នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រសួង-ស្ថាប័នចំនួន៣ ចាប់ផ្ដើមទទួលពាក្យជ្រើសរើសមន្ត្រីថ្មី ក្រោយ​ទទួល​ការ​អនុញ្ញាត​ពី​រដ្ឋាភិបាល
មន្ទីរពេទ្យគន្ធបុប្ផា អំពាវនាវដល់ពលរដ្ឋចូលរួមបរិច្ចាគឈាម ខណៈតម្រូវការឈាមកើនឡើង
គ.ស.ម.ក. ដាក់លិខិតទៅកាសែត The Wall Street Journal ឱ្យលុបពាក្យ “Scambodia” និងសុំទោសជាផ្លូវការចំពោះកម្ពុជា
មគ្គទេ្ទសក៍ទេសចរណ៍ជិត១០០នាក់ ចូលរួម​ប្រលង​ដំឡើង​កម្រិត​មគ្គទ្ទេសក៍​ទេសចរណ៍​ថ្នាក់​ជាតិ​ និងតំបន់

ព័ត៌មានជាតិ

កម្ពុជាបង្វែរការនាំចូលប្រេងឥន្ធនៈពីសិង្ហបុរី និងម៉ាឡេស៊ី ខណៈសង្គ្រាមនៅមជ្ឈិមបូព៌ាធ្វើឲ្យប៉ះពាល់សកល

2026/03/18 05:38:53 pm        436
Facebook Telegram Linkin
ភ្នំពេញ៖នៅថ្ងៃពុធ (ទី១៨ ខែមីនា ឆ្នាំ២០២៦) នេះ រដ្ឋមន្ត្រីថាមពលរបស់ប្រទេសកម្ពុជា បានប្រាប់សារព័ត៌មាន Reuters ថា កម្ពុជាកំពុងនាំចូលប្រេងឥន្ធនៈបន្ថែមទៀតពីក្រុមហ៊ុនផ្គត់ផ្គង់ នៅក្នុងប្រទេសសិង្ហបុរី និងម៉ាឡេស៊ី ដើម្បីបំពេញបន្ថែមការខ្វះខាតការផ្គត់ផ្គង់ពីវៀតណាម និងចិន ខណៈដែលសង្គ្រាមរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ធ្វើឲ្យប៉ះពាល់ដល់ការផ្គត់ផ្គង់ នៅទូទាំងពិភពលោក។ប្រហែល១ភាគ៣ នៃស្ថានីយប្រេងឥន្ធនៈនៅកម្ពុជា ក្នុងចំណោមស្ថានីយប្រេងចំនួន ៦.៣០០ ទីតាំងដែលមានប្រជាជនជិត ១៨លាននាក់ប្រើប្រាស់ បានបិទទ្វារចាប់តាំងពីថ្ងៃពុធសប្តាហ៍មុន ដោយអាជ្ញាធរកំពុងស៊ើបអង្កេតថា តើអាជីវករកំពុងស្តុកទុកស្តុក មុនពេលតម្លៃហក់ឡើងបន្ថែមទៀតដែរ ឬយ៉ាងណាលើករណីបិទទ្វានេះ។ជាមួយគ្នានេះដែរ ការនាំចូលប្រេងរបស់កម្ពុជា កើតមានឡើងស្របពេលដែលវៀតណាម និងចិន បានរឹតត្បិតការនាំចេញប្រេងឥន្ធនៈ រហូតដល់យ៉ាងហោចណាស់ចុងខែមីនា ដើម្បីទប់ស្កាត់ការខ្វះខាតក្នុងស្រុកដែលអាចកើតមាន។ រដ្ឋមន្ត្រីក្រសួងរ៉ែ និងថាមពល ឯកឧត្តម កែវ រតនៈ (Keo Rottanak) បានមានប្រសាសន៍ថា ប្រទេសកម្ពុជា កំពុងជំរុញការនាំចូលពីសិង្ហបុរី និងម៉ាឡេស៊ី ដោយសារតែការរឹតត្បិតការនាំចេញពីនៅកន្លែងផ្សេងទៀត។យ៉ាងណាក្ដី ឯកឧត្តមរដ្ឋមន្រ្ដី ក្រសួងរ៉ែ និងថាមពល ថ្លែងថា៖ «កម្ពុជានៅតែអាចនាំចូលប្រេងឥន្ធនៈក្នុងបរិមាណតិចតួចពីប្រទេសចិន។ ប៉ុន្តែដោយសារតែមានភាពជាដៃគូរឹងមាំជាមួយក្រុមផ្គត់ផ្គង់សកល Total និង Chevron ដូច្នេះអាចកាត់បន្ថយហានិភ័យមួយចំនួន»។ឯកឧត្តម កែវ រតនៈ មិនបានផ្តល់ព័ត៌មានលម្អិតអំពីពេលវេលាដែលការផ្គត់ផ្គង់ពីប្រទេសសិង្ហបុរី និងម៉ាឡេស៊ី នឹងមកដល់នោះទេ ប៉ុន្តែឯកឧត្តមបាននិយាយប្រាប់ Reuters ថា បញ្ហាស្តុកប្រេងឥន្ធនៈបច្ចុប្បន្ន គឺអាចប្រៀបធៀបទៅនឹងកម្រិតជាប្រវត្តិសាស្ត្រ។បើយោងតាម ទិន្នន័យរបស់ស្ថាប័ន Kpler បានបង្ហាញថា ការនាំចេញប្រេងសាំង និងប្រេងម៉ាស៊ូតពីប្រទេសទាំងពីរ មកកាន់ប្រទេសកម្ពុជា ក្នុងរយៈពេល ១៨ថ្ងៃដំបូងនៃខែមីនានេះ គឺខ្ពស់ជាង ២៥ភាគរយ បើធៀបនឹងរយៈពេលដូចគ្នាកាលពីឆ្នាំមុន៕

អភិបាលខេត្តកណ្ដាល ណែនាំដល់ប្រជាពលដ្ឋឱ្យមានការ​ប្រុងយ័ត្នខ្ពស់ ចំពោះការជួលកន្លែងស្នាក់ដល់ជនបរទេស

2026/03/18 05:13:44 pm        118
Facebook Telegram Linkin
ឯកឧត្តម គួច ចំរើន អភិបាលខេត្តកណ្ដាលស្នើរដល់ប្រជាពលរដ្ឋសូមមានការប្រុងប្រយ័ត្នខ្ពស់ចំពោះការជួលអគារ ផ្ទះ កន្លែងស្នាក់នៅផ្សេងៗពីសំណាក់ជនបរទេស ជាពិសេសត្រូវពិនិត្យឯកសារនានា ធ្វើកិច្ចសន្យាឱ្យបានត្រឹមត្រូវមុនពេលជួលឱ្យ ជៀសវាងការផាកពិន័យ និងត្រូវសង្កេតចាប់អារម្មណ៍ចំពោះអ្នកស្នាក់នៅជាក្រុម មានភ្ជាប់ Internet ទំហំធំៗ គួរឱ្យសង្ស័យ សូមបងប្អូនប្រជាពលរដ្ឋចូលរួមសហការផ្ដល់ព័ត៌មានមកកាន់សមត្ថកិច្ចជាបន្ទាន់ ដើម្បីមានវិធានការចុះត្រួតពិនិត្យ និងបង្ក្រាបបានទាន់ពេលវេលា។មានប្រសាសន៍ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) ចំនួន ១២,៤២៥បណ្ណ ជូនដល់ប្រជាពលរដ្ឋចំនួន ១២ភូមិ ស្ថិតនៅក្នុងស្រុកកៀនស្វាយខេត្តកណ្ដាល ដោយមានការអញ្ជើញចូលរួមពី ឯកឧត្តម ឈឿន ប៊ុណ្ណារ័ត្ន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ ឯកឧត្តម នូ សាខន ប្រធានក្រុមប្រឹក្សាខេត្ត នាព្រឹកថ្ងៃទី១៨ ខែមីនា ឆ្នាំ២០២៦នេះថា៖ អជ្ញាធរតាមមូលដ្ឋានត្រូវយកចិត្តទុកដាក់ ធ្វើការផ្សព្វផ្សាយ និងពន្យល់ណែនាំដល់ប្រជាពលរដ្ឋអំពីបញ្ហាបោកប្រាស់តាមប្រព័ន្ធបច្ចេកវិទ្យា Scam online បញ្ហាជួញដូរមនុស្សជាដើម។ ឯកឧត្តមបានអំពាវនាវដល់ឪពុកម្ដាយ អាណាព្យាបាលទាំងអស់ ត្រូវមានការប្រុងប្រយ័ត្នខ្ពស់ ចំពោះល្បិកកលនៃការបោកប្រាស់ ការលួងលោមគ្រប់រូបភាពពីជនឧក្រិដ្ឋដែលមានបំណងក្នុងការឆបោកជួញដូរមនុស្ស ករណីសង្ស័យត្រូវពិគ្រោះនិងសហការជាមួយអាជ្ញាធរ សមត្ថកិច្ចក្នុងមូលដ្ឋានរបស់ខ្លួន ដើម្បីជួយអន្តរាគមន៍ កុំបណ្ដោយឱ្យកូនចៅរបស់យើងរងគ្រោះដោយការឆបោក។  ឯកឧត្តមបានបន្ថែមថា ចំពោះបញ្ហាគ្រឿងញៀន សូមលើកទឹកចិត្តដល់បងប្អូនប្រជាពលរដ្ឋ ជាពិសេសយុវជនសូមប្រើប្រាស់កម្មវិធី App Nodrug ដើម្បីរាយការណ៍អំពីសកម្មភាពបទល្មើសគ្រឿងញៀនមកកាន់សមត្ថកិច្ច ដើម្បីបង្ក្រាបបានទាន់ពេលវេលាដោយរក្សាការសម្ងាត់ជូន។ ដោយឡែកចំពោះបញ្ហាសណ្ដាប់ធ្នាប់តាមដងផ្លូវ ក្នុងស្រុកកៀនស្វាយ ឯកឧត្តមអភិបាលខេត្ត បានស្នើដល់បងប្អូនប្រជាពលរដ្ឋសូមចូលរួមសហការ រៀបចំសណ្ដាប់ធ្នាប់តាមដងផ្លូវលើចិញ្ចើមផ្លូវ សូមបញ្ឈប់ការតយ៉ាប ការសង់រោង ការលក់ដូរលើចិញ្ចើមផ្លូវ មុនពេលអាជ្ញាធរចុះរៀបចំសណ្តាប់ធ្នាប់ និងរុះរើនាពេលខាងមុខ ការរៀបចំសណ្ដាប់ធ្នាប់តាមដងផ្លូវនេះ គឺមានសារៈសំខាន់ណាស់ ក្រុមការងារជួយសម្រួលការធ្វើចរាចរណ៍ទៅមក របស់បងប្អូនប្រជាពលរដ្ឋកាត់បន្ថយបាននូវគ្រោះថ្នាក់ចរាចរណ៍ និងលើសោភ័ណ្ឌភាពតាមដងផ្លូវ។ឯកឧត្តមអភិបាលខេត្ត ក៏បានផ្ដាំផ្ញើដល់បងប្អូនប្រជាពលរដ្ឋ នៅពេលទទួលបានបណ្ណហើយ សូមគិតគូទុកដាក់ថែរក្សាឱ្យបានល្អ ពីព្រោះបណ្ណកម្មសិទ្ធដីធ្លី គឺពិតជាមានសារៈសំខាន់ និងមានតម្លៃណាស់ ក្នុងការសម្គាល់សិទ្ធិកាន់កាប់ ការទិញលក់ បញ្ចាំដីធ្លីរបស់ខ្លួនស្របតាមច្បាប់ ធ្វើឱ្យដីមានសុវត្ថិភាព ទទួលស្គាល់ដោយអាជ្ញាធរ ជៀសផុតពីការរំលោភបំពាន កាត់បន្ថយជម្លោះ ស្របទៅតាមគោលនយោបាយរបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្រ្តី នៃព្រះរាជាណាចក្រកម្ពុជា ដែលបាន និងកំពុងអនុវត្តយ៉ាងសកម្មលើគោលនយោបាយដីធ្លី ជូនដល់ប្រជាពលរដ្ឋ ដើម្បីផលប្រយោជន៍របស់ប្រជាពលរដ្ឋយ៉ាងពិតប្រាកដ ធ្វើឱ្យដីធ្លីមានសុវត្ថិភាព និងកាត់បន្ថយវិវាទដីធ្លី។អត្ថបទ៖ សៅ យ៉ម៉ង់

ក្រសួងការងារលើកទឹកចិត្តវិស័យឯកជនអូស្ត្រាលី ពិនិត្យលទ្ធភាពបន្ថែមលើកម្មវិធីសិក្សាភាសាទៅក្នុងគ្រឹះស្ថាន TVET

2026/03/18 05:09:27 pm        83
Facebook Telegram Linkin
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកទឹកចិត្តស្ថាប័នអប់រំប្រទេសអូស្ត្រាលី ឱ្យពិនិត្យលទ្ធភាពសហការជាមួយក្រសួង បញ្ជ្រាបកម្មវិធីសិក្សាភាសាអង់គ្លេសទៅក្នុងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (ធីវ៉េត) សាធារណៈ ដើម្បីលើកកម្ពស់វិស័យ ធីវ៉េត នៅកម្ពុជាកាន់តែមានគុណភាពបន្ថែមទៀត។ក្រោយចប់ជំនួបការងារ រវាងឯកឧត្តមរដ្ឋមន្រ្តី ហេង សួរ ជាមួយលោកស្រី ប្រីជែត ខូលៀរ (Bridget Collier) ភារធារីស្ថានទូតអូស្ត្រាលីប្រចាំកម្ពុជា និងលោកស្រី ធេនណាល អូហ្សេនណេស៊ី (Tennealle O'Shannessy) នាយិការប្រតិបត្តិនៃ IDP Education និងជាអ្នកធុរកិច្ចឆ្នើមអូស្ត្រាលីប្រចាំនៅកម្ពុជា ដើម្បីផ្លាស់ប្តូរមតិយោបល់ពីការពង្រឹងកិច្ចសហប្រតិបត្តិការរវាងកម្ពុជា និងអូស្ត្រាលីក្នុងការអភិវឌ្ឍជំនាញវិជ្ជាជីវៈ (TVET) ការបណ្តុះបណ្តាលភាសាអង់គ្លេស និងការជំរុញទំនាក់ទំនងធុរកិច្ចរវាងប្រទេសទាំងពីរ កាលពីរសៀលថ្ងៃទី១៧ មីនា ឆ្នាំ២០២៦កន្លងទៅ ក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ក្នុងជំនួបនេះ ឯកឧត្តមរដ្ឋមន្ត្រី បានលើកឡើងនូវគំនិតផ្តួចផ្តើមជាយុទ្ធសាស្ត្រ ដោយលើកទឹកចិត្តឱ្យស្ថាប័ន IDP Education ពិសេសតាមរយៈសាលា ACE ពិនិត្យលទ្ធភាពសហការជាមួយក្រសួង ដើម្បីបញ្ជ្រាបកម្មវិធីសិក្សាភាសាអង់គ្លេសទៅក្នុងគ្រឹះស្ថាន TVET សាធារណៈ។ តាមរយៈកិច្ចសហការនេះ សាលា ACE អាចប្រើប្រាស់ទីតាំងរបស់រដ្ឋ ដើម្បីផ្តល់ការបណ្តុះបណ្តាលភាសាអង់គ្លេសប្រកបដោយគុណភាព ក្នុងតម្លៃមួយដ៏សមរម្យ ដែលផ្តល់ប្រយោជន៍យ៉ាងធំធេងដល់យុវជន និងសិស្សានុសិស្សផ្នែកបច្ចេកទេសបន្ថែមទៀតផងដែរ។ឯកឧត្តម ក៏បានស្នើឱ្យស្ថាប័ន IDP ជួយសម្របសម្រួល និងបើកផ្លូវបន្ថែមទៀត ក្នុងការបញ្ជូនសិក្ខាកាម ឬបុគ្គលិកក្រុមហ៊ុនកម្ពុជា ទៅសិក្សាវគ្គបណ្តុះបណ្តាលជំនាញបច្ចេកទេសរយៈពេលខ្លីនៅប្រទេសអូស្ត្រាលី ដើម្បីរួមចំណែកពង្រឹងសមត្ថភាពកម្លាំងពលកម្មកម្ពុជាឱ្យស្របតាមស្តង់ដាអន្តរជាតិ។ ឯកឧត្តម បានចែករំលែកបន្ថែមអំពីចក្ខុវិស័យរបស់ក្រសួង ក្នុងការរៀបចំដាក់ឱ្យអនុវត្តនូវ «ប្រព័ន្ធកម្មសិក្សាការងារ (Apprenticeship)» តាមគំរូនៃប្រព័ន្ធ TAFE របស់ប្រទេសអូស្ត្រាលី ដែលជាទម្រង់ “រៀនផង ធ្វើការផង” ( Earn and Learn) ដោយធានាបាននូវការការពារសិទ្ធិ និងផលប្រយោជន៍របស់សិក្ខាកាមយ៉ាងពេញលេញ។ជាការឆ្លើយតប លោកស្រី ធេនណាល អូហ្សេនណេស៊ី បានសម្តែងការគាំទ្រយ៉ាងពេញទំហឹងចំពោះគំនិតផ្តួចផ្តើមដ៏ខ្ពង់ខ្ពស់របស់ ឯកឧត្តមរដ្ឋមន្ត្រី និងបានសន្យាថានឹងចាត់ឱ្យក្រុមការងារបច្ចេកទេសនៃសាលា ACE ជួបពិភាក្សាលម្អិតបន្ថែមលើកិច្ចការងារនេះ។ លោកស្រីបានកោតសរសើរយ៉ាងខ្លាំងចំពោះការរីកចម្រើននៃវិស័យ TVET នៅកម្ពុជា ពិសេសនវានុវត្តន៍ឌីជីថលនៅ អេស ខេមបូឌា ដែលទើបសម្ពោធកាលពីថ្ងៃទី១៦ ខែមីនានេះ ដោយលោកស្រីបានចាត់ទុកថាជាគំរូដ៏ល្អមួយសូម្បីតែសម្រាប់ស្ថាប័ននៅប្រទេសអូស្ត្រាលី។ក្រៅពីវិស័យអប់រំ ឯកឧត្តម ហេង សួរ បានលើកទឹកចិត្តឱ្យលោកស្រីក្នុងនាមជាតំណាងធុរកិច្ចអូស្ត្រាលី ជួយជំរុញភាពសកម្មរបស់សភាពាណិជ្ជកម្មអូស្ត្រាលីប្រចាំកម្ពុជា ដើម្បីធ្វើជាស្ពានផ្សារភ្ជាប់ និងទាក់ទាញវិនិយោគិនអូស្ត្រាលី ព្រមទាំងសហគមន៍ខ្មែរ-អូស្ត្រាលី ឱ្យមកបណ្តាក់ទុននៅកម្ពុជាឱ្យកាន់តែច្រើនឡើងបន្ថែមទៀត៕អត្ថបទ៖ ឈិត បូរ៉ាវី 

ធនាគារពិភពលោកបន្តកិច្ចសហប្រតិបត្តិការជួយកម្ពុជាដើម្បីឈានទៅសម្រេចចក្ខុវិស័យឆ្នាំ២០៥០

2026/03/18 05:02:13 pm        99
Facebook Telegram Linkin
ធនាគារពិភពលោកត្រៀមខ្លួនបន្តកិច្ចសហប្រតិបត្តិការ តាមរយៈការផ្តល់ជំនួយបច្ចេកទេស និងចែករំលែកបទពិសោធន៍អន្តរជាតិ ដើម្បីគាំទ្រកម្ពុជា ក្នុងការកែលម្អគោលនយោបាយ សមត្ថភាពស្ថាប័ន និងការងារអាទិភាព សម្រាប់ឈានឆ្ពោះទៅសម្រេចចក្ខុវិស័យ កម្ពុជាឆ្នាំ២០៥០។ ឯកឧត្តម Carlos Felipe Jaramillo អនុប្រធានធនាគារពិភពលោកទទួលបន្ទុកតំបន់អាស៊ីខាងកើត និងប៉ាស៊ីហ្វិក និង សហការី ក្នុងដំណើរបេសកកម្មនៅប្រទេសកម្ពុជា ក្នុងជំនួបជួបពិភាក្សាការងារ ជាមួយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៦ ខែមីនា ឆ្នាំ២០២៦, តំណាងធនាគារពិភពលោករូបនេះ បានលើកឡើងអំពីការប្តេជ្ញាចិត្តរបស់ធនាគារពិភពលោក ក្នុងការបន្តកិច្ចសហប្រតិបត្តិការ និងគាំទ្រដល់កម្ពុជា ដើម្បីរួមចំណែកក្នុង ដំណើរឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ តាមរយៈក្របខ័ណ្ឌថ្មី នៃកិច្ចសហប្រតិបត្តិការភាពជាដៃគូរវាងរាជរដ្ឋាភិបាល កម្ពុជា (CPF) ជាមួយធនាគារពិភពលោកឆ្នាំ២០២៥-២០២៩ រួមមាន៖ ១. ការអភិវឌ្ឍមូលធនមនុស្ស, ២. ការពង្រីកភាពប្រកួត ប្រជែងសម្រាប់ការងារល្អប្រសើរ និង៣.ការពង្រឹងភាពធន់សម្រាប់ប្រជាជនងាយរងគ្រោះ ។  ឯកសារ CPF ឆ្នាំ២០២៥-២០២៩ ត្រូវបានអនុម័តជាផ្លូវការពីក្រុមប្រឹក្សាភិបាលនាយកប្រតិបត្តិ នៃធនាគារពិភពលោក ក្រោមកិច្ចសហការ រៀបចំយ៉ាងជិតស្និទ្ធ ជាមួយក្រសួង-ស្ថាប័នរបស់រាជរដ្ឋាភិបាល ព្រមទាំងបណ្តាភាគីពាក់ព័ន្ធដ៏ទៃទៀត ស្របតាម យុទ្ធសាស្ត្របញ្ចកោណ-ដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ និងតម្រូវការជាអាទិភាពរបស់កម្ពុជា។ ក្នុងជំនួបនោះ, ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី ក៏បានគូសបញ្ជាក់ផងដែរ អំពីទិសដៅការងារក្នុងវិស័យ អាទិភាពមានជាអាទិ៍៖ វិស័យអភិវឌ្ឍន៍ជំនាញ និងអប់រំ, វិស័យដឹកជញ្ជូន, និងវិស័យអាទិភាពផ្សេងៗទៀត ដែលធ្វើឱ្យប្រសើរឡើង នូវបរិយាកាសវិនិយោគ និងកិច្ចសម្រួលពាណិជ្ជកម្ម ដើម្បីលើកកម្ពស់ភាពប្រកួតប្រជែង ផលិតភាព និងពិពិធកម្មសេដ្ឋកិច្ច ព្រមទាំង ដើម្បីអាចទាញយកប្រយោជន៍ពីកិច្ចព្រមព្រៀងពាណិជ្ជកម្មសេរីនានា។ឯកឧត្តមអគ្គបណ្ឌិតសភាចារ្យ បានលើកឡើងបន្ថែមពីតម្រូវការចាំបាច់ ក្នុងការចាត់វិធានការឲ្យបានឆាប់រហ័ស និងមាន ប្រសិទ្ធិភាព តាមរយៈការបណ្តុះបណ្តាលជំនាញ ក៏ដូចជាធនធានហិរញ្ញវត្ថុសមស្រប គាំទ្រដល់សហគ្រាសធុនតូច និងមធ្យម (SMEs) សហគ្រាសធុនមីក្រូ និងមធ្យម (MSMEs) និងលើកកម្ពស់សកម្មភាពសេដ្ឋកិច្ចក្រៅប្រព័ន្ធ, បង្កើតសហគ្រាសក្នុងមូលដ្ឋាន ដែលបង្កលក្ខណៈឲ្យប្រជាពលរដ្ឋអាចបង្កើតការងារ និងមុខរបរអាជីវកម្មដោយខ្លួនឯង ដើម្បីស្រូបយកកម្លាំងពលកម្មយុវជន និង កម្លាំងពលកម្មដែលវិលត្រឡប់មកវិញពីប្រទេសថៃ៕អត្ថបទ៖ សុន រ៉ាឌី

ក្រសួងធម្មការ និងសាសនា បន្តផ្សព្វផ្សាយ «នាទីព្រះពុទ្ធសាសនាផ្សារភ្ជាប់នឹងសង្គម» លើកទី​៣២៤

2026/03/18 04:57:55 pm        166
Facebook Telegram Linkin
ឯកឧត្តម ហាក់ ប៊ុនធឿន រដ្ឋលេខាធិការតំណាងដ៏ខ្ពង់ខ្ពស់ឯកឧត្តម ចាយ បូរិន រដ្ឋមន្រ្តី​ក្រសួង​ធម្មការ ​និង​សាសនា បានអញ្ជើញបើកកម្មវិធីនាទីព្រះពុទ្ធសាសនាផ្សារភ្ជាប់ នឹងសង្គម​លើក​ទី​៣២៤​ ស្មើនឹង ១០៩៧មាតិកាព្រះធម៌ នៅទីស្តីក្រសួង នារសៀលថ្ងៃទី១៨ ខែមីនា ឆ្នាំ២០២៦​នេះ​។លោក កែវ ហេង ប្រធាននាយកដ្ឋានស្រាវជ្រាវពុទ្ធសាសនាផ្សារភ្ជាប់សង្គម បានលើកឡើងថា ការ​សម្តែងព្រះធម៌ទេសនានេះ ពិតជាបានចូលរួមចំណែកយ៉ាងធំធេងដល់ការអប់រំក្នុងសង្គម ក្នុង​នោះ​រួម​មាន៖១-ព្រះធម៌ទេសនាជួយអប់រំទូន្មាន កូនខ្មែរគ្រប់រូបឱ្យប្រកាន់ខ្ជាប់នូវអំពើល្អ សីលធម៌ គុណធម៌ ចរិយាធម៌ សេចក្តីថ្លៃថ្នូរនៅក្នុងសង្គម, ២-បង្ការការរីករាលដាលមេរោគអេដស៍ និង​ជំងឺ​អេដស៍​, ​៣-ចៀសផុតពីគ្រឿងញៀន គ្រឿង ស្រវឹង ពីការជួញដូរមនុស្ស, ៤-ចៀស​ផុត​ពី​អំ​ពើ​ហឹង្សា​ក្នុង​គ្រួសារ និងក្នុងសង្គម, ៥-បង្ការគ្រោះថ្នាក់ចរាចរណ៍, ៦-ទីក្រុងស្អាត រមណីយ​ដ្ឋាន​ស្អាត​ សេវាល្អ និងបដិសណ្ឋារកិច្ចល្អ, ៧-រួមចំណែករក្សា ភូមិ-ឃុំ-មានសុវត្ថិភាព, ៨-អក្ខរកម្ម​ឆ្ពោះ​ទៅ​រកការសិក្សាពេញមួយជីវិត, ៩-ការចិញ្ចឹមកូនបែបវិជ្ជមាន និង១០-ជួយ​ផ្សព្វ​ផ្សាយ​ពី​ហានិភ័យ ​ដែលកើតឡើងពីផ្សែងធូប ផ្សែងភ្លើងទៀន ធ្វើយ៉ាងណាឱ្យពួកគាត់កាត់បន្ថយ ព្រោះ​បង្ក​គ្រោះ​ថ្នាក់​ដល់​សុខភាពខ្លាំងណាស់។ ឯកឧត្តម ហាក់ ប៊ុនធឿន បានសង្កត់ធ្ងន់ថា កម្មពិធីផ្សព្វផ្សាយ នាទីព្រះពុទ្ធសាសនា​ផ្សារ​ភ្ជាប់​នឹង​សង្គម​ ត្រូវបានបង្កើតឡើងតាមគំនិតផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា អតីតនាយករដ្ឋមន្រ្តី នៃព្រះរាជាណាចក្រកម្ពុជា និង​សម្តេច​កិត្តិ​ព្រឹទ្ធ​បណ្ឌិត​ ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាលពីឆ្នាំ២០០៩។ ចាប់​តាំង​ពី​ការ​បង្កើត​កម្ម​វិធីផ្សព្វផ្សាយនាទីព្រះពុទ្ធសាសនាផ្សារភ្ជាប់ នឹងសង្គមនេះមក។ កម្មវិធីនេះ​ទទួល​បាន​ការ​អបអរ​សាទរទាំងផ្នែកពុទ្ធចក្រ និងអាណាចក្រ ក៏ដូចជាមានការចូលរួម និងអបអរ​សាទរ​របស់​ប្រជា​ពលរដ្ឋ លោកគ្រូ អ្នកគ្រូ មន្រ្តីរាជការ និងសិស្សានុសិស្សនៅ​ទូទាំង​ប្រទេស​យ៉ាង​អធិក​អធម​។ ជាពិសេសជាងនេះទៅទៀត នៅក្នុងអាណត្តិរាជរដ្ឋាភិបាលទី៧ នៃរដ្ឋសភា ក្រោម​ការ​ដឹក​នាំ​ចង្អុល​បង្ហាញ​ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជា​ណា​ចក្រ​កម្ពុជា​ កម្មវិធីនេះក៏ត្រូវបានបន្តអនុវត្ត និងផ្សព្វផ្សាយជាបន្តបន្ទាប់ ហើយ​ទទួល​បាន​ការ​គាំទ្រ​យ៉ាង​ច្រើនពីសំណាក់ប្រជាពលរដ្ឋ។ ក្រោមការចង្អុលបង្ហាញរបស់ឯកឧត្តមបណ្ឌិត រដ្ឋមន្រ្តី ចាយ បូរិន បានអនុញ្ញាតឲ្យអគ្គនាយកដ្ឋានកិច្ចការសាសនា នៃក្រសួងធម្មការ និងសាសនា សហការ​ជាមួយអគ្គនាយកដ្ឋានទូរទស្សន៍ វិទ្យុរដ្ឋ និងឯកជន បាននិងកំពុង​បន្ត​រៀប​ចំ​ដឹក​នាំ​ផ្សព្វ​ផ្សាយ ​ដើម្បីបញ្ជ្រាបការយល់ដឹង អប់រំទូន្មានដល់កុលបុត្រខ្មែរ ដើម្បីឱ្យប្រកាន់ភ្ជាប់នូវអំពើល្អ សទ្ធា​ជ្រះ​ថ្លា យកព្រះធម៌ជាគោលមកពិចារណាអ្វីមួយដោយធម៌ ពិសេសទូន្មានសិស្ស និស្សិត​ឱ្យ​ស្គាល់​នូវ​បុណ្យ បាប និងត្រូវយកចិត្តទុកដាក់ខិតខំប្រឹងប្រែងរៀនសូត្រ។សូមជម្រាបជូនថា នាទីព្រះពុទ្ធសាសនាផ្សារភ្ជាប់នឹងសង្គមលើកទី៣២៤ ស្មើនឹង១០៩៧ មាតិកា​ព្រះធម៌ នាឱកាសនេះ មានការនិមន្តសម្តែងព្រះធម៌ទេសនា ដោយព្រះបវរសត្ថា ហួរ សារិទ្ធិ, ព្រះមហាជយបណ្ឌិត លាង សុវណ្ណ, ព្រះមហាធម្មធរោ ឡុង ចក់ និងមាន​ការ​អញ្ជើញ​ចូល​រួម​ពីឯកឧត្តម លោកជំទាវ មន្រ្តីរាជការ លោក លោកស្រី លោកគ្រូ អ្នកគ្រូ តាជី យាយជី សីលវ័ន សីល​វត្តី​ និងសិស្សានុសិស្សយ៉ាងច្រើនកុះករ៕ អត្ថបទ រដ្ឋា 

ACU ឃាត់ខ្លួនមនុស្ស៣នាក់ជាប់សង្ស័យពីបទរំលោភអំណាច មានទ្រព្យសម្បត្តិដោយខុសច្បាប់ និងមិនប្រកាសទ្រព្យសម្បត្តិ និងបំណុល និងសមគំនិតក្នុងអំពើរំលោភអំណាច

2026/03/18 04:57:13 pm        8848
Facebook Telegram Linkin
អង្គភាពប្រឆាំងអំពើពុករលួយ (ACU) ឃាត់ខ្លួនមនុស្សចំនួន ៣នាក់ និងបានបញ្ជូនសំណុំរឿងទៅសាលាដំបូងរាជធានីភ្នំពេញ ដើម្បីចាត់វិធានការតាមផ្លូវច្បាប់ពាក់ព័ន្ធនឹងករណីជាប់សង្ស័យពីបទ រំលោភអំណាច មានទ្រព្យសម្បត្តិដោយខុសច្បាប់ និងមិនប្រកាសទ្រព្យសម្បត្តិ និងបំណុល និងសមគំនិតក្នុងអំពើរំលោភអំណាច។លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានប្រាប់ BTV នៅរសៀលថ្ងៃទី១៨ ខែមីនា នេះថា ៖ កាលពីថ្ងៃទី១៦ ខែមីនា ឆ្នាំ២០២៦ អង្គភាពប្រឆាំងអំពើពុករលួយ បានបញ្ជូនសំណុំរឿង ដែលមានជនសង្ស័យ ៣រូប មានដូចជា៖១. ឈ្មោះ ជឹម អូន ភេទប្រុស អាយុ ៣៨ ឆ្នាំ ជាមន្រ្តីនាយកដ្ឋានស៊ើបអង្គេត និងចារកម្ម នៃអង្គភាពប្រឆាំងអំពើពុករលួយ ជាប់សង្ស័យពីបទ រំលោភអំណាច មានទ្រព្យសម្បត្តិដោយខុសច្បាប់ និងមិនប្រកាសទ្រព្យសម្បត្តិ និងបំណុល។២. ឈ្មោះ ជឹម សុខជឿន ភេទប្រុស អាយុ ៣២ ឆ្នាំ ជាជំនួយការ ជឹម អូន ជាប់សង្ស័យពីបទ សមគំនិតក្នុងអំពើរំលោភអំណាច ។៣. ឈ្មោះ ភេន រចនា ភេទស្រី អាយុ ៣៦ ឆ្នាំ អតីតមន្រ្តីជាប់កិច្ចសន្យា នៃនាយកដ្ឋានរដ្ឋបាលនិងហិរញ្ញវត្ថុ នៃអង្គភាពប្រឆាំងអំពើពុករលួយ ជាប់សង្ស័យពីបទ សមគំនិតក្នុងអំពើរំលោភអំណាច៕ អត្ថបទ៖ វង្ស សុភាព​

រាជរដ្ឋាភិបាល កំពុងបន្តកិច្ចសហការល្អជាមួយប្រទេសនាំចូល ដើម្បីធានា​ដល់ការផ្គត់ផ្គង់​ប្រេងឥន្ធនៈ​នៅកម្ពុជា

2026/03/18 03:34:47 pm        297
Facebook Telegram Linkin
អ្នកនាំពាក្យក្រសួងពាណិជ្ជកម្ម ថ្លែងថា ជុំវិញបញ្ហាប្រេងឥន្ធនៈនេះ រាជរដ្ឋាភិបាល បាន​និង​កំពុង​ខិត​ខំ​ប្រឹងនូវគ្រប់មធ្យោបាយ និង ពិនិត្យនូវគ្រប់លក្ខខណ្ឌចាំបាច់នានា ជាពិសេស​ការ​បន្ត​កិច្ច​សហការ​ល្អ​ជាមួយបណ្តាប្រទេសដែលផ្គត់ផ្គង់ ដើម្បីធានានូវលទ្ធភាពផ្គត់ផ្គង់ ប្រេងឥន្ធនៈ​សម្រាប់​​ប្រជាជនកម្ពុជា។ ឯកឧត្តម ប៉ែន សុវិជាតិ អ្នកនាំពាក្យនិងជារដ្ឋលេខាធិការក្រសួងពាណិជ្ជកម្ម ថ្លែងប្រាប់ BTV ស្តីពី​ទីផ្សារប្រេងឥន្ធនៈលើ ពិភពលោក និងការផ្គត់ផ្គងប្រេងឥន្ធនៈនៅកម្ពុជា នេះថា ជុំវិញ​ការ​ផ្ទុះ​ឡើ​​ងសង្គ្រាមនៅតំបន់មជ្ឈិមបូព៌ា បច្ចុប្បន្ន ប្រទេសអ៊ីរ៉ង់បាន កំពង់​បន្ត​វាយ​ប្រហារ​រោង​ចក្រ​ចម្រាញ់​ប្រេង​នៅមជ្ឈិមបូព៌ាមួយចំនួន ដែលផ្គត់ផ្គង់ប្រេងឥន្ធនៈដល់ប្រទេសសឹង្ហបុរី និងស្រប​ពេល​ច្រក​ សមុទ្រ HORMUZ ដែលប្រទេសអ៊ីរ៉ង់កាន់កាប់ នៅកំពុងមានភាពតានតឹងនៅឡើយ ដែល​បញ្ហានេះធ្វើឱ្យនិន្នាការប្រេងឥន្ធនៈបន្ត ឡើងថ្លៃ។ឯកឧត្តម បន្តថា ជុំវិញបញ្ហានេះ រាជរដ្ឋាភិបាល​កម្ពុជា​បាន​និង​កំពុង​បន្ត​ខិតខំ​ប្រឹង​ប្រែង​នូវ​គ្រប់​មធ្យម​បាយ ​ត្រួតពិនិត្យនូវ លក្ខខណ្ឌចាំបាច់ទាំងអស់ ដើម្បីជួយដល់កា​រ​ប្រើប្រាស់​របស់​ប្រជា​ពលរដ្ឋ​ ជាពិសេសការប្រើប្រាស់ក្នុងផលិតកម្ម និងកសិករ ឱ្យទទួល បានតម្លៃសមសម្យ ជាក់​ស្តែង​រាជ​រដ្ឋាភិបាលបានបន្ថយ ៦,៥ សេនដុល្លារក្នុងមួយលីត្រ (សម្រាប់​ប្រេង​គណនា​លក់​រាយ​)។​ បច្ចុប្បន្ន ខណៈដែលតម្លៃប្រេងឥន្ធនៈទិញចូលលើសពី ៩០ ដុល្លារ សម្រាប់ប្រេង​សាំង​ក្នុង​មួយ​បារ៉ែល ​និងលើសពី ១០០ ដុល្លារសម្រាប់ម៉ាស៊ូត រាជរដ្ឋាភិបាលបានបន្ថែម ១សេន ដុល្លារ ក្នុង​មួយលីត្រទៀត ដើម្បីសម្រាលបន្ទុករបស់ប្រជាពលរដ្ឋ។ឯកឧត្តម បន្ថែមឱ្យដឹងថា ជុំវិញបញ្ហាប្រេងឥន្ធនៈនេះ រាជរដ្ឋាភិបាលខិតខំប្រឹងនូវគ្រប់មធ្យោបាយ និង​ពិនិត្យនូវគ្រប់លក្ខខណ្ឌចាំបាច់ នានា ជាពិសេស​ការ​បន្តកិ​ច្ច​សហការ​ល្អ​ជា​មួយ​បណ្តា​ប្រទេស​ដែល​ផ្គត់​ផ្គង់ ដើម្បីធានានូវលទ្ធភាពផ្គត់ផ្គង់ប្រេងឥន្ធនៈសម្រាប់ប្រជាជន កម្ពុជា ព្រោះកម្ពុជា​មាន​តម្រូវ​ការ​ប្រេង​ច្រើន ជាក់ស្តែងនៅក្នុងរយៈពេល២ខែ ដើមឆ្នាំ២០២៦នេះ កម្ពុជាបាននាំចូល​ប្រេង​សាំង និងម៉ាស៊ូតសរុបជាង ៦០០ លានលីត្រ ដែលនេះគឺជាទំហំដ៏ធំមួយ ដែលបាន​កើត​ឡើង​ក្រោម​កិច្ចសហការល្អជាមួយប្រទេសដែល មានកិច្ចសន្យាដូចជា ប្រទេសសឹង្ហបុរី, ម៉ាឡេស៊ី វៀតណាម និងប្រទេសចិន បច្ចុប្បន្ននៅតែបន្តផ្តល់ដល់ការផ្គត់ផ្គង់ប្រេងឥន្ធនៈដល់ ទីផ្សារកម្ពុជា ទោះបី​ស្ថិតក្នុងកាលៈទេសៈលំបាកនេះក៏ដោយ។ទាក់ទិនបញ្ហាប្រេងឥន្ធនៈនេះដែរ, ឯកឧត្តម ប៉ែន សុវិជាតិ បានអំពាវ​នាវ​ដល់​បង​ប្អូន​ប្រជា​ពលរដ្ឋ​, អ្នកប្រកបអាជីវកម្ម និងកសិករ សូមជឿជាក់លើរាជរដ្ឋាភិបាល ក្នុងកា​រ​ដោះ​ស្រាយ​ប​ញ្ហា​ទាំង​អស់​នេះ ​ដោយរាជរដ្ឋាភិបាលនឹងបន្តកិច្ចការជាជំហ៊ានៗ ពិនិត្យ និងដោះស្រាយ​លទ្ធភាព​ស្វែង​រក​ប្រភព​ប្រេង ​ក៏ដូចជាការក្សាតម្លៃសមស្របដល់បងប្អូនផងដែរ។ សូមបញ្ជាក់ថា ជុំវិញតម្លៃប្រេងសាំងនេះ នៅថ្ងៃទី១៧ ខែមីនា ម្សិលមិញនេះ ក្រសួង​ពាណិជ្ជ​កម្ម​បាន​ជូន​ដំណឹង តម្លៃលក់រាយប្រេង ឥន្ធនៈ នៅព្រះរាជាណាចក្រកម្ពុជា ក្នុងនោះប្រេង​សាំង​មាន​តម្លៃ ​៥,៥០០ រៀល និងម៉ាស៊ូត ៦,៥៥០ រៀល/លីត្រ៕ អត្ថបទ៖ សុន រ៉ាឌី

អគ្គលេខាធិការរងសមាគមអតីតយុទ្ធជន ដឹកនាំកិច្ច​ប្រជុំពិនិត្យ​របាយការណ៍​ត្រៀម​សម្រាប់​មហា​សន្និបាត​សហព័ន្ធ​អតីតយុទ្ធជនបណ្តា​ប្រទេសអាស៊ាន-VECONAC ២០២៦

2026/03/18 02:56:03 pm        166
Facebook Telegram Linkin
នៅព្រឹក​ថ្ងៃទី១៨ ខែមីនា ឆ្នាំ២០២៦ ឯកឧត្តម នាយឧត្តមសេនីយ៍ មាស សាវ៉ន អគ្គ​លេខា​ធិការ​រង​ប្រចាំការ​សមាគមអតីតយុទ្ធជន និងនិវត្តជនកម្ពុជា (អ.ន.ក) និងជាអគ្គលេខាធិការ សហព័ន្ធ​អតីត​យុទ្ធជ​នបណ្តា​ប្រទេស​អាស៊ាន ​(VECONAC) បានអញ្ជើញដឹកនាំកិច្ចប្រជុំពិនិត្យ របាយ​ការណ៍ វឌ្ឍនភាពការងារ​ត្រៀម​សម្រាប់​មហា​សន្និបាត​សហព័ន្ធ​អតីត​យុទ្ធជន​បណ្តា​ប្រទេស​អាស៊ាន​លើក​ទី​២៥ ដែលសមាគមអតីតយុទ្ធជន និងនិវត្តជនកម្ពុជា ធ្វើជាប្រធានប្តូរវេន និងជា​ម្ចាស់​ផ្ទះ​។ កិច្ចប្រជុំនាព្រឹកនេះមានការចូលរួមពីប្រធាន និងសមាជិកក្រុមការងារទាំង៦ នៃ​លេខា​ធិការ​ដ្ឋាន VECONAC ដែលប្រព្រឹត្តទៅនៅសាលប្រជុំ អ.ន.ក.។ ឯកឧត្តម គីម សុផារុន អគ្គលេខាធិការរង អ.ន.ក. និងជាប្រធានលេខាធិការដ្ឋាន VECONAC ឆ្នាំ ២០២៦​ បានមានប្រសាសន៍ស្វាគមន៍ និងរាយការណ៍សង្ខេបពីវឌ្ឍនភាពការងារ និង​ទិស​ដៅ​អនុវត្ត​របស់លេខាធិការដ្ឋាន VECONAC ជូនឯកឧត្តម នាយឧត្តមសេនីយ៍ មាស សាវ៉ន អគ្គ​លេខា​ធិការ​រងប្រចាំការ អ.ន.ក និងជាអគ្គលេខាធិការ VECONAC។ក្នុងកិច្ចប្រជុំនេះ ប្រធានក្រុមការងារទាំង៦ នៃលេខាធិការដ្ឋាន VECONAC បាន​រាយ​ការណ៍​ពី​ការងារ​សម្រេច​បានតាមផ្នែក និងបញ្ហាប្រឈម​នានា​ទាក់​ទង​នឹង​ការងារ​ត្រៀម​រៀប​ចំ​មហា​សន្និបាត​សហព័ន្ធអ​តីតយុទ្ធជនបណ្តាប្រទេសអាស៊ានលើកទី២៥ នាពេលខាងមុខ ជូន​ឯក​ឧត្តម​អគ្គ​លេខា​ធិការ VECONAC ជ្រាប និងផ្ដល់យោបល់បន្ថែម។បន្ទាប់​ពី​ស្តាប់ការរាយការណ៍របស់ប្រធានលេខាធិការដ្ឋាន និងប្រធានក្រុមការងារទាំង៦ រួច ឯកឧត្តម នាយឧត្តមសេនីយ៍ មាស សាវ៉ន អគ្គលេខាធិការរង ប្រចាំការ អ.ន.ក និងជា​អគ្គ​លេខា​ធិការ ​VECONAC បានថ្លែង កោតសរសើរដល់ប្រធាន និងសមាជិក​នៃ​លេខា​ធិការ​ដ្ឋាន​ទាំង​អស់​ដែល​បាន​ខិតខំធ្វើការងារនានាដើម្បីត្រៀមរៀបចំមហាសន្និបាតនាពេលខាងមុខ និង​បាន​សម្រេច​ឯកភាព​ គម្រោង និងផែនការមួយចំនួនរបស់ប្រធានក្រុមទាំង៦ ដែលរៀបចំ និងត្រៀមរៀបចំ។ អគ្គ​លេខាធិការ VECONAC ឯកឧត្តម នាយឧត្តមសេនីយ៍ មាស សាវ៉ន បន្ថែមថា លេ​ខា​ធិការ​ដ្ឋាន​ និងក្រុមការងារទាំង៦ ត្រូវអនុវត្តតាមសេចក្តីសម្រេច និងអនុសាសន៍របស់ឯកឧត្តម កិត្តិ​សង្គ​ហ​បណ្ឌិត គន់ គីម ប្រធានប្តូរវេន VECONAC ទាំង៩ចំនុចដែលបានដាក់ជូនកន្លងមក និង​ត្រូវ​ធ្វើ​បច្ចុប្បន្នភាពរបាយការណ៍ការងារក្រុមទាំងអស់ ជាពិសេសរបាយការណ៍ហិរញ្ញវត្ថុ ក្នុង​កិច្ច​ដំណើរ​ការ​រៀបចំ​មហា​សន្និបាត​នា​ពេល​ខាង​មុខ​ទៅ​ក្រុម​ការងារ​ហិរញ្ញ​វត្ថុ​នៃ​លេខា​ធិការ​ដ្ឋាន​ដើម្បី​ប្រមូល​រៀប​ចំ​ដាក់ជូន ឯកឧត្តម កិត្តិសង្គហបណ្ឌិត គន់ គីម ប្រធានប្តូរវេន VECONAC ពិនិត្យ និង​សម្រេច។សូមបញ្ជាក់ថា សមាគមអតីតយុទ្ធជន និងនិវត្តជនកម្ពុជា នឹងធ្វើជាម្ចាស់ផ្ទះរៀបចំ មហា​សន្និបាត​សហព័ន្ធ​អតីត​យុទ្ធជនបណ្តាលប្រទេសអាស៊ាន(VECONAC) លើកទី២៥ នាខែតុលា ឆ្នាំ​២០២៦​ ខាងមុខ។ នេះគឺជាព្រឹត្តិការណ៍អន្តរជាតិដ៏សំខាន់មួយ ដែលបង្ហាញពីការចូលរួមរបស់ កម្ពុជា​ ក្នុងកិច្ចសហប្រតិបត្តិការក្នុងតំបន់ រួមចំណែកដល់សន្តិភាព ស្ថិរភាព សុខដុមរមនា ការ​អភិវឌ្ឍ​ និងលើកកម្ពស់សុខុមាលភាពអតីតយុទ្ធជន និងនិវត្តជនកម្ពុជា និងពិភពលោក៕

អ្នកនាំពាក្យក្រសួងពាណិជ្ជកម្ម៖ សង្គ្រាមនៅមជ្ឈិមបូព៌ាមិនប៉ះពាល់ការធ្វើពាណិជ្ជកម្មកម្ពុជា-អេមីរ៉ាតអារ៉ាប់រួមទេ

2026/03/18 02:12:13 pm        192
Facebook Telegram Linkin
អ្នកនាំពាក្យក្រសួងពាណិជ្ជកម្ម ថ្លែងថា ការផ្ទុះឡើងសង្គ្រាមនៅតំបន់មជ្ឈិមបូព៌ា មិន​មាន​ការ​ប៉ះ​ពាល់​ដល់​ការធ្វើពាណិជ្ជកម្មរវាង កម្ពុជា ជាមួយអេមីរ៉ាតអារ៉ាប់រួមនោះទេ ខណៈ​បច្ចុប្បន្ន​បាន​និង​កំពុង​ដំណើរ​ល្អ នឹងនៅពេលខាងមុខការធ្វើអាពាណិជ្ជកម្មរវាងភាគីទាំង ពីរ នឹងលេច​ឡើង​នូវ​ប្រភេទ​ពាណិជ្ជ​កម្មសេវា និងពាណិជ្ជកម្មតាមប្រព័ន្ធអេឡិចត្រូនិច។ឯកឧត្តម ប៉ែន សុវិជាតិ អ្នកនាំពាក្យនិងជារដ្ឋលេខាធិការក្រសួងពាណិជ្ជកម្ម បានថ្លែងប្រាប់ BTV ស្តីពី​ការផ្ទុះឡើងសង្គ្រាម នៅតំបន់មជ្ឈិមបូព៌ា និង​កិច្ច​ព្រម​ព្រៀង​ភាព​ជាដៃ​គូ​សេដ្ឋកិច្ច​គ្រប់​ជ្រុង​ជ្រោយ​រវាង​កម្ពុជា និងអេមីរ៉ាតអារ៉ាប់រួម (CEPA) នេះថា បន្ទាប់ ពីការចូលជាធរ​មាន​រវាង​កម្ពុជា និង​អេមីរ៉ាត​អារ៉ាប់ ក្នុងរយៈពេលកន្លងមកនេះ ភាគីទាំងពីរបានបង្កើន​ទំហំ​ពាណិជ្ជ​កម្ម​ប្រកប​ដោយ ​ប្រសិទ្ធភាព ព្រមទាំងមានកិច្ចសហប្រតិបត្តិការមួយចំនួនថែមទៀត នៃការបើក​ទីផ្សារ​សម្រាប់​ផលិតសម្រាប់នាំចេញដូចជា ផលិតផល ហាឡាល់ និងផលិតផលកសិកម្ម ដែល​យើង​កែច្នៃ​សមស្របតាមនៃទីផ្សារនាំចេញ។ឯកឧត្តម បន្តថា បច្ចុប្បន្ន​យើង​នៅ​តែប​ន្ត​ដើម្បី​បើក​ច្រក​ទីផ្សារ​ថ្មី​ៗ​បន្ថែម​ទៀត​ទៅ​កាន់​តំបន់​មជ្ឈិមបូព៌ា ទោះមានការផ្ទុះឡើងសង្គ្រាមនៅតំបន់មជ្ឈិមបូព៌ា តែមិនប៉ះពាល់​ដល់​បណ្តា​ប្រទេស​ដៃ​គូ​ពាណិជ្ជកម្មផ្ទាល់នោះទេ (ដោយអឺរ៉ង់វាយលុកទៅលើមូល ដ្ឋានទ័ពអាមេរិកតែប៉ុណ្ណោះ) ដែល​បញ្ហា​នេះ កម្ពុជានិងអេមីរ៉ាតអារ៉ាប់រួម នៅតែបន្តធ្វើ​យ៉ាង​ណា​ឱ្យ​មាន​ចរន្ត​ពាណិជ្ជ​កម្ម​មាន​ការ​កើន​ឡើង និងផ្តល់ភាពវិជ្ជមានរវាងទីផ្សារទាំងពីរ។ ឯកឧត្តមបញ្ជាក់ថា អ្វីដែលជា​ចំណែក​នៃ​ការ​អនុវត្ត​កិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយ រវាងកម្ពុជានិងអេមីរ៉ាតអារ៉ាប់រួម (CEPA) គឺនៅតែបន្តនូវកិច្ចសហប្រតិបត្តិការ និងការជំរុញឱ្យមានទំហំពាណិជ្ជកម្ម កាន់​តែ​កើន​ឡើង ​និងការស្វែងរកផលិតភាពផ្សេងៗទៀត ដើម្បីនាំចេញ​មុខ​ទំនិញ​ថ្មី​ទៅកា​ន់​ទីផ្សារ​នោះ​បន្ថែម​។ឯកឧត្តម ប៉ែន សុវិជាតិបានថ្លែងថា «ថ្វី​ត្បិត​ច្រក​ទីផ្សារ​របស់​យើង​កំពុង​រង​គ្រោះ​ពី​សង្គ្រាម​ក៏​ដោយ​យើង​នៅ​តែ​បន្ត​អនុវត្ត​នូវ​កិច្ច​សហការ ដើម្បីធ្វើយ៉ាងណាឱ្យមានចរន្ត ពាណិជ្ជ​កម្ម​ឱ្យ​កាន់​តែ​កើន​ឡើង​រវាង​កម្ពុជា​ជាមួយ ​UAE។សូមបញ្ជាក់ថា ការធ្វើពាណិជ្ជកម្មរវាងកម្ពុជានិងអេមីរ៉ាតអារ៉ាប់រួម បើ​យោង​តាម​របាយ​ការណ៍​ក្រសួង​ពាណិជ្ជ​កម្ម នៅក្នុងរយៈពេល២ ខែ ដើមឆ្នាំ២០២៦ នេះ, ការធ្វើពាណិជ្ជ​កម្ម​រវាង​ភាគី​ទាំង​ពីរ​ មានទំហំទឹកប្រាក់សរុបជាង ១៥ លានដុល្លារអាម៉េរិក ក្នុងកម្ពុជាមាននាំ ចេញ​មាន​ទឹក​ប្រាក់​ជាង​ ១០លានដុល្លារអាម៉េរិក និងការនាំចូលមកទីផ្សារកម្ពុជា មានទឹកប្រាក់ជិត ៥ លាន​ដុល្លារ​អាម៉េរិក៕ អត្ថបទ៖ សុន រ៉ាឌី

តំណាង UN ប្រចាំកម្ពុជាកោតសរសើរកម្ពុជា លើការឆ្លើយតបនឹងមេរោគអេដស៍ប្រកបដោយភាពច្នៃប្រឌិត

2026/03/18 01:42:31 pm        166
Facebook Telegram Linkin
ព្រឹកថ្ងៃទី១៨ ខែមីនា ឆ្នាំ២០២៦ នៅអាជ្ញាធរជាតិប្រយុទ្ធនឹងជំងឺអេដស៍ មានជំនួបពិភាក្សាការងាររវាង  ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងលោកជំទាវ Vladanka Andreeva អ្នកសម្របសម្រួលអង្គការសហប្រជាជាតិប្រចាំកម្ពុជា អមដោយលោកស្រី Patricia Ongpin នាយិកាអង្គការយូអិនអេដស៍ប្រចាំកម្ពុជា ឡាវ និងម៉ាឡេស៊ី។ ចូលរួមនៅក្នុងជំនួបនេះរួមមាន ឯកឧត្តម និងលោក ជាអនុប្រធាន នាយកខុទ្ទកាល័យ និងប្រធានការិយាល័យសម្របសម្រួលនៃការិយាល័យអ្នកសម្របសម្រួលអង្គការសហប្រជាជាតិប្រចាំកម្ពុជាផងដែរ។ជាកិច្ចចាប់ផ្តើម ឯកឧត្តមទេសរដ្ឋមន្រ្តីបានស្វាគមន៍លោកជំទាវ Vladanka Andreeva ដែលបានត្រលប់មកកម្ពុជាម្តងទៀតក្នុងតួនាទីថ្មីនៅអង្គការសហប្រជាជាតិ។ ឯកឧត្តមទេសរដ្ឋមន្រ្តីបានបញ្ជាក់ថា កម្ពុជាប្តេជ្ញាធ្វើការជាមួយអង្គការសហប្រជាជាតិ ព្រោះកម្ពុជាមានការជឿជាក់លើប្រព័ន្ធរបស់អង្គការសហប្រជាជាតិ ពឹងផ្អែកលើធម្មនុញ្ញអង្គការសហប្រជាជាតិ និងជឿទុកចិត្តលើច្បាប់អន្តរជាតិ។ ទន្ទឹមនឹងនេះ ឯកឧត្តមទេសរដ្ឋមន្រ្តីក៏បានសង្កត់ធ្ងន់លើភាពជាដៃគូជាមួយអង្គការយូអិនអេដស៍ ដែលក្នុងនោះកម្ពុជាត្រូវការនូវភាពជាដៃគូ ដើម្បីសម្រេចគោលដៅអភិវឌ្ឍន៍។ បន្ថែមលើនេះ ឯកឧត្តមទេសរដ្ឋមន្រ្តីបានសង្កត់ធ្ងន់ថា ដោយមានការគាំទ្រយ៉ាងរឹងមាំពីសម្តេចមហាបវរធិបតី នាយករដ្ឋមន្រ្តី កម្ពុជាបានដាក់ចេញនូវគោលនយោបាយជាតិបញ្ចប់អេដស៍ និងចីរភាព កម្មវិធីអេដស៍សម្រាប់ឆ្នាំ២០២៣-២០២៨កាលពីឆ្នាំ២០២៤ ព្រមទាំងបានរៀបចំរបាយការណ៍ស្តីពីគោលនយោបាយនេះ ក្នុងឆ្នាំ២០២៥កន្លងទៅ។បន្ទាប់មកលោកជំទាវ Vladankar Endreeva បានបង្ហាញនូវក្តីសោមនស្សចំពោះការស្វាគមន៍យ៉ាងកក់ក្តៅ និងការត្រលប់មកកម្ពុជាជាថ្មី។ លោកជំទាវបានថ្លែងការកោតសរសើរចំពោះកម្ពុជាក្នុងការឆ្លើយតបនឹងមេរោគអេដស៍ថាជាប្រទេសឈានមុខមួយ ប្រកបដោយការច្នៃប្រឌិត និងធ្វើឱ្យមានវឌ្ឍនភាព។ លោកជំទាវបានអបអរសាទរចំពោះការដាក់ចេញនូវគោលនយោបាយជាតិបញ្ចប់អេដស៍ សមាជិកភាពរបស់កម្ពុជាក្នុងក្រុមប្រឹក្សាសម្របសម្រួលអង្គការយូអិនអេដស៍(PCB) និងទស្សនកិច្ចដោយជោគជ័យរបស់លោកជំទាវ Winnie Byanyima នាយិកាប្រតិបត្តិអង្គការយូអិនអេដស៍ នៅកម្ពុជាក្នុងខែឧសភា ឆ្នាំ២០២៥។ លោកជំទាវក៏បានសម្តែងនូវការអបអរសាទរដែលកម្ពុជានឹងទទួលបានជោគជ័យជាបន្តបន្ទាប់ក្នុងការឆ្លើយតបនឹងមេរោគអេដស៍និងជំងឺអេដស៍។ ជាការឆ្លើយតប ឯកឧត្តមទេសរដ្ឋមន្រ្តីបានបញ្ជាក់ថា ដើម្បីអបអរសាទរសមិទ្ធផលថ្មីៗដែលកម្ពុជា សម្រេចបាន អាជ្ញាធរជាតិប្រយុទ្ធនឹងជំងឺអេដស៍រៀបចំទស្សនកិច្ចរបស់លោក Eamonn Murphy នាយកប្រចាំតំបន់អាស៊ី-ប៉ាស៊ីហ្វ៊ិច នៃអង្គការយូអិនអេដស៍ មកកម្ពុជា ក្នុងខែមិថុនា ឆ្នាំ២០២៦នេះ។ ឯកឧត្តមទេសរដ្ឋមន្រ្តីបានរំឭកថា ដោយជឿជាក់លើប្រព័ន្ធ កម្ពុជាបានចូលរួមថវិកាចំនួន ១០០,០០០ ដុល្លារអាមេរិកជាមួយអង្គការយូអិនអេដស៍ កាលពីឆ្នាំ២០២៥កន្លងទៅ។ជាទីបញ្ចប់ ឯកឧត្តមទេសរដ្ឋមន្រ្តីបានថ្លែងអំណរគុណចំពោះកិច្ចសហការដ៏ល្អនាពេលកន្លងមក និងសន្យាបន្តសហការជាមួយអង្គការសហប្រជាជាតិ ជាពិសេសអង្គការយូអិនអេដស៍បន្តទៅមុខទៀត ដើម្បីបញ្ចប់អេដស៍នៅកម្ពុជា៕អត្ថបទ រដ្ឋា 

បណ្ដាញសង្គម

ព័ត៌មានថ្មីៗ

អឺរ៉ុបត្រៀមខ្លួនឆ្លើយតបវិបត្តិថាមពលដោយសារសង្គ្រាមអ៊ីរ៉ង់ ជាលើកទី២ រយៈពេល ៤ឆ្នាំ
04/22/2026 03:04 PM
Facebook Telegram Linkin
ការចរចា រវាងអាមេរិក និងអ៊ីរ៉ង់ មិនច្បាស់លាស់ ដោយដំណើររបស់លោក Vance ត្រូវបានលុបចោល
04/22/2026 03:04 PM
Facebook Telegram Linkin
ក្រសួង-ស្ថាប័នចំនួន៣ ចាប់ផ្ដើមទទួលពាក្យជ្រើសរើសមន្ត្រីថ្មី ក្រោយ​ទទួល​ការ​អនុញ្ញាត​ពី​រដ្ឋាភិបាល
04/22/2026 02:04 PM
Facebook Telegram Linkin
មន្ទីរពេទ្យគន្ធបុប្ផា អំពាវនាវដល់ពលរដ្ឋចូលរួមបរិច្ចាគឈាម ខណៈតម្រូវការឈាមកើនឡើង
04/22/2026 02:04 PM
Facebook Telegram Linkin
គ.ស.ម.ក. ដាក់លិខិតទៅកាសែត The Wall Street Journal ឱ្យលុបពាក្យ “Scambodia” និងសុំទោសជាផ្លូវការចំពោះកម្ពុជា
04/22/2026 02:04 PM
Facebook Telegram Linkin
មគ្គទេ្ទសក៍ទេសចរណ៍ជិត១០០នាក់ ចូលរួម​ប្រលង​ដំឡើង​កម្រិត​មគ្គទ្ទេសក៍​ទេសចរណ៍​ថ្នាក់​ជាតិ​ និងតំបន់
04/22/2026 02:04 PM
Facebook Telegram Linkin
ប្រជានុរាស្រ្តបន្តបួងសួងថ្វាយព្រះពរព្រះមហាក្សត្រឱ្យឆាប់ជាសះស្បើយពីព្រះរោគ
04/22/2026 02:04 PM
Facebook Telegram Linkin
អ្នកវិភាគនយោបាយបង្ហាញសុទិដ្ឋិនិយមចំពោះការរីកចម្រើនទំនាក់ទំនងបន្ថែមទៀតរវាងចិន និងកម្ពុជា
04/22/2026 01:04 PM
Facebook Telegram Linkin
អ៊ីរ៉ង់រិះគន់ខ្លាំងៗ ចំពោះការចរចាសន្តិភាពរបស់អាមេរិក ដោយចាត់ទុកថា ជាការ «ខ្ជះខ្ជាយពេលវេលា»
04/22/2026 01:04 PM
Facebook Telegram Linkin
អ្នកនាំពាក្យ៖ បញ្ហាព្រំដែន​ជាមួយថៃ​មិន​ធ្វើ​ឱ្យ​ពលរដ្ឋ​ខ្មែរ​បាក់​ទឹក​ចិត្ត​ឡើយ​តែ​ធ្វើ​ឱ្យ​រួប​រួម​គ្នា​កាន់​តែ​ខ្លាំង
04/22/2026 12:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.