទុក អង្គប្រជុំបានកំណត់កាលបរិច្ឆេទ សម្រាប់ការប្រឡងនៅថ្ងៃទី១៣-១៤ និងថ្ងៃទី២០-២១ ខែកក្កដា ឆ្នាំ២០២៤ តាមមណ្ឌលប្រឡងផ្សេងៗគ្នា។កិច្ចប្រជុំនេះ មានការធ្វើរបាយការណ៍ពីក្រុមការងារបច្ចេកទេស រួមជាមួយការពិភាក្សាលើទិដ្ឋភាពនានា ដើម្បីឱ្យការប្រឡង ប្រព្រឹត្តទៅកាន់តែល្អប្រសើរស្របតាមនិយាមដែលបានដាក់ចេញ និងស្របតាមគោលការណ៍ដែលធ្លាប់បានអនុវត្តកន្លងមក៕

អតីតយុទ្ធជនថ្លែងអំណរគុណដល់រាជរដ្ឋាភិបាលដែលតែងតម្លើងប្រាក់សោធននិវត្តន៍

អតីតយុទ្ធជន បានថ្លែងអំណរគុណដល់រាជរដ្ឋាភិបាលដែលតែងតម្លើងប្រាក់សោធននិវត្តន៍ និងយកចិត្តទុកដាក់ពីជីវភាពរស់នៅប្រចាំថ្ងៃរបស់ពួកគាត់។ក្នុងឱកាសទិវាអតីតយុទ្ធជនកម្ពុជាលើកទី១៧ នៅថ្ងៃទី២១ ខែមិថុនានេះ អតីតយុទ្ធជនទាំងកងទ័ព និងនគរបាល បានបង្ហាញពីការចូលរួមអបអរសាទរដល់ទិវាអតីតយុទ្ធជនកម្ពុជា ដែលតែងតែរៀបចំការអបអរ និងជួបជុំសំណេះសំណាលជារៀងរាល់ឆ្នាំ។ អតីតយុទ្ធជន លើកឡើងថា រយៈពេល១៧ឆ្នាំមកនេះ រាជរដ្ឋាភិបាលតាមរយៈក្រសួងពាក់ព័ន្ធ ជាពិសេសសមាគមអតីតយុទ្ធជនកម្ពុជា បានគិតគូរ និងយកចិត្តទុកដាក់ជាប់ជាប្រចាំអំពីជីវភាព និងការរស់នៅរបស់អតីតយុទ្ធជនគ្រប់រូប។ រយៈពេល១៧ឆ្នាំមកនេះអតីតយុទ្ធជន បានថ្លែងអំណរគុណដល់រាជរដ្ឋាភិបាល ជាពិសេសសម្តេចតេជោ ហ៊ុន សែន អតីតនាយករដ្ឋមន្រ្តី និងជាប្រធានសមាគមអតីតយុទ្ធជនកម្ពុជា ដែលបានជំរុញគោលការណ៍តម្លើងប្រាក់សោធននិវត្តន៍ដល់អតីតយុទ្ធជនឱ្យទទួលបានបៀរវត្សរ៍ច្រើនជាងមុន។ទន្ទឹមគ្នានោះ អតីតយុទ្ធជន ជឿជាក់ថា តាមរយៈការគិតគូរពីសុខទុក្ខរបស់អតីតយុទ្ធជន រាជរដ្ឋាភិបាល និងសមាគមអតីតយុទ្ធជនកម្ពុជា នឹងបន្តផ្តល់ដី និងផ្ទះដល់អតីតយុទ្ធជនជួបការលំបាកបន្ថែមទៀត ដើម្បីឱ្យពួកគាត់មានជីវភាពកាន់តែល្អប្រសើរ។សូមជម្រាបថា រាជរដ្ឋាភិបាលតាំងពីការដឹកនាំដោយសម្តេចតេជោ ហ៊ុន សែន អតីតនាយករដ្ឋមន្រ្តី និងបន្តមកសម្តេចធិបតី ហ៊ុន ម៉ាណែត នាយករដ្ឋមន្រ្តី តែងបានយកចិត្តទុកដាក់លើសុខុមាលភាព និងការលើកកម្ពស់តួនាទីរបស់អតីតយុទ្ធជន ដោយបានផ្តោតលើចំណុចអាទិភាពសំខាន់ចំនួន ៣គឺ ជីវិត, ជីវភាព និងកិត្តិយស៕ អត្ថបទ សេក ឧត្តម

ប្រជានេសាទខេត្តកំពង់ឆ្នាំង សំណូមពរមន្ត្រីជំនាញ បង្កើនការបង្ក្រាបបទល្មើស ខណៈពួកគាត់មើលឃើញថាទិន្នផលត្រីធ្លាក់ចុះកាលពីឆ្នាំមុន

កំពង់ឆ្នាំង៖ ប្រជានេសាទលក្ខណៈគ្រួសារក្នុងខេត្តកំពង់ឆ្នាំងនៅថ្ងៃទី២១ ខែមិថុនា ឆ្នាំ២០២៤នេះ បានសំណើរសុំដល់មន្ត្រីជំនាញ និងអាជ្ញាធរមានសមត្ថកិច្ចក្នុងខេត្ត ជួយបង្កើនការបង្រាបបទល្មើសគ្រប់ប្រភេទអោយច្រើនជាងឆ្នាំកន្លងទៅ ខណៈពួកគាត់បានសង្កេតឃើញថា ផលត្រីឆ្នាំ២០២៣ បានធ្លាក់ចុះ និងប្រឈមនឹងការផុតពូជត្រីមួយចំនួនទៀត ដោយសារតែបទល្មើសទាំងនោះ។ ប្រជានេសាទបានអោយដឹងថា៖ ការខិតខំបង្ក្រាបបទល្មើសនេសាទរបស់សមត្ថកិច្ចជំនាញ និងអាជ្ញាធរមានសមត្ថកិច្ចនាឆ្នាំកន្លងមក បានល្អហើយ ក៏ប៉ុន្តែពួកគាត់សុំអោយបង្កើនការបង្ក្រាបបទល្មើសទាំងនេះ និងអោយមានការដាក់ទោសទណ្ឌទៅលើក្រុមជនសង្ស័យក្នុងបទល្មើសនេសាទនេះផងដែរ ដើម្បីថែរក្សាពូជត្រីអោយនៅគង់វង្ស និងសំរាប់ប្រជានេសាទ បាននេសាទជាលក្ខណៈគ្រួសារ។ ដោយឡែកទាក់ទងនឹងព្រៃលិចទឹកជាជំរកសំរាប់ត្រីពងកូនវិញ សូមជួយយកចិត្តទុកដាក់អោយកាន់តែរឹងមាំជាងឆ្នាំកន្លងៗមក ស្របតាមអនុសាសន៍ដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីផង ព្រោះកន្លងមកមានជនសង្ស័យច្រើននាក់បានប្រើប្រាស់គ្រប់រូបភាព ដើម្បីបំផ្លាញព្រៃលិចទឹកនេះ ។ ការបំផ្លាញព្រៃលិចទឹកនាពេលកន្លងមក មានការទន្ទ្រានយកដី ការកាប់ព្រៃលិចទឹកដាក់សម្រាស់ ការក្រៀវព្រៃលិចទឹកអោយងាប់យកធ្វើអុសលក់ជាដើម ដែលទង្វើទាំងនេះ បានបំផ្លាញព្រៃលិចទឹកយ៉ាងច្រើនផងដែរ។ ចំណែកបទល្មើសឆក់វិញ ក៏បានបំផ្លាញមច្ឆាជាតិធំធេងផងដែរ និងជួយថែរក្សាតំបន់អភិរក្សកុំអោយមានអ្នកចូលមកនេសាទនៅក្នុង និងខាងក្រៅតំបន់ទាំងនោះ ។លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទ បានអោយដឹងថា៖ ជារៀងរាល់ឆ្នាំ មន្ទីរកសិកម្មដែលមានខ័ណ្ឌរដ្ឋបាលជលផលជាសមត្ថកិច្ចជំនាញនោះ បានខិតខំបង្ក្រាបបទល្មើសនេសាទគ្រប់ប្រភេទ និងបទល្មើសបំផ្លាញព្រៃលិចទឹកជាប្រចាំ និងបានបញ្ជូនជនសង្ស័យជាច្រើននាក់ទៅសាលាដំបូងខេត្តកំពង់ឆ្នាំងផងដែរ។ ទាក់ទងនឹងសំណូមពររបស់ប្រជានេសាទខាងលើ លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទ បានសន្យាថានឹងបង្កើនការបង្ក្រាប និងទប់ស្កាត់អោយបានល្អជាងឆ្នាំមុនៗតាមសំណូមពរប្រជានេសាទ ហើយក្នុងរដូវបិទនេសាទនេះ លោកថា មិនអោយមានបទល្មើសកើតឡើងឡើយ ៕ ដោយ ៖ កាំង ហុងវាស្នា

គណៈឃោសនាអប់រំគណបក្សខេត្តកំពង់ឆ្នាំង បើកវគ្គអប់រំនយោបាយរបស់គណបក្សកម្រិត១ ជំនាន់ទី១៣ ដល់សិក្ខាកាមជាង៣០០នាក់ក្នុងខេត្ត

កំពង់ឆ្នាំង៖ នាព្រឹកថ្ងៃទី២១ ខែមិថុនា ឆ្នាំ២០២៤ គណៈឃោសនាអប់រំគណបក្សខេត្តកំពង់ឆ្នាំង បានបើកវគ្គអប់រំនយោបាយរបស់គណបក្សកម្រិត១ ជំនាន់ទី១៣ ក្រោមអធិបតីភាពឯកឧត្តម ស៊ីវ រុន អនុគណៈកម្មាធិការគណៈបក្សខេត្តកំពង់ឆ្នាំង ឯកឧត្តម លោកជំទាវ រួមនិងសិក្ខាកាមប្រមាណជាង៣០០នាក់ ជាមន្ត្រីរបស់គណបក្សមកពីមន្ទីរអង្គភាពជុះវិញខេត្តផងដែរ ។ ឯកឧត្តម ស៊ីវ រុន បានសម្តែងនូវសេចក្តីសោមនស្សរីករាយក្រៃលែង ដោយបានចូលរួមជាអធិបតីក្នុងពិធីបើកវគ្គអប់រំនយោបាយរបស់គណបក្សជំនាន់ទី១៣ ស្របពេលដែលសភាពការណ៍ទូទៅរបស់ប្រទេសជាតិ កំពុងមានការវិវត្តន៍ដ៏ល្អក្នុងដំណើរឆ្ពោះទៅមុខលើមាគ៌ាសន្តិភាព ប្រជាធិបតេយ្យ និងអភិវឌ្ឍន៍ បន្ទាប់ពីគណបក្សប្រជាជនទទួលបានជោគជ័យយ៉ាងត្រចះត្រចង់ក្នុងការបោះឆ្នោតនាពេលកន្លងមក ។ ឯកឧត្តមបានពាំនាំការសួរសុខទុក្ខ និងជូនពរពីសំណាក់សម្តេចប្រធានគណបក្ស សម្តេចប្រធានកិត្តិយសគណបក្ស សម្តេចអនុប្រធានគណបក្ស និងថ្នាក់ដឹកនាំគណបក្សទាំងអស់ ជូនដល់សិក្ខាកាម ក៏ដូចមន្រ្តីបម្រើការងារក្នុងវគ្គអប់រំនយោបាយនេះ ដោយក្តីនឹករឭក និងស្រឡាញ់ដ៏ជ្រាលជ្រៅ ។ ការអប់រំនយោបាយដល់មន្រ្តីគណបក្ស គឺជាការងារដ៏មានសារៈសំខាន់មួយ ដែលគណបក្សតែងតែយកចិត្តទុកដាក់តាំងពីដើមរៀងមក ទាំងនៅក្នុងសម័យតស៊ូរំដោះជាតិ ក៏ដូចក្នុងពេលដែលគណបក្សបានកាន់អំណាចដឹកនាំប្រទេស ជាពិសេសការដឹកនាំក្នុងរបបប្រជាធិបតេយ្យ សេរីពហុបក្សបច្ចុប្បន្ននេះ ។ ការរៀបចំវគ្គអប់រំនយោបាយមានគោលបំណងលើកកម្ពស់សមត្ថភាព និងគុណធម៌របស់មន្រ្តីគណបក្ស ព្រមទាំងពង្រឹងការឯកភាពផ្ទៃក្នុងខ្ពស់អំពីទស្សនៈ គោលជំហរ និងសកម្មភាព ដើម្បីធានាជោគជ័យក្នុងការអនុវត្តកម្មវិធីនយោបាយ គោលការណ៍ គោលនយោបាយ និងសេចក្តីសម្រេចនានារបស់គណបក្ស ។ ព្រមជាមួយនេះ ការងារអប់រំនយោបាយក៏ជាថ្នាលដ៏សំខាន់មួយសម្រាប់បណ្តុះបណ្តាល និងបំពាក់បំប៉នកម្លាំងបន្តវេនរបស់គណបក្សផងដែរ ។ គប្បីចងចាំថា មន្រ្តី គឺជាស្ពានតភ្ជាប់រវាងគណបក្ស និងប្រជាជន ដូច្នេះស្ពាននេះត្រូវតែរឹងមាំ ទើបចំណងទាក់ទងរវាងគណបក្សជាមួយប្រជាជនអាចរឹងមាំបាន ។ឯកឧត្តមបានបន្តថា៖ វគ្គនេះ ទោះបីមានរយៈពេលខ្លីក៏ពិតមែន ប៉ុន្តែជាឱកាសមួយដ៏មានតម្លៃសម្រាប់សិក្ខាកាមគ្រប់ៗរូប ។ ព្រមជាមួយនេះ វគ្គអប់រំនយោបាយក៏ជាឱកាសដែលមន្រ្តីយើងមកពីមន្ទីរអង្គភាពនានា បានស្គាល់គ្នា បានផ្លាស់ប្តូរការយល់ដឹង និងបទពិសោធន៍ពីគ្នាទៅវិញទៅមក ព្រមទាំងរឹតចំណងសាមគ្គីភាពផ្ទៃក្នុងគណបក្សឲ្យកាន់តែរឹងមាំឡើងថែមទៀត ៕ ដោយ ៖ កាំង ហុងវាស្នា

សមាគមមិត្តតន្រ្តីករ រៀបចំសិក្ខាសាលាស្តីពីការស្រាវជ្រាវ និងរំឭករំលេចតន្ត្រីប្រពៃណីខ្មែរ ដែលពុំសូវមានប្រជាប្រិយភាពក្នុងស្រទាប់សាធារណជន

សមាគមមិត្តតន្រ្តីករ បានរៀបចំសិក្ខាសាលាស្តីពី «ការស្រាវជ្រាវ និងរំឭករំលេចតន្ត្រីប្រពៃណីខ្មែរដែលពុំសូវមានប្រជាប្រិយភាពក្នុងស្រទាប់សាធារណជន» នៅថ្ងៃទី២១ ខែមិថុនា ឆ្នាំ២០២៤ នេះ។សិក្ខាសាលាដ៏មានសារ:សំខាន់នេះ មានបទបង្ហាញចំនួន៤ ដូចខាងក្រោម: -បទបង្ហាញទី១៖ «បទភ្លេង និង ទំនុកច្រៀងគ្រឹម» ដោយលោក ឈឿន វាស្នា (នាយកដ្ឋានសិល្បៈទស្សនីយភាព) -បទបង្ហាញទី២៖ «វង់ភ្លេងពិណពាទ្យបុរាណ (មុនសម័យអង្គរ និងបច្ចុប្បន្ន)» ដោយលោក កែវ សុនន្ទកវី (សាកលវិទ្យាល័យភូមិន្ទវិចិត្រសិល្បៈ) -បទបង្ហាញទី៣៖ «សិក្សាស្រាវជ្រាវពីឧបករណ៍តន្ត្រីនៅលើជញ្ជាំងប្រាសាទបាយ័ន»ដោយលោក សួន សុភ័ក្ត្រ (រាជបណ្ឌិត្យសភាកម្ពុជា) និងបទបង្ហាញទី៤៖ «ការវិវត្ត ការអភិវឌ្ឍ ច្នៃប្រឌិតបង្កើតថ្មី៖ ឧបករណ៍ភ្លេងក្រពើ» ដោយលោក សក់ បុប្ផាវណ្ណ (រាជបណ្ឌិត្យសភាកម្ពុជា)។នាឱកាសនោះឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា ខ្មែរយើងមានភ័ព្វសំណាងនិងមោទនភាពខ្លាំងណាស់ ដែលជាប្រជាជនខ្មែរ និងរស់នៅក្នុងប្រទេសដែលមានវប្បធម៌អរិយធម៌ខ្ពង់ខ្ពស់ ជាពិសេសវប្បធម៌អរិយធម៌អង្គរដ៏រុងរឿង (ស.វ. ទី៩-១៥)។ វប្បធម៌អរិយធម៌ខ្មែរ ជាវប្បធម៌អរិយធម៌ស្នូលនៅក្នុងពិភពលោក ជាពិសេសនៅតំបន់អាស៊ីយើងនេះ។ «កម្ពុជាអច្ឆរិយ» «កម្ពុជា៖ ព្រះរាជាណាចក្រនៃវប្បធម៌» «វប្បធម៌ជាព្រលឹងរបស់ជាតិ» «វប្បធម៌រលំជាតិរលាយ វប្បធម៌ពណ្ណរាយជាតិថ្កើងថ្កាន» ជាទិសនិងពាក្យស្លោកឆ្លុះបញ្ចាំងពីអច្ឆរិយភាពវប្បធម៌ និងប្រទេសជាតិខ្មែរ។ សូមគិត និងស្រមៃមើល មនុស្សដែលមានតែខ្លួនប្រាណ តែគ្មានព្រលឹង។ តើមនុស្សនោះរស់របៀបណា? តាមការស្រាវជ្រាវ យើងឃើញថាវប្បធម៌ខ្មែរដ៏រុងរឿងនិងសម្បូណ៌បែប រួមមានទាំងទម្រង់សិល្បៈទស្សនីយភាពជាង២០ទម្រង់៖ តន្ត្រី ចម្រៀង កំណាព្យ របាំ និងល្ខោនជាច្រើនប្រភេទ។ យើងឃើញនៅពេលបច្ចុប្បន្ននេះ ទម្រង់សិល្បៈមួយចំនួន បានមានការបាត់បង់ទាំងស្រុង។ ខ្លះទៀត ដោយការខិតខំប្រឹងប្រែងរបស់សិល្បករសិល្បការិនីយើង បានរស់រៀនមានជីវិតឡើងវិញ តែក៏នៅមានកម្រិត ដូចជាល្ខោនអាប៉េ ល្ខោនប្រាមោជ្ជទ័យ ល្ខោនពោលស្រី ល្ខោនស្បែកពណ៌ ជាដើម។ចំណែកឯកឧត្តមបណ្ឌិត យន់ ខៀន អនុរដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានសមាគមមិត្តតន្រី្តករ បានលើកឡើងថា ភ្លេងបុរាណខ្មែរយើង អភ័ព្វបន្តិចត្រង់ថា អត់មានប្រជាប្រិយភាព។ ដូច្នេះការពេញនិយម ត្រូវបានកាត់បន្ថយ ដោយឡែកភ្លេងសម័យមានការពេញនិយមច្រើន។ជាចុងក្រោយឯកឧត្តម ហាប់ ទូច បានបញ្ជាក់ថា ព្រឹត្តិការណ៍សិក្ខាសាលា គឺដើម្បីលើកកម្ពស់ការយល់ដឹង ភាពសុខដុមរមនា សន្តិភាព និងមនុស្សជាតិ។ ឯកឧត្តម មានទំនុកចិត្តនិងជឿជាក់ថា កម្មវិធីនេះនឹងអនុញ្ញាតឱ្យយើងកសាង និងអភិវឌ្ឍ យុវជនជំនាន់ក្រោយ ព្រមទាំងការស្រឡាញ់នៃវប្បធម៌របស់ពួកគេ ស្របតាមគោលនយោបាយវប្បធម៌៖ អភិរក្ស ថែរក្សា ច្នៃប្រឌិត នវានុវត្តន៍ ទំនើបកម្ម អភិវឌ្ឃន៍ និងបង្កើតថ្មី៕ អត្ថបទ រដ្ឋា

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

កិច្ចពិគ្រោះយោបល់វាងកម្ពុជា-អាល្លឺម៉ង់ ជាវេទិកាដ៏មានសារៈសំខាន់ក្នុងការតាមដានវឌ្ឍនភាព នៃកិច្ចសហប្រតិបត្តិការ និងក៏ជាការរួមចំណែកគាំទ្រដល់កម្ពុជាស្របពេលដែលកម្ពុជាកំពុងត្រៀមខ្លួនធ្វើការចាកចេញពីឋានៈជាប្រទេសអភិវឌ្ឍន៍តិចតួច (LDC) ក្លាយជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០។ ឯកឧត្តម ឈៀង យ៉ាណារ៉ា ទេសរដ្ឋមន្ត្រី ទទួលបន្ទុកបេសកម្មពិសេស និងជាអនុប្រធានទី២ ក្រុមប្រឹក្សាអភិវឌ្ឍកម្ពុជា បានដឹកនាំកិច្ចពិគ្រោះយោបល់ស្ដីពីកិច្ចសហប្រតិបត្តិការអភិវឌ្ឍន៍ឆ្នាំ ២០២៤ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋ សហព័ន្ធអាល្លឺម៉ង់ នៅថ្ងៃទី ២០ ខែ មិថុនា ឆ្នាំ២០២៤, នេះជាកិច្ចប្រជុំទ្វេភាគីលើកទី ១៦ ដែលត្រូវបានចាត់ទុកជាវេទិកាដ៏សំខាន់ ក្នុងការបន្តពង្រឹង និងពង្រីកកិច្ចសហប្រតិបត្តិការអភិវឌ្ឍន៍ និងភាពជាដៃគូរវាងរដ្ឋាភិបាលទាំងពី។ គោលដៅចម្បងនៃកិច្ចពិគ្រោះ យោបល់នេះ គឺដើម្បីពិនិត្យ និងពិភាក្សាលើវឌ្ឍនភាព និងបញ្ហាប្រឈមនានា ក្នុងការអនុវត្តគម្រោង ដែលផ្ដល់ហិរញ្ញប្បទានដោយ រដ្ឋាភិបាលអាល្លឺម៉ង់ និងលើកសំណើគម្រោងថ្មី និងគម្រោងដែលត្រូវអនុវត្តបន្ត សម្រាប់រដ្ឋាភិបាលអាល្លឺម៉ង់ពិចារណា និងអនុម័ត ក្នុងកិច្ចចរចាទ្វេភាគី ស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២៥ ។ជាមួយគ្នានេះ កិច្ចពិគ្រោះយោបល់នេះ គឺជាវេទិកាដ៏មានសារៈសំខាន់ ក្នុងការតាមដានវឌ្ឍនភាពនៃកិច្ចសហប្រតិបត្តិការ រវាងកម្ពុជានិងអាល្លឺម៉ង់ ស្របពេលដែលកម្ពុជាកំពុងត្រៀមខ្លួនធ្វើការចាកចេញពីឋានៈជាប្រទេសអភិវឌ្ឍន៍តិចតួច (LDC) តាមរយៈកិច្ចខិតខំប្រឹងប្រែងសហការរវាងក្រសួង/ស្ថាប័នរបស់រាជរដ្ឋាភិបាល និងដៃគូអភិវឌ្ឍន៍ ពិសេសដៃគូអាល្លឺម៉ង់ ដែលបានដើរតួនាទីយ៉ាងសំខាន់ ក្នុងការរួមចំណែកគាំទ្រកម្ពុជាក្នុងការចាកចេញដោយរលូន និង ស្របពេលដែលក្រុមប្រឹក្សាអភិវឌ្ឍន៍កម្ពុជាបានរៀបចំយុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូឆ្នាំ២០២៤-២០២៨ ដើម្បីធានាថាហិរញ្ញប្បទានសហប្រតិបត្តិការ ត្រូវបាន ប្រើប្រាស់ឱ្យមានប្រសិទ្ធភាពជាអតិបរមា ខណៈពេលដែលភាពជាដៃគូ, ភាពជាម្ចាស់ និងភាពជាអ្នកដឹកនាំរបស់រាជរដ្ឋាភិបាលត្រូវបានពង្រឹងក្នុងកិច្ចលើកកម្ពស់កិច្ចអភិវឌ្ឍន៍។បន្ថែមលើនេះភាគីទាំងពីរបានវាយតម្លៃខ្ពស់ ចំពោះសមិទ្ធផលដែលសម្រេចបានក្នុងកិច្ចសហប្រតិបត្តិការទ្វេភាគី ហើយ សមិទ្ធផលទាំងនោះ គឺពិតជាបានរួមចំណែកក្នុងការកាត់បន្ថយផលប៉ះពាល់ដល់សង្គម សេដ្ឋកិច្ច ពីជំងឺកូវីដ-១៩ និងលើកកម្ពស់ កំណើនសេដ្ឋកិច្ចនៅកម្ពុជា ដើម្បីសម្រេចក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានចំណូល ខ្ពស់នៅឆ្នាំ២០៥០៕ អត្ថបទ៖ សុន រ៉ាឌី

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

បណ្តាក្រុមហ៊ុនការីទេសចរណ៍កម្ពុជា បានបង្ហាញប្តេជ្ញាចិត្ត ខិតខំផ្សព្វផ្សាយគោលដៅទេសចរក្នុងស្រុក និងក្រៅស្រុក រៀបចំកញ្ចប់ទេសចរលក់ក្នុងតម្លៃសមរម្យ ដើម្បីជំរុញកំណើនចលនាលំហូរទេសចរជាតិ អន្តរជាតិបន្ថែមទៀត។នៅក្នុងដំណើរទស្សនៈកិច្ចសិក្សាស្វែងយល់ពីវិស័យទេសចរណ៍នៅខេត្តហៃណានប្រទេសចិន បណ្តាក្រុមហ៊ុនការីទេសចរណ៍នៅកម្ពុជា បានថ្លែងប្រាប់ BTV នៅថ្ងៃទី២១ ខែមិថុនានេះថា ដោយមានកិច្ចសហការគ្នាល្អរវាងបណ្តាអាជីវកម្មទេសចរណ៍ រមណីយដ្ឋានទេសចរណ៍ សណ្ឋាគារ ភោជនីយដ្ឋាន និងបណ្តាក្រុមហ៊ុនអាកាសចរណ៍ នៅក្នុងស្រុក និងក្រៅស្រុក បញ្ចុះតម្លៃសេវាកម្មខ្លួនជូនដល់បណ្តាការីទេសចរណ៍កម្ពុជា គឺបានជំរុញបណ្តាក្រុមហ៊ុនការីទេសចរណ៍ ច្នៃប្រឌិត និងរៀបចំកញ្ចប់ទេសចរណ៍លក់ក្នុងតម្លៃសមរម្យ ដើម្បីជំរុញទាក់ទាញភ្ញៀវទេសចរជាតិ អន្តរជាតិកក់ទិញកញ្ចប់ទេសចរណ៍ដើរកម្សាន្តនៅក្នុងប្រទេស និងចេញទៅក្រៅប្រទេស។ទន្ទឹមនឹងការផ្សព្វផ្សាយលក់កញ្ចប់ខែ្សទស្សនៈកិច្ចនេះដែរ បណ្តាការីទេសចរណ៍ ក៏បានរួមគ្នាផ្សព្វផ្សាយគោលដៅទេសចរណ៍ប្រណិតៗ ជំរុញការផ្តល់សេវាល្អប្រកបផាសុកភាព សុវត្ថិភាព ផ្តល់ចំណេះដឹងល្អៗផ្នែកខាងទំនៀមទំលាប់ ជំនឿ សាសនា ការរស់នៅ ការអភិវឌ្ឍ និងការរីកចំរើន នៅក្នុងសង្គមជាតិ អន្តរជាតិបច្ចុប្បន្ន។សូមបញ្ជាក់ថា តាមរបាយការណ៍ក្រសួងទេសចរណ៍រយៈពេល៤ខែ ចាប់ពីខែមករា ដល់ខែមេសា ឆ្នាំ២០២៤ ពលរដ្ឋខ្មែរបានចេញទេសចរនៅក្រៅប្រទេសប្រមាណជាង៥៨ម៉ឺននាក់។ ដោយឡែកទេសចរអន្តរជាតិមកចូលទស្សនាប្រទេសកម្ពុជាប្រមាណជាង ២លាននាក់។ នៅក្នុងតួលេខកំណើនកំណើនលំហូរទេសចរណ៍នេះ គឺមានភ្ញៀវទេសចរជាតិ និងភ្ញៀវអន្តរជាតិមួយចំនួនធំបានទិញកញ្ចប់ទេសចរណ៍ពីកម្ពុជា ចេញទៅទស្សនានៅក្រៅប្រទេស ហើយក៏មានភ្ញៀវទេសចរអន្តរជាតិជាច្រើន បានកក់ទិញកញ្ចប់ទេសចរណ៍ត្រៀមមកទស្សនាកម្ពុជានៅក្នុងអំឡុងខែតុលានេះរហូតដល់ខែមេសាឆ្នាំ២០២៥ ដែលរដូវ High Season៕ អត្ថបទ ស៊ុម សុខជា

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

ក្រសួងពាណិជ្ជកម្មកកម្ពុជា បានប្រគល់លិខិតជូនដល់សហគ្រិនកម្ពុជាមានពិការភាពចំនួន ២០នាក់ ចំពោះការដាក់ពាក្យស្នើសុំចុះបញ្ជីម៉ាក ដែលមានសុពុលភាពរយៈពេល១០ឆ្នាំ ដោយមិនគិតថ្លៃ តាមរយៈគម្រោងពាណិជ្ជកម្មតំបន់សម្រាប់ការអភិវឌ្ឍ ដើម្បីលើកកម្ពស់ការយល់ដឹងពាក់ព័ន្ធនឹងម៉ាកពាណិជ្ជកម្ម និងដើម្បីពង្រឹងអាជីវកម្មឱ្យរីកចម្រើនបន្តទៀត។លោក អាឌ្រៀន ហ្គីលប៊ឺត (Adrian Gilbert) នាយកគម្រោងពាណិជ្ជកម្មតំបន់សម្រាប់ការអភិវឌ្ឍ (RT4D) ក្នុងពិធីបិទ“ការអនុវត្តគម្រោង RT4D ដោយផ្តោតលើកំណើនប្រកបដោយបរិយាបន្ន៖ ការលើកកម្ពស់សហគ្រិនកម្ពុជាដែលមានពិការភាពតាមរយៈការអប់រំកម្មសិទ្ធិបញ្ញា និងការកសាងកេរ្តិ៍ឈ្មោះម៉ាកសម្រាប់ពាណិជ្ជកម្ម” នារសៀលថ្ងៃទី២០ មិថុនា ឆ្នាំ២០២៤កន្លងទៅ បានឲ្យដឹងថា នេះជាគម្រោងទី១ ដែល RT4D បានចូលរួមអនុវត្តជាមួយក្រសួងពាណិជ្ជកម្ម ដើម្បីជួយដល់សហគ្រិនមានពិការភាពនៅកម្ពុជា។ លោកបន្តថា គម្រោងនេះ គឺជាការប្តេជ្ញាចិត្តរបស់ RT4D ក្នុងការគាំទ្រកម្ពុជា ដើម្បីអនុវត្តឱ្យបានពេញលេញនូវកិច្ចព្រមព្រៀងសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP) ដោយបានផ្តោតការយកចិត្តទុកដាក់លើវិស័យកម្មសិទ្ធិបញ្ញា។ គម្រោងនេះដែរ នឹងជួយពង្រីកឱកាសផ្នែកសេដ្ឋកិច្ច ជំរុញឱ្យមានការឱ្យតម្លៃនិងបរិយាបន្ន និងផ្តល់សិទ្ធិអំណាចដល់បុគ្គលដែលជាសហគ្រិនមានពិការភាពឱ្យទទួលបានភាពរីកចម្រើន និងអាចចូលរួមចំណែកដល់សង្គមជាតិបាន។ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ការចូលរួមអនុវត្តគម្រោងនេះ គឺឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល ក្នុងការចូលរួមលើកកម្ពស់ចំណេះដឹង និងបង្កើនភាពប្រកួតប្រជែងរបស់សហគ្រិនកម្ពុជា។ ឯកឧត្តម បានបន្តថា ដូចដឹងហើយថា ក្រសួងពាណិជ្ជកម្ម ក្នុងនាមជាសេនាធិការឱ្យរាជរដ្ឋាភិបាលកម្ពុជា បានខិតខំប្រឹងប្រែងយ៉ាងខ្លាំងក្នុងការចរចាបើកច្រកទីផ្សារថ្មីៗ ដើម្បីអាចនាំចេញទំនិញរបស់កម្ពុជាឱ្យបានកាន់តែទូលាយ ព្រមជាមួយការចរចាកិច្ចព្រមព្រៀងពាណិជ្ជកម្មសេរីថ្មីៗបន្ថែមទៀត ដែលនឹងជំរុញឱ្យកម្ពុជាមានកាលានុវត្តភាពខ្ពស់ក្នុងការនាំចេញទំនិញកាន់តែច្រើនទៅតាមគោលដៅនៃឯកទេសនីយកម្ម នៃទំនិញដែលកម្ពុជាផលិតបានទៅកាន់ទីផ្សារទាំងអស់នោះ។អ្នកស្រី ឆា ស្រីនាង ម្ចាស់អាជីវកម្មផ្នែកម្ហូបអាហារ នាងច្នៃ និងអ្នកស្រី ឃួន សុជាតា ម្ចាស់អាជីវកម្មលក់កូនឈើ យីហោ ម៉ាក់តាតា ជាសហគ្រិនមានពិការភាពជើងដូចគ្នា បានឲ្យដឹងស្រដៀងគ្នាថា ពិតជាមានអារម្មណ៍ថា រំភើបចិត្ត និងសប្បាយរីករាយ ដែលទទួលបានការយកចិត្តពីសំណាក់រដ្ឋាភិបាលផង និងជាពិសេសគម្រោង RT4D ដែលធ្វើឲ្យពួកគាត់បានយល់ដឹងកាន់តែស៊ីជម្រៅពាក់ព័ន្ធនឹងកម្មសិទ្ធិបញ្ញា ទៅប្រកបអាជីវកម្មរបស់ខ្លួនដើម្បីអភិវឌ្ឍផលិតផល និងពង្រឹងការកសាងកេរ្តិ៍ឈ្មោះម៉ាកនៅក្នុងទីផ្សារឱ្យកាន់តែរឹងមាំបន្ថែមទៀត។គម្រោងពាណិជ្ជកម្មតំបន់សម្រាប់ការអភិវឌ្ឍ (RT4D) គឺជាបច្ច័យកើតចេញពីកិច្ចព្រមព្រៀងអាស៊ាន-អូស្ត្រាលី-នូវែលហ្សេឡង់ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលផ្តល់ការគាំទ្រផ្នែកពាណិជ្ជកម្ម និងវិនិយោគ សម្រាប់រដ្ឋជាសមាជិកអាស៊ាន តាមរយៈគម្រោង RT4D ។ ដោយឡែក សហគ្រិនមានពិការភាពដែលបានចូលរួមគម្រោងនេះ ទទួលបានការបណ្តុះបណ្តាលពីមន្ត្រីជំនាញរបស់នាយកដ្ឋានកម្មសិទ្ធិបញ្ញា និងវាគ្មិនជំនាញផ្សេងៗ លើប្រធានបទមួយចំនួនរួមមាន៖ មូលដ្ឋានគ្រឹះទស្សនទាននៃកម្មសិទ្ធិបញ្ញា, ការចែករំលែកអាជីវកម្មជោគជ័យ តាមរយៈការប្រើប្រាស់កម្មសិទ្ធិបញ្ញា, ការរស់នៅប្រសើរជាមួយនឹងពិការភាព, ការអភិវឌ្ឍផលិតផល, ទស្សនទាននៃការច្នៃនិម្មិតសញ្ញា, និងប្រសិទ្ធភាព នៃការវេចខ្ចប់ផលិតផលជាដើម៕ អត្ថបទ ឈិត បូរ៉ាវី

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ

ទូរថភ្លើង Kiha-183 ប្រភេទ DMU(Diesel Multiple Unit) ដែលទើបយកមកពីជប៉ុនចំនួន ៥គ្រឿងបន្ថែមទៀត និងទើបកែសម្រួលប្រព័ន្ធជើងក្រោម និងបច្ចេកទេសរួចរាល់ បានដាក់ឱ្យដំណើរការបើកធ្វើតេស្តសាកល្បងរត់ពីព្រះសីហនុ មកភ្នំពេញកាលពីថ្ងៃទី២០ ខែមិថុនា ឆ្នាំ២០២៤ ប្រកបដោយជោគជ័យ ។ នេះបើតាមឯកឧត្ដម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឱ្យដឹង។ ទូរថភ្លើងចំនួន ៥គ្រឿងថ្មីនេះ ត្រូវបានដាក់ឱ្យដំណើរការសាកល្បង នៅបន្ទាប់ពីទូរថភ្លើងដូចគ្នានេះចំនួន ៤គ្រឿង ត្រូវបានដាក់ឱ្យដំណើរការបើកធ្វើតេស្តសាកល្បងដោយជោគជ័យទាំងលើផ្លូវភាគខាងត្បូងភ្នំពេញ និងភាគខាងជើងភ្នំពេញកាលពីពេលថ្មីៗកន្លងមកនេះរួចមក។ឯកឧត្ដម ផន រឹម បានឱ្យដឹងបន្ថែមថា ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន បានចុះពិនិត្យ តាមដានដំណើរការបើកសាកល្បងនេះ បន្ទាប់ពីកែសម្រួលប្រ ព័ន្ធហ្វ្រ័ង និងទទឹងកង់ពីស្តង់ដាផ្លូវដែកជប៉ុន មកស្តង់ដាផ្លូវដែកនៅកម្ពុជារួចមក។ក្រុមការងារបច្ចេកទេសនាយកដ្ឋានផ្លូវដែកនៃក្រសួងសាធារណការ និងដឹកជញ្ជូន ព្រមទាំងក្រុមហ៊ុន Royal Railway Cambodia(RRC) ក៏បានពិនិត្យ និងសិក្សារួមគ្នាលើដំណើរការកង់, ប្រព័ន្ធហ្វ្រ័ង, ម៉ាស៊ី នត្រជាក់, ច្រកទ្វារសម្រាប់អ្នកដំណើរ, ច្រកទ្វារសុវត្ថិភាព, សម្ភារៈបរិក្ខារ និងការងារផ្សេងៗទៀត ដើ ម្បីប្រាកដថា មានសុវត្ថិភាពខ្ពស់សម្រាប់ដឹកជញ្ជូនអ្នកដំណើរ មុននឹងសម្រេចដាក់ឱ្យដំណើរការជាផ្លូវការនាពេលឆាប់ៗខាងមុខនេះ។នៅពេលដាក់ឱ្យដំណើរការជាផ្លូវការ Kiha-183 នឹងត្រូវដាក់ឱ្យរត់ដោយបែងចែកជាពីរក្នុងនោះ ខ្សែរត់លើផ្លូវភាគខាងត្បូង គឺភ្នំពេញ-ព្រះសីហនុ តម្រូវឱ្យបើកបរក្នុងល្បឿន ៨០ គីឡូម៉ែត្រក្នុងមួយម៉ោង និងខ្សែរត់លើផ្លូវភាគខាងជើង គឺភ្នំពេញ-ប៉ោយប៉ែត តម្រូវឱ្យបើកបរក្នុងល្បឿនចន្លោះពី ៣០ ទៅ ៥០ គីឡូ ម៉ែត្រក្នុងមួយម៉ោង៕ ដោយ៖ គង់ ឌិន

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញសំណេះសំណាលជាមួយថ្នាក់ដឹកនាំ និងសមាជិកសមាជិកាសមាគមឧកញ៉ាកម្ពុជា

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅព្រឹកថ្ងៃទី២១ ខែមិថុនា ឆ្នាំ២០២៤នេះ បានអញ្ជើញជាអធិបតីភាពក្នុងពិធីសំណេះសំណាលជាមួយថ្នាក់ដឹកនាំ និងសមាជិកសមាជិកាសមាគមឧកញ៉ាកម្ពុជា។ ពិធីនេះបានប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា។សមាគមឧកញ៉ាកម្ពុជា ដែលមានលោកអ្នកឧកញ៉ា លី យ៉ុងផាត់ ជាប្រធានបានបរិច្ចាគថវិកាចំនួន ១,៥៥៥,៥៥៥ ដុល្លារអាមេរិក ចូលរួមជាមួយកាកបាទក្រហមកម្ពុជា ក្នុងឱកាសខួបទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»។សមាគមឧកញ៉ាកកម្ពុជា ក្រោមការដឹកនាំដ៏ឆ្នើមរបស់លោកអ្នកឧកញ៉ា លី យ៉ុងផាត់ បានធ្វើឱ្យសមាគមឧកញ៉ានេះ មានការរីកចម្រើនរុងរឿងជាបន្ដបន្ទាប់។ ពិសេសសមាគមមួយនេះបានចូលរួមធ្វើសកម្មភាពជាច្រើន ដើម្បីរួមចំណែកអភិវឌ្ឍន៍សង្គមជាតិ បម្រើនូវឧត្តមប្រយោជន៍សម្រាប់ជាតិ និងប្រជាជន ពិសេសការងារមនុស្សធម៌៕

បណ្ដាញសង្គម

ព័ត៌មានថ្មីៗ

ចិននិយាយថា បញ្ហាថ្នាំហ្វេនតានីលអាមេរិក គឺជាទំនួលខុសត្រូវផ្ទាល់ខ្លួនរបស់ទីក្រុងវ៉ាស៊ីនតោន

សាលារៀននៅតាមទីក្រុងព្រំដែនប្រទេសឥណ្ឌា និងប៉ាគីស្ថាន ចាប់ផ្តើមបើកឡើងវិញ ក្រោយមានបទឈប់បាញ់

ការវាយប្រហាររបស់អ៊ីស្រាអែលលើតំបន់ហ្កាហ្សាសម្លាប់មនុស្សយ៉ាងហោច ៤៦នាក់ក្នុងរយៈពេល ២៤ម៉ោងចុងក្រោយ

វិមានក្រឹមឡាំង បដិសេធន៍ពុំនិយាយពីជំនួបសន្តិភាពរវាងរុស្ស៊ី និងអ៊ុយក្រែននៅទួរគី

ប៉ាគីស្ថាន និយាយថា ទាហាន និងជនស៊ីវិល ៥១នាក់របស់ខ្លួន ត្រូវបានសម្លាប់ អំឡុងការប៉ះទង្គិចជាមួយឥណ្ឌា

ភ្នំភ្លើង Etna របស់អ៊ីតាលី ចាប់ផ្តើមកម្រើកកាន់តែខ្លាំងកាលពីយប់ថ្ងៃចន្ទ

ឧបទ្ទេវហេតុគ្រោះថ្នាក់ចរាចរណ៍បានសម្លាប់ទាហានប៉ារ៉ា ៩នាក់ នៅម៉ាឡេស៊ីល

ចិន និងប្រេស៊ីល សន្យាការពារពាណិជ្ជកម្មសេរី ពេលប្រធានាធិបតីប្រទេសទាំង ២ជួបគ្នានៅទីក្រុងប៉េកាំង

ថៃបញ្ចប់ប្រតិបត្តិការស្វែងរក នៅទីតាំងអគារខ្ពស់ដែលបាក់រលំ អំឡុងរញ្ជួយដី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ការប្រឡងជ្រើសរើសគ្រូបង្រៀនបឋមសិក្សា លើកទី១ គ្រោងប្រព្រឹត្តិទៅ នៅខែកក្កដា ឆ្នាំ២០២៤

អតីតយុទ្ធជនថ្លែងអំណរគុណដល់រាជរដ្ឋាភិបាលដែលតែងតម្លើងប្រាក់សោធននិវត្តន៍

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ការប្រឡងជ្រើសរើសគ្រូបង្រៀនបឋមសិក្សា លើកទី១ គ្រោងប្រព្រឹត្តិទៅ នៅខែកក្កដា ឆ្នាំ២០២៤

អតីតយុទ្ធជនថ្លែងអំណរគុណដល់រាជរដ្ឋាភិបាលដែលតែងតម្លើងប្រាក់សោធននិវត្តន៍

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរ​ការ​សាកល្បង​លើផ្លូវភ្នំពេញ-ព្រះសីហនុ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ