BTV NEWS

កម្លាំងចម្រុះនៃគណៈបញ្ជាការឯកភាពរដ្ឋបាលខេត្តសៀមរាបឃាត់ខ្លួនជនសង្ស័យចំនួន៤នាក់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា

ជនសង្ស័យម្នាក់ ត្រូវបានឃាត់ខ្លួន ក្រោយញុះញង់ឱ្យចូលរួមធ្វើបដិវត្តពណ៌ផ្ដួលរំលំរាជរដ្ឋាភិបាល

១សប្តាហ៍ គ្រោះថ្នាក់ចរាចរណ៍ បន្តឆក់យកជីវិតមនុស្ស២៨នាក់ របួសជិត៧០នាក់

ឃាត់ខ្លួនជនសង្ស័យម្នាក់ក្នុងចំណោមបក្ខពួក ៤នាក់ ករណីឆក់ប្រដាប់អាវុធ ៣ករណី

សន្តិសុខ និង សង្គម

ក្រុមហ៊ុន ស្តាបាក់ស៍ នឹងចេញច្បាប់តុបតែង 'កាន់តែច្បាស់លាស់' បន្ទាប់ពីក្រុមគាំទ្រអ្នកស្រលាញ់ភេទដូចគ្នាប៉ះទង្គិចជាមួយសហជីព

ក្រុមហ៊ុនខ្សែសង្វាក់ផ្គត់ផ្គង់កាហ្វេ ស្តារបាក់ស៍ (Starbucks) បាននិយាយនៅក្នុងលិខិតផ្ទៃក្នុងមួយទៅកាន់និយោជិកថា ក្រុមហ៊ុន ស្តារបាក់ស៍ គ្រោងនឹងចេញគោលការណ៍ណែនាំជាកណ្តាល "ច្បាស់ជាងមុន" មួយចំនួនសម្រាប់ការដាក់បង្ហាញរូបភាពនៅក្នុងហាង បន្ទាប់ពីមានការចោទប្រកាន់របស់សហជីពដែលថាអ្នកគ្រប់គ្រងបានហាមឃាត់ការតុបតែងបែបពណ៌ឥន្ទធនូ ដែលតំណាងឲ្យសិទ្ធិក្រុមអ្នកស្រលាញ់ភេទដូចគ្នា។លិខិតនេះធ្វើឡើង បន្ទាប់ពីសហជីពតំណាងឱ្យបុគ្គលិកហាងកាហ្វេ របស់សមាគមន៍ខ្សែសង្វាក់ផ្គត់ផ្គង់កាហ្វេមួយនេះបានចោទប្រកាន់ថា អ្នកគ្រប់គ្រងនៅទីតាំងហាងកាហ្វេ ស្តារបាក់ស៍ រាប់សិបកន្លែងបានរារាំងបុគ្គលិកមិនឱ្យដំឡើងទង់ និងការតុបតែងសម្រាប់ទិវានៃខែឥន្ទធនូ ឬបានដកការតុបតែងទាំងនោះចេញ។ ក្រុមហ៊ុនកាហ្វេយក្សមួយនេះបានជំទាស់នឹងការចោទប្រកាន់ទាំងនេះ។សហជីពបាននិយាយកាលពីថ្ងៃសុក្រថា កម្មករជាង៣.០០០នាក់នៅហាងហាងកាហ្វេ ស្តារបាក់ស៍ ជាង១៥០ទីតាំងនៅសហរដ្ឋអាមេរិកនឹងដើរចេញពីការងារជុំវិញបញ្ហានេះ។ក្រុមហ៊ុន ស្តារបាក់ស៍ ក៏បានដាក់ពាក្យបណ្តឹងចំនួនពីរករណីប្រឆាំងនឹងសហជីពកម្មករទៅកាន់ក្រុមប្រឹក្សាទំនាក់ទំនងការងារជាតិ (NLRB) កាលពីថ្ងៃចន្ទ ដោយចោទប្រកាន់ថាសហជីពនោះបានធ្វើការអះអាងខុសលើគោលការណ៍ណែនាំការតុបតែងនៅក្នុងហាងរបស់ក្រុមហ៊ុន និងអត្ថប្រយោជន៍ការថែទាំដែលបញ្ជាក់ពីសមភាពយេនឌ័រ។ស្លាកយីហោលក់រាយរបស់សហរដ្ឋអាមេរិកជាច្រើន បានប្រឈមមុខនឹងការរិះគន់ពីអ្នកអភិរក្សជុំវិញការការបង្ហាញទំនិញដែលមានការតុបតែងពណ៌ឥន្ទធនូដែលតំណាងឲ្យសិទ្ធិក្រុមអ្នកស្រលាញ់ភេទដូចគ្នា (LGBTQ+) ក៏ដូចជាការរិះគន់ពីក្រុមសិទ្ធិស្រឡាញ់ភេទដូចគ្នាចំពោះការគាំទ្រមិនគ្រប់គ្រាន់សម្រាប់សហគមន៍៕

អាជីវករលក់តាមផ្លូវជួបការលំបាកខ្លាំងនៅប្រទេសឥណ្ឌា ស្របពេលដែលជួបអាកាសធាតុក្តៅខ្លាំង

ឥណ្ឌា៖ អាកាសធាតុក្តៅហួតហែង បន្តកើតមាននៅតាមតំបន់ជាច្រើននៅក្នុងប្រទេសឥណ្ឌា ក្នុងនោះក្រុមធុរកិច្ច និងក្រុមអាជីវករលក់ដូរតាមផ្លូវ មើលឃើញប្រាក់ចំណូលរបស់ពួកគេធ្លាក់ចុះយ៉ាងគំហុក ស្របពេលដែលអតិថិជន លែងសូវចេញក្រៅ ដោយសារតែរលកកម្តៅក្តៅខ្លាំងពេក ។ នៅទូទាំងប្រទេសឥណ្ឌា សីតុណ្ហភាពអតិបរមា បានឡើងដល់ចន្លោះពី ៤២ ដល់ ៤៥អង្សាសេ យ៉ាងហោចណាស់នៅតាមរដ្ឋចំនួន៥ កាលពីថ្ងៃទី១៧ ខែមិថុនាកន្លងទៅ ។ នេះបើយោងតាមការអះអាងរបស់នាយកដ្ឋានឧតុនិយមឥណ្ឌា ។ ក្រុមមន្រ្តីក្នុងស្រុក និយាយថា រដ្ឋភាគខាងជើង Bihar និង Uttar Pradesh ប្រឈមនឹងអាកាសធាតុដ៏អាក្រក់បំផុត ខណៈដែលចំនួនមនុស្សស្លាប់សរុបនៅក្នុងរដ្ឋទាំង២នេះ បានកើនឡើងដល់ ៩៨នាក់ អំឡុងរយៈពេល ៣ថ្ងៃប៉ុណ្ណោះ គិតត្រឹមថ្ងៃទី ១៨ ខែមិថុនា ។ ប្រជាពលរដ្ឋដែលមានជំងឺធ្ងន់ធ្ងរ ឬរ៉ាំរ៉ៃរយៈពេលយូរ ដែលរួមទាំងជំងឺបេះដូង ឬជំងឺសួត ទឹកនោមផ្អែម និងជំងឺគ្រួសក្នុងតម្រងនោម រងផលប៉ះពាល់ទាំងអស់ដោយសារតែរលកកម្តៅដ៏អាក្រក់នេះ ។ ដោយឡែក អ្នកដែលមានបញ្ហាសុខភាពផ្លូវចិត្ត រួមទាំងមនុស្សចាស់ និងអ្នកដែលប្រើថ្នាំតាមវេជ្ជបញ្ជាធ្វើឱ្យខូចសមត្ថភាពរាងកាយដើម្បីគ្រប់គ្រងសីតុណ្ហភាព មានហានិភ័យកើនឡើង នៅក្នុងសីតុណ្ហភាពដ៏ក្តៅបែបនេះ ។ ក្រុមគ្រូពេទ្យក្នុងស្រុកនៅទីក្រុង Patna រដ្ឋ Bihar និយាយថា ពួកគេពុំធ្លាប់ដែលមើលឃើញរលកកម្តៅដ៏ធ្ងន់ធ្ងរបែបនេះនោះទេ ។ លោក Deepak Kumar គឺជាវេជ្ជបណ្ឌិតមកពីមន្ទីរពេទ្យ Patna Medical College and Hospital (PMCH) និយាយថា លោកពុំធ្លាប់ដែលជួបអាការៈសុរិយរោគ ឬអាការៈថប់ដង្ហើមដោយសារកម្តៅខ្លាំងបែបហ្នឹងឡើយ ពីព្រោះថាមានមនុស្សច្រើនណាស់ បានស្លាប់ក្នុងរយៈពេល ៣-៤ថ្ងៃមុន ហើយលោកគិតថា មនុស្សប្រហែល ១០០នាក់ នឹងរងគ្រោះឥឡូវនេះនៅក្នុងមន្ទីរពេទ្យ PMCH របស់លោក ៕

ករណីជំងឺគ្រុនចាញ់នៅអាមេរិកលើកដំបូង ត្រូវបានពិនិត្យរោគវិនិច្ឆ័យក្នុងរយៈពេលច្រើនទសវត្សរ៍មកនេះនៅរដ្ឋ Florida និង Texas

អាមេរិក៖ មជ្ឈមណ្ឌលគ្រប់គ្រង និងបង្ការជំងឺឆ្លងបាននិយាយកាលពីថ្ងៃចន្ទថា ករណីជំងឺគ្រុនចាញ់ចំនួន៥ករណី ត្រូវបានបញ្ជាក់នៅក្នុងរដ្ឋ Florida និងរដ្ឋ Texas ជាលើកដំបូងដែលជំងឺចម្លងដោយសត្វមូសអាចបណ្តាលឱ្យស្លាប់ត្រូវបានគេរកឃើញក្នុងតំបន់នៅសហរដ្ឋអាមេរិកក្នុងរយៈពេល ២០ឆ្នាំមកនេះ។ ទីភ្នាក់ងារនេះ បាននិយាយថា ករណីចំនួនបួនករណីនៅក្នុងរដ្ឋ Florida រួមជាមួយនឹង១ករណីទៀតនៅរដ្ឋតិចសាស់ ត្រូវបានគេពិនិត្យរោគវិនិច្ឆ័យឃើញក្នុងរយៈពេលពីរខែ។រដ្ឋ Florida បាននិយាយថា ករណីលើកដំបូងរបស់ខ្លួនត្រូវបានពិនិត្យរោគវិនិច្ឆ័យកាលពីថ្ងៃទី ២៦ ខែឧសភានៅតំបន់ Sarasota ខណៈក្រុមមន្រ្តីនៅរដ្ឋតិចសាស់ បាននិយាយនៅថ្ងៃទី ២៣ ខែមិថុនាថាពលរដ្ឋនៅរដ្ឋតិចសាស់ម្នាក់ដែលធ្វើការនៅខាងក្រៅនៅតំបន់ Cameron ត្រូវបានគេពិនិត្យរោគវិនិច្ឆ័យថាមានជំងឺនេះ។ មជ្ឈមណ្ឌលគ្រប់គ្រង និងបង្ការជំងឺឆ្លង (CDC) បាននិយាយនៅក្នុងការព្រមានមួយដែលបានចេញផ្សាយកាលពីថ្ងៃច័ន្ទថា ជំងឺគ្រុនចាញ់ត្រូវបានចាត់ទុកថាជាគ្រាអាសន្នផ្នែកវេជ្ជសាស្រ្ត ហើយអ្នកដែលមានរោគសញ្ញាគួរតែត្រូវបានវាយតម្លៃជាបន្ទាន់។ទោះជាយ៉ាងណា មជ្ឈមណ្ឌលគ្រប់គ្រងនិងបង្ការជំងឺឆ្លង (CDC) បាននិយាយថា ហានិភ័យនៃជំងឺគ្រុនចាញ់ នៅតែមានកម្រិតទាបនៅក្នុងសហរដ្ឋអាមេរិក ហើយករណីភាគច្រើនត្រូវបានកើតឡើងនៅពេលដែលមនុស្សធ្វើដំណើរទៅក្រៅប្រទេស។ ទីភ្នាក់ងារសុខាភិបាលបាននិយាយថា ៩៥ ភាគរយនៃករណីឆ្លងមេរោគគ្រុនចាញ់ត្រូវបានឆ្លងនៅក្នុងទ្វីបអាហ្រ្វិក៕

រលកកម្តៅនៅអេស្ប៉ាញធ្វើឲ្យក្មេងៗលេងសប្បាយក្រោមទឹកបាញ់ ខណៈដែលកម្មករកាត់បន្ថយម៉ោងធ្វើការ

អេស្ប៉ាញ៖ រលកកម្តៅដំបូងក្នុងឆ្នាំនេះនៅប្រទេសអេស្ប៉ាញ បង្ខំឲ្យអ្នកថែសួននៅទីក្រុង Madridឈប់ធ្វើការមុនម៉ោងធម្មតាកាលពីថ្ងៃចន្ទម្សិលមិញ ហើយក្មេងៗ ព្យាយាមគេចចេញពីកម្តៅព្រះអាទិត្យដ៏ក្តៅនេះ ដោយនាំគ្នានៅខាងក្រោមកន្លែងទឹកបាញ់ ។ រលកកម្តៅនេះ ត្រូវបានគេរំពឹងថា នឹងបន្តកើតមានរហូតដល់ថ្ងៃពុធ មិនត្រឹមតែនៅក្នុងតំបន់សហគមន៍ Andalusia មួយប៉ុណ្ណោះទេ ប៉ុន្តែនៅទីក្រុង Madrid តំបន់សហគមន៍ Extremadura និងតំបន់សហគមន៍ Castilla-La Mancha ផងដែរ ជាទីដែលសីតុណ្ហភាពកើនឡើងដល់ ៤០អង្សាសេ ឬ ៤២អស្សាសេរ ។ វាពិតជាក្តៅខ្លាំងណាស់ ។ អ្នកស្រី Elvira Martinez គឺជាពលរដ្ឋមួយរូបវ័យ ២៧ឆ្នាំ និយាយប្រាប់ទីភ្នាក់ងារព័ត៌មានរ៉យទ័រ ខណៈពេលដែលកូនៗរបស់គាត់លេងសប្បាយលើឆ្នេរទីក្រុង Madrid ដែលមានទឹកបាញ់ជាច្រើននៅតាមដងទន្លេ Manzanares ថា ក្មេងៗមកទីនេះ ដើម្បីឲ្យត្រជាក់ខ្លួន ដោយសារនៅផ្ទះ ពួកគេមិនអាចទ្រាំបាននោះទេ ។ គួរឲ្យដឹងថា រលកកម្តៅនៅក្នុងខែមិថុនា បានកើតឡើងញឹកញាប់ជាងមុនក្នុងរយៈពេលប៉ុន្មានឆ្នាំចុងក្រោយនេះ គឺជាផ្នែកមួយនៃការឡើងសីតុណ្ហភាព ដែលក្រុមអ្នកវិទ្យាសាស្រ្ត និងអ្នកជំនាញអាកាសធាតុ សន្និដ្ឋានថាបណ្តាលមកពីសកម្មភាពរបស់មនុស្ស ។ លោក Ruben del Campo គឺជាអ្នកនាំពាក្យទីភ្នាក់ងារឧតុនិយមជាតិ (AEMET)បាននិយាយកាលពីថ្ងៃចន្ទនៅក្នុងព្រឹត្តការណ៍ជាមួយរដ្ឋមន្រ្តីក្រសួងបរិស្ថានលោក Teresa Ribera ថា កាលពីរយៈពេលជាង ១០ឆ្នាំមុន រលកកម្តៅពុំដែលកើតមានញឹកញាប់បែបនេះទាល់តែសោះ ប៉ុន្តែនៅក្នុងរយៈពេល ១២ឆ្នាំចុងក្រោយនេះ ភាពញឹកញាប់នៃរលកកម្តៅក្នុងខែមិថុនា បានកើនឡើងបីដង ៕

ព្យុះភ្លៀងបោកបក់មកលើតំបន់ជាច្រើនរបស់ចិន បណ្តាលឲ្យមានទឹកជំនន់ទ្រង់ទ្រាយធំ

ចិន៖ ភ្លៀងធ្លាក់ខ្លាំងបានបោកបក់ទៅលើតំបន់ជាច្រើនរបស់ចិនក្នុងរយៈពេលប៉ុន្មានថ្ងៃចុងក្រោយនេះ បណ្តាលឲ្យកើតមានទឹកជំនន់ជន់លិចដីកសិកម្ម បង្អាក់ដល់ការធ្វើចរាចរណ៍ និងធ្វើឲ្យអ្នកស្រុកជាប់ខ្លួន ។ ទីក្រុង Qiyang (ឈីយ៉ាង)ស្ថិតនៅខេត្តភាគកណ្តាល Hunan(ហ៊ូណាន)របស់ចិន បានកើតមានទឹកជំនន់ខ្ពស់បំផុតកាលពីរសៀលថ្ងៃចន្ទ ដោយសារភ្លៀងធ្លាក់ខ្លាំងអស់រយៈពេលជាច្រើនថ្ងៃជាប់ៗគ្នា និងការរំដោះទឹកជន់ពីផ្នែកខាងលើនៃទន្លេ Xiangjiang (ហ៊្សាំងជាំង)។ នៅក្នុងភូមិ Dongchuan(ទុងឈ័ន) ទឹកជន់បានហូរប្រៀបច្រាំងទន្លេហៀរដល់ផ្លូវថ្នល់ និងផ្ទះកញ្ចក់ ហើយវាលស្រែសងខាងផ្លូវ ត្រូវបានជន់លិចអស់ ។ ក្រុមអ្នកស្ម័គ្រចិត្តក្នុងស្រុក បានរៀបចំឲ្យអ្នកភូមិជម្លៀសខ្លួនចេញ និងផ្លាស់ទីទៅកាន់ទីទួលសុវត្ថិភាព ។ មកទល់នឹងពេលនេះ មនុស្ស ៨៩៤នាក់ ត្រូវបានជម្លៀសចេញ ។ ភ្លៀងធ្លាក់ឥតឈប់ឈរ បានបោកបក់លើទីក្រុង Hezhou (ហ៊ើចូវ)តំបន់ស្វយ័តភាគខាងត្បូង Guangxi Zhuang (ក្វាងហ្ស៊ី ជ័ង)អស់រយៈពេលជាច្រើនថ្ងៃមកហើយ ធ្វើឲ្យជន់លិចផ្លូវជនបទ និងបង្កឲ្យកើតមានបំណាក់ដីនៅទីនោះផងដែរ ។ ផ្លូវសំខាន់ៗជាច្រើនខ្សែនៅក្នុងទីក្រុងមួយនេះ ត្រូវបានជន់លិចជម្រៅទឹក ២០សង់ទីម៉ែត្រ កាលពីថ្ងៃអាទិត្យ ។ ក្រុមអាជ្ញាធរក្នុងស្រុក បានដាក់ពង្រាយរថយន្តបូមភក់ និងក្រុមការងារសង្រ្គោះបន្ទាន់ទៅកាន់តំបន់ជនបទផ្សេងៗជាច្រើន ដើម្បីធានាដល់ការធ្វើចរាចរណ៍ធម្មតា ។ ខណៈពេលនោះដែរ មនុស្ស ៧នាក់ ត្រូវបានគេរាយការណ៍ថា កំពុងបាត់ខ្លួន ក្រោយហេតុការណ៍បំណាក់ដី ២លើកបណ្តាលមកពីភ្លៀងធ្លាក់ខ្លាំងនៅស្រុក Wenchuan (វិនឈ័ន) ខេត្ត Sichuan (ស៊ីឈ័ន) ភាគនិរតីប្រទេសចិន នាព្រឹកថ្ងៃអង្គារនេះ ៕

ភ្លៀងធ្លាក់ខ្លាំងធ្វើឲ្យផ្លូវថ្មើរជើង នៅក្រុងប៊ែរឡាំង ជន់លិច

អាល្លឺម៉ង់៖ ភ្លៀងធ្លាក់រយៈពេលខ្លី ប៉ុន្តែមានសភាពខ្លាំងក្លា នៅទីក្រុងប៊ែរឡាំង ប្រទេសអាល្លឺម៉ង់ កាលពីថ្ងៃចន្ទ (ទី២៦ ខែមិថុនា) ដោយបានធ្វើឲ្យអ្នកជិះកង់ និងអ្នកថ្មើរជើងត្រូវទទឹក ដោយសារពួកគេត្រូវដើរលុយទឹកដែលលិចដល់ស្មងជើង នៅគ្រប់កន្លែង។ភ្លៀងបានធ្លាក់បន្ទាប់ពីមានអាកាសធាតុក្ដៅហើយសើម ដែលឃើញថា សីតុណ្ហភាពឡើងខ្ពស់ដល់ ៣០អង្សាសេ។ ការិយាល័យអាកាសធាតុអាល្លឺម៉ង់ បានចេញសេចក្ដីព្រមានអំពីព្យុះ និងការធ្លាក់ព្រិល នៅផ្នែកខ្លះនៃទីក្រុងប៊ែរឡាំង និងទីក្រុងប៊្រេនដែនប៊ើក (Brandenburg) ខណៈដែលការិយាល័យអគ្គិភ័យ បានប្រកាសអំពី «ស្ថានភាពមិនប្រក្រតី» នៅលើទំព័របណ្ដាញសង្គម Twitter របស់ខ្លួន។គេឃើញថា ការធ្វើចរាចរណ៍មិនសូវជាមមាញឹក ដោយសារភ្លៀងនេះ ហើយសេវាដឹកជញ្ជូនសាធារណៈ S-Bahn នៅទីក្រុងប៊ែរឡាំង បានប្រកាសផ្ដល់ដំណឹងថា នឹងមានការលុបចោល និងការពន្យារពេលទាំងស្រុងនូវបណ្តាញដឹកជញ្ជូនរបស់ខ្លួន៕

ខ្មាន់កាំភ្លើងដែលបាញ់ប្រហារសម្លាប់មនុស្ស៥នាក់ នៅក្លឹបរាត្រីភេទទី៣នៅរដ្ឋខូឡូរ៉ាដូ ផ្ដល់ចម្លើយពីភាពមានទោស ត្រូវជាប់ពន្ធនគារអស់មួយជីវិត

អាមេរិក៖ ជនសង្ស័យក្នុងការបាញ់ប្រហារដ៏រង្គាល ដែលបានស្លាប់មនុស្ស៥នាក់ នៅក្លឹបកម្សាន្តរាត្រីភេទទី៣ Colorado Springs កាលពីឆ្នាំ២០២២ ត្រូវបានកាត់ទោសឲ្យជាប់ពន្ធនាគារអស់មួយជីវិត បន្ទាប់ពីផ្ដល់ចម្លើយពីភាពមានទោសចំពោះឃាតកម្ម និងបទចោទប្រកាន់ផ្សេងទៀត ក្នុងការវាយប្រហារនេះ។ ការកាត់ទោសជនល្មើស Anderson Lee Aldrich កើតឡើងត្រឹមតែ៧ខែ បន្ទាប់ពីការបាញ់ប្រហារ និងទុកឲ្យជីវិតគ្រួសាររបស់ក្រុមជនរងគ្រោះ និងអ្នកនៅរស់រានមានជីវិត រង់ចាំការកាត់ក្តីដ៏យូរ និងពោពេញដោយការឈឺចាប់។ ជនល្មើស Aldrich ដែលបានបដិសេធមិននិយាយទៅកាន់តុលាការមុនការកាត់ទោស បានផ្ដល់ចម្លើយពីភាពមានទោសនៃអំពើឃាតកម្មចំនួន៥ករណី និង៤៦ករណីពីបទប៉ុនប៉ងនុស្សឃាត។លោក Aldrich ក៏បានអង្វរកុំឲ្យបែងចែកគ្នាចំពោះឧក្រិដ្ឋកម្មស្អប់ខ្ពើមចំនួនពីរ មួយបទឧក្រិដ្ឋ និងមួយទៀតជាបទមជ្ឈិម។គួររម្លឹកថា កាលពីថ្ងៃទី ១៩ខែវិច្ឆិកា ឆ្នាំ ២០២២ ជនជាប់ចោទ Aldrich ដែលបានពាក់អាវក្រោះ បានបើកការបាញ់ប្រហារនៅក្លឹប Q ដែលជាក្លឹបរាត្រីសម្រាប់ភេទទី៣ LGBTQ នៅសហរដ្ឋអាមេរិក ។ ក្រៅពីអ្នកដែលត្រូវបានសម្លាប់ មនុស្សជិត២០នាក់ផ្សេងទៀតបានរងរបួសដោយគ្រាប់កាំភ្លើង ឬរបួសដោយសារវត្ថុផ្សេងទៀត មុនពេលត្រូវបានបញ្ឈប់ ។ Aldrich ដែលមានអាយុ២២ ឆ្នាំត្រូវបានចោទប្រកាន់ពីបទឧក្រិដ្ឋចំនួន ៣២៣ ករណី ៕

ភ្លៀងធ្លាក់ខ្លាំងជាច្រើនថ្ងៃ បណ្ដាលឲ្យមានទឹកជំនន់ នៅភាគកណ្ដាលឈីលី

ឈីលី៖ ភ្លៀងធ្លាក់ខ្លាំងជាច្រើនថ្ងៃ បានធ្វើឲ្យទឹកទន្លេនៃប្រទេសឈីលីឡើងខ្ពស់ រហូតបង្កទៅជាទឹកជំនន់បិទផ្លូវ និងបង្ខំឲ្យមានការជម្លៀសចេញនៅតំបន់ភាគកណ្តាលប្រទេស ដែលនេះជាអ្វីដែលត្រូវបានគេចាត់ទុកថា ជាការប្រឈមនឹងអាកាសធាតុដ៏អាក្រក់បំផុត ក្នុងរយៈពេលមួយទសវត្សរ៍។រូបភាព ដែលថតពីលើអាកាស បានបង្ហាញឲ្យឃើញពីភូមិ លំនៅឋាន និងដំណាំផ្សេងៗ នៅភាគកណ្តាលនៃប្រទេសឈីលី បានលិចបាត់ក្នុងទឹកជំនន់ ដោយអ្នកស្រុក និងលំនៅឋានជាច្រើនខ្នង ត្រូវជាប់នៅក្នុងផលវិបាកដែលបំផ្លាញខ្ទេចខ្ទី បន្ទាប់ពីមានភ្លៀងធ្លាក់យ៉ាងខ្លាំង។ដំណាក់ដំបូងនេះ មានការរាយការណ៍ថា មនុស្សពីរនាក់ បានស្លាប់ ក្នុងគ្រោះទឹកជំនន់នេះ ខណៈ ៣នាក់ទៀត បាត់ខ្លួន ហើយអ្នកស្រុកជាង ៤០០នាក់ បានបាត់បង់លំនៅឋានរបស់ពួកគេ។ ការបិទផ្លូវ និងទឹកជំនន់ដ៏ធំនេះ បានជំរុញឲ្យអាជ្ញាធរជួយសង្គ្រោះជនរងគ្រោះ ដោយប្រើឧទ្ធម្ភាគចក្រ និងទូកជាច្រើនគ្រឿង ហើយជាមួយគ្នានេះ រដ្ឋាភិបាលបានសម្រេចប្រកាសតំបន់គ្រោះមហន្តរាយពីតំបន់ Valparaiso ទៅតំបន់ BioBio។បម្រែបម្រួលអាកាសធាតុ ធ្វើឲ្យអាកាសធាតុមានសភាពកាន់តែធ្ងន់ធ្ងរឡើងៗ ដោយភ្លៀងធ្លាក់ នៅប្រទេសឈីលីនេះ កើតឡើងតែប៉ុន្មានខែប៉ុណ្ណោះ បន្ទាប់ពីមានចំហេះព្រៃ ចំពេលមានគ្រោះរាំងស្ងួតធ្ងន់ធ្ងរ ដែលបានបំផ្លាញលំនៅឋានរាប់រយខ្នង និងបណ្តាលឲ្យមនុស្សរាប់សិបនាក់ បាត់បង់ជីវិត៕

មនុស្ស៣នាក់ស្លាប់ និងលំនៅឋានរាប់សិបខ្នងត្រូវបានបំផ្លាញបន្ទាប់ពីព្យុះបោកបក់នៅតំបន់Midwest សហរដ្ឋអាមេរិក

អាមេរិក៖ អាជ្ញាធរបាននិយាយកាលពីថ្ងៃចន្ទថា ព្យុះកួចនិងព្យុះភ្លៀង បានបោកបក់នៅតំបន់Midwest និងភាគខាងត្បូងសហរដ្ឋអាមេរិក បានបណ្តាលឱ្យលំនៅឋានរាប់សិបខ្នងត្រូវបានបំផ្លាញ និងយ៉ាងហោចណាស់មនុស្ស៣នាក់បានស្លាប់នៅក្នុងរដ្ឋ Indiana និង Arkansas ។អង្គភាពសេវាអាកាសធាតុជាតិបាននិយាយថា ខ្យល់កួចជាច្រើន និងខ្យល់ព្យុះខ្លាំង ត្រូវបានគេរាយការណ៍កាលពីថ្ងៃអាទិត្យនៅភាគកណ្តាលរដ្ឋ Indiana និងរដ្ឋ Arkansas ។មន្ត្រីសង្គ្រោះបន្ទាន់ មកពីតំបន់ Martin រដ្ឋ Indiana បានបញ្ជាក់ថា មានអ្នកស្លាប់ម្នាក់នៅក្នុងតំបន់នេះ។ នាយកគ្រប់គ្រងគ្រោះអាសន្ន លោក Cameron Wolf បាននិយាយថា ដៃគូដែលរងរបួសរបស់ជនរងគ្រោះ ត្រូវបានបញ្ជូនទៅកាន់មន្ទីរពេទ្យ។ ពួកគេរស់នៅក្នុងលំនៅឋានសង់ពីឈើពីរជាន់ ដែលត្រូវបានបំផ្លាញដោយព្យុះ។ ការិយាល័យតម្រួតតំបន់ Lonoke បានបញ្ជាក់ថា មនុស្សពីរនាក់បានស្លាប់ បន្ទាប់ពីដើមឈើមួយដើមបានបាក់រលំលើលំនៅឋានមួយខ្នងក្នុងទីក្រុង Carlisle រដ្ឋ Arkansas ដោយសារតែខ្យល់ព្យុះខ្លាំងកាលពីថ្ងៃអាទិត្យ។ យោងតាមគេហទំព័រតាមដានការដាច់ចរន្តអគ្គិសនី PowerOutage.us បានឲ្យដឹងថា គិតត្រឹមព្រឹកថ្ងៃចន្ទ អតិថិជនប្រើប្រាស់អគ្គិសនីប្រហែល៥សែននាក់បានប្រឈមការដាច់ចរន្តអគ្គិសនីដោយសារតែអាកាសធាតុនៅតំបន់ Midwest និងនៅភាគខាងត្បូង សហរដ្ឋអាមេរិក៕

ឧតុនិយមឥណ្ឌាព្យាករណ៍ថា នឹងមានភ្លៀងធ្លាក់ពីខ្លាំងដល់កម្រិតធ្ងន់ធ្ងរ ក្នុងរដ្ឋចំនួន៨ រហូតដល់ថ្ងៃទី ៣០ ខែមិថុនា

ឥណ្ឌា៖ មន្ទីរឧតុនិយមឥណ្ឌា (IMD) កាលពីថ្ងៃចន្ទបានព្យាករណ៍ថានឹងមានភ្លៀងធ្លាក់ខ្លាំងទៅខ្លាំងក្លាបំផុត នៅក្នុងរដ្ឋមួយចំនួនរហូតដល់ថ្ងៃទី ៣០ ខែមិថុនា។ មន្ទីរអាកាសធាតុក៏បានចេញសេចក្ដីជូនដំណឹងផងដែរអំពីភ្លៀងធ្លាក់ខ្លាំងសម្រាប់ស្រុកមួយចំនួននៃរដ្ឋ រាជស្ថាន (Rajasthan) រដ្ឋ ម៉ាត់យ៉ាប្រទេស (Madhya Pradesh)រដ្ឋ ឆាទីសហ្គា(Chhattisgarh) រដ្ឋ ឧត្តារខណ្ឌ (Uttarakhand) រដ្ឋ ហិម៉ាឆាលប្រទេស(Himachal Pradesh)រដ្ឋអាសាំ (Assam) និងរដ្ឋ ម៉េហ្គាឡាយ៉ា ( Meghalaya) ។ នៅក្នុងការធ្វើបច្ចុប្បន្នភាពចុងក្រោយបំផុតរបស់ខ្លួន មន្ទីរអាកាសធាតុបាននិយាយថា ស្ថានភាពខ្យល់មូសុងសកម្មទំនងជាបន្តធ្លាក់លើភាគខាងកើត ភាគពាយ័ព្យ និងភាគខាងលិចប្រទេសឥណ្ឌាក្នុងរយៈពេល ៥ទៅ៥ ថ្ងៃបន្ទាប់។ មន្ទីរឧតុនិយមខាងលើនេះបាននិយាយថា សម្រាប់តំបន់ភាគឦសាន មន្ទីរឧតុនិយម បានព្យាករណ៍ថានឹងមានភ្លៀងធ្លាក់ខ្លាំង នៅរដ្ឋ អាសាំ រដ្ឋម៉េហ្គាឡាយ៉ា និង រដ្ឋ អារុណាចាល់ ប្រទេស (Arunachal Pradesh) នៅថ្ងៃទី២៩ និង៣០ ខែមិថុនា។ "ភ្លៀងធ្លាក់ខ្លាំងនៅដាច់តំបន់ស្រយាលក៏ទំនងជានៅលើផ្នែកខ្លះនៃប្រទេសឥណ្ឌាខាងកើតក្នុងអំឡុងពេលពីរថ្ងៃបន្ទាប់ និងលើភាគឦសាននៃប្រទេសឥណ្ឌាក្នុងអំឡុងពេល ៥ ថ្ងៃបន្ទាប់។ នៅភាគពាយព្យ រដ្ឋ រាជស្ថាន ត្រូវបានគេរំពឹងថានឹងមើលឃើញពីភ្លៀងធ្លាក់ខ្លាំង ដល់ខ្លាំងបំផុតនៅថ្ងៃទី ២៩ ខែមិថុនា និង ភ្លៀងធ្លាក់ខ្លាំង នៅថ្ងៃទី ២៧ និង ២៨ ខែមិថុនា។ រដ្ឋ អុត្តារខណ្ឌ និង រដ្ឋ ហិម៉ាចាលប្រទេស ត្រូវបានគេរំពឹងថានឹងវាយប្រហារដោយ ភ្លៀងធ្លាក់ខ្លាំងដល់ខ្លាំងបំផុត រហូតដល់ថ្ងៃទី២៨ ខែមិថុនា។ ការិយាល័យអាកាសធាតុបានចេញសេចក្ដីជូនដំណឹង 'ពណ៌លឿងទុំ' សម្រាប់រដ្ឋឧត្តារខណ្ឌ ទាំងមូលសម្រាប់ថ្ងៃអង្គារនេះ និងការជូនដំណឹង 'ពណ៌លឿង' រហូតដល់ថ្ងៃទី ៣០ ខែមិថុនានេះ៕

បណ្ដាញសង្គម

ព័ត៌មានថ្មីៗ

អង្គការសហប្រជាជាតិទទួលបន្ទុកសិទ្ធិមនុស្ស គូសបញ្ជាក់គម្រោងបន្តកិច្ចសហប្រតិបត្តិការ សិទ្ធិមនុស្សកម្ពុជា

សមាជិករដ្ឋសភា ចុះសួរសុខទុក្ខប្រជាពលរដ្ឋរងគ្រោះ ១២គ្រួសារ នៅភូមិព្រៃចាន់ និងភូមិជោគជ័យ

ឯកឧត្តម វង សូត អញ្ជើញទៅចូលរួមសន្និសីទសភាអន្តរជាតិរំលឹកខួបលើកទី៣០ នៃការអនុម័តរដ្ឋធម្មនុញ្ញសាធារណរដ្ឋអាស៊ែបៃហ្សង់

រថយន្តដឹកប្រេង និងជំនួយទៅកាន់តំបន់ហ្កាហ្សា បានធ្វើដំណើរឆ្លងកាត់ច្រកព្រំដែន Rafah របស់អេហ្ស៊ីប

លោក Trump ទៅដល់ជប៉ុនហើយ ជាជើងទី២ នៃដំណើរទស្សនកិច្ច ៣ប្រទេស នៅអាស៊ី

សម្តេចធិបតី បញ្ជាក់សារៈសំខាន់ នៃការដំឡើងកម្រិតភាពជាដៃគូសេដ្ឋកិច្ចគ្រប់ជ្រុងជ្រោយអាស៊ាន-ជប៉ុន

យន្តហោះចម្បាំងសហរដ្ឋអាមេរិក បានធ្លាក់នៅសមុទ្រចិនខាងត្បូង ហើយអាកាសយានិកត្រូវបានសង្រ្គោះ

សម្តេចធិបតី បានអំពាវនាវឱ្យសហរដ្ឋអាម៉េរិកគាំទ្រអាស៊ានក្នុងការពង្រឹងសមាហរណកម្មឌីជីថល

សភាកូសូវ៉ូមិនអាចបោះឆ្នោតជ្រើសរើសនាយករដ្ឋមន្ត្រី ខណៈការបោះឆ្នោតមុនអាណត្តិ ជិតកើតមាន

លោក Trump បញ្ជាក់ថា លោកនឹងដោះស្រាយវិបត្តិអាហ្វហ្គានីស្ថាន-ប៉ាគីស្ថាន «ឲ្យបានឆាប់»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877