នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ទេសាភិបាលធនាគារជាតិ អញ្ជើញចុះសួរសុខទុក្ខ​ប្រជាពលរដ្ឋ​មកព្យាបាល​ជំងឺភ្នែក​នៅ​មន្ទីរ​ពេទ្យ​រុស្សី
តំណាងថ្មី UNDP វាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការ​ជំរុញ​ការអភិវឌ្ឍលើគ្រប់វិស័យ
សាលាTVET រៀបចំស្តង់ពិព័រណ៍ប្រចាំការរង់ចាំទទួលអតីតពលករមកពីថៃ​ចុះឈ្មោះ​រកការងារ និង​រៀនជំនាញ
ក្រុមហ៊ុនអ័រគីដេ ឌីវែឡុបម៉ិន និងធនាគារចិន ចុះហត្ថលេខាយោគយល់គ្នាដើម្បីផ្តល់អត្រាការប្រាក់ពិសេសជូនដល់អតិថិជន

ព័ត៌មានជាតិ

ឧបនាយករដ្ឋមន្ត្រីប្រចាំការ វង្សី វិស្សុត ដឹកនាំគណៈប្រតិភូទៅចូលរួមពិព័រណ៍ចិន-អាស៊ាន លើកទី២១ នៅប្រទេសចិន

2024/09/23 06:54:34 pm        75
Facebook Telegram Linkin
ភ្នំពេញ៖ តាមការចាត់តាំងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, កាលពីព្រឹកថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានដឹកនាំគណៈប្រតិភូទៅចូលរួមពិព័រណ៍ចិន-អាស៊ាន លើកទី២១ នៅទីក្រុងណាននីង តំបន់ស្វយ័តក្វាងស៊ី ប្រទេសចិន ដោយមានការចូលរួមអមដំណើរដោយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងមន្រ្តីជាន់ខ្ពស់នៃទីស្តីការគណៈរដ្ឋមន្ត្រី និងក្រសួងពាណិជ្ជកម្ម។ ពិព័រណ៍ចិន-អាស៊ាន លើកទី២១ ឆ្នាំ២០២៤នេះ នឹងប្រព្រឹត្តទៅចាប់ពីថ្ងៃទី២៤-២៨ ខែកញ្ញា ឆ្នាំ២០២៤ ក្រោមប្រធានបទ «លើកកម្ពស់មិត្តភាព, ស្មោះត្រង់រួមគ្នា, អភិវឌ្ឍន៍ និងចែករំលែកផលប្រយោជន៍ ប្រកបដោយបរិយាប័ន្ន ក្នុងក្របខណ្ឌសហប្រតិបត្តិការត្បូងពេជ្រ ដើម្បីអនាគតថ្មី និងជំរុញការអភិវឌ្ឍតំបន់ពាណិជ្ជកម្មសេរី ៣.០ រវាងចិន-អាស៊ាន ដើម្បីកំណើនក្នុងតំបន់»។តាមកម្មវិធី ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នឹងឡើងថ្លែងសុន្ទរកថាបើកពិព័រណ៍ចិន-អាស៊ាន លើកទី២១។ ឯកឧត្តមឧបនាយករដ្ឋមន្ត្រីប្រចាំការ ក៏នឹងកាត់ខ្សែបូសម្ពោធស្តង់ពិព័រណ៍កម្ពុជា និងកាត់ខ្សែបូសម្ពោធពន្លាជាតិ កម្ពុជាផងដែរ ដោយមានការចូលរួមពីថ្នាក់ដឹកនាំ និងមន្រ្តីជាន់ខ្ពស់ក្រសួងពាណិជ្ជកម្ម ព្រមទាំងវិនិយោគិន ធុរជន ពាណិជ្ជករ និងអាជីវករជាច្រើននាក់។ ក្នុងឱកាសនោះដែរ ឯកឧត្តមឧបនាយករដ្ឋមន្ត្រីប្រចាំការ ក៏នឹងមានជំនួបពិភាក្សាការងារជាមួយឯកឧត្តម Ding Xuexiang ឧបនាយករដ្ឋមន្ត្រី នៃសាធារណរដ្ឋប្រជាមានិតចិន និងឯកឧត្តម Lan Tianli អភិបាលនៃតំបន់ស្វយ័តក្វាងស៊ីផងដែរ។ការចូលរួមពិព័រណ៍ចិន-អាស៊ាននេះ ក្នុងគោលបំណងដើម្បីផ្សព្វផ្សាយពីផលិតផលសក្តានុពលរបស់កម្ពុជាស្វែងរកទីផ្សារនាំចេញទំនិញពីកម្ពុជា និងពង្រឹងភាពជាម្ចាស់នៃវិស័យឯកជនឱ្យមានបណ្តាញជាអន្តរជាតិ, ទាក់ទាញវិនិយោគិនឱ្យមកវិនិយោគនៅកម្ពុជា តាមរយៈការរៀបចំវេទិកាធុរកិច្ច និងកិច្ចពិភាក្សាធុរកិច្ច, ពង្រឹងកិច្ចសហប្រតិបត្តិការល្អលើវិស័យសេដ្ឋកិច្ច ពាណិជ្ជកម្ម ការទូតរវាងកម្ពុជា-ចិន និងរវាងកម្ពុជាជាមួយបណ្តាប្រទេសនានាក្នុងតំបន់ ជាពិសេសប្រទេសក្នុងតំបន់អាស៊ាន និងផ្សព្វផ្សាយវប្បធម៌ អរិយធម៌ និងទាក់ទាញភ្ញៀវទេសចរ។ ដូចនេះ ការចូលរួមពិព័រណ៍ពាណិជ្ជកម្មចិន-អាស៊ានលើកទី២១នេះ គឺជាឱកាសដ៏ល្អសម្រាប់កម្ពុជា ក្នុងការចូលរួមវេទិកាពាណិជ្ជកម្មនានា និងរៀបចំវេទិកាជំរុញសកម្មភាពពាណិជ្ជកម្ម និងវិនិយោគរបស់កម្ពុជា។ តាមការគ្រោងទុកកម្ពុជានឹងមានការរៀបចំវេទិកាជំរុញធុរកិច្ច វិនិយោគ និងទេសចរណ៍កម្ពុជា-ចិន និងពិធីចុះកិច្ចសន្យាពាណិជ្ជកម្មរវាងក្រុមហ៊ុនចិន និងក្រុមហ៊ុនកម្ពុជា ក្នុងអំឡុងពេលកម្ពុជាចូលរួមពិព័រណ៌ដ៏មានសារសំខាន់នេះ៕

រដ្ឋមន្រ្ដីក្រសួងអធិការកិច្ចដឹកនាំកិច្ចប្រជុំផ្ទៃក្នុងជាលើកដំបូងជាមួយថ្នាក់ដឹកនាំ និងមន្រ្តីរាជចំណុះក្រសួង

2024/09/23 06:51:04 pm        50
Facebook Telegram Linkin
ភ្នំពេញ ៖ នៅព្រឹកថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម សុខ សូកេន រដ្ឋមន្រ្តីក្រសួងអធិការកិច្ច បានអញ្ជើញដឹកនាំកិច្ចប្រជុំផ្ទៃក្នុងជាលើកដំបូងជាមួយថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃក្រសួងអធិការកិច្ច ដើម្បីធ្វើការសំណេះសំណាល សួរសុខទុក្ខ ក៏ដូចជាបង្កើតនូវភាពស្និទ្ធស្នាលនាឱកាសដែលឯកឧត្តមចូលកាន់តំណែងជា រដ្ឋមន្រ្តីក្រសួងអធិការកិច្ច។ឆ្លៀតក្នុងឱកាសនោះដែរ ឯកឧត្តមរដ្ឋមន្រ្តី បានគោរពថ្លែងអំណរគុណ និងដឹងគុណយ៉ាងជ្រាលជ្រៅបំផុតជូនចំពោះ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលបានផ្ដល់នូវជំនឿទុកចិត្ត និងឱកាសដល់ឯកឧត្តមដើម្បីបន្តចូលរួមជាមួយរាជរដ្ឋាភិបាលដើម្បីបុព្វហេតុជាតិមាតុភូមិ និងប្រជាជន។ ឯកឧត្តមរដ្ឋមន្រ្តីក៏បានគោរពថ្លែងអំណរគុណ និងកតញុតាធម៌ដ៏ខ្ពង់ខ្ពស់ជូនចំពោះ សម្ដេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ដែលកន្លងមកបានយកអស់កម្លាំងកាយចិត្ត ប្រាជ្ញាស្មារតី ចូលរួមដឹកនាំក្រសួងអធិការកិច្ចឱ្យទទួលបានផ្លែផ្កាគួរជាទីមោទនៈ និងភាពរីកចម្រើនជាច្រើនក្នុងវិស័យអធិការកិច្ចនាពេលកន្លងមក។ ឯកឧត្តមរដ្ឋមន្រ្តីក៏បានស្នើឱ្យថ្នាក់ដឹកនាំ និងមន្រ្តីរាជការទាំងអស់ក្នុងក្រសួងអធិការកិច្ចបន្តរួបរួមគ្នាដើម្បីពង្រឹងវិស័យអធិការកិច្ចទាំងក្នុងក្របខណ្ឌសាធារណៈ និងឯកជនសំដៅចូលរួមលើកកម្ពស់បន្ថែមទៀតទៅលើអភិបាលកិច្ចល្អ ពង្រឹងភាពស្អាតស្អំក្នុងប្រព័ន្ធរដ្ឋបាល និងទប់ស្កាត់អំពើអសកម្មនានា ទាំងក្នុងស្ថាប័នរដ្ឋ និងឯកជន។ឯកឧត្តមបន្តថា ដោយបន្តពីគោលនយោបាយនៃក្រសួងអធិការនៃអណត្តិទី៦ និងចូលរួមអនុវត្តយុទ្ធសាស្ត្រ បញ្ចកោណ-ដំណាក់កាលទី១ ក្រសួងអធិការកិច្ចនៃរដ្ឋាភិបាលអណត្តិទី៧នេះ តាំងពីនៅដើមអណត្តិបានដាក់ចេញចក្ខុវិស័យចំនួន ៤ រួមមាន៖ (១)ការពង្រឹងសមត្ថភាពស្ថាប័ន, (២)ការកសាង និងអភិវឌ្ឍន៍ធនធានមនុស្ស, (៣) ការរៀបចំច្បាប់ និងលិខិតបទដ្ឋានគតិយុត្ត នៅក្នុងសមត្ថកិច្ចក្រសួង, (៤) ការថែរក្សាបរិយាកាសសុខុដុមនីយកម្មនៅក្នុងក្រសួង និង អង្គភាពចំណុះ។ឯកឧត្តមបន្តថាស្របតាមយុទ្ធសាស្ត្របញ្ចកោណដំណាក់កាលទី១ និងអនុសាសន៍ដ៏ខ្ពង់ខ្ពស់របស់សម្តេចមហាបវរធីបតី ឯកឧត្តមរដ្ឋមន្រ្ដីបានកំណត់សសរស្តម្ភយុទ្ធសាស្ត្រស្ថាប័នដោយពិចារណាបន្ថែម ៣ ចំណុចទៀត សម្រាប់ក្រសួងអនុវត្តរួមមាន ទី១ ពង្រឹងការរៀបចំកម្មវិធីផ្សព្វផ្សាយច្បាប់ដើម្បីធានាតម្លាភាព និងការអនុវត្តច្បាប់ពេញលេញ ទី២ ជំរុញកិច្ចសហការ និងភាពជាដៃគូរដ្ឋ ឯកជន និងដៃគូសំខាន់ៗ ក្នុងគោលបំណងផ្លាស់ ប្តូរព័ត៌មាន និងបទពិសោធន៍ ដើម្បីប្រសិទ្ធភាពនៃការអនុវត្តច្បាប់ និងទី៣ រួមចំណែកក្នុងការប្រើប្រាស់បច្ចេកវិជ្ជាឌីជីថលដើម្បីពង្រឹងប្រសិទ្ធភាពនៃប្រតិបត្តិការអធិការកិច្ច និងដោះស្រាយបណ្តឹង៕

គណៈកម្មាធិការអន្តរក្រសួងចុះពិនិត្យការងារថែទាំផ្លូវជនបទចំនួន១០ខ្សែ សរុបប្រវែង ១០៤គីឡូ ក្នុងខេត្តពោធិ៍សាត់

2024/09/23 05:01:25 pm        702
Facebook Telegram Linkin
នៅថ្ងៃទី២៣ ខែកញ្ញា ឆ្នាំ២០២៤ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ​ក្រសួង​អភិវឌ្ឍន៍​ជន​បទ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមនិង​ឯកឧត្តម ហួត សារឹម អនុរដ្ឋលេខាធិការ បានអញ្ជើញដឹកនាំគណៈកម្មាធិការអន្តរក្រសួង រួម​មាន​ក្រសួង​អភិវឌ្ឍន៍ជនបទ និងក្រសួងសេដ្ឋកិច្ចនិងហិរញ្ញវត្ថុ ព្រមទាំងមន្ទីរជំនាញ ធ្វើ​ការ​ចុះ​ត្រួត​ពិនិត្យ និងវាយតម្លៃ លើការងារថែទាំជាប្រចាំផ្លូវជនបទចំនួន១០ខ្សែក្នុងខេត្តពោធិ៍សាត់ ។ លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់បានឱ្យដឹងថា ផ្លូវទាំង​១០​ខ្សែ​នេះ​មាន​ទទឹង​ចន្លោះពី៥ ម៉ែត្ររហូតដល់៨ម៉ែត្រ ហើយសរុបមានប្រវែង ១០៤គីឡូម៉ែត្រ និង៣៥០​ម៉ែត្រ ស្ថិតនៅតាមបណ្តាឃុំ-សង្កាត់ចំនួន១២ ក្នុងស្រុកបាកាន ស្រុកតាលោសែនជ័យ ស្រុក​ក្រគរ ស្រុកភ្នំក្រវាញ ស្រុកកណ្តៀង និងក្រុងពោធិ៍សាត់ ។ ចំពោះ​ការងារ​ថែ​ទាំ​ជា​ប្រចាំ​ផ្លូវ​ទាំ​ង​១០​ខ្សែ​នេះ គឺអនុវត្តន៍ដោយមន្ទីរអភិវឌ្ឍន៍ខេត្តពោធិ៍សាត់ ដោយប្រើប្រាស់ថវវិកាជំពូក៦១ ជា​ថវិការបស់រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ។ជាមួយគ្នានោះ ឯកឧត្តមបណ្ឌិត ចាន់ ដារ៉ុង រួមនិងគណៈកម្មាធិការអន្តរក្រសួង បាន​ជួប​សំណេះ​សំណាល​សួរសុខទុក្ខបងប្អូនប្រជាពលរដ្ឋដែលជាអ្នកអាស្រ័យផលផ្លូវទាំងនេះ ដោយឯកឧត្តម​បណ្ឌិត បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រី​ក្រសួង​អភិវឌ្ឍន៍ជនបទជូនដល់បងប្អូនប្រជាពលរដ្ឋ ហើយឯកឧត្តមបណ្ឌិតបានជម្រាបជូនថា គណៈ​កម្មាធិការអន្តរក្រសួងចុះមកក្នុងពេលនេះគឺដើម្បីធ្វើការត្រួតពិនិត្យ និងវាយតម្លៃ លើការ​អនុវត្តន៍​របស់​មន្ទីរអភិវឌ្ឍន៍ជនបទខេត្ត ក្នុងការងារថែទាំផ្លូវជនបទដែលបានកសាងកន្លងមក ជា​លទ្ធផលគណៈកម្មាធិការបានទទួលយក១០០ភាគរយក្នុងអនុវត្តន៍ការថែទាំបានល្អផ្លូវទាំង១០ខ្សែ​នោះ នៅមានគុណភាពល្អប្រសើរ អាចបន្ត​បម្រើ​ផល​ប្រយោជន៍​ជូន​បងប្អូន​ប្រជាពលរដ្ឋ​ក្នុង​ការ​ធ្វើដំណើរ និងដឹកកសិផល ។ ជាមួយគ្នានោះ ឯកឧត្តមបណ្ឌិត ចាន់ ដារ៉ុង បានជំរុញ ឱ្យ​បង​ប្អូន​ប្រជាពលរដ្ឋ និងអាជ្ញាធរ​មូលដ្ឋានត្រូ​វ​រួម​ចំណែក​ក្នុង​ការ​ថែ​រក្សា​ផ្លូវ​ទាំង​នោះ​ដើម្បី​ការ​ប្រើប្រាស់​បានយូរអង្វែងបន្ថែមទៀត ដោយកុំចាក់ដីលុបលូរំដោះទឹកដែលមានស្រាប់ ហើយ​ពេល​ចាក់​ដី​ខ្ពស់ជាងផ្លូវសុំដាក់លូរំដោះទឹក និងកុំទុកដាក់សម្ភារៈផ្សេងៗឬ ហាលស្រូវដំឡូងនៅលើផ្លូវ ព្រម​ទាំងត្រូវទបស្កាត់រថយន្តធំៗដឹកលើសទំងន់ ។ ឯកឧត្តមបណ្ឌិត ចាន់ ដារ៉ុង មាន​ប្រសាសន៍​បន្ត​ថា រាជរដ្ឋាភិបាលបច្ចុប្បន្នបាននិងកំពុងខិតខំអភិវឌ្ឍប្រទេសជាតិ លើគ្រប់​វិស័យ​ឱ្យ​កាន់​តែ​មាន​ភាព​រីកចម្រើនទៅមុខបន្ថែមទៀត ដោយបានដាក់ចេញនូវយុទ្ធសាស្ត្របញ្ចកោណ ដំណាក់​កាលទី១ ដែលបានកំណត់អាទិភាពគន្លឹះ៥ គឺ៖ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ក្រោម​បាវចនាដើម្បីកំណើន ការងារ សមធម៌ ប្រសិទ្ធភាព និងចីរភាព ក្នុងគោលដៅ​អភិវឌ្ឍ​ប្រទេស​ឈាន​ឆ្ពោះ​ទៅ​សម្រេច​ចក្ខុ​វិស័យ​កម្ពុជា​ជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ និងជាប្រទេសមានចំណូលខ្ពស់នៅឆ្នាំ២០៥០ ។ ជាមួយគ្នានោះ រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បាននឹងកំពុ​ង​ខិតខំ​ក្នុង​ការ​លុប​បំបាត់​ផ្លូវ​លំដី​សរ​ជន​បទ​មក​ជាផ្លូវ​ក្រាល​ក្រួសក្រហមជំនួសវិញ និងកំពុងកែប្រែផ្លូវ​ជនបទ​កាល​ក្រួស​ក្រហម​ឱ្យ​មក​ជា​ផ្លូវ​កៅ​ស៊ូ​រ​ជា​បន្តបន្ទាប់ ដើមជួយសម្រួលការលំបាករបស់ប្រជាពលរដ្ឋ ក្រៅពីការងារ​ស្ថាបនា​កសាង​ហេដ្ឋា​រចនា​សម្ធ័ន​ជនបទ ក្រសួងអភិវឌ្ឍន៍ជនបទ​បាន​យក​ចិត្ត​ទុក​ដាក់​ខ្ពស់​ផង​ដែរ​លើ​ការងារ​ថែ​ទាំ​ផ្លូវ​ដើម្បី​អាយុ​កាលប្រើប្រាស់បានយូរអង្វែង ៕

ខយ តេ បំបែកឯតទគ្គកម្ម «អ្នកបរិច្ចាគឈាមច្រើនជាងគេក្នុងមួយថ្ងៃ»

2024/09/23 04:44:27 pm        63
Facebook Telegram Linkin
ខយ តេ បានប្រកាសយ៉ាងមោទនអំពីភាពជោគជ័យ នៃយុទ្ធនាការបរិច្ចាគឈាមរបស់ខ្លួនជាមួយមជ្ឈមណ្ឌលជាតិផ្តល់ឈាមក្រោមឈ្មោះ «អ្នកជាវីរៈជន ឈាមអ្នកជីវិតគេ» ដោយបានបំបែកឯតទគ្គកម្ម «អ្នកបរិច្ចាគឈាមច្រើនជាងគេក្នុងមួយថ្ងៃ» នាឱកាសសម្ពោធ សាខាថ្មី ខយ តេ ២០០៤។ព្រឹត្តិការណ៍នេះ បានទាក់ទាញសធារណជនដ៏ច្រើនគួរឱ្យកត់សម្គាល់ ដោយមានអ្នកស្ម័គ្រចិត្តជិត ១០០០ នាក់មកពីជាង ១០ ប្រទេសចូលរួម។ ក្នុងចំណោមអ្នកចូលរួមយ៉ាងច្រើនសន្ធឹកសន្ធាប់នេះ អ្នកដែលអាចបរិច្ចាគឈាមបានមានចំនួនរហូតដល់ ៧៤៩ នាក់ ភាគច្រើនជាអ្នកបរិច្ចាគលើកដំបូង។ លោកស្រី ម៉ា យ៉ាហ្វិន ស្ថាបនិក និងជាអគ្គនាយិកា ខយ តេ គ្រុប បានចូលរួមបរិច្ចាគឈាម​ជាលើកដំបូង​ក្នុងជីវិតរបស់លោកស្រីហើយបង្ហាញការគាំទ្រយ៉ាងស្មោះស្ម័គ្រ និងសរសើរអំពីស្មារតីយុទ្ធនាការនេះ។ លោកស្រី ម៉ា បាននិយាយថា លោកស្រីពិតជាស្ងើចសរសើរចំពោះទឹកចិត្តសប្បុរស និងក្តីមេត្តាពីអ្នកចូលរួមគ្រប់គ្នា។ លោកស្រីបន្តថា នេះគឺជាសក្ខីភាពបញ្ជាក់ពីទឹកចិត្តសប្បុរស និងភាពរួបរួមគ្នារបស់ប្រជាជនកម្ពុជា។លោកឧកញ៉ា ឃន ឈុនដារ៉ា អគ្គនាយកក្រុមហ៊ុន ខយ តេ បានថ្លែងអំណរគុណ​ចំពោះអ្នកស្ម័គ្រចិត្តចូលរួមបរិច្ចាគឈាមទាំងអស់ និងក្រុមការងារនៅមជ្ឈមណ្ឌលជាតិផ្តល់ឈាម ដែលបានខិតខំប្រឹងប្រែងអស់ពីកម្លាំងកាយចិត្ត។ លោកបន្តថា ខយ តេ រៀបចំព្រឹត្តិការណ៍នេះ​ឡើងដើម្បីបង្កលក្ខណៈងាយស្រួលដល់​ប្រជាពលរដ្ឋក្នុងការបរិច្ចាគឈាម។ ខយ តេ ជ្រើសរើសថ្ងៃ១៨ កញ្ញា ព្រោះជាថ្ងៃបិណ្ឌ១នៃពិធីបុណ្យភ្ជុំបិណ្ឌ ដែលជានិមិត្ដរូប​នៃស្មារតីសប្បុរសធម៌​របស់ប្រជាជនកម្ពុជា។ លោកឧកញ៉ាបន្តថា ព្រឹត្តិការណ៍ដ៏មានអត្ថន័យនេះនឹងធ្វើឱ្យថ្ងៃសម្ពោធសាខាថ្មីរបស់​លោក​ឧកញ៉ាឱ្យកាន់តែមានន័យនឹងគួរឱ្យចងចាំ។ លោកស្នើនឹងលើកទឹកចិត្តដល់ស្ថាប័ន និងក្រុមហ៊ុនផ្សេងៗ ឱ្យព្យាយាមបំបែកកំណត់ត្រានេះ ដើម្បីឱ្យមានការយល់ដឹង និងសម្រេច​បាននូវការបរិច្ចាគឈាមពីសាធារណជនកាន់តែច្រើន។សូមជម្រាបថា ការបំបែកឯតទគ្គកម្មនេះ បានបញ្ជាក់ពីសេចក្ដីមោះមុត និងការប្តេជ្ញាដ៏ខ្លាំងក្លា​របស់ក្រុមហ៊ុន ខយ តេ ក្នុងការបង្កើតផលវិជ្ជមានជូនសង្គម។ ឈាមដែលបានបរិច្ចាគ​តាមរយៈអ្នកស្ម័គ្រចិត្តពីយុទ្ធនាការនេះនឹងជួយក្រុមគ្រូពេទ្យសង្គ្រោះជីវិតមនុស្សទូទាំងប្រទេសកម្ពុជា។ក្នុងឱកាសនោះលោកឧកញ៉ា ឃន ឈុនដារ៉ា បានថ្លែងអំណរគុណយ៉ាងជ្រាលជ្រៅ​ទៅ​កាន់​អ្នកស្ម័គ្រ​ចិត្តចូលរួមបរិច្ចាគឈាម និងដៃគូសហការទាំងអស់ដែលបានរួមចំណែក​ធ្វើឱ្យព្រឹត្តិការណ៍នេះ​ ទទួលបានភាពជោគជ័យយ៉ាងក្រៃលែង។ លោកបន្តថា រាល់តំណក់ឈាមគឺមានសារសំខាន់ ​និងរាល់ការបរិច្ចាគអាចជួយសង្គ្រោះជីវិតមនុស្ស៕

មន្រ្តីជាន់ខ្ពស់ក្រសួងមហាផ្ទៃ ជំរុញឲ្យអភិបាលរងខេត្តថ្មី ត្រូវបម្រើសេវាជូនពលរដ្ឋឲ្យមានតម្លាភាព និងប្រសិទ្ធភាពខ្ពស់

2024/09/23 04:30:51 pm        641
Facebook Telegram Linkin
ឧត្ដរមានជ័យ៖ មន្រ្តីជាន់ខ្ពស់ក្រសួងមហាផ្ទៃ បានជំរុញដល់អភិបាលរងខេត្តឧត្ដរមានជ័យ ដែលទើបតែតែងតាំងថ្មី ត្រូវចេះសហការការងារជាថ្លុងមួយ សាមគ្គីផ្ទៃក្នុងឲ្យបានល្អ និងបម្រើការងារផ្តល់សេវានានាជូនប្រជាពលរដ្ឋឲ្យមានតម្លាភាព និងប្រសិទ្ធភាពខ្ពស់។មានប្រសាសន៍បែបនេះ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ក្នុងឱកាសចូលរួមប្រកាសមុខតំណែងអភិបាលរងនៃគណៈអភិបាលខេត្តឧត្តរមានជ័យ នាថ្ងៃទី២៣ ខែកញ្ញាឆ្នាំ២០២៤នេះ ។ ក្នុងនោះសម្រេចតែងតាំងមុខតំណែងលោក ស៊ឹម វុទ្ធា ជាអភិបាលរង​ខេត្តឧត្តរមានជ័យ ជំនួសលោក ឌី រ៉ាដូ ដែលត្រូវផ្លាស់ប្តូរទៅកាន់​ជាអភិបាលរងខេត្តសៀមរាប ។ឯកឧត្តម ប៊ុន ហុន បានណែនាំបន្ថែមទៀតថា រដ្ឋបាលខេត្តត្រូវបង្កើនការយកចិត្តទុកដាក់​ឲ្យបាន​ខ្ពស់ ក្នុងការផ្សព្វផ្សាយ​ពាក់ព័ន្ធ និងបញ្ហាប្រឈមនានា​ក្នុងសង្គម ពិសេសរឿងបញ្ហាសង្គម និង​បក្សពួកបំពុលសង្គមមួយចំនួននៅឯក្រៅប្រទេស ត្រូវទប់ស្កាត់​សកម្មភាពទាំងអស់នេះ ​ខានតែបាន ព្រោះយើងគ្រប់គ្នាត្រូវការសន្តិភាព។ យ៉ាងណាម៉ិញ​បញ្ហា​ភូមិឃុំសង្កាត់​មាន​សុវត្ថិភាព ត្រូវគ្រប់គ្រងបង្រ្កាបឲ្យខានតែបាន បទល្មើសឆ្លងដែននានា ​ការលេងល្បែងស៊ីសង បញ្ហា​គ្រឿងញៀន ការជួញដូរមនុស្ស ការហូរចូលជនអន្តោប្រវេសន៍ខុសច្បាប់ និងអាវុធជាតិផ្ទុះទប់ស្កាត់ឲ្យមានប្រសិទ្ធភាពខ្ពស់ ដើម្បីសង្គម​មាន​សុខ​សុវត្ថិភាព​ជូន​ពលរដ្ឋប្រកបដោយភាពកក់ក្តៅផងដែរ៕ 

ព្រះមហាក្សត្រ និងសម្តេចព្រះមហាក្សត្រី យាងនិវត្តមកប្រទេសវិញក្រោយ ពិនិត្យព្រះរាជសុខភាពនៅប្រទេសចិន

2024/09/23 04:15:24 pm        698
Facebook Telegram Linkin
នៅរសៀលថ្ងៃទី២៣កញ្ញានេះ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះ​មហា​ក្សត្រ នៃព្រះរាជា ណា ចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះ​វររាជ​មាតា​ជាតិខ្មែរ ក្នុង សេរីភាព សេចក្ដីថ្លៃថ្នូរ និងសុភមង្គល ជា ទីសក្ការៈដ៏ខ្ពង់ខ្ពស់បំផុត ព្រះ​អង្គ​ទាំង​ទ្វេសព្វព្រះរាជហឫទ័យ បានស្ដេចយាងនិវត្តមកកាន់មាតុប្រទេសវិញហើយ បន្ទាប់​ពី​បាន​ស្តេច​យាងទៅកាន់រដ្ឋធានីប៉េកាំងកាលពីថ្ងៃទី២៦ខែសីហា ឆ្នាំ២០២៤ ដើម្បីស្តេចយាងទៅ ពិនិ ត្យនិងព្យា បាលព្រះរាជសុខភាពជាទៀងទាត់ តាមការកំណត់របស់ក្រុមវេជ្ជបណ្ឌិតចិន។យាង និង អញ្ជើញថ្វាយព្រះរាជដំណើរព្រះអង្គទាំងទ្វេ ស្តេចយាងនិវត្តដល់អាកាសយានដ្ឋានអន្តរ ជាតិភ្នំពេញ មានសម្ដេចអគ្គមហាសេនាបតីតេជោ ហ៊ុន សែន ប្រធានក្រុម​ឧត្តម​ប្រឹក្សា​ផ្ទាល់​ព្រះ​មហាក្សត្រ និងជាប្រធានព្រឹទ្ធសភា នៃព្រះរាជាណាចក្រកម្ពុជា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត ពេជ ចន្ទមុន្នី, សម្តេច ឯកឧត្តម ឧត្តម​ប្រឹក្សា​ផ្ទាល់​ព្រះមហាក្សត្រ សមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល  ,ព្រះរាជវង្សា​នុវង្ស មន្ត្រីអ្នកមុខ អ្នកការជាច្រើនទៀត។ថ្នាក់ដឹកនាំគ្រប់ជាន់ថ្នាក់ មន្ត្រីរាជការ កងកម្លាំងប្រដាប់អាវុធ គ្រប់ប្រភេទ និងប្រជារាស្ត្រខ្មែរ មាន​សេច​ក្តីសោមនស្សរីករាយ ដោយបានបួងសួង ថ្វាយព្រះពរ ព្រះករុណាជាអម្ចាស់ជីវិតលើត្បូង ព្រះ​មហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ ក្នុង សេរីភាព សេចក្ដីថ្លៃថ្នូរ និង​សុភមង្គល​ជា ទីសក្ការៈដ៏ខ្ពង់ខ្ពស់បំផុត សូមព្រះអង្គទាំងទ្វេ មានព្រះរាជសុខភាពល្អបរិបូរណ៍ ព្រះជន្ម​យឺន​យូរជាងរយព្រះវស្សា ដើម្បីស្តេចគង់ជាម្លប់ដ៏ត្រជាក់ត្រជុំ ដ៏យូរអង្វែង​ដល់​ប្រជា​រាស្ត្រ​ខ្មែរ បានជ្រកកោនដោយសុខដុមរមនា ។គួរបញ្ជាក់ថា៖ ក្នុងឱកាសស្តេចគង់ប្រថាប់នៅរដ្ឋធានីប៉េកាំង ឱ្យក្រុមវេជ្ជបណ្ឌិតចិនពិនិត្យ និង​ព្យាបាល ព្រះរាជសុខភាពរបស់ព្រះអង្គទាំងទ្វេមួយរយៈនៅទីនោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរព​សក្កា​រៈ​ដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យព្រះបរមរាជានុញ្ញាតប្រោសព្រះរាជទានជូន ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញដឹកនាំ​គណៈ​ប្រតិភូ​ចូល​ក្រាប​ថ្វាយ​បង្គំ​គាល់​នា​ព្រះរាជ​ដំណាក់រដ្ឋធានីប៉េកាំង និងតង្វាយពីឯកឧត្តម ស៊ី ជីនភីង ប្រធានាធិបតី នៃសាធារណ​រដ្ឋ​ប្រជា​មានិតចិន ថ្វាយអង្គសម្តេចព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត នូវនំ​សំពះ​ព្រះ​ខែ និងផ្លែឈើដ៏ប្រណិត,នំសំពះព្រះខែ ស្រា និងតែ ពីឯកឧត្តម Yang Guangyu ចាង​ហ្វាង​សណ្ឋាគារភ្ញៀវរដ្ឋទាយ៉ុតថៃ ក្នុងឱកាសបុណ្យនិទាឃរដូវ នៅព្រះរាជដំណាក់​ប៉េកាំង​កាល​ពី​ថ្ងៃ​ទី​២​ខែកញ្ញា ។ នៅវេលាថ្ងៃទី២០ ខែកញ្ញា ឆ្នាំ២០២៤ ព្រះករុណាជាអម្ចាស់ជីវិតលើត្បូង និង​សម្តេច​ព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តី​ថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេ ស្តេចសព្វ​ព្រះរា​ជ​ហឫទ័យ​ប្រោស​ព្រះរាជទានព្រះរាជសវនការជូន ឯកឧត្តម Zhao Leji ប្រធានសភាប្រជាជន នៃសាធារណរដ្ឋប្រជាមានិតចិន ហើយព្រះអង្គក៏សព្វ​ព្រះរាជហឫទ័យ​ព្រះបរមរាជា​នុញ្ញាតប្រោស​ព្រះរាជ​ទាន​ថ្វាយ សម្តេចក្រុមព្រះ នរោត្តម ចក្រពង្ស និងព្រះបុត្រាបុត្រី យាងចូលក្រាប​ថ្វាយ​បង្គំ​គាល់ នាព្រះរាជដំណាក់រដ្ឋធានីប៉េកាំង សាធារណរដ្ឋប្រជាមានិតចិនផងដែរ ។រាប់​ចាប់តាំងពីសម័យកាលដំបូងនៃការកកើតចំណងមិត្តភាពកម្ពុជា-ចិនថ្នាក់​ដឹក​នាំ​ចិន​បាន​ថ្វាយ​នូវ​វន្ទនកិច្ច និងបដិសណ្ឋារកិច្ចយ៉ាងល្អប្រពៃបន្ថែមពីលើពិធីការការទូតដ៏ទៃទាំងទ្បាយ តួរយ៉ាង​ដូច​ជា​ការថ្វាយនូវក្រយាជារឿយៗ រួមជាមួយសារលិខិតបង្ហាញពីក្តីនឹករលឹក មនោសច្ចេតនា​រាប់​អាន​ពី​សំណាក់ឯកឧត្តមជូ អេន ឡាយ ថ្វាយព្រះបរមរតនកោដ្ឋ គ្រាព្រះអង្គគង់​ប្រថាប់​នាប្រទេស​ចិន​កាលពីអតីតកាលកន្លងទៅ ។ ទាំងនេះបានបង្ហាញថា ចំណងមិត្តភាព​ជា​ប្រពៃណី​កម្ពុជា​-ចិន គឺជាចំណងមិត្តភាពដ៏ជ្រាលជ្រៅ និងមានអតីត​កាល​ដ៏​យូរ​អង្វែងជាមួយ​និង​អនុស្សាវរីយ៍​ជាច្រើន៕ អត្ថបទ៖ មុត សុទ្ធ 

ក្រសួងអប់រំ ប្រកាសពីការកំណត់មណ្ឌលប្រឡងសញ្ញាបត្រ​មធ្យមសិក្សា​ទុតិយភូមិ សម័យប្រឡង៖ ០៨ តុលា ២០២៤

2024/09/23 04:05:08 pm        844
Facebook Telegram Linkin
នារសៀលថ្ងៃទី២៣ ខែកញ្ញា ឆ្នាំ២០២៤នេះ ក្រសួងអប់រំ យុវជន និងកីឡា បានប្រកាសពី​​មណ្ឌល​​ប្រឡង​សញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤ ដែល​ត្រូវ​បាន​កំណត់ ថ្នាក់៖ វិទ្យាសាស្ត្រ មាន ៧៣ មណ្ឌល ១ ៦១៦ បន្ទប់ និងថ្នាក់៖ វិទ្យាសាស្ត្រសង្គម មាន ១៥៧ មណ្ឌល ៤ ០២០ បន្ទប់ សរុបចំនួន ២៣០ មណ្ឌល ត្រូវជា ៥ ៦៣៦ បន្ទប់ ដែល​បែង​ចែក​តាមរាជធានី ខេត្តដូចខាងក្រោម៖

គណៈប្រតិភូជាន់ខ្ពស់រដ្ឋសភាកម្ពុជា អញ្ជើញទស្សនាមហាកំផែងចិន

2024/09/23 03:02:47 pm        149
Facebook Telegram Linkin
បន្ទាប់ពីអញ្ជើញដល់សាធារណរដ្ឋប្រជាមានិតចិន នៅព្រឹកថ្ងៃទី២៣ ខែកញ្ញា ឆ្នាំ២០២៤នេះ គណៈប្រតិភូជាន់ខ្ពស់រដ្ឋសភាកម្ពុជា ដឹកនាំដោយ សម្តេចមហារដ្ឋសភាធិការធិបតី ឃួន សុដារី ប្រធាន​រដ្ឋសភា បានអញ្ជើញទស្សនាមហាកំផែង ដែលជា​កន្លែង​ប្រវត្តិសាស្ត្រ​ដ៏​ល្បី​របស់​ប្រទេស​ចិន និង​ជាបេតិកភណ្ឌពិភពលោកមួយ​ដែល​បាន​ទាក់ទាញ​អ្នក​ទេសចរ​រាប់​សិប​លាន​នាក់​មក​ទស្សនា​ក្នុង​មួយឆ្នាំៗ។ដំណើរទស្សនកិច្ច គណៈប្រតិភូជាន់ខ្ពស់រដ្ឋសភាកម្ពុជានៅមហាកំផែងចិន នៅក្នុងគោល​បំណង​ភ្ជាប់​ទំនាក់ទំនងអរិយធម៌ដ៏ចំណាស់ សប្បូរបែប និងយូរលុងប្រទេសទាំងពីរ និង​ក៏​ជា​ការ​ភ្ជាប់​ទំនាក់​ទង​ប្រជាជន និងប្រជាជន ដែលជាគ្រឹះនៃការពង្រឹង​កិច្ចសហប្រតិបត្តិការ​ទំាង​វិស័យ​ការ​ទូត​សភា ទេសចរណ៍ វប្បធម៌ សេដ្ឋកិច្ច ពាណិជ្ជកម្ម ជាដើម។ ឆ្នាំ២០២៤ ជាឆ្នាំ​នៃ​ការ​ផ្លាស់​ប្តូរ​ប្រជាជន និង​ប្រជាជន ដែលរដ្ឋាភិបាលប្រទេសទំាងពីរ បានដាក់​ចេញ​ក្នុង​ផែន​ការ​កសាង​សហគមន៍​ជោគ​វាសនារួម កិច្ចសហប្រតិបត្តិត្បូងពេជ្រ ប្រកបដោយគុណភាពខ្ពស់ កម្រិតខ្ពស់ និង​ស្តង់ដារខ្ពស់។មហាកំផែងចិន បានសាងសង់នៅដើមសតវត្សរ៍ទី៣ មុនគ.ស មានប្រវែងសរុប ២១,១៩៦ គីឡូម៉ែត្រ មានទទឹងប្រែប្រួលតាមផ្នែកនីមួយៗ ចន្លោះពី ៤ ទៅ៩ ម៉ែត្រ។ មហាកំផែង បាន​បញ្ចូល​ទៅ​ក្នុងបញ្ជីបេតិកភណ្ឌពិភពលោករបស់អង្គការយូណេស្កូក្នុងឆ្នាំ១៩៨៧។សូមជម្រាបថា តបតាមការអញ្ជើញរបស់ ឯកឧត្តម ចាវ ឡឺជី (Zhao Leji) ប្រធាន​សភា​តំណាង​ប្រជាជន​ចិន សម្តេចមហារដ្ឋសភាធិការធិបតី ឃួន សុដារី បានដឹកនាំ​គណៈ​ប្រតិភូ​ជាន់​ខ្ពស់​រដ្ឋសភា នៃ​ព្រះរាជាណាចក្រកម្ពុជា ទៅបំពេញទស្សនកិច្ចផ្លូវការ និងមិត្តភាព នៅសាធារណ​រដ្ឋ​ប្រជា​មានិតចិន រយៈពេល៥ថ្ងៃចាប់ពីថ្ងៃទី២២ ដល់ថ្ងៃទី២៦ ខែកញ្ញា ឆ្នាំ២០២៤ ដើម្បី​ពង្រឹង​ពង្រីក​ចំណង​មិត្តភាព និងកិច្ចសហប្រតិបត្តិការសភា នៃប្រទេសទាំងពីរឱ្យកាន់តែរឹងមាំ ស៊ីជម្រៅ និង​គ្រប់ជ្រុងជ្រោយឡើង ទាំងក្នុងក្របខណ្ឌទ្វេភាគី និងពហុភាគី។ នៅរសៀលថ្ងៃទី២៣ ខែកញ្ញានេះ សម្តេចរដ្ឋសភាធិការធិបតី នឹងជួបពិភាក្សាការងារទ្វេភាគី ជា​មួយ ឯកឧត្តម ចាវ ឡឺជី ហើយបន្ទាប់មក ប្រធាន​រដ្ឋសភា​ប្រទេស​ទំាង​ពីរ​នឹង​ចុះ​ហត្ថ​លេខា​លើ​កិច្ច​ព្រម​ព្រៀងស្តីពីកិច្ចសហប្រតិបត្តិការរវាងរដ្ឋសភាប្រទេសទំាងពីរ និងធ្វើជាអធិបតី​ភាព​ក្នុង​ពិធី​ចុះ​អនុស្សរណៈនៃការយោគយល់គ្នារវាងអគ្គលេខាធិការដ្ឋានរដ្ឋសភាកម្ពុជានិងចិន ផងដែរ៕

ជប៉ុនផ្តល់ឥណទានជាង ៥៤ លានដុល្លារ សម្រាប់ពង្រីកខ្សែបញ្ជូន និងចែកចាយ​អគ្គិសនីនៅភ្នំពេញ

2024/09/23 02:47:46 pm        165
Facebook Telegram Linkin
ជប៉ុនឥណទានសម្បទាន សម្រាប់គម្រោងពង្រីកប្រព័ន្ធខ្សែបញ្ជូន និង​ចែកចាយ​នៅ​រាជ​ធានី​ភ្នំពេញ​ជំហាន​ទី២ ជាកញ្ចប់ឥណទាន ទី៣ មានទឹកប្រាក់ជាង ៥៤ លានដុល្លារ សម្រាប់​សាង​សង់​អនុស្ថានីយអគ្គិសនី និងប្រព័ន្ធខ្សែបញ្ជូនអគ្គិសនីតភ្ជាប់ទៅតំបន់ច្បារអំពៅ។ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ជាភាគី​ហត្ថ​លេខី​តំណាង​រាជ​រដ្ឋាភិបាល​កម្ពុជា និង ឯកឧត្តម SANUI Kazumasa ប្រធានទីភ្នាក់ងារ​សហប្រតិបត្តិការ​អន្តរជាតិ នៃ​ប្រទេសជប៉ុន (JICA) ប្រចាំព្រះរាជាណាចក្រកម្ពុជា ជាភាគីហត្ថលេខី​តំណាង​រាជ​រដ្ឋាភិបាល​ជប៉ុន នៅថ្ងៃទី ២៣ ខែ កញ្ញា ឆ្នាំ២០២៤នេះ, បានចុះហត្ថលេខា​លើ​កិច្ច​ព្រម​ព្រៀង​ឥណ​ទាន សម្បទាន សម្រាប់គម្រោងពង្រីកប្រព័ន្ធខ្សែបញ្ជូន និងចែកចាយ​នៅ​រាជ​ធានី​ភ្នំពេញ​ជំហាន​ទី២ ដែលជាកញ្ចប់ឥណទានទី ៣ មាន ទឹកប្រាក់ចំនួន ៧ ៩៨៨ លានយ៉េនជប៉ុន ត្រូវ​ជា​ប្រមាណ ៥៤,៣ លានដុល្លារអាម៉េរិក។គម្រោងពង្រីកប្រព័ន្ធខ្សែបញ្ជូន និងចែកចាយនៅរាជធានីភ្នំពេញជំហានទី២នេះ មាន​គោលបំ​ណង​ពង្រឹងស្ថេរភាព និងពង្រីក សមត្ថភាពក្នុងការផ្គត់ផ្គង់អគ្គិសនីនៅរាជធានីភ្នំពេញ តាមរយៈ​ការ​សាងសង់អនុស្ថានីយអគ្គិសនីថ្មី, ការសាងសង់ប្រព័ន្ធខ្សែបញ្ជូន អគ្គិសនីអាកាស តង់​ស្យុង​ខ្ពស់, និងការសាងសង់ប្រព័ន្ធខ្សែបញ្ជូន អគ្គិសនីបង្កប់ក្រោមដី តង់ស្យុងខ្ពស់ និងមធ្យម ដើម្បី​ការ​ធ្វើ​ឱ្យប្រសើរឡើង នូវអនុស្ថានីយអគ្គិសនីដែលមានស្រាប់ផងដែរ។ ជាមួយគ្នានេះ កញ្ចប់ឥណ​ទាន​ទី៣នេះ គឺជាហិរញ្ញប្បទានបំពេញ បន្ថែម សម្រាប់ការងារសាងសង់អនុស្ថានីយអគ្គិសនី និង​ប្រព័ន្ធ​ខ្សែប​ញ្ជូនអគ្គិសនីបន្តបន្ទាប់ទៀតដែលតភ្ជាប់ទៅតំបន់ច្បារអំពៅ។ជុំវិញគម្រោងខាងលើនេះ, ឯកឧត្តម រស់ សីលវ៉ា បានថ្លែងអំណរគុណដល់រដ្ឋាភិបាល និង​ប្រជាជន​ជប៉ុន និងគ្រប់ស្ថាប័ន ពាក់ព័ន្ធរបស់រដ្ឋាភិបាលជប៉ុន ជាពិសេស​ទីភ្នាក់​ងារ​សហ​ប្រតិបត្តិការ​អន្តរជាតិនៃប្រទេសជប៉ុន (JICA) ដែលតែងតែបានផ្តល់នូវកិច្ច សហប្រតិបត្តិការ​ដ៏​ល្អ​ប្រ​សើរ និងបានចូលរួមគាំទ្រដល់កិច្ចអភិវឌ្ឍន៍សង្គម-សេដ្ឋកិច្ចកម្ពុជា ដែលបាន​បន្ត​ផ្តល់​ហិរញ្ញប្ប​ទាន​សម្រាប់កិច្ចសហប្រតិបត្តិការអភិវឌ្ឍន៍ផ្លូវការ (ODA) ដោយបានឆ្លើយតប​ចំ​ទិសដៅ​នៃ​កម្មវិធីគោលនយោបាយអាទិភាពរបស់រាជរដ្ឋាភិបាល កម្ពុជា និងយុទ្ធសាស្រ្ត​បញ្ចកោណ​ដំណាក់កាលទី១ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា៕ អត្ថបទ៖ សុន រ៉ាឌី

អបអរសាទរ!​ ប្រៃសណីយ៍កម្ពុជាដែលបានឈ្នះពានរង្វាន់ពីសហភាពប្រៃសណីយ៍សកល (Universal Postal Union​ - UPU)

2024/09/23 02:40:12 pm        150
Facebook Telegram Linkin
កាលពីថ្ងៃទី១៣ ខែកញ្ញា ឆ្នាំ២០២៤ ក្នុងវេទិកា TradePost Forum​ នៅទីក្រុងហ្សឺណែវ ប្រទេសស្វីស សហភាពប្រៃសណីយ៍សកល (Universal Postal Union​ - UPU) បានផ្តល់ពានរង្វាន់ Global Alliance for Trade Facilitation (GATF) Trade Facilitation Innovation Award ជូនប្រៃសណីយ៍កម្ពុជាសម្រាប់គម្រោងរបស់ខ្លួន ស្តីពី e-costoms clearance platform for postal shipment។​ ពានរង្វាន់របស់ UPU នេះ ត្រូវបានផ្តល់ដល់ស្ថាប័នដែលមានគំនិតផ្តួចផ្តើម ឬវិធានការសាធារណៈ និងឯកជន សំដៅជំរុញគម្រោងសម្រួលពាណិជ្ជកម្មប្រកបដោយនវានុវត្តន៍ តាមរយ:បណ្តាញប្រៃសណីយ៍។ការទទួលបានពានរង្វាន់នេះដោយសារប្រៃសណីយ៍កម្ពុជាបានភ្ជាប់ដោយជោគជ័យប្រព័ន្ធប្រតិវេទន៍គយ (Customs Declaration System-CDS) របស់សហភាពប្រៃសណីយ៍សកល (UPU) ជាមួយប្រព័ន្ធស្វ័យប្រវត្តិកម្មទិន្នន័យគយ(ASYCUDA) របស់អគ្គនាយកដ្ឋានគយនិងរដ្ឋាករ ដែលផ្តល់លទ្ធភាពសម្រាប់ការផ្លាស់ប្តូរព័ត៌មានរវាងគ្នា ឆ្លើយតបនឹងការបញ្ចេញវត្ថុបញ្ញើ គាំទ្រដល់កិច្ចព្រមព្រៀងសម្របសម្រួលពាណិជ្ជកម្មរបស់ WTO សម្រាប់ដំណើរការជាមុន មុនបញ្ញើប្រៃសណីយ៍មកដល់ ដោយធ្វើឱ្យមានសុខដុមនីយកម្មនៃប្រព័ន្ធទាំងពីរ ដោយប្រើបច្ចេកទេសគ្រប់គ្រងហានិភ័យទំនើប ផ្សារភ្ជាប់នឹងនីតិវិធី និងការអនុវត្តរបស់អន្តរជាតិ។

បណ្ដាញសង្គម

ព័ត៌មានថ្មីៗ

មន្ត្រីស៊ីរី និងអ៊ីស្រាអែល ជួបពិភាក្សាគ្នា អំពីស្ថិរភាពស៊ីរីភាគខាងត្បូ
08/20/2025 03:08 PM
Facebook Telegram Linkin
ប្រទេសប៉ាណាម៉ា និងអាមេរិក ធ្វើសមយុទ្ធយោធារួមគ្នានៅទីក្រុង Colon
08/20/2025 03:08 PM
Facebook Telegram Linkin
អ៊ីស្រាអែល ពុំបានឆ្លើយតបទៅនឹងផែនការបទឈប់បាញ់ដែលក្រុមហាម៉ាសបានព្រមព្រៀងនៅឡើយទេ
08/20/2025 03:08 PM
Facebook Telegram Linkin
ទេសាភិបាលធនាគារជាតិ អញ្ជើញចុះសួរសុខទុក្ខ​ប្រជាពលរដ្ឋ​មកព្យាបាល​ជំងឺភ្នែក​នៅ​មន្ទីរ​ពេទ្យ​រុស្សី
08/20/2025 03:08 PM
Facebook Telegram Linkin
អ្នកជំនាញ៖ ឃ្លាំងអាវុធនុយក្លេអ៊ែររបស់ប្រទេសចិន កំពុងតែកើនឡើងយ៉ាងលឿន
08/20/2025 03:08 PM
Facebook Telegram Linkin
វិបត្តិប្លាស្ទិកសកលកើនឡើង ខណៈកិច្ចពិភាក្សាសន្ធិសញ្ញារបស់ UN បញ្ចប់ដោយការបរាជ័យ
08/20/2025 03:08 PM
Facebook Telegram Linkin
ការស្លាប់ជាង ១.១០០នាក់ ត្រូវបានផ្សារភ្ជាប់ទៅនឹងរលកកម្ដៅដ៏កំណាចនៅប្រទេសអេស្ប៉ាញ
08/20/2025 03:08 PM
Facebook Telegram Linkin
ការនាំចេញរ៉ែមេដែកកម្ររបស់ចិន បានកើនឡើងខ្ពស់ក្នុងពេល ៦ខែនៅខែកក្កដា កន្លងទៅ
08/20/2025 03:08 PM
Facebook Telegram Linkin
សេតវិមាន៖ សហរដ្ឋអាមេរិក កំពុងពិភាក្សាលើសំណើបទឈប់បាញ់ចុងក្រោយបំផុតនៅតំបន់ហ្កាហ្សា
08/20/2025 03:08 PM
Facebook Telegram Linkin
តំណាងថ្មី UNDP វាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការ​ជំរុញ​ការអភិវឌ្ឍលើគ្រប់វិស័យ
08/20/2025 03:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.