BTV NEWS

ក្រសួងការពារជាតិ អំពាវនាវប្រុងប្រយ័ត្ន ខណៈមាន Page បរទេស បន្លំដាក់ឈ្មោះខ្មែរ បង្កចលាចល

ក្រសួងសុខាភិបាល ប្រគល់-ទទួលរថយន្តគិលានសង្គ្រោះចំនួន ១០គ្រឿង ដែលជាហិរញ្ញប្បទានឥណទានរបស់ធនាគារអភិវឌ្ឍន៍អាស៊ី (ADB Loan)

អគ្គលេខាធិការដ្ឋានរដ្ឋសភា និងព្រឹទ្ធសភា បិទវគ្គបណ្តុះបណ្តាលស្តីពី “ការទូតសភា” ជូនដល់មន្ត្រីជំនាញនៃសភា កម្ពុជា-ឡាវ

រដ្ឋសភាកម្ពុជាសហការជាមួយ AVI និងKASបើកវគ្គបណ្តុះបណ្តាលកសាងសមត្ថភាពមន្ត្រីនិងយុវជន ដើម្បីក្លាយជា«ខែលការពារសុចរិតភាពព័ត៌មាន» ក្នុងយុគសម័យបញ្ញាសិប្បនិម្មិត (AI)

ព័ត៌មានជាតិ

ក្រុមការងាររាជរដ្ឋាភិបាលចុះសួរសុខទុក្ខកងកម្លាំង ក្រុមគ្រូពេទ្យ និងបងប្អូនប្រជាពលរដ្ឋភៀសសឹកនៅស្រុកព្រះនេត្រព្រះ

ភ្នំពេញ៖ ក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ដឹកនាំដោយ ឯកឧត្តម គង់ ច័ន្ទវាសនា និងមានការចូលរួមពី ឯកឧត្តម ងិន ឆាយ លោកជំទាវ ហ៊ូ សុពណ៌ លោកស្រី ស៊ិន សោភណ័ ជាអនុប្រធាន និងថ្នាក់ដឹកនាំរដ្ឋបាលស្រុកព្រះនេត្រព្រះ បាននាំយកស្បៀងអាហារ និងថវិកាមួយចំនួន ចុះសួរសុខទុក្ខ លើកទឹកចិត្ត និងឧបត្ថម្ភកងកម្លាំង ក្រុមគ្រូពេទ្យ និងប្រជាពលរដ្ឋជាពិសេសកុមារកំព្រាដែលភៀសខ្លួនចេញពីតំបន់ប្រយុទ្ធ ក្នុងខេត្តឧត្តរមានជ័យ មកស្នាក់នៅបណ្តោះអាសន្ននៅទីតាំងសុវត្ថិភាព ក្នុងមូលដ្ឋានស្រុកព្រះនេត្រព្រះ កាលពីថ្ងៃទី២៥ ខែកក្ក្កដា ឆ្នាំ២០២៥។ ឯកឧត្តមប្រធានក្រុមការងារ បានជម្រាបជូនអំពីការយកចិត្តទុកដាក់ខ្ពស់ និងការផ្តាំផ្ញេីសួរសុខទុក្ខរបស់ថ្នាក់ដឹកនាំរាជដ្ឋាភិបាល និងរបស់ឯកឧត្តមរដ្ឋមន្ត្រី ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ជូនដល់កងកម្លាំង ក្រុមគ្រូពេទ្យ និងប្រជាពលរដ្ឋទាំងអស់ ជាពិសេសក្នុងស្ថានភាពនៃការបង្កហេតុរបស់ភាគីថៃ។ ឯកឧត្តមបានលេីកទឹកចិត្តឱ្យទាំងអស់គ្នាបន្តជឿជាក់លេីការដឹកនាំរបស់សម្តេចធិបតីនាយករដ្ឋមន្ត្រី ដែលកំពុងដឹកនាំបញ្ជាដោះស្រាយបញ្ហា និងទប់ទល់ការឈ្លានពានរបស់ថៃមកលេីទឹកដីកម្ពុជាយេីង។ ឯកឧត្តម គង់ ច័ន្ទវាសនា បានជម្រាបជូនបន្ថែមថា ក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ដឹកនាំដោយឯកឧត្តមរដ្ឋមន្ត្រី ឌិត ទីណា និងក្រុមការងាររាជរដ្ឋាភិបាលចុះមូលដ្ឋានគ្រប់ក្រុង និងស្រុកទាំងអស់នៅទូទាំងខេត្តបន្ទាយមានជ័យ កំពុងមានវត្ថមានក្នុងមូលដ្ឋានក្រុង ស្រុក និងខេត្ត ដេីម្បីជួយគាំទ្រដល់រដ្ឋបាលក្រុង ស្រុក និងខេត្ត លេីការងារចាំបាច់នានា ក្នុងស្ថានភាពលំបាកនេះ៕

អភិបាលខេត្តតាកែវ៖ ប្រជាពលរដ្ឋខេត្តតាកែវរួមចិត្តរួមកាយគាំទ្ររាជរដ្ឋាភិបាលក្នុងការប្រយុទ្ធប្រឆាំង សៀមឈ្លានពាន

តាកែវ៖ អភិបាលខេត្តតាកែវ ឯកឧត្តម វ៉ី សំណាង បានចូលរួមលើកទឹកចិត្តវីរកងទ័ពដែលកំពុងឈរជើង ការពារទឹកដីយ៉ាងរឹងមាំទប់ទល់នឹងចោរសៀមឈ្លានពាន ដោយបានបញ្ជាក់ថា ក្នុងនាមមន្រ្តីរាជការ កង កម្លាំងប្រដាប់អាវុធ ជាពិសេសបងប្អូនប្រជាពលរដ្ឋនៅក្នុងខេត្តតាកែវជាង១លាននាក់ រួមចិត្តរួមកាយ ដើម្បីគាំទ្រដល់រាជរដ្ឋាភិបាលកម្ពុជា និងកងទ័ពទាំងអស់ក្នុងការប្រយុទ្ធប្រឆាំងជាមួយចោរសៀមឈ្លាន ពាន។ឯកឧត្តម បានបញ្ជាក់ថា មន្រ្តីរាជការ បងប្អូនប្រជាពលរដ្ឋខ្មែរទាំងអស់ក្នុងខេត្តតាកែវ នឹងផ្ដល់ជា កម្លាំងចិត្ត កម្លាំងកាយ សម្ភារបរិក្ខារជូនទៅសមរភូមិមុខ ដើម្បីប្រយុទ្ធតទល់នឹងពួកចោរឈ្លានពាន។ឯកឧត្តម វ៉ី សំណាង បានអំពាវនាវដល់អង្គការសហប្រជាជាតិ សហគមន៍អន្តរជាតិទាំងអស់ មេត្តា ធ្វើយ៉ាងណាចាត់គ្រប់វិធានការណ៍ គ្រប់នីតិវិធីដើម្បីថ្កោលទោស និងដាក់សម្ពាធឱ្យទាហានឈ្លានពាន សៀមបញ្ឈប់ការវាយប្រហារមកលើទាហានកម្ពុជា និងសូមបួងសួងដល់វត្ថុស័ក្ដិសិទ្ធិក្នុងលោក ជួយបីបាច់ ថែរក្សាកងកម្លាំងប្រដាប់អាវុធកម្ពុជាទាំងអស់ដែលកំពុងប្រយុទ្ធនៅសមរភូមិមុខ សូមទទួលបាននូវសុខ សុវត្ថិភាព និងជ័យជម្នះលើសមរភូមិ ៕

អភិបាលខេត្តប៉ៃលិនបញ្ជាក់ថាមិនមានការផ្ទុះអាវុធទេនៅព្រំដែនខេត្តនេះគឺរក្សាប្រក្រតីភាពធម្មតា

(ប៉ៃលិន)៖ លោកជំទាវ បាន ស្រីមុំ អភិបាលខេត្តប៉ៃលិន បានបញ្ជាក់ថា ក្នុងភូមិសាស្ដ្រខេត្តប៉ៃលិន មិន មានការផ្ទុះអាវុធនៅតាមព្រំដែននោះទេ ពោលគឺរក្សាប្រក្រតីភាពធម្មតា ខុសពីការផ្សព្វផ្សាយព័ត៌មានមិន ពិតនៅតាមបណ្ដាញសង្គម ។ឆ្លើយតបចំពោះការចែកចាយតាមបណ្ដាញសង្គម លោកជំទាវ បានបញ្ជាក់ថា «ស្ថានភាពព្រំដែនក្នុងភូមិ សាស្ត្រខេត្តប៉ៃលិន យប់ថ្ងៃទី២៥ ខែកក្កដា នេះ រហូតដល់ពេលនេះ រក្សាប្រក្រតីភាពធម្មតា។សូមជម្រាបថា ការចេញមកបញ្ជាក់របស់អភិបាលខេត្តប៉ៃលិន បានធ្វើឡើងបន្ទាប់ពីមានការចែកចាយនៅ តាមបណ្ដាញសង្គម Facebook ថា ទាហានឈ្លានពានថៃ បានបន្ដផ្ទុះអាវុធដល់ភូមិសាស្ដ្រខេត្តប៉ៃលិន៕

ឯកឧត្តម ឌិត ទីណា៖ ការភៀសខ្លួនពលរដ្ឋគឺជាការលះបង់ចាំបាច់ លើការជួយសម្រួលឱ្យកងទ័ពការពារទឹកដីដោយទឹកចិត្ត អង់អាចក្លាហាន

ភ្នំពេញ៖ នាព្រឹកថ្ងៃទី២៦ ខែកក្កដា ឆ្នាំ២០២៥នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានបន្តដំណើរសួរសុខទុក្ខ និងនាំយកស្បៀង ជូនប្រជាពលរដ្ឋ និងគ្រួសារកងទ័ព ដែលបានភៀសខ្លួនពីតំបន់សឹកខេត្តឧត្តរមានជ័យ និងតំបន់ជួរមុខព្រំដែនខេត្តបន្ទាយមានជ័យ មកទីទួលសុវត្ថិភាពនៃស្រុកថ្មពួក។នាឱកាសនេះ ឯកឧត្តមរដ្ឋមន្ត្រី បានមានមតិផ្ដាំផ្ញើឱ្យរក្សាភាពអត់ធ្មត់ស៊ូទ្រាំ និងថែរក្សាខ្លួននៅទីកន្លែងសុវត្ថិភាព ខណៈពេលដែលការចាកចេញពីភូមិស្រុក គេហដ្ឋាន ពុកម៉ែបងប្អូនគឺជាការលះបង់ចាំបាច់មួយដើម្បីបញ្ចៀសហានិភ័យនៃការប្រយុទ្ធគ្នា ដែលជួយសម្រួលឱ្យកងទ័ពរបស់យើងការពារទឹកដីដោយទឹកចិត្តមោះមុត និងអង់អាចក្លាហាន។ឯកឧត្តមរដ្ឋមន្ត្រី ក៏បានពាំនាំការផ្ដើមផ្ញើសួរសុខទុក្ខ និងសេចក្ដីនឹករលឹក ពីសំណាក់សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ ឯកឧត្តមបានបន្ថែមថា យើងទាំងអស់គ្នាគាំទ្រកងទ័ពដ៏អះអាងរបស់យើងក្នុងបុព្វហេតុការពារអធិបតេយ្យភាពជាតិ និងបូរណភាពទឹកដី រហូតដល់ពុកម៉ែបងប្អូនវិលត្រឡប់ទៅភូមិស្រុកគេហដ្ឋានវិញបាន៕

ការឈ្លានពានរបស់ទាហានសៀមមិនត្រឹមតែប៉ះពាល់ដល់សន្តិសុខតាមព្រំដែនប៉ុណ្ណោះទេថែមទាំងប៉ះពាល់ដល់សន្តិសុខក្នុងតំបន់ផងដែរ

ភ្នំពេញ ៖ អ្នកនាំពាក្យក្រសួងការពារជាតិកម្ពុជា បានថ្លែងថា ការឈ្លានពានរបស់ទាហានសៀមមកលើកម្ពុជា មិនត្រឹមតែប៉ះពាល់ដល់សន្តិសុខនៅតាមបណ្តោយព្រំដែនរវាងកម្ពុជា និងសៀមប៉ុណ្ណោះទេ វាថែមទាំងប៉ះពាល់ដល់សន្តិសុខក្នុងតំបន់ផងដែរ ដូច្នេះកម្ពុជានៅតែបន្តអំពាវនាវឲ្យសហគមន៍អន្តរជាតិជួយអន្តរាគមន៍ជាបន្ទាន់ ខណៈទង្វើឈ្លានពានរបស់ទាហានសៀមកាន់តែពង្រីកធំឡើងៗហើយនោះ។ ក្នុងសន្និសីទប្រចាំថ្ងៃជាលើកទីពីរ ស្តីពីដំណើរការឈ្លានពានរបស់ទាហានសៀមមកលើកម្ពុជា នាថ្ងៃទី២៦ ខែកក្កដា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតា បានលើកឡើងជាមួយទឹកមុខយ៉ាងមុតមាំថា រហូតមកដល់ពេលនេះទាហានឈ្លានពានសៀមបានកំពុងបន្តផ្លោងគ្រាប់ចូលទឹកដីកម្ពុជា នៅតំបន់ថ្មដាខេត្តពោធិសាត់ ដោយឡែកខេត្តបន្ទាយមានជ័យ និងខេត្តកោះកុងមិនទាន់មានការផ្ទុះអាវុធនោះទេ ប៉ុន្តែទាហានឈ្លានពានសៀមបានធ្វើការគំរាមកំហែងដល់ទាហានកម្ពុជា ខណៈខេត្តកោះកុងទាហានសៀមបានចល័តនាវាចម្បាំងចំនួន៨គ្រឿងចូលចន្លោះកោះឆាង និងកោះគុត។ លោកជំទាវម៉ាលី សុជាតា បានបញ្ជាក់ថា«ចំពោះខេត្តបន្ទាយមានជ័យមិនទាន់មានការផ្ទុះអាវុធនៅឡើយទេ...ប៉ុន្តែកងទ័ពថៃបានដើរដាក់សម្ពាធ និងគំរាមកំហែងមកលើកងកម្លាំងកម្ពុជា បណ្តេញចេញ ពីទឹកដីកម្ពុជាបើមិនចេញនឹងមានការប្រើប្រាស់អាវុធ បាញ់ប្រហារមកលើកងកម្លាំងប្រដាប់អាវុធកម្ពុជា»។លោកជំទាវម៉ាលី សុជាតា បានហៅការគំរាមកំហែងរបស់ទាហានឈ្លានបានសៀមនេះ គឺជាទង្វើ រំលោភបំពាននូវMOU នៃមាត្រា៥ ហើយទង្វើប្រកបដោយអរិយភាពនេះ គឺបានកើតឡើងតាំងពីតំបន់ប្រាសាទតាមាន់តូច តាមាន់ធំ តាក្របី មុំបី និងតំបន់ជាច្រើនទៀត ដែលបណ្តាលជនស៊ីវិលកម្ពុជាស្លាប់ និងរងរបួសជាច្រើននាក់ និងរាប់ម៉ឺននាក់ទៀតកំពុងរត់ភៀសសឹករកមណ្ឌលសុវត្ថិភាព៕អត្ថបទ ៖ បាន ចក់

ក្រោយចោរឈ្លានពានសៀមវាយចូលកម្ពុជាបណ្តាលឲ្យទាហានកម្ពុជាពលីជីវិត៥នាក់របួស២១នាក់ជនស៊ីវិលស្លាប់៨នាក់និងរបួស៥០នាក់

ភ្នំពេញ ៖ អ្នកនាំពាក្យរបស់ក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានប្រកាសឲ្យ ដឹងថា ក្រោយទាហានឈ្លានពានសៀមបានបាញ់ចូលទាំងកម្រោលចូលទឹកដីកម្ពុជា ជាច្រើនកន្លែងមក រហូតដល់ថ្ងៃទី៣ ពោលគឺចាប់ពីថ្ងៃទី២៤ ដល់ថ្ងៃទី២៦ ខែកក្កដា ឆ្នាំ២០២៥នេះ បានបណ្តាលឲ្យទាន កម្ពុជាពលីជីវិតចំនួន៥នាក់ រងរបួសធ្ងន់ស្រាល២១នាក់ ជនស៊ីវិលស្លូតត្រង់កម្ពុជាបាត់បង់ជីវិត៨នាក់ និង រងរបួស៥០នាក់ ហើយរាប់ម៉ឺននាក់បានភៀសសឹករកមណ្ឌលសុវត្ថិភាព។ ក្នុងសន្និសីទសារព័ត៌មាន ស្តីពីដំណើរការឈ្លានពានរបស់ទាហានឈ្លានពានសៀម នៅព្រឹកព្រលឹមថ្ងៃទី២៦ ខែកក្កដា ឆ្នាំ២០២៥នេះ លោកជំទាវអ្នកនាំពាក្យក្រសួងការពារជាតិកម្ពុជា បានបញ្ជាក់ថា ការឈ្លានពាន និងការរំលោភអធិបតេយ្យភាព និងបូរណភាពទឹកដីរបស់កម្ពុជា ពីសំណាក់ទាហានឈ្លានពានសៀមដ៏កម្រោលនេះ គឺជាការរំលោភបំពានយ៉ាងធ្ងន់ធ្ងរបំផុតលើច្បាប់អន្តរជាតិ រួមទាំងគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ ហើយបានបង្កគ្រោះថ្នាក់ដល់អាយុជីវិតជនស៊ីវិលស្លូតត្រង់ និងបំផ្លាញសន្តិភាព និងស្ថិរភាពក្នុងតំបន់បន្ថែមទៀតផងដែរ។ លោកជំទាវអ្នកនាំពាក្យបានបញ្ជាក់ទៀតថា មកដល់ថ្ងៃទី៣ក្រោយការឈ្លានពានរបស់ទាហានឈ្លានពានសៀមនេះ គេបានពង្រីកការបាញ់ប្រហារមកលើកម្ពុជារាលដាលដល់ខេត្តផ្សេងទៀត ដោយក្នុងនោះដោយបានបើកការវាយប្រហារដោយកាំភ្លើងធំចំនួន៥គ្រាប់ មកលើទីតាំងជាច្រើនកន្លែងនៅក្នុងភូមិសាស្រ្តដែលមានការឯកភាព ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ ខណៈការពង្រីកនៃការឈ្លានពាននេះគឺជាគោលបំណងបំពាន ដែលរៀបចំទុកជាមុនពីសំណាក់ទាហានឈ្លានពានសៀម។ ជាមួយគ្នានោះក្រសួងការពារជាតិកម្ពុជា សូមធ្វើការថ្កោលទោសយ៉ាងខ្លាំងក្លាចំពោះសទង្វើឈ្លានពានរបស់ទាហានសៀម ហើយកម្ពុជាក៏សូមអំពាវនាវឱ្យសហគមន៍អន្តរជាតិចូលរួម ក្នុងការថ្កោលទោសយ៉ាងម៉ឺងម៉ាត់បំផុតចំពោះការឈ្លានពានខុសច្បាប់របស់សៀមនេះដែរ។ តាមរយៈអ្នកនាំពាក្យក្រសួងការពារជាតិកម្ពុជានេះដែរ កម្ពុជាទាមទារឱ្យសៀមបញ្ឈប់រាល់សកម្មភាពអរិភាពជាបន្ទាន់ ហើយប្រកាន់ខ្ជាប់កាតព្វកិច្ចរបស់ខ្លួនក្រោមច្បាប់អន្តរជាតិ។ យ៉ាងណាក៏ដោយកម្ពុជានៅតែប្តេជ្ញាចិត្ត ក្នុងការដោះស្រាយវិវាទដោយសន្តិវិធី និងអនុលោមតាមច្បាប់អន្តរជាតិ។ កម្ពុជារក្សាសិទ្ធិក្នុងការការពារខ្លួនដូចមានចែងក្នុងមាត្រា៥១ នៃធម្មនុញ្ញអង្គការសហប្រជាជាតិ។ ជាងនេះទៅទៀតកងយោធពលខេមរភូមិន្ទប្តេជ្ញាចិត្តឥតងាករេ ក្នុងការការពារអធិបតេយ្យភាព បូរណភាពទឹកដី និងសុវត្ថិភាពរបស់ប្រជាជន ប្រឆាំងនឹងអំពើឈ្លានពានដ៏សាហាវឃោរឃៅរបស់សសៀម៕អត្ថបទ៖ បាន ចក់

កម្ពុជាទាត់ចោលទាំងស្រុងចំពោះការផ្សព្វផ្សាយថាកម្ពុជាជាអ្នកបំពាន ឬឈ្លានពានភាគីសៀមមុន

ភ្នំពេញ ៖ ក្រសួងការពារជាតិកម្ពុជាធ្វើការទាត់ចោលទាំងស្រុង ចំពោះព័ត៌មានដែលផ្សាយថាកម្ពុជា ជាអ្នកបំពាន ឬឈ្លានពានថៃមុន ដោយការផ្សព្វផ្សាយនេះគឺជារឿងមិនពិតនោះឡើយ ហើយកម្ពុជាទទួចឲ្យភាគីថៃបង្ហាញទីតាំង ឬកន្លែងដែលថាកម្ពុជា ជាអ្នកបំពានខ្លួនមុននោះផងដែរ។ ក្នុងសន្និសីទសារព័ត៌មានប្រចាំថ្ងៃជាលើកទី២ ស្តីពីដំណើរការឈ្លានពានរបស់ទាហានសៀម មកលើកម្ពុជា នាថ្ងៃទី២៦ ខែកក្កដា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតា បានលើក ឡើងថាពេលវេលានេះកម្ពុជា គឺជាជនរងគ្រោះពីការឈ្លានពានរបស់ភាគីថៃ ពុំមែនដូចការចុះផ្សាយព័ត៌ មានក្លែងក្លាយ បំភ្លើស បំភ្លៃថាកម្ពុជា ជាអ្នកបំពានថៃនោះឡើយ។ យ៉ាងណាក៏ដោយកម្ពុជារក្សាសិទ្ធិវាយ បក គឺជាការរក្សាសិទ្ធិនូវកិច្ចការពារនូវដែនអធិបតេយ្យរបស់ខ្លួនតែប៉ុណ្ណោះ។ជាថ្មីម្តងទៀតអ្នកនាំពាក្យរបស់ក្រសួងការពារជាតិកម្ពុជារូបនេះ ក៏បានក៏បានប្រកាសផងដែរថា កងទ័ពកម្ពុជាគឺឈរលើគោលការណ៍ ដោយវាយបកចំពោះគោលដៅយោធារបស់ចោរឈ្លានពានសៀមតែប៉ុណ្ណោះ ពុំមានគោលការណ៍វាយប្រហារលើជនស៊ីវិលនោះឡើយ។ ជាមួយគ្នានោះដែរ លោកជំទាវម៉ាលី សុជាតា អ្នកនាំពាក្យក្រសួងការពារជាតិកម្ពុជា ក៏បានលើកឡើងផងដែរថា រហូតមកដល់ម៉ោងនេះកងកម្លាំងប្រដាប់អាវុធរបស់កម្ពុជាឈរយ៉ាងរឹងមាំ និងជឿជាក់ក្លាហាន មុះមុតក្នុងកិច្ចការពារដែនអធិបតេយ្យ និងបូរណភាពទឹកដីរបស់ខ្លួនដោយមិនរុញរា មិនខ្លាចការគំរាមកំ ហែង ការបង្ខិតបង្ខំ ដាក់សម្ពាធ ឬការដាក់ពង្រាយកម្លាំងឈ្លានពាននៅទីតាំងផ្សេងៗរបស់ក្រុមទាហានឈ្លានពានសៀមនោះឡើយផ្ទុយទៅវិញកងកម្លាំងប្រដាប់អាវុធកម្ពុជាបានឈរយ៉ាងអង់អាចក្លាហានដើម្បីការការពារដែនអធិបតេយ្យភាពរបស់ខ្លួនដោយមិនឲ្យបាត់បង់ដីរបស់ខ្លួន សូម្បីតែមួយមីលីម៉ែត្រនោះឡើយ៕អត្ថបទ ៖ បាន ចក់

សម្តេចកិត្តិសង្គហបណ្ឌិត ម៉ែន សំអន អញ្ជើញគោរពវិញ្ញានក្ខន្ធសពវីរកងទ័ពពលី ក្នុងសមរភូមិឈ្លានពានរបស់កងទ័ពថៃ

ឧត្តរមានជ័យ៖ នាព្រឹកថ្ងៃទី២៦ ខែកក្កដា ឆ្នាំ២០២៥ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ អមដំណើរដោយ ឯកឧត្តម ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជកម្ពុជា បានអញ្ជើញគោរពវិញ្ញានក្ខន្ធសពវីរកងទ័ពពលី២រូប នៃកងពលតូចថ្មើរជើងលេខ៤២ យោធភូមិភាគទី៤ ក្នុងសមរភូមិឈ្លានពានពីកងទ័ពថៃ នៅប្រាសាទតាមាន់តូច ខេត្តឧត្តរមានជ័យ។ក្នុងវេលាដ៏សោកសៅ និងក្រៀមក្រំនេះ សម្តេចកិត្តិសង្គហបណ្ឌិត ម៉ែន សំអន សូមចូលរួមរំលែកទុក្ខ ជូនដល់ក្រុមគ្រួសារនៃសព ចំពោះមរណភាពរបស់លោកអនុសេនីយ៍ទោ ក្លប រាយ និង លោក ព្រិន្ទបាលឯក ឡោក ម៉ៅ ជាកងទ័ពនៅកងពលតូចថ្មើរជើងលេខ៤២ ដែលទទួលមរណភាព ក្នុងសមរភូមិមុខនៅព្រំដែន ប្រាសាទតាមាន់ធំ ស្ថិតក្នុងខេត្តឧត្តរមានជ័យ។សម្តេចកិត្តិសង្គហបណ្ឌិត ម៉ែន សំអន បានចាត់ទុកការបាត់បង់ លោកអនុសេនីយ៍ទោ ក្លប រាយ និង លោកព្រិន្ទបាលឯក ឡោក ម៉ៅ ថា ជាការបាត់បង់នូវស្វាមី ឪពុក កូនប្រុស បងប្រុស ប្អូនប្រុសជាទីស្រឡាញ់ ប្រកបដោយព្រហ្មវិហារធម៌ចំពោះក្រុមគ្រួសារ ហើយក៏ជាការបាត់បង់នូវយោធិនស្នេហាជាតិដ៏បរិសុទ្ធ ដែលបានលះបង់អស់ពីកម្លាំងកាយចិត្តបញ្ញាស្មារតី និងធ្វើពលិកម្មគ្រប់បែបយ៉ាងដើម្បីបុព្វហេតុ ជាតិ សាសនា ព្រះមហាក្សត្រ ជាពិសេស លោកបាន រួមចំណែកយ៉ាងសកម្ម នៅក្នុងកិច្ចការការពារអធិបតេយ្យភាព បូរណភាពទឹកដី ដើម្បីសេចក្តីសុខក្សេមក្សាន្តរបស់ប្រជាជនកម្ពុជា។ក្នុងនាម សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចកិត្តិសង្គហបណ្ឌិត ម៉ែន សំអន មានប្រសាសន៍ថា ថ្នាក់ដឹកនាំគ្រប់លំដាប់ថ្នាក់ និងរាជរដ្ឋាភិបាល សូមដឹងគុណវីរភាព អង់អាច ក្លាហាន និងពលីរបស់យុទ្ធជនទាំងពីររូប និងជាការចងចាំមិនអាចបំភ្លេចបានចំពោះការពលីក្នុងសមរភូមិការពារបូរណភាពទឹកដី និងអធិបតយ្យភាព ក្នុងនាមកម្ពុជាជាប្រទេសតែងតែរក្សាសុខសន្តិភាព ស្ថិរភាព និងចំណងមិត្តភាពជាមួយប្រទេសជាមិត្ត។សម្តេចកិត្តិសង្គហបណ្ឌិត ម៉ែន សំអន មានប្រសាសន៍ទៀតថា ក្នុងពេលកម្ពុជារងការវាយប្រហារ ឈ្លានពានពីកងទ័ពថៃឥតឈប់ឈររហូតធ្វើឱ្យកងទ័ពបានបាត់បង់អាយុជីវិត ប៉ុន្តែទឹកចិត្តរបស់ប្រជាពលរដ្ឋខ្មែរគ្រប់ទិសទីបានតម្កល់ការតស៊ូរបស់កងទ័ពជួរមុខ ជាស្មារតីខ្មែរតែមួយ ហើយគាំទ្រជានិច្ចទាំងស្មារតី និងធនធានផ្ទាល់ខ្លួនជូនចំពោះកងទ័ពជាដរាប ដើម្បីបង្ហាញពីមនសិកាស្នេហាជាតិ។ជាចុងក្រោយ សម្តេចកិត្តិសង្គហបណ្ឌិត ម៉ែន សំអន ស្នើដល់ប្រជាពលរដ្ឋទាំងអស់ សូមចូលរួមគាំទ្រ និងជឿជាក់លើការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលបានខិតខំប្រឹងប្រែង និងការពារដាច់ខាតចំពោះបូរណភាពទឹកដី និងអាយុជីវិតប្រជាពលរដ្ឋជាជនភៀសសឹក ជម្លៀសមកពីតំបន់ប្រឈមដោយការវាយប្រហាររបស់កងទ័ពថៃ៕

អាជ្ញាធរស្រុកឈូករៀបចំពិធីស្តេចក្រុងពាលីនិងអញ្ជើញបារមីមេទ័ពខ្មែរគ្រប់ជំនាន់ជួយដល់វីរៈកងព័ទខ្មែរ ឈ្នះចោរឈ្លានពានទឹកដី

កំពត៖ នៅរសៀលថ្ងៃទី២៥ ខែកក្កដា ឆ្នាំ២០២៥ រដ្ឋបាលស្រុកឈូក បានរៀបចំពិធីស្តេចក្រុងពាលី និងអញ្ជើញអស់បារមីមេទ័ពខ្មែរគ្រប់ជំនាន់ ដើម្បីជួយដល់វីរៈកងព័ទខ្មែរ ដែលកំពុងប្រយុទ្ធយ៉ាងអង់អាចក្លាហាននៅតំបន់ដែន(កម្ពុជា-ថៃ)។ ពិធីនេះធ្វើឡើងនៅព្រះសាទមាសលោកជំទាវ ម៉ៅ ក្រោមការដឹកនាំដោយ លោក សៅ មឿន អភិបាលស្រុកឈូក និងមានការចូលរួមពីមន្ត្រីរាជការ ព្រះសង្ឃ និងប្រជាពលរដ្ឋផងដែរ។ លោកអាចារ្យ មន្ត្រីរាជការ និងប្រជាពលរដ្ឋ បានបង្ហាញស្មារតីសាមគ្គីចូលរួមក្នុងពិធីដើម្បីឧទ្ទិសបួងសួង សូមសេចក្តីសុខ និងជ័យជម្នះកើតមានដល់វីរៈកងទ័ពខ្មែរ ដែលកំពុងតែច្បាំងប្រយុទ្ធជាមួយទាហានថៃ។ ពួកគាត់បានផ្ញើសារទៅកាន់កងទ័ពជួរមុខថា ថ្នាក់ដឹកនាំ មន្ត្រីរាជការ ប្រជាជន និងព្រះសង្ឃនៅខាងក្រោយនេះ សូមកោតសរសើរចំពោះវីរៈភាពដ៏អង់អាចក្លាហានរបស់កងព័ទខ្មែរក្នុងការការពារទឹកដី ពីចោរឈ្លានពានថៃ និងបានបួងសួងដល់អស់វិញ្ញាណក្ខន្ធព្រះមហាវិរៈក្សត្រគ្រប់ព្រះអង្គ និងបារមីមេទ័ពខ្មែរគ្រប់ជំនាន់ ឲ្យតាមថែរក្សាកងទ័ពខ្មែរដែលកំពុងប្រយុទ្ធក្នុងសមរភូមិ។ អភិបាលបាលស្រុកឈូក លោក សៅ មឿនបានប្រាប់ឲ្យដឹងថា ក្នុងនាមថ្នាក់ដឹកនាំស្រុក និងក្នុងនាមជាប្រជាពលរដ្ឋខ្មែរ យើងត្រូវរួបរួមសាមគ្គី រួមគ្នាឧត្តម្ភគាំទ្រកម្លាំងកាយចិត្ត ទាំងផ្លូវក្រៅ និងផ្លូវក្នុង ជាក់ស្តែងពិធីនេះ គឺធ្វើឡើងដើម្បីលើកទឹកចិត្តដល់កងព័ទខ្មែរដែលកំពុងតែច្បាំង សូមឲ្យឈ្នះចោរឈ្លានពានដឹកដីកម្ពុជា។ ហើយជំនួសមុខឲ្យមន្ត្រីរាជការ និងពលរដ្ឋស្រុកឈូក លោកសូមគ្រាំទ្ររាល់យន្តការដោះស្រាយ និងដឹកនាំរបស់សម្តេចទាំងទ្វេ។ សូមបញ្ជាក់ថា សម្រាប់រដ្ឋបាលខេត្តកំពតបានចេញញ្ញត្តិគាំទ្រដោយឥតងាករេ និងជឿជាក់ទាំងស្រុងលើការ ដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែន និងការការពារបូរណភាពទឹកដីនៅតាមតំបន់ព្រំដែនកម្ពុជា-ថៃ ព្រមទាំងគាំទ្រយ៉ាង ពេញទំហឹង ចំពោះវីរៈកងទ័ពជួរមុខកម្ពុជា ដែលបាននឹងកំពុងប្រយុទ្ធយ៉ាងអង់អាចក្លាហានជាមួយសត្រូវឈ្លានពានទឹក ដី ដែលបង្កឡើងដោយកងទ័ពផងដែរ៕

អ្នកនាំពាក្យក្រសួងការពារជាតិកម្ពុជា៖ការជាន់មីនពីសំណាក់ទាហានសៀមគឺជាទង្វើរៀបចំជាមុនដើម្បីយកលេសឈ្លានពានកម្ពុជា

ភ្នំពេញ ៖ អ្នកនាំពាក្យក្រសួងការពារជាតិកម្ពុជា លោកជំទាវ ម៉ាលី សុជាតា បានអះអាងថា ការដើរជាន់មីនរបស់ទាហានសៀម ដែលបានបណ្តាលឲ្យដាច់ជើង និងរងរបួសមួយចំនួននោះ គឺជាទង្វើរៀបចំជាមុនពីសំណាក់ទាហានឈ្លានពានសៀម ដើម្បីយកលេសសធ្វើការឈ្លានពាន និងបាញ់ប្រហារមកលើកម្ពុជា ខណៈសកម្មភាពនេះគឺជាទង្វើដ៏ឃោឃៅ ដែលកម្ពុជាមិនអាចទទួលយកបាននោះឡើយ។ តាមរយៈក្នុងសន្និសីទសារព័ត៌មាន ស្តីពីដំណើរការឈ្លានពានរបស់ចោរឈ្លានពានសៀម នៅព្រឹកថ្ងៃទី២៦ ខែកក្កដា ឆ្នាំ២០២៥នេះ លោកជំទាវ ម៉ាលី សុជាតា បានថ្លែងថា ភាគីសៀមកាន់តែគឃ្លើន ដោយបានដាក់ពង្រាយកម្លាំងកងទ័ព វាយប្រហារមកលើកម្ពុជា កាន់តែខ្លាំងឡើងដោយមិនចាត់វិធានការ កាត់បន្ថយភាពតានតឹងណាមួយនោះឡើយ ហើយមួយវិញទៀតទាហានឈ្លានពានសៀមបានដាក់ខេត្តត្រាត ចន្ធាបុរី ដែលជាប់នឹងព្រំប្រទល់ខេត្តកោះកុង និងខេត្តពោធិសាត់របស់កម្ពុជា ក្រោមច្បាប់អាជ្ញាសឹក ហើយបានចាប់ផ្តើមពង្រាយទ័ព សព្វាវុធ នៅតាមតំបន់ព្រំដែននៃខេត្តបន្ទាយមានជ័យ ដែលបានរៀបចំទុកជាមុនផងដែរ។ លោកជំទាវម៉ាលី សុជាតា បានសង្កត់ធ្ងន់ថា«ការត្រៀមកងទ័ពទាំងនេះគឺបានបង្ហាញឲ្យឃើញថា ថៃមានបំណងពង្រីកការវាយប្រហារមកលើកម្ពុជាកាន់តែកម្រោល និងរំលោភបំពានដែនអធិបតេយ្យភាព របស់កម្ពុជា កាន់តែខ្លាំងឡើងៗ។ ការចោទប្រកាន់ដោយគ្មានមូលដ្ឋានច្បាស់លាស់ពីសំណាក់ទាហានថៃ មកលើកម្ពុជា ដូចជាការអះអាង ការបំភ្លៃទាក់ទងនឹងការជាន់មីនរបស់កងទ័ពថៃ ជាហេតុផលនៃការបង្កើតទុកជាមុន ដើម្បីយកលេសម្រាប់ពង្រីកយុទ្ធនាការឈ្លានពានលើទឹកដីកម្ពុជា»។តាមរយៈសន្និសីទសារព័ត៌មាននេះដែរ លោកជំទាវអ្នកនាំពាក្យក៏បានអំពាវនាវដល់សហគមន៍ អន្តរជាតិ រួមមានក្រុមប្រឹក្សាសន្តិសុខអង្គការសហប្រជាជាតិ សហគមន៍អាស៊ាន និងដៃគូពាក់ព័ន្ធអន្តរជាតិ ទាំងអស់ថ្កោលទោសយ៉ាងធ្ងន់ធ្ងរបំផុត ចំពោះការឈ្លានពានយ៉ាងកម្រោលរបស់ទាហានសៀមមកលើកម្ពុ ជានេះ។ កម្ពុជាក៏បានស្នើឲ្យអន្តរជាតិចាត់វិធានការជាបន្ទានផងដែរ ដើម្បីបង្ការនៃការដាក់ពង្រាយកងទ័ព បន្ថែមទៀតពីសំណាក់ទាហានឈ្លានពានសៀមវាយប្រហារមកលើកម្ពុជា ដោយធានាឲ្យថៃគោរពបូរណៈ ភាបទឹកដីកម្ពុជា និងទាមទារឲ្យទទួលការខុសត្រូវចំពោះការរំលោភបំពានទៅលើធម្មនុញ្ញអង្គការសហប្រ ជាជាតិ សន្ធិសញ្ញាក្រុងសឺណែវ សន្ធិសញ្ញាមិត្តភាព និងសហប្រតិបត្តិការអាស៊ានជាដើម។ យ៉ាងណាក៏ដោយអ្នកនាំពាក្យក្រសួងការពារជាតិកម្ពុជា ក៏បានប្រកាសផងដែរថា កងទ័ពកម្ពុជាគឺឈរលើគោលការណ៍ ដោយវាយចំពោះគោលដៅយោធារបស់ចោរឈ្លានពានសៀមតែប៉ុណ្ណោះ ពុំមានគោលការណ៍វាយប្រហារលើជនស៊ីវិលណាមួយនោះ ខណៈចំណុចនេះរាជរដ្ឋាភិបាលកម្ពុជា កងទ័ពរួមទាំងជនស៊ីវិលកម្ពុជា រួមគ្នាជាធ្លុងមួយក្នុងកិច្ចការ ពារដែនអធិបតេយ្យរបស់ខ្លួន ការពារសេចក្តីថ្លៃថ្នូរបស់ខ្លួន ដោយមិនងាក់រេទោះបីក្នុងតម្លៃណាក៏ដោយ។ ជាមួយគ្នានោះដែរ លោកជំទាវម៉ាលី សុជាតា អ្នកនាំពាក្យក្រសួងការពារជាតិកម្ពុជា ក៏បានឲ្យដឹង ផងដែរថា រហូតមកដល់ម៉ោងនេះកងកម្លាំងប្រដាប់អាវុធរបស់កម្ពុជាឈរយ៉ាងរឹងមាំ និងជឿជាក់ក្លាហាន មុះមុតក្នុងកិច្ចការពារដែនអធិបតេយ្យ និងបូរណភាពទឹកដីរបស់ខ្លួនដោយមិនរុញរា មិនខ្លាចការគំរាមកំ ហែង ការបង្ខិតបង្ខំ ដាក់សម្ពាធ ឬការដាក់ពង្រាយកម្លាំងឈ្លានពាននៅទីតាំងផ្សេងៗរបស់ក្រុមទាហានឈ្លានពានសៀមនោះឡើយផ្ទុយទៅវិញកងកម្លាំងប្រដាប់អាវុធកម្ពុជាបានឈរយ៉ាងអង់អាចក្លាហានដើម្បីការការពារដែនអធិបតេយ្យភាពរបស់ខ្លួនដោយមិនឲ្យបាត់បង់ដីរបស់ខ្លួន សូម្បីតែមួយមីលីម៉ែត្រនោះឡើយ៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

លោក Trump និយាយថា លោកអាចនឹងដកទណ្ឌកម្មចេញពីក្រុមហ៊ុនចិនដែលទិញប្រេងអ៊ីរ៉ង់

លោក Araghchi ៖ អ៊ីរ៉ង់មិនទុកចិត្តអាមេរិកទេ ហើយពួកគេនឹងចរចាបើសិនវាជាបញ្ហាធ្ងន់ធ្ងរ

រដ្ឋមន្ត្រី៖ ហ្វីលីពីននឹង «ពិតជា» គោរពតាមសំណើរបស់ ICC ដើម្បីចាប់ខ្លួនសមាជិកព្រឹទ្ធសភា

កិច្ចពិភាក្សា BRICS បញ្ចប់ដោយគ្មានសេចក្តីថ្លែងការណ៍រួម ជាការបង្ហាញពីភាពរកាំរកូស ដោយសារសង្គ្រាមនៅអ៊ីរ៉ង់

UN ៖ ការគំរាមកំហែងគ្រោះទុរ្ភិក្សកើតមាននៅភាគខាងត្បូងប្រទេសូម៉ាលី លុះត្រាតែបង្កើនជំនួយមនុស្សធម៌

លោក Trumpនិយាយថា នាយករដ្ឋមន្រ្តីប្រឈមហានិភ័យនយោបាយដោយសារគ្មានវិធានការលើបញ្ហាអន្តោប្រវេសន៍ និងថាមពល

លោក Trump៖ ចិនប្តេជ្ញាចិត្តទិញយន្តហោះ Boeing រហូតដល់ ៧៥០គ្រឿង

រដ្ឋមន្ត្រីការបរទេសអ៊ីរ៉ង់៖ សហរដ្ឋអាមេរិកមានឆន្ទៈបន្តការចរចា និងបើកចំហ ចំពោះជំនួយពីចិន

រញ្ជួយដីកម្រិត ៦,៣រ៉ិចទ័រ កើតមាននៅភាគខាងជើងនៃប្រទេសជប៉ុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877