BTV NEWS

ក្រសួងការពារជាតិ អំពាវនាវប្រុងប្រយ័ត្ន ខណៈមាន Page បរទេស បន្លំដាក់ឈ្មោះខ្មែរ បង្កចលាចល

ក្រសួងសុខាភិបាល ប្រគល់-ទទួលរថយន្តគិលានសង្គ្រោះចំនួន ១០គ្រឿង ដែលជាហិរញ្ញប្បទានឥណទានរបស់ធនាគារអភិវឌ្ឍន៍អាស៊ី (ADB Loan)

អគ្គលេខាធិការដ្ឋានរដ្ឋសភា និងព្រឹទ្ធសភា បិទវគ្គបណ្តុះបណ្តាលស្តីពី “ការទូតសភា” ជូនដល់មន្ត្រីជំនាញនៃសភា កម្ពុជា-ឡាវ

រដ្ឋសភាកម្ពុជាសហការជាមួយ AVI និងKASបើកវគ្គបណ្តុះបណ្តាលកសាងសមត្ថភាពមន្ត្រីនិងយុវជន ដើម្បីក្លាយជា«ខែលការពារសុចរិតភាពព័ត៌មាន» ក្នុងយុគសម័យបញ្ញាសិប្បនិម្មិត (AI)

ព័ត៌មានជាតិ

៣យប់៤ថ្ងៃ ឯកឧត្តម ឌិត ទីណា ប្រចាំការត្រៀមអន្តរាគមន៍ និងចុះសួរសុខទុក្ខប្រជាពលរដ្ឋ នៅខេត្តបន្ទាយមានជ័យ

ភ្នំពេញ៖ គិតចាប់តាំងពីថ្ងៃទី២៤ រហូតត្រឹមថ្ងៃទី២៧ ខែកក្កដា ឆ្នាំ២០២៥នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋាន ខេត្តបន្ទាយមានជ័យ បានដឹកនាំកិច្ចប្រជុំពីស្ថានភាពក្នុងតំបន់ព្រំដែនខេត្តបន្ទាយមានជ័យ និងការត្រៀមលក្ខណៈអន្តរាគមន៍របស់ខេត្ត ដើម្បីការពារបូរណភាពទឹកដី និងការរក្សាសន្តិសុខប្រជាពលរដ្ឋខ្មែរ។គិតក្នុងរយៈពេល ៣យប់៤ថ្ងៃមកនេះ ក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានប្រចាំការ និងចុះសួរសុខទុក្ខប្រជាពលរដ្ឋដែលបានជម្លៀសពីតំបន់ព្រំដែនមកទីទួលសុវត្ថិភាព ក្នុងស្រុកចំនួន៤ រួមមាន៖ ស្រុកភ្នំស្រុក ស្រុកព្រះនេត្រព្រះ ស្រុកអូរជ្រៅ ស្រុកថ្មពួក និងបានណែនាំដល់ក្រុមការងារទាំងអស់បន្តយកចិត្តទុកដាក់ខ្ពស់នៅទូទាំងខេត្តបន្ទាយមានជ័យ ជាពិសេសតំបន់ព្រំដែនកម្ពុជា-ថៃ និងបងប្អូនភៀសសឹកពីខេត្តព្រះវិហារ និងខេត្តឧត្តរមានជ័យ។ស្ថិតក្នុងពេលដ៏លំបាកនេះ ឯកឧត្តមរដ្ឋមន្ត្រី បានផ្ដាំផ្ញើឱ្យរក្សាភាពអត់ធ្មត់ស៊ូទ្រាំ និងថែរក្សាខ្លួននៅទីកន្លែងសុវត្ថិភាព ខណៈពេលដែលការចាកចេញពីភូមិស្រុកគេហដ្ឋានពុកម៉ែបងប្អូន គឺជាការលះបង់ចាំបាច់មួយដើម្បីបញ្ចៀសហានិភ័យនៃការប្រយុទ្ធគ្នា ដែលជួយសម្រួលឱ្យកងទ័ពរបស់នៅសមរភូមិការពារទឹកដីដោយទឹកចិត្តមោះមុត និងអង់អាចក្លាហាន។ជានិច្ចកាលឯកឧត្តមរដ្ឋមន្ត្រី បានពាំនាំការផ្ដាំផ្ញើសួរសុខទុក្ខយកចិត្តទុកដាក់ និងសេចក្ដីនឹករលឹកពីសំណាក់ សម្ដេច តេជោ ហ៊ុន សែន ប្រធានព្រឹទ្ធសភាកម្ពុជា និងសម្ដេចនាយករដ្ឋមន្រ្តី ហ៊ុន ម៉ាណែត និងបាននាំយកនូវអំណោយជាច្រើន មានដូចជា៖ គ្រឿងបរិភោគ និងសម្ភារៈប្រើប្រាស់ សម្រាប់ជួយសម្រួលប្រជាពលរដ្ឋភៀសសឹកមកកន្លែងទីទួលសុវត្ថិភាព។យើងទាំងអស់គ្នាគាំទ្រកងទ័ពដ៏អង់អាចរបស់យើងក្នុងបុព្វហេតុការពារអធិបតេយ្យភាពជាតិ និងបូរណភាពទឹកដី រហូតដល់ពុកម៉ែបងប្អូនវិលត្រឡប់ទៅភូមិស្រុកគេហដ្ឋានវិញបាន ហើយយើងទាំងអស់គ្នាថ្កោលទោសសកម្មភាពខ្មាំងឈ្លានពាន រំលោភអធិបតេយ្យភាព និងបូរណភាពទឹកដីរបស់កម្ពុជា ដែលបង្កហានិភ័យផ្ទាល់ដល់ប្រជាពលរដ្ឋស្លូតត្រង់ ហើយគាំទ្រការឆ្លើយតបការពារដែនដីមិនឱ្យបាត់សូម្បីតែមួយមីលម៉ែត្រ៕

ជនភៀសសឹកចំនួនជាង៧០០គ្រួសារ នៅស្រុកអន្លង់វែង ទទួលអំណោយពីសប្បុរសជន

ឧត្តរមានជ័យ៖ នាព្រឹកថ្ងៃទី២៧ ខែកក្កដា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចែកអំណោយរបស់សប្បុរសជនជូនជនភៀសចំនួនជាង ៧០០គ្រួសារ មកពីឃុំចំនួន៥ នៅមណ្ឌលសុវត្ថិភាព ក្នុងស្រុកអន្លង់វែង ខេត្តឧត្តរមានជ័យ។អំណោយផ្តល់ជូនភៀសសឹកចំនួនជាង៧០០គ្រួសារ នាព្រឹកនេះ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈឧកញ៉ា ស្រី ចន្ធូ និងឯកឧត្តម ហ៊ុន សុខា ទីប្រឹក្សាសម្តេចតេជោ ហ៊ុន សែន។ជាមួយគ្នានេះអ្នកឧកញ៉ា ម៉ម វណ្ណឌី បានរួមចំណែកជាថវិកាក្នុង១គ្រួសារ ទទួលបាន ៥ម៉ឺនរៀល និងបូករួមថវិកា ១០០លានរៀលផ្សេងទៀត សម្រាប់ចាត់ចែង និងផ្គត់ផ្គង់ដល់ជនភៀសសឹក ស្រុកអន្លង់វែង។នាឱកាសនេះឯកឧត្តម ទេសរដ្ឋមន្រ្តី គន់ គីម បានថ្លែងអំណរគុណចំពោះទឹកចិត្តរបស់សប្បុរសជន ដែលបានរួមចំណែកជាធនធានផ្ទាល់ខ្លួន ដើម្បីផ្តល់ជាអំណោយគ្រឿងឧបភោគ បរិភោគ ចែកជូនដល់ជនភៀសសឹកជម្លៀសពីតំបន់រងគ្រោះដោយការវាយប្រហាររបស់កងទ័ពថៃ។ឯកឧត្តម ទេសរដ្ឋមន្រ្តី គន់ គីម បានកោតសរសើរ និងចាត់ទុកការផ្តល់អំណោយទាំងនេះ ជាសារបង្ហាញសាមគ្គីភាពឥតងាករេ ឯកភាពជាតិខ្មែរជាធ្លុងមួយ ក្រោមការដឹកនាំរបស់រាជរដ្ឋាភិបាល ជាពិសេសឆ្លុះបញ្ចាំងថា ប្រជាពលរដ្ឋជាសមរភូមិក្រោយនៅតែគាំទ្រជានិច្ចចំពោះកងទ័ព និងជនភៀសសឹក។ក្នុងឱកាសនោះ ឯកឧត្តម ទេសរដ្ឋមន្រ្តី គន់ គីម ណែនាំដល់ជនភៀសសឹកទាំងអស់ត្រូវថែទាំសុខភាពឱ្យបានល្អ ក្នុងករណីមានបញ្ហាឈឺស្កាត់ ឬត្រូវការសេវាពិនិត្យសុខភាពអាចទាក់ទងក្រុមគ្រូពេទ្យ និងអាជ្ញាធរមូលដ្ឋានដែលប្រចាំការនៅមណ្ឌលសុវត្ថិភាពអន្លង់វែង៕

ក្រុមសេនាសន្តិភាពបាននាំយកអំណោយជាគ្រឿងបរិភោគ ឧបភោគចែកជូនបងប្អូនប្រជាពលរដ្ឋខ្មែរ ដែលកំពុងភៀសសឹកនៅស្រុកចុងកាល់

ក្រុមសេនាសន្តិភាព នៅព្រឹកថ្ងៃទី២៧ ខែកក្កដា ឆ្នាំ២០២៥នេះ បាននាំយកអំណោយជាគ្រឿងបរិភោគ និងឧបភោគទៅចែកជូនបងប្អូនប្រជាពលរដ្ឋខ្មែរ ដែលកំពុងភៀសសឹកពីការឈ្លានពានរបស់សៀម នៅស្រុកចុងកាល ខេត្តឧត្តរមានជ័យ ខណៈអំណោយទាំងនេះ គឺបានមកពីបងប្អូនខ្មែរទាំងក្នុង និងក្រៅប្រទេស។អំណោយដែលក្រុមសេនាសន្តិភាព យកទៅចែកជូនដល់បងប្អូនប្រជាពលរដ្ឋ និងក្រុមគ្រួសារកងទ័ពជួរមុខរត់ភៀសសឹកនេះ រួមមាន៖ អង្ករចំនួន៣០០ការ៉ុង ដោយមួយការ៉ុងមានទម្ងន់ ១៥គីឡូក្រាម ទឹកស៊ីអ៊ីវចំនួន១៥០យួរ ទឹកត្រីចំនួន១៥០យួរ សាច់ក្រក់ចំនួន២០០គីឡូក្រាម ទឹកសុទ្ធចំនួន២៥០០យួរ រួមទាំងថវិកាមួយចំនួនផងដែរ៕

កម្ពុជាប្រាប់ទៅថៃថា គ្មានហេតុផលអ្វីដែលកម្ពុជា បាញ់ទៅលើប្រាសាទតាមាន់ ដែលជាដួងព្រលឹកដូនតាខ្លួន នោះឡើយ

អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានផ្តាំទៅភាគីថៃថា គ្មានហេតុផលអ្វីដែលកម្ពុជាបាញ់ប្រាសាទតាមាន់ដែលជាដួងព្រលឹង របស់ដូនតាខ្លួនឯង ដូចការចោទប្រកាន់យ៉ាងគឃ្លើន និងគ្មានការអៀនខ្មាស់របស់ភាគីថៃនោះឡើយ។ក្នុងសន្និសីទសារព័ត៌មាន ស្តីពីបច្ចុប្បន្នភាពជាលើកទីពីរនៃដំណើរការឈ្លានពានរបស់ទាហានថៃ នាថ្ងៃទី២៧ ខែកក្កដា ឆ្នាំ២០២៥នេះ លោកជំទាវ ម៉ាលី សុជាតា បានធ្វើការទាត់ចោលទាំងស្រុងចំ ពោះផេកផ្លូវការរបស់កងទ័ពជើងគោកថៃ ដែលបានផ្សាយថាកម្ពុជា បានបាញ់ផ្លោងបេអឹម២១ ទៅតំបន់ប្រាសាទតាមាន់ ដោយការចោទប្រកាន់ពីសំណាក់ទាហានថៃនេះ គឺពិតជាអស់សំណើច និងគួរឲ្យហួសចិត្តជាខ្លាំង ខណៈប្រាសាទតាមាន់ជាប្ររបស់ខ្មែរ គ្មានហេតុផលណាមួយដែលកម្ពុជាបាញ់កម្ទេចដួងព្រលឹងខ្លួនឯងនោះទេ។លោកជំទាវម៉ាលី សុជាតា បានឆ្លើយតបបែបចំអក និងគួរឲ្យសំណើចចំពោះការចោទប្រកាន់របស់ ទាហានឈ្លានពានសៀមថា «តាមការពិតប្រាសាទដែលដូនតាខ្មែរជាអ្នកសាងសង់ ហើយជាកម្មសិទ្ធស្របច្បាប់ក្នុងដែនអធិបតេយ្យរបស់កម្ពុជា ដោយផ្អែកលើផែនទីស្របច្បាប់ ប្រាសាទតាមាន់ស្ថិតនៅក្នុងទឹកដី នៃខេត្តឧត្តរមានជ័យរបស់កម្ពុជា។ ដូច្នេះគ្មានហេតុផលណាមួយដែលកម្ពុជាត្រូវបំផ្លិតបំផ្លាញកម្ទេចនូវ ទ្រព្យសម្បត្តិខ្លួននោះទេ....ប៉ុន្តែមានតែភាគីថៃទេ ដែលមានចេតនាទុច្ចរិតទាំងអស់នេះ»។លោកជំទាវម៉ាលី សុជាតា បានបន្ថែមទៀតថា សកម្មភាពឈ្លានពាន និងគិតទុកជាមុនរបស់ភាគីថៃដែលបានរំលោភ បំពានលើដែនអធិបតេយ្យភាពរបស់កម្ពុជានេះគឺបានធ្វើឡើងជាបន្តបន្ទាប់ និងពង្រីកកាន់តែធំឡើងបើទោះបីជាមានការដាក់សម្ពាធពីអន្តរជាតិក៏ដោយនោះ។ យ៉ាងណាក៏ដោយកម្ពុជា នឹងមិនដកថយ និងចុះញ៉មចំពោះការឈ្លានពានរបស់សៀមនោះឡើយ ហើយនឹងធ្វើការវាយបកទៅវិញ ដើម្បីរក្សាសិទ្ធការពារខ្លួនស្របទៅតាមច្បាប់អន្តរជាតិ និងការពារដែនអធិបតេយ្យ និងសេចក្តីសុខរបស់ប្រជាជនខ្មែរទាំងមូលផងដែរ។ ជាមួយគ្នានោះដែរ លោកជំទាវម៉ាលី សុជាតា ក៏បានបញ្ជាក់ជាថ្មីម្តងទៀតកម្ពុជាមានការប្តេជ្ញាចិត្តយ៉ាងម៉ឺងម៉ាត់ចំពោះ«បទឈប់បាញ់ជាបន្ទាន់» និងដោះស្រាយរាល់វិវាទដោយសន្តិវិធី ស្របតាមច្បាប់អន្តរជាតិដដែល៕ អត្ថបទ បាន ចក់

TOP STORY | សម្ដេចធិបតី បានចាត់វិធានការចាំបាច់ជាបន្តបន្ទាប់ចំពោះការវិលត្រឡប់ទ្រង់ទ្រាយធំរបស់ពលករខ្មែរ និងជនភៀសសឹក

ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ចំពោះការវិលត្រឡប់ក្នុងទ្រង់ទ្រាយធំរបស់បងប្អូនពលករខ្មែរយើងពីប្រទេសថៃ និងជនភៀសសឹកដោយសារការប្រយុទ្ធគ្នារវាងកងទ័ពកម្ពុជា និងកងទ័ពថៃ រាជរដ្ឋាភិបាលបានចាត់វិធានការចាំបាច់ជាបន្តបន្ទាប់ចាប់តាំងពីថ្ងៃផ្ទុះអាវុធទី ២៤ កក្កដា ២០២៥ ដើម្បីសម្របសម្រួល៖ក្រសួង-ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្តជាប់ព្រំដែនថៃទាំង ៧ បានសម្របសម្រួលការឆ្លងកាត់ព្រំដែន និងសុំចតបណ្ដោះអាសន្នរបស់បងប្អូននៅតំបន់ព្រំដែនតាមការចាំបាច់។ ក្រសួងការពារជាតិ កងទ័ពជើងគោក សាលារាជធានីភ្នំពេញ សហការជាមួយបណ្ដាខេត្តជាប់ព្រំដែនកម្ពុជា-ថៃ បានរៀបរថយន្តដើម្បីដឹកជញ្ជូនបងប្អូនពីព្រំដែន ត្រឡប់ទៅស្រុកកំណើត។ រដ្ឋបាលរាជធានី-ខេត្ត ក្រុមការងារថ្នាក់ជាតិចុះជួយបណ្ដាលរាជធានី-ខេត្ត សហការដើម្បីជួយសម្របសម្រួលក្នុងការទទួលបងប្អូនប្រជាពលរដ្ឋដែលវិលត្រឡប់មកពីប្រទេសថៃនៅតាមភូមិសាស្ត្រទទួលខុសត្រូវរបស់ខ្លួន។ ដោយឡែកចំពោះប្រជាពលរដ្ឋជាជនភៀសសឹក ដែលត្រូវជន្លាសចេញពីតំបន់ប្រយុទ្ធគ្នា គណៈកម្មការជាតិគ្រប់គ្រងគ្រោះមហន្តរាយ បានសហការជាមួយក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំទួលសុវត្ថិភាព ក៏ដូចជាដោះស្រាយស្នាក់នៅ ហូបចុក និងសុខាភិបាលជូនបងប្អូន។ ក្រសួងសេដ្ឋកិច្ចហិរញ្ញវត្ថុ ក្រសួងសុខាភិបាលសហការដោះស្រាយតាមដំណើរការជាក់ស្ដែងធ្វើយ៉ាងណាយកចិត្តទុកដាក់លើជីវភាពរស់នៅនិងសុខសប្បាលភាពរបស់បងប្អូនដំណាក់កាលលំបាកនេះ។ ជាមួយគ្នាដែលសម្ដេចនាយករដ្ឋមន្រ្ដី ចូលរួមរំលែកទុក្ខចំពោះវីរៈកងទ័ពកម្ពុជាដែលបានពលី និងប្រជាជនស៊ីវិលដែលបានស្លាប់ដោយសារការប្រយុទ្ធគ្នានេះ។ ក្នុងពេលជាមួយគ្នានេះ ខ្ញុំក៏សូមកោតសរសើរចំពោះវីរភាពដ៏អង់អាចក្លាហានរបស់កងទ័ពនិងកងនគរបាលជាតិរបស់យើង ដែលកំពុងធ្វើប្រតិបត្តិការយ៉ាងសកម្មក្នុង កិច្ចការការពារបូរណភាពទឹកដីរបស់យើង។ សម្ដេចក៏បានអរព្រះគុណនិងអរគុណ ព្រះថេរានុថេរៈគ្រប់ព្រះអង្គក៏ដូចជាបងប្អូនប្រជាពលរដ្ឋខ្មែរទាំងអស់ដែលបានបន្តគាំទ្រនិងផ្ដល់ការលើកទឹកចិត្តដល់វីរៈយុទ្ធជន វីរៈនគរបាលជាតិ ដែលកំពុងឈរជើងនិងធ្វើប្រតិបត្តិការយ៉ាងសកម្មក្នុងការការពារបូរណភាពទឹកដីខ្មែរយើង។ សូមបន្តនូវស្មារតីរួបរួមជាតិក្នុងនាមជាខ្មែរតែមួយ ដើម្បីការពារបូរណភាពទឹកដីខ្មែរ៕

ទាហានសៀមនៅបន្តឈ្លានពានមកលើកម្ពុជាយ៉ាងកំរោល បើទោះបីឯកឧត្តម ដូ ណាត្រាំ ស្នើឲ្យមានការឈប់បាញ់ក្តី

អ្នកនាំពាក្យក្រសួងការពារជាតិកម្ពុជាលោកជំទាវឧត្តមសេនីយ៍ឯក ម៉ាលី សុជាតា បានប្រកាសអះអាងថា មកដល់ពេលនេះ ទាហានឈ្លានពានសៀមនៅតែបន្តបាញ់ប្រហារមកលើកម្ពុជាយ៉ាងកំរោល និងគឃ្លើនបំផុត បើទោះបីមានការសម្របសម្រួលស្នើឲ្យឈប់បាញ់ពីសំណាក់ប្រធានាធិបតីអាមេរិក ឯកឧត្តម ដូ ណាត្រាំ ក៏ដោយនោះ។ក្នុងសន្និសីទសារព័ត៌មាន ស្តីពីបច្ចុប្បន្នភាពជាលើកទីពីរនៃដំណើរការឈ្លានពានរបស់ ទាហាន សៀម នាថ្ងៃទី២៧ ខែកក្កដា ឆ្នាំ២០២៥នេះ លោកជំទាវ ម៉ាលី សុជាតា បានបញ្ជាក់ថា មកដល់ពេល នេះទាហានឈ្លានពានសៀម បានបាញ់យ៉ាងសន្ធុបមកលើកម្ពុជានៅតាមបណ្តោយព្រំដែន ដោយប្រើប្រាស់យន្តហោះចម្បាំង ដ្រូន កាំភ្លើងធំ រថពាស់ដែក រត់ក្រោះ និងគ្រាប់បែកចង្កោមជាដើម។ មួយវិញទៀតការបន្តរំលោភបំពានលើដែនអធិបតេយ្យកម្ពុជាយ៉ាងគឃ្លើន ដោយមិនគោរពច្បាប់អន្តរជាតិនេះ គឺជាការគំរាមកំហែងយ៉ាងធ្ងន់ធ្ងរ ចំពោះសណ្តាប់ធ្នាប់អន្តរជាតិ សន្តិភាព និងស្ថិរភាព មិនត្រឹមតែនៅតំបន់ព្រំដែនកម្ពុជា និងថៃប៉ុណ្ណោះទេ វានឹងបង្កផលប៉ះអាល់ដល់សន្តិសុខក្នុងតំបន់ទាំងមូលផងដែរ។ជាមួយគ្នានោះដែរ លោកជំទាវម៉ាលី សុជាតា ក៏បានប្រកាសទាត់ចោលទាំងស្រុងចំពោះភាគីសៀមដែលបានបន្តចោទប្រកាន់មកលើកម្ពុជា ទាំងគឃ្លើន គ្នានការខ្មាស់អៀន ថាការបាញ់ប្រហារថ្ងៃនេះ គឺកម្ពុជាជាអ្នកផ្តើមុនផងដែរ ខណៈភាគីសៀមខ្លួនឯកជាអ្នកបង្ករ ដោយមិនព្រមស្តាប់តាមការសម្របសម្រួលរបស់ប្រធានាធិបតីអាមេរិក ឯកឧត្តមដូ ណាត្រាំ ដើម្បីទទួលយកការសម្របសម្រួលដោយសន្តិវិធី ក្នុងគោលបំណងឈ្មោះទៅរកភាពឈប់បាញ់នោះ។យ៉ាងណាក៏ដោយអ្នកនាំពាក្យក្រសួងការពារជាតិលោកជំទាវ ម៉ាលី សុជាតា ក៏បានបន្តអំពាវនាវយ៉ាងទទួចជាថ្មីម្តងទៀតដល់សហគមន៍អន្តរជាតិ រួមគ្នាធ្វើការថ្កោលទោសដល់ទាហានឈ្លានពានសៀមផងដែរខណៈការឈ្លានពានរបស់សៀមកាន់តែវាទទីធំឡើងមកលើដែនអធិបតេយ្យភាពរបស់កម្ពុជា។ ប៉ុន្តែទោះជាយ៉ាងណាកម្ពុជានឹងមិនដកថយ និងចុះញ៉មចំពោះការឈ្លានពានរបស់សៀមនោះឡើយ ហើយនឹងធ្វើការវាយបកទៅវិញដើម្បីរក្សាសិទ្ធការពារខ្លួនស្រប ទៅតាមច្បាប់ អន្តរជាតិ និងការពារដែនអធិបតេយ្យ និងសេចក្តីសុខរបស់ប្រជាជនខ្មែរទាំងមូលផងដែរ៕អត្ថបទបាន ចក់

អភិបាលខេត្តព្រះវិហារ៖ ត្រឹមថ្ងៃទី២៦ ខែកក្កដានេះមានពលរដ្ឋ ១១,៥៥៨ គ្រួសារនៃស្រុកជាំក្សាន្ត បានជម្លៀសចេញពីតំបន់គ្រោះថ្នាក់មកទីតាំងមានសុវត្ថិភាព

ព្រះវិហារ៖ អភិបាលខេត្តព្រះវិហារ លោក គីម រិទ្ធី បានឱ្យដឹងថា គិតត្រឹមថ្ងៃទី២៦ ខែកក្កដា ឆ្នាំ២០២៥នេះប្រជាពលរដ្ឋ ៦ឃុំ លើ៨ឃុំ នៃស្រុកជាំក្សាន្ត បានជម្លៀសចេញពីឃុំសរុបចំនួន ១១,៥៥៨ គ្រួសារ ស្មើនឹង ២៧,០៥៣នាក់។ ដោយឡែក បងប្អូនមួយចំនួនក៏បានទៅស្នាក់នៅផ្ទះសាច់ញាតិ និងផ្ទះមិត្តភក្តិ។ ដោយទ្បែក ប្រជាជនបានមកទីតាំងមានសុវត្ថិភាពចំនួន ១១ កន្លែង ទូទាំងខេត្តព្រះវិហារ សរុបមានចំនួន ៤,៩៤៦ គ្រួសារ ស្នើនឹង ១៧,០៣០នាក់។ 1. មណ្ឌលសុវត្ថិភាពវត្តពោធិ៍ ៥០០០ដើម សរុបមានចំនួន ៣,៧៤៨គ្រួសារ ស្មើនឹង ១២,៧២២នាក់ (ទំនាក់ទំនង៖ ឯកឧត្តម គឹម ចាន់បញ្ញា អភិបាលរងខេត្ត 060 512 345)។2. មណ្ឌលសុវត្ថិភាពវត្តឧត្តរគីរីទួលអណ្ដែត នៅភូមិថ្នល់បែក ឃុំថ្មី ស្រុកគូលែន សរុបមានចំនួន ៤៣១គ្រួសារ ស្មើនឹង ១,៥៤៦នាក់ (ទំនាក់ទំនង៖ ឯកឧត្តម មិន ស៊ីថា អភិបាលរងខេត្ត 012 995 143)។3. វត្តកំពង់ស្រឡៅ ឃុំកំពង់ស្រឡៅមួយ ស្រុកឆែប មានចំនួន ១០៩គ្រួសារ ស្មើនឹង ៣៤០នាក់ (ទំនាក់ទំនង៖ លោក ឃិត សុធារ៉ា អភិបាលស្រុកឆែប 097 825 4222)។ 4. វត្តកំពង់សង្កែ ឃុំកំពង់ស្រឡៅមួយ ស្រុកឆែប មានចំនួន ១០២គ្រួសារ ស្មើនឹង ៣៩៨នាក់ (ទំនាក់ទំនង៖ លោក ឃិត សុធារ៉ា អភិបាលស្រុកឆែប 097 825 4222)។ 5. វត្តដងផ្លិត ឃុំឆែបពីរ ស្រុកឆែប មានចំនួន ១១០គ្រួសារ ស្មើនឹង ៣៧៩នាក់ (ទំនាក់ទំនង៖ លោក ឃិត សុធារ៉ា អភិបាលស្រុកឆែប 097 825 4222)។ 6. វត្តពោធិ៍កែវមានជ័យ ឃុំពៅធិ៍ ស្រុកត្បែងមានជ័យ មានចំនួន ១០២គ្រួសារ ស្មើនឹង ៣២១នាក់ (ទំនាក់ទំនង៖ លោក នុត សោភ័ណ្ឌ អភិបាលស្រុក ត្បែងមានជ័យ 097 974 4447)។ 7. វត្តពើងព្រះគោ ឃុំឈានមុខ ស្រុកត្បែងមានជ័យ មានចំនួន ៣១គ្រួសារ ស្មើនឹង ១០៦នាក់ (ទំនាក់ទំនង៖ លោក នុត សោភ័ណ្ឌ អភិបាលស្រុកត្បែងមានជ័យ 097 974 4447)។ 8. វត្តពើងអង្កកាម (បាក់កាំ) ឃុំឈានមុខ ស្រុកត្បែងមានជ័យ មានចំនួន ១៦៣គ្រួសារ ស្មើនឹង ៥៨៥នាក់ (ទំនាក់ទំនង៖ លោក នុត សោភ័ណ្ឌ អភិបាលស្រុក ត្បែងមានជ័យ 097 974 4447)។ 9. វត្តពើងនាគ ឃុំឈានមុខ ស្រុកត្បែងមានជ័យ មានចំនួន ៥៣គ្រួសារ ស្មើនឹង ១៦៥គ្រួសារ (ទំនាក់ទំនង៖ លោក នុត សោភ័ណ្ឌ អភិបាលស្រុក ត្បែងមានជ័យ 097 974 4447)។ 10. វត្តព្រះលាន ឃុំព្រះឃ្លាំង មានចំនួន ៣៩គ្រួសារ ស្មើនឹង ២៥៩នាក់ (ទំនាក់ទំនង៖ លោក នុត សោភ័ណ្ឌ អភិបាលស្រុក ត្បែងមានជ័យ 097 974 4447)។ 11. វត្តប្រមេរ ឃុំប្រមេរ ស្រុកត្បែងមានជ័យ មានចំនួន ៥៨គ្រួសារ ស្មើនឹង ២០៩នាក់ (ទំនាក់ទំនង៖ លោក នុត សោភ័ណ្ឌ អភិបាលស្រុក ត្បែងមានជ័យ 097 974 4447)។ សម្រាប់នៅសាលាខេត្តព្រះវិហារ ទំនាក់ទំនងលោកស្រី ប៉ាង រ៉ាវី អភិបាលរងខេត្ត 071 255 1966៕

អាជ្ញាធរមីន អំពាវនាវដល់សហគមន៍អន្តរជាតិឈរជាមួយកម្ពុជា ថ្កោលទោសទង្វើអមនុស្សធម៌របស់ថៃឈ្លានពានកម្ពុជា ដោយប្រើប្រាស់គ្រាប់បែកចង្កោម

ភ្នំពេញ៖ អាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(អាជ្ញាធរមីន) នៅព្រឹកថ្ងៃទី២៧ ខែកក្កដានេះ បានចេញលិខិតធ្វើការអំពាវនាវដល់សហគមន៍អន្តរជាតិ ឱ្យឈរជាមួយកម្ពុជាថ្កោលទោសទង្វើអមនុស្សធម៌របស់ថៃ ឈ្លានពានដោយគិតព្រាងទុកជាមុន និងការប្រើប្រាស់គ្រាប់បែកចង្កោមមកលើប្រទេសកម្ពុជា។យោងតាមសេចក្តីអំពាវនាវរបស់អាជ្ញាធរមីនកម្ពុជា ដែលបានចេញនៅថ្ងៃទី២៧ ខែកក្កដា ឆ្នាំ២០២៥នេះ បានលើកឡើងថា គ្រាប់បែកចង្កោម ដែលថៃខ្លួនឯងបានទទួលស្គាល់ថាបានប្រើប្រាស់ គឺជាអាវុធដ៏ព្រៃផ្សៃបំផុត ដែលប្រើប្រាស់នៅក្នុងសង្គ្រាម។ គ្រាប់បែកចង្កោមទាំងនេះ មិនត្រឹមតែបង្កសោកនាដកម្មនាពេលបច្ចុប្បន្ននោះទេ វានឹងបន្តនៅពាសពេញផ្ទៃដីរបស់កម្ពុជា និងបន្តបង្កសោកនាដកម្មដល់មនុស្សនាពេលអនាគតផងដែរ។ នៅពេលដែលគ្រាប់បែកនេះធ្លាក់មកវានឹងបែកចេញជាគ្រាប់តូចៗជាច្រើនស្រោចស្រពទៅលើវាលស្មៅ សាលារៀន មណ្ឌលសុខភាព វត្តអារាម និងទីតាំងប្រាសាទនានាហើយគ្រាប់ទាំងនេះ នឹងមិនបាត់ទៅវិញឡើយ ទោះបីជាសង្គ្រាមបានបញ្ចប់ក៏ដោយ ហើយវានឹងក្លាយជាស្រមោលដ៏សែនឃោរឃៅនៃសង្គ្រាម ដែលបន្តគំរាមកំហែងដល់ប្រជាជន។អាជ្ញាធរមីនបានចាត់ទុកថា ការវាយប្រហាររបស់ទាហានឈ្លានពានថៃមកលើកម្ពុជា នាពេលនេះ «គឺមិនមែនជាជម្លោះយោធានោះទេ តែជាការបង្កសោកនាដកម្មដល់ប្រជាជនស្លូតត្រង់ ស្ត្រី កុមារ ព្រះសង្ឃ និងកសិករ។ ក្នុងរយៈពេល ៧២ម៉ោងចុងក្រោយនេះ មនុស្សបានរបួសនិងបាត់បង់ជីវិត និងផ្ទះសម្បែង ទ្រព្យសម្បត្តិ និងទីសក្ការៈបូជាត្រូវបានបំផ្លាញ ត្រូវនិងឆេះខ្ទេចខ្ទី ប្រាសាទព្រះវិហារដែលមានតម្លៃជាសកលសម្រាប់មនុស្សជាតិ ជាបេតិកភណ្ឌពិភពលោក ជានិមិត្តរូបនៃដួងព្រលឹងសន្តិភាព និងជាអត្តសញ្ញាណជាតិកម្ពុជា ត្រូវទទួលរងផលប៉ះពាល់ និងបំផ្លិចបំផ្លាញយ៉ាងធ្ងន់ធ្ងរដោយសារការវាយប្រហារនេះ(ពីសំណាក់ទាហានឈ្លានពានសផម)។ វាគឺជាការឈឺចាប់បំផុតរបស់ប្រជាជាតិ ហើយវានឹងបន្តដល់មនុស្សជំនាន់ក្រោយទៀត»។តាមរយៈសេចក្តីអំពាវនាវនេះ អាជ្ញាធរមីន ក៏បានលើកឡើងផងដែរថាការឈ្លានពានរបស់ទាហានសៀមក៏បានធ្វើឱ្យអាក់ខានដល់ការអប់រំផងដែរ ដោយគិតត្រឹមរសៀលថ្ងៃទី២៦ ខែកក្កដានេះ សាលារៀនប្រមាណជិត ៥០០ នៅក្នុងខេត្ត/ក្រុងចំនួន១៤ នៅតាមបណ្ដោយព្រំដែន ត្រូវបង្ខំឱ្យបិទ ដែលបានប៉ះពាល់ជាខ្លាំងដល់សិស្ស និងគ្រូប្រមាណ ១៣០,០០០ នាក់។ កុមារដែលអង្គុយរៀននៅក្នុងថ្នាក់ បែរជាមកជ្រកលាក់ខ្លួនដោយភ័យខ្លាច គ្មានសុវត្ថិភាព និងមិនអាចទៅសាលារៀន និងធ្វើសកម្មភាពប្រចាំថ្ងៃមិនដូចមុនឡើយ។ ការឈ្លានពាននេះ មិនត្រឹមតែបង្កការអាក់ខានដល់ការសិក្សា របស់ក្មេងនោះទេ តែវានឹងប៉ះពាល់ជាខ្លាំងដល់សុខុមាលភាពផ្លូវចិត្តរបស់ពួកគេផងដែរ។យ៉ាងណាក៏ដោយជាថ្មីម្ដងទៀតអាជ្ញាធរមីន អំពាវនាវដល់សហគមន៍អន្តរជាតិ ទាំងរដ្ឋាភិបាល ទាំងប្រជាជនគ្រប់ទីកន្លែងនៅទូទាំងពិភពលោក ឱ្យឈរនៅជាមួយកម្ពុជា ខណៈពេលវេលានេះមិនមែនជាពេលវេលា ដែលយើងត្រូវនៅស្ងៀមស្ងាត់នោះទេ គឺជាពេលវេលាដែលយើងត្រូវបង្ហាញភាពក្លាហានរបស់យើង ថ្កោលទោសចំពោះទង្វើដ៏ព្រៃផ្សៃនេះ ទាមទារឱ្យមានការទទួលខុសត្រូវ និងគាំទ្រពេញទំហឹងដល់ប្រជាជនរងគ្រោះ ដែលបានបង្កឡើងពីទាហានឈ្លានពានសៀមនោះ៕អត្ថបទ បាន ចក់

ទាហានឈ្លានពានថៃ បានទម្លាក់គ្រាប់លើផ្លូវចូលប្រាសាទព្រះវិហារ និងទីតាំងផ្សេងទៀតយ៉ាងសម្បើម

អ្នកនាំពាក្យរបស់ក្រសួងការពារជាតិកម្ពុជាលោកជំទាវឧត្តមសេនីយ៍ឯក ម៉ាលី សុជាតា បានបញ្ជាក់អះអាងថា រហូតដល់ថ្ងៃទី២៧ ខែកក្កដា ឆ្នាំ២០២៥នេះ ទាហានឈ្លានពានថៃ បានពង្រីកទីកន្លែង ផ្លោងគ្រាប់ និងគ្រាប់បែកចង្កោមចូលទឹកដីកម្ពុជាបន្តទៀតយ៉ាងសម្បើម រួមទាំងទម្លាក់គ្រាប់បែកលើផ្លូវចូលប្រាសាទព្រះវិហារដែលជាសម្បត្តិបេតិកភណ្ឌពិភពលោកចំនួនពីរគ្រាប់ផងដែរ។ថ្លែងប្រាប់អ្នកសារព័ត៌មានស្តីពីបច្ចុប្បន្នភាពនៃការឈ្លានពានរបស់ទាហានថៃ នាព្រឹកថ្ងៃទី២៧ ខែកក្កដា ឆ្នាំ២០២៥នេះ លោកជំទាវម៉ាលី សុជាតា បានគូសបញ្ជាក់ថា ថៃនៅតែបន្តបផ្លោងគ្រាប់ ទម្លាក់គ្រាប់បែកចង្កោម និងបាញ់នូវអាវុធធុនធ្ងន់មកលើកទឹកដីកម្ពុជាយ៉ាងកម្រោល និងគឃ្លើនបំផុត ដោយមិនខ្លាចរអានូវច្បាប់អន្តរជាតិ និងថែមទាំងបំផ្លិតបំផ្លាញ់ផ្ទះសម្បែងប្រជាជនស្លូតត្រង់របស់កម្ពុជា ហេដ្ឋារចនាសម្ព័ន្ធ ដោយក្នុងនោះក៏មាននូវវត្តអារាម ស្ថានីយប្រេងឥន្ធនៈ ផ្សា សាលារៀន និងជាពិសេសនោះគឺប្រាសាទព្រះវិហារដែលជាសម្បត្តិបេតិកភណ្ឌរបស់មនុស្សជាតិតែម្តង រួមទាំងបង្ករវិនាសសកម្មដល់ជនចាស់ជរា ស្រ្តី និងកុមារកម្ពុជាផងដែរ។លោកជំទាវ ម៉ាលី សុជាតា បានបញ្ជាក់ថា ការវិវត្តន៍នៃការបាញ់ប្រហារពីភាគីថៃមកលើកកម្ពុជា ចាប់ពីម្សិលមិញវេលាម៉ោង៥ នៅក្នុងយោធភូមិភាគទី៤ ថៃចាប់ផ្តើមបាញ់ចូលជាំតែ បុស្បូវ ដែលយើងឃើញថា មានការបាញ់ជាបន្តបន្ទាប់ និងរហូត។ជាមួយគ្នានេះដែរកម្មភាពនៅទីតាំងផ្សេងៗនៅក្នុងយោធភូមិភាគទី៤ នៅវេលាម៉ោង១០ថៃ បានទម្លាក់គ្រាប់២គ្រាប់លើផ្លូវឡើងប្រាសាទព្រះវិហារ ទម្លាក់គ្រាប់ បែកចង្កោមនៅតំបន់ភ្នំខ្មោច រហូតមកដល់ម៉ោងជាង២ ថៃបានចាប់ផ្តើមវាយចូលដោយរថក្រោះនៅក្នុងតំបន់វាលឥន្ទ្រី។អ្នកនាំពាក្យក្រសួងការពារជាតិកម្ពុជា ក៏បានលើកឡើងផងដែរថា ទៀបភ្លឺយប់មិញ រហូតដល់ព្រឹកថ្ងៃនេះ(ថ្ងៃទី២៧) ភាគីថៃបានបន្តផ្លោងគ្រាប់បែកចង្កោម និងកាំភ្លើងធំចូលទឹកដីខ្មែរយ៉ាងសម្បើមបន្ថែមទៀតផងដែរ។ តែយ៉ាងណាក៏ដោយគ្រប់ទីតាំងនៃការប្រយុទ្ធទាំងអស់ ទាំងប្រាសាទតាមាន់ ទាំងតំបន់មុំបី ទោះបីជាទាហានថៃប្រើប្រាស់ដ្រូតទម្លាក់គ្រាប់បែកចង្កោម យន្តហោះចម្បាំង និងកាំភ្លើងធំក្តី ក៏វិរៈយោធាកម្ពុជាបានវាយបកទៅវិញគ្រប់ទីតាំងទាំងអស់ដោយមិនញញើត និងតស៊ូយ៉ាងស្វិតស្វាញ និងក្រាញននៀលក្នុងកិច្ចការពារដែនអធិបតេយ្យភាពរបស់យើងឲ្យខាងតែបាន និងប្រឆំាង នឹងចោរឈ្លានពានទឹកដីកម្ពុជា។យ៉ាងណាក៏ដោយអ្នកនាំពាក្យក្រសួងការពារជាតិរូបនេះ ក៏បានបន្តអំពាវនាវទទួចជាថ្មីម្តងទៀតដល់សហគមន៍អន្តរជាតិ រួមគ្នាធ្វើការថ្កោលទោសដល់ទាហានឈ្លានពានថៃផងដែរ ខណៈការឈ្លានពានរបស់ថៃកាន់តែវាទទីធំឡើងមកលើដែនអធិបតេយ្យភាពរបស់កម្ពុជា។ ប៉ុន្តែទោះជាយ៉ាងណាកម្ពុជានឹងមិនដកថយ និងចុះញ៉មចំពោះការឈ្លានពានរបស់ថៃនោះឡើយ ហើយនឹងធ្វើការវាយបកទៅវិញដើម្បីរក្សាសិទ្ធការពារខ្លួនស្របទៅតាមច្បាប់អន្តរជាតិ និងការពារដែនអធិបតេយ្យ និងសេចក្តីសុខរបស់ប្រជាជនខ្មែរទាំងមូលផងដែរ៕អត្ថបទបាន ចក់

TOP STORY | សម្តេចធិបតី៖ ភាគីថៃបានឯកភាពសំណើរបស់ប្រធានាធិបតីដូណាត្រាំ ស្តីពីការឈប់បាញ់គ្នាជាមួយកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាព្រះរាជាណាចក្រកម្ពុជា នៅយប់ថ្ងៃទី២៦ ខែកក្កដា ឆ្នាំ២០២៥នេះ បានពិភាក្សាជាមួយឯកឧត្តមដូ ណាត្រាំ ប្រធានាធិបតីអាមេរិក តាមទូរស័ព្ទស្តីពីការប្រយុទ្ធគ្នាប្រដាប់ដោយអាវុធរវាងកងទ័ពកម្ពុជា និងថៃ ហើយក្នុងកិច្ចសន្ទនានេះ ឯកឧត្តមដូ ណាត្រាំ បានប្រាប់សម្តេចថា ភាគីថៃបានឯកភាពសំណើររបស់ឯកឧត្តម ដើម្បីឈប់បាញ់គ្នាជាមួយកម្ពុជា។តាមរយៈបណ្តាញសង្គមហ្វេសបុក និងឆាណែលតេលេក្រាម នាព្រឹកថ្ងៃទី២៧ ខែកក្កដា ឆ្នាំ២០២៥នេះ សម្តេចធិបតីហ៊ុន ម៉ាណែត នាយករដ្ឋមន្រ្តីបានឲ្យដឹងថា «ជាដំណឹងល្អដែលខ្ញុំបានទទួលពីឯកឧត្តម Donald Trump ក្រោយពីឯកឧត្តមបានពិភាក្សាជាមួយឯកឧត្តម Phumtham Wechayachai នាយករដ្ឋមន្ត្រីស្តីទីថៃ គឺភាគីថៃបានឯកភាពជាមួយសំណើរបស់ឯកឧត្តមប្រធានាធិបតី ស្តីពីការឈប់បាញ់គ្នាភ្លាមផងដែរ។ នេះគឺជាដំណឹងដ៏ល្អសម្រាប់កងទ័ព និងប្រជាជននៃប្រទេសទាំងពីរ»។ សម្តេចធិបតី ហ៊ុន ម៉ាណែត បានអរគុណឯកឧត្តមប្រធានាធិបតី Donald Trump ដែលបានផ្តួចផ្ដើមគំនិត និងសម្របសម្រួលដើម្បីស្វែងរកការឈប់បាញ់ភ្លាម និងសន្តិភាពរវាងកម្ពុជានិងថៃនាពេលនេះផងដែរ ដែលលទ្ធផលដ៏ល្អនេះពិតជានឹងជួយការពារអាយុជីវិតរបស់កងទ័ព និងដូចប្រជាពលរដ្ឋស៊ីវិលជាច្រើននាក់ទាំងខ្មែរទាំងថៃ ដែលអាចបាត់បង់ដោយសារការប្រយុទ្ធគ្នា ឬក៏រងរបួស និងជួយឲ្យជនភៀសខ្លួនរាប់សែននាក់អាចបានត្រឡប់ទៅរស់នៅក្នុងភូមិឋានរបស់ខ្លួនវិញ ដើម្បីបន្តដំណើរការជីវិតជាប្រចាំថ្ងៃរបស់ពួកគាត់ដោយសេចក្តីសុខ និងសន្តិភាព។សម្តេចធិបតី នាយករដ្ឋមន្រ្តីនៃកម្ពុជា បានសង្ឃឹមថាភាគីថៃនឹងមិនកែប្រែជំហរនេះ (កិច្ចពិភាក្សាឈប់បាញ់)ម្តងទៀត ដូចកាលពីថ្ងៃទី២៤ កក្កដាក្រោមការជួយសម្របសម្រួលរបស់ឯកឧត្តម Anwar Ibrahim នោះទេ។ សម្តេចនឹងប្រគល់ភារកិច្ចជូនឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ អោយបន្តកិច្ចការងារនេះដោយពិភាក្សាជាមួយ ឯកឧត្តម Marco Rubio រដ្ឋមន្ត្រីការបរទេសសហរដ្ឋអាមេរិក ដើម្បីសម្របសម្រួលជាមួយភាគីថៃ ក្នុងគោលដៅឈានទៅអនុវត្តគោលការណ៍ដែលបានព្រមព្រៀងគ្នាឲ្យបានឆាប់រហ័ស ដែលអាចបញ្ចប់ការស្លាប់ និងរបួសរបស់កងទ័ពនិងប្រជាពលរដ្ឋទាំងសងខាង៕ អត្ថបទបាន ចក់

បណ្ដាញសង្គម

ព័ត៌មានថ្មីៗ

លោក Trump និយាយថា លោកអាចនឹងដកទណ្ឌកម្មចេញពីក្រុមហ៊ុនចិនដែលទិញប្រេងអ៊ីរ៉ង់

លោក Araghchi ៖ អ៊ីរ៉ង់មិនទុកចិត្តអាមេរិកទេ ហើយពួកគេនឹងចរចាបើសិនវាជាបញ្ហាធ្ងន់ធ្ងរ

រដ្ឋមន្ត្រី៖ ហ្វីលីពីននឹង «ពិតជា» គោរពតាមសំណើរបស់ ICC ដើម្បីចាប់ខ្លួនសមាជិកព្រឹទ្ធសភា

កិច្ចពិភាក្សា BRICS បញ្ចប់ដោយគ្មានសេចក្តីថ្លែងការណ៍រួម ជាការបង្ហាញពីភាពរកាំរកូស ដោយសារសង្គ្រាមនៅអ៊ីរ៉ង់

UN ៖ ការគំរាមកំហែងគ្រោះទុរ្ភិក្សកើតមាននៅភាគខាងត្បូងប្រទេសូម៉ាលី លុះត្រាតែបង្កើនជំនួយមនុស្សធម៌

លោក Trumpនិយាយថា នាយករដ្ឋមន្រ្តីប្រឈមហានិភ័យនយោបាយដោយសារគ្មានវិធានការលើបញ្ហាអន្តោប្រវេសន៍ និងថាមពល

លោក Trump៖ ចិនប្តេជ្ញាចិត្តទិញយន្តហោះ Boeing រហូតដល់ ៧៥០គ្រឿង

រដ្ឋមន្ត្រីការបរទេសអ៊ីរ៉ង់៖ សហរដ្ឋអាមេរិកមានឆន្ទៈបន្តការចរចា និងបើកចំហ ចំពោះជំនួយពីចិន

រញ្ជួយដីកម្រិត ៦,៣រ៉ិចទ័រ កើតមាននៅភាគខាងជើងនៃប្រទេសជប៉ុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877