BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

គ្រូបង្រៀនឈីលីធ្វើកូដកម្មបន្ទាប់ពីកិច្ចព្រមព្រៀងជាមួយរដ្ឋាភិបាលបរាជ័យ

ឈីលី៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា គ្រូបង្រៀនៅប្រទេសឈីលី បានបន្តធ្វើកូដកម្មគ្មានកំណត់មួយកាលពីថ្ងៃអង្គារ និងបានចេញដើរទៅកាន់វិមានប្រធានាធិបតី La Moneda បន្ទាប់ពីបំណងមួយដើម្បីឈានដល់កិច្ចព្រមព្រៀងមួយជាមួយរដ្ឋាភិបាល បានបរាជ័យ។ការចេញធ្វើបាតុកម្ម ដែលត្រូវបានរៀបចំឡើងដោយសហជីពគ្រូបង្រៀន រួមមានទាំងការស្រែក និងលើកស្លាកសញ្ញាផ្សេងៗទាមទាការបង់ប្រាក់នូវអ្វីដែលគេហៅថា «បំណុលប្រវត្តិសាស្ត្រ» ព្រមទាំងការទាមទាដែលមិនពេញចិត្តជាបន្តបន្ទាប់ដែលសហជីពបានធ្វើរយៈពេលជាច្រើនឆ្នាំមកហើយ។ បំណុលដែលបានចោទប្រកាន់បានកើតមាននៅដើមទសវត្សរ៍ឆ្នាំ១៩៨០ នៅពេលដែលឧត្តមសេនីយ៍លោក Augusto Pinochet បានផ្លាស់ប្តូរផ្នែកនៃប្រព័ន្ធអប់រំសាធារណៈរបស់ប្រទេស ពីសហព័ន្ធទៅជាការគ្រប់គ្រងរបស់ក្រុង។សហជីពបានទាមទាគំរូការសិក្សាអប់រំថ្មី ខណៈគំរូបច្ចុប្បន្នត្រូវបានបង្កើតឡើងអំឡុងភាពផ្តាច់ការរបស់ប្រទេសឈីលី នៅក្នុងទសវតស្សរ៍ឆ្នាំ១៩៧០ ដែលគំរូថ្មីនេះជាប្រព័ន្ធស្វែងរកមូលនិធិ និងវិធានការបន្ថែមដើម្បីការពារគ្រូបង្រៀនពីអំពើហិង្សានៅក្នុងសាលារៀនក្នុងចំណោមការទាមទារដ៍ទៃទៀត៕

អាមេរិក ព្រមានពីការបាត់បង់ជីវិតមនុស្ស និងគ្រោះមហន្តរាយ ខណៈព្យុះសង្ឃរាអ៊ីដាលីយ៉ាបោកបក់ខ្លាំងនៅរដ្ឋ Florida

អាមេរិក៖ ព្យុះសង្ឃរាអ៊ីដាលីយ៉ា(Hurricane Idalia) ដែលជាព្យុះដ៏មានឥទ្ធិពលកម្រិតទី២ បានបោកបក់យ៉ាងខ្លាំងនិងឆាប់រហ័ស និងកំពុងគំរាមកំហែងពីការបំផ្លិចបំផ្លាញដ៏មហន្តរាយ នៅតំបន់ឆ្នេរសមុទ្រភាគខាងលិចរបស់រដ្ឋ Florida ស្របពេលដែលក្រុមមន្ត្រីទទូចឲ្យពលរដ្ឋជម្លៀសចេញពីផ្លូវព្យុះ។ ព្យុះនេះ មានកម្លាំងបោកបក់១០៥គីឡូម៉ែត្រក្នុងមួយម៉ោង កាលពីយប់ថ្ងៃអង្គារ និងក្រៅរង្វង់ព្យុះរបស់វា បានកំពុងវាយប្រហាររដ្ឋ Florida រយៈពេលជាច្រើនម៉ោងរួចទៅហើយ ដែលបណ្ដាលឲ្យមានទឹកជំនន់នៅក្នុងតំបន់ឆ្នេរមួយចំនួន។មជ្ឈមណ្ឌលតាមដានព្យុះសង្ឃរាជាតិ បាននិយាយថា គេរំពឹងថាព្យុះនេះ នៅតែបន្តមានកម្លាំងក្លាយជាព្យុះសង្ឃរាដ៏មានឥទ្ធិពលមួយ មុនពេលបោះពួយទៅដល់តំបន់ឆ្នេរ ប៊ីកប៊ែន (Big Bend)របស់ រដ្ឋ Florida ជាទីដែលគេរំពឹងថាព្យុះនេះ នឹងវាយប្រហារដល់ដីគោកនៅព្រឹកថ្ងៃពុធនេះ ។ មជ្ឈមណ្ឌលនេះ បាននិយាយកាលពីដំបូងថា គេក៏បង្ហាញក្ដីរំពឹងផងដែរថា តំបន់មួយចំនួននៅឈូងសមុទ្ររបស់រដ្ឋមួយនេះ នឹងរងការគំរាមកំហែងដល់អាយុជីវិត ដោយសារកម្លាំងព្យុះខ្លាំង នៅពេលដែលខ្យល់បោកបក់ទៅកាន់តំបន់ច្រាំងមហាសមុទ្រនេះ ។ ការិយាល័យស្រុក ថេល័រ (Taylor County) បានព្រមានថា អាចនឹងមានការបាត់បង់ជីវិតមនុស្ស និងការបំផ្លិចបំផ្លាញដ៏ធ្ងន់ធ្ងរ ដោយនិយាយថាប្រជាពលរដ្ឋរស់នៅតាមតំបន់ឆ្នេរ ត្រូវបានបញ្ជាឲ្យជម្លៀសចេញ ៕

ករណីរំដោះទណ្ឌិតនៅខេត្តសៀមរាបតំណាងអយ្យការសម្រេចចោទប្រកាន់បទល្មើសជាច្រើន

ភ្នំពេញ ៖ ករណីក្រុមឧក្រឹដ្ឋជនប្រដាប់អាវុធរំដោះទណ្ឌិតនៅខេត្តសៀមរាប មកដល់ពេលនេះតំណាងអយ្យការអមសាលាដំបូងរាជធានីភ្នំពេញបានបើកការស៊ើបសួរលើជនសង្ស័យទាំងអស់ និងបានបញ្ជូនទៅចៅក្រមស៊ើបសួរដោយសម្រេចចោទប្រកាន់នូវបទល្មើសធំៗជាច្រើន។លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានឱ្យដឹងនៅរសៀលថ្ងៃទី២៩ ខែសីហា ឆ្នាំ២០២៣នេះថា ពាក់ព័ន្ធនឹងករណីរំដោះទណ្ឌិតនៅខេត្តសៀមរាបតំណាងអយ្យការអមសាលាដំបូងរាជធានីភ្នំពេញបានបើកការស៊ើបសួរលើជនសង្ស័យទាំងអស់ និងបានបញ្ជូនទៅចៅក្រមស៊ើបសួរដោយសម្រេចចោទប្រកាន់បទល្មើសមួយចំនួន។អ្នកនាំពាក្យអយ្យការអមសាលាដំបូងរាជធានីភ្នំពេញបានបញ្ជាក់ថា បទល្មើសទាំងនោះមាន ១-រៀបចំចាត់តាំងក្រុមជនប្រដាប់អាវុធ ផ្តើមគំនិតក្នុងអំពើចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស លួចរត់មានស្ថានទម្ងន់ទោស ដោយប្រើប្រាស់អាវុធ ផ្តើមគំនិតក្នុងអំពើបោះបង់អាវុធក្នុងទីកន្លែងសាធារណៈ និងបទល្មើសសម្អាតប្រាក់ តាមបញ្ញត្តិមាត្រា ៤៨៦ មាត្រា ២៥៤ កថាខណ្ឌទី១ ចំណុច៣ មាត្រា ៥៦៤ មាត្រា ២៨ មាត្រា ៤៩១ នៃក្រមព្រហ្មទណ្ឌ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ។ ២-សមគំនិតក្នុងអំពើលួចរត់មានស្ថានទម្ងន់ទោស ដោយមានប្រើប្រាស់អាវុធ តាមបញ្ញត្តិមាត្រា ២៩ និងមាត្រា ៥៦៤ នៃក្រមព្រហ្មទណ្ឌ ។ ៣-សមគំនិតក្នុងអំពើរៀបចំចាត់តាំងក្រុមជនប្រដាប់អាវុធ រក្សាទុកដោយខុសច្បាប់នូវសារធាតុញៀន តាមបញ្ញត្តិមាត្រា ២៩ មាត្រា ៤៨៦ នៃក្រមព្រហ្មទណ្ឌ និងមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន។ ៤-សមគំនិតក្នុងអំពើចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស តាមបញ្ញត្តិមាត្រា ២៩ មាត្រា ២៥៤ កថាខណ្ឌទី១ ចំណុច៣ នៃក្រមព្រហ្មទណ្ឌ ។ ៥-បោះបង់អាវុធក្នុងទីកន្លែងសាធារណៈ ផ្តើមគំនិតក្នុងអំពើបោះបង់អាវុធក្នុងទីកន្លែងសាធារណៈ និងសមគំនិតក្នុងអំពើបោះបង់អាវុធក្នុងទីកន្លែងសាធារណៈ តាមបញ្ញត្តិមាត្រា ២៨ មាត្រា ២៩ និងមាត្រា ៤៩១ នៃក្រមព្រហ្មទណ្ឌ ។ ៦-រៀបចំចាត់តាំងក្រុមជនប្រដាប់អាវុធ ចូលរួមក្នុងក្រុមជនប្រដាប់អាវុធ ចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស តាមបញ្ញត្តិមាត្រា ៤៨៦ មាត្រា ៤៨៥ និងមាត្រា ២៥៤ កថាខណ្ឌទី១ ចំណុច៣ នៃក្រមព្រហ្មទណ្ឌ និងបទល្មើសទី៧-កាន់កាប់ និងដឹកជញ្ជូនអាវុធដោយគ្មានការអនុញ្ញាត តាមបញ្ញត្តិមាត្រា ៤៩០ នៃក្រមព្រហ្មទណ្ឌ ។សូមជម្រាបថា ករណីរំដោះអ្នកទោសនេះបានកើតឡើងនៅម៉ោង៩ព្រឹកថ្ងៃទី១៧ ខែសីហាឆ្នាំ២០២៣ ដោយឧក្រិដ្ឋមួយក្រុមបើកបររថយន្ត Lexus ទៅរំដោះអ្នកទោសគ្រឿងញៀនជាជនជាតិចិនម្នាក់ ឈ្មោះ Chen Hsin Han នៅគ្លីនិកព្យាបាលធ្មេញមួយកន្លែង ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប រួចបានយករថយន្តនោះទៅផ្លុងចោលនៅជិតបុរីអាខេត ក្នុងសង្កាត់ស្វាយដង្គំ ហើយគេចខ្លួន ដោយបន្សល់អាវុធខ្លីជាច្រើនដើម និងសម្ភារៈមួយចំនួនក្នុងរថយន្ត ក្រោយមកនគរបាលបានស្វែងរកចាប់ខ្លួនក្រុមនេះបានជាបន្តបន្ទាប់ក្នុងរាជធានីភ្នំពេញ។ ចំពោះអ្នកទោសគ្រឿងញៀនជាជនជាតិចិន ឈ្មោះ Chen Hsin Han គឺជាមេក្លោងជួញដូរគ្រឿងញៀន ដែលត្រូវតុលាការខេត្តសៀមរាបកាត់ទោសឱ្យជាប់ពន្ធនាគាររយៈពេល៥២ឆ្នាំ កាលពីឆ្នាំ២០០៩៕ អត្ថបទ ៖ ប្រាក់ វ៉ាន់ដា

ទាហានម៉ារីនអាមេរិក កំណត់អត្តសញ្ញាណមនុស្ស៣នាក់ ដែលបានស្លាប់ក្នុងការធ្លាក់យន្តហោះនៅអូស្ត្រាលី

ទាហានម៉ារីនសហរដ្ឋអាមេរិក៣នាក់ ដែលបានស្លាប់នៅពេលយន្តហោះOsprey របស់ពួកគេបានធ្លាក់អំឡុងសមយុទ្ធយោធា នៅក្នុងប្រទេសអូស្ត្រាលី ត្រូវបានកំណត់អត្តសញ្ញាណដោយអង្គភាពរបស់ពួកគេ។ នាង Spencer R. Collart អាយុ២១ឆ្នាំ លោកកាពីទែន Eleanor V. LeBeau អាយុ២៩ឆ្នាំ និងលោក Tobin J. Lewis អាយុ៣៧ឆ្នាំស្ថិតក្នុងចំណោមទាហានម៉ារីន ២៣នាក់នៅលើយន្តហោះ MV-22B Osprey នៅពេលយន្តហោះបានធ្លាក់ នៅកោះ Melville កាលពីថ្ងៃអាទិត្យ។អង្គភាពរបស់ពួកគេបាននិយាយកាលពីថ្ងៃចន្ទថា នាងCollart គឺជាប្រធានក្រុមយានិកយន្តហោះ Osprey លោក LeBeau ជាអាកាសយានិក និងលោក Lewis ជាមន្ត្រីប្រតិបត្តិ នៃក្រុមកម្រិតមធ្យមកងម៉ារីនលេខ363។ លោកវរៈសេនីឯក Brendan Sullivan មន្ត្រីទីបញ្ជាការរបស់អង្គភាពបាននិយាយថា យើងសោកស្តាយយ៉ាងខ្លាំងចំពោះការបាត់បង់សមាជិកជាទីគោរពស្រលាញ់ចំនួន៣នាក់ របស់គ្រួសារកងកម្លាំងប្តូរវេនកងម៉ារីន Darwin។ គំនិតរបស់យើង និងការបួងសួងនៅជាមួយក្រុមគ្រួសារ និងនៅជាមួយអ្នកជាទីស្រលាញ់ទាំងអស់។ ក្នុងចំណោមកងម៉ារីន២០នាក់ផ្សេងទៀត ៣នាក់នៅព្យាបាលនៅឡើយនៅមន្ទីរពេទ្យ Royal Darwin Hospital។ ម្នាក់ក្នុងចំណោមពួកគេស្ថិតក្នុងស្ថានភាពធ្ងន់ធ្ងរ និង២នាក់ផ្សេងទៀតមានស្ថិរភាព ហើយអ្នកក្រៅពីនេះ១៧នាក់ទៀត បានព្យាបាលជាសះស្បើយដោយមានរបួសស្រាល និងបានចេញពីមន្ទីរពេទ្យ។ រីឯមូលហេតុនៃការធ្លាក់យន្តហោះកំពុងស្ថិតក្រោមការស៊ើបអង្កេត។

ប្រទេសម៉ិកស៊ិកបញ្ជូនទាហាន១.២០០នាក់បន្ថែមទៀត ទៅកាន់រដ្ឋ Michoacan បន្ទាប់ពីមានអំពើហិង្សាបង្កឡើង ដោយក្រុមជួញដូរគ្រឿងញៀន

រដ្ឋាភិបាលម៉ិកស៊ិកបាននិយាយកាលពីថ្ងៃចន្ទថា ខ្លួនបានបញ្ជូនទាហានចំនួន១.២០០នាក់បន្ថែមទៀត ទៅកាន់រដ្ឋមីឆ្វាខាន (Michoacan) ភាគខាងលិចដែលគ្រប់គ្រងដោយក្រុមជួញដូរគ្រឿងញៀន បន្ទាប់ពីមានអំពើហិង្សាកាលពីចុងសប្តាហ៍។រដ្ឋអាជ្ញា បាននិយាយថា ហាងលក់ទំនិញចំនួនបី និងរថយន្តដឹកទំនិញចំនួន៥គ្រឿង ត្រូវបានដុតបំផ្លាញ ដែលជាយុទ្ធសាស្ត្រមួយដែលក្រុមជួញដូរគ្រឿងញៀនតែងតែប្រើក្នុងរដ្ឋ ដើម្បីបិទផ្លូវ និងអនុវត្តការទាមទារជំរិតទារប្រាក់។ រដ្ឋអាជ្ញា បាននិយាយថា បុរសបីនាក់ និងយុវជនបីនាក់ ដែលមានអាយុ ១៦ និង ១៧ឆ្នាំ ត្រូវបានចាប់ខ្លួន នៅក្នុងការវាយប្រហារនេះ។សេចក្តីថ្លែងការណ៍របស់ក្រសួងការពារជាតិ បានឲ្យដឹងថា ទាហាន និងសមាជិកឆ្មាំជាតិ ត្រូវបានដាក់ពង្រាយនៅចុងសប្តាហ៍។ វាបានបន្តថា ពួកគេត្រូវបានបញ្ជាឲ្យរារាំងក្រុមឈ្មួញ គ្រឿងញៀនពីការបិទផ្លូវបន្ថែមទៀត«ដើម្បីឲ្យប្រជាជនអាចធ្វើអាជីវកម្មរបស់ពួកគេជាធម្មតា» ។ទាហាន ត្រូវបានឈរជើងនៅគ្រប់រដ្ឋម៉ិកស៊ិក ប៉ុន្តែកងទ័ពមិនបាននិយាយថា ចំនួនប៉ុន្មានរួចទៅហើយនៅក្នុងរដ្ឋមីឆ្វាខាន ( Michoacan) មុនពេលការដាក់ពង្រាយចុងសប្តាហ៍នោះ។

មនុស្ស១៣នាក់បានស្លាប់ ក្នុងបំណាក់ដីនៅប្រទេសតាហ្ស៊ីគីស្ថាន បន្ទាប់ពីភ្លៀងធ្លាក់ខ្លាំង

លំហូរល្បប់ដែលបង្កឡើងដោយភ្លៀងធ្លាក់ខ្លាំងបានសម្លាប់មនុស្ស១៣នាក់នៅក្នុងប្រទេសតាហ្សីគីស្ថានកាលពីថ្ងៃអាទិត្យ (២៧ សីហា) នេះបើយោងតាមរដ្ឋាភិបាលរបស់ប្រទេសអាស៊ីកណ្តាលមយយនេះបាននិយាយកាលពីថ្ងៃចន្ទ (២៨ សីហា) ដោយព្រមានថាតំបន់ភ្នំជាច្រើនរបស់ខ្លួននៅតែមានគ្រោះថ្នាក់។វីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម និងដោយគណៈកម្មាធិការស្ថានភាពអាសន្នរបស់ប្រទេសនេះពីកន្លែងនានាក្នុងទីក្រុង Vakhdat និងស្រុក Rudaki ទាំងនៅខាងក្រៅរដ្ឋធានី Dushanbe បានបង្ហាញរថយន្តនៅលើផ្លូវតំបន់ភ្នំលិចទឹក ដែលរងការខូចខាតយ៉ាងធ្ងន់ធ្ងរដោយសារលំហូរល្បប់ និងថ្មធំៗជាច្រើន៕

អារម្មណ៍ខឹងសម្បាបានផ្ទុះឡើងនៅប្រទេសឥណ្ឌា បន្ទាប់ពីគ្រូបង្រៀនម្នាក់ប្រាប់សិស្សឲ្យទះកំផ្លៀងមិត្តរួមថ្នាក់ជាជនជាតិម៉ូស្លីម

នគរបាលក្នុងប្រទេសឥណ្ឌា កំពុងស៊ើបអង្កេតលើគ្រូបង្រៀនម្នាក់ បន្ទាប់ពីវីដេអូដែលគ្រូបង្រៀនម្នាក់នោះឱ្យសិស្សទះកំផ្លៀងមិត្តរួមថ្នាក់អាយុ៧ឆ្នាំរបស់ពួកគេដែលជាជនម៉ូសី្លម បានបង្កឱ្យមានការខឹងសម្បារយ៉ាងទូលំទូលាយនៅក្នុងប្រទេស។ វីដេអូនៃឧបទ្ទវហេតុ ដែលបានកើតឡើងនៅក្នុងស្រុក Muzaffarnagar ភាគខាងជើងរដ្ឋ Uttar Pradesh នោះ បានបង្ហាញពីក្មេងប្រុសម្នាក់នេះឈរនៅចំពោះមុខមិត្តរួមថ្នាក់របស់គេដោយភាពភ័យខ្លាច ខណៈដែលគ្រូហៅសិស្សឱ្យវាយក្មេងនោះ។លោក Satyanarayan Prajapat ស្នងការនគរបាលរបស់ស្រុក Muzaffarnagar កាលពីថ្ងៃសុក្រ បាននិយាយថា គ្រូបង្រៀននោះបានប្រាប់សិស្សឱ្យវាយក្មេងប្រុសនេះ «ព្រោះគេមិនចាំកាលវិភាគបង្រៀនរបស់ខ្លួន» ។ យោងតាមលោក Prajapat បានឲ្យដឹងថា គ្រូបង្រៀនម្នាក់នោះក៏បាននិយាយយោងទៅលើសាសនារបស់ក្មេងប្រុសនេះផងដែរ។ នគរបាលស្រុកបានកសាងសំណុំរឿងប្រឆាំងនឹងអ្នកគ្រូបង្រៀននេះ ហើយការស៊ើបអង្កេតកំពុងដំណើរការ។ អ្នកគ្រូម្នាក់នោះ មិនត្រូវបានចោទប្រកាន់ជាផ្លូវការទេ។ឧបទ្ទវហេតុនេះបានបណ្តាលឱ្យមានការខឹងសម្បា និងការខកចិត្តស្ទើរតែក្នុងស្ថានភាពទូទៅ នៅក្នុងប្រទេសឥណ្ឌា ដែលជាប្រទេសប្រជាធិបតេយ្យដ៏ធំបំផុតរបស់ពិភពលោក មានប្រជាជនចំនួន១,៤ពាន់លាននាក់ ដែលគោលនយោបាយជាតិនិយមហិណ្ឌូរបស់គណបក្ស Bharatiya Janata (BJP) ដែលកំពុងកាន់អំណាច បានធ្វើឱ្យភាពតានតឹងសហគមន៍របស់ប្រទេសកាន់តែស៊ីជម្រៅ ហើយបានបង្កើតនូវអ្វីដែលក្រុមសិទ្ធិមនុស្ស និងអ្នករិះគន់រដ្ឋាភិបាលនិយាយថា ជាបរិយាកាសនៃការភ័យខ្លាច និងការផ្តាច់ខ្លួនក្នុងចំណោមក្រុមជនជាតិភាគតិចផងដែរ៕

មនុស្ស៣នាក់ត្រូវបានប្រហារជីវិតដោយព្យួរក ជុំវិញរឿងរ៉ាវការបំផ្ទុះគ្រាប់បែកនៅអ៊ីរ៉ាក់ ដែលបានសម្លាប់មនុស្សជាង៣០០នាក់

អ៊ីរ៉ាក់បានប្រហារជីវិតដោយព្យួរកមនុស្ស៣នាក់ ដែលត្រូវបានជាប់ទោសពីបទជាប់ពាក់ព័ន្ធក្នុងការបំផ្ទុះរថយន្តមួយនៅទីក្រុងបាកដាដ (Baghdad) ដែលបានសម្លាប់មនុស្សជាង៣០០នាក់ និងបណ្ដាលឲ្យមនុស្សរាប់រយនាក់រងរបួសកាលពីឆ្នាំ២០១៦។ ហេតុការណ៍នោះគឺជាការបំផ្ទុះគ្រាប់បែកដ៏មហន្តរាយតែមួយគត់នៅក្នុងប្រទេសអ៊ីរ៉ាក់ ចាប់តាំងពីការចូលលុកលុយដឹកនាំដោយសហរដ្ឋអាមេរិកក្នុងឆ្នាំ២០០៣មក។ ក្រុមរដ្ឋអ៊ីស្លាម (IS) បាននិយាយថា ខ្លួនបានធ្វើការវាយប្រហារនោះ។ការិយាល័យរបស់នាយករដ្ឋមន្ត្រីអ៊ីរ៉ាក់ លោក Mohammed Shia al-Sudani មិនបានបញ្ចេញឈ្មោះអ្នកដែលត្រូវបានប្រហារជីវិត ឬនិយាយថាពួកគេត្រូវបានគេកាត់ទោសនៅពេលណានោះទេ។ ការិយាល័យបាននិយាយថា ការប្រហារជីវិតត្រូវបានធ្វើឡើងកាលពីថ្ងៃអាទិត្យ (២៧សីហា) និងថ្ងៃចន្ទ (២៨សីហា)។ ការិយាល័យនោះបន្តថា លោកនាយករដ្ឋមន្ត្រីបានជូនដំណឹងដល់ក្រុមគ្រួសារជនរងគ្រោះថា «ការដាក់ទោសប្រហារជីវិតដោយត្រឹមត្រូវ» ត្រូវបានធ្វើឡើងប្រឆាំងនឹងឧក្រិដ្ឋជនសំខាន់ៗចំនួន៣នាក់ ដែលត្រូវបានគេរកឃើញថាមានពិរុទ្ធពីបទជាប់ពាក់ព័ន្ធក្នុងការបំផ្ទុះគ្រាប់បែកភេរវកម្ម។គួររម្លឹកផងដែរថា កាលពីថ្ងៃទី៣ ខែកក្កដា ឆ្នាំ២០១៦ រថយន្តដែលផ្ទុកទៅដោយសារធាតុផ្ទុះ ត្រូវបានបំផ្ទុះនៅជាប់នឹងមជ្ឈមណ្ឌលលក់ទំនិញដែលមានមនុស្សច្រើននៅទីក្រុង Karrada ដែលជាតំបន់មូស្លីមនិកាយស៊ីអ៊ីត ភាគច្រើននៃរដ្ឋធានីប្រទេសអ៊ីរ៉ាក់។ ជនរងគ្រោះជាច្រើននាក់ត្រូវបានស្លាប់ដោយចំហេះដែលឆាបឆេះពេញអគារបន្ទាប់ពីការបំផ្ទុះគ្រាប់បែកនោះ៕

រុស្ស៊ីប្តេជ្ញាបន្តជួយប្រទេសម៉ាលី បន្ទាប់ពីការស្លាប់របស់ប្រធានក្រុមទាហានស៊ីឈ្នួល Wagner

កាលពីថ្ងៃចន្ទ (២៨ សីហា) ប្រទេសរុស្ស៊ីបានសន្យានៅអង្គការសហប្រជាជាតិ ក្នុងការបន្តផ្តល់ «ជំនួយគ្រប់ជ្រុងជ្រោយ» ដល់ប្រទេសម៉ាលី ជាទីដែលអ្នកប្រយុទ្ធប្រហែល១.០០០នាក់នៃក្រុមទាហានស៊ីឈ្នួល Wagner របស់រុស្ស៊ី កំពុងជួយរបបសឹករដ្ឋអាហ្រ្វិកខាងលិចមួយនេះ ប្រយុទ្ធប្រឆាំងនឹងការបះបោររបស់ក្រុមអ៊ីស្លាមនិយម។ ប្រធានក្រុម Wagner លោក Yevgeny Prigozhin បានស្លាប់នៅក្នុងការធ្លាក់យន្តហោះកាលពីសប្តាហ៍មុន ហើយបន្ទាប់មកប្រធានាធិបតីរុស្ស៊ីលោក វ្លាឌីមៀរ ពូទីន បានបញ្ជាឱ្យក្រុមអ្នកប្រយុទ្ធ Wagner ចុះហត្ថលេខាលើពាក្យសច្ចាប្រណិធានចំពោះរដ្ឋរុស្ស៊ី។លោក Dmitry Polyanskiy ឯកអគ្គរដ្ឋទូតរងរបស់អង្គការសហប្រជាជាតិរបស់រុស្ស៊ី បាននិយាយថា កិច្ចសហប្រតិបត្តិការទ្វេភាគីរវាងរុស្ស៊ី និងម៉ាលី ព្រមទាំង «ជម្រើសអធិបតេយ្យភាព» នៃដៃគូសន្តិសុខអន្តរជាតិរបស់របបសឹក កំពុងធ្វើឱ្យអតីតដៃគូលោកខាងលិចរបស់យើងនៅមិនបានសុខនោះទេ។កាលពីក្នុងខែមិថុនា ក្រុមប្រឹក្សាដែលមានសមាជិក១៥រូបនេះ បានបោះឆ្នោតដើម្បីបញ្ចប់បេសកកម្មរក្សាសន្តិភាពរយៈពេលមួយទសវត្សរ៍នៅក្នុងប្រទេសម៉ាលី បន្ទាប់ពីរបបយោធាបានស្នើសុំឱ្យកងកម្លាំងចំនួន១៣.០០០នាក់ (MINUSMA) ចាកចេញភ្លាមៗ ជាទង្វើមួយដែលសហរដ្ឋអាមេរិកបាននិយាយថា ត្រូវបានបង្កើតឡើងដោយក្រុម Wagner៕

អ៊ុយក្រែន និយាយថា ខ្លួនរំដោះបានតំបន់យុទ្ធសាស្ត្រមួយពីដៃរុស្ស៊ី នៅភាគអាគ្នេយ៍

អ៊ុយក្រែន បាននិយាយកាលពីថ្ងៃចន្ទថា ទាហានរបស់ខ្លួន រំដោះបានតំបន់ រ៉ូបូទី (Robotyne នៅភាគអាគ្នេយ៍ និងកំពុងព្យាយាមរុលទៅមុខបន្ថែមទៀតក្នុងភាគខាងត្បូង ក្នុងការវាយបករយៈជាង២ខែមកនេះ ទៅលើ កងកម្លាំងរុស្ស៊ី ដែលកំពុងគ្រប់គ្រងតំបន់នេះ។ យោធាអ៊ុយក្រែន និយាយថា កងទ័ពរបស់ខ្លួន កាលពីសប្ដាហ៍មុនបានលើកទង់ជាតិនៅក្នុងភូមិយុទ្ធសាស្ត្រមួយនេះ និង បានបង្ហោះវីដេអូ បង្ហាញសកម្មភាពយឺតៗ ។ យោធានិយាយថា ក្រោយមកកងកម្លាំងរបស់ខ្លួនបានបើកប្រតិបត្តិការបោសសម្អាត រហូតដល់ពួកគេបានអះអាងការគ្រប់គ្រងកាលពីថ្ងៃចន្ទ ។អនុរដ្ឋមន្ត្រីការពារជាតិលោកស្រី ហាណា ម៉ាលីយ៉ា (Hanna Maliar) ត្រូវបានដកស្រង់សម្ដីដោយនិយាយកាលពីថ្ងៃចន្ទដោយយោធានេះថា ភូមិយុទ្ធសាស្ត្រ រ៉ូបូទី ត្រូវបានរំដោះបានហើយ។តំបន់នេះ ស្ថិតនៅចម្ងាយ១០គីឡូម៉ែត្រ ពីសមរភូមិជួរមុខនៃទីប្រជុំជន អូរីខីវ (Orikhiv) ក្នុងតំបន់ហ្សាប៉ូឌីហ្សា( Zaporizhzhia) ស្ថិតនៅលើផ្លូវដ៏សំខាន់មួយទៅកាន់តំបន់ តុកម៉ាក(Tokmak) ជាផ្លូវ និងស្ថានីយរថភ្លើងដែលកងកម្លាំងរុស្ស៊ីកំពុងកាន់កាប់។ ការដណ្ដើមបានតំបន់តុកម៉ាក នេះ នឹងក្លាយជា ហេតុការណ៍ដ៏សំខាន់បំផុត មួយ ខណៈដែលទាហានអ៊ុយក្រែន វាយសម្រុកខ្លាំងនៅភាគខាងត្បូង ឆ្ពោះទៅសមុទ្រអាសូវ (Azov) ក្នុងការបណ្ដេញរបស់យោធាដែលចង់បំបែកកម្លាំងរបស់រុស្ស៊ី ក្រោយការវាយលុកពេញបន្ទុករបស់ទីក្រុងម៉ូស្គូ កាលពីថ្ងៃទី២៤ខែកុម្ភៈឆ្នាំ២០២២។ រុស្ស៊ី ពុំបានបញ្ជាក់ពីការវាយរុលទៅមុខរបស់អ៊ុយក្រែនទេ។ ក្រសួងការពារជាតិរុស្ស៊ី និយាយនៅក្នុងសេចក្ដីថ្លែងការណ៍មួយថា ទាហានក្រុងម៉ូស្គូ បានវាយបណ្ដេញការវាយប្រហាររបស់កងកម្លាំងក្រុងគីវ (Kyiv) ជិតតំបន់ រ៉ូបូទី និង តំបន់ វើបូវ៉េ(Verbove)៕

បណ្ដាញសង្គម

ព័ត៌មានថ្មីៗ

អ្នកវិទ្យាសាស្ត្របកស្រាយប្រវត្តិភូគព្ភសាស្ត្រនៃជ្រលងភ្នំ Grand Canyon

វិមានក្រឹមឡាំង៖ សហប្រតិបត្តិការយានដ្រូនរបស់អឺរ៉ុបជាមួយអ៊ុយក្រែន គឺជាការចូលរួមខ្លាំងឡើងៗ នៅក្នុងសង្គ្រាម

អតីតប្រធានាធិបតីមីយ៉ាន់ម៉ា មានសេរីភាព ក្រោយការលើកលែងទោស ពាក់ព័ន្ធការផ្ដន្ទាទោសក្រោយរដ្ឋប្រហារ

UN៖ ស្រ្តី និងក្មេងស្រី ៤៧នាក់ ត្រូវបានសម្លាប់ក្នុង ១ថ្ងៃ អំឡុងសង្រ្គាមហ្កាហ្សា

លោក Macron និងលោក Starmer រៀបចំកិច្ចប្រជុំកំពូលស្តីពីសន្តិសុខច្រកសមុទ្រ Hormuz

ប្រធានាធិបតីលីបង់ បញ្ជាក់ថា កិច្ចចរចាដោយផ្ទាល់ជាមួយអ៊ីស្រាអែល គឺ «សំខាន់ណាស់»

មនុស្ស ៦នាក់ ស្លាប់ និងមនុស្ស ៤៣នាក់ រងរបួសនៅអ៊ុយក្រែន ក្នុងការវាយប្រហាររបស់រុស្ស៊ី រយៈពេល ១ថ្ងៃកន្លងមកនេះ

រដ្ឋមន្រ្តីការពារជាតិ៖ អ៊ីស្រាអែលនឹងបន្តគ្រប់គ្រងទឹកដីដែលពួកគេដណ្តើមបាននៅភាគខាងត្បូងលីបង់

អាល្លឺម៉ង់មិនចូលរួមបេសកកម្មច្រកសមុទ្រ Hormuz នោះទេ រហូតដល់សន្តិភាពសម្រេចបាន

សភាហូឡង់គាំទ្រសំណើ ដើម្បីជំរុញឲ្យមានការផ្អាកកិច្ចព្រមព្រៀង EU-អ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877