BTV NEWS

រដ្ឋមន្ត្រីសុខាភិបាល លើកទឹកចិត្តថ្នាក់ដឹកនាំទាំងអស់ មានភាពក្លាហានក្នុងការស្វែងយល់ពីស្ថានភាពជុំវិញខ្លួន និងហ៊ានដាក់ចេញសកម្មភាព ដើម្បីលើកកម្ពស់វិស័យសុខាភិបាល ប្រកបដោយនវានុវត្តន៍

ឯកឧត្តម សុខ ពុទ្ធិវុធ អញ្ជើញជាអធិបតីក្នុងសិក្ខាសាលាពិនិត្យស៊ីជម្រៅលើ “សេចក្តីព្រាងគោលនយោបាយអភិបាលកិច្ចទិន្នន័យ”

ក្រសួងអភិវឌ្ឍន៍ជនបទ បានកំពុងប្រែក្លាយតំបន់ជនបទ ទៅជាតំបន់អភិវឌ្ឍន៍រីកចម្រើន

ឯកឧត្តម ហ៊ុន ម៉ានី៖“បើទោះបីជាត្រូវមកព្យាបាលរបួស តែអារម្មណ៍ចង់ត្រលប់ទៅជួរមុខវិញដើម្បីការពារបូរណភាពដែនដី”

ព័ត៌មានជាតិ

ឯកឧត្តម ទៀ សីហា ប្រកាសបញ្ចូលសមាជិកថ្មី គណបក្សប្រជាជនកម្ពុជាចំនួន ៤៧១នាក់ ស្រុកបន្ទាយស្រីខេត្តសៀមរាប

នៅរសៀលថ្ងៃទី២១ខែកញ្ញា ឆ្នាំ២០២៤នេះ ឯកឧត្តម ទៀ សីហា សមាជិកគណៈអចិន្ត្រៃយ៍ គណៈកម្មាធិការកណ្តាល គណបក្សប្រជាជនកម្ពុជា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធាន គណបក្សប្រជាជនកម្ពុជា អញ្ជើញប្រកាសបញ្ចូលសមាជិកថ្មីគណបក្សប្រជាជនកម្ពុជា ស្ថិតក្នុងស្រុកបន្ទាយស្រី ខេត្តសៀមរាប។ឯកឧត្តម ទៀ សីហា បានលើកឡើងថា គណបក្សប្រជាជនកម្ពុជា ជាគណបក្សដែលមានភាពចាស់ទុំខាងនយោបាយ ជាគណបក្សដែលបានរំដោះប្រទេសជាតិពីរបបប្រល័យពូជសាសន៍ និងនាំយកនូវសន្តិភាព និងការអភិវឌ្ឍពេញលេញ ជូនប្រទេសជាតិ និងប្រជាជនកម្ពុជា។ ការសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ជាការសម្រេចចិត្តដ៏ត្រឹមត្រូវ បង្ហាញពីការយល់ដឹង និងឆន្ទៈចង់បានសន្តិភាព និងអភិវឌ្ឍន៍បន្តទៅមុខទៀត។

អំណោយកុំព្យូទ័រ និងសម្ភារៈរបស់សម្ដេចធិបតី ហ៊ុន ម៉ាណែត ត្រូវបាននាំយក ប្រគល់ជូនសាលានៃវិទ្យាល័យហ៊ុនសែនតាខ្មៅ

កណ្ដាល៖ បន្ទាប់ពីបានចុះជួបសំណេះសំណាល និងស្ដាប់ពីសំណូមពរ របស់លោកគ្រូ អ្នកគ្រូ និងសិស្សានុសិស្ស កាលពីថ្ងៃទី១៦ កញ្ញា ២០២៤ នៅវិទ្យាល័យហ៊ុនសែនតាខ្មៅ ខេត្តកណ្តាល ខេត្តកណ្តាល រសៀលថ្ងៃសៅរ៍ទី២១ កញ្ញា ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានចាត់តាំងឯកឧត្តម ខេង សាម៉េត និងក្រុមការងារ នាំយកអំណោយដើម្បីប្រគល់ជូនដល់គណៈគ្រប់គ្រងសាលា និងសិស្សានុសិស្ស។អំណោយដែលត្រូវបានប្រគល់ជូននាពេលនេះ រួមមាន៖ - កុំព្យូទ័រយួរដៃ សរុបចំនួន ១០គ្រឿង (មានកាបូបស្ពាយ, mouse និងmouse pad)- LCD Projector ចំនួន ១០ឈុត- ម៉ាស៊ីនព្រីន ចំនួន ៥គ្រឿង- ម៉ាស៊ីនកូពី ចំនួន ១គ្រឿង - សៀវភៅសរសេរ ចំនួន ៤ ៧០៨ក្បាល- ប៊ិក ចំនួន ២ ៣៥៤ដើម ។សូមបញ្ជាក់ថា បន្ថែមពីលើសម្ភារៈជំនួយដល់ការបង្រៀនរបស់លោកគ្រូអ្នកគ្រូ និងការសិក្សារបស់សិស្សានុសិស្សសម្តេចធិបតីនាយករដ្ឋមន្ត្រី ក៏បានឯកភាពជាគោលការណ៍កាលពីថ្ងៃទី១៦ កញ្ញា ២០២៤ ផងដែរ ក្នុងការសាងសង់សាលារៀនចំនួន ១ខ្នង កម្ពស់ ៣ជាន់ ស្មើនឹង ៣០បន្ទប់ ដើម្បីបំពេញតម្រូវការវិស័យអប់រំ ដោយតាមការប៉ាន់ស្មាន វិទ្យាល័យហ៊ុនសែនតាខ្មៅ នឹងមានចំនួនសិស្សកើនឡើងបន្ថែមនាឆ្នាំខាងមុខ ពីលើចំនួន ២ ៣៥១នាក់ ក្នុងឆ្នាំ២០២៤នេះ ។

រដ្ឋមន្រ្តីក្រសួងទេសចរណ៍ថ្មី អនុញ្ញាតឱ្យក្រុមការងារ CAM-DMCមកពី១៨ក្រុមហ៊ុនទេសចរណ៍ ចូលជួបពិភាក្សាការងារ

ភ្នំពេញ៖ នៅព្រឹកថ្ងៃសៅរ៍ ទី២១ ខែកញ្ញា ឆ្នាំ២០២៤ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ អនុញ្ញាតឱ្យក្រុមការងារ CAM-DMC (Cambodia Destination Management Companies) ចូលជួបពិភាក្សាការងារនិងរាយការណ៍អំពីសកម្មភាពការងារ បញ្ហាប្រឈម និងសំណូមពររបស់ក្រុមការងារ។ក្នុងឱកាសនោះ បន្ទាប់ពីបានស្តាប់នូវការលើកឡើងរបស់ក្រុមការងារដោយយកចិត្តទុកដាក់ ឯកឧត្តមរដ្ឋមន្រ្តី បានកោតសរសើរ និងវាយតម្លៃខ្ពស់លើគំនិតផ្តួចផ្តើម ការប្តេជ្ញា និងការចូលរួមចំណែករបស់ក្រុមការងារក្នុងការជួយជម្រុញវិស័យទេសចរណ៍កន្លងមក និងសង្ឃឹមជឿជាក់ថា ក្រុមការងារនឹងបន្តចូលរួមចំណែកគាំទ្រ និងអភិវឌ្ឍន៍វិស័យទេសចរបន្ថែមទៀត។ជាមួយគ្នានេះដែរ រាល់ធាតុចូល, បញ្ហាប្រឈម, សំណូមពរដែលលើកឡើងនៅក្នុងកិច្ចពិភាក្សានាពេលនេះ ឯកឧត្តមរដ្ឋមន្រ្តី នឹងយកទៅពិភាក្សាលម្អិតបន្ថែម ក្នុងក្របខណ្ឌក្រសួង, អន្តរក្រសួង, ក្រុមការងារផ្នែកទេសចរណ៍ ក្នុងក្របខណ្ឌវេទិការាជរដ្ឋាភិបាល-ផ្នែកឯកជន ដើម្បីធ្វើការឆ្លើយតបឱ្យមានប្រសិទ្ធភាព ប្រសិទ្ធផល និងទាន់ពេលវេលា។

អាជ្ញាធរខេត្តក្រចេះ ចុះពិនិត្យលំនៅដ្ឋាន និងផ្ទៃដីកសិកម្មរងផលប៉ះពាល់ដោយជំនន់ទឹកភ្លៀង

ក្រចេះ៖ នាព្រឹកថ្ងៃថ្ងៃទី២១ ខែកញ្ញា ឆ្នាំ២០២៤ ឯកឧត្តម វ៉ា ថន អភិបាលខេត្តក្រចេះ និងក្រុមការងារ ចុះពិនិត្យវាយតម្លៃជាក់ស្ដែង ផលប៉ះពាល់ខ្នងផ្ទះ និងផ្ទៃដីកសិកម្ម ដល់មូលដ្ឋាន ស្ថិតក្នុងឃុំបុសលាវ ស្រុកចិត្របុរី និងសង្កាត់រកាកណ្ដាល ក្រុងក្រចេះ ។ក្នុងដំណើរអញ្ជើញចុះពិនិត្យនិងវាយតម្លៃផលប៉ះពាល់ នាព្រឹកនោះដែរឯកឧត្តម វ៉ា ថន មានប្រសាសន៍ឲ្យដឹងថា ក្រុមការងារនឹងវាយតម្លៃបូកសរុប ដើម្បីស្នើសុំស្រូវពូជចែក ជូនបងប្អូនប្រជាពលរដ្ឋ ដែលមានលទ្ធភាពស្ដារឡើងវិញ បានឲ្យទាន់ពេលវេលាន ទោះបីជាស្ថិតក្នុងពេលកាន់បិណ្ឌភ្ជុំបិណ្ឌក៏ដោយ ។ទន្ទឹមនឹងនោះ ឯកឧត្តម ក៏បានបញ្ជាក់ឲ្យដឹងដែរថា នៅថ្ងៃទី២១ ខែកញ្ញានេះ ស្ថានភាពកម្ពស់ទឹកទន្លេ មេគង្គក្រចេះ ជិត ២១ម៉ែត្រ ពោលគឺ ២០.៨៥ម៉ែត្រ ខណៈដែល ប្រកាសអាសន្ននៅកម្រិតកម្ពស់ទឹក ២២ម៉ែត្រ ប៉ុន្តែបើមើលតាមស្ថានភាពទឹកក្នុងទន្លេជាក់ស្ដែង គឺមិនទាន់ទឹកធំទេ អ្វីដែលធ្ងន់ធ្ងរនោះ គឺមេឃបន្តមាន ភ្លៀងធ្លាក់ជ្រុំ ៤ ទៅ ៥ ថ្ងៃហើយ ។ ធ្វើឲ្យលិចនៅផ្ទៃ បឹង ស្រែ ដែលនៅជុំវិញដងទន្លេមេគង្គ និងវាលទំនាបមួយចំនួន តំបន់ខ្លះលិចអស់ ៤ថ្ងៃ និងខ្លះទៀត ៥ថ្ងៃក៏មានដែរ ។ ចឹងបើទឹកបន្តហក់ឡើងទៀត ទឹកដែលមានក្នុង បឹង ស្រែ ស្រាប់នោះ នឹងកើនឡើងកាន់តែខ្លាំង ព្រោះទឹកភ្លៀងកាន់តែ កើនឡើង ចឹងហានិភ័យច្បាស់ជាមាន ។ដោយឡែកប្រជាជននៅមិនទាន់មានហានិភ័យធំទេ ដោយសារ ទី ១ ខេត្តបាន កសាងផ្លូវតាមគ្រោងរបស់រាជរដ្ឋាភិបាល ពោលគឺ ផ្លូវសង់ខ្ពស់ពីទឹក នៅតំបន់ទឹកលិច ។ ម្យ៉ាងវិញទៀត គិតមកដល់ពេលនេះ ការជម្លៀសមនុស្ស សត្វ មានចំនួនតិចតួចនៅឡើយ ។ គូសបញ្ជាក់ផងដែរថា ស្ថានភាពជំនន់ទឹកភ្លៀង និងទឹកជំនន់ទន្លេ មេគង្គខេត្តក្រចេះ គិតចាប់ពីថ្ងៃទី១៦ ដល់ ២០ ខែកញ្ញា ឆ្នាំ២០២៤ របាយការណ៍ទាញចេញប្រព័ន្ធ ព្រីស៊ឹម ស្ថានភាព អាកាសធាតុ និងកម្ពស់ទឹក ២០.៨៥ម៉ែត្រ ទឹកហូរចូលគ្រប់ព្រែក ចំនួន ២៨ ព្រែក និងបានបង្កផល ប៉ះពាល់ដល់ឃុំ/សង្កាត់ ចំនួន ៣៥ឃុំ/សង្កាត់ ស្មើនឹង ១៦៥ភូមិ ក្នុង ក្រុង/ស្រុក ចំនួន ៦ រួមមាន ស្រុកឆ្លូង ស្រុកព្រែកប្រសព្វ ស្រុកចិត្របុរី ស្រុកសំបូរ ស្រុកអូរគ្រៀងសែនជ័យ និងក្រុងក្រចេះ ។ ប៉ះពាល់វិស័យមួយចំនួន ដូចជា វិស័យសង្គមកិច្ច ៖ ប្រជាពលរដ្ឋប៉ះពាល់ សរុបចំនួន ៨.៣២៤ គ្រួសារ ស្មើនឹង ៣២.៧៥៦នាក់ ស្រី ចំនួន ១៦.០២៦នាក់ ។ ជម្លៀសប្រជាពលរដ្ឋ ចំនួន ៥៩ គ្រួសារ ស្មើនឹង ២៥៤នាក់ ស្រី ១២៩នាក់ ។ ប៉ះពាល់ផ្ទះប្រជាពលរដ្ឋ ចំនួន ២.២០៦ខ្នង សាលារៀន ចំនួន ២០កន្លែង មណ្ឌលសុខភាព ចំនួន ២កន្លែង វត្តអារាម ចំនួន ១៣កន្លែង អណ្តូងស្នប់ ២៨កន្លែង និងបង្គន់អនាម័យ ៨៩ និងអគារដ្ឋបាលឃុំ ចំនួន ១កន្លែង។ វិស័យកសិកម្ម៖ ប៉ះពាល់លិចស្រូវសន្ទូង/ពង្រោះ សរុបចំនួន ៤.៩២២ ហ.ត ប៉ះពាល់លិចដំណាំចម្ការ/ដំណាំរួមផ្សំ (ដំឡូងមី ពោត ល្ង) សរុបចំនួន ៤៣៨ ហ.ត ជម្លៀសគោ/ក្របី សរុបចំនួន ២.៧៧៦ ក្បាល ទៅកាន់ទីទួលខ្ពស់ៗនៅក្បែរភូមិដ្ឋាន។ វិស័យហេដ្ឋារចនាសម្ព័ន្ធ៖ លិចផ្លូវលំ សរុបប្រវែង ១១១.៨៥២ម៉ែត្រ ផ្លូវកៅស៊ូ ៤០០ម៉ែត្រ ផ្លូវបេតុង ៣៣០ម៉ែត្រ ស្ពានឈើ ៩កន្លែង និងលូកាត់ផ្លូវ ៤៤កន្លែង។ ជាមួយគ្នានោះ គណៈកម្មាធិការគ្រប់គ្រងគ្រោះមហន្តរាយខេត្ត ក្រុង/ស្រុក និងឃុំ/សង្កាត់ បានដាក់ចេញនូវទិសដៅការងារបន្ត ត្រូវប្រចាំការត្រៀមធនធានសម្ភារ និងកម្លាំងអន្តរាគមន៍ ដើម្បីត្រៀមអនុវត្តផែនការឆ្លើយតបសង្គ្រោះបន្ទាន់គ្រប់ពេលវេលា ៕ ដោយ សេង ម័រ

សម្ដេច ម៉ែន សំអន៖ រណសិរ្សខេត្ត សូមអនុវត្តការទូត សន្តិភាព ឯករាជ្យ មិត្តភាព និងសហប្រតិបត្តិការស្មើភាព

ស្ទឹងត្រែង៖ នាឱកាសអញ្ជើញជាអធិបតីនៃពិធីប្រកាសទទួលស្គាល់គណៈកម្មាធិការរណសិរ្សសាមគ្គីអភិវឌ្ឍន៍មាតុភូមិកម្ពុជា ខេត្តស្ទឹងត្រែង នាព្រឹកថ្ងៃទី២១ ខែកញ្ញា ឆ្នាំ២០២៤ សម្ដេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា មានប្រសាសន៍ទៅកាន់អង្គពិធីថា « បណ្ដុំនៃភារកិច្ចមួយក្នុងចំណោមបណ្ដុំនៃភារកិច្ចស្នូលរបស់គណៈកម្មាធិការរណសិរ្សសាមគ្គីអភិវឌ្ឍន៍មាតុភូមិកម្ពុជាខេត្ត គ្រប់ជាន់ថ្នាក់ ត្រូវអនុវត្តនោះគឺ ចូលរួមអនុវត្តមាគ៌ាគោលនយោបាយការទូត សន្តិភាព ឯករាជ្យ មិត្តភាព និងសហប្រតិបត្តិការ ស្មើភាពជាមួយបណ្តាប្រទេសនានានៅលើពិភពលោក ដោយឈរលើមូលដ្ឋានគោរពឯករាជ្យ អធិបតេយ្យ ស្មើសិទ្ធិ និងមានផលប្រយោជន៍ទាំងសងខាង ស្របតាមបាវចនារបស់រាជរដ្ឋាភិបាលកម្ពុជា នៃការកែទម្រង់ខាងក្នុង កសាងមិត្តខាងក្រៅ ដោយឈរលើមូលដ្ឋានឯករាជ្យ » ។ សម្ដេចកិត្តិសង្គហបណ្ឌិត ម៉ែន សំអន បន្ថែមថា អនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាគណៈអធិបតីកិត្តិយសក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា សម្ដចកិត្តិសង្គហបណ្ឌិត បានស្នើ គណៈកម្មាធិការរណសិរ្សសាមគ្គីអភិវឌ្ឍន៍មាតុភូមិកម្ពុជាខេត្តគ្រប់ជាន់ថ្នាក់ ត្រូវបន្តចូលរួមជាមួយរាជរដ្ឋាភិបាល ដើម្បីថែរក្សាសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ សុខដុមនៃសង្គម និងការពារដាច់ខាតនូវឯករាជ្យ អធិបតេយ្យភាព និងបូរណភាពទឹកដី ពង្រឹង និងពង្រីករចនាសម្ព័ន្ធចាត់តាំងរណសិរ្ស បង្កើនសមត្ថភាពគ្រប់គ្រង និងដឹកនាំការងារស្វែងរកប្រភពគាំទ្រឱ្យបានកាន់តែច្រើនឡើង ដើម្បីធានានិរន្តរភាព និងវឌ្ឍនភាពនៃបេសកកម្មរចនាសម្ព័ន្ធ និងបុព្វហេតុរបស់រណសិរ្ស បន្តអប់រំ បំផុសចលនា បញ្ជ្រាបការយល់ដឹងអំពីគោលនយោបាយនានារបស់រាជរដ្ឋាភិបាលឱ្យបានជ្រួតជ្រាបទូលំទូលាយក្នុងសង្គម និងការប្រមូលផ្ដុំកម្លាំងមហាជនពីគ្រប់ស្រទាប់ គ្រប់មជ្ឈដ្ឋាន ដើម្បីចូលរួមគាំទ្រ និងអនុវត្តគោលការណ៍ និងគោលនយោបាយទាំងនោះ សំដៅចូលរួមចំណែកជាមួយរាជរដ្ឋាភិបាលកម្ពុជា សម្រេចបានចក្ខុវិស័យនៃការអភិវឌ្ឍសេដ្ឋកិច្ច-សង្គមរបស់កម្ពុជា ជាពិសេសជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ។ សម្ដចកិត្តិសង្គហបណ្ឌិត បានបន្តថា គណៈកម្មាធិការរណសិរ្សខេត្ត សូមចូលរួមតស៊ូប្តូរផ្តាច់ក្នុងការទប់ស្កាត់នូវរាល់ឧបាយកល និងសកម្មភាពបំបែកបំបាក់សាមគ្គីភាពជាតិរបស់ក្រុមប្រឆាំង មជ្ឈដ្ឋានអមិត្តទាំងក្នុង និងក្រៅប្រទេស ដែលប៉ុនប៉ងអូសទាញមហាជន ប្រជាជន ឱ្យប្រឆាំងចំពោះបុព្វហេតុកសាង និងអភិវឌ្ឍន៍ជាតិមាតុភូមិ ពង្រឹង និងថែរក្សាឱ្យបានរឹងមាំនូវសាមគ្គីភាព និងឯកភាពផ្ទៃក្នុង ទាំងទស្សនៈគោលជំហរ និងនយោបាយសតិអារម្មណ៍តាមគោលការណ៍ រក្សាចាស់ បង្កើនថ្មី ។ គួររំឭក និងជម្រាបជូនថា ដោយមានគោលការណ៍ ១១ ចំណុច ជាស្នូល ដែលត្រូវបានប្រកាសនៅថ្ងៃបង្កើតរណសិរ្សនេះឡើង កាលពីថ្ងៃទី២ ខែធ្នូ ឆ្នាំ១៩៧៨ នាភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ ដែលជាវិមានអនុស្សាវរីយ៍រណសិរ្ស ២ ធ្នូ នាពេលបច្ចុប្បន្ននេះ រណសិរ្សសាមគ្គីសង្គ្រោះជាតិកម្ពុជា បានក្លាយជាអង្គការចាត់តាំងមហាជនឈានមុខមួយរបស់សង្គម រួបរួមគ្នាជាកម្លាំងមហាសាមគ្គីជាតិ ដោយផ្អែកលើស្មារតីឯករាជ្យជាតិ ដ៏បរិសុទ្ធរបស់ប្រជាជនកម្ពុជា សាមគ្គីគ្រប់ជនជាតិទូទាំងប្រទេស ប្រមូលរាល់កម្លាំងសង្គម ដោយមិនប្រកាន់និន្នាការនយោបាយ ជំនឿ សាសនា កម្មករ កសិករ បញ្ញវន្ត ព្រះសង្ឃ រួមទាំងគ្រប់ជនរួមជាតិទាំងឡាយ ដែលរស់ក្រៅប្រទេសផង ដើម្បីផ្ដួលរំលំរបបកម្ពុជាប្រជាធិបតេយ្យ ខ្មែរក្រហម រហូតដល់ទទួលបានជ័យជម្នះដ៏ត្រចះត្រចង់នាថ្ងៃ៧ មករា ឆ្នាំ១៩៧៩ ៕ អត្ថបទ ៖ ប្រាក់ វ៉ាន់ដា

ព្រះសង្ឃ នឹងបែងចែកចង្ហាន់ និងទេយ្យទានដែលបានពីបុណ្យភ្ជុំបិណ្ឌជាទានសប្បុរស

ចង្ហាន់ និងទេយ្យទានដែលបានពីពិធីបុណ្យភ្ជុំបិណ្ឌ នឹងត្រូវព្រះសង្ឃ បែកចែកធ្វើជាទានសប្បុរស បន្តទៅដល់ជនក្រីក្រ ឬជនងាយរងគ្រោះ ជាដើម ។ព្រះបិដកធម្មមេ ម៉ៅ នីម ព្រះអនុគណសង្ឃខណ្ឌ៧មករា និងជាព្រះចៅអធិការវត្តព្រះពុទ្ធមានបុណ្យ បានមានសង្ឃដីកាឱ្យដឹងថា ចង្ហាន់ដែលពុទ្ធបរិស័ទយកមកប្រគេនព្រះសង្ឃ គឺនឹងត្រូវចែកជូនបន្តដល់ញាតិញោមជាភ្ញៀវ ជាចាស់ទុំក្នុងវត្ត ពិសេសគឺចែកជូនដល់ជនអនាថា អ្នកសុំទាន ដើម្បីទទួលបានទៅបរិភោគ ក្រោយពេលដែលព្រះសង្ឃឆាន់ពេលថ្ងៃត្រង់រួច ។ ព្រះចៅអធិការ បន្ថែមថា សម្រាប់ទេយ្យទានវិញ គឺនឹងត្រូវធ្វើការបែកចែកមួយចំនួន សម្រាប់ជាទានប្រគេនទៅកាន់កាកកបាទក្រហមកម្ពុជា ដែលនេះជាផ្នែកមួយ នៃការចូលរួមចំណែកជាមួយសកម្មភាពសប្បុរស ពីចម្ងាយ ទោះបីមិនបានជូនផ្ទាល់ដល់ដៃរបស់ជនក្រីក្រ ឬអ្នកខ្វះខាតក៏ដោយ ។ប្រជាពុទ្ធបរិស័ទ សម្តែងក្តីជ្រះថ្លានឹងការធ្វើបុណ្យដាក់ទាន ក្នុងរដូវកាលកាន់បិណ្ឌទី៤នេះ ដោយពួកគាត់បានមកធ្វើបុណ្យរួមគ្នាជាមួយបងប្អូនសាច់ញាតិ និងលក្ខណៈក្រុមគ្រួសារ ដើម្បីជាការឧទ្ទិសកុសលផលបុណ្យដល់ញាតិការ៧ សណ្តានដែលបានចែកឋាន ទៅបរលោកនៅជាតិខាងមុខ ។ សូមបញ្ជាក់ថា ពិធីបុណ្យកាន់បិណ្ឌភ្ជុំបិណ្ឌ មានរយះពេល១៥ថ្ងៃ ដោយគិតចាប់ពីថ្ងៃ១៨ ខែកញ្ញា រហូតដល់ថ្ងៃទី០៣ ខែតុលា ឆ្នាំ២០២៤ខាងមុខ ។ ទន្ទឹមនឹងនោះដែរ បញ្ហាសន្តិសុខសុវត្ថិភាព ក៏ត្រូវបានការពារយ៉ាងយកចិត្តទុកដាក់ផងដែរ ពីសំណាក់កម្លាំងអាជ្ញាធរ មានសមត្ថកិច្ច ក្នុងមូលដ្ឋាន ដើម្បីការពារធានាមិនឱ្យអំពើអសន្តិសុខណាមួយអាចកើតមានឡើងនោះឡើយ ក្នុងពេលដែលប្រជាពុទ្ធបរិស័ទនាំគ្នាទៅធ្វើបុណ្យតាមទីវត្តអារាមនោះ ៕ អត្ថបទ៖ លីហេង

អតីតយុទ្ធជនចំនួន១១០គ្រួសារ បានទទួលអំណោយពីសម្តេចធិបតី ហ៊ុន ម៉ាណែត ក្នុងឱកាសបុណ្យភ្ជំ

កំពង់ឆ្នាំង៖ នៅរសៀលថ្ងៃទី២០ ខែកញ្ញា ឆ្នាំ២០២៤ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បានអញ្ជើញសួរសុខទុក្ខបងប្អូនអតីតយុទ្ធជនចំនួន១១០គ្រួសារ កំពុងរស់នៅតំបន់ដីសម្បទានសង្គមកិច្ច ក្នុងភូមិអូរកាខុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង ក្នុងឱកាសបុណ្យកាន់បិណ្ឌ ភ្ជុំបិណ្ឌ ឆ្នាំ២០២៤ ។ ឯកឧត្តម ស៊ីវ រុន ប្រធានក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្ត ប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ឆ្នាំង និងក្រុមការងារ ក៏បានចូលរួមផងដែរ។ លោកឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត បាននាំយកអំណោយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានទី១ សមាគមអតីតយុទ្ធជនកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និង មានការចូលរួមសហការឧបត្ថម្ភបន្ថែមពីឯកឧត្តមអភិបាលខេត្ត មន្ទីរអង្គភាពជុំវិញខេត្ត រដ្ឋបាលក្រុងស្រុក ទាំង០៨ ផ្តល់ជូនបងប្អូននាឱកាសនោះដែរ។ ឯកឧត្តមបណ្ឌិតសភាចារ្យ អ៊ុក រ៉ាប៊ុន ក៏បានរំលឹកឡើងវិញពីវីរភាព ដ៏អង់អាចក្លាហានរបស់បងប្អូនអតីតយុទ្ធក្នុងការបូជាសាច់ស្រស់ ឈាមស្រស់ ដើម្បីរំដោះជាតិចេញពីរបបប្រល័យពូជសាសន៍ និងថែរក្សា ការពារ សន្តិភាព ស្ថេរភាពសង្គមរហូតដល់សព្វថ្ងៃ។ វីរជនពិតប្រាកដ គឺបងប្អូនអតីតយុទ្ធនេះហើយ ដែលបានចូលរួមជាមួយរាជរដ្ឋាភិបាលរំដោះជាតិ នាំមកនូវសុខសន្តិភាព ស្ថេរភាព និងការអភិវឌ្ឍន៍ជូនប្រជាជន និងជាតិរហូតដល់ពេលនេះ។ ការអភិវឌ្ឍន៍នាពេលនេះ គឺមិនមែនកើតឡើងដោយចៃដន្យទេ តែជាការខិតខំប្រឹងប្រែងរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី ជាប្រមុខ បានខិតខំគៀងគរអ្នកវិនិយោគទាំងក្នុង និងក្រៅប្រទេសដើម្បីធ្វើការវិនិយោគនៅប្រទេសកម្ពុជា និងបានបង្កើតការងារយ៉ាងច្រើនជូនប្រជាពលរដ្ឋកម្ពុជា។ឯកឧត្តមបណ្ឌិត ក៏បានផ្តាំផ្ញើបងប្អូនអតីតយុទ្ធជន និងគ្រួសារអតីតយុទ្ធជន ត្រូវថែរក្សាសុខភាពឱ្យបានល្អ ហើយកុំជឿលើការញុះញង់របស់ជនមួយចំនួនដែលនាំឱ្យបែកបាក់សាមគ្គីជាតិ ជាពិសេសណែនាំដល់បងប្អូន និងក្រុមគ្រួសារកុំចូលរួមក្នុងបាតុកម្មការពារកំហុសរបស់ជនមួយចំនួន ដែលនាំឱ្យបង្កចលាចលដល់សង្គម និងខាតពេលវេលាក្នុងការប្រកបរបរចិញ្ចឹមជីវិត។ ត្រូវចេះថែរក្សាសុខភាពអោយបានល្អគ្រប់គ្នា ដើម្បីមើលការអភិវឌ្ឍន៍របស់ប្រទេសជាតិយើង ដែលក្នុងរយៈពេលដ៏ខ្លី ការអភិវឌ្ឍន៍លើគ្រប់វិស័យ បានរីកចម្រើនគួរអោយកត់សម្គាល់៕ កាំង ហុងវាស្នា

សមាជិកក្រុមប្រឹក្សាឃុំមកពីគណបក្សភ្លើងទៀន នៃស្រុកដងទង់ បានសុំចូលជាមួយគណបក្សប្រជាជនកម្ពុជាវិញ

កំពត៖ ចលនានៃការផ្តាច់ខ្លួនពីគណបក្សប្រឆាំងមកសុំរួមរស់ក្នុងជីវភាពនយោបាយ ជាមួយគណបក្សប្រជាជនកម្ពុជា នៅតែបន្តកើតមានស្ទើរតែជារៀងរាល់ថ្ងៃ ។ជាក់ស្តែងតាមរយៈប្រព័ន្ធទំនាក់ទំនងសង្គមតេឡេក្រាមរបស់សម្តេចតេជោ ហ៊ុន សែន ប្រធានព្រឹទ្ធសភា នៃកម្ពុជា និងជាប្រធានគណបក្សប្រជាជនកម្ពុជា នៅថ្ងៃនេះ និងថ្ងៃម្សិលមិញនេះ បានបង្ហោះនូវឃ្លីបវីដេអូរបស់បងប្អូនដែលជាសមាជិក សមាជិកា ក្រុមប្រឹក្សាឃុំមកពីគណបក្សភ្លើងទៀននៃបណ្តាឃុំមួយចំនួននៃស្រុកដងទង់ ខេត្តកំពត បានប្រកាសផ្តាច់ខ្លួនចាកចេញពីគណបក្សរបស់ខ្លួន ហើយគោរពស្នើសម្តេចតេជោ សុំចូលមករួមរស់ជាមួយគណបក្សប្រជាជនកម្ពុជាវិញ។សមាជិក សមាជិកា ក្រុមប្រឹក្សាឃុំ មកពីគណបក្សភ្លើងទៀន ខាងលើ មានបេក្ខជនក្រុមប្រឹក្សាមកពីគណបក្សភ្លើងទៀនឃុំខ្ជាយខាងត្បូង ឃុំស្រែជាខាងជើង ឃុំខ្ជាយខាង ជើង ស្រុកដងទង់ ខេត្តកំពត ។ពួកគាត់ថា ការផ្តាច់ខ្លួនពីបក្សប្រឆាំងបែបនេះគឺគ្មានការបង្ខិតបង្ខំ ឬទិញ ដូរ ព្រោះពួកគាត់អស់ជំនឿនឹងក្រុមមេដឹកនាំបក្សប្រឆាំងរបស់ខ្លួន។ ផ្ទុយទៅវិញ ពួកគាត់សប្បាយចិត្ត ដោយឃើញរាជរដ្ឋាភិបាល កម្ពុជា បានកសាងនូវសមិទ្ធផលដ៏ធំធេងជូន ប្រទេសជាតិ ទើបមូលមតិគ្នាធ្វើការសម្រេច ចិត្តយ៉ាងត្រឹមត្រូវ គោរពស្នើសម្តេចតេជោ សុំចូលចូលរួមជីវភាពនយោបាយជាមួយនឹង គណបក្សប្រជាជនកម្ពុជា។ជាមួយនឹងការសម្រេចចិត្តដោយគ្មានការបង្ខិតបង្ខំមកចូលរួមរស់ជាមួយគណបក្សប្រជាជនខាងលើនេះ ពួកគាត់ក៏បានថ្កោលទោសចំពោះជនទាំងឡាយណាដែលបំភ្លៃការពិតមកលើរាជរដ្ឋាភិបាលផងដែរ។គួរបញ្ជាក់ថា ការសុំចូលរួមរស់ក្នុងជីវភាពនយោបាយនៃសមាជិកក្រុមប្រឹក្សាឃុំ សង្កាត់ ខេត្តក្រុង ស្រុកខណ្ឌមកពីគណបក្សប្រឆាំងបែបនេះ បានកើតមានស្ទើរជារៀងរាល់ថ្ងៃនៅទូទាំងប្រទេស ដែលចរន្តរន៍ នៃការផ្តាច់ខ្លួនបែបនេះ ដោយសារពួកគាត់អស់ជំនឿលើការដឹកនាំរបស់គណបក្សខ្លួនហើយកាន់តែមើលឃើញច្បាស់ពីការរីកចម្រើនយ៉ាងពិតប្រាកដ នៅក្នុងសង្គមជាតិនាបច្ចុប្បន្នក្រោមការខិតខំរបស់រាជរដ្ឋាភិបាលដែលមានគណបក្សប្រជាជនកម្ពុជាធ្វើជាស្នូល៕អត្ថបទ៖ មុត សុទ្ធ

ដើមឈើជាង២០០ដើម បានដាំនៅសួនស្ទឹងមានជ័យ និងប្រឡាយបឹងសាឡាងនៅថ្ងៃនេះ

ដើមឈើសរុបជាង២០០ដើម បានដាំនៅសួនស្ទឹងមានជ័យ និងប្រឡាយបឹងសាឡាង ស្ថិតនៅក្នុងរាជធានីភ្នំពេញ ដើម្បីអបអរសាទរ «រុក្ខទិវា ៩ កក្កដា ឆ្នាំ២០២៤»។ដោយមានកិច្ចសហការរវាងក្រុមការងារសហភាពសហព័ន្ធយុវជនកម្ពុជា គ៧៨ ជាមួយមន្ទីរកសិកម្មរុក្ខាប្រមាញ់ និងនេសាទ រាជធានីភ្នំពេញ និងក្រុមការងាររាជរដ្ឋាភិបាលចុះមូលដ្ឋានសង្កាត់បឹងសាឡាង ខណ្ឌទួលគោក រាជធានីភ្នំពេញ នៅព្រឹកថ្ងៃទី២១ ខែកញ្ញានេះ បានរៀបចំពិធីអបអរសាទរ «រុក្ខទិវា ៩កក្កដា ឆ្នាំ២០២៤» ក្រោមអធិបតីភាពឯកឧត្តម យិនទៀង ពុទ្ធិរិទ្ធ អនុប្រធានក្រុមការងាររាជរដ្ឋាភិបាលចុះមូលដ្ឋានខណ្ឌទួលគោក និងជាប្រធានក្រុមការងារសហភាពសហសព័ន្ធយុវជនកម្ពុជាគ៧៨។នៅក្នុងអង្គពិធី ឯកឧត្តម យិនទៀង ពុទ្ធិរិទ្ធ បានថ្លែងថា ពិធីដាំដើមឈើ និងចែកកូនឈើ ក្នុងពេលនេះ គឺមានការដាំដើមឈើចម្រុះចំនួន៦ប្រភេទ សរុបចំនួន ២០៧ដើម នៅតាមប្រឡាយ ស្ថិតក្នុងភូមិចំនួន៧ ក្នុងភូមិសាស្ត្រសង្កាត់បឹងសាឡាង ខណ្ឌទួលគោក និងមួយផ្នែកទៀតស្ថិតក្នុងសង្កាត់មានជ័យ ខណ្ឌមានជ័យ។ ជាមួយគ្នានេះ ក្រុមការងារក៏បានត្រៀមកូនឈើចម្រុះចំនួន ៣០០ដើម សម្រាប់ចែកជូនបងប្អូនប្រជាពលរដ្ឋ ដើម្បីយកទៅដាំនៅតាមទីវត្តអារាម ដងផ្លូវសាធារណៈ និងលំនៅឋានរៀងៗខ្លួន។សម្រាប់អ្នកចូលរួមបានបង្ហាញអារម្មណ៍រីករាយដែលបានចូលរួមដាំដើមឈើនៅពេលនេះ និងប្តេជ្ញាថែរក្សាព្រៃឈើឱ្យនៅស្ថិតស្ថេរគង់វង្ស។គួរបញ្ជាក់ដែរថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានកំណត់យ៉ាងច្បាស់ពីតម្លៃ និងតួនាទីដ៏សំខាន់ របស់ព្រៃឈើ ដែលមិនអាចកាត់ផ្តាច់ចេញពីវិស័យអាទិភាពទាំងឡាយរបស់រដ្ឋបានឡើយ ដោយបានបន្តពង្រឹង និងពង្រីកបន្ថែមទៀតនូវការគ្រប់គ្រងធនធានធម្មជាតិ សំដៅរក្សាតុល្យភាព រវាងការអភិវឌ្ឍ និងការអភិរក្ស ពិសេសលើកកម្ពស់វិភាគទាន នៃធនធានធម្មជាតិ ក្នុងយុទ្ធសាស្ត្របញ្ចកោណ ដំណាក់កាលទី១ ត្រង់ចំណុចបញ្ចកោណទី៤ មុំទី២ និងបន្តអនុវត្តកម្មវិធីកំណែទម្រង់សំខាន់ៗលើគ្រប់វិស័យសំដៅឈានទៅសម្រេចចក្ខុវិស័យក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ អត្ថបទ៖ទូច សោភ័ណ

កម្ពុជារៀបចំអបអរសាទរទិវាសម្អាតពិភពលោកលើកទី៧ ក្រោមមូលបទ«កម្ពុជាស្អាត ខ្មែរធ្វើបាន»

ក្រសួងបរិស្ថាន អង្គការសំអាតទន្លេ-សមុទ្រ សហការជាមួយស្ថាប័នពាក់ព័ន្ធនានា នៅថ្ងៃទី២១ ខែកញ្ញានេះ បានរៀបចំអបអរសាទរទិវាសម្អាតពិភលោកលើកទី៧ ក្រោមមូលបទ «កម្ពុជាស្អាត ខ្មែរធ្វើបាន»ក្រោមអធិបតីភាពឯកឧត្តម សាប៊ូ អូហ្សាណូ រដ្ឋលេខាធិការក្រសួងបរិស្ថាន និងជាតំណាងឯកឧត្តមបណ្ឌិត អ៊ាង សុផល្លែតរដ្ឋមន្រ្តីក្រសួងបរិស្ថាន។ពិធីនេះ រៀបចំឡើងនៅសួនច្បារមាត់ទន្លេ រូបសំណាកតេជោមាស តេជោយ៉ត រាជធានីភ្នំពេញ ដោយមានអ្នកច្រើនជាច្រើនកុះករ។នៅក្នុងអង្គពិធី ឯកឧត្តម សាប៊ូ អូហ្សាណូ បានមានប្រសាសន៍ថា ទិវាសម្អាតពិភពលោក រៀបចំឡើងក្នុងគោលបំណង លើកកម្ពស់ការយល់ដឹងរបស់ប្រជាពលរដ្ឋឱ្យស្រឡាញ់បរិស្ថាន និងចូលរួមក្នុងការគ្រប់គ្រងសំរាម សំណល់រឹង នៅក្នុងប្រទេស ដោយបញ្រ្ជាបការយល់ដឹងអំពីផលប៉ះពាល់នៃកំណើនបរិមាណសំរាមលើភពផែនដី។ ទិវាសម្អាតពិភពលោក ជាវេទិកាដ៏ល្អប្រសើរមួយដែលផ្តល់ឱកាសដល់ប្រជាពលរដ្ឋ យុវជន សិស្សានុសិស្ស និង បុគ្គលិកមកពីគ្រប់ស្ថាប័នចូលរួមយ៉ាងច្រើនកុះករ ដែលជាសារមួយផ្ញើជូនដល់សហគមន៍អន្តរជាតិគឺ «កម្ពុជាស្អាត ខ្មែរធ្វើបាន»។ឯកឧត្តម ហួត ហៃ អភិបាលរងរាជធានីភ្នំពេញ បានលើកឡើងដែរថា ដើម្បីឱ្យទីក្រុងភ្នំពេញកាន់តែស្រស់ស្អាតបន្ថែមទៀត សូមអំពាវនាវដល់ប្រជាពលរដ្ឋត្រូវទុកដាក់សំរាមឱ្យបានត្រឹមត្រូវ ខណៈរាជរដ្ឋាភិបាលបានដាក់ចេញគោលនយោបាយច្បាស់លាស់ក្នុងការគ្រប់គ្រងសំរាម។សាធារណៈជនបានលើកឡើងដែរថា មូលហេតុដែលចូលរួមក្នុងទិវាសម្អាតពិភពលោក មានបំណងចង់ចូលរួមចំណែកសម្អាតបរិស្ថានៅក្នុងរាជធានីភ្នំពេញឱ្យបានស្អាត ដោយការរើសសំរាមនៅតាមទន្លេ។លើសពីនេះ សាធារណៈជនប្តេជ្ញាថែរក្សាបរិស្ថានឱ្យបានស្អាត ដោយមិនបោះចោលសំរាមផ្តេសផ្ដាស នោះទេ។គួរបញ្ជាក់ដែរថា ទិវាសម្អាតពិភពលោក រៀបចំឡើងស្របទៅ នឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក្នុងការកសាងនិងពង្រឹង មូលដ្ឋានគ្រឹះ ដើម្បីពន្លឿនការអភិវឌ្ឍជាតិ និងគាំទ្រដល់យុទ្ធសាស្រ្តចក្រាវិស័យបរិស្ថានរួមមាន៖ ភាពស្អាត ភាពបៃតង និងចីរភាព ៕ អត្ថបទ៖ទូច សោភ័ណ

បណ្ដាញសង្គម

ព័ត៌មានថ្មីៗ

នេប៉ាលផ្តល់ការឡើងកំពូលភ្នំចំនួន ៩៧ដោយឥតគិតថ្លៃ ពេលដែលវិស័យទេសចរណ៍ហក់ឡើងខ្ពស់នៅភ្នំ Everest

និស្សិតនៅតំបន់ហ្កាហ្សាអះអាងថា សង្រ្គាមរបស់អ៊ីស្រាអែលបានប្លន់ការសិក្សារបស់ពួកគេ

ក្រុមស្ម័គ្រចិត្តអ៊ីរ៉ាក់នៅទីក្រុងបាកដាដ ចែកចាយដើមឈើដោយឥតគិតថ្លៃដើម្បីប្រយុទ្ធប្រឆាំងនឹងវាលរហោដ្ឋាន

ក្រុមអ្នកវិទ្យាសាស្រ្តអាមេរិកនៅសាកលវិទ្យា Emory បង្កើតឧបករណ៍ជីវសាស្រ្ត ដើម្បីការពារកសិករពីរលកកម្តៅ

មន្រ្តីរដ្ឋាភិបាល៖ ក្រុមសកម្មប្រយុទ្ធបានសម្លាប់ទាហានប៉ាគីស្ថាន ៩នាក់ នៅខេត្ត Balochistan

អ៊ីរ៉ង់៖ ជនសង្ស័យ ២១.០០០នាក់ ត្រូវបានចាប់ខ្លួន អំឡុងសង្គ្រាម ១២ថ្ងៃជាមួយអ៊ីស្រាអែល

ហ៊្សកដានីធ្វើជាម្ចាស់កិច្ចប្រជុំដើម្បីពិភាក្សាលើការកសាងប្រទេសស៊ីរីឡើងវិញ

ទាហានគ្រវីទង់ជាតិរុស្ស៊ីនៅភូមិអ៊ុយក្រែនដែលពួកគេអះអាងថាដណ្តើមកាន់កាប់បាន

ក្រុមឃ្លាំមើលសមុទ្រអាល្លឺម៉ង់សង្រ្គោះជនអន្តោប្រវេសន៍ ៧៣នាក់នៅជិតតំបន់ឆ្នេរប្រទេសលីប៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877