BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

អវកាសយានិកអន្តរជាតិថ្មីសង្កត់ធ្ងន់ពីការរួបរួមគ្នា ពេលដែលពួកគេចូលរួមការងារនៅស្ថានីយ៍អវកាស ISS

អាមេរិក៖ អវកាសយានិកមកដល់ថ្មី បានធ្វើការសង្កត់ធ្ងន់ពីតម្រូវការរួបរួមគ្នា ហើយនិងកិច្ចសហប្រតិបត្តិការ ពេលដែលពួកគេត្រូវបានស្វាគមន៍ដោយសមាជិកបច្ចុប្បន្ននៅស្ថានីយ៍អវកាសអន្តរជាតិ(ISS) កាលពីថ្ងៃអាទិត្យ ។ អង្គការ NASAនិយាយថា សមាជិកអវកាសយានិកថ្មីចំនួន ៤នាក់ ដែលមកពីប្រទេសចំនួន ៤ផ្សេងៗគ្នា នឹងធ្វើពិសោធន៍វិទ្យាសាស្រ្ត ដូចជាអការៈសរីរវិទ្យានៃការគេងរបស់អវកាសយានិក និងការប្រមូលសំណាកអតិសុខុមប្រាណពីផ្នែកខាងក្នុងរបស់ស្ថានីយ៍អវកាស ISS ។ ក្រុមអវកាសយានិកថ្មី អ្នកស្រី Jasmin Moghbeliគឺជាអវកាសយានិករបស់អង្គការ NASA លោក Andreas Mogensen គឺជាអវកាសយានិកមកពីទីភ្នាក់ងារអវកាសអឺរ៉ុប ESA លោក Satoshi Furukawa គឺជាអវកាសយានិករបស់ទីភ្នាក់ងាររុករុកទីអវកាសជប៉ុន JAXA និងលោក Konstantin Borisov គឺជាអវកាសយានិកមកពីទីភ្នាក់ងារអវកាសសហព័ន្ធរុស្ស៊ី Roscosmosនឹងចូលរួមជាមួយក្រុមអវកាសយានិក ៧នាក់ ដែលបច្ចុប្បន្ននៅក្នុងស្ថានីយ៍អវកាស ISS ។ គួរឲ្យដឹងថា យានចម្លង Falcon 9របស់ក្រុមហ៊ុន SpaceXបានដាក់យានចម្លង Dragon និងក្រុមអវកាសយានិក ចូលទៅកាន់គន្លងតារាវិថី ក្រោយបាញ់បង្ហោះចេញពីមជ្ឈមណ្ឌលអវកាស Kennedyរបស់អង្គការ NASA នៅរដ្ឋ Florida សហរដ្ឋអាមេរិក កាលពីវេលាម៉ោង ៣ និង ២៧នាទីព្រឹកថ្ងៃសៅរ៍ចុងសប្តាហ៍មុន ៕

ប្រទេសរុស្ស៊ីបញ្ជូនកងទ័ពពិសេសទៅទប់ទល់នឹងការវាយបករបស់អ៊ុយក្រែន

រុស្ស៊ី៖ប្រទេសរុស្ស៊ី បានដាក់ពង្រាយទាហានឆ័ត្រយោងពិសេសទៅកាន់ខ្សែត្រៀមជួរមុខហ្សាប៉ូរីហ្សា (Zaporizhzhia) ក្នុងកិច្ចខិតខំប្រឹងប្រែងជាក់ស្តែងមួយ ដើម្បីទប់ស្កាត់ការវាយទម្លុះចូល ខណៈពេលដែលការវាយបករបស់អ៊ុយក្រែន កំពុងបង្កើនល្បឿន។សមាសភាពនៃកងពលការពារអាកាសលេខ៧៦ ដែលជួនកាលត្រូវបានពិពណ៌នាថា ជាអង្គភាពប្រយុទ្ធដ៏ល្អបំផុតតែមួយគត់របស់រុស្ស៊ី ត្រូវបានគេប្រទះឃើញនៅជិតភូមិរ៉ូបូទីណេ(Robotyne) កាលពីដើមសប្តាហ៍នេះ។វិទ្យាស្ថានស្រាវជា្រវសម្រាប់ការសិក្សាសង្រ្គាមនៅទីក្រុងវ៉ាស៊ីនតោនដែលបាននិងកំពុងតាមដានសមរភូមិប្រយុទ្ធនេះ បាននិយាយថា៖«ការដាក់ពង្រាយឡើងវិញនៃសមាភាពកងពលការពារតំបន់ភ្នំVDVលេខ៧ ពីតំបន់ឃើសុន( Kherson) ទៅខ្សែត្រៀមជួរមុខនៅតំបន់ហ្សាប៉ូរីហ្សា និងសមាសភាពនៃកងពលVDVលេខ៧៦ពីតំបន់ក្រីមីនណា ( Kreminna) ដល់តំបន់រ៉ូបូទីណេ បានបញ្ជាក់ថា កងកម្លាំងរុស្ស៊ីអាចនឹងប្រើប្រាស់អង្គភាពពិសេសដែលពាក់ព័ន្ធ ដើម្បីពង្រឹងផ្នែកសំខាន់ៗនៃខ្សែត្រៀមជួរមុខ»៕

ក្រុមសិទ្ធិមនុស្ស៖ក្រុមអន្ធពាលនៅប្រទេសហៃទី បានបាញ់ប្រហារលើការតវ៉ាដែលដឹកនាំដោយព្រះវិហារ ដោយបានសម្លាប់មនុស្សយ៉ាងហោចណាស់៧នាក់

ហៃទី៖ យ៉ាងហោចណាស់មនុស្ស៧នាក់ បានស្លាប់ បន្ទាប់ពីជនអន្ធពាលមួយក្រុម បានបាញ់ប្រហារទៅលើការតវ៉ាដែលដឹកនាំដោយព្រះវិហារនៅជាយក្រុងមួយនៃប្រទេសហៃទី កាលពីថ្ងៃសៅរ៍ នេះបើយោងតាមក្រុមសិទ្ធិមនុស្សក្នុងតំបន់។ លោកស្រី Marie Yolène Gilles នាយកអង្គការសិទ្ធិមនុស្ស Fondasyon Je Klere (ហ្វុងដាសយ៉ុង ជេ ឃ្លា) បានថ្លែងប្រាប់សារព័ត៌មានCNNថា មនុស្សរាប់រយនាក់ បានប្រមូលផ្តុំគ្នាដោយមេដឹកនាំព្រះវិហារគ្រិស្តសាសនា ដើរដង្ហែក្នុងទីក្រុងកាណាអាន (Canaan) ជាយក្រុងភាគខាងជើងនៃរដ្ឋធានីព័រអូប្រាំង (Port-au-Prince) ហើយបានប្រមូលផ្តុំគ្នាប្រឆាំងនឹងអំពើហិង្សារបស់ក្រុមជនអន្ធពាល នៅពេលដែលក្រុមជនអន្ធពាលក្នុងតំបន់ បានបើកការបាញ់ប្រហារដោយកាំភ្លើងយន្ត។ នាយកមជ្ឈមណ្ឌលសម្រាប់ការវិភាគ និងស្រាវជ្រាវផ្នែកសិទ្ធិមនុស្ស លោកហ្គេដេអុង ហ្សង់ ( Gédéon Jean) បានថ្លែងថា ចំនួនអ្នកស្លាប់ទំនងជាខ្ពស់ជាងនេះ ដោយសារមានអ្នកកាន់សាសនាគ្រិស្តជាច្រើននៅកន្លែងហែក្បួននោះ។លោកហ្សង់ បាននិយាយថា៖«មានទទួលខុសត្រូវទ្វេដងដែលត្រូវបង្កើតឡើង គឺការទទួលខុសត្រូវរបស់បព្វជិត ដែលបានយកមនុស្សស្លូតត្រង់ទាំងនេះទៅកន្លែងពិឃាត ហើយជាពិសេស គឺអាជ្ញាធរតុលាការ និងនគរបាលដែលមិនបានទប់ស្កាត់បញ្ហានេះ»។

យុទ្ធនាការរបស់លោក Trump អង្គាសបានប្រាក់ជាង៧លានដុល្លារ ក្រោយការថតរូបនៅពន្ធនាគារជាប្រវត្តិសាស្ត្រនៅរដ្ឋចចា

អាមេរិក៖ ក្រុមរៀបចំយុទ្ធនាការបោះឆ្នោតរបស់លោក Donald Trump និយាយថា ខ្លួនបានរៃអង្គាសបានប្រាក់ចំនួន៧,១លានដុល្លារអាមេរិក ចាប់តាំងពីការថតរូបដែលត្រូវបានថតនៅក្នុងពន្ធនាគាររបស់លោកនៅទីក្រុង Atlanta រដ្ឋចចា( Georgia)កាលពីថ្ងៃព្រហស្បតិ៍ទី២៤សីហាមក ។ ភាគច្រើននៃប្រាក់ទាំងនេះ រកបានពីការលក់ទំនិញដូចជា ពែងកាហ្វេ អាវយឺត ស្រោមដាក់ភេសជ្ជៈ ដែលមានរូបថតទឹកមុខក្រញូវរបស់អតីតប្រធានាធិបតីរូបនេះ ។ លោក Trump ត្រូវបានដោះលែងដោយបង់ប្រាក់ធានាខ្លួន ក្រោមបទចោទប្រកាន់ពីបទរៀបចំផែនការបង្វែរលទ្ធផលក្នុងការបោះឆ្នោតកាលពីឆ្នាំ២០២០។ លោកប្រឈមការចោទប្រកាន់ចំនួន៣ករណីផ្សេងទៀត ខណៈលោកធ្វើយុទ្ធនាការរកសំឡេងឆ្នោតសម្រាប់ឆ្នាំ២០២៤។ការចោទប្រកាន់ទាំងនោះ រួមបញ្ចូលទាំង ២ករណីដែលជាប់ពាក់ព័ន្ធការអះអាងខុសការពិតរបស់លោកថា ការបោះឆ្នោតនោះត្រូវបានគេលួច និងការវាយប្រហារដោយក្រុមអ្នកគាំទ្ររបស់លោកលើវិមានកាពីតូលក្នុងទីក្រុងវ៉ាស៊ីនតោន ។ ការចូលរួមនេះទំនងជាបានជំរុញដល់ក្រុមអ្នកគាំទ្ររបស់លោក ហើយលោកបានអង្គាសបានប្រាក់ជិត២០លានដុល្លារក្នុងរយៈពេល៣សប្ដាហ៍ ចាប់តាំងពីការចោទប្រកាន់លើរូបលោកក្នុងរដ្ឋចចា និងអំពើកុបកម្មនៅវិមានកាពីតូល។កាលពីថ្ងៃសុក្រ ភ្លាមៗបន្ទាប់ពីការចាប់ខ្លួនលោកក្នុងរដ្ឋចចា លោកអង្គាសបាន ៤,១៨ លានដុល្លារ ដែលត្រូវបានគេនិយាយថា ជាចំនួនខ្ពស់បំផុតរបស់លោកក្នុងពេល២៤ម៉ោង ក្នុងយុទ្ធនាការនេះ ៕

ប្រទេសអាហ្វហ្គានីស្ថាន៖ពួកតាលីបង់ហាមឃាត់ស្ត្រីមិនឲ្យទៅលេងឧទ្យានជាតិដ៏ពេញនិយម

អាហ្វហ្គានីស្ថាន៖ រដ្ឋាភិបាលតាលីបង់ បានហាមស្ត្រីមិនឲ្យចូលទៅទស្សនាឧទ្យានជាតិបានអ៊ីអាមៀ (Band-e-Amir) ក្នុងខេត្តបាមីយ៉ាន (Bamiyan)។រដ្ឋមន្ត្រីស្តីទីនៃក្រសួងគ្រប់គ្រងអបាយមុខនិងគុណធម៌អាហ្វហ្គានីស្ថាន លោក ម៉ូហាម៉េដ ខាលេដ ហាណាហ្វី (Mohammad Khaled Hanafi) បាននិយាយថា ស្ត្រីមិនបានប្រកាន់ខ្ពស់ការពាក់ហ៊ីចាប (hijab) នៅក្នុងឧទ្យាននោះទេ។លោកបានអំពាវនាវឲ្យក្រុមបព្វជិតសាសនា និងក្រុមភ្នាក់ងារសន្តិសុខហាមស្ត្រីមិនឲ្យចូល រហូតដល់មានដំណោះស្រាយ។បានអ៊ីអាមៀ (Band-e-Amir) គឺជាតំបន់ទេសចរណ៍ដ៏សំខាន់មួយ ដែលបានក្លាយជាឧទ្យានជាតិដំបូងគេរបស់ប្រទេសអាហ្វហ្គានីស្ថាន ក្នុងឆ្នាំ២០០៩ ។វាគឺជាទិសដៅដ៏ពេញនិយមសម្រាប់ក្រុមគ្រួសារហើយការហាមប្រាមស្ត្រីចូលទៅលេង នឹងរារាំងមនុស្សជាច្រើនមិនឲ្យមានភាពរីករាយនឹងឧទ្យាននេះ។អង្គការយូណេស្កូ (Unesco) ពិពណ៌នាឧទ្យាននេះថាជា«ក្រុមបឹងដែលបង្កើតដោយធម្មជាតិ ដោយមានទម្រង់និងរចនាសម្ព័ន្ធភូមិសាស្ត្រពិសេស ព្រមទាំងមានសម្រស់ធម្មជាតិដ៏ស្រស់ស្អាតដាច់គេ៕

កងកម្លាំងយោធាប៉ារ៉ាស៊ូដង់ គាំទ្របទឈប់បាញ់ និងការពិភាក្សាអំពីអនាគតរបស់ប្រទេសនេះ

ស៊ូដង់៖ កងកម្លាំងគាំទ្ររហ័សយោធាប៉ារ៉ារបស់ស៊ូដង់ (RSF) បាននិយាយថា ខ្លួនបើកចំហចំពោះបទឈប់បាញ់រយៈពេលវែងជាមួយកងទ័ពស៊ូដង់ ហើយបង្ហាញពីចក្ខុវិស័យរបស់ខ្លួនសម្រាប់ «ការកើតឡើងវិញនៃស៊ូដង់» ដែលជាគំនិតផ្តួចផ្តើមមួយអាចស្តារកិច្ចខិតខំប្រឹងប្រែងដើម្បីធ្វើការចរចាដោយផ្ទាល់រវាងភាគីជម្លោះទាំងពីរ។ សេចក្តីថ្លែងការណ៍នេះបានធ្វើឡើងនៅពេលដែលការប្រយុទ្ធគ្នារវាងកងកម្លាំង RSF និងកងទ័ពស៊ូដង់ បានឈានចូលដល់សប្តាហ៍ទី២០ របស់ខ្លួនដោយគ្មានភាគីណាមួយអះអាងពីជ័យជម្នះ ខណៈដែលមនុស្សរាប់លាននាក់ត្រូវបានបង្ខំឲ្យចាកចេញពីលំនៅឋានរបស់ពួកគេនៅក្នុងរដ្ឋធានី និងទីក្រុងផ្សេងៗទៀត។អង្គការសហប្រជាជាតិបានព្រមានអំពី «មហន្តរាយមនុស្សធម៌នៃសមាមាត្រវីរភាព» ជាមួយនឹងកំណើនភាពអត់ឃ្លាន ការដួលរលំសេវាថែទាំសុខភាព និងហេដ្ឋារចនាសម្ព័ន្ធដែលបានខូចខាតផងដែរ។ កងកម្លាំង RSF និងកងជីវពលសម្ព័ន្ធមិត្ត ក៏ត្រូវបានគេចោទប្រកាន់ពីការបោសសម្អាតជនជាតិភាគតិចនៅទីក្រុង Darfur ភាគខាងលិចផងដែរ។ ភាគីជម្លោះទាំងពីរ បានស្តីបន្ទោសគ្នាទៅវិញទៅមកចំពោះការចាប់ផ្តើមសង្រ្គាមនៅថ្ងៃទី១៥ ខែមេសា បន្ទាប់ពីភាពតានតឹងជាច្រើនសប្តាហ៍ជុំវិញការរួមបញ្ចូលកងទ័ពរបស់ពួកគេទៅជាកម្លាំងតែមួយ ដែលជាផ្នែកមួយនៃការផ្លាស់ប្តូរទៅកាន់លទ្ធិប្រជាធិបតេយ្យ។នៅក្នុងសេចក្តីថ្លែងការណ៍ដែលបានចេញផ្សាយកាលពីល្ងាចថ្ងៃអាទិត្យមានឲ្យដឹងថា មេដឹកនាំកងកម្លាំង RSF លោកឧត្តមសេនីយ៍ Mohamed Hamdan Dagalo ហាក់ដូចជាមានឆន្ទៈក្នុងការចរចាជាមួយកងទ័ព ជុំវិញស្ងានភាពនៃរដ្ឋស៊ូដង់នាពេលអនាគត ដោយហួសពីសេចក្ដីលម្អិតនៃបទឈប់បាញ់អចិន្ត្រៃយ៍ក្នុងប្រទេសនេះផងដែរ៕

ក្រុមបាតុករតវ៉ានៅតាមដងផ្លូវដើម្បីប្រឆាំងនឹងរដ្ឋាភិបាលក្នុងប្រទេសស៊ីរី

ស៊ីរី៖ ក្រុមបាតុករបានស្រែកពាក្យស្លោកប្រឆាំងរដ្ឋាភិបាលនៅទីក្រុង Sweida ប្រទេសស៊ីរី កាលពីថ្ងៃអាទិត្យ (២៧ សីហា) ខណៈដែលការតវ៉ាដោយសន្តិវិធីទាមទារឱ្យបញ្ចប់ការគ្រប់គ្រងដោយផ្តាច់ការ បានឈានចូលដល់សប្តាហ៍ទីពីរ។ មានបុរសនិងស្ត្រីជាច្រើនបានស្ថិតនៅទីលានចតុរង្គសំខាន់មួយ ដែលអំពាវនាវឲ្យមានការទម្លាក់ប្រធានាធិបតីស៊ីរី លោក Bashar al-Assad។ក្រុមសកម្មជនពលរដ្ឋ និងសាក្សីជាច្រើនបាននិយាយថា អ្នកតវ៉ារាប់រយនាក់បានដើរតាមផ្លូវក្នុងថ្ងៃទីប្រាំពីរ ដោយបានបិទទីស្នាក់ការកណ្តាលរបស់គណបក្ស Baath ដែលជាបក្សកំពុងកាន់អំណាចនៅក្នុងទីក្រុង Druze ភាគនិរតីប្រទេសស៊ីរី។ ក្រុមអាជ្ញាធរបានរក្សាភាពស្ងៀមស្ងាត់ចំពោះការតវ៉ាដែលកាន់តែធំនេះ ប៉ុន្តែបានណែនាំកងសន្តិសុខឱ្យនៅឆ្ងាយពីការតវ៉ានោះ ហើយថែមទាំងបានដកកន្លែងត្រួតពិនិត្យមួយចំនួន ដើម្បីបញ្ចៀសការប៉ះទង្គិចដែលមិនអាចគ្រប់គ្រងបានផងដែរ៕

ជប៉ុននិយាយថា កម្រិតវិទ្យុសកម្មក្នុងទឹកសមុទ្រនៅក្បែររោងចក្រហ្វ៊ូគូស៊ីម៉ា មានទាបជាងការកំណត់

ជប៉ុន៖ ក្រសួងបរិស្ថានជប៉ុនបាននិយាយកាលពីថ្ងៃអាទិត្យ (២៧សីហា) ថា ការធ្វើតេស្តទឹកសមុទ្រនៅជិតរោងចក្រថាមពលនុយក្លេអ៊ែរ ហ្វ៊ូគូស៊ីម៉ា របស់ប្រទេសជប៉ុន មិនបានរកឃើញសារធាតុវិទ្យុសកម្មណាមួយនោះទេ ប៉ុន្មានថ្ងៃបន្ទាប់ពីក្រុមអាជ្ញាធរបានចាប់ផ្តើមបញ្ចេញសំណល់ទឹកបានធ្វើប្រព្រឹត្តកម្មរួច ចូលទៅក្នុងសមុទ្រ ដែលទឹកនោះប្រើសម្រាប់ធ្វើឲ្យត្រជាក់ម៉ាស៊ីនរ៉េអាក់ទ័រដែលបានខូច។ប្រទេសជប៉ុន និងបណ្ដាអង្គការវិទ្យាសាស្ត្របាននិយាយថា សំណល់ទឹកគឺមានសុវត្ថិភាពបន្ទាប់ពីត្រូវបានសម្លាប់មេរោគ ដើម្បីយកធាតុវិទ្យុសកម្មភាគច្រើនចេញ លើកលែងតែសារធាតុទ្រីចូល (tritium) ដែលជាអ៊ីសូតូបវិទ្យុសកម្មនៃអ៊ីដ្រូសែនប៉ុណ្ណោះ ព្រោះសារធាតុនោះពិបាកក្នុងការបំបែកចេញពីទឹក។ ក្រសួងបាននិយាយថា ការធ្វើតេស្តសំណាករបស់ក្រសួងពីចំណុចចំនួន១១ទីតាំងនៅជិតរោងចក្រ បានបង្ហាញពីកំហាប់នៃសារធាតុទ្រីចូល ស្ថិតនៅក្រោមដែនកំណត់ទាបនៃការរកឃើញ ដោយក្រសួងបាននិយាយថាវានឹងមិនមានផលប៉ះពាល់អវិជ្ជមានដល់សុខភាពមនុស្សនិងបរិស្ថាននោះទេ។ការបង្ហូរសំណល់ទឹកសំណល់វិទ្យុសកម្មពីរោងចក្រនុយក្លេអ៊ែរ ហ្វ៊ូគូស៊ីម៉ា របស់ប្រទេសជប៉ុន ធ្វើឡើងស្របពេលមានការរិះគន់ទាំងក្នុង និងក្រៅប្រទេស ជាមួយនឹងបម្រាមនាំចេញអាហារសមុទ្រ ព្រមទាំងការបៀតបៀនតាមទូរសព្ទមួយចំនួនពីជនជាតិចិនទៀតផងដែរ។ បន្ថែមពីលើនោះ ក្រុមបាតុករជប៉ុនរាប់សិបនាក់ សកម្មជនកូរ៉េខាងត្បូង និងប្រជាជនហុងកុង បានប្រមូលផ្តុំគ្នាតវ៉ាចំពោះការបញ្ចេញសំណល់ទឹកវិទ្យុសកម្ម ដែលត្រូវបានធ្វើប្រព្រឹត្តកម្មរួច ចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលបានខូចខាត ចូលទៅក្នុងមហាសមុទ្រប៉ាស៊ីហ្វិកមួយនេះផងដែរ៕

ខ្មាន់កាំភ្លើងស្បែកសនៅរដ្ឋ Florida ដែលបានសម្លាប់ជនរងគ្រោះស្បែកខ្មៅបីនាក់ បានទិញកាំភ្លើងដោយស្របច្បាប់

អាមេរិក៖ ក្រុមមន្ត្រីអនុវត្តន៍ច្បាប់ក្នុងតំបន់បាននិយាយកាលពីថ្ងៃអាទិត្យថា ខ្មាន់កាំភ្លើងស្បែកស ដែលបានបាញ់សម្លាប់ជនជាតិអាមេរិកស្បែកខ្មៅ ៣នាក់ នៅហាង Dollar General ក្នុងទីក្រុង ជេកស៊ុនវីល( Jacksonville) រដ្ឋ Florida កាលពីថ្ងៃសៅរ៍ គឺជាយុវជនអាយុ ២១ឆ្នាំ ដែលបានទិញកាំភ្លើងដោយស្របច្បាប់ និងពុំមានប្រវត្តិឧក្រិដ្ឋកម្មឡើយ។ ក្រុមមន្ត្រីបាននិយាយថា បុរសស្បែកសពាក់ម៉ាស់ម្នាក់បានបាញ់សម្លាប់ជនជាតិអាមេរិកស្បែកខ្មៅបីនាក់នៅក្នុងហាង ជេកស៊ុនវីល(Jacksonville)រដ្ឋ Floridaសហរដ្ឋអាមេរិក ជាការវាយប្រហារមួយដែលជនសង្ស័យបានប្រើកាំភ្លើងលាបថ្នាំមានសញ្ញាដៃខ្វែងគ្នាឬ swastika។ ក្រោយមក ឃាតករដែលបានបង្ហោះសំណេរស្តីពីការរើសអើងជាតិសាសន៍ផងនោះបានបាញ់សម្លាប់ខ្លួនឯង។ស្នងការនគរបាល លោក T.K. Waters បានប្រាប់សន្និសីទសារព័ត៌មានថា ខ្មាន់បាញ់ប្រហារឈ្មោះ រីយ៉ាន គ្រីស្តូហ្វើរ ផាលមេធ័រ (Ryan Christopher Palmeter) រស់នៅជាមួយឪពុកម្តាយរបស់គេនៅជាយក្រុង ជេកស៊ុនវីល។ជនល្មើសបានស្លាប់ដោយសារគ្រាប់កាំភ្លើងបាញ់ខ្លួនឯង។លោកWaters បាននិយាយថា ការបាញ់ប្រហារនេះគឺទាក់ទងនឹងការរើសអើងពូជសាសន៍។ក្រុមអាជ្ញាធរបាននិយាយថា ខ្មាន់កាំភ្លើងបានបន្សល់ទុកសកម្មភាពជាច្រើនសម្រាប់ប្រព័ន្ធផ្សព្វផ្សាយ ដោយឪពុកម្តាយរបស់គេ និងមន្ត្រីអនុវត្តច្បាប់ដែលរៀបរាប់លម្អិតពីការស្អប់ខ្ពើមរបស់ខ្មាន់កាំភ្លើងរូបនេះ លើជនជាតិស្បែកខ្មៅ។លោកWaters បាននិយាយថា "មិនមានប្រវត្តិប្រព្រឹត្តអំពើឧក្រិដ្ឋកម្មអ្វីទេ" ដោយបន្ថែមរឿងតែមួយគត់នៅក្នុងឯកសារគឺការហៅទូរស័ព្ទជាមួយបងប្រុសរបស់គេ អំពីអំពើហិង្សាក្នុងគ្រួសារ។ "មិនមានទង់ក្រហមទេ។"ទោះបីជាយ៉ាងណាក៏ដោយ នគរបាលបាននិយាយថាខ្មាន់កាំភ្លើងរូបនេះ ក្នុងឆ្នាំ ២០១៧ត្រូវបានឃុំខ្លួនមួយរយៈពេលខ្លីក្រោមច្បាប់រដ្ឋមួយហៅថាច្បាប់ Baker ដែលចែងថាមនុស្សម្នាក់អាចត្រូវបាន"នាំយកទៅកន្លែងទទួលសេវាកម្មសម្រាប់ការពិនិត្យដោយមិនស្ម័គ្រចិត្ត" ក្នុងអំឡុងពេលមានវិបត្តិសុខភាពផ្លូវចិត្ត។សារព័ត៌មានReuters មិនអាចទាក់ទងសមាជិកគ្រួសារខ្មាន់កាំភ្លើងបានភ្លាមៗដើម្បីសុំការអត្ថាធិប្បាយបានទេ ៕

រុស្ស៊ីនិយាយថា ការធ្វើតេស្តហ្សែនបញ្ជាក់ថាលោក Prigozhin បានស្លាប់នៅក្នុងការធ្លាក់យន្តហោះ

រុស្ស៊ី៖ ក្រុមអ្នកស៊ើបអង្កេតរុស្ស៊ីបាននិយាយកាលពីថ្ងៃអាទិត្យ (២៨ សីហា) ថា ការធ្វើតេស្តហ្សែន បានបញ្ជាក់ថាលោក Yevgeny Prigozhin ប្រធានក្រុមទាហានស៊ីឈ្នួល Wagner បានស្ថិតក្នុងចំណោមមនុស្ស១០នាក់ ដែលបានស្លាប់នៅក្នុងការធ្លាក់យន្តហោះកាលពីសប្តាហ៍មុននោះ។ ទីភ្នាក់ងារអាកាសចរណ៍រុស្ស៊ី ធ្លាប់បានចុះផ្សាយឈ្មោះអ្នកទាំង១០នាក់នោះ នៅលើយន្តហោះឯកជន ដែលបានធ្លាក់នៅតំបន់ Tver( ទ្វែ) ភាគពាយព្យនៃទីក្រុងមូស្គូ កាលពីថ្ងៃពុធ។ ពួកគេរួមបញ្ចូលឈ្មោះលោក Prigozhin និងលោក Dmitry Utkin ជាដៃស្តាំរបស់លោក Prigozhin ដែលបានជួយបង្កើតក្រុមទាហានស៊ីឈ្នួល Wagner ។គណៈកម្មាធិការស៊ើបអង្កេតរបស់រុស្ស៊ីបាននិយាយនៅក្នុងសេចក្តីថ្លែងការណ៍មួយនៅលើកម្មវិធីផ្ញើសារ តេឡេក្រាម ថា «ជាផ្នែកមួយនៃការស៊ើបអង្កេតការធ្លាក់យន្តហោះនៅក្នុងតំបន់ Tver ការពិនិត្យម៉ូលេគុលហ្សែនត្រូវបានបញ្ចប់។ យោងទៅតាមលទ្ធផលទាំងនោះ អត្តសញ្ញាណអ្នកស្លាប់ទាំង១០នាក់ត្រូវបានបង្ហាញឡើង។ លទ្ធផលត្រូវគ្នាទៅនឹងបញ្ជីដែលមានចែងក្នុងតារាងអ្នកធ្វើដំណើរលើយន្តហោះ ដែលបានធ្លាក់នោះ»។មានការរំពឹងទុកមួយចំនួន ជាពិសេសនៅលើបណ្តាញសង្គមតេឡេក្រាម ដែលគាំទ្រក្រុមទាហានស៊ីឈ្នួល Wagner អំពីថាតើលោក Prigozhin ដែលត្រូវបានគេស្គាល់ថា ជាមនុស្សមានការប្រុងប្រយ័ត្នសុវត្ថិភាពផ្សេងៗខ្ពស់ក្នុងការប៉ុនប៉ងអាក្រក់ដែលអាចកើតមានលើជីវិតរបស់លោកនោះ ពិតជាបានស្ថិតនៅលើជើងហោះហើរដែលត្រូវបានធ្លាក់នោះ ឬយ៉ាងណា។ ក្រុមអាជ្ញាធរមិនទាន់និយាយពីមូលហេតុដែលគេជឿថាបណ្ដាលឱ្យយន្តហោះឯកជនរបស់លោក Prigozhin ធ្លាក់ពីលើមេឃនោះទេ៕

បណ្ដាញសង្គម

ព័ត៌មានថ្មីៗ

ក្រុមគ្រូពេទ្យជាង ១ពាន់នាក់ និងស្តង់សុខភាពប្រចាំការ ត្រៀមសង្រ្គោះបឋម ជូនភ្ញៀវជាតិ និងអន្តរជាតិ ចូលមកកម្សាន្តក្នុងព្រឹតិ្តការណ៍នគរសង្រ្កាន្ត

អភិបាលរាជធានីភ្នំពេញ៖ ការការពារសន្តិសុខជូនពលរដ្ឋក្នុងព្រឹត្តិការណ៍ «នគរសង្ក្រាន្ត» គឺជាការងារចម្បងរបស់រដ្ឋបាលរាជធានីភ្នំពេញ

ភ្ញៀវទេសចរជាច្រើននាំគ្នាទៅលេងកម្សាន្តនៅតំបន់រមណីយដ្ឋានទឹកឈូច្រើនក្នុងឱកាសចូលឆ្នាំថ្ងៃទីពីរ

ពលករ និងសហគមន៍ខ្មែរនៅប្រទេសម៉ាឡេស៊ីជួបជុំរៀបចំពិធីបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយដើម្បីបង្ហាញពីវប្បធម៌ប្រពៃណីជាតិដ៏ផូរផង់

កម្ពុជា បដិសេធចំពោះការផ្សាយរបស់សារព័ត៌មានថៃថា «កម្ពុជាស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់» ដែលនេះជាព័ត៌មានក្លែងក្លាយ

រដ្ឋមន្ត្រីក្រសួងទេសចរណ៍ អញ្ជើញចូលរួម ព្រឹត្តិការណ៍លៀសហាល ចំនួន ៥តោន ជាមួយថ្នាក់ដឹកនាំ និងប្រជាពលរដ្ឋខេត្តកំពង់ចាម

នាវាដឹកប្រេងចិនរងទណ្ឌកម្មអាមេរិក ធ្វើដំណើរឆ្លងកាត់ច្រកសមុទ្រ Hormuz

ធានាធិបតីកូរ៉េខាងត្បូង ព្រមានថាជម្លោះមជ្ឈិមបូព៌ានឹងធ្វើឲ្យតម្លៃប្រេងនៅតែហក់ឡើងខ្ពស់ប្រធ

ហេតុការណ៍បាញ់ប្រហារនៅប្រទេសទួរគី បណ្តាលឲ្យមនុស្ស ១៦នាក់ រងរបួស

គ្មានកិច្ចពិភាក្សានោះទេរវាងកាតា និងអ៊ីរ៉ង់ លើការចំណាយដើម្បីបញ្ឈប់ការវាយប្រហាររបស់អ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877