BTV NEWS

ស្នងការរាជធានី ដាក់ចេញនូវគោលការណ៍បង្ការ ទប់ស្កាត់រាល់បទល្មើស និង អនុវត្តប្រកបដោយក្រមសីលធម៌វិជ្ជាជីវៈនគរបាល

ក្មេងទំនើង៣នាក់បំផ្លាញទ្រព្យសម្បត្តិសាធារណៈត្រូវបានឃាត់ខ្លួន ធ្វើកិច្ចសន្យាអប់រំណែនាំដោយមានការធានាពីអាណាព្យាបាល ដើម្បីអប់រំនៅមូលដ្ឋានបន្ត

រយៈពេល១ខែកន្លះចុងឆមាសទី១នេះ សមត្ថកិច្ចរាជធានី បង្ក្រាបបទល្មើសគ្រឿងញៀន ឃាត់មនុស្ស៧៣នាក់

កម្លាំងនគរបាលស្រុកស្វាយជ្រំយកចិត្តទុកដាក់ទប់ស្កាត់និងបង្ក្រាប ធ្វើឱ្យបទល្មើសថយចុះស្ទើរទាំងស្រុង

សន្តិសុខ និង សង្គម

អ៊ីស្រាអែលបន្តវាយលុកតំបន់ហ្កាហ្សា ខណៈលោក Netanyahu ចង្អុលបង្ហាញពីសង្រ្គាមអូសបន្លាយពេលយូរ

ក្រុមអ្នកស្រុក និងក្រុមគ្រូពេទ្យបាននិយាយថា យន្តហោះអ៊ីស្រាអែលបានបង្កើនការវាយប្រហារទៅលើភាគកណ្តាលតំបន់ហ្កាហ្សាកាលពីថ្ងៃអាទិត្យ (៣១ ធ្នូ) ខណៈដែលការប្រយុទ្ធគ្នាបានផ្ទុះឡើងតាមរយៈគំនរបាក់បែកនៃទីក្រុង និងជំរំជនភៀសខ្លួន នៅក្នុងសង្គ្រាមដែលនាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu) បាននិយាយថានឹងចំណាយពេល «ច្រើនខែទៀត» ដើម្បីបញ្ចប់។ការអត្ថាធិប្បាយរបស់លោក ណេតាន់យ៉ាហ៊ូ បង្ហាញសញ្ញាថានឹងមិនមានការបន្ធូរបន្ថយនៅក្នុងយុទ្ធនាការមួយដែលបានសម្លាប់មនុស្សរាប់ពាន់នាក់ និងធ្វើឲ្យតំបន់ហ្កាហ្សា កាន់តែខ្ទេចខ្ទី ខណៈដែលការប្តេជ្ញារបស់លោកក្នុងការស្ដារការគ្រប់គ្រងរបស់អ៊ីស្រាអែល ឡើងវិញលើតំបន់ហ៊ុមព័ទ្ធព្រំដែននៃប្រទេសអេហ្ស៊ីប បានចោទជាសំណួរថ្មីអំពីដំណោះស្រាយរដ្ឋពីរ។យោធាអ៊ីស្រាអែល នឹងបញ្ចេញទាហានបំរុងមួយចំនួនដែលត្រូវបានកោះហៅឱ្យទៅប្រយុទ្ធនឹងក្រុមហាម៉ាស នៅតំបន់ហ្កាហ្សា ជាទង្វើមួយដែលខ្លួនបាននិយាយកាលពីថ្ងៃអាទិត្យថានឹងជួយដល់សេដ្ឋកិច្ចនៅពេលដែលប្រទេសនេះរៀបចំសម្រាប់សង្រ្គាមដ៏យូរ។ វីដេអូពីទីភ្នាក់ងារអឌ្ឍចន្ទក្រហមមួយដែលត្រូវបានផ្សព្វផ្សាយកាលពីថ្ងៃអាទិត្យបានបង្ហាញក្រុមអ្នកជួយសង្គ្រោះដែលកំពុងធ្វើការក្នុងភាពងងឹតដើម្បីដឹកកុមារដែលរងរបួសពីគំនរបាក់បែកនៅតំបន់កណ្តាលហ្កាហ្សា។ការទម្លាក់គ្រាប់បែកតាមអាកាស និងវាយប្រហារដោយកាំភ្លើងធំរបស់អ៊ីស្រាអែល បានសម្លាប់មនុស្សជាង ២១.៨០០នាក់ បើយោងតាមអាជ្ញាធរសុខាភិបាលនៅតំបន់ហ្កាហ្សាគ្រប់គ្រងដោយក្រុមហាម៉ាស ដោយមានមនុស្សជាច្រើនត្រូវភ័យខ្លាចថាបានស្លាប់នៅក្នុងគំនរបាក់បែក ហើយសង្រ្គាមនេះបានរុញច្រានប្រជាជនជិត ២,៣លាននាក់ ចេញពីលំនៅឋានរបស់ពួកគេ៕

ផែនការបីដំណាក់កាលសម្រាប់សន្តិភាព ផ្តល់ក្តីសង្ឃឹមបញ្ចប់សង្គ្រាម នៅតំបន់ហ្កាហ្សា

ផែនការចរចាសន្តិភាពថ្មីមួយ បានធ្វើឲ្យមានក្តីសង្ឃឹមនៃបទឈប់បាញ់ឡើងវិញ ជាមួយនឹងសំណើ ដើម្បីប្រមូលផ្តុំមេដឹកនាំ នៅតំបន់វេសបែង( West Bank) និង តំបន់ហ្កាហ្សា សម្រាប់បទឈប់បាញ់ជាអចិន្ត្រៃយ៍។ផែនការបីដំណាក់កាលនេះ កំពុងប្រឈមនឹងការប្រឆាំងយ៉ាងតឹងរ៉ឹងពីក្រុមប៉ាឡេស្ទីន ប៉ុន្តែនៅមិនទាន់ត្រូវបានគេបដិសេធជាផ្លូវការទេ បើទោះបីជាត្រូវបានគេលើកដំបូងប្រហែលមួយសប្តាហ៍មុនក៏ដោយ។ផែនការនេះពាក់ព័ន្ធនឹងបទឈប់បាញ់រយៈពេលពីរសប្តាហ៏ និងអាចពង្រីកបាន ដើម្បីអនុញ្ញាតឲ្យមានការដោះដូរចំណាប់ថ្នូរអ៊ីស្រាអែល និងអ្នកទោសប៉ាឡេស្ទីនដំបូង។ដំណាក់កាលទីពីរមានគោលបំណងបង្រួបបង្រួមអ្នកនយោបាយប៉ាឡេស្ទីនដែលបែកបាក់គ្នា ដើម្បីគ្រប់គ្រងតំបន់ហ្កាហ្សា និងតំបន់វេសបែង ជាមួយនឹងរដ្ឋាភិបាលដែលមានជំនាញបច្ចេកទេស ហើយទីបីនឹងនាំឲ្យមានបទឈប់បាញ់ចុងក្រោយ។សំណើ ដែលបានត្រូវបានធ្វើឡើងជាមួយអ្នកសម្រុះសម្រួលអេហ្ស៊ីប និងកាតា មិនបានបំពេញតាមការទាមទាររបស់អ៊ីស្រាអែល និងប៉ាឡេស្ទីន។ វាមិនបំពេញគោលដៅសំខាន់របស់អ៊ីស្រាអែល ក្នុងការរុះរើក្រុមហាម៉ាសទាំងស្រុងទេ ហើយវាណែនាំឲ្យដោះលែងចំណាប់ថ្នូរនៅតំបន់ហ្កាហ្សាមុនពេលបទឈប់បាញ់ជាអចិន្ត្រៃយ៍ដែលផ្ទុយនឹងលក្ខខណ្ឌសំខាន់របស់ប៉ាឡេស្ទីន។

ក្រុមហ៊ួទីនៅយេម៉ែននិយាយថា សមាជិក១០នាក់ ត្រូវបានសម្លាប់ដោយកងកម្លាំងអាមេរិក នៅសមុទ្រក្រហម

ចលនាសកម្មប្រយុទ្ធក្រុមហ៊ួទី នៅប្រទេសយេម៉ែន បាននិយាយកាលពីថ្ងៃអាទិត្យថា បុគ្គលិកកងទ័ពជើងទឹករបស់ពួកគេ ១០ នាក់ បានស្លាប់ និងបាត់ខ្លួន បន្ទាប់ពីទូករបស់ពួកគេបីគ្រឿង ត្រូវបានវាយប្រហារដោយកងកម្លាំងសហរដ្ឋអាមេរិកនៅក្នុងសមុទ្រក្រហម។យោធាអាមេរិក បាននិយាយនៅមុននេះថា ក្រុមសម្ព័ន្ធមិត្តអ៊ីរ៉ង់ ដែលបាននិងកំពុងវាយប្រហារលើការដឹកជញ្ជូនទំនិញនៅសមុទ្រក្រហមរយៈពេលជាច្រើនសប្តាហ៍នេះ ជាអ្វីដែលខ្លួនចាត់ទុកថា ជាការឆ្លើយតបទៅនឹងសង្រ្គាមរបស់អ៊ីស្រាអែល នៅតំបន់ហ្កាហ្សា ដែលបានវាយប្រហារលើនាវាដឹកទំនិញ Maersk កាលពីថ្ងៃសៅរ៍ និងថ្ងៃអាទិត្យ។យោធានិយាយថា ឧទ្ធម្ភាគចក្រកងទ័ពជើងទឹករបស់សហរដ្ឋអាមេរិក បានពន្លិចទូកតូចៗចំនួនបីគ្រឿងក្នុងចំណោមទូកតូចៗចំនួនបួនគ្រឿង ដែលក្រុមហ៊ួទី បានប្រើប្រាស់ក្នុងការវាយប្រហារ កាលពីថ្ងៃអាទិត្យ ហើយបានបើកទូកទីបួន ត្រឡប់ទៅកាន់ឆ្នេរសមុទ្រវិញ។អ្នកនាំពាក្យយោធារបស់ក្រុមនេះ លោកស្រី Yahya Sarea បាននិយាយថា កងកម្លាំងរបស់សត្រូវអាមេរិក បានវាយប្រហារទូកចំនួនបីគ្រឿងដែលជាកម្មសិទ្ធិរបស់កងកម្លាំងកងទ័ពជើងទឹកក្រុមហ៊ួទី នៅយេម៉ែន បានបណ្តាលឲ្យសមាជិកនៃកងទ័ពជើងទឹកចំនួន១០នាក់បានស្លាប់ និងកំពុងបាត់ខ្លួន។ លោកស្រី Sarea និយាយថា កងកម្លាំងទ័ពជើងទឹកក្រុមហ៊ួទី បានវាយប្រហារដោយមីស៊ីល លើនាវាដឹកទូទំនិញ Maersk Hangzhou បន្ទាប់ពីនាវិករបស់នាវានេះ បដិសេធមិនស្តាប់តាមការហៅព្រមាន។

ចំនួនអ្នកស្លាប់ខាងប៉ាឡេស្ទីន នៅក្នុងតំបន់សង្រា្គមហ្កាហ្សា កើនឡើងដល់ជាង ២១.៨០០នាក់

ក្រសួងសុខាភិបាលនៅតំបន់ហ្កាហ្សា បាននិយាយកាលពីថ្ងៃអាទិត្យ (៣១ ធ្នូ) ថាចំនួនអ្នកស្លាប់ខាងប៉ាឡេស្ទីន ដោយសារការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីប បានកើនឡើងដល់ ២១.៨២២នាក់ ហើយមនុស្សចំនួន ៥៦.៤៥១នាក់បានរងរបួស។នៅក្នុងសេចក្តីថ្លែងការណ៍មួយ ដែលផ្ញើទៅកាន់សារព័ត៌មានស៊ីនហួ លោក អាស្រា្វហ្វ អាល់កេដ្រា (Ashraf Al-Qedra) អ្នកនាំពាក្យក្រសួងសុខាភិបាល បាននិយាយថា កងទ័ពអ៊ីស្រាអែល បានសម្លាប់មនុស្ស ១៥០នាក់ និងបង្ករបួសដល់មនុស្ស ២៨៦នាក់ផ្សេងទៀត ក្នុងរយៈពេល ២៤ម៉ោងកន្លងមកនេះ។លោក អាវីចាយ អាដ្រែអ៊ី (Avichay Adraee) អ្នកនាំពាក្យកងទ័ពអ៊ីស្រាអែលបាននិយាយនៅលើគណនីបណ្ដាញសង្គម X របស់ខ្លួនថា កងកម្លាំងអ៊ីស្រាអែលបន្តការប្រយុទ្ធនៅតំបន់ហ្កាហ្សា ហើយរារាំងបានគ្រឿងផ្ទុះដែលត្រៀមរួចជាស្រេច និងបំផ្លាញហេដ្ឋារចនាសម្ព័ន្ធនៃបក្សពួកប៉ាឡេស្ទីន ព្រមទាំងបានសម្លាប់ពួកសកម្មប្រយុទ្ធ ១៤នាក់។អ៊ីស្រាអែលបានបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកនឹងការវាយលុករបស់ក្រុមហាម៉ាស នៅភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ក្នុងអំឡុងពេលដែលមនុស្សប្រហែល ១.២០០នាក់ត្រូវបានសម្លាប់ និងមនុស្សជាង ២០០នាក់ត្រូវបានចាប់ធ្វើជាចំណាប់ថ្នូរ៕

រដ្ឋមន្ត្រីការពារជាតិលោក Grant Shapps៖ ចក្រភពអង់គ្លេស ត្រៀមវាយប្រហារក្រុមឧទ្ទាមហួទី

ចក្រអង់គ្លេស កំពុងពិចារណាការវាយប្រហារតាមអាកាសលើក្រុមឧទ្ទាមហួទី ខណៈដែលរដ្ឋមន្ត្រីការពារជាតិ បានព្រមានថា ចក្រភពអង់គ្លេស នឹងមិនស្ទាក់ស្ទើរក្នុងការចាត់វិធានការដោយផ្ទាល់លើការវាយប្រហាររបស់ពួកគេលើនាវាដឹកទំនិញ នៅសមុទ្រក្រហមនោះទេ។ចក្រភពអង់គ្លេស កំពុងរៀបចំផែនការជាមួយសហរដ្ឋអាមេរិកសម្រាប់ការវាយប្រហារផ្នែកយោធាដ៏មានសក្តានុពលប្រឆាំងនឹងក្រុមហួទី ដែលគាំទ្រដោយអ៊ីរ៉ង់ នៅក្នុងប្រទេសយេម៉ែន ដើម្បីប្រឆាំងនឹងការវាយប្រហាររបស់ពួកគេលើការដឹកជញ្ជូន ដែលបង្កឲ្យមានភាពចលាចលលើផ្លូវពាណិជ្ជកម្មពិភពលោក។ដោយសរសេរនៅក្នុងសារព័ត៌មាន The Telegraph ខាងក្រោម លោក Grant Shapps ព្រមានក្រុមហួទីថា ចក្រភពអង់គ្លេស មានឆន្ទៈក្នុងការធ្វើសកម្មភាព ដើម្បីទប់ស្កាត់ការគំរាមកំហែង។សហរដ្ឋអាមេរិក និងចក្រភពអង់គ្លេស កំពុងរៀបចំសេចក្តីថ្លែងការណ៍រួមដែលមិនធ្លាប់មានពីមុនមក ដែលអាចត្រូវបានចេញនៅដើមថ្ងៃចន្ទ ដោយផ្តល់ការព្រមានចុងក្រោយដល់ក្រុមហួទី ដើម្បីបញ្ឈប់ការវាយប្រហាររបស់ពួកគេ។សារព័ត៌មាន The Telegraph យល់ថា ការវាយប្រហារណាមួយទំនង ជាត្រូវបានដឹកនាំដោយសហរដ្ឋអាមេរិក។ វានឹងក្លាយជាការកើនឡើងដ៏សំខាន់នៃការឆ្លើយតបទៅនឹងក្រុមហួទី ហើយការពិភាក្សាកំពុងដំណើរការសម្រាប់ប្រទេសផ្សេងទៀត ដើម្បីចូលរួមជាមួយសហរដ្ឋអាមេរិក និងចក្រភពអង់គ្លេស។

តុលាការសម្រេចឃុំខ្លួនជនបើកថយន្ដ Hammer បុកម៉ូតូមួយគ្រឿងបណ្ដាលស្លាប់ ២នាក់ និងរបួសធ្ងន់ម្នាក់ នៅខណ្ឌដូនពេញ

ភ្នំពេញ៖ ជនបង្កឈ្មោះ យ៉េត ច័ន្នគ្រឹស្មា ភេទប្រុស ដែលបើកថយន្ដ Hammer បុក ម៉ូតូមួយគ្រឿង បណ្ដាលឲ្យស្លាប់ ២នាក់ របួសធ្ងន់១នាក់ នៅខណ្ឌដូនពេញ នៅល្ងាចថ្ងៃទី៣១ ខែធ្នូ ឆ្នាំ២០២៣ ត្រូវបានតុលាការសម្រេចឃុំខ្លួននៅពន្ធនាគាររាជធានីភ្នំពេញ (PJ) ជាបណ្ដោះអាសន្នរហូតដល់មានបទបញ្ជាថ្មីសម្រេចផ្សេងពីនេះ។ នេះបើតាមការបញ្ជាក់របស់ ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី ៣១ ខែធ្នូ ឆ្នាំ ២០២៣នេះ។

ឃាត់ខ្លួនជនសង្ស័យ ៣នាក់ ករណីហិង្សាដោយចេតនាមានស្ថានទម្ងន់ទោស

ភ្នំពេញ ៖ ការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋានគរបាលរាជធានីភ្នំពេញឃាត់ខ្លួនជនសង្ស័យ ៣នាក់ ករណីហិង្សាដោយចេតនាមានស្ថានទម្ងន់ទោស ។កាលពីថ្ងៃទី២៩ ខែធ្នូ ឆ្នាំ២០២៣ វេលាម៉ោងប្រហែល ២និង៣០នាទី ការិយាល័យនគរបាលព្រហ្មទណ្ឌកំរិតស្រាលស្រាវជ្រាវឃាត់ខ្លួនជនសង្ស័យជាបន្តបន្ទាប់ ៣នាក់ ករណីហិង្សាដោយចេតនាមានស្ថានទម្ងន់ទោស (ប្រើកាំបិតផ្គាក់ ,កាំបិតប៉័ងតោ,ដងឆ័ត្រ និងដំបងឬស្សី កាប់ និងវាយជនរងគ្រោះបណ្តាលឲ្យរងរបួស និងខូចខាតទ្រព្យសម្បត្តិ) ចំនួន ០២ ករណី ។ ករណីទី១ ក្រុមជនសង្ស័យប្រើប្រាស់ដងឆ័ត្រ និងដំបងឫស្សីព្រួតគ្នាវាយជនរងគ្រោះបែកក្បាលរងរបួស និងវាយម៉ូតូបណ្តាលឲ្យខូចខាត ចំនួន ០១គ្រឿង) នៅចំណុចផ្លូវបំបែកជាបួន ផ្លូវ២៨គ្រួសារ ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ កាលពីថ្ងៃទី១១ ខែធ្នូ ឆ្នាំ២០២៣ វេលាម៉ោង ០៣ និង ៣០ នាទី ។ ករណីទី២ ក្រុមជនសង្ស័យប្រើកាំបិតប៉័ងតោ,កាំបិតផ្គាក់ និងដំបងគ្រលាស់ព្រួតគ្នាកាប់ និងវាយលើជនរងគ្រោះបណ្តាលឲ្យត្រូវចំកណ្តាលក្បាលរយៈហូរឈាម ,ត្រូវគុម្ពត្រចៀកឆ្វេង,ចំឆ្អឹងជំនីខាងឆ្វេងនិងចង្កេះខាងស្តាំរងរបួសជាទម្ងន់) នៅចំណុចផ្លូវបំបែកជាបួនប្រឡាយទឺកស្អុយ ផ្លូវលំ ភូមិមានជ័យ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ កាលពីថ្ងៃទី២០ ខែធ្នូ ឆ្នាំ២០២៣ វេលាម៉ោង ១៧ និង ១៥ នាទី ។ជនសង្ស័យ ១-ឈ្មោះ នួន ចំណាន ហៅ ណាន់ ភេទ ប្រុស អាយុ ១៩ ឆ្នាំ ជនជាតិ ខ្មែរ មានទីលំនៅផ្ទះមិនចាំលេខ ផ្លូវមិនចាំលេខ សង្កាត់បឹងសាឡាង ខណ្ឌទួលគោក រាជធានីភ្នំពេញ មុខរបរ មិនពិតប្រាកដ ។ ២-ឈ្មោះ វ៉ើន ដាវីន ភេទ ប្រុស អាយុ ១៧ ឆ្នាំ ជនជាតិ ខ្មែរ មានទីលំនៅផ្ទះជួល ផ្លូវលេខ២០០២ សង្កាត់អូរបែកក្អម ខណ្ឌសែនសុខ រាជធានីភ្នំពេញ មុខរបរ មិនពិតប្រាកដ ។ ៣-ឈ្មោះ កុល ពិសី ភេទ ប្រុស អាយុ ១៧ ឆ្នាំ ជនជាតិ ខ្មែរ មានទីលំនៅផ្ទះលេខ៤ ផ្លូវលេខ៦០៤ ភូមិ០៧ សង្កាត់បឹងកក់២ ខណ្ឌទួលគោក រាជធានីភ្នំពេញ -មុខរបរ សិស្ស ។ វត្ថុតាងមាន៖ -ដែកដងឆត្រ័ ចំនួន ០២ដើម -ដំបងឬស្សី ចំនួន ០១ដើម -កាំបិតបុ័ងតោ ចំនួន ០២ដើម -កាំបិតផ្គាក់ ដងឈើ ចំនួន ០១ដើម -រណា ចំនួន ០២ដើម ។ ជនសង្ស័យ និងវត្ថុតាង ការិយាល័យកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕ តារាវុទ្ធី

គណៈបញ្ជាការឯកភាពខណ្ឌមានជ័យចុះបង្ក្រាបទីតាំងល្បែងអនឡាញខុសច្បាប់មួយកន្លែង ឃាត់មនុស្ស ១០នាក់

ភ្នំពេញ៖ កម្លាំងគណៈអភិបាលខណ្ឌមានជ័យចុះបង្ក្រាប ល្បែងស៊ីសងខុសច្បាប់ នៅចំណុចមួយកន្លែងក្នុងមូលដ្ឋានខណ្ឌមានជ័យ ។ ក្នុងប្រតិបត្តិការនេះដែរបានធ្វើឡើង នាវេលាម៉ោង១០ និង៤០នាទី ត្រូវនឹងថ្ងៃទី៣១ ខែធ្នូ ឆ្នាំ២០២៣ ស្ថិតនៅផ្លូវ៣៨សេ ផ្ទះលេខ៧៧២B ក្រុមទី២ ភូមិ ទ្រា២ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ក្រោយពីមានប្រជាពលរដ្ឋរាយការណ៍ថា មានទីតាំងណេតមួយកន្លែងបង្កប់ល្បែងស៊ីសងខុសច្បាប់ លោក សេង គន្ធ អភិបាល នៃគណៈអភិបាលខណ្ឌមានជ័យ ដឹកនាំដោយផ្ទាល់ បានចុះបង្ក្រាប ទីតាំងណេតខុសច្បាប់ខាងលើគឺពិតជាមានបង្កប់ល្បែងស៊ីសង បាល់អនឡាញ , ខេណូ , បាការ៉ាត់ ពិតប្រាកដមែន។ កម្លាំងចម្រុះបានធ្វើការដកហូតសម្ភារៈ មានដូចជា ៖ កុំព្យូទ័រ ចំនួន១១គ្រឿង , ធុងម៉ាស៊ីនកុំព្យូទ័រចំនួន ១១ធុង , ម៉ូតូ ០២ គ្រឿង កៅអីជ័រ ចំនួន ០៧ , តុ ០២ នឹងកង់អាគុយ ០១ គ្រឿង ។ ក្នុងនោះឃាត់ខ្លួនមនុស្សប្រុស-ស្រី ១០នាក់ ស្រី២នាក់ (អ្នកលេង ៨នាក់, បុគ្គលិក២នាក់)។ បច្ចុប្បន្ន មនុស្សប្រុសស្រីទាំង១០នាក់ ត្រូវបានឃាត់ខ្លួនប្រគល់អោយទៅនគរបាលនៃអធិការដ្ឋានខណ្ឌមានជ័យ ដើម្បីចាត់ការតាមនីតិវិធី ៕ អត្ថបទ៖ កុម្ភះ

ជនជាតិកូរ៉េខាងត្បូង ២នាក់ត្រូវបានដោះលែង បន្ទាប់ពីត្រូវបានចាប់ពង្រត់ នៅនីហ្សេរីយ៉ា

ក្រសួងការបរទេសរបស់ទីក្រុងសេអ៊ូល នៅថ្ងៃសៅរ៍ (ទី៣០ ខែធ្នូ) នេះ បានឲ្យដឹងថា ជនជាតិកូរ៉េខាងត្បូង ២នាក់ ដែលត្រូវបានចាប់ខពង្រត់ដោយខ្មាន់កាំភ្លើង នៅក្នុងប្រទេសនីហ្សេរីយ៉ា កាលពីដើមខែនេះ ត្រូវបានដោះលែងដោយសុវត្ថិភាព។បុរស ២នាក់ ត្រូវបានចាប់ខ្លួនបន្ទាប់ពីខ្មាន់កាំភ្លើង បានវាយឆ្មក់ក្បួនរថយន្តរបស់ពួកគេ នៅក្នុងតំបន់ដីសណ្ត ដែលផលិតប្រេងរបស់ប្រទេសនីហ្សេរីយ៉ា កាលពីថ្ងៃទី12 ខែធ្នូ ដោយបានសម្លាប់ទាហាន ៤នាក់ ដែលការពារក្រុមនោះ និងអ្នកបើកបរស៊ីវិល ២នាក់។ក្រសួងបាននិយាយនៅក្នុងសេចក្តីថ្លែងការណ៍ថា៖ «កាលពីថ្ងៃសុក្រ យើងបានធានាការថែទាំពលរដ្ឋកូរ៉េខាងត្បូង ២នាក់ ដែលត្រូវបានចាប់ពង្រត់។ បច្ចុប្បន្ន អ្នកទាំង២ ស្ថិតក្នុងស្ថានភាពល្អប្រសើរ ហើយបន្ទាប់ពីពិនិត្យនៅមន្ទីរពេទ្យ ពួកគេបានផ្លាស់ទៅកន្លែងមានសុវត្ថិភាព និងបាននិយាយជាមួយក្រុមគ្រួសាររបស់ពួកគេ»។ការវាយប្រហារដោយពួកសកម្មប្រយុទ្ធនៅតំបន់ដីសណ្ដនីហ្សេរីយ៉ា បានថយចុះក្នុងរយៈពេលជាច្រើនឆ្នាំមកននេះ។ ប៉ុន្តែតំបន់នេះ មានភាពប្រែប្រួលមិនទៀតទាត់ និងទទួលរងពីការលួចប្រេងឆៅ និងការបំផ្លិចបំផ្លាញនៃបំពង់បង្ហូរប្រេង ដែលបានធ្វើឲ្យខាតបង់ដល់ទិន្នផលប្រេងរបស់ប្រទេសនីហ្សេរីយ៉ា៕

បុរសអាមេរិករងការប្រកាន់ពីបទព្យាយាមជួយក្រុម Al Shabaab ក្រោយការវាយប្រហារថ្ងៃទី៧ តុលា លើអ៊ីស្រាអែល

ក្រសួងយុត្តិធម៌សហរដ្ឋអាមេរិក បានឲ្យដឹងថា បុរសនៅរដ្ឋ New Jersey ម្នាក់ ដែលត្រូវបានចាប់ខ្លួន នៅក្នុងប្រទេសកេនយ៉ា ត្រូវបានចោទប្រកាន់ពីបទព្យាយាមជួយដល់ក្រុមសកម្មប្រយុទ្ធឥស្លាម Al Shabaab (អាល់សាបាប) ដោយចោទប្រកាន់ថា រូបគេត្រូវបានជំរុញទឹកចិត្តដោយការវាយប្រហារ កាលពីថ្ងៃទី៧ ខែតុលា ពីសំណាក់ក្រុមហាម៉ាសលើប្រទេសអ៊ីស្រាអែល ដើម្បីបង្កអំពើហិង្សា។ការចាប់ខ្លួននេះ កើតឡើងចំពេលមានការកើនឡើងនូវឧប្បត្តិហេតុនៃការប្រឆាំងពួកជ្វីហ្វនិយម និងការស្អប់ស្ពើមសាសនាអ៊ីស្លាម បន្ទាប់ពីមានសង្គ្រាមអ៊ីស្រាអែល និងតំបន់ហ្កាហ្សា ដែលបានធ្វើឲ្យកម្រិតនៃការគំរាមកំហែងភេរវកម្មកើនឡើង នៅក្នុងសហរដ្ឋអាមេរិក។ក្រសួងយុត្តិធម៌ បានឲ្យដឹងនៅក្នុងសេចក្តីថ្លែងការណ៍កាលពីថ្ងៃសុក្រថា លោក Karrem Nasr ជាពលរដ្ឋអាមេរិក ដែលបានផ្លាស់ប្តូរពីរដ្ឋ New Jersey ទៅកាន់ប្រទេសអេហ្ស៊ីបកាលពីខែកក្កដា ត្រូវបានចាប់ខ្លួន នៅទីក្រុង Nairobi (ណៃរ៉ូប៊ី) កាលពីថ្ងៃទី១៤ ខែធ្នូ ហើយត្រូវបាននាំខ្លួនទៅសហរដ្ឋអាមេរិក កាលពីថ្ងៃព្រហស្បតិ៍ (ទី២៨ ខែធ្នូ)។យោងតាមរដ្ឋអាជ្ញា បានឲ្យដឹងថា ជនសង្ស័យវ័យ ២៣ឆ្នាំរូបនេះ ត្រូវបានចោទប្រកាន់ពីបទ «ប៉ុនប៉ងផ្តល់ជំនួយផ្នែកសម្ភារៈដល់អង្គការភេរវករបរទេស ដែលត្រូវបានកំណត់» ដែលត្រូវអនុវត្តការផ្តន្ទាទោសដាក់ពន្ធនាគារអតិបរមា ២០ឆ្នាំ។ សូមបញ្ជាក់ថា សហរដ្ឋអាមេរិក ចាត់ទុកក្រុម Al Shabaab ជា «អង្គការភេរវជនបរទេស»៕

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877