BTV NEWS

កម្ពុជា តវ៉ាយ៉ាងខ្លាំងក្លាបំផុត និងជំទាស់ជាដាច់ខាតចំពោះការរៀបចំព្រឹត្តិការណ៍ ពិធីសាសនា និងបើកប្រាសាទខ្នារឱ្យចូលទស្សនាជាសាធារណៈដោយភាគីថៃ ខណៈទីតាំងនេះគឺស្ថិតក្រោមអធិបតេយ្យភាពកម្ពុជា

ឯកឧត្តម ហេង សួរ ចូលរួមអបអរសាទរសិស្ស-និស្សិតជ័យលាភី TVET ជាង ២ពាន់នាក់ដែលជាកម្លាំងចលករថ្មីរួមចំណែកលើកកម្ពស់មុខមាត់ សេដ្ឋកិច្ច និងទាក់ទាញវិនិយោគនៅខេត្តស្វាយរៀង

ពេទ្យស្ម័គ្រចិត្តកម្ពុជា និងសិង្ហបុរី ចុះពិនិត្យព្យាបាលជំងឺជូនពលរដ្ឋ និងធ្វើអនាម័យកុមារា នៅខេត្តតាកែវដោយឥតគិតថ្លៃ

អន្តរក្រសួងចុះពិនិត្យវឌ្ឍនភាព ការអនុវត្តការងារសាងសង់គម្រោងគ្រប់គ្រងធនធានទឹកចម្រុះហ្វូណនតេជោ នៅស្រុកបូរីជលសារ ខេត្តតាកែវ

ព័ត៌មានជាតិ

សម្ដេចប្រធានរដ្ឋសភា៖ បារាំងគឺជាតួអង្គដ៏សំខាន់ចូលរួមចំណែកដោះស្រាយវិវាទព្រំដែនរវាងកម្ពុជា និងថៃ

ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា អនុញ្ញាតឱ្យឯកឧត្តម ហ្សាក់ ប៉េឡេ (Jacques PELLET) ឯកអគ្គរដ្ឋទូតបារាំង ដែលនឹងចប់អាណត្តិប្រចាំព្រះរាជាណាចក្រកម្ពុជា ចូលជួបសំដែងការគួរសម និងជម្រាបលា នៅវិមានរដ្ឋសភា រាជធានីភ្នំពេញ នាព្រឹកថ្ងៃទី១៧ ខែកក្កដា ឆ្នាំ២០២៥។ជាកិច្ចចាប់ផ្តើម សម្ដេចប្រធានរដ្ឋសភា បានស្វាគមន៍យ៉ាងកក់ក្តៅ និងថ្លែងអំណរគុណឯកឧត្តមឯកអគ្គរដ្ឋទូត ចំពោះកិច្ចសហប្រតិបត្តិការ និងសកម្មភាពនានាដែលឯកឧត្តម បានជួយសម្រួបសម្រួលរៀបចំ ដូចជាព្រះរាជទស្សនកិច្ច ទស្សនកិច្ចផ្លូវការ ការងារ និងការចូលរួមកិច្ចប្រជុំកំពូលនានា នៅបារាំង របស់ព្រះករុណាព្រះមហាក្សត្រ, សម្តេចតេជោ ក្នុងអំឡុងពេលជានាយករដ្ឋមន្រ្តី និងសម្តេចបវរធិបតីនាយករដ្ឋមន្រ្តី និងសម្ដេចផ្ទាល់ដែលបានអញ្ជើញទៅធ្វើទស្សនកិច្ច និងចូលរួមកិច្ចប្រជុំប្រធានសភាស្រ្ដីនៅបារាំងកាលពីឆ្នាំ២០២៤ ដែលសកម្មភាពទាំងនេះគឺជាកិច្ចឆ្លើយតបដ៏ល្អក្នុងការពង្រឹងទំនាក់ទំនងរវាងកម្ពុជា-បារាំង។ សម្ដេចប្រធានរដ្ឋសភា ក៏បានវាយតម្លៃខ្ពស់ចំពោះបេសកកម្មរបស់ឯកអគ្គរដ្ឋទូតដែលសម្រេចបាននៅក្នុងប្រទេសកម្ពុជា ដោយបានជំរុញ និងពង្រឹងទំនាក់ទំនងរវាងកម្ពុជា និងបារាំង ដែលក្នុងពេលថ្មីៗនេះទំនាក់ទំនងប្រទេសទាំងពីរបានកើនឡើងមួយកម្រិតទៀត។ សម្ដេចប្រធានរដ្ឋសភាបន្តថា ទំនាក់ទំនងកម្ពុជា-បារាំង គឺមានទំនាក់ទំនងជាប្រវត្តិសាស្រ្ដតាំងពីយូរឡុងណាស់មកហើយៗបារាំងក៏ជាតួអង្គមួយដ៏សំខាន់ក្នុងការងារចូលរួមចំណែកដោះស្រាយវិវាទព្រំដែនរវាងកម្ពុជា និងថៃផងដែរ។ សម្ដេចប្រធានរដ្ឋសភា បានឆ្លៀតឱកាសនេះ ថ្លែងអំណរគុណដល់បារាំងដែលបានបញ្ជាក់ថានឹងជួយផ្ដល់នូវឯកសារពាក់ព័ន្ធ ដើម្បីជួយសម្រួលក្នុងការដោះស្រាយវិវាទព្រំដែនរវាងកម្ពុជា និងថៃឱ្យបានដោយរលូន។ សម្ដេចប្រធានរដ្ឋសភា ក៏បានថ្លែងអំណរគុណដល់បារាំងដែលបានជួយដល់ដំណើរការស្វែងរកសុខសន្ដិភាពរបស់កម្ពុជា និងបន្តចូលរួមចំណែកទាំងលើការផ្ដល់ជំនួយឥតសំណង និងការជំរុញវិនិយោគ និងពាណិជ្ជកម្មផ្សេងៗមកវិនិយោគនៅកម្ពុជា។ ក្រៅពីនេះបារាំងបានជួយកម្ពុជាជាច្រើនទៀត នៅលើវិស័យអប់រំ វិស័យសុខាភិបាល វប្បធម៌ផងដែរ។ សម្ដេចប្រធានរដ្ឋសភា ជំរុញឱ្យឯកអគ្គរដ្ឋទូតបារាំងថ្មីដែលមកបន្តបេសកកម្មនៅកម្ពុជា បន្តចូលរួមចំណែកជំរុញទំនាក់ទំនងឱ្យកាន់តែស៊ីជម្រៅបន្ថែមទៀត ជាពិសេសលើវិស័យ ពាណិជ្ជកម្ម វិនិយោគ និងជំរុញជើងហោះហើរត្រង់រវាងប្រទេសទាំងពីរ។ ជាការឆ្លើយតប ឯកឧត្តម ឯកអគ្គរដ្ឋទូតបារាំង បានថ្លែងអំណរគុណយ៉ាងជ្រាលជ្រៅ ចំពោះសម្ដេចប្រធានរដ្ឋសភា ដែលបានទទួលស្វាគមន៍ និងផ្ដល់ឱកាសដល់ឯកឧត្តមបានចូលជួបសម្ដែងការគួរសម និងជម្រាបលា នាឱកាសនេះ។ ក្នុងឱកាសនោះ ឯកឧត្តម ឯកអគ្គរដ្ឋទូតបារាំង ក៏បានបង្ហាញនៅសមិទ្ធផលដែលសម្ដេចបានក្នុងអាណត្តិរបស់ឯកឧត្តមធ្វើជាឯកអគ្គរដ្ឋទូតបារាំងប្រចាំនៅកម្ពុជាផងដែរ។ ក្នុងឱកាសនោះឯកឧត្តម ឯកអគ្គរដ្ឋទូតបារាំង ក៏បានបញ្ជាក់អំពីការត្រៀមក្នុងការទទួលទស្សនកិច្ចរបស់ឯកឧត្តមប្រធានាធិបតីបារាំង ដែលនឹងអញ្ជើញមកកម្ពុជានៅឆ្នាំ២០២៦ខាងមុខ ក្នុងកិច្ចប្រជុំកំពូលហ្វ្រង់កូហ្វូនី (APF) លើកទី២០ ដែលកម្ពុជានឹងធ្វើជាម្ចាស់ផ្ទះ៕

អភិបាលខេត្តកំពង់ចាម ស្នើដល់អាជ្ញាធរ និងសមត្ថកិច្ចពាក់ព័ន្ធ បង្កើនការផ្សព្វផ្សាយពីបញ្ហាទឹកជំនន់ទន្លេមេគង្គ

អភិបាលខេត្តកំពង់ចាម បានស្នើដល់អាជ្ញាធរ និងសមត្ថកិច្ចពាក់ព័ន្ធ បង្កើនការផ្សព្វផ្សាយដល់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ឱ្យបង្កើនការប្រុងប្រយ័ត្នខ្ពស់ ចំពោះទឹកជំនន់ទន្លេមេគង្គ។ អភិបាលខេត្តកំពង់ចាម កត់សម្គាល់ថា ក្នុងឆ្នាំ២០២៥នេះ ទឹកទន្លេមេគង្គបានហក់ឡើងយ៉ាងគំហុកខ្ពស់ជាងឆ្នាំមុន។ ក្នុងកិច្ចប្រជុំវាយតម្លៃលទ្ធផលការងារការអនុវត្តគោលនយោបាយភូមិ ឃុំ សង្កាត់ មានសុវត្ថិភាពប្រចាំឆមាសទី១ និងលើកទិសដៅអនុវត្តបន្ត នៅថ្ងៃទី១៦ កក្កដានេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងពីការត្រៀមបង្ការគ្រោះទឹកជំនន់ទន្លេមេគង្គ។ អភិបាលខេត្តកំពង់ចាម រំឭកថា នៅរដូវវស្សា ខេត្តកំពង់ចាម ដែលស្ថិតនៅជាប់ដងទន្លេមេគង្គ តែងរងគ្រោះដោយសារទឹកជំនន់ទន្លេមេគង្គ។ដើម្បីទប់ស្កាត់ផលប៉ះពាល់ដល់ការរស់នៅរបស់ប្រជាពលរដ្ឋ។ ឯកឧត្តម អ៊ុន ចាន់ដា បានបញ្ជាឱ្យសមត្ថកិច្ចមូលដ្ឋានចុះពិនិត្យជាប្រចាំនូវតំបន់ងាយរងគ្រោះ រាប់ចេញពីស្រុកស្ទឹងត្រង់ រហូតដល់ស្រុកកងមាស-ស្រុកស្រីសន្ធរ ដែលជាមុខសញ្ញាត្រូវសង្គ្រោះ។ បើតាមអភិបាលខេត្តកំពង់ចាម អាជ្ញាធរត្រូវណែនាំដល់ពលរដ្ឋឱ្យត្រៀមបង្ការ និងរកទីទួលមានសុវត្ថិភាពសម្រាប់ប្រជាពលរដ្ឋ។ជាមួយគ្នានេះ អាជ្ញាធរត្រូវត្រៀមកម្លាំង និងក្រុមឆ្លើយតប ដើម្បីសង្គ្រោះបន្ទាន់ ក្នុងករណីដែលមានការទំនាក់ទំនងពីប្រជាពលរដ្ឋ។ តាមការកត់សម្គាល់ឆ្នាំនេះ ទឹកទន្លេមេគង្គបានហក់ឡើងយ៉ាងគំហុកខ្ពស់ជាងឆ្នាំមុន ដែលបង្កការព្រួយបារម្ភដល់សុវត្ថិភាពពលរដ្ឋរស់នៅជាប់ទន្លេមេគង្គ៕

ក្រសួងការងារ នាំយកឱកាសការងារជាង ៣ពាន់កន្លែងសម្រាប់ប្រជាពលរដ្ឋ និងពលករខ្មែរក្នុងខេត្តបន្ទាយមានជ័យដែលទើបត្រឡប់មកពីប្រទេសថៃ

ឯកឧត្តម សាន គីមហុង អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាសមាជិកក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ និងឯកឧត្តម យឹម សំណាង អភិបាលរង នៃគណៈអភិបាលខេត្តបន្ទាយមានជ័យ និងអាជ្ញាធរពាក់ព័ន្ធបានអញ្ជើញចូលរួមពិធីបើក «វេទិកាការងារ» របស់ទីភ្នាក់ងារជាតិមុខរបរ និងការងារ (NEA) នៅស្រុកមង្គលបុរី ខេត្តបន្ទាយមានជ័យ នាព្រឹកថ្ងៃទី១៦ ខែកក្កដា ឆ្នាំ២០២៥។«វេទិកាការងារ»នេះ ផ្ដល់ឱកាសសម្រាប់បងប្អូនប្រជាពលរដ្ឋនៅមូលដ្ឋាន ជាពិសេស បងប្អូនពលករខ្មែរដែលបានវិលត្រឡប់មកពីប្រទេសថៃ ដើម្បីសម្ភាសការងារភ្លាមៗជាមួយក្រុមហ៊ុន, សហគ្រាស និងរោងចក្រ ចំនួន ៣ ដែលបានចុះមកផ្ទាល់ និងមានឱកាសការងារចំនួនជាង ៣ពាន់កន្លែង៕

«ដំណើរទេសចរណ៍នៅប្រទេសកម្ពុជាពិតជាសប្បាយរីករាយ និងពោរពេញដោយអនុស្សាវរីយ៍ល្អៗដែលមិនអាចបំភ្លេចបាន ហើយយើងមកលេងម្តងទៀតជាមិនខាន» ចំណាប់អារម្មរណ៍រួមរបស់ប្រតិភូបុគ្គលិកក្រុមហ៊ុន EdF និង GdF បារាំង

ភ្នំពេញ៖ នៅទីស្តីការក្រសួងទេសចរណ៍ នារសៀលថ្ងៃទី១៦ ខែកក្កដា ឆ្នាំ២០២៥ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានអនុញ្ញាតជូនតំណាងប្រភិភូបុគ្គលិក-និយោជិក នៃក្រុមហ៊ុនថាមពលបារាំង EdF និង GdF ព្រមទាំងលោក អាំង ពិទូ ជាប្រធានសមាគមកូដូខែ្មរ ចូលជួបសម្តែងការគួរសម គោរពជម្រាបពីចំណាប់អាម្មរណ៍នៃដំណើរទេសចរណ៍នៅប្រទេសកម្ពុជារយៈពេលជាង២សប្តាហ៍ ព្រមទាំងគោរពជម្រាបលាត្រលប់ទៅប្រទេសបារាំងវិញ។ក្នុងឱកាសជំនួបនេះ ឯកឧត្តមរដ្ឋមន្រ្តី បានស្តាប់នូវចំណាប់អាម្មរណ៍ល្អៗ និងបទពិសោធផ្ទាល់ខ្លួនពីការធ្វើទេសចរណ៍នៅគោលដៅទេសចរណ៍នានាក្នុងប្រទេសកម្ពុជា ជាពិសេសគឺការស្នាក់នៅទទួលទាន និងការចុះធ្វើស្រែចំការតាមភូមិឋានជនបទនានាជាមួយប្រជាពលរដ្ឋកម្ពុជារបស់ប្រតិភូ និងថ្លែងអំណរគុណចំពោះការជ្រើសរើសប្រទេសកម្ពុជាជាគោលដៅវិស្សមកាលប្រចាំឆ្នាំរបស់ប្រតិភូ ព្រមទាំងការជួយផ្សព្វផ្សាយបន្តរបស់ប្រតិភូដល់ក្រុមគ្រួសារ មិត្តភ័ក្រ និងប្រជាពលរដ្ឋបារាំងទាំងអស់អំពីកត្តាសុខសន្តិភាព សុវត្ថិភាពល្អ ស្ថេរភាពសង្គម និងការអភិវឌ្ឍលើគ្រប់វិស័យរបស់ប្រទេសកម្ពុជានាពេលបច្ចុប្បន្ន ជាពិសេសបដិសណ្ឋារកិច្ចដ៏កក់ក្តៅ ម្ហូបអាហារដ៏មានឱជារស គ្រឿងផ្សំពីធម្មជាតិផ្តល់សុខភាពល្អ និងទេសភាពដ៏ស្រស់ត្រកាល អាកាសធាតុល្អ នារដូវការបៃតង៕

ជនជាតិឥណ្ឌូនេស៊ីប្រុសស្រីចំនួន២៧១នាក់ ត្រូវបានឃាត់ខ្លួន ក្នុងទីតាំងអគារលួចបើកល្បែងអនឡាញ នៅក្រុងប៉ោយប៉ែត

បន្ទាយមានជ័យ៖ ជនជាតិឥណ្ឌូនេស៊ីប្រុសស្រីចំនួន២៧១នាក់ ក្នុងនោះស្រី៤៥នាក់ ត្រូវបានឃាត់ខ្លួនក្នុងទីតាំងអគារលួចបើកល្បែងអនឡាញមួយកន្លែង នៅក្រុងប៉ោយប៉ែត ខេត្តបន្ទាយមានជ័យ នារសៀលថ្ងៃទី១៦ ខែកក្កដា ឆ្នាំ២០២៥។ការឃាត់ខ្លួនជនជាតិឥណ្ឌូនេស៊ីប្រុសស្រីទាំងនេះ អនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បញ្ជាកម្លាំងផែនជំនាញ កម្លាំងអធិការដ្ឋាននគរបាលក្រុងប៉ោយប៉ែត បានសហការជាមួយ រដ្ឋបាលក្រុងប៉ោយប៉ែត រដ្ឋបាលខេត្តបន្ទាយមានជ័យ ដឹកនាំសម្របសម្រួលពីលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្ត បានចុះបង្ក្រាបទីតាំងអគារអនឡាញខុសច្បាប់០១កន្លែង នៅចំណុចផ្លូវស្តង់តាងួន ទល់មុខផ្លូវខាងលិចបុរីដឹផាកស៊ីធី ស្ថិតក្នុងភូមិបាលិលេយ្យ២ សង្កាត់.ក្រុងប៉ោយប៉ែត ខេត្តបន្ទាយមានជ័យ។ប្រតិបត្តិការនេះ កម្លាំងនគរបាលបានធ្វើការឆែកឆេរ អគារមានកម្ពស់០៣ជាន់ បន្ទប់៧០បន្ទប់ ជាន់ទី១,ទី២ ជាបន្ទប់ស្នាក់នៅ និងជាន់ទី០៣ ជាបន្ទប់លួចលាក់សម្រាប់ធ្វើការអនឡាញ រកឃើញជនជាតិឥណ្ឌូនេស៊ីចំនួន២៧១នាក់ ស្រី៤៥នាក់។ ដកហូត៖ កុំព្យូទ័រ៣៤១គ្រឿង និងទូរសព្ទ ៣៥២គ្រឿង។ បច្ចុប្បន្នជនបរទេសទាំងនោះ កម្លាំងជំនាញកំពុងសួរនាំ និងចាត់ការតាមនីតិវិធី៕ដោយឃិនសារិទ្ធ

ក្រុមហ៊ុនវិនិយោគធំៗចិននាំយកបច្ចេកវិទ្យាទំនើបលើប្រពន្ធ័ប្រព្រឹត្តកម្មទឹកកខ្វក់ និងកែច្នៃកាកសំណល់រឹង, ប្លាស្ទិករួមចំណែកលើកកម្ពស់សុខភាពសាធារណៈនៅកម្ពុជា

ក្រុមហ៊ុនវិនិយោគធំៗចំនួន៣ ដែលមានផ្សារភាគហ៊ុននៅប្រទេសចិន ឯកទេសខាងប្រព័ន្ធប្រព្រឹត្តកម្មទឹកកខ្វក់ និងការកែច្នៃកាកសំណល់រឹង និងប្លាស្ទិក ដឹកនាំដោយលោក Ding Yongjun ប្រធានក្រុមហ៊ុន Morgan Group នៅកម្ពុជា បានចូលជួបសម្តែងការគួរសម និងសុំអនុសាសន៍ លើវិស័យបរិស្ថាន ពីឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅរសៀលថ្ងៃពុធ ទី១៦ ខែកក្កដា ឆ្នាំ២០២៥ នាទីស្តីការក្រសួងបរិស្ថាន។ក្រោយពីបានស្តាប់នូវបទបង្ហាញអំពីបទពិសោធន៍ និងសមត្ថភាព របស់ក្រុមហ៊ុន តាមរយៈបច្ចេកវិទ្យាទំនើបក្នុងការធ្វើប្រព្រឹត្តិកម្មសំណល់ទឹកកង្វក់ និងភាពវៃឆ្លាតក្នុងការប្រមូលសំរាម សំណល់រឹង និងប្លាស្ទិកដើម្បីរួមចំណែកការពារបរិស្ថានរួចមក ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានគូសបញ្ជាក់ថា ក្រោមម្លប់នៃសុខសន្តិភាព និងក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កម្ពុជាបានក្លាយជាគោលដៅដ៏ទាក់ទាញ និងមានសក្តានុពលរបស់វិនិយោគិនគ្រប់ទិសទី។ ក្រសួងបរិស្ថានសូមសម្តែងនូវការស្វាគមន៍ និងគាំទ្រ ដែលក្រុមហ៊ុនវិនិយោគទាំង៣ ដែលមានបំណងរួមចំណែកជាមួយគោលនយោបាយចក្រាវិស័យបរិស្ថាន ផ្តោតលើ ភាពស្អាត បៃតង និងចីរភាព។ ដោយឡែក ចំពោះភាពស្អាត ក្រសួងបរិស្ថានផ្តោតលើភាពស្អាតលើមេឃ សំដៅលើគុណភាពខ្យល់ល្អ ភាពស្អាតលើដីសំដៅលើការកាត់បន្ថយសំរាម សំណល់រឹង និងប្លាស្ទិក។ឯកឧត្តមបណ្ឌិតរដ្ឋមន្រ្តី បានបន្តថា កន្លងមកនេះ យើងមានសាធារណជន និងសិស្សានុសិស្សសរុបចំនួន១១លាននាក់ បានបេ្តជ្ញាចិត្តមិនប្រើថង់ប្លាស្ទិក ហើយបច្ចុប្បន្នក្រសួងកំពុងសម្លឹងមើលឡដុតសំរាមដែលមានបច្ចេកវិទ្យាខ្ពស់ សន្សំសំចៃថាមពល សម្រាប់ដុត ឬ កែច្នៃសំណល់ប្លាស្ទិកដែលប្រមូលបាន។ ជាមួយគ្នានេះដែរក្រសួងបាននិងកំពុងរៀបចំគោលនយោបាយគ្រប់គ្រងសំណល់រឹងរយៈពេលវែង ខ្លី និងមធ្យម និងការគាំទ្រជាច្រើនទៀតដើម្បីធ្វើយ៉ាងណា ឱ្យកម្ពុជាមានសោភណ័ភាពស្អាត និងធានាបាននូវសុខភាពសាធារណៈកាន់តែល្អប្រសើរ។ចំពោះភាពស្អាតក្នុងទឹកវិញ ក្រសួងកំពុងសម្លឹងមើលបច្ចេកវិទ្យាដំឡើងអាងប្រព្រឹត្តកម្មទឹកកង្វក់ដែលមានសមត្ថភាពខ្ពស់ចម្រាញ់ទឹកបានស្អាត ចំណាតិច សន្សំសំចៃថាមពល ដែលអាចបំពាក់នៅតាមអាគារខ្ពស់ៗ តាមទីក្រុង និង តាមតំបន់ប្រជុំជននានា ដូចនេះ វត្តមានរបស់ក្រុមហ៊ុន Toyon Energy Co., Ltd. ក្រុមហ៊ុន JingLV Environment Co., Ltd.និងក្រុមហ៊ុន. Shun Yu Water Co., Ltd. ពិតជាមានសារៈសំខាន់ណាស់ ដែលនាំមកនូវបច្ចេកវិទ្យាដ៏ទំនើប និងជោគជ័យនៅប្រទេសចិន មកចែករំលែកនៅកម្ពុជា ក្នុងនាមជាប្រទេសមិត្តភាពដែកថែប កម្ពុជា-ចិន។ គួរបញ្ជាក់ថា ក្រុមហ៊ុន Toyon Energy Co., Ltd. ក្រុមហ៊ុន JingLV Environment Co., Ltd. និងក្រុមហ៊ុន. Shun Yu Water Co., Ltd. ជាក្រុមហ៊ុនដ៏ធំរបស់ខេត្ត Anhui ប្រទេសចិនដែលមានបទពិសោធន៍ជាង២០ឆ្នាំ ក្នុងការប្រមូល និងកែច្នៃ កាកសំណល់រឹង និងប្លាស្ទិក បំល្លែងចេញជាវត្ថុផ្សេងៗ និងប្រភពថាមពល និងការប្រើប្រាស់បច្ចេកវិទ្យាទំនើបស្របតាមស្តង់ដា សន្សំសំចៃថាមពលខ្ពស់ ក្នុងការធ្វើប្រព្រឹត្តិកម្មសំណល់ទឹកកង្វក់ បំល្លែងចេញជាទឹកស្អាតសម្រាប់ប្រើប្រាស់ និងបរិភោគផងដែរ៕

ត្រឹមពាក់កណ្ដាលខែកក្កដានេះអ្នកសេដ្ឋកិច្ចក្រៅប្រព័ន្ធចុះឈ្មោះតាមថ្នាលឌីជីថលកើនដល់ជាង ១១៩ ពាន់នាក់

គិតត្រឹមថ្ងៃទី១៥ ខែកក្កដា ឆ្នាំ២០២៥នេះ គណៈកម្មាធិការសម្របសម្រួលការអភិវឌ្ឍន៍សេដ្ឋកិច្ចក្រៅប្រព័ន្ធទទួលបានការចុះ ឈ្មោះអ្នកសេដ្ឋកិច្ចក្រៅប្រព័ន្ធតាមថ្នាលឌីជីថល មានចំនួនជាង ១១៩ ពាន់នាក់ ដែលនេះជាវឌ្ឍនភាពសំខាន់មួយ នៅក្នុងកិច្ចខិត ខំប្រឹងប្រែងរបស់រាជរដ្ឋាភិបាល។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការ សម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ លើកឡើងនៅក្នុងកម្មវិធីដាក់ឱ្យប្រើប្រាស់ជាផ្លូវការ ក្របខ័ណ្ឌត្រួតពិនិត្យ តាមដាន និង វាយតម្លៃយុទ្ធសាស្ត្រជាតិ ស្ដីពីការអភិវឌ្ឍន៍សេដ្ឋកិច្ចក្រៅប្រព័ន្ធឆ្នាំ២០២៣-២០២៨ នៅថ្ងៃទី១៦ ខែកក្កដា ម្សិលមិញនេះថា ការដាក់ឱ្យដំណើរប្រព័ន្ធចុះឈ្មោះតាមថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ បានដាក់ឱ្យដំណើរនៅខែធ្នូ ឆ្នាំ២០២៤ កន្លងមក។ ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ត្រូវបានរៀបចំឡើងដើម្បីឆ្លើយតបទៅនិងតម្រូវការចំពោះមុខ ក្នុងការបង្កើតមូលដ្ឋាន ទិន្នន័យ ដោយបានអនុញ្ញាតអ្នកសេដ្ឋកិច្ចក្រៅប្រព័ន្ធចុះឈ្មោះដ៏ងាយស្រួល គ្មានចំណាយ និងតាមគោលការណ៍ស្ម័គ្រចិត្ត ដើម្បីទទួល បានអត្តសញ្ញាណ និងស្នើសុំអត្ថប្រយោជ៍នានា ហើយប្រព័ន្ធនេះគឺជាជម្រើសដ៏សមស្រប ចំណេញពេលវេលា និងទាន់សភាពការណ៍សម្រាប់បងប្អូនសេដ្ឋកិច្ចក្រៅប្រព័ន្ធ។ឯកឧត្តម បន្តថា បច្ចុប្បន្នអ្នកសេដ្ឋកិច្ចក្រៅប្រព័ន្ធ អាចចុះឈ្មោះលើថ្នាលឌីជីថលរបស់រាជរដ្ឋាភិបាល តាមរយៈកម្មវិធីទូរសព្ទ ដៃ វិបផតថល និងសាខាធនាគារដៃគូនៅទូទាំងប្រទេស, ជាក់ស្តែងនាពេលនេះ ធនាគារដៃគូដែលអ្នកសេដ្ឋកិច្ចក្រៅប្រព័ន្ធ អាចទទួល សេវាចុះឈ្មោះបានកើនឡើងដល់៨រួមមាន៖ ធនាគារសហគ្រាសធុនតូច និងមធ្យមកម្ពុជា, ធនាគារ ARDB, ធនាគារ វីង, ធនាគារ ABA,ធនាគារអេស៊ីលីដា, ធនាគារវឌ្ឍនៈ, ធនាគារកាណាឌីយ៉ា, និងធនាគារពាណិជ្ជកម្មក្រៅប្រទេស ក្នុងនោះគិតត្រឹមថ្ងៃទី១៥ ខែ កក្កដា ឆ្នាំ២០២៥ ថ្នាលឌីជីថលបានទទួលសំណើចុះឈ្មោះចំនួនជាង ១១៩ ពាន់នាក់ ដែលជាវឌ្ឍនភាពសំខាន់មួយ នៅក្នុងកិច្ចខិត ខំប្រឹងប្រែងរបស់រាជរដ្ឋាភិបាល ក្នុងការទទួលស្គាល់ និងពង្រីកសក្តានុពលនៃវិស័យសេដ្ឋកិច្ចក្រៅប្រព័ន្ធ។ឯកឧត្តមរដ្ឋមន្ត្រីក្រសួង លើកឡើងបន្ថែមថា ជុំវិញថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធនេះ ទៅថ្ងៃអនាគត គណៈកម្មាធិការចង់ឱ្យវាមានសមត្ថភាពមួយ លើការចែករំលែកទិន្នន័យទៅវិញ ដើម្បីយកទិន្នន័យដែលបានរក្សាទុក ទៅចែករំលែក ទាំងអស់វិញ ក្នុងនោះបងប្អូនប្រជាពលរដ្ឋក៏អាមើលឃើញទិន្នន័យ និងអាចទាញអត្ថប្រយោជន៍ពីអ្វីដែលមាន យកទៅប្រើប្រាស់តាម តម្រូវការ ចំណែកអាជ្ញាធរ ក៏អាចទាញយកទិន្ន័យបានផងដែរ ដើម្បីទទួលនូវព័ត៌មានអ្នកសេដ្ឋកិច្ចក្រៅប្រព័ន្ធក្នុងមូលដ្ឋានរបស់ខ្លួន។ក្រៅពីគោលការណ៍ខាងលើ, គណៈកម្មាធិការកំពុងបន្តបើកយុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធ បាននិងកំពុងអនុវត្តការងារ នេះ ទាំងការផ្សព្វផ្សាយ ការបញ្ជ្រាបការយល់ដឹងអំពីអត្ថប្រយោជន៍នៃការុះឈ្មោះ របៀបចុះឈ្មោះជូនដល់បងប្អូនអ្នកសេដ្ឋកិច្ចក្រៅ ប្រព័ន្ធនៅទូទាំងប្រទេស ក្នុងនោះយុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធ ត្រូវបានរៀបចំជាបន្តបន្ទាប់ ដោយបញ្ចប់នូវជុំទី១ ដែលបានចុះផ្សព្វផ្សាយចំនួន៥លើរួចហើយ ដែលមានអ្នកចូលរួមប្រមាណាង ១៤ ពាន់នាក់៕ អត្ថបទ៖ សុន រ៉ាឌី

ពោធិ៍សាត់ក្លាយជាខេត្តទី២៣ ដែលបានបញ្ចប់ការបន្ទោបង់ពាសវាលពាសកាល(ODF)ទាំងស្រុង

រដ្ឋបាលខេត្តពោធិ៍សាត់ សហការជាមួយមន្ទីរអភិវឌ្ឍន៍ជនបទ និងអង្គការដៃគូរ បានរៀបចំ«សិក្ខាសាលាឆ្លុះបញ្ចាំងស្តីពីលទ្ធផលផ្ទៀងផ្ទាត់ស្ថានភាព បញ្ចប់ការបន្ទោបង់ពាសវាលពាសកាល ខេត្តពោធិ៍សាត់» ។ សិក្ខាសាលារៀបចំធ្វើឡើងនៅសាលប្រជុំសាលាខេត្តពោធិ៍សាត់ ក្រោមអធិបតីភាពឯកឧត្តម យឹម ជុង រដ្ឋលេខាធិការនៃក្រសួងអភិវឌ្ឍន៍ជនបទ និង លោក លឹម សុខតូ អភិបាលរងខេត្តពោធិ៍សាត់ និងដោយមានការចូលរួមពី លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្ត ក្រុមការងារចុះផ្ទៀងផ្ទាត់ODFនៃក្រសួងអភិវឌ្ឍន៍ជនបទ តំណាងអង្គការដៃគូរ មន្ទីរអង្គភាព-ជុំវិញខេត្ត និងអាជ្ញាធរក្រុងស្រុកទាំង៧ ។ ខេត្តពោធិ៍សាត់ មានក្រុងចំនួន១ ស្រុកចំនួន៦ សង្កាត់មាន៧ និងឃុំចំនួន៤២ និងភូមិចំនួន៥២៧។ យោងតាមរបាយការណ៍របស់មន្ទីរអភិវឌ្ឍន៍ជនបទខេត្ត ស្តីពីការទទួលបានជ័យលាភី ODF ភូមិ ឃុំ សង្កាត់ ក្រុង ស្រុក និងការចុះពិនិត្យផ្ទៀងផ្ទាត់ ODF ដោយក្រុមការងារនៃក្រសួងអភិវឌ្ឍន៍ជនបទ គឺភូមិចំនួន៥២៧ ឃុំចំនួន៤២ សង្កាត់០៧ ក្រុងចំនួន០១ ស្រុកចំនួន០៦ បានបញ្ចប់ការបន្ទោបង់ពាសវាលពាសកាល ODFទាំងស្រុង តាមរយៈការវិនិច្ឆ័យពីភាពត្រឹមត្រូវស្របតាមគោលការណ៍ណែនាំ និងលក្ខណៈបច្ចេកទេស នាំឲ្យខេត្តពោធិ៍សាត់ក្លាយជាខេត្តទី២៣ ដែលនឹងទទួលបានជ័យលាភីបញ្ចប់ការបន្ទោបង់ពាសវាលពាសកាល ODF ទាំងស្រុង ដោយគ្រោងនឹងរៀបចំពិធីប្រកាសទទួលស្គាល់ជាផ្លូវការនាចុងខែកក្កដាឆ្នាំ២០២៥ខាងមុខនេះ។ លោក លឹម សុខតូ អភិបាលរងខេត្ត បានលើកឡើងថា លទ្ធផលសម្រេចបានពេលនេះ បង្ហាញកាន់តែច្បាស់ពីការប្តេជ្ញាចិត្តរបស់ថ្នាក់ដឹកនាំក្រសួងអភិវឌ្ឍន៍ជនបទ ដែលមាន ឯកឧត្តម ឆាយ ឫទ្ធិសែន ជារដ្ឋមន្ត្រី ដើម្បីសម្រេចឱ្យបាននូវទស្សនវិស័យរបស់រាជរដ្ឋាភិបាល បានកំណត់ថា “ត្រឹមឆ្នាំ២០៣០ ប្រជាពលរដ្ឋគ្រប់រូប នៅសហគមន៍ជនបទ ត្រូវមាន សេវាផ្គត់ផ្គង់ទឹក ស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តរភាព”។ លោក លឹម សុខតូ បានវាយតម្លៃខ្ពស់ ចំពោះក្រុមការងារបច្ចេកទេសវិស័យផ្គត់ផ្គង់ទឹក និង អនាម័យជនបទ (PWG) លោកប្រធានមន្ទីរអភិវឌ្ឍន៍ជនបទខេត្ត និងថ្នាក់ដឹកនាំមន្ត្រីរាជការមន្ទីរ អភិវឌ្ឍន៍ជនបទ រដ្ឋបាលក្រុង-ស្រុក ឃុំ/សង្កាត់ មេភូមិ ជនបង្គោលអនាម័យភូមិ-ឃុំ បងប្អូនប្រជាពលរដ្ឋ សប្បុរសសជន និងអង្គការដៃគូដែលបានខិតខំប្រឹង ប្រែងយកចិត្តទុកដាក់ចូលរួមសហការ ឧបត្ថម្ភគាំទ្រ ប្រកបដោយស្មារតីទទួលខុសត្រូវខ្ពស់ និងធ្វើឱ្យខេត្តពោធិ៍សាត់ សម្រេចបានការបញ្ចប់បន្ទោបង់ពាសវាលពាសកាល ប្រកបដោយជោគជ័យ ។ លោកអភិបាលរងខេត្ត ក៏បានជំរុញឲ្យគ្រប់ភាគីពាក់ព័ន្ធទាំងអស់បន្តសហការគ្នាលើការងារអនាម័យជនបទ និង ODF ដើម្បីធ្វើយ៉ាងណាឲ្យខេត្តពោធិ៍សាត់ក្លាយជាខេត្ត ODF Plush នៅឆ្នាំ២០២៧ ។ មានប្រសាសន៍បិទសិក្ខាសាលានេះ ឯកឧត្តម យឹម ជុង បានលើកឡើងថា សមិទ្ធផលនៃការ បញ្ចប់ការបន្ទោរបង់ពាសវាលពាសកាលODF នៅខេត្តពោធិ៍សាត់នាពេលនេះ ពិតជាបានចូលរួមចំណែកយ៉ាងធំធេង ក្នុងការអភិវឌ្ឍជាតិ ជាពិសេសប្រជាពលរដ្ឋនៅក្នុងខេត្ត បានបង្កើនលទ្ធភាព ក្នុងការទទួលបាននូវប្រាក់ចំណូល មានសុខុមាលភាពល្អ ជីវភាពសមរម្យ អនាម័យបរិស្ថានស្អាត ដែលជាភាពសុខសាន្ត របស់បងប្អូនប្រជាពលរដ្ឋ។ ព្រោះថាបើការរស់នៅមិនមានអនាម័យ មិនមានទឹកស្អាតប្រើប្រាស់ ជាប្រភពនាំឱ្យកើតជំងឺឆ្លង ដែលជាហេតុនាំឱ្យប៉ះពាល់ដល់សុខភាព ទាំងរូបរាងកាយ និងសតិបញ្ញាស្មារតី ជាពិសេសធ្វើឱ្យខាតបង់សេដ្ឋកិច្ចគ្រួសារ និងសង្គមជាតិផងដែរ។ ឯកឧត្តមរដ្ឋលេខាធិការ បានកោតសរសើរដល់រដ្ឋបាលខេត្តពោធិ៍សាត់ អាជ្ញាធរគ្រប់លំដាប់ថ្នាក់ និងគ្រប់ភាគីពាក់ព័ន្ធទាំងអស់ បានចូលរួមសហការគ្នា ខិតខំប្រឹងប្រែង ប្តេជ្ញាចិត្ត រួមគំនិតគ្នាធ្វើ ដើម្បីទទួលបាននូវជោគជ័យ បញ្ចប់ការបន្ទោបង់ពាសវាលពាសកាល ODF នាពេលនេះ ៕

ឧបនាយករដ្ឋមន្រ្តី កើត រិទ្ធ៖យប់នេះក្រសួងយុត្តិធម៌មានភាពចាំបាច់ផ្អាកជាបណ្តោះអាសន្នមុខងាររបស់ព្រះរាជអាជ្ញារងឈ្មោះ គ្រី សីហា ដែលដោះលែងដោយរំលោភអំណាចនូវជនល្មើស

ភ្នំពេញ៖ ឯកឧត្តម ឧបនាយករដ្ឋមន្រ្តី កើត រិទ្ធ រដ្ឋមន្ត្រី ក្រសួងយុត្តិធម៌បានធ្វើចំណាត់ការរចំពោះការដោះលែងដោយរំលោភអំណាច នូវជនល្មើសដែលមានការពាក់ព័ន្ធនឹងការឆបោកតាមប្រព័ន្ធបច្ចេកវិទ្យា នៅខេត្តពោធិសាត់។ឯកឧត្តម ឧបនាយករដ្ឋមន្រ្តី កើត រិទ្ធ ថ្លែងថា ក្នុងកិច្ចប្រជុំពីម្សិល, ឯកឧត្តម បានណែនាំឱ្យឯកឧត្តម លោកជំទាវជាប្រធានតុលាការ និង ព្រះរាជអាជ្ញា ប្រកាន់នូវភាពម៉ឺងម៉ាត់ក្នុងការអនុវត្តវិធានការច្បាប់ ក៏ដូចជាផ្តល់កិច្ចសហការពេញលេញដល់សមត្ថកិច្ចដើម្បីអនុវត្តបទបញ្ជារបស់រាជរដ្ឋាភិបាលក្នុងការបង្រ្កាបបទល្មើសឆបោកតាមប្រព័ន្ធបច្ចេកវិទ្យា។ឯកឧត្តម ថ្លែងថា យប់នេះ, ក្រសួងយុត្តិធម៌មានភាពចាំបាច់ ក្នុងការសម្រេចផ្អាកជាបណ្តោះអាសន្ននូវមុខងាររបស់ព្រះរាជអាជ្ញារងឈ្មោះ គ្រី សីហា ពីអយ្យការអមសាលាដំបូងខេត្តពោធិ៍សាត់ ដើម្បីបើកផ្លូវឱ្យក្រុមអធិការរបស់ក្រសួងយុត្តិធម៌ ក៏ដូចជា សមត្ថកិច្ច ចុះធ្វើការស្រាវជ្រាវ និងចាត់វិធានការតាមច្បាប់ ចំពោះករណីដែលព្រះរាជអាជ្ញារងរូបនេះ បានសម្រេចធ្វើការដោះលែងដោយរំលោភអំណាច នូវជនល្មើសដែលមានការពាក់ព័ន្ធនឹងការឆបោកតាមប្រព័ន្ធបច្ចេកវិទ្យា និង ដែលត្រូវបានសម្រេចធ្វើការសម្រេចឃាត់ខ្លួនដោយសមត្ថកិច្ច ដើម្បីកសាងនីតិវិធីទៅតាមច្បាប់។ជាថ្មីម្តងទៀត ឯកឧត្តម ឧបនាយករដ្ឋមន្រ្តី កើត រិទ្ធ រំលឹកជាថ្មីជូនដល់ឯកឧត្តម លោកជំទាវជាប្រធានតុលាការ និង ព្រះរាជអាជ្ញាទាំងអស់ សូមប្រកាន់ខ្ជាប់នូវភាពម៉ឺងម៉ាត់ និង ការទទួលខុសត្រូវខ្ពស់ក្នុងការអនុវត្តវិធានការច្បាប់ឱ្យបានម៉ឺងម៉ាត់ ពិសេស ផ្តល់កិច្ចសហការឱ្យបានពេញលេញដល់ប្រតិបត្តិការរបស់សមត្ថកិច្ចក្នុងការបង្រ្កាបសកម្មភាពឆបោកតាមប្រព័ន្ធបច្ចេកវិទ្យានៅទូទាំងប្រទេស ស្របតាមបទបញ្ជាដ៏ខ្ពង់ខ្ពស់របស់រាជរដ្ឋាភិបាល។

សម្តេចរដ្ឋសភាធិបតី ឃួន សុដារី ៖ កិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦បានផ្លាស់ប្តូរនូវទស្សនៈយ៉ាងសកម្មក្នុងការជំរុញការទូតសភា កិច្ចសហប្រតិបត្តិការ និងភាពជាដៃគូដើម្បីប្រជាពលរដ្ឋ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ក្នុងនាមសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងក្នុងនាមសម្តេចផ្ទាល់ បានថ្លែងអំណរគុណយ៉ាងជ្រាលជ្រៅ ចំពោះគណៈប្រតិភូទាំងអស់ដែលបានអញ្ជើញ ចូលរួមនិងគាំទ្រដល់កិច្ចប្រជុំក្រុមអ្នកនយោបាយអន្តរសភាអាស៊ាន (AIPA Caucus )លើកទី១៦។ សម្តេច បានគូសបញ្ជាក់ថា ក្នុងរយៈពេលពីរថ្ងៃកន្លងមកនេះ សមាជិកអន្តរសភាអាស៊ាន(អាយប៉ា/AIPA) ប្រទេសសង្កេតការណ៍ ភ្ញៀវរបស់កម្ពុជា ក៏ដូចជាដៃគូអភិវឌ្ឍន៍នានា បានចែករំលែកបទពិសោធន៍ ទស្សនៈដោយបើកចំហ ប្រកបដោយភាពស្មោះត្រង់ជាមួយនឹងស្មារតីនៃមិត្តភាព សាមគ្គីភាព និងភាពជាដៃគូ ក្នុងការដោះស្រាយបញ្ហារួមសម្រាប់ពលរដ្ឋ។សម្តេចប្រធានរដ្ឋសភា បានលើកឡើងដូច្នេះនៅក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីលៀងសាយភោជន ជូនគណៈប្រតិភូបរទេសទំាងអស់ ដែលបានអញ្ជើញចូលរួមកិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦ ដែលសភាកម្ពុជាធ្វើជាម្ចាស់។ នៅក្នុងឱកាសនោះ សម្តេចប្រធានរដ្ឋសភា បានគូសបញ្ជាក់បន្តថាកិច្ចប្រជុំបានស្តាប់របាយការណ៍របស់ប្រទេសនីមួយៗស្តីពីវឌ្ឍនភាពនៃការអនុវត្តនូវសេចក្តីសម្រេចរបស់ អាយប៉ានិងរបាយការណ៍របស់អគ្គលេខាធិការដ្ឋានអន្តរសភាអាស៊ាន (AIPA)។ នេះពិតជាមោទនភាពបង្ហាញពីការរីកចម្រើនគួរជាទីមោទនៈ របស់អាយប៉ា។ ក្នុងពិធីលៀងសាយភោជនក្រោមបរិយាកាសរីករាយស្និទ្ធស្នាល សាមគ្គីភាព សម្តេចរដ្ឋសភាធិបតី បានបញ្ជាក់ថា “យើង បានផ្លាស់ប្តូរនូវទស្សនៈយ៉ាងសកម្មលើការជំរុញការទូតសភាដើម្បីសន្តិភាព តាមរយៈកិច្ចសហប្រតិបត្តិការ និងភាពជាដៃគូ។ លើសពីនេះទៅទៀត យើងបានឱ្យយុវជនរបស់យើងចូលរួមជាមួយ AIPA ផងដែរ តាមរយៈកម្មវិធី AIPA Roadshow ពីព្រោះសំឡេងរបស់ពួកគេមានសារៈសំខាន់ណាស់ ដើម្បីឆ្ពោះទៅរកការសម្រេចបាននូវអាស៊ានដែលផ្តោតលើប្រជាជនជាស្នូល”។សភាកម្ពុជាបានធ្វើជាម្ចាស់កិច្ចប្រជុំក្រុមអ្នកនយោបាយអាយប៉ា ពីថ្ងៃទី១៤ដល់ថ្ងៃទី១៧ ខែកក្កដា ឆ្នាំ២០២៥ នៅវិមានរដ្ឋសភា ក្រោមមូលបទ «សន្តិភាពតាមរយៈការសន្ទនា៖ មាគ៌ាឆ្ពោះទៅមុខរបស់សភា» (Peace through dialogue: The Parliamentary Path Forward) ដែលមានការអញ្ជើញចូលរួមពីសមាជិកសភាគ្រួសារអាយប៉ា (AIPA) ប្រទេសសង្កេតការណ៍ AIPA និងប្រទេសដែលជាភ្ញៀវរបស់សភាកម្ពុជា ដែលជាម្ចាស់ផ្ទះ និងដៃគូអភិវឌ្ឍន៍នានាសរុបប្រមាណជិត១០០នាក់។កិច្ចប្រជុំក្រុមអ្នកនយោបាយអាយប៉ា (AIPA Caucus) ជាកិច្ចប្រជុំសំខាន់ប្រចាំឆ្នាំមួយរបស់ AIPA ដែលសមាជិកអាយប៉ា ត្រូវប្រជុំពិភាក្សាគ្នាពិនិត្យលើវឌ្ឍនភាពនៃការអនុវត្តសេចក្តីសម្រេចដែលបានអនុម័តដោយមហាសន្និបាតអាយប៉ា កាលពីឆ្នាំកន្លងទៅ។សម្តេចរដ្ឋសភាធិបតី ឃួន សុដារី បានគូសបញ្ជាក់ថា AIPA គឺជាផ្នែកមួយនៃកិច្ចខិតខំប្រឹងប្រែងដ៏ធំ ដែលកំពុងតែមានភាពសកម្មជាងមុន មិនមែនគ្រាន់តែនិយាយប៉ុណ្ណោះទេ ប៉ុន្តែអនុវត្តសកម្មភាពជាក់ស្តែង ដើម្បីធ្វើឱ្យប្រាកដថាការសន្យានឹងក្លាយជាការពិត។ លទ្ធផលនៃកិច្ចប្រជុំ AIPA Caucus លើកទី ១៦ គឺជាជំហានឆ្ពោះទៅមុខដ៏សំខាន់ ដែលត្រូវរក្សានូវសន្ទុះនេះ។ សម្តេចមានប្រសាសន៍បន្តថា “តាមរយៈការធ្វើការយ៉ាងជិតស្និទ្ធជាមួយប្រទេស និងតំបន់ផ្សេងទៀត យើងអាចបង្កើតកម្លាំងវិជ្ជមាននៃការផ្លាស់ប្តូរកាន់តែច្រើនបន្ថែមទៀតយើងនឹងជួបជុំគ្នាម្តងទៀតនៅទីក្រុងគូឡាឡាំពួរ ប្រទេសម៉ាឡេស៊ី ដើម្បីចូលរួមមហាសន្និបាត AIPA លើកទី ៤៦ ។ ខ្ញុំជឿជាក់ថា ទស្សនៈ គំនិត និងយោបល់ដែលយើងបានចែករំលែកគ្នានៅទីនេះ នឹងជួយយើងក្នុងការតៀមរៀបចំសម្រាប់មហាសន្និបាតនាពេលខាងមុខនោះ”៕

បណ្ដាញសង្គម

ព័ត៌មានថ្មីៗ

ក្រុមហាម៉ាសបញ្ជាក់ពីការស្លាប់របស់មេបញ្ជាការយោធា ក្រោយការវាយប្រហាររបស់អ៊ីស្រាអែល

លោក Trump និងនីហ្សេរីយ៉ា អះអាងថា បានសម្លាប់មេដឹកនាំជាន់ខ្ពស់របស់រដ្ឋឥស្លាម ISIS

ប្រធានាធិបតី ទូលទៅកាន់សម្តេច ប៉ាប ថា អ៊ីរ៉ង់ «នៅតែប្តេជ្ញាចិត្តចំពោះការទូត»

ប្រមុខថាមពលអាមេរិក និយាយថា ច្រកសមុទ្រ Hormuz អាចនឹងបើកឡើងវិញ នៅចុងរដូវក្តៅ

វិមានក្រឹមឡាំង៖ លោក Putin នឹងទៅទស្សនកិច្ច នៅចិន ដើម្បីធ្វើកិច្ចពិភាក្សាជាមួយលោក Xi

គ្រូបង្រៀន នៅម៉ិកស៊ិក ជួបជុំតវ៉ាទាមទារប្រាក់ឈ្នួលខ្ពស់ និងកំណែទម្រង់ប្រាក់សោធននិវត្តន៍

កូរ៉េខាងត្បូងប្រឆាំងផែនការរបស់អ៊ីរ៉ង់ ក្នុងការគិតថ្លៃដឹកជញ្ជូន នៅច្រកសមុទ្រ Hormuz

នាយកប្រតិបត្តិក្រុមហ៊ុន Samsung ទៅជួបសហជីព ខណៈក្ដីបារម្ភពីការធ្វើកូដកម្មកើនឡើង

អ្នកពន្លត់អគ្គិភ័យស្លាប់ ខណៈ ១១នាក់រងរបួស ក្នុងហេតុការណ៍ផ្ទុះ និងមានអគ្គិភ័យនៅរោងចក្រឈើ ក្នុងរដ្ឋ Maine របស់អាមេរិក

លោក Trump និយាយសម្រាលហានិភ័យនៃជម្លោះចិន-អាមេរិក ជុំវិញបញ្ហាតៃវ៉ាន់ ក្រោយជួបជាមួយលោក Xi

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

សម្ដេចប្រធានរដ្ឋសភា៖ បារាំងគឺជាតួអង្គដ៏សំខាន់ចូលរួមចំណែកដោះស្រាយវិវាទព្រំដែនរវាងកម្ពុជា និងថៃ

ត្រឹមពាក់កណ្ដាលខែកក្កដានេះអ្នកសេដ្ឋកិច្ចក្រៅប្រព័ន្ធចុះឈ្មោះតាមថ្នាលឌីជីថលកើនដល់ជាង ១១៩ ពាន់នាក់

ពោធិ៍សាត់ក្លាយជាខេត្តទី២៣ ដែលបានបញ្ចប់ការបន្ទោបង់ពាសវាលពាសកាល(ODF)ទាំងស្រុង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

សម្ដេចប្រធានរដ្ឋសភា៖ បារាំង​គឺជាតួអង្គដ៏សំខាន់​ចូលរួម​ចំណែក​ដោះស្រាយ​វិវាទ​ព្រំដែន​រវាង​កម្ពុជា និងថៃ

ត្រឹមពាក់កណ្ដាលខែកក្កដានេះអ្នកសេដ្ឋកិច្ចក្រៅប្រព័ន្ធចុះឈ្មោះតាមថ្នាលឌីជីថលកើនដល់ជាង ១១៩ ពាន់នាក់

ពោធិ៍សាត់ក្លាយជាខេត្តទី២៣ ដែលបានបញ្ចប់ការបន្ទោបង់ពាសវាលពាសកាល(ODF)ទាំងស្រុង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្ដេចប្រធានរដ្ឋសភា៖ បារាំងគឺជាតួអង្គដ៏សំខាន់ចូលរួមចំណែកដោះស្រាយវិវាទព្រំដែនរវាងកម្ពុជា និងថៃ