BTV NEWS

សម្រាលការលំបាកពលរដ្ឋភៀសសឹក៖ យុវជនគណបក្សប្រជាជនកម្ពុជា អគ្គលេខាធិការដ្ឋានរដ្ឋសភា ផ្តល់ការបណ្តុះបណ្តាលជំនាញផលិតសាប៊ូលាងចាន ចែកកង់ សម្ភារៈសិក្សា ដាំដើមឈើ និងអំពូលសូឡា ក្នុងភូមិស្លក្រាម

សម្តេចធិបតី៖គុណតម្លៃមិនអាចកាត់ថ្លៃបានរបស់នគរបាលជាតិគឺការចូលរួមការពារបូរណភាពទឹកដី ដែលរងនូវការឈ្លានពានពីថៃ

សម្តេចតេជោ ហ៊ុន សែន ជួបសំណេះសំណាលជាមួយក្រុមប្រឹក្សា មន្ត្រី និងសម្ពោធអគារទីស្នាក់ការគណបក្សប្រជាជនកម្ពុជាខេត្តព្រៃវែង

ក្រសួងការពារជាតិ អំពាវនាវប្រុងប្រយ័ត្ន ខណៈមាន Page បរទេស បន្លំដាក់ឈ្មោះខ្មែរ បង្កចលាចល

ព័ត៌មានជាតិ

អ្នកនាំពាក្យរងក្រសួងមហាផ្ទៃ៖មាត្រាដែលត្រូវធ្វើវិសោធនកម្មពាក់ព័ន្ធនឹងការដកសញ្ជាតិខ្មែរ មានមាត្រា១ មាត្រា៤ មាត្រា៧ មាត្រា២៨ និងមាត្រា២៩ នៃច្បាប់ស្ដីពីសញ្ជាតិ

ភ្នំពេញ ៖ នៅព្រឹកថ្ងៃ ទី២៣ ខែកក្កដា ឆ្នាំ២០២៥, អន្តរក្រសួង រួមានក្រសួងមហាផ្ទៃ និងក្រសួងយុត្តិធម៌ បានបើកកិច្ចប្រជុំដើម្បីពិនិត្យ និងពិភាក្សាលើសេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីសញ្ជាតិ។ កិច្ចប្រជុំនេះ ដឹកនាំដោយឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នឹងមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីជំនាញនៃក្រសួងមហាផ្ទៃ និងក្រសួងយុត្តិធម៌ផងដែរ។លោក ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់ឱ្យដឹងនូវក្រោយកិច្ចប្រជុំនេះថា កិច្ចប្រជុំបានពិភាក្សាគ្នាយ៉ាងផុលផុសជាច្រើនម៉ោងទៅលើខ្លឹមសារនៃសេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីសញ្ជាតិ ដើម្បីឱ្យដើរស្រប និងមានសង្គតភាពទៅនឹងច្បាប់វិសោធនកម្មរដ្ឋធម្មនុញ្ញដែលបើកផ្លូវឱ្យមានការដកសញ្ជាតិលើពលរដ្ឋខ្មែរ (ពលរដ្ឋខ្មែរសំដៅទៅលើពលរដ្ឋខ្មែរដែលទទួលបានសញ្ជាតិពីកំណើតជាម្ចាស់ស្រុក និងពលរដ្ឋទទួលបានសញ្ជាតិតាមរយៈសញ្ជាតូបនីយកម្ម បានន័យថាជនបរទេសដែលទទួលបានសញ្ជាតិខ្មែរតាមលក្ខខណ្ឌដែលកំណត់ក្នុងច្បាប់) នេះហៅថាពលរដ្ឋខ្មែរ។លោកបានបន្តថា អង្គប្រជុំបានពិភាក្សាគ្នា ដើម្បីស្វែងរកលក្ខខណ្ឌណាខ្លះ ដែលឈានទៅដល់ការសម្រេចដកសញ្ជាតិ ហើយនឹងកំណត់អំពីទម្រង់នៃការដកសញ្ជាតិ។ លោក សុខៈ បានបញ្ជាក់ថា ចំណុចលក្ខខណ្ឌនេះ គឺសំដៅទៅលើអំពើដែលពលរដ្ឋខ្មែរណាម្នាក់បានធ្វើសកម្មភាពដើម្បីឈានទៅដល់ការដកសញ្ជាតិ។ ចំណែកទម្រង់នៃការដកសញ្ជាតិនេះ គឺធ្វើទៅបានដោយមាន គណៈកម្មាធិការជាតិមួយ សម្រាប់ពិគ្រោះយោបល់ ហើយឈានទៅដល់ការស្នើសុំព្រះរាជក្រឹត្យដើម្បីដកសញ្ជាតិលើពលរដ្ឋខ្មែរនោះ។ លោកបានបញ្ជាក់ថា ក្នុងក្របខណ្ឌនេះ សម្រាប់ពលរដ្ឋខ្មែរមានសញ្ជាតិខ្មែរពីកំណើតតែម្ដង គឺមានការការពារតឹងរឹងមុននឹងឈានទៅដល់ការដកសញ្ជាតិ គឺអង្គប្រជុំអន្តរក្រសួងបានជជែកគ្នាយ៉ាងផុលផុសនៅលើចំណុចនេះ គឺក្រសួងទាំងពីរបានឯកភាពគ្នា បង្កើតឱ្យមានគណៈកម្មាធិការជាតិមួយ ដើម្បីវាយតម្លៃទៅលើអំពើ និងលក្ខខណ្ឌដែលពលរដ្ឋខ្មែរណាម្នាក់នោះបានធ្វើហើយចូលជាលក្ខខណ្ឌឈានទៅដល់ការដកសញ្ជាតិឬក៏អត់។ នេះគឺជាការការពារតឹងរឹងមួយមុនឹងឈានទៅដល់ការចេញព្រះរាជក្រឹត្យដកសញ្ជាតិខ្មែរពីពលរដ្ឋខ្មែរណាម្នាក់នោះ។ បើតាមលោក សុខៈ ចំពោះមាត្រាដែលត្រូវធ្វើវិសោធនកម្មដែលពាក់ព័ន្ធនឹងការដកសញ្ជាតិខ្មែរនេះ មានមាត្រា១ មាត្រា៤ មាត្រា៧ មាត្រា២៨ និងមាត្រា២៩ ហើយមាត្រាស្នូលជាងគេនោះគឺមាត្រា ២៨ និងមាត្រា ២៩ តែម្ដងនៃច្បាប់ស្ដីពីសញ្ជាតិ។ ចំណែកក្រៅពីនេះគឺជាការបំពេញន័យ។ លោកបានបញ្ជាក់ឱ្យដឹងជាសេចក្ដីព្រាងបឋមនៃលក្ខខណ្ឌដើម្បីឈានទៅដល់ការវាយតម្លៃ និងដកសញ្ជាតិខ្មែរបាន ឬក៏សកម្មភាពប្រព្រឹត្តរបស់បុគ្គលនោះ ដែលត្រូវឈានទៅដល់ការសម្រេចដកសញ្ជាតិខ្មែរ។ ទី១ គឺពលរដ្ឋខ្មែរដែលអាចត្រូវបានដកសញ្ជាតិខ្មែរ ក្នុងករណីណាមួយដែលពួកគេប្រព្រឹត្តនូវអំពើដូចជា៖ អំពើក្បត់ជាតិ, ធ្វើសកម្មភាពគបគិតគ្នាជាមួយបរទេស ដែលនាំឱ្យប៉ះពាល់ដល់ផលប្រយោជន៍របស់ព្រះរាជាណាចក្រកម្ពុជា, ធ្វើសកម្មភាពដែលនាំឱ្យអន្តរាយដល់អធិបតេយ្យជាតិ, បូរណភាពទឹកដី និងសន្ដិសុខជាតិ, ចូលបម្រើកងទ័ពនៃរដ្ឋបរទេសដោយស្ម័គ្រចិត្តឬក៏បំពេញតួនាទីជាមន្រ្ដីសាធារណៈនៃរដ្ឋបរទេស និងមិនព្រមលាឈប់ទោះបីជាមានបញ្ជាពីរាជរដ្ឋាភិបាលកម្ពុជាក៏ដោយ។ មួយក្នុងករណីដែលទទួលបានសញ្ជាតិខ្មែរដោយការក្លែងបន្លំ ឬការទទួលបានព័ត៌មានមិនពិត ហើយបន្តមកគឺជាបុគ្គលដែលត្រូវបានផ្ដន្ទាទោសពីបទឧក្រិដ្ឋ ឬក៏បទមជ្ឈិមដែលពាក់ព័ន្ធនឹងការរំលោភបំពានដល់អង្គព្រះមហាក្សត្រ ការប៉ះពាល់ដល់សន្ដិសុខនៃរដ្ឋ ឬអំពើភេរវកម្ម និងបទល្មើសផ្សេងៗទៀតដែលបង្កឱ្យមានភាពវឹកវរធ្ងន់ធ្ងរដល់សង្គមជាតិ ប៉ះពាល់ដល់ឧត្តមប្រយោជន៍របស់ជាតិ។ ទាំងនេះហើយគឺជាលក្ខខណ្ឌដើម្បីឈានទៅដល់ការវាយតម្លៃ និងដកសញ្ជាតិខ្មែរ។លោក សុខៈ បានបញ្ជាក់ទៀតថា ការធ្វើច្បាប់ រាប់ចាប់តាំងពីការធ្វើវិសោធនកម្មរដ្ឋធម្មនុញ្ញ ដើម្បីដកសញ្ជាតិខ្មែរ ឈានមកដល់ការធ្វើវិសោធនកម្មច្បាប់ស្ដីពីសញ្ជាតិ និងឈានទៅដល់ាការធ្វើវិសោធនកម្មលើអនុក្រឹត្យស្ដីអំពីបែបបទ និងនីតិវិធីនៃការដកសញ្ជាតិនោះ គឺមិនសំដៅទៅលើបុគ្គលណាមួយ ក្រុមណាមួយ ដោយផ្នត់គំនិតរើសអើងនោះទេ ប៉ុន្ដែគឺធ្វើដើម្បីបន្សុទ្ធនូវស្មារតីស្នេហាជាតិ ក្នុងនាមជាពលរដ្ឋខ្មែរ ដែលរដ្ឋធម្មនុញ្ញបានកំណត់ថា បើជាពលរដ្ឋខ្មែរ គឺត្រូវតែតម្កល់ឧត្តមប្រយោជន៍ ការពារឧត្តមប្រយោជន៍ជាតិ ការពារជាតិ ធ្វើឱ្យសន្ដិសុខជាតិដំណើរការទៅបានល្អប្រសើរ ហើយហ៊ានប្រឆាំងនឹងបរទេសឈ្លានពាន មិនគប់គិតជាមួយរដ្ឋបរទេស ធ្វើឱ្យប៉ះពាល់ដល់ឧត្តមប្រយោជន៍របស់ជាតិខ្លួនឯង៕

គណបក្សហ៊្វុនស៊ិនប៉ិច ចេញញត្តិថ្កោលទោស ចំពោះសកម្មភាពបំពាន និងជេរប្រមាថព្រះមហាក្សត

ភ្នំពេញ ៖ ព្រះមហាក្សត្រកម្ពុជា គឺជានិមិត្តរូបនៃអធិបតេយ្យភាព និងឯកភាពជាតិ ដែលមាន គុណតម្លៃខ្ពង់ខ្ពស់បំផុតសម្រាប់ព្រះរាជាណាចក្រកម្ពុជា។ ព្រះអង្គគ្រងរាជ្យសម្បត្តិ ប៉ុន្តែមិនកាន់ អំណាច ហើយទ្រង់ជាព្រះប្រមុខរដ្ឋមួយជីវិត ដែលគ្មាននរណាអាចរំលោភបំពានបានឡើយ។គណបក្សរាជានិយមហ៊្វុនស៊ិនប៉ិច សូមថ្កោលទោសយ៉ាងខ្លាំងក្លា និងខ្លាំងដាច់ខាតបំផុត ចំពោះសកម្មភាពបុគ្គលមួយចំនួន ដែលបានប្រព្រឹត្តការជេរប្រមាថ ពិពណ៌នាផ្សេងៗ ដោយអសុរោះ កាត់តរូបភាពមិនសមរម្យ ខ្វះសីលធម៌ និងបានបង្ហោះចែកចាយតាមបណ្តាញ សង្គមនាពេលថ្មីៗនេះ។សកម្មភាពទាំងនេះ គឺជាការបំពានយ៉ាងធ្ងន់ធ្ងរទៅលើសេចក្ដីគោរពស្រឡាញ់ដ៏ជ្រាលជ្រៅបំផុតរបស់ប្រជាជនខ្មែរដែលមានចំពោះអង្គព្រះមហាក្សត្រដែលទ្រង់តែងតែមានព្រះរាជហឬទ័យមេត្តាករុណា និងការពារប្រជារាស្ត្រទ្រង់ជានិច្ច។ ការប្រមាថព្រះអង្គគឺជាអំពើបំផ្លិច បំផ្លាញស្មារតីជាតិនិយម និងផ្ទុយនឹងច្បាប់នៃរដ្ឋធម្មនុញ្ញរបស់ព្រះរាជាណាចក្រកម្ពុជា។គណបក្សរាជានិយមហ៊្វុនស៊ិនប៉ិច សូមអំពាវនាវដល់អាជ្ញាធរ ដែលមានសមត្ថកិច្ច អនុវត្តវិធានការតាមច្បាប់យ៉ាងម៉ឹងម៉ាត់បំផុត ចំពោះបុគ្គលណាដែលបានរំលោភបំពានលើ ព្រះមហាក្សត្រ។ ព្រមជាមួយនេះយើងខ្ញុំ សូមអំពាវនាវដល់ប្រជាពលរដ្ឋខ្មែរទាំងអស់ រួមគ្នាថ រក្សា និងគាំទ្រស្ថាប័នព្រះមហាក្សត្រ ឲ្យបានរឹងមាំ និងគង់វង្សជានិរន្តរ៍។

រដ្ឋបាលខណ្ឌ៧មករា បើកវគ្គផ្សព្វផ្សាយច្បាប់ ស្តីពីការប្រឆាំងអំពើពុករលួយ នឹងច្បាប់ ស្តីពីវិសោធនកម្មប្រឆាំងអំពើពុករលួយ

ភ្នំពេញ៖ អង្គភាពប្រឆាំងអំពើពុករលួយបានសហការជាមួយរដ្ឋបាលខណ្ឌ៧មករា រៀបចំពិធីបើកវគ្គផ្សព្វផ្សាយច្បាប់ ស្តីពីការប្រឆាំងអំពើពុករលួយ នឹងច្បាប់ ស្តីពីវិសោធនកម្មប្រឆាំងអំពើពុករលួយ នៅសាលាខណ្ឌ៧មករា។កម្មពិធីផ្សព្វផ្សាយនេះ បានធ្វើឡើងនៅរសៀលថ្ងៃទី២៣ ខែកក្កដា ឆ្នាំ២០២៥ ក្រោមអធិបតីភាព លោកស្រី អ៊ូ ស៉ីថា ឧបការីនៃអង្គភាពប្រឆាំងអំពើពុករលួយ, លោក កេត ឧត្តម អភិបាលរងតំណាងឲ្យលោក ថេង សុថុល អភិបាល នៃគណៈអភិបាលខណ្ឌ៧មករា មានការចូលរួមពីមន្រ្តីជំនាញពាក់ព័ន្ធ និងសង្កាត់ទាំង០៨ នៃរដ្ឋបាលខណ្ឌ៧មករា។ក្នុងឱកាសដ៏មានសារៈសំខាន់នេះដែរ លោក កេត ឧត្តម អភិបាលរងនៃគណៈអភិបាលខណ្ឌ៧មករា បានលើកឡើងថា ក្នុងនាមក្រុមប្រឹក្សាខណ្ឌ គណៈអភិបាលខណ្ឌនៃរដ្ឋបាល ខណ្ឌ៧មករា មន្ត្រីរាជការ និងកងកម្លាំងក្នុងខណ្ឌទាំងមូល មានសេចក្តីសោមនស្សរីករាយក្រៃលែង ដល់អង្គភាពប្រឆាំងអំពើពុករលួយ បានបើកវគ្គផ្សព្វផ្សាយច្បាប់ស្តីពី ការប្រឆាំង អំពើពុករលួយ និងច្បាប់ស្តីពី វិសោធនកម្មប្រឆាំងអំពើពុករលួយ។លោកស្រី អ៊ូ ស៉ីថា ឧបការីនៃអង្គភាពប្រឆាំងអំពើពុករលួយ បានលើកឡើងផងដែរថា កម្មវិធីចុះផ្សព្វផ្សាយនេះ មានគោលបំណងចែករំលែក ចំណេះដឹង បទពិសោធន៍ដល់មន្រ្តីថ្នាក់មូលដ្ឋាន ជាពិសេសមន្រ្តីអនុវត្តន៍ការងារផ្ទាល់ ពីរូបភាព សកម្មភាពនៃអំពើពុករលួយ។ លោកស្រីបានបញ្ជាក់ បន្ថែមថា ពាក្យថាអំពើពុករលួយត្រូវបានគេនិយាយនិងស្គាល់ច្បាស់ ប៉ុន្តែគោលគំនិតនិងខ្លឹមសារនៃអំពើពុករលួយមិនត្រូវបានយល់ដឹងទូលំទូលាយនិងស៉ីជម្រៅនោះទេ។ លោកស្រីសង្កត់ធ្ងន់ថា បច្ចុប្បន្នអំពើពុករលួយភាគច្រើនតែងតែកើតឡើងនៅសកម្មភាព សូកប៉ាន់ ដូច្នេះក្នុងកម្មពីធីផ្សព្វផ្សាយច្បាប់ ស្តីពីការប្រឆាំងអំពើពុករលួយ នឹងច្បាប់ ស្តីពីវិសោធនកម្មប្រឆាំងអំពើពុករលួយ ឲ្យមន្រ្តីជំនាញពាក់ព័ន្ធបានទទួលចំណេះដឹងបន្ថែមដើម្បីអនុវត្តន៍ ឲ្យត្រូវនៅ សញ្ញាណនៃអំពើពុករលួយ ,ការប្រឆាំងអំពើពុករលួយនៅកម្ពុជា, និតិវិធីស៊ើបអង្កេតបទល្មើសពុករលួយ,បទល្មើសពុករលួយនិងទោស ជាពិសេសរបៀបដាក់ពាក្យបណ្ដឹង៕អត្ថបទ៖ កុម្ភៈ

ក្រសួងអភិវឌ្ឍន៍ជនបទ កំពុងពង្រីកការស្ថាបនាផ្លូវនៅតំបន់ដាច់ស្រយាល តាមតម្រូវការពលរដ្ឋ

កំពង់ធំ៖ រាជរដ្ឋាភិបាលកម្ពុជា ដែលមានក្រសួងអភិវឌ្ឍន៍ជនបទជាសេនាធិការ កំពុងខិតខំពង្រីកការស្ថាបនាផ្លូវ នៅតាមទីជនបទដាច់ស្រយាល ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ក្នុងការធ្វើដំណើរកាន់ស្រួល និងងាយនាំកសិផលទៅកាន់ទីផ្សារ ទាំងនៅរដូវប្រាំង និងរដូវវស្សា ។ក្នុងឱកាសតំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើការងារជួសជុលស្ដារឡើងវិញ ផ្លូវក្រាលដីល្បាយក្រួស ១ខ្សែ ប្រវែងជាង ៧គីឡូម៉ែត្រ និងប្រព័ន្ធលូ ស្ថិតក្នុងឃុំក្តីដូង និងឃុំកំពង់គោ ស្រុកកំពង់ស្វាយ ខេត្តកំពង់ធំ អនុវត្តដោយនាយកដ្ឋានវិស្វកម្ម នៃក្រសួងការពារជាតិ នៅថ្ងៃទី២៣ ខែកក្កដា ឆ្នាំ២០២៥ ឯកឧត្តម ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ បានថ្លែងថា ក្រសួងអភិវឌ្ឍន៍ជនបទកំពុងខិតខំចូលរួមកសាងតំបន់ជនបទកម្ពុជា ប្រកបដោយវិបុលភាព, បរិយាបន្ន, នវានុវត្តន៍, ឌីជីថល និងភាពធន់ ទាំងផ្នែកសេដ្ឋកិច្ច សង្គម និងវប្បធម៌” ធានាបានកំណើនប្រាក់ចំណូលក្នុងគ្រួសារប្រកបដោយចីរភាព និងមានសុខុមាលភាពកាន់តែល្អប្រសើរឡើង ។ ឯកឧត្តមបានបន្តថា ក្នុងនោះក្រសួងបានដាក់ចេញនូវយុទ្ធសាស្ត្រចំនួន ៥ រួមមាន ទី១. ការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ជនបទប្រកបដោយភាពធន់,ទី២. ការលើកកម្ពស់សុខភាព អនាម័យ និងបរិស្ថានរស់នៅរបស់សហគមន៍ជនបទ, ទី៣. ការអភិវឌ្ឍសហគមន៍ជនបទ, ទី៤. ពិពិធកម្មសេដ្ឋកិច្ចជនបទ និងនវានុវត្តន៍ការងារ និងទី៥. ការពង្រឹងស្ថាប័នតាមរយៈការរៀបចំគោលនយោបាយ ហិរញ្ញវត្ថុ ឌីជីថល និងសហប្រតិបត្តិការ។ ឯកឧត្តមរដ្ឋលេខាធិការ បានបន្ថែមថា នៅក្នុងចំណោមការងារអទិភាពទាំងអស់ ការកសាងផ្លូវ គឺជាវិស័យអាទិភាពផងដែរ នៅក្នុងយុទ្ធសាស្ត្របញ្ចកោណ ដូចនេះក្នុងនាមជាសេនាធិការរបស់រាជរដ្ឋាភិបាល ក្រសួងអភិវឌ្ឍន៍ជនបទ នឹងបន្តប្រឹងប្រែងការស្ថាបនា និងការប្រែក្លាយផ្លូវលំបាកធ្វើដំណើរ ទៅជាផ្លូវក្រាលក្រួស ផ្លូវកៅស៊ូ និងផ្លូវបេតុងជាដើម ដោយធ្វើយ៉ាងណា ឲ្យប្រជាពលរដ្ឋធ្វើដំណើរ និងដឹកកសិផលទៅកាន់ទីផ្សារងាយស្រួលជាងមុន ។ជាមួយនេះ ឯកឧត្តម ផូ ផារិទ្ធ ជឿជាក់ថា នាយកដ្ឋានវិស្វកម្ម នៃក្រសួងការពារជាតិ នឹងស្ថាបនាផ្លូវ១ខ្សែនេះ តាមស្ដង់ដារនិងរឹងមាំយូរអង្វែង ដើម្បីជាប្រយោជន៍ដល់ប្រជាពលរដ្ឋ ហើយក៏បានអំពាវនាវដល់ប្រជាពលរដ្ឋ សូមចូលរួមថែទាំ នៅពេលផ្លូវនេះ ជួសជុលរួចរាល់ ក្នុងនោះមិនត្រូវនាំគ្នាកាប់គាស់ ជីកកកាយផ្លូវ មិនត្រូវដឹកលើសទម្ងន់ និងមិនត្រូវលើកដីផ្ទះខ្ពស់ជាងផ្លូវ ។ ឯកឧត្តមក៏បានជំរុញ ទៅអាជ្ញាធរមូលដ្ឋាន ត្រូវទប់ស្កាត់សកម្មភាពដឹកលើសទម្ងន់ ធ្វើឲ្យផ្លូវឆាប់រងការខូចខាត តាមរយៈការដាក់វិធានការនានា ព្រោះផ្លូវមួយខ្សែៗ គឺបានប្រើប្រាស់ថវិកាជាតិច្រើន ក្នុងការកសាង៕ អត្ថបទ បាន សុខរិទ្ធិ

ឯកឧត្តមរដ្ឋមន្រ្តី ជា វ៉ាន់ដេត បានអញ្ជើញជាអធិបតីដឹកនាំកិច្ចប្រជុំក្រុមការងាររៀបចំផែនការយុទ្ធសាស្រ្តរបស់ក្រសួង

នាព្រឹកថ្ងៃទី២២ ខែកក្កដា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីដឹកនាំកិច្ចប្រជុំក្រុមការងាររៀបចំផែនការយុទ្ធសាស្រ្តរបស់ក្រសួង ដោយមានការអញ្ជើញចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួង លោកស្រី លោក ជាប្រធានអង្គភាព និងមន្រ្តីបច្ចេកទេសក្រោមឱវាទក្រសួង នៅទីស្ដីការក្រសួងប្រៃសណីយ៍និងទូរគមនាគមន៍។កិច្ចប្រជុំនេះ រៀបចំឡើងក្នុងគោលបំណងណែនាំសមាសភាព និងបែងចែកការទទួលខុសត្រូវរបស់ក្រុមការងារ និងអនុក្រុមការងារទទួលបន្ទុកតាមវិស័យដូចជា ការងារអភិវឌ្ឍស្ថាប័ន វិស័យបច្ចេកវិទ្យាគមនាគមន៍និងព័ត៌មាន និងវិស័យឌីជីថល វិស័យទូរគមនាគមន៍ និងវិស័យប្រៃសណីយ៍។ ជាមួយគ្នានេះដែរ ឯកឧត្តមរដ្ឋមន្រ្តី បានផ្តល់អនុសាសន៍ណែនាំលើការរៀបចំផែនការយុទ្ធសាស្រ្តរបស់ក្រសួងសំដៅបម្រើសេវាសាធារណៈជូនប្រជាពលរដ្ឋប្រកបដោយប្រសិទ្ធភាពខ្ពស់ កាត់បន្ថយពេលវេលា ការចំណាយ និងឆ្លើយតបតាមតម្រូវការ ព្រមទាំងមានសង្គតិភាពទៅនឹងគោលនយោបាយ យុទ្ធសាស្រ្ត និងផែនការសកម្មភាពរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់ សម្តេចមហាបវធិបតី ហ៊ុន ម៉ាណែត ជានាយករដ្ឋមន្រ្តីនៃព្រះរាជាណាចក្រកម្ពុជា ដែលរួមមាន យុទ្ធសាស្រ្តបញ្ចកោណដំណាក់កាលទី១ ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា (២០២២-២០៣៥) គោលនយោបាយរដ្ឋាភិបាលឌីជីថលកម្ពុជា (២០២៣-២០៣៥) និងគោលនយោបាយអភិវឌ្ឍន៍វិស័យប្រៃសណីយ៍ ជាដើម៕

គ្រឿងញៀនជាង ២៤៧គីឡូក្រាម ត្រូវបានដុតបំផ្លាញចោល ក្នុងឱកាស ទិវាអន្តរជាតិប្រយុទ្ធប្រឆាំងគ្រឿងញៀន នៅខេត្តស្វាយរៀង

ខេត្តស្វាយរៀង៖ នៅព្រឹកថ្ងៃទី២៣ ខែកក្កដាឆ្នាំ២០២៥នេះ រដ្ឋបាលខេត្តស្វាយរៀង មានរៀបចំពិធីអបអរទិវាអន្តរជាតិប្រយុទ្ធប្រឆាំគ្រឿងញៀន ថ្ងៃទី២៦ ខែមិថុនា ឆ្នាំ២០២៥ ក្រោមប្រធានបទ «រួមគ្នា បង្ការ ទប់ស្កាត់ និងកាត់ផ្តាច់ឬសគល់នៃបញ្ហាគ្រឿងញៀននៅកម្ពុជា»។ ក្នុងពិធីនោះក៏មានការដុតបំផ្លាញវត្ថុតាងគ្រឿងញៀន ដែលរឹបអូសបានពីបទល្មើសមានទម្ងន់សរុបជាង ២៤៧គីឡូក្រាម ព្រមទាំងសម្ភារៈវេចខ្ចប់ និងការប្រើប្រាស់គ្រឿងញៀនមួយចំនួនទៀតផងដែរ៕

ផ្លូវអភិវឌ្ឍន៍ជនបទ បាន និងកំពុងប្រែក្លាយជីវភាពប្រជាពលរដ្ឋអោយធូរធារ និងបង្ករលក្ខណៈងាយស្រួលក្នុងការធ្វើដំណើររបស់ពួកគាត់

កំពង់ឆ្នាំង៖ ឯកឧត្តម ចាន់ ដារ៉ុង រដ្ឋលេខាធិការ សមាជឹកគណៈកម្មាធិការធិការលទ្ធកម្ម តំណាងឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ នៅថ្ងៃទី២៣ ខែកក្កដា ឆ្នាំ២០២៥នេះ បានដឹកនាំគណ:កម្មការអន្តរក្រសួង រួមមានក្រសួងអភិវឌ្ឍន៍ជនបទ និងតំណាងក្រសួង សេដ្ឋកិច្ច និងហិរញ្ញវត្ថុ ,លោក ជិន រដ្ឋា ប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង និងមន្ត្រីបច្ចេកទេសផ្លូវជនបទចុះត្រួតពិនិត្យ និងវាយតម្លៃបញ្ចប់សុពលភាព លើការងារថែទាំផ្លូវខួប ដោយក្រាលគ្រួសក្រហមចំនួន៣ខ្សែ ស្ថិតក្នុងស្រុកសាមគ្គីមានជ័យ ស្រុកកំពង់ត្រឡាច និងស្រុកទឹកផុស និងផ្លូវកៅស៊ូDBST១ខ្សែ ស្ថិតក្នុងស្រុកសាមគ្គីមានជ័យ និងស្រុកទឹកផុស ខេត្តកំពង់ឆ្នាំង។ក្រោយពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បានកសាងផ្លូវទាំងនេះរួចមក ប្រជាពលរដ្ឋដែលជាអ្នកប្រើប្រាស់ផ្លូវទាំង៣ខ្សែនេះ បានអោយដឹងថា៖ ពីមុនផ្លូវទាំងនេះ គឺជាផ្លូវរទេះ និងមានជង្ហុគបែកភក់ជ្រាំក្នុងរដូវវស្សា និងហុយប៉ះពាល់ដល់សុខភាព រួមនិងពិបាកក្នុងការធ្វើដំណើរនៅរដូវប្រាំងផងដែរ។ ដោយការយកចិត្តទុកដាក់ពីសម្តេចធិបតី ហ៊ុន ម៉ាណែត ក្នុងការកែលម្អផ្លូវជនបទអោយល្អប្រសើរ តាមរយៈក្រសួងអភិវឌ្ឍន៍ជនបទក្នុងឆ្នាំ២០២៤កន្លងមក ផ្លូវទាំង៣ខ្សែនេះ បានប្រែក្លាយពីផ្លូវរទេះទៅជាផ្លូវក្រាលគ្រួសក្រហម និង១ខ្សែទៀតប្រែទៅជាផ្លូវកៅស៊ូDBST ងាយស្រួលក្នុងការធ្វើដំណើរទៅមក ការដឹកកសិផល និងការប្រើប្រាស់ផ្សេងៗទៀត។ដោយឡែកឯកឧត្តម ចាន់ ដារ៉ុង បានថ្លែងថា៖ គណៈកម្មការអន្តរក្រសួងបានឯកភាពទទួលយកលើការងារបញ្ចប់សុពលភាព គម្រោងថែទាំផ្លូវជាលក្ខណៈខួបផ្លូវក្រាលគ្រួសក្រហមទាំង៣ខ្សែ និងផ្លូវកៅស៊ូDBST១ខ្សែខាងលើនេះ។ ការចុះត្រួតពិនិត្យ វាយតម្លៃ និងបញ្ចប់សុពលភាព លើការងារថែទាំខួបផ្លូវក្រាលគ្រួសក្រហមចំនួន៣ខ្សែប្រវែងសរុប២១០០០ម៉ែត្រ ទទឹង៤,៥ម៉ែត្រ កម្រាស់០,១៥ម៉ែត្រ សាងសង់លូប្រអប់១កន្លែង ស្ថិតក្នុងឃុំទួលខ្ពស់ ស្រុកទឹកផុស, ឃុំសែប ឃុំតាជេស ឃុំស្រុកកំពង់ត្រឡាច, ឃុំស្វាយ ឃុំសេដ្ឋី ស្រុកសមគ្គីមានជ័យ ខេត្តកំពង់ឆ្នាំង។ ផ្លូវកៅស៊ូDBST១ខ្សែ ប្រវែង៨០០០ម៉ែត្រ ទទឹង៥ម៉ែត្រ ព្រមទាំងគូសគំនូសចរាចរណ៍ទំហំ១៦០០ម៉ែត្រការ៉េ ឆ្លងកាត់ឃុំចោងម៉ោង ឃុំអភិវឌ្ឍន៍ ស្រុកទឹកផុស, ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។ ឯកឧត្តមបានអំពាវនាវដល់បងប្អូនប្រជាពលរដ្ឋនៅសងខាងផ្លូវ សូមចូលរួមថែរក្សាផ្លូវក្រាលគ្រួសក្រហមទាំង៣ខ្សែ និងផ្លូវកៅស៊ូDBST១ខ្សែនេះ អោយបានល្អប្រសើរ ដើម្បីជាប្រយោជន៍ដល់ការធ្វើដំណើរ ការដឹកកសិផលនានា ការទៅមកសាលារៀន និងទៅកាន់មន្ទីរពេទ្យវត្តអារាម សំខាន់គឺការប្រើប្រាស់អោយបានយូរអង្វែង។ ៕ កាំង ហុងវាស្នា

ឆមាសទី១ឆ្នាំនេះ មន្រ្តីឧទ្យានុរក្សបង្រ្កាបបទល្មើសធនធានធម្មជាតិបាន ៩៨៦ ករណី

នៅក្នុងឆមាសទី១ ឆ្នាំ២០២៥ បទល្មើសធនធានធម្មជាតិត្រូវបានបង្រ្កាប មានចំនួន ៩៨៦ករណី។ ទិន្នន័យនេះមានការថយចុះចំនួន ៣៦៨ករណី បើប្រៀបធៀបនឹងការពង្រឹងការអនុវត្តច្បាប់ទប់ស្កាត់និងបង្រ្កាបបទល្មើសធនធានធម្មជាតិ តាមតំបន់ការពារធម្មជាតិ ក្នុងរយៈពេលដូចគ្នា នាឆ្នាំ២០២៤ ដែលមានរហូតដល់១៣៥៤ករណី។ លើសពីនេះ ចាប់ពីខែមករា ដល់ខែមិថុនា ឆ្នាំ២០២៥ បានរឹបអូសវត្តុតាង រួមមាន រណាយន្ត៤៥០គ្រឿង គោយន្តចំនួន៥៩គ្រឿង រថយន្ត១៥គ្រឿង ម៉ូតូចំនួន៤៥គ្រឿង អេស្ការចំនួន ៣គ្រឿង និងមធ្យោបាយធ្វើដំណើរនិងដឹកជញ្ជូនបទល្មើសមួយចំនួនទៀត។ នៅក្នុងរយៈដូចគ្នាដែរ មន្រ្តីឧទ្យានុរក្ស បានដកហូត អន្ទាក់ឆក់ ចំនួន ៤៣២ម និងអន្ទាក់ខ្សែបានចំនួន១១ ៣៣៦ខ្សែ អាវុធចំនួន ៨ដើម គ្រាប់ចំនួន ១០៨គ្រាប់ កាំភ្លើងកែច្នៃ ចំនួន ១២៩ដើម រួមជាមួយវត្ថុចាប់យកមួយចំនួនទៀត។ ដោយឡែក ក្នុងរយៈពេល៦ខែ ក្នុងឆ្នាំ២០២៥នេះដែរ សមត្ថកិច្ចក្រសួងបរិស្ថាន បានចាត់ការបញ្ជូនសំណុំរឿងបទល្មើស ទៅតុលាការ បានចំនួន៩១ ករណី និងជនសង្ស័យចំនួន៧២នាក់។ អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានឱ្យដឹងថា ជារួមចំនួនបទល្មើសនិងករណីការបង្ក្រាបបទល្មើសនៅក្នុងឆមាសទី១ ឆ្នាំ២០២៥ មានការថយចុះច្រើន ក្នុងរយៈពេលដូចគ្នានៅឆ្នាំ២០២៤។ អ្នកនាំពាក្យរូបនេះ បានបន្តថា ការថយចុះករណីបទល្មើស គឺពិតជាកើតឡើង ដោយសារកិច្ចខិតខំប្រឹងប្រែងពីថ្នាក់ដឹកនាំ និងមន្រ្តីឧទ្យានុរក្ស របស់ក្រសួងបរិស្ថាន សហការជាមួយក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ អាជ្ញាធរមូលដ្ឋានគ្រប់ថ្នាក់ សមត្ថកិច្ចគ្រប់ប្រភេទ រួមជាមួយប្រជាពលរដ្ឋ នៅតាមសហគមន៍មូលដ្ឋាន ចូលរួមអនុវត្តក្រមបរិស្ថាន និងធនធានធម្មជាតិ និងបទដ្ឋានគតិយុត្តមានជាធរមាន ដើម្បីធានាការការពារ និងអភិរក្សធនធានធម្មជាតិ សម្រាប់ការរស់នៅដោយចីរភាព។ ជាមួយគ្នានេះ មន្រ្តីឧទ្យានុរក្ស រួមជាមួយអ្នកពាក់ព័ន្ធ បានពង្រឹងសមត្ថភាព និងបានប្រើប្រាស់បច្ចេកវិទ្យាថ្មី រួមមានការប្រើប្រាស់ដូន ការប្រើប្រាស់ផែនទីតំបន់ការពារ និងផែនទីផ្កាយរណប ដែលក្រសួងផ្តល់ជូន ដើម្បីបង្កើនប្រសិទ្ធភាពក្នុងការឆ្លើយតប មានភាពលឿនរហ័ស ច្បាស់លាស់ និងធ្វើការអន្តរាគមន៍ចំគោលដៅ ក្នុងការទប់ស្កាត់បទល្មើស នៅតាមតំបន់ការពារធម្មជាតិ។សូមបញ្ជាក់ថា ក្រសួងបរិស្ថានបានដាក់ចេញអនុវត្តយុទ្ធសាស្រ្តចក្រាវិស័យបរិស្ថាន ដែលក្នុងសសរស្តម្ភទី២ គឺ«ភាពបៃតង» ផ្តោតលើយុទ្ធសាស្រ្តអាទិភាពចំនួន៣គឺ ទី(១)ពង្រីកចលនាដាំដើមឈើ ទី(២)ជំរុញការគ្រប់គ្រងតំបន់ការពារធម្មជាតិ និងទី(៣)លើកកម្ពស់ជីវភាពសហគមន៍មូលដ្ឋាន។ ជាមួយគ្នានេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដាក់ចេញនូវវិធានការយ៉ាងម៉ឺងម៉ាត់ ក្នុងការទប់ស្កាត់បទល្មើសធនធានធម្មជាតិ រួមមាន៖១) ការអនុវត្តច្បាប់១០០% ចំពោះអ្នកប្រព្រឹត្តបទល្មើសធនធានធម្មជាតិ២) ពង្រឹងកិច្ចសហការ ជាមួយគណៈបញ្ជាការ កងឯកភាពនៃរដ្ឋបាលខេត្ត នោះគឺអាជ្ញាធរមូលដ្ឋាន ដែលមានតួនាទី ភារកិច្ចគ្រប់គ្រងធនធានធម្មជាតិ ឱ្យបានស្អិតរមួត ដើម្បីធ្វើការទប់ស្កាត់ការពារនិងអភិរក្សធនធានធម្មជាតិ នៅតាមតំបន់ការពារធម្មជាតិ។ លើសពីនេះសហការជាមួយ អង្គភាពប្រឆាំងនឹងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ក្រុមអ្នកច្បាប់ ក្រសួងយុត្តិធម៌ បន្ថែមទៀត។៣) គាំទ្រផ្តល់មធ្យោបាយ និងសម្ភារជួយដល់ការអនុវត្តច្បាប់ ដូចជាផ្តល់ដ្រូន ដល់គ្រប់មន្ទីរទាំងអស់ ដើម្បីជួយសម្រួល ដល់ការល្បាតរបស់សមត្ថកិច្ច ផ្តល់ផែនទីតំបន់ការពារធម្មជាតិ និងផែនទីផ្កាយរណប ដល់រដ្ឋបាលថ្នាក់ក្រោមជាតិ ដើម្បីប្រសិទ្ធភាពនៃការផ្ទៀងផ្ទាត់ និងអន្តរាគមន៍ទប់ស្កាត់បទល្មើស បន្ថែមទៀត។៤) ជំរុញការបណ្តុះ ដាំ និងស្តារព្រៃឈើឱ្យច្រើន ដើម្បីបង្កើនគម្របបៃតង និងឆ្ពោះទៅសម្រេចបានកម្ពុជាជាប្រទេសអព្យាក្រឹតកាបូន នៅឆ្នាំ២០៥០។វិធានការទាំង៤ខាងលើ របស់ក្រសួងបរិស្ថាន បានដាក់ចេញស្របជាមួយគោលនយោបាយ និងយុទ្ធសាស្រ្តនាពេលកន្លងមក របស់រាជរដ្ឋាភិបាលកម្ពុជា ដឹកនាំដោយ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភានៃព្រះរាជាណាចក្រកម្ពុជា និងការដឹកនាំរដ្ឋាភិបាល នីតិកាលទី៧ នៃរដ្ឋសភា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ប្រកបដោយឆន្ទះមុតស្រួចបន្តថែមទៀត និងបានដាក់ចេញយុទ្ធសាស្រ្តបញ្ចកោណ ដំណាក់កាលទី១ ដែលក្នុងនោះ ផ្តោតលើអាទិភាពក្នុងការការពារនិងអភិរក្សធនធានធម្មជាតិ ដើម្បីការរស់នៅប្រកបដោយចីរភាព និងឆ្ពោះទៅសម្រេចទស្សនវិស័យឆ្នាំ២០៥០៕

អ្នកនាំពាក្យរាជរដ្ឋាភិបាល៖ យុវជនសម័យនេះ ឱកាសក៏មាន សាលារៀនក៏សម្បូរ គ្រូក៏ពូកែ

ក្នុងឱកាសអញ្ជើញចូលរួមជាវាគ្មិនក្នុងកម្មវិធីបាឋកថានៅរាជបណ្ឌិត្យសភាកម្ពុជានាព្រឹកថ្ងៃពុធ ទី២៣ ខែកក្កដា ឆ្នាំ២០២៥ នេះ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលបានថ្លែងថា យុវជនសម័យនេះ ឱកាសក៏មាន សាលារៀនក៏សម្បូរ គ្រូក៏ពូកែ។ ចំណែកឯគោលនយោបាយរបស់រាជរដ្ឋាភិបាលក៏លើកទឹកចិត្តយ៉ាងខ្លាំងដល់ការសិក្សារបស់យុវជន។ ជាក់ស្តែង នៅក្នុងយុទ្ធសាស្ត្របញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ការអភិវឌ្ឍមូលធនមនុស្សត្រូវបានចាត់ទុកជាអាទិភាពទី១។ នេះជាការគូសបញ្ជាក់របស់ឯកឧត្តម ប៉ែន បូណា នៅចំពោះមុខនិស្សិតរាជបណ្ឌិត្យសភាកម្ពុជា។ ប្រធានអង្គភាពអ្នកនាំពាក្យរាជរដ្ឋាភិបាលបន្តថា រាជរដ្ឋាភិបាលក៏មានគោលនយោបាយយកចិត្តទុកដាក់ថែទាំទារកនិងកុមារក្នុងគ្រួសារក្រីក្រចាប់តាំងពីការចាប់កំណើតក្នុងផ្ទៃនៃមាតា រហូតដល់អាយុ២ឆ្នាំ និងបន្តជួយផ្តល់អាហារូបករណ៍រហូតដល់រៀនចប់ថ្នាក់មធ្យមសិក្សា។ ចំពោះយុវជនដែលគ្មានលទ្ធភាពបន្តការសិក្សាទៅសាកលវិទ្យាល័យ ក៏ត្រូវបានរដ្ឋាភិបាលផ្តល់ការបណ្តុះបណ្តាលជំនាញបច្ចេកទេសវិជ្ជាជីវៈដោយឥតគិតថ្លៃថែមទាំងឧបត្ថម្ភថវិកាសម្រាប់ការសិក្សាទៀតផង។ ដូច្នេះ យុវជនសម័យនេះ ពិតជាមានសំណាងណាស់ដែលរស់ក្នុងសង្គមបរិយាកាសដ៏អំណោយផលសម្រាប់ការសិក្សាបែបនេះ។ ខុសពីយុវជនជំនាន់មុនដែលឱកាសក៏អត់ សាលារៀនក៏គ្មាន បើបានរៀនក៏ក្នុងស្ថានភាពហួសវ័យ និងលំបាកលំបិន។ ទោះយ៉ាងណា ឯកឧត្តម ប៉ែន បូណា បានជំរុញលើកទឹកចិត្តឱ្យយុវជនចេះចាប់យកឱកាសដ៏អំណោយផលនេះដើម្បីអភិវឌ្ឍន៍ខ្លួនឱ្យក្លាយជាមូលធនមនុស្សពិតប្រាកដសម្រាប់ប្រទេសជាតិ។ អ្នកនាំពាក្យរាជរដ្ឋាភិបាលសង្កត់ធ្ងន់ថា ទោះបីជាបរិយាកាសអំណោយផលយ៉ាងណាក៏ដោយ បើយុវជនមិនខិតខំប្រឹងប្រែងដោយខ្លួនឯងទេ ឱកាសនឹងមិនរត់រកពួកគេឡើយ។ ក្នុងន័យនេះ ឯកឧត្តមក៏បានចែករំលែកអំពីវិធីសាស្ត្រមួយចំនួនដើម្បីក្លាយខ្លួនជាមនុស្សពូកែ លេចធ្លោ ពោរពេញដោយចំណេះដឹង និងសីលធម៌ល្អ។ប្រសាសន៍របស់ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល នៅក្នុងបាឋកថា ស្តីពី «ការចូលរួមរបស់យុវជនដើម្បីឆ្ពោះទៅសម្រេចចក្ខុវិស័យកម្ពុជាឆ្នាំ២០៥០» នាព្រឹកថ្ងៃពុធ ទី២៣ ខែកក្កដា ឆ្នាំ២០២៥ នៅរាជបណ្ឌិត្យសភាកម្ពុជា ដោយមានការចូលរួមពីនិស្សិតថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត សរុបចំនួន ៣០០ នាក់។សូមបញ្ជាក់ថា បាឋកថានេះ មានគោលបំណងបញ្ជ្រាបការយល់ដឹងពីគោលនយោបាយជាតិ និងយុទ្ធសាស្ត្របញ្ចកោណរបស់រដ្ឋាភិបាលកម្ពុជា នីតិកាលទី៧ នៃរដ្ឋសភា លើកទឹកចិត្តដល់និស្សិតក្នុងការអភិវឌ្ឍមូលធនមនុស្សដ៏ពេញលេញ ដើម្បីឆ្លើយតបទៅនឹងយុទ្ធសាស្ត្របញ្ចកោណអាណត្តិទី៧ យល់ដឹងពីជ្រុងនៃព័ត៌មាន ដើម្បីជាប្រភពនៃការសិក្សាស្រាវជ្រាវ និងការសម្រេចចិត្ត និងលើកកម្ពស់ក្នុងការចូលរួមអភិវឌ្ឍសង្គមជាតិ ឱ្យសម្រេចបានចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់។ បាឋកថានេះ ក៏មានការអញ្ជើញចូលរួមជាវាគ្មិនពីសំណាក់ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បកស្រាយលើប្រធានបទ «ទិសដៅឥតងាករេនៃគោលនយោបាយការបរទេសប្រកបដោយភាពបត់បែនរបស់កម្ពុជា» និងវត្តមានរបស់ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា តំណាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា រួមទាំងព្រឹទ្ធបុរស សាស្ត្រាចារ្យ លោកគ្រូអ្នកគ្រូ និងនិស្សិតជាច្រើននាក់៕

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ប្រតិបត្តិការទូទាត់តាមឃ្យូអរកូត (QR Code) នៅក្នុងបំណាច់ឆ្នាំ២០២៤ បានកើនឡើងជាង ២៥២ធៀបនឹងឆ្នាំ២០២៣ ក្នុងទំហំប្រាក់សរុបចំនួន ៥៥,៨ ប៊ីលានដុល្លារអាមេរិក ត្រូវវប្រមាណ ១២៤ភាគរយ នៃផលិតផលសរុបក្នុងស្រុក (ផ.ស.ស)។ធនាគារជាតិនៃកម្ពុជា បង្ហាញរបាយការណ៍ប្រព័ន្ធទូទាត់សងប្រាក់នៅកម្ពុជា ប្រចាំឆ្នាំ២០២៤ ក្នុងនោះសេវាទូទាត់សងប្រាក់ នៅក្នុងប្រទេសកម្ពុជា មានការរីកចម្រើនគួរឱ្យកត់សម្គាល់ ដោយទិន្នន័យអតិថិជនចុះឈ្មោះបង្កើត គណនីកាបូបអេឡិចត្រូនិក (E-wallet) សរុបបានកើនឡើងដល់ប្រមាណ ២០,៧ លានគណនី ពោលគឺកើនឡើងជាង ៥ ភាគរយ ធៀបនឹងឆ្នាំ២០២៣។ ជាមួយនឹងការកើនឡើងនៃការប្រើប្រាស់ស្មាតហ្វូន និងលទ្ធភាពប្រើប្រាស់អ៊ីនធឺណិត ការធ្វើប្រតិបត្តិការតាមរយៈឌីជីថលដោយផ្ទាល់ ពេញនិយមជាងប្រតិបត្តិការតាមបញ្ហារភ្នាក់ងារ ដែលជាហេតុនាំឱ្យមានការថយចុះនៃចំនួនភ្នាក់ងារ។ក្នុងឆ្នាំ២០២៤នេះ ការចេញផ្សាយរូបិយវត្ថុអេឡិចត្រូនិក មានការកើនឡើងគួរឱ្យកត់សម្គាល់ ដោយសមតុល្យរូបិយវត្ថុ អេឡិចត្រូនិកសរុប ដែលបានចេញផ្សាយមានចំនួនជាង ៥៧៥ លានដុល្លារអាមេរិក។ ចំណែកឯសមតុល្យដែលបានរក្សាទុកក្នុង គណនីអាណត្តិព្យាបាល កើនឡើងជាង ៥៨១លានដុល្លារ កើនពី ៤៤៣ លានដុល្លារ កាលពីឆ្នាំ២០២៣។ ការកើនឡើងនេះ បានបង្ហាញពីទំនុកចិត្តរបស់អ្នកប្រើប្រាស់លើសេវាទូទាត់សងប្រាក់តាមបែបឌីជីថល និងក្របខណ្ឌបទប្បញ្ញត្តិដែលគាំទ្រ។គ្រឹះស្ថានធនាគារ និងហិរញ្ញវត្ថុចំនួន ៥០ គ្រឹះស្ថាន ផ្តល់សេវាធនាគារអ៊ីនធឺណិត និងសេវាធនាគារចល័ត ហើយអ្នកចុះ ឈ្មោះប្រើប្រាស់ អាចធ្វើប្រតិបត្តិការសេវាធនាគារផ្សេងៗ ក្នុងនោះចំនួនប្រតិបត្តិការតាមរយៈសេវាធនាគារអ៊ីនធឺណិតក្នុងឆ្នាំ២០២៤ មានការកើនឡើង ១២៦ ភាគរយ ពី ៤,៧ ទៅ ១០,៧ លានប្រតិបត្តិការ និងទំហំប្រាក់មានការកើនឡើងប្រមាណ ៥៥,៦% ពី ១៨,២ទៅ ២៨,៣ ប៊ីលានដុល្លារអាមេរិក ប្រមាណ ៦២% នៃផ.ស.ស។ ចំណែកការទូទាត់ប្រាក់តាមប័ណ្ណទូទាត់ កាន់តែមានភាពទូលំទូលាយ ដោយគ្រឹះស្ថានធនាគារ និងហិរញ្ញវត្ថុចំនួន ៤០ គ្រឹះស្ថាន បានចេញផ្សាយប័ណ្ណទូទាត់ចំនួនប្រមាណ ១២,៧ លានប័ណ្ណ។ ក្នុងឆ្នាំ២០២៤ ប្រតិបត្តិការទូទាត់តាមប័ណ្ណទូទាត់ជារូបវ័ន្ត ក្នុងស្រុកសរុប មានការថយចុះប្រមាណ ២,២% ពីជាង ១៥០ មកត្រឹម ១៤៧ លានប្រតិបត្តិការ ក្នុងទំហំប្រាក់ជិត ២៧ ប៊ីលាន ដុល្លារអាមេរិក ។ ដោយឡែកចំនួនប្រតិបត្តិការប័ណ្ណទូទាត់ជារូបវ័ន្តនៅក្រៅប្រទេស មានការកើនឡើងប្រមាណ ៩,៥% ពី ២,៨ ទៅ ៣,១ លានប្រតិបត្តិការ និងក្នុងទំហំប្រាក់ ១,១ ប៊ីលានដុល្លារអាមេរិក។ ចំណែកឯប្រតិបត្តិការប័ណ្ណទូទាត់តាមអនឡាញសរុបមាន ការកើនឡើងប្រមាណ ២២,៣% និងមានទំហំប្រាក់មានការកើនឡើងប្រមាណ ៤៣,៥% ពី ១ ទៅ ១,៥ ប៊ីលានដុល្លារអាមេរិក។ គិតត្រឹមឆ្នាំ២០២៤ គ្រឹះស្ថានធនាគារ និងហិរញ្ញវត្ថុចំនួន ៤០ គ្រឹះស្ថាន បានដំឡើងម៉ាស៊ីន ATM ចំនួន ៥,៧ ពាន់គ្រឿង និង ៣០ គ្រឹះស្ថានបានតម្លើងម៉ាស៊ីន POS ចំនួន ៥៣,៦ ពាន់គ្រឿង នៅទូទាំងប្រទេសកម្ពុជា ដែលជួយសម្រួលដល់លទ្ធភាពទទួលបាន សាច់ប្រាក់កាន់តែងាយស្រួល និងពង្រឹងហេដ្ឋារចនាសម្ព័ន្ធទូទាត់ទាំងមូល។ ប្រតិបត្តិការទូទាត់តាមឃ្យូអរកូត នៅតែទទួលបានការ ពេញនិយម និងទាក់ទាញ ដែលជាមធ្យោបាយទូទាត់ប្រាក់ងាយស្រួល និងសុវត្ថិភាព។ ចំនួនប្រតិបត្តិការទូទាត់តាមឃ្យូអរកូត បាន កើនឡើង ២៥២,៦% ធៀបនឹងឆ្នាំ២០២៣ ក្នុងទំហំប្រាក់សរុបចំនួន ៥៥,៨ ប៊ីលានដុល្លារអាមេរិកប្រមាណ ១២៤% នៃផ.ស.ស៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

លោក Trump និយាយថា លោកអាចនឹងដកទណ្ឌកម្មចេញពីក្រុមហ៊ុនចិនដែលទិញប្រេងអ៊ីរ៉ង់

លោក Araghchi ៖ អ៊ីរ៉ង់មិនទុកចិត្តអាមេរិកទេ ហើយពួកគេនឹងចរចាបើសិនវាជាបញ្ហាធ្ងន់ធ្ងរ

រដ្ឋមន្ត្រី៖ ហ្វីលីពីននឹង «ពិតជា» គោរពតាមសំណើរបស់ ICC ដើម្បីចាប់ខ្លួនសមាជិកព្រឹទ្ធសភា

កិច្ចពិភាក្សា BRICS បញ្ចប់ដោយគ្មានសេចក្តីថ្លែងការណ៍រួម ជាការបង្ហាញពីភាពរកាំរកូស ដោយសារសង្គ្រាមនៅអ៊ីរ៉ង់

UN ៖ ការគំរាមកំហែងគ្រោះទុរ្ភិក្សកើតមាននៅភាគខាងត្បូងប្រទេសូម៉ាលី លុះត្រាតែបង្កើនជំនួយមនុស្សធម៌

លោក Trumpនិយាយថា នាយករដ្ឋមន្រ្តីប្រឈមហានិភ័យនយោបាយដោយសារគ្មានវិធានការលើបញ្ហាអន្តោប្រវេសន៍ និងថាមពល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877