BTV NEWS

សាលាដំបូងរាជធានីភ្នំពេញ សម្រេចឃុំខ្លួនជនបរទេស ១២នាក់ ពាក់ព័ន្ធករណីឆបោកវិនិយោគតាមប្រព័ន្ធអនឡាញ

ឃាត់ជនបរទេស១៦នាក់ ពាក់ព័ន្ធ Online Scams និងការរស់នៅដោយខុសច្បាប់ និងបានសង្គ្រោះជនជាតិជប៉ុនម្នាក់ពីការចាប់បង្ខាំងទុក

ប្រតិបត្តិការបង្ក្រាប Online Scams នៅខេត្តបន្ទាយមានជ័យ ឃាត់ខ្លួនជនបរទេសជាង ៤ពាន់នាក់

អាជ្ញាធរកម្ពុជាបន្តបណ្តេញជនបរទេសជាង២ពាន់៦រយនាក់បន្ថែមទៀតក្រោយចាប់ពួកគេបានជាបន្តបន្ទាប់ដោយជាប់ពាក់ព័ន្ធ Online Scams

សន្តិសុខ និង សង្គម

អារ៉ាប៊ីសាអូឌីត៖ កំណើនភាពតានតឹង ស្របពេលការវាយប្រហាររបស់ក្រុមហ៊ូទី និងអាមេរិក គឺគ្រោះថ្នាក់ណាស់

រដ្ឋមន្ត្រីការបរទេសអារ៉ាប៊ីសាអូឌីត បាននិយាយថា រាជាណាចក្រនេះមាន «ការព្រួយបារម្ភយ៉ាងខ្លាំង» ដែលភាពតានតឹងនៅសមុទ្រក្រហម ស្របពេលមានការវាយប្រហារដោយក្រុមហ៊ូទី (Houthi) របស់យេម៉ែន និងការវាយប្រហាររបស់សហរដ្ឋអាមេរិកលើគោលដៅក្រុមហ៊ូទី អាចរំកិលចេញពីការគ្រប់គ្រង និងបង្កើនជម្លោះកាន់តែខ្លាំងនៅក្នុងតំបន់។ព្រះអង្គម្ចាស់ ហ្វៃសាល ប៊ីនហ្វាហាន (Faisal bin Farhan) បានមានបន្ទូលប្រាប់ទូរទស្សន៍ CNN នៅក្នុងបទសម្ភាសន៍ដែលនៅថ្ងៃអាទិត្យ (២១ មករា) ថា «យើងមានការព្រួយបារម្ភយ៉ាងខ្លាំង។ យើងកំពុងស្ថិតនៅក្នុងពេលវេលាដ៏លំបាក និងគ្រោះថ្នាក់រួចទៅហើយនៅក្នុងតំបន់ ហើយនោះហើយជាមូលហេតុដែលយើងកំពុងអំពាវនាវឱ្យមានការបន្ធូរបន្ថយការកើនឡើងនៃភាពតានតឹងបន្ថែមទៀត»។ការវាយប្រហារដោយកងជីវពលហ៊ូទី ដែលមានសម្ព័ន្ធមិត្តអ៊ីរ៉ង់ទៅលើនាវាក្នុង និងជុំវិញសមុទ្រក្រហមក្នុងរយៈពេលជាច្រើនសប្តាហ៍កន្លងមកនេះ បានធ្វើឱ្យប៉ះពាល់ដល់ពាណិជ្ជកម្មរវាងអាស៊ី និងអឺរ៉ុប បង្កជាភាពយឺតយ៉ាវ និងធ្វើឱ្យប្រទេសមហាអំណាចព្រួយបារម្ភនៅក្នុងការកើនឡើងនៃសង្គ្រាមនៅតំបន់ហ្កាហ្សា។ក្រុមហ៊ូទី ដែលគ្រប់គ្រងភាគច្រើននៃប្រទេសយេម៉ែន បាននិយាយថា ការវាយប្រហាររបស់ពួកគេគឺនៅក្នុងសាមគ្គីភាពជាមួយប៉ាឡេស្ទីន ដែលកំពុងស្ថិតក្រោមការវាយប្រហារពីអ៊ីស្រាអែលនៅតំបន់ហ្កាហ្សា។ ចាប់តាំងពីសប្តាហ៍មុនមក សហរដ្ឋអាមេរិកបានចាប់ផ្តើមការវាយប្រហារដោយបើកផ្ទាំងថ្មីលើគោលដៅក្រុមហ៊ូទី ក្នុងប្រទេសយេម៉ែន ហើយសប្តាហ៍នេះ បានដាក់កងជីវពលមួយនេះទៅក្នុងបញ្ជីក្រុម «ភេរវករ»៕

ម្ដាយ នៅតំបន់ហ្កាហ្សានិយាយថា ក្មេងៗស្លាប់បណ្ដើរៗ ដោយសារតែគ្មានថ្នាំពេទ្យ

នៅក្នុងជំរំតង់នៃភាគខាងត្បូងហ្កាហ្សា ប្រជាជនប៉ាឡេស្ទីនដែលបានភៀសខ្លួន បាននិយាយថាពួកគេជួបស្ថានភាពពិបាកក្នុងការស្វែងរកថ្នាំពេទ្យ សម្រាប់ព្យាបាលកូនឈឺរបស់ពួកគេ។ ស្រី្តជាម្ដាយមួយរូបគឺអ្នកស្រីម៉ូស៊ីរ៉ា អាប៊ូ ឡេបដេ (Mushira Abu Lebdeh) និយាយថា អ្នកស្រីដេកក្នុងជម្រកតង់ជាមួយមនុស្ស ១០ នាក់ផ្សេងទៀត ហើយគ្មានភាពកក់ក្តៅទេ។ អ្នកស្រីមិនអាចស្វែងរកថ្នាំព្យាបាលជំងឺគ្រុនក្តៅ ថ្នាំប្រឆាំងមេរោគអង់ទីប៊ីយោទិច ឬថ្នាំបំបាត់ការឈឺចាប់សម្រាប់កូនៗរបស់អ្នកស្រីបានទេ។យើងឲ្យពួកគេលេបថ្នាំទឹកស៊ីរ៉ូ តែគ្មានប្រយោជន៍ទេ កេ្មងៗ នឹងរងទុក្ខរហូតដល់ស្លាប់ ជីវិតយើងនឹងស្លាប់ជាបណ្ដើរៗ ក្មេងក៏នឹងស្លាប់ជាបន្តបន្ទាប់ ។បើគ្មានការព្យាបាលទេ កេ្មងៗនឹងស្លាប់ម្ដងមួយៗ។ នេះគឺជាការព្រួយបារម្ភយ៉ាងខ្លាំង ខណៈការកើនឡើងនៃអំពើហិង្សានាពេលថ្មីៗនេះ បានធ្វើឲ្យបញ្ហាដែលមានស្រាប់កាន់តែធ្ងន់ធ្ងរ។ ការផ្គត់ផ្គង់ជាមូលដ្ឋាន ដូចជាថ្នាំពេទ្យ និងការថែទាំសុខភាព ស្ទើរតែគ្មាន។ អង្គការសុខភាពពិភពលោកនិយាយថា ភាគច្រើននៃមន្ទីរពេទ្យទាំង ៣៦ កន្លែងក្នុងតំបន់រងការឡោមព័ទ្ធដោយអ៊ីស្រាអែល បានឈប់ដំណើរការហើយ។អង្គការនេះនិយាយថា មន្ទីរពេទ្យចំនួន១៥កំពុងដំណើរការដោយផ្នែក ដោយដំណើរការលើសពីសមត្ថភាពរបស់ខ្លួនដល់ទៅបីដង ទាំងដែលគ្មានប្រេងឥន្ធនៈ ឬការផ្គត់ផ្គង់វេជ្ជសាស្រ្តគ្រប់គ្រាន់។ជំងឺឆ្លងក៏បាននិងកំពុងរីករាលដាលយ៉ាងឆាប់រហ័ស រួមទាំងករណីរាគក្នុងចំណោមកុមារអាយុក្រោម ៥ ឆ្នាំផងដែរ។ ពួកគេនិយាយថាករណីរាគបានកើនឡើងខ្ពស់ជាង២០ដងកាលពីខែវិច្ឆិកាធៀបទៅនឹងឆ្នាំមុន៕

លោក Netanyahu បដិសេធលក្ខខណ្ឌរបស់ក្រុមហាម៉ាស សម្រាប់កិច្ចព្រមព្រៀងចំណាប់ថ្នូរអ៊ីស្រាអែល

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃអាទិត្យ (២១ មករា) បានច្រានចោលលក្ខខណ្ឌដែលបង្ហាញដោយក្រុមហាម៉ាស ដើម្បីបញ្ចប់សង្រ្គាម និងដោះលែងចំណាប់ថ្នូរដែលនឹងរួមបញ្ចូលការដកខ្លួនទាំងស្រុងរបស់អ៊ីស្រាអែល និងការទុកឲ្យក្រុមហាម៉ាស នៅកាន់អំណាចនៅក្នុងតំបន់ហ្កាហ្សា។នៅពេលដែលយន្តហោះអ៊ីស្រាអែលបានបន្តទម្លាក់គ្រាប់បែកលើទីក្រុង ខាន់ យ៉ូនីស (Khan Younis) នៅតំបន់ហ្កាហ្សាភាគខាងត្បូង មន្ត្រីជាន់ខ្ពស់របស់ក្រុមហាម៉ាស លោក សាមី អាប៊ូហ្ស៊ូរី (Sami Abu Zuhri) បានប្រាប់សារព័ត៌មានរ៉យទ័រថាការបដិសេធរបស់មេដឹកនាំអ៊ីស្រាអែលក្នុងការបញ្ចប់ការវាយលុកយោធានៅតំបន់ហ្កាហ្សា «មានន័យថាមិនមានឱកាសសម្រាប់ការវិលត្រឡប់របស់ពួកឈ្លើយសឹកអ៊ីស្រាអែលនោះទេ»។ក្រោមកិច្ចព្រមព្រៀងមួយដែលត្រូវបានសម្របសម្រួលកាលពីចុងខែវិច្ឆិកាដោយសហរដ្ឋអាមេរិក កាតា និងអេហ្ស៊ីប ចំណាប់ថ្នូរជាង ១០០នាក់ ក្នុងចំណោមចំណាប់ថ្នូរប្រមាណ ២៤០នាក់ ដែលត្រូវបានចាប់ខ្លួនទៅកាន់តំបន់ហ្កាហ្សា ក្នុងអំឡុងពេលការវាយប្រហារដោយពួកសកម្មប្រយុទ្ធហាម៉ាស កាលពីថ្ងៃទី០៧ ខែតុលា ត្រូវបានដោះលែងជាថ្នូរនឹងការដោះលែងជនជាតិប៉ាឡេស្ទីនចំនួន ២៤០នាក់ ដែលត្រូវបានឃុំខ្លួននៅក្នុងពន្ធនាគារអ៊ីស្រាអែល។ចាប់តាំងពីពេលនោះមក លោក ណេតាន់យ៉ាហ៊ូ បានប្រឈមមុខនឹងសម្ពាធកាន់តែខ្លាំងដើម្បីធានាបាននូវការដោះលែងចំណាប់ថ្នូរចំនួន ១៣៦នាក់ ដែលនៅតែជាប់ឃុំខ្លួន។ វេទិកាគ្រួសារចំណាប់ថ្នូរ និងមនុស្សបាត់ខ្លួន បានទាមទារនៅក្នុងសេចក្តីថ្លែងការណ៍មួយថា លោក ណេតាន់យ៉ាហ៊ូ «ត្រូវបញ្ជាក់យ៉ាងច្បាស់ថាយើងនឹងមិនបោះបង់ចោលជនស៊ីវិល ទាហាន និងអ្នកផ្សេងទៀតដែលត្រូវបានចាប់ខ្លួននៅក្នុងជម្លោះខែតុលា នោះទេ»៕

ចំនួនអ្នកស្លាប់ក្នុងការវាយប្រហាររបស់អ៊ីស្រាអែល នៅតំបន់ហ្កាហ្សាកើនឡើងដល់ជាង២៥.០០០នាក់

យោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស មនុស្សជាង២៥.០០០នាក់ ឥឡូវនេះបានស្លាប់នៅក្នុងតំបន់ហ្កាហ្សាក្នុងអំឡុងពេលការវាយលុករបស់អ៊ីស្រាអែលនៅទីនោះ ។ ក្រសួងខាងលើបាននិយាយថាមានអ្នកស្លាប់ចំនួន ១៧៨នាក់ ក្នុងរយៈពេល ២៤ម៉ោងចុងក្រោយនេះ ដែលធ្វើឱ្យក្លាយជាថ្ងៃមួយក្នុងចំណោមថ្ងៃជាច្រើននៃការស្លាប់ដ៏ច្រើនបំផុតនៅក្នុងសង្គ្រាមរហូតមកដល់ពេលនេះ។ ខណៈការប្រយុទ្ធនៅតែបន្ត លោកនាយករដ្ឋមន្ត្រីអ៊ីស្រាអែល Benjamin Netanyahu បានច្រានចោលម្តងទៀតនូវការបង្កើតរដ្ឋប៉ាឡេស្ទីន។ សេតវិមានបាននិយាយថា សហរដ្ឋអាមេរិក និងអ៊ីស្រាអែល បានមើលឃើញយ៉ាងច្បាស់ពីភាពខ្វែងគំនិតគ្នា នៅពេលនិយាយអំពីដំណោះស្រាយរដ្ឋពីរ។ នៅក្នុងប្រកាសសាធារណៈលើកដំបូងរបស់ខ្លួនអំពីការវាយលុកកាលពីខែតុលា ដែលបានចេញផ្សាយកាលពីថ្ងៃអាទិត្យ ក្រុមហាម៉ាសបានពិពណ៌នាថា ការវាយប្រហារកាលពីថ្ងៃទី៧ខែតុលាគឺជាជំហានចាំបាច់ ប្រឆាំងនឹងការកាន់កាប់របស់អ៊ីស្រាអែលលើដែនដីប៉ាឡេស្ទីន និងជាមធ្យោបាយធានាការដោះលែងអ្នកទោសប៉ាឡេស្ទីន។ ប្រតិបត្តិការផ្លូវអាកាស និងថ្មើរជើងរបស់អ៊ីស្រាអែល បច្ចុប្បន្នកំពុងផ្តោតលើតំបន់ហ្កាហ្សាភាគខាងត្បូង ជាទីដែលយោធាជឿជាក់ថា មេបញ្ជាការកំពូលរបស់ហាម៉ាស ត្រូវបានលាក់ខ្លួននៅក្នុង ឬនៅខាងក្រោមទីក្រុង ខាន់ យូនីស (Khan Younis)៕

ពលរដ្ឋអ៊ីស្រាអែល តវ៉ានៅខាងក្រៅនិវេសនដ្ឋាននាយករដ្ឋមន្រ្តី ទាមទារឲ្យមានការដោះលែងចំណាប់ថ្នូរ

ក្រុមគ្រួសារនៃចំណាប់ថ្នូរ និងអ្នកគាំទ្ររបស់ពួកគេបានអំពាវនាវឱ្យរដ្ឋាភិបាលអ៊ីស្រាអែល ធានាឲ្យមានការដោះលែងចំណាប់ថ្នូរក្នុងអំឡុងពេលនៃការតវ៉ាមួយកាលពីថ្ងៃអាទិត្យ (២១ មករា) នៅខាងក្រៅនិវេសនដ្ឋានរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) ក្នុងទីក្រុងហ្សេរុយសាឡឹម។ស្របពេលមានសេចក្តីរាយការណ៍អំពីលទ្ធភាពនៃការបន្តកិច្ចព្រមព្រៀងចំណាប់ថ្នូរដោយប្រទេសកាតា និងអេហ្ស៊ីប គ្រួសារចំណាប់ថ្នូររបស់ក្រុមហាម៉ាស រួមជាមួយនឹងក្រុមគ្រួសារនៃចំណាប់ថ្នូរដែលត្រូវបានសម្លាប់បានប្រមូលផ្តុំគ្នានៅទីនោះដើម្បីទាមទារឱ្យមានការវិលត្រឡប់មកវិញជាបន្ទាន់នូវមនុស្សជាទីស្រលាញ់របស់ពួកគេ។ចំណាប់ថ្នូរជាង ១០០នាក់ ដែលត្រូវបានចាប់ខ្លួនដោយក្រុមហាម៉ាស នៅថ្ងៃទី០៧ ខែតុលា ត្រូវបានដោះលែងក្នុងអំឡុងពេលបទឈប់បាញ់ខែវិច្ឆិកា រយៈពេលខ្លីមួយ។ អ៊ីស្រាអែលនិយាយថា មនុស្ស ១៣២នាក់ នៅតែស្ថិតក្នុងតំបន់ហ្កាហ្សា ក្នុងនោះមានមនុស្ស ២៧នាក់ ត្រូវបានសម្លាប់ក្នុងការចាប់ខ្លួន។លោក ណេតាន់យ៉ាហ៊ូ កាលពីថ្ងៃអាទិត្យ (២១ មករា) បានច្រានចោលលក្ខខណ្ឌដែលបង្ហាញដោយក្រុមហាម៉ាស ដើម្បីបញ្ចប់សង្គ្រាម និងដោះលែងចំណាប់ថ្នូរដែលនឹងរួមបញ្ចូលការដកខ្លួនទាំងស្រុងរបស់អ៊ីស្រាអែល និងទុកឲ្យក្រុមហាម៉ាស នៅកាន់អំណាចនៅក្នុងតំបន់ហ្កាហ្សា៕

អាវុធហត្ថខេត្តព្រះវិហារបង្ក្រាបគ្រឿងញៀនជាងមួយតោន

គ្រឿងញៀនជាងមួយតោនត្រូវបានបង្ក្រាបដោយកម្លាំងកងរាជអាវុធហត្ថ ខេត្តព្រះវិហារ កាលពីយប់ ថ្ងៃទី២០ ខែមករា ឆ្នាំ២០២៤។ យោងតាមព័ត៌មានបឋមឲ្យដឹងថាគ្រឿងញៀនប្រភេទម៉ាទឹកកកប្រមាណ ១០២០ដុំ ទម្ងន់ប្រមាណជា ១០២០គីឡូក្រាម(១តោន ២០គីឡូក្រាម) ត្រូវបានកម្លាំងកងរាជអាវុធហត្ថខេត្តព្រះវិហាររកឃើញ និងរឹបអូស ខណៈឧក្រិដ្ធជនដឹកតាមរថយន្តមួយគ្រឿងនាំចេញពីប្រទេសឡាវឆ្លងកាត់ខេត្តព្រះវិហារ និងបន្តទៅគោលដៅផ្សេង។តាមប្រភពព័ត៌មានបានឲ្យដឹងថា កម្លាំងសមត្ថកិច្ចនៃកងរាជអាវុធហត្ថខេត្តព្រះវិហារបើកការស៊ើបអង្កេត ចាប់ឃាត់ខ្លួនម្ចាស់រថយន្ដបានម្នាក់ និងកំពង់បន្តស្រាវជ្រាវតាមប្រម៉ាញ់មេខ្លោងរួមទាំងបក្សពួកក្រុមឧក្រឹដ្ឋជនគ្រឿងញៀន ដើម្បីយកមកផ្ដន្ទារទោស។ជុំវិញករណីជំនួញគ្រឿងញៀនដ៏សម្បើមខាងលើនេះ កម្លាំងអាវុធហត្ថខេត្តព្រះវិហារបានសូមសហការជាមួយកម្លាំងកងរាជអាវុធហត្ថខេត្តស្ទឹងត្រែង ដើម្បីតាមរកប្រភពអ្នកពាក់ព័ន្ធ ពីព្រោះរថយន្ដធ្វើសកម្មភាពដឹកគ្រឿងញៀននោះ មានពាក់ស្លាកលេខ ស្ទឹងត្រែង 2A-5558 បច្ចុប្បន្ន អាវុធខេត្តស្ទឹងត្រែង បានស្រាវជ្រាវដឹងពីប្រភពទីតាំងកន្លែងលក់រថយន្ដ និងបានហៅអ្នកលក់រថយន្ដមកសាកសួរ ពិនិត្យមើលឯកសារទីញលក់គឺមានឯកសារត្រឹមត្រូវ ។ ហើយអ្នកលក់រថយន្ដខាងសមត្ថកិច្ចព្រះវិហារកំពុងសាកសួរ ដើម្បីបន្តរកមុខសញ្ញាអ្នកពាក់ព័ន្ធ៕

បង្ក្រាបករណីជួញដូរ-ដឹកជញ្ជូនគ្រឿងញៀនឆ្លងដែន បង្កប់តាមកញ្ចប់បញ្ញើ រឹបអូសបានថ្នាំញៀនជិត ៣គីឡូក្រាម

ភ្នំពេញ ៖ កម្លាំងជំនាញមន្ទីរប្រឆាំងបទល្មើសគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ សហការជាមួយសមត្ថកិច្ចគយប្រចាំព្រលានយន្តហោះអន្តរជាតិភ្នំពេញ បង្ក្រាបករណីជួញដូរ និងដឹកជញ្ជូនគ្រឿងញៀនឆ្លងដែន ដែលបង្កប់តាមកញ្ចប់បញ្ញើពីកម្ពុជា ទៅអូស្ត្រាលី ចំនួន ២ករណី រឹបអូសបានថ្នាំញៀនជិត ៣គីឡូក្រាម។ ការបង្ក្រាបនេះដោយ អនុវត្តតាមបញ្ជានាយឧត្ដមសេនីយ៍ ស ថេត អគ្គស្នងការនគរបាលជាតិ, នាយឧត្ដមសេនីយ៍ ម៉ក់ ជីតូ អគ្គរងនគរបាលជាតិ ក្រោមការដឹកនាំផ្ទាល់របស់ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀនកម្លាំងជំនាញ (ក១០) មន្ទីរប្រឆាំងបទល្មើសគ្រឿងញៀន សហការជាមួយកម្លាំងគយប្រចាំ ព្រលានយន្តហោះភ្នំពេញ បានត្រួតពិនិត្យកេសបញ្ញើមួយ កាលពីថ្ងៃទី១៩ ខែមករា ឆ្នាំ២០២៤ កម្លាំងជំនាញ សហការជាមួយក្រុមហ៊ុន Embassy freight express co,ltd និងក្រុមហ៊ុន ១៦៨ Logistics chains co,ltd បានធ្វើការត្រួតពិនិត្យកេសបញ្ញើមិនប្រក្រតី ។ ជាលទ្ធលនៃការចុះបង្ក្រាបទាំង២ទីតាំងនេះ កម្លាំងជំនាញបានចាប់យកសារធាតុញៀន ន្រភេទ ហេរ៉ូអ៊ីន ទម្ងន់ ២,៧៥២.៩៦ក្រាម (២គីឡូ និង៧៥២.៩៦ក្រាម)។ ចំពោះករណីនេះកម្លាំងជំនាញកំពុងបន្តស្រាវជ្រាវរកបុគ្គលអ្នកពាក់ព័ន្ធ និងចាប់ខ្លួនមេក្លោងមកផ្តន្ទាទោស ខណៈវត្ថុតាងជាថ្នាំញៀន ត្រូវបានកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីបន្តនីតិវិធី៕ ដោយ ៖ តារាវុទ្ធី

នគរបាលបើកការស្រាវជ្រាវករណីបុរសម្នាក់ដេកស្លាប់ក្នុងថ្លុកឈាម លើផ្លូវជាតិលេខ២

កណ្តាល៖ កម្លាំងនគរបាលស្រុកកណ្តាលស្ទឹង សហការជាមួយនគរបាលជំនាញខេត្តកណ្ដាលកំពុងបើកការស្រាវជ្រាវ លើករណីប្រទះឃើញបុរសម្នាក់ដេកក្នុងថ្លុកឈាមរងរបួសធ្ងន់នៅលើផ្លូវជាតិលេខ២ និងបានស្លាប់ពេលបញ្ចូនដល់មន្ទីរពេទ្យ ដែលករណីនេះសាច់ញាតិសង្ស័យថា ជាករណីកាប់ប្លន់យកម៉ូតូពេលកំពុងធ្វើដំណើរ។ លោកវរសេនីយ៍ឯក ឡេង សុខរុន អធិការនគរបាលស្រុកកណ្តាលស្ទឹង បានប្រាប់ BTV តាមទូរស័ព្ទនារសៀលថ្ងៃទី២០ ខែមករា ឆ្នាំ២០២៤នេះឱ្យដឹងថា ករណីនេះ សមត្ថកិច្ចមិនទាន់អាចកំណត់បាន ១០០ភាគរយនៅឡើយទេ ថាជាករណីអ្វីឱ្យពិតប្រាកដ ខណៈជនរងគ្រោះត្រូវបានគេប្រទះឃើញដួលដេកលើផ្លូវតែម្នាក់ឯង និងមិនមានសាក្សីបានឃើញហេតុការណ៍ពេលកើតហេតុនោះឡើយ។ លោកអធិការស្រុកបន្ថែមថា សមត្ថកិច្ចជំនាញផ្នែកកោលស្យវិច្ច័យក៏បានធ្វើការពិនិត្យរបួសដែលមានលើផ្ទះមុខជនរងគ្រោះផងដែរ ដោយលទ្ធិផលបញ្ជាក់ថា ផ្នែកមុខគាត់ គឺត្រូវទង្គិចនឹងរបស់រឹងម្យ៉ាង ដែលបណ្តាលឱ្យបែកមុខខ្លាំងនៅចង្ការរហែកដល់សៀតថ្កា ដោយនោះមិនមែនជាស្នាកស្នាមដែលរងរបួសដោយកាំបិតកាប់នោះឡើយ។ បន្ថែមពីនោះទៀតមួកសុវត្ថិភាពរបស់ជនរងគ្រោះបានបែកប្រេះអស់ ហើយនៅកន្លែងកើតហេតុក៏មានប្រទះឃើញដុំឥដ្ឋបែកមួយដុំផងដែរ។ លោកអធិការបន្ថែមថា នគរបាលកំពុងបន្តការស្រាវជ្រាវ ដើម្បីឈានទៅកំណត់ចំពោះករណីនេះ និងបន្តស្រាវជ្រាវតាមស្វែករកម៉ូតូរបស់ជនរងគ្រោះ ដើម្បីយកប្រគល់ជូនសាច់ញាតិវិញ។ ជនរងគ្រោះក្នុងករណីឈ្មោះ ហៀង ភេទប្រុស អាយុ៤៧ឆ្នាំ មានស្រុកកំណើតនៅភូមិព្រៃស្នួល ឃុំរវៀង ស្រុកសំរោង ខេត្តតាកែវ។ ចំណែកម៉ូតូដែលបាត់ម៉ាកហុងដាឌ្រ៊ីម សេ១២៥ ពណ៌ខ្មៅ ស៊េរីឆ្នាំ២០២២ ពាក់ស្លាកលេខ តាកែវ 1AC - 2119 គឺជាម៉ូតូដែលជនរងគ្រោះខ្ចីគេជិះ។ បច្ចុប្បន្ន សពជនរងគ្រោះត្រូវបានសាច់ញាតិ តម្កល់ធ្វើបុណ្យតាមប្រពៃណីនៅឯស្រុកកំណើតខាងប្រពន្ធនៅខេត្តតាកែវ ។ ករណីនេះបានកើតឡើងនៅវេលាយប់រំលងអាធ្រាត្រឈានចូលថ្ងៃទី១៩ ខែមករា ឆ្នាំ២០២៤ ជនរងគ្រោះត្រូវបានពលរដ្ឋអ្នកដំណើរប្រទះឃើញដេករងរបួសក្នុងថ្លុកឈាមលើកំណាត់ផ្លូវជាតិលេខ២ ក្បែរស្ពានក្រវ៉ាត់ក្រុងទី៣ ក្នុងឃុំជើងកើប ស្រុកកណ្តាលស្ទឹង ខេត្តកណ្តាល តែម្នាក់ឯង ដោយក្នុងនោះគេបានប្រទះឃើញដុំឥដ្ឋ និងដុំថ្មមួយចំនួនបែកនៅក្បែរខ្លួនជនរងគ្រោះផងដែរ។ ដោយបានឃើញដូចនោះ ពលរដ្ឋដែលបានឃើញហេតុការណ៍ ក៏បានជួយយកទូរស័ព្ទក្នុងខ្លួនជនរងគ្រោះទំនាក់ទំនងទៅតាមលេខដែលមានក្នុងទូរស័ព្ទ ហៅចូលបងប្អូនសាច់ញាតិ ទើបសាច់ញាតិជនរងគ្រោះធ្វើដំណើរមកពីស្រុក ដើម្បីដឹកបញ្ចូនជនរងគ្រោះទៅសង្គ្រោះនៅមន្ទីរពេទ្យ។តាមប្រភពពីសាច់ញាតិបានឱ្យដឹងថា ជនរងគ្រោះបានធ្វើដំណើរចេញពីស្រុកទាំងយប់ ទៅទទួលប្រពន្ធដែលកំពុងធ្វើការនៅភ្នំពេញ ដើម្បីត្រឡប់មកស្រុកវិញ ដើម្បីត្រៀមចូលរួមហែរជំនួនក្នុងពិធីមង្គលការក្មួយស្រីបង្កើតនៅព្រឹកថ្ងៃទី១៩នេះ ប៉ុន្តែជាអកុសលធ្វើដំណើរមិនទាន់ដល់ភ្នំពេញផង ក៏ជួបរឿងហេតុបែបនេះតែម្តងទៅ ។ សាច់ញាតិជនរងគ្រោះឱ្យដឹងថា ស្ថានភាពជីវភាពគ្រួសារជនរងគ្រោះ គឺមានភាពខ្សត់ខ្សោយខ្លាំងណាស់ រកមួយថ្ងៃរស់មួយថ្ងៃនោះទេ ដោយជនរងគ្រោះជាប្តីធ្វើសំណង់ និងស្ត្រីជាប្រពន្ធធ្វើការស៊ីឈ្នួលនៅភ្នំពេញ មានកូនប្រុសស្រី០៤នាក់នៅក្នុងបន្ទុកផងដែរ។សាច់ញាតិជនរងគ្រោះអំពាវនាវសូមឱ្យសមត្ថកិច្ចជួយយកចិត្តទុកដាក់ស្រាវជ្រាវ ដើម្បីតាមយកម៉ូតូដែលគាត់ខ្ចីគេយកមកវិញផង ព្រោះគាត់កំពុងក្រលំបាកស្រាប់ទៅហើយ តើនៅមានលទ្ធិភាពឯណាត្រូវសងម៉ូតូគេទៀតនោះ ។ ពលរដ្ឋអ្នកដំណើរក៏បានសំណូមពរដល់សមត្ថកិច្ចខេត្តកណ្តាលបន្ថែមកម្លាំងចេញល្បាតចេញពួនស្ទាក់ ដើម្បីបង្ការបង្ក្រាបទប់ស្កាត់អំពើអសន្តិសុខនានា នាពេលរាត្រីឱ្យបានខ្លាំងខ្លាផង៕ លីហេង

ឪពុកដែលគំរាមសម្លាប់កូន ហើយថតវីដេអូបង្ហោះតាមហ្វេសប៊ុក សមត្ថកិច្ចចាប់ខ្លួនបានហើយ ឯកូនប្រុសមានសុវត្ថិភាព

កំពត៖ ស្នងការដ្ឋាននគរបាលខេត្តកំពត នៅរសៀលថ្ងៃទី២០ខែមករានេះ បានឲ្យដឹងថា នារសៀលនេះ ចំពោះករណីឪពុកគំរាមសម្លាប់កូនប្រុសខ្លួនឯង ហើយថតវីដេអូបង្ហោះតាមហ្វេសប៊ុកនោះ កម្លាំងសមត្ថកិច្ចចាប់បានហើយ ឯកូនប្រុស គឺមានសុវត្ថិភាពធម្មតា។ បើតាមស្នងការខេត្តបានឲ្យដឹងថា បច្ចុប្បន្ន ក្មេងប្រុសបានប្រគល់ជូនម្តាយហើយ ដោយឡែកប្តីបន្តនិតិវិធី តាមច្បាប់។

ជិះម៉ូតូពីស្រុកទៅយកប្រពន្ធនៅភ្នំពេញ ត្រូវគេគប់ដុំថ្មប្លន់ម៉ូតូ នៅផ្លូវជាតិលេខ២ ក្នុងស្រុកកណ្តាលស្ទឹង

កណ្តាល៖ បុរសម្នាក់បានរងរបួសធ្ងន់ធ្ងរក្បែរស្លាប់ បន្ទាប់ពីរូបគេបានធ្វើដំណើរតាមបណ្តោយផ្លូវជាតិលេខ២ ហើយត្រូវជនមិនស្គាល់មុខយកដុំថ្មគប់បណ្តាលឱ្យដួល ហើយក៏លើកម៉ូតូយកទៅបាត់ស្រមោល បង្កឱ្យមានការភ្ញាក់ផ្អើលឡើង កាលពីវេលាម៉ោង១១យប់ថ្ងៃទី១៨ ខែមករា ឆ្នាំ២០២៤ ត្រង់ចំណុចម្តុំស្ពានក្រវ៉ាត់ក្រុង ស្ថិតក្នុងស្រុកកណ្តាលស្ទឹង ខេត្តកណ្តាល ។ ជនរងគ្រោះមានឈ្មោះ ហៀង ភេទប្រុស អាយុ ៤៧ ឆ្នាំ មានស្រុកកំណើតនៅភូមិព្រៃស្នួល ឃុំរវៀង ស្រុកសំរោង ខេត្តតាកែវ ។ ចំណែកម៉ូតូដែលចោរប្លន់យកទៅបាត់នោះម៉ាកសេ ១២៥ ពណ៌ខ្មៅ ពាក់ស្លាកលេខ តាកែវ 1AC - 2119 ជាម៉ូតូដែលជនរងគ្រោះខ្ចីគេជិះ ។តាមប្រភពព័ត៌មាន បានឱ្យដឹងថា ជនរងគ្រោះត្រូវបានពលរដ្ឋអ្នកដំណើរប្រទះឃើញដេករងរបួសក្នុងថ្លុកឈាមលើកំណាត់ផ្លូវជាតិលេខ២ តែម្នាក់ឯងនៅវេលាកើតហេតុខាងលើ ក្នុងនោះគេបានប្រទះឃើញដុំឥដ្ឋ និងដុំថ្មមួយចំនួនបែកនៅក្បែរខ្លួនជនរងគ្រោះផងដែរ ។ ដោយបានឃើញដូចនោះ ពលរដ្ឋដែលបានឃើញហេតុការណ៍ ក៏បានជួយយកទូរស័ព្ទក្នុងខ្លួនជនរងគ្រោះទំនាក់ទំនងទៅតាមលេខដែលមានក្នុងទូរស័ព្ទ ក៏ខលចូលបងប្អូនសាច់ញាតិ ទើបសាច់ញាតិជនរងគ្រោះធ្វើដំណើរមកពីស្រុក ដើម្បីដឹកបញ្ចូនជនរងគ្រោះទៅសង្គ្រោះនៅមន្ទីរពេទ្យ ។ តាមប្រភពពីសាច់ញាតិ បានឱ្យដឹងថា ជនរងគ្រោះ បានធ្វើចេញពីស្រុកទាំងយប់ ទៅទទួលប្រពន្ធដែលកំពុងធ្វើការនៅភ្នំពេញ ដើម្បីត្រឡប់មកស្រុកវិញ ត្រៀមចូលរួមហែរជំនូនក្នុងពិធីមង្គលការក្មួយស្រីបង្កើត នៅព្រឹកថ្ងៃទី១៩ ខែមករានេះ ។ ប៉ុន្តែជាអកុសល ធ្វើដំណើរមិនទាន់ដល់ភ្នំពេញផង ក៏ជួបរឿងហេតុបែបនេះតែម្តងទៅ ។ បច្ចុប្បន្នជនរងគ្រោះ កំពុងសង្គ្រោះនៅមន្ទីរពេទ្យ ដោយក្រុមគ្រូពេទ្យបានប្រាប់សាច់ញាតិថា ស្ថានភាពរងរបួសជនរងគ្រោះ គឺសង្ឃឹមនៅរស់តិចតួចបំផុត ដោយសារផ្ទៃមុខ គឺរងរបួសបែកធ្ងន់ធ្ងរខ្លាំងបំផុត ។ ក្នុងនោះដែរ កម្លាំងនគរបាលស្រុក និងនគរបាលថ្នាក់ខេត្ត ក៏បានចុះទៅដល់មន្ទីរពេទ្យ ដើម្បីសាកសួរនាំព័ត៌មាន និងទទួលពាក្យបណ្តឹងពីសាច់ញាតិជនរងគ្រោះ ដើម្បីបើកការស្រាវជ្រាវឱ្យបានច្បាស់លាស់ថាជាករណីអ្វី ក្នុងការបន្តរកយុត្តិធម៌ជូនរងគ្រោះ ប្រសិនបើកំណត់ឃើញថា ជាករណីប្លន់យកម៉ូតូប្រាកដមែន សមត្ថកិច្ចនឹងបន្តជំនាញតាមចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់ ។សូមបញ្ជាក់ថា ស្ថានភាពជីវភាពគ្រួសារជនរងគ្រោះ គឺមានភាពក្រខ្សត់ខ្សោយខ្លាំងណាស់ រកមួយថ្ងៃរស់មួយថ្ងៃនោះទេ ដោយជនរងគ្រោះជាប្តីធ្វើសំណង់ និងដើររកក្តាមខ្យងតាមវាលស្រែយកមកទទួលក្នុងគ្រួសារ ហើយស្ត្រីជាប្រពន្ធធ្វើការស៊ីឈ្នួលនៅភ្នំពេញ ខណៈដែលអ្នកទាំង២ ក៏មានកូនប្រុសស្រី០៤នាក់ នៅក្នុងបន្ទុកផងដែរ ។ ឥលូវបុរសជាប្តីមកជួបរឿងអកុសលបែបនេះទៅទៀត តើឱ្យស្ត្រីជាប្រពន្ធ រំពឹងអ្វីទៀត ដើម្បីជ្រោមជ្រែងគ្រួសារដ៏កម្សត់មួយនេះឱ្យទៅមុខបាន ។ សាច់ញាតិជនរងគ្រោះអំពាវនាវ សូមឱ្យសមត្ថកិច្ចជួយយកចិត្តទុកដាក់ស្រាវជ្រាវ ដើម្បីតាមយកទ្រព្យម៉ូតូដែលគាត់ខ្ចីគេយកមកវិញផង ព្រោះគាត់កំពុងក្រលំបាកស្រាប់ទៅហើយ តើនៅមានលទ្ធិភាពឯណាត្រូវសងម៉ូតូគេទៀតនោះ ខណៈដែលជនរងគ្រោះរងរបួសក្បែរស្លាប់បែបនេះ ។ ពលរដ្ឋអ្នកដំណើរ ក៏បានសំណូមពរដល់សមត្ថកិច្ចតាមមូលដ្ឋាន មានខេត្តកណ្តាល និងខេត្តតាកែវ ដែលមានការជាប់ពាក់ព័ន្ធនៅលើកំណាត់ផ្លូវជាតិលេខ០២ សូមមេត្តាបន្ថែមកម្លាំងចេញល្បាតចេញពួនស្ទាក់ ដើម្បីបង្ការបង្ក្រាបទប់ស្កាត់អំពើអសន្តិសុខនានា នាពេលរាត្រីឱ្យបានខ្លាំងខ្លាផង ខណៈដែលបច្ចុប្បន្ននេះ គេបានសង្កេតឃើញថា សកម្មភាពក្រុមក្មេងទំនើងកាប់ចាក់គ្នា ដេញគប់វាយគ្នា និងគប់វាយបំផ្លាញទ្រព្យសម្បត្តិអ្នកដទៃ ឬក៏ឈ្លៀតឱកាសធ្វើសកម្មភាពប្លន់ ក៏កំពុងកើតមានជាញឹកញយផងដែរ ព្រោះតែដងផ្លូវខាងលើ គឺជាផ្លូវស្ងាត់ ហើយងងិតទៀត ទើបជាកត្តាឱ្យក្រុមជនសង្ស័យអាចមានឱកាសគ្រប់គ្រាន់ក្នុងការធ្វើសកម្មភាព ៕ លីហេង

បណ្ដាញសង្គម

ព័ត៌មានថ្មីៗ

សិស្សសាលាអារ៉ាប់រួមនៅទីក្រុងឌូបៃ វិលត្រឡប់ទៅរៀនតាមអនឡាញ ក្រោយការវាយប្រហាររបស់អ៊ីរ៉ង់

ភរិយាសកម្មជនកងនាវាហ្កាហ្សានិយាយថា ស្វាមីរបស់ពួកគេដែលឃាត់ខ្លួនដោយអ៊ីស្រាអែល ត្រូវបានគេធ្វើទារុណកម្ម

នាយករដ្ឋមន្ត្រីរ៉ូម៉ានីត្រូវបានទម្លាក់ពីតំណែង ដោយការបោះឆ្នោតដកសេចក្ដីទុកចិត្ត

អារ៉ាប់រួមរឹតបន្តឹងដែនអាកាស ក្រោយមានការវាយប្រហារដោយមីស៊ីល និងយានដ្រូនរបស់អ៊ីរ៉ង់

ប្រមុខមន្ទីរបញ្ចកោណ៖ អាមេរិកមិនស្វែងរកការប្រយុទ្ធ ដោយប្រតិបត្តិការបណ្តោះអាសន្ន ដើម្បីការពារនាវាទេ

កូនប្រុសរបស់លោកស្រី អ៊ុងសាន ស៊ូជី ជំរុញឲ្យរដ្ឋាភិបាលមីយ៉ាន់ម៉ាផ្តល់ «ភស្តុតាងពីការមានជីវិត»

ចិន៖ ទណ្ឌកម្មកាន់តែទូលំទូលាយរបស់សហរដ្ឋអាមេរិក លើគុយបា គឺ «ខុសច្បាប់»

រដ្ឋមន្ត្រីការបរទេសអ៊ីរ៉ង់ ចេញដំណើរទៅទីក្រុងប៉េកាំង សម្រាប់កិច្ចពិភាក្សាជាមួយចិន

អ៊ុយក្រែនអះអាងថា មនុស្ស ៣នាក់ រងរបួស ក្នុងការវាយប្រហារយានដ្រូនរុស្ស៊ីលើមជ្ឈមណ្ឌលទីក្រុង Chernihiv

‎អនុប្រធាន សមាគមអតីតយុទ្ធជន អញ្ជើញប្រគល់ផ្ទះជូនគ្រួសារសមាជិកពលីមានជីវភាពខ្វះខាត ក្នុងខេត្តកំពង់ចាម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877