BTV NEWS

ឃាត់ជនបរទេស១៦នាក់ ពាក់ព័ន្ធ Online Scams និងការរស់នៅដោយខុសច្បាប់ និងបានសង្គ្រោះជនជាតិជប៉ុនម្នាក់ពីការចាប់បង្ខាំងទុក

ប្រតិបត្តិការបង្ក្រាប Online Scams នៅខេត្តបន្ទាយមានជ័យ ឃាត់ខ្លួនជនបរទេសជាង ៤ពាន់នាក់

អាជ្ញាធរកម្ពុជាបន្តបណ្តេញជនបរទេសជាង២ពាន់៦រយនាក់បន្ថែមទៀតក្រោយចាប់ពួកគេបានជាបន្តបន្ទាប់ដោយជាប់ពាក់ព័ន្ធ Online Scams

ជនបរទេស ២,៦៧១នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងបទល្មើសព្រហ្មទណ្ឌផ្សេងៗទៀត

សន្តិសុខ និង សង្គម

ជនជាតិស៊ែរប៊ីបូសនី ដែលរឹងរូស អបអរទិវាស្វ័យភាពរដ្ឋ ទោះបីមានការហាមឃាត់ពីតុលាការក៏ដោយ

ពលរដ្ឋស៊ែរប៊ីបូសនី បានអបអរទិវាស្វ័យភាពនៅតំបន់ស្វយ័តរបស់ពួកគេ កាលពីថ្ងៃអង្គារ ដោយមានក្បួនព្យុហយាត្រារបស់កងកម្លាំងពិសេស និងយានរថពាសដែក ក្នុងការប្រឆាំងទៅនឹងការហាមឃាត់របស់តុលាការកំពូល និងការព្រមានពីអ្នកត្រួតពិនិត្យប្រទេសលោកខាងលិច អំពីសន្តិភាពដែលមានបញ្ហារបស់ប្រទេសបូសនី។ក្នុងភាពត្រជាក់ខ្លាំងដល់កក មន្ត្រីនគរបាល អតីតយុទ្ធជនសម័យសង្គ្រាម និងជនស៊ីវិលប្រហែល ៣.៤០០នាក់ បានដើរដង្ហែរតាមដងផ្លូវនៅរដ្ឋធានី Banja Luka ក្នុងតំបន់ ដោយមនុស្សជាច្រើនបានធ្វើដំណើរតាមរថយន្តក្រុងមកពីទីក្រុងផ្សេងៗ។ លោក Milorad Dodik ប្រធានាធិបតីនៃសាធារណរដ្ឋស៊ែរប៊ី បាននិយាយទៅកាន់ក្បួនព្យុហយាត្រាថា ប្រទេសមួយនេះ មិនអនុញ្ញាតឱ្យខ្លួនរស់នៅធ្វើជាទាសករនោះទេ។ នោះហើយជាមូលហេតុនៃការប្រារព្ធពិធីអបអរទិវា របស់សាធារណៈរដ្ឋ ដែលពុំអាចដាក់ឲ្យនៅក្រៅច្បាប់លើយ។ ថ្ងៃទី ៩ ខែមករា គឺជាកាលបរិច្ឆេទក្នុងឆ្នាំ ១៩៩២ នៅពេលដែលពលរដ្ឋបូសនីស៊ែរប៊ី បានប្រកាសឯករាជ្យ ខណៈក្រោយមកសហព័ន្ធយូហ្គោស្លាវី បានបែកបាក់ ដែលបានបង្កឱ្យមានសង្រ្គាមរយៈពេល៣ឆ្នាំកន្លះ បណ្តាលឲ្យមនុស្ស ១០០.០០០នាក់ត្រូវបានសម្លាប់ និង ២ លាននាក់គ្មានលំនៅឋានរស់នៅ ភាគច្រើនជាជនមូស្លីមបូសនី។ ចាប់តាំងពីថ្ងៃទី ៩ ខែមករា ស្របពេលជាមួយនឹងថ្ងៃឈប់សម្រាកគ្រិស្តសាសនានិកាយអូថូដុករបស់ជនជាតិស៊ែរប៊ី តុលាការធម្មនុញ្ញរបស់បូសនី បានប្រកាសពីរដងថាវាខុសច្បាប់ ដោយចេញសេចក្តីសម្រេចថា ខ្លួនមានការរើសអើងប្រឆាំងសហគមន៍កាតូលិកក្រូអាត និងមូស្លីមបូសនី។ពិធីជាតិនិយមប្រចាំឆ្នាំរបស់សាថារណៈរដ្ឋស៊ែរបី បានបញ្ជាក់ពីការបែកបាក់ជនជាតិភាគតិច និងនយោបាយយ៉ាងជ្រៅ នៅក្នុងប្រទេសតំបន់បាល់កង់មួយនេះ។

គុយបា ត្រៀមទប់ទល់សម្រាប់ផលប៉ះពាល់ ខណៈតម្លៃឧស្ម័ន នឹងហក់ឡើងខ្ពស់

ប្រជាជនគុយបា នៅទូទាំងរដ្ឋធានី ដែលមកប្រមូលផ្តុំគ្នានៅតាមស្ថានីយ៍ប្រេងឥន្ធនៈ កាលពីថ្ងៃអង្គារ និងបានត្រៀមទប់ទល់ចំពោះផលប៉ះពាល់ មុនពេលការហក់ឡើងតម្លៃប្រេងឥន្ធនៈខ្ពស់បំផុតនៅប្រទេសកោះមួយនេះ ក្នុងរយៈពេលជាច្រើនទសវត្សរ៍មក។ រដ្ឋាភិបាលគុយបា បានប្រកាសកាលពីថ្ងៃចន្ទ ថា នឹងដំឡើងថ្លៃលក់រាយប្រេងសាំងគុណភាព៩៤ របស់ខ្លួនពី ៣០ ទៅ ១៥៦ ប៉េសូ ក្នុងមួយលីត្រ ចាប់ពីថ្ងៃទី ១ ខែកុម្ភៈ ជាការកើនឡើង៥ដង ដែលរដ្ឋាភិបាលគ្រប់គ្រងដោយកុម្មុយនិស្ត និយាយថា ចាំបាច់ដើម្បីធានាបានការផ្គត់ផ្គង់ប្រេងឥន្ធនៈ។ការកើនឡើងតម្លៃសម្រាប់ប្រេងសាំង៩៤ ដ៏ពេញនិយម នឹងនាំឲ្យប្រេងឥន្ធនៈក្នុងមួយធុងចំណុះ៤០ លីត្រ ឡើងដល់ ៦.២៤០ប៉េសូ ឬប្រហែល ២៣ ដុល្លារ នៅក្នុងអត្រាប្តូរប្រាក់ទីផ្សារងងឹត លើសពីប្រាក់ខែរដ្ឋជាមធ្យម ៤.២០៩ ប៉េសូ ឬ ១៥,៦០ ដុល្លារ។ រដ្ឋាភិបាលបាននិយាយថា ថ្នាក់ផ្សេងទៀតនៃប្រេងសាំង និងប្រេងម៉ាស៊ូត នឹងហក់ឡើងស្រដៀងគ្នា។ការប្រកាសនេះធ្វើឡើង ទោះបីជាមានពាក្យចចាមអារ៉ាមជាច្រើនខែមកក៏ដោយ បានធ្វើឱ្យរង្គោះរង្គើប្រទេសគុយបា ជាកន្លែងដែលពលរដ្ឋ ពឹងផ្អែកលើការឧបត្ថម្ភធនរបស់រដ្ឋយ៉ាងច្រើន ដើម្បីរស់រានមានជីវិត ដែលបានឃើញអតិផរណា និងតម្លៃទំនិញ ព្រមទាំងសេវាកម្មភាគច្រើន បានហក់ឡើងខ្ពស់។រដ្ឋាភិបាលបាននិយាយថា ខ្លួននឹងដំណឡើងថ្លៃឧស្ម័នរាវ ដែលប្រើប្រាស់សម្រាប់ចម្អិនអាហារ និងអគ្គិសនី សម្រាប់អ្នកប្រើប្រាស់ច្រើន ដែលបាននិយាយថា ខ្លួននឹងការពារការងាយរងគ្រោះពីការហក់ឡើងតម្លៃ។ រដ្ឋាភិបាលរបស់ប្រទេសគុយបា បាននិយាយថា ការគិតប្រាក់ជាប្រាក់ដុល្លារ ជាការចាំបាច់ដើម្បីប្រមូលមូលនិធិនាំចូលប្រេងឥន្ធនៈពីបរទេស និងបាននិយាយថាខ្លួនសង្ឃឹមថា វិធានការថ្មីនឹងជួយរក្សាស្ថិរភាពការផ្គត់ផ្គង់ក្នុងរយៈពេលវែង។

រដ្ឋមន្ត្រីការបរទេសអាមេរិក៖ ចំនួនជនស៊ីវិលស្លាប់ប្រចាំថ្ងៃនៅតំបន់ហ្កាហ្សា ខ្ពស់ខ្លាំង

រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃអង្គារថា សហរដ្ឋអាមេរិកជឿថា ចំនួនអ្នកស្លាប់ប្រចាំថ្ងៃក្នុងសង្គ្រាមលើជនស៊ីវិលនៅតំបន់ហ្កាហ្សា ខ្ពស់ខ្លាំង។ លោក Blinken និយាយថា ការចោទប្រកាន់អំពើប្រល័យពូជសាសន៍របស់អាហ្វ្រិកខាងត្បូងទៅលើអ៊ីស្រាអែលគឺ «គ្មានប្រយោជន៍» ។ លោក Blinken បានថ្លែងដូច្នេះនៅក្នុងសន្និសីទសារព័ត៌មានមួយ បន្ទាប់ពីជំនួបពិភាក្សានៅទីក្រុង Tel Aviv ជាមួយមេដឹកនាំអ៊ីស្រាអែល។ លោក Blinken និយាយថា ប្រជាជនប៉ាឡេស្ទីន ត្រូវតែអាចវិលត្រឡប់ទៅលំនៅឋានវិញ បានក្នុងពេលឆាប់តាមលក្ខខណ្ឌអនុញ្ញាត និងបានលើកឡើងពីកិច្ចព្រមព្រៀងស្តីពីផែនការសម្រាប់អង្គការសហប្រជាជាតិ ដើម្បីបំពេញបេសកកម្មវាយតម្លៃនៅតំបន់ហ្កាហ្សា។ រដ្ឋមន្ត្រីការបរទេសអាមេរិក លោក Antony Blinken បានជំរុញឱ្យមេដឹកនាំអ៊ីស្រាអែល បញ្ចៀសការបង្កគ្រោះថ្នាក់ដល់ជនស៊ីវិល ខណៈខ្លួនដាក់សម្ពាធលើសង្គ្រាមប្រឆាំងក្រុមហាម៉ាសនៅតំបន់ហ្កាហ្សា និងបាននិយាយថា ការបង្កើតរដ្ឋប៉ាឡេស្ទីន គឺជាគន្លឹះនៃដំណោះស្រាយរយៈពេលវែង។ លោក Blinken និយាយថា ចំនួនអ្នកស្លាប់ប្រចាំថ្ងៃលើជនស៊ីវិលនៅតំបន់ហ្កាហ្សា ជាពិសេសកុមារ គឺមានចំនួនខ្ពស់ខ្លាំង។ លោកបានប្រាប់នាយករដ្ឋមន្ត្រីថា សហរដ្ឋអាមេរិក បដិសេធដាច់ខាតរាល់សំណើដែលគាំទ្រសម្រាប់ការតាំងទីលំនៅថ្មីរបស់ពលរដ្ឋប៉ាឡេស្ទីននៅខាងក្រៅតំបន់ហ្កាហ្សា ហើយនាយករដ្ឋមន្ត្រី បានបញ្ជាក់ជាថ្មីដល់លោកថា នេះពុំមែនជាគោលនយោបាយរបស់រដ្ឋាភិបាលអ៊ីស្រាអែលនោះទេ។យោងតាមក្រសួងការបរទេស បានឲ្យដឹងថា ការអត្ថាធិប្បាយរបស់លោក Blinken បានធ្វើឡើងបន្ទាប់ពីជំនួបជាមួយនាយករដ្ឋមន្រ្តី លោក Benjamin Netanyahu និងគណៈរដ្ឋមន្ត្រីសង្គ្រាមរបស់លោក ដែលក្នុងអំឡុងពេលនោះ លោកបានបញ្ជាក់លើសារៈសំខាន់នៃការបញ្ចៀសការបង្កគ្រោះថ្នាក់ដល់ជនស៊ីវិលបន្ថែមទៀត។ ការទម្លាក់គ្រាប់បែករបស់អ៊ីស្រាអែលនៅក្នុងតំបន់ហ៊ុមព័ទ្ធមិនបានស្រាកស្រាននោះទេ ទោះបីជារដ្ឋមន្ត្រីការពារជាតិរបស់ប្រទេសនេះ បានប្រកាសពីដំណាក់កាលថ្មីនៃសង្រ្គាមដែលមានគោលដៅច្រើនជាងនេះក៏ដោយ។ ក្រុមគ្រួសារនៅតំបន់ហ្កាហ្សា បន្តប្រញាប់ប្រញាល់ទៅមន្ទីរពេទ្យជារៀងរាល់ព្រឹក ដោយដឹកសាច់ញាតិដែលរងរបួសអំឡុងពេលការបំផ្ទុះគ្រាប់បែក។

អ៊ីស្រាអ៊ែល ចោទប្រកាន់អាហ្វ្រិកខាងត្បូងពីបទមិនមានភាពស្មោះត្រង់ជុំវិញករណីប្រល័យពូជសាសន៍

ពុំមានអ្វីឃោរឃៅ និងមិនសមហេតុផល ជាងការអះអាងនេះទេ។ប្រធានាធិបតីអ៊ីស្រាអែល លោក Isaac Herzog កាលពីថ្ងៃអង្គារ (ទី៩ ខែមករា) និយាយអំពីបណ្តឹងដែលប្តឹងដោយប្រទេសអាហ្វ្រិកខាងត្បូងប្រឆាំងនឹងប្រទេសរបស់ខ្លួន នៅតុលាការយុត្តិធម៌អន្តរជាតិ (ICJ)។ប្រទេសនេះ បានចោទប្រកាន់អ៊ីស្រាអែលពីបទប្រល័យពូជសាសន៍ប្រឆាំងនឹងប្រជាជនប៉ាឡេស្ទីន ក្នុងការវាយលុកតំបន់ហ្កាហ្សារបស់ខ្លួន។សវនាការក្នុងសំណុំរឿងនេះនៅតុលាការ ICJ នឹងចាប់ផ្តើមនៅថ្ងៃព្រហស្បតិ៍ (១១ មករា) ដោយស្នើសុំវិធានការបណ្តោះអាសន្ន រួមទាំងការផ្អាកជាបន្ទាន់នូវយុទ្ធនាការយោធារបស់អ៊ីស្រាអែល។ប៉ុន្តែថ្លែងក្នុងអំឡុងពេលនៃដំណើរទស្សនកិច្ចរបស់រដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន (Anthony Blinken) លោក Herzog បានចោទប្រកាន់អាហ្វ្រិកខាងត្បូងពីបទមិនមានភាពស្មោះត្រង់។តាមពិតទៅ សត្រូវរបស់យើង គឺក្រុមហាម៉ាស។ នៅក្នុងធម្មនុញ្ញរបស់ពួកគេ (ពួកគេ) អំពាវនាវឲ្យមានការបំផ្លិចបំផ្លាញ និងការបំផ្លិចបំផ្លាញនៃរដ្ឋអ៊ីស្រាអែល ដែលជារដ្ឋជាតិតែមួយគត់របស់ប្រជាជនជ្វីហ្វ។ការវាយលុករបស់អ៊ីស្រាអែលនៅក្នុងក្របខ័ណ្ឌប៉ាឡេស្ទីន បានធ្វើឡើង បន្ទាប់ពីមានការវាយលុកឆ្លងព្រំដែនកាលពីថ្ងៃទី៧ ខែតុលាដោយក្រុមហាម៉ាស ដែលក្នុងនោះយោងទៅតាមអាជ្ញាធរអ៊ីស្រាអែលមនុស្ស ១.២០០នាក់ ត្រូវបានសម្លាប់។

កងកម្លាំងការពារអ៊ីស្រាអែល៖ យុទ្ធជនហាម៉ាសចំនួន៤០នាក់ ត្រូវបានសម្លាប់ នៅទីក្រុងខាន់យូនីស

ការប្រយុទ្ធគ្នារវាងកងកម្លាំងអ៊ីស្រាអែល និងក្រុមហាម៉ាស បានផ្ទុះឡើងនៅតំបន់ហ្កាហ្សា ខណៈដែលរដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន ( Antony Blinken) បានអង្គុយចរចាជាមួយមេដឹកនាំសង្រ្គាមអ៊ីស្រាអែលកាលពីថ្ងៃអង្គារ ដោយយោធា បាននិយាយថា ខ្លួនបាន «សម្លាប់» យុទ្ធជនហាម៉ាសចំនួន ៤០នាក់ នៅទីក្រុងខាន់យូនីស។កងកម្លាំងការពារអ៊ីស្រាអែល បាននិយាយនៅក្នុងការព័ត៌មានបច្ចុប្បន្នភាពលើបណ្តាញសង្គម Xថា ក្រុមសកម្មប្រយុទ្ធ ត្រូវបានសម្លាប់ នៅក្នុងការវាយលុកថ្មើរជើង ដែលដឹកនាំដោយទាហានឆត្រយោងនៃកងពលលេខ ៩៨ របស់កងទ័ពអ៊ីស្រាអែល ចូលទៅកណ្តាលនៃទីក្រុងហ្កាហ្សាភាគខាងត្បូង ក្នុងរយៈពេល ២៤ម៉ោងកន្លងមក ដែលក្នុងនោះ អាវុធជាច្រើនប្រភេទ និងកំណាត់ផ្លូវរូងក្រោមដីសំខាន់ៗ ត្រូវបានរកឃើញនៅទីនោះ។ អាវុធដែលត្រូវរកឃើញបានរួមមានកាំភ្លើងវែង Kalashnikov ចំនួន ១២ ដើម កាំភ្លើងបាញ់ RPG ចំនួន ៤ដើម គ្រាប់បែកដៃរាប់សិបគ្រាប់ គ្រាប់រំសេវ និងអាវកាក់។អ្នកនាំពាក្យរបស់កងកម្លាំងការពារអ៊ីស្រាអែល លោក Avichay Adaree បាននិយាយនៅក្នុងការបង្ហោះដាច់ដោយឡែកមួយថា កងពលថ្មើរជើងរបស់កងកម្លាំងការពារនេះ ក៏បានបន្តការវាយលុក នៅក្នុងតំបន់ Maghazi នៃតំបន់ហ្កាហ្សាភាគកណ្តាល ដោយចូលរួមជាមួយក្រុមយុទ្ធជន ដែលភ្ជាប់ទៅនឹងកងពលតូចជំរំកណ្តាលរបស់ក្រុមហាម៉ាស ហើយបានអំពាវនាវឲ្យមានការវាយប្រហារតាមអាកាស ដើម្បីកម្ទេចអ្នកបំផ្លិចបំផ្លាញ។កងកម្លាំងទ័ពជើងទឹកអ៊ីស្រាអែល នៅឯឆ្នេរសមុទ្រ ក៏បានបាញ់ទៅលើទីតាំងយោធា ឃ្លាំង និងរថយន្តកងទ័ពជើងទឹកដែលប្រើប្រាស់ដោយក្រុមហាម៉ាស។

អេហ្ស៊ីប បដិសេធសំណើរបស់អ៊ីស្រាអែល ក្នុងការត្រួតពិនិត្យតំបន់ទ្រនាប់ជាប់ព្រំដែនតំបន់ហ្កាហ្សា

ប្រភពសន្តិសុខអេហ្ស៊ីបចំនួនបីបាននិយាយថា អេហ្ស៊ីបបានច្រានចោលសំណើរបស់អ៊ីស្រាអែលសម្រាប់ការត្រួតពិនិត្យកាន់តែខ្លាំងរបស់អ៊ីស្រាអែល លើតំបន់ទ្រនាប់នៅព្រំដែនអេហ្ស៊ីប-ហ្កាហ្សា ហើយកំពុងផ្តល់អាទិភាពដល់កិច្ចខិតខំប្រឹងប្រែងដើម្បីស្វះស្វែងរកបទឈប់បាញ់មួយ មុនពេលធ្វើការលើការរៀបចំក្រោយសង្គ្រាម។អេហ្ស៊ីបមានព្រំដែន ១៣គីឡូម៉ែត្រ ជាមួយតំបន់ហ្កាហ្សា ដោយជាព្រំដែនតែមួយគត់នៃតំបន់ឆ្នេរហ៊ុមព័ទ្ធប៉ាឡេស្ទីននេះ ដែលមិនត្រូវបានគ្រប់គ្រងដោយផ្ទាល់ពីអ៊ីស្រាអែល។ រួមជាមួយប្រទេសកាតា ប្រទេសអេហ្ស៊ីបក៏បានដើរតួនាទីឈានមុខគេក្នុងកិច្ចពិភាក្សាដើម្បីសម្របសម្រួលបទឈប់បាញ់ថ្មីនៅតំបន់ហ្កាហ្សា និងធានាបាននូវកិច្ចព្រមព្រៀងសម្រាប់ការដោះលែងចំណាប់ថ្នូរអ៊ីស្រាអែល ដែលត្រូវចាប់ខ្លួនដោយក្រុមហាម៉ាស។ប្រភពរបស់អេហ្ស៊ីបនោះបាននិយាយថា ក្នុងអំឡុងពេលកិច្ចចរចាទាំងនោះ អ៊ីស្រាអែលបានស្នើទៅកាន់ប្រទេសអេហ្ស៊ីប អំពីការធានាសុវត្ថិភាពច្រករបៀង ហ្វីឡាឌែលហ្វៀ (Philadelphia) ដែលជាតំបន់ទ្រនាប់តូចចង្អៀតនៅតាមព្រំដែន ដែលជាផ្នែកនៃផែនការរបស់អ៊ីស្រាអែល ដើម្បីការពារការវាយប្រហារនាពេលអនាគត។ប្រភពអេហ្ស៊ីបដដែលនោះបាននិយាយថា ក្រុមមន្ត្រីអ៊ីស្រាអែលមិនបានពិភាក្សាអំពីការគ្រប់គ្រងច្រករបៀងក្នុងអំឡុងពេលកិច្ចចរចាបទឈប់បាញ់បច្ចុប្បន្នទេ ប៉ុន្តែផ្ទុយទៅវិញបានស្នើសុំចូលរួមក្នុងការត្រួតពិនិត្យតំបន់នេះ រួមទាំងតាមរយៈការចែករំលែកការប្រើប្រាស់បច្ចេកវិទ្យាត្រួតពិនិត្យថ្មីដែលអ៊ីស្រាអែលនឹងទទួល។ ប្រភពនោះបានបន្ថែមថា ក្រុមអ្នកចរចាអេហ្ស៊ីបបានច្រានចោលគំនិតនេះ ប៉ុន្តែអេហ្ស៊ីបបានពង្រឹងរបាំងនៅម្ខាងនៃព្រំដែនរបស់ខ្លួន៕

លោក Biden មិនធ្លាប់បានដឹងពីជំងឺមហារីកក្រពេញប្រូស្តាតរបស់ប្រធានមន្ទីរបញ្ចកោនទេ រហូតដល់ពេលនេះ

សេតវិមានបាននិយាយថា ប្រធានាធិបតីសហរដ្ឋអាមេរិក លោក ចូ បៃដិន (Joe Biden) មិនបានដឹងថា រដ្ឋមន្ត្រីការពារជាតិរបស់ខ្លួន គឺលោក ឡយដ៍ អស្ទីន (Lloyd Austin) មានជំងឺមហារីកក្រពេញប្រូស្តាតនោះទេ រហូតដល់ថ្ងៃអង្គារ (០៩ មករា) ប៉ុន្មាននាទីបន្ទាប់ពីជំងឺនោះត្រូវបានបង្ហាញជាសាធារណៈ រួមជាមួយនឹងការឆ្លងដែលត្រូវបានរក្សាទុកជាការសម្ងាត់ផងដែរ។លោក អស្ទីន ដែលមានវ័យ ៧០ឆ្នាំ ត្រូវបានសម្រាកនៅមន្ទីរពេទ្យចាប់តាំងពីថ្ងៃទី០១ ខែមករា មកនៅមជ្ឈមណ្ឌលវេជ្ជសាស្ត្រយោធាជាតិ វ៉លធើ រីដ (Walter Reed) ដោយនោះជាការពិតដែលមន្ទីរបញ្ចកោណបានរក្សាទុកមិនឲ្យសាធារណជន សេតវិមាន និងសភាបានដឹងអស់រយៈពេលជាច្រើនសប្តាហ៍មុន ដែលបង្កឱ្យមានប្រតិកម្មនយោបាយដ៏ធំមួយ។អនុប្រធានផ្ទាល់របស់លោក អស្ទីន គឺលោកស្រី ខាត់លីន ហីកស៍ (Kathleen Hicks) ក៏មិនត្រូវបានប្រាប់ឲ្យដឹងអស់ពេលជាច្រើនថ្ងៃដែរ សូម្បីតែបន្ទាប់ពីលោកស្រីត្រូវបានគេប្រាប់ក្នុងអំឡុងពេលវិស្សមកាលនៅដែនដី ពើតូ តីកូ (Puerto Rico) ឱ្យបំពេញភារកិច្ចមួយចំនួនរបស់លោក អស្ទីន នៅថ្ងៃទី០២ ខែមករា។ លោក អស្ទីន និងលោក បៃដិន បានជួបនិយាយគ្នាកាលពីថ្ងៃសៅរ៍ ប៉ុន្តែគេមិនច្បាស់ទេថាហេតុអ្វីបានជាលោក បៃដិន មិនបានដឹងរហូតដល់ថ្ងៃអង្គារអំពីជំងឺមហារីកក្រពេញប្រូស្តាតរបស់លោក អស្ទីន។ប្រមុខមន្ទីរបញ្ចកោនរូបនេះត្រូវបានគេដឹកតាមរថយន្តគិលានសង្គ្រោះនៅថ្ងៃទី០១ ខែមករា ទៅមន្ទីរពេទ្យយោធា វ៉លធើ រីដ បន្ទាប់ពីទទួលរងផលវិបាកពីការព្យាបាលមហារីកក្រពេញប្រូស្តាតនៅថ្ងៃទី២២ ខែធ្នូ ដោយរួមមានអាការៈក្អួតចង្អោរ ឈឺពោះខ្លាំង ចុកត្រគាក និងឈឺជើង។ បន្ទាប់ពីលោកត្រូវបានគេរកឃើញថាមានការឆ្លងមេរោគផ្លូវបង្ហូរនោម លោក អស្ទីន ត្រូវបានគេផ្លាស់នៅថ្ងៃទី០២ ខែមករា ទៅកាន់បន្ទប់ថែទាំសុខភាពដែលកាន់តែដិតដល់ជាងមុន៕

កោះតៃវ៉ាន់ មិនចាត់ទុកការបាញ់បង្ហោះផ្កាយរណបរបស់ចិន ជាការជ្រៀតជ្រែកក្នុងការបោះឆ្នោតទេ

ការិយាល័យមេដឹកនាំកោះតៃវ៉ាន់បាននិយាយថា ខ្លួនមិនបានចាត់ទុកការបាញ់បង្ហោះផ្កាយរណបរបស់ចិន ដែលគ្រាប់រ៉ូកែតបានហោះពីលើកោះតៃវ៉ាន់ភាគខាងត្បូង ជាការប៉ុនប៉ងជ្រៀតជ្រែកក្នុងការបោះឆ្នោតនៅមុនការបោះឆ្នោតមេដឹកនាំ និងសភានៅថ្ងៃសៅរ៍ (១៣ មករា) ខាងមុខនេះនោះទេ។កាលពីថ្ងៃអង្គារ (០៩ មករា) រដ្ឋាភិបាលកោះតៃវ៉ាន់បានចេញការជូនដំណឹងអំពីការវាយឆ្មក់តាមអាកាសដោយច្រឡំ បន្ទាប់ពីគ្រាប់រ៉ូកែតរបស់ចិន ដែលផ្ទុកផ្កាយរណបវិទ្យាសាស្ត្រ បានហោះពីលើភាគខាងត្បូងកោះតៃវ៉ាន់ ក្នុងរយៈកម្ពស់ជាង ៥០០គីឡូម៉ែត្រ។ ក្រោយមកអាជ្ញាធរការពារជាតិបានសូមអភ័យទោសចំពោះកំហុសឆ្គងពាក្យខុសជាភាសាអង់គ្លេស ដែលខ្លួនបានប្រើពាក្យថា «មីស៊ីល»។ការិយាល័យមេដឹកនាំរបស់កោះតៃវ៉ាន់ ឆ្លើយតបនឹងសំណួរដែលថាតើខ្លួនបានចាត់ទុកការបាញ់បង្ហោះផ្កាយរណបនេះជាការជ្រៀតជ្រែកក្នុងការបោះឆ្នោតដែរឬទេ ដោយនិយាយថា ខ្លួនមិនគិតថាមានហេតុផលនយោបាយនៅពីក្រោយការបាញ់បង្ហោះនោះទេ។ខណៈការបាញ់គ្រាប់រ៉ូកែតនោះបានបង្កឱ្យមានការជូនដំណឹងអំពីការវាយឆ្មក់តាមអាកាសដោយច្រឡំ កោះតៃវ៉ាន់ដែលចិនចាត់ទុកជាទឹកដីរបស់ខ្លួនជុំវិញការជំទាស់យ៉ាងខ្លាំងរបស់រដ្ឋាភិបាលនៅទីក្រុងតៃប៉ិ បានចោទប្រកាន់ក្រុងប៉េកាំង ម្តងហើយម្តងទៀតថាព្យាយាមជ្រៀតជ្រែកក្នុងការបោះឆ្នោតមិនថាតាមរយៈយោធា នយោបាយ សេដ្ឋកិច្ច ឬមធ្យោបាយអ្វីផ្សេងទៀតទេ។ ប្រទេសចិនបានឲ្យឈ្មោះការចោទប្រកាន់របស់តៃវ៉ាន់ទាំងនោះថាជា «ល្បិចដ៏កខ្វក់»៕

គ្រាប់ប្លាស្ទិករាប់លានគ្រាប់ត្រូវបានបោកបក់ទៅលើឆ្នេរសមុទ្រនៅប្រទេសអេស្ប៉ាញ

អ្នកស្ម័គ្រចិត្តរាប់រយនាក់បានចុះសម្អាតតាមឆ្នេរខ្សាច់ជាមួយនឹងកញ្ច្រែង និងប៉ែល កាលពីថ្ងៃអាទិត្យ (០៧ មករា) ក្នុងតំបន់ ហ្កាលីសា (Galicia) ភាគពាយ័ព្យនៃប្រទេសអេស្ប៉ាញ បន្ទាប់ពីគ្រាប់ប្លាស្ទិករាប់លានគ្រាប់បានបោកបក់ទៅលើឆ្នេររបស់ប្រទេសនេះ ដែលបង្កឱ្យមានការព្រួយបារម្ភអំពីបរិស្ថាន និងល្បែងស្តីបន្ទោសខាងនយោបាយ។គ្រាប់ប្លាស្ទិក ដែលប្រើសម្រាប់ផលិតរបស់របរប្រើប្រាស់ប្រចាំថ្ងៃ រាប់ចាប់ពីដបទឹក រហូតដល់ថង់ដាក់ទំនិញ ហើយត្រូវបានគេស្គាល់ថាបានបន្ថែមបញ្ហាប្លាស្ទិកចូលទៅក្នុងមហាសមុទ្រ និងទន្លេរបស់ពិភពលោកនោះ បានមកពីកុងតឺន័រមួយដែលបានធ្លាក់ពីនាវា តូខូណៅ (Toconao) ជានាវាដែលបានចុះបញ្ជីរបស់ប្រទេសលីបេរីយ៉ា ជួលដោយក្រុមហ៊ុនដឹកជញ្ជូនយក្ស មែកស៍ (Maersk) នៅឯឆ្នេរសមុទ្រនៃប្រទេសជិតខាងព័រទុយហ្គាល់ កាលពីខែមុន នេះបើយោងតាមក្រុមហ៊ុនផលិតគ្រាប់ប្លាស្ទិកអឺរ៉ុប បេដេកូ (Bedeko) បាននិយាយនៅក្នុងសេចក្តីថ្លែងការណ៍មួយ។ឧបនាយករដ្ឋមន្ត្រីអេស្ប៉ាញ លោកស្រី ម៉ារីយ៉ា ហេស៊ូស ម៉ុនតេរ៉ូ (Maria Jesus Montero) បានប្រាប់ទូរទស្សន៍រដ្ឋ TVE ថា រដ្ឋាភិបាលមានការព្រួយបារម្ភអំពី «ផលប៉ះពាល់យ៉ាងធ្ងន់ធ្ងរ» ប៉ុន្តែមិនទាន់ដឹងពីផលប៉ះពាល់ពិតប្រាកដ និងថាតើវានឹងប៉ះពាល់ដល់ការនេសាទដែរឬយ៉ាងណានោះទេ៕

អ៊ីរ៉ង់ នឹងពង្រឹងកិច្ចប្រឹងប្រែងប្រឆាំងភេរវកម្មជាមួយបណ្ដាប្រទេសក្នុងតំបន់

អ្នកនាំពាក្យក្រសួងការបរទេសអ៊ីរ៉ង់ លោក ណាសសឺ ខាណានី (Nasser Kanaani) បាននិយាយនៅក្នុងសន្និសីទសារព័ត៌មានមួយក្នុងទីក្រុងតេអេរ៉ង់ កាលពីថ្ងៃចន្ទ (០៨ មករា) ជាការឆ្លើយតបទៅនឹងការបំផ្ទុះគ្រាប់បែកដ៏បង្ហូរឈាមនៅទីក្រុងឃើម៉ាន់ (Kerman) ភាគអាគ្នេយ៍កាលពីសប្តាហ៍មុន ដែលបានសម្លាប់មនុស្សរាប់សិបនាក់ថា អ៊ីរ៉ង់ នឹងពង្រឹងកិច្ចសហប្រតិបត្តិការជាមួយបណ្ដាប្រទេសក្នុងតំបន់ដើម្បីប្រយុទ្ធនឹងភេរវកម្មរួមគ្នា។លោក ខាណានី បាននិយាយថា អំពើភេរវកម្មគឺជាការគំរាមកំហែងទូទៅសម្រាប់ពិភពលោក ហើយសំណល់នៃអង្គការជ្រុលនិយមនៅតែគំរាមកំហែងប្រជាជនក្នុងតំបន់ ហើយអ៊ីរ៉ង់នឹងពង្រឹងកិច្ចខិតខំប្រឹងប្រែងប្រឆាំងភេរវកម្មជាមួយបណ្តាប្រទេសក្នុងតំបន់។លោក ខាណានី បាននិយាយថា ភាពតានតឹងបច្ចុប្បន្ននៅសមុទ្រក្រហម គឺជាការបង្ហាញមួយនៃឥទ្ធិពលរាលដាលនៃជម្លោះនៅតំបន់ហ្កាហ្សា ដែលបណ្តាលមកពីក្រុមចម្រុះលោកខាងលិចដឹកនាំដោយសហរដ្ឋអាមេរិកសម្រាប់ការគាំទ្រអ៊ីស្រាអែល ហើយវត្តមានយោធារបស់សហរដ្ឋអាមេរិកនៅមជ្ឈិមបូព៌ាគឺជា ប្រភពនៃអស្ថិរភាពក្នុងតំបន់។អ្នកនាំពាក្យរូបនេះក៏បាននិយាយផងដែរថា នេះគឺជាសេចក្តីប្រាថ្នារួមរបស់សហគមន៍អន្តរជាតិក្នុងការសម្រេចបានបទឈប់បាញ់រវាងប៉ាឡេស្ទីន និងអ៊ីស្រាអែល និងទប់ស្កាត់ការរីករាលដាលនៃជម្លោះ ហើយអ៊ីរ៉ង់នឹងបន្តរួមចំណែកក្នុងការដោះស្រាយជម្លោះនេះ៕

បណ្ដាញសង្គម

ព័ត៌មានថ្មីៗ

អ៊ីតាលីស៊ើបអង្កេតការឃុំខ្លួនសកម្មជនកងនាវាជំនួយ ពីសំណាក់អ៊ីស្រាអែល

បងប្រុស៖ ម្ចាស់ពានរង្វាន់ណូបែល លោកស្រី Mohammadi ត្រូវការការព្យាបាលបេះដូងបន្ទាន់ នៅអ៊ីរ៉ង់

អារ៉ាប់រួម បញ្ជាក់ថា អ៊ីរ៉ង់បានបាញ់យានដ្រូនទៅលើនាវាដឹកប្រេង នៅច្រកសមុទ្រ Hormuz

បេសកជនក្រុមប្រឹក្សាសន្តិភាពរបស់លោក Trump នឹងពិភាក្សាជាមួយមន្ត្រីអ៊ីស្រាអែល ពាក់ព័ន្ធការរឹតបន្តឹង នៅហ្កាហ្សា

រុស្ស៊ីនឹងឆ្លើយតបយ៉ាងខ្លាំងក្លា ចំពោះការបណ្តេញអ្នកការទូតដោយអូទ្រីស

អ៊ីរ៉ង់ជំរុញឲ្យនាវាជៀងវាងការចូលទៅក្នុងច្រកសមុទ្រហ័រមូស ដោយគ្មានការអនុញ្ញាតពីទីក្រុងតេអេរ៉ង់

សម្ដេច ម៉ែន សំអន គាំទ្រផ្សារផលិតផលខ្មែខេត្តកំពង់ចាម ដើម្បីបង្កើនផលិតភាពផលិតផលក្នុងស្រុក បង្កើនប្រាក់ចំណូល និងលើកស្ទួយជីវភាពប្រជាជន និងជំរុញអភិវឌ្ឍន៍សេដ្ឋកិច្ច-សង្គមឲ្យកាន់តែប្រសើរឡើង

ក្រសួងយុត្តិធម៌រៀបចំ កម្មវិធីជិះកង់អង្គរ លើកទី៤ ដើម្បីរៃអង្គាសថវិកាជូន មន្ទីរពេទ្យជ័យវរ្ម័នទី៧ (គន្ធបុប្ផាទី៣)

មេបញ្ជាការកងពលតូចដឹកជញ្ជូនលេខ៩៩ប្រាប់ដល់កងទ័ពក្នុងកងពលទាំងអស់បន្តភារៈកិច្ចជូនជាតិមាតុភូមិដោយភាពអត់ធ្មត់ និងមោះមុត

រដ្ឋមន្ត្រីការប្រទេសកម្ពុជាបង្ហាញការត្រៀមខ្លួនរួចជាស្រេច ក្នុងការធ្វើការយ៉ាងជិតស្និទ្ធជាមួយឯកអគ្គរដ្ឋទូតអាមេរិកថ្មី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877