BTV NEWS

៣ខែដើមឆ្នាំនេះ ក្មេងទំនើងជិត ១ពាន់នាក់ត្រូវសមត្ថកិច្ចឃាត់ខ្លួន

នគរបាលជំនាញព្រហ្មទណ្ឌរាជធានីភ្នំពេញ បង្រ្កាបជនសង្ស័យជនជាតិចិន ៣នាក់ពាក់ព័ន្ធអំពើលួចរថយន្ត និងផ្លាកលេខរថយន្តចំនួន ៦ករណី

កម្លាំងនគរបាលរាជធានី បើកការឆ្មក់ចុះបង្ក្រាប Online Scams នៅខណ្ឌសែនសុខ ឃាត់ខ្លួនជនបរទេស ៣៣នាក់

ឃាត់ខ្លួនជនសង្ស័យ០៩នាក់ រកឃើញសម្ភារបម្រើឲ្យបទល្មើស Online Scams និងអាវុធខ្លីមួយដើម នៅខណ្ឌច្បារអំពៅ

សន្តិសុខ និង សង្គម

UN ព្រមានថា ការវាយលុកជើងគោករបស់អ៊ីស្រាអែល លើក្រុងរ៉ាហ្វា ខិតកាន់តែកៀក

អង្គការសហប្រជាជាតិ កាលពីថ្ងៃអង្គារ (៣០ មេសា) បានព្រមានថា ការវាយលុកថ្មើជើងរបស់អ៊ីស្រាអែល លើទីក្រុង រ៉ាហ្វា (Rafah) នៅតំបន់ហ្កាហ្សាស្ទ្រីប គឺ «កាន់តែកៀកខ្លាំង» ហើយថាវឌ្ឍនភាព «បន្ថែមតិចតួច» របស់អ៊ីស្រាអែល លើការបញ្ជូនជំនួយទៅកាន់តំបន់ហ៊ុមព័ទ្ធនោះមិនអាចប្រើដើម្បីរៀបចំ ឬបង្ហាញអំពីភាពត្រឹមត្រូវនៃប្រតិបត្តិការសឹកណាមួយបានទេ។អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) បានអំពាវនាវឱ្យបណ្ដារដ្ឋដែលមានឥទ្ធិពលលើអ៊ីស្រាអែល «ធ្វើអ្វីគ្រប់យ៉ាងនៅក្នុងអំណាចរបស់ពួកគេ» ដើម្បីការពារការវាយលុកជើងគោករបស់អ៊ីស្រាអែល លើក្រុងរ៉ាហ្វា នៅភាគខាងត្បូងហ្កាហ្សា ជាទីដែលប្រជាជនប៉ាឡេស្ទីនជាង ១,២ លាននាក់រត់ភៀសខ្លួនពីកន្លែងផ្សេងៗនៃតំបន់ហ្កាហ្សា កំពុងជ្រកកោន។ប្រធានជំនួយរបស់អង្គការសហប្រជាជាតិ លោក ម៉ាទីន ហ្គ្រីសហ្វីបស៍ (Martin Griffiths) បាននិយាយនៅក្នុងសេចក្តីថ្លែងការណ៍មួយថា «ពិភពលោកបានធ្វើការអំពាវនាវដល់អាជ្ញាធរអ៊ីស្រាអែល អស់ជាច្រើនសប្តាហ៍ដើម្បីរំដោះទីក្រុងរ៉ាហ្វា ប៉ុន្តែប្រតិបត្តិការជើងគោកនៅទីនោះគឺខិតកាន់តែជិតដល់ជាងមុនទៅទៀត។ ការពិតដ៏សាមញ្ញបំផុតគឺថា ប្រតិបត្តិការថ្មើជើងនៅ រ៉ាហ្វា គឺមានតែសោកនាដកម្មប៉ុណ្ណោះ»។បណ្តាប្រទេសលោកខាងលិច រួមទាំងសម្ព័ន្ធមិត្តជិតស្និទ្ធបំផុតរបស់អ៊ីស្រាអែល គឺសហរដ្ឋអាមេរិក បានទទូចកុំឱ្យវាយប្រហារទីក្រុងនៅចុងភាគខាងត្បូងនៃតំបន់ហ្កាហ្សា ដែលជាជម្រកសម្រាប់ជាងពាក់កណ្តាលនៃប្រជាជនសរុបចំនួន ២,៣ លាននាក់មួយនេះ៕

អង្គការផ្ទះបាយកណ្តាលពិភពលោក (WCK)និយាយថា អង្គការបានដំណើរការឡើងវិញ នៅហ្កាហ្សា

អង្គការផ្ទះបាយកណ្តាលពិភពលោក (WCK) បានចេញផ្សាយរូបភាព កាលពីថ្ងៃអង្គារ ដែលអង្គការនេះ បានបង្ហាញពីបុគ្គលិកនិងអ្នកស្ម័គ្រចិត្តជាច្រើននាក់ កំពុងធ្វើការនៅតំបន់ហ្កាហ្សា។ អង្គការ WCK បាននិយាយកាលពីថ្ងៃចន្ទថា ខ្លួននឹងបន្តប្រតិបត្តិការនៅតំបន់ហ្កាហ្សាស្ទ្រីប មួយខែបន្ទាប់ពីបុគ្គលិក៧នាក់របស់អង្គការសប្បុរសធម៌ដែលមានមូលដ្ឋាននៅសហរដ្ឋអាមេរិក ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល។មុនពេលបញ្ឈប់ប្រតិបត្តិការ អង្គការ WCK បានចែកចាយអាហារជាង៤៣លានកញ្ចប់នៅតំបន់ហ្កាហ្សា ចាប់តាំងពីខែតុលា ដែលបង្ហាញពីចំនួនផ្ទាល់ខ្លួន៦២ភាគរយ ក្នុងចំណោមជំនួយរបស់អង្គការក្រៅរដ្ឋាភិបាលអន្តរជាតិទាំងអស់។អង្គការសប្បុរសធម៌មួយនេះ បាននិយាយថា អង្គការមានរថយន្តដឹកជំនួយចំនួន ២៧៦គ្រឿង ដែលមានអាហារជិត៨លានកញ្ចប់រួចហើយដើម្បីចូលឆ្លងកាត់ទីក្រុង Rafah ដែលនឹងបញ្ជូនរថយន្តដឹកជំនួយទៅកាន់តំបន់ហ្កាហ្សា ពីប្រទេសហ្ស៊កដានី។អ្នកស្លាប់កាលពីថ្ងៃទី ១ ខែមេសា បង្កឱ្យមានការថ្កោលទោសយ៉ាងទូលំទូលាយ និងការទាមទារការពន្យល់ពីសម្ព័ន្ធមិត្តរបស់អ៊ីស្រាអែល រួមទាំងសហរដ្ឋអាមេរិកផងដែរ។អ៊ីស្រាអែល បាននិយាយថា ការស៊ើបអង្កេតរបស់ខ្លួនបានរកឃើញកំហុសធ្ងន់ធ្ងរ និងការរំលោភលើនីតិវិធីធ្វើឡើងដោយយោធារបស់ខ្លួន ដោយបានបណ្តេញមន្ត្រីជាន់ខ្ពស់ពីរនាក់ និងស្តីបន្ទោសមេបញ្ជាការជាន់ខ្ពស់ច្រើននាក់។ ទន្ទឹមគ្នានេះ អង្គការ WCK កំពុងទាមទារឱ្យមានការស៊ើបអង្កេតឯករាជ្យ។

រថយន្តក្រុង និងរថភ្លើងបុកគ្នានៅទីក្រុង Los Angeles បណ្តាលឲ្យមនុស្សរាប់សិបនាក់រងរបួស

មនុស្សរាប់សិបនាក់ បានរងរបួសបន្ទាប់ពីរថភ្លើងនិងរថយន្តក្រុងបានបុកគ្នា នៅតំបន់ឧទ្យាន Exposition Park ទីក្រុង Los Angeles រដ្ឋកាលីហ្វ័នីញ៉ា សហរដ្ឋអាមេរិក កាលពីថ្ងៃអង្គារ។រថភ្លើងដែលដឹកអ្នកដំណើរជាង១៥០នាក់ និងរថយន្តក្រុងរបស់សាកលវិទ្យាល័យ Southern California (USC) បានបុកគ្នា។អាជ្ញាធរ បានទទួលការរាយការណ៍អំពីឧបទ្ទវហេតុនេះភ្លាមៗនៅមុនពេលរសៀល នៅលើមហាវិថី Exposition ទីក្រុង Los Angeles ។ក្រុមអ្នកសង្គ្រោះបន្ទាន់ បានដឹកជញ្ជូនអ្នករបួសពីរនាក់យកចេញពីរថយន្តសាកលវិទ្យាល័យ ទៅកាន់មន្ទីរពេទ្យនៅក្បែរនោះ ខណៈពួកគេស្ថិតក្នុងស្ថានភាពធ្ងន់ធ្ងរ ប៉ុន្តែនៅតែដឹងខ្លួននៅឡើយ។បន្ថែមលើនេះ អ្នកដំណើរចំនួន១៦ នាក់នៅលើរថភ្លើង បានរងរបួសស្រាល ប៉ុន្តែត្រូវការការយកចិត្តទុកដាក់ផ្នែកវេជ្ជសាស្ត្រនៅកន្លែងថែទាំសុខភាពក្នុងតំបន់។ មនុស្សសរុបចំនួន ៣៧ នាក់បានទទួលការព្យាបាលនៅនឹងកន្លែងកើតហេតុ ហើយត្រូវបានចាកចេញជាបន្តបន្ទាប់។

នាយករដ្ឋមន្ត្រីអ៊ីស្រាអែល ព្រមានវាយលុកក្រុងរ៉ាហ្វា ទោះមាន ឬគ្មានកិច្ចព្រមព្រៀងបទឈប់បាញ់ក្ដី

លោកនាយករដ្ឋមន្ត្រីអ៊ីស្រាអែល Benjamin Netanyahu បានប្តេជ្ញាកាលពីថ្ងៃអង្គារ ៣០ មេសា ថា ខ្លួននឹងបើកការវាយលុកលើទីក្រុង រ៉ាហ្វា (Rafah) ភាគខាងត្បូងក្នុងដែនដីហ្កាហ្សាស្ទ្រីប ទោះមាន ឬគ្មានកិច្ចព្រមព្រៀងបទឈប់បាញ់ជាមួយក្រុមហាម៉ាសក៏ដោយ។ នាយករដ្ឋមន្ត្រី ដែលកំពុងរងសម្ពាធទាំងក្នុងស្រុក និងអន្តរជាតិ រូបនេះ បានចេញការព្រមាននេះ ទោះបីមានការព្រួយបារម្ភយ៉ាងខ្លាំងលើកឡើងដោយទីក្រុងវ៉ាស៊ីនតោន ដែលជាសម្ព័ន្ធមិត្តសំខាន់បំផុតរបស់ខ្លួនក្ដី និងប៉ុន្មានម៉ោងមុនពេលរដ្ឋមន្ត្រីការបរទេសអាមេរិកលោក លោកAntony Blinken ទៅដល់ប្រទេសអ៊ីស្រាអែលក្នុងដំណើរចុងក្រោយរបស់លោកដើម្បីដោះស្រាយវិបត្តិនៅមជ្ឈិមបូព៌ា។ លោក Netanyahu ដែលបានប្តេជ្ញាថានឹងកម្ទេចក្រុមហាម៉ាស ក្រោយការវាយប្រហារកាលពីថ្ងៃទី៧ខែតុលា បានសន្យាប្រយុទ្ធលុះត្រាទទួលជ័យជម្នះទាំងស្រុង ហើយបាននិយាយថាការបញ្ឈប់សង្រ្គាម មុនពេលសម្រេចបានគោលដៅទាំងអស់គឺមិនអាចទៅរួចឡើយ ។ ការិយាល័យរបស់លោកបាននិយាយថា លោកនាយករដ្ឋមន្ត្រី បានប្រាប់ក្រុមគ្រួសាររបស់ចំណាប់ខ្មាំងមួយចំនួនដែលនៅតែត្រូវបានឃុំខ្លួននៅក្នុងដែនដីហ្កាហ្សាថាយើងនឹងចូលទៅក្នុងតំបន់ រ៉ាហ្វា ហើយយើងនឹងលុបបំបាត់កងវរសេនាតូចហាម៉ាសនៅទីនោះ ទោះមាន ឬគ្មានកិច្ចព្រមព្រៀងក៏ដោយ។ ការអត្ថាធិប្បាយរបស់លោក Netanyahu បានកើតឡើង ខណៈក្រុមហាម៉ាស កំពុងថ្លឹងថ្លែងផែនការចុងក្រោយសម្រាប់បទឈប់បាញ់ដែលបានស្នើឡើងនៅក្នុងកិច្ចពិភាក្សានៅទីក្រុងគែរ(Cairo) ប្រទេសអេហ្ស៊ីប ជាមួយក្រុមអ្នកសម្របសម្រួលអាមេរិក អេហ្ស៊ីប និងកាតា ដែលបានលើកឡើងពីក្តីសង្ឃឹមយ៉ាងប្រុងប្រយ័ត្នសម្រាប់ការបញ្ចប់ការប្រយុទ្ធគ្នា បន្ទាប់ពីសង្រ្គាមមានរយៈពេលជិត៧ខែ៕

កម្មករសំណង់ឥណ្ឌា ប្រឈមស្ថានភាពការងារធ្ងន់ធ្ងរខ្លាំង ដោយសាររលកកម្ដៅខ្លាំងពេក

រលកកម្ដៅដ៏ក្ដៅបំផុតនៅក្នុងទីក្រុងកូលកាតា(Kolkata)ភាគខាងកើតរបស់ប្រទេសឥណ្ឌា បានបង្កបញ្ហាធ្ងន់ធ្ងរយ៉ាងខ្លាំងដល់ពលករ ឬកម្មករសំណង់នៅខាងក្រៅ ខណៈពួកគេធ្វើការនៅការរដ្ឋានសំណង់ផ្សេងៗ ក្រោមកម្ដៅព្រះអាទិត្យដ៏ក្ដៅជាច្រើនម៉ោង ដោយមានពេលសម្រាកបានតិចតួច។ កាលពីថ្ងៃអង្គារ ទី៣០ ខែមេសា សប្ដាហ៍នេះ ក្រុមកម្មករ បាននិយាយថា ការធ្វើការងារនៅក្រោមស្ថានភាពអាកាសធាតុគ្រោះថ្នាក់បែបនេះ អាហារូបត្ថម្ភល្អៗគឺជារឿងចាំបាច់។ កម្មករម្នាក់ លោក បៃយ៉ា ណាត់យ៉ាដាវ (Baidya Nath Yadav)បាននិយាយថា ការជ្រកក្រោមម្លប់ និងទទួលទានភេសជ្ជៈមានសារធាតុគ្លុយកូស គឺជាដំណោះស្រាយដ៏ល្អ ជួយដល់កម្មករសំណង់ ដើម្បីរក្សាកម្រិតថាមពលរបស់ពួកគេ អំឡុងបំពេញការងារ ។ ទីក្រុងនេះ បានកត់ត្រា កម្រិតសីតុណ្ហភាពអតិបរ ៤២អង្សាសេ ខណៈការិយាល័យអាកាសធាតុ បានចេញការប្រកាសអាសន្ន សម្រាប់កម្ដៅក្ដៅខ្លាំងបន្ថែមទៀត និងសំណើមក្ដៅ ជាងធម្មតា រវាងខែមេសា និងខែមិថុនា។ មនុស្ស២នាក់ បានស្លាប់ នៅក្នុងរដ្ឋកេរ៉ាឡា(Kerala)ប្រទេសឥណ្ឌា កាលពីថ្ងៃទី២៩ខែមេសា ដោយគេសង្ស័យថាស្លាប់ដោយសារក្ដៅខ្លាំងពេក ។ ក្រុមអ្នកវិទ្យាសាស្ត្រ បាននិយាយថា បម្រែបម្រួលអាកាសធាតុ ជាកត្តាជំរុញឲ្យមានរលកកម្ដៅកាន់តែញឹកញាប់ ធ្ងន់ធ្ងរ និងមានរយៈពេលយូរ អំឡុងរយៈពេលប៉ុន្មានខែនៃរដូវក្ដៅនេះ៕

ពលរដ្ឋវៀតណាម ស្នាក់នៅក្នុងផ្ទះ អំឡុងពេលវិស្សមកាល ដើម្បីគេចពីរលកកម្ដៅខ្លាំង

អ្នកស្រុកជាច្រើននៅទីក្រុងហាណូយបានជ្រើសរើសការចំណាយពេលវិស្សមកាលនៃទិវាបង្រួបបង្រួមជាតិរបស់ពួកគេស្នាក់នៅក្នុងផ្ទះកាលពីថ្ងៃអង្គារ ថ្ងៃទី៣០ ខែមេសា ខណៈប្រទេសវៀតណាមបានជួបប្រទះរលកកម្ដៅក្ដៅបំផុត ដោយមានសីតុណ្ហភាពកើនឡើងដល់ ៤៤ អង្សាសេ នៅក្នុងតំបន់មួយចំនួនរបស់ប្រទេសនេះ។ ថ្ងៃឈប់សម្រាកជាសាធារណៈ ដែលជាថ្ងៃរំលឹកខួបនៃការបង្រួបបង្រួមវៀតណាមខាងត្បូង និងខាងជើងក្នុងឆ្នាំ ១៩៧៥ ជាធម្មតាគេតែងមើលឃើញទីធ្លាសាធារណៈនានាពោរពេញដោយភ្ញៀវទេសចរកាលពីឆ្នាំមុនៗ។ឆ្នាំនេះ ភ្ញៀវទេសចរជាច្រើនកំពុងស្វែងរកទីជម្រកក្នុងម្លប់ ដើម្បីគេចពីកម្ដៅព្រះអាទិត្យដ៏ក្ដៅ ដែលធ្វើឲ្យផ្លូវនានាក្នុងទីក្រុងហាណូយស្ទើរតែគ្មានមនុស្សតាមផ្លូវ។ អ្នកធ្វើដំណើរតាមទោចក្រយានយន្ត ក៏ត្រូវបានគេមើលឃើញពាក់អាវដៃវែងផងដែរ ដើម្បីការពារស្បែករបស់ពួកគេពីកម្ដៅព្រះអាទិត្យដ៏ក្ដៅដោយផ្ទាល់។ លោកឌីញវ៉ាន់ហ៊ើយ( Dinh Van Hieu)វ័យ៥៤ ឆ្នាំ អ្នករត់ស៊ីក្លូ បានប្រាប់សារព័ត៌មាន Reuters កាលពីថ្ងៃអង្គារថា កម្ដៅខ្លាំងបានប៉ះពាល់ដល់អាជីវកម្មរបស់លោក ដោយបន្ថែមថារឿងតែមួយគត់ដែលលោកអាចធ្វើបាន គឺជ្រកនៅក្រោមដើមឈើដើម្បីគេចពីកម្ដៅព្រះអាទិត្យ។ ទីភ្នាក់ងារព្យាករណ៍អាកាសធាតុជាតិរបស់ប្រទេសវៀតណាមបានព្រមានពីហានិភ័យនៃចំហេះព្រៃ ការខ្សោះជាតិទឹក និងការដួសន្លប់ដោយសារកម្ដៅក្ដៅខ្លាំងពេក ។ ប្រភពដដែលនេះ បាននិយាយថា សីតុណ្ហភាពអតិបរិមានៅក្នុងតំបន់មួយចំនួននៃភាគខាងជើង និងកណ្តាលប្រទេសវៀតណាម មានចាប់ពី៤០,២ ដល់៤៤ អង្សាសេ ក្នុងរយៈពេលប៉ុន្មានថ្ងៃកន្លងមកនេះ ដោយបន្ថែមថាសីតុណ្ហភាពនឹងមិនធ្លាក់ចុះទេ រហូតដល់ដើមខែឧសភានេះ ៕

ហ្ស៊កហ្ស៊ី ត្រូវបានចលាចលដោយសារការប៉ះទង្គិចគ្នាជុំវិញសេចក្ដីស្នើច្បាប់ ភ្នាក់ងារបរទេស

នគរបាលបង្ក្រាបកុបកម្មនៅក្នុងប្រទេសហ្ស៊កហ្ស៊ី បានបាញ់ឧស្ម័នបង្ហៀរទឹកភ្នែក និងកាណុងបាញ់ទឹក ដើម្បីបំបែកហ្វូងមនុស្សកំពុងតវ៉ាប្រឆាំងសំណើច្បាប់នេះ ដែលក្រុមប្រឆាំងមើលឃើញថា សំដៅលើសេរីភាពសារព័ត៌មាន។ ក្រុមបាតុករបានគប់ស៊ុត និងដបទឹកលើកងកម្លាំងនគរបាលនៅខាងក្រៅសភាក្នុងរដ្ឋធានី ប៊ីលីស៊ី (Tbilisi)។ ក្រុមមនុស្សបានដកថយ ប៉ុន្តែការប៉ះទង្គិចគ្នានៅតែបន្តនៅលើវិថី រ៉ាស្តាវ៉េលី(Rustaveli)កាលពីល្ងាចថ្ងៃអង្គារទី៣០ខែមេសា។មនុស្សមួយចំនួនត្រូវបានរាយការណ៍ថាបានរងរបួស និងត្រូវបានឃុំខ្លួន។កាលពីថ្ងៃទី១៧មេសា កន្លងទៅសមាជិកសភាបានផ្តល់ការគាំទ្រដំបូងចំពោះសំណើច្បាប់ស្ដីពីភ្នាក់ងារបរទេស។ នៅក្រោមច្បាប់ដែលស្នើឡើងដោយគណបក្សកាន់អំណាចក្ដីសុបិនហ្ស៊កហ្ស៊ី (Georgian Dream) បណ្ដាអង្គការមិនមែនរដ្ឋាភិបាល (NGOs) និងប្រព័ន្ធផ្សព្វផ្សាយឯករាជ្យដែលទទួលបានមូលនិធិលើសពី ២០% ពីម្ចាស់ជំនួយបរទេស នឹងត្រូវចុះបញ្ជីជាអង្គការទទួលផលប្រយោជន៍ពីអំណាចបរទេស។ ពួកគេក៏ នឹងត្រូវបានត្រួតពិនិត្យដោយក្រសួងយុត្តិធម៌របស់ហ្ស៊កហ្ស៊ីផងដែរ ហើយអាចត្រូវបានបង្ខំឱ្យចែករំលែកព័ត៌មានរសើប ឬប្រឈមការពិន័យជាប្រាក់រហូតដល់ ២៥.០០០ ឡារីហ្ស៊កហ្ស៊ី ស្មើ៩.៤០០ដុល្លារអាមេរិក ។ការអនុម័តច្បាប់នេះនៅក្នុងអំណានលើកដំបូងរបស់ខ្លួនបានបង្កឱ្យមានការតវ៉ាតាមដងផ្លូវជាបន្តបន្ទាប់។ សេចក្តីរាយការណ៍របស់ប្រព័ន្ធផ្សព្វផ្សាយបាននិយាយថា កាលពីថ្ងៃអង្គារសប្ដាហ៍នេះ អ្នកតវ៉ាជាច្រើននាក់បានរងរបួសក្នុងអំឡុងការប៉ះទង្គិចគ្នានៅក្នុងរដ្ឋធានីប៊ីលីស៊ី ៕

សហជីពអាហ្សង់ទីន ធ្វើកូដកម្មប្រឆាំងនឹងកំណែទម្រង់ការងាររបស់រដ្ឋាភិបាល

សហជីពគ្រាប់ធញ្ញជាតិផលិតប្រេង និងសហជីពកម្មករដែនសមុទ្ររបស់ប្រទេសអាហ្សង់ទីន បានធ្វើកូដកម្មកាលពីថ្ងៃចន្ទ (២៩ មេសា) ដើម្បីតវ៉ាចំពោះសេចក្ដីស្នើច្បាប់កំណែទម្រង់ការងារដែលគាំទ្រដោយប្រធានាធិបតីសេរីនិយមជ្រុលនិយម លោក ហាវីយេ មីឡៃ (Javier Milei) ខណៈដែលសមាជិកសភាបានចាប់ផ្តើមការជជែកដេញដោលលើសំណើច្បាប់នោះ។អាហ្សង់ទីន គឺជាប្រទេសនាំចេញសណ្តែកសៀងកែច្នៃដ៏សំខាន់មួយរបស់ពិភពលោក ហើយប្រាក់ចំណូលបានមកពីការនាំចេញទំនិញគឺជាប្រភពរូបិយប័ណ្ណបរទេសដ៏សំខាន់ដែលត្រូវការដើម្បីទូទាត់បំណុល និងហិរញ្ញវត្ថុសម្រាប់ការនាំចូលរបស់រដ្ឋាភិបាលដែលកំពុងជាប់គាំងលើបញ្ហាសាច់ប្រាក់ ស្របពេលមានការធ្លាក់ចុះនៃសេដ្ឋកិច្ចដ៏យូរ។កូដកម្មបានធ្វើឡើងបន្ទាប់ពីសមាជិកសភានៅក្នុងសភាជាន់ទាបរបស់ប្រទេសអាហ្សង់ទីន បានចាប់ផ្តើមការពិភាក្សាលើសេចក្ដីស្នើច្បាប់កំណែទម្រង់សេដ្ឋកិច្ចដ៏ធំចំនួនពីរ ដែលស្នើឡើងដោយលោកប្រធានាធិបតី មីឡៃ ដែលអំពាវនាវឱ្យធ្វើឯកជនភាវូបនីយកម្ម និងគោលនយោបាយសារពើពន្ធកាន់តែតឹងរ៉ឹង ក៏ដូចជាពន្ធលើប្រាក់ខែខ្ពស់ និងកំណែទម្រង់ការងារ។លោក មីឡៃ បានឡើងកាន់អំណាចកាលពីខែធ្នូ ដោយសន្យាកាត់បន្ថយការចំណាយសាធារណៈ និងទប់ស្កាត់អតិផរណាខ្ពស់ ប៉ុន្តែការជំរុញកំណែទម្រង់របស់លោកបានប្រឈមមុខនឹងការតស៊ូយ៉ាងតឹងរឹងពីគូប្រជែងកណ្តាលនិយមឆ្វេង និងបង្កឱ្យមានបាតុកម្មជាបន្តបន្ទាប់៕

បុរសអ៊ុយក្រែន ៣០នាក់បានស្លាប់ ដោយសារព្យាយាមគេចពីការប្រយុទ្ធ តាំងពីសង្គ្រាមចាប់ផ្តើម

អ្នកនាំពាក្យសេវាព្រំដែនអ៊ុយក្រែន បានប្រាប់ទីភ្នាក់ងារសារព័ត៌មាន យ៉ូគ្រីនហ្វម (Ukrinform) ថា បុរសជនជាតិអ៊ុយក្រែនប្រហែល ៣០ នាក់បានស្លាប់ដោយព្យាយាមឆ្លងព្រំដែនចេញពីប្រទេសអ៊ុយក្រែន ដោយខុសច្បាប់ ដើម្បីគេចចេញពីការប្រយុទ្ធគ្នាក្នុងសង្គ្រាមប្រឆាំងនឹងប្រទេសរុស្ស៊ី ដែលបានចាប់ផ្តើមនៅឆ្នាំ២០២២។លោក អាន់ឌ្រី ដេមឈិនកូ (Andriy Demchenko) បាននិយាយថា «អ្នកខ្លះបានបាត់បង់ជីវិត ខណៈពេលដែលពួកគេព្យាយាមឆ្លងទន្លេ ឬឆ្លងកាត់ភ្នំ ហើយសរុបមក ចាប់តាំងពីការលុកលុយពេញលេញបានចាប់ផ្តើម មនុស្សប្រហែល ៣០ នាក់បានស្លាប់ដោយប៉ុនប៉ងឆ្លងដែនខុសច្បាប់»។ជាមួយនឹងករណីលើកលែងមួយចំនួន បុរសជនជាតិអ៊ុយក្រែនដែលមានអាយុចន្លោះពី ១៨ ទៅ ៦០ ឆ្នាំមិនត្រូវបានអនុញ្ញាតឱ្យចាកចេញពីប្រទេសទេ ព្រោះពួកគេអាចត្រូវបានប្រមូលផ្តុំដើម្បីធ្វើជាកងកម្លាំងប្រយុទ្ធ នេះបើយោងតាមច្បាប់អាជ្ញាសឹករបស់ប្រទេសអ៊ុយក្រែន។ លោក ដេមឈិនកូ បាននិយាយថា ចាប់តាំងពីការចាប់ផ្តើមនៃសង្រ្គាមមក ឆ្មាំល្បាតព្រំដែនបានរកឃើញក្រុមឧក្រិដ្ឋជនប្រហែល ៤៥០ ក្រុមដែលបានប៉ុនប៉ងរត់ពន្ធមនុស្សឆ្លងកាត់ព្រំដែនដោយខុសច្បាប់។កាលពីដើមខែមេសា លោក ដេមឈិនកូ បានប្រាប់ទូរទស្សន៍រដ្ឋរបស់អ៊ុយក្រែនថា ជាមធ្យមបុរសប្រហែល ១០ នាក់ ដែលព្យាយាមចាកចេញពីអ៊ុយក្រែនដោយខុសច្បាប់ ត្រូវបានបញ្ឈប់ជារៀងរាល់ថ្ងៃ៕

អាមេរិកអះអាងថា អង្គភាពចំនួន៥របស់អ៊ីស្រាអែល បានរំលោភសិទ្ធិមនុស្ស មុនថ្ងៃទី ៧ ខែតុលា

ក្រសួងការបរទេសរបស់សហរដ្ឋអាមេរិក បាននិយាយថា ក្រសួងបានអះអាងថា អង្គភាពកងកម្លាំងសន្តិសុខអ៊ីស្រាអែលចំនួនប្រាំ បានរំលោភសិទ្ធិមនុស្សយ៉ាងធ្ងន់ធ្ងរ មុនខែតុលា ឆ្នាំមុន នៅពេលដែលជម្លោះជាមួយក្រុមហាម៉ាសបានចាប់ផ្តើម។ប្រព័ន្ធផ្សព្វផ្សាយរបស់សហរដ្ឋអាមេរិក បានរាយការណ៍ថា អង្គភាពរបស់អ៊ីស្រាអែល បានធ្វើទារុណកម្ម និងបំពានលើពលរដ្ឋប៉ាឡេស្ទីន នៅក្នុងតំបន់ West Bank ដែលកាន់កាប់ដោយអ៊ីស្រាអែល។ ច្បាប់របស់សហរដ្ឋអាមេរិក បានហាមឃាត់មិនឱ្យផ្តល់ជំនួយយោធាដល់អង្គភាពកងកម្លាំងសន្តិសុខបរទេស នៅពេលដែលមានព័ត៌មានគួរឱ្យទុកចិត្តពាក់ព័ន្ធក្នុងការរំលោភសិទ្ធិមនុស្សធ្ងន់ធ្ងរ។ប្រព័ន្ធផ្សព្វផ្សាយរបស់សហរដ្ឋអាមេរិក បានរាយការណ៍ថា ទីក្រុងវ៉ាស៊ីនតោន អាចផ្អាកជំនួយយោធាដល់អង្គភាពកងកម្លាំងការពារជាតិអ៊ីស្រាអែល។ របាយការណ៍នេះ បានធ្វើឲ្យមានការឆ្លើយតបយ៉ាងម៉ឹងម៉ាត់ពីនាយករដ្ឋមន្ត្រីអ៊ីស្រាអែល លោក Benjamin Netanyahu។ច្បាប់របស់សហរដ្ឋអាមេរិក អនុញ្ញាតឱ្យមានការលើកលែងឡើយ។ ជំនួយផ្នែកយោធាអាចត្រូវបានផ្តល់ឲ្យ ប្រសិនបើរដ្ឋមន្ត្រីការបរទេសកំណត់ថា រដ្ឋាភិបាលរបស់កងកម្លាំងសន្តិសុខដែលពាក់ព័ន្ធនឹងចាត់វិធានការប្រកបដោយប្រសិទ្ធភាព ដើម្បីនាំអ្នកទាំងឡាយណាដែលទទួលខុសត្រូវទៅកាន់តុលាការ។

បណ្ដាញសង្គម

ព័ត៌មានថ្មីៗ

លោក Araghchi ៖ អ៊ីរ៉ង់មិនទុកចិត្តអាមេរិកទេ ហើយពួកគេនឹងចរចាបើសិនវាជាបញ្ហាធ្ងន់ធ្ងរ

រដ្ឋមន្ត្រី៖ ហ្វីលីពីននឹង «ពិតជា» គោរពតាមសំណើរបស់ ICC ដើម្បីចាប់ខ្លួនសមាជិកព្រឹទ្ធសភា

កិច្ចពិភាក្សា BRICS បញ្ចប់ដោយគ្មានសេចក្តីថ្លែងការណ៍រួម ជាការបង្ហាញពីភាពរកាំរកូស ដោយសារសង្គ្រាមនៅអ៊ីរ៉ង់

UN ៖ ការគំរាមកំហែងគ្រោះទុរ្ភិក្សកើតមាននៅភាគខាងត្បូងប្រទេសូម៉ាលី លុះត្រាតែបង្កើនជំនួយមនុស្សធម៌

លោក Trumpនិយាយថា នាយករដ្ឋមន្រ្តីប្រឈមហានិភ័យនយោបាយដោយសារគ្មានវិធានការលើបញ្ហាអន្តោប្រវេសន៍ និងថាមពល

លោក Trump៖ ចិនប្តេជ្ញាចិត្តទិញយន្តហោះ Boeing រហូតដល់ ៧៥០គ្រឿង

រដ្ឋមន្ត្រីការបរទេសអ៊ីរ៉ង់៖ សហរដ្ឋអាមេរិកមានឆន្ទៈបន្តការចរចា និងបើកចំហ ចំពោះជំនួយពីចិន

រញ្ជួយដីកម្រិត ៦,៣រ៉ិចទ័រ កើតមាននៅភាគខាងជើងនៃប្រទេសជប៉ុន

ក្រសួងសុខាភិបាល ប្រគល់-ទទួលរថយន្តគិលានសង្គ្រោះចំនួន ១០គ្រឿង ដែលជាហិរញ្ញប្បទានឥណទានរបស់ធនាគារអភិវឌ្ឍន៍អាស៊ី (ADB Loan)

តំបន់ភាគខាងកើតឥណ្ឌា មើលឃើញកង្វះខាតប្រេងកើនឡើង ដោយសារសង្រ្គាមអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877