នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា បដិសេធ និងចាត់ទុកជាការមួលបង្កាច់ចំពោះការផ្សាយរបស់សារព័ត៌មានថៃចោទប្រកាន់កម្ពុជាថា បានបាញ់ចំនួន ១១គ្រាប់ នៅទីតាំងច្រកអន្តរជាតិអូស្មាច់
កម្ពុជា ដាក់ឱ្យប្រើប្រាស់ បណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ឯកសារ
កម្ពុជា និងសហរដ្ឋអាម៉េរិក ប្ដេជ្ញាបន្តពង្រឹងកិច្ចសហប្រតិបត្តិការទ្វេភាគី ឱ្យកាន់តែស៊ីជម្រៅ
កម្មកររោងចក្រជាង១ពាន់នាក់ ចូលរួមប្រារព្ធទិវាពិភពលោក ដើម្បីសុវត្ថិភាព និងសុខភាពការងារ

ព័ត៌មានជាតិ

សម្តេចប្រធានរដ្ឋសភាកម្ពុជា ស្រក់ទឹកភ្នែកអាណិតពលរដ្ឋខ្លួន នៅពេលលើកឡើងពីការឈ្លានពានដ៏ឃោរឃៅរបស់យោធាថៃលើបូរណភាពទឹកដីកម្ពុជា ក្នុងកិច្ចប្រជុំកំពូលប្រធានសភាជាស្រ្តីលើកទី១៥ ដែលមានប្រធានសភាជាស្រ្តីមកពី ៣០ប្រទេស ចូលរួមនៅទីក្រុងហ្សឺណែវ

2025/07/28 06:05:13 pm        630
Facebook Telegram Linkin
នៅចំពោះមុខគណៈប្រតិភូ ដែលជាប្រធានសភាជាស្រ្តីក្នុងពិភពលោកចំនួន៣០ប្រទេសចូលរួម សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានស្រក់ទឹកភ្នែក អាណិតប្រជាពលរដ្ឋខ្មែរ ពិសេសស្រ្តីនិងកុមារ ដែលជាជនស្លូតត្រង់ បានរងគ្រោះយ៉ាងធ្ងន់ធ្ងរ ពីការវាយប្រហារដោយអាវុធធុនធ្ងន់ យ៉ាងឃោរឃៅពីការឈ្លានពានរបស់ប្រទេសថៃមកលើដែនធិបតេយ្យកម្ពុជានៅក្នុងរយៈពេលប៉ុន្មានថ្ងៃនេះ។ក្នុងបទអន្តរាគមន៍ នៅក្នុងកិច្ចប្រជុំកំពូលប្រធានសភាស្រ្តីលើកទី១៥ (15 SWSP) ក្រោមមូលបទ«ការដឹកនាំដើម្បីសន្តិភាពរួម និងមានចីរភាព» សម្តេចប្រធានរដ្ឋសភាកម្ពុជា បានគូសបញ្ជាក់ថា កម្ពុជាសូមថ្កោលទោសយ៉ាងដាច់អហង្ការចំពោះការឈ្លានពានយ៉ាងគឃ្លើនរបស់យោធាថៃមកលើដែនអធិបតេយ្យភាពកម្ពុជា ដែលជាការរំលោភទាំងស្រុងលើធម្មនុញ្ញអង្គការសហប្រជាជាតិ ដោយបានរំលោភទៅលើអធិបតេយ្យភាព និងបូរណភាពទឹកដី នៃរដ្ឋធិបតេយ្យមួយ។ អំពើព្រៃផ្សៃនោះ បានបង្កផលប៉ះពាល់យ៉ាងធ្ងន់ធ្ងរដល់ពលរដ្ឋស្លូតត្រង់ ពិសេសស្រ្តីនិងកុមារ ដែលជាជនងាយរងគ្រោះ។ ក្នុងទង្វើឈ្លានពាននេះ យោធាថៃបានប្រើប្រាស់គ្រាប់បែកចង្កោម អាវុធគីមី យន្តហោះចម្បាំងដ៏មានអំណាច F-16 ដ្រូន និងគ្រឿងសព្វាវុធធុនធ្ងន់ជាច្រើន ដែលបានសម្លាប់ប្រជាជនស្លូតត្រង់ និងធ្វើឱ្យពលរដ្ឋកម្ពុជារាប់សែននាក់ត្រូវបាត់បង់ទីជម្រក និងជីវភាពរស់នៅប្រចាំថ្ងៃ ហើយមន្ទីរពេទ្យ សាលារៀន ហេដ្ឋារចនាសម្ព័ន្ធដ៏ទៃផ្សេងទៀត ទទួលរងការបំផ្លិចបំផ្លាញយ៉ាងធ្ងន់ធ្ងរ។  “យើងសូមអំពាវនាវឱ្យមានបទឈប់បាញ់ជាបន្ទាន់ ដើម្បីការពារជនស៊ីវិល ពិសេសស្រ្តី និងកុមារ ដើម្បីចៀសផុតពីការឈឺចាប់នេះបន្តទៀត។ បន្ថែមពីនេះ យើងត្រូវពង្រឹងតួនាទីរបស់ស្រ្តីក្នុងការស្វែងរកដំណោះស្រាយចំពោះជម្លោះដែលកំពុងកើតមាននេះ“។  នៅក្នុងកិច្ចប្រជុំដែលមានប្រធានសភាជាស្រ្តីមកពី៣០ប្រទេស សម្តេចរដ្ឋសភាបានសង្កត់ធ្ងន់ថា” យើងត្រូវតែបញ្ឈប់នូវការរំលោភលើច្បាប់អន្តរជាតិ និងសូមអញ្ជើញអ្នកសង្កេតការណ៍អន្តរជាតិដើម្បីស្វែងរកការពិត និងត្រូវស្វែងរកដំណោះស្រាយតាមរយៈតុលាការអន្តរជាតិ”។ សម្តេចមានប្រសាសន៍បន្តថា ពិភពលោកបច្ចុប្បន្ន កំពុងស្ថិតនៅចំណុចរបត់ដ៏សំខាន់មួយ។ យើងប្រឈមទៅនឹងជម្រើសមួយដ៏លំបាក៖ ត្រូវការសន្តិភាព ឬសង្រ្គាម? តើត្រូវគោរពច្បាប់អន្តរជាតិ ឬបណ្តោយឱ្យមានការធ្លាក់ចុះ? តើយើងត្រូវការនូវ វិបុលភាពរួម ឬ ការគិតបំផ្លិចបំផ្លាញដោយមានអ្នកឈ្នះ និងអ្នកចាញ់? ។ សន្ទរកថាសម្តេចប្រធានរដ្ឋសភាកម្ពុជា បានទទួលការចាប់អារម្មណ៍ជាខ្លំាងពីកិច្ចប្រជុំ។កិច្ចប្រជុំបានស្តាប់ដោយការយកចិត្តទុកដាក់ពីការរៀបរាប់របស់សម្តេចប្រធានរដ្ឋសភា។ សម្តេចបានបន្តថា ការចុះខ្សោយនៃអភិបាលកិច្ចសកល និងការមិនគោរពច្បាប់អន្តរជាតិ បានគម្រាមកំហែងដល់សន្តិភាព និងស្ថិរភាពនៅទូទាំងពិភពលោក។ សម្តេចរដ្ឋសភាធិបតី ឃួន សុដារី បញ្ជាក់ថា“យើងចាំបាច់ត្រូវឈរជាមួយគ្នាឱ្យរឹងមាំក្នុងការការពារច្បាប់អន្តរជាតិ ធម្មនុញ្ញអង្គការសហប្រជាជាតិ និងប្រព័ន្ធពហុភាគីនិយម ដែលទាំងអស់នេះជាមូលដ្ឋានគ្រឹះនៃសន្តិភាព”៕

​​ TOP STORY | កម្ពុជា-ថៃ ឯកភាពគ្នាឈប់បាញ់បន្ទាន់នៅយប់នេះ, រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ និងកិច្ចប្រជុំ GBC នៅខែក្រោយ

2025/07/28 05:42:16 pm        335
Facebook Telegram Linkin
ភ្នំពេញ៖ តាមរយៈកិច្ចប្រជុំពិសេសនៅរសៀលថ្ងៃទី២៨ ខែកក្កដានេះ នៅទីក្រុងគូឡាឡាំពួរ ប្រទេសម៉ាឡេស៊ី កម្ពុជា និងថៃ បានឯកភាពគ្នាចំនួន ៣ ចំណុច ក្នុងនោះ ភាគីទាំងពីរបានឯកភាពគ្នាទទួលយកបទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង ២៤៖00នាទី ថ្ងៃទី២៨ ខែកក្កដា ឆ្នាំ២០២៥នេះ, ឯកភាពគ្នារៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ និងឯកភាពគ្នារៀបចំកិច្ចប្រជុំ GBC នៅថ្ងៃទី៤ ខែសីហាខាងមុខនេះ។ តាមការបញ្ជាក់របស់សម្ដេចធិបតី ហ៊ុន ម៉ាណែត នាយករដ្ឋមន្រ្ដី នៅលើបណ្ដាសង្គមនៅមុននេះថា ជាលទ្ធផលដ៏ត្រចះត្រចង់ពីចំនួបរវាងសម្ដេច និងឯកឧត្ដម Phumtham Wechayachai នាយករដ្ឋមន្ត្រីស្តីទីនៃព្រះរាជាណាចក្រថៃ ដោយភាគីទាំងពីរកម្ពុជា-ថៃបានឯកភាពគ្នាដូចខាងក្រោម៖ ទី១ បទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង ២៤៖០០នាទី ថ្ងៃទី ២៨ ខែកក្កដា ឆ្នាំ ២០២៥។ នេះជាជំហានដ៏សំខាន់ ឆ្ពោះទៅការបន្ថយការតានតឹង នឹងការស្តារឡើងវិញនៅសន្តិភាព និងសន្តិសុខ។ ទី២ រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ (ភាគីថៃ យោធភូមិភាគទី1 និងទី2 និងភាគីកម្ពុជាយោធភូមិភាគទី៤ និងទី៥) នៅវេលាម៉ោង៧៖00នាទី ថ្ងៃទី២៩ ខែកក្កដា ឆ្នាំ ២០២៥ និងបន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បើមានការឯកភាពពីភាគីទាំងពីរ និង ទី៣. រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ ២០២៥ ដែលកម្ពុជានឹងធ្វើជាម្ចាស់ផ្ទះ។ ក្នុងឱកាសនោះ សម្ដេចធិបតីនាយករដ្ឋមន្រ្ដី បានអរគុណឯកឧត្តមនាយករដ្ឋមន្ត្រី Anwar Ibrahim ដែលបានផ្តួចផ្តើមគំនិតសម្របសម្រួលអោយមានកិច្ចប្រជុំ និងធ្វើជាម្ចាស់ផ្ទះ។ សម្ដេចក៏អរគុណឯកឧត្តមប្រធានាធិបតី Donald Trump ដែលបានផ្តល់ការគាំទ្រដល់ដំណើរការចរចាររកការឈប់បាញ់ភ្លាមដើម្បីកសាងសន្តិភាព តាមរយៈសហរដ្ឋអាមេរិកធ្វើជាសហអ្នករៀបចំនៃជំនួបថ្ងៃនេះ។ សម្ដេចក៏បានអរគុណដល់រដ្ឋាភិបាលចិនដែលតែងតែគាំទ្រលើកទឹកចិត្តអោយភាគីទាំងពីរស្វែងរកការឈប់បាញ់និងចូលរួមយ៉ាងសកម្មគាំទ្រដល់ជំនួបពិសេសនេះផងដែរ។ សូមបញ្ជាក់ថា កិច្ចចរចាបទឈប់បាញ់រវាងកម្ពុជា និងថៃ ចាប់ផ្តើមហើយ ក្រោមការសម្របសម្រួលរបស់ម៉ាឡេស៊ី ដោយមានការចូលរួមពីតំណាងអាមេរិក និងចិន នៅទីក្រុងកូឡាឡាំពួរ ប្រទេសម៉ាឡេស៊ី ទើបឈានដល់ការសម្រេចបានបទឈប់បាញ់គ្នាបន្ទាន់ជាមួយគ្នាបែបនេះ ខណៈកិច្ចប្រជុំនេះនាយករដ្ឋមន្ត្រីនៃប្រទេសទាំងពីរកម្ពុជា និងថៃបានឯកភាពគ្នាតាមគំនិតផ្ដួចផ្ដើមរបស់ ឯកឧត្តម Donald Trump ប្រធានាធិបតីសហរដ្ឋអាមេរិក៕

សម្តេចកិត្តិព្រឹទ្ធបណ្ឌិត ប៊ុន រ៉ានី អញ្ជើញចុះសួរសុខទុក្ខកងទ័ពដែលរងរបួសក្នុងសង្គ្រាមវាយប្រហារដោយកម្រោលរបស់កងទ័ពសៀម

2025/07/28 05:28:18 pm        413
Facebook Telegram Linkin
ព្រះវិហារ៖ នាថ្ងៃទី២៨ ខែកក្កដា ឆ្នាំ២០២៥ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងគណៈប្រតិភូ បានអញ្ជើញចុះសួរសុខទុក្ខកងទ័ពដែលសម្រាកព្យាបាលនៅមន្ទីរពេទ្យបង្អែកខេត្តព្រះវិហារ បន្ទាប់ពីរងរបួសក្នុងការវាយប្រហារដោយកម្រោលរបស់កងទ័ពសៀម តាមបន្ទាត់ព្រំដែនកម្ពុជា-ថៃ។នាឱកាសនោះ សម្តេចកិត្តិព្រឹទ្ធបណ្ឌិត បានពាំនាំនូវព្រះរាជបន្ទូលផ្តាំផ្ញើសុខទុក្ខ និងក្តីនឹករលឹក ពីព្រះករុណា ព្រះមហាក្សត្រ និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ដែលជានិច្ចកាល ព្រះអង្គទាំងទ្វេតែងតែគិតគូរពីសុខទុក្ខរបស់បង-ប្អូនប្រជានុរាស្ត្រនៅគ្រប់ទីកន្លែង ពិសេសក្នុងកាល:ទេសៈនេះកងទ័ពបានលះបង់ខ្ពស់ប្រកបដោយភាពអង់អាចក្លាហាន តស៊ូការពារបូរណភាពទឹកដីពីការឈ្លានពានទាំងកម្រោលរបស់កងទ័ពសៀមតាមបន្ទាត់ព្រំដែនកម្ពុជា-ថៃ។ សម្តេចកិត្តិព្រឹទ្ធបណ្ឌិត បានសម្តែងនូវក្តីអាណិតអាសូរចំពោះកងទ័ព ដែលរងបួសក្នុងសង្គ្រាមឈ្លានពានរបស់កងទ័ពចោរសៀម ដែលបានបើកការប្រហារមុនមកលើកងទ័ពកម្ពុជា។ជាមួយគ្នានេះ សម្តេចកិត្តិព្រឹទ្ធបណ្ឌិត ប៊ុន រ៉ានី សូមជូនពរដល់កងទ័ពដែលកំពុងសម្រាកព្យាបាលបន្តថែទាំសុខភាព និងឆាប់ជាសះស្បើយពីរបួស។ សម្តេចកិត្តិព្រឹទ្ធបណ្ឌិត ប៊ុន រ៉ានី បានណែនាំដល់ក្រុមគ្រូពេទ្យ សូមបន្តថែទាំ និងតាមដានពីសុខភាពកងទ័ព ដែលកំពុងសម្រាកព្យាបាលត្រូវទទួលបានការយកចិត្តទុកដាក់ឱ្យបានល្អបំផុត ដោយសារកងទ័ពបានការពារបូរណភាពទឹកដី និងអធិបតេយ្យភាពយ៉ាងម៉ឺងម៉ាត់បំផុតជូនជាតិមាតុភូមិ៕

ឯកឧត្តម ឌិត ទីណា បន្តសួរសុខទុក្ខ និងនាំយកស្បៀងជូនប្រជាពលរដ្ឋភៀសសឹក នៅទីតាំងសុវត្ថិភាពស្រុកព្រះនេត្រព្រះ

2025/07/28 04:49:36 pm        178
Facebook Telegram Linkin
ភ្នំពេញ៖នាព្រឹកថ្ងៃ ទី២៨ កក្កដា ឆ្នាំ២០២៥ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អញ្ជើញបន្តសួរសុខទុក្ខ និងនាំយកស្បៀងជូនប្រជាពលរដ្ឋ និងក្រុមគ្រួសារកងទ័ព ប្រមាណ ៣២៩ គ្រួសារ ដែលបានភៀសខ្លួនពីតំបន់សឹកខេត្តឧត្ដរមានជ័យ និងតំបន់ខេត្តបន្ទាយមានជ័យ មករកទីតាំងសុវត្ថិភាពក្នុងស្រុកព្រះនេត្រព្រះ ដែលរហូតមកដល់ពេលនេះបានកើនឡើងដល់ជាង ៩០០ គ្រួសារ។ រាជរដ្ឋាភិបាល និងអាជ្ញាធរខេត្ត នឹងបន្តការគាំពារប្រជាពលរដ្ឋភៀសខ្លួនចេញពីតំបន់ហានិភ័យ៕

ឯកឧត្តមសាស្ត្រាចារ្យ គង់ សន្យា បានប្រគល់អំណោយជូនរដ្ឋបាលខេត្តបាត់ដំបង សម្រាប់ទ្រទ្រង់ដល់បងប្អូនប្រជាពលករ ដែលត្រឡប់ពីប្រទេសថៃ និងជួយគាំទ្រដល់កងកម្លាំងជួរមុខ

2025/07/28 04:41:44 pm        170
Facebook Telegram Linkin
ភ្នំពេញ ៖ ឯកឧត្តមសាស្ត្រាចារ្យ គង់ សន្យា អគ្គនាយកមនី្ទរពេទ្យកាល់ម៉ែត នៃក្រសួងសុខាភិបាល រួមនិងថ្នាក់ដឹកនាំមន្ទីរពេទ្យ បាននាំយកសម្ភារៈចាំបាច់មួយចំនួន ដើម្បីជូនរដ្ឋបាលខេត្តបាត់ដំបង សម្រាប់ប្រើប្រាស់ទៅតាមគោលដៅអាទិភាព ក្នុងអំឡុងពេលដែលប្រទេសកម្ពុជាកំពុងមានជម្លោះព្រំដែនជាមួយប្រទេសថៃ។​ពិធីប្រគល់អំណោយខាងលើនេះ មានការអញ្ជើញចូលរួមពីឯកឧត្តម សុខ លូ អភិបាលនៃគណៈអភិបាលខេត្តបាត់ដំបង លោកប្រធានមន្ទីរសុខាភិបាលខេត្តបាត់ដំបង ឯកឧត្តម លោកជំទាវ អគ្គនាយករង ឯកឧត្តមសាស្ត្រាចារ្យទីប្រឹក្សា លោក លោកស្រី សាស្ត្រាចារ្យ វេជ្ជបណ្ឌិតឯកទេស លោក លោកស្រី នាព្រឹកថ្ងៃទី២៨ ខែកក្កដា ឆ្នាំ២០២៥នេះ។ ថ្ងៃនេះតាមរយៈការចង្អុលបង្ហាញដ៏ខ្ពង់ខ្ពស់ពីឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមសាស្ត្រាចារ្យ គង់ សន្យា និងសហការី ព្រមទាំងបុគ្គលិក និងមន្ត្រីរាជការទាំងអស់ នៃមន្ទីរពេទ្យកាល់ម៉ែត បានរួបរួមគ្នានាំយកនូវសម្ភារៈចាំបាច់មួយចំនួនដើម្បីជូនរដ្ឋបាលខេត្តបាត់ដំបង ប្រើប្រាស់ទៅតាមគោលដៅអាទិភាព ក្នុងអំឡុងពេលដែលប្រទេសកម្ពុជា កំពុងមានជម្លោះព្រំដែនជាមួយប្រទេសថៃ។ យើងទាំងអស់គ្នាពិតជាចង់បានសន្តិភាពណាស់ ដោយព្រោះសង្គ្រាមតែងនាំមកនូវការខូចខាតនូវហេដ្ឋារចនាសម្ព័ន្ធនានា សិស្សានុសិស្សបាត់បង់ការសិក្សា ប្រជាជនស៊ីវិលបាត់បង់ផ្ទះសម្បែង បាត់បង់ការងារ បាត់បង់ចំណូលសម្រាប់ផ្គត់ផ្គង់ជីវភាព បញ្ហាសុខភាព និងអនាម័យ កើតមានឡើង ជាពិសេសអ្វីដែលយើងទាំងអស់គ្នាតែងខ្លាចបារម្ភពីផលវិបាក ដែលកើតមានឡើងនោះគឺសង្គ្រាមបានបំផ្លាញអាយុជីវិតរបស់ប្រជាពលរដ្ឋស្លូតត្រង់ និងទាហានដែលតស៊ូប្រយុទ្ធលើសមរភូមិ បន្សល់ទុកនូវកូនកំព្រា ស្ត្រី មេម៉ាយដែលគួរឱ្យឈឺចាប់ និងខ្លោចផ្សារជាទីបំផុត។ ពេលវេលានេះ គឺជាពេលដែលយើងទាំងអស់គ្នាត្រូវរួបរួមសាមគ្គីគ្នា ក្រោមស្មារតី ខ្មែរតែមួយ។ មន្ទីរពេទ្យកាល់ម៉ែត ក្នុងនាមជាមន្ទីរពេទ្យថ្នាក់ជាតិ និងជាមន្ទីរពេទ្យ ចងសម្ព័ន្ធមេត្រីភាពរបស់មន្ទីរពេទ្យបង្អែកខេត្តបាត់ដំបង បានផ្តល់ការគាំទ្រជានិច្ច ដោយយើងបានបញ្ជូនក្រុមគ្រូពេទ្យឯកទេសវះកាត់ និងរថយន្តសាមុយចំនួន ០១ គ្រឿង មកជួយភ្លាមៗតាំងពីថ្ងៃទី២៥ ខែកក្កដា ឆ្នាំ២០២៥ ព្រមទាំងបានបញ្ជូន ឱសថសំខាន់ៗសម្រាប់ប្រើប្រាស់ក្នុងការងារវះកាត់ និងសង្គ្រោះបន្ទាន់។ នាថ្ងៃ នេះយើងបាននាំមកជូនឱសថបរិក្ខារពេទ្យបន្ថែមសម្រាប់ជូនរដ្ឋបាលខេត្តបាត់ដំបង ដែលមានតម្លៃ 4,813.60$ (បួនពាន់ ប្រាំបីរយដប់បីដុល្លារអាមេរិក និងហុកសិបសេន) និងឃីត(Kit)ចំនួន 600 គិតជាទឹកប្រាក់ស្មើនឹង 13,945.78$ (ដប់បីពាន់ ប្រាំបួនរយសែសិបប្រាំដុល្លារអាមេរិក និងចិតសិបប្រាំបីសេន)។ មន្ទីរពេទ្យកាល់ម៉ែត នៅតែបន្តគាំទ្រយ៉ាងពេញទំហឹងចំពោះតម្រូវការចាំបាច់នានាទាំងធនធានមនុស្ស ឧបករណ៍ និងសម្ភារៈបរិក្ខារពេទ្យសម្រាប់ជួយដល់រដ្ឋបាលខេត្តបាត់ដំបង ជាពិសេសនៅមន្ទីរពេទ្យបង្អែកខេត្តបាត់ដំបង និងមន្ទីរពេទ្យស្រុកបវេល ដើម្បីជួយសង្គ្រោះអាយុជីវិតបងប្អូនប្រជាពលរដ្ឋ ព្រមទាំងបងប្អូនកងទ័ព ឱ្យអស់លទ្ធភាពស្របតាមគោលការណ៍ “មិនបោះបង់ពលរដ្ឋណាម្នាក់” របស់រាជរដ្ឋាភិបាលកម្ពុជា។ នៅថ្ងៃនេះក្រុមការងារយើងបាននាំយកមកនូវឱសថ និងបរិក្ខារមានតម្លៃសរុប 6,512$ ព្រមទាំងឧបករណ៍បរិក្ខារសំខាន់ៗ សម្រាប់ការវះកាត់ បឋម និងសង្គ្រោះបន្ទាន់រួមមាន៖១- Ventilator =04 គ្រឿង២- Patient monitor =07 គ្រឿង៣- Vital sign monitor =01 គ្រឿង៤- Suction unit =02 គ្រឿង៥- Syringe pump =04 គ្រឿង៦- ECG =01 គ្រឿង៧- ESU =02 គ្រឿង៨- Mobile Led lamp = 01៩- Electric outlet manifold oxygen=01set/5pre។ឆ្លៀតក្នុងឱកាសនេះ ឯកឧត្តមសាស្រ្តាចារ្យ គង់ សន្យា សូមថ្លែងអំណរគុណចំពោះឯកឧត្តមអភិបាលខេត្តបាត់ដំបង មន្ទីរសុខាភិបាលខេត្ត ប្រធានមន្ទីរពេទ្យបង្អែក ប្រធានមន្ទីរពេទ្យស្រុកបវេល មន្ត្រី-បុគ្គលិកសុខាភិបាលទាំងអស់ ដែលបានខិតខំយកចិត្តទុកដាក់ខ្ពស់សហការជាមួយមន្ទីរពេទ្យថ្នាក់ជាតិ ផ្តល់សេវាសុខាភិបាលជូនអ្នកជំងឺពីគ្រប់មជ្ឈដ្ឋាន និងការជួយឧបត្ថម្ភគាំទ្រនានាដល់ជនភៀសសឹកបានយ៉ាងរលូន។ សូមថ្លែងអំណរគុណដល់ក្រុមគ្រូពេទ្យនៃមន្ទីរពេទ្យកាល់ម៉ែតដែលចូលរួមសហការក្នុងការងារពិនិត្យ ព្យាបាលអ្នកជំងឺ និងសូមថ្លែងអំណរគុណដល់ក្រុមការងារទាំងអស់នៃមន្ទីរពេទ្យកាល់ម៉ែត ដែលបានរៀបចំ និងផ្គត់ផ្គង់សម្ភារៈនានាសម្រាប់បំពេញតម្រូវការដល់រដ្ឋបាលខេត្តបាត់ដំបង។ ឯកឧត្តមអគ្គនាយកមនី្ទរពេទ្យកាល់ម៉ែត សង្ឃឹមថាបងប្អូនទាំងអស់ នឹងចូលរួមក្នុងបេសកម្មមួយនេះ ក្នុងបុព្វហេតុជាតិ យើងទាំងអស់គ្នា រួមសាមគ្គីគ្នា ដើម្បីរក្សាភាពឈ្នះលើសត្រូវ៕អត្ថបទ រដ្ឋា

ឯកឧត្តមទេសរដ្ឋមន្រ្តី លី ធុជ ចាត់ទុកការប្រយុទ្ធប្រឆាំងនឹងគ្រាប់មីន មិនមែនគ្រាន់តែជាការទទួលខុសត្រូវរបស់កម្ពុជាប៉ុណ្ណោះទេ វាគឺជាការទទួលខុសត្រូវរួមរបស់ពិភព លោកទាំងមូល

2025/07/28 04:07:54 pm        177
Facebook Telegram Linkin
(ភ្នំពេញ) ឯកឧត្តមបណ្ឌិត លី ធុជ បានចាត់ទុកការប្រយុទ្ធប្រឆាំងនឹងគ្រាប់មីនមិន មែនគ្រាន់តែជាការបទទួលខុសត្រូវរបស់កម្ពុជាប៉ុណ្ណោះទេ វាគឺជាការទទួលខុសត្រូវរួមរបស់ពិភពលោកទាំងមូល។ ការលើកឡើងបែបនេះ ក្នុងឱកាសដែល ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន អញ្ជើញជាអធិបតីក្នុងពិធីចុះអនុស្សារណៈនៃការយោគ យល់គ្នារវាងអាជ្ញាធរមីន អង្គការមនុស្សធម៌អន្តរជាតិកូរ៉េ (GPI) និងអង្គការដោះមីនកម្ពុជា (CSHD) ដើម្បីគាំទ្រដល់ការងារបោសសម្អាតមីននៅខេត្តសៀមរាប ថ្ងៃទី២៨ ខែកក្កដា ឆ្នាំ២០២៥ន។ជាមួយគ្នានោះ ឯកឧត្តម លី ធុជ បញ្ជាក់ថា រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានចាត់ទុកវិស័យសកម្មភាពមីន ជាការរួមចំណែកក្នុងការលើកកម្ពស់មិនត្រឹមតែផ្តល់សុខសុវត្ថិភាពប៉ុណ្ណោះទេ ប៉ុន្តែជាមូលដ្ឋានគ្រឹះនៃការកសាងសន្តិភាព គាំទ្រដល់សន្តិសុខស្បៀង ការកាត់បន្ថយភាពក្រីក្រ ការអភិវឌ្ឍ និងកំណើនសេដ្ឋកិច្ច ជាដើម។ តាងនាមឱ្យរាជរដ្ឋាភិបាលកម្ពុជា ឯកឧត្តមបណ្ឌិត លី ធុជ បានថ្លែងអំណរគុណដល់អង្គការមនុស្សធម៌អន្តរជាតិកូរ៉េ ដែលបានប្តេជ្ញាចិត្តរួមគ្នាជាមួយកម្ពុជាចំពោះសន្តិភាព ការអភិវឌ្ឍ និងកិច្ចសហប្រតិបត្តិការមនុស្សធម៌ តាមរយៈការរួមចំណែកក្នុងការដោះស្រាយការគំរាមកំហែងនៃគ្រាប់មីន និងសំណល់ជាតិផ្ទុះពីសង្គ្រាម។ ឯកឧត្តមទេសរដ្ឋមន្រ្តី លី ធុជ ក៏បានសូមកោតសរសើរ និងវាយតម្លៃចំពោះការគាំទ្ររបស់អង្គការមនុស្សធម៌អន្តរជាតិកូរ៉េ ដែលបានផ្តល់នូវទំនុកចិត្តដល់រាជរដ្ឋាភិបាលកម្ពុជា និងបានរួមចំណែកក្នុងការផ្លាស់ប្តូរស្ថានភាពរស់នៅរបស់ប្រជាពលរដ្ឋ តាមរយៈការជួយសង្រ្គោះអាយុជីវិត ការស្តារសហគមន៍ឡើងវិញ ការបង្កើតសេចក្តីសង្ឃឹមថ្មី និងកសាងភាពថ្លៃថ្នូរ ជាពិសេសរួមចំណែកក្នុងការសម្រេចបាននូវចក្ខុវិស័យដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងការប្តេជ្ញាចិត្តកសាងអនាគតមួយដែលប្រជាជនកម្ពុជាគ្មានការភ័យខ្លាចពីគ្រាប់មីន។ ពិធីនេះ ប្រព្រឹត្តិទៅនៅទីស្នាក់អាជ្ញាធរមីន ដែលចុះហត្ថ លេខាដោយ អាជ្ញាធរមីន តំណាងដោយ ឯកឧត្តម លី បញ្ញារិទ្ធិ៍ អគ្គលេខាធិការ អង្គការមនុស្សធម៌អន្តរជាតិកូរ៉េ តំណាងដោយ លោក Lee Jongsun អនុប្រធាន និងអង្គការដោះមីនកម្ពុជា តំណាងដោយ លោកស្រី អ៊ឹង សុខចេង នាយិការប្រតិបត្តិ ក្នុងគោលបំណងដើម្បីរួមចំណែកក្នុងការលើកកម្ពស់ផលិតភាពកសិកម្ម និងការជំរុញលទ្ធភាពទទួលបានដីកសិកម្មប្រកបដោយសុវត្ថិភាពសម្រាប់ប្រជាពលរដ្ឋខេត្តសៀមរាប ដែលកំពុងរស់នៅក្នុងតំបន់រងផលប៉ះពាល់ដោយសារមីននិងសំណល់ជាតិផ្ទុះពីសង្គ្រាម៕ អត្ថបទ.ភារម្យ

កិច្ចចរចាបទឈប់បាញ់រវាងកម្ពុជា និងថៃបានចាប់ផ្តើម ក្រោមការសម្របសម្រួលរបស់ម៉ាឡេស៊ី និងមានការចូលរួមពីតំណាងអាមេរិក និងចិន

2025/07/28 03:01:44 pm        945
Facebook Telegram Linkin
ភ្នំពេញ៖ នៅរសៀលថ្ងៃទី២៨ ខែកក្កដានេះ កិច្ចចរចាបទឈប់បាញ់រវាងកម្ពុជា និងថៃ ចាប់ផ្តើមហើយ ក្រោមការសម្របសម្រួលរបស់ម៉ាឡេស៊ី ដោយមានការចូលរួមពីតំណាងអាមេរិក និងចិន នៅទីក្រុងកូឡាឡាំពួរ ប្រទេសម៉ាឡេស៊ី ដើម្បីសម្រេចឱ្យមានបទឈប់បាញ់គ្នាបន្ទាន់ ខណៈកិច្ចប្រជុំនេះនាយករដ្ឋមន្ត្រីនៃប្រទេសទាំងពីរកម្ពុជា និងថៃបានឯកភាពគ្នាតាមគំនិតផ្ដួចផ្ដើមរបស់ ឯកឧត្តម Donald Trump ប្រធានាធិបតីសហរដ្ឋអាមេរិក។ជំនួបនេះធ្វើឡើងនៅទីក្រុងកូឡាឡាំពួរ ដែលក្រោមការសម្របសម្រួលរបស់នាយករដ្ឋមន្រ្តីម៉ាឡេស៊ី លោក Anwar Ibrahim ដោយមានការសហការរៀបចំដោយសហរដ្ឋអាមេរិក និងមានការចូលរួមពីតំណាងប្រទេសចិន ដើម្បីពិភាក្សាគ្នាសម្រេចឱ្យមានបទឈប់បាញ់គ្នាជាបន្ទាន់រវាងកម្ពុជា-ថៃ។កិច្ចចរចានេះ ត្រូវបានប្រកាសរៀបចំឡើង ក្រោយប្រធានាធិបតីអាមេរិក លោក ដូណាល់ ត្រាំ ជំរុញឱ្យភាគីជម្លោះទាំង២ស្វែងរកដំណោះស្រាយបិទបញ្ចប់ជម្លោះ។ លោកប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ បាននិយាយថា លោកជឿថា កម្ពុជា-ថៃ ចង់ផ្សះផ្សាជម្លោះនឹងគ្នាបន្ទាប់ពីរូបលោកបានប្រាប់មេដឹកនាំនៃប្រទេសទាំងពីរថា លោកនឹងមិនចុះកិច្ចព្រមព្រៀងពាណិជ្ជកម្មជាមួយប្រទេសទាំងពីរឡើយ លុះត្រាតែការវាយប្រយុទ្ធគ្នាត្រូវបានបិទបញ្ចប់៕

ប្រជាពលរដ្ឋភៀសសឹក​ ៥០០០​ គ្រួសារ​ ទទួលអំណោយមនុស្សធម៌ពីសម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន

2025/07/28 02:58:50 pm        148
Facebook Telegram Linkin
ភ្នំពេញ ៖ នៅព្រឹកថ្ងៃទី២៨​ ខែកក្កដា​ ឆ្នាំ​២០២៥នេះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ អមដោយថ្នាក់ដឹកនាំ​ និងភរិយាថ្នាក់​ដឹកនាំ បានអញ្ជេីញចុះជួបសំណេះសំណាល​ សួរសុខទុក្ខ​ និងផ្តល់អំណោយជូនប្រជាពលរដ្ឋភៀសសឹកចំនួន៥០០០គ្រួសារ​ មកពីឃុំចំនួន៦ក្នុងចំណោមឃុំទាំង៨នៃស្រុកជាំក្សាន្តខេត្តព្រះវិហារ​ ។យោងតាមរបាយការណ៍ឯកឧត្តម​ គីម​ រិទ្ធី​ អភិបាលខេត្តព្រះវិហារ​ និងជាប្រធានគណ:កម្មាធិការ​ សាខាកាកបាទក្រហមកម្ពុជា​ខេត្ត​ បានឲ្យដឹងថា​ ៖​  មកដល់ថ្ងៃទី២៧ ខែកក្កដា ឆ្នាំ២០២៥នេះ ប្រជាពលរដ្ឋ ៦ឃុំ លើ៨ឃុំ នៃស្រុកជាំក្សាន្ត បានជម្លៀសចេញពីឃុំ សរុបចំនួន ១១,៥៥៨គ្រួសារ ស្មើនឹង ២៧,០៥៣នាក់​ បងប្អូនមួយចំនួនក៏បានទៅស្នាក់នៅផ្ទះសាច់ញាតិ និងផ្ទះមិត្តភក្តិ។ដោយទ្បែក ប្រជាជនបានមកទីតាំងមានសុវត្ថិភាពចំនួន ១៥កន្លែង ទូទាំងខេត្តព្រះវិហារ សរុបមានចំនួន ៥,៨៥៥គ្រួសារ ស្នើនឹង១៩,៩៤៣នាក់។ក្នុងឱកាសជួបសំណេះសំណាលសួរសុខទុក្ខជាមួយប្រជាជនភៀសសឹកទាំងអស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មានក្តីក្តុកក្តួលរំជួលចិត្ត អាណិតអាសូរយ៉ាងក្រៃលែងជាមួយលោកយាយលោកតា បងប្អូនជនភៀសសឹកទាំងអស់ ដែលបង្ខំចិត្តចាកចោលផ្ទះសម្បែងព្រាត់ប្រាសគ្រួសារដោយសារសង្គ្រាម។ ទន្ទឹមនឹងនេះដែរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានពាំនាំនូវព្រះរាជបន្ទូលនិងព្រះសវណីយ៍ ផ្តាំផ្ញើសុខទុក្ខ និងក្តីនឹករលឹក អាណិតអាសូរ ពីព្រះករុណា ព្រះមហាក្សត្រ ជាអម្ចាស់ជីវិតលើត្បូង និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាល ព្រះអង្គទាំងទ្វេតែងតែគិតគូរពីសុខទុក្ខរបស់បងប្អូនប្រជានុរាស្ត្រនៅគ្រប់ទីកន្លែង ថ្វីបើព្រះអង្គមិនបានយាងមកជួបលោកយាយលោកតា មាមីង បងប្អូន កូនក្មួយដោយផ្ទាល់ក៏ដោយ។ សម្តេចប្រធាន​ បានបញ្ជាក់ថា​ ៖​ ទោះបីជាស្ថិតក្នុងកាល:ទេស:ណាក៏ដោយរាជរដ្ឋាភិបាលក៏ដូចជា កាកបាទក្រហមកម្ពុជា​ នៅតែគិតគូរយកចិត្តទុកដាក់ដល់ប្រជាពលរដ្ឋគ្រប់ពេលវេលា​ ជាពិសេសបងប្អូនប្រជាពលរដ្ឋភៀសសឹករស់នៅតាមបន្ទាត់ព្រំដែនដែលរងគ្រោះដោយគ្រាប់ផ្លោងរបស់កងទ័ពឈ្លានពានសៀម​ តាំងពីថ្ងៃទី២៤​ ខែកក្កដា រហូតមកដល់ពេលនេះ ធ្វេីបាត់បង់សេចក្តីសុខ​ សុភមង្គល​ ក្នុងក្រុមគ្រួសារ​ និងការសិក្សារបស់កូនៗចៅៗ​ ។ដោយមេីលឃេីញពីទុក្ខលំបាកវេទនាទាំងអស់នេះហេីយ​ ទេីបថ្ងៃនេះ កក្រក​ បាននាំយកគ្រឿងឧបភោគបរិភោគ​ និងសម្ភារ:ប្រេីប្រាស់មួយចំនួនជូនបងប្អូននាពេលនេះ​ ដើម្បីជួយសម្រាលជីវភាពប្រជាពលរដ្ឋ។ប្រជាពលរដ្ឋភៀសសឹកដែលទទួលអំណោយបានថ្លែងអំណរគុណយ៉ាងជ្រាលជ្រៅចំពោះទឹកចិត្ត​ និងការគិតគូរ​ សម្តេចប្រធាន​ពីជិវភាពរស់នៅរបស់ពួកដោយមិនទុកពួកគាត់ចោល​។ ពួកគាត់បន្តថា​ មានតែមាតាមនុស្សធម៌នៃកម្ពុជា ដែលតែងយកចិត្តទុក្ខដាក់គិតគូរខ្ពស់ចំពោះសុខទុក្ខប្រជាពលរដ្ឋជួបការលំបាកគ្រប់ពេលវេលាឆ្លៀតនៅក្នុងឱកាសនោះដែរ សម្ដេចគតិព្រឹទ្ធបណ្ឌិត បានស្នើសុំទៅដល់ក្រសួងការងារ និងបណ្ដុះបណ្ដាលវិជ្ជាជីវៈនិងមន្ទីរទាំង២៥ រាជធានីខេត្ត បង្កើតការិយាល័យទំនាក់ទំនង ជួយរកការងារជូនពលករមកពីប្រទេសថៃ ដើម្បីឲ្យពួកគាត់មានការងារធ្វើឡើងវិញ មានប្រាក់ចំណូលចិញ្ចឹមគ្រួសាររបស់ពួកគាត់ផងដែរ។ ហើយសម្ដេចប្រធានស្នើរសុំទៅដល់ពលករ ដែលទើបត្រឡប់មកសូមកុំត្រឡប់ទៅប្រទេសថៃវិញ។ ព្រោះជនជាតិថៃមិនស្រឡាញ់យើងនោះទេ ពួកគេមើលងាយយើងគ្រប់ពេលវេលា។ជាមួយគ្នានេះដែរសម្ដេចបានអំពាវនាវទៅដល់ប្រជាជនភៀសសិកទាំងអស់ដែលកំពុងរស់នៅទីនេះ ថែរក្សាសុខភាពឱ្យបានល្អ ពិសារទឹកដាំឆ្អិន ស្ត្រីមានផ្ទៃពោះទៅពិនិត្យសុខភាពឲ្យបានទៀងទាត់ កុំឱ្យកុមារតូចៗលេងទឹកចៀសចៀសវាងគ្រោះថ្នាក់ដោយយថាហេតុ។សូមជម្រាបថា​ ៖​ អំណោយដែលចែកជូននាពេលនេះក្នុងមួយគ្រួសារៗ​ ទទួលបាន​ អង្ករ​ ៣០​ គីឡូ​ មី១កេស​ ត្រី១០កំប៉ុង​ ទឹកស៉ីអ៉ីវ៣ដប​ ទឹកត្រី៣ដប​ ឃីត១​ (​ មុងក្រមា​ ភួយ​ សារុង​ )​ សាប៊ូដុសខ្លួន១ដប​ ម្សៅសាប៊ូ១គីឡូក្រាម​ ថ្នាំដុសធ្មេញមួយទីប​ ច្រាស់ដុះធ្មេញ១ដេីម​ និងថវិកា​ ៥ម៉ឺន​ អំណោយជាស្បៀង សម្ភារ​:​ និងថវិកា​ទាំងនេះគឺជា ជាអំណោយបានមកពីសប្បុរសជន​ក្នុងឱកាសទិវា 8 ឧសភា។សម្រាប់ទែយ្យទានប្រគេនវត្តពោធិ៍ប្រាំពាន់ដើមរួមមាន៖ អង្ករ២០០គីឡូក្រាម, មី១០កេស, ស្ករស១០ គីឡូក្រាម, តែ៥គីឡូក្រាម, ទឹកក្រូច១០កេស, ទឹកសុទ្ធ១០កេស, សាច់ក្រក១២ គីឡូ ក្រាម, ត្រីងៀត ១២គីឡូក្រាម និងថវិកា៥លានរៀល។ ប្រគេន ព្រះចៅអធិការវត្តពោធិ៍៥ពាន់ដើម នូវបច្ច័យ២លានរៀល និងព្រះសង្ឃ៤អង្គ ១អង្គៗ ១លានរៀល។ ដោយឡែក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏មានសទ្ធាជ្រះថ្លាប្រគេនបច្ច័យ ចំនួន ១០.០០០ ដុល្លារទៀត សម្រាប់ចូលរួមកសាងព្រះពុទ្ធបដិមាក្នុងវត្តពោធិ៍៥ពាន់ដើម ផងដែរ។ ជាមួយគ្នានេះ គណៈប្រតិភូអមដំណើរ ក៏មានសទ្ធាជ្រះថ្លាចូលរួមកសាងបន្ថែម ក្នុងនោះមាន៖ ឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម និងលោកជំទាវ ថវិកា២០លានរៀល, ឯកឧត្តម គួច ចំរើន និងលោកជំទាវ អ៊ូ ធីតាពៅ ថវិកា ១ម៉ឺនដុល្លារ, អ្នកឧកញ៉ា ជឹង ធានសេង ថវិកា ១ម៉ឺនដុល្លារ, អ្នកឧកញ៉ា ម៉ម វណ្ណឌី ថវិកា ៤០លានរៀល, លោកជំទាវ ម៉ុក ប៉ូប៉ុនរិទ្ធ ពេជ សោភ័ន ថវិកា ១ពាន់ដុល្លារ, ឯកឧត្តម អ៊ុត ឈន និងលោកជំទាវ ថវិកា ១ពាន់ដុល្លារ, លោកជំទាវបណ្ឌិត អ៊ុក ម៉ាលី ថវិកា ១ពាន់ដុល្លារ, ឯកឧត្តម ហ៊ីវ គីមហេង និងលោកជំទាវ លឹម ស្រីពៅ ព្រមទាំងបុត្រនិងចៅ ថវិកា ១ពាន់ដុល្លារ, ឯកឧត្តម ឯក ឃុនឌឿន ថវិកា ១ពាន់ដុល្លារ, លោក សេង ទាំងវៀង និងភរិយា ១ពាន់ដុល្លារ, និងសប្បុរសជន ៥រូបទៀត ថវិកា ៥ពាន់ដុល្លារ។សូមជម្រាបជូនថា ក្នុងឱកាសនោះដែរ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ក៏បានឧបត្ថម្ភថវិកាចំនួន ២០០លានរៀល ជូនសាខាកាកបាទក្រហមកម្ពុជា ខេត្តព្រះវិហារ សម្រាប់បន្តក្នុងប្រតិបត្តិការជួយដល់ជនភៀសសឹកផងដែរ៕អត្ថបទ: សំ ងីម

កម្មកររោងចក្រគាំទ្រកងទ័ពជួរមុខ និងពលរដ្ឋភៀសសឹក ខណៈកំពុងតតាំង​ការពារ​បូរណ​ភាព​ទឹកដី

2025/07/28 11:48:48 am        424
Facebook Telegram Linkin
ដើម្បីចូលរួមចំណែកក្នុងការការពារបូរណភាពដែនដី ដែលបង្ហាញ​ពី​ភាព​រួបរួម​ជាធ្លុង​មួយ ​នៃ​ខឿន​ការ​ពារ​ជាតិ​របស់កម្ពុជា កម្មករ-កម្មការិនីដែលកំពុងបម្រើការងារក្នុងវិស័យរោងចក្រ បាន​ចូល​​រួម​ជា​ថវិកា​ផ្ទាល់​ខ្លួន ដើម្បីជូនដល់កងទ័ពជួរមុខ និងសម្រាប់ជួយសម្រួលការលំបាក​របស់​ប្រជា​​ពលរដ្ឋ​ភៀស​សឹកម​កកន្លែងទីទួលសុវត្ថិភាព។លោក ផល ចិត្រា ប្រធានសហជីពដើម្បីសិទ្ធិការងារ នៃរោងចក្រកាត់ដេរ សេឌូណូ អ៊ិនវេសមេន ខេមបូឌា ហ្វេសិន ស្ថិតនៅខណ្ឌដង្កោ រាជធានីភ្នំពេញ បានឱ្យព័ត៍មាន ប៊ីធីវី ដឹងនៅព្រឹកថ្ងៃទី២៨ ខែ​កក្កដានេះថា តាមរយៈមូលនិធិសហភាពពលកម្មជាតិកម្ពុជា គឺឃើញ​មាន​ការ​ចូលរួ​ម​ជា​បន្ត​បន្ទាប់​របស់​កម្មករ-កម្មការិនី ដើម្បីបង្ហាញ​អំពី​មនោសញ្ចេត​នា​ដ៏​ជ្រាល​ជ្រៅ​ក្នុង​ការ​ចូល​រួម​គាំទ្រ​ស្មារតី​ស្នេហាជា​តិមាតុភូមិរបស់បងប្អូនវីរកងទ័ព ដែលបាននិង​កំពុង​ឈរ​ជើង​ការពារ​ទឹក​ដី​នៅ​តាម​ខ្សែប​ន្ទាត់ព្រំដែន និងប្រជាពលរដ្ឋដែលជម្លៀសពីតំបន់ព្រំដែន។ជាមួយសកម្មភាព និងទឹកចិត្តដ៏ល្អប្រពៃនេះ កម្មករ កម្មការិនី បាននិយាយឱ្យដឹងថា ទោះ​បី​ជា​មមា​ញឹក​ការងារនៅឆ្ងាយក៏ពិតមែន ប៉ុន្តែអារម្មណ៍ពួក​គា​ត់​គឺ​តែង​តែ​នឹក​ដល់​អំពី​សុខ​ទុក្ខ​របស់​កង​ទ័ព​ជួរ​មុខ និងប្រជាពលរដ្ឋភៀសសឹក ដែលកំពុង​ជួប​ទុក្ខ​លំបាក​យ៉ាង​ធ្ងន់​ធ្ងរ​លើ​ការ​ចាក​ចេញ​ពី​ភូមិ​ស្រុក​គេហដ្ឋាន​របស់ពួកគាត់។ពាក់ព័ន្ធទៅនឹងមូលនិធិនេះ សហជីពដើម្បីសិទ្ធិការងារ សង្ឃឹមជឿជាក់ថា នឹងមាន​ការ​ចូល​រួម​គាំទ្រ​ពី​កម្មករ កម្មការនីរោងចក្រទាំងអស់ ក៏ដូចជាប្រជាពលរដ្ឋទូទៅ ដើម្បីរួម​ចំណែក​ក្នុង​ការ​ជួយ​ដល់​វីរកងទ័ពដ៏អង់អាចក្លាហាន និងប្រជាពលរដ្ឋដែលជំលៀសពីតំបន់ព្រំដែន។ សហជីព​ដើម្បី​សិទ្ធិ​ការងារ បានបញ្ជាក់ឱ្យដឹងទៀតថា ការចូលជាមួយ​មូល​និធិ​សហភាព​ពលកម្ម​ជាតិ​កម្ពុជា ​នឹងត្រូវយកទៅដោយផ្ទាល់ដើម្បីប្រគល់ជូនកងទ័ព និងប្រជាពលរដ្ឋដោយផ្ទាល់ នៅ​ថ្ងៃ​ទី​២ ខែសីហា ឆ្នាំ២០២៥ខាងមុខនេះ៕ អត្ថបទ៖ ឈិត បូរ៉ាវី 

សម្ដេចធិបតី ដឹកដឹកនាំគណៈប្រតិភូកម្ពុជាចូលរួមកិច្ចប្រជុំពិសេសជាមួយភាគីថៃ ដើម្បីសម្រេចឱ្យមានបទឈប់បាញ់គ្នាបន្ទាន់

2025/07/28 11:18:38 am        533
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា នៅព្រឹកថ្ងៃទី១០ ខែកក្កដានេះ បានអញ្ជើញដឹកនាំប្រតិភូចូលរួមប្រជុំពិសេសនៅទីក្រុងគូឡាឡាំពួរ ប្រទេសម៉ាឡេស៊ី ដែលម៉ាឡេស៊ីធ្វើជាម្ចាស់ផ្ទះ អាមេរិកជាសហអ្នករៀបចំ និងការចូលរួមពីតំណាងប្រទេសចិន បើកកិច្ចប្រជុំជាមួយភាគីថៃដឹកនាំដោយលោកនាយករដ្ឋមន្ត្រីស្ដីទីថៃ Phumtham Wechayachai ដើម្បីសម្រេចឱ្យមានបទឈប់បាញ់គ្នាបន្ទាន់មួយរវាងប្រទេសទាំងពីរកម្ពុជា-ថៃ។សម្ដេចធិបតី នាយករដ្ឋមន្រ្ដីបានបញ្ជាក់តាមបណ្ដាញសង្គមហ្វេសប៊ុកថា កិច្ចប្រជុំពិសេសជាមួយភាគីថៃ នៅទីក្រុងកូឡាឡាំពួរ ប្រទេសម៉ាឡេស៊ី គឺដើម្បីសម្រេចឱ្យមានបទឈប់បាញ់គ្នាបន្ទាន់ ដែលនាយករដ្ឋមន្ត្រីនៃប្រទេសទាំងពីរកម្ពុជានិងថៃ បានឯកភាពគ្នាតាមគំនិតផ្ដួចផ្ដើមរបស់ ឯកឧត្តម Donald Trump ប្រធានាធិបតីសហរដ្ឋអាមេរិក។សម្ដេចនាយករដ្ឋមន្រ្ដីបានលើកឡើងថា កិច្ចប្រជុំពិសេសនេះ ត្រូវបានសម្របសម្រួលដោយប្រទេសម៉ាឡេស៊ីជាម្ចាស់ផ្ទះ ប្រទេសអាមេរិកជាសហអ្នករៀបចំ និងមានការចូលរួមពីតំណាងនៃប្រទេសចិន៕

បណ្ដាញសង្គម

ព័ត៌មានថ្មីៗ

កម្ពុជា បដិសេធ និងចាត់ទុកជាការមួលបង្កាច់ចំពោះការផ្សាយរបស់សារព័ត៌មានថៃចោទប្រកាន់កម្ពុជាថា បានបាញ់ចំនួន ១១គ្រាប់ នៅទីតាំងច្រកអន្តរជាតិអូស្មាច់
05/13/2026 10:05 PM
Facebook Telegram Linkin
[UPDATE] លោក Trump ធ្វើដំណើរទៅដល់ទីក្រុងប៉េកំាង សម្រាប់ជំនួបកំពូលជាមួយប្រធានធិបតីចិន
05/13/2026 09:05 PM
Facebook Telegram Linkin
ស្រ្តីជាម្តាយប៉ាឡេស្ទីនសោកសៅចំពោះការរំឭកដល់ការចងចាំដ៏ជូរចត់នៃសង្រ្គាមនៅតំបន់ហ្កាហ្សា
05/13/2026 09:05 PM
Facebook Telegram Linkin
អង្គការណាតូអញ្ជើញកាតា អារ៉ាប់រួម បារ៉ែន និងគូវ៉ែត ចូលរួមកិច្ចប្រជុំកំពូល Ankara
05/13/2026 08:05 PM
Facebook Telegram Linkin
វិមានក្រឹមឡាំង៖ រុស្ស៊ីអាចធ្វើអាជីវកម្មជាមួយអាមេរិក បើឈប់យកបញ្ហាពាណិជ្ជកម្មទៅពាក់ព័ន្ធអ៊ុយក្រែន
05/13/2026 08:05 PM
Facebook Telegram Linkin
មនុស្សជាង ១.៧០០នាក់ត្រូវឃុំខ្លួនលើនាវាទេសចរណ៍នៅបារាំង ក្រោយសង្ស័យមានអ្នកស្លាប់ដោយវីរុសណូរ៉ូ
05/13/2026 08:05 PM
Facebook Telegram Linkin
ទាហាន និងផ្សែងហុយត្រូវបានមើលឃើញនៅតាមបណ្តោយព្រំដែនអ៊ីស្រាអែល-លីបង់ ខណៈការប្រយុទ្ធគ្នានៅតែបន្ត
05/13/2026 08:05 PM
Facebook Telegram Linkin
វិទ្យាសា្ថនសុខាភិបាលហូឡង់បន្ទាបហានិភ័យនៃការរីករាលដាលឆ្លងវីរុស Hanta
05/13/2026 07:05 PM
Facebook Telegram Linkin
របាយការណ៍៖ ការជ្រើសរើសទាហានថ្មីរបស់បែលហ្ស៊ិក ឈានដល់កម្រិតខ្ពស់បំផុត ដោយមានទាហានថ្មីជិត ៣.០០០នាក់
05/13/2026 07:05 PM
Facebook Telegram Linkin
UPDATE | សំឡេងកាំភ្លើងបាន​បន្លឺឡើង ខណៈភាពច្របូកច្របល់​កើតមាន​នៅព្រឹទ្ធសភាហ្វីលីពីន
05/13/2026 07:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.